CLOSE WINDOW

Gpb044.012
བོད་ཡིག

/// rgya gar skad du/ b+kab+katab+ta/ p+dad Ta/ p+dan/ bod skad du// thugs rje chen po pad+ma rgyas pa'i rgyud/ bcom ldan 'das 'od dpag med la phyag 'tshal lo// 'di skad bdag gis thos pa'i dus gcig na// bde ba can gyi zhing khams pad+ma dbang gi gzhal yas na/ sangs rgyas snang ba mtha' yas la/ yum gos dkar mo dang/ gI ti ma dang/ A lo ke dang/ byang chub sems dpa' spyan ras gzigs dang/tshe dpag med dang/ 'od dpag med la sogs pa rnams kyis bskor nas bzhugs so// yang de'i tshe byang chub sems dpa' spyan ras gzigs dbang phyug dang mkha' 'gro dbang mos/ sangs rgyas snang ba mtha' yas kyi 'gro ba la ji tsam cig gzigs zhes zhus pas/sangs rgyas kyis 'khor rnams la bka' stsal pa/ ngas yangs par nam mkhas khyab tshad la gzigs/ dog sar 'gro drug kun la gzigs/khyad par rigs drug nang nas mi la gzigs so// zhes gsungs so// yang zhus pa/ thugs rje'i rang bzhin ji ltar gzigs shing 'byung/ ngo bo ltar gzigs shing 'byung// zhes zhus pas/ yang gsungs pa/thugs rje'i rang bzhin mkha' ltar khyab// ngo bo nyi ma ltar 'byung ste// nga'i sku yi sprul pa spyan ras gzigs// gsung gi sprul pa mkha' 'gro gsang ba ye shes/ thugs rje'i sprul pa dpal rta mgrin yon tan gyi sprul pa pad+ma 'byung gnas/'phrin las kyi sprul pa rang byung mched bzhi'o// bye brag ni sems can thams cad bde ba dang ldan pa/ sdug bsngal dang bral ba'o// thugs rje chen po pad+ma rgyas pa'i rgyud las/gleng gzhi gleng bslang ba'i le'u ste dang po'o//// de nas yang 'khor rnams kyis sangs rgyas snang ba mtha' yas la zhus pa/ rang byung rig pa'i ngo bo ji ltar lags zhus pas/ chos sku snang ba mtha' yas kyis bka' stsal pa// ngo bo chos sku 'gyur med de/ ma bcos ma bslad lhun gyi grub// ma bcos pa ni chos kyi sku// ma bslad pa ni bde ba che// lhun grub chos nyid rnam par dag/ dug lnga ye shes ngo bor rdzogs// zhes gsungs so// yang rig pa'i rang bzhin dang mtshan nyid ji ltar lags// zhes zhus pas// ngo bo stong pa chos sku la// snang ba rang bzhin med par shar// rgyu 'bras dkar nag rang bzhin kun// dngos po 'dzin med stong par 'jug/ dngos po'i rang bzhin stong par dag/ stong las gsal ba dag tu shar// stong nyid snying rje'i rang bzhin shar// dper na nam mkha' la sprin bzhin du// ma 'gags rang bzhin ngang la 'byung// rig pa'i mtshan nyid ma grub pas// dbyibs dang kha dog bzung ba med// stong la 'dzin med gsal bar 'phro// rtags pas ngos gzung grub pa med// ngo bo stong la rang bzhin gsal// nges tshig brjod pa'i mtha' dang bral// sna tshogs gsal la gcig tu 'dus// bye brag dbye ba'i mtha' las 'das// zhes pa pad+ma rgyas pa'i rgyud las/ rang byung rig pa'i 'dug tshul bstan pa'i le'u ste gnyis pa'o//// yang 'khor rnams kyis zhus pa/ rang byung gi rig pa'i rgyal po 'di// rtogs par bya ba ji ltar bgyi// sangs rgyas chaus skus yang gsung pa// gzhi rtsa med pa'i sems nyid 'di// ma bcos rang thang che por bzhag/ rnam rtog 'thor ba bsdu zhing lta// dper na nam mkha' sprin dang dra// nam mkha' sprin bral ngo bo bzhin// ma bcos pa la chag chad bzhag/ yang na nam mkha'i sprin tshogs bzhin// skye 'gag mkha' las grub par shes// de bzhin brgya khri spang rtogs rnams// 'thor ba bsdu zhing sems la lta// thams cad ma grub sems su lta// sems nyid ma 'gags rang gsal la// gzung 'dzin rtog pa'i mtha' dang bral// dper na rgya mtsho'i skar tshogs ltar// snang la rang bzhin med par brtag/ sems nyid ye nas gsal ba la// gsal la 'dzin pa ma zhugs pa// bu chung mar me'i dper bzhag 'dra// snang la ngos gzung ma grub pa// dper na chu nang zla ba 'dra// stong la gsal cha ma 'gags pa// dper na bar snang 'ja' tshon 'dra// rgyu 'bras rten 'brel zung 'jug gi/ rgyu nyid sgyu lus phung po las// 'bras bu dbyer med stong par shar// stong pa'irgyu las thugs rjer shar// 'bras bu dbyer med sprul pa'i sku// gzi ldan nyi ma snying po bzhin// rtsol med shugs las byung ba'o// pad+ma rgyas pa'i rgyud las/rtogs pa'i thabs bstan pa'i le'u ste gsum pa'o//// yang 'dus pa'i 'khor gyis zhus pa/ kye sangs rgyas chos kyi sku// de nyid rtogs par ma gyur na// ngos ni 'dzin thabs ji ltar bgyi// zhes zhus pas/ sangs rgyas chos skus bka' stsal pa// nyon cig 'dus pa'i 'khor rnams kun// sems nyid ma rtogs bdud du che// bdud ngos rang gis zin par bya// chos rnams mnyam pa ris med la// blo ngan skur 'debs chos kyi bdud// mi dang 'du shes spang bar bya/ khams gsum sems can thams cad la// snying rje mnyam pa ris med la// nga dang bdag tu 'dzin pa'i bdud// sdug bsngal blo yis mi bzung bar// byas pa'i mkhan po rang ngo rtag/ nyon mongs thod rgal mi btang bar/ ma spangs rang gsal yal du gzhug/ lta ba phyogs ris 'dzin pa'i bdud// phyogs 'dzin rtogs pa'i mtha' dang bral// sgom pa sems 'dzin ba blo la bsgaum// rig pa gsal stong ngang la zhog/ spyod pa dgag bsgrub tshul 'chos bdud// chos brgyad g.yeng ba'i mgo bsnyoms thong// 'bras bu re dogs the tshom bdud// rang sems sangs rgyas rtogs par gyis// dka' thub phyi shol 'dod pa'i bdud// lteb bskyang med par nyams su long// nyams myong bsgom la chags pa'i bdud// sems nyid gang la'ang rten med bzhag/ le lo med par nyams su blang// rang nyid byin rlabs ngo bo la// the tshom zhugs pas byin rlabs bdud// don dam the tshom med par bsgrub// yid ma ches pa bla ma'i bdud// mos gus drag pos gsol ba gdab// dad pa yar grus chos kyi bdud// sdug bsngal byed la lcags kyi brab// 'dus byas tha mar shor bas dge sbyor bdud// skyo bas nyams len srang du gzhug/ sbyin pa chud zos ser sna'i bdud// 'bras bu longs spyod thob re ba// dmigs pa med pa rgya yis thob// tshul khrims chud zos tshul 'chos bdud// sgyu med rang sems dag par bsrung// bzod pa chud zos khong khro'i bdud// gza' gtad med par don la khol// brtson 'grus chud zos longs spyod bdud// mi rtag 'chi bsam chos nyid sgom// bsam gtan chud zos g.yengs pa'i bdud/ yengs med chos nyid klong du klod// shais rab chud zos rang ngo ma shes bdud// sems nyid rig pa chos skur rtogs// tshe gcig skyes pa'i lus di la/ mdo don chos la dril bar bya// pad+ma rgyas pa'i rgyud las/ bdud ngos bzung ba'i le'u ste bzhi pa'o//// yang zhus pa// bdud dang 'brel pa ji tsam na chod// ces zhus pas// gsung gi bdag pos bka' stsal pa// nyams su len pa'i rnal 'byor pas// sems dang bag chags ma bral bar// 'khor 'das dbye yi mi phyed pas// sems nyid ye stong rtogs par bya// 'khor ba chos nyid skye med du// ma rtogs par du mi go bas// 'khor ba rang bzhin med par rtogs// gnyis snang rtog pa ma grol bar// bdag gzhan gzung 'dzin mi 'dzad pa// gnyis snang rang gsal grol du gzhug/tshogs drug rang grol ma shes par// sems dzin bsgom pas mi chod pas// snang stong ngang du grol du zhug/ 'khor ba skyo ba ma skyes par// mi chos snang ba mi spongs pas// 'dus byas rgyu 'bras don la brtag/chos nyid bden pa ma mthong bar// 'jig rten chos brgyad mi 'bral bas// chos nyid don la rtse gcig sbyangs// rang nyid gcig tu ma shes par// 'khor 'das blo yis mi 'phreng bas// don med thig le gcig tu bsgom// thamasacad don med ma shes par/ kheng grags dgos med mi shes pas// kun kyang 'brel med blo thag bcad// chos kyi mthar thug blo las 'das// ming tshig don la ma zad par// tshig dang yi ge mi mdzad pas// tshig la mi lta don la brtag/ chos rnams zad par ma skyol bar// gza' gtad med par mi go bas// byar med blo 'das go bar gyis// pad ma rgyas pa'i rgyud las/ 'brel thag bcad pa'i le'u ste lnga pa'o//// yang dbang mo la sogs pa'i 'khor gyis zhus pa// kye sangs rgyas gsung gi bdag/ snang ba stong pa zung 'jug 'di// lta ba'i rang bzhin ji ltar lta// sgom pa'i rang bzhin ji ltar bsgom// spyod pa'i rang bzhin ji ltar spyod// ces zhus pas// gsung gi bdag pos bka' stsal pa// sna tshogs yul gyi snang ba la// rnam rtog blo yi dran rig gnyis// gsal stong dbyer med zung du 'jug/snang stong 'dzin pa ma zhugs par// phyogs 'dzin med pa'i ngang la lta// ma skyes ma 'gags rang so la// gsal 'grib med pa'i ngang la bsgom// ye nas gsal stong dgag bsgrub med// blang dor med pa'i ngang la spyod// dbang po ma 'gag gsal bar lta// ched du mi 'dzin stong par lta// ma 'dres yongs su gsal bar bsgom// gsal la mi rtog goms par bsgom// spyod pa 'di la bya med par// gza' gtad dgag bsgrub med par spyad// pad+ma rgyas pa'i rgyud las/ lta sgaum spyod pa nyams su blang ba'i le'u ste drug pa'o//// yang zhus pa/ de la rog pa ji ltar 'byung// zhes zhus pas// gsung gi bdag pos yang gsungs pa/ gsal bas btang snyoms ma rig dag/ ma rtog blo yi 'khrul pa chad/ bde bas sems kyi zug rngu zhi// gsal dang mi rtog bde ba gsum// chos nyid yang don cig rig/sems kyi ngo bo stong gsal mthong// gsal ba'i mthar thug spros pa med// sems nyid rnam rtog mtha' dang bral// mi rtag mthar thug gzung 'dzin med// sems la dran byed zug rngu med// bde ba'i mthar thug re dogs bral// gsal bas chad pa ma gol ba// mi rtog rtag par ma gol ba// bde bas gnyis 'dzin ma gol bas// dbye ba phyogs su ltung ba med// de ma rtogs pa'i gol ba ni// gsal la zhen pas gzugs khams gol// mi rtog zhen pas gzugs med gol// bde la zhen na 'dod khams gol// dbyer med pa la zhen gyur na// bsam gtan lha ru shugs kyis gol// gsal bar nyams su myong ba na// ma chags ma zhen sprul sku thob// mi rtog nyams su myong gyur na// chags zhen med pas chos sku thob// bde ba nyams su myong gyur nas// zhen chags med pas long sku thob// kun la mi rtog rang ngo shes// ngo bo nyid kyi sku yang thob// gang la zhen chags g.yos med pas// mi 'gyur rdo rje'i sku yang thob// pad+ma rgyas pa'i rgyu da las/ rtogs lugs gol ba gsal ba'i le'u ste bdun pa'o//// yang dbang mo la sogs 'khor rnams kyis zhus pa/kye sangs rgyas gsung gi bdag/ phyi nang rig pa'i ngo sprod ji ltar lags// zhes zhus pas// gsung gi bdag pos yang gsungs so// phyi nang yul la ngo sprod pa// ye nas dag pa'i zhing khams la// ma bcos mi bslad ma byas par// lhun gyis grub par rtogs par bya// 'gro ba'i don byed gsal dus su// tshad med bzhi las bskyed pa'i lha// byams pa wa ti kun la dad// rnying rje 'ja' ma li yis rtse// 'bu khang dga' bas don byas pa// btang snyoms lo gi shwa ra skyong// rang byung thugs rje chen po bzhi// dang po bskyed pa'i rgyu med pas// bar du gnas pa'i rten med pas// tha ma rkyen gyis 'jig pa med// lta sgom byed pa'i mkhan po lta// rang gi sems kyis byas pa'i lha// lha de rang gis sems su 'dug/ sems las gang du 'ang ma grub pas// stong pa spros bral lhun gyis grub// rig cing gsal la ngos gzung med// ngo bo stong la rang bzhin gsal// rgya ma chad de mthar ma red// dbyibs dang kha dog brtag tu med// phyi nang ngo bo stong pa la// nang gi rang bzhin gsal ba las// dbyer med stong gsal 'dzin pa bral// ngo bo 'gyur med stong pa de// rig pa skye med chos kyi sku// rig pa 'gag med longs spyod rdzogs// sna tshogs ma 'gag sprul skur shar// pad+ma rgyas pa'i rgyud las/ phyi nang rig pa'i ngo sprod bstan pa'i le'u ste brgyad pa'o//// yang dbang mo la sogs 'khor gyi zhus pa// de ltar rtogs pa'i mthar phyin pa ji ltar lags// zhes zhus pas// gsung gi bdag pos bka' stsal pa// brtags pa sna tshogs rang la snang// rgyu 'bras yul med blo las 'das// stong pa blo 'das byar med la/ ji bzhin pa yi ngang la gnas// stong pa gnas med klod pa'i mchog/ mtha' bral spros pa chod pa dang/rang gsal 'dzin pa gtor ba dang// don dang bral ba med pa dang/ spang blang 'dzin pa zhig pa dang/ gsal la ngos bzung med pa dang/ stong la gsal cha ma 'gags dang// gsal la rtog pa med pa dang// snang la rang bzhin med pa la// rtogs pa'i btsan sa mthar phyin pa'o// yang gsung gi bdag pos bka' stsal pa// sems nyid dmigs pa'i mtha' dang bral// bsam pa gza' gtad med par grol// stong pa nyid la thun mtshams med// gza' gtad med la lta rgyu med// dmigs gtad med la bsgom du med// spyad rgyu med la yengs pa med// gzhag rgyu med la btang rgyu med// brjod rgyu med la nor rgyu med// blo ngos gnyis la bzang ngan med// yid kyi yul la phyi nang med// ngo bo stong pas pho mo med// chos la gza' gtad med pa yi// 'bras bu re ba'i mkhan po med// 'dod pa med pas thob pa med// rtsol med 'phrin las btsal du med// ces pas pad+ma rgyas pa'i rgyud las/ rtogs pa mthar phyin bstan pa'i le'u ste dgu pa'o//// yang dbang mo la sogs 'khor rnams kyis zhus pa// de'i yon tan gsung du gsol// zhes zhus pas// yang gsung gi bdag pos bka' stsal pa// rgyu 'bras stong par zhugs pa las// 'bras bu stong nyid rgyu 'bras 'char// rtsol med 'gro don byed pa la// 'khor ba gnas kyang skyon ma gos// skyo dub med par 'gro don mdzad// byang chub sems kyi dbang du sdud// 'gro ba'i kha lo thabs kyis sgyur// sems can blo la gar phan bshad// brjed rdo bka' rgyud shul du 'jog/ 'gro ba'i sems nyid lam du 'dzud// sems can rnam rtog rang sar grol// byar med dge sbyor blo la sbyor// rtsol med rang lus rgyu la sbyor// tha ma rtag pa kha lo sgyur// blo sna'i 'khrid thabs sna tshogs ston// rtsa bral nang du go ba ston// don go nyag gcig sems su ston// stong pa skye med chos skur ston// dag snang 'gag med longs sku ston// sna tshogs thabs 'dren 'gro ba 'dul// nyon mongs sems can bde bar grol// zhes pas pad+ma rgyas pa'i rgyud las// mthar phyin pa'i 'phrin las bstan pa'i le'u ste bcu pa rdzogs so//// rang byung thugs rje chen po sangs rgyas snang ba mtha' yas/ mkha' 'gro gar gyi dbang mo/ slob dpon pad ma 'byung gnas/jo bo rang byung mched bzhi// mkha' 'gro ma cig mtsho rgyal/ mnga' bdag khri srong lde btsan/ rim pa nas rim par brgyud pa'o// smon lam btab cing gter du gtad de rgya// lha mgon gnyis la gtad do srung/

CLOSE WINDOW