CLOSE WINDOW

Gpb054.012
བོད་ཡིག

/ thig le 'dus pa man ngag gi rgyud rdzogs so// // A ti rdzogs pa chen po'i rgyud bzhugs so// @##// rgya gar skad du/ ad+hi san+ti ma hA tan+t+ra/ bod skad du/ a ti rdzogs pa chen po'i rgyud/dpal kun tu bzang po la phyag 'tshal lo// 'di skad bdag gis thos pa'i dus gcig na/ byang chub shing drung gnas mchog tu/ sprul sku dga' rab rdo rje ni/ me tog pad+ma'i gdan la bzhugs// sangs rgyas lus kyi rgyan yang rdzogs// phyag mtshan 'gyur med rdo rje bsnams// zhi dang khro ba'i mtshan mchog mnga'// snying rje chen pos gzhan don mdzad// chos dang yul la dmigs pa yis// snying rjes 'gro ba'i don yang mdzad// thabs kyi sgo nas thams cad 'dul// byin rlabs nyi ma'i 'od ltar 'char/ khu byug gsung 'dra dus tshod 'dzin// thams cad rang la rdzogs pa'i dus// brda dang sgra dang tshig dang don gyis bsdus// e ma ho/ yang gsang rmad du byung ba'o// a ti rdzogs pa'i rgyud las ston pas gleng slang ba'i le'u ste dang po'o//// de nas 'jam dpal bshes gnyen gyis// kyai ston pa dga' rab rdo rje lags// rgyud kyi ngo bo bstan du gsol// zhes zhus pas/ thugs rgyud zhal brgyud zhus lan gsum gsal// dgongs te gsum nyid rnam par gsungs// chos gsum phun sum tshogs pas rgyud ces bya// zhes gsungs pas/de'i don 'di bstan du gsol ces zhus pas/ thugs su rgyud pa kun bzang rgyud// zhal nas gsungs pa'i rgyud dag ni// rdo rje sems dpas gsungs pa'o// zhus lan phra med 'phel rgyas rgyud// dga' rab rdo rje bdag gi bshad// byin brlabs nyi ma'i 'od ltar shar// skyes bu'i thugs la gang shar ba// kun tu bzang po'i thugs rgyud rdzogs// snang la rang bzhin med pa'i don// chu zla'i dkyil 'khor lta bur bshad// sgyu ma lta bu'i gsung gi brgyud// rdo rje sems dpa'i zhal brgyud rdzogs// dpal ldan sangs rgyas pad+ma'i nang// skyes pa'i tshul gyis skur bstan pa// byin brlabs dug la sngags ltar shar// 'phel rgyas phra men rgyud 'di rdzogs// zhes gsungs so// a tI'i rdzogs pa'i rgyud las/ rgyud kyi zhus lan gyi le'u ste gnyis pa'o//// de nas yang zhus pa/ rgyud lung 'brel par bshad par zhu/ zhes gsungs pas/ gsung gi bsgyur zhing gang mtshon pa// skyes bu rgyal po'i bka' lung rdzogs// byin gyis brlabs kyi thugs dag la// nges pa'i shes pa skyed pa 'di// skyes bu'i rgyal po'i byin lung rdzogs// skyes bu gdams pa'i lung phog pas// nges par byin brlabs phra men lung yang rdzogs// snying po'i don la bkol ba med// rang byung ye shes 'pho 'gyur med// rig pa'i ye shes g.yo ba med// rang rig ye shes 'gag pa med// thig le'i ye shes skye 'gag med// don de thugs la gang 'dzin pa// skyes bu nga'i bka' lung rdzogs// rgya chen lung la zab pa rgyud// rgya che rig pa'i snang ba la// zab pa ye shes ngos bzung bshad pa yi// de don nges par bstan pa yin// zhes gsungs so// a ti rdzogs pa'i rgyud las/ rgyud lung sbag tu bshad pa'i le'u ste gsum pa'o//// de nas bka' stsal pa/ thig le nyag cig zhig tu bshad pa dang// gnyis su bshad pa dang// gsum du bshad pa dang/ bzhi dang lnga ru bshad pa bstan du gsol zhes zhus pas// bka' stsal pa/ thig le nyag cig zhig tu bshad pa ni/ thig le nyag cig ye shes chen po ste/ rgya che lta ba la zla'i don du bshad pa yang// gzhi ma dngos po'i gnas lugs la// rtogs dang ma rtogs gnyis su med// sangs rgyas sems can gnyis su med// dag dang ma dag gnyis su med// snang dang ma snang gnyis su med// bsgom dang mi sgom gnyis su med// skyon dang yon tan gnyis su med// thabs dang thig le rang snang la// gnyis su 'dzin pa 'khrul pa yin// rgya che nam mkha' lta bu yin// phyogs 'tshams sgrubs pas ga la grub// thams cad phyogs med khyab brdal la// rnam rtog blo yi ga la slod// ldongs bas nam mkha' ga la snyegs// grang nad can gyi skyes bu la// ga bur dug du nges par 'gyur// blo chung shes rab chung ba la// nyag cig bstan pas lkug par 'gyur// e ma ho/ thams cad gcig pa la/ sgro btags chos kun thig ler cig/ sna tshogs thig le nyag cig dang// zhes gsungs so// a ti rdzogs pa'i rgyud las/thig le rgya che ba ru bshad pa'i le'u ste bzhi pa'o//// thig le zab par bshad par zhu zhes zhus pas/ bka' stsal pa/ zab cing yangs la rgya che ba// zab mo sangs rgyas dgongs pa ste// de dag nyams su len pa la// thig le gnyis su bshad par bya// snang ba ma 'gags thig le'i rgyan// rol pa yin par shes par bya// rig pa ye shes ma 'gags rtsal// 'gag pa med par shes par bya// snang ba thig le'i gnas du ma shes pa// mngal kha rgya yis gang la thebs// snang ba stong par bsgoms pas bsam ngo yid smon yul// rig pa ye shes gnad du ma shes na// 'gyu ba stong par bsgoms pas rig pa rkyang sgoms yin// nyan thos gang zag bdag med rtogs dang khyad par med// 'gro drug g.yang sa chod par ga la 'gyur// rta brgyugs 'drog la me tog chod pa bzhin// gang ltar bltas pas ye shes shar na sangs rgyas dgongs pa yin// thabs shes gnyis ni btsun mo zo chu khyud mo 'dra// rnam rtog ye shes gnyis ni me la shing bsnan 'dra// ye shes gnad du gzir na rgya mtsho nya mo 'dra// ye shes byin brlabs mun pa'i nyi ma 'dra// ma dres rang sar gnas pa za 'og snal bu 'dra// ces gsungs so// a ti rdzogs pa'i rgyud las/ ye shes dang rnam rtog gnyis brdar bstan pa'i le'u ste lnga pa'o//// thig le gsum du bshad pa ni// gzhi dang lam dang 'bras bu gsum// gzhi lam rnam gsum shes bya ste// dbyings kyi thig le stong pa la// ye shes thig le gsal la 'tsher// rtsal gyi thig le ljang la sgram// 'du 'gro las kyi thig le// bkod pa rgyan gyi thig le// gnyis med rang gsal gyi thig le// lam gyi thig le rnam gsum ste// rang snang 'od zer gyi thig le la chags pa sna tshogs skye ba e ma ho// rig pa rtsal gyi thig le la/ zhen pa dngos por shar ba e ma ho// dbyer med snying po'i thig le la// gnyis snang nyams su myong bas 'bras bu sna tshogs su grub pa e ma ho// 'bras bu'i thig le rnam gsum ste// lhun grub rtogs pa'i thig les thas cad mkhyen// rang byung rang la snang ba'i thig les bde chen rang la shar// rgyun gyi thig les byin brlabs la rgyun chad med// snang ba rnam shes yid dang gsum// 'khor ba sangs rgyas gnas lugs gsum// rgyu dang lam dang 'bras bu gsum// byin brgyud snyan brgyud thugs brgyud gsum// snying po 'od dang zer dang gsum// rno dang myur dang zab dang gsum// brtan dang rgya che phra dang gsum// man ngag gdams ngag snyan brgyud gsum// thig le gsum du bshad pa'o// zhes gsungs so// a ti rdzogs pa'i rgyud las/ zab mo gsum du bshad pa'i le'u ste drug pa'o//// yang bka' stsal pa/ zab mo bzhi ru bstan pa bshad du gsol// zhes zhus pas/ bka' stsal pa/ dngos po gcig la bzhir dbye ba// le'u dag gi dpe bzhin no// dpe dang don dang tshig dang ni// brda yi dgrol bar bshad pa'o// chos kyi sku yi don dang ni// rang snang longs spyod rdzogs pa'i sku// spyir yang sprul pa'i sku la ngo sprad pas// de'i yon tan ngo bo nyid kyi sku// ye shes bzhi'i don kyang rang sor 'brel// 'byung ba lnga ni chos sku'i brda// shing spags me ni ga la 'byung// rnam rtog med na ye shes ga la skye// rnam rtog ye shes yin na bka' rgyud zab mo gang la dgos// 'bad pa med par ye nas grol// sprul pa'i sku la rnam rtog skyes nas ye shes gsal// dper na me la shing bsnan 'dra// zung du zhugs pas longs spyod rdzogs pa'i sku// ji ltar spyad kyang zad pa med// ngo bo nyid kyi sku'i ngang du gnas// ye grol bzhi yi sku bzhi de// rgya che ba'i don du bshad pa yin// zab mo nyams su len na rang grol sku bzhi'i ngo sprod na// rnam rtog wal gyi skyes pa'i dus nyid na// rang rig ye shes ngo sprod kyis// rnam rtog dwangs nas ye shes gsal// 'gyu ba med na ye shes ga la gsal// 'gyu ba dwangs pas ye shes gsal// rang grol sprul pa'i sku'i ngo sprod yin// rang grol long sku'i ngo sprod ni// 'gyu ba dang pas 'od gsal la// lha ne brtan par gnas pa de// de ni long sku'i ngo sprod do// 'gyu ba 'od gsal gnyis su med// gang gi phyogs su ma lhung pa// de ni chos sku'i ngo sprod yin// thig le ye shes zang thal la// rgyu dang rkyen gyis ma skyed par// rang bzhin shugs kyi shar ba de// ngo bo nyid kyi sku'i ngo sprod yin/ zhes gsungs so// a ti rdzogs pa'i rgyud las/ thig le bzhi sbyor ngo sprod kyi le'u ste bdun pa'o//// de nas yang bka' stsal pa/ thig le lnga sbyor bshad pa ni// dbyings kyi thig le 'od gsal ba// rang byung ye shes mal du gzhug/ ye shes thig le chen po de// rig pa'i ye shes ma bu sprad// gnyis su snang ba'i ye shes de// lhag mthong rig pa'i ye shes kyis// gzung 'dzin thag pa bcad par bya// de ni lhun grub thig le yin// snying po g.yo med ye shes kyis// dang du phrad na bzung 'dzin 'chad// dbyings nyid rnam dag thig le yin// ye shes zang thal chen por bzla// blta ba'i sgong rgya ral pa yin// lhun gyi gnas pa'i thig le yin// sgo lnga chags sdang mdud pa la// lhag mthong rig pa'i ye shes kyis// ral gris bcad de gtang bar bya// snang ba 'od gsal gyi ngo sprod do// dkar dmar 'dod chags kyi mdud pa la// rang byung rang snang gi ye shes kyis// lcag kyus bzung ba gtang par bya// chos sku 'od gsal gyi ngo sprod do// sems 'gyu ba rnam rtog gi mdud pa la// nyams myong sgom pa'i sgong rgya ral// rang rig ye shes kyi ngo sprod byas// snying po ye shes snang med kyis// chags 'dzin sgom pa'i zhen pa spangs// rang snang thig le'i ngo sprod do// yid 'gyus bag chags kyi mdud pa la// 'od gsal gsang lam gyi ngo sprod kyis// rgyas 'debs spyod pa'i sgong rgya ral// rang la shar ba'i 'od gsal skyes// mtshan ma lam gyi gol sa chod// kun gzhi zang thal gyi thig le dang// mtshan ma rang snang gi thig le gnyis// bsres pa med par dkrug gis 'dres// 'bras bu spangs thob dus kyi sgong rgya ral e ma ho// zhes gsungs so// a ti rdzogs pa'i rgyud las/ thig le lnga sbyor du bshad pa'i le'u ste brgyad pa'o//// de nas yang bka' stsal pa/ 'gag gi rnam pa bstan par bya'o zhes gsungs so// sems 'dzin phra mo rtsom pa ni// ye shes zang thal skye ba'i 'gag/ tshogs drug bkag nas dbugs la gtod// chos nyid 'od gsal skye ba 'gag/ dbugs la gtod cing rlung la sbyong// rang byung ye shes skye ba 'gag/ phung po lha dang lha mor sgom// sku yis dam tshig rten pa des// chos sku 'od gsal skye med 'gag/ ngag gi bzlas brjod 'phro 'du sbyong// gsung gi dam tshig rgyun du spyod// des ni rang rig ye shes 'gag/ dam rdzas rnam lnga rgyun du rten// thugs kyi dam tshig rgyun mi gcod// lhag mthong rig pa'i ye shes 'gag/ rgya che lta ba kha 'gyang khyer// 'gyu dwangs ye shes skye ba 'gag/'gag med thig le 'di yin gyis// thug par mos la spyad par gyis// zhes gsungs nas chos nyid rang snang gi dbyings su gshegs so// a ti rdzogs pa'i rgyud las le'u dgu pa'o//// a ti rdzogs pa'i rgyud rdzogs so/

CLOSE WINDOW