CLOSE WINDOW

Gpb045.024
བོད་ཡིག

rgya gar skad du/ badzra kI la ya mU la tsit+ta nA ma tan+t+ra/ bod skad du/ rdo rje phur pa rtsa ba thugs kyi rgyud ces bya ba/ dpal rdo rje khros pa'i rgyal po la phyag 'tshal lo// 'di skad bstan pa'i dus gcig na/ bcom ldan 'das dpal kun tu bzang po nyid/ de bzhin gshegs pa thams cad kyi sku dang/ gsung dang/ thugs dang/ yon tan dang/ 'phrin las ma lus pa'i bdag nyid/ ye shes rol pa'i cho 'phrul sna tshogs rnam par 'phrul pa la mnga' brnyes pa nyid 'og min gyi gnas lhun gyis grub pa'i pho brang yum gyi mkha' ye shes kyi rgyan rnam pa sna tshogs kyis klabs pa na/rigs kyi yab dang// rigs kyi yum dang/ sems dpa' dang// sems ma dang/ sgo ba dang/ sgo ma dang/ gzhan yang de las sprul pa'i 'khor grangs med pa dang thabs gcig tu bzhugs so// rdo rje phur ba rtsa ba thugs kyi rgyud las// gling gzhi'i le'u ste dang po'o//// de nas bcom ldan 'das de bzhin gshegs pa 'khor dang bcas pa chos nyid zhi ba chen po'i cho 'phrul bde ba chen po'i ting nge 'dzin la snyoms par zhugs te/ mdzad spyod thams cad ye shes kyi don la gnas par gyur to// de'i tshe de'i dus na log pa'i lam la zhan te/ dngos po la mngon par 'chel ba nga rgyal gyi mthus bsnyems pa'i ru drag nag po zhes bya ba zhig/ sangs rgyas kyi bstan pa la ma dad cing 'gro ba rnams la gnod par byed de/de la bcom ldan 'das 'khor dang bcas pa thams cad dgongs pa gcig tu gyur nas/ gdan tshoms bcas te bka' bgros pa las/ zhi bas mi 'dul te rol pa'i mdzad spyod kyis 'dul bar gzigs nas/bcom ldan 'das nyid kyis dpal rdo rje khros pa'i rgyal por sprul nas rigs lnga'i sangs rgyas la sogs pa rnams thugs kar bsdus te/ dur khrod kyi gzhal yas khang dang/ khro bo'i dkyil 'khor gyi skur mngon par 'du mdzad de/thugs ka nas yum 'khor lo rgyas 'debs ma sprul nas/ gnyis su med pa'i sprul pa las khro bo sras mchog sprul nas ru tra bsgral nas btul lo// thugs ka nas khro bo bcu dang/khro mo bcu sprul nas/ ru dra'i 'khor na gnas pa'i phyogs skyong bcu dang de'i chung ma rnams btul lo// de'i nye 'khor rnams la mgo brnyan nyi shu sprul nas btul lo// ru dra'i 'khor na tshangs pa dang/ nye dbang dang/ dbang phyug dang/ khyab 'jug rnams gnas pa ni yab yum mkha' las sangs rgyas 'dus pa dang/ rin chen 'dus pa dang/ pad+ma 'dus pa dang/ las rab 'dus pa'i sras mchog rnams sprul nas btul lo// de nas dregs pa de'i slas dang/ bu mo dang/ chung ma dang/ ma dang/ sring mo rnams la ma chags thabs kyi sbyor ba mdzad de dam la btags te 'khor du byas so// de bzhin du bse'i lha mo bzhi dang/bdag nyid ma bzhi dang/ shwa na mu kha bzhi la sogs pas srog gi snying po phul nas phur pa'i srung mar dbang bskur te dam la btags so// de'i tshe 'jig rten drug gi phyogs mtshams thams cad g.yos shing khrugs te/thams cad dpal rdo rje gzhon nu'i gzhal yas khang dkyil 'khor gyi lha'i ngo bor shar te/ rol pa'i mdzad spyod ye shes kyi ngang du gyur to// rdo rje phur pa rtsa ba thugs kyi rgyud las/ dregs pa btul nas cho 'phrul bstan pa'i le'u ste gnyis pa'o//// de'i tshe de'i dus na bcom ldan 'das nyid kyis drag po'i rtum rngam tshig tu skad ces bka' stsal to// rdo rje khros pas zhe sdang gcod// de bzhin rim pa ji bzhin du// mtshon chen sngon po 'bar ba yi// nam mkha' dkyil nas thigs pa shar// srog gi sgo ru shar ba dang// snying gi go ru bsgom par bya'o// snying rjes bsgral ba'i dam tshig ni/ gsad cing mnan pa ma yin te// phung po rdo rje gtam byas nas// rnam par shes pa rdo rje bsgom/ oM badzra kI li k-I la ya sarba big+ha nan baM hUM hUM phaT/ rdo rje gzhon nu'i rigs 'dzin rnams// srid pa'i rdo rje grub mdzod cig/ srid pa rdo rje phur pa'i lha// ye shes khro bo grub par mdzod// sangs rgyas kun gyi ye shes sku// ngang nyid rdo rje chos dbyings las// 'bar ba'i khro bo mi bzad pa// sku yi dbyig tu bdag bskyed cig/ thabs kyis spyod pas 'gro don du// byams dang snying rje gang 'dul ba// sangs rgyas 'phrin las rdzogs mdzad nas// dbang dang byin rlabs 'dir stsol cig/ oM badzra kro d+ha hUM kA ra hUM/ gardza gardza hUM phaT/ khro bo chen po hUM ka ra dang/ yum rdo rje sgra 'byin ma/ sprul pa'i 'phra men ma phag gi mgo can dang/ smigs bu'i mgo can no// oM badzra kro d+ha ba dzi ya hUM hUM ha na ha na hUM phaT/ khro bo chen po rnam par rgyal ba dang/ yum rdo rje rnam bsnyems ma/ sprul pa'i 'phra men ma stag gi mgo can dang/ bya rgod kyi mgo can no// oM badzra kro d+ha nI la dan Da hUM/ da ha da ha hUM phaT/ khro bo chen po dbyug pa sngon po dang/ yum rdo rje sder mo/ sprul pa'i 'phra men ma/ g.yag gi mgo can dang/bya rog gi mgo can no// oM badzra kro d+ha ya man ta ka hUM/ pa tsa pa tsa hUM phaT/ khro bo chen po gshin rje gshed po dang/ yum rdo rje dur khrod kyi bdag mo/ sprul pa'i 'phra men ma shwa ba'i mgo can dang/ 'ug pa'i mgo can no/ oM badzra kro d+ha Ar+ya a tsa la hUM/ ban d+ha ban d+ha hUM phaT/ khro bo chen po mi g.yo mgon po dang/ yum rdo rje gtun khung ma/ gzig gi mgo can dang/ khwa'i mgo can no// oM badzra kro d+ha ha ya grI ba hUM/hu lu hu lu hUM phaT/ khro bo chen po rta mgrin dang// yum rdo rje gtum mo// sprul pa'i 'phra men ma byi la'i mgo can dang/ pu shud kyi mgo can no// oM badzra kro d+ha a pa rA dzi ta hUM/ tiSh+ta tiSh+ta hUM phaT/ khro bo chen po gzhan gyis mi thub pa dang/ yum rdo rje mda' bsnyegs ma/ sprul pa'i 'phra men ma spyang ki'i mgo can dang/ khra'i mgo can no// oM badzra kro d+ha a mr-i ta ku N+Da li hUM/ tshin da tshin da hUM phaT/ khro bo chen po bdud rtsi 'khyil ba dang/yum rdo rje rlung 'byin ma/ sprul pa'i 'phra men ma seng ge'i mgo can dang/ pha wang gi mgo can no// oM badzra kro d+ha trai lokya pi dza ya huM/ b+hi na da b+hi na da hUM phaT/ khro bo chen po khams gsum rnam par rgyal ba dang/yum rdo rje gsod byed ma/ sprul pa'i 'phra men ma dred mgo can dang/ ze mo'i mgo can no// oM badzra kro d+ha ma hA ba la hUM/ s+pho Ta s+pho Ta hUM phaT/ khro bo chen po stobs po che dang/ yum rdo rje bskyod chen ma/sprul pa'i 'phra men ma dom gyi mgo can dang/ byi ba'i mgo can gyis gtams pa'o// srid pa'i phur bu bsgrub pa dang// dbang dang dngos grub blang ba'i phyir// ye shes khro bo gshegs su gsol// khro bo chen po gshegs nas kyang/ rtags dang mtshan ma bstan pa dang// kI la ya yi dngos grub gsol/ dam tshig chen po'i dus la bab// sprul pa chen po'i dus la bab// phyag brnyan chen po'i dus la bab// shwa na mu kha'i dus la bab// bdag nyid chen mo'i dus la bab/ sa bdag chen mo'i dus la bab/ khyed kyi 'phrin las dus la bab// mthu rtsal dbyung ba'i dus la bab// byang chub mchog tu sems bskyed la/khams gsum rgyal ba'i gdung sob pa'i// rigs 'dzin bdag cag rnam sa la ni// gnod cing gdug pa'i dgra dang bgegs/ bdud dang bar du gcod pa rnams/ khro bo chen po'i byin rlabs kyis// yud tsam gyis ni 'dir bkug nas// mngon spyod tshul bzhin bsgral ba dang// lus ngag rdul du shig nas kyang// sdug bsngal nyams su myong bar mdzod/ oM laM hUM laM staM pa nan/ mo ha g+ha ya b+ha ga ban/ shi kri bi kri badzra hUM kA ra hUM hUM phaT phaT/badzra kI li kI la ya/ dzaHhUM baM ho/ sarba bag+hi nan/ badzra kI li kI la ya hUM phaT/ badzra hUM ka ra hUM a/ dngos grub bar gcod byed pa'i bgegs/ gdug cing sdang sems ldan pa rnams// zung zhig sdoms shig rnam par chings/ gtogs shig grogs dang bral bar gyis/ rings par khug la smrar chug cig/ phob cig rnam par gzir bar gyis/ nga yi dbang du gyur nas kyang// bsgo ba'i bka' rnams nyan par gyis// hUM pa ra bdi dan tshin da tshin da hUM phaT/ b+hin da b+hin da hUM phaT/ gr-i h+Na gr-i h+Na hUM phaT/ ha na ha na hUM phaT/ ban d+ha ban d+ha hUM phaT/ ta tha ya ta tha ya hUM phaT/ ha sa ya ra ha ta na hUM phaT/shi krin A na ya hUM phaT/ dza la pa ya dza la pa ya hUM phaT/ A be sha ya A be sha ya hUM phaT/ b+hin da ya b+hin da ya hUM phaT/ bran dang bka' nyan pho nya'i tshogs/ khyed kyi dam tshig dus la bab/ sngon chad ji ltar dam bcas pa/ sngon spyod 'phrin las myur du mdzod/ ha na ha na badzra/ da ha da ha badzra/ pa tsa pa tsa badzra/ ma tha ma tha badzra/ dz+wa la dz+wa la badzra/ su ru su ru badzra/ mu ru mu ru badzra/ ka taM ka te dza ye bi dza yi/a dzi te/ a pa rA dzi te/ ma ra sa na pra mar rta ni ye phaT/ rdo rje gsang ba'i bka' las ni// sdig can gang zhig 'da' byed pa// stobs chen khro bo chen po yis// klad pa tshal pa brgya ru khos// nyon cig bgegs dang log 'dren tshogs// nga yi bka' las 'da' ma byed// ma ma ba shang ku ru ma dam nya ka ra i nan d+ha ti ma ma kar ma shi kraM ka re ya/ gdug cing sdang sems ldan pa rnams// lha 'am 'on te bdud kyang rung// nga la bar chod byed pa rnams// mthu dang rdzu 'phrul med par byos// sarba A na ya hUM phaT/ tad ya thA tad ya thA hUM phaT/ rdungs shig rdo rje 'bar ba'i gtun/ bka' las 'da' byed sdig can rnams// rdo rje me dbal snying bsregs nas// lus ngag rdul phran bzhin du lhogs/ khro mo 'bar ba'i gtun khung du// rdo rje tho bas brdungs byas nas// lha yang rung ste rlag par 'gyur// gnod byed dgra bgegs smos ci dgos/ kha thaM kha thaM kha thaM/ hUM hUM hUM/ phaT phaT phaT/ badzra yag sha kro d+ha kha kha/ khA hi khA hi/ ha ha ha/ hUM hUM hUM/ phaT phaT phaT/ gsang sngags kyi byin rlabs so// sangs rgyas kyi mthu'o// a bi ra tsa'i dus la bab bo// brnag pa de kho na la'o// badzra kI la ya zhes nyi shu rtsa gcig/ kI la ya zhes bco brgyad/ dkar gnag gi mtshams su'o/ hUM hUM hUM/ phaT phaT phaT/ ces bzlas par bya'o zhes gsungs so// rdo rje phur pa rtsa ba thugs kyi rgyud las/dpal rdo rje gzhon nu'i rtsa ba'i don dngos su bstan pa'i le'u ste gsum pa'o//// de nas gzhan yang bka' stsal pa/ oM badzra kI li kI la ya hUM phaT/ bsnyen phur gyi sngags so// oM bud d+ha kI li kI la ba di ya bing bing hUM phaT/zhes pa ste bya phur gyi sngags so// oM rat+na kI li kI la ya na ma sa man ta hing hing hUM phaT/ skyer phur gyi sngags te rgyas pa'o// oM pad+ma kI li kI la ya su ru su ru pra su ru hUM phaT/ mchog phur gyi sngags te dbang gi'o// oM karma kI li kI la ya mA ra ya mA ra ya hUM phaT/ lcags phur gyi sngags te drag po'o// oM badzra kI li kI la ya kA ya badzra oM dza la dza la/ s+phu ta s+phu ta sarba na sa pa na ye hUM phaT/ oM badzra kI li kI la ya bA ka badzra/oM sarba duSh+tan hri da sho da ya hUM phaT/ oM badzra kI li kI la ya tsit+ta badzra hUM tsit+ta huM phaT/ ces sku gsung thugs kyi sngags so// oM badzra kI li kI la ya pe ta li maN+Dal rag k+Sha rag k+Sha hUM phaT/ oM badzra kI li kI la ya ma ku la ta la ta la ta la pra ta la hUM phaT/ oM badzra kI li kI la ya ma hA rak+ta hUM phaT/ dbyug brdeg bdug pa bya ba'i sngags so/ zhes gsungs so/ rdo rje phur pa rtsa ba thugs kyi rgyud las/sras mchog lnga'i sngags dang dbyug brdeg bdug cing byin gyis brlabs par mdzad pa'i le'u ste bzhi pa'o//// de nas bcom ldan 'das dpal rdo rje gzhon nu la/ rdo rje 'dus pa'i sras mchog kI li yas 'di skad ces gsol to// e ma ho rdo rje khros pa'i sku// de ltar sku gsung thugs dang ni// yon tan 'phrin las 'dus pa yi// dregs pa bsgral ba ngo mtshar che// gtum rngam tshig tu gsungs pa yi// rdo rje phur pa rtsa ba nyid// de don bsgrub pa ji ltar lags// rim par bdag la bshad du gsol// ces gsol bas/ bcom ldan 'das rdo rje gzhon nus bka' rtsal pa nyon cig rdo rje 'dus pa'i sras/rdo rje phur pa bsgrub 'dod pas// phun sum tshogs pa'i slob dpon dang// gnas dang 'khor dang yo byad rnams// dus tshod ldan pas b sgrub par bya// phyi nang bshags par bya ba dang// lto 'phye'i gzhung rnams brtags nas ni// sa chog bya zhing stegs bu brtsig/ dkyil 'khor bri zhing phur bu dang// rdzas rnams rim par dgod par bya// phyi nang gsang ba'i mtshams bcad nas// las kyi rim pa rdzogs byas la// ting 'dzin rnam pa gsum bsgoms nas// gzhal yas khang bskyed gdan stengs su/ dkyil 'khor rnam gsum lhar bskyed de// de yang phyi nang gsang ba'i tshul/phyi ltar gzhal yas nang du bsgom/ nang ltar bdag nyid lus la bsgom// gsang ltar thugs la bsgom par bya// ye shes srog la dbang bskur te// rang bzhin dkyil 'khor spyan drangs la// sman dang gtor ma rak+ta dang// sgrol ba dang ni sbyor ba yis// mchod dbul smon lam gdab par bya// de nas 'dzab bzlas thugs dam bskul// dus drug tshogs kyi mchod pa bya// rtags dang mtshan ma byung ba dang/dngos grub blang zhing dgra 'dzab bzlog/ tshe lung khrul lung dgongs pa yi// gsang ba gsum ldan phur pa gdab/ de ltar phur pa 'debs dus su// gser skyems gtang zhing bden pa bdar/ nyes med dgra ni mi blang zhing// snang srid bdag gi grogs su bcad// de ni gdams ngag chen por bshad// las grub bdag dang phung bu gso// mnan bsreg 'phang bas mtha' brtul bya// gtor ma gnas btang 'phrin las bcol// dkyil 'khor bsdu zhing rgyu ting bsgom// lus bsrung go bgo bka' nan bya// dbu rgyan dgyes pa'i thal mo sbyar// de yis dngos grub thob par bshad/ ces gsungs so// rdo rje phur pa rtsa ba thugs kyi rgyud las/'phrin las bsgrub pa'i don bsdus te bstan pa'i le'u ste lnga pa'o//// de nas yang rdo rje 'dus pas gsol pa/ e ma bcom ldan gsang sngags bdag/ rdo rje phur pa bsgrub pa la// slob dpon gnas 'khor phur pa yo byad dang// dus tshod rim bzung don rnams ni// phyi rabs don du bdag nyan 'tshal// rdo rje khros pas bshad du gsol// ces gsol pas/ rdo rje khros pa'i rgyal pos bka' stsal pa/phun sum tshogs pa'i slob dpon ni// yon tan ma lus tshang ba la// phun sum tshogs zhes bya ba yin// de yang rab 'bring tha ma gsum// rab ni dang po dbang thob nas// dam tshig ldan zhing lta spyod 'brel// 'phrin las rim la rab tu goms// shes rab rnam gsum blo sbyangs pas// rgyud lung man ngag don la mkhas// ting 'dzin las rung brtse dang ldan// bsgrub la brtson shing bsnyen pa rdzogs// rdo rje slob dpon mtshan nyid do// 'bring ni dbang thob dam la gnas// 'phrin las bye brag phyed pa dang// lta spyod gnyis dang ldan pa dang// bsnyen pa rdzogs shing rtags ldan pa'o// tha ma dbang dang dam tshig ldan// 'phrin las 'di don tsam la mkhas// de lta bu yi bsgrub pa pos// bsgrubs nas 'grub par gdon mi za// yang na slob dpon mtshan nyid ni// gang zag bsgrub pa'i slob dpon ni// rgyud bzang kun gyis bkur zhing kun la mdzes// dbyibs legs gsong po nyon mongs chung// longs spyod ldan zhing sgo yangs spyod lam mdzes// gang gis gang la ma rmongs bzo'i bye brag phyed// phyi nang sde snod thams cad la// thos bsam bsgoms la rab sbyangs pa'i// las su dge bcu ldan zhing tshad med ngang la gnas// bstan pa rgya mtsho 'dul khrims sdom pa yi// ngang la gnas te dam tshig srung// bla med theg pa rnam gsum la// bye brag sgrub pa'i nyams drod ldan// dkyil 'khor mtshan nyid 'phrin las bye brag phyed// ting 'dzin las rung drod tshad rtags mthong ba'i// dbang gi rim pa ma lus rdzogs pa ni// de ltar ldan pa rdo rje bla ma yin// de yi phyi bzhin be'u ltar du 'brang// de dang mi ldan skyon du 'gyur ba'i bla ma ni// gsang sngags spyod dka' 'bras bu bla ma la ldan pas// tho cho ra chod gzu lum ma yin par// thabs kyi rim pas spang bar bya'o// gnas kyi rim pa bstan pa ni// gnod sbyin mo yi sbar rjes sam// gnod sbyin mtshon chas bshal rjes sam// klu bdud dag gi rgyun srang ngam// rten dang 'brel ba'i ya ga can// nags ri tsher ma can gyi ri// gnam ni gri 'dra ral gri'i shugs// sa ni grub gsum me dpung 'dra// logs na dur khrod gling yod la// drag pa'i las 'di bya bar shis// sems la chos nyid mi gsal zhing// nyams dang ting 'dzin g.yel ba yis// gnas der bya bar yongs mi gsungs// rnal 'byor gsar pas spang bar bya// spangs na dngos grub myur bar bshad// ma spangs nam phugs rang la gnod pa'o// steng 'og bar snang brtag pa ni// 'khor lo gnam la pad+ma sa// phyogs mtshams kun tu rdo rje brag/ gzhung ldan bkra shis dam pa'o// dbyibs legs lung pa ran pa dang// 'bru khung chu shing 'tsham pa dang// gcan gzan mi rgod nyam nga med// mi dang mi med rgyu 'grul nyung// 'di ni yid 'ong dam pa ste// de ni dang du blang bar bya// spang dang dang du blang ba ni// bdag gi ting 'dzin nyams dang sbyar// ting 'dzin zab na ngan pa bsdams// ting 'dzin g.yel na bzang po bsdam// ting 'dzin drod tshad ldan 'gyur na// ngan pa'i gnas rnams gong ma der// bsgrub pa la sogs byas na yang// ngan pa'i las kyi ngan pa 'grub// las la phan thogs yod pa dang// grims 'byin shugs kyis ting 'dzin gsal// bzang po'i gnas su 'grub 'gyur na// yun du bsrings kyang phung 'tsheng med// de bas gzhung dang ldan pas gdams par bya'o// 'khor gyi rim pa bstan pa ni/kha gtsang g.yo sgyu med pa dang// rem pa nyams shed ldan pa dang// brling po gzhan gyis slu bar lci// bsgo nyan dus la rub pa dang// gang zag pho mo de lta bu// bsgrub pa phyi'i 'khor du bya'o// rgyal 'thebs stobs dang ldan pa dang// las mkhan bye brag phyed pa dang// brtul zhugs 'chang ba'i ging chen dang// drod tshad zin pa'i spyan mthong dang// gtsang sbra phyed pa'i g.yos mo ni// sgrub pa nang gi 'khor du bya// rigs bzhi 'os bzhi tshul bzhi dang// yon tan bcu gcig ldan pa yi// mtshan bzang bkra shis gzungs mchog ni// dgyes pa skong ba'i 'khor du bya'o// phur pa yo byad mtshan nyid ni// phur pa'i rgyu ni 'di lta ste// dngul lam dkar po'i shing rnams ni// zhi ba'i phur bu'i rgyu ru bshad// gser ram ser po'i shing rnams ni// rgyas pa'i phur bu'i rgyu ru bshad// zangs sam dmar por shing rnams ni// dbang gi phur bu'i rgyu ru bshad// lcags sam nag po'i shing rnams ni// drag po'i phur bu'i rgyu ru bshad// de ni phyi yi phur pa'i rgyu ru bshad// nang gi phur pa'i rgyu nyid ni// rmig zlum rkang la zhi ba bya// 'dab chags rkang la rgyas pa bya// rkang leb rkang la dbang yang bya// sde chags rkang la drag po bya/ yang na bya phur zhi ba la// skyer phur rgyas pa mchog phur dbang// lcags ni drag por bya ba'o// gsang ba'i phur pa'i rgyu bzhi ni// lo ma me tog yal ga med// shing shing nag po'i myu gu la// de la drag po'i phur bu bya// pho mo 'dod pa'i srid ma zin// gtsos po ru leb mtshan ma la// de la dbang gi phur pa bya// pho mo gnyis kyi mtshan ma dod// ma ning nag po'i mtshan ma la// de la rgyas pa'i phur pa bya// bu tsha rigs rgyud srid ma zin// dre rta nag po'i mtshan ma la// de la zhi ba'i phur pa bya'o// 'di ni kun rdzob phur pa'i rgyu// rtog pa'i don la mi dgos te// ma rtogs don du bstan par zad// kun gyi rgyu ni byang chub sems// byang chub sems kyi don rtogs na// gzhan nas rgyu nyid btsal mi dgos// btsal yang rgyal bas mi rnyed do// de ni don dam phur pa'i rgyu'o// phur pa'i tshad ni 'di lta ste// rang byung chen po'i phur pa la// sems nyid gsal ba'i tshad gtang nas// kun rdzob tshad ni mi dgos te// dman pa'i don du tshad bstan to// drag po la ni sor bzhi ste// dbang la sor drug rgyas sor brgyad// zhi ba sor ni bcu gnyis pa'o// rtse mo'i phyaugs ni ma nor bar// rtsa ba la ni rgya mdud bya// de yang spyi bor sor gcig rgya mdud bya// rked par de bzhin bya ba ste// stod kyi dbyibs ni zur brgyad la// rtse mo so sor bya ba ni// zlum po gru bzhi zla gam zur gsum ste// rtse mtshan so so'i dbyibs su ni// dbang drag gnyis ni chu srin kha nas dbyung// zhi ba zur drug rgyas la brgyad// ri rab lta bur brjid che ba// kun rdzob dbyibs sam yang na ni/ khrag 'thung 'bar ba'i thugs kyi ye shes la// yon tan tshang ba'i tshul lam dbyibs// de nyid rtogs na 'di mi dgos// rgyu rkyen ma 'gags don shes na// rtsa ba rtse mo dbyer med de// ma rtogs pa la de bstan no// phur pa'i legs nyes skyon yon ni// legs pa'i yon tan dpag las 'das// legs na yid 'ong dod na drug/nyes pa'i skyon rnams 'di lta ste// gang dgar byas nas bka' las 'gal// bsnyed btsan byas nas tshul las nyams// ngan dgu bshams na rtogs par 'gyur// de bas legs shing dod par bya'o// yo byad dam pa byang chub sems// sems kyi stobs kyis rtsol nus na// thams cad ma lus yo byad yin// lha grangs tshangs pa'i phur pa dang// sgrub pa rdzas kyi phur pa dang// yungs kar gu gul rak+ta rnams// sgrub pa rtsa ba'i yo byad do// phyi nang gsang ba'i mchod rdzas de// bdug spos mar me me tog bshos dang chab// gtor ma bdud rtsi rak+ta dang// gtsor zung lhag pa'i byang chub sems// mchod pa gsang ba'i yo byad do// dur khrod sha khrag la sogs dang/ khyi spyang wa 'phar sha khrag dang// mar zhag 'o ma khrag rnams kun// ma mo sten pa'i yo byad do// rabs chad nag po'i thod pa dang// lcags sna lnga yi phur pa dang// dam sri gnon pa'i yo byad do// mdzes pa'i gtor ma mchod pa phur pa bcu// 'bar ba 'tshams kyi yo byad do// shun chen ko ba stag lpags dang// dar gyi snying nan phyag rgya'i phu rung dang// cod pan stod g.yogs smad dkris sbrul chun rnams// sngags pa rgyan gyi yo byad do// ma hA pan tsa 'dza gad tshe// tshim byed kun tu rgyug pa dang// gal phyi ka ta ri dang zla tshes dang// zla phrom zla rgyas a sa ni// 'byor pa tshogs kyi yo byad do/sman dang spra ba rtsags cha ni// nad 'joms sman gyi yo byad do// go dang phub dang mtshon cha rnams// bar chod dgra bzlog yo byad do// 'dod chags gti mug bsgral zhing rnams// nyams chag bskang dang rkyen bzlog yo byad do// de ltar bstan pa'i yo byad rnams// sgrub pa lo zla'i yo byad ldab tu bya// ma rma ba dang ma rme ba'i// tshogs pas 'grub par the tshom med// byang chub sems ni rgyu yin te// phyi ma rkyen gyi tshul du bshad// rgyu rkyen tshogs pas 'bras bu chud mi za// 'jug pa'i dus tshod bstan pa ni// rnal 'byor bsgrub pa'i don ldan na// dus tshod med de kun kyang dus// spyod yul kun tu bsgrub pa'i dus tshod yin te// ma rtogs don du 'di bstan no// dbyar dgun ston dpyid nam zla bzhi// yar gyi ngo la 'jug pa ni// dbyar dgun ston dpyid zla dus so// stag glang rta bya'i nyi ma la// phur pa mig dmar pa wa sangs// rgyal stod rgyal smad dbo dang wa// nyi ma skar ma gza' dus so// yo byad ma lus tshogs gyur na// sgrub pa la 'jug dus tshod yin// ma tshogs bar du dus tshod min// zhes gsungs so// rdo rje phur pa rtsa ba thugs kyi rgyud las/slob dpon dang/ gnas dang/ 'khor dang/ yo byad dang/ sgrub pa'i dus tshod bstan pa'i le'u ste drug pa'o//// de nas yang rdo rje 'dus pas// dpal rdo rje khros pa'i rgyal po la 'di skad ces gsol to// e ma ho dpal chen khro bo'i rgyal// gtum rngam drag po'i tshig gsungs pa'i// drag po'i 'phrin las sgrub pa la// bsgral ba'i zhing rnams bshad du gsol// ces gsol bas/ rdo rje khros pa'i rgyal pos bka' stsal pa/nyon cig rdo rje 'dus pa'i sras// drag po'i 'phrin las bya ba yang/ kun la bya bar yongs ma gsungs// sangs rgyas bstan pa la gnod pa'i// nyams pa bdun dang zhing bcu rnams// bsgral bar bya ba'i zhing du gsungs// nyams pa bdun ni thun mong du// rdo rje slob dpon sku dgra dang// rdo rje spun la 'khu byed pa// gsang ba'i theg pa smod pa dang// sangs rgyas bstan pa 'jig byed dang// rgyal khams yongs la gnod pa dang// rnal 'byor spyi yi dgrar gyur dang// dam can bdag gi sgos dgra ni/ thun mong spyi yi nyams pa bdun/ khyad par chos zhugs nyams pa ni// srogs don bka' dam las kyis nyams// mtshan ma 'dod pas nyams dang bdun// pha ma mkhan po slob dpon gsod// srog las nyams pa bsgral ba'i zhing// slob dpon bka' slu nyams pa'i sems// don las nyams pa bsgral ba'i zhing// rnal 'byor sngags spyod la skur 'debs// bka' las nyams pa bsgral ba'i zhing// bka' yi gzhung bor log par spyod// dam las nyams pa bsgral ba'i zhing// nyes med dgrar slong mthu zhed pa// las kyi nyams pa bsgral ba'i zhing// bla ma dkon mchog rdzas la 'bag/ 'dod pas nyams pa bsgral ba'i zhing/ khyad par dam she nyams pa bdun// zhing bcu dag dang bcas pa yi// de dag bsgral ba'i yon tan ni// zhing bcu bsgral na rnal 'byor btsun// bdud rnams btul na bstan pa gnyan// dam med bsgral na bar chad nyung// med par gyur pa bstan pa rgyas// nyams pa med na dkon mchog che// de bas yon tan bsam mi khyab// ma bsgral ba yi skyon bstan pa// dmyang khams 'phel nas mtho ris 'grib// gzhung spyod rnal 'byor sgyid lug nas// gsang sngags theg pa'i gzhung spyod 'gag/ dam chos spong ba'i gzhi gyur pas// don la mi mthun skyon rnams 'byung// zhes gsungs so// rdo rje phur pa rtsa ba thugs kyi rgyud las/ bsgral ba'i zhing bcu bstan pa'i le'u ste bdun pa'o//// de nas yang rdo rje khros pa'i rgyal po la// rdo rje 'dus pas gsol ba ni/ khro rgyal rdo rje kros pa'i sku// bsgral ba'i zhing rnams gsungs ba ni// dmigs pa'i rten ni gang la bya/ khro rgyal gtso bos bshad du gsol// zhes gsol pas/ bka' stsal pa/ nyon cig rdo rje 'dus pa'i sras// dmigs pa'i rten ni ling ga ste// grog mkhar sa dang mi phung sa// gangs kyi dum bu ju che'i phub// srub ma'i lo ma zhing chen ras// ske tshe dang ni ldong ros dang// thal chen dang ni rak+ta dang// bshang ba 'am ni gci ba ste// bcu gnyis thod pa'i nang du drung// oM badzra kI li kI la ya/ mud ga ra A ko ta ya hUM phaT/ lug thug ra thug dri chus sbru// oM badzra kI li kI la ya sa sham pi/sho ta baM khaM hUM phaT/ dur khrod ku sha'i rtsa dag la// dgra dang bgegs kyi gzugs brnyan bya// oM badzra kI li kI la ya nri tri ma ra ya phaT aH de la gong gi rdzas rnams byug/ oM badzra kI li kI la ya e ra ga hUM phaT// dkar nag skud pas ske nas gdags// oM badzra kI li kI la aM ku sha huM dza/ de ni gdab pa'i ling ga yin// shing shun tshon gang nyi shu rtsa gcig la// de la dgra bgegs gzugs brnyan bya// de ni gzir ba'i ling ga yin// gro ga'am ras sam shu gu la// dgra bgegs gzugs brnyan rdzogs bris la/ khram shing nag la gdags pa ni// 'di ni bstan pa'i ling ga'o// ma ning nag po'i thod pa la// grub gsum ' bar ba cha drug la// yan lag mgo dang gsang gnas bya// gru gsum rtse la 'khor lo drug/ mtha' ma mu khyud zlum pos bskor// 'khor lo drug gi cha la ni// sngags dang mchod gnyis thun bdebs pa// dgra bgegs ming dang gzugs bris la// spyi bor oM dang kI la ya// dpral bar rus pa snying kar ming// g.yas su hUM la g.yon du phaT// mdoms su mA ra ya ni dgod// 'di ni mnan pa'i ling ga'o// zhes gsungs so// rdo rje phur pa rtsa ba thugs kyi rgyud las// dgra bgegs kyi ling ga bca' ba'i le'u ste brgyad pa'o//// de nas dpal rdo rje khros pa'i rgyal po la/ rdo rje khros pas gsol ba/dpal chen rdo rje khro rgyal 'bar ba nyid// gsang sngags rdo rje phur pa la// dbang dang dam tshig ji ltar lags// bdag la khro bos bshad du gsol// zhes gsol pas/ khro bo'i rgyal pos bka' stsal pa// e ma rdo rje 'dus pa'i sras// bla ma mnyes pa bya ba dang// dbang mchog thob par ma gyur par// nyan 'chad 'phrin las byed pa yi// rmongs pas de nyid 'grub mi 'gyur// slob dpon dag gis bsnyen pa bskyal// slob mas gsol ba yang du btab// de nas slob ma khrus byas la// rdo rje gral gsham 'jug par bya// de nas bla mas dbang rnams bskur// phyi dang nang dang gsang ba dang// rdzogs pa'i dbang dang bzhir bskur nas// dus 'di phan chad rgyal ba'i sras// dngos grub 'grub pa'i gnas su gsungs// dbang de 'chags shing smin pa la// dam tshig rim pa bsrung ba yang// spyi yi dam tshig nyi shu brgyad/ khyad par dam tshig nyi shu dang// lhag pa'i dam tshig rnam pa gsum// de bsrungs dngos grub bdag por 'gyur// 'di la phun sum tshogs par 'gyur// phyi ma rdo rje sems dpa'i gral// sku dang ye shes thob nas kyang// sems can kun gyi don byed 'gyur// ma bsrungs nyams na mi 'grub ste// 'di dang phyi mar skyon mang bas// dam tshig bsrung zhing nan tan bya// gal te nyams par gyur na yang// 'gyod sems ldan pas bshags shing bsgrub// lta ba stong nyid nan tan bya// zhes gsungs so// rdo rje phur pa rtsa ba thugs kyi rgyud las/ dbang dang dam tshig bstan pa'i le'u ste dgu pa'o//// de nas yang rdo rje 'dus pa'i sras mchog gis/ bcom ldan 'das rdo rje khros pa'i rgyal po la 'di skad ces gsol to// e ma bcom ldan khros pa'i rgyal// rdo rje phur pa'i don nyid ni// phyi rabs don du bdag nyan 'tshal/ khros pa'i rgyal pos bshad du gsol/ ces gsol bas/dpal rdo rje khros pa'i rgyal// rdo rje 'dus pa'i sras mchog nyon// rdo rje phur pa'i don nyid ni// phur bu byang chub sems nyid de// byang chub sems kyi phur bu yis// srid gsum 'gro ba'i bdar sha gcad// byang chub sems kyi phur bu des// ma btab bzhin du lhun gyis grub// mnyam pa'i rgyal por rig pas btab// phur pa chos nyid dbyings kyi brtags// byang chub sems kyi phur bu des// gzhan du gdab pa'i gnas med de// gnyis med ma bcod chos dbyings la// rang rig byang chub sems kyis gdab// phur pa 'dzin chags 'dod nas dag/ rnam rtog gzung 'dzin dngos dang bral// dngos po kun bral phur bu yis// dngos po phyin ci log la gdab// gdab dang ma gdab gnyis las 'das// phur pa skye ba med pa'i don// ma skyes brdal ba'i phur pa yis// dbyings la btab pas rig par shar// sems la btab pas don dam rtogs// gnyis su med pas brdal ba'i klong/ khyab brdal rang bzhin phur pa yis// snang srid kun la phur pas gdab// de ltar rtogs na thebs pa yin// mngon du gyur na thebs pa yin// tshig las 'das na sangs rgyas yin// grangs las 'das na brjod du med// rang bzhin phur pa'i don nyid ni// phur pa bla ma chen po'i don// phur ni chos kyi dbyings zhes bya// pa ni rig pa ye shes nyid// gnyis su med pas phur pa'i ngang// phur ni skye ba med pa'i ngang// pa ni 'gag pa med pa'i don// gnyis su med pas phur pa nyid// phur ni thabs kyi rgyal po yin// pa ni shes rab dag pa'i don// gnyis med mnyam pas rdo rje'i sku// phur pa kun khyab nam mkha' 'dra// phur pa khyab gsal nyi zla bzhin// kun la snyoms pa'i ngo bor snang// chos kyi chos nyid phur pa yin// nam mkha'i mtshan nyid phur pa yin// sems kyi sems nyid phur pa yin// phur pa rgyud kyi rgyal po yin// phur pa lung gi bla ma yin// phur pa man ngag nges pa'i don// gnyis med gsal bas bskyed pa yin/ khro bo pho nyas 'jig rten bkang// 'phral la bkang ba ma yin te// ye nyid nas ni bkang bar gnas// gsel bar bsgoms pas bskyed pa yin// nyams 'og tshud na sgrol ba yin// gnyis su med na sbyor ba yin// lhangs kyis rtogs na thebs pa yin// thugs rjes zin na dam tshig yin// zhes gsungs so// rdo rje phur pa rtsa pa thugs kyi rgyud las/ mthar thug de kho na nyid phur pa byang chub sems su bsgrub pa'i le'u ste bcu pa'o//// de nas gzhan yang bka' stsal pa// drod tshad mtshan nyid bstan pa ni// brdal ba chen po'i ting 'dzin gyis// chos nyid mnyam la blo gzhag nas// ci yang mi dmigs bsam las 'das// chos nyid lta ba'i drod tshad do// 'ga' na 'ching grol med pa dang// dam rdzas blang dor med pa dang// sta na skye shi med spyod pa// 'di ni spyod pa'i drod tshad yin// dngos su snang ba skur bsgrub cing// sgra ru grag pa gsung du ste// dngos med snang bas thugs grub na// 'di ni bsgrub pa'i drod tshad yin// snod kyi 'jig rten gzhal yas la// bcud kyi 'jig rten de ltar shes te// thams cad kun tu dkyil 'khor te// dkyil 'khor chen po'i drod tshad yin// bya byed gnyis la spyod byed cing// gang la byas kyang bde gshegs las// byas pas mi dmigs 'phrin las te// 'phrin las chen po'i drod tshad yin// dbri mnan med pa'i ting 'dzin gyis// gol sa med pa'i sa la gnas// blang dor med pa'i dbang rdzogs na// 'di ni dbang gi drod tshad yin// dam pa'i gzhi nyid bde gshegs las// zhal nas gsungs pa'i tshig tu shes// dam tshig dam pa chog gi gzhi// 'di ni dam tshig drod tshad yin// phur bu'i grub rtags bstan pa ni// 'phar dang 'tsher dang 'phrog pa dang// 'gul dang ldeg dang mchong ba dang// 'od dang du ba 'byung ba dang// bgrub po nam mkha' 'gro 'phur dang// sa la mi thogs chur mi 'bying// 'di ni rtags rab bstan pa yin// mtshan ma ling ka 'gul ba dang// rmi lam nyams dang rtogs byung dang// bar ma'i rtags su bstan pa yin// tha ma nyams tsam ston pa'o// de ltar drod tshad rtags mthong nas// drag po'i las la brtson par bya'o// zhes gsungs so// rdo rje phur pa rtsa ba thugs kyi rgyud las/ drod tshad dang rtags kyi le'u ste bcu gcig pa'o//// de nas yang dpal rdo rje khros pa'i rgyal po la/ rdo rje 'dus pas gsol ba/ bcom ldan 'das rdo rje khros pa'i rgyal po/ rdo rje phur bu gsang ba'i theg pa 'di nyid/ da ltar ni khyad par du gyur cing spyod na/sngar 'das pa'i sangs rgyas gang gis bshad cing bstan pa dang/ slad kyis gang du spyod cing ston par 'gyur ba rnams bdag la bshad du gsol/ ces gsol bas/ bcom ldan 'das rdo rje khros pa nyid kyis bka' stsal pa/rdo rje 'dus pa nyon cig/ gsang ba'i theg pa 'di nyid 'byung ba ni shin tu yang dkon te/ u dum ba ra'i me tog dang mtshungs so// sngon byung ba'i sangs rgyas 'od srungs chen po dang/de bzhin du 'das pa'i sangs rgyas bye ba phrag rgya bcu rtsa bzhis kyang gsang ba'i theg pa 'di ma bshad de/ de ci'i phyir zhe na/ dus de'i 'gro ba rnams 'dul ba'i snod du ma gyur pa'i phyir ro// sngon thog ma bskal pa kun tu bkod pa zhes bya ba byung ste// de'i tshe sangs rgyas sngon 'byung gi rgyal po zhes bya ba byung ba'i tshe/ de'i bstan pa la gsang ba'i theg pa 'di bshad cing bstan te/ de'i dus de'i tshe 'gro ba rnams dad cing snod du gyur nas/rnam par grol ba'i lam la bkod do// rdo rje 'dus pa da ste bskal pa byed pa 'das pa'i 'og tu/ bskal pa me tog bkod pa zhes bya ba zhig 'byung ba'i dus der/ sangs rgyas 'jam pa'i dbyangs zhes bya ba zhig 'byung bar 'gyur te/des gsang ba'i theg pa 'di bshad cing ston par 'gyur te/ sangs rgyas gzhan gang gis kyang gsang ba'i theg pa 'di ston par mi 'gyur te/ de ci'i phyir zhe na/ sangs rgyas gzhan rnams kyis mi mkhyen pa ma yin te/ 'gro ba rnams gsang ba'i theg pa 'di'i snod du ma gyur pa'i phyir ro// rdo rje 'dus pa da lta 'og min 'dir nga nyid kyis bstan pa'i gsang ba'i theg pa 'di yang phyi ma'i dus na lha'i gnas dang// klu'i gnas dang/ mi'i gnas 'dzam bu'i gling du spyod par 'gyur te/ der skyes pa'i rgyal po dza zhes bya ba tshogs bsags pa'i gnas 'khor zhig tu/ rdo rje 'dus pa khyod kyis bsdus pa'i don 'di nyid gsung chos kyi glegs bam du snang bar 'gyur ro// de nas skal ba can rnams rim par spyod 'gyur te/ de yang bar skabs gcig tu ni nub/ skabs kha cig tu ni mngon du phyung// skabs kha cig tu ni gab cing sbas// tshul bzhin du spyad pas gsang sngags kyi mthu stobs kyang rnyed/ phal cher tshul 'dra log par spyad pas ltung gnas su gyur te/ 'gro ba la la ni dad/ la la ni ma dad pas/dus lnga brgya tha ma 'byung bar nye ba'i tshe dar zhing rgyas par 'gyur ro// rdo rje 'dus pa de'i tshe de'i dus na/ gsang ba'i rgyud 'di la nan tan byed cing/ gzhan la 'chad pa dang/ nyan pa dang/ tshul bzhin du yid la byed pa de ni rdo rje theg pa'i rting 'dzugs shing/rnal 'byor dbang phyug gi rgyud 'dzin pa ste/ nga'i sras kyi dam par lta'o// rdo rje 'dus pa khyod kyis spun dang grogs po nyid du byin gyis rlobs cig/ces gsungs so// rdo rje phur pa rtsa ba thugs kyi rgyud las/ gsang sngags kyi rgyud gang du dar zhing spyod par 'gyur ba'i lung bstan pa'i le'u ste bcu gnyis pa'o//// de nas rdo rje 'dus pa la sogs pa nyid las mi gzhan pa'i 'khor rnams kyis dpal rdo rje khros pa'i rgyal po 'khor dang bcas pa la mdzad spyod don gyis bstod pa/e ma ho/ bdud bzhi bcom nas yon tan drug dang ldan/ yod med mtshan ma'i dngos po kun las 'das// don dam thugs ni 'da' ka shin tu gsang// gsung ni gsang sngags ma lus kun gyi gtso// bcom ldan gsang bdag rdo rje khros pa'i sku// gsang thugs gzhon nu thams cad mkhyen mdzad de// ston pa'i bdag nyid gtso bo de la phyag 'tshal bstod// e ma ho/ shes rab rang bzhin dag pa las// dbyings kyi rang bzhin grub gsum gsal bar mdzad// dbus nas pad+mas byang chub sems kyis mtshan// dus gsum 'du 'bral med par dgyes par sbyor// skyes ba med pa'i don rnams ston byed ma// shes rab dbyings ma de la phyag 'tshal bstod// e ma ho/ stobs bcu dag las ye shes khro bo bcu// phyogs skyong tshar bcad mi dge bcu rnams sel// ye shes dbang bcu kun la mnga' brnyes pa/ khro bo bcu rnams de la phyag 'tshal bstod// e ma ho/ pha rol phyin pa bcu las khro bo bcu// phyogs skyong chung ma tshar bcad skyon bcu sel/stong nyid dbyings kyi sgra stogs don ldan ma// dbyings kyi khro mo bcu la phyag 'tshal bstod// e ma ho/ ting nge 'dzin las sprul pa'i 'phra men rnams// phyogs skyong bu dang bu mo tshar bcad nas// log par lta ba bsal nas don dag ldan// phra thabs nyi shu'i tshogs la phyag 'tshal bstod// e ma ho/ skye med ngang las rdo rje kI li ya// zhe sdang 'dul mdzad dmyang ba'i 'jig rten stongs// gsal la ma 'dres me long ye shes bsnyes// rdo rje 'dus pa nyid la phyag 'tshal bstod// e ma ho/ sku gsung yon tan 'phrin las phur bu'i tshogs/ bsdu ba rnam bzhi don mdzad tshad med brnyes// 'phrin las rnam bzhi lhun grub dregs pa 'dul// sgrol ba sras mchog phur pa rnams la phyag 'tshal bstod// ces pas bstod par gyur to// rdo rje phur pa rtsa ba thugs kyi rgyud las/ bstod pa'i le'u ste bcu gsum pa'o//// de nas bcom ldan 'das rdo rje khros pa'i rgyal pos/ rdo rje 'dus pa la bka' stsal pa/ rdo rje 'dus pa'i sras mchog khyod kyi ma 'ongs pa'i rnal 'byor pa rnams kyi don du rgyud 'di bsdus la/nub tu mi gzhug par gzung zhing gsung chos kyi yi ger gnas par bya'o// 'on tang rgyud 'di gang na bzhugs pa na dpal rdo rje gzhon nu nyid 'khor dang bcas pa bzhugs par 'gyur te/ gshin tu gces spras kyis gzung bar bya'o// zhes bka' stsal pa dang/ rdo rje 'dus pa la sogs pa 'dus pa'i 'khor rnams yi rangs te/ mngon par dgyes bar gyur to// rdo rje phur pa rtsa ba thugs kyi rgyud las/ rgyud gzung zhing gtad pa'i le'u ste bcu bzhi pa'o//// rdo rje phur pa rtsa ba thugs kyi rgyud ces bya ba rdzogs so//// u rgyan gyi slob dpon pad+ma 'byung gnas kyis bal po ba su da ra la gnang ste/ slad nas snubs rdo rje yang dbang gter gyis zhus nas/b+ha sa ya'i dgon par bsgyur nas gtan la phab pa'o// slad nas snubs yon tan rgya mtsho skye ba brgyud nas 'phrad par gyur cig/ rgyud 'di phur pa rtsa ba la brten pa tsam gyis rgyud du'agro ste/

CLOSE WINDOW