CLOSE WINDOW

Gpb036.018
བོད་ཡིག

/ phyogs med rang grol mya ngan 'das// ma rig dus zad las zad 'das// 'khor ba tshe zad mkhyen gsum thob ces bya// rtogs pa sku dang ye shes thob// ye shes don ni 'od shar gsal// sgrib med gsal 'tsher rang bzhin zer la rol// ma rtogs snod bcud gnyis su 'khrul// dper na me long dag pa la// rkyen gyi dbang gis so sor gsal// rkyen gyi dbang gis snang na yang// snang ba ngo bor gos pa med// de bzhin rig pa chos sku la// rtsal snang ma 'gags sna tshogs shar// shar yang rang rig gcig pu las// rig pa'i ye shes brjod du med// dus dang gnas skabs thams cad du// dngos med ye shes dag par gnas// sgrib med gdangs gsal ngang du rol// lam pa'i dus la ye shes lnga ma rdzogs// me long ye shes mnyam nyid gsum la gnas// gsal ba ma 'gags me long dang// tha dad snang ba so so ste// gdams ngag tha dad mnyam sbyor ston// mnyam nyid ye shes rtogs pa lam// ye shes bya ba rang la rdzogs// thogs med bya grub ye shes de// ye shes lam du 'bras bu 'char// ye shes lnga ka ldan pa'i 'od snang ba// lnga ldan ye shes bar do'i lam la 'char// longs sku mkhyen pa'i 'od zer gdangs// ye shes lnga ldan mkhyen spyod shar zhes bya// rdzogs ldan chen po ye shes snang ba ni// mi gnas ye shes rang la shar ba'i tshe// sku gnyis chos sku'i klong du rdzogs zhes bya// gzugs sku gnyis kyi snang ba yang// rang la mi gnas rnam dag pas// 'ja' tshon sgyu ma rang snang yang// rig pa'i rtsal du byung ba dang// rtsal gyi rnam dag gcig tu bstan// rig pa'i rtsal snang ye shes lnga// de yi rtsal snang 'od zer lnga// 'od lnga bag gdul 'byung ba la// 'byung ba rtsal ni so so ba// nam mkha' stsal gyis go phye nas// rlung gis g.yo zhing chu yis sdud// sa yis 'degs byed me yis smin// dwangs snyigs gnyis kyis 'byung bar shar// snod bcud phyi nang gnyis su bstan// thig le phyi nang rtsal zhes bya// gzhan las ma byung rang las byung// 'khor 'das dbyer med rtsal gyi ye shes gsal// de ltar shar bas rang shar ye shes bya// snod bcud 'khor 'das sku gsum rtsal gyi ye shes zhes bya'o// seng ge sgra'i dgongs pa nyi zla kha sbyor las/ ye shes rgyas par bshad pa'i le'u ste bcu dgu pa'o//// kye/ bcom ldan thugs rje thabs kyi bdag/ sku gsum rtsal du ma 'gags pa// rgyan dang rol pa bshad du gsol// bka' stsal pa/ rgyan rol ngo bo nges tshig dang// dbye ba rnam pa bstan pa ni// ngo bo dbye ba'i 'char bshad bya// nges tshig mdzes pa'i cha la btags// chos nyid rgyan dang chos sku'i rgyan// chos nyid dbyings la chos skus brgyan// chos sku rgyan du sku gnyis brgyan// mtshan nyid 'dzin pa'i 'od lnga yang// dbyings dang ye shes 'bral yul rgyan// dper na gser la g.yu spras 'dra// mdzes pa'i phyir na rgyan ces bya// chos nyid stong pa chos sku rig pas brgyan// stong pa'i dbyings la ye shes mdzes// chos kyi sku la ye shes brgyan// yon tan longs sku 'gag med mdzes// ye shes longs sku gsung la thugs rjes brgyan// 'gro drug sdug bsngal gnas nas 'dren pas sprul skus mdzes// byas pa'i rgyan ma yin te lhun grub shugs las 'char// de nas rol pa'i don bstan pa// chos nyid dag pa'i rol ba dang// 'khor ba rang rgyud rol ba'o// dag pa chos nyid rol pa ni// ma bcos pa yi chos nyid la// ma g.yos pa yi ngang nyid gsal// rang bzhin 'gag med ye shes shar// bag dang bral ba'i nam mkha' la// 'byung ba bzhi yi gdangs shar bzhi// snang la rang bzhin med pas mkhyen pas grol// ma 'gags rang gdangs 'gro la 'od gsal lo// 'khor ba rang rgyud rol pa ni// phyi nang snod bcud bsdus pa'i chos// gzugs su snang ba sku yi rgyan// chu zla bzhin du gzung dang bral// sgra skad thams cad gsung gi rgyan// brag cha bzhin du dngos ma grub// dran rig thams cad thugs kyi rgyan// nam mkha' bzhin du dngos ma grub// gzung 'dzin rang rgyud ma grub pas// ye shes rgyu ma'i yul la rol// lus ngag yid gsum sku gsung thugs kyi ngang du grol// sku gsum rgyan dang rol bar kun shar bas// rtog ldan rgyan dang rol ba kun snang ste// snang grags sgyu ma rmi lam dpe'i rang bzhin med// yod pa med par rtogs pa rnam rtog zil gyis non// med pa yod par sku gsum rtogs pas ye shes nang nas shar// man shel sku la 'od lnga mi 'gag pa// chos kyi sku la ye shes brgyan pa'i dpe// seng ge sgra'i dgongs pa nyi zla kha sbyor las// rgyan rol pa'i le'u ste nyi shu pa'o// kye// bcom ldan thugs rje thabs kyi bdag/ sku gsum dpe yis bstan du gsol// bka' stsal pa/ nyi ma'i snying po 'od zer 'byung ba ltar// sku gsum 'od zer 'phro ba'i bdag nyid do// rma bya sgo nga kha dog lnga ldan pa// sku gsum ye shes kha dog lnga ldan dpe// man shel rkyen dang phrad pas 'od snang phyir 'byung ltar// chos sku'i ngang las sku gnyis nang na gsal bar 'char// sgo nga bye'u phrug smin pa phyir 'byung ltar// longs sku ye shes rtsal rdzogs sprul sku phyir 'byung 'gro don byed// rgya mtshor bu bran 'phro zhing 'du ba dang// sgyu ma'i gzugs brnyan ston cing sdud pa ltar// rgyan dang rol pa chos nyid ngo bo sdud pa'i dper bstan// seng ge sgra nyi zla kha sbyor las// sku gsum dpe'i le'u ste nyi shu gcig pa'o//// kye/ bcom ldan thugs rje thabs kyi bdag/'gro ba 'dren pa'i sprul sku bshad du gsol// bka' stsal pa/ gdod nas rnam dag chos sku chen po las// sku gnyis rol par bstan pa'i dpe// nam mkha' lta bu'i chos nyid la// man shel lta bu rig pa gsal// nyi zer lta bu'i thugs rje byung// nad pa lta bu'i rigs drug la// mun pa lta bu'i 'khrug pa gsal// dgongs pa'i ye shes bdud rtsi yis// dug lnga rang rgyud nad gzhi g.yos// zhes seng ge sgra nyi zla kha sbyor las/'gro ba 'dren par bstan pa thugs rje'i le'u ste nyi shu gnyis pa'o//// kye/ bcom ldan thugs rje thabs kyi bdag/ sbubs kyi gnas lugs bshad du gsol// bka' stsal pa/ ngo bo nges tshig dbye ba mtshon dpe bstan// ngo bo bstan pa'i sku yin pas// sbubs shes pa ru btags pa yin// dbye ba rnam pa gsum yin te// rin chen sbubs dang 'od kyi sbubs// bag chags sbubs dang gsum yin no// rin chen sbubs kyis mtshan nyid ni// rnam dag zang thal gsal la 'tsher// 'gyur med 'gag med ngo bo nyid// 'od 'bar kun gsal ye shes sku// nyi ma'i snying po lta bu rin chen chos sku sbubs// 'od gsal sbubs na rang rig dri med pa// 'gag med bde chen ye shes 'od kyi sbubs// sum cu rtsa gnyis mtshan 'chang ba// 'ja' tshon 'bar ba'i tshom bur mdzes// lhun sdug gsal 'bar gzi brjid ldan// 'od kyi sbubs te longs sku yin// bag chags sbubs su bstan pa ni// sgong dang drod dang mngal skyes dang// pad+ma dag las rdzus skyes pa// phung po khams dang skye mched dang// tshogs brgyad sems dang bcas pa'i lus// sha khrag sbubs te sprul sku dang// 'gro ba drug gi sems can rnams// bzhugs dang gnyen pas sbubs shes bya// la la chu bur lus dang ni// yid dang 'od la gnas pa'o// yon tan kun 'byung rin chen sbubs// snang la dngos med 'od gsal ba// 'ja' tshon chu zla nyi zla'i dpe// 'ja' tshon lta bu 'od gsal zang thal dpe// 'od sbubs longs skur dper bstan pa'o// rnam rtog mthu brtas bag chags sbubs// sgyu ma rmi lam dpes bstan mi rtag stong// zhes seng ge sgra nyi zla kha sbyor las/ sbubs gsum dbye ba'i le'u ste nyi shu gsum pa'o//// kye/ bcom ldan thugs rje thabs kyi bdag/ sku gsum spyan gyi 'char lugs gsung du gsol// bka' stsal pa/ spyan gyi ngo bo dbye ba bcas// de yi dbye ba rdo rje 'dzin pas zung// chos sku ye shes chos nyid kyi// spyan ni dbyer med rtse gcig gzigs// longs sku ye shes spyan ni rtog med zang thal gsal// sprul sku shes rab spyan gyis 'khor 'das so sor gsal// lha yi spyan gyis bag chags zad par gzigs// sha yi spyan gyis ting 'dzin rnam dag gzigs// chu bur spyan ni 'gro ba yongs la gsal// spyan gyi nges tshig ma bcos 'gag med gsal// mtshan nyid sgrib med dper na nyi ma'i snying po ltar// kye rigs kyi bu dag chos nyid spyan zhes ji ltar gdags she na// chos sku thugs kyi khyab bdal la// longs sku ye shes khyab bdal la// rnam rtog mi mnga' chos nyid ngang du sa le gzigs// chos nyid ngang la sgrib pa med pas chos kyi spyan zhes bya// longs sku ye shes spyan gyis skad cig thams cad du// ye shes 'od gsal gdangs la ci yang rtog med gsal// sprul sku shes rab spyan gyis ldog gyur kun 'byung gzigs// byang sems lha yi spyan gyis mngon shes gzhan sems gzigs// sha yi spyan ni gsal la mi rtog rang rig go/ chos sku'i spyan gyi zer las longs sku spyan gyi bum pa lnga// rang shar ngo bo nyid las ngo bo nyid sku shar// longs sku spyan gyi zer las thugs rje yi ge drug/'a dang a dang ha dang sha dang sa/ ma ste ye shes spyan gyi zer la rang bzhin bzhugs// sprul sku spyan gyi zer las rdzu 'phrul 'gro bar byed// chos sku spyan gyis shar rings yul snang thag kyang chod// snang 'gyur chos nyid ngang gi snang bar gsal// ye shes 'gag pa med par yid kyang ches// longs sku snang ba 'od snang gdangs su ngo yang shes// sgrib med gdangs kyi ngang du yid kyang ches// mkhyen pa'i rang gsal shar bar thag kyang chod// sprul sku snang ba sgyu ma zang thal ngo yang shes// 'khrul pa rmi lam lta bur yid kyang ches// ye shes rtsal gyi gdangs su thag kyang chod// seng ge sgra yi dgongs pa nyi zla kha sbyor las// sku gsum gzigs snang dag pa spyan gyi le'u ste nyi shu bzhi pa'o//// kye/ bcom ldan thugs rje thabs kyi bdag/ sku gsum 'od zer ji ltar 'char ba gsung du gsol// bka' stsal pa/ chos sku stong zhing 'gag med kyang// longs sku ye shes sgyu lus sku// sprul sku ma nges gang 'dul 'char// sku gsum ye shes rig pa'i rtsal// stong nyid 'od gsal rig pa'i snying po can// rtag chad mtha' 'das 'od zer phung po nyid// sku gsum dag pa ye shes sgyu ma nyid// 'od zer rnam lnga ji ltar 'phro ba ni// ye shes lnga yi rtsal snang 'char// shes rab stong pa ye shes 'gag med snying po dang// shes rab mi g.yo mnyam nyid 'gag med snying po dang// shes rab rgyun chad med pa 'gag med snying po dang// shes rab zag med mi 'gag snying po dang// shes rab 'gyur ba med pa mi 'gag snying po lnga// byas rtsol med pas rgyun gyi 'od zer 'bar bar gnas// de nas sku gsum ston pa ye shes snying po can zhes bya// de nyid rang bzhin dag pa'i dbyings nas 'od zer 'phro// sku gnyis chos sku zer 'od la// rol pa'i ye shes 'od 'phro ba// kha dog lngar ni ma 'dres 'tsher// gsal dang dro dang bsil ba dang// yang dang yangs shing khyab pa'i bdag/ ye shes 'byung lnga'i cha 'dzin pa// 'od zer 'phro ba'i rang bzhin ni// sangs rgyas kun gyi sku la 'char/gcig pu rab tu che ba'i lha// nam mkha' nyi ma'i tshul du gsal 'tsher ba// rdo rje lta bu'i ting 'dzin la// 'du 'bral med par dbyer med bzhugs// seng ge sgra nyi zla kha sbyor las/ chos sku ngo bo nyid las ni ye shes 'od zer rnam pa lnga 'gag med 'byung ba'i le'u ste nyi shu lnga pa'o//// kye/ bcom ldan thugs rje thabs kyi bdag/ longs sku'i 'od zer ji ltar 'char// thabs kyi bdag nyid gsung du gsol// bka' stsal pa/ sangs rgyas ngo bo rang bzhin ni// longs sku'i 'od zer dpag mtha' yas// ye shes 'od zer byung lugs ni// ma 'ongs sngon rol thog ma'i dus// sangs rgyas mi 'gyur ljags kyi pad+mo las// gsang ba'i bdag po rjes su yi rang ngo// rgyud kyi rgyal po bskal ba dum bu 'bar ba'i rgyud// mkha' 'gro ma'i lag nas byung ba rdzogs so//// rgya gar skad du// rad na bi sha tig sna tan tra// bod skad du// rin po che sna tshogs ral gri'i rgyud// bcom ldan 'das lhun gyis grub pa'i rgyal po la phyag 'tshal lo// 'byung ba rtsa ba ston pa'i dus dag tu// 'og min yangs la snang ba'i gnas dag tu// ston pa'i ston pa kun tu bzang po des// sdud pa po rdo rje sems dpa'i 'khor rnams la// bya ba las kyi rim pa 'di bshad do// yan lag rtsal gyis snang ba'i dngos po la// rgyud dang 'bras bu tha dad 'dod pa la// dge sdig las kyi 'bras bu so sor byed// gnyis med gnyis kyi dngos po so sor bshad// gleng gzhi'i le'u ste dang po'o//// ston pa'i ston pa kun tu bzang po la// sdud pa'i gsang bdag rdo rje sems dpas su// rtsal grub pa yi gnas 'di gang du bshad/ 1/ rtsal gyi maN+Dal gang la ji ltar dbul/ 2/ rtsal gyi maN+Dal tshad de ji tsam bya/ 3/ rtsal gyi maN+Dal rgyan ni ci yis bya/ 4/ rtsal gyi maN+Dal phul ba'i dgongs pa gang/5/ ston pa'i ston pa kun tu bzang po des// rtsi shing nag tshal me tog brgyan pa'i gnas// nyams dga' yid 'ong dben pa'i gnas de ru// 'tshogs pa'i yid 'ongs bsags pa'i pho nya dang// 'phrul pa'i lha mchod lha yi rdzas rnams dang// 'bol ba'i stan la 'dus nyid legs 'dug ste/ 1/ srog chags med pa'i sa gzhi snum pa la// ba yis rnam lngas legs par rab brdzis la/kha dog nag po khru gang tshad du bya// zlum zhing mtho ba grwa zur med par bya/ 3 cha mnyam yid 'ong mdzes pa'i maN+Dal la// sman lnga spos lnga snying po rnam lnga yis// rin chen lnga dang legs par byugs byas la/ 5/ gser dngul me tog rin chen rnam lnga 'am// chu dang thang skyes mdzes pa'i me tog kun// chos sku spros bral de la dbul ba'i phyir// tshom bu lnga ru legs par mnyam la dgod// ye shes lnga yi ngo bor sbrul la dbul// sangs rgyas dkon mchog sngags 'dis dbul bar bya// na mo b+hud+ha ya maN+Dal pu dza sa ma ye hUM// mdzes pa'i me tog rim pa dgur bkod do// theg pa'i grangs dang rim par sbyar byas la// bstan pa'i chos rnams kun la dbul// na mo d+harmA ya maN+Dal pu dza badzra sa ma ye hUM// me tog tshom bu gsum byas la// dge 'dun bden pa rnams la dbul// na mo sang g+hA ya maN+Dal pU dza sa ma ye hUM// 2maN+Dal phul ba'i dgos pa 'di 'byung ste// maN+Dal rnam gsum rim gyis phul ba yis// sgrib pa rnam gsum rim gyis 'byang bar 'ong// pha rol phyin drug dbang du rdzogs pa'o// sa dang lam nye myur du thob par 'gyur// dkon mchog gsum gyi rtsal 'di spyad pas// sku gsum dbyer med chos sku don rtogs 'gyur// rtsal snang maN+Dal bya zhing dbul ba'i le'u ste gnyis pa'o//// ston pa'i ston pa kun tu bzang po la// sdud pa'i gsang bdag rdo rje sems dpas su// yan lag rtsal du snang ba'i chos rnams la/ sems nyid gzung ba'i thabs ni du zhig mchis/ sems nyid bzhag pa'i thabs ni du zhig mchis/ sems de zin pa'i tshad ni ji lta bu/ston pa'i ston pa kun tu bzang po de// sems nyid gzung pa'i thabs ni 'di gsum ste// dang po sems kyi zhi la phar brtsal bas// sems de cir yang grub pa med par shes// grub med ngang la rtag tu gnas par bya// sgrub pa med pa'i sems nyid de// phyi rol yul la phar ltas pas// yul de dngos po stong par shes// stong ngang la gnas par bya// stong pa'i rig pa chen po des// phyi nang kun gyi chos rnams la// dngos zhan dngos rtogs mi skye na// dngos bral ngang la gnas par bya'o// sems nyid gzhag pa'i thabs gsum ste// dngos med mkha' la gzhag pa dang// rig med sems la gzhag pa dang// spros bral yul la gzhag pa'o// zin pa'i tshad ni rnam gsum ste// tshogs brgyad yul la bltas tsam na// yul la mi 'jug zin pa yin// tshogs brgyad nang du bsdus tsam na// ming mi 'dogs na zin pa yin// tshogs brgyad rang sor gzhag tsam na// g.yos pa med na zin pa yin// sems su gzung ba'i thabs te gsum pa'o//// ston pa'i ston pa kun tu bzang po la// sdud pa'i gsang bdag rdo rje sems dpa' yis// yan lag rtsal snang 'khrul pa'i sems can la// rnam rtog che ba'i sgom pa ji lta bu// 'dod chags che ba'i sgom pa ji lta bu// zhe sdang che ba'i sgom pa ji lta bu// gti mug che ba'i sgom pa ji lta bu// nga rgyal che ba'i sgom pa ji lta bu// ston pa'i ston pa kun tu bzang po des// rnam rtog che ba'i sgom pa chen po ni// rnam rtog dbugs kyi rta la rten pa'i phyir// dbugs kyi rta la sems nyid phar btang la// phyi ru spros yang mi gdag par bzhag// nang du rngub kyang rtog pa mi skye'o// sems nyid stong pa dbugs kyang stong par sgom// 'dod chags ldan pa'i sgom pa chen po ni// 'dod chags yul las skyes pa'i phyir// yul grub// bdag gis las kyang 'di 'drar rnam par sgom// zhe sdang ldang ba'i sgom pa chen po ni// dang po zhe sdang kha yis bsgrubs// bar du 'dod chags ma yis bskyed// tha mar rang 'dus zhes sdang grub// zhe sdang rang mnyam rgyu las skyes// rang yang pha ma'i rtsis las grub// gzhan yang pha ma'i rtsog las grub// ngan pa'i yul las zhe sdang skye mi dgos// skye ba'i rgyu med nang du sgom pa'o// gti mug che ba'i sgom pa ni// chos nyid ma gsal shin tu bying ba la// lus kyang legs 'dug sems kyang gzengs bstod la// chos nyid nam mkha'i ngang la blo bzhag ste// yengs pa med pa'i sems kyis blta bar bya'o// nga rgyal che ba'i sgom pa'i gzhag thabs ni// nga rgyal rang gi yon tan brjod pa ste// yon tan ma yin rang gi sems kyang yin// sems de yon yan brjod kyang cir yang grub pa med// brjod pa'i sgra dag sems la 'brel ba med// 'bral med ngang du rtag tu bsgom par bya'o// nyon mongs lnga sgom pa'i le'u ste bzhi pa'o//// ston pa'i ston pa kun tu bzang po la// sdud pa'i gsang bdag rdo rje sems dpas su// snang ba cher phrad sgom pa ji lta bu// snang ba rtag pa'i sgom pa gang lta bu// snang ba bsgyur ba'i sgom pa ji lta bu// snang ba 'dzin pa'i sgom pa ji lta bu// ston pa'i ston pa kun tu bzang pos su// dbang po drug gi yul du gyur pa la// sna tshogs snang yang ngos bzung med par bzhag/ sna tshogs grags kyang 'tshig pa med par zhi// sna tshogs sgom yang rtog pa med par bzhag/ sna tshogs myong yang brjod bya med par bzhag// sna tshogs reg kyang zhen chags med par zhen// sna tshogs rgyu yang mi dogs med par bzhag/ snang ba dngos po ci dang cir sang yang// de nyid ka na chos sku ngang du sgom// rig rtog shes pa ci dang ci rgyus kyang// de nyid ka nas ye shes ngang du sgom// snang ba rtags pa'i sgom pa chen po ni// 'khor dang mya ngan 'das pa'i chos kun yang// de rnams mtshan nyid stong pa'i rgyu yin te// stong pa'i ngang las mtshan nyid kun ma 'das// sku yi rgya mtsho chu yi phung po yang// thigs pa'i ngang las de kun yongs ma 'das// thigs pa de kun gcig tu grub pa med// gling bzhi ri rab sa yi dkyil 'khor yang// phra rab rdul gyi dngos po dag las grub// phra rab rdul gyi chos zhig na// rdul de dngos po gcig tu grub pa med// nang gi rig pa shes pa'i rnam pa yang// sna tshogs rig gi sna tshogs mi 'dogs kyang// dngos po 'di yin brtags na grub pa med// snang grags chos kyi dngos po thams cad kun// brtags na cir yang grub pa med par sgom// snang ba bsgyur ba'i sgom pa chen po ni// sna tshogs bskyed pa'i chos rnams thams cad kun// kun gzhi rnam shes g.yos pa med pa yin// g.yos pa med pa rtag tu sgom par bya// snang ba'i 'dzin pa sgom pas ni// sna yi rtse la sems phab ste// g.yos pa med par sgom par bya// yul du byas pa'i dmigs pa la// ming mi 'dogs par rang dgar sgom// sgo lnga rnam shes rang sor bzhag pa ste// rtog pa med na snang yang sgom pa yin// nam mkha' g.yos pa med pa la// rang sems g.yos pa med par bzhag/ snang ba sgom pa'i le'u ste lnga pa'o//// ston pa'i ston pa kun tu bzang po la// sdud pa'i gsang bdag rdo rje sems dpas su// rtsal gyi dngos po dag la grub pa'o// lus ngag yid gsum dul ba'i thabs ni gang// ston pa'i ston pa kun tu bzang po des// lus ni lha yi phyag rgya chen pos 'dul// rang nyid mos pa lha ru gsal ba la// phyag mtshan cha lugs lha bzhin du// dngos por ma grub 'od kyi tshul du sgom// 'gro 'dug spyod lam rnam bzhi'i dus su yang// g.yos pa med par lha yi ngang du sgom// ngag de byang chub sngags kyis dul bar bya// gsang sngags 'phro 'du gnyis med rig pa gzung// snang grags chos kyang byang chub sngags su shes// sngags kyi dbang phyug bden pa'i lam la mkhas// ngag gi bden pa 'gro ba 'dul ba'i mchog/ yid kyi rnam shes ming la mkhas pa de// ming med nam mkha'i ngang du dul bar bya// nam mkha'i ngo bo ming gi bden pa de// yid kyi rnam shes ming gi bden par sgom// lus ngag yid gsum ngang gis dul ba'i thabs// phyogs bcur mi 'gro lha yi phyag mtshan sgom// sna tshogs mi smra gsang sngags 'khor lo bzlas// sna tshogs mi bsam gnyis med rig pa sgom// de ltar byas na 'bras bu khams gsum spangs// sku gsum don byed bde ba'i zhing khams skye// lus ngag yid gsum 'dul ba'i le'u ste drug pa'o//// ston pa'i ston pa kun tu bzang po la// sdud pa'i gsang bdag rdo rje sems dpa' yis// rtsal las grub pa'i sems can ma lus la// dmigs med tshogs bsog bya ba ji lta bu// zas kyi rnal 'byor bya ba ji lta bu// ston pa'i ston pa kun tu bzang po des// yul med lha yi tshogs rnams bsag par ni// bde gshegs zhing khams ma lus thams cad la// dmigs pa med pa'i mchod pa chen por bsngo// shes rab thabs kyis zin pa'i mchod pa chen po'o// snang ba'i yul du byas pa'i sems can la// thugs rje phyogs ris med par shes byas la// gnyis med ngang gis phan pa'i don bya'o// lha yi rnal 'byor sgom pa'i rim pa ni// stong pa'i ngang las gsal ba'i lhar bskyed la// 'gro ba'i don bya kha dog cir yang gsal// yul du byas kyang g.yos pa med par sgom// rgyud kyi nyon mongs zhi na lha yi sku yin te// nyon mongs mi skya kha dog ci yang rung// rang sems ma bcos tshad ma ci yang rung// ma bcos ngang gis grub pa lha sgom mo// zas kyi rnal 'byor mchod sbyin bya ba ni// snying po med pa'i lha yi lus 'di la// ro dang ldan pa'i zas mchog 'di rnams la// ro la chags shing rgyags phyar mi bza' 'o// kheng grags dga' phyir mi 'gro'o// rang lus snying po med pa'i mchog yin te// bde gshegs kun gyi snying po mchog yin no// bde gshegs mchod bya rang gi zas bza' 'o// rang la gnas pa'i srin bu 'bum chags la// srin bu lus rgyas sbyin pa chen por bsam// zas de za yang rang bzhin med par bzhag/ tshogs gnyis bsag cing lha sgom zas kyi rnal 'byor gyi le'u ste bdun pa'o//// ston pa'i ston pa kun tu bzang po la// sdud pa'i gsang bdag rdo rje sems dpa' yis// rgyud 'di gang la ji ltar gtad pa yin// ston pa'i ston pa kun tu bzang po des// nyid las mi zhan sdud pa po la gtad// sdud pa'i gsang bdag rdo rje sems dpa' des// brgya byin lha yi bu la gtad// brgya byin lha yi bu des rgyud kyi rgyal po 'di// lha dang mkha' 'gro rnams la gtad// lha dang mkha' 'gro de rnams kyis// mchod pa'i rten du rab mthong ste// rin chen gser gyi glegs bam la// bai DUr+ya yi zhun mas bris// rang byung mchod rten de la gtad// gsang ba gnyis su med pa'i 'khor lo bskor te/

CLOSE WINDOW