བོད་ཡིག |
420a7 / //rgya gar skad du/ AR+ya many+dzu shrI bi ha ra na ma ma hA yA na sU tra/ bod skad du/ 'phags pa 'jam dpal gnas pa zhes
420b1 bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das rgyal po'i khab
420b2 na bya rgod kyi phung po'i ri la dge slong lnga brgya tsam gyi dge slong gi dge 'dun chen po dang / byang chub sems dpa'i dge 'dun chen po dang yang thabs gcig tu bzhugs te/ de nas
420b3 bcom ldan 'das phye ma red kyi dus kyi tshe nang du yang dag 'jog las bzhengs nas 'khor mang pos yongs su bskor cing mdun gyis bltas nas chos ston to/ /de nas 'jam
420b4 dpal gzhon nur gyur pa 'chag cing dge slong lnga brgya po thams cad kyi gnas khang nas gnas khang du byung ste/ gnas brtan shA ri'i bu'i gnas khang ga la ba der song ste phyin
420b5 nas| 'jam dpal gzhon nur gyur pas gnas brtan shA ri'i bu gcig pu dben par 'dug ste nang du yang dag bzhag nas bsam gtan byed par mthong ngo / /mthong nas kyang gnas
420b6 brtan shA ri'i bu la 'di skad ces smras so/ /btsun pa shA ri'i bu/ khyod bsam gtan byed dam/ smras pa/ 'jam dpal/ de bzhin no/ /'jam dpal gyis smras pa/ ci btsun pa shA
420b7 ri'i bu/ khyod nyon mongs pa spangs pa rnams spang ba'i phyir bsam gtan byed dam/ 'on te ma spangs pa rnams spang ba'i phyir bsam gtan byed/ ci btsun pa shA ri'i bu/ khyod 'das pa
421a1 la gnas te bsam gtan byed dam/ 'on te ma 'ongs pa la gnas te bsam gtan byed dam/ 'on te da ltar byung ba la gnas te bsam gtan
421a2 byed| ci btsun pa shA ri'i bu/ khyod gzugs la gnas te bsam gtan byed dam/ 'on te tshor ba dang / 'du shes dang / 'du byed rnams dang / rnam par shes pa la gnas te
421a3 bsam gtan byed/ ci btsun pa shA ri'i bu/ khyod mig la gnas te bsam gtan byed dam/ 'on te rna ba dang / sna dang / lce dang / lus dang / yid la gnas te bsam gtan
421a4 byed| ci btsun pa shA ri'i bu/ khyod gzugs la gnas te bsam gtan byed dam/ 'on te sgra dang / dri dang / ro dang / reg bya dang / chos rnams la gnas te bsam gtan byed/
421a5 ci btsun pa shA ri'i bu/ khyod 'dod pa'i khams la gnas te bsam gtan byed dam/ 'on te gzugs kyi khams dang / gzugs med pa'i khams la gnas te bsam gtan
421a6 byed| ci btsun pa shA ri'i bu/ khyod nang la gnas te bsam gtan byed dam/ 'on te phyi rol la gnas te bsam gtan byed dam/ 'on te phyi nang la gnas te bsam gtan
421a7 byed| ci btsun pa shA ri'i bu/ khyod lus la gnas te bsam gtan byed dam/ 'on te sems la gnas te bsam gtan byed/ shA ri'i bus smras pa/ 'jam dpal/
421b1 'di ltar tshe 'di la bde bar gnas par bya ba dang / brjed pa med par gnas par bya ba'i phyir te de lta bu'i phyir bsam gtan byed do/ /'jam dpal gyis smras pa/ btsun
421b2 pa shA ri'i bu/ chos gang dag tshe 'di la bde bar gnas pa'am/ tshe 'di ma yin pa la bde bar gnas pa'am/ brjed pa med pa'i chos de dag dmigs sam/ shA ri'i bus
421b3 smras pa/ 'jam dpal/ bdag gis chos gang dag tshe 'di la bde bar gnas pa'am/ tshe 'di ma yin pa la bde bar gnas pa'i chos de dag yang dag par rjes su mi mthong zhing
421b4 mi dmigs mod kyi/ 'on kyang / 'jam dpal/ de bzhin gshegs pas nyan thos rnams la rab tu dben pa'i chos su gsungs pa gang yin pa de la bdag brten cing gnas so//
421b5 'jam dpal gyis smras pa/ btsun pa shA ri'i bu/ gang de bzhin gshegs pas nyan thos rnams la rab tu dben pa'i chos su gsungs pa gang yin/ btsun pa shA ri'i bu/ gang
421b6 la rten cing gnas/ shA ri'i bus smras pa/ 'jam dpal/ 'di la dge slong ni 'das pa la rten cing gnas so/ /ma 'ongs pa la rten cing gnas so/ /da ltar byung ba la rten cing
421b7 gnas so/ /de bzhin du sbyar te sems kyi bar la rten cing gnas par khong du chud par bya ste/ 'jam dpal/ chos de dag ni de bzhin gshegs pas nyan thos rnams la rab tu dben
422a1 par gsungs pa yin te/ bdag chos de dag la rten cing gnas so/ /'jam dpal gyis smras pa/ btsun pa shA ri'i bu/ gang gi phyir/ 'di skad ces/
422a2 'das pa la rten cing gnas/ ma 'ongs pa la rten cing gnas/ da ltar byung ba la rten cing rab tu dben pa la gnas pa nas de bzhin du sbyar te/ sems kyi bar la rten cing rab tu
422a3 dben pa la gnas shing smra/ btsun pa shA ri'i bu/ 'di lta ste/ gang 'das pa'i de bzhin nyid de'ang yod pa ma yin/ gang ma 'ongs pa'i de bzhin nyid de'ang yod pa ma yin/
422a4 gang da ltar byung ba'i de bzhin nyid de'ang yod ma yin te/ de ltar chos de dag ni yod pa ma yin na/ ji ltar/ gnas brten shA ri'i bu/ de 'di skad ces/ 'das pa la rten cing gnas
422a5 ma 'ongs pa la rten cing gnas/ da ltar byung ba la rten cing gnas zhes smra/ yod pa ma yin pa'i chos la ni gnas pa med do/ /yang btsun pa shA ri'i bu/ 'das pa'i de bzhin nyid
422a6 dang | ma 'ongs pa dang / da ltar byung ba'i de bzhin nyid gang yin pa de ni tsa'ang ma yin/ gang gis kyang ma yin/ gang gi 'ang ma yin/ gang la'ang mi gnas te/ gang mi
422a7 gnas pa de'i gnas dmigs su med do/ /yang btsun pa shA ri'i bu/ gang 'das pa dang / ma 'ongs pa dang / da ltar byung ba'i de bzhin nyid ces brjod cing kun tu gnas
422b1 nas smra ba de dag ni de bzhin gshegs pa la skur pa 'debs pa'o/ /de ci phyir zhe na/ 'di ltar de bzhin nyid ni g.yo ba med pa rlom sems med pa'o/ /'di ltar de bzhin nyid ni nyams
422b2 pa med pa'o/ /'di ltar de bzhin nyid ni stong pa'o/ /mtshan ma med pa'o/ /smon pa med pa'o/ /yang btsun pa shA ri'i bu/ gang 'das pa'i de bzhin nyid de'ang dmigs su med/ gang
422b3 ma 'ongs pa'i de bzhin nyid de'ang dmigs su med/ gang da ltar byung ba'i de bzhin nyid de'ang dmigs su med pa nas de bzhin du sbyar te/ sems kyi bar gyi rang bzhin nyid de'ang
422b4 dmigs su med do/ /'on kyang / btsun pa shA ri'i bu/ de bzhin nyid ma gtogs par gang bstan pa'am/ rab tu bshad par nus pa'i chos gzhan gang yang mi dmigs so/ /shA ri'i
422b5 bus smras pa/ 'jam dpal/ de bzhin gshegs pa de bzhin nyid la bzhugs nas chos ston tam/ 'jam dpal gyis smras pa/ btsun pa shA ri'i bu/ de bzhin nyid yod pa
422b6 ma yin na/ ji ltar de bzhin gshegs pa de bzhin nyid la bzhugs te chos ston/ btsun pa shA ri'i bu/ chos kyang yod pa ma yin na/ ji ltar de bzhin gshegs pa de bzhin nyid la
422b7 bzhugs te chos ston/ de bzhin gshegs pa'ang yod pa ma yin na/ ji ltar de bzhin gshegs pa de bzhin nyid la bzhugs te chos ston/ chos thams cad kyang yod pa ma yin te
423a1 dmigs su med/ de bzhin gshegs pa'ang yod pa ma yin te dmigs su med do/ /de'i chos bstan pa ni 'di 'dra ste/ 'di la dmigs pa'am/ mi
423a2 dmigs pa gnyis kyis rab tu phye ba med do/ /de bzhin gshegs pa ni brjod pa'am mi brjod pas rab tu phye ba ma yin no/ /de ci'i phyir zhe na/ btsun pa shA ri'i bu/ 'di ltar de
423a3 bzhin gshegs pa ni brjod pa yang dag par chad pa/ btags pa med pa/ gdags par bya ba ma yin pa'o/ /shA ri'i bus smras pa/ 'jam dpal/ su zhig chos bstan pa 'di lta bu
423a4 'di'i snod du 'gyur/ 'jam dpal gyis smras pa/ btsun pa shA ri'i bu/ gang 'dus byas kyi khams rnam par 'khrugs par mi 'gyur zhing yongs su mya ngan las 'da' bar 'dod par
423a5 yang mi 'gyur ba de ni chos bstan pa 'di lta bu 'di'i snod du 'gyur ro/ /gang 'das pa'i chos rnams mi dmigs shing 'das pa'i chos rnams kun shes par mi 'gyur ba dang / gang
423a6 'das pa dang / ma 'ongs pa dang / da ltar byung ba'i chos rnams mi dmigs shing 'das pa dang / ma 'ongs pa dang / da ltar byung ba'i chos rnams kun shes par mi 'gyur ba de chos
423a7 bstan pa 'di lta bu 'di'i snod du 'gyur ro/ /gang kun nas nyon mongs pa dang / rnam par byang ba mi mthong zhing de nye bar len par yang mi 'gyur ba de chos bstan pa 'di lta bu
423b1 'di'i snod du 'gyur ro/ /gang bdag dang / bdag med par yang spyod par mi 'gyur ba dang / gang len pa dang / 'dor bar yang spyod par yang mi 'gyur ba de chos bstan pa 'di lta bu
423b2 'di'i snod du 'gyur te/ de ni bshad pa 'di'i don kun shes par 'gyur ro/ /shA ri'i bus smras pa/ 'jam dpal/ 'di la ci zhig kun shes par 'gyur/ 'jam dpal gyis
423b3 smras pa/ btsun pa shA ri'i bu/ bshad pa 'di'i don shes par 'gyur ba ci zhig yod na/ 'di la ci zhig kun shes par 'gyur zhes de skad 'dri/ shA ri'i bus smras pa/ 'jam
423b4 dpal/ chos zab mo bstan pa 'di mngon sum du 'gyur ba nyung / 'di ni yongs su 'dzin par 'gyur ba nyung ngo / /'jam dpal/ dgra bcom pa dang / slob pa dang / mi slob
423b5 pa rnams kyang phyogs 'di la sgyid lug par 'gyur na byis pa so so'i skye bo rnams lta ci smos/ 'jam dpal gyis smras pa/ btsun pa shA ri'i bu/ dgra bcom pa rnams
423b6 la ni sa med do/ /de ci'i phyir zhe na/ 'di ltar dgra bcom pa'ang med na sa gang la dgra bcom pa gnas par 'gyur/ dgra bcom pa dag ni gnas med pas rab tu phye
423b7 pa'o| |dgra bcom pa dag ni dmigs su med pas rab tu phye ba'o/ /dgra bcom pa dag ni brjod pa dang / mi brjod pa shin tu chad pas rab tu phye ba'o/ /de ci'i phyir zhe na /
424a1 'di ltar dgra bcom pa dag ni brjod pa dang / mi brjod pa yang dag par chad pa ste btags pa med pa'o/ /dgra bcom pa dag ni sar dbye ba dang
424a2 bral ba/ 'dus ma byas kyis rab tu phye ba/ 'jug pa med pa/ 'dus ma byas kyis rab tu phye ba ste/ dgra bcom pa dag ni 'dus ma byas pa/ gnas pa med pa yin na ci
424a3 zhig dgra bcom pa dag gi sar 'gyur/ dgra bcom pa dag ni ming dang / gzugs kyis rab tu phye ba ma yin no/ /byis pa so so'i skye bo rnams ni ming dang / gzugs la rnam par
424a4 rtog go/ ming dang / gzugs de'ang rtog pa med cing rnam par rtog pa med par dgra bcom pa rnams kyis shes te/ de'i phyir dgra bcom pa dag ni ming dang / gzugs kyis
424a5 rab tu phye ba ma yin no/ /byis pa rnams kyang mi dmigs/ byis pa'i chos dang / dgra bcom pa dang / dgra bcom pa'i chos rnams kyang mi dmigs so/ /nam mi
424a6 dmigs pa de'i tshe na mi rtog go /kun tu mi spyod do/ /de spyod pa med/ spros pa med cing nye bar zhi ste/ yod do zhes khas mi len/ med do zhes khas mi len/ yod
424a7 kyang yod la med kyang med do zhes khas mi len/ yod pa'ang ma yin/ med pa'ang ma yin zhes de skad kyang khas mi len to/ /nam khas mi len pa de na dmigs
424b1 pa med do/ /de dmigs pa thams cad dang bral bas sems med cing sems dang bral te gnas med pa'i tshul gyis dge sbyong gi chos la gnas pa zhes bya'o/ /de nas 'jam
424b2 dpal gzhon nur gyur pas bstan pa 'di bshad pa na 'khor de'i dge slong lnga brgya po stan las langs nas/ 'di skad ces/ 'jam dpal gzhon nur gyur pa la mi blta'o/ /'jam
424b3 dpal gzhon nur gyur pa la mi mnyan to/ /'jam dpal gzhon nur gyur pa phyogs gang na gnas pa'i phyogs de'ang spang bar bya'o/ /de ci'i phyir zhe na/ 'di ltar 'jam
424b4 dpal gzhon nur gyur pa ni ston pa mngon sum du gyur bzhin du kun nas nyon mongs pa dang / rnam par byang ba mtshan nyid gcig tu ston pas chos ma yin pa smra'o zhes
424b5 brjod nas de dag yang 'di snyam du sems te/ bdag cag ji ltar bcom ldan 'das kyis legs par gsungs pa'i chos 'dul ba la tshangs par spyod pa spyad snyam nas dong
424b6 ngo| |de nas gnas brtan shA ri'i bus 'jam dpal gzhon nur gyur pa la 'di skad ces smras so/ /'jam dpal/ khyod 'di ltar sems can rnams kyis chos kun shes
424b7 par gyur par bya ba'i phyir chos mi ston tam/ 'jam dpal gyis smras pa/ btsun pa shA ri'i bu/ de bzhin no/ /shA ri'i bus smras pa/ dge slong lnga brgya po de dag stan
425a1 las langs nas 'phya smod/ mi snyan par zer zhing dong ngo / /'jam dpal gyis smras pa/ btsun pa shA ri'i bu/ gang gi phyir dge slong lnga brgya po de
425a2 dag 'di skad ces/ 'jam dpal gzhon nur gyur pa la mi blta'o/ /'jam dpal gzhon nur gyur pa la mi mnyan to/ /'jam dpal gzhon nur gyur pa gang na gnas pa'i
425a3 phyogs de'ang spang bar bya'o zhes zer ba de ni legs so/ /legs so/ /shA ri'i bu/ dge slong de dag gi tshig de ni legs par smras pa'o/ /de ci'i phyir zhe na/ 'di ltar
425a4 'jam dpal gzhon nur gyur pa ni yod pa ma yin te dmigs su med do/ /gang yod pa ma yin te dmigs su med pa de la blta ba dang / mnyan par mi nus so/ /'jam dpal
425a5 gzhon nur gyur pa phyogs gang na gnas pa'i phyogs de'ang spang bar bya'o/ /de ci'i phyir zhe na/ 'jam dpal gzhon nur gyur pa yod pa ma yin te dmigs su med pas gang
425a6 de'i gnas kyang yod pa ma yin te dmigs su med do/ /gang yod pa ma yin te dmigs su med pa de ni bsten par bya ba ma yin no/ /de nas dge slong lnga brgya po de dag
425a7 'jam dpal gzhon nur gyur pas bstan pa 'di thos pa dang / slar sa phyogs der log nas 'jam dpal gzhon nur gyur pa la 'di skad ces smras so/ /'jam dpal/
425b1 bdag cag ni ji ltar khyod kyis bstan pa de ltar mi shes so/ /'jam dpal gyis smras pa/ dge slong dag /legs so/ /legs so/ /de lta bu ni ston pa'i nyan thos rnams kyis
425b2 bya ba ste/ dge slong dag/ 'di la ni kun shes par bya ba med/ rnam par shes par bya ba med do/ /de ci'i phyir zhe na/ 'di ltar chos kyi dbyings 'di ni gnas med pa'i tshul
425b3 gyis gnas pa nyid do/ /chos kyi dbyings gang yin pa de dbyings ma yin no/ /de ni yod pa ma yin te dmigs su med cing g.yo ba med la 'chi 'pho med do/ /gang g.yo ba med
425b4 cing 'chi 'pho med pa de kun shes par bya ba ma yin/ rnam par shes par bya ba ma yin no/ /gang kun shes par bya ba dang / rnam par shes par bya ba'i rlom sems med pa
425b5 de ni ston pa'i nyan thos zhes bya/ mchog thob pa zhes bya/ gtso bo zhes bya/ sbyin gnas zhes bya'o/ /bstan pa 'di bshad pa na dge slong lnga brgya po de dag las dge slong bzhi
425b6 brgya ni len pa med par zag pa rnams las sems rnam par grol lo/ /dge slong brgya ni sems cher 'khrugs nas lus de nyid dang sems can dmyal ba chen po du 'bod
425b7 du lhung ngo / /de nas tshe dang ldan pa shA ri'i bus 'jam dpal gzhon nur gyur pa la 'di skad ces smras so/ /'jam dpal/ khyod sems can rjes su bsrung ba'i chos mi ston
426a1 pas dge slong brgya po de dag chud zos te ngo mtshar byas so/ /de nas bcom ldan 'das kyis gnas brtan shA ri'i bu la 'di skad ces bka' stsal
426a2 to| |shA ri'i bu/ khyod de skad ma zer cig/ de ci'i phyir zhe na/ shA ri'i bu/ dge slong brgya po de dag sems can dmyal ba chen po du 'bod du reg pa thang cig reg nas dga'
426a3 ldan gyi lha rnams dang skal ba mnyam par skya bar 'gyur ro/ /shA ri'i bu/ gal te dge slong de dag gis chos kyi rnam grangs 'di ma thos su zin na de dag gdon mi za bar
426a4 sems can dmyal bar 'gro bar 'gyur te/ las de zad nas mir skye bar 'gyur ba zhig na de dag gis chos kyi rnam grangs 'di la brten pas bskal par sems can dmyal ba
426a5 myong bar 'gyur ba'i las de'ang cung zad cig myong bar byas so/ /shA ri'i bu/ de'i phyir dge slong brgya po de dag de bzhin gshegs pa byams pa'i nyan thos thog ma 'dus par
426a6 dgra bcom pa zag pa zad par 'gyur ro/ /shA ri'i bu/ de lta bas na chos kyi rnam grangs 'di som nyi dang bcas pas thos na ni dam pa yin gyi/ bsam gtan bzhi la snyoms
426a7 par zhugs pas ni de lta ma yin/ tshad med pa bzhis ni de lta ma yin/ gzugs med pa'i snyoms par 'jug pa bzhi bsgoms pas ni de lta ma yin no/ /de ci'i phyir zhe na/
426b1 chos kyi rnam grangs 'di lta bu ma thos pas 'khor ba las yongs su ma grol/ skye ba dang / rga ba dang / na dang / 'che ba dang / mya ngan dang / smre sngags 'don pa dang / sdug bsngal ba dang /
426b2 yid mi bde ba dang / 'khrug pa rnams las yongs su ma grol zhes bshad do/ /de nas tshe dang ldan pa shA ri'i bus 'jam dpal gzhon nur gyur pa la 'di skad ces smras so/ /
426b3 'jam dpal/ 'di ltar sems can yongs su smin par bya ba'i phyir khyod kyis chos kyi rnam grangs 'di legs par bshad pa ngo mtshar to/ /'jam dpal gyis smras pa/ btsun
426b4 pa shA ri'i bu/ de bzhin nyid ni 'bri ba ma yin/ 'phel ba ma yin/ chos kyi dbyings kyang 'bri ba ma yin/ 'phel ba 'ang ma yin no/ /sems can gyi khams kyang 'bri ba ma yin/
426b5 'phel ba ma yin/ kun nas nyon mongs pa ma yin/ rnam par byang ba ma yin no/ /de ci'i phyir zhe na/ 'di ltar de dag ni yod pa ma yin zhing dmigs su med de tha snyad tsam du zad
426b6 pas ci'ang ma yin/ gang gis kyang ma yin/ gang gi'ang ma yin/ gang la'ang mi gnas te gnas pa med do/ /btsun pa shA ri'i bu/ gang 'di lta bu'i mi 'gag pa de
426b7 ni byang chub bo/ /byang chub gang yin pa de ni thar pa'o/ /thar pa gang yin pa de ni rnam par mi rtog pa'o/ /gang rnam par mi rtog pa de ni mi byed cing 'gyur ba med do/ /gang mi byed
427a1 cing 'gyur ba med pa de ni yongs su mya ngan las 'das pa'o/ /de nas bcom ldan 'das kyis gnas brtan shA ri'i bu la 'di skad ces bka'
427a2 stsal to/ /shA ri'i bu/ 'jam dpal gzhon nur gyur pas ji skad bstan pa de bzhin te/ de bzhin nyid ni 'bri ba ma yin/ 'phel ba ma yin no/ /chos kyi dbyings
427a3 kyang 'bri ba ma yin/ 'phel ba ma yin no/ /sems can gyi khams kyang 'bri ba ma yin/ 'phel ba ma yin/ kun nas nyon mongs pa ma yin/ rnam par byang ba ma yin
427a4 no| |de ci'i phyir zhe na/ 'di ltar de dag yod pa ma yin zhing dmigs su med de tha snyad tsam du zad pas ci'ang ma yin/ gang gis kyang ma yin/ gang gi yang ma yin/
427a5 gang la'ang mi gnas te gnas pa med do/ /de nas bcom ldan 'das kyis de'i tshe tshigs su bcad pa 'di dag bka' stsal to/ /'das pa dag dang ma 'ongs dang / /
427a6 da ltar byung chos brjod pa ni/ /don gyis ma yin tha snyad tsam/ /gcig dang sna tshogs mtshan nyid min/ /mtshan nyid med par gang rtog pa/ /de dag nyid na mtshan
427a7 nyid 'gyur/ /mtshan nyid med la rtog pa med/ /rtog pa nyid kyang mtshan nyid min/ /'dus ma byas la gang rtog dang / /mya ngan 'das la gang rtog pa/ /gnyis ga
427b1 bdud kyi las yin zhes/ /de ni mkhas pa rnams kyis bshad/ /phung po skye mched khams kyi rnams/ /de dag ming gis brjod pa ste/ /ming dang skye med gang yin pa/ /de gnyis
427b2 mtshan nyid gcig pa yin/ /tshul bzhin la ni gang rtog pa/ /de nyid tshul bzhin ma yin no/ /mkhas pa cung zad mi rtog ste/ /stong pa ji bzhin spyod yul lo/ /gang dag
427b3 rtog pa de dag g.yo/ /rtog pa med pa g.yo ba med/ /rtog pa rnams ni g.yo bar 'gyur/ /rtog pa med pa mya ngan 'da'/ /gang gis rang bzhin 'di shes pa/ /de ni
427b4 ye shes ldan zhes bya/ /de phyir zad pa rjes su thob/ /de ni rtog med ye shes so/ /ye shes kyis ni ye shes brjod/ /ye shes brjod pa rnams kyang gsog /ye shes
427b5 'di ltar gang bzod pa/ /de ni ye shes ldan zhes bya/ /gang gis stong gsum 'di dag rnams/ /rin chen bkang ste byin pa bas/ /gang gis dam chos 'di 'dra la//
427b6 bzod pa de ni bzod pa mchog /bskal pa bye ba bsam yas su/ /sbyin dang tshul khrims bzod pa dang / /brtson 'grus bsam gtan bsnyen pas ni/ /mdo sde 'di dang
427b7 mtshungs ma yin/ /chos 'di dang ni theg pa 'di/ /yang dag rdzogs pa'i sangs rgyas gsungs/ /mdo sde 'di la bsten byas na/ /thams cad de bzhin gshegs
428a1 par 'gyur/ /chos kyi rnam grangs 'di bshad pa na srog chags 'bu ma ni chos rnams la chos kyi mig rdul dang bral zhing dri ma med par rnam par
428a2 dag go /dge slong lnga brgya ni len pa med par zag pa rnams las sems rnam par grol lo/ /gzugs na spyod pa'i lha'i bu brgyad khri ni bla na med pa yang dag par rdzogs pa'i
428a3 byang chub tu sems bskyed nas de dag thams cad bskal pa skar ma lta bu zhes bya ba la bla na med pa yang dag par rdzogs pa'i byang chub mngon par rdzogs par 'tshang
428a4 rgya bar 'gyur te/ de dag thams cad kyang 'di ltar de bzhin gshegs pa dgra bcom pa yang dag par rdzogs pa'i sangs rgyas me tog ces bya bar ming mthun par
428a5 'gyur ro zhes bcom ldan 'das kyis lung bstan to/ /bcom ldan 'das kyis de skad ces bka' stsal nas/ 'jam dpal gzhon nur gyur pa dang / tshe dang ldan
428a6 pa shA ri'i bu dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /
428a7 'phags pa 'jam dpal gnas pa zhes bya ba theg pa chen po'i mdo rdzogs so// //rgya gar gyi mkhan po su re n+d+ra bo d+hi dang / zhus chen gyi lo tsA ba
ban+de ye shes sdes bsgyur cing zhus te gtan la phab pa/
CLOSE WINDOW