CLOSE WINDOW

Gpb048.005
བོད་ཡིག

/ ye shes tshogs kyi rje mo'i rgya// phyag rgya bca' ba'i le'u ste dgu pa'o//// ma mo'i srog rdzogs so//// rgya gar skad du/ badzra b+han d+ha dz+wa la gu h+ya ka pA la dz+nya na ra b+ha shri u tan tra nA ma/ bod skad du/ rdo rje ka pA la b+han d+ha gsang ba 'bar ba'i gzhal yas khang/ gnam zhal 'dzin pa'i yon tan dngos grub ste bar mdzad pa'i rgyud ces bya ba/ bcom ldan 'das dpal 'jigs byed chen po la phyag 'tshal lo// dpal chen po gnam zhal mkha' klong ka pA la 'di'i don zhes bya ba/ khro mo dkar mo mig gcig ma bzhi la sogs pa thugs kyi dgyes sde mo bzhis zhus pa/ de nas bcom ldan 'das dpal 'jigs byed chen pos bka' stsal pa/ b+han d+ha gsang ba ka pA la 'bar ba gsang ba'i rgyud 'di la don rnam pa gnyis sam/ rim pa rnam pa lngas ston te/ de la yang don rnam pa gnyis kyis bstan pa ni// mi gson po rnams la brtag pa dang/ de yang thugs rjes bzung ste don gyis bsgral nas/ b+han d+ha ka pA la nyid kyi don bstan pa dang gnyis so// de la rigs rnam pa lnga bstan pa ni/ bram ze'i rigs dang/ rje rigs dang/ rgyal rigs dang/ dmangs kyi rigs dang/ bud med dang gdol ba'i rigs dang/ rnam pa lnga'i rigs la bud med dmag gdol ba'i rigs kyi b+han d+ha ni/ spra brtag dang spra bzang yang mi bcang bar bya'o// mi gson po rnams la don brtag pa bstan pa ni/ de la brda dang/ rgya skad dang/ sang kri ta dang/ bod skad nyid don to// rgya gar gyi skad du/ ke sa la/ tshe la pra/ kha ta d+ha la/ b+ha ha ku b+hu hu la shri u tra/ zhes bya ste/ mtshan rnam pa lnga tshogs par yod pa ni/ ke sa la zhes bya ste/ skra gnag cing 'tsher la 'jam pa pa'o// tshe la bra zhes bya ste/ smin ma nag la mtshams 'thug pa'o// dkyus ring la mtshams ma chad pa'o/ kha d+ha la zhes bya ste/ rna ba gzhi che la tshogs ma ring ba'o// b+ha ha ku zhes bya ste/ mig dkar khrag 'dug pa'o// b+ha hu la zhes bya ste/ mkhur tshos kyi rus pa mtho ba/ shri u tra zhes bya ste/ bong gzugs dang byad dbyibs legs pa/ sha mdog bag tsam sngo ba/ spyod lam thams cad legs par byed pa'o// yang bsrung mtshams rnam pa gsum dang/ thugs rje'i zhing drug ste/ de la yong bsrung mtshams rnam pa gsum ni/ sku gsung thugs kyi dam tshig tshul bzhin du bsrung ba yin/ de la yang thugs rjes bzung ste bsgral ba'i zhing drug ni/ mgo yi skra kham pa/ mig ni la mig tu 'dug pa/ yan dkan gyi dkyil na mche ba zur gsum pa yod pa/ lag pa bya lag bzhin du 'brel ba/ lce sna rtse ra bsleb pa/ dpral ba'i dbyes na sme ba yod pa/ 'di drug ni bsgral bar bya ba'i zhing drug yin te/ de la yang 'di rnams drug po ni skye ba snga ma la mi lus blangs pa yin no// de ltar mi gson po brtag pa gal che'o// rtags gong ma de tsho yod pa'i thod pa rnyed na ni/ 'jig rten 'di'i yon tan bsam gyis mi khyab ste/ mchog tu rnyed na dngos grub thob bo/ 'jig rten phyi ma la yang bcu gsum yi ge 'khor lo tshogs chen gyi sa non par/ bcom ldan 'das 'jigs byed chen pos bka' stsal to// rdo rje ka pA la gsang ba'i rgyud las/ gleng gzhi'i le'u ste dang po'o//// de nas dgyes sde mo bzhis zhus pa// b+han d+ha ka pA la'i don bstan du gsol// zhes zhus pas/ de nas bcom ldan 'das he ru kas bka' stsal pa/ b+han d+ha ka pA la'i don bstan pa ni/ don rnam pa bcu gsum gyis bstan te/ de bzhin gshegs pa'i rigs kyi zhal don bstan pa dang/ rdo rje rigs kyi kA pa la bstan pa dang/ rin chen rigs kyi ka pA la bstan pa dang/ pad+ma rigs kyi ka pA la bstan pa dang/ las kyi rigs kyi ka pA la bstan pa dang/ bdag nyid bcang du mi rung ba'i don bstan pa dang/ yon bdag dang yon gnas kyi skyon gang la 'ong/ mi 'ongs pa bcad nas brtag pa dang/ zhal bu'i dbyibs dang mdog bstan pa dang/ dum bu'i grangs bstan pa dang/ rtsa ro'i don bstan pa dang/ rogs rnam pa lnga'i don bstan pa dang bcu gsum gyis bstan pa'o/ b+han d+ha kA la 'bar ba'i gsang ba'i rgyud las/ rnam grangs dang rigs bstan pa'i le'u ste gnyis pa'o//// de nas thugs kyi dgyes sde mo bzhis zhus pa/ rigs rnam pa lnga'i b+han d+ha kA pa la gsang ba'i don bstan du gsol// zhes zhus pas/ de nas bcom ldan 'das he ru kas bka' stsal pa// de la de bzhin gshegs pa'i rigs kyi zhal bu ni/ yid tsam zur gsum pa dum bu gcig pa/ dum bu yang nang gi ri mo tsug srubs la ya yod med par 'dug pa/ rtsa dang rim thams cad khug tu 'khyil ba/ rdzas dang 'khor lo rtsibs brgyad dkyil na gsal bar snang ba/ yang na tsakra ha gsum gsal bar yod pa/ ri mo thams cad 'jam pa nyung bar 'dug pa'o// ngan par gsal ba gang yang med pa/ kha sbub nas phyi rol nas bltas na/ 'tshogs ma shin tu 'bur ba/ bag tsam zur yod pa 'dra ba/ gang nas bltas kyang legs pa de ni bsgrubs par bzang ngo// las drag po thams cad 'grub bo// lcang lo can du 'dug na yang/ de'i mtshan ni yang dag don ldan b+han d+ha lcang lo can zhes bya ste/ bud b+ha rigs kyi rnam zhal ma'i zhal bu/ dpal chen po'i gnam zhal yin par shes par bya'o// ka pA la b+han d+ha 'bar ba gsang ba'i rgyud las/ de bzhin gshegs pa'i rigs kyi zhal bu brtag pa ste le'u gsum pa'o//// de nas bcom ldan 'das he ru kas/ rdo rje'i rigs kyi kA pa la b+han d+ha zhal bu bka' stsal pa/ zlum la dum bu gsum pa/ nang gi ri mo 'jam la nyung ba/ gtsug tu gnam zhal chen po'i rtsa sgril ma zang thal du byung ba/ rdzas la rdo rje gsal bar yod pa/ yig 'bru badzra gsal bar yod pa/ yang na ma dang/ dza dang ra gsum gsal bar yod pa/ ngan par gsal ba gang yang med pa/ kha sbub nas phyi rol nas bltas te/ ltag pa'i bdud sgo'i rus pa 'bar ba/ sprul pa 'bur bar snang ba ste/ gang nas bltas kyang legs pa/ des rdo rje rigs kyi thams cad myur bar 'grub pa/ lcang lo can du 'dug na yang/ ra med don thob b+han d+ha lcang lo can zhes bya'o// rdo rje rigs kyi zhal bkra shis zhal bu ste/ dkar mo mig gcig ma'i gnam zhal du zhes par bya'o// ka pA la b+han d+ha gsang ba'i rgyud las/ rdo rje rigs kyi zhal bu bstan pa ste le'u bzhi pa'o//// de nas thugs kyi dgyes sde bzhis zhus pa// rin chen rigs mchog zhal bu bkra shis phun sum tshogs pa gsung du gsol/ zhes zhus so// de nas yang bka' stsal pa/ rin chen rigs kyi ka pA la bkra shis g.yung drung rang 'byung b+han d+ha ni/ yid tsam ljong la dum bu gnyis pa/ nang gi ri mo 'jam la mang ba/ lcang lo'i ljon shing lta bur 'dug pa/ 'jam la ri mo mang ba/ dkyil na bum pa'i nor bu rin po che gsal bar yod pa/ yang na sa dang yig 'bru gsal bar yod pa// ngan pa'i mtshan ma gang yang med pa// kha sbub nas phyi rol nas bltas na 'tshogs ma'i dus dkyus ring ba/ gang nas bltas na legs pa ste/ de la rin chen rigs kyi zhal bu mtshan ldan las thams cad myur du 'grub bo// lcang lo can du 'dug na yang/ mtshan ri 'dod pa'i yon tan g.yung drung 'grub byed dpal ldan lcang lo can zhes bya ste/ nag mo mche gtsigs mo'i zhal bur shes par bya'o// zhes he ru kas bka' stsal to// ka pA la b+han d+ha gsang ba'i rgyud las/ le'u lnga pa'o//// de nas dmar mo thugs kyi dgyes sde mos zhus pa// pad+ma rigs gnam zhal ma'i don ji ltar lags/ zhes zhus pas/ bka' stsal pa/ pad+ma rigs kyi g.yung drung ka pA la/ yid tsam zla kham dum bu bzhi pa/ nang gi ri mo thams cad 'jam la thung ba/ ri mo gang yang pad+ma'i dbyibs su 'dug pa/ spyir na ri mo bags kyi nyung ba/ rdzas kyi gzugs la rtsa las pad+ma 'dab brgyad du 'dug pa/ yi ge oM gsal bar yod pa/ ngan par gsal ba gang yang med pa/ kha sbub nas bltas na/ rna ba g.yas pa bag tsam 'bur bar gsal ba'o// de ni lcang lo can du 'dug na'ang/ ka pA la b+han d+ha gsang ba'i rgyud las/ pad+ma rigs kyi zhal bu brtag pa ste le'u drug pa'o//// de nas yang thugs kyi dgyes sde mo bzhis zhus pa/ las kyi rigs kyi gnam zhal gyi don bstan du gsol// zhes zhus pas/ bka' stsal pa/ las kyi rigs kyi zhal bu ni/ yid tsam gru bzhi pa/ rdo rje rgya gram gyi dbyibs su 'dug pa/ ri mo thams cad 'jam la yid tsam nyung ba/ rtsa'i ri mo la rdzas su gsal ba'i rdo rje rgya gram yod pa/ yig 'bru ha gsal bar yod pa/ yang nang nga dang gsum gsal bar yod pa/ ngan par gsal ba gang yang med pa/ kha sbub nas bltas nas/ ltag pa'i rig pa 'bur 'bur gnyis yod pa/ gnya' chu bo'i shong shul 'bur gsum yod pa/ gang nas bltas kyang legs par snang ba ste/ lcang lo can du 'dug na yang/ b+han d+ha thogs med dpal ldan lcang lo can zhes bya ste/ de ni las rnam bzhi 'grub/ las kyi rigs kyi gnam zhal ka pA la/ las thams cad myur du 'grub pa'o// de yang lcang lo can du 'dug na/ zhal bu de'i mtshan ni bkra shis don ldan dpal ldan ka pA lcang lo can zhes bya'o// sor mo las mkhan mo'i nal bur shes par bya'o// zhal bu dum bu lnga pa gong ma de rnams kyis ni/ las dang bsgrub pa gang la yang gal shin tu yang che ste/ de'i nang nas kyang shin tu che ste/ de'i nang nas kyang shin tu bsgrub pa la sogs pa dang/ ma mo bsgrub pa dang/ yang dag me 'bar dgu pa'i bsgrub pa'i dkyil 'khor gyi rdzas su shes par bya'o// b+han d+ha ka pA la 'bar ba gsang ba'i rgyud las/ le'u bdun pa'o//// de nas yang bka' stsal pa/ gzhan yang gang rung rung du bab chol du spyad du mi rung ste/ dam tshig nyams pa'i rgyu yin/ de nas bcang du rung mi rung gnyis las/ bcang du rung ba'i ka pa la rnams kyi zhal bu la brtag ste/ ji ltar 'dod pa'i spra yod pa'i ka pA la dbyibs legs pa/ lce ste gser ram spram 'dra ba/ mkhregs te gnam lcags 'dra ba/ 'thug pa glang po cha'i rgyab 'dra ba/ mdog ni dngul chu zhun ma blug pa lta bu/ rtsa dang ri mo gong du smos pa'i ka pA la rdo rje'i zhal bu'i ri mo dang 'dra ba/ rang ji ltar 'dod pa yod pa de lta bu ni/ nor gyi sar mar dkar la mtheb mo bzhag pa 'dra ba yod pa de ni/ yid bzhin gyi nor bu rin po che yin te bcang du rung/ b+han d+ha ka ba la ni rdzas dang zhal bu yin pas/ rjes su 'jug pa'i phyi rabs kyi rnal 'byor ba rnams kyis kyang/ dper na pha'i nor bu rin po che bu la bzhag pa lta bu'o// nor bu sdig bzang po bzhin du/ rin po che'i snod legs par bsal ste/ dus dus su rang gi yi dam byed pa dang/ sngags kyis kha sgo mchod pa byas na/ rnal 'byor pa de la ni 'jig rten 'dir tshe ring ba dang/ nad med pa dang bkra shis pa dang/ rigs brgyud 'phel ba dang/ chos mkhan du 'gyur te/ rdo rje rgyal po la thob ste/ nor rdzas 'dul ba la sogs te/ ji ltar bsam pa bzhin du 'grub/ ces dpal he ru kas bka' stsal to// rdo rje ka pA la b+han d+ha gsang ba'i rgyud las/ bcang du rung ba'i brtag pa'i le'u ste brgyad pa'o//// de nas yang thugs kyi dgyes sde mo bzhis zhus pa/ ka pA la'i dam rdzas bcang du rung mi rung de'i don ji ltar bya/ zhes zhus pas/ bka' stsal pa/ rdzas rnams gong ma rdo rje ka pA la'i b+han d+ha de lta bu de ni gang rung rung du dam tshig la 'dres pa dang/ dam tshig med pa dang/ dam tshig nyams pa la mi bstan par byas te/ tshul bzhin du bcangs nas/ dam tshig ma nyams par byas nas/ 'jig rten phyi ma la yangs nyi shu rtsa gcig non par he ru ka nyid kyis bka' stsal par bshad do// ka pA la gsang ba'i rgyud las/ dam tshig med pa la mi bstan pa'i le'u ste dgu pa'o//// de nas thugs kyi dgyes sde mo bzhis dris te zhus pa/ dam tshig nyams pa ji ltar 'gyur/ zhes zhus pas/ de la he ru kas bka' stsal pa/ nyon cig thugs kyi dgyes sde rnams/ gal te dam tshig nyams nas sa ma non na yang/ chos mkhan chen po rdo rje rgyal po 'am/ rgyal thebs kyi sa non por 'gyur ro// tha ma yang bram ze'i rigs sam/ rigs bzang ste btsun par skye bar bka' stsal to// rdo rje ka pA la b+han d+ha 'bar ba gsang ba'i rgyud las/ le'u bcu pa'o//// de nas yang bka' stsal pa/ gcang du mi rung ba'i zhal bu ka pA la ni/ gson po tsa na bzang ba'i rtags gang kyang med par/ ka pA la'i zhal bu'i brtag pa ngan pa'i rtags bstan te/ dbyibs shin tu ma legs pa yon por 'dug pa dang/ zhom pa'am 'bar 'bur mang ba/ gang nas bltas kyang ma legs pa/ dum bu drug pa'am/ bdun pa dang/ brgyad pa dang/ dgu pa dang/ bcu pa la sogs par 'dug pa/ mdog ma legs te rul pa 'dra ba'i ser khog ba 'am/ skya khog pa ste/ lhag par skya ser ba dang/ sngo nag tu 'dug pa/ gro ba/ 'jis pa dang/ dgra bo dag la byas na shis/ rus pa dum bu bdun pa dang brgyad pa ru/ dgra bo'i ming dang/ rus pa dang/ nyungs kar la sngags te/ dgra bo'i khang pa'i rmang du sbas na dgra bo de 'chi'o// yang de dang dra ba byas nas dgra bo dur du sbas na/ dgra bo pha tshan stums kyis 'chi'o// dgra bo rtsad nas gcod ces he ru kas bka' stsal to// ka pA la b+han d+ha 'bar ba gsang ba'i rgyud las/ rdzas kyis bstan pa bsrung ba'i le'u ste bcu gcig pa'o//// de nas yang dgyes sde mos zhus pa/ yon bdag dang yon gnas kyi skyon yon gang la yong mi yong de'i don ji ltar lags/ zhes zhus pas/ bka' stsal pa/ yon bdag dang yon gnas gnyis kyi skyon yon gang la yong mi yong/ ka pA la zhal bu ma bcad nas brtag pa ni// dang po ka pA la'i zhal bu legs par mtho dman med par bregs la/ chod par bcad pa ni/ 'tshogs srungs phan chad g.yas pa yon bdag gi sar rtsi/ g.yon pa b+han d+ha'i sar rtsi/ ltag srubs phan chad dgra sar rtsi/ 'tshogs srubs phan chad nas ltag srubs tshun chod nor sar rtsi/ rna ba g.yas g.yon dur sar rtsi'o// dpral ba g.yon phyogs kyi nang rol nas bregs pa'i sa nas/ sran ma'i gang bu tsam bcal ba'i sa de ban d+he rgad por rtsi/ de nas sran ma gang bu tsam bcal ba'i sa de ban d+he gzhon pa'i sar rtsi/ g.yas pa yon bdag gi sar rtsi ba yin/ yang sran ma gang bu bcal ba'i sa stag shar/ de na bud med/ de nas gang bu tsam nor sar rtsi/ ltag pa'i phyogs su dgra la rtags yong mi yong rtsi ste/ dgra bo g.yas su khyog rtsi/ g.yon du bud med rtsi/ rgan gzhon nor yan chad gong ltar rtsi/ dgra la gdong gcig gi rtsar rtsa ro dang/ srin khung dang/ de rnams 'dzom pa byung na dgra de bdun brgyad 'chad par 'gyur ro// de yang ma 'dzom na gang rung gnyis sam/ re re byung na 'bad las bsgrubs kyi rtags mod la 'ong ngo// zhes dpal he ru kas bka' stsal to// ka pA la b+han d+ha 'bar ba gsang ba'i rgyud las/ le'u ste bcu gnyis pa'o//// de nas yang dgyes sde mo bzhis zhus pa/ na tshod rang nyid dgos pa 'grub// na tshod nor pa dgos 'dod rnams// ji ltar 'dod pa'i don de rnams// yang dag rdzogs par gsung du gsol// yang dag rdzogs pas bka' stsal pa// rgan pa gzhon pa bus pa bud med dang// nor pa la sogs gang la lta ba ni// na tshod rgan dang gzhon sogs gong mas blta bar bya'o// nor sar mar dkar la mtheb mos brdzis pa 'dra ba bzhin byung na// de ni yid bzhin gyi nor bu rin po che yin te// nor rdzas dang mag pa tsha yug la bzang ngo/ dur sar gdong gcig gi rtsa dang/ rtsag ro dang/ sring khung la sogs pa med na bzang ngo// ban d+he'i sa dang yon bdag gi sa gnyis gcig ste/ gcig bshad pas gnyis ka go/ gdong gcig gi rtsa ban d+he'i sar byung na/ ban d+he'i bu chung rigs la rtsub bo// yon bdag gis sar gdong gcig gi rtsa byung// ro de rabs chad gcig yin na des thub/ men na bus pa chung rigs la ngan no// rtsa de gang gi sar byung yang long/ dur sar byung na ro de'i gang la bus pa yod pa de la rtsub/ de la bu med na pha tshan spyi ru bus pa gsum bzhi la rtsub/ nor sar gdong gcig gi rtsa g.yas su byang na/ yon bdag gi nor la god ka yong/ g.yon du byung na mag tsha yug la rtsub/ dur sa g.yas su byung na pha tshan gzhon rim la bu yod kyang rabs chad gcig yong/ de rang rabs chad gcig yin na g.yas g.yon gang du byung yang thub/ rtsag ro dang srin khung ni rgad po la rtsub/ dar ma'i sar byung na dar ma la rtsub/ bus pa bud med nor sa gang du byung yang de'i sa der rtsub bo/ ban d+he dang yon bdag gnyis don gcig pa yin par shes par bya'o// rtsag ro dang srin khung nor sar byung na yon bdag gi nor la gong kha yongs te/ rtsa ro che chung dang sbyar ro// rtsa ro dang srin khung nor sa g.yon par byang na/ tsha yug la rtsub/ rtsa ro dang srin khung mag tsha yug rgan gzhon la sbyor/ rtsa ro dang srin khung nor sar byung na/ yon bdag gi nor rdzas la mag tsha yug rgya 'dre byed/ rtsa ro dang srin khung dur sa g.yas su byung na/ snga ma des ma thub na da rung 'chi'o// g.yon phyogs su byung na des thub/ shi chad mi 'ong bar bshad do// zhes bka' stsal to// ka pA la b+han d+hA 'bar ba gsang ba'i rgyud las/ rtags bstan pa'i le'u ste bcu gsum pa'o//// de nas thugs kyi dgyes sde mo bzhis zhus pa/ srubs zhig pa dang mtshams ral pa ni pha tshan rgya 'dre byed de/ don de ji ltar lags/ bka' stsal pa/ srubs zhig pa dang mtshams ral pa thams cad rgya 'drer shes par bya'o// de ltar rtsab rtsub gang byung yang bzlog pa byas pas thub bo// ban d+he'i sar rtsa ro dang srin khung byung na bskang gso dang/ yang na bag zan la ban d+he'i gzugs byas la khrag gi ri mo bris la/ zangs kyi nang du gtor ma dang bcas la/ de nas yod pa'i sha sna mang po dang/ chang phud dang/ bdud rtsi dang/ sha sna khrag sna mang pos zangs bu khebs par byas la/ der 'tshogs pa'i ban d+he sogs kyang bskang gso drag po byas nas dgra phyogs su 'phangs na des thub/ ka pA la b+han d+ha gsang ba'i rgyud las/ bzlog pa dang bskang gso bya ba'i le'u ste bcu bzhi pa'o//// de nas yang thugs kyi dgyes sde mo bzhis zhus pa/ yon bdag gi sar rtsa ro dang srin khung la sogs pa gang byung yang bzlog pa'i thabs ji ltar byed/ bka' stsal pa/ yon bdag gi sar rtsa dang/ rtsa ro dang/ srin khung la sogs pa gang byung yang bzlog pas bzlog ste/ 'di ltar bya'o// yon bdag mo kha gcig 'dus la/ ma mo'i bsgrub thabs yun ring du bya/ spyi mdos sarba ru pa'i mdos chen bya'o// de nas yang ma bzlog na/ so so'i khyim du ma mo'i bskang gso bya'o// phyi skongs mdos chen btang/ des bzlog ste 'ong/ zhes bka' stsal to// rdo rje ka pA la b+han d+ha 'bar ba gsang ba'i rgyud las/ bskang gso dang bzlog thabs bstan pa ste le'u bco lnga'o//// de nas yang thugs kyi dgyes sde bzhis zhus pa/ yon bdag gi sa dang/ dur sa dang/ nor sa gsum du/ rtsa dang srin khung la sogs pa byung na/ de'i bzlog thabs gsung du gsol/ zhes zhus pas/ bka' stsal pa/ dgyes sde khyod la 'di skad bstan/ yon bdag gi dur sa dang/ spyi'i dur sa/ nor sa gsum ka ru/ rtsag ro dang srin khung la sogs pa byung na/ de rnams bzlog pa'i thabs/ lha 'dre pho rigs thams cad dang/ lha 'dre mo rigs thams cad la bskang gso bya'o// phyi skongs dag dang nang skongs dang/ gsang ba gsum ltar bskang ba ni/ yang dag yang gsang ltar na bskang ba na/ de ltar byas na mi bzlog mi srid do// bskang ba'i don gal che'o// zhes gsungs so// badzra ka pA la lha mo bam ril gyi rgyud las/ bskang gso bzhi pa bstan pa'i le'u ste bcu drug pa'o//// de nas lha mo dgyes sde bde byed mas/ ka pA la gsang ba mi bzlog pa de gang lags zhes zhus pas/ bka' stsal pa/ b+han d+ha ngan pa gang gis kyang mi bzlog pa ni/ ma ldog pa ni bu gu hang tsher byang na ma bzlog pa 'chi/ gsang ba yang gsang byas kyang bzlog pa med/ bug pa'i don ni 'di ltar bstan/ byis pa'i dus su mgo bo chag nas bu ga byung ba dang/ mgo bo chag nas rmen ba yod pa cha med/ nad ro langs na bu ga byung ba dang/ lha 'dres dpral ba phug pa mi rung ste mi bzlog go/ mgo chag pa'i bu ga yod pa la skyon med do// zhes bka' stsal to// rdo rje ka pA la b+han d+ha 'bar ba lha mo bam ril gyi rgyud las/ bug pa byung na mi ldog pa bstan pa'i le'u ste bcu bdun pa'o//// de nas dgyes sde chen mo des/ bam chen bkrol ba'i thabs gsung du gsol// zhes zhus pas/ de nas dpal chen pos/ nyon cig lha mo dgyes sde ma/ bam bkro ba la rnam pa gsum/ skyes nas 'jig rten phyi ma'i don la dgongs pa dang/ mi mang po shi nas shi phro chod du re ba la dgongs pa dang/ ban 'de'i phur kha bzlog tu re ba la dgongs pa dang gsum mo// de yang 'jig rten phyi ma la dgongs nas phul ba'i bam de la bkro lugs rnam pa bzhi ste/ sman du byas te bkro ba dang/ yang dag me 'bar dgu pa'i dkyil 'khor gyis rdzas su byas te bkro ba dang/ ma mo'i rnams kyi rdzas su byas te spro ba dang/ ro bsregs stong pa thal bar bkro ba'o// de la yang bdud rtsi sman rdzas su bkro ba yang/ nang gi sbas pa bzhi dang/ phyi'i mngon pa bzhi dang/ nya bzhi dang/ rtsi bzhi dang/ rtsa ba brgyad la sogs pa bam po brgyad pa'i gzhung bzhin du bya'o// de la yang dag me 'bar dgu pa'i rdzas su bkro ba ni/ thod pa b+han d+ha ka pA lar byas te/ dpal chen po'i rjes su dgod pa la sogs pa sha chen bzhi dang/ zhing lpags tsit+ta dang/ rgyu zhags dang/ rkang lag mchog phur bya ba dang/ yan lag bzhi la bsgo ba bzhi'i rdzas dang/ b+han d+ha dpal thar chen po bzhi la sogs pa dkyil 'khor gyi rdzas su bkod pa'o// de nas ma mo rnams kyi dam rdzas su bkro ba ni/ phung po ril gyis yum chen mo'i dam rdzas su bsngo ba dang/ 'byung ba chen po lnga/ kha bzhi/ dbyings lnga'i dam rdzas su bsngo ba dang/ rnam par shes pa'i tshogs brgyad la sogs pa rang bzhin gyi rnal 'byor ma bcu bzhi'i rdzas su bsngo ba dang/ rgyungs ba dang srog ba rtsa la sogs te/ rkang lag bzhi ni grub pa'i rnal 'byor ma a phyi chen pos shan me las kyi sring yan chad kyi rdzas su bkro ba dang/ de ltar ma mo rnams kyi rdzas su bkro ba bstan pa'o// rdo rje ka pA la b+han d+ha 'bar ba lha mo bam ril gyi rgyud las/ bam bkro ba bstan pa'i le'u ste bco brgyad pa'o//// de nas lha mo dge sde mas zhus pa/ ro bsregs thal bar bkro ba bstan du gsol// zhes zhus pas/ dpal he ru kas rol bsreg pa thal bar bkro ba 'di gsungs so// ro sregs thal bar bkro ba ni// gsang ba nang bsregs chen po yis// gzhung bzhin rgyas par byas pa la// tsha tsha gdab pa la sogs pa// dge ba'i rtsa ba rgya cher bya// zhes gsungs so// rdo rje ka pA la gsang ba'i rgyud las/ ro bsregs tsha tsha gdab pa bstan pa'i le'u ste bcu dgu pa'o//// de nas lha mo dgyes sde mos/ bam bkro bsha' ba'i spyod pa ji ltar bgyi// zhes zhus pas/ de nas yang bka' stsal pa/ bam chen bsha' ba 'di ltar bsha'// bam bkro ba yang sha dad pags pa la sogs kyi chod mi bya'o// gcan gzan gyis zos pa'i 'phro ltar mi bya'o// spyod lam dang gtsang spra che bas gzabs las bya'o// mi gzhan la gnod pas gsang ba thub par bya'o/ khyi zas su mi btang ngo// ban d+he rang yang gnas su bag phebs par byas la/ mis ma tshor bar bya'o// zhes gsungs so// rdo rje ka pA la b+han d+ha gsang ba'i rgyud las/ bam bkro bsha' ba'i thabs bstan pa'i le'u ste nyi shu pa'o//// de nas lha mo dgyes sde mos shi 'phro phur kha bzlog pa'i bam bkro thabs bstan par zhus pas/ dpal chen pos bka' stsal pa/ mi'i 'chi 'phro chod pa dang/ ban d+he rang gi phur kha bzlog pa'i bam gyi bkro thabs bstan pa ni/ ma mo rdzas su bkro ba'i lugs su bgyi'o// de'i cho ga ni bskang gso rgyas par bya ba gal che'o// de ltar bya ba dag par zin pa ni/ de bas kyang thod pa brtag pa gal che/ 'jig rten phyi ma dgongs te/ 'bras bu mtho ris su skye ba'am/ ngan song su skye ba brtag pa dang/ de'ang spyi bo'i ri mo thams cad spyi bo'i gtsug tu zangs song ste/ de'ang rnam 'then gyi rtsa sgril ma'i nang du mdan pa g.yas g.yon gyi rtse mo gsang bar chud pa/ ri mo de la rdzas sam gang yang rung ba gsal bar yod pa/ rtsa dang/ rtsag ro dang/ srin khung gi rdzas rnams nyung ba dang med pa ni/ gson po rnams 'gab 'phel ba 'am bzang ba ste/ de yang 'bras bu mtho ris su skye bar bka' stsal to// brtags te ri mo thams cad zab la 'dzengs ba/ ri mo thams cad 'phred la nyal ba 'dra ba/ ri mo thams cad da res yar la song/ da res mar la song zhing/ de nas 'thur la 'brug pa'am/ rdzas sam/ yid 'bru gang yang mi gsal ba/ rtsa dang/ rtsag ro dang/ srin khung rnams mang ba/ thod pa dum bu'i grangs mang ba/ de ni gson po rnams la 'gab ngan pa dang/ 'bras bu ngan song du skyes bas na/ dge ba'i rtsa ba rgya cher bsngo ba'o// zhes he ru kas bka' stsal to/ rdo rje ka pA la b+han d+ha 'bar ba gsang ba'i rgyud las/ phur kha bzlog pa dang/ bam bkro thabs dang/ shi 'phro gcad pa'i le'u ste nyer gcig pa'o//// de nas yang zhus pa/ shi 'phro chod dam ma chod dang// phur kha bzlog dang mi ldog kyang// thod pa'i bra ni brtag pa ste// de yi bra rnams bstan du gsol// zhes zhus pas/ yang bka' stsal pa/ thod pa phyi dang nang gi bra// legs par brtags par shes nas ni// snga ma ji ltar byung ba dang// phyi ma ji ltar 'ong ba ni// skyon yon rtags te 'ong bas na// shes rab rno bas zhib par brtag pa gal che'o// de la thod pa'i bra ni bzang ngan yo ga gong du bstan te// 'dir yang shi 'phro chod mi chod/ phur kha lhog dang mi lhogs kyi// thod pa'i pra bzang bcu gcig gis bstan te/ dpral ba'i nang nas ltag pa'i bdud sgo ru/ rus pa'i mo khab tsam cig zam ma chad par byung na bzang dpral ba'i nang du rus pa la sogs pa dang 'dra ba mtho na bzang ngo// thod pa dbyibs legs na bzang/ dum bu nyung na bzang// mdog legs na bzang/ ri mo 'jam la ring ba mang na bzang/ ri mo thams cad gyen la drang na bzang/ rdzas dang yig 'bru gang yang rung ba gsal ba byung na bzang/ gdong gcig gi rtsa dang/ rtsag ro dang/ srin khung med na bzang/ thod pa ka pA la de lci na bzang ngo// 'thug na bzang ngo// de ltar bzang rtags byung na 'chi 'phro yang 'chad do// phur kha yang bzlog go/ bzlog pa drag po yang bya mi dgos so// chos spyod dge ba nar mar byas pas chog ste/ bzang bar bshad de bka' stsal pa'o// rdo rje ka pA la b+han d+ha 'bar ba gsang ba'i rgyud las/ shi kha chod pa dang/ phur kha bzlog pa dang/ b+han d+ha'i bra bzang ba'i le'u ste nyer gnyis pa'o//// de nas dgyes sde mo bzhis zhus pa/ b+han d+ha ngan pa'i rtags ji ltar lags/ ngan pa bzlog pa gang gis bzlog/ de'i don gsung du gsal/ zhes zhus pas/ he ru kas bka' stsal pa/ thod pa ngan pa'i don de las bzlog pa de/ dpral ba'i nang nas ltag pa'i bdud sgo ru rus pa mo khab tsam med na ngan/ ri mo zab la 'thur la zug na ngan/ rdzas sam yig 'bru gsal ba med na ngan/ gdong gcig gi rtsa dang/ rtsag ro dang/ srin khung mad na ngan/ thod pa de yang na ngan/ srab na ngan/ 'chi 'phro mi chod/ phur kha yang mi ldog/ bzlog pa yang drag po bgyi 'tshal/ gong du ji ltar byas pa bzhin bskang ngo// de rnams kyis ma bzlog na/ gzhan mas mi bzlog pas/ bskang gso kho na gal che'o// bskang gso yas thags dang/ skang gso bsgom pa dang/ bskang gso lha 'dre pho rigs dang/ lha 'dre mo rigs thams cad dbang che ba gang yin pa dang/ yas mar bskang ba dang/ mas yar bskang ba ni don ji ltar yin pa dang/ bskang bas skong ba gang yin pa dang/ bskang gso'i don de ltar shes nas/ mi rtogs pa med par bskang gso bya'o// rdo rje ka pA la b+han d+ha gsang ba'i rgyud las/ thod pa'i brang ngan par bskang gsos bzlog par bstan pa'i le'u ste nyer gsum pa'o//// yang zhus pa// rdo rje ka pA la ban d+ha 'bar ba gsang ba'i rgyud las/ dbyibs dang kha dog brtag pa bstan du gsol// de nas he ru kas bka' stsal pa/ ka pA la'i mdog dbyibs ngas bshad kyis/ zhal bu'i dbyibs mdog brtag pa bstan du gsol// bshad zin to// de'i ma legs pa ni yon por 'dug pa/ zhom pa/ phyi rol na 'bar 'bur mang ba/ nang na thag thug mang ba/ khyor 'dra ba/ bram ze'i rigs la sogs te/ mi'i rigs bcu po yin yang/ mi bcad myur du spangs bar bya'o// rdo rje ka pA la b+han d+ha 'bar ba'i rgyud las/ ma legs pa rnams spang bar bya ba'i le'u ste nyer bzhi'o//// de nas dgyes sde legs mas zhus pa/ ka pA la b+han d+ha gsang ba'i legs pa'i dbyibs dang kha dog bshad du gsol// zhes zhus pas/ bka' stsal pa/ dbyibs legs pa ni/ dper na sgo nga phyed la gshags pa 'dra ba/ phyi nas bltas kyang 'bar 'bur med pa/ nar nas bltas na thag thug med/ 'jam la mtshan dang ldan pa/ mar dkar la mthe bo brdzis pa lta bu 'dra ba byas pa ni/ yid bzhin gyi nor bu dngos dang 'dra ba'o// rigs btsun pa dang a cang ches te/ bud med gdol ba yin yang mi spang bcang bar bya'o// rdo rje ka pA la b+han d+ha 'bar ba gsang ba'i rgyud las/ dbyibs dang kha dog legs par brtags te mi spang bar legs par brtags te bcang bar bya ba'i le'u ste nyer lnga pa'o//// de nas dgyes sde mos zhus pa/ b+han d+ha ka pA la 'bar ba'i rgyud las mdog dang dum bu'i rnam grangs yon tan bstan du gsol// de nas lcang lo'i mgo bo yi mdog bstan pa ni/ dum bu gcig pa dung gi mdog tu bzhed/ dum bu gnyis pa gser gyi mdog tu bzhed/ dum bu gsum pa dmar la gdang bar bzhed// dum bu bzhi pa bye'u lcog dang bya go bo'i sgo nga lta bu/ dum bu lnga pa smug par bzhed/ spyir na rnam pa re re la'ang/ mdog ni rnam pa re re'ang yod/ dum bu lnga pa la mdog lnga yod pas/ dum bu lnga pa de bzang ngo bcang ngo// de ni dum bu'i grangs dang rus mdog sbyar ba yin te/ mdog ni dkar ba dang/ dmar la 'tshor ba dang/ dmar la gdang ba dang/ smug la 'tsher ba dang/ smug la gro ba rnams na mdog legs pa yin te/ mi spongs te bcang bar bya'o// zhes bka' stsal to// b+han d+ha ka pA la 'bar ba gsang ba'i rgyud las/ dum bu'i grangs dang mdog bstan pa'i le'u ste nyer drug pa'o//// de nas yang lha mo dgyes sde mos/ he ru ka la gsol ba/ rdo rje ka pA la mdog lhag par brtags pa'i skyon yon gsung du gsol/ zhes zhus pas/ he ru kas bka' stsal pa/ mdog ni lhag par dkar ba'ang skyon yin no// de bas lhag par ser ba dang/ lhag par dmar ba dang/ lhag par smug pa dang/ lhag par gro ba dang/ khog bor 'dug pa dang/ gnag pa dang/ skya bor 'dug pa dang/ 'di rnams ni mi bcang ste spang bar bya'o// zhes bka' stsal to// badzra ka pA la dz+wa la gu h+ya tan tra las/ mi bcang ste spang bar bya ba'i le'u ste nyer bdun pa'o//// de nas yang lha mo dgyes sde mo bzhis/ dpal he ru ka la gsol pa/ b+han d+ha 'bar ba gsang ba'i rgyud las dum bu dang rnam grangs kyi don ston par zhus pas/ he ru kas bka' stsal pa/ dum bu grangs kyi don rnams bstan pa ni/ de nas gang zag bsgrub pa pos/ dum bu gcig pa bcangs pa na/ yon tan srid gsum mthong byed do// de cis te byas pas/ mi gcig gis don gnyer du phyin pa las ngal chad nas/ lam kar sgong pa gcig la gnyes nas bsdams pa las/ srid pa gsum po sal gyis mthong bar gyur pa dang/ de nas langs te phyin pas srid gsum mi gsal bar gyur nas/ slar log nas sgong pa de gnyes pas/ yang gsal bar gyur nas/ de nas sgong pa de slog pa dang/ mi des thod pa dum bu gcig pa gcig rnyed nas/ de khyer nas phyin pa dang/ srid gsum a cang che ste/ chos thams cad bkra gsal du gyur nas/ rang la dngos grub 'byung ba'i lo rgyus so// yang b+han d+ha ka pA la gsang ba'i rgyud las 'di skad 'byung ste/ dum bu gcig pas dpal chen nyid kyang 'grub// dum bu gnyis pas yab yum gnyis kyang 'grub/ dum bu gsum pas sku gsung thugs kyang 'grub// dum bu bzhi pas ye shes bzhi dang ldan// dum bu lnga pas bsam pa thams cad 'grub// b+han d+ha dpal dang ldan pa ni// ma chag ma gas khyad par can// rnam dag chos kyi dbyings kyang yin// mkhyen rab ye shes dbyings kyang yin// thod pa dum bu gcig pa ni// sku yi rgyan tshogs b+han d+ha yin// thod pa dum bu gnyis pa ni// che ba'i yon tan b+han d+ha yin// thod pa dum bu gsum pa ni// mtshan ma rtags kyi b+han d+ha yin/ b+han d+ha dum bu bzhi pa ni// 'bras bu me tog b+han d+ha yin// b+han d+ha dum bu lnga pa ni// bde gshegs dung chen b+han d+ha yin/ ces b+han d+ha gsang ba'i rgyud las 'byung ste// dum bu lnga tshun chad ni bcang bar bya ba'i mchog yin te// rang gis dang du blangs la mi spang bar bcang bar bya'o// de nas rtsag ro'i don gong du bshad pa las 'dir ma bstan to// de yang rtsa dang ri mo'i don bstan pa ni/ zhal bu bregs pa'i sa nas rtsa du yod pa'i rtsam spun grangs brtsi'o// spyir rtsa 'phan na mi 'phan no// rtsa'i dkyil yan chad du yal ga du gsal ba bu tsha'i grangs su rtsi/ rtsa'i yal ga gur gur por song na bu tsha skyes nas 'chi ba yin no// rtsa'i yal ga chu la zangs so// na bu tsha sogs te 'ong ba yin no// gdong gcig rtsa zhes bya ba'i ni zab la thung ba yin// ring yang sor gnyis man chad/ sor gcig tsam zab la thag thug che ba ste gdong gcig yin no// de yang mang po tsam mi yong ste// byung na gang byung mi rung ngo// rtsa grangs dang mi grangs su sbyar ro// thod pa'i dbyibs dang mi'i byad du sbyar ro// rig pa can gyis shes par bya// srin rjes bya ba ni/ ri mo thung ba dang ring na sor gcig tsam/ sor phyed tsam/ zab la thug thug che ba ste gdong cig ma yin ste/ ri mo zangs la kyag kyog tu 'dug pa de ni srin rjes bya ba yin no// srin khung dang rtsag ro bag tsam 'dra/ ri mo'i 'don ni ma legs pas/ ri mo spus bris pa 'dra ba bsam gyis mi khyab pa yod de/ shes pa zhib mos brtags na/ rung mi rung mthar phyin te 'ong/ bsam gyis mi khyab pas gzung gyis ming lang ngo// ri mo'i don gong du bshad pa bzhin du shes par bya'o// de la bkra shis kyi rdzas brgyad dang mchod pa rnams bzung ngo// yi ge'i 'bru rnams ni ka kha sum cu las bzung ngo// rtsa dang ri mos gang ltar zhib mos brtags na/ rung mi rung mthar phyin te 'ong ngo// zhes bka' stsal to// rdo rje ka pA la b+han d+ha 'bar ba gsang ba'i rgyud las/ srin rjes srin khung bstan pa'i le'u ste nyer brgyad pa'o//// de nas dgyes sde mos zhus pa/ dum bu gcig pa'i don ji ltar lags/ zhes zhus pas/ he ru kas bka' stsal pa/ dum bu gcig pa 'di bram ze'i rigs yin te/ bram ze rtog pa can yin pas/ ban d+ha de bcangs na sems kyi rtog pa dang bral nas/ rtog pa la khu 'phrig med par 'gyur/ rang nyid dad pa che bar 'gyur/ bram zes ni chos spyod pa'i skal pa dang ldan par 'gyur/ dum bu gcig pa de bcangs na/ ji ltar byas kyang chos spyod par 'gyur ro// rang nyid dad pa che bar 'gyur te/ tshe 'di la a cang yang ches te/ phyi ma la yang chos mkhas par 'gyur ro// yang na tshe snga ma la chos mkhas pa lta bu yin no// b+han d+ha dum bu gnyis pa ni rgyal po'i rigs yin te/ de bcang nas bdag gi rgyal po gcig byas pa yin/ tshe 'di la yang chos mkhas te/ rdo rje nga rgyal chen po dang mi ldan par 'gyur/ chos mkhas par 'gyur ro// yang na tshe phyi ma la yang chos mkhas par 'gyur ro// dum bu gsum pa rje rigs byas te/ zhal lce dang yig rtsis rigs la mkhas pa yin te/ chos mkhas par yang 'gyur ro// yang na tshe snga ma la rje rigs byas te/ zhal bu de bcangs nas spyad na/ phyi ma la yang rje rigs sam btsun par skye'o// de min tshe snga ma la lha'i bu gcig yin no// zhal bu de lta bu bcangs na/ tshe phyi ma la las spyod la mkhas par 'gyur ro// dum bu bzhi ba de dmangs rigs yin te/ de bcangs na 'phrin las bzhi la sogs pa ste/ cho ga la mkhas par 'gyur ro// dum bu lnga pa ni mi rigs ma nges te/ rgyal ba rigs lnga'i don tshang bas na/ de bcangs na tshe 'di nyid la bsam pa 'grub bo// phyi ma la rigs 'dzin gyi sa thob pas ci ste bcang bar bya'o/ b+han d+ha ka pA la gsang ba'i rgyud las/ dum bu'i yon tan bka' stsal pa'i le'u ste nyer dgu pa'o//// de nas yang thugs kyi dgyes sde bzhis zhus pa/ de ltar bstan pa'i don 'di la/ tha mar mi bcang spang ba la gnag pa/ rus pa'i lhag ma mtho mong tsam yod pa/ srubs par so gtsigs pa 'dra ba yod pa/ yang ste bya sgro 'dra ba/ snyi ste sha mo 'dra ba/ srab 'thug ma snyoms pa/ dkyil 'thugs la mtha' srab pa/ yang yon bdag gi sa dang/ yon gnas kyi sa dang/ nor sa gsum du shug rdol byung ba dang/ srab pa dang/ srin song ba'i rjes 'dra ba dang/ ri mo thung la zab pa dang/ kha brag gsum du 'dug pa ni// bya rog rjes zhes bya ste/ gnyis pa kha brag tu byung yang bya rog rjes zhes bya'o// gcig byung na gdong gcig gi rtsa yin te/ mthar rab 'chad pas spang bar shes par bya'o// rtsag ro bdun sprel tshun chod nas gcig phan chad/ che ba ni srin ma shong ba tsam/ chung ba ni nyungs kar shong ba tsam/ rdo la khad pa/ khab rtses btsags pa 'dra ba/ rtsa ro'i dbyibs ni ri bong rdzi khungs 'dra ba yod pa/ bya ti ti'i mchu brgyad pa 'dra ba/ rtsa ris legs pa'am/ rdzas sam yig 'bru bzang bar gsal ba gang yang med pa ri mo thams cad 'dzings pa/ 'phred la nyal ba'i ri mo thams cad 'thur la bub pa/ nang na thag thug mang ba/ de lta bu de ni bcangs sam srol na/ 'jig rten 'dir tshe thung/ nad mang/ rigs brgyud mi 'phel/ nor god che ba ste/ mthar dbul bor 'gyur ro// mi bcang bar bya'o// 'jig rten phyi ma la yang don med/ he ru kas gsungs so// mi bcang bar bya ba'i le'u ste sum cu pa'o//// de nas yang thugs kyi dgyes sde mo bzhis zhus pa/ rdzas kyis bstan pa bsrung ba ji ltar lags/ bka' stsal pa/ yang na dgra bo dag la ngan thabs byed na yang rung ste/ dum bu drug pa'i nang dag tu/ dgra bo'i ming rus tshar gsum dang/ nyungs kar dag la sngags bzlas te/ dgra bo de'i zhing dkyil du sbas na/ zhing la lo thog mi 'byung ste/ je ltogs je ltogs la 'gro ste/ mthar sprang por 'gyur ro// rdzas kyis bstan pa bsrung ba'i le'u ste so gcig pa'o//// yang gsol ba/ sangs rgyas kyi bstan pa'i rigs gang zhig lags/ dpal chen pos bka' stsal pa/ bud med rigs ni smad 'tshong ma gdol ba'i dngos la bya/ gdol ba'i rigs ni/ mon rta gdong dang/ glo bi dang/ glo kha bkra'i rigs la sogs te/ de rnams la bya'o// de rnams kyi thod pa bcangs pa'am bregs na ni/ bsam pa thams cad mi 'grub ste/ mthar yang brlag par 'gyur ro// phyi ma la don med/ b+ha ga wan gyis bka' stsal to// b+han d+ha ka pA la 'bar ba gsang ba'i rgyud las/ pra brtag pa dang/ rigs lnga dang/ rigs bzang po bcang ba bsten pa dang/ ngan pa rnams spang bar bstan pa'i le'u ste sum cu gnyis pa'o//// de nas thugs kyi dgyes sde bzhis dril nas 'khor dang bcas pas/ dpal 'jigs byed he ru ka la bskor ba lan du mar byas te/ rdo rje ka pA la b+han d+ha 'bar gsang ba'i rgyud las/ bdag cag gi rigs gang dang gang yin pa dang/ bcangs pa dang spang ba gang yin pa dang/ sid+d+hi blang ba dang/ bar chad bzlog pa dang/ 'jig rten du bkra shis pa dang/ dgra bgegs sgrol ba la sogs pa rnams bka' stsal pa ngo mtshar che'o/ bdag cag rnams kyis kyang ji ltar gsungs pa bzhin mi brjed par yid la bgyi'o// dge bas bsod nams tshogs su bsngo bar bgyi'o// badzra ka pA la b+han d+ha dz+wa la gu h+ya tan tra las/

CLOSE WINDOW