CLOSE WINDOW

H190
བོད་ཡིག

/ //rgya gar skad du/ AR+ya brah+ma shrI byA ka ra Na nA ma mahA yA na sU tra/ bod skad du/ 'phags pa tshangs pa'i dpal lung bstan pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na dge slong gi dge 'dun mang po dang thabs cig tu bzhugs so/ /de nas bcom ldan 'das snga dro sham thabs dang / chos gos gsol te lhung bzed bsnams nas mnyan yod kyi grong khyer du bsod snyoms la gshegs so/ /yang de'i tshe mnyan yod kyi grong khyer gyi phyi rol na byis pa phal po che dag sa rdul gyi khyim dang / sa rdul gyi ra ba dang / sa rdul gyi khang pa brtsegs pa dag gis rtse zhing 'khod pa las byis pa phal po che de dag gis thag ring po zhig nas bcom ldan 'das gshegs pa mthong ngo / /mthong nas kyang lhag par dga' ba dang / rab tu dga' ba dang / yid bde ba skyes te rtse dga' zhing 'khod do/ /de nas bcom ldan 'das khye'u de dag la thugs brtse ba'i phyir gang na khye'u de dag rtse zhing 'khod pa'i sa phyogs der gshegs so/ /de nas byis pa de dag gi nang nas khye'u tshangs pa'i dpal zhes bya ba zhig bcom ldan 'das kyi zhabs la phyag btsal nas/ bcom ldan 'das kyi spyan sngar 'dug go /de nas bcom ldan 'das kyis mkhyen bzhin du byis pa de dag la 'di skad ces bka' stsal to/ /byis pa/ khyod 'di na ci byed/ de skad ces bka' stsal pa dang / bcom ldan 'das la khye'u de dag gis 'di skad ces gsol to/ /bcom ldan 'das/ bdag cag 'di na sa rdul gyi khyim dag dang / sa rdul gyi ra ba dag dang / sa rdul gyi khang pa brtsegs pa dag gis rtse zhing mchis lags so/ /de nas bcom ldan 'das la khye'u tshangs pa'i dpal gyis 'di skad ces gsol to/ /bcom ldan 'das/ bdag la thugs brtse ba'i slad du sa rdul gyi khang pa brtsegs pa 'di bzhes su gsol de nas bcom ldan 'das kyis khye'u tshangs pa'i dpal gyi lhag pa'i bsam pa dang / dga' ba'i sems thugs su chud nas thugs brtse ba'i phyir sa rdul gyi khang pa brtsegs pa de bzhes so/ /de nas sangs rgyas kyi mthus skad cig de dang / yud tsam de la sa rdul gyi khang pa brtsegs pa de rin po che sna bdun las grub pa'i khang pa brtsegs pa zhig tu gyur nas/ bcom ldan 'das kyi spyan snga na 'dug par gyur te/ de'i shar phyogs kyi ngos su ni gser gyi ka ba brgyad khri bzhi stong zug par gyur/ lho phyogs kyi ngos su ni dngul gyi ka ba brgyad khri bzhi stong zug par gyur/ nub phyogs kyi ngos su ni bai DUR+ya'i ka ba brgyad khri bzhi stong zug par gyur/ byang phyogs kyi ngos su ni shel gyi ka ba brgyad khri bzhi stong zug par gyur to/ /de nas de'i tshe khye'u tshangs pa'i dpal gyis rdzu 'phrul gyi cho 'phrul de mthong nas lhag par yang ches dga' ba dang / mchog tu dga' ba rgya chen po skyes par gyur to/ /da nas bcom ldan 'das la khye'u tshangs pa'i dpal gyis tshigs su bcad pa 'di dag gsol to/ /kye ma 'jig rten mgon po yis/ /rdzu 'phrul shin tu rgya chen bstan/ / bdag nyid la ni thugs brtse'i phyir/ /sangs rgyas kyis ni rdzu 'phrul bstan/ /drang srong che la bdag gis ni/ /sa rdul khang brtsegs phul ba de/ /rin po che las grub par gyur/ /kye ma sangs rgyas bsam mi khyab/ /kye kye zhing ni 'di 'dra ba/ /sangs rgyas zhing ni bla med dang / /mig med mig ni nyams pa dang / /shes rab chung ngus mi shes so/ /rkang gnyis dam pa 'gro ba'i zhing / /'di ni bdag gis rnyed pa dang / /dal ba rab dkon thob pas na/ /byang chub tu ni smon lam gdab/ /bdag kyang 'dren pa khyod kyi ni/ /yon tan rjes su slob par tshal/ /bla med byang chub thob nas ni/ /rdzu 'phrul 'di 'dra bdag gis bgyi/ /de nas de'i tshe bcom ldan 'das kyis 'dzum pa mdzad nas bcom ldan 'das kyi zhal gyi sgo nas 'od zer kha dog sna tshogs 'di lta ste/ sngon po dang / ser po dang / dmar po dang / dkar po dang / btsod ka dang / shel gyi kha dog dang / dngul gyi kha dog lta bu dag byung ngo / /de dag byung nas tshangs pa'i 'jig rten gyi bar du song ste/ yang slar log nas bcom ldan 'das la lan gsum bskor ba byas te/ bcom ldan 'das kyi dbu'i gtsug tor du nub par gyur to/ / de nas bcom ldan 'das la tshe dang ldan pa kun dga' bos tshigs su bcad de gsol pa/ rgyal mchog 'dren pa 'gro ba'i gtso bo rnams/ /rgyu ma mchis par 'dzum pa mi mdzad na/ /thugs rje ldan pa 'jig rten sman slad du/ /deng 'dir ci phyir 'dzum mdzad bdag la gsungs/ /de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ /kun dga' bo/ khyod kyis khye'u tshangs pa'i dpal 'di mthong ngam/ gsol pa/ bcom ldan 'das/ mthong lags so/ /bcom ldan 'das kyis bka' stsal pa/ kun dga' bo/ khye'u 'di dge ba'i rtsa ba 'di dang / sems kyi smon pa 'dis ni bskal pa sum stong nyis brgya'i bar du nam yang sems can dmyal bar 'gro bar mi 'gyur ro/ /des byang chub bsgrubs nas de bzhin gshegs pa dgra bcom pa yang dag par rdzogs pa'i sangs rgyas 'jig rten las mngon par 'phags pa zhes bya bar 'gyur ro/ /zhes gsungs so/ /de nas bcom ldan 'das kyis de'i tshe tshigs su bcad pa 'di dag bka' stsal to/ /sangs rgyas la ni dad pa yis/ /bsod nams chung ngu skye mi 'gyur/ /chos mchog thos dang dge 'dun la/ /gus par byas pa'ang de bzhin no/ /sangs rgyas la ni dad pa la/ /byang chub thob par dka' ba med| |de phyir byang chub 'dod pas 'dir/ /'jig rten 'dren pa mchod par bya/ /kun dga' khye'u 'di rkang gnyis kyi/ /mchog ste dpal dang ldan pa yi/ /mngon par 'phags pa zhes bya ba/ /'jig rten gyi ni 'dren par 'gyur/ /de ltar sangs rgyas bsam mi khyab/ /sangs rgyas chos kyang de bzhin te/ /bsam mi khyab la dad pa yi/ /rnam par smin pa'ang de bzhin no/ /bcom ldan 'das kyis de skad ces bka' stsal nas/ tshe dang ldan pa kun dga' bo dang / khye'u tshangs pa'i dpal bcom ldan 'das kyis gsungs pa la yi rangs te mngon par bstod do/ /'phags pa tshangs pa'i dpal lung bstan pa zhes bya ba theg pa chen po'i mdo rdzogs so// //rgya gar gyi mkhan po bi shud+d+ha sid+ha dang / lo tsA ba ban+de dge ba dpal gyis bsgyur/ rgya gar gyi mkhan po bid+yA ka ra sid+hi dang /

CLOSE WINDOW