CLOSE WINDOW

Gpb035.020
བོད་ཡིག

/ ces glengs so// e ma ho skal ldan 'dus pa'i tshogs// nga ni thugs rje byin brlabs kyis// bskur ba'i cha gnyis mi ldan yang// gsal snang gzugs bzhin snang bar bya// rin chen gter gyi snying po 'di// kun bzang rgyal ba thams cad kyi// gsang ba'i bdag po bka' bsgo ba// gsang mdzod rdo rje sems dpa' yis// sum cu rtsa gsum bum thog stengs// srog shing rdo rje rtse dgu ste// gser gyi 'khor lo 'bar ba bzhag/gsang ba'i gter 'dzin bdag por grags// dga' rab rdo rje nyid kyang ni// de ba bzang skyong bu thu'o// kun dga' snying po bya ba yin// lag na rdo rje gsang bdag gis// 'khor lo 'bar ba'i lte bar bzhag/nam mkha' dang mnyam nga dang ni// klong dgu bam po nyi khrir gsungs// spyi blugs tshangs pa'i dbang bskur nas// dus mtha' nyid kyi sa la bkod// 'dzam gling nyid du rgyal 'theb byas// 'gro ba'i rigs can smin par byed/kha sa man ta nam mkha'i mtha' dang mnyam pa'i rgyud las/ gtan la 'bebs pa dang sngon byung gi le'u ste dgu pa'o//// de nas dpal kun tu bzang po bde ba chen po kun gyi bdag nyid des bar cis kyang ma chod bar 'di skad ces gsungs so// 'dus pa'i 'khor tshogs skal ldan rnams// dngas pa'i sems kyis yid kyi sgo phye zhig/ spyi blugs tshangs pa'i dbang chen 'di// thabs kyi rgyal po rim par bstan// rjes su 'thun pa'i gzhi dang bcas// 'jug pa'i rgyu yi rim pa dang// dman pa'i khyad par kun spangs pa'i// kun rdzogs tshangs pa'i dbang bstan dang// brda don grol ba'i rim pa yis// thugs brtol rna rgyud man ngag bzhin// 'phrul gyi me long dgu skor bzhin// rgyal po mngon grub man ngag sbyin// gsal byed rin chen 'bar ba bstan// mi 'gyur brtan pa'i dbang bskur la// dran pa rkyen gyi man ngag sbyin// g.yo 'dzin rlung gi man ngag sbyin// sems nyid mi brtan spros 'chel bas// bde ba thig le'i man ngag sbyin// bde chen rang byung byin brlabs pas// mi 'gyur brtan pa'i spyod pa bstan// bstan nas mi 'gyur lhun gyi che// bde chen rig pas bsgrub par bya// dang po yan lag rim pa ni// gnas dang slob dpon slob ma dang// dkyil 'khor 'jug pa'i rim pa dang// dus dang 'jug pa'i yon tan no// de la gnas ni rnam pa gnyis// gzhi yi gnas dang brten pa'i gnas// thams cad rang rig sems nyid de// sangs rgyas sems can thams cad kyi// gzhug gnas rmad byung khyad par can// tshad dang bral ba'i gzhal yas khang// mi 'gyur rdo rje rgyu la byung// rang byung ye shes gzhal yas khang// gnas nyid gnas la gnas pa med// de las byung zhing de ru 'dus// de nyid de yi rang bzhin gzhan// byang chub sems nyid bde chen po// rmad byung thig le gnas zhes bya'o// brten gnas khyad par bstan bya ba// dngos grub rdo rje rigs can 'di// dang po bde ba'i gzhi yin pas// ye shes rgyu las byung ba yin// pu ta ri yi rgyal mtshan nam// dpag phug rdo rje gdan stengs sam// pu ti na yi gsil khang ngam// dngos grub rin chen sul mangs sam// su ta ri ka ling phug gam// ye shes stobs dang rig pa'i byin brlabs can// bde ba'i gnas su mkha' 'gro bde ba'i bcud sel la// rnal 'byor tshe 'dzin rig pa'i byin rlabs sten// des na snyigs ma'i rgyu can dang po ste// rkyen ldan rnal 'byor yi ge stan gzhir gzang// de nas kun tu bzang po des// rnal ma'i dkyil 'khor 'di gsungs so// btsal med dkyil 'khor rang byung ye shes te// ma bcos bzhi yi dkyil 'khor nyid// thams cad ye shes rang rig gsal// mkha' ltar khyab pa'i bde chen po// ye shes dpag med yon tan gsal// snying po len pas ma d+ha la// rang la rdzogs pas lhun gyi grub// yongs su rgyas pas yon tan rdzogs// thig ler 'dus pas gtso bo'i rgyan// snod bcud 'dus pas thig le che// 'bar ba dpag med gzhal yas khang// gdod nas grub pas rab gnas rgyas// ngo bor gsal bas 'byung 'jug med// bdag nyid gsal bas skyed pa med// rgya dbyibs bral bas yongs su rdzogs// yon tan lhun grub gru bzhi yin// rang rig ye shes chen po la// ma lus kun 'dus zla gam yin// mtshan ma'i rkam chags ma lus 'joms// gru gsum drag po'i gzhal yas yin// 'dzin rtog spong ba ngang gis zhi// zhi ba chen po'i gzhal yas yin// ye shes 'bar ba lam me ba// dngos po 'joms pa'i khro chen yin// lhan ne lhang nge 'od du zhu// gnyis med thig le'i rang bzhin can// rdo rje nyi ma lha chen po// 'di ni rang bzhin rnal ma yi// dkyil 'khor chen po nyid yin te/ khro dang zhi ba la sogs te// gnas pa'i dkyil 'khor ma lus bdag/las rnams ma lus kun bsgrub pa'i// rnal ma'i dkyil 'khor chen po ru// zhugs pa med par grub pa yi// rnal ma'i dkyil 'khor chen po'o// dang po sems dpa'i rnal 'byor gyis// dngos med thabs kyis ma mtshon na// rgyal po'i phrug gu 'khyams pa bzhin// rang gi rnam pa ma rtogs so// bdag nyid khams gsum rnam par shar// mya ngan 'das pa'i bdag nyid de// ma lus gcig rdzogs 'khor lo yin// bdag nyid rdzogs pa'i dkyil 'khor ni// kun gzhi chos sku chen po yin// longs spyod rdzogs pa ma 'dres gsal// tshogs drug sprul pa rgya chen po// brkam chags lnga ni rigs lnga yin// rnam shes gcig bdag rigs gcig yin// shes pa'i bye brag rnam mtha' yas// rgyal ba rdul snyed 'jig rten sgron// tsit+ta rin chen dkyil 'khor ni// 'og min gnas chen mu mtha' yas// sgra skad ma lus rnam mang yang// mi zad rgyan gyi 'khor lo'i gsung// gzugs mchog sku yi 'khor lor rdzogs// dran rtogs sems kyi rgyu ba kun// mi zad rgyan gyi 'khor lo thugs// snod bcud ye shes dkyil 'khor yin// rabs 'byams rmad byung dkyil 'khor mchog/ces gsungs so/ kha sa man ta nam mkha'i mtha' dang mnyam pa'i rgyud las/ spyi blugs tshangs pa'i dbang bsdus don dang// gnas dang// dkyil 'khor bstan pa'i le'u ste bcu pa'o//// de nas bcom ldan 'das dpal kun tu bzang po bde ba chen po des/ 'dus pa'i tshogs la 'di skad ces bka' stsal to// lhun grub ye shes bde chen po/ rgyu yis ma bskyed rkyen dang bral// lhun gyi grub dang snang ba med// snang med tshig gis mtshon te bstan// brda don sprad grol man ngag bstan// 'di la slob dpon rnam gnyis te// brda don sprad 'grol slob dpon dang// shes rab mchog ldan ting 'dzin thob// dman pa'i blo spangs khyad par kun shes nas// bstan pa'i bcud chung theg pa'i yang thog la// bde gshegs sras dang dman pa'i sangs rgyas kyang// re thag las shing mi rtog thugs brtse ba// nang gi dri ma spangs pas 'jig rten chos brgyad spangs// rig pa'i ye shes gsal ba'i bka' yi mnga' bdag can// shes rab dad ldan brtson 'grus khyad 'phags pa// ma nor don rtogs rdo rje zam ma chad// snod bcud rtogs shing gzhan gyi sems shes pa// snod ldan mchog tu smin byed thugs rje'i bdag// 'di 'dra'i bla mas rjes su gzung bya ste// srog lus bral bas bla ma yid kyis gzung// rgyal ba'i sras mchog chos kyi rgyal tshab yin// don gyi bla ma ma nor ni// rang rig slob dpon dpal gyi bdag/ thams cad rang rig rgyal po bas// sems nyid sangs rgyas kun gyi dngos// rdo rje slob dpon zhing ni rin chen bdag/rgyal ba kun gyi bla ma ni// rang rig ye shes chen po yin// 'di ni sangs rgyas thams cad kyi// mchog tu bskur zhing rjes su gzung// rang rig ye shes rgyal po 'di// gsang sngags gter gyi mdzod 'dzin cing// bstan pa rgya mtsho sgrogs pa'i bdag/ man ngag rin chen gter gyi klong// ye shes sgron ma ye gsal 'bar// 'jig rten kun gyi ston pa po// bla ma rdo rje rin chen sems// ma bcos don nyid ston pa po// bla ma sangs rgyas kun gyi dngos// rdo rje slob dpon mchog yin no// snying po don gyi de kho na'o// de nas sems dpa' rdo rje stan las langs nas 'di skad ces gsol to// e ma slob dpon rin chen sems rang bzhin// kun gyi rang bzhin dngos de nyid// de nyid de yi phyag rgya can// de yi dbang gis de thob cing// der 'dus de la rag las pas// de dag de yi rigs las byung// brkam chags drug ldan skye bzhi'i bdag/rnam dag bde lam thob dang bcas// thams cad sems kyi de bdag nyid// spyod yul sems kyi rang bzhin can// slob ma rdo rje rin chen te// lhun grub bla ma'i rang bzhin te// de yi bka' rtags rdo rje can// thams cad mi 'gyur rdo rje'i dbyings// de nas slob ma rdo rje'i bu// rigs su nges pa'i bka' rtags yin// thams cad slob ma rdo rje nyid// de nyid bla ma rdo rje stobs// rdo rje ngang gcig rdo rje nyid// rdo rje ye shes khyab brdal bas// des na rdo rje lhun grub bo// blo yi rim pa'i rnal 'byor can// de nyid sdud dang 'thor ba yi// rigs pa nyams su bde bzhag na// spyor ba ma nor rigs can nam// rigs brgyud dag pa'i rnal 'byor pas// man ngag rin chen gter du 'chang// bla ma rdo rje srog tu 'dzin// ting 'dzin shes rab rtsal du rdzogs// lhag pa'i ye shes nyi ma shar// dad dang brtson 'grus rgyu 'bras rdzogs// rtsol bas lus ngag rlag stong du// gyur kyang don gyi 'dod mi gtong// bde ba 'bebs pa'i yan lag yin// bla ma rdo rje srog 'gyur te// lus ngag sems kyi rgyu med par// rdo rje lus su gyur pa grub// rdo rje bla ma gzhan sems can// rgyal sras yid kyi blo can des/ khengs sems 'jig rten spyod yul gang// bags kyis mthong na bla ma des// gter khyim rig pa'i sgo sdom sde// man ngag nyams pa'i rgyu yin te// lus dang bral ba'i yan lag rgyus// glang chen lus su mi thob ltar// man ngag nyams pa'i thabs rnams kyis// byang chub lus su thob mi 'gyur// des na bla ma srog yin pas// lus ngag sems kyi dus gsum du// rang srog bral ba'i las mi byed// grags dang rnyed pa'i sems log gis// nyams par gyur pa'i mthu shes pas// nang dang phyi rgyud sems sbyangs pas// 'khrul pa'i sems brgyad rnam spangs shing// don ltar phyin pa'i brtson 'grus so// mi ldog nges pa'i rigs rgyud can// rdo rje lus la brgyan mthong na// bdag sems dga' ba'i tshor ba skyes// grags sems rgyas pa'i chos thos na// rjes su mthun pa'i yid kyis mos// bla ma rdo rje skal ldan des// lus ngag spyod pa ci byas kyang// g.yo rgyu med pas dge byed cing// mthong dang dran pa'i shes rgyud kyis// thun mong dri ma kun sbyong zhing// nyi ma'i 'od bzhin gsal byed pa// bla ma sku gsung rdo rje la// rtag tu rang gi yid 'dogs shing// thugs kyi ji ltar mos pa bzhin// gus pa'i sems kyis mnyes byed cing// rtag tu mchod pa 'bul byed cing// de ni rigs kyi bu yin te// bde ba'i zhing gyur skal ldan de// rdo rje khri chen dag la bskyon// bde gshegs nyid du nges lung bstan// dus mtha' 'bras bu nyid la bkod// de nas rdo rje bla ma des// don rtogs gsal ba'i mngon sum mam// lus ngag sems kyi brda rtags sam// chos skyong mkha' 'gro'i sems bra yis// rdo rje gdan du ma pa ra// rig nas skal ldan de yi sar// smin par bya phyir rim par bya// 'di la bya btsal yan lag dang// thabs rim thar [(]g+shar g+shird [)]kar ma// rtsol sgrub lus ngag sems kyi las// dngos gang thig le'i mtshan nyid la// 'dod rtsol spros pa thams cad 'gag/ brjod par bya ba'i lung rten med// skal ldan rigs kyi dkyil 'khor du// bde chen shar ba'i rnal 'byor ram// don rtogs klungs su phebs 'dod pas// gsang sngags 'phrul gyi lam chen nam// bstan pa'i blo yi rim pas sam// rang 'dod mtha' la smad lam gyis// rig pa de ci de bzhin du// thabs kyi rgyal po mthar phyin bya// gsal 'bar rin chen 'phrul snang dam// bcud len sman dang ma ki ta// gang ldan de nyid 'dres 'gyur byed// rtogs chen thabs dang ldan 'gyur ba'i// gang gsang gang de thams cad la// gang 'dod 'thun pa'i sgo phye nas// thabs kyi 'dod pa ci rtsol ba// de ni 'bad rtsol med pa'i las// rtsol bsgrub 'bad rtsol ci byed kyang// de ni 'bad rtsol med pa yin// oM badzra su lam ma lam// ma ma ru ru tsi ta a bi pra sa la swA hA/ 'dis ni mkha' 'gro bstod pa yi// dang po rtags kyi mngon shes yin// don dang ldan pa'i snod rig na// thabs chen sbyor ba rtsom par bya// skal ldan blo yi khyad par gyis// so sor bstan pa'i rim pa bzhin// 'dod pa'i smon pas rjes 'jug na// so so'i grub mtha' rim pa bzhin// gdeng skur shes rab rim par skyed// rnam rtog spros pa tha mal gcod// sems kyi dmigs pa zin 'gyur te// rnam rtog dmigs pa dngos por 'gyur// yang na dngos po don gcig la// sems kyi bye brag kun skyed nas// sems dpa' lus su 'jug pa ste// des na tshangs pa chen po'i lam// dam pa 'di ni skur 'gyur na// de ni skad cig dus mtha' yis// sems dpa' chen po nyid du 'gyur// dngos su ye shes kun khyab can// zag pa med pa'i rtse mor 'byin// yon tan ma lus dus gcig rdzogs// de nas sems dpa' rdo rjes 'di skad ces gsol to// 'jig rten mthu can mos pa'i rjes bsgrub na// yang dag don la ji ltar 'jug par bgyi// zhes gsungs so// kun tu bzang pos bka' stsal pa// rnam rtog grub mthas ma bsgyur pa'i// tha mal dngos 'dzin rtog pa can// lha klu gnod sbyin la sogs pa// 'dod pa'i smon pas rjes bsgrub na// dang po thun mong maN+Dal la// sbyangs dang bsrung pa la sogs pa'i// drag po'i rtsol bas sems stobs bsgyur// rang rig sems rtog spong byed na// des na bde ba chen po yin// 'di ni rig pa'i dus mtha' yin// rgyal ba'i sras su nges pa yin// bde gshegs nyid dang skal ba mnyam// ye shes nam mkha'i mtha' dang mnyam// rig pa rgya mtsho klong ltar zab// mngon du 'jug pa'i stobs med kyang// rtsal chen rig pa'i ngang la rdzogs// seng ge bya rgod stobs 'gran bzhin// rig pa shar kyang stobs ma rdzogs// sems rgyud rig pa ma gsal cing// dngos po klungs su ma phebs pas// rig pa'i rtsal chen ma 'byongs pa'o// 'di la rim pa med pa ste// dang po dngos gzhi dkyil 'khor bstan// kun rdzogs dkyil 'khor lus la dgod// 'phrul gyi man ngag rna bar gzhug/ sems lung sgom pa'i man ngag bstan// de nas bla ma rdo rje la// dngos dang 'dod pa'i ting 'dzin gtang// mos pa'i don gyis dbul bar bya// mos dang 'dod pa'i bde ba skyed// skal ldan rigs kyi bu de ni// dam pa gcig la brtag par bya// 'jig rten khams ni ma lus las// gsal byed kun la bltas gyur kyang// de ni nang nas 'ga' 'am gsum// gdams ngag blo yi rim pa bzhin// dam pas lhun grub bde chen bskyed// dang por dus dang bral ba nas// mthar phyin thun mtshams bcu phrag bdun// gnyis dang ldan pas mthar phyin 'gyur// de nas yang 'di skad ces gsungs so// de nas thabs kyi rim pa bzhin gyi sgo nas lhug pa'i don bstan pa'o// dang po bcu gcig zhag gis dus// nus pa'i tshogs bsag bar chad bsrung// rdo rje go bskon lus bsrung ngo// 'pho ba'i dus mtshams nyi shu drug/ thun mtshams brgyad du bsgom bya ba// dngos po phyi nang thams cad la// bu des ji ltar gzung pa rnams// rnam rtog zhen pa'i yul de nyid// brtags pas de nyid ngos gzung bya// de bzhin thun mtshams brgyad la ni// bcu drug dag tu rnam phye ste// bdag nyid rgyan dang bcas pa'i lus// gsal ba'i yul la brtag bya ste// mi g.yo sems dpa' thad du gzung// rtse gcig brtag pa'i dngos po dmigs// de nas thun byed rkyang pa la// stong pa nam mkha'i 'du shes dngos// chad pa'i snying po nyi tshe de// brtag cing de nyid ngos gzung bya// de dag rim pa'i don rnams ni// thun mong blo yis ngos zin nas// rdo rje mi ldog go bskon te// bu khyod rmongs pa'i dri ma can// bskal par sbyong ba'i sdug bsngal nyid// ding nas de nyid bde bar gnas// gcong rong 'khor ba'i mun pa nyid// de nyid ye shes sgron mar 'bar// snyigs ma'i gnas ngan khams gsum nyid// rgyal ba'i zhing khams bde bar bsgyur// nga yi tshig 'di bdud rtsi'i bcud// ye shes sgron ma'i 'od 'bar can// rig pa'i steng du nan tan bya'o// zhes gsungs so/ kha sa man ta nam mkha'i mtha' dang mnyam pa'i rgyud chen po las/ gu ru dang shi ba'i A be sha rim pa yan lag bstan pa'i le'u ste bcu gcig pa'o//// de nas sems dpa' rdo rjes skal ldan rnams kyi don du 'di skad ces glengs so// e ma kun bzang ye shes mchog/skal ldan rnams kyi mgon po mchog/ thugs rje chen po 'od ldan pa// thugs rje gsal snang chu zla ltar// gdul bya rnams la snang ba mdzod// 'phrul gyi me long 'khor lo bskor// zhes zhus so// de nas bcom ldan 'das dpal kun tu bzang po des// 'phrul gyi 'od ldan pa zhes bya ba'i ting 'dzin la snyoms par zhugs nas 'di skad ces bka' stsal to// nyon cig mos ldan 'dus pa'i tshogs// bkra shis yan lag rgyu ldan pa'i// sems dang mthun pa'i gnas chen de// rin chen gsal byed 'bar ba de// rtsi bstan ra yis 'o mas byas// so na zhun ma'i rtsi btang ste// be dur so ma ta yi rtsis/ kha byugs ka ba dag par bya// dan shing dkar po sol pa yis// bzhu ba'i dngul chu zhun mas byug/ 'phar ma bdun gyis tshangs pa'i zhag/ 'phrul gyi 'o ma gsal byed kyis// rlangs pas mig la byugs gyur nas// tsa k+Shu bteg ste bltas gyur na// stong gi 'jig rten khor yug bcas// gang phyogs gzugs brnyan lta bur gsal// de ni rin chen khri ldan sgo brgyad ldan// yid mthun byug pa kun gyis byug/ rtsibs brgyad 'khor lo gru bzhi pa// lag na rdo rjes byin brlabs pas// rtsibs brgyad 'khor lo gru bzhir bya// las rnams sgo phye thob par byed// dang po sems skyed 'jug gi bar// lus su bstan par ma red la// lag na rdo rjes byin brlabs pa'i// bsrung dang bkrad pa'i rig pa gdab// longs spyod kun la'ang sbyor bas gdab// oM badzra yak+Sha kro d+ha dz+wa la ha la ha la hUM phaT/ oM badzra tsa kra rak+Sha rak+Sha mu la tsu la rak+Sha rak+Sha hUM hUM hUM/ de nas mthar phyin thun mtshams ni// nyi shu rtsa bzhi 'am bcu bzhi la// 'jug cing zhugs pa'i yon tan de// mtho ba'i lam dang ldan par bya// phyi rol nang du gnas pa yi// don rnams ma lus ldan par bya// thams cad spangs pa'i gzhi med de// de nyid don de yin phyir ro// phyi rol yul la sogs pa yi// gnyis pa'i dngos po mi dmigs te// thams cad sems nyid kho na ste// de yang dngos grub yod ma yin// dang por gnyis pa med pas na// de ni gnyis med brtags pa yin// gnyis pa gnyis ka med pas na// gnyis med drang ba'i dag pa yin// gsum pa kun med thams cad ldan// bde chen ye shes rang rig la// 'dod pa kun spangs chags chen po// ye shes kun grub bde ba'i klong// sgyu ma lhun grub yul la rol// de ni gcig med kun rdzogs pa'o// de ni rnam pa bde bsgrub na// yul gyi rnam pa sems nyid de// de nyid de la gsal ba dang// de ma grub par de rtogs pas// de nyid de yi rang bzhin te// de rig de snang de kho na'o// nyi ma'am rin chen 'bar ba bzhin// 'od dang ngo bo de nyid las// yul dang gzhan gyis byas pa yin// rig pa'i ye shais skur gsal ba// sems nyid dri ma med pa la// nam mkha'i khams dang sbyor ba'i sems// 'dzin pa'i rlung dang de nyid rlung// las rlung rten pa phrad pa yis// de nas de bzhin de ltar snang// snang yang dor ba med pa yi// gnyis med bde ba'i ye shes te// rang byung ye shes rtsa med pas// bde ba chen po'i ngang du 'char// lus dang bral ba'i ye shes ni// dus gsum mthar gtugs 'byung mi 'gyur// de bral de nyid mi srid de// ngo bo gcig la mnyam rdzogs yin// 'du 'bral med pa'i ye shes ni// rgyu dang bral ba'i rang bzhin 'byung// mtshan nyid bral ba'i mtshan gzhi can// 'di ni srid par mi rung ste// bdag las yon tan rdzogs pa dang// me dang tsha ba bral ba bzhin// mngon sum bde ba chen por gsal// bde chen bde bas rgyas gyur na// yul du snang dang thig le yin// thig le 'am bde ba ma rgyas pa'i// rig par snang yang rtog pa ste// yul dang bral yang rtogs 'gags yin// yul gyi mtshan nyid bstan par bya// rtog med ngang la shar ba'i ngang// tshig gi sgro btags tha snyad yin// bstan bya rtogs pa las grol ba'i// ye shes chen po'i mtshan nyid can// yul 'dzin rtog pa dag byed pa'i// ye shes chen po'i mtshan nyid can// ma bcos ngang gis dag byed pa'i// ma bcos ngang gis dag byed gsal// de nyid rtog pa rnam spangs te// sems nyid gsal bas yul dang bral// mngon sum gsal bas log rtog bral// de nyid mthong bas the tshom med// rgyu ba med pas klungs su thebs// ngang gis gsal bas rtog sgrib med// gang yang yin pas gol sa med// rnam dag sems kyi ye shes yul// bde bar shar ba'i ye shes yin// rtsol ba med pas rang byung yin// de ni yul bral ye shes so// rang byung ye shes kun gyi bdag/lus bcu rdzogs pa'i thig le can// rang yul rtogs pa'i ye shes te// de bzhin ye shes bdag gzhi can// rgyu rkyen bral ba'i dngos grub med// chos kun nam mkha'i rang bzhin can// lus dang brel bas yan lag med// dngos gzhi bral bas gdags dang bral// kun spangs kun gyi dngos gzhi can// rtog pa'i las rlung ye shes rgyas// rten can shar ba'i ye shes rlung// de nyid de ldan de grub ste// g.yo ba med pas kun khyab can// shar ba med pas kun tu gsal// 'di ni rmi lam shes pa bzhin// rgyu bzhi bral ba'i rang rig ste// sgyu ma rtsal 'dzin thabs su 'phro// rig pa'i ngang las bde bar 'khyil// spros pa ma bkag thig ler bsdus// ma bcos ngang la shar ba yi// ma skyes sems kyi thig le la// rtsol sgrub bral ba'i ting 'dzin gsal// bya ba byed pa'i don kun rdzogs// rgyu 'bras rdo rje ngang las bsrungs// thams cad rang sems ngo bo'i phyir// 'dzin rtog spros pa thams cad zhi// rtsol byed rig pa'i ngang la grub// rtsol sgrub bral ba'i lam mchog yin// dgyes chen bsdus pa'i thig le yin// rgyud drug rtogs pa thams cad dang// mya ngan 'das pa rgyal ba'i thugs// ma lus bde chen rig pa'i ngang// ji bzhin ma bcos ngang du gsal// lhun rdzogs spros pa med pa'i ngang// gcig 'dus ma lus kun gyi bdag/ rnam par rtog pa'i rgyu ba bral// dus gsum bral ba'i rang rig nyid// rtsol dang bral bas rgyun mi 'chad// rnam rtog mtshan ma ji snyed pa// ji bzhin mi 'gyur de bzhin gsal// gnas 'gyur rgyal ba'i lung chen yin// byed rtsol thams cad ma spangs pas// 'jig rten 'das dang 'jig rten pa'i// sems kyi rim pa ma lus 'dus// bsgrub pa'i lam mchog kun gyi bdag/ 'dod pa'i 'bras bu kun dngos can// rtsol sgrub blang dor rgyu 'bras dang// lus can ma lus thams cad 'dus// 'dod rtsol byed bsgrub rgyu rkyen bral// rdzogs chen rin chen gter gyi dngos// don gcig rnam pa kun gyi bdag/ bgrod med rnam grol lhun grub lam// kun rdzogs ji bzhin 'bras bu mchog/ rgyu 'bras dbyer med thig le'i ngang// bya med lhun rdzogs sems kyi gter// dpe byad mtshan chen mtshan rdzogs te// mtshon pa'i phyag rgya dri ma med// dran rtog mi 'gyur gsal ba'i thugs// sku gsung thugs kyi phyag rgya can// 'dod sogs ting 'dzin bde ba'i ro// yan lag ting 'dzin stong dang bcas// mi rtog bde ba gcig tu 'khyil// ma lus kun grub bde ba can// mi rtog ye shes bde ba'i thugs// dpag med ting 'dzin 'bum phrag sgo// skal ldan dang po nyid nas rdzogs// rgyud drug 'gro ba ma lus pa'i// lus snang rnam pa ji snyed pa'i// gzugs snang rag pas bsdus pa kun// thams cad 'khyil ba'i ye shes sku// tshad las 'das pa'i sku rdzogs te// ma lus 'dus pa'i brgyan mnga' ba// ma lus 'dus pa'i sku yi bcud// grag stong 'dzin pa chags bral gsung// rgyud drug sgra skad la sogs te// rab 'bring yi ge brjod pa rnams// ma lus skye med rdo rje gsung// rmad byung lhun grub gsung dbyangs nyid// mi rtog brda 'byal thams cad go/ thams cad bstan pa'i rig pa'i sgo// kun grub bde chen tshangs pa'i gsung// thams cad rdzogs pa'i bde chen po// rang byung lhun grub rdo rje ste// rdo rje gsung 'dus kun gyi dngos// 'dus pa thig le dgu yi bdag/ snying po lnga 'dus rdo rje'i rgyal// bde chen drug bsdus rig pa'i rgya// kun grol bde ba'i lam la gzung// lung gsum brgyud pa'i bde chen 'di// lnga dang rgyu bdag gsum gyi mdo// ma lus gzhir gyur dngos med pa// brjod gzhi tha snyad kun bdag nyid// yi ge rnam rtog rgyu ba bral// nam mkha' dngos po stong pa bzhin// bral dang ma lus sems kyi gter// 'dod yon longs spyod rgyal ba'i yum// de nyid longs spyod gter gyi bcud// bde ba'i longs spyod rang rig mchog/ zhing khams gzhal yas bde ba'i gnas// gsang ba'i gsang chen gsang ba bdag/ rgyu dang bral ba'i dngos gzhi can// ngo mtshar rmad byung de nyid bcud// ma lus 'dus pa'i rin po che// brjod bya ma lus kun 'dus pa// rgyal ba'i bstan pa kun gyi gtso// thugs kyi bcud 'dus de nyid lam// spyod yul bral ba'i rang rig nyid// bde gshegs rgyal ba kun gyi thugs// dngos gzhi bral ba'i ye shes nyid// bde gshegs rgyal ba kun gyi yum// ma lus 'phros pa kun gyi rgyud// zag pa zad pas 'dus ma byas// bstan pa kun 'dus thig le bcud// rig pa'i ngang gsal ye shes sgron// 'phel 'grib med pas nam mkha'i dbyings// sdug bsngal dag pas bde klong 'khyil// sbyang du med pas sgrub dang bral// re ba med pas dgongs ba bcom// shes rgyud bcad pas yul dang bral// brkam chags lnga bral rang byung bas// 'khor ba rnam rtog ye shes klong// byed rtsol ting 'dzin ma spangs pas// 'bras bu gzhan don yul dang bral// dge dang mi dge rnam rtog spangs// mnyam rdzogs chen po thig le bas// gtsang dang sme ba'i rtog pa bor// thams cad ma lus ye shes gsal// sbyod pa rnam dag rtog med pas// ji ltar 'dod dgu bde bar spyod// mi rtog bde chen shar ba nyid// de nyid spyod pa'i rgya mtsho ste// lus ngag gtso ru spyod byed pa// de yang spyod nyid spyod pa min// rang byung lhun grub bde chen la// yan lag kun rdzogs khyad par che// mi dmigs sgyu ma'i bde mchog ni// gnyug mar gsal na lta ba yin// gdeng du phebs na sgom pa'i mchog/ snying por chub na dkyil 'khor yin// rang la rdzogs na dbang bskur yin// de nyid nyams len spyod pa'i mchog/ bde mchog mi g.yo 'bar ba'i klungs// mi rtog bde ba'i klong gyur pa// de ni bsgrub pa'i dngos grub mchog/ mi 'da' ba yi dam tshig ste// phyag rgya sgrub pa'i lung chen yin// ma lus zhing du zhugs gyur pas// bde ba chen po'i mchod pa yin// zhes de bzhin gshegs pa nyid kyis bka' stsal to// blang dor mos 'dod rtsol dka' ba'i// mthar phyin che ba'i 'bras 'dod pa// rmongs pa rmu rgod nam mkha' la// gser gyi them skas tshol dang 'dra// sdug bsngal las grol 'dod sems kyis// blang dor sdug bsngal byed rtsol ba// 'dod pa'i log rtog spyi 'grel rdeg/ mu la hra yi don dang mtshungs// zhes gsungs so/ kha sa man ta nam mkha'i mtha' dang mnyam pa'i rgyud las/rang la rdzogs pa a be she ka'i gdams ngag bcas pa'i le'u ste bcu gnyis pa'o//// de nas bcom ldan 'das dpal kun tu bzang po yon tan thams cad kyi bdag nyid de la 'bru gsum dbang gi man ngag dus mtha' nyid kyis rdzogs pa'i sa la chub pa 'di zhus par dgongs nas 'di skad ces gsol to// e maho rgyal ba rnams kyi sku// 'gro ba rnams kyi spyi dpal mgon// thugs rje byin rlabs rmad po che// yi ge med pa'i 'bru gsum mchog/ yon tan ma lus rang shar ba// gdul bya rnams la gsal bar ston// ces glaings so// de nas yang 'di skad ces gsungs so// skal ldan 'dus pa'i 'khor tshogs rnams// nyon cig dad pa'i sems kyis 'thud// gzhan las ma yin rang la rdzogs// thob med ma lus mngon du thob// mi 'gyur rdo rje tshangs pa'i dbang// kun rdzob bde ba chen por thim// gsal bas mngon du shar bar gyis// zhes gsungs so// dus gsum rgyal ba thams cad kyi// thugs la brnag pa'i man ngag bcud// thams cad bstan par rang la rdzogs// yon tan kun gyi mchog tu shar// lhun grub bde chen mi rtog pa// ma bcos de nyid bde ba'i klong// lhun grub rang byung klong du shar// rang byung ye shes mkha' khyab pa// ma 'gags rig pa'i mkha' la rdzogs// rang byung rig pa'i bde chen la// yon tan lhun grub rdzogs pa'i klong// spros med thig le chen por shar// rang rig rnam pa ye shes sku// bde chen mngon du gsal ba nyid// rtog med ye shes rol ba ste// rnam dag ye shes sgyu ma'i klong// rang rig ye shes sgyu ma'i ngang// rang byung sgyu mar mngon du gsal// lhun grub sgyu ma ma bcos pa// bde chen sgyu ma rang rig gsal// rang sems lhun grub rin po che// rang rig mkha' khyab rdo rje sku/sgyu ma'i ye shes sprul pa'i tshul// gsal byed khams gsum gzugs brnyan 'char// oM A hUM ma hA k+Sha a ti a hI she e/ 'bru gsum ldan pa'i sngags dang bcas// rdo rje rin chen spubs su gzhug/bar chod rlung dang ldan par bya// bco lnga tho rangs dus su bstan// 'phrul tshig rig pa'i ngang gis bsdebs// brda don bral ba'i rgyal bu bzhin// nor bu'i sa nas brda bkrol te// 'khor lo bzhi la dbang byed cing// stobs rgyud mthu yis bdag por bskur// de bzhin dang ldan rigs kyi bu// rang snang brda don grol thob nas// rang gi mtshan nyid ma bcos pa// sngon du bstan pa'i man ngag sbyin/ khams gsum mngon du bslang ba yi// sgyu ma'i ye shes lhun grub pa// ye shes man ngag bstan bya zhing// chags med ye shes klong du gzhug/ thabs kyi ye shes mngon sum du// skad cig dus gsum lhun gyi grub// sgyu ma chu zla bde ba'i klong// mi rtog thabs kyi ye shes 'di// rang byung ma bcos ji bzhin la// rnam pa'i ye shes thabs kyis rol// rgyal ba'i dgongs pa klong brdal ba// rnam pa'i ye shes bde chen 'di// mngon du snang la thob pa med// rang la rdzogs pa grub pa med// 'di dang bral na rtog pa'i bdag/ mtshan ma'i mdud pa grol mi 'gyur/ kha sa man ta nam mkha'i mtha' dang mnyam pa'i rgyud las/ 'bru gsum dbang gi le'u ste bcu gsum pa'o//// de nas bcom ldan 'das dpal kun tu bzang po des/ 'dus pa'i 'khor tshogs la brda don sprad ba'i man ngag 'di gsungs so// skal ldan mos pa'i rnal 'byor pa/ dri ma bral rung ma bral rung thams cad rang byung ye shes bde ba chen por shar kyang thams cad kyi ngo bo shes pa ni ma yin no// des de las byung ba thams cad shes par rung la/ des de nyid mtshon par yang rung la/ de nyid ni de kho na'o zhes bstan par ni ma yin no// 'bral ba med pa ni ngo bor ma grub la/ mthong ba de nyid sgra cir yang 'byung zhing gang yang ma bral ba ste/ sems dpa' chen po 'di lta ste// gzugs brnyan gang yin pa de ni don gyi dngos gzhi'o// dngos gzhi gang yin pa de ni gzugs brnyan no// gong du brtan pa gnyis ni gsang ba dam pa'i dbyings so// gsang ba dam pa gang yin pa de ni gong gnyis so// 'on tang ni gsang ba dam pa ni rgya mtsho 'dra la/ byin gyis brlabs las byung ba thams cad ni rlabs dang 'dra ste// 'di gnyis la gnyis su med pa// gnyis kyi mtha' las grol ba/ yongs su mi 'gyur bar gzigs pa ste/de kho na nyid mi 'bral ba'o// de bzhin du bcings kyang 'gyur mi byed pa dang// yong med thams cad mnyam pa nyid dang/ rang gi ngo bo mi 'gyur ba nyid dang// ma grub na nam mkha'i rang bzhin brtags pa ming 'brel ba'i tshig dpes mtshon pa'i don// dngos gsang sngags kyi dbye ba med pa'o// 'on tang na gzugs brnyan gyis rang bzhin pas/ mi dmigs pa'i dbyings la dngos gzhi'i rang bzhin la yang mi dmigs pa'i dmigs kho na bas bral ba med pa'i gzungs so// dmigs pa'i dbyings ni thams cad bskyed cing de'i rang bzhin de yin pas na so so ma yin pa'i bral ba med pa'o// sems dpa' chen po gzugs brnyan 'da' ba med pa ni/gang de las mi g.yo ba ste dam tshig go/ cir yang snang yang dngos gzhi de las mi 'gyur mi 'da' ba ste// de ltar 'byung 'jug med pas phyi nang med pa/ sgo phugs med pa 'du 'bral med pas mi 'da' ba'o// sems dpa' chen po mtshon na rdo rje sems dpa' ni sangs rgyas thams cad kyi spyod yul dgongs pa dam pa yin no// de'i gzugs brnyan ni blun po gang zhig gi mdun du bzhag na/blun po de ji snyam du sems/ smras pa/ e ma ho/ de ni 'di ltar rdo rje sems dpa' nyid ma yin/ de 'di ltar 'dra ba 'ba' zhig go/ bka' stsal pa/ sems dpa' chen po de bas na gang dam pa dag gis bltas na mi dmigs pa'i dbyings na rdo rje sems dpa' dang de'i gzugs brnyan gnyis gnas gzhan dang gzhan yod pa de so so na gnas pa ma yin no// de ci'i phyir zhe na// de nyid kyi rang bzhin de kho na nyid de ye shes chen po yin pa'i phyir ro// de tha dad pa yin na mi dmigs pas 'bras bu skye bar mi rigs so// sems dpa' rdo rje legs so// de dag la chos ma bcos pa 'di skad gsungs so// ma shes pa'i dbang du gzugs brnyan dang des mtshon pa'i don zhes gnyis su brjod cing snang bar zad kyi// de kho na nyid la khyad par gang yang med do// de nas sems dpa' rdo rjes 'di skad ces glengs so// e ma ho/ chos rnams ma lus brjod pa dang// mtshon pa'i tha snyad ci zhig bgyi// bka' stsal pa/ de ni gang gis dgongs pa gsal to// sems dpa' chen pos 'di skad ces glengs so// 'o na blo che ba rnams kyis byang chub spyod pa bsgrub cing legs par bsgrubs te ci zhig bya/ston pas bka' stsal pa/ 'on kyang de lta mod kyi/ gang mtshan ma la zhen pa rnams khrid pa'i phyir dang/ gang blo che yang tshogs chung ngu na thabs rlabs po ches don chen por bya ba dang/'bras bu ye nas byas zin pa'i nyams rnyed par bya ba'i phyir ro// sems dpa' chen po de kho na nyid las rmad du byung ba'i cho 'phrul rnams snang ba yin te/ yid bzhin nor bu rin po che 'am sprin lta bu cir yang med pa las cir yang snang zhing// gang chung ngu na las mang po sems kyis 'thud/ nga yi tshig 'di bdud rtsi ste// brda gsum bstan pa nga yi tshig/ chos sku longs spyod rdzogs pa dang// de bzhin sprul sku gsum gyi brda// chos sku skye med ye nas dag/ ngo bo nyid kyis brda sprod pa'o// longs spyod rdzogs pa'i gnas rnams ni// gnas rab dag pa gzhal med khang// sna tshogs rgyan dang bcas pa yi// dri ma rnams spangs ma 'dres gsal// dag pa'i zhing du smin pa'i 'khor// lus dang ting 'dzin brda yis ston// thugs rje gzung pa'i ting nge 'dzin// mtshan mas bskul ba'i ting nge 'dzin// dgongs pa klong ba'i ting nge 'dzin// la sogs gdul bya blo yi rim// de yis don de brda sprad pa'o// sku yi brda yi rim pa ni// dag pa'i 'khor rnams smin pa la// phyag brkyang ba dang bskum pa dang// phyar dang bsgyur ba la sogs rim// gdul bya'i blo brda yis sprod// de la sogs te du mar sprad// tshig gi brda ni du ma ste// tshig gi brda ru brjod pa'o// ming don 'bral bas brda ru brjod pa dang// grangs dang bsgyur ba la sogs te// rnam pa du mar shes par bya// de bas de lung de nyid la// de la de sbyar sgrib par 'gyur// de ltar de la de rtog na/ de la de nyid grub pa med// rang byung ye shes bde chen po// rgyu rkyen bral bas 'dus ma byas// de don rig pa byang chub sems// rang byung rang gsal de brda sprod// drangs dang bsgyur ba la sogs pa// du mas don la brda sprad pa'o// de ltar ma yin brda don bral// brda don sprad nas brda de nyid// rang byung ye shes chen por lhun grub pas// bral ba med par bral ba ste// lhun grub ngang du gsal ba'o/ kha sa man ta nam mkha'i mtha' dang mnyam pa'i rgyud las/ brda don sprad pa'i le'u ste bcu bzhi pa'o//// de nas sems dpa' rdo rje des/ bcom ldan 'das dpal kun tu bzang po la gsung gi byin rlabs ji ltar snang ba dpag pa'i phyir/ dri ba yongs su dris pa/ e ma ho/ gang gis thugs dang sku yi byin brlabs las/snang ba yongs su dgod pa de dag gsung gi byin brlabs snang ba ji ltar dpag par bgyi/ de skad ces glengs pa las/ kun tu bzang po bde ba chen pos bka' stsal pa/ ji skad du dri ba de ni 'di lta ste/ngo bo nyid de med pa la gsang ba de la ni tshig dang sgra'i tha snyad med de// thams cad nas thams cad du gsungs pa med pa kho na'o// gal te gsungs pa de dag dpag par ni gang yongs su rgyud dag pa'i skyes bu dam pas kyang mi dpogs te/gang gi phyir dpog pa nyid na ngo bo nyid med pa gang gsang ba dam pa nyid du nges pa'i phyir dpag par rab tu dka' 'o// sems dpa' chen po 'on kyang 'di ltar rig par bya ste/gang ngo bo nyid med pa'i gsung ni nam mkha' lta bu'o// rnam par dag pa'i gsung ni nyi ma'i snying po lta bu'o// yongs su smin pa'i gsung ni me long lta bu'o// gsang ba dam pa'i gsung ni seng ge lta bu'o// rgyun du 'byung ba'i gsung ni seng ge lta bu'o// rgyun du 'byung ba'i gsung ni/ gsung gcig yan lag bsam gyis mi khyab par byung ba'i phyir bsam gyi mi khyab pa zhes bya'o// sems dpa' chen po nyon cig/bsam gyis mi khyab pa de dag kyang grangs bzhir snang ba las bzhi las rgyas par shes par bya'o// de ni 'di lta ste// gsung gi rang bzhin dang/ rnam grangs dang// yan lag dang/ gzugs brnyan rnams su shes par bya'o// sems dpa' chen po de la rang bzhin gyis gsungs 'di lta ste/ chos su khyab pa'i sgo nas gdangs su che ba dang// sgra tha dad pa'i sgo nas yongs su khyab pa da nga// skad kyi dbyings kyi sgo nas go ba myur ba dang/ nye bar bsgrubs pa'i sgo nas the tshom chod pa dang/ byams pa'i sgo nas gcig la gcig gzigs snyam pa dang/ thugs rje'i sgo nas nyi tsher ston pa dang/ dga' ba'i sgo nas 'jug pa dang/nyan pas mos pa'i sgo nas 'dun pa skyed pa dang// shes pa bye brag gi sgo nas khyad par bzhugs pa dang/ tshig gi yon tan gyi sgo nas thams cad 'dul ba'i sgra'o// sems dpa' chen po nyon cig/gsung gi rnam grangs 'di lta ste/ tshangs pa lta bu dang/ sil snyan lta bu dang/ glu gar lta bu dang// ka la ping ka lta bu dang/ pu hi dbyings lta bu dang/ na rag gi sgra lta bu'o// sems dpa' chen po nyon cig yan lag gi sgra ni 'di lta ste/sems 'jug pas 'du shes skyed pa dang/ don so sor rnam par rig pa dang/ rang gi 'dod pa dang 'thun pa mnyan par 'os pa dang/ so so blo dang mi mthun pa med pa dang/mi dpogs shing shin tu zab pa dang/ don gyi rjes su mthun par rjes su 'byung ba dang// bar chod tshig gis mi tshugs pa dang/ rnar snyan pa dang/ tha dad ma 'dres rna bar ma 'khrugs pa dang/ gang du yang shin tu gsal ba ste/rnam grangs kyi sgo re re gang byung ba de dang der/ de dag gcig la yang yan lag kun rdzogs par 'gyur/ sems dpa' chen po dngas pa'i sems kyis nos shig/ yi ge la sogs pa'i chos thams cad rtags pa ltar 'chags/med pa las byung/ ji ltar ltas pa ltar snang/ bsgrub pa ltar grub pa'i phyir yi ge yang mi dmigs pa'i phyir ma 'gags par shar ba las gsung gi gzugs brnyan du byung bar zad do/kha sa man ta nam mkha'i mtha' dang mnyam pa'i rgyud las/ yi ge rgyas par bstan pa'i le'u ste bco lnga pa'o//// de nas bcom ldan 'das dpal kun tu bzang pos// mnyam pa dang mnyam pa chen po'i ngang las mi 'da' bar ngang gsal ba la sems dpa' rdo rje 'di skad ces gsol to// chos thams cad ngang gis stong/ rang bzhin med/ rang bzhin gyis 'od gsal/ tha snyad chad pa la rmad du byung ba'i don ye shes kyi gzugs brnyan ji ltar 'char/gzugs brnyan ji lta bu zhes glengs so// sems dpa' chen po dang bar sems shig/ gzugs brnyan gyi rgyu dang/ 'byung ba'i sgo dang/ mi 'bral ba dang/mi 'da' ba dang/ gzugs brnyan rig pa'i sprul par rang shar pa'o// rgyu ni dang ba dang/ mi dmigs pa dang/ ci yang ma yin pa las cir yang byung ba'o// sgo ni gang du gnyis 'dus pa ste ci yang med pa las cir yang rig par byed pa'o// gzugs brnyan gyis gang mtshon par byed mos kyi/ gzugs brnyan las don gyi dngos gzhi byung ba yang yin/ mi 'byung ba yang yin/ snang ba yang yin/ mi snang ba yang yin/ khyab ba dang ma khyab pa gnyis ka yang yin// dper na nam mkha'i ming gi sgra grags par ni kun gyis nus mod kyi/ nam mkha' gang zhe na 'di kho na 'o zhes ni gang gis kyang bstan par mi nus so// de ci'i phyir zhe na/dngos gzhi las byung ba mtshon par nus la/ gzugs brnyan yin pa gang gi yang spyod yul du gyur pa yin la/ dngos gzhi ni gang yin gang gi spyod yul du ma gyur pa yin pas 'di zhes bstan par mi nus so// de bas na bde bar gshegs pa'i thugs ye shes de ni/ bde bar gshegs pa 'jig rten du byung yang rung ma byung yang rung/ sems can dri ma dang bral ba dang chen po 'byung ba'i phyir 'khor ba dang mya ngan las 'das pa'i chos thams cad ci yang med pa las snang ngo// de bas na gsung gi gzugs brnyan 'di dag kyang ci yang ma yin/ ye shes chen po las snang ba'i chos nyid du rig par bya'o// kun tu bzang pos bka' stsal ba/sems dpa' chen po sems dngas pas mos shig/ gang gzugs kyi sprul ba tha dad de gsung gi gzugs brnyan ni yi ger snang ste ming sna tshogs dang/ byung tshul sna tshogs dang// yi ge'i gzugs brnyan sna tshogs dang/don 'byin pa las rang bzhin med pa las snang ba dang/ sgra tha dad du grags pa dang// bskyed cing mtshon pa'i las dang/ gzugs ming brjod pa'i sgo dang/ rnam grangs dbye ba dang/yi ge'i gzhi rnams kyis de kho na nyid shes shing mthong bar 'gyur ro/ kha sa man ta nam mkha'i mtha' dang mnyam pa'i rgyud las/ rig pa ye shes kyi gzugs brnyan shar ba'i le'u ste bcu drug pa'o//// de nas 'dus pa'i 'khor gyi nang nas sems dpa' chen po rdo rje rgyan ces bya bas dngas pa'i sems kyis dga' ba'i mdangs phyung ste/ bcom ldan 'das dpal kun tu bzang po la 'di skad ces glengs so// bdag cag 'dus pa'i 'khor tshogs kyis// dngos po ji bzhin don de la// mnyam par gnas pa ma 'tshal bas// 'phro med rmugs med gsal ba'i don// bde bar gshegs pas ba ta ha// bcom ldan 'das dpal kun tu bzang po des 'di skad ces gsungs so// mchog gi mos ldan skal ba can// rdzogs pa'i don la nges par 'thud// ston pa'i lung bzhin tshig gi mtha' spyod lam du de mthong na// de nyid rtog pa'i rgyun 'brangs smig sgyu snyegs pa 'dra// yang dag lam ni tshig gis mtshon du med// yang dag nyid du bstan pa nga yis 'khrul// dag dang ma dag gnyis med 'dres shing mtshungs// rnam pa cir yang mi 'byed ye shes gti mug dang// thogs med gsal ba'i mar me bsam pa kun dang bral// ngang gis mi g.yo rmugs shing ting 'dzin rgyal por gnas// ston pa'i sgron mar gyur pas kun rab sngags pa// chos kyi snying por gyur bas 'jam dpal gzhon nu nyid// bya bral lhun rdzogs bde ba'i glong du ji bzhin gnas// tshul khr-ims la sogs spyod pa rgya mtsho'i gzhir gyur ba// ji snyed rnam grol lam du bsnyad cing gsungs pa dang// phra zhing shes dka' kun gyi lam ste rtogs las 'das// mi gnas mi dmigs spros med bsam pa kun dang bral// tshig gis mi phebs dbyibs dang kha dog dbang po spyod yul min// bstan cing rtag par dka' la brjod du rdul tsam med// sngon gyi drang srong lam du gang 'jug pa// bsgom chags bde ba'i nad kyis zin ta re// mngon sum mthong ba'i mig med mthong ba'i mig/ de phyir thams cad mkhyen pa'i spyan zhes de la bya// lo rgyus don nyid tshad ma'i blo bzhag pas// ting 'dzin gsum po grub pa'i mtha' spyod pa// rtsol bral lung las gol te 'khrul pa yin// bya bral lhun rdzogs bde ba'i yul la gnas// shes rab rang byung rtain med bde ba'i chen por gnas// zin pa'i bdud rtsis rtsol ba'i sdug bsngal 'joms// bya bral ji bzhin yul la kun tu ji bzhin gnas// rnam pa cir yang mi dgongs thabs kyis de la rol// kun dang mi mthun yongs kyis spong ba'i chos// nyon mongs lnga dang mtshams med lnga po yi// rnam dag lam der zhugs na mnyam pa'i rgyal po thog/ bud med la sogs kun kyang spong mi byed// chos rnams thams cad th-ig le'i rang bzhin pas// spros pa med cing 'du ba med// skye ba med cing 'gag pa med// dngos med mtshan ma cir mi gnas/ rnam par mi rtog snying po 'di// nam mkha' bzhin du ye nas gnas// rtog pa'i smra bsam yul las 'das// zhes bka' stsal to// 'khor 'dus pa thams cad kyis/ tshogs phal mo che byang chub sems dang phrad de blo gsengs so// mnyam par gnas par gyur to/ kha sa man ta nam mkha'i mtha' dang mnyam pa'i rgyud las/ tsa ta klur dril ba'i le'u ste bcu bdun pa'o//// de nas sems dpa' rdo rjes ye shes dngas pa'i sems kyis sku snang bar mdzad de/ 'dus pa'i tshogs mos par bya ba'i phyir rig pa'i 'od kyi khyad par gyi mchod pa mtha' klas pas mchod de/'di skad ces gsol to// lhun grub ye nas bde chen po// 'dus pa'i tshogs la ye nas snang// snang yang rang gi bzhin ltar bral// kun mkhyen thugs rje chen po yis// byin rlabs chu dang zla ba bzhin// 'dus pa'i tshogs la bshad du gsol// zhes glengs so// bde bar gshegs pas 'di skad ces bka' stsal to// rtsol dang mi rtsol byang chub sems su gcig/sems nyid nam mkha' mtha' dang mnyam// zhes gsungs so// sems dpa' rdo rjes 'di skad ces zhus so// bdag cag 'dus pa'i 'khor tshogs rnams// thog ma med nas sems yin dang// ma rig ling tog sgribs par 'gyur// kun mkhyen khyod kyi thugs rje yis// drang don ma yin nges pa'i don// dkrugs med gsal ba'i don du bshad// ces glengs so// de nas kun tu bzang pos 'dzum pa'i mdangs bstan te/chos sku ye nas rnam par rab dben pa// 'khor ba'i rnam rtog yul spangs pa'i// yod dang med pa'i bya ba dbyings su gcig/ mnyam nyid gcig la ltas sgyur de ltar snang// snang 'dod rtsol sems sdug bsngal che ba'i nad// theg pa'i khyad par ji snyed sgrogs pa yang// tshul khrims sdom dang phyi nang dam tshig dang// 'gro la 'dul ba'i ngo bo ji srid 'dod la bstan// tha snyad tsam du 'dul zhes bya mod kyi// dam du bcas pa'i yul yang rdul tsam med// dam bcas pa yi yul med rab rtogs na// dam du bcas dang skyon med nam mkha' 'dra// 'dod dgur sgyur zhing snying rje thabs mi spangs// bsgom pa'i yul med de la bsgom pa'i gnas// bsgom chags bde ba bdag 'dzin sdug bsngal yin// bsgom pa'i gnas med dag tu rab rtogs na// bsgoms kyang skyon med chos dbyings nam 'kha' 'dra// chos rnams sna tshogs ji snyed snang ba yang// tha snyad thams cad byang chub mchog gi lam// snying po byang chub mchog ni yin shes na// bza' zhing bgrod kyang yul ni ga la yod// bya byed rdzogs pa'i ngang du rab rtogs na// gang ltar bza' zhing bgrod dang yul las 'das// bskal pa med bzhin kun gyi re skong ba'o// mnyam nyid dang rtog theg chen 'di dag ni// kun la khyab cing ma rdzogs cos 'ga' 'ang med// chos dang gar ma chad pa'i rang bzhin las// thugs rje chen po nam mkha'i dbyings phyugs nas// thabs kyis rol bas 'dod dgur bsgyur ba'i dpal// de la de bzhin bag chags bzang ba'ang med// de bzhin ye nas bdud rtsis zin pa las// byas pas zin pas yong mi 'gyur zhes bshad// ma lus zin par gyur te dbyings rtogs na// rnam pa kun byas byang chub mchog gi ngang// de dang mthun pa'i dgongs spyod bde ba la// 'khrul dang ma 'khrul mnyam zhes gsungs pa'o// zhes bka' stsal to// zhes glengs so// de nas kun tu bzang po la 'di skad ces gsol to/ khams gsum las 'das yid bzhin rin chen dag/bgrod med rnam par grol ba'i lam ston pa// gzhan nas btsal bas rnyed par mi 'gyur te// thig le chen po kun tu khyab pas na// rang byung kun bzang ye nas 'od gsal la// rtsol bas brtsal du med de snying po'i don// rnam par snang mdzad rtag pa kun tu bzang// gnyis med bde ba'i mchog ste lhun gyi grub// de bas rtag chen de ni 'gyur ba med// bde ba chen po'i longs spyod rdzogs pa ni// 'di las shin tu rnal 'byor ro/ kha sa man ta nam mkha'i mtha' dang mnyam pa'i rgyud las/ thams cad thig le gcig tu bstan pa'i le'u ste nyi shu pa'o//// de nas yang sems dpa' rdo rjes rig pa'i stan las 'thon te sems kyi dri ma sbyangs nas dngas pa'i sems kyis 'dun no// gnyis su med pa'i u pa ha ra nas zhus pa/ bcom ldan kun bzang bde chen po// thugs rje'i mnga' bdag yongs kyi dpal// rang bzhin rdzogs pa'i don de nyid// ye nas gnas pa'i chos chen po// kun gyi blo yis ma rig pa// dman pa'i blo la gsal bar gnas// zhes glengs so// de nas kun tu bzang po bde ba chen po des 'di skad ces gsungs so// chos rnams kun gyi lus chen po// ye nas rdzogs la snang ba med// brjod du tshig gi yul dang bral// snang ba med pas mtshon du med// rang bzhin rdzogs pa chen po don/ khyed la rab tu bstan par dka'// ma rtogs rtogs par bya ba'i phyir// tshig bral tshig gis brjod byas na// snang zhing srid pa ma lus dang/ khams gsum stong gsum rnam grangs chos// mtha' yas mu med thams cad dang// bde gshegs yon tan lhun grub dang// mi zad rgyan gyi 'khor lo rnams// gnyis med gcig ste ye shes chen por 'char// bdag nyid byang sems rmad du byung ba las// de dag thams cad de las byung ba dang// de las byung ba'i dkyil 'khor yang// rmad du byung ba'i dkyil 'khor yin pa'i don// sku rmad du byung ba sku yi dkyil 'khor dang// gsung rmad du byung ba gsung gi dkyil 'khor dang// thugs rmad du byung ba thugs kyi dkyil 'khor dang// chos chen po rmad du byung ba'i don// bdag nyid thams cad ye nas shar ba de// don gsum gyi rang bzhin du gnas so// zhes gsungs so// ye nas mi dmigs pa'i don dang// ye nas mi gnyis pa'i don dang// ye nas ma 'gags pa'i don no// sems dpa' chen pos 'di skad ces zhus so// ye nas gnas pa'i don gyi rang bzhin ci// zhes glengs so// de nas kun tu bzang pos 'di skad ces gsungs so// sems dpa' chen po thams cad mkhyen pa'i ngo bo ni/ ngo bo nyid ni dmigs su med// nga yi lus la sbyor ba las// byang chub med cing bsgom pa med// lus dang ngag sems mtshan nyid ni// ye shes lnga yi byang chub sems// sems can kun gyi sems chen po// rang bzhin dag pa dri ma med// thams cad ma skyes zag pa med// byang chub med de mngon rtogs med/ khams kyang med de 'byung ba med// mtshan med mi 'gyur nam mkha' bzhin// gnyis med gnyis su med man zhing// sems 'du byang chub rgyas pa'i spyan// zhes bka' stsal to// yang gsungs pa/ kye sems dpa' chen po de bzhin gshegs pa rnams kyi sku gsung thugs dang/snang zhing srid pas bsdus pa'i chaus thams cad 'dra ste/ nga'i byang chub kyi sems rmad du byung ba nyid yin no// rang gi rig pa las byung ba'i chos chen po rmad du byung ba nyid yin no// rdzu 'phrul chen po nyid yin no// 'phrul chen po rmad du byung ba nyid yin no// nga'i rol pa rmad du byung ba nyid yin no// nga'i mdzad pa rmad du byung ba nyid yin no// nga'i rmad du byung ba'i dkyil 'khor rmad du byung ba nyid yin no// nga'i gsang ba rmad du byung ba nyid yin no// bde bar gshegs pa rnams dang/ rdo rje sems dpa' nyid kyi thugs gsang ba chen po dang/ gsang ba de kho na nyid dang/ lta ba gsang ba rmad du byung ba nyid yin no// sku rmad du byung ba sku'i dkyil 'khor gsang ba rmad du byung ba nyid yin no// gsung rmad du byung ba gsung gi dkyil 'khor rmad du byung ba nyid yin no// thugs rmad du byung ba thugs kyi dkyil 'khor rmad du byung ba nyid yin no// de nas sems dpa' rdo rje 'di skad ces gsol to// 'jig rten mgon po rdzogs sangs rgyas// yid bzhin nor ltar snang ba'i mchog/ sangs rgyas don du mdzad pa yi// rang bzhin gnas pas rdzogs sangs rgyas// thugs kyi sgron ma'i don bstan pa// yid kyi dkyil 'khor sgo phye nas// rang gi rig pa don gsal 'gyur// thams cad don ni ji lta bu nyid yin// so so rig pa snang byas nas// don de bdag la rig gyur nas// sangs rgyas kun dang skal mnyam nas// rgyal ba kun pas rgyal gyur cig/ dus gsum rnal 'byor gang dag gis// skal ldan gang zhig 'byung ba yi// don du bdag gis bshad par 'tshal/ kha sa man ta nam mkha'i mtha' dang mnyam pa'i rgyud las/ rang bzhin rdzogs pa chen po bstan pa'i le'u ste nyi shu gcig pa'o//// de nas bcom ldan 'das dpal kun tu bzang po des/yongs su rdzogs pa'i ting nge 'dzin la snyoms par zhugs so// gsang ba'i bdag pos 'di skad ces gsol to// sems dpa' chen po nyon cig/ dngos po tha snyad kun bral yang// thugs rje gzugs brnyan lta bur 'chang// ma lus don ni gang yin pa// nges pa don gyi lung/[ u0f84]bsgom pa don gyi lung/ shes bya nges pa'i lung// rmad du byung ba gsang ba nges pa'i lung ngo// de las don ni bkri ba'i don ma yin gyis/nges pa'i don gtan la phab pa'o// de la de bzhin gshegs pa thams cad kyi snod kyi 'jig rten dang/ bcud kyi 'jig rten nam mkhas bsdus pa ril ma ma lus pa'i chos thams cad sku gsung thugs su bsdus so// sku gsung thugs kyi don ni dbyer med pa ste/ mi 'gyur/ mi shigs/ mi phyed rdo rje lta bu'o// sku gsung thugs kyi rang bzhin la 'gyur ba'i dngos po 'am// ma 'dus pa'i chos gang yang med de/sku gsung thugs slun gyis grub par gtan la phab pa'o// de bas na rdo rje'i chos zhes bya/ 'bras bu 'gyur med ces kyang bya/ rdo rje theg pa zhes kyang bya'o// bsgom pa'i lung ni bsgom pa ni/ rtogs pa'i don la 'byung 'jug med par gsal ba'o// shes par bya ba'i don ni/ chos thams cad ma nor bar shes pa dang/ bdag nyid kyi don ma nor bar shes par bya ba dang// lta ba'i don ma nor bar shes par bya ba dang/rdo rje sems dpa'i thugs gsang ba ma nor bar shes par bya ba dang/ rdo rje sems dpa'i rang bzhin ma nor bar shes par bya ba dang/ rdo rje sems dpa'i yon tan ma nor bar shes par bya ba dang/rdo rje sems dpa'i rnam par rol pa ma nor bar shes par bya ba dang/ rdo rje sems dpa'i spyod pa ma nor bar shes par bya ba dang/ chos nyid la longs spyod chen por mnga' mdzad pa'i don la ma nor bar shes par bya ba'o// nges pa'i gsang ba'i man ngag rol pa chen po rmad du byung ba dang/ don rmad du byung ba'i gsang ba ni/ 'khor ba dang mya ngan las 'das pa bdag nyid las byung zhing bdag nyid kyis mdzad/bdag nyid las 'phros shing bdag nyid las rol/ bdag nyid las sprul zhing bdag nyid dbyings su sdud/ bdag nyid las byung ba'i chos la bdag nyid longs spyod cing mdzad/ bdag nyid kyi yon tan la bdag nyid che bar sgrogs shing/ bdag nyid las byung ba'i chos rnams la bdag nyidachen por ston par byed/ 'khor 'das kyi chos thams cad bdag nyid las byung/ slar yang bdag nyid kyi dbyings su 'dus te/bdag las ma byung ba 'am/ bdag nyid du ma gyur ba'i chos gang yang med do/ zhes kun tu bzang pos gsungs so/ kha sa man ta nam mkha'i mthar dang mnyam pa'i rgyud las/ byang chub sems kyi rig pa'i ye shes des lung gi le'u ste rtsa gnyis pa'o//// de nas bcom ldan 'das dpal kun tu bzang pos rdo rje lta bu'i ting nge 'dzin la snyoms par zhugs so// sems dpa' chen pos 'di skad ces gsol to// e ma ho/ bcom ldan kun tu bzang/ khyod ni gsung gi seng ge ste// brjod bya ma lus thugs la rdzogs// skal ldan 'dus pa'i 'khor tshogs la// gsal bar ston pa thugs la rdzogs// gdul bya blo yi bye brag ni// go ba rang bzhin tha dad pas// 'dus pa'i rdo rje tshig tu gsungs// zhes glengs so// de nas bcom ldan 'das dpal kun tu bzang po des/ 'dzum pa'i mdangs kyi seng ge bsgyings pa dang chas te 'di skad ces gsungs so// sems dpa' rdo rje nyon cig/ skal ldan blo mchog 'dus pa'i tshogs// ma rtogs gsang ba rdo rje'i tshig/ mtha' bral rdo rje byang chub sems// dngos bzhin kun 'dus rdo rje byang chub sems// rdo rje rnam pa byang chub sems// nam mkha' rdo rje byang chub sems/ lhun grub med pa phyal ba gcig pu rdo rje byang chub sems/ tshig gi rdo rje rtse lnga pa// rdo rje tshig ste rtogs par dka'// rtsol ldan rnams kyis spyod yul min// 'di ni gting dpags dkar ba'o// thams cad 'dus pa'i rdo rje yin// a ho/ zhes rdo rje gsang ba'i tshig tu'o/ kha sa man ta nam mkha'i mtha' dang mnyam pa'i rgyud las/rdo rje tshig lnga ba'i le'u ste rtsa gsum pa'o//// de nas bcom ldan 'das kun tu bzang pos 'di skad ces bka' stsal to// sems dpa' chen po nyon cig/ bshes gnyen kun las 'byung ba'i nor bu rin po che// dmigs pa med cing 'gyur ba med pa'i gnas la mi ltos par// rang gi rang bzhin len pas re ba thams cad skong// brtags na med la bzhag na legs pas 'byung ba che// mngon du mi snang chags pa'i cha lugs kun la ston// bdag dang gzhan du bral ba'i ston mkhan rin chen mdzod// thams cad grub pa'i yul zhes bdag med snying rjes bstan// nang nas ma g.yos nang nas btsal ba'i gnas med de// yul phyir chags la yul la bsngo ba'i dmigs pa med// mi 'gyur mi 'jug bdag med snying rje de yis na// gzhan gyi nor med mi 'ong ye nas gnas pa yin// bde ba 'dod pas bde ba rgyab kyi phyogs// bde ba zin te bde bas bde tshol ba// byang chub 'phrul pa ye rngam chos la za// de lta'i yul can sangs rgyas mthong ba med// mi gnas mi dmigs mi rtog yul med chos kyi lam// bsngo ba'i cha shas phra mo yul las byung ba ste// mi gnas don nyid legs pa'i ye shes rang byung ste// mngon sum kun tu mi rtog sangs pa'i snying po la// rnam dag lam der zhugs pas mnyam pa'i rgyal po thob// ngo mtshar mthong ba'i yul med de la mthong ba'i mig/gang la'ang thos par mi rigs bsnyad pa kun dang bral// rang byung che ba'i yul la kun tu ji bzhin gnas// ye nas rgyas pa'i bdag nyid mngon sum gnas pa la// grib ma gzugs kyi dpe bzhin de la rtog pa 'byung// me de med pa ma yin med pa'i snying po 'byung// stong pa'i stong pa nyid de stong pa'i yul la gnas// nam mkha'i rang bzhin de las byung ba'i dran pa skyed// bya bral zin pa'i bde ba 'dod pa med pas len// zin dang chags dang bral dang zhing// dngos po med dang rnam par spong// bdud rtsi chen po'i rang bzhin la// za ba'i thabs la rag pa med// yangs so gcig gis chos chen po// chung ngu na rnams kyi gnyen po yin// che la dmigs pa'i cha bsnyams nas// chung ched de rnams dmigs dang bral// gsungs dang rgyas pa dmigs dang snang// sgyu mkhan ri mo snang ba bzhin// 'byung 'jug ye shes rmugs pa yis// de yi dbang las skye bar 'gyur// gtang ngo bzhag go rang bzhin te// 'dod pa med cing len pa med// brod pa rdul tsam mi bskyed cing/ khyung chen mkha' la lding pa bzhin// 'phro ba med cing 'du ba med// mi 'gyur 'gyur ba med pas chags pa'i gnas med de// de bzhin gzung ba'i yul med sems kyi gnas kyang med// rdul phran gcig las gse shing phyogs cha gcig la bral// yan lag tshogs kyi dbang gi snying po yul tshol zhing// gza' ba'i yul med de las ye shes 'byung ba tshol// sngon gyi drang srong rjes su bsgom pa'i yid kyis 'jug/ rang bzhin lam der 'khrul pas thams cad mkhyen pa med// ji bzhin pa zhes rnam rtog de bzhin rtags bsgom pa// bde ba chen pos 'dod pas chags pa'i lam yin te// mi g.yo rang bzhin gnas pas sman chen ma byas na// mtho ris bgrod pa'i rgyu des nyon mongs zin par 'gyur// lam med lam du 'jug pa rnams kyi nad che ba// phyin par 'dod pas ri dwags smig sgyu snyeg pa ltar// rnyed pa'i yul med 'jig rten gsum las mi 'byung zhing// sa bcur ltos pa'i gnas kyang byang chub sgrib pa yin// shin tu myur ba'i ye shes bsam pa kun dang bral// chos dang chos min rtag tu 'dres shing dbyer med la// don dam chos shes bshad pa rtag tu rdul tsam med// 'khrul dang byang chub lam de rtogs pa thob pa med// rang byung ye shes nyid dang tshig gi tha snyad bral// rang byung ye shes mi rtog kun tu rang bzhin gnas// bya bral yul la mi gnas gnyen pos bcos su med// sku gcig kun tu khyab pas bsnan pa'i chos med de// mtha' la thugs pa med pas dbyings la bri ba med// chos kyi rol pas nyam thag lhag pa'i gnas med de// stor bar mi dgos bza' ba med// rgya mtsho bzhin du ye gnas la// chos rnams sna tshogs 'byung bar byed// yon tan nam mkha'i mtha' dang mnyam// bsdu ba'i gnas su nges pa med/ byang chub snying po de ma thag/ ting 'dzin rgyal po chen por 'byung// snang ba rgya mtsho chen po bzhin// mi rtog nam mkha'i mtha' ltar yangs// rtog sgom chos kyi sku ni khyad par don med pas// mngon sum thob par 'dod nas rtag tu rgyu la bsgom// bsgom chags bde ba de las mnyam pa'i don mi 'byung// sangs rgyas med pas sangs rgyas ming yang med// sangs rgyas ston pas ming du btags pas nor// sangs rgyas gzhan nas thob byed nor ba'i lam// don rnams ji bzhin mi bskyod de// bya ba med pas grol bas grol// rang byung ye shes btsal med pas// grol nas grol ba'i lam yang bston// 'byung ba chen po com ldan 'das// chub par gnas pas bcom ldan 'das// phyin ci log tu rnam brtags kyang// grol ba rang byung gzhan las min// che ba'i ye shes rnyed dka' ba// shes rab thabs la brten pas 'grub// ming tsam gzhan las 'di 'dra yang// mngon sum bde ba rang las byung// cho 'phrul chen po dga' ba min// yon tan kun dang stobs kyi rnams// ji bzhin rtogs pa phra ba las// de ma thag tu rang las byung// snang ba med pa'i chos nyid ni// ma btsal bzhag pas bsgom pa yin// de dang der ni rnam btsal na// de las de bzhin de mi 'byung// mchog tu gsang ba'i chos nyid ni// rna dbang gzhan las thos mi 'gyur// de bzhin lce yi dbang pos kyang// de la brjod du rdul tsam med// 'gro ba'i sdug bsngal byang chub sems// kun tu chub pas rnam par rol// de las bskyod pa med bzhin du// nam mkha'i mtha' bzhin mnyam par gnas/ khyad par cir yang mtshungs pa las// las so zhes ni rnam par brtags// ci ste las kyi dbang gyur na// rang byung ye shes yod ma yin// rgyu nyid rdo rje rkyen dang 'dra// ma skyes pas na 'jig pa med// gdod nas snying po byang chub la// btsal ba'i bsam pa dbyings mi skyod// yon tan chen po'i bsam gtan ni// bsdu ba'i gnas su nges pa med// byang chub snying por chos kun bshad// zin dang chags dang bral dang zhing// dngos po med dang rnam par spong// bdud rtsi chen po'i rang bzhin la// bza' ba'i thabs la rag pa med// kun tu bzang po'i spyod yul la// skye zhing 'phro ba'i gnas med do// rgyu rkyen yan lag bcu gnyis so// skur ba btab pas bshad pa yin// 'phrul pa rnams kyi ngo tsam du// mkhas pas de bzhin shes par gyis// 'gro la rgyud du snang ba la// dad pa'i lam du shes par bya// 'dod spyod snying rjes brlan pas na// gang du dga' bar byang chub spyod// shan pa smad 'tshong mtshams med pa/ kha na ma tho 'jig rten spong// yongs su rdzogs pa'i chos kyi rtsis// bde ba che las gzhan med do/ kha sa man ta nam mkha'i mtha' dang mnyam pa'i rgyud las/ lta ba go 'phang gcod pa'i le'u ste rtsa bzhi pa'o//// de nas sems dpa' rdo rje des/ nye ba'i gnas 'thon te mos pa'i lus dga' ba'i sems kyi mdangs phyung ste/ de bzhin gshegs pa thams cad kyi bdag nyid/chos thams cad kyi rang bzhin/ bcom ldan 'das dpal kun tu bzang po de la 'di skad ces zhus so// chos rnams ye nas spros med la// brjod pa'i tha snyad kun dang bral// mtshan ma'i dngos po ngang gis dngas pa la// rnam grangs bye brag ji ltar 'byung// zhes glengs so// de nas dpal kun tu bzang po bde ba chen po des 'di skad ces bka' stsal to// sems dpa' chen po nyon cig/ sems ni rang byung ngo bo ste// ji bzhin gnyis med bde chen po// rnam pa kun ldan rnam pa yongs kyis med// spros bral nam mkha' bzhin du ye gnas la// dmigs pa'i yul 'das gcig ces bgrang du med// byang chub sems la bgrang zhing mtshon du med// sems kyi byas pa'i chos rnams gang byung na// de dag gang byas gang du snang// snang srid snod bcud sangs rgyas sems can rnams// gsal la rig pa'i ngo bo de la shar// de nyid mngon du phyung nas snang ba gang// chen po lnga ni rigs drug snang ba dang// de yi don mdzad gzugs sku rnam gnyis ni// sems kyi rnam pa dag tu byung nas bstan// ces gsungs so// de nas sems dpa' chen pos 'di skad ces glengs so// dang po byang chub sems langs nas// rang dang chos rnams ma shes nas// kun bzang khyod kyi 'khor du 'dus// zhu dmigs snang dang mi myong bas// kun bzang nyid kyis bka' stsal pa// chos rnams gcig tu 'dus par ni// sems lung chen po 'di la sna?ng// gcig dang gnyis su bstan pa ni// rnam grangs mdo 'di ji ltar lags// zhes zhu?s so// sems dpa' chen po nyon cig/ kye/ nga ni ye nas lhun gyis grub// nga ni sangs rgyas thams cad kyi// lhun gyis grub pa'i snying po yin// nga ni thugs rje'i ngo bo ste// gang dang gang la de mos pa// gang gi don de byed pa'i phyir// nga yi las kyi don bstan gyis// gang zhig gang la de dbang gis// gang la gang mos de la ni// chos rnams gcig tu 'dus pa'i phyir// rang byung byang chub sems nyid bstan// mtshan ma'i grangs la de sbyor dga'// gang zhig de la gang med na// gang la de mos de dag la// nga yis byas pa'i sna tshogs gang// de dang de dag sna tshogs pa// brjod kyis mi lang de dag bstan// de yang nga yi rang bzhin bstan// gcig ni nga nyid snying po ste// gnyis byung sna tshogs nga yis byas// grangs kyi mdo na kun bral yang// gcig dang gnyis dang bsam yas grub// mtha' ni brjod med brjod mi lang// brjod med snying po gcig tu bstan// gcig ni kun byed byang chub sems// byas pa'i chos ni rnam pa gnyis// rgyu dang 'bras bu'i ngo bo bstan// kun rdzob dam pa'i don gnyis kyis// dpe don rtags dang gtan tshigs gsum// nges dang drang don sgo gnyis bshad// rgyu ni 'byung ba chen po lnga// 'bras bu khams gsum sems can te/ khams gsum sems can rgyu 'brel nas// 'bras bu sangs rgyas ming 'dogs te// rgyu 'bras dpe don de ru btags// de dag drang ba'i lung bshad de// rnam pa gnyis su dbye bar bya// chen po lnga ni rgyu rkyen gyis// byas pa'i chos ni thams cad kun// sems nyid rang byung mngon gsal te// de bzhin nyid du ma rtogs te// ma rig log rtog gzug 'dzin gyis// yul drug chos la nges brtags pa// 'jig pa drug dang rten pa drug/ 'jig rten zhes su bshad pa yin// yul drug chags pa drug rten nas// dman pa'i sdug bsngal ya nga la// mya ngan mya ngan zhes su bshad// de nyid gang dang bral gyur pa// yul drug dngos po mi rtag cing// rkyen drug gnas su mi gshegs gsal// sdug bsngal drug las 'das pa'i phyir// mya ngan 'das pa zhes par brjod// ji bzhin snying po byang chub la// ma btsal rang byung shar ba yi// chen po lnga dang byas snang kun// rang gi mtshan nyid 'dzin ltar snang// de bzhin byang chub snying pos kyang// dmigs med ngo bo 'bad pa med// mtshan nyid rjes su 'dzin ltar snang// rang shar ba yi chen po lngas// chos kun skyed pa'i snying po byed// de yis bskyed pa'i sems can rnams// rang byung nga yin mi rtog par// spyod pa'i lam der gyur bltas nas// rgyu 'bras 'bras bu byung bar 'dod// rgyu zhes ming du btags pa yin// 'bras bu gang thob theg par bshad// spong bgegs sbyong ba la sogs pa'i// byed rtsol dgag bsgrub med pa'i rgyu// 'bras bu zhes su btags pa yin// snying po rgyu las 'bras bur bshad// rang bzhin snying po de las ni// skye 'jig med pa'i rang bzhin las// mi 'gyur rdo rjer zhugs pa yin// sku gsung thugs kyi ye shes ni// phyag rgya rten dang rten par 'bar// snying po stong pa nyid yin te// phyag rgya de yi kun rdzob ste// blang dor byed rtsol 'dod sbyong gis// bden pa gnyis kyi rtog pa bral// sems kyi rim rtsal snying po grub// bdag nyid dbyings dang ye shes lta// gang la mi brten gzhan mi tshol// skul ba'i snying po rang las byung// mi g.yo rdzogs pa'i ting 'dzin gyis// ngang gi bya med 'phrin las 'das// mi rtsol bde ba'i 'phrin las bkod// bskal pa gsum dang mi tshe bdun// zla drug lo gcig zla bcu drug/ bsti gnas skabs kyis rtsol byed pa// byed rtsol bcos ma'i theg pa yin// bya med rnal ma'i don bstan pa// mi rtsol lhun grub bde bar gnas// 'di la ma rdzogs gang yang med// gcig rdzogs kun rdzogs yongs rdzogs pas// bya ba phun sum tshogs par bde// gcig rdzogs byang chub sems su rdzogs// rang nyid shar bas gnyis gnyis rdzogs// kun rdzogs phun sum tshogs par rdzogs// rang la thig le gnyis snang pas// yongs su rdzogs pa chen po ste// gcig la rdzogs pa'i lung 'di yis// sangs rgyas dgongs pa 'di la gnas// bya med 'di la gang gnas pa// lus ni lha mi la sogs pa'i// 'gro ba ma lus 'dzin na yang// dgongs pa chos nyid sangs rgyas yin// gang de sems can don byas na// brtson 'grus mi byed bde bar 'gyur// zhes gsungs so/ kha sa man ta nam mkha'i mtha' dang mnyam pa'i rgyud las// theg pa'i rnam grangs bsdus pa bkod pa'i le'u ste rtsa lnga pa'o//// de nas bcom ldan 'das dpal kun tu bzang pos/skal ldan 'dus pa'i 'khor rnams la mdun bsu ste gsungs pa/ nga la lta ba rnal 'byor rnam pa bzhi 'di lta ste/ shin tu rnal 'byor zhes bya ba dang/ yongs su rnal 'byor zhes bya ba dang// rnal 'byor chen po zhes bya ba dang/sems dpa'i rnal 'byor zhes bya ba dang bzhi yis// snying po don gyi rnal ma bya med la// bltas pas mthong ba'i yul ni rnam bzhi ste// sems dpa'i rnal 'byor yul dang dbang por snang// byang chub yan lag cho 'phrul la sogs bzhi// byin gyis brlabs nas sems dpa'i lha nyid lta// snying po ye shes chen po mthong ba min// ma bcos de bzhin nyid du sems dpa' zhog/ don gyi snying po rnal ma bya med la// chen po sbyor ldan rnams kyis mthong ba ni// ye nas rang rgyud dag pa'i dkyil 'khor la// rgyu las 'bras bu'i 'khor lo rtsol ba ste// bsnyen bsgrub bzhi yis yan lag rdzogs pa byed// 'phro dang 'du ba bdag nyid lhun grub byed// don gyi ye shes chen po mthong ba med// ma bcos de bzhin nyid du chen po zhog/ don gyi ye shes chen po bya med la// yongs su sbyor ldan rnams kyis mthong ba ni// dbyings ni rnal ma'i rgyu ru mthong ba la// ye shes chen po rnal ma'i 'bras bur mthong// snying po gcig la rgyu 'bras gnyis mthong bas// rgyu las 'das pa'i rnal ma mthong ba min// mi g.yo shugs kyi dbyings su rnal mar zhog/don gyi ye shes chen po bya med la// shin tu rdzogs chen rnal 'byor nyid kyis mthong// byang chub sems ni kun gyi ye shes gsal// de nyid ma bcos don gyi rnal mar mthong// lta ba ye nas bsgom du med par bzhag/ dam tshig ye nas bsrung med 'phrin las btsal du med par bzhag/ bzhag pa'i ji bzhin de nyid rnal du 'byor// rnal 'byor bzhi yi bye brag dbye ba ni// re re la yang bzhi bzhi dbye bya ste// sems dpa'i rnal 'byor bye brag bzhir lta ba// yul dang dbang po rnam par mi rtog sems// des na sems dpa'i rnal 'byor nyid du bshad// byang chub byin rlabs cho 'phrul 'byin pa ni// de ni rnal 'byor chen po zhes su bshad// phyag rgya chen po bzhi dang ldan pa ni// yongs su rnal 'byor zhes su bshad pa yin// ye shes dam tshig rang bzhin med lta ba// shin tu rnal 'byor dgongs par sems dpa' bzhed// blang dor med pa'i rnal 'byor de ma thog/ rnal 'byor chen po bye brag bzhir phye ba'i// dang po ting 'dzin rnam gsum sems dpa' ni// sems dpa'i rnal 'byor zhes su bshad pa yin// rang rgyud dag pas ye shes lta byed pa// rnal 'byor chen po zhes su bstan pa yin// bsnyed bsgrub rnam bzhi yongs su rdzogs pa ni// yongs su rnal 'byor zhes su bstan pa yin// thams cad bdag nyid chen por lta ba ni// shin tu rnal 'byor zhes su bstan pa yin// rtsol bral rang rig klungs su zhugs pa yin// yongs su rnal 'byor bye brag bzhir lta ba// ting 'dzin rim pas bdag sku mi skyed pa// chos rnams rang rgyud dag par sems pa'i phyir// sems dpa'i rnal 'byor zhes su bshad pa yin// yab yum thabs dang shes rab mi ltos par// snying po tsam gyis dkyil 'khor rdzogs byed phyir// rnal 'byor chen po'i dgongs pa bshad pa yin// snang la rang bzhin med pa'i chos nyid du// spyad pas yongs su rnal 'byor nyid du bshad// ji ltar snang ba'i chos rnams thams cad kun// rgyu dbyings 'bras bu ye shes lta ba'i phyir// shin tu rnal 'byor nyid du bshad// shin tu rnal 'byor bye brag bzhir lta ba// blang dor med pa'i byang chub sems de yis// sems dpa'i rnal 'byor rjes su bzhag pa yin// rtsol sgrub 'das pa'i byang chub sems de yis// rtsol dang bral ba'i byang chub chen por bstan// rgyu 'bras 'das pa'i byang chub sems// yongs su rnal 'byor zhes su bshad pa yin// ye nas sgro dang skur pa spangs pa'i phyir// shin tu rnal 'byor zhes su brjod pa yin// yongs su rnal 'byor la sogs gsum po la// rang byung ye shes che dang mi ldan pas// lam la bgrod cing sa la sbyang bar byed// dam tshig tshul bsrung lta ba sgom byed pas// gom pa drag dal lta spyod yod ma yin// de bas shin tu rnal 'byor longs spyod ni// ye nas kun tu bzang pos byas pa'i phyir// lam ni mi bgrod sa la sbyang du med// dam tshig mi bsrung lta ba sgom mi byed// byang chub chen po lam nas kun 'byung phyir// byang chub nyid las byang chub nyid mi bgrod// ye shes nyid kyis ye shes nyid mi spyod// dam tshig rang bzhin byang chub nyid yin pas// byang chub nyid las byang chub nyid mi srun// bsgom pa'i rang bzhin byang chub nyid yin pas// byang chub nyid las bsgom du med// lta ba'i yul ni byang chub nyid yin pas// byang chub nyid la byang chub nyid ltar med// shin tu rnal 'byor lta spyod bya med 'di// rang byung ye shes ma btsal de nyid yin// gang zhig gang dang gang gi dngos po de// rang gi mtshan nyid gzhan du rag ma lus// zhes gsungs so/ kha sa man ta nam mkha'i mtha' dang mnyam pa'i rgyud las/rnal 'byor bzhi mdor bstan pa'i le'u ste rtsa drug pa'o//// de nas bcom ldan 'das dpal kun tu bzang po des 'di skad ces gsungs so// kye sems dpa' chen po/ brkam chags lnga yi dri ma ma spangs bral// kun tu bzang po ma lus mchog gi don// snying po byang chub gang zhig phrad 'dod pas// kun tu bzang po nga yi lus 'di bzung// chos ni phyi nang snang grags thams cad kun// mi rtog rnying po rang byung ye gnas yin// rgyu 'bras lung spyis 'di la rtog pa byed// bden pa gnyis med ye nas lhun grub pas// gcig la blang dor byas na gnyis ka spong len 'byung// dman pa'i bden pa de bzhin gang gnas med// rang byung snying po de bzhin nyid gang yin// gcig nyid ma grub gcig la gcig gis stong// gnyis su ma grub gnyis la gnyis kyis stong// gsum la gsam med bzhi la bzhi yis stong// lnga ru ma grub drug la drug gis stong// bdun du ma grub brgyad la brgyad kyis stong// dgu yang de bzhin bcu la grangs mtha' sogs// grangs kyi de bzhin gnas gzhan de bzhin stong// grangs dbye dngos po ma grub grangs sogs de bzhin te// thams cad kun stong rnam pa ma lus 'das// dngos po rang bzhin rtag pa kun dang bral// rang byung rdzogs chen snying po nga nyid las// blo yi rim 'jug theg gzhan las khyad par// dngos por gzung zhing rtog dang mi rtog byed// 'dod 'dzin byed rtsol ma lus de dag stong// thams cad stong nyid rnam pa kun rdzogs pas// thams cad lhun grub bde chen rang rig snang// gang yang yin no rnam pa'i don kun rdzogs// dgu dang bcu dang de bzhin grangs mtha' rnams// ma lus kun rdzogs de bzhin grangs rdzogs pas// thams cad ma lus de bzhin thig ler chub// thams cad rdzogs spangs gzhan nas sgrub tu med// rtag 'dzin chos kun stong pas sems nyid dri ma med// ma grub ngang gis gsal bar 'byung bas rang byung ye shes shar// bdag nyid ye nas dag pas zhen pa zlog tu med// 'bras bu ye nas chub pas 'bras bu btsal mi dgos// gzung 'dzin ye nas dag pas gnyen po rten mi dgos// sgrib pa ye nas byang bas ye shes skyed du med// dngos po'i rang bzhin stong pas chags pa'i gzhi dang bral// rang byung rang gis gsal bas chags med ye shes shar// chos rnams ma lus dngos po thams cad kun// rang sems byang chub sny-ing po kho na bas// las kyis ma bcos rgyal bas ma mdzad de// snga rabs 'das pa'i rgyal ba ji snyed pa'i// snang byed la sogs 'das pa grangs med pas// ma byung ma skyes ma 'gags sngon rol du// rang byung snying po de nyid ye nas rgyas// snga rabs 'das pa rgyud drug sems can gang// tshangs dang bde byed la sogs 'das pa rnams// ma byung ma bskyed ma 'gags sngon rol tu// rang byung nga nyid gdod nas ye sangs rgyas// 'das pa'i dus sogs ye phung chen po lnga// rang byung ma skyes ma 'gags sngon rol du// bdag nyid rang byung snying po gdod nas ye sangs rgyas// gdod nas sgrib pa bral ba'i ye sangs rgyas// rtsol bral ye nas rdzogs pas ye sangs rgyas// kun gyi thog mar byung bas chen po yin/ye nas rdzogs pa chen po sangs rgyas nyid du bshad// gang yang ma 'gags rig pa rang byung la// rnam par gang snang rtog par ci byung yang// rang rig bde ba chen po mngon sum gsal// ye shes sku dang rig pa phyag rgya rnams// ma 'gags bde ba'i don chen 'khor lo rnams// mngon du gsal ba'i rig pa'i ye shes che// 'khor ba'i rgyud drug rang byung bdag nyid la// lo rtog rol pa'i bsam pas skyod pa med// mya ngan 'das pa'i rol pa phyag rgya kun// ma lus ji bzhin nyid de bdag nyid ldan// kun gyi bdag nyid mchog tu gyur pas che// ma lus 'byung bas yon tan kun rdzogs te// rnam par dag pas rgyu ba med pa'i dbyings// kun tu snang bas mkha' ltar khyab pa'i dbyings// gdod nas dag pas spros dang bral ba'i dbyings// skye 'jig med pas 'gyur ba med pa'i dbyings// gdod nas gnas pas btsal du med pa'i dbyings// mchog ldan rig pa'i pho brang kun rdzogs pas// bsam pa med pas ma lus 'dus pa'i dbyings// bskyod med rnam dag rig pa'i dbyings su che// ye nas grub pas rig pa'i 'khor lo che// bdag dang gzhan med brjod pa'i sangs rgyas med// nga yi ngag nyid rig pa'i phyag rgya'i gsung// brjod pa'i sgra med sangs rgyas gsung yang med// thams cad rang byung ye shes nga yi thugs// sangs rgyas gsung med rang gsal thugs dang bral// 'dzin bral snying po'i mchog ste bde chen rol pa'i sku// zhes brjod pas/ 'khor ba dang mya ngan las 'das pa'i chos thams cad bde ba chen por shar ro/kha sa man ta nam mkha'i mtha' dang mnyam pa'i rgyud las/ che ba bstan pa'i le'u ste rtsa bdun pa'o//// de nas bcom ldan 'das dpal kun tu bzang po des/ thig le chen po ye shes me long ltar gsal ba'i dgongs pa la snyoms par zhugs so// de nas sems dpa' chen po des 'di skad ces gsol to// byang chub sems ni kun gyi bdag/ kun tu bzang po bde chen po// byang chub sems kyi rang bzhin pas// rang byung snying po don gyi mchog/ grol ba rang byung dngos grub thabs// byed rtsol 'jug dang ldan min las// cir yang snang ba ye shes kyis// rang byung grol ba'i dngos grub 'byung// ye nas rnam dag don nyid las// 'gyur med rang byung gang gsal pa// las rtog ma lus byed rtsol gyi// de bzhin 'byung dang nyams 'gyur ba// snying po'i don ni ji ltar lags// bde ba chen po'i ye shes gang// sdug bsngal dben zhing ldan gyur te// dmigs pa'i yul ni ji ltar rkyen// rang byung ye shes nub med pa'i// rig pa'i sgron ma rgyal mtshan ltar// bde ba'i ye shes ji ltar snang// blo yi khyad par mos pa yi// dman pa'i ye shes gang snang ba// rang byung ye shes rgyu rkyen bcas// gol sgrib gnas ni ji ltar byed// snying po rdo rje sems nyid gnas// shar bas thabs ni 'gags ldan zhing// rnam pa'i bye brag shar bar mdzod// ces glengs so// de nas bcom ldan 'das dpal kun tu bzang po des 'di skad kyis gsungs so// sems dpa' chen po dngas pa'i yid kyis sgo phye zhig/ rang byung rgyal mtshan ltar gnas pa// don gyi rim pa 'di lta ste// rdo rje sems dpa' nam mkha' che// kun bzang yangs pa chos kyi dbyings// rnam dag lam chen kun sgrol phyir// mi skye mi 'gags cir mi dgongs// byams pas don nyid rnam sbyang phyir// snying rje chen po cir mi mdzad// che bas che ba'i zab mo yis// yon tan cir yang bsngags pa med// bsam gtan nyid pas bsam du med// ma bsams ma sbyangs chos nyid de// rnam rtog nyid la ye shes skye// byung ba'i sgo mor ming btags te// sems kyi dben pas lam tshol zhing// dgon pa'i rgyud du dben 'dzin cing// btags na rnam par rtog 'gyur bsgom// rgyu dang 'bras bur ming btags te// dge sdig gnyis kar rnam par spel// 'jig rten 'di las 'byung ngo zhes// blang dor brod pa mchog tu skye// chags dang ma chags tshig gi lam// dbu ma bzhin te brag cha 'dra// bde dang sdug bsngal rgyu mthun zhing// 'gro ba'i mgon po sems dpas gsungs// 'dod chags zhes sdang gti mug dang// byang chub sems dpa'i lam las byung// kun spyod yon tan rnam lnga yang// chos nyid dbyings kyis rgyan ces gsungs// nam mkha' rtog pa skye med cing// rtog pa de nyid nam mkha' 'dra// mi chags nam mkha'i bsngo ba las// rang don chen po nam mkha' 'byung// rtog med mnyam nyid chos kyi sku// gzung bas mi zan chu zla 'dra// kun tu bzang po'i rol ba yis// A li kA li zab tu bstan// 'di ni i dang mdzes pa'i ta// pa dang yan lag spros pa bzhin// 'jig rten yongs kyi spyod yul las// sangs rgyas gsung gi zab mo 'byung// e ma sangs rgyas spyod yul 'di// btsal bas rnyed pa'i gnas med de// drug gi chos bzhin yul med pas// stong pas nam mkha' snyeg pa bzhin// gong nas gong du tshangs pa'i lam// bya bral chos dang 'thun pa med// ci ste lam la bgrod 'gyur na// nam mkha'i mtha' bzhin thugs pa med// de ltar de bzhin de yi phyir// de la de bstan de yang thob// de yi snying po de bas na// de las de 'byung ngo mtshar che// sngon gyi de dang da lta'i de// de bzhin de yi gnas su che// de ltar de yi lam 'dra bar// de ni de yi rang bzhin no// de dang 'dra ba yongs kyi lam// zla ba las byung rten dang bcas// kun gyi mnyam nyid yin pa la// phyogs su bltas pas grub pa med// da lta'i bde dang phyi ma'i bde// mngon sum pa dang rgyab nas byung// de yang rnam pa'i skyon yin pas// de la brten par mi bya'o// dus gsum gcig ste khyad par med// sngon med phyis med gdod nas byung// chos skus khyab pas gcig pa'i phyir// che ba'i chen por rang bzhin gnas// srid pa gsum na sbyong ba yang// ming tsam sgyu mar snang ba ste// 'khor lo sgyur ba'i gnas chen yang// sgyu ma sbyong ba'i bsti gnas yin// rnam sbyong dus la ltos pa rnams// dus der 'byung bar mi 'gyur ro// ma bral smon pas spyod pas na// stong pa'i mtshan nyid gsung ba bzhin// gcig ste rnam pa yongs kyis med// rnal 'byor nam mkha'i bya lam gnas// ma byung ma skyes snying po la// sgro btags chos kun ga la yod// phyi nang gnyis ka phyi nyid nang// zab mo'i cha shas rtog yul med// de bas ting 'dzin mnyam dang bral// 'di la tha tshig phyi dang nang// rang bzhin phung po khams bzhin gnas// dus gsum 'di dang mi 'bral bas// tha tshigs ming du btags pa med// mi g.yo ba ni sku yi rgya// mi bskyod pa ni ye shes te// mi len pas ni bdag med cing// mi 'dor tshig bral mnyam nyid do// gang dang gang gi gang du yang// kun 'khol kun spyod bdag las byung// 'di la skyes pa bud med ces// mnyam pa'i rgyal pos yongs ma gsungs// de la brtul zhugs drag shul gyi// gnas su bya ba ming med de// a dang par ni rnam ldan na// sgyu ma'i bde ba 'byung bar 'dod// rang bzhin gcig tu ma nges pas// ji ltar btags pa de nga ste// snang 'dod rtsol sems bde ba yang// de ni de sgrib skyon chen yin// byang chub yan lag kun gyi sgo// cha lugs bsgoms pas chu zla bzhin// ma gos ma chags 'byung 'gyur yang// bsgoms pas byis pa'i spyod yul bzhin// dkyil 'khor khro gnyer cha lugs kyis/ khro bdag chen po'i lus bzung nas// yi ge sngon du byung na yang// zhi ba de nyid mthong ba min// nyon mongs pa yi dbang gis ni// ta la'i mgo bo bcad pa dang// sa bon me ru bsregs pa yang// de yi dbang du mi 'gyur ston// rnam grangs brgya stong phrag yangs pa// gang ltar dpyad kyang me tog skye// mtshan ma med pa'i dbang gis na// bsti gnas de las 'byung mi 'gyur// gleng bral 'di la gang gnas pa// rnal 'byor de ni skal ba bzang// bdag dang gzhan don mi byed pas// sgyu ma lhun grub yul la rol// lhag ma med par yongs su rdzogs// 'gyur ba ma yin drang por gnas// nam mkha' bzhin te mtha' mnyam zhing// gzhan la ltos 'gyur chos ma yin// lhun gyis gnas pa'i bde chen de// mtshungs pa med pa'i ye shes kyi// rang gi mthu yis rig pa las// chos ni gzhan nas 'byung mi 'gyur// mnyam pas rig par bkod pa med// gcig pas phyogs su dngos dang bral// tshogs kyi brgyan rnams bkram pa yang// rang bzhin gnas pas 'grib pa med// lhun gyis gnas pas mi bsngo zhing// gdod nas dag pas bdud rtsi yin// 'du byed bcu gnyis khyab par ru// lhag pa'i bsam pas gzung ba med// yid kyis bsam pas yon bdag ste// bltas pa'i stobs ni bkram pa'o// mthong par gyur bas dngos grub la// de nyid mnyam bzhag rdzogs pa'o// yud tsam gzung bas sbyor ba yin// dga' bar gyur bas dam tshig ste// thabs kyis gar thabs skyod pa yis// gnyis med sbyor ba phul ba yin// mi gzung gtor bas gtor ma yin// bya ba med pas las rnams te// mi rtog ye shes bgegs bsal nas// mi gsung mnyam bzhag sngags tshig go/ bla ma mchod dang gtong ba dang// de bzhin bsod nams thams cad kyang// ma chags mig g.yo'i stobs med na// byas na 'ching ba chen por 'gyur// de bas de lung de nyid la// de las de byar sgrib par 'gyur// de ltar de la de rtog na// de la de nyid grub pa med// de bas de nyid de rgyur byung// de phyir de grub kho na'o// zhes gsungs pas/ thams cad kyang dbyings kyi rdo rje chung ste snying po don las mi g.yo bar gyur to// bcom ldan 'das dpal kun tu bzang pos/ nam mkha' mtha' dang mnyam pa'i rgyud las/ mi nub rgyal mtshan lta ba shan 'byed gsal ba don gyi bkral ba'i le'u ste rtsa brgyad pa'o//// de nas sems dpa' rdo rje des/de bzhin gshegs pa la 'di skad ces gsol to// chos rnams snying po lhun grub pas// btsal med ye shes rang byung la// bgrod lam skas ltar snang ba ni// gnyis dang bdun dang bcu la sogs// grangs ni du mar snang ba ste// 'dus pa'i tshogs kyis rmongs pa'i dbang// bde bar gshegs pas bshad du gsol// ces zhus so// de nas bcom ldan 'das dpal kun tu bzang po des/ sems dpa' rdo rje la 'di skad ces bka' stsal to// rgyu 'bras byed rtsol bgrod lam rnal bcos rjes 'dzin rtog pa rnams// rdzogs chen rnal 'byor gyi don shes shing rig pa las// gol sa sgrib par 'gyur 'di 'dus pa'i tshogs la bshad kyis nos// sems kyi rang bzhin 'di nyid ni// chos kun ma lus gcig gi snying po ste// ma skyes rnam par dag pas sgrib pa med// bgrod pa'i lam dang bral bas gol sa med// ye nas lhun gyis gnas pas btsal du med// chos kun snying po rang byung thig le la// rgyu las btsal zhing spros pas sgrib pa byung// thams cad bdag nyid rang byung ye shes la// gzhan du btsal zhing grangs kyis rnam pas bslad// dman pa'i bslad pas gol sa sgrib pa byung// rgyu 'bras dbyer med snying por ro gcig la// rtog pa'i de nyid rnam pa gnyis po gnyis// bdag nyid btsal ba'i snying po gzhan phyir rtsol// sa dang pha rol phyin pas bskal ba du mar bsgribs// de bzhin phyi nang rtog pa'i dag pa rnam gsum dang// byang chub rkyen dang cho 'phrul yan lag gis// bskyed bdun la sogs bslad pas byis pa bsgribs// rgyu 'bras mtho dman lta spyod khung long ste// de bzhin lung gsum gnas kyi dus sogs rkyen gyis nyams// snying po gcig la bde sdug blang dor gnyis// gcig ma mthong bas blang dor snying po sgribs// rang byung snying po kun gyi rang bzhin la// rnam thar phyag rgya rang bzhin dag pa nyid// rang byung gcig las yin pa gsum sogs rtsol// rtsol bral lung las log cing rig pa'i man ngag/ rang rig gsal ba'i ye shes snying po la// dbyings dang ye shes rgyu dang 'bras bur dmigs// rgyu yi sgro btags 'bras bur skur pa btag/ de dag bral ba'i yid ches rab tu bsgribs// med pa'i 'bras bu 'dod pa drug la sogs// gnyis kyi bden pas stong zhing sgrub byed dang// de bzhin dag pa'i rim pas 'dod pa'i don rtsol byed// lta spyod yan lag cha nyams de bzhin te// bdag la rim pas rtsol bas sna 'dod dang// rgyu 'bras gnyis nyed rang bzhin stong par bltas// de dag rim gyis 'dod pa'i 'bras bu 'byung// gol sa drug dang sgrib pa drug drug ste// byang chub sems la gol sgrib skyon yin pas// nges thob drug gis skyon yon bsal bar gsungs// bslad pa'i gol sgrib rtog la bsam yas kyang// nye ba'i gnas pas brten pa'i gnas byed ltar// rjes mthun nye ba'i gags gsal bya// rtog spyod gnyis la sgrib pa yang// gzung 'dzin gnyis rten lta spyod gol sgrib yin// blang dor byed rtsol rgyu 'bras rnam de bzhin// mi rtsol bde ba'i cha las kun rtsol rang byung ye shes nam mkha' lta bu la// lta ba'i dmigs dang dam tshig bsrung mtshams dang// byed rtsol spyod dang 'dod dmigs 'phrin las dang// gang zhig dmigs 'dzin spyod rtsol 'dod pas sgrub// ma lus kun bral de dag ma lus stong// sems la lung med gtan la 'bebs pa med// sgro skur med pas man ngag zla ba med// lta med lta ba'i mchog ni rdzogs pa chen po yin// blta bya lta byed med pa'i rang byung ye shes la// sgro btags rtog pa mthong ba gsum gnyis sogs// la gol la sgrib lta ba'i gol sgrib byung// bsgom med gcig la bsgom pa drug sogs bsgom// mngon du ma smin bsgom pa'i gol sgrib byung// bsrung med gcig la drug sogs sdom bsrungs pas// la nyams la 'chal dam tshig gol sgrib byung// rtsol med gcig la de bzhin drug sogs byas// la chad la lhag 'phrin las gol sgrib byung// ye shes gcig ste btsal ba'i ye shes sna tshogs pas// la btags la 'gags ye shes gol sgrib byung// bden pa gcig la de bzhin drug sogs pas// la bden la brdzun lung gi gol sgrib byung// mngon mtshon gcig la brjod pa sna tshogs pas// la bden la brlan man ngag gol sgrib byung// gang zhig gang la de nyams de med pas// sgro skur log bslad bcos ma'i blo bslad dang// de la de med gang la de ma bsags// de bas sna tshogs zhen pa'i rtog bsam yas// sgro skur gnyis log rang byung bden gnyis sgrib// gol sgrib la sogs de bzhin rtog mtha' yas// zhes gzhan gyi sgro skur gsal ba'i don de kho na nyid gsungs so/ kha sa man ta nam mkha'i mtha' dang mnyam pa'i rgyud las/ gol sgrib blang dor bstan pa'i le'u ste rtsa dgu pa'o//// de nas bcom ldan 'das kun tu bzang po des/ 'dus pa'i tshogs la 'di skad ces gsungs so// nga yi de nyid ma bcos ma yin pas// kun gyi rang bzhin byang chub sems 'di ni// ye nas nga yin thams cad lhun grub pas// bcu sogs rang bzhin btsal zhing bsgrub mi dgos// nga yi rang bzhin gang de nam mkha' 'dra// nam mkha' dag las kun kyang btsal mi byed// rtsol sgrub byas pas nam mkha' kun las 'das// de bzhin nga nyid kun rdzob lhun grub pas// nga la gzhan gyis blta zhing bsgom bya sgom byed med// gang zhig rtsol ba'i rgyu 'bras theg pa yis// rang bzhin yan lag bcu la sogs pa yis// dus gsum kun tu rang byung la btsal kyang// nga yi rang bzhin mngon du gyur pa bas// mthong zhing thos pa tsam du ga la 'gyur// mkha' la dor zhing pe ga u ta ya// rang nyid sa la lhung zhing nyams par 'gyur// nga yi rang bzhin nges par lung bstan gyis// rang min bltas pas mthong min de bzhin min// btsal ba'i rang bzhin yan lag don med kyis// de bzhin pa la de bzhin nyid du rtsol// dngos grub 'dod pa thams cad rang la rdzogs// mi 'gyur ji bzhin gong du yengs med zhog/ rtsol dang bcas pa'i lta ba 'dir mi dgos// rtog dang bcas pa'i sdom bsrung 'dir mi dgos// brtul zhugs spyad pa'i spyod pa de bzhin te// byed rtsol ma lus 'dod pa sbyong ba med// de la de med de yin de yi snying po mchog/ gang dang ma lus de dag de nyid de// de nyid de yin mchog ste gang de gzung// zhes gsungs so// de nyid mdud 'grol gyi don gsungs pa// sems dpa' chen po nyon cig/ mdud pa 'grol bar bya'o// ye shes gsal cing shar bar bya'o// rdzogs shing lhun par bya'o// snying po kun gyi ye shes rang gsal bdag rdzogs pas// rig pa'i ye shes gsal bar bskyed du med// rten dang gnas kun ma lus kun chub pas// sbyangs nas brten pa'i sa gzhi gzhan yod min// byed rtsol ma lus bdag nyid lam yin pas// nga las gzhan pa'i bgrod byed yod ma yin// nga ni ye nas gnyis snang bral ba'i phyir// gzung 'dzin gnyis su snang ba ye nas med// nga las gzhan ni gtan la dbab tu med// nga ni kun gyi byang chub snying po bas// gsang ba'i man ngag gzhan la yod ma yin// sgro dang skur pa kun las 'das pa'i phyir// chos kun snying po la ni nga yis bzlas// nga med yul na gzhan ni mi dmigs pas// lta ba bsgom du med par la yang bzla// nga las gzhan na bsrung du med pa'i phyir// dam tshig bsrung du med par la yang bzla// btsal ba'i 'phrin las lhun gyis grub pa'i phyir// 'phrin las btsal du med par la yang bzla// rang bzhin nga yis gtan la phebs pa'i phyir// lung chen thog 'bebs yin par la yang bzla// chos la nga las gzhan pa med pa'i phyir// kun bzang nga nyid yin par la yang bzla// nga ma mthong bas sgrib pa yin par bshad// nga dang nga yi sgrib pa gnyis yin te// ma mthong ba nyid las kyi sgrib pa yin// ma shes pas ni shes bya'isgrib pa yin// ji ltar snang ba'i chos rnams thams cad ni// snying po byang chub sems kyi ngo bo bas// ma shes ma rig sgrib pa'i ngo bor bshad// ji ltar snang ba'i chos rnams thams cad ni// rang yin gzhan min de la rang rtog na// de yin snyam pas rang la rang gis bsgribs// rang gis rang bzhin de yis shes pa min// ji ltar snang ba'i chos rnams thams cad kun// sems dpa' nyid yin nyid las gzhan med kyis// gol sa'i gnas kyang rang ngam gzhan gnyis yin// rang gol rang du dngos 'dzin dang// gzhan gol gzhen du bden 'dzin na// gol sa gnas ni bsdu na gnyis// rnam par g.yeng na log rtog sna tshogs bzhin// de nyid de dag rig na bde ba yin// rnam pa ma lus bde ba'i mchog tu gsal// ces gsungs so/ kha sa man ta nam mkha'i mtha' dang mnyam pa'i rgyud las/ gzhan ma yin pa'i de kho na bstan pa'i le'u ste sum cu pa'o//// de nas kun tu bzang pos 'di skad ces gsungs so// nges pa thob pa'i theg pa drug gis rang bzhin bcu la bltas pas// snying po'i don la bltas pa dang// ma mthong ba'i don gyis gol sa dang sgrib pa byung ste// theg pa gcig gis lta ba la// gol sgrib lta ba bcu yod de// lta ba dag gi gol sgrib dang// dam tshig dag gi gol sgrib dang// 'phrin las dag gi gol sgrib dang// ye shes dag gi gol sgrib dang// sa dang pha rol phyin pa dag gis gol sgrib dang// lam la gnas pa'i gol sgrib dang// phra bdag gis ni gol sgrib dang// rgyud kyi gol sa sgrib pa dang// lung gi gol sa sgrib pa dang/ man ngag gol sa sgrib pa bcu'o// rdzogs chen shin tu rnal 'byor la// sgrib pa yod bar ma gsungs so// rnal 'byor rnam pa drug po yis// sems nyid rdzogs pa chen po la// bltas pas sgrib pa'i gol sa byung// ston pa'i lung la gol sa med// gang zag blo la gol sgrib byung// kun tu bzang po'i rang bzhin la// lung chen rnam pa bcu snang ste// lta ba bsgom du med pa yin// dam tshig bsrung du med pa yin// phrin las btsal du med pa yin// ye shes rang byung sgrib med yin// sa lam sbyang du med pa yin// lam la bgrod du med pa yin// phra ba gzung 'dzin med pa yin// rgyud kyi rang bzhin 'brel ba yin// lung gi ye nas thog tu phebs// man ngag dag gi la yang zlo// rdzogs chen shin tu rnal 'byor gyi// rang bzhin bcu ni de ltar ro// zhes gsungs so// rdzogs pa chen po shin tu rnal 'byor gyi rang bzhin lta ba 'di lta ste/ rgyu ni dge ba'i dbyings la lta// 'bras bu ye shes dkyil 'khor lta// rgyu 'bras gnyis su bltas pas gol// snying po don ma mthong bas sgrib// snying po byang chub sems de las// gzhan du lta ba'i yul med de// dbyer med pa ni chos nyid dbyings// lta ba med par lta ba ni// lta ba'i dam pa kho na'o// lta bar byed pa lta ba med// de nas gol sa sgrib pa byung// rnal 'byor chen po ma hA yi// rang bzhin lta ba 'di lta ste// lta ba dag gi rang bzhin ni// lha dang lha mo sku gsung thugs// rang rgyud dag pa'i ngo bo ste// bdag nyid chen po'i dkyil 'khor lta// kun tu bzang po bde chen ni// ma spangs bzhin du lhun gyis rdzogs// rdzogs kyang lta ba'i yul med pas// blta bya lta byed med pa yin// des na gol sa sgrib pa byung// yang na sems dpa'i rnal 'byor gyis// rang bzhin lta ba 'di lta ste// lta ba dag gi rang bzhin ni// byin rlabs dag las byung ba yi// spyan drangs grogs su lta ba ste// chos la mtshan ma med par lta// kun tu bzang po bde chen ni// gzhan du lta ba'i yul med pas// lta ba byed pa med pa yin// de na gol sa sgrib pa byung// yang na gnyis ka rgyu 'di la// rang bzhin lta ba 'di lta ste// lta ba dag gi rang bzhin ni// dmigs pa bdag gi ting 'dzin gyis// rang bzhin chos la blta byas nas// lha dpon bdag g.yog lta bar byed// kun tu bzang po'i bde chen ni// bden pa gnyis med rig par gsal// blta bya lta byed ngang gis med// des na rnam par mthong bas gol// kun bzang ma mthong sgrib par 'gyur// zhes kun tu bzang pos bka' stsal to/ kha sa man ta nam mkha'i mtha' dang mnyam pa'i rgyud las/nges thob drug gis bzla ba gol sgrib bstan pa'i le'u ste sum cu gcig pa'o//// de nas bcom ldan 'das dpal kun tu bzang po des/ 'dus pa'i tshogs la dam tshig gi gol sgrib bstan pa'i phyir 'di skad ces gsungs so// sems dpa' chen po/ dbyings la lta ba'i sdom pa yi// dam tshig dag gi rang bzhin ni// chos dang yul la snying rje sku gsung thugs// sbyor ba rnam pa bzhi ru bsrung// rdzogs pa chen po'i dam tshig ni// gzung 'dzin med pa'i rang bzhin gyis// dam tshig bsrung du med pa yin// des na gol sa sgrib pa 'byung// rnal 'byor chen po dam tshig bstan pa ni// rtsa ba sku gsung thugs te yan lag lnga// bco lnga bco brgyad drug cu dang// sa ma ya ste du mar srung// kun bzang bde chen dam tshig ni// gzung 'dzin med pas bsrung du med// des na gol sa sgrib pa 'byung// yo ga rgyud kyi dam tshig ni// rtsa ba bdun dang dge sdig bcu// spong zhing dang du len par byed// kun bzang rdzogs chen dam tshig ni// gzung 'dzin med pa'i rang bzhin gyis// dam tshig bsrung du med pa yin// des na gol sa sgrib pa 'byung// yo ga rgyud kyi dam tshig ni// rtsa ba bdun dang dge sdig bcu// spong zhing dang du len par byed// kun bzang rdzogs chen dam tshig ni// gzung 'dzin med pas bsrung du med// des na gol sa sgrib par 'byung// gnyis ka rgyud kyi dam tshig drug gi rang bzhin ni// rtsa ba bdun gyi yan lag ste// nyams pa med par srung bar byed// kun bzang rdzogs chen dam tshig ni// gzung 'dzin med pa'i rang bzhin gyis// dam tshig bsrung du med pa yin// de na gol sa sgrib pa 'byung// bya ba rgyud kyi dam tshig ni// rtsa ba lnga dang yan lag bdun// mi nyams bsrung ba dam tshig go/ kun bzang rdzogs chen de la ni// dgag sgrub gzung 'dzin med pa'i rang bzhin gyis// dam tshig bsrung du med pa yin// des na gol sa sgrib pa 'byung// sa dang pha rol phyin pa yi// dam tshig rang bzhin sdom pa ste// spyod pa 'jug dang sdom pa ni// grangs mtha' yas te rgya mtsho 'dra// kun bzang rdzogs pa chen po la// gzung 'dzin bral ba'i rang bzhin gyis// dam tshig bsrung du med pa yin// des na gol sa sgrib par 'byung// zhes kun tu bzang pos bka' stsal to/kha sa man ta nam mkha'i mtha' dang mnyam pa'i rgyud las/ dam tshig gol sgrib bstan pa'i le'u ste so gnyis pa'o//// de nas bcom ldan 'das dpal kun tu bzang po des/ 'phrin las btsal du med pa 'di gsungs so// rdzogs pa yongs su rnal 'byor gyis// rang bzhin 'phrin las 'di lta ste// 'phrin las dag gi rang bzhin ni// zhi rgyas dbang dang mngon spyod bzhi// ma 'dres so sor gsal bar lta// kun bzang rdzogs chen rang bzhin la// lhun gyis grub pa'i rang bzhin gyis// 'phrin las btsal du med pa yin// des na gol sa sgrib pa byung// bskyed pa ma hA yo ga ni// rang bzhin 'phrin las 'di lta ste// 'phrin las dag gi rang bzhin ni// ta na dang ni 'ga' na dang// dam rdzas lnga la spyod par byed// kun tu bzang po'i rang bzhin las// btsal ba med par lhun gyis grub// 'phrin las btsal du med pa yin// des na gol sa sgrib pa byung// yo ga sems dpa'i rnal 'byor ni// rang bzhin 'phrin las 'di lta ste// sems dang ting 'dzin las la spyod// kun tu bzang po'i bde chen la// ye shes rang snang rtsol ba med// ting 'dzin chen du rtsol ba med// des na gol sa sgrib pa byung// gnyis ka rgyud kyi thig pa ni// rang bzhin 'phrin las 'di lta ste// 'phrin las dag gi rang bzhin ni// las su khrus dang mchod pa byed// lta spyod gnyis la brten pa'i las// kun tu bzang po bde chen la// sgrib pa med pa'i rang bzhin gyis// ye nas rang byung ye shes yin// des na gol sa sgrib pa byung// bya ba kri ya'i a nu ni// rang bzhin 'phrin las lta ba ste// 'phrin las dag gi rang bzhin ni// gza' dang rgyu skar dus bzang tshig khrus dang gtsang sbra bye brag tshogs// kun tu bzang po bde chen ni// 'phrin las ye nas lhun grub pas// 'phrin las btsal du med pa yin// des na gol sa sgrib pa byung// mtshan nyid byang chub sems dpa' yi// rang bzhin 'phr-in las 'di lta ste// 'phr-in las dag gi rang bzhin ni// spyod pa'i 'phrin las rnam grangs ni// pha rol phyin pa bcu la spyod// kun tu bzang po bde chen ni// lhun gyis grub pa'i rang bzhin gyis// 'phrin las btsal du med pa yin// zhes kun tu bzang pos bka' stsal to/ kha sa man ta nam mkha'i mtha' dang mnyam pa'i rgyud las/'phr-in las kyi gol sa bstan pa'i le'u ste sum bcu gsum pa'o//// de nas yang bcom ldan 'das dpal kun tu bzang po des rang byung gi ye shes sgrib pa med par gsal ba las/nges pa drug gi theg pa'i ye shes kyi gol sa dang sgrib par gyur pa 'di 'dus pa'i ched du gsungs so// sems dpa' chen po nyon cig/ yongs su rnal 'byor rjes 'jug gi/ rang bzhin ye shes 'di lta ste// ye shes dag gi rang bzhin ni// gnyis su med pa'i rang bzhin yin// kun bzang bde chen 'di la ni// sgrib pa med pa'i rang bzhin gyis// ye nas rang byung ye shes yin// des na gol sa sgrib pa byung// rnal 'byor ye shes rang bzhin ni// rigs chen dag gi ye shes bzhi// kun tu bzang po bde chen 'di// sgrib pa med pa'i rang bzhin gyis// ye nas rang byung ye shes yin// des na gol sa sgrib pa 'byung// lta spyod 'brel med gnyis ka rgyud// rang bzhin ye shes 'di lta ste// ye shes dag gi rang bzhin ni// rigs bzhi phyag rgya bzhi ru gsal// kun tu bzang po bde chen ni// sgrib pa med pa'i rang bzhin gyis// ye shes rang byung ye shes yin// des na gol sa sgrib pa byung// las dang bya ba rnal 'byor gyi// rang bzhin ye shes 'di lta ste// ye shes rang bzhin bstan pa ni// so sor rtog pa'i ye shes ni// rigs gsum so sor 'byed par gsal// kun tu bzang po bde chen ni// sgrib pa med pa'i rang bzhin gyis// ye shes rang byung ye shes yin// des na gol sa sgrib pa byung// byang chub sems dpa'i ye shes ni// ye shes rang bzhin 'di lta ste// brgyad khri bzhi stong rnam grangs dang// thams cad mkhyen pa'i ye shes so// kun tu bzang po bde chen ni// sgrib pa med pa'i rang bzhin gyis// ye nas rang byung ye shes yin// zhes kun tu bzang pos bka' stsal to/kha sa man ta nam mkha'i mtha' dang mnyam pa'i rgyud las/ ye shes kyi gaul sa dang sgrib pa bstan pa'i le'u ste so bzhi pa'o//// de nas bcom ldan 'das dpal kun tu bzang po des/sa yi rim pa'i gol sa dang sgrib par gyur pa 'di gsungs so// sems dpa' rdo rje dngas pas 'thud// yongs su rnal 'byor rjes 'jug gi/ sa yi rang bzhin 'di lta ste// kun bzang dbye ba med pa'i sa// kun tu bzang po bde chen ni// 'di la thams cad gnas pa'i phyir// sa zhes sbyang du med pa yin// des na gol sa sgrib pa byung// rnal 'byor chen po bskyed pa yi// sa yi rang bzhin bstan pa ni// lus dang ngag dang yid dang gsum// sku gsum rdo rje 'chang gi sa// kun tu bzang po bde chen ni// 'di la thams cad gnas pa'i phyir// sa zhes bya ba sbyang du med// des na gol sa sgrib pa byung// gnyis ka rgyud kyi rnal 'byor gyi// sa yi rang bzhin bstan pa ni// lta spyod so sor spyod pa'i sa// kun tu bzang po bde chen ni// 'di la thams cad gnas pa'i phyir// sa zhes bya ba sbyang du med// des na gol sa sgrib pa byung// bya ba las kyi kri ya yi// sa yi rang bzhin bstan pa ni// thugs ni ye shes lnga ldan pa'i// ting 'dzin rdo rje 'dzin pa'i sa// kun tu bzang po bde chen ni// 'di la thams cad gnas pa'i phyir// sa zhes bya ba sbyang du med// des na gol sa sgrib pa byung// byang chub sems dpa'i theg pa yi// sa yi rang bzhin bstan pa ni// dang pos sa nas rim gyi bcu// kun tu 'od kyi sa la gnas// kun tu bzang po bde chen ni// 'di la thams cad gnas pa'i phyir// sa zhes bya ba sbyang du med// des na gol sa sgrib pa byung// zhes bka' stsal to/ kha sa man ta nam mkha'i mtha' dang mnyam pa'i rgyud las/ sa sbyang du med pa la gol sgrib bstan pa'i le'u ste sum cu so lnga pa'o//// de nas kun tu bzang po bde ba chen po des/ 'dus pa'i tshigs la 'di skad ces gsungs so// kye sems dpa' chen po yongs su rnal 'byor gyi lam gyi rang bzhin 'di lta ste/lam gyi rang bzhin bstan pa ni// dbyings dang ye shes gnyis med lam// kun tu bzang po bde chen ni// gzhan du bgrod du med pa'i phyir// lam la bgrod du med pa yin// des na gol sa sgrib pa byung// rnal 'byor chen po bskyed pa yi// lam gyi rang bzhin bstan pa ni// thabs dang shes rab lam sgo dang// ting 'dzin rnam gsum sku gsum lam// kun tu bzang po bde chen ni// lam la bgrod du med pa'i phyir// des na gol sa sgrib pa byung// rnal 'byor bgrod lam rang bzhin ni// mtshan ma med pa'i lam du 'jug/ kun tu bzang po bde chen ni// gzhan du bgrod du med pa'i phyir// lam la bgrod du med pa yin// des na gol sa sgrib pa byung// bya ba kri ya ba dag ni// lam gyi rim pa bstan pa ni// gza' dang rgyu skar dus tshigs bzang sgo nas// dag pa rnam gsum lam du lta// kun tu bzang po bde chen ni// gzhan du bgrod du med pa'i phyir// lam la bgrod du med pa yin// des na gol sa sgrib pa byung// mtshan nyid byang chub sems dpa' yi// lam gyi rang bzhin nges pa byung// tshogs dang sbyor ba mthong ba dang// sa bcu bsgom pa rnam pa lnga'o// kun tu bzang po bde chen ni// gzhan du bgrod du med pa'i phyir// lam la bgrod du med pa yin// des na gol sa sgrib pa byung// zhes gsungs so/ kha sa man ta nam mkha'i mtha' dang mnyam pa'i rgyud las/lam la bgrod du med pa'i gol sgrib bstan pa'i le'u ste so drug pa'o//// de nas bcom ldan 'das dpal kun tu bzang po bde ba chen po des// chos nyid phra ba'i gol sgrib bstan pa'i phyir 'dus pa'i tshogs la 'di skad ces gsungs so// yongs su rnal 'byor chen po yi// rang bzhin phra ba 'di lta ste// phra ba zab mo'i rang bzhin ni// snang la rang bzhin med pa yin// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// rnal 'byor ma hA yo ga yi// rang bzhin phra ba 'di lta ste// phra ba chos kyi rang bzhin ni// thabs dang shes rab ma skyes pa// skyes pa med pa'i phra bar bshad// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// rnal 'byor rnal 'byor yo ga yi// rang bzhin phra ba 'di lta ste// phra ba chos kyi zab mo ni// mtshan ma med pa'i chos kyi dbyings// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// gnyis ka rgyud gyi u pa ya// rang bzhin phra ba 'di lta ste// phra ba chos kyi rang bzhin ni// rnam par mi rtog stong las phra// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// las dang bya ba'i rnal 'byor gyi// rang bzhin phra ba'i da lta ste// chos nyid rnam par mi rtog la// gzung zhing sh-in tu phra ba lta// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// mtshan nyid theg pa chen po yi// rang bzhin lta ba 'di lta ste// chos kyi rang bzhin phra ba ni// chos sku gzung 'dzin bral bar 'dzin// kun tu bzang po bde chen ni// ye nas chos nyid yin pa'i phyir// phra ba dag gi rang bzhin yin// des na gol sa sgrib pa byung// zhes gsungs so/kha sa man ta nam mkha'i mtha' dang mnyam pa'i rgyud las/ chos nyid phra ba'i gol sgrib bstan pa'i le'u ste sum cu bdun pa'o//// de nas bcom ldan 'das dpal kun tu bzang po des 'di skad ces gsungs so// sems dpa' chen po nyon cig/ yongs su rnal 'byor chen po yi// 'brel ba rgyud kyi rang bzhin ni// rgyu dang 'bras bu gnyis med 'brel// kun tu bzang po bde chen ni// sangs rgyas sems can gnyis snang bas// 'brel ba rgyud kyi rang bzhin yin// des na gol sa sgrib pa byung// bskyed pa ma hA yo ga yi// 'brel ba rgyud kyi rang bzhin ni// yab yum thabs dang shes rab gnyis// bdag nyid chen por gzugs kyis 'brel// kun tu bzang po bde chen ni// sangs rgyas sems can gnyis snang bas// 'brel ba rgyud kyi rang bzhin yin// des na gol sa sgrib pa byung// rnal 'byor rnal 'byor yo ga yi// 'brel ba rgyud kyi rang bzhin ni// yul dang dbang po gnyis su 'brel// kun bzang bde chen rdzogs pa ni// sangs rgyas sems can gnyis snang bas// 'brel ba rgyud kyi rang bzhin yin// des na gol sa sgrib pa byung// gnyis lta spyod kyi u ba ya// 'brel ba rgyud kyi rang bzhin ni// gnyis ka spyod pa'i 'brel ba med// kun bzang rdzogs pa bde chen ni// sangs rgyas sems can gnyis snang pas// 'brel ba rgyud kyi rang bzhin yin// des na gol sa sgrib pa byung// las dang bya ba'i kri ya yi// rgyud kyi rang bzhin 'di lta ste// yan lag bcu gnyis rim par 'brel// kun bzang rdzogs pa bde chen ni// sangs rgyas sems can gnyis snang bas// 'brel ba rgyud kyi rang bzhin ni// des na gol sa sgrib pa byung// sa dang pha rol phyin pa yi// 'brel ba rgyud kyi rang bzhin ni// las dang thugs rje bden gnyis 'brel// kun bzang rdzogs pa bde chen ni// sangs rgyas sems can gnyis snang bas// 'brel ba rgyud kyi rang bzhin yin// des na gol sa sgrib pa byung// zhes gsungs so/ kha sa man te nam mkha'i mtha' dang mnyam pa'i rgyud las/'brel ba rgyud kyi gol sa bstan pa'i le'u ste sum cu brgyad pa'o//// de nas yang bcom ldan 'das dpal kun tu bzang po des/ lung gis thog tu phebs pa'i gol sgrib 'dus pa'i tshogs la bka' stsal pa/yongs su rnal 'byor bya ba yi// rang bzhin lung ni 'di lta ste// lung gi rang bzhin bstan pa ni// dbyings ni rgyu yi lung yin la// 'bras bu ye shes lung du bstan// kun bzang rdzogs pa bde chen ni// chos kun gtan la phab pa'i phyir// lung gis thog tu phebs pa yin// des na gol sa sgrib pa byung// rnal 'byor chen po bskyed pa yi// lung chen thog tu phebs pa ni// phung po lnga dang 'byung ba lnga/ khams dang skye mched sems chos rnams// bdag nyid chen po'i thog tu 'bebs// kun bzang rdzogs chen bde ba che// chos kun gtan la phab pa'i phyir// lung gis gtan la phab pa yin// des na gol sa sgrib pa byung// rnal 'byor ting 'dzin gtsor byed kyi// lung chen thog tu phebs pa ni// chags pa med par thog tu 'bebs// kun bzang rdzogs chen bde ba che// chos kun gtan la 'bebs pa'i phyir// lung chen gtan la phebs pa yin// des na gol sa sgrib pa byung// lta spyod 'brel med rnal 'byor gyi// thog tu 'bebs pa'i lung chen ni// nges pa med par bstan pa yin// kun tu bzang po bde chen ni// chos kun gtan la phab pa'i phyir// lung gi thog tu phebs ba yis// des na gol sa sgrib ba byung// bya ba las kyi theg pa yi// lung chen thog tu phebs pa ni// ting 'dzin gzung 'dzin byed pa yi// thog tu phebs par ngas ma bstan// kun bzang rdzogs chen bde ba yis// chos kun gtan la phebs pa'i phyir// lung gi thog tu phebs pa yin// des na gol sa sgrib pa byung// mtshan nyid byang chub sems dpa' yi// lung chen thog tu 'bebs pa ni// don dam kun rdzob bden pas 'bebs// kun bzang rdzogs chen bde ba yis// chos kun gtan la phab pa'i phyir// lung gi thog tu phebs pa yin// des na gol sa sgrib pa byung// zhes gsungs so/ kha sa man ta nam mkha'i mtha' dang mnyam pa'i rgyud las/ lung chen thog tu 'bebs pa'i gol sgrib bstan pa'i le'u ste so dgu pa'o//// de nas dpal kun tu bzang po des/ 'dus pa'i tshogs la 'di skad ces gsungs so// rjes su 'jug pa'i rnal 'byor gyis// man ngag dag gi rang bzhin ni// rgyu ni dbyings su dag par bzlas// 'bras bu ye shes la yang bzlas// kun bzang rdzogs chen bde ba che// rang byung ye shes chen po 'di// sgro skur kun dang bral ba'i phyir// la bzlas pa yi man ngag yin// des na gol sa sgrib pa byung// bskyed pa ma ha yo ga ni// la bzlo ba yi man ngag ni// snang zhing srid pa'i chos rnams la// bdag yin gzhan du rag ma lus// ltos pa ma mchis la bzlo ba'i// kun bzang rdzogs chen bde ba che// rang byung ye shes snying po 'dis// sgro skur kun dang bral ba'i phyir// la bzlo ba yi man ngag yin// des na gol sa sgrib pa byung// yang na sems dpa'i rnal 'byor gyi// la bzlo ba yi man ngag ni// chu zla lta bu'i rang bzhin du// gzung du med par la bzlo ba'o// kun bzang rdzogs chen bde chen ni// sgro skur kun dang bral ba'i phyir// la bzlo ba yi man ngag yin// des na gol sa sgrib pa byung// yang na gnyis ka rgyu 'di yi// la bzlo ba yi man ngag ni// 'di spyod nyes pa ma mchis pas// sems dpa' nga yis lung ma bstan// kun bzang bde chen rdzogs pa ni// sgro skur kun dang bral ba'i phyir// la bzlo ba yi man ngag yin// des na gol sa sgrib pa byung// las dang bya ba ya na yi// la bzlo ba yi man ngag ni// chos la gzung dang 'dzin byad pas// ting 'dzin rtag pa la ma bzlos// kun bzang rdzogs chen bde ba che// sgro skur kun dang bral ba'i phyir// la bzlo ba yi man ngag yin// zhes kun tu bzang pos gsungs so// yang sems dpa' rdo rjes 'di skad ces gsol to// gegs spong 'khor ba las 'das pa'i// rang bzhin bcu ni ji ltar lags// zhes gsol to// bka' stsal ba// spong zhing 'gegs pa rnam gnyis la// rang bcu yis ni lung ma bstan// nges pa thob pa'i theg pa gsum// rnal 'byor bzhi yi gol sar bstan// zhes gsungs so// rnal 'byor bzhi las phye ba yi// rang bzhin bcu yi gol sar ni// gol sa brgya ni brgyad cu la// bcu phrag drug gis sgrib pa yin// bsdoms pas brgya gnyis bcu tshan bzhi// theg pa bdun gyis phye ba'i tshe// rnam pa bcu yi rang bzhin la// bzhi brgya dang ni bcu tshan gnyis// rang bzhin bcu yi ngo bo ni// kun bzang rdzogs pa bde ba che// zhes gsungs pa'o// nges par byed pa'i don bstan pa// rjes 'jug la sogs theg bdun gyis// rang gi rang bzhin ma shes nas// sgrib pa sgrib pa zhes su bshad// rang gi rang bzhin ma shes nas// gong mas 'og ma'i don 'dzin na// gol sa gol sa zhes su bshad// ces gsungs so/ kha sa man ta nam mkha'i mtha' dang mnyam pa'i rgyud las/la bzlo ba'i man ngag gi gol sgrib bstan pa'i le'u ste bzhi bcu pa'o//// de nas bcom ldan 'das dpal kun tu bzang po des/ sems dpa' rdo rje la 'di skad ces gsungs so// sems dpa' rdo rje nyon cig/sgro skur bral ba'i snying po'i don// sgra ru phyung la bshad par bya'o// zhes gsungs so// nga ni kun bzang nyid kyi dngos// des na kun gyi ngo bor shar// gol sa sgrib pa ngang gis med// nyi ma'i snying po lta bu'o// de nyid kun gyi ngo bor gsal// sku gsum ston pa rnam gsum dang// dus gsum sangs rgyas khams gsum dang// snang srid snod bcud thams cad kun// nga yi rnam pa ma 'gags shar// de yang ji ltar shar ce na// mi rtog mnyam pa de nyid la// 'khor 'das thams cad ngo bos ldan// des na chos sku chen po'o// de nyid chu dang zla ba ltar// gzugs sku rnam gnyis snang ba yang// gdul bya rim pa'i ngo la snang// snang ba nyid na chos sku che// dus gsum sangs rgyas thams cad dang// ye shes snying po'i ngo bo ste// snga rabs 'das pa'i sangs rgyas kyang// rang byung ye shes sems nyid do// sems nyid mi rtog rtogs na rgyas/de ltar sangs rgyas mi rtog dang// mi rtog par ni 'gro don mdzad// slad nas 'byon pa'i sangs rgyas rnams// byang chub sems kyi ye shes te// lung don 'gro don mdzad pa ngas// sa pa rigs 'dzin byang chub sems// bltas pas ma mthong ma yin na// rang byung ye shes de ru phrad/ khams gsum sems can thams cad kyi// rang byung ye shes bkag med pas// dbang po yul la rig pas gsal// kun bzang bde ba chen po nyid// snang srid snod bcud thams cad kyang// nga yi rnam pa ma 'gags shar// shar ba nyid na gnyis su med// des na kun gyi snying por bshad// nga ni kun tu shar ba ste// sku gsung thugs su nga nyid shar// rigs 'dzin byang chub sems dpa' dang/ khams gsum gnas pa'i sems can dang// snang srid snod bcud thams cad kun// nga nyid kun bzang rdo rje yi// thams cad rig par rang gsal lo// nga ni kun bzang rdo rje ste// 'khor 'das ma lus thams cad kun// ye nas btsal med byas zin phyir// chos la bya ru med pa'i phyir// btsal ba med pa'i sgo nas 'jug/ byang chub sems las med pa'i phyir// sems kyis bsgom du med pa'o// gzugs med 'das pa'i chos nyid la// dam tshig bsrung du med pa'o// ye nas lhun gyis grub pas na// 'phrin las btsal du med pa'o// byang chub sems la kun 'grub pas// sa la sbyang du med pa'o// byang chub sems ni bgrod zin pas// lam la 'grod du med pa'o// byang chub sems ni sbyangs zin pas// yon tan lhun gyis grub pa'o// rang byung ye shes ye gsal khyab// shes bya shes byed gnyis med pa'o// byang chub sems ni kun gyi dngos// byang chub sems ni snying po'i mchog/ dri bral snying po'i rang bzhin te// yid bzhin nor ltar ye nas gnas// a a zhes bka' stsal to/kha sa man ta nam mkha'i mtha' dang mnyam pa'i rgyud las/ sgro skur bral ba'i snying po'i le'u ste zhe gcig pa'o//// de nas yang kun tu bzang pos 'di skad ces gsungs so// nga yi bstan pa rgya mtsho 'dra// kun dang thun mong ma yin no// nga yi bstan pa nam mkha' 'dra// kun gyi thun mong ma yin no// kye sems dpa' chen po// nga yi rang bzhin rtogs dka' ste// lta dang sgom dang dam tshig dang// 'phrin las dang ni bgrod lam gnas// ye shes chos nyid bzhi gnyis don// nges pa thob pa'i theg drug dang// lta sgom la sogs byi dor tha// btsal med sgo ni gzhan la 'gags// lta ba med pa'i lta ba 'di// theg pa gzhan dang mthun pa med// med pa phyal pa lhun grub cig/ bsrung mtshams gzhan du mthun pa min// btsal ba med pa'i 'phrin las 'di// gzhan ma sems kyis rtsol ba yin// lam la bgrod du med pa la// teg gzhan lam la bgrod byed pa// mkha' la them skas 'tshol ba 'dra// gnas pa sbyang med bstan pa yin// rim par gnas la sbyong ba ni// mkha' la bi ta ra hi ra// ye shes cir yang shar ba yin// gzhan gyi gzugs brnyan ngos gcig gsal// chos nyid ji bzhin skye 'gag med// med cing cir yang mi gnas yin// gzhan gyi chos nyid de dang mthun pa min/ kye/ sems dpa' chen po don 'di yi// 'bras bu theg pa can la bstan 'gyur na// 'jig rten rgyu dang 'bras bu chos bzhin du// rgyu las 'bras bu 'byung bar mi rigs zer// rgyu ni khams gsum sems can la bsgrubs pas// 'bras bu dus gsum sangs rgyas 'byung bar 'dod// rgyu ni lta ba bsgom pas bya ba yin// gang bsgoms 'bras bu de thob 'dod pa ni// bsgom pa de yi 'bras bu thob pa med// thams cad ji bzhin chos yin pas// ji bzhin pa la 'chos par byed pa ni// brdzun gyis bden pa slu ba snying re rje// lta bsgom dam tshig la sogs rtsol bsgrub kyis// dbang po yul la yangs pa phral nas ni// dben pa'i sa la thabs kyi khrid byas nas// rtog med mnyam par thabs kyis bstan pa yin// zhes gsungs so/ kha sa man ta nam mkha'i mtha' dang mnyam pa'i rgyud las/ chos nyid gzhan gyi spyod yul ma yin par bstan pa'i le'u ste zhe gnyis pa'o//// de nas bcom ldan 'das dpal kun tu bzang po des// seng ge bsgyings pa lta bu'i ting nge 'dzin la snyoms par zhugs so// de nas sems dpa' rdo rjes 'di skad ces zhus so// a/ skye med rdo rje kun tu bzang// sangs rgyas kun gyi ngo bo ste// rgyal ba kun gyi mdzad pa shar// thugs rje chen po'i byin brlabs kyis// skye med rdo rje tshig 'di gsungs// zhes glengs so// sems dpa' chen po nyon cig/ nga yi tshig 'di rdo rje ste// phal gyis rtogs par dka' ba'o// sna tshogs rang bzhin mi gnyis kyang// cha shas nyid du spros dang bral// ji bzhin pa zhes mi rtog kyang// rnam par snang mdzad kun tu bzang// zin pa'i rtsol ba'i nad spangs te// lhun gyis gnas pa'i bzhag pa yin// zhes rdo rje gsang ba'i tshig go kha sa man ta nam mkha'i mtha' dang mnyam pa'i rgyud las// nges thob kyi theg pa zil gyis gnan pa'i le'u ste zhe gsum pa'o//// de nas bcom ldan 'das dpal kun tu bzang po des 'di skad ces gsungs so// sems dpa' rdo rje mdangs phyung zhig/ nga yi rig pa'i ngo bo ni// bltas pas mi mthong bltas med gsal/khyod kyis rang sems shes par gyis// chos rnams thams cad rtsol bral yang// las dang skal ldan gang dag la// tha dad ma 'dres gsal zhing 'dren par mdzad// nyon mongs skyon gyis ma gos pad+ma 'dra/zhes gsungs so// de nas kun tu bzang po des 'di skad ces bka' stsal to// thams cad rang rig rkyen dang bral// snang ba'i chos su brtags pa rnams// de la de dag yod ma yin// mnyam pa'i don la cir mi mthong// tha dad gzhi la ngo bor 'grub// ma bcos rang snang chu zla 'dra// dngos gzhi ma grub bzung du med// rnam pa thams cad sems kyi lung// rtog pa chos nyid chu zla 'dra// nam mkha' lta bu'i tshul du gnas// ma bgrod cir yang 'jug pa'i sa// gang ltar spyod kyang nyams pa med// rtog pa sems su shes pa la// ye shes bye brag bsam mi khyab// rig pa'i shes pa rig pa'i nyams// dang po gnyis pa gsum pa bzhi// rgya mtsho dpe yi tshul du bstan// rnam rtog cir yang mi lta drang po'i don// zin pas rtsol dang bral bar lhun gyis grub// yon tan dpag tu med par shar// shar ba nyid na ngo bor chub// mtshan nyid mtha' rnams kun bral ba'o// zhes gsungs pas// rig pa rang 'bar gyi 'od gsal bar gyur to/ kha sa man ta nam mkha'i mtha' dang mnyam pa'i rgyud las/ rig pa byang chub kyi sems bstan pa'i le'u ste zhe bzhi pa'o//// de nas sems dpa' rdo rje des 'di skad ces zhus so// skye med chos rnams rtsol bral nas// gdul bya skal ldan ngo dag tu// sku gsum grangs snang don gang lags/ de nyid dngos sam blo la snang// zhes gsol to// de nas bcom ldan 'das dpal kun tu bzang po des 'di skad ces gsungs so// chos rnams thams cad rkyen med rtsol bral yang// las dang skal bar ldan pa gang dag la// tha dad ma 'dres gsal bar bstan par mdzad// rkyen bral skyon gyi ma gos chu yi me tog 'dra// snang ba ma bcos chos sku la// rig pa ma sbyangs longs spyod rdzogs// thugs rje sprul pa'i sku ru shar// zhing khams snang srid thams cad yin// 'khor 'das snod bcud ma lus pa// skye med byin rlabs thams cad 'khor// rin chen 'phreng pa rig pa sgrogs// mi rtog spros med sems su shar// 'phel zhing 'dus pas de yi 'khor// skye med 'gyur med rtag pa'i sku// rang byung spros med byin rlabs shar// rang rig gzugs su snang ba dang// bde ba ma lus rang rig kyang// rig pa nyid la gdod nas rdzogs/ khyad par bde ba lha yi yin// lhag par bde ba'ang lha yi yin// rang byung spros med sems la rdzogs// shin tu bde ba thams cad kyang// rang byung spros med sems la shar// bde ba chen po thams cad kyang// rang byung spros med sems la rdzogs// longs spyod ma chags zhing khams yin// rig pa'i 'khor lo dgongs pa 'char// ting 'dzin rig pa gdeng gis go/ gnas dang 'khor dang bstan pa dang// rig pa'i ngang la gsal bar ston// ma bcos sa la dgod par mdzad// mtshon byed thabs dang sprad pa dang// dbang gi man ngag ston par mdzad// mtshon bya mtshon byed ngo bo gcig/ thugs rje rang bzhin sprul par shar/ khams gsum thams cad thugs rje'i gnas// zhen pa'i bsam pas brtags pa rnams// bkag tu rang snang 'bras bur shar// ston pa drug gi mdzad par shar// gang zag blo la 'thun phyogs su// de dang 'thun pa'i sgo nas bstan// zhes gsungs so// nam mkha'i mtha' dang mnyam pa'i rgyud las/ sku gsum bstan pa'i le'u ste zhe lnga pa'o//// de nas bcom ldan 'das dpal kun tu bzang po des/ sems dpa' rdo rje la 'di skad ces gsungs so// kun bzang rdzogs chen nga nyid la// rdo rje tshig tu thig le dgu// sems dpa'i tshogs la bstan par bya// zhes gsungs so// e ma ho/ rdo rje gsang tshig rtogs dka' ba/ khyed kyi tsit+tar gsal gyur cig/tshig dgu byang chub sems bcu ni// tshig dgu smras pas don tshig sbyar// sems de bstan phyir tshig dgu byung// sems kyi chos nyid nga nyid yin// chos nyid ye nas rgyu rkyen bral// de nas kun bzang byang chub sems// yin par bde gshegs kun gyis bshad// byang chub sems kyi chos nyid la// rang byung rgyu rkyen gnyen po med// btsal du med pa'i byang chub sems// sbyang du med pas byang chub sems// bsam du med pas byang chub sems// dngos po bral ba'i byang chub sems// bstan du med pa'i byang chub sems// spros pa med pa'i byang chub sems// rtag tu med pa'i byang chub sems// sgro skur med pa'i byang chub sems// kun las 'das pa'i sems nyid 'dir// chos kun ye nas 'dus shing gnas// sems nyid nam mkha' lta bur gnas// nam mkha' ci la'ang mi gnas bzhin// sems nyid ci la'ang gnas pa med// sems dpa' chen po nga yis ni// nga yin rang bzhin 'das pa'i rgyud/ khyod la rdo rje'i tshig dgu bstan// rtogs par shin tu dka' ba'o// zhes rdo rje gsang ba'i tshig tu'o/ kha sa man ta nam mkha'i mtha' dang mnyam pa'i rgyud las/rdo rje tshig dgu pa'i le'u ste zhe drug pa'o//// de nas bcom ldan 'das dpal kun tu bzang po des/ rig pa 'gag pa med pa nam mkha' rdo rje'i spyod pa 'di gsungs so// ye shes bde mchog kun tu bzang// rang byung rdo rje nam mkha' 'dra// ci la spyod kyang zin chags med// sgo gsum bag yangs lhun pa med// log snang bral bas ye shes gsal// snang bzhag ye shes spyod pa la// bde chen blang dor gnyis su med// mkha' mnyam ye shes rang byung du// dus gsum 'da' ba med par gnas// ye shes dkyil 'khor rang gsal bar// dngos grub ye shes 'od ltar 'byung// ye shes rnam pa cir yang gsal// ma 'gags 'od gsal rig pa'i gdeng// mtshon pa'i lam gyis rgyu dang bral// rang byung ye shes lung gi don// lung chen tshad ma kun gyi bdag/ rig pa'i ye shes brjod bral ba'i// yang dag brjod pa'i lung dang bral// sems nyid rigs pa'i sgron ma yis// sna tshogs kun tu rang 'bar shar// kun gyis gsal ba'i me long mthong thos pas// rna rgyud sga la rag ma lus// chos nyid nam mkha' lta bu las// rang byung gsal ba'i nyi ma shar// bsam sbyor blo yi dri ma dag/ 'dod rtsol 'jug pa'i rim pa bral// bsam med rag bzhag spyod par grags// sku gsum rig pa'i dkyil 'khor nas// thugs rje nyi ma'i zer ltar shar// gdul bya'i blo la 'tshams tshad kyis// 'gro 'dul spyod pa ci bder spyod// thabs kyi rig pa rang shar nas// ye shes gsal ba'i 'gro don mdzad// rang byung ye shes 'dren pa'i sku// sprul sku sna tshogs rin chen 'phro// skal ldan blo dman 'khor dag la// blo dang 'thun pa'i bstan pa bkod// 'dod pa'i blo yis dpag med kyang// ye shes chen po'i ngo bo la// thig le gcig las 'da' ba med// rim pa blo yi theg pa rnams// ye shes thugs rje'i rgyur byung nas// rang byung ye shes bstan par zad// rim 'jug blo yi theg pa rnams// 'dren pa'i sku yi drang don mdzad// theg pa gcig gi snying po la// 'dod pa'i yan lag kun dang bral// ma lus bstan pa'i ldan pa kun// kun bzang bde chen rol par rdzogs// gdul bya ngo la cir snang yang// 'gro 'dul thabs kyis spyod pas so// nam mkha' rdo rje 'dzin spyod bral// zhes bka' stsal to/ kha sa man ta nam mkha'i mtha' dang mnyam pa'i rgyud las/ spyod pa bstan pa'i le'u ste zhe bdun pa'o//// de nas sems dpa' rdo rje des// bcom ldan 'das dpal kun tu bzang po la 'di skad ces gsol to// kun bzang rdzogs chen lhun grub la// ma btsal grub pa ji ltar lags// skal ldan rnams la bshad du gsol// zhes glengs so// de nas kun tu bzang pos 'di skad ces bka' stsal to// nga las byung ba'i sku rdzogs ston// rtsol byas rgyu yi chos kyang sna tshogs bstan// skul bas rgyu 'bras rdzogs pa'i chos kyang sna tshogs bstan// rgyu 'bras thun pa'i chos kyang sna tshogs bstan// rgyu 'bras 'gal ba'i chos kyang sna tshogs bstan// rgyu nyams yan lag 'bras bu'i chos kyang sna tshogs bstan// 'bras bu rgyu gcig chos kyang sna tshogs bstan// 'gal med rgyu rtsol chos kyang sna tshogs bstan// med pa byed pa'i chos kyang sna tshogs bstan// yongs rdzogs phun sum tshogs pa gcig gi kyang// mya ngan 'das dang 'khor ba'i chos// ma lus thams cad dus gcig tu// btsal ba med par rang byung rdzogs par bshad// dus dang sbyor ba blo yi khyad par gyis// ji bzhin ma bcos blo yi rang bzhin ni// bstan pa'i snying po'i blo ni skabs kyis 'jug/gzhan gyi 'dod pa ma spangs bral ba nga nyid yin// gdod nas nga nyid rang bzhin lhun gyis grub// rtsol dang bral bas bdag nyid kun gyi ngang// 'das pa'i sangs rgyas ma lus nga// da ltar ma 'ongs de nyin don// ye nas rang la rdzogs pas byed rtsol bral// nga nyid rang byung kun bzang snying po'i mchog/ 'dod chags zhe sdang gti mug phrag dog dang// nga rgyal khengs pa'i mtshan ma ye shes gsal// sa chu me rlung 'byung ba chen po lnga// rig pa ma 'gags longs spyod lhun gyis grub// zhen drug log gsum rtsol brgyad kyang// nga yi sprul pa 'gag pa med par shar// spong 'gegs rgyu yis rtsol na nga yi lung dang 'gal// man ngag la ma bzlas par btsal na 'gal// lus kyis btsal bas phrad pa med// ngag gis btsal bas brda 'jal med// sems kyi btsal du yul dang bral// lam gyis bgrod pas bgrod gzhi med// lta bas btsal bas rtogs pa med// spyod pas btsal du bya byed med// dkyil 'khor btsal du 'jug pa med// dam tshig btsal du bsrung rgyu med// dbang la thob bya thob byed bral// bsnyen bsgrub rtsol ba 'jug rim med// las kyis btsal bas smin bya med// btsal med lhun grub ye nas rdzogs// 'di las bcom bar sus kyang mi nus so/ kha sa man ta nam mkha'i mtha' dang mnyam pa'i rgyud las/ lhun grub btsal ba med pa'i le'u ste zhe brgyad pa'o//// de nas bcom ldan 'das dpal kun tu bzang po des 'di skad ces gsungs so// sems dpa' chen po nyon cig/ lta ba nam mkha'i mtha' dang mnyam par bshad par bya'o/zhes gsungs so// sems dpa' rdo rjes mdangs phyung ste 'dun ston no// sems dpa' chen po/ bya ba med pa'i don 'di ni// kun bzang nga yi rang bzhin te// nga nyid ye nas byas zin pas// bya ba med pa'i chos nyid yin// chos nyid rang bzhin nga yin pas// chos nyid de la bya ru med// rang bzhin ngo bo sems nyid de// sems nyid ngo bo bcos su med// bcos med byang chub de la ni// su yang 'chos par ma byed cig/sems dpa' rdo rje khyod ma 'chos// 'chos na kun bzang nga la 'chos// sna tshogs snang ba kun tu bzang// kun bzang nga yi rang bzhin yin// kun bzang nga yi ngo bo yin// kun bzang nga yi rnam pa yin// sems can skal ldan 'dus pa'i tshogs// nga yi rang bzhin mi 'gyur rdo rje la// bsgoms na bcos shing bsgyur ba yin// nga ni ye nas lhun grub la// bsnyen sgrub nga la 'chos pa yin// nga la btsal bas 'grub pa med// nga la bgrod pas phyin pa med// nga la sbyangs pas byang ba med// nga la blta bya lta byed med// nga la bgrod pa'i lam ma grub// sbyang du sgrib pa ye nas dag/ mi dmigs dmigs pa'i yul dang bral// yul las grol bas spro bsdu med// 'dzin zhing zhen pa'i chos rnams ni// nga yi rnam pa ma 'gags shar// de la spong 'gegs su byed pa// kun bzang nga dang phrad mi 'gyur// nga ni kun gyi bdag nyid do// spang bar bya ba'i chos nyid de// nga yi ngo bo rnam par shar// kye sems dpa' chen po/ sems nyid kun tu bzang po la// dor ba med pas kun tu bzang// dog pa med pas kun tu bzang// gang yang yin pas kun tu bzang// gang yang gsal bas kun tu bzang// nor ba med pas kun tu bzang// bden brdzun sgro btags med pas kun tu bzang// rgyu rkyen bral bas kun tu bzang// zhes bka' stsal to/ kha sa man ta nam mkha'i mtha' dang mnyam pa'i rgyud las// kun bzang rdzogs chen skal med don min kun bzang mtha' dang mnyam pa'i le'u ste zhe dgu pa'o//// de nas bcom ldan 'das kun tu bzang po bdag nyid des/kun tu bzang po rdzogs chen la lta ba sgom med 'di nyid la nyid kyis gsungs so// sems dpa' chen po nyon cig/ kun bzang rdzogs chen nga ni ma bcos kun gyi rang bzhin yin// kun bzang nga nyi nga la bsgom du med// rdzogs chen nga ni bsgom pa'i yul ma yin// ye nas rdzogs pa bsgom du med pa de// nga yi bdag nyid ston pa rnam gsum gyis// nga nyid shar bas gsal ba'i chos nyid la// 'dod chags zhe sdang gti mug phrag dogs dang// nga rgyal khengs pa'i brkam chags skyes zer nas// mi 'dzin bcom med spong 'gegs brtul zhugs bsgom// de lung bstan pas bcos don nga dang be ro tha// log pa gsum la sprul pa'i thugs rje yis// 'khor du bkod nas byin brlabs lung du bstan// lhun grub rdzogs chen de nyid thob mi 'gyur// kye sems dpa' chen po/ nga las mngon du byung ba'i chos nyid la// nyon mongs sdug bsngal brkam chags skyes zer nas// lam lnga pha rol phyin bcu sa bcu sbyang// dang po sa dang bcu par sems pa la// don dam kun rdzob gnyis kyi rtog spyod kyis// don dam mi dmigs kun rdzob sgyu ma tsam// sprul pa'i sku yis 'khor la lung bstan nas// rtog dpyod bsgom pa mnyam bzhag rjes thob skyes// ma bcos ji bzhin don dang be ro tha// kye sems dpa' chen po// kun bzang rdzogs chen chos nyid de// ma bcos ji bzhin chos nyid yin// longs spyod rdzogs pas 'khor la lung bstan pa// ji bzhin ma bcos ngo bo rtogs pa med// dag pa gsum gyis phyi nang snod bcud rlob// yan lag bcu gcig byang chub kun sgo nas// ye shes lha yi bsgom pa snang ba med// rje khol spyan drangs mchod nas ting 'dzin bshig/ yang bsgoms yang bshig pi ti'i dag khang 'dra// kun bzang nga yi don dang be ro tha// kye sems dpa' chen po/gtsang ma'i rigs dag spangs nas 'og min chen po ru// dbang phyug chen po lung ston chen po des// nga las shar ba'i chos nyid mngon phyung la// de bzhin nyid dang rgyu dang kun tu snang// ye nas 'bras bu grub pa'i don nyid yin// bzod sgrub dkyil 'khor chen po'i rang bzhin la// ting 'dzin rim par bgrod nas rang gsal ba// grub pa'i gnas nas spyin 'dren grogs po tsam// gcig la gnyis su bltas pas bsgom pa nor// ngo bo gcig la gnyis kyis thob ba med// kye sems dpa' chen po/ nga yi rang bzhin mngon phyung rang shar la// dbang po yul dang rnam shes phung po 'byung ba sogs// rang rgyud dag pa'i rdo rje lhar byas nas// blo yi rim pa'i ting 'dzin yig 'bru gsal tsam gyis// bsnyen bsgrub rnam bzhi cho ga bsgom byas nas// sems kyi 'phro 'du 'phags mchod 'gro don mdzad// 'phro 'du bsdus nas dngos grub thob byed pa// rang la rang gis dngos grub thob par bsgom// de yang sems kyi ting 'dzin tshi chad 'gyur// kun bzang rdzogs chen lta ba sgom med ni// kun bzang rdzogs chen che ba'i yon tan gyis// rtsol sgrub byar med ye nas rang la rdzogs// rgyu rkyen med pas rtsol ba'i las dang bral// 'bras bu rang la rdzogs pas bsgrub tu med// ye nas grub pas chos nyid bsgom mi dgos// bskyed pa med pas rkyen gyis 'jig pa med// ltos pa'i chos dang bral bas bsgoms nas rtsol mi byed// gang zhig kun bzang rdzogs chen bsgom pa des// bsgoms pas nyid kyis nga dang phrad mi 'gyur// chos nyid mngon du phyung bas kun bzang rdzogs chen nga yin pas// brkam chags mi skyed rnam pa spang mi dgos// skye 'jig med pas rang byung rdo rje ste// ma rig rten 'brel dbang po dgag mi dgos// rang byung rnams dang chos nyid sbyong mi dgos// gtsang spra mi byed ye nas rnam dag pas// ye nas dag pas rtsol sgrib tshi chad pas// gnyis snang bral bas ltas pas mthong ba med// de bzhin nyid dang rnam sbyang kun tu bzang// yul drug dbang po drug la bsnan pa dang// rang byung ye shes shar ba rdo rje'o// de la gang zhig sgom dang sgrub byed pa// de ni mkha' la them skas tshol ba 'dra// kun bzang rdzogs chen nga yi rang bzhin ni// thams cad 'gag pa med pa ma 'gags gsal// ye nas de yin de las gzhan pa med// sna tshogs dbang po ngo la bstan pa ni// de las nga yi rang bzhin gnas na med// de las kun bzang rdzogs chen ma mthong na// sbyangs med skal med nga dang 'gal ba yin// rgyu 'bras theg pa drang ba'i lung la gzung// kun bzang rdzogs chen spyod yul ye nas 'das pa'i phyir// rgyu 'bras 'das pa'i skal ba med pa rnams// bstan na sgro 'dogs skur pa 'debs pa'i phyir// bstan na rang gis sems la skur btab pas// 'gro drug skye zhing khams gsum 'khor bar gnas// kye sems dpa' chen po/ nga ni rtog dang spyod yul kun las 'das pa'i phyir// tshig gis mtshon du med cing dbang po yul dang bral// nga yi rang bzhin spros med thig le chub// gnyis med spros pa med de gcig gi ngang// dam tshig brten bsrungs mtshams dang bral ba yin// 'phrin las zhi rgyas dbang drag btsal mi dgos// lam la mi bgrod sa la mi sbyong ste// rang la lhun grub gzhan la btsal mi dgos// rang byung ye shes mi rtog g.yos pa med// gzhan gyi lung min kun bzang nga yi lung// rgyu dang 'bras bu rtsol dang sgrub med pas// rang byung pas na dngos po bsgom mi bya// skye ba med pas dngos por 'dzin dang bral// dmigs pa med pas dngos po bsgom dang bral// kun bzang bde chen yangs pa'i klong dkyil ni// mi rtog mnyam pa chen po'i rang bzhin gnas// snang ba med pa'i chos nyid rang bzhin gnas// rig pa mi rtog ting 'dzin bya ba med// gang dag ji ltar sgom yang sgom pa'i skyon// kun gyi snying po kun bzang byang chub sems// byang chub sems ni gzung 'dzin bral ba'i phyir// rdul tsam sgom pa byar ni nges pa med// gong du bstan pa'i bsgom pas 'bras bu thob pa med// nga ni ye nas kun bzang rdzogs pa che// thams cad 'dor ba med par kun tu bzang// btsal med grub pas rdzogs pa chen po ste// gong na gzhan ma med pas chen po'o/ kha sa man ta nam mkha'i mtha' dang mnyam pa'i rgyud las/ lta ba nam mkha' mtha' dang mnyam pa'i le'u ste lnga bcu pa'o//// de nas sems dpa' rdo rjes 'di skad ces zhus so// e ma kun bzang rdzogs pa che/ khyed kyi dgongs pa nam mkha' 'dra// bsrung ba med pa'i sdom pa can// 'dus pa'i tshogs la bshad du gsol// de nas bcom ldan 'das dpal kun tu bzang po des 'di skad ces gsungs so// sems dpa' chen po nyon cig/ rang bzhin spros dang bral ba ma skyes pa// skye ba'i cho 'phrul sna tshogs yul byung nas// rang gi rang bzhin yul de yin zhes pas// de la mi rtog rtog pa'i yul las 'das// spong len med pas yul la 'dzin pa med// des na phyal ba med pa gcig pu 'grub// sdom pa tshul khrims dam tshig bsrung ba med// kun bzang thugs las byung ba'i ston gsum gyis// sum brgya drug bcu la sogs lung bstan nas// bsdus pas log pa rtsa ba bzhi dang yan lag gnyis// byin rlabs bsrung ba phob cig lung bstan pa// bsrung ba bya ba'i khrims ni 'di lta ste// rtsa ba yan lag bsrung ba'i rnam grangs ni// nyis brgya lnga bcu lnga brgyad bcu mtha' yas// bsrung ba'i dus na grangs gang dus mi shes// des na khrims dang sdom pa bsrung mtha' yas// rdzogs chen spyi spyod mtshan ma kun las 'das// 'dul khrims rgya mtsho rnam grangs mtha' yas pa// lus ngag yid la bsdus pas rnam pa gsum// dbang po yul la sdug bsngal byung nas ni// 'gro 'dug lus kyi du li kha// tshig brjod don gyi bden pa dka'// yid kyis ci bsam rtog pa'i 'du shes skyed// lus ngag spyod pa rgya mdud dam po des// ma nor bsam pa dang ba sgrub tu med// don dam kun rdzob don dam phrad mi 'gyur// bden gnyis dbyer med don dang be ro tha// kun bzang rdzogs chen bsrung bya srung byed med// kye/ sems dpa' chen po rdo rje khyod nyon cig/'dul khrims sdom pa rgya mtsho las// bcu pa gnyis po bsdus te dka' ba spyod// bden pa gnyis dang ngo bo 'gal// lhun grub rdzogs chen don dam snang ba mun pa bzhin// sems dpa' chen po nyon cig/ nga las byung ba'i ston pas lung phog pa// bzang po gza' dang rgyu skar dus tshigs dang// phyi nang gtsang ma'i khrus kyis dag byas te// 'dul khrims sdom pa 'gro don zhal 'ches pa// dam bcas tshul bzhin gang yang mi 'grub ste// phyi nang dam bcas bshags sems mi 'dag par// kun bzang rdzogs chen don dang shin tu dben// kye sems dpa' chen po/ bla med gsum dang rdo rje spun// de bzhin sngags dang phyag rgya rnams// dri ma rtsa ba'i dam par lta// kun bzang lhun grub rdzogs chen la// dag dang ma dag ngang gis med// de bas nga yi don dang 'gal// kye sems dpa' chen po/ rnal 'byor rnal 'byor dam tshig ni// byang chub sems ni mi spong zhing// bla med gsum dang slob dpon gsum// rdo rje mched lcam lha ltar dmigs// bdag nyid rdo rje dril 'chang zhing// ting nge 'dzin gyis las rnams byed// nga ni bya btsal kun dang bral// kye sems dpa' chen po/ rnal 'byor chen po'i dam tshig ni// sum brgya drug bcu 'bum sde ste// bsdus na rtsa ba yan lag gnyis// rtsa ba gsum dang bcu gnyis lnga// mi rku mi rdeg rngan mi sems// sngags dang phyag rgya gsal bar 'da' mi byed// lus dang ngag yid sdom las 'da' mi byed// kun bzang rdzogs chen ye nas brdal ba la// dngos po snang ba mtshan ma ngang gis med// de la rku rdeg sdom dang bral// gsal dang gsal byed sngags dang rgya// spyad bya rten byed mi spang dang// shes dang bsgrub pa mi 'da' bsrun// ngo bo nyid la ka nas dag/ de dag 'dzin pa'i shes pa med// yongs su rnal 'byor dam tshig ni// rang gi lta ba dam tshig ste// dbyings ni rgyu las ye shes 'bras// 'da' ba med pa sa ya ste// kun bzang rdzogs chen bde ba yis// med phyal lhun cig don du shes// kun bzang rdzogs chen bde ba la// dbyings dang ye shes rgyu 'bras du// 'dzin zhing sdom pa sa ya med// ces kun tu bzang pos gsungs so/ kha sa man ta nam mkha'i mtha' dang mnyam pa'i rgyud las// dam tshig bsrung du med pa nam mkha' dang mnyam pa'i le'u ste lnga bcu gcig pa'o//// de nas bcom ldan 'das dpal kun tu bzang po des/ rdzogs pa chen po la 'phrin las btsal du med pa 'di gsungs so// kye/ sems dpa' chen po skal ldan 'dus pa'i tshogs// rdzogs pa chen po lhun gyis grub pa'i phyir// ye shes 'phrin las btsal du med pas med// btsal du med pas stong pa'i 'phrin las yin// nga las shar ba'i ston pa rnam gsum gyis// so so'i 'khor la bya ba'i las phog pa// bya ba'i las ni gdul bya so so ste// dman pa'i 'khor la sprul ba'i lung phog pa// tshad med sgo ru lus ngag yid gsum zhugs/brdzun dang phra ma 'khyal pa rtsub ba ngag/ brnab sems gnod sems log par lta ba yid// srog gcod rku g.yem lus kyi sdom pa'i las// dge bcu spyod pa'i las te rgyur bkod nas// lam lnga pha rol phyin bcu spyad byas nas// sa bcu rim dang rim gyis bgrod byas te// kun tu 'od kyi sa la gnas par 'dod// tshi chad las ni bskal pa gsum du spyod// kun bzang rdzogs chen nga yi lung bstan men// rdzogs longs spyod pas 'khor la lung bstan pa// rgyu dang 'bras bu'i sgo nas lung bstan te// las dang bya ba'i sgo ni 'di lta ste// gtsang spra khrus kyis phyi nang dag byed cing// byin gyis brlabs dang cho 'phrul ni// dam tshig sems dpas ye shes spyan drangs te// ting 'dzin las kyis spyan drangs mchod bstod gshegs gsol byed// las de tshe bdun bar du tshi chad 'gyur// gtsang ma'i rigs dag rnam spras te// longs sku chen pos lung bstan pa// bdag nyid chen po yin par lung bstan nas// rang rgyud ye nas dag pa'i dkyil 'khor la// rigs dang kha dog sbyar ba'i lha bsgom 'di lta ste/ kha dog dkar po zhi ba'i las byed pa// gser 'od rgyal po'i las la 'jug pa byed// dmar po'i sku yis dbang gi las byed pa// sku mdog nag po drag po'i las byed cing// tshe la gnas dang phyag rgya'i rigs grub pas// 'phrin las rnam bzhi tshi chad grub par byed// rtsol med bya med las ni de mi 'grub// rgyu med ye nas lhun gyis rdzogs pa'i phyir// bya med 'grub pa med pa btsal ba med// byang chub sems la skye ba med pa'i phyir// 'jig rten skye ba'i chos la dpe blangs nas// bskyed pa'i las las byung ba'i sgro mi gdags// rang 'byung rgyu 'bras 'das pa ma rtogs par// tshad mas 'jig rten chos la tshad btsugs nas// rgyu yis tshogs las 'bras bu bskyed 'dod pa// rgyu yis skyed la ma byung 'byung med de// thams cad rang las skyes pas gzhan las chos 'byung med// 'jig rten rgyu 'bras chos la tshad btsugs kyang// btsal ba med pa'i 'bras bu 'byung mi 'gyur// byang chub sems ni rgyud rkyen rang ma las// skye 'gag 'jig rten chos la tshad mi gzugs// rgyu dang rkyen gyis byang chub sems mi bskyed// 'jig rten skye mched chos la dpe ma len// bka' stsal pa/kye sems dpa' chen po/ rang byung gnyen po med pas ye nas che ba la// rtsol sgrub byed pas che 'dod grub pa med// sgom sgrub btsal bas che ba de mi 'grub// ye nas che ba rang byung ye shes yin// bsgoms pas kun bzang dgongs pa bcos pa yin// kun bzang rgyal ba kun gyi dgongs yin pas// de yang 'chos na rgyal ba thams cad spangs// de yi rnam pa spangs pa ma yin te// de yi sems kyi rang bzhin de spangs pa// bdag nyid chen po phrad par mi 'gyur ro// kun tu bzang pos gdams ngag tu gsungs pa// kye sems dpa' chen po/ sems kyis ting 'dzin rtsol bar ma byed cig/ ngag gi 'dzab dang snying po bzla ba dang// lag gi phyag rgya bca' bar dgos mi 'gyur// sems kyi ting 'dzin 'phro 'du spong ma byed// gdod nas gnas pas btsal med lhun gyis grub// ye nas gnas pas sus kyang bcos su med// btsal med ji bzhin pa ru 'gag pa med// bya ba med pa'i 'bras bu mchog tu gsungs// don de rtogs na rtsol ba'i las mi byed// las ma byas pa de bzhin nyid du 'gyur// de bzhin nyid la su zhig gnas pa de// de yis kun bzang rdzogs chen de yi zhal mthong ngo// kun ni khyab pa chen po yin// bzang bas dor ba med pa ste// rdzogs pa'i yon tan btsal ba med par 'grub// ces kun tu bzang pos bka' stsal to/kha sa man ta nam mkha'i mtha' dang mnyam pa'i rgyud las/ 'phrin las btsal du med par bstan pa'i le'u ste lnga bcu gnyis pa'o//// de nas bcom ldan 'das dpal kun tu bzang po des/sngags med yon tan zhes bya ba'i ting nge 'dzin la gnas par gyur to// de nas sems dpa' rdo rjes 'di skad ces gsol to// e ma kun bzang rdzogs pa che// sangs rgyas kun gyi ngo bo ste// ye rdzogs gsal bar rdzogs pa'i bdag/nges pa drug gis theg pa'i 'bras// skas kyi rim pa bzhin dag tu// 'dus pa'i tshogs la bstan du gsol// zhes glengs so// de nas kun tu bzang pos 'di skad ces bka' stsal to// nges pa'i don la sgrub byed pa'i// byang chub sa la sems dpa' che// btsal ba'i 'bras bu 'di lta ste// lam la rim gyis sgom byed cing// pha rol phyin pa bcu spyad nas// sa bcu rim gyi bgrod pa'i mtha'// kun tu 'od kyi sa la bsngags// kun bzang rdzogs chen bde ba yi// 'bras bu cir yang bsngags pa med// cir yang shar bas 'bras bu'i don// zhes gsungs so// yang kun tu bzang pos 'di skad ces bka' stsal to// sems dpa' chen po nyon cig/ las dang bya ba'i 'bras bu ste// cho ga'i yan lag bcu gcig dang// mtho dman 'jam rtsub rigs kyi bdag/ de ba drug gis phyag rgya gsal// rigs kyi bye brag ma 'dres 'dzin// rdo rje 'dzin pa'i sa ru gnas// mthar phyin don nyid ces bya'o// a ti yo ga'i mthar phyir te// rigs la mi bsngags grangs nges med// shar ba rdo rje zhes su bshad// de nyid 'bras bu zhes su gdags// zhes gsungs so// nges pa med pa'i rnal 'byor pas// lta spyod 'brel med so so bas// stug por sbyor yang grub pa med// rang byung ye shes chen po ni// so so med cing gcig pa med// kun tu gsal ba sngags ba med// ces gsungs so// kye sems dpa' chen po nyon cig/ rnal 'byor rnal 'byor 'bras bu ni// skye 'gag med pa'i lta ba yis// mtshan ma'i dngos po dbyings su gnan// gsal ba'i byang chub gnyis gnyis gcig/ chos nyid stong pa zla bar gsal// yig 'bru thugs mtshan phyag rgya yi// phyag rgya gzhi yi rang bzhin gyis// dkyil 'khor yongs su rdzogs pa'o// skye med rang rig rdo rje yis// stug po bkod pa'i zhing du snang// sngags pa med de de ma yin// kun bzang rdzogs chen bde ba'i sa// 'bras bu kun gsal gzung ba med// ces gsungs so// sems dpa' chen po nyon cig/rnal 'byor chen po'i 'bras bu ni// grub pa'i blau yis tha dad de// 'bras bu sku dang gsung dang thugs// yon tan 'phrin las dbyings ye shes// rang snang rdo rje don du shar// 'phags pa'i nor bdun 'bras bu'i mchog/kun bzang bde chen rol pa yi// 'bras bu brtags pa'i don nyid ni// sna tshogs cir yang snang ba la// btsal med shar bas rdo rje'i bdag/ ma shar shar bas 'bras bur gdags// a ho zhes gsungs so// sems dpa' chen po nyon cig/ rjes su rnal 'byor 'bras bu'i don// nga dang rang bzh-in don nyid dang// bdag nyid chen po'i gtan tshigs dang// dbyings ni skyed pa'i rgyu yin te// 'bras bu ye shes sha ba'o// 'du 'bral med pa'i mthar thug don// de ni btsal ba'i 'bras bu'o// kun bzang rdzogs chen bde ba yi// yon tan btsal ba med par shar// shar ba nyid na skye ba med// ye nas zin pa'i don yin no// 'gag pa med pas 'dus pa med// 'dus med sems kyi ngo bo'o// ru ka lan ka'i skad dang 'dra'o// zhes gsungs so// 'dus pa'i tshogs kho thag chad par gyur to/kha sa man ta nam mkha'i mtha' dang mnyam pa'i rgyud las/ 'bras bu bsngags pa nam mkha' mtha' dang mnyam pa'i le'u ste lnga bcu gsum pa'o//// de nas bcom ldan 'das dpal kun tu bzang po des// 'khor skal ldan rnams la 'di skad ces gsungs so// kun tu bzang po bde chen gyis// lhun gyis grub pa rdzogs pa yi// tshul gyi rim pa 'di sta ste// rgya mtsho chen po dwangs pa la// nam mkha'i gzugs brnyan snang ba ltar// tha dad rnam par ma 'dres par// yongs su rdzogs pa chos kyi sku'o// rgyu rkyen las 'das bya byed med// rang byung grub ba'i gzugs can te// mkha' la ri mo snang ba ltar// cho 'phrul chen po yongs su rdzogs// de nyid chos sku bde ba'o// mthus gzung yongs rdzogs skongs par shar// mchog gi thabs chen grub pa'o// de la chags bral 'dod dang bral// nyes pa'i skyon med yon tan bral// 'jigs pa med dang skrag dang bral// dus gsum rtag tu gnas pa ni// yengs pa med par bral ba med// rnam par gsal bas 'thun pa'i grogs// thams cad rang byung gnyen po med// zil gyis mnan pas mi mthun rang bzhin med// smon lam bral bas re dogs med// sgrib pa med par 'od gsal bas// yongs su rdzogs pas che bar gnas pa'o// lam rigs rdzogs pas bgrod med yongs su rdzogs// smin pa bzhin pas 'bras bu ye shes rdzogs// rdzogs pa sku yi rang bzhin lhun grub pas// mkhas pa'i thabs kyis theg pa kun gyi gang// des na thams cad kun gyi bdag nyid byang sems kun tu bzang// de nas sems dpa' chen po stan las langs nas 'di skad ces gsol to// kun bzang rdzogs chen bde ba che// thams cad sems su yongs rdzogs na// spros pa'i mtshan ma ji ltar rdzogs// zhes glengs so// bka' stsal pa/ji ltar snang ba'i mtshan ma thams cad nam mkha'i rgyan du shar// rmi lam lta bur snang ba'i snang ba la// nges par 'jug pa'i rten pa med// sgyu ma lta bu'i snang ba la// yid la nges pa'i zhen pa med// mkha' la glu len rgyan 'dogs dang// nyal dang 'chag dang 'gro ba dang// za ba la sogs snang ba la// yid la 'jug pa'i rten med pas// des de gzugs la chags pa med// sgra la dmigs pa'i chags pa med// dri la dmigs pa'i chags pa med// ro la dmigs pa'i chags pa med// reg la dmigs pa'i chags pa med// chos la dmigs pa'i chags pa med// ces gsungs so// des na sems dpa' rdo rjes 'di skad ces gsol to// sna tshogs snang dang stong pa gnyis// zung du 'brel ba'i tshul ci lags// zhes gsol to// bcom ldan 'das dpal kun tu bzang pos 'di skad ces gsungs so// sems dpa' chen po/ gzugs la brten pa'i shes pa ni// 'gro ba rigs drug gi shes pa gzugs la brten pa ste mthar dbyung bar bya'o// rmi lam lta bu'i shes pa ni// rang bzhin med pa snang ba ste// nam mkha' lta bur thugs gsal ba// rnal 'byor shin tu 'ong ba'o// nam mkha' lta bur shes pa ni// gnyis su dmigs su med pa'i snang ba ste// rang bzhin rdzogs pa chen po dang// mthun par snang zhes bka' stsal to// de nas yang sems dpa' chen pos 'di skad ces glengs so// 'di lta ste/ kun gyi rang bzhin kun gyi dngos// yongs su rdzogs dang ma rdzogs gnyis med don// phyin ci log dang ma log mngon gyur ji lta bu// zhes zhus so// de nas bcom ldan 'das dpal tu bzang po des 'di skad ces bka' stsal to// chos rnams thams cad rtag pa dang// mi rtag ma nges sgyu ma dang// yang dag pa dang yang dag min// ma nges sgyu ma lhun gyis grub// gsang ba'i bsngags pa theg pa'i rgyud du bstan// lhun grub yod par brtags pa dang// rtag pa'i dngos por 'dzin par dang// lta ba rtogs byed mthong ba med pa dang glu ba bya'o// lhun gyis grub pa ni ma nges par 'gyur bar snang ba'i sgyu ma'i rol bar gsungs so// lhun gyis grub pa ni sgyu ma'i rol pa ste gsang ba 'di ni mtshan ma ma spangs la bral ba'o// rol pa'i rgyu ma bsgrubs pas chub// rnam pa ma 'gags shar bas rig/ mtshan nyid mtha' dang bral ba'o// ye shes chen po lhun grub pas// 'bras bu nyid du lhun pa'i sku// zhes bka' stsal to/ kha sa man ta nam mkha'i mtha' dang mnyam pa'i rgyud las/rgyu 'bras dbyer med 'bras bu lhun gyis grub pa'i le'u ste lnga bcu bzhi pa'o//// de nas bcom ldan 'das dpal kun bzang po des 'di skad ces gsungs so// sems dpa' chen po nga dang gnyis su med pa thabs chen po rdo rje'i sku// lhun gyis grub pa sgyu ma dang sgyu mar snang bar rol ba rdo rje'i sku'o// lhun gyis grub pa sgyu ma dang sgyu mar snang bar rol ba rdo rje'i gsung ngo// lhun gyis grub pa sgyu ma dang sgyu mar snang bar rol pa rdo rje'i thugs so// des na gnyis su lta ba'i yul med pas// gnyis su med pa rdo rje lta bu nyid do// de bas nyams su bsam pa'i yul med pas// gnyis su med pa rdo rje'i ting nge 'dzin nyid do// de bas gnyis su chags pa'i yul med pas/ gang la spyad kyang rdo rje thabs kyis spyod pa nyid do// de bas na 'khor ba dang mya ngan las 'das pa'i chaus thams cad dam mkha'i rang bzhin rgyun du gnas pa'o// mdzes pa'i rang bzhin bkod pa'i 'bras bu'o// log pa'i yul med de sgyu ma lhun grub tu rig pa rang la shar bas dug lnga 'od du 'bar/ snang ba chos nyid du shar/ yon tan dpag gis mi lang ste rin po che dgos 'dod skong ba'i dpais mtshon to// 'gyur ba med pa rdo rje dpes mtshon to// btsal ba med pa rdo rje'i dpes mtshon to// 'dus ma byas pa rdo rje'i dpes mtshon to// nyon mongs pa 'joms pa rdo rje'i dpes mtshon to// tha dad med pa rdo rje'i dpes mtshon to/ kha sa man ta nam mkha'i mtha' dang mnyam pa'i rgyud las/ gnyis med sgyu ma lhun gyis grub pa bstan pa'i le'u ste lnga bcu lnga pa'o//// de nas bcom ldan 'das dpal kun tu bzang po des/'dus pa'i skal ldan rnams la/ de bzhin gshegs pa thams cad kyi gdams ngag sgrub rgyud du gsungs pa 'di bka' stsal to// skal ldan 'dus pa'i tshogs nyon cig/dwangs pa'i sems kyis 'dun bar gyis// zhes gsungs so// gsal ba'i ye shes goms bya'i phyir gdams pa'i don la mos par 'dud// gzung ba'i nyams blang bsam pa'i blo// spang med de nyid ye shes gsal// 'gyur med rang gsal gyi na bde// lta ba lung nod thag gcad bzhin// bsam med dran pa ma shor to// lus sems khod glod lhun par bzhag/ de nyid don las mi g.yo bar// cha shas sres don ngang gis bral// mi sdu mi spro mi rtog gsal// dri bral rig pa de nyid tsam// lhug pa'i sems nyid glang chen 'dra// rig pa bcos med glang chen bzhag khyung chen mkha' la ldings pa bzhin// ri brag gyen tur nyam ming// de nyid rnal 'byor mnyam bzhag blo// 'khor ba'i chos la nyam mi nga// bskyod pa med pas rgya mtsho 'dra// mtha' dang bral bas nam mkha' bzhin// dgos 'dod skongs ba nor bu bzhin// 'khor ba'i rgya mtsho chen po las// thar par nus pas gru zhes grags// 'khor ba'i nad las thar pas sman// ye zin ye gsal ye nas grub// mi bsdu chen du yan pa med// 'dzin pa'i rtog ba rjes dran tshe// de nyid yin pas bcos su med// de dran de nyid de gsal med// bcos med bcos pa'i thabs yin no// zhes gsungs so// de nas sems dpa' rdo rje des 'di skad ces gsol to// rang byung ye shes de nyid la// ye shes lnga nyid ji ltar snang// zhes zhus so// de nas bcom ldan 'das dpal kun tu bzang po des 'di skad ces bka' stsal to// skye med sgyu ma lhun grub la// 'bras bu yon tan lhun grub gnas// btsal med rig pa'i ye shes la// btsal ba med par kun tu shar// mi gnas thugs la phyi nang med// stong ba'i ye shes rgyu rkyen bral// gsal ba'i ye shes chen po ni// shes bya thams cad btsal med gnas// rtog pa ye shes rang 'bar bas// bzang ngan che chung blang dor med// shes bya'i don la ma 'dres gsal// thugs rje mdzad pas kun tu shar// bcos med ye shes chen po la// chos tshul zad med brjod las 'das// rang rig yul gyis bskyed pa min// rgyu rkyen skyed pa'i ye shes min// btsal ba med pas rgyu dang bral// nam mkha' lta bu'i ye shes la// brdal ba chen pos spros ba med// lhun gyis grub pa'i 'bras bu yin// btsal med ye shes rang 'bar yin// zhes gsungs so// 'khor rnams ye shes chen po la lhun gyis gnas par gyur to// de nas sems dpa' rdo rje des 'di skad ces gsol to// rang byung ye shes bde chen 'od// theg pa kun las ji ltar 'phags// bde gshegs snying po kun la gsal// zhes glengs so// de nas kun tu bzang pos 'di skad ces gsungs so// ji ltar snying po rang bzhin ni// zla ba'i dkyil 'khor ma spros ltar// ma 'dres gsal phyir de dang 'dra// kun gyi rang bzhin de ru gnas// de las spros pa tha dad snang// e ma ho ye shes rang snang ba// ngo mtshar chen po 'byung ba'i don// de phyir don la ngo mtshar che// ye shes rig pa rang snang bas// thig le mtshan nyid ye nas chub// che ba'i rgyan gyis rnam par brgyan// gnyen po med pas ye nas che// spang bya med pas ye nas gsal// gnyis med bral bas tha dad med// 'du 'bral med pa'i ye shes ni// mtshan ma'i dngos po kun las 'das// blo yi yul du de ma grub// de la dmigs nas de don skye// de phyir de la e ma ho// de nyid yul de ma yin na// de don thabs dang bral ba'i phyir// mtshon byed thabs kyi man ngag bstan// rtogs pa'i rig pa blo la skye// de phyir gzhi las ma g.yos pas// mthar phyin gzhi las g.yos pa med// des na kun gyi yang rtse ste// theg pa kun gyi yang rtse'o// lta ba kun gyi yang rab bo// thabs rgyal rnams kyi rgyal po 'o// gong na med pa'i 'bras bu'o// zhes bka' stsal to// skal ldan rnams kho thag chod par gyur to/ kha sa man ta nam mkha'i mtha' dang mnyam pa'i rgyud las/rtogs pa ye shes su gsal ba'i ye shes lnga kun gyi yang rtser bstan pa'i le'u ste lnga bcu drug pa'o//// de nas sems dpa' rdo rjes 'di skad ces gsol to// e ma ho kun bzang rdzogs pa che// de bzhin gshegs pa thams cad kyi// sku gsung thugs kyi rdo rje'i bdag/ yon tan kun gyi dpal du shar// gsal la mi g.yo sna tshogs lhun gyis grub// chags pa med pa pad+ma'i sbyan// brtsal ba med pa rdzogs sangs rgyas// skal ldan rnams la bshad du gsol// ces zhus so// de nas bcom ldan 'das dpal kun tu bzang po des dgongs pa slong ba'i ting nge 'dzin mdzad de/ de bzhin gshegs pa thams cad kyi gdams ngag sgrubs rgyud du gsungs pa// lung phog pa gsungs so// rtog dpyod rnam dag gnyis med chos dbyings la// rtog pa'i blo la pi ta ci zhig bslus// gnyis med bde chen sems can kun spyod pa// 'khrul pas nor ba'i lam du brtags pa yang// gang du bstan pa'i lam chen de las mi nyams pas// mnyam pa chen por shes la sangs rgyas kun gyi rje// phyi dang nang kun chos kyi dbyings// rnam par dag pa'i spyod yul la// sangs rgyas sems can gnyis med de// lam gyi bcos su ga la yod// bus pa bslus pa chos spyod rtog pa'i lam la btsud pa ni// phyin pa'i lam med rtog pa'i dus kyang med// chos nyid chos tshol rnyed par ga la 'gyur// nga dang bdag tu brtags pas mu stegs 'khrul pa'i lam// sgrub med rtsal sprugs smon pa med pa yi// bya med lhun rdzogs gu pi pa ga la// zhes gsungs so// dper na gcan gzan gyi rgyal bos nam mkha'i dkyil du mchongs pas/glang chen la sogs pa stobs can thams cad zil gyi gnon cing brgyal bar 'gyur ro// de bzhin du rgyal ba'i gdams ngag rdzogs pa chen po'i lung phog pas/dman pa'i theg pas lta ba spyi rgya brlabs kyis bcad/ ces bka' stsal to// de nas skal ba dang ldan pa'i 'khor rnams mtshan ma rang grol du gyur to// bsngags pa med pa'i 'bras bur shar to// bgrod ba med pa'i lam byang ngo/ kha sa man ta nam mkha'i mtha' dang mnyam pa'i rgyud las/ lta bsgom 'bras bu rdzogs pa'i le'u ste lnga bcu bdun pa'o//// de nas bcom ldan 'das dpal kun tu bzang po des/mnyam pa rdzogs pa chen po la gnas par gyur to// sems dpa' rdo rjes 'di skad ces gsol to// e ma ho kun bzang rdzogs pa che// sgom du med pa'i don de la// mnyam par bzhag pa ji lta bu// zhes glengs so// kun tu bzang pos 'di skad ces gsungs so// sems dpa' rdo rje lta ba sgom du med pa ni// kun bzangs rdzogs chen nga yi sgom pa ni// nga ni bsgom pa'i yul dang yul can min// nga yis ma bcos ye nas kun la gsal bar khyab// 'o na bsgom par bya ba'i lung bstan pa// nga la thos pa'i ston pa rnam gsum gyis// nga las shar ba'i chos nyid la// nyon mongs lnga yi dri ma rang la gzung 'dzin byed zer nas// ma bcos mi 'jigs spong 'gegs brtul zhugs bsgoms// lung bstan de yis bcos med don dang 'gal// log pa bzhi la sprul pa'i thugs rje yis// 'khor du bkod nas byin rlabs lung bstan pas// gnyis med rtsol bral bde ba thob mi 'gyur// e ma ho/ nga las mngon du shar ba'i chos nyid la// bden gnyis lta bas don spyod rnal 'byor pas// nyon mongs lnga yi dri ma skye zer nas// sa rnams rim par sbyong zhing bgrod pa las// don dam kun rdzob phye ba'i rtog spyod kyis// med las sgyu ma tsam du yod 'dzin cing// sprul ba'i sku yis lung bstan rtog dpyod byed// ma bcos ji bzhin don dang be ro tha// sems dpa' rdo rje/ nga las mngon du shar ba'i chos nyid de// rang gsal bcos pa med pa'i chos nyid la// longs spyod rdzogs pa'i sku yis lung bstan pa// snod bcud phyi nang dag par byin brlabs te// yan lag bcu gcig byang chub lnga po kun bsgoms nas// bsgom pa'i ye shes lha ni snang ba med// spyan drangs mchod nas gshegs gsol ting 'dzin bshig/ yang bshig yang bsgom pi ta ra ti 'dra// ma bcos ji bzhin don dang be ro tha// sems dpa' rdo rje e ma ho// nga las 'thon pa'i ston pa'i lung bstan pa// rang gsal bcos pa med pa'i chos nyid la// yod pa med pa'i ting 'dzin sgor zhugs nas// gcig la blang dor byas nas dam tshig so sor bsgom// grogs po dag gis dngos grub gsol bar bsam// rang byung gcig la gnyis su bltas pas nor// ngo bo gcig la gnyis kyi thob bya thob byed med// sems dpa' rdo rje e ma ho// nga las mngon du shar ba'i chos nyid la// rnam shes dbang po phung po 'byung ba yul// rang rgyud rdo rje ltar byas dag pa yi// bsnyen pa dang ni nye ba'i bsnyen pa dang// sgrub dang sgrub pa chen po bsgom byas nas// 'phags mchod 'gro don sems kyi 'phro 'du byed// 'phro zhing 'du ba'i dngos grub thob pa de// bdag gis bdag gi dngos grub thob par sgom// de yang ting 'dzin tshi chad gyur ba'o// lhun grub lta ba bsgom du med pa ni// kun bzang rdzogs chen ye shes gdags pa'i chos// rang byung ye shes che ba'i yon tan gyis// sgrub cing rtsol ba'i spyod pa bya mi dgos// rgyu rgyen bral bas btsal ba'i bya ba med// ye nas grub pas rtsol bas bsgrub mi dgos// chos nyid nyid du grub pas bsgom bya sgom byed med// gnyen po med pas 'jigs pas 'jigs pa med// sgom gnas gzhan la ma bltos tshol mi byed// ngang la gang zhig sgom pa byed pa des// sgom pa nyid kyi nga dang phrad mi 'gyur// ye shes mngon du shar ba nga yin pas// sdug bsngal skye med rnam par spang mi dgos// skye 'jig med pas rang byung rdo rje ste// ma rig rten 'bral dbang po 'gag mi dgos// rang byung rnams dang chos nyid sbyang mi dgos// ye nas dag pas gtsang sbra bya mi dgos// lhun gyis grub pas rtsol sgrub bya mi dgos// rig pa gsal bas thams cad ye shes shar// de bzhin rnam snang kun tu bzang po las// dbang po drug la snang ba'i chos rnams byang// ye nas de yin de las gzhan pa med// de las gang zhig bsgom dang bsgom bya ba// de ni 'khrul te mkha' la them skas tshol// kun bzang rdo rje sems dpa'i spyod yul kun las 'das// mngon du rig pa shar ba'i chos rnams ni// ngo bo kun gyis thob par bya ba'i phyir// rnam pa sna tshogs dbang po kun gyi ngo bo bstan pa yin// de la nga yi rang bzhin ma mthong na// kun bzang rdzogs chen skal med pas// drang lung dgu yi theg pa bstan// kun bzang rdzogs chen ye nas spyod yul bral// rgyu 'bras lhun grub mthong ba'i skal ba med// rnams la bstan na sgro dang skur btab ste// rgyud drug ngan 'gro'i gnas su ltung bar 'gyur// sems la skur pa btab pas bsreg cing sgrebs// lhun grub de don rtogs shing sems dpa' che'o// kun bzang nga ni spyod yul las 'das phyir// tshig gi mi phebs tha snyad kun dang bral// dbang po'i spyod yul ma yin brjod pa'i tha snyad bral// nga yi rang bzhin bsdus te thig ler chub// spros med ye nas gnyis med gcig tu bstan// sdom pa ma bsrung 'phrin las btsal mi dgos// lam gnas mi bgrod sa la mi sbyong ste// chos nyid rang bzhin ngang las gzhan du btsal mi dgos// rang byung ye shes chen po mi rtog g.yos pa med// kun bzang nga yi lus 'di kun gyi gter// rgyu yis ma bskyed rtsol dang sgrub mi dgos// dngos po ma byung pas na sgom mi byed// dngos por ma skyes pas na 'jig pa med// nga mi snang bas dmigs pa'i sgo dang bral// brdal ba chen po bde ba'i klong dkyil na// mnyam pa chen por mi rtog rang bzhin gnas// rig pas mi rtog ting 'dzin phye ba med// sgom na gang bsgoms bsgom pa'i nad yin te// kun bzang snying po rang rig byang chub sems ni gzung 'dzin bral ba'i phyir// bsgom par bya ba rdul tsam yod pa min// nges thob theg pa'i 'bras bu ma thob bzhin// bsgoms pas thob par nga yang lung mi ston// sems dpa' chen po kun bzang nga la nyon// kun ni kun byas nyid du byas// gong na med pas bzang po ste// ma shong med pas yangs pa yin// zug rngu med pas bde ba che// zhes gsungs so/ kha sa man ta nam mkha'i mtha' dang mnyam pa'i rgyud las/ rnam pa lhun grub bstan pa'i dgongs pa'i le'u ste lnga bcu brgyad pa'o//// de nas bcom ldan 'das dpal kun tu bzang po des/sems dpa' rdo rje la 'di skad ces gsungs so// kye sems dpa' chen po dwangs ba'i sems kyis 'dus cig/ ye shes ye shes shes bya ba// ye nas yin pa'i don shes na// rang byung ye shes nyid ye shes// sprul pa lta rtog ye shes de// yul las skyes pas rang byung min// yul las ma skyes gsal mi byed// des na rang byung ye shes te// ye nas shes pas ye shes yin// de la ye shes zhes ni gdags// 'khor gyi ston pa'i ye shes ni// yul la brtags pas ye shes te// su gang yul la rtog byed pa// de ni rig byed ye shes min// rang rig bya ba'i yul de ni// sems nyid rig par shar ba'o// chu yin nang gi zla ba bzhin// gsal bas rang byung ye shes so// ye shes rang las byung ba'i phyir// de la ting 'dzin bsgom pa med// ting 'dzin bsgom pa mi byed pas// bag chags bsag bya bsag byed med// bag chag med pa'i chos nyid de// dus gsum sangs rgyas dgongs pa shar// dus gsum sangs rgyas thams cad kyi// dgongs pa yul dang yul can gyi// mnyam nyid ye shes rang gsal ba'o// sems dpa' rdo rje nyon cig/sangs rgyas kun gyi ye shes ni// mnyam pa nyid du ye nas gnas// sems dpa' rdo rje nyon cig/ sangs rgyas kun gyi ye shes la// ye nas rtog pa med pa'i phyir// bde gshegs dgongs pa mi mdzad de// rtog pa'i yul ni kun dang bral// shin tu rnal 'byor skal ldan gang// su yang rung ba de nyid ni// rtog pa med las rang gsal na// de ni sangs rgyas dgongs pa mdzad// sems dpa' rdo rje nyon cig/rang byung ye shes yul la mi rtog pas// rnam par rtog pa'i bag chags gos mi 'gyur// de bas las ni ting 'dzin brtags pa'i bag chags yin// rtog pa bral bas bag chags yod pa men// rtog bral gsal ba'i rang byung ye shes lnga// sems kyi rang bzhin dbang po sgo lngar bshad// rang byung ye shes de la 'gag pa med// sna tshogs kun gyi ngo bo byang sems snang// rang bzhin ye shes mi 'gog ngo bo so sor gsal// rang gi rkyen gyis snang bas der mi spong// mi rtog ting 'dzin bag chags ye shes gsal// de ni dus gsum sangs rgyas dgongs pa ste// su yang dgongs pa 'di la gang gnas pa// sa la mi gnas 'gro don btsal mi gnas// chos nyid bde ba che la 'di gnas te// rgyal ba ma lus kun gyi thugs kyi bcud// sems dpa' rdo rje tshig gi don 'di rig pas nyams su len// rang sems ye shes yul lngar rang gsal ba// ye shes lnga yi yul la 'dod mi byed// yul lnga ye shes lnga ru rang shar te// yul de ye na ye shes yin pa'i phyir// yul dang ye shes gnyis su ngas ma bstan// des na yul yang rang byung ye shes bshad// rang byung ye shes dngos med rang shar ba'o// nga las 'thon pa'i ston pa rnam gsum ni// ma 'gags gsal ba'i yul la rten nas ni// ye shes gsal zhing tha snyad ming btags la// ye shes grangs kyi rnam pa byung ba ni// rnam rtog yul shes ye shes gcig la ni// gcig gi rang bzhin so sor snang ba la// yul can la ni yul gyi ming btags te// de ni nges pa ma yin 'khrul pas btags// kun bzang nga yi rang byung ye shes min// kun bzang rdzogs chen rang byung ye shes gcig shar la// 'khor gyi 'dod pa rnams su ming btags pa// 'khor gyi 'dod pa'i bye brag gis// byang chub sems dang chos kyis dbyings// rang byung ye shes nam mkha'i khams// chos sku longs sku rdzogs pa'i sku// sku gsung thugs dang thams cad mkhyen// ye shes bzhi dang gsum dang gnyis// ye shes lnga dang dbyings dang ye shes sogs// rang byung ye shes gcig la khyab par gnang ba'i chos// yon tan dpag med snang bar zad// ces gsungs so/ kha sa man ta nam mkha'i mtha' dang mnyam pa'i rgyud las/ rang byung ye shes bstan pa'i le'u ste lnga bcu dgu pa'o//// de nas bcom ldan 'das dpal kun tu bzang po la/ sems dpa' rdo rjes 'di skad ces zhus so// e ma ho kun bzang rdo rje sems// thams cad gnas pa'i pho brang mchog/kun bzang rdo rje sems dpa' che// skal ldan rnams la bstan par gyis// zhes glengs so// de nas kun tu bzang pos gsungs pa/ sems dpa' rdo rje skal ldan tshogs// kun bzang rdo rje nga nyid ni// kun gyi byang chub snying por gnas// chos kyi dbyings kyi pho brang ni// byang chub sems kyi rang bzhin te/ khams gsum sems can thams cad dang// bde gshegs ma lus thams cad kyi// sems kyi klong chen gnas de na// mi gnas pa ni gcig kyang med// kun gyi sa dang gnas yin te// 'du 'bral med pa de na bzhugs// de la sbyang zhing bgrod pa med// de la rim par sbyang bgrod na// rang sems bcos te 'byongs mi 'gyur// gong du bstan pa'i spyi sa yin// sems dpa' chen po/ nga las 'thon pa'i sku gsum gyis/ khyad par mngon du byung ba yi// rgyu 'bras dag pa'i 'khor rnams la// sa mdo rnam pa gsum bstan te// sems bskyed sa dang rtsol bsgrub sa// spyod pa'i yan lag rdzogs pa'i sa// sems bzhin bskyed pa'i sar bskyed de// spyod pa'i sa ru sems spyod bcu// sgrub pa'i sa ru rtsol zhing bsgrub// de ni dman pa drang ba'i lung ston to// yang dag nges pa'i lung don min// e maho sems dpa' rdo rje khyod// yang dag nges pa'i lung 'di nyon// sems la rgyu rkyen med pa'i phyir// bskyed pa'i sa ru sems mi bskyed// bskyed pa'i sa ru sems bskyed na// chos dbyings nam mkha' byang chub sems mi shong// dge sdig las la dran pa dbang sgyur bas// spyod yul chos kyi nges pa ma rnyed de// rang byung ye shes mi khegs bzhin du 'gegs// ye shes yul la mi rtog rang byung bzhin// gzung dang 'dzin pa yod ces 'joms par byed// des na byang chub sems la skyes pa med// spyod pa'i sa ru sems bcu spyad pa'i sa// ji ltar snang ba'i chos rnams thams cad kun// byang chub sems la g.yos pa med pa ni// nam mkha' lta bu chos nyid snang bar zad// nam mkha'i ngang las g.yos pa rdul tsam med// 'grub pa'i sa ru byang chub sems dpa' 'dod// kun tu 'od dang ma chags pad+ma'i spyan// rdo rje 'dzin dang stug po bkog pa dang// yi ge 'khor lo tshogs chen rdo rje 'chang// rgyu 'bras kun bzang dbye ba med sa drug/ bsgrub bya byang chub sa ru ming btags pas// rgyu rkyen bral ba'i sems kyi rang bzhin de// bsgrub pas 'grub pa'i 'bras bu'i sa ma bstan// sems kyi rang bzhin drug tu snang ba bstan// sems kyi rang bzhin bstan pas 'di lta ste// dbang po sgo lnga kun tu gsal ba ni// rang byung ye shes ma 'gags pa yi rtags// de la kun tu 'od ces btags pa'o// yul du mi rtog chags pa med pa la// ma chags pad+ma'i spyan du btags pa'o// skye dang 'jig pa med pa rdo rje 'dzin// rang bzhin chos dbyings dpag tu med pa la// rang byung ye shes mi rtog mnyam par bkod// stug po bkod pa zhes su btags pa'o// sna tshogs snang bas sems kyi dkyil 'khor te// rang la ye nas rdzogs pas chos rnams la// yi ge 'khor lo tshogs chen lha rnams te// sku gsung thugs la skye dang 'jig med pas// de la rdo rje 'chang gi sa zhes btags// rig pa rang byung ye shes byang chub sems// sems la rgyu dang 'bras bu gnyis med de// sems las byung ba'i chos rnams thams cad de// ye nas blang dor bzang ngan dbye ba med// de la kun bzang dbyer med sa zhes btags// de bas byang chub sems kyi chos dbyings ni// bde gshegs kun dang rgyud drug gnas rnams kun// de las byung ba'i chos rnams gnas pa'i phyir// chos nyid byang chub sems ni kun spyod sa// sangs rgyas ye nas grub pa'i sa zhes bya// zhes kun tu bzang po sa gsungs so/ kha sa man ta nam mkha'i mtha' dang mnyam pa'i rgyud las// sbyang du med pa'i bstan pa'i le'u ste drug bcu pa'o//// de nas sems dpa' rdo rje des/ rgyud dang ston pa la bstod pa 'di gsungs so// e maho kun bzang rdzogs pa che// yon tan lhun grub kun gyi bdag/ kun gyi rtse mo byung rgyal lo// sku dang gsung thugs yon tan las// rin chen thugs kyi dkyil 'khor sgo phye nas// bde gshegs dpal gyi mgur nas gsung bsgrags pa// gsang sngags dbang phyug rnal 'byor rgyal po yis/ mnyam sbyor kun tu bzang po nyid kyi dbyings// lung gi rgyal po bstan pa'i yang rtser bshad// rnam dag lam chen kun sgrol dgongs pa'i thugs// bgrod med rnam grol rdzogs pa chen po'i lam// lhun rdzogs skye med bya med nyid kyi dbyings// lung gi rgyal po lam gyi rtse mo byung rgyal 'dis// theg pa'i rnam grangs grol thabs cha bsnyams pa// yongs su rdzogs pa ma 'dres chos rnams kun gyi rgyun// klung yangs rgya mtsho'i chu bo 'phro 'du bzhin// rgyal thabs spyi blugs dbang phyug rnams kyi mdzod// bstan pa kun gyi 'byung gnas snying po ste// theg pa kun gyi rtse mo byung rgyal yin// ye bya shes byed kun gyi gzhir gyur pa// kun gzhi gnas gyur rdzogs pa'i dkyil 'khor ni// nam mkha'i mtha' dang mnyam pa'i mkha' klong nas// de snyed rnam shes gdengs ka'i rgya mnyam pa// bde ba chen po rtse mo byung rgyal dbyings// bla na med pa'i yang thog sde rgyud sa// theg pa kun gyi yang rtse ye shes rgyas// don thams cad kyi rtse mo byung rgyal 'di// kun tu bzang po rang byung bcom ldan 'das// gcig pu che mchog rab tu che ba'i lha// lhun rdzogs sku gsung thugs kyi phyag rgya che// bla na med pa'i go 'phang mchog lags na// man ngag kun gyi rtsa bar nges pa ste// sangs rgyas kun gyi rtse mo byung rgyal lo// a ho/ chos dbyings ma skyes gdod nas dag pa'i phyir// sems skye ba yi rgyu ni ye nas med// de phyir srid pa'i chos rnams ye nas lhun gyis grub// rgyu nas lhun rdzogs byang chub sems kyi ngang// mya ngan 'das par mi gnas 'bras bu lhun gyis grub// don rnams kun gyi 'jug sdud nyid yin pas// 'bras bu ma lus pa yi rtse mo byung rgyal lo// thams cad sems kyi ngang du chub pa'i phyir// zla rgyas bzhin du spros pa mi mnga' yang// ye nas rgya mtsho 'khyil ba'i dbyings dang mtshungs// spros dang de bzhin bsdus dang de bzhin pa// bsod nams tshogs kun sku gsung thugs la rdzogs// tshogs gnyis rnams kyi rtse mo byung rgyal lo// nam mkha'i rgyal po lta bas 'phangs gcod pa// lhun rdzogs btang snyoms chen po'i ngang nyid las// gang yang ma g.yos chos rnams kun gyi dbyings// ma skyes mi gnas nam mkha'i rang bzhin la// thugs rje cho 'phrul ya mtshan chen por ston// lta spyod kun gyi rtse mo byung rgyal lo/ khyung chen gshogs rdzogs mkha' la ldings ba bzhin// ngam 'grogs g.yang sa chu klung gyen thur nyam mi nga// nam mkha'i khams kun bar snang lam du bde// mi rlob shugs ldan khebs 'og chud pa ltar// gang du dmigs pa'i sa kun ye nas chod// sgrub pa kun gyi rtse mo byung rgyal lo// rang byung ye shes bde ba chen po des// snang zhing srid pa ma lus rig pa'i ngang du bcom// 'khor dang mya ngan 'das pa ye nas ldan// mtshan nyid mtha' la mi gnas ye nas 'das// bdag gzhan kun gyi yon tan rgya mtsho shar// thams cad dor ba med cing dogs ba med las 'das// thams cad bsdus shing 'phro bas dbyings su bshad// yon tan mchog ste nges pa'i don dang ldan// de nas yang sems dpa' rdo rjes 'di skad ces bstod do// e ma kun bzang rdzogs pa che// bde ba chen po ye shes klong// kun gyi ngo bo ye shes ye nas shar// dam pa'i don gyi bdag nyid do// mkha' ltar byed pa med par gsal// lta ba kun gyi dam pa'i dbyings// ma chags spyod pas ye shes chen por ro// spyod pa kun gyi dam pa'i dbyings// las rnams thams cad ye nas lhun grub pas// rang byung lhun gyis grub pa'i 'phrin las rdzogs// las rnams thams cad kun gyi dam pa'i dbyings// ma bcos pa yi rig pa'i thig le ni// kun tu bzang po'i mkha' la ye nas 'khyil// dkyil 'khor kun gyi dam pa'i dbyings// chos rnams kun gyi rgyu 'bras ro gcig pa// byang chub snying po nyid du ye nas thim// sgrub pa kun gyi dam pa'i dbyings// log rtog rang byung ye shes rang gsal bas// ye shes kun gyi dam pa'i dbyings// bde chen longs spyod 'du 'bral med par rol// longs spyod kun gyi dam pa'i dbyings// ye shes chen po'i gzhal yas khang du rang gnas pas// gnas rnams kun gyi dam pa'i dbyings// kun tu bzang po'i klong dbyings na// rgyu drug ngar 'dzin log rtog rnams// ye shes chen po'i 'phro 'dur gsal// 'khor rnams kun gyi dam pa'i dbyings// des na kun grol rdzogs pa'i sku// rmad byung rol pa'i sku ru shar// zhes don rtags kyi sgo nas bstod pas// kun tu bzang po thugs rje g.yos pa med pas gsal zhing dges par gyur to/ kha sa man ta nam mkha'i mtha' dang mnyam pa'i rgyud las/ bstod pa'i le'u ste drug cu gcig pa'o//// de nas bcom ldan 'das dpal kun tu bzang po des/ sems dpa' rdo rje la 'di skad ces bstod do// e ma sems dpa' rdo rje che// smra ba'i seng ge rdzogs pa che// de bzhin gsang ba kun gyi thugs// che mchog che btsan kun gyi rgyal// sems dpa' sangs rgyas kun gyi dngos// kun gyi 'byung gnas rang byung ste// me long lta bu gsal ba'i mchog/ phyogs bcu thams cad ma 'dres gsal// theg chen rmad grags gong na med// ye shes chen po ma 'gags shar// ba a ho/ b+ha/ d+ha/ hri/ gra/ ling/ de nas kun tu bzang pos brtan zhing 'gyur med 'di gsungs so// de bzhin gshegs pa kun gyi thugs// ma 'dres yongs su rdzogs pa yi// rang byung ye shes lhun gyis grub// gsang ba 'di la gzhan mi spro// sgro skur bral ba'i snying po 'di// 'di ni nges lung dam par bstan// thugs las skyes pa'i sras mchog ni// sems dpa' rdo rje kun gyi thugs// bsdu zhing spro ba dam pa'i mchog/ bu/ hi/ twa/ lta/ skal ldan yon tan mchog gyur pa// bstan pa rang byung ye shes 'di// gsang ba chen po 'di yod par// ra bu la spu gri so la 'dzegs te don la lhun par gyis/khong na gnas pa'i yang khong du// sbas pas bam gyi kha bzhin no// thams cad la yang me long bzhin// bltas kyang gzugs brnyan snang mi 'gyur// ye shes 'phrul gyi gsang tshig ni// 'byed par byed pa'i tha ram 'dra// yid bzhin rin chen lhun gyis grub// ces gsungs so// de nas yang 'di skad ces bka' stsal to// nga yi ston pa rnams kyis// bstan pa yongs su rgyas bya'i phyir// 'bras bu lnga lnga tha mar brgyad// dam bcas tshul las 'da' ma byed/ khyad par gter sgo srung byed pa// bka' yi ral can e ka ti// zhes bka' stsal to// theg pa thams cad kyi yang rtse/bstan pa kun gyi 'byung gnas// rgyud thams cad kyi spyi 'grel// man ngag thams cad kyi rtsa ba/ rtsa ba'i rgyud chen po/ kha sa man ta nam mkha'i mtha' dang mnyam pa'i rgyud las// kun tu bzang po nyid kyis gsungs pa ste le'u drug cu rtsa gnyis pa'o//// ma ha a ti yo ga g+hu h+ya pra de sha kha sa man ta nam mkha'i mtha' dang mnyam pa'i rgyud rdzogs so//// rgya gar gyi mkhan po dpal seng ge'i 'od can gyi zhal snga nas dang/zhu chen gyi lo tsa ba dge slong gan 'jags snam par snang mdzad kyi zhal gzigs pa des/ yul d+ha he na'i 'du khang du bsgyur cing zhus te gtan la phab pa'o//// rgya gar skad du/ rat+na sUr+ya tsan+t+wa kU Ta tan+t+ra/ bod skad du/ rin po che nyi zla brtsegs pa'i rgyud/ ka dag rnal ma la phyag 'tshal lo// 'di skad bdag med ci yang ma thos/ bsam brjod blo yis yul du ma gyur te/dus mtha' med pa'i yid med blo 'das chen po'i dus na/ thog ma gzhi yi klong/ chos nyid kyi mkha'/ dbyings kyi klong/ ka dag snying po skye ba med pa'i dkyil 'khor/ rin po che gsal dag 'od kyi dkyil 'khor/'od sna tshogs 'phro ba'i mdangs/ rin po che'i 'od lnga las grub pa'i gzhal khang na/ sngon thog spyi phud kyi sangs rgyas dam pa gzhi yi ston pa 'od mi 'gyur ba bzhugs so// ston pa'i drung na gnas pa'i 'khor yang 'di lta ste/'byung ba lnga'i 'khor dang/ dngas ma lnga'i 'khor dang/ rlung lnga'i 'khor dang/ 'od lnga'i 'khor dang/ rtsal lnga'i 'khor dang/ zer lnga'i 'khor dang/ mdangs lnga'i 'khor dang/ snang tshul lnga'i 'khor dang/ dam pa dang po'i 'khor ro// bstan pa thig le khong gsal gsang ba'i nyi ma'o// dus ni dus kyi mtha' stong pa'o// de yi rjes 'jug ston pa'i 'khor ni/ ston pa'i rgyal po sngon thog ka dag gi sangs rgyas kyis/gnas kyi rgyal po 'od gsal chos nyid du// 'khor gyi rgyal ba kun rig 'khrul rje la// ston pa'i rgyal pos thig le spyi brtol bshad// dus kyi rgyal po mi 'bral chen po'i dus// de yi gdung 'tsho phun sum tshogs pa lnga ni// ston pa'i rgyal po gsang bdag chen po la// 'khor gyi rgyal po khye'u lnga yis bskor// bstan pa'i rgyal po nyi zla brtsegs pas chos nyid dbyings su bshad/ chos nyid dbyings skye ba med pa'i dus// sdud pa po ni kun rig khye chung ngo// zhes gsungs so// rin po che nyi zla brtsegs pa'i rgyud las/ gleng gzhi phun sum tshogs pa'i le'u ste dang po'o//// de nas kun rig khye chung gis/sngon thog spyi phud sangs rgyas la// phun sum tshogs pa'i don ni de ltar na// thog ma dang po ji ltar gnas// rlung lnga 'byung lnga ji ltar 'khrul// 'od gsal yan lag ji ltar grol// thig le rang bzhin ji ltar gnas// ye shes zang thal ji ltar 'char// gdams pa'i gnad ni gang gis bstan// gsang sngags brda yis ji ltar bstan// thig le spyi brtol lta bu gang gis rtogs// byar med blo 'das ji ltar a yin// ming med mtha' stong ji ltar go/ yang ti nyi zla'i snying po ru// theg pa rim dgu ji ltar rdzogs// rdzogs chen yang ti yo ga yis// ma bsgrubs 'bras bu ji ltar thob// ston pas 'khor la bka' stsol cig/ces zhus so// nyi zla brtsegs pa'i rgyud las/ 'khor gyis gleng slang ba'i le'u ste gnyis pa'o//// a tha as+b+ho ya mu hu la ma/ de nas kun rig khye chung gis// ston pa gsang bdag chen po la/ thog ma dang po ji ltar gnas// zhes zhus pa dang/ ston pas 'khor la bka' stsal pa// thog ma gzhi la ming med kyang// 'khor gyi rtog pa gsal phyir bshad// ye med gting med gsongs kyang med// gzhi med gzhi yi gnas lugs te// dngos med rlung med 'gyur yang med// spangs med rgyas med sku yang med// 'khrul med sems med rig pa med// 'khor med ltung med 'gro drug sems can med// bdag med gnas med phyogs ris med// mtha' med dbus med phyogs mtshams kha dog med// thog ma gzhi yi gnas lugs te// dngos med yul med cang kyang med// cang med dngos med tha snyad med// thog ma tha ma med pa ste/ ming med mtshon du ci yang med// ces gsungs so// nyi zla brtsegs pa'i rgyud las// gzhi bstan pa'i le'u ste gsum pa'o//// de nas kun rig 'phrul rje yis// sngon thog spyi phud sangs rgyas la// rlung lnga 'byung lnga ji ltar 'phrul// zhes zhus pa dang/ ston pas 'khor la bka' stsal pa/ thog ma ci yang med pa la// tha ma cir kyang rnam par 'khrul// de ltar 'khrul pa'i rgyu rkyen kyang// kun gzhis gzhi byas rlung lngas 'khrul rgyu byas// 'byung lngas dus byas 'od lngas rkyen byas nas// rtsal lnga ma 'gags zer lnga shes par 'khrul// shes pa'i ngo bo stong pa gsal ba las// ngo shes 'gyur med klong 'gyur snying po gzhi dang phrad// rang dngas rang grol thog mar ye sangs rgyas// rang bzhin ngo bo thugs rje las// mchog gi dang po sku gsum 'chang// zhes gsungs so// shes pas gnas pa'i don ma rig/ yid 'gyu rig myong sems su gsal// gsal ba'i 'od la min snang shar// rig pa 'og rlung langs pas 'khor sgor tshud// ma rig 'khrul rgyu 'gyu bas rkyen byas nas// mun pas bar bcad dug gsum 'khrul par smin// dug lngas gzhi byas mngal sgos rkyen byas nas// sha khrag gzugs sogs dngos po'i chos rnams 'khrul// phyi nang snod bcud gling bzhi ri rab dang// snang srid skye 'gro nyon mongs brgyad khri stong// de la 'khrul pa brtsis na brjod mi lang// zhes gsungs so// nyi zla brtsegs pa'i rgyud las/ 'khrul pa bstan pa'i le'u ste bzhi pa'o//// de nas kun rig 'phrul rje yis// sngon thog spyi phud sangs rgyas la// 'od gsal yan lag ji ltar grol// zhes zhus pas/ ston pas 'khor la bka' stsal pa// rlung sogs yan lag 'khrul pa rnams// rang grol rang sangs snying po'i klong// rlung la 'gyur med lnga yi klong du grol// 'byung lnga g.yo med snying po'i klong du grol// 'od lnga'i rkyen med ka dag klong du grol// zer lnga rang dngas chos nyid klong du grol// shes pa'i snang tshul dngas ma lnga ru grol// rang bzhin ngo bo thugs rje sku gsung thugs su grol// yid 'khor rnam gsum dkyil 'khor gsum du grol// stong pa'i klaung nas yid rig sems blo rnams// rang byung rang grol stong nyid klong du grol// ston pa kun 'byung stong par grol// med la sna tshogs med par grol// cang med cir snang snang tsam nyid na grol// thol byung ngang dngas byung sar grol// wal byung dran rtog snying por grol// gti mug ka dag chen por grol// ma rig ye shes chen por grol// dug gsum sangs rgyas sku gsum grol// dug lnga sku lnga nyid du grol// phyi nang yul sems gnyis su med pa grol// snang srid snod bcud ka dag chen por grol// lus ngag yid gsum sku gsum nyid du grol// stong gsum stong gi 'jig rten khams 'di rnams// ka dag 'od gsal thig le gsang ba'i lam// zang thal chen po mu mtha' yas pa ste// rang sangs rang dngas rang grol gting mtha' yas// thig le spyi brtol chen por rang grol lo// grol ba thar pa rnam grol lus// bag chags bcas nas gting nas grol// zhes gsungs so// rin po che nyi zla brtsegs pa'i rgyud las/ rlung lnga 'byung rtsal zer yan lag thams cad snying po ka nas dag pa'i klong du grol bar bstan pa'i le'u ste lnga pa'o//// de nas kun rig khye chung gis// sngon thog spyi phud sangs rgyas la// thig le'i rang bzhin ji ltar gnas// zhes zhus pa dang/ston pas 'khor la bka' stsal pa// thig le gang yin snying po yin// thig le'i rang bzhin sems nyid yin// thig le'i ngo bo chos sku yin// thig le'i snang tshul 'od gsal yin// thig le'i 'bras bu rang dag yin// thig le'i las ni rang grol yin// thig ni 'gyur ba med pa yin// le ni rgya chad med pa yin// thig ni rgyu rkyen med pa yin// le ni 'pho 'gyur med pa yin// thig ni skye med ka dag yin// le ni dngos med zang ka yin// thig ni rnal ma so ma yin// le ni byar med blo 'das yin// thig ni thig le spyi brtol yin// le ni ye shes gting rdzogs yin// thig ni thig le khong gsal yin// le ni ye shes gsang lam yin// thig ni gsang ba'i pho brang yin// le ni ye shes 'byung gnas yin// ka dag 'od gsal dkyil 'khor nas// thig le gsang ba'i nyi shar bas// ma rig sgrib g.yogs gtan nas sangs// zhes gsungs so// nyi zla brtsegs pa'i rgyud las/ thig le'i rang bzhin bstan pa'i le'u ste drug pa'o//// de nas kun rig khye chung gis// sngon thog spyi phud sangs rgyas la// ye shes zang thal ji ltar 'char// zhes zhus pa dang/ ston pas 'khor la bka' stsal pa// ye shes zang thal 'char lugs ni// gti mug rang sangs ye shes thal 'char ba yin// ma rig ka dag ye shes zang thal 'char// dus gsum ka dag ye shes zang thal 'char// nyon mongs ka dag ye shes zang thal yin// rnam rtog ka dag ye shes zang thal yin// yul sems ka dag ye shes zang thal yin// gzung 'dzin ka dag ye shes zang thal yin// phung po lnga dag ye shes zang thal yin// rnam shes tshogs brgyad ye shes zang thal yin// dbang po lnga dag ye shes zang thal yin// sgo lnga gsal dag ye shes zang thal yin// yul lnga rang grol ye shes zang thal yin// rig yid mi 'gyur ye shes zang thal yin// 'gyus kyang ngang dngas ye shes zang thal yin// rnam rtog rang grol ye shes zang thal yin// nyon mongs rang brlag ye shes zang thal yin// snang srid 'khor 'das ye shes zang thal yin// nyon mongs brgyad khri bzhi stong rang grol zang thal yin// chos sde brgyad khri bzhi stong ye shes zang thal yin// 'gyus tshad rig tshad rang brlag ye shes zang thal yin// mnos tshad bsams tshad rang grol ye shes zang thal lo// phye tshad brtag tshad ye shes zang thal lo// blo brtags chos rnams ril por ka dag ye shes zang thal lo// zhes gsungs so// rin po che nyi zla brtsegs pa'i rgyud las/ye shes zang thal bstan pa'i le'u ste bdun pa'o//// de nas kun rig khye chung gis// sngon thog spyi phud ston pa la// gdams pa'i gnad ni ji ltar bstan// zhes gsungs so// ston pas 'khor la bka' stsal pa// gdams pa gnad kyi man ngag bstan// kun rig khye chung thugs la chongs// gdams pa'i man ngag 'di yin no// snying po ka dag 'di yin no// snying po ka dag 'od gsal chos nyid klong// thig le yang gsang nyi ma shar// bag chags sgrib g.yogs gtan nas brlag/ thig le mthong brtol gsal lam phyed// thig le khong gsal don rtogs pas// ci yang mi brtag gza' gtad med// gang yang mi sgom mtha' stong gting mtha' yas// ci la'ang mi spyod rnam gzhag dal bar sdod// gang la'ang mi zhen mi spyod rang sar grol// su la'ang mi re 'di ka rang du grol// re dogs byar med rang la ye nas grub// ces gsungs so// rin po che nyi zla brtsegs pa'i rgyud las/ gdams pa'i gnad bstan pa'i le'u ste brgyad pa'o//// de nas kun rig khye chung gis// sngon thog spyi phud ston pa la// gsang sngags brda yis ji ltar bstan// zhes zhus pa dang/ ston pas 'khor la bka' stsal pa// a ti brda yi sgo nas bstan// 'khor rnams gus pas brda gnad zung// zhes gsungs pa dang/ mtha' med gting mtha' yas pa'i pho brang na// spyi phud khri rje gtsugs bstan bya ba bzhugs so// 'khor blon po kun spyod bya byed can bya bas bskor ro// rig pa thang rgyal kun 'phyo mgo rlung langs// zhes gsungs so// stong gsal mtha' stong gi lha khang na/ lha mnga' bdag rlung lha na bun gyi zhwa can bya ba bzhugs so// 'khor rlung po'i rta la nga bdag gi mi zhon pas bskor// bya btsal 'khor lo bskor zhing stong khams rjes kyi 'gengs// zhes gsungs so// la po che yi la kha'i rtse la btsal gyi kha na mthon po gcig 'dug pas phar 'gro tshur ldog kho rang la rag/ ces gsungs so// thog ma spyis brda'o// ka dag dang ye shes brdar bstan pa nyi zla kha sbyor gyi lha khang na/rin po che shel gyi sku gcig 'od dkar lam la bzhugs so// ka dag mtshon pa'i brda'o// rin po che snang gsal 'od kyi dkyil 'khor na/ 'ja' tshon gsal ba'i khri stengs na/rigs lnga gsal dag dngas ma lnga yi kha dog lnga bzhugs so// 'od gsal ngang dngas mtshon pa'i brda'o// mkha' klaung rnam dag chos nyid kyi pho brang na/ rgyal po spyi phud bya ba la/ jo mo gsal ba'i 'od 'bar ma dang/bu rang dngas pa'i khye chung dang/ bza' mi gsum po de dus gsum du mi 'bral ba'i rgyas thebs so// stong pa/ gsal ba/ dbyer med mtshon pa'i brda'o// e ma ngo mtshar rmad byung chos/ kye/ kun rig gsal ba'i khye chung lags// g.yas su mtshon pa'i 'khor lo bskor// g.yon du nyi zla'i sgron ma thogs// rin chen thugs las chongs la bcud kyi nying khu 'thung// stong pa'i rtsa ba phyung la shing thog 'bras bu zo// nam mkha' gos su gyon/ sa gzhi gdan du things/ rgya mtsho'i klong du nyol/ 'ja' tshon ma gol tshugs/ rlung po 'og tu chug spre'u lag pas gzung/ kye ma kun rig 'phrul gyi rje// 'khor 'das gnyis kyi so mtshams ltos// ma rig ye shes rtsa ba ltos// sangs rgyas sems gyes mdo ltos// snang srid 'khrul snang 'khrul tshul ltos// 'gro drug sems can sdug bsngal ltos// snga ma'i sems can gar song ltos// da lta'i sems can gar 'gro ltos// kye ma sems can ngan rtog can// rang la rang gi dbang 'dug gam// yun ring mgron po thag ring 'gro// rgyags phye gnas khang gang na bdog/ mgron po skyel med 'jigs par 'gro// lam 'phrang skyel ma gang nas tshol// kye khams gsum 'khor ba'i sems can rnams/ dug ma 'thung/ rang ma bslu/ sems grong rgyun ma gzhug rig pa kha yan du ma gtang/ yul dang/ rdzas dang/'khor la ma chags/ rang ma grol bar gzhan la ma ston/ kye ma 'ching bar ma byed mdud pa khrol// chags pa ma che mtsho mo skoms// zhe sdang ma che me 'bar sod// nga rgyal ma che rang che chog/ phrag dog ma che rdza klong brtol// nyon mongs ma che phyags mas thob// rnam rtog ma che rtog med spyod// drwa bar ma zhugs 'dam nas thon// rgya ru ma chung lcags sgrog khrol/ kye ma/ 'gro drug ma 'gro 'khor sgo sdoms// re ba ma gon mun pa sol// bar ma do ru dgra la sems ma bskur cig/ kye ma kun rig 'phrul gyi rje// bar do chen po 'di la skyes sam/ dran nam/ shes sam/ gnas sam/ rtsa ba phyin nam/ rtsad nas chod dam/ longs sam/shar ram/ nub bam/ sad dam/ rlag gam/ mtha' stongs sam/ zad dam/ sangs sam/ zhi'am/ grol lam/ yul phyin nam/ rtsa ba chod dam/ phugs su skyol lam/ sleb sar slebs sam/ phyir mi ldog pa'i sangs rgyas thebs sam/nyi ma shar ram/ mun pa sangs sam/ khra dang spre'u sod dam/ phag dang khyi'i snying phyung ngam/ gcig sod dam/ gnyis yul phyin nam/ gsum gyi ske gcad dam/ gsum rang la skyed dam/oM he ho ang g+ha g+ha ri ma/ e ma kun rig khye chung 'khor// nam mkha'i dbyings su nyol la rgya mtsho'i khregs chod kyis/ rgya mtsho'i klong du sdod la nor bu rin chen chongs// rlung po stong la non la 'ja' tshon rgyal mtshan gyis/khyung la zhon la glang po khrid// seng ge zhon la stag mo khrid// nor gyi mchog 'tsho bcud kyi bdud rtsi 'thungs// zas kyi bro ga myong la sngon gyi gnas su so// mun snang go phye gsal ba'i rgyas thob cig/ces gsungs so// nyi zla brtsegs pa'i rgyud las/ gsang sngags brdas bstan pa'i le'u ste dgu pa'o//// de nas kun rig khye chung gis// thig le spyi brtol gang gis rtogs// zhes zhus pa dang/ ston pas 'khor la bka' stsal pa// thig le spyi brtol rtogs thabs la// bya btsal zhe 'dod blo yi chos kyis mi rtogs te// byar med rang grol gzhag pas rtogs// lta sgom spyod 'bras sgrub pas mi rtogs te// gtad med bsam med byar med re med rtogs// skye med ka dag byar med blo las 'das// de yis thig le spyi brtol rtogs// thig le spyi brtol rtogs thabs ni// bya ba thams cad gtang la ni// byar med lhug par gzhag pas chog/ chos rnams blo yis gtang na ni// grub mtha'i zhe 'dod med par gzhag/ de yis thig le spyi brtol rtogs// thig le spyi brtol rtogs thabs ni// bsam sgom ci yang mi bya ste/bsam med glong du nyal bas chog/ lta ba yengs med skye ba med// chos rnams skye med rtogs pas lta rgyu med// ka dag dngos med rtogs pas sgom pa med// ma bcos rnal ma rtogs pas spyod pa med// blo 'das rang gnas rtogs pas 'bras bu med// de yis thig le spyi brtol rtogs// thig ni snying po chos nyid sku// le ni 'od gsal ka dag yin// spyi brtol snying po klong brtol lo// de phyir thig le spyi brtol yin// thig ni skye med snying po yin// le ni 'od gsal 'gag pa med// spyi brtol chos rnams spyi brtol lo// thig ni yang dag nges pa yin// le ni don dam 'gyur ba med// spyi ni theg pa thams cad yongs kyi spyi// brtol ni de rnams lta sgom phugs su brtol// de phyir thig le spyi brtol yin// zhes gsungs so// nyi zla brtsegs pa'i rgyud las/ thig le spyi brtol bstan pa'i le'u ste bcu pa'o//// de nas kun rig khye chung gis// sngon thog spyi phud ston pa la// byar med blo 'das ji ltar yin// zhes zhus pa dang/ ston pas 'khor la bka' stsal pa/ byar med blo 'das yin rgyu cang med de// 'khor gyi rtog pa gsal phyir re zhig bshad// ma bcos yongs rdzogs chos nyid klong dkyil nas// yan lag rtsal gyi shes pa ji snyed la// mi 'gyur mi spyod mi chags byar med blo las 'das// mi zla mi sgom mi spyod bral med blo las 'das// mi sgrub mi rtsol mi sbyong byar med blo las 'das// mi bgrod mi skyod byar med blo las 'das// mi tshol mi rnyed byar med blo las 'das// mi ltung mi rtogs rang sangs blo las 'das// lta yin lta yin blo las 'das// sgom gyin sgom gyin blo las 'das// spyod cing spyod cing blo las 'das// sgrub kyin sgrub kyin blo las 'das// de rnams blo brtag bla dgas rtogs pa yin// rtog pa'i chos kyis sangs mi rgyal grol mi thob// blo 'das ji ltar yin zhe na// byar med blo 'das myong chos med// byar med blo 'das blo brtags med// blo 'das nyid la grub mtha' med// byar med ngang la grub pa med// blo 'das nyid la tha snyad grol// blo 'das nyid la 'dod rlom med// byar med nyid la chos rnams med// byar med nyid la lus ngag yid kyi rtsol sgrub med// blo 'das don gyi ngo bo ni// snying po chos nyid yang dag nges pa'o// thig le gsang khong gsal ti rtogs so// mu med ming med mtha' stongs so// snying po chos sku gnas lugs gshis kyi 'dug tshul yin// skye med ka dag dngos med zang ka yin// ma bcos rnal ma rang 'khrungs ma yin so ma lhug pa'o// de kho na yin pa'o// nges pa yang dag bdag med thig le spyi brtol yin// ye shes gting rdzogs rnam par rtog med yin// brjod med mtshon med ye nas ye dag yin// ye gsal ye grub ye rdzogs ye zin ye dang ye sangs rgyas// ye grol ye rgyas ye thob bo// ye stong ye byung ye nas grol// ye med sna tshogs rang grol lo// ye sangs ye rgyas ye byang ye chub bo// stong pa kun 'byung 'dzin pa rang grol lo// ye shes zang thal thig le khong gsal lo// skye med ka dag dngos med zang thal byar med blo 'das snga ma de nyid do// cang med cir snang snang sa nyid du grol// zhes gsungs so// blo 'das rang gi ngo bo ni// thig le chen po yi ge med// rnam pa kun ldan rnam pa med// dpe med bla med dngos med do// dngos med gtad med bsam brlag po// col med don chung mtha' stongs so// gting med phred med 'gyur med pa'o// rdul med dri med ka dag yin// bka' med dri med ka dag yin// mun med sgrib med bag chags med// rtsis gdab bcas bcos 'dod rlom med// de yis byar med blo 'das rtogs// ltar med sgom med spyod du med// de yang byar med blo 'das rtogs// rig pa rang grol dran sems rnam rtog sangs// de yis byar med blo 'das rtogs// blo 'das nyid la sems med sangs rgyas med// theg pa dgu yi rtags grub rtogs// byang med chub med sku lnga'i rigs lnga med// blo 'das don gyi ngo bo ni// sems la yul med de// dbye gsal bcas bcos rtsis gdab 'dod rlom med pa'o// zhe 'dod dang dgag sgrub spong len med pa'o// rig pa la mtha' dbus mu las grol te chos nyid blo 'das de/ bsam du med cing dmigs pa'i yul las 'das te/ blo las grol zhing brjod du med// mtshon pa'i yul du ma gyur pas// blo brtags theg pa rim dgu'i chos mtha' dag las grol te/ bsam med brjod blo'i yul du ma gyur te// dmigs pa'i spyod yul mtha' dag las grol ba'o// deng sdod byar med blo 'das chen por rang grol zhing gyur to// blo brtags don la 'dod rlom brtsis gdab bya btsal med// ces gsungs so// rin po che nyi zla brtsegs pa'i rgyud las/ byar med blo 'das yin tshul bshad pa'i le'u ste bcu gcig pa'o//// de nas kun rig khye chung gis// sngon thog spyi phud sangs rgyas la// ming med mtha' stongs kyi rgyu med na yang// 'khor gyi rtog pa gsal phyir bshad// 'khor rnams ma yengs gus pas nyon// dug gsum med mtha' stongs pa yin// dug lnga ming med mtha' stongs yin// ma rig ming med mtha' stongs yin// gti mug ka dag ming med mtha' stongs yin// 'khor ba ka dag ming med mtha' stongs yin// rnam rtog ka dag ming med mtha' stongs yin// 'khrul pa ka dag ming med mtha' stongs yin// snang ba ka dag ming med mtha' stongs yin// 'gro drug mi 'khyams ming med mtha' stongs yin// khams gsum mi 'khor ming med mtha' stongs yin// ming med mtha' stongs go lugs yin// bsam tshad ming min rtogs pa yin// de phyir mi bsam mi sgom gting mtha' yas// phye tshad rtags tshad blos brtags yin// blo brtags chos kyis sangs mi rgya// de phyir blo brtags ming med mtha' stongs go/ dug lnga dug gsum ming med mtha' stongs so// rnam shes tshogs brgyad ming med mtha' stongs so// phyi nang yul sems ming med mtha' stongs so// lus ngag yid gsum ming med mtha' stongs so// snang srid 'khor 'das ming med mtha' stongs so// dgag sgrub spong len ming med mtha' stongs so// phye tshad rjod tshad ming med mtha' stongs so// snang tshad gzung tshad ming med mtha' stongs so// nyon mongs ji snyed ming med mtha' stongs so// rnam rtog ma lus ril por mtha' stongs so// khams gsum sems can ming med mtha' stongs so// 'gro ba rigs drug sdug bsngal ma lus mtha' stongs so// gzung 'dzin chags sdang ril gyi mtha' stongs so// dgra brten phyogs ris ming med mtha' stongs sau// dbye bsal rtsis gdab 'dod sems mtha' stongs sau// bya btsal zhe 'dod dgag sgrub ma lus mtha' stongs so// nyon mongs brgyad khri bzhi stong mtha' stongs so// blos brtags chos rnams ril gyi mtha' stongs so/ lta ba mtha' stongs gza' gtad mu mtha' yas// sgom pa mtha' stongs dmigs med mu mtha' yas// spyod pa mtha' stongs byar med las zin// so ma lhug pa rnal ma mu mtha' yas// 'bras bu mtha' stongs re med rang gnas blo 'das mu mtha' yas// ces gsungs so// rin po che nyi zla brtsegs pa'i rgyud las/ ming med mtha' stongs kyi le'u ste bcu gnyis pa'o//// de nas kun rig khye chung gis// sngon thog spyi phud sangs rgyas la// rdzogs chen yang ti yo ga ru// theg pa rim dgu ji ltar rdzogs// zhes zhus pas// ston pas 'khor la bka' stsal pa// yang ti nyi zla'i snying po ru// theg pa rim dgu'i rdzogs lugs ni// yul drug gang zag chos bdag med// nyan thos lta ba yongs su rdzogs// rten 'brel rnam par rig byed med// rang rgyal lta ba ma 'dres rdzogs// yang ti nyi zla'i snying po la// yul sems bden brdzun rang rig mi rtag pas// skad cig cha yis rtag 'dod med// sems tsam lta ba ma 'dres rdzogs// bden pa gnyis su mi lta bas// dbu ma'i lta ba longs su rdzogs// gsang sngags theg pa'i rdzogs lugs kyang// rdzogs chen a ti yo ga la// phyi dag nang dag yongs su dag/ rigs gsum rje dang khol du mi lta bas// kri ya'i lta ba yongs su rdzogs// mar spyod yang lta rigs bzhi'i lha med pas// u ba'i lta ba rdzogs// rigs lnga spun dang grogs su mi lta// skye 'gag gnyis med pas// yo ga'i lta ba yongs su rdzogs// nang rgyud sde gsum rdzogs lugs ni// ting 'dzin rnam gsum thabs dang shes rab med// snang ba lha dang lha mor mi lta bas// ma hA yo ga'i theg pa yongs su rdzogs// dbyings dang ye shes gnyis med pas// a nu'i lta ba ma 'dres rdzogs// rig pa 'gyu ba'i ye shes la// rang byung ye shes yin 'dod pas// a ti'i lta ba yongs su rdzogs// ka dag mtha' ru ma reg pas// spyi ti lta ba yongs su rdzogs// yang ti yo ga mu mtha' grol bu ru// theg pa'i chos rnams ma 'dres yongs su rdzogs// zhes gsungs so// nyi zla brtsegs pa'i rgyud las/theg pa rim pa dgu rdzogs pa'i le'u ste bcu gsum pa'o//// de nas kun rig khye chung gis// sngon thog spyi phud sangs rgyas la// rdzogs chen spyi ti yo ga yis// ma bsgrubs 'bras bu ji ltar thob// ces zhus pa dang/ ston pas 'khor la bka' stsal pa// a ti yo ga'i snying po la// 'bras bu thob dang ma thob gnyis med kyang// re zhig 'khor la brod pa bskyed phyir bshad// 'bras bu zhes pa'i ngo bo ni// gzhan nas thob rgyu ye med de// rang sems ming med mtha' stong yin// de ltar go na 'bras bu yin// thig le gting rdzogs 'bras bu yin// thig le spyi brtol 'bras bu yin// thig le khong gsal 'bras bu yin// thig le gsang ba'i nyi ma 'bras bu yin// skye med ka dag 'bras bu yin// dngos med zang ka 'bras bu yin// ma nor yang dag res pa'i 'bras bu yin// byar med blo 'das 'bras bu yin// sku gsum lhun grub 'bras bu yin// sku lnga ye shes 'bras bu yin// snying po chos sku 'bras bu yin// gting mtha' yas pa'i 'bras bu yin// mu mtha' grol ba'i 'bras bu yin// snang mtha' grol ba'i 'bras bu yin// blo zad chos zad 'bras bu thob// rtsol sgrub re dogs 'bras bu med// ces gsungs so// gzhan nas mi rnyed rang la ye nas grub// ces gsungs so// nyi zla brtsegs pa'i rgyud las// 'bras bu bstan pa'i le'u ste bcu bzhi pa'o//// de nas kun rig 'phrul rje yis// rgyud 'di'i mtshan ni ji ltar gzung// zhes zhus pa dang/ ston pas 'khor la bka' stsal pa/ rin chen nyi zla brtsegs pa ni// rin chen lta sgom 'dod pa 'byung// nyi ma snang gsal thabs kyi rgyud// zla ba mun sel shes rab rgyud// thabs dang shes rab brtsegs pa'i rgyud// nyi mas ka dag 'ong gsal ston// zla bas gti mug ma rig sel// ka dag ma rig mun sel rgyud du zung// zhes gsungs so// nyi zla brtsegs pa'i rgyud las/ mtshan bstan pa'i le'u ste bco lnga pa'o//// nyi zla ri rab bla ma snying sems man ngag gter du 'chang// skal ldan dam tshig bsrung ba la dam tshig gtad/ces gsungs so// snod med dam nyams zong tshong lag tu shor ra re// rin po che nyi zla brtsegs pa'i rgyud rdzogs so////

CLOSE WINDOW