CLOSE WINDOW

H280
བོད་ཡིག

/ //rgya gar skad du/ AR+ya maM ga la aSh+Ta kaM nA ma ma hA yA na sU tra/ bod skad du/ 'phags pa bkra shis brgyad pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das yangs pa na a mra srung ba'i tshal na bzhugs so/ /de nas li tsa bI'i bu rtsal rab bcom ldan 'das ga la ba der song ste phyin nas/ bcom ldan 'das kyis zhabs la mgo bos phyag btsal te/ bcom ldan 'das la 'di skad ces gsol to/ /bcom ldan 'das/ de bzhin gshegs pa dgra bcom pa yang dag par rdzogs pa'i sangs rgyas gang la la sngon gyi smon lam phun sum tshogs pa dag bzhugs pa/ bcom ldan 'das/ gang dag thos na bdag gis spyi bos bkur zhing gang dag bdag gis spyi bos bkur bas mi'am/ mi ma lags pa las 'jigs pa'am/ gtse ba 'byung bar mi 'gyur ba dang / bcom ldan 'das/ bdag rgyal po'i pho brang du mchis te/ smra brjod pa na ci nas gang gis kyang smra ba la zlog pa mi bgyid cing zil gyis mi non pa dang / mtshan de dag nyid bdag 'dzin na gnyid kyis log na'ang sdig pa'i rmi lam rmi bar mi 'gyur ba dang / bdag mtshon cha gzas pa'i g.yul gyi nang du zhugs na'ang lus la mtshon cha rnams phog par mi 'gyur la/ de las bde bar thar par yang 'gyur ba de dag bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis yongs su bstan du gsol/ /de skad ces gsol nas/ bcom ldan 'das kyis li tsa bI'i bu rtsal rab la 'di skad ces bka' stsal to/ /rtsal rab/ shar phyogs na 'jig rten gyi khams grags ldan zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas sgron ma'i rgyal po zhes bya ba bzhugs so/ /rtsal rab/ shar phyogs na 'jig rten gyi khams skyo ba med pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas rtsal brtan don grub dgongs pa zhes bya ba bzhugs so/ /rtsal rab/ shar phyogs na 'jig rten gyi khams bde ldan zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas kun la dgongs pa rgya cher grags pa can zhes bya ba bzhugs so/ /rtsal rab/ shar phyogs na 'jig rten gyi khams bgegs med pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas byams pa'i rgyan gyi dpal zhes bya ba bzhugs so/ /rtsal rab/ shar phyogs na 'jig rten gyi khams chad pa spangs pa zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas dge bar grags pa dpal dam pa zhes bya ba bzhugs so/ /rtsal rab/ shar phyogs na 'jig rten gyi khams sna tshogs ldan zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas lhun po ltar 'phags pa rtsal rab grags pa'i dpal zhes bya ba bzhugs so/ /rtsal rab/ shar phyogs na 'jig rten gyi khams dpal 'bar ba zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas sems can thams cad la dgongs pa grags pa'i dpal zhes bya ba bzhugs so/ /rtsal rab/ shar phyogs na 'jig rten gyi khams rdo rje grags pa dga' ba can zhes bya ba yod de/ de na de bzhin gshegs pa dgra bcom pa yang dag par rdzogs pa'i sangs rgyas yid tshim par mdzad pa rtsal rab grags pa'i dpal zhes bya ba bzhugs so/ /rtsal rab/ sangs rgyas bcom ldan 'das rnams kyi mtshan 'di dag legs par rab tu gzung bar bya'o/ /kun chub par bya'o/ /bcang bar bya'o/ /rtsal rab/ sangs rgyas bcom ldan 'das thams cad ni yon tan bsam gyis mi khyab pa dang ldan mod kyi/ 'on kyang rtsal rab/ de bzhin gshegs pa dgra bcom pa yang dag par rdzogs pa'i sangs rgyas 'di dag gi sangs rgyas kyi zhing ni yongs su dag pa ste/ snyigs ma rnams dang bral ba yin no/ /rtsal rab/ khyod kyis gang gi tshe de bzhin gshegs pa dgra bcom pa yang dag par rdzogs pa'i sangs rgyas 'di dag gi mtshan rnams blangs nas 'dzin na des yon tan gyi khyad par de dag dang gzhan dag tu'ang 'gyur te/ sangs rgyas bcom ldan 'das rnams kyi mtshan 'di dag ni sngon gyi smon lam gyi yon tan dang ldan pa yin pa'i phyir ro/ /nub mo srod la nyal na'ang khyod kyis mtshan 'di dag bsam par bya'o/ /ldang ba na'ang bsam par bya'o/ /'jig rten gyi bya ba gang ci'ang rung ba dag rtsom pa dag na'ang thams cad la mtshan 'di dag bsam nas de'i 'og tu brtsams na der yang khyed la 'phel ba nyid du 'gyur gyi 'grib par ni ma yin par shes par bya ste/ 'dis khyod gnas par gyis shig /de nas li tsa bI'i bu rtsal rab kyis bstan pa 'di thos nas tshim zhing mgu la yi rangs te/ rab tu dga' nas dga' ba dang / yid bde ba skyes te/ de bzhin gshegs pa rnams kyi mtshan 'di dag yongs su brjod cing rin po che sna bdun gyi me tog brgyad stong gis bcom ldan 'das la mngon par gtor te bskor pa'ang byas nas/ de bzhin gshegs pa'i mtshan yongs su brjod pa bkra shis brgyad pa'i chos kyi rnam grangs 'di bzung ste bcom ldan 'das kyi thad nas song ngo // de nas lha rnams kyi dbang po brgya byin 'khor de nyid du 'dus par gyur nas 'dug pa des bcom ldan 'das la phyag btsal nas/ bcom ldan 'das la 'di skad ces gsol te/ bcom ldan 'das/ bdag gis kyang de bzhin gshegs pa'i mtshan yongs su brjod pa bkra shis brgyad pa'i chos kyi rnam grangs 'di nyams su blangs lags so/ /bcom ldan 'das kyis bka' stsal pa/ kau shi ka /de'i phyir khyod kyis lha dang / lha ma yin g.yul 'gyed pa na chos kyi rnam grangs 'di yongs su brjod par bya'o/ /yongs su brjod pa na lha'i dbang po khyod rgyal bar 'gyur ro/ /de ci'i phyir zhe na/ de bzhin gshegs pa'i mtshan yongs su brjod pa gang yin pa 'di ni bde zhing 'jigs pa med par yongs su brjod pa yin pa'i phyir ro/ / mtshan yongs su brjod pa gang yin pa 'di ni kun nas ldang ba med par yongs su brjod pa yin pa'i phyir ro/ /de bzhin gshegs pa'i mtshan yongs su brjod pa gang yin pa 'di ni yang dag pa'i mtshan yongs su brjod pa yin pa'i phyir ro/ /de bzhin gshegs pa'i mtshan yongs su brjod pa gang yin pa 'di ni g.yul thams cad las yang dag par 'das par yongs su brjod pa yin pa'i phyir ro/ /de bzhin gshegs pa'i mtshan yongs su brjod pa gang yin pa 'di ni zil gyis mi non par yongs su brjod pa dang / zhi bar yongs su brjod pa dang yongs su gdung ba med par yongs su brjod pa dang / 'jigs pa med par yongs su brjod pa yin pa'i phyir ro/ /de nas lha rnams kyi dbang po brgya byin gyis chos kyi rnam grangs 'di la mchod pa'i phyir/ bcom ldan 'das la lha'i me tog man+dA ra ba dag gis mngon par gtor nas/ bcom ldan 'das kyi zhabs la mgo bos phyag btsal te lan gsum bskor ba byas nas yid dga' ba dang / sems dge ba dang / sems sgrib pa med pa dang / sems kun nas ldang ba med pa dang / de bzhin gshegs pa'i mtshan yongs su brjod pa'i chos kyi rnam grangs 'di yid la byed bzhin du slad kyis kyang bdag gis bcom ldan 'das kyi zhal mthong bar gyur cig ces tshig tu smras nas/ sum cu rtsa gsum gyi lha rnams dang lhan cig tu bcom ldan 'das kyi thad nas dong ngo / /bcom ldan 'das kyis de skad ces bka' stsal nas/ li tsa bI'i bu rtsal rab dang / lha rnams kyi dbang po brgya byin dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa bkra shis brgyad pa zhes bya ba theg pa chen po'i mdo rdzogs so// //rgya gar gyi mkhan po su ren+d+ra bo d+hi dang / zhus chen gyi lo tsA ba ban+d+he ye shes sdes bsgyur cing zhus te gtan la phab pa/

CLOSE WINDOW