CLOSE WINDOW

Gpb037.042
བོད་ཡིག

rtogs par byar yod bya bral na// nyan thos la sogs ci phyir min// bsgoms pas 'bras thob rdzogs chen na// nyan thos la sogs ci phyir min// brtan du byar yod brtan pa na// nyan thos la sogs ci phyir min// bya bral ngang brtan nam mkha' bzhin// brtan dang ma brtan gnyis med brtan// mi 'gyur don gyi mtshon tshod brtan// rmongs pa kha cig 'di skad zer// chos nyid mi skye rtogs skye zer// skye dang mi skye so so'i phyir// gnyis ka rdzas su yod par thal// gnyis skye chos skye su yi lugs// yang na chos nyid mi skye ba// yod nas med skye med mi skye// yod na rtag ste med na chad// gal te bsam gyis mi khyab na// rtogs dag skye med dam bca' 'gal// rmongs pa tshad mas chos rtogs 'dod// tshad dang chos nyid gcig tha dad// tha dad gnyis ka rdzas su thal// gcig na rang rtogs tshad mas byed// gang gi dam bca' 'gal ba'o// gal te gcig min tha dad min pa na// 'bebs min mi 'bebs min par 'gro// don min kun rdzob 'bebs zer na// kun rdzob don dam phan mi phan// phan gdags kun rdzob ci phyir yin// ming kun kun rdzob bden med thal// rtogs bya rtogs byed lhan skyes la// bya byed med pas skye med rtogs// chos rnams gnyis su med pa la// rtogs bya'i dus su rtogs byed med// rtogs byed dus su rtogs bya med// 'khor ba'i dus su myang 'das med// myang 'das dus su 'khor ba med// 'khrul dang ma 'khrul de dang mtshungs// rtogs bya rtogs byed tha dad la// rmongs pa gnyis med rang byung zer// 'byung rgyu yod pas 'gag rgyu yod// de ni 'khrul pa'i rang byung ngo// rtogs par bya byed gnyis byung nas// gnyis med zer ba'i rmongs pa dang// thabs sgo du mas rtogs byas nas// rang byung bya bral zer ba dang// rmongs pa kha cig 'di skad zer// rtogs pa rkyen dang thabs la rab// rtogs pa'i thab ni bya bral zhing// rang byung yin no zer ba yod// rtogs dang rtogs don so so la// gcig ni rang byug gcig rkyen byung ba dang// gcig ni bya bral gcig byas pa// zer te de la 'di skad brtag/ de gnyis gcig gam tha dad brtags// tha dad gcig bem gcig rig ste// yang na gnyis ka rdzas su thal lo// yang na 'dus byas 'dus ma byas// yang na rgyu 'bras 'gal ba'o// gcig ni rtogs rkyen rag las bzhin// chos nyid rkyen la rag las 'gyur// de la sogs pa'i rkyen rnams byung// de nas mi rtog zhes na ni// chos nyid ma rtogs grol med pas// 'khor ba ste chad nyid du 'gyur// don dam kun rdzob gnyis ka rtogs par med zer na// bem po nyid du 'gyur ba'o// yang na chos nyid bya ba bral ba bzhin du// rtogs pa yang bya ba bral bar thal// kun rdzob rtogs su yod dam med// don dam mi rtogs don dam kun rdzob gnyis kar bstan// e ma don nyid ye nas spros bral la// ltos pa gnyis la brten pa med// 'khrul yang 'khrul pa song 'gyur med// ltar snang rang ngor rang dag pas// 'das chos kun grub ltos pa med// khyod kyis de ltar shes par gyis// zhes skye ba med pa'i gsang thig ste bcu bzhi pa'o//// bcom ldan 'das rang rig ngang la phyag 'tshal lo// rang gis rang rig ye shes dang// gzhan gyis gzhan rig rnam rtog gnyis// blun pas nam yang shes mi 'gyur// rig tu yod pa'i rang rig dang// gnyis med bya bral rang rig gnyis// sems kyi yul dang rang rig yul// 'khrul pa'i sems dang byang chub sems// sems min logs nas sems 'dod dang// sems dang sems nyid rtag tu 'dres// 'byung rgyu yod pa'i rang byung ni// dung nyid dkar por rang byung la// bya dang byed pa ga la yod// chu nyid rang rlan la sogs la// bya dang byed pa yod dam med// yod na rang rlan ci phyir yin// blun po kha cig 'di skad zer// rig par bya dang byed pa yis// bya bral rtogs par byed do zer// bya dang byed po gnyis 'dus nas// bya ba la rtogs par byed pa na// 'dus nas byas te byas nas bya bral 'dod pa blun// rig pa byar med rig pa min zhe na// dper na dung gi dkar po yang// dkar bar byar med dkar min nam// de ni dkar po rang yod do// zhe na 'dir yang gnyis med ye shes dang// rnam par dag dang spyod yul dag/ la sogs mtshan tshod de la bya// rig par bya dang byed med na// bya ba bral phyir rang rig go/ gal te rig par bya yod na// rang byung rang rig ci phyir yin// rig pa rkyen gyis skyes pa na// rkyen zhes gnyen pos cis ma 'jig/rang rig chos nyid don rtogs dang// rkyen rig chos can brtag rtogs gnyis// rtogs par 'dra ste 'khor 'das gnyis// rang rig rgyun tu ma gnas pas// rmongs pa kun la mi 'thad de// de la 'di skad brtag par bya// khyod rang nyid kyi gzhung ltar na// da ltar rtogs pa yod dam med// yod na rgyun du gnas mi gnas// gnas na gzung 'dzin yod dam med// yod na rtogs pa ci phyir yin// med na mngon sum nyid dang 'gal// rtogs dang sangs rgyas gcig mi gcig/ gcig na sangs rgyas skye rgas can// ma rgyas ci gnod rgyas ci phan// mi shes mkhas pa 'di skad zer// rkyen gyis rtogs te rang rig yin// rtogs dgos bya bral sgom dgos lhun gyis grub// dper na 'jig rten chos la ni// me yin 'di las grang ba med// tshig de khyod la 'thad mi 'thad// de bas rang byung rten 'byung gnyis// rgyu 'bras 'khor 'das mkhas pas rig/rang byung tha snyad yang dag rig/ tha snyad 'byung rgyu 'byung bzhi yod// de las de byung de ltar byung// de ni rten cing 'brel par 'byung// yang dag rang byung 'di lta ste// 'khrul blo zad pa tsam nyid la'o// mdor na dngos po'i gnas lugs ni// blo dang blo yul ma yin pas// lta sgom spyod 'bras dam tshig dang// shes rab snying rje blo yul min// de nas dngos po'i gnas lugs te// blo dang blo yul dag pa yis// dag pa yin te yang dag min// blo yul byung nas dag pa ni// dag pa yin zhing yang dag yin// gal te bzhi la blo yod na// blo de ji lta bu zhig gis// yul ni ji lta bu zhig gis// de men lam la ci yod kyang// de nyid ma yin de las gol// skyes pa dang ni rang byung yang// tshig 'dra 'dra yang don mi 'dra// 'khrul ba'i rang byung dag skyes cig/ chos nyid rang byung zhes bya ba// ma byung ma skyes snying po ste// 'di las 'di 'byung 'di ltar 'byung// 'di yis 'di 'byung 'di dus 'byung// 'byung bya 'byung byed med pa yis// rgyu rkyen med par rang byung ste// gal te de rnams gang yod kyang// rang byung man te rten 'byung yin// mdor na rten 'byung dngos yin no// rang 'das chos yod ma srid cing// de bas blo bur blo dag pas// 'das pa'i chos rnams lhun grub ste// yul sems dmigs pa ci yang med// khyod kyis de ltar shes par gyis// zhes rang byung dang rten 'byung khyad par gyi gsang thig ste bco lnga pa'o//// bcom ldan 'das dang rig ngang la phyag 'tshal lo// theg pa'i bye brag bsam yas kyang// mdor bsdus gzhi lnga lam lnga yin// rig pa'i gzhi lnga 'di lta ste// shin tu so sor rig pa dang// so sor ma yin rang rig dang// so sor yang dag rang rig dang// so sor ma yin rang rig go/ gzhi ni bya ba'i rang rig ste// cig ni rang rig bya bral yin// gzhi ni 'dzin pas bsags pa ste// cig ni rtog pa dag pa'o// zhin bdag yod rang rig ste// gcig ni bdag med dngos zhi'i rig/ bdag dang rang dang rig dang gsum// chos nyid rig pa ma yin pa// gsum ni so so ma yin pa// blun pas bdag med rang rig 'dod// de ni mkhas te mi shes pa'o// de la lam lnga 'di lta ste// shin tu so so nyan thos spong// so so ma yin rang rgyal 'gegs// phyed spyod phyed sgrub sems tsam ste// yul sems ma grub dbu ma sbyangs// yul sems gnyis med bya bral bsngags// lam lnga de ltar shes par gyis// rang rig lnga ni 'di lta ste// shin tu so so'i rang rig ni// don dam kun rdzob gnyis kar ni// yul sems so sor 'brel ba yod// yul nyid so so sems so so// de kun 'brel ba mtshungs par ldan// sems ni yang dag yul brjod bral// de yi 'brel ba gong dang mtshungs// so so yang dag rang rig ni// yul ni kun rdzob 'khrul snang ste// sems ni rag rig yang dag gsal// de yi 'brel ba rgyun dang ldan// so so yang dag rang rig ni// rang ngam gzhan zhes btags pa kun// btags pas rang gis stong// thams cad spros bral bdag nyid cig/ so so ma yin rang rig ni// yul sems so so ma yin te// thams cad so so ma yin pas// rig dang rig bya so so min// ngo bo gnyis su med par 'brel// gnyis ni rang rig rig pa ste// theg pa sems tsam rang gi rig/ theg pa dbu ma rang gis rig/ gzhan ni gnyis kyi bye brag ste// rig pa bya ba bral ba ni// chos nyid don rig lhun gyis grub// de ni che ba lnga dang ldan// sa bcu pha rol phyin bcu rdzogs// lam lnga gzungs dang ting 'dzin rdzogs// gzhi ni chos can cig chos nyid// gzhi ni rten 'byung cig rang byung// gzhi ni skyes pa cig skye med// gzhi ni 'khor ba'i lam yin te// gcig ni rnam dag lam chen yin// re re la yang lam lnga ste// mdor sdus lnga ni 'di lta'o// shin tu so so tshogs kyi lam// so so ma ning sbyor ba'i lam// so so yang dag mthong ba'i lam// so so rang dag sgom pa'i lam// so so ma yin mthar phyin lam// 'bras bu lnga ni 'di lta ste// so so rang re'i 'bras bu lnga'o// so so'i 'bras bu dgra bcom pa'o// so so ma ning 'bras bu bse ru lta bu'o// so so yang dag 'bras bu shes dag pa ste// bla med byang chub pa'o// so so rang dag 'bras bu bdag nyid be ba'o// so so ma yin 'bras bu lhun grub pa'o// rig lnga lam lnga'i bye brag ni// nyon mongs lnga dang 'gro ba lnga// 'byung ba lnga dang phung po lnga// 'khor 'das kyi bsdus pa'i chos// rig pa'i gzhi lngar rgyal pas gsungs// de las gzhan pa'i chos med kyis// de yi bye brag shes par gyis// skal ldan blo la go bar gyis// zhes gzhi lnga lam lnga'i// gsang thig ste bcu drug pa'o//// bcom ldan 'das gcod byed rgyal po la phyag 'tshal lo// e ma 'ching bar ma byed dang// thong thong chags sdang thong// rtogs byed med kyis ma chags shig/ rtogs yul med kyis ma chags shig/ rtogs pa lta bu'i sdig pa med// sgom mkhan med pas ma chags shig/ sgom yul med kyis ma chags shig/ sgom pa lta bu'i sdig pa med// sangs rgyas med kyis ma chags shig/ sangs rgyas lta bu'i sdig pa med// thams cad chos ni gnyis med la// rgya ba'i bdag med ma chags shig/ rgya ba'i yul med ma chags shig/ ma sdang sdang bas thams cad 'ching// chos rnams thams cad dbyer med la// 'khor ba ma spongs spongs yul med// spong ba'i bdag kyang yod ma yin// don la yul dang rnam rtog med// yod na sdang bas ci zhig phan// nyon mongs med kyis ma sdang zhig/ yod na sdang bas ci zhig phan// med na sdang ba bya mi dgos// de kun 'khrul pa'i snang ba yin// 'khrul pa yan phyir spangs sgrubs med// bya dang byed pa 'khrul pa yin// 'khrul pa yin phyir bya byed med// bya dang byed pa 'khrul pa yin// 'khrul pa yin phyir bya byed med// thong 'khrul la dam par ma 'dzin dang// de kun dam par mi 'dzin na// yid kyi g.yo ba ji ltar 'byung// yid nyid dam pa ma yin na// g.yo dang mi g.yo su yi yin// yid gcig dam par yod mthong nas// g.yo la sdang zhing mi g.yo chags// blun po de yis don mi mthong// de bas chags sdag kun gyi gzhi// bdag gzhan legs par btang bar byos// don la btang bya btang byed med// de nyid legs par btang ba yin// thig le bdag gzhan yongs med kyis// yod na thig le yong min gyis// thong thong nyes pa'i rtsa ba thong// bdag nyid grol na sangs rgyas gzhan med de// bdag nyid grol ba'i dus nyid du// de ma thag tu chags pa zad// de ma thag tu 'khor ba dag/ de ma thag tu mngon sangs rgyas// de bas skal ldan skyes bu yis// bdag nyid thong la ma rtogs cig/ bdag nyid thong la ma sgom zhig/ bdag gis chags sdang ma spongs bar// bdag nyid btang bar byas na bde// de ni kun bzang rdo rje sems// chags sdang bral ba nam mkha' bzhin// bya bral lhun grub bde chen la// pha rol phyin bcu sa bcu rdzogs// lam lnga sku gsum ye shes rdzogs// dus gsum bde gshegs thams cad kyis// bya bral lhun grub rdzogs pas bsngags/chos nyid rang snang gi dbyings su gshegs so// a ti rdzogs pa'i rgyud las le'u dgu pa'o//// a ti rdzogs pa'i rgyud rdzogs so//// rgya gar skad du/ a ti la b+he da/ bod skad du/ a ti spyi gcod kyi rgyud/ dpal rdo rje sems dpa' la phyag 'tshal lo// ro langs bde ba rangs pa na// pan tsa a mri ta bin du pra sha bin tu/ nam shrI pha la mun+t+ra man+t+ra e ka 'du ti ha li na ma/rol ba rgyun gyi thig le'i klong nas// byang chub shing drung du sku sprul nas// de yis 'jam dpal bshes gnyen dag la brgyud// mthing ka shu gu dag la bris pa'i glegs bam 'di// 'jam dpal bshes gnyen khyod la gdams par bya// zhes gsungs so// gleng gzhi'i le'u ste dang po'o//// thog ma'i sangs rgyas 'od mi 'gyur ba/ rtogs te sangs rgyas ma byung/ ma rtogs te sems can ma byung ba'i dus na/ gzhi dngos po'i gnas lugs ji ltar lags/ snang ba ni ji ltar snang/ ming du 'dogs na ji ltar 'dogs/ de las 'khrul pa ji ltar lags/ zhes zhus pas/ a ti spyi gcod bstan par bya// zhes gsungs so// a ti spyi gcod kyi rgyud las/ gleng gzhi'i le'u ste gnyis pa'o//// de nas bka' stsal pa/ snang ba ni rang bzhin gyi snang ba zhes bya'o// dus de tsam na gnas pa'i rtogs med kun gzhi zhes kyang bya'o// ming du 'dogs na mi zad pa'i mdzod kyang bya'o// spyi sa chen mo 'khor ba'i gzhi la/ sems can gyi thug pa/ chos nyid spangs pa'i klong zhes kyang bya/ rang snang gi nam mkha' zhes kyang bya'o// de'i rtsal las shes pa rkyang pa khyab pa'i shes pa/rgyu ba'i shes pa/ mi rgyu ba'i shes pa/ lung ma bstan gyi shes pa zhes kyang bya ste/ dus de tsam na thog mtha' med pa'i snying po zhes kyang bya'o// zhes gsungs so// a ti spyi gcod kyi rgyud las/gleng gzhi'i le'u ste gsum pa'o//// g.yo ba ni spyi sa chos kyi sku rtog med kyi sbubs nas g.yos/ sgo ni gsum nas 'byung ste/ gsal ba rtog med kyi sgo/ stong pa mtshan med kyi sgo/ gsal stong btsad med kyi sgo nas/ rnon po'i sgo byed nas khyab pa'i rig pa byung ste/ rig pa rkyang pa de la 'gro ba'i sgo med pas/ ma ning gi sgo bya/ rgyu ba'i rig pa'i phyir thon/ rtul po'i sgo phye/ mtshan ma'i rig pa shar/rno btul gnyis med kyi sgo 'gags pas// myong ba'i rig pa smin no// yan lag sgo dbye/ rig pa smin te/ chos dbyings rang byung gi sbubs zhes bya ste// sna tshogs la 'jug go/ zhes gsungs so// a ti spyi gcod kyi rgyud las/rig pa dngos su smin nas 'khrul pa'i dpe ste le'u bzhi pa'o//// de nas mtshan dang dpe byad longs skur 'khrul pa bka' stsal pa/ gsal ba snod kyi sgo/ stong pa bcud kyi sgo/ 'dzin pa ma zhugs pa'i sgo/kha dog gsal ba yan lag gi sgo/ mtshan ma rig par shar/ myong ba'i rig pa skyes/ rgyu ba'i rig pa yul 'od lnga la shar te/ dang po ci yin mnyam du shes pas/ bar du yin min gyi shes pa/ tha mar yin gdengs kyi shes pas gcad pas/yid 'khor lo gsum zhes te de la bya'o// dus de tsam na yar sangs ma rgyas/ mar 'khor bar ma 'khyams pas lung ma bstan gyi sgo zhes bya'o// bar der kun tu bzang pos rig pa ye shes kyi lde mig cig/'phags pa blo gros mi zad pa zhes bya ba mun pa smag tu gyur pa khang pa dgu rim gyi nang na yod do// de lta ru phyin pa/ khang pa dag po na mun pa gnag la 'jigs// gnyis pa na yam nag po za tshul gyi dbu// gsum pa na bdud lha sbyin gyis srog gcod/ bzhi pa na srin po'i rgyal po'i dbugs len/ lnga pa na ging la dkar po phyag na dung gi 'khar ba bsnams nas brdeg cing gsod/drug pa mun pa'i nang na me rlung gi ma bskyod par 'dug/ bdun pa nyi zla phrug gcig la shar nub med par 'dug/ brgyad pa na nor bu rin po che lha'i bu rnams rtse zhing snang/ dgu par phyin pas yid bzhin gyi nor bu rin po che 'od 'bar ba'i rtsar 'phags pa blo gros mi zad pa zhugs nas/kun tu bzang pos bka' stsal pa/ 'gro ba'i lam nor thar pa'i go yang 'gag/ ma rig rmongs pa thugs rje'i zhags pa bzung// 'phrul gyi sgo ma phyed pas mun pa'i nang du 'khyams// zhes zhus pas/ 'phags pa blo gros mi zad pas bka' stsal pa/ thams cad 'byed pa 'khrul gyi lde mig 'di// yid bzhin nor bu'i nang nas ston la sbyin// nyi zla'i sgo phye snang stong dbyer med 'byung// shes rig sgrau btags dgra la ltos// me mar 'od la lta nam mkha' gser gyi sgron ma ltos// zhes gsungs nas/ 'phags pa blo gros mi zad pa mi snang bar 'gyur ro// mtshan dang dpe byad las kun tu bzang por sangs rgyas pa'i le'u ste lnga pa'o//// khams gsum gyi sems can sems can du 'khrul pa gsungs pa ni/ gzhi rin po che gser gyi sgron ma nas/mi zad pa'i nor la spyad pas/ kun la snyoms pa'i zang ma la sbyin/ las kyi lus blangs rgyu rkyen dus kyang mtshungs// ma rig le los snyoms las dmar la sbyar// srid len gnyis kyi dus mtshungs rig pa yul dang mtshungs// 'byung du thabs med ri dwags rgyar tshud 'dra// ma rig rmongs pa'i sems chags sdug bsngal med skyes dang// las kyi phyir thon bag chags sna tshogs ltas// pha dang mar bltas dgra dang gnyen du bzung// yul khang khyim khang dag la rten bcas nas// ma bcad yul la nga dang bdag gir gzung 'dzin// mi sdod dbugs chad gar 'gro shes par gyis// 'gro drug las kyi sdug bsngal cha mchis sam// 'gro drug rtag tu 'khyams pas don dang rtsang phrad de// de bas man ngag gdams pa 'di la ltos// zhes gsungs so// a ti spyi gcod kyi rgyud las/ khams gsum du 'khrul ba'i le'u ste drug pa'o//// man ngag gdams pa bstan du gsol// bka' stsal pa/ phyi'i me long ltas tsam na// 'gro drug srid pa wa le gsal// 'gro drug snying po sbubs na gnas// ma dag 'khrul pa'i snang ba de// rang grol yin par rtogs tsam na// rang byung ye shes dgongs pa thob// nang gi me long ltas tsam na// rgyud drug chags sdang wa le gsal// rgyud drug rang gi sbubs su gsal// rgyud drug rang grol du shes tsam na// rang rig ye shes kyi dgongs pa thob// gsal ba'i me long ltas tsam na// 'gyu ba thogs med du wa le gsal// rang shar ye shes kyi sbubs su gsal// 'gyu ba rang grol du shes tsam na// lhag mthong ye shes kyi dgongs pa shar// lhun grub srid pa'i me long gi nang na thams cad gsal// ye shes dri med kyi dkyil 'khor du thams cad rgyas// mtshan ma sna tshogs kyi me long du thams cad mchi// chos sku me long gi nang na rtog pa skye mi srid// sprul sku me long gi nang nas// 'gyu ba med na ye shes gsal mi srid// 'bras bu thig le nyag gcig la// sku gsum 'grub mi srid// rnal 'byor ye shes ngos zin dus su shes pa rgyun gnyis su 'char mi srid do// zhes gsungs so// a ti spyi gcod kyi rgyud las/ me long gnad du brdeg pa'i le'u ste bdun pa'o//// yang bka' stsal pa/ rig pa chos nyid kyi sku'i don rtogs na// 'gyu ba nyag thal bcad pas dmyal ba yang rdzogs pas phyir gcad// thig le rang grol du shar bas lha ma yin rdzogs te spyir bcad// byang chub sems kyi 'od gsal rin po che la longs spyad pas lha rdzogs te spyir bcad/'gro drug rang grol du shes na/ khams gsum lus dang bag chags 'khrul te mchi'o// zhes gsungs so// a ti spyi gcod kyi rgyud las/ 'gro drug g.yang sa bcad pa'i le'u ste brgyad pa'o//// yang bka' stsal pa/ 'od gsal du bu bcad nas rig pa la stegs bcas pas/ mu stegs kyi lta ba spyir bcad/ thig le zang thal yid la 'dogs pas/ yi dags rdzogs te phyir bcad/ thig le sbyor ba las byol nas zang thal du song bas/byol song rdzogs te phyir bcad/ de la zhen pa mi mnga' bas/ mi yang rdzogs te phyir bcad/ rang don 'od gsal zab mo la spyad pas/ rang sangs rgyas sangs rgyas kyi lta ba spyir bcad/sgrib pa thams cad zang thal du byang nas/ 'od gsal du sems dpa' byang chub sems dpa'i lta ba spyi bcad/ kri ya ni 'od gsal du bkri nas yang dag pa'i don rtogs pas/ kri ya'i lta bu spyir bcad/'od gsal rgya chung du ma yin te snang srid yo ga 'od gsal du rtogs pas/ yo ga'i lta ba spyir bcad// thams cad ma lus par 'od gsal chen po'i ngang du rdzogs pas yo gsal bas// ma hA yo ga'i lta ba spyi bcad/skye ba med pas a gnyis su med pas nu rtses byas te/ thams cad gnyis su med pas/ a nu'i lta ba spyir bcad/ thams cad 'od gsal ngang rdzogs pas// lta ba thams cad che bas na// rdzogs chen gyi lta ba spyir bcad pas// bde bar gshegs pa sku dang ye shes su 'khrul pa'i gol sa bcad/ ces gsungs so// a ti spyi gcod kyi rgyud las/ mtshan ma lam gyi gol sa bcad pa'i le'u ste dgu pa'o//// yang bka' stsal pa/ ye shes ngos bzung bshad par bya// zhes gsungs so// de nas 'gag pa med pas ye shes kyi skye ba bshad pa/ dang po ye shes ngos bzung ba la gsum ste/ 'gyu ba de la zhag gcig tu blta ba dang gcig/nub gnyis pa 'od gsal thun du bcug la bskor ba dang gnyis/ nub gsum pa 'od gsal gyi lam du gzud pa dag gsum mo// dang po zhag gcig tu ltas pas/'gyu ba bun long gi song nas/ mtshan ma zhi ba ni zhi gnas rtse gcig gi bsam gtan zhes bya ste/ gang zag bdag med nyan thos dang khyad med do// snang ba 'di stong pa la me long gi skor ma ltar mthong ba ni/ chos kyi bdag med kyi bsam gtan de/ des kyang sangs mi rgya bas/ phal cher lta ba kha rkyangs dang de gnyis na gnas so// dbu ma'i lta bar kyang ma bslebs so// nub gnyis pa 'od gsal du bskor ba la gsum ste// snang ba 'od gsal du thun gsum du bskor bas ni phyi nang rang snang du ngo sprad de/ rta dkyus pa'i 'drog la me tog chad pa dang 'dra'o// thun gsum tshogs bdun bskor bas nang snang bar rang grol te/ dug la sngags kyi thebs pa dang 'dra'o// thun gsum du 'gyu ba gsang lam 'od gsal du bskor bas gsung snang bar grol du shar te/ ga pur tsha ba nad kyis zos pa dang 'dra'o// de ni thun tshad bzung ba bstan pa'o// da ni 'od gsal lam du bzud pa bstan te/ nub tha ma la thun gong du bshad pa 'khor lo de bskor ba'i gting la ji tsam gnas lta ba shin tu gces te/ 'khor lo dang gnas pa gsum cha gsum gnyis mgo la 'char ram/phyed 'char ram/ bzhi car 'char ram/ lnga cha 'am/ drug cha'am/ ji tsam 'char ba ni/ lam du 'dzud pa yin te/ dbang po rab 'bring rtags dang sbyar/ mi 'khor ba'i dbang med pa'i thabs ni gong ma snang ba bun ne bde lam bzhag par/mig rtsa mthong byed du gyur pa la snang ba gtad pas/ 'gyu ba de kyus tser byung ba'i dus su/ 'bras bu dril sku la bskor bskul/ snang ba la yan du chug/ yang bskul gyin bskor/btsun mo zo chu rgyud ma 'dra ba mi dmigs// skyi ser 'dra ba'i 'gyu ba/ 'khor lo lta bu'i nyams/ nyi zla lta bu'i don/ dper na 'khor lo sgyur ba'i rgyal po de rin po che gser gyi khang pa la sogs pa dang/rin po che'i steng rnams nas 'gro ba las thog mi 'gro ba bzhin/ 'gyu ba 'od gsum du bskor na 'od gsal gyi ma la las mi 'dra'o// gsal gdab sgrar 'gyur du bskor/ wal gyi byung ba'i dus su mal du gzhug/chu bo rgyun gyi rnal 'byor ces kyang de la bya// rdzogs pa spyi gcod ces kyang de la bya// zhes gsungs so// ye shes ngos bzung ba'i le'u ste bcu pa'o//// yang bka' stsal pa/ rtags kyi rim pa bshad par bya/'gyu ba ngos zin na ye shes mi 'char mi srid de/ dang po lus 'dar snyam byed pa dang/ 'gyu ba de ngos zin pa'i rtags/ de nas lus 'gul mi shes pa snyam byed pa 'am thang nga ma 'ong ste/ 'gyu ba de sangs te 'ong ba'i rtags/de nas 'dag pa la sgor phor btab pa'am/ spos dang spos rgya lta bu 'ong ste/ ye shes 'char ba'i rtags// 'gyu ba de la 'khor lo ma bskor kyang 'od gsal skam du zhugs pa ni/'od gsal lam du tshud nas brtan pa thob pa'o// bkrag shes mdangs gsal rig pa khong nas grol// skran dang nad kyang 'byang bar byed pa'i gdams pa 'di// rnal 'byor nyams su len pa 'ga' rnams la// bla ma dam pa'i rkyen du shar nas kyang// myur du gdams pa 'di dang phrad par shog/ ces gsungs so// 'jam dpal bshes gnyen rjes su yi rang ba'i le'u ste bcu gcig pa'o//// a ti rdzogs pa gsang ba spyi gcod kyi rgyud las/

CLOSE WINDOW