CLOSE WINDOW

Gpb035.001
བོད་ཡིག

thams cad nam mkha'i ngo bo skye ba med pa'i byang chub kyi sems bsgom pa'i rgyud bzhugs so// rgya gar skad du/ sarba kha k+Sha a ba yan bo d+hi tsit+ta tan tra/ bod skad du/ thams cad nam mkha'i ngo bo skye ba med pa'i byang chub kyi sems bsgom pa'i rgyud/ bcom ldan 'das dpal kun tu bzang po la phyag 'tshal lo// 'di skad bdag gis thos par dus gcig na/ bcom ldan 'das de bzhin gshegs pa/ yang dag par rdzogs pa'i bcom ldan 'das de bzhin gshegs pa thams cad kyi sku gsung thugs kyi dngos grub kyi dbyig bsdus nas thams cad kun dang dbyer med pa'i rdo rje'i bdag nyid du bzhugs pa la/gsang sngags kyi snying po las khyad par du bstan par dgongs pa'i phyir/khyad par du gyur pa'i 'og min gyi/ gnas dang bdag po ji bzhin pa// 'dzam bu gling gi bu rir ni// ji bzhin pa de der snang nas// dga' rab blo bstan yu ba can// gnas mchog gtsug gi nor bu can// nges 'byed rab snang la sogs la// bcom ldan 'das kyis lcags rtse yi// bsgom pa 'di ni rab tu bshad// chos rnams ma lus snang bar gyur pa thams cad kun// ye nas rang bzhin rnam par dag pa la// phyin ci log rtog rkyen gyis bslang nas blo bur bar// sprin gyis nyi ma blo bur btson du 'dzin tshul du// rang dbang med par khams gsum 'khor ba'i btson rar gnas// rang rig gsal la sgrib med gdod nas dag pa yi// thams cad myang 'das 'khor ba gnyis su snang// rang bzhin med pa ji ltar yin pa'i don rtogs na// thams cad sangs rgyas zhing du gdod nas rnam par dag/ de bzhin gshegs pa'i rgyal ba'i dkyil 'khor ma lus kun// rig pa rang dbang gyur pa thams cad kun dbang bskyur// log rtog cher rgyas 'khrul pa'i chos rnams sna tshogs dang// sangs rgyas dkyil 'khor de bzhin nyid la sogs pa kun// rig pa nyid las yod pa min te dbyings su gcig/ 'jug pa'i dbang gis phyin ci log tu rnam brtag pas// thams cad gzhan dang bdag gi so sor snang// de la gzung 'dzin pa ni gnyis kyi blo bzhugs nas// ye nas rang bzhin med pa'i de bzhin nyid de so sor 'dzin// blo ldan yang dag brtags pas rab tu brtags gyur na// dngos por snang ba thams cad ye nas stong pa yin// dngos dang stong nyid mi gnas mi dmigs rtogs pa// 'khor ba'i sdug bsngal drag po gsal zhing zad pa yin// stong nyid ye mkhyen rang rig mnga' brnyes pa de ni// nyon mongs 'khor ba'i lam las rnam par grol ba ste// shes rab mchog gis de ltar gang zhig de ltar rtogs pa de// de ni mtshan nyid 'dzin pa'i don la phyag rgyas btab pa yin// bdag rtog mtshan ma kun zhig mtshan ma med pa'i sku// shes rab rnam par grol ba'i dbyings kyi rgyal po der// thams cad ma lus 'dus par rtogs pas yang dag rtogs// de ltar ma rtogs nyid kyang dngos po med par gsal// de nyid sna tshogs snang ba nyid na bya byed med// des ni chos kyi rang bzhin snying por gsal ba yin// byang chub kyi sems bsgom pa'i rgyud las/ 'khor ba'i chos 'di ltar snang ba thams cad kyi rang bzhin ji ltar yin pa bstan pa'i skabs dang po'o//// de nas rdo rje 'dzin pas gsol pa/bcom ldan 'das/ slob dpon dang// sangs rgyas dang// yang sangs rgyas dang/ chos gsum la khyad par ci mchis/ bsgom na ji ltar bsgom/ zhes gsol bas/ bcom ldan 'das kyi khyad med pa'i ting nge 'dzin la bzhugs nas bka' stsal pa/rdo rje slob dpon smad par mi bya yi dam lha nyid du// gang 'dzin pa nyid bde gshegs kun dang dgongs pa gcig/ yang dag byang chub ston pa'i 'dren pa'i skyes bu des// ngan song 'thoms pa'i long ba'i dmigs bu 'dren dang 'dra// skal ldan slob dpon 'khor ba'i mtsho skem ste// rin chen rin thang med pa'i don ston skal ldan la// dkyil 'khor ma lus chos kyi snying po kun ldan pas// sku gsung thugs kyi rdo rje bdag po smod pa de/ khri mun mun nag gsal ba'i sgron ma 'dra bas ni// slob dpon gsal bar bsgoms na chos rnams ma lus bsgom// mtshan dpes brgyan pa 'bum bsgoms pas ni char mi phod// de bzhin snying po ji bzhin mi dmigs mi 'gyur brtan// gang yang bdag dang gnyis med bdag med so so ma yin pa// mi 'gyur brtan po sangs rgyas sa yin te// bdag las gzhan du dbog pa ma yin bdag rang nyid// phyi nang ma lus chos rnams thams cad kun nyid ni// bdag las gzhan min bdag las yod ma yin// kun sbyor gsum gyi zhags pas gang bcad pa// de ni bdag rig gnas su son te gdod nas dag pa yin// gang yang 'jig rten pa dang 'jig rten 'das pa yi// sna tshogs ma lus rnam grangs bsam yas brjod pa yang// rang rang so so'i mtshan nyid brjod rgyu ma gtogs pa// chos kyi dbyings la ba spu'i cha tsam brjod rgyu med// kun gyi dgos pa rnam gnyis bsam ma dgos par rdzogs// 'di la bskyed dang dgug dang sbyor sgrol bya mi dgos// thabs chen thabs kyi sprul pas 'jig rten khyab pa'i phyir// ye shes dbyings kyi sprul pas ye nas ma khyab med// 'du 'phro bde gnas chos kyi snying po 'di dang rang blo mnyam// de phyir sems can gang la gnas par rang blo yin// rang blo de bzhin de ltar gnas pa dgos pa'i mchog/ dbang po yul dus bcas pa thams cad zag dang bcas pa yin// 'di la zag med kun gyi yon tan rgya mtsho'i mchog/ ye sangs rgyas par rang rgyud sbyangs nas sangs rgyas btsal du med// ngan song gsum dang sangs rgyas so sor yod mi gnas// sangs rgyas zhing dang phung po khams su dbye ba yod ma yin// thams cad dbyer med ye nas mnyam pa bde mchog sku// 'gro drug dus gnas byang chub lam du ye nas gnas// chos kyi dbyings las sangs rgyas gud na yod ma yin// ci la'ang mi gnas kun la khyab pa'i tshul du khyab// thugs rje gnyis mnyam pa'i zhing la rtag par gnas// 'dir mi chud pa gang yang med de yangs pa nyid du sbyor// che chung gnyis med dbyings su rang blo de bzhin bzhag/ rgyal ba rnams kyi dgongs pa'i mchog ces bya// de nas gsang ba'i bdag po chen po des/bcom ldan 'das/ bcom ldan 'das gang la brtags la gang la 'jug/ ces gsol pas// brtag tu med cing 'jug tu med pa'i ting nge 'dzin la snyoms par zhugs nas bka' stsal pa/rang bzhin med pa'i byang chub sems nyid nor bu rin po che// sus kyang ma bcos ma byas ngang gis rnam par gsal// ming dang tha snyad 'dzin pa ye nas gsal// thams cad rang 'byung dkyil 'khor nyid du rnam par dag/bde dang mi bde med pa 'di la ji yang brtag tu med// thams cad dbyer med byang chub lam chen 'di la ci zhig yod// 'di la skye ba med de skye ba sna tshogs skye// skyes pa nyid na skyes pa rdul tsam med de de bzhin nyid// cis kyang ma gos cis kyang mi shigs thams cad yin// phyi dang nang med phyi nyid de bzhin nang yang yin// sangs rgyas zhing khams ma lus bkod pa chen po'i sku// rnam par byang dang nyon mongs so sor mi 'byed ye// cis kyang mi tshugs thams cad 'dus te gong na'ang med// phyogs bcu dus bzhi dus gsum mi 'byed mnyam pa nyid// gang yang mi dmigs pa las dmigs pa sna tshogs 'byung// rgyu 'bras mi 'byed gzhi dang rtsa ba med pa yin// yang dag byang chub rang rig sems su sus rig na// log 'khrul ma rig ba slad pa'i rgyu 'bras rnam par dag/ nyon mongs pa nyid byang chub zhing ste cir yang bsam du med// gang la brtag tu med pa yang dag byang chub lam// don la 'jug tu med pas byang chub mchog gi snying po nyid// 'di ltar dran byed stobs dang ldan pa dgos pa yin// 'khrul pas lam lngar rtags pa rnam rtog yin// bsgrod sbyongs sa la stsol bas lam mi rnyed de gol// rtogs dang mi rtogs gnyis ka dpyad du med pa yin// 'di ni gang yang gnyis med yang dag thar pa'i lam// ting 'dzin rnam gsum sgom du ye nas 'dzin dang bral// zhi gnas lhag mthong gnyis su sbyar yang lhung pa'i lam// sna tshogs kun bsgyur chos ni 'di min pas// theg pa bsam yas kun gyi rgyal po ye nas yin// 'di ni rdo rje mchog gi theg pa kun gyi pa// gang la'ang dpyad du med pa de la bsgom du med// mi bsgom pa de kun dang ldan te kun la zhugs// de phyir de bzhin nyid la drang srong 'da' mi byed// byang chub kyi sems bsgaum pa'i rgyud las/slob dpon dang sangs rgyas dang/ chos gsum slob dpon dran pa yin pa dang// ci la'ang brtag tu med cing gang la'ang 'jug tu med pa'i skabs gnyis pa'o//// de nas gsang ba'i bdag po kun mkhyen des/bcom ldan 'das la gsol ba btab pa/ dpa' bo chen po chos rnams kyi rang bzhin ji ltar bsgom// zhes gsol pas/ bcom ldan 'das kyis chos kyi rang bzhin ji ltar bsgom pa'i tang nge 'dzin la snyoms par zhugs nas bka' stsal pa/byang chub sems dpa' mi dmigs de bzhin sangs rgyas mi dmigs dge 'dun chos mi dmigs// sdug bsngal 'khor bar btags pa dul yang med pa ste// drang srong nyid kyis dmigs pa'i don mi rnyed pa yin// rnam pa thams cad mkhyen pa'i ye shes kyis/ khams gsum snang srid ma lus thams cad kun nyid ni// de bzhin nyid las gzhan du ma 'phros dbang sgyur te// zad med ye shes gter ldan thams cad dbyings su thim// 'di la gang yang dmigs su med pa snying po'i mchog/ 'jig rten 'das dang 'jig rten tha dad pa 'di 'ang// so sor don rnams btags pas ye nas rnam par dag/rnam dag lam dor zhugs pas mnyam pa'i rgyal po 'thob// phung po khams ni theg pa dgu gsum bzhi dang gcig/ phyogs dus mnyam dbyings rnam par dag pa ma shes pas// rnam rtog theg pa'i grangs su snang bas sangs mi rgya// chos kyi rang bzhin mtshon du med pa rnam par dag pa la// ston pas chos su btags nas bstan par bya ba ye nas nor// 'dul ba mdo sder btags pas 'khrul tshabs che ba yin// chos zhes btags pa'i gzhi 'di zad mtha' ga na yod// tshig gi dpyod pa'i tshogs la lam mi gnas te gol// 'das dang ma 'das 'di ltar snang ba thams cad kun// yang dag shes pas don de rab tu brtags gyur na// rang bzhin med la cir yang snang zhing cir yang 'byung// ji ltar snang ba nyid nas dbyings kyi rang bzhin te// de ltar chos kyi rang bzhin rtogs pa'i ye shes ni// sna tshogs chos rnams kun la dbang yang sgyur// de ltar shes pa chos rnams thams cad kun shes so// rnam rtog kun gzhi ma yin rang bzhin med pa'i gzhi// chos rnams ma lus nga dang bdag tu mi 'dzin cing// kun kyang dbyer med thams cad mnyam yin pas// rtogs dang brtag par byar med dus gsum yang mi dmigs// dbang po yul rnams dngos rnams dbyer med de bzhin nyid// chos rnams ma lus de ltar rang bzhin med pa yin// de ltar de bzhin de la gnas pa bsgom pa'i mchog/ byang chub kyi sems bsgom pa'i rgyud las/ chos thams cad kyi rang bzhin ji ltar sgoms bstan pa'i skabs gsum pa'o//// de nas bcom ldan 'das la/ rdo rje 'dzin pas gsol pa/ bcom ldan 'das sems las ma gtogs pa'i chos gud na mchis sam/ zhes gsol pas/ bcom ldan 'das kyis bka' stsal pa/chos rnams thams cad sems kyi 'khrul pa ste// sems las ma gtogs chos rnams gud na med// chos su mthong bar snang ba 'khrul pa'i sems// rten 'brel sgyu ma la sogs skye ba med// skye ba med ces dngos por bstan pa yang// dngos por 'dzin pa las ni bzlog phyir te// sgyu ma la sogs ye nas skye med la// skye med snyad kyi sgro zhig gdags su med// nam mkha' 'di ni ye nas med do zhes// blun po gang zhig nam mkha' rtogs par byed// mkhas pa rnams ni sngon nas yod min 'dzin// med par mi brjod tshig tu smra mi bya// sems las ma rtogs chos rnams med pa'i phyir// bsgom bya'i chos ni gud na yod ma yin// sems kyang ye nas ma byung ma skyes na// bsgom zhes bya ba ga la yod par 'gyur// brjod par bya ba'i sems de nyid// ma skyes bas na dngos po yod min na// bsgom par bya dang bsgom du med ba yi// tha snyad gang zhig gang la 'jug par 'gyur// grol thar 'gro ba'i sems rgyu gnyis mi 'chang// de ni ma skyes rang gi sems mi dmigs// de las gzhan pa'i sems ni med pa'i phyir// de la bcos shing gnas pa gang zhig yod// 'khrul rtogs rkyen dpa' tshams par ldan pa'i bar// smig sgyu lta bu'i sems su snang ba la// rang bzhin shes pa 'di las med pas bcos su 'di la med// mi shes blun po'i smig sgyu 'chos ba bzhin// mi rtog mtshan ma'i gdod ma'i sems nyid kyis// mtshan ma med la ye nas gnas mi byed// mtshan ma med la sngon nas mi gnas na// mtshan mar mi gnas pa lta smos ci dgos// bsgrub pa med cing gnas pa 'di las med// 'du byed med pas mkha' la mkha' 'dra bas// 'du byed las byung thams cad bsam gtan skyon// ma lus kun gyi sems la dgos pa med// ji tsam brtag tu med pa'i zab mo zhig/blo yi ngang du gsal bar zhen zhe na// gang la mi rtog zab mo'i nyams myong ba// myong ba yin phyir de ni rtog ma yin// rgyal ba sangs rgyas rnams kyis kun brtags pas// dgongs ba'i mchog tu bzhag pa 'di las med// ji bzhin nyid kyis chos kyi ngang btsan par// chos kyi dbyings las chos nyid mi 'jug ste// ji tsam zab mo'i tshig rnams brjod byas kyang// don dang 'thun par gang yang mi 'gyur te// sems ni ci yang mi dmigs mi gnas te// sems la gnas dmigs yod pa'i skyon sel ba'i// sems su 'dzin pa'i phrag dogs de la yod// smig sgyu bzhin du sems la dngos med na// sems la mi dmigs mi gnas byed pa gang// nam mkha' nam mkha' rang la ma gnas zhes// bsgo ba don dang ldan pa ma yin te// de bzhin skyil krung drang por 'dug pa dang// yang dag de la bdag blo gtang byas te// lus kyi bcom pas rang dgar ci byed pa// lus su mthong bar zhen las byung ba yin// mkha' la bcos pa med bzhin lus kyang med// sgyu ma bzhin du bdag gi lus shes na// drang por 'dug na skyil krung 'cha' ba med// spyod lam gsum gyi don la dgongs pa gang// ched du mi byed ye nas byar yang med// lus dang sems gnyis ma skyes gzhi med pa// mkha' ltar gnas sa bcos pa'i kha na med// 'dod don tshad mar lus sems 'chos byed pa// rtogs pa 'dzin pa'i phur ba de la yod// ji ltar mtshan ma med pa'i nam mkha' ni// dmigs dang mi dmigs rtsol ba'i nad dang bral// de bzhin sems nyid nam mkha' lta bu yang// rang bzhin gyis ni de ltar 'gyur ba'i phyir// lus sogs sems kyang ye nas de bzhin te// 'di la rtsa ba med phyir gang ltar yang// de la gnas pa med de de ltar na// mi 'gal tsam du gyur pa dgongs pa yin// ngo bo yod min ci yang 'byung ba de// ci yang mi bsam mi bsam bsam mi bya// bag chags ngan pa bsam pa ste// ma bsags rang bzhin bzhag pas bsgrib par bya// bsam du med pa'i chos kyi rang bzhin la// bsam gyi mi khyab chos rnams thams cad kun// de bzhin ma nyams mi 'byed mnyam bzhag na// de don ci la'ang mi rtogs mi dmigs te// m-i rtog ba la don de mi gnas so// bsam du med pa'i chos kyi dbyings nyid la// gnyen pos rdul tsam bcos su ga la yod// de dag thams cad ji ltar 'dod ce na// rang gi rig pa smra bsam las 'das pa// bsam gyis mi khyab dbyings dang dbyer med cing// rig pa bsam yas de bzhin der bzhag pa// don la zhugs pa'i bsam gtan zhes bya'o// bden dang mi bden sems ni mi 'byung ste// yon tan skyon tu mthong ba gang 'gag pa// bden pa'i don las ma nyams dgongs pa'i mchog/byang chub kyi sems bsgom pa'i rgyud las/ sems rtse gcig pa'i don las mi 'da' ba'i sangs rgyas dang byang chub sems dpa'i bsam gtan gyi skabs bzhi pa'o//// de nas rdo rje 'dzin pas/bcom ldan 'das la de bzhin nyid la tshad mas gzhig tu rung ngam mi rung zhe na// bcom ldan 'das kyis bka' stsal pa/ shin tu brtag dka' gting dpag yangs pa 'di// 'khrul pa rtog pa bde ba'i spyod yul min// mi dmigs mi dmigs dmigs su ye nas med// sems nyid byang chub de ni ji lta bu// byang chub sems de sems nyid byang chub yin// sems dang byang chub gdod nas dbyer med pas// ma lus sems can mi lus thams cad dang// dus gsum chos rnams thams cad sems nyid yin// thams cad ma lus bgrangs pa'i chos so cog/ sems dang byang chub dbyer med nyid du 'ub// drang srong blo rtsal rab dang ldan pa yin// ci la 'ang mi dpyad chags thogs med par gnas// de ltar gnas pa nyid na gang la'ang chags med cing// dus dang mtha' med par ni ma nyams gnas// ji ltar snang ba'i chos rnams thams cad la// so so grangs su 'dzin pa rnam rtog yas// mngon sum tshad mas ji ltar rtog mthong yang// ji ltar snang yang dngos po med pa ste// de bzhin yang dag gnyis su kun rtogs na// tshad mas gzhig nas gtan la dbab tu med// gang zhig stong pa'i ngang yod med pa'i rang bzhin te// mtshon phyir tshig tsam gdags su rung mod kyi// tshad mas gzhag pa mo sham bu 'dod 'dra// ri bong rwa ltar tshad mas grub mi srid// chos rnams thams cad ming tsam stong nyid med// thams cad ma lus ye nas stong zer te// phyi nang 'di ltar snang ba thams cad kun// gdod nas gdos pa can gyi chos min te// shes pa 'khrul pa 'ba' zhig kho na yin// gang yang gnyis med mnyam nyid klung chen rtogs gyur na// de nyid don dam yang dag dbyings yin te// gzhan nas btsal zhing gcig tu bzhag tu med// med bzhin yod las btsal nas sgros btags 'gyur// yod bzhin med las btsal na skur btab ste// yod med gnyis las sangs rgyas btsal byas na// sangs rgyas mi rnyed lung du yod ma bstan// bsam 'das brjod las 'das pa'i byang chub sems// cir yang mi dmigs brtag tu mi snang ste// rnam rtog mi mnga' sangs rgyas nyid kyi thugs// de yis mi mkhyen ci yang med pa ste// sangs rgyas dgongs pa lta bu de lta bu// 'khrul pa'i tshig gi snga phyi yod mod kyang// theg mchog 'di la nyams pa med pa'i phyir// tshad mas gzhig tu 'di la ga la yod// don gyis cig car rdzogs par sgom dgos pas// 'gro nyam 'dug sdod mi bsam longs spyod bya// sems kyis chos rnams mnyam pa ma gtogs na// log rtog 'khrul ba'i tshig gis mnyam pas sangs mi rgya// thabs mkhas rnal 'byor don chen rtogs pa yis// le lo bya byed med pa'i brtson 'grus kyis// tshad mas mi gzhig gcig las nyams mi bya// dus mtha' med par gcig po de ltar bsgom// spyod yul sangs rgyas nyid du kun gcig nas// bzod cig des ni byang chub snying po len// byang chub kyi sems bsgom pa'i rgyud las/ rdzogs pa chen po brtag dka' ba'i don la tshad mas gzhig tu med pa'i skabs lnga pa'o//// de nas rdo rje 'dzin pas/ bcom ldan 'das la 'di skad ces gsol to// bcom ldan 'das 'bras bu sangs rgyas thob pa'i rgyu gang lags/ zhes gsol pas/ bcom ldan 'das kyis bka' stsal pa/ nyon mongs chags sdang rnam pa lnga po nyid// rab tu 'bar zhing kun tu g.yo ba nyid// ma rig 'khrul pa'i dbang gis kun spyod pa// rnal 'byor chen po las su rung rnams kyis// mi sdang mi g.yo'i ye shes longs spyod de// mi spong gnas su bzhag pa shes rab ste// byang chub sems ni snying rjes kun la khyab// bdag phyogs gzhan tu mi 'dzin snying rje kun// mi 'bras gzungs su bzung ba bu bzhin brtan// bdud bzhi dpung gi tshogs kyis mi thub cing// bya byed med pa'i klung las nyams par min// 'bras bu sangs rgyas thub pa'i 'grub rgyu lags// shes rab chen pos chos kyi dbyings la sbyor// rtsa ba snying rje chen po stong mi byed// 'du shes 'du byed chags sdang gnas su bcings// sdang pa'i tshe na ye shes dkyil 'khor bsam// gsang sngags rgya mtsho nor bu rin chen 'di// thugs rjes gzung ba'i yul nyid nyon mongs lnga// snying rje btang snyoms ngang gis kun la gsal// yon tan ye shes tshogs ni zhar la 'byung// dpe dang tshad ma gtan tshigs lung nyid dang// rjes su dpog dang shes rab chen po yi// rtogs par nus pa ma yin 'di la ni// dpag gis mi lang gsang sngags bdag nyid che/khams gsum las 'das byang chub rin po che// ston pas btsal yang rnyed par ga la 'gyur// thig le chen po kun tu cub gnas la// ye shes snying po de las gud ces 'byung// byang chub sems ni ye sangs gang rgyas na// chags sdang rnam lnga mi g.yo mi ldang bya// zla gsang thig le skye 'gag bdag tu 'dzin// skyes chen thugs la rtag tu gsal ba'i rgyun// thams cad sangs rgyas med par rdzogs pa'i mchog/'bras bu sangs rgyas 'thob pa'i yon tan pa// ma bcos ma byas ma gsal ma 'gags pa// gsal ba de nyid ye shes chen po'i klong// byang chub chen por 'od gsal rnam par dag/ de bzhin de bzhin gnas su de bzhin bdag/gzhag pa gzhag par de bzhin bzhag par bya// ye shes chen po ngang gis gsal bar 'gyur// rgyal ba'i dgongs pa 'di las la bzlar med// byang chub kyi sems bsgom pa'i rgyud las/'bras bu sangs rgyas lag tu thob pa'i skabs drug pa rdzogs so//// de nas bcom ldan 'das gsang ba'i bdag po phyag na rdo rje gsol ba btab ste/ chos thams cad rnam par dag pa'i don bshad du gsol zhes gsol ba btab nas/de'i don bstan pa/ ston pa ngais pa'i lung dang bla ma rnams kyis man ngag de nyid don 'dir blta// mngon sum la sogs rgyu yi dngos po 'jig cing grub ba'i mtha' dpyod pa// rab tu 'khrul pa rnams kyi don 'di shin tu brjod par dka'// ye shes klong chen 'khyil ba'i mkha' dbyings ni// kun gyi dur khrod rab tu nyam nga nam mkha'i 'jings// ye shes 'di ni yul la rnam par yan cing kun tu ldang yang de nyid yin// de nyid rtogs pa'i rgyun 'brangs spyod yul tshad mar bzhag nas blo yis 'jig byed de// rtog mtha' med phyir dpyod mtha' med de snying po med na tshad mar gang// rang sems rnam par dag pas don gyi gting dang ngang ldan// de med mi rtog de nyid don gyi lung ldan shes rab mtshungs med de// de yang thun mong ma yin 'di la ci yang bya mi dgos te yin// dka' thub dka' bas 'di la sbyang mi dgos te rang sa nyid na gnas// stobs ldan chags pa'i yul la rten 'chang bya mi dgos// lam de stags la brten te sa la sbyangs nas 'bras bu 'thob tu med// yo klung bya med don 'di sku gsung tshig las 'das// ting nge 'dzin dang rnam pa mang po 'di la skyed mi dgos// 'di la ci zhig bsgrub tu yod de gang yang bsgrub tu med// bsngags par byar med kun gyis bsngags su med bas khyad par mchog/skye bo kun gyi sems la mngon snang phyi nang grags pa'i chos 'di ni// 'dzin pa drug gis ji ltar mthong bzhin brtag pa de lta ma yin 'khrul// rang gi rtogs pas myos shing bzung ba de bzhin bden gyur na// snang ba dbang pos brtags pa'i chos 'di thams cad tshad mar 'os// de ltar rang rig rtogs pa kun bzung 'khrul pa 'di ni phyin ci log/ de ltar dngos po med rtog dgra bcom 'dra bar grol bar 'gyur bar rigs// 'phags pa'i rigs kyis rang sems brten par ma mthong ba ni yong mi 'phags// skye mched 'du mched lhag pa'i khyad par kun la 'dzin byed pa// des ni sangs rgyas bskal ba'i lam la zhen par nus pa min// de dag dus dgras 'joms dang sdug bsngal nyon las des 'khrul mngon par 'gyur// gzhan tu skye mched sgo nas rig pa de dag tshad mar gyur na ni// de nyid tshad mar gyur pas 'phags pa'i lam de su la'ang dgos mi 'gyur// lam de rnam grol lam du bstan cing dbang po'i shes pas mi thar te// rang rig snying po tshad mar gang gnas pa 'di tshad ma'ang yin// dmigs pa'i yul ni snying po mchog gi yul te sangs rgyas nyid// thar lam 'dzin pa'i don la rnal du gang 'jog pa de mchog/ ye shes snying po pad+mo pad+mo can te pad ma'i klong// byang chub kyi sems bsgom pa'i rgyud las// gsang ba man gang gi skabs bdun pa'o//// de nas bcom ldan 'das chos thams cad gtan la dbab pa'i ting nge 'dzin la snyoms par zhugs pa la/ rdo rje 'dzin pa chen pos gsol ba btab ste/ de lta bu'i don bshad gsol ba btab pas/bcom ldan 'das kyis de kho na'i don bshad pa/ kun 'byung ting 'dzin rgyal po mchog gi lam chen khyad par 'di// 'phags chen cher 'phags khyad par yod min gnyis las 'phags// bla med bde gshegs mi rtog ye shes chos dbyings sku brnyes pa// chos kyi sku ni nor bu rgyal mtshan rgyal po lam po che// mchog gi mchog nyid kun gyi lam chen khyad par 'phags pa'i lam// kun gyi rang bzhin zhi ba 'di la gsal zhing bla med lam mchog ste// mi ldog pa la sogs te dbang bcu rgyal ba kun dang gcig brnyes pa// kun gyi rang bzhin mchog gi chos nyid de ni kun gyi mchog/ 'gro drug gnas 'gro mchog gi bsod nams mkha' la rgyas pa'i mtha'// gnas gsum mnyam nyid de la mtshan med yid kyis rab tu dad pas mos// shes bya mchog gi yul chen dam pa 'di ni rgyal mchog nyid kyi kun gyi rgya// ston pa 'jig rten sgron mar gyur pa kun gyis rab bsngags pa// chos la chos kyi snying por gyur pas 'jam dpal gzhon nu'i snying po nyid// kun 'byung 'phags lam rgyal ba'i thugs la de bzhin nyid du dmigs pa lam// 'di las gzhan du don gnyer rgyus kyis 'grod de 'gro phugs btsal du med// sangs rgyas kun gyi thugs nyid de bzhin gshegs pa'i thugs te nam mkha'i dbyings de la// gzhi dang rtsa ba med de kha dog dbyibs kyis yong shig mtshon du med// bde gshegs ma lus yum du gyur pas rgyal ba kun gyi lam mchog go/ tshul khrims pha rol phyin sogs lam spyod rgya mtsho'i gzhir gyur pa// snying rje chen po kun gyi rtsa ba yin te 'bras bu grub pa'i thabs// shes rab chen pos yul dang dbang por bltas te mthong nas brtag mi bya// ji ltar brtag mi bya la khyad par brtags nas brtag tu med pas mthong nas de bzhin gnas pa mchog/rnam dag byang chub sems kyi ngang tshul ye nas rnam par dag pa yon tan 'phungs pa'i sku// 'di las mchog gi mchog tu gyur cing bsgom pa'i yul du dmigs par bya ba'i khyad par ni// bsam gyis mi khyab kun gyi yul te sangs rgyas ma lus 'di rtogs pa las byung// de phyir rnal 'byor 'bras bu'i lam 'dod lam la mkhas pa rnams kyis khyad par 'di la brtag/ blo ldan nam zhig sems kyi dmangs de ni mngon du gyur cing rnyed pa na// de la sku gsum mchog tu gyur pa chos kyi sku zhes rgyal bas gsung// blang dang dor med skye dang 'gag med rnal 'byor zhi ba'i mchog/ sangs rgyas kun gzhi nyon mongs yid gnyis gcod pa bral las gzhan na med// med pa'i snying po rdo rje'i sku ste yod pa'i snying po phyogs bral 'di la brtag/ ci zhig bsam zhing gang la brtags te ci la dmigs su yod// gang yang dmigs su med pa de la blo ldan su gnas pa la rgyas sras ldan// de ni kun gyi yul te rgyal ba'i yul yin thob par bya ba'i 'bras// 'di la tshig dang yi ges mtshon par byed pa long bas long ba khrid// rgyal ba bsam du med pa sus kyang mtshon du med// de phyir rgyal ba'i lam 'di btsal ba las ni ci zhig btsal du yod// rig pa mi bsam blo yis mi sbyar shes pas mi spyod de// pha rol phyin pa la sogs spyod pa'i rgya mtsho'i gzhir gyur sdom pa rnams mi rten// sku gsum ting nge 'dzin la rten 'cha' mi bya ci'ang dpyad du med// 'khrul pas btags pa'i lam ni yi ges mtshon pa'i grangs// rgyal ba rnams ni mtshon du med las gzhan du yengs pa med las min las byung// shes byed dam par gyur pas shes rab spyan zhes kyang ni de la bya// rdo rje rtse mo mchog nyid mi rtog ye shes de yang de nyid do// ji snyed 'phags pa'i rnam grol chos su bstan pa de dag thams cad kyang// byang chub sems nyid rdzogs lam de yi yon tan de dag de las byung// byang chub sems bsgom pa'i rgyud las/ rnam par grol ba'i lam bstan pa'i skabs brgyad pa'o//// de nas bcom ldan 'das la/ rdo rje 'dzin pas chos thams cad gcig tu bsdu na ji ltar bsdu/ zhes zhus pa las/ bcom ldan 'das don yod pa'i ting nge 'dzin la snyoms par zhugs nas/ched du brjod pa'i rgyu 'di ched du brjod do// rdzogs so rdzogs so mchog gi snying po 'gro med rnam par dag pa 'di la rdzogs// kun rdzogs nor bu rin po che la sgrib pa rnam gnyis ye nas rdzogs pas rdzogs// de las gzhan zhig rdzogs su 'di la med pas rdzogs chen po// 'phags pa'i rigs chen 'chi med byang chub sems dpa' de dag thams cad kyang// de med mi 'byung de phyir de ni rnam grol mchog gi lam nyid de// rdo rje sems dpa' mchog gi sems dpa' nyid// rnam grol lam chen rigs chen sras kyi ma ste rigs chen skyed pa'i gzhi// rdo rje sems dpa' bsams pas bsam pa'i gzhi dang bral// mtshan med mtshan mar sgoms pas rnam grol lam mi rnyed// de phyir ci yang mi bsam bsam du ye nas med pas sangs rgyas nyid de gang yang bral// bral zhes de ba'ang tshig gi tha snyad med pas ye nas sangs pa yin// de nas gsang pa'i bdag po phyag na rdo rjes/ bcom ldan 'das la bde bar gshegs pa'i thugs ji ltar lags// zhes gsol pas/ bcom ldan 'das kyis bka' stsal pa/ rnam shes de yang 'du byed rgyun la mtshan ma tha dad 'dzin pas na// las kyi khyad par dag gis brgyad du snang ba'i rigs la du ma med// shes shing rig pa'i ris su gcig ste rigs la du ma med// de phyir sems kyi skad cig dang po de la lus dang chos kun gnas// byang chub byang chub ces bya sems las sangs rgyas med// rgyu ma'i 'khrul 'khor rlung gis btab pa bzhin du med de stong// med pa de yang chu'i lbu ba bzhin dngos dang so sor snang// snang ba de yang rdul tsam med de skad cig nyid la gnas// de la bsam pa zhen phy-ir phyin ma ngais 'byung de la snang// kun gyi rang bzhin kun la snang phyir kun gyi mchog/ snang stong ngo bo gang bden de la bsam pa'i gnas kyang med// rang sems rgyun las 'phags pa skye bo'i chos ni gzhan na yod ma yin// rgyud drug rigs las de la'ang sna tshogs de dag rang gi ting 'dzin no// ting 'dzin gsum por brtags pa de yang ye nas 'khrul pas bsam mi bya'o// 'dzin pa sdug bsngal yin zhing skye bzhi rgyu drug rgyu// rigs drug sdug bsngal skye ba'i rgyun ni 'dzin pa'i dbang// 'dzin pa'i dbang gi sdig bsngal skye ste sdug bsngal byang chub yin// mchog tu'ang rgyas pa'i sku ni khyad par de la rab tu snang// sems rgyun de ni phyogs kyang cung zad med pas gcig la rten med de// de la phyogs rnams phyogs su 'dzin pa gang na yod de thob pa med// de phyir phyogs med phyir na mtha' yas zhing rnams bdag gi lus// bdag gi lus ni mtha' yas zhing dang skye bo'i lus su rab snang yang// sems dang bag chags tha dad ma yin gcig min brtag par rab tu dka'// 'di kun 'byung zhing 'di snang kun 'byung 'khrul pa'i tshogs// yul du dbang pos brtags las khyad par snang bas na// yul dang dbang por mi bya de bzhin gyi 'da' kho nar gzhag/ sems dang bag chags mi dbye gcig min tha dad min// don dam kun rdzob gnyis med ye nas dam pa'i don// 'khor ba mya ngan 'das pa gnyis med ye nas mya ngan 'das// gang yang thob med gang la'ang 'jug par bya ba min pas na// gang yang dmigs shing thob par bya ba semasalas gang na yod// sems kyi rang bzhin gang yang blang dor med cing cir yang brtag tu med// des na 'khrul 'khor med cing mya ngan 'das pa med pa nyid du mngon// gnas kyi skad cig nam yang mi 'bral de tshe mnyam 'gyur de med med// sems ni rnam par dag cing gang yang dmigs su rdul yang yod min to// sems las ma gtogs chos ni gud na yod pa gang ma yin// de phyir sems kyi rang bzhin shes na chos kyi rang bzhin shes// des ni sangs rgyas mngon du mthong ste 'phags pa yin// de la sgom par byed pa drang srong blo 'chal pa// byang chub kyi sems bsgom pa'i rgyud la sa/gsang ba'i man ngag mngon du byung ba bstan pa'i skabs dgu pa'o//// de nas bcom ldan 'das la/ gsang ba'i bdag po phyag na rdo rjes gsang sngags thams cad kyi rang bzhin ji ltar lags/zhes zhus pas/ bcom ldan 'das kyis bka' stsal ba/ gsang sngags lha pho rigs sngags lha mo rnams// sems las gzhan min kun za kun la spyod cing bza'// kun sbyar ma dang bu mo sring mo ha la sogs pa kun// sbyor ba byas na skyon gyi gos par yong mi 'gyur// pha bsad rgyal bsad mchog phran kun bsad kyang// gsang sngags kun gyi rang bzhin 'di rnams kun la dpyad par bya// yang dag ma yin rtogs pas skyed phyir bag chags yod pa ma yin dang// 'di yi spyod yul nyid du ma gyur gang yang med pas kun la dpyad// spyod yul med phyir kun gzhi med cing rnam rig de yang med pa yin// phyogs dang ris med bdag bral 'du shes kun spangs pa// ye med rgyal po kun snyoms khyab brdal par dag/ phyogs rnams med phyir dmigs dang rnam shes rig pa rnam par yin// sems ni glog dang spre'u dang rgya mtsho'i nor bu 'dra ste ci'ang yod ma yin// de phyir sems 'di yod med mtha' las 'das shing gcig dang du mar bral// sangs rgyas gdod nas med na dkon mchog gsum med gdags pa gang yang med// bde gshegs byang chub med phyir de'i lta bu 'brul sgyu 'dra 'khrul la snang// gang gis nga la gzugs mthong nga la sgrar shes pa// log par spongs la bzhugs te skye bo de yis nga mi mthong// 'dren pa rnams ni chos kyi sku ste chos nyid sangs rgyas lta// rnam par dag pa'i snying po gdod nas rnam par de bzhin gnas// ci la'ang mi bsam de bzhin nyid la yin par bsam mi bya// sangs rgyas mi sgom lha spangs spyod yul thams cad rnam par spangs// rdo rje mi bcang sngags rdzas ci 'ang dben par 'dug mi bya// mchod gtor sbyin pa'i phyogs ni gang yang mi btang mi bsngo su la'ang mi bsngo'o// cho ga la sogs 'khrul ba'i las rnams gang yang spyad mi bya// rdzogs pa chen po'i rang bzhin kun gyi snying po yin te 'di la ci 'ang med// phag tu 'dugs la bsgom par mi bya rdo rje lta bu'i chos nyid bsgom du med// ye shes rab 'byung rigs dang sku rnams bsam pa byar med sku rnams ga na yod// snying po bgrang zhing bsod nams spel du ga na yod de dag pa'i sems las med// dge rtsa rim gro'i mchog ni rang sems dag pa yin// de bzhin gshegs pa'i ye shes de dag shin tu dge ba'i rgyun nyid dang// rdo rje gnas med phyir na mnyam gnas rang bzhin 'drar 'gyur dang// chos dbyings rdo rje rtse mo de dag phyogs nyid med pas skad cing min// dag pa'i dge rtsa gzugs brnyan med pas 'jig rten ye shes yod mi 'gyur// bsam gtan byar med bsam gtan lung la gnas pa gang yang yin// bsgom par byar med drang srong sgom chen gyis kyang ma bsgoms pa las grub// bcom ldan 'das rnams phugs su ma 'dug dbang po yan par bzhag pas byung// don gyi ngo bo 'di la ci zhig bsam du yod na gang yang bsam du med// de phyir byang chub mtshan nyid med pas gcig pas blang dor med// don 'di'i tshul gyis don dam rnam grangs skye 'gag med dang mnyam nyid dang// gnyis med bsam 'das chos dbyings brjod dang tha snyad bral la sogs// bstan pa de kun tha snyad yin te don dam me cing kun sgrib med// kun gzhi med cing kun la rnam pa med pas kun gyi rang bzhin yin// de phyir mchog gi mchog nyid khyad par mchog tu 'di nyid bsngags// 'di la byang chub med cing sangs rgyas bsgrub tu med par shes pa don 'di go/don 'di go bas khams gsum mnyam nyid snying por shes pa yin// byang chub kyi sems bsgom pa'i rgyud las/ gsang sngags bstan pa'i skabs bcu pa'o//// de nas bcom ldan 'das la/ gsang ba'i bdag po phyag na rdo rje 'di skad ces gsol to// bzang po bzang po zhes bya ba'i don gyi ngo bo bka' stsal du gsol/ zhes gsol ba btab po// de nas bcom ldan 'das kyi bka' stsal pa/yang dag ma yin rtogs pas bskyed phyir bag chags yod ma yin// snying po med pas lung gi don 'di mchog gi lung chen yin// spyod yul med phyir kun gzhi med phyir rnam rig de yang med pa yin// mchog gi lung 'di phyogs rnams med phyir dmigs dang gnas kyang med// de phyir sems 'di yod med mtha' las 'das shing gdags pa'i ming dang bral// rdo rje gnas med phyir na mnyam gnas rang bzhin 'drar gyur na// chos dbyings rdo rje rtse mo de dag phyogs nyid med pas skad cig min// dag pa'i 'jig rten 'di na dag pa'i gzugs brnyan med pas 'jig rten ye shes yod mi 'gyur// kun gzhi med cing kun gzhi'i gzugs brnyan med na byang chub bsgrub pa khyad par mchog tu mkhas// de phyir byang chub ma chub mtshan nyid med par gcig pas blang dor med// don de'i tshul gyis don dam rnam grangs skye dang 'gag pa med dang mnyam nyid dang// gnyis med bsam 'das stong nyid chos dbyings brjod dang tha snyad bral la sogs// bstan pa de kun tha snyad yin te don dam med cing kun sgrib med// de phyir sangs rgyas byang chub rang gi sems nyid rnam par dag pa byang chub nyid// gang nas btsal ba gang du bzhag ste gang la dmigs su yod pa min// don dam tshig gyi lam nyid 'di 'dra zhes pa de nyid kun sgrib yin// the tsom yod med chos ni gang la 'ang spong zhing gnas par mi byed do// zhing dang lam dang sa dang rten dang gnas dang yul rnams brtag mi dgos// mi dgos me dpyad mtshan nyid gang yang rdzogs pa chen po 'di la brtag mi dgos// kun nas nyon mongs pa dang lam la brtag mi dgos dang yon tan stobs kyang rdzogs// ye nas ci'ang mi dpyad gang la'ang dpyad du 'di la ga na sgom du yod de med// bsgom du med pa rgyal ba'i dgongs pa yin te sangs rgyas nyi dang mtshungs// sngon gyi drang srong sangs rgyas rnams ni don 'di bsgoms las rgyas// de phyir bsgom du med pa'i kun gyis nyams su blangs la'ang dpyad// bsgom pa dang ni chos dbyings med phyir som nyi med la dam par lta ba'ang med// de ltar dngos po'i mtha' rnams brtags dang rang bzhin sgyu la'ang med 'gyur phyir// kun gyis brtags nas dngos por grub pa'i mtha' spyod pa ni 'jig/yod las ltos pa'i med pa'ang med de med pa'i med pa'ang med// 'khor ba rnams ni kun tu bzang po'i sku ste mtshan med nam mkha'i klong// gang yang bsgom par bya ba rdzogs pa chen po 'di la med pa ci la'ang sgom du med// mi bsgom mi bsgom gang yang bsgom du rdul tsam med de ci zhig sgom// bsgom par 'dod pa rnams kyis 'di yi don mi rtogs te klung las nyams// drang srong bsgom 'dod pas ni phyi yi yul la dpyad mi bya// bsgom med yul la dmigs par byed pa smig sgyu snyeg pa 'dra// kun 'dus klong chen gyi rang bzhin 'di la nyams su ci zhig rung// 'di las nyams par byed pa chu yi lbu ba bzhin te med// spangs pa'i snying po 'di la ci zhig bsgom na drang srong ga la dmigs// dmigs pa'i yul ni rdul dang ri rab 'dra ste rtogs pa'i rlung chen mtsho// srang dang srang mda' bzhin te drang po'i lam la zhugs par bya'o// drang pos 'phags pa nyid ni yid kyi lam ste sangs rgyas nyid// de nyid gang yin zhe na sems nyid dag pa de nyid kho na yin// de bzhin kun la kun 'byams de bzhin 'byam yang klas// de nyid 'phags pa sangs rgyas byang chub med// rgyal la sogs pa cha 'phra sgrol la sogs// chos kyi sku 'di kun gyi sku ste kun la gang la snang zhing med// byang chub 'dod na sdig pa'i las rnams cher spyod dad dpon blo la bzhag/ci ste srog med srog gcad sdig tu 'gro na ye nas chad pa su la sdig/ gang yang snying rjes mi bzung su yang rje ba gang na yod de med// snying rjes byang chub brlan du mi ster snying rjes su la bzung// gang la 'dzin pa yod pa de la lhag pa'i bsam pa yod kyang rtog/ rtog 'dzin mkhar 'gram gting nas tshugs pa med pa byang chub bde ba'i shul// rgyal ba mi mchod sangs rgyas mi sgrub thar pa'i lam mi 'dod pa de/khab len rdo la lcags 'du'i tshul du tshogs gnyis bsag mi dgos par 'du// de ltar don 'di tshig tu ne tsos mi skad slabs bzhin ma yin te// don 'di su'i blo'i steng du shar bar gyur pa de yi ni/rgya gar skad du/ hri da yo da ya ma hA tan+t+ra rA dza ma hA nA ma/ bod skad du/ srog gi 'byung ba rgyud kyi rgyal po chen po zhes bya ba/ dpal rdo rje sems dpa' la phyag 'tshal lo// 'di skad bdag gis bshad pa'i dus gcig na/ bcom ldan 'das srog gi 'byung ba nam mkha' che la/ sangs rgyas dang byang chub sems dpa' bye ba dgu bcu rtsa dgu dang lhan cig bzhugs so// de nas byang chub sems dpa' chen po kun tu bzang po stan las langs te bla gos phrag pa la gzar te/ bcom ldan 'das la thal mo sbyar zhing bcom ldan 'das la phyag byas nas mchod de 'di skad ces gsol to// bcom ldan 'das srog gi 'byung ba zhes bya ba de kho na nyid chen po mchog tu gsang ba snying po las kyang snying po mchog tu bshad du gsol/ / de nas bcom ldan 'das kyis rdo rje 'chang kun tu bzang po la legs so legs so byin zhing 'di skad gsungs so// kun tu bzang po ji ltar zhus pa bshad pa de nyon cig/'jig rten 'di dag lta ba na// log pa'i nga rgyal dang ldan pa// rtog ge nyan thos sems tsam pa// de bzhin dbu ma pa rnams kyang// rang gi ngo bo brjed 'gyur bas// lam log pa ni brten par byed// de rnams rtogs par bya ba'i phyir// mdor bsdus pa ni de nyid nyon// yod med rtog pa la khyab pa// dngos dang dngos med gnyis la gnas// blang dor dag las tha dad min// sgyu dang sgyu min mnyam pa'i gnas// phyi dang nang gi gzugs sogs dang// mig la sogs pa tha mi dad// khyad par byed pa gnas pa ste// mu tig 'phreng ba srad bu bzhin// de nyid srog chags rnams kyi srog/ gzugs dang gzugs med gnyis kar gnas// go rim gyi ni ji bzhin du// de yi 'byung ba bshad par bya// btags pa dang ni rdzas yod dang// dngos po rnams kyis rtog pa gnyis// rtogs pa yod pa kun btags pa// mkhas pas tshad ma de mi 'dod// 'khrul ba'i ngo bo yin phyir dang// mi gsal phyir na yang dag min// rdzas yod pas ni de log pas// phung po la sogs tshad mar yod// de ltar nyan thos spyod pa can// ye shes spangs pas 'dod pas yin// de rnams rtogs par bya ba'i phyir// srog gi 'byung ba nyan par gyis// don dam pa yi btags pa ni// chos kyi sku yi bdag nyid 'dod// rdzas kyang tha mi dad pa'i phyir// gang tshe de yi ngo yin na// tshad ma dang ni tshad min la// de tshe de dag khyad ci yod// tshad ma'am ni tshad min pa// rang bzhin gyis ni nam mkhas khyab// gzhal bya gzhal bya ma yin pa// srog gi 'byung ba la brten te// blang dang dor ba'i rtog pa ni// ngo bo nyid du yod ma yin// dngos po kun gyi rang bzhin ni// nam mkha' chen po gcig pu nyid// nyon mongs spang bar bya ba'i phyir// lam sgom pa yang don med do// spangs pa'am ni ma spangs pa// nyon mongs shes bya nam mkha' che// 'gog pa'i snyoms par 'jug pa dang// dgra bcom pa nyid thar pa 'dod/ / sems can 'ching bar bya ba'i phyir// nyon mongs pa rnams 'khor ba yin// de ltar gang zhig lta dman pa'i// grub mtha' srid pa'i bcings ster ba// de la de ltar kho na nyid// mdor bsdus pas ni bshad par bya// nyon mongs bcom pa nyid gcig phyir// bcing dang thar pa gcig yin te/ khyab byed sel bya min pa'i phyir// gnyis po de dag mkha' dang mtshungs// nam mkha' nam mkha' dang sbyor ba// thams cad nam mkha' nam mkha' che// sa dang chu dang me dang rlung// phung po lnga dang dbang po drug/ gzugs la sogs pa yul tshogs ni// thams cad nam mkha' bzhin du min// khyab bya dang ni khyab byed blo// nam mkha' yi ni ngo bo nyid// sangs rgyas ma thob pa nyid med// 'gro ba de nyid la ni gnas// sgom pa don med pa nyid de// de ni 'ba' zhig ngal ba yin// de phyir chos rnams mkha' dang mtshungs// nam mkha' yang ni ye shes mchog/ ye shes nam mkha' phan tshun ni// don dam par ni dbyer med pa'o// srog gi 'byung ba zhes bya ba rgyud chen po las/ theg pa dman pa sel ba bstan pa zhes bya ba'i le'u ste dang po'o//// de nas gzhan yang bshad bya ba// nga rgyal pa yi yang dag gzhung// de yi lam dang sel ba dang// gang gis 'jig rten 'grol bar 'gyur// gzungs ba'i cha ni tshad ma yin// gnod par 'gyur bas yod ma yin// 'dzin pa'i cha ni tshad ma yis// grub pa nyid du yod ma yin// rnam shes bskyed pa'i shugs kyis ni// rjes su dpag pas gtan la phab// gzung ba'i cha yang yod ma yin// 'di la 'di ltar rig par ldan// rgyu med pas ni 'bras bu ni// kha cig tu ni mthong ma yin// sa bon med pas myu gu dag/ gang du yang ni srid ma yin// de phyir gzung ba'i cha bzhin du// 'dzin pa'i cha yang yod ma yin// phyed yod pa dang phyed med ces// rig par smra ba ma yin no// gzung ba'i cha ni med gyur na// don dam pa ste yod ma yin// de nyid kyi phyir nga rgyal pas// 'dod pa'i smra ba'i rig ldan min// gzung ba dang ni 'dzin pa'i cha// yod gcig dang ni med gcig ste// srog gi 'byung ba gcig shes pas// de dag la ni khyab par gnas// ji ltar pad+ma ra ga sogs// gzugs dang kha dog tha dad pas// de kun la ni nor bu nyid// khyab pa nyid du gnas pa ste// rten cing 'byung ba'i chos bstan pas// de bzhin dngos po thams cad la// srog 'byung ba ni gcig pu nyid// nam mkha' bzhin du khyab par gnas// ji ltar chu dang chu bran kun// rgya mtsho la ni zhugs 'gyur ba// de bzhin 'khor ba mya ngan 'das// nam mkha' che la rab tu gnas// 'ching ba dang ni grol ba ste// don dam par ni su zhig yod// skye bo 'jig pa 'khor ba dang// thar pa 'ba' zhig nam mkha' yin// gzung ba'i cha dang 'dzin pa'i cha// yang na phyed cha gang yin pa// de nyid shin tu zab pa yi// nam mkha'i bdag nyid gzhan du min// med pa gang zhig la rigs te// yang na yod pa gang la rigs// ngo bo gcig pa'i nam mkha' la// dbye ba gnyis ni ngo tsha yin// rang rig nyid kyi 'dzin pa'i cha// gal te tshad ma nyid yin na// rang rig ma yin tshad ma yin// khyod la gang la nges pa yod// shes pa de'am gzhan ma de// de ltar rtog pa nyid la ni// des na 'dir ni 'gal 'gyur te// ral gri sos ni rang gcod bzhin// gal te gzhan gyi de yi tshe// rang rig la ni gnod thal 'gyur// de yang gzhan gyis de bzhin gyis// de ltar mthar thug med thal 'gyur// skyon gnyis thal bar 'gyur ba'i phyir// 'dzin pa'i cha ni rig ldan min// gzung cha phyed yod phyed med ltar// 'di 'dra byis pa'i smra ba yin// rig pa min pa'i grub pa'i mtha'// smra ba po rnams 'di ltar gnas// de phyir gzung ba yod med dam// 'dzin pa yang ni yod med gcig/ 'ba' zhig ye shes bdag nyid che// phyogs 'di la ni rnam par rol// bsam gyis mi khyab ye shes che// de nyid gcig la yid zhugs pa// mkhas pas gang zhig bkag pa 'am// gang zhig nges par bzhag par byed// de phyir log pa'i lta ba 'di// gal te lta ba bzang 'dod na// brdzun dang rdzun min nga rgyal 'di// thams cad nam mkha' dang mtshungs pa'o// srog gi 'byung ba zhes bya ba rgyud chen po las/ bse ru'i theg pa sel ba zhes bya ba'i le'u ste gnyis pa'o//// de nas yang dag bshad bya ba// sems tsam la gnas bdag nyid kyi// grub mtha' sel ba gang gis ni// yang dag de nyid gsal bar 'gyur// phyi rol don ni yod ma yin// ji ltar byis pa rnams kyi brtags/bag chags kyis ni dkrugs pa'i sems// don ltar snang ba rab tu 'jug/ phyi rol gzhan gyi don byed min// bya ba de ni sems nyid de// don ni thun mong yin phyir dang// blo ni de las bzlog phyir ro// rab tu byung ba 'dod rnams kyis// bud med kyi ni ro gcig la// ro dang rol ma bza' ba zhes// rnam par rtog pa gsum 'byung ngo// gang dang gang snang de dang de// rang rig tsam ni bshad pa yin// snang ba tha mi dad pa'i phyir// don min de ni rnam shes min// gang zhig rnam pa snang ba ste// de de rnam shes snang ba ste// blo ni shel sgong dang 'dra ba// gcig kyang du ma nyid du gyur// de phyir de nyid rnam grol dang// de nyid rnam par rig tsam nyid// yang dag mtha' yang de nyid dang// de nyid de bzhin de stong nyid// chos kun nang du chud pa'i phyir// ring du ma yin gang du min// de nyid dka' ba rtogs pa'i phyir// de yi ngo bo spyod pa yin// phra bar lta ba'i sangs rgyas kyis// de ni phra phyir rang rig yin// bdag dang 'dra ba'i blo rags pas// rang gnas kyang ni mthong mi 'gyur// de ltar rnam shes sna tshogs pa// smra ba po gang blo chen po// rang gi grub mtha' rab smra ba// de la de nyid bshad par bya// 'di ni thams cad sems tsam zhes// nyan thos pa la phan pa'i phyir// drang ba'i don du bstan yin gyi// nges pa'i don ni ma yin no// sems ni snga dang phyir gyur pa'i// rang rig skad cig ma'i bdag nyid// mi gnas gnas pa'i sbyor ba yis// de dang 'dra ba'i rang ngo med// snga ma skad cig 'jig pa dang// ma phrad pas ni phyi ma med// da ltar byung ba mi gnas pas// sems tsam yod pa ma yin no// thun mong thun mong nyid dag gis// sems ni yang dag gnas pas ni// thun mong ma yin pa nyid ces// byis pa rnams kyis log par btags// rtogs pa'i bdag nyid ngo bo ni// sems kyi thun mong gi bdag nyid// khyad par dang ni dbyer med pas// thun mong nyid du rnam par gnas// snang ba 'am ni mi snang ba// de ni blo nyid 'ba' zhig ste// don dang don min ngo bo yis// nam mkha' nyid du 'ga' zhing snang// ka ba khang dang bum sogs pa// ji ltar nam mkha' 'ba' zhig khyab// de bzhin chos rnams thams cad la// chos kyi sku ni khyab par gnas// phyi rol dngos po yod min dang// sems ni dngos po snang ba ste// de ltar chung ba ye shes ni// de nyid rig pas rig smra min// khyab byed rgya chen dag pa dang// thog pa med cing bstan du med// thams cad bdag nyid ye shes ni// nam mkha' chen po shes par bya/ de phyir de dag phyogs gcig pa// sems tsam rab tu smra ba ste// nam mkha'i spyod yul sems nyid che// de dag snying rje'i gnas yin no// srog gi 'byung ba zhes bya ba'i rgyud chen po las/rnal 'byor spyod pa'i gzhung sel zhes bya ba'i le'u ste gsum pa'o//// de nas gzhan yang bshad bya ba/ byang chub sems dpa' lam gyi rim// ji ltar rang gzhung de spangs nas// nam mkha' che la zhugs par bya// dngos po kun ni rang bzhin med// gcig dang du ma bral ba'i phyir/ gzugs brnyan dang mtshungs de dag kyang// de nyid gzhan nyid rnam spangs ba// khyab par byed pa mi dmigs pas// dngos po brtags pa bdag nyid kyi// yang dag ngo bo yod ma yin// de med pas kyang de rnams med// snang ba'am ni mi snang ba// ji ltar klong ni yod ma yin// snang ba'am ni mi snang ba// de bzhin du ni dngos po med// ji ltar smig sgyu sos dus su// ri dwags kyis ni chu 'dzin pa// sems kyi yul la snang ba yang// de la dngos po yod ma yin// phung po 'di dag snying po med// rtog pa las ni yang dag byung// gang gis stong pa zhes btags pas// rtog pa de yang stong pa nyid// nang ni snying por lta ba dang// phyi rol yang ni stong par lta// gang gis stong pa nyid sgom pa// de yang kha cig yod ma yin// bsam med bsam gtan bsam bya dang// spong ba dang ni bden pa mthong// 'di dag rtog pa tsam nyid de// gang gi zhes pa de grol 'gyur// gzugs ni lbu ba lta bur bshad// tshor ba chu bur lta bu ste// 'du shes smig sgyu lta bu ste// 'du byed chu shing dang mtshungs te// rnam par shes pa sgyu ma bzhin// khams rnams mig yor lta bu ste// dbang po rnams dang yul rnams ni// dri za'i grong khyer dang 'dra ba// de ltar gang dag dbu ma pa// smras pa de ni mchog ma yin// chad pa'i phyogs kyi skyon gyis ni// byis pa'i blo gros de dag nyid// snang ba sgyu ma'i rang bzhin yin// de tshe rtag pa'i phyogs su 'gyur// mtha' gnyis thal bar 'gyur ba'i phyir// yang dag ye shes de ma yin// mtha' yas mtshungs med khyab byed pa// rtag pa chad pa rnam spangs pa// rnam par mi rtog 'gyur ba med// srog 'byung chen po de nyid yin// ji ltar srog chags 'tsho 'gyur ba// 'gro dang 'ong ba bdag nyid can// las la rab tu sbyar ba ste// de bzhin de nyid shin tu bstan// stong pa bco brgyad ye shes ni// nyes pa gang gis nges byas pa// nges pa'i nyes pa yod pa'i phyir// de ni ji ltar stong par bshad// nges pa'i rtogs pas stong par na// bem pos ji ltar gzhag par byed// rtag tu rang gi grub pa'i mtha'// med phyir nges pa yod ma yin// grub pa'i mtha' ni khas blangs na// phyogs ni rab tu thal bar 'gyur// de phyir stong pa nyid smra ba// tshig tsam la ni mkhas pa yin// e ma skyes bu nga rgyal can// de nyid kyi phyir mi gnas pas// sgrub pa dang ni sun 'byin pas// ci 'dod don ni gzhag par byed// de nyid sman pa de rnams ni// yang dag lam ni mi shes la// snying rje chen po rigs yin te// min na dmyal bar 'gro bar 'gyur// srog 'byung ba yi lam spangs nas// thams cad khyab pa nam mkha' che// 'khor ba nas ni skye ba rnams// 'dod pa yi ni thabs gzhan med// srog gi 'byung ba zhes bya ba rgyud chen po las/ byang chub sems dpa'i las sel ba zhes bya ba'i le'u ste bzhi pa'o//// de nas gzhan yang bshad bya ba// lha yi sku ni bsgom pa rnams// sel ba gang gi de kho na// byis pas yang dag shes par 'gyur// phung po lnga ni mdor bsdus pas// sangs rgyas lngar ni rab tu grags// rdo rje skye mched nyid dag ni// byang chub sems dpa'i dkyil 'khor mchog/ sa ni sangs rgyas spyan bshad dang// chu yi khams ni mA ma ki// me ni gos dkar mo yin te// rlung ni sgrol mar rab tu grags// nam mkha'i khams ni bcom ldan 'das// khyab bdag rdo rje 'chang chen yin// de ltar lha yi rnam pa ni// khams gsum pa rnams thams cad yin// de ni rig pa ldan min te// drang ba'i don du bdag gis bstan// sangs rgyas dgongs pa la sogs pa// dgongs pa min par gsungs pa min// gal te sna tshogs thams cad ni// lha yi sku ni 'dzin pa na// de tshe byis pa'i skye bo la// ji ltar mngon shes 'byung mi 'gyur// mi 'jigs pa dang dbang rnams dang// thun mong min pa'i sangs rgyas kyi// yon tan mtshan dang dpe byad sogs// ji ltar 'di la ma mthong ste// ma mthong ba la lha ste min// kun mkhyen ye shes 'bral phyir dang// nyon mongs kun tu 'byung phyir dang// sbyin sogs pha rol ma thob dang// 'jig rten pa la rten phyir dang// sman dang sems can don med phyir// 'gro ba lha yi rang bzhin min// dang po nyon mongs sbyangs byas nas// gal te phyi nas bsgom pa yis// 'gro ba lha yi sku thob na// de yang rigs pa ldan pa yin// lha yi sku ni rang bzhin nam// gal te rang bzhin ma yin pa// rang bzhin yin na nyon mongs pa// sbyong ba yin zhes mi rigs te// lha yi sku dang nyon mongs pa'i// phyogs dag 'gal ba yin pa'i phyir// gcig 'byung bas na gnyis pa ni// gnas pa yin par ma mthong ngo// gal te lha sku ngo min na// de tshe de nyid thob pa'i phyir// nyon mongs chen po sbyangs na yang// sus kyang de nyid thob mi 'gyur// sa las mar khu ba'i rwa las// 'o ma dang ni me las chu// rang bzhin med pa mi rnyed pa// de bzhin du ni lha de yin// zhal gsum phyag drug zhi ba ni// ji ltar sku de mthong mi 'gyur// de phyir lha yi sku bsgoms pa// de ni rtog pa can yin no// de nyid kyi phyir bdag gi bu// rtog pa'i rnal 'byor bstan pa yin// bces ba'i lam la brten nas su// dngos po'i rang bzhin ji lta bu// sa rnams thob par gyur pas kyang// de nyid yin te ma rtogs so// rtogs pa dang ni rdzogs pa ste// rnal 'byor rnam pa gnyis su bstan// de la sogs pa mi bya yis// nam mkha' la ni rtsol ba bya// chos sku gnyis med khyab byed pa// rnal 'byor thams cad bdag nyid bshad// rtog dang mi rtog rnams la ni// de nyid bdag po mchog yin no// rnal 'byor thams cad bcom ldan 'das// rdo rje sems dpa' de bzhin gshegs// khams gsum pa 'di ma lus pa// de yi longs spyod kun yin no// srog gi 'byung ba zhes bya ba rgyud chen po las/ rtog pa'i rnal 'byor sel ba zhes bya ba ste le'u lnga pa'o//// de nas gzhan yang bshad bya ba// rdzogs pa'i rim pa sel ba de// gang gis phyogs gcig spangs nas ni// nam mkha' che la de bzhin gzhag/ srog dang rtsol ba me mnyam dang// gyen du 'gro ba khyab byed nyid// rlung ni lnga po de dag nyid// lus ma rtag tu rgyu ba yin// rgyu ba la sogs de bzhin lnga// nye ba'i rlung ni gang yin pa// de rnams de nyid yongs shes pas// gsung rdo rje nyid thob par 'gyur// nyungs kar 'dra ba de nyid ni// thig le sngags sogs mtshan nyid de// dgra rnams che ba'i dus su ni// de yi ngo bo rtogs par 'gyur// 'od gsal ba ni rtag pa'i gnas// ma ning go 'phang la gnas pa// 'jug dang mdangs dang gnas pa dang// dgral bas de na thob par 'gyur// de ltar rlung gi de kho na// blo dman pas ni smra bar byed// de rnams la ni mdor bsdus pas// sel ba mchog ni bshad par bya// rlung ni bems po ji ltar de// khyod kyi de nyid rtsol bar byas// gang gis de nyid pha rol phyin// mgar ba yi ni sbud pa la// rlung gi de nyid cir mi 'gyur// de bems yin na 'di yang bems// de nyid brtags pa ci dgos so// 'jug zlogs dgag pa de nyid na// de ni dka' las bdag nyid che// mgul la srad bu btags nas ni// ci phyir skad cig 'ching mi 'gyur// dus gsum ngal ba chen po las// skad cig ngal ba bsngags pa yin// bdag nyid ngal ba'i sbyor ba yis// kha cig de nyid thob mi 'gyur// rang bzhin rnams ni 'gog pa yis// thams cad stong par thob 'dod na// ros kyang thams cad stong pa'i phyir// byang chub thob par thal bar 'gyur// gal te sgyu ma'i de nyid na// mig 'phrul mkhan yang thal bar 'gyur// 'od gsal de nyid ma yin te// de ni 'chad pa'i ngo bo'i phyir// zung 'jug rim pa gnyis po ni// yod dam yang na med pa de// yod na gnyis su snang bar 'gyur ba dang// med na chad pa'i phyogs thal 'gyur// rtsa yi 'dab ma'i dbye ba yis// 'khor lo bzhi po bsgom pa ni// yod pa'i rang bzhin dngos po la// sga ba dag ni mi rigs so// gtum mo spar ba'i snyam pa can// mi rnams kyis ni bsgom par rigs// rang bzhin grub pa'i chos la ni// su zhig gis ni bsgom par byed// sa la sogs pa 'byung ba che// sra ba la sogs chos rnams ni// sgom pa med kyang 'grub pa ste// rdzogs pa yang ni de bzhin yin// bcos ma gnyis kyi ngo bo ni// rmongs pa rnams kyi bsgom bya yin// ma bcos gnyis med de long na// de ni nam yang khom mi 'gyur// mig 'dzum pa dang ngag bsdams pa// rkang pa dang ni bcings pa dang// dben par gnas dang longs spyod spangs// bsam gtan gyi ni bza' ba ste// de rnams bcos ma dang 'dra ba// de kho na yi sgyu ma yin// rtag tu khyab byed nam mkha' che// chos kyi sku ni snyog pa med// dngos po kun gyi rang dag nyid// rnal 'byor dam pas shes par bya// sus kyang ma thob pa ni med// gang phyir de ni kun gyis thob// yongs su shes na 'gro ba rnams// sangs rgyas yin pas the tsom med// srog gi 'byung ba zhes bya ba'i rgyud chen po las/ rdzogs pa'i rim pa sel ba zhes bya ba ste le'u drug pa'o//// gtsang dang mi gtsang gtan la phab// des ni yang dag bshad bya ste// gang gi thams cad nam mkha' che// thob par 'gyur te the tsom med// 'o ma 'bras chan rgun 'brum sogs// gtsang ma yin pas skye bos bza'// bdud rtsi lnga ni mi gtsang bas// blo dman pas ni smod pa yin// de la tshad ma gnyis snang nas// gang gis mi gtsang bzhag pa yin// tshad ma gang gis gtsang ba ste// dang po rab tu spyad par bya// re zhig tshad ma dang po yis// bdud rtsi mi gtsang mi brtags te// rnam par mi rtog ngo phyir dang// 'khrul pa med phyir mi 'byung phyir// gang gis mi gtsang mi brtags pa/ de ni tshad ma ma yin te// 'khrul pa yin phyir rtog bcas phyir// phyi yi rnam pa yin phyir ro// phyi yi rnam pa blo rnams ni// gal te mtshan ma nyid btags na// rmi lam la sogs snang ba yi// blo rnams kyang ni de 'dra 'gyur// gal te tshad ma gnyis pa yis// de ni mi gtsang bzhag pas na// rtags med mi 'byung pa yi phyir// 'di la rtags ni yod ma yin// kha dog ser po dri nga ba// mi gtsang ba yi rtags yin na// gser dang sgog pa la sogs pa// mi gtsang ba nyid thal bar 'gyur// lto ba'i drod kyis yongs smin pas// kha dog ser po mi gtsang na// ba yis lto ba'i drod min pa// 'o ma yang ni mi gtsang 'gyur// de phyir tshad ma gnyis kyi ni// gang zhig rang bzhin ma grub pa// de ni mi gtsang ba 'am// srid pa bcing bas ji ltar btags// 'byung ba chen po las byung kun// mi gtsang pa ni ji ltar bshad// ji ltar gtsang ba bshad pa ste/ theg pa chen po ma mthong phyir// dag byed bsam pa dam pa dang// mi 'gyur skye ba dang bral ba// dag dang 'ching ba'i gnod pa yis// mi gnod pa dang skyon med pa// 'du 'dzi med cing gdab thabs med// khyab bdag bdag chen kun la khyab// longs spyod 'gro ba 'bras bu yi// lus can kun gyis rten gyur pa// rtog dang rtog med las 'das pa// cha shas med cing cha shas can// 'gyur ba med cing snang ba med// dngos dang dngos med snang ba bcas// khyab byed nam mkha' dang 'dra ba// ye shes nyid la dpyad par bya// rang bzhin spyod yul bsam mi khyab// yang na rnam par spyod mi bya// sems kyi ngo bo bsam mi khyab// de ltar tshig gi byas pa rnams// sems ni rtog par byed pa yis// sems kyi sems nyid ma yin no// bong ba skyar ba gyis 'dzin te// skyar ba po la ma yin pa// de bzhin du ni sems shes kyis// sems kyi sems nyid ma yin no// sems dang sems min sems ngo bo// shes dang shes bya'i ngo bo nyid// bsgom bya ma yin thob bya min// zab pa sangs rgyas kyis gsungs pa'o// rgya mtsho shin tu gting med dang// nam mkha' bzhin du mtha' dang bral// tshim byed yid bzhin nor bu bzhin// mar me bzhin du mun sel ba// sems dpa' chen po gang zhes pa// bde 'gro la ni the tshom med// mi shes shes pa'i dbye ba yis// srid dang mya ngan 'das gnas pa// de ni srog gi 'byung ba zhes bya ba rgyud chen po las/ gtsang dang mi gtsang sel ba zhes bya ba'i le'u ste bdun pa'o//// de nas byang chub sems dpa' sems dpa' chen po kun tu bzang pos dga' bas spyan phye zhing ched du brjod pa 'di ni ched du brjod do// e ma ho sangs rgyas tshul re bzang// e ma hau de yon tan dri ma med// e ma hau kun nas nyon mongs dang// rnam sbyongs ldan kyang mtshungs pa'o// mgon po khyed la gsol ba btab// rang gi grub mtha' ji ltar lags// de yi sgom pa ji ltar dang// de yi spyod pa ji ltar dang// de ltar bdag nyid the tshom ni// mgon po khyed kyis sel bar mdzod// khyab bdag rdo rje 'chang chen po// de nas bdag pos bka' stsal pa// mdor na rang bzhin grub pa'i mtha'// skal chen bu khyod mnyan par gyis// khams kyi dbye bas rang bzhin ni// sems can snod dang tha dad pas// gnas pa de ni sel min dang// mkhas pas kyang ni bsgrub mi bya// bye ba phyed dang bzhi yi tshad// rtsa yi 'khor lo lus can gyis// de ni bsgom par mi bya ste// rang bzhin grub phyir me drod bzhin// kun nas nyon mongs rnam par byang// rang bzhin gyis ni tha mi dad// thabs dang blo ni grub mtha' min// las las log pa grub mtha' 'ong// rang rig pa yi ngo bo la// sgom pa nyid ni mi rigs te// dngos min la yang bsgoms pa med// gnyis ka'i cha dang ldan pa la// snga ma bzhin du sba ba min// grub mtha' rang bzhin gyis grub na// gang zhig gang gis ji ltar bsgom// mthong bar de nyid med pas ni// bsgom pas de ni thob mi 'gyur// thob par de nyid yod pas na// de tshe sgom pa don med 'gyur// sgom pa dri ma spong ba'i phyir// gal te by-is pas byed pas ni// nam mkha' dri ma nyid yin pas// de tshe gang gis gang zhig spong// spong ba 'am ni mi spong ba// don dam par ni yod ma yin// gang zhig ma dor rgyu yi phyir// sgom pa shes par bsgom par bya// mig 'dzum pa dang mig mi 'dzum// longs spyod nyid dang bde dus su// gtan du de nyid gang gnas pa// de ni ji ltar chung bar bya// khams gsum ma lus khyab byed pa// bstan du la sogs rnams spangs pa// khyab byed nam mkha' gang gi ni// bum pa tsam ji ltar la gzhag par byed// rgya mtsho'i chu yi phung po ni// pha rol tshu rol ma mthong ba// 'thor 'thung blangs nas chu rgyun dang// su zhig gis ni gzhal bar byed// ri rab sum cu rtsa drug gi/ rdul phran rab ni ji snyed pa// sor rtse rdul phran rab tsam gyis// su zhig gis ni mtshungs par byed// rnam pa med cing snang ba med// gnyis gnyis med cing mchog zhi ba// de ni yod min med min te// tshig gi spyod yul ma yin no// grub mtha' 'di ni mchog yin te// rtog pas 'di ni mchog yin te// rtog pas 'di ni ma rtog pa// bla ma'i zhal nas thob bya yis// glegs bam mthong bas ma yin no// de'i phyir rdo rje bla ma las// yang dag man ngag brten par bya// mngon sum rdo rje 'chang 'dra ba'i// de nas grub mtha' thob par 'gyur// srog gi 'byung ba zhes bya brgyud chen po las/ rang gi grub pa'i mtha' gtan la phab pa zhes bya ste le'u brgyad pa'o//// de yi des ni ji lta bu// bcom ldan bdag gis nyan par 'tshal// gang zhig shes pa tsam gyis ni// rnal 'byor pa ni mkha' 'drar gyur// khyab bdag rdo rje 'chang chen po// de nas gtso bos bka' stsal pa// bdag gis dpe ni bstan pas na// mnyam par gzhag pas bu khyod nyon// ji ltar bkrus pa'i bum pa la// chu yi srang brgya gtsugs byas nas// gzhan yang de yi nang du ni// lan tshwa'i srang brgya bcug par bya// lan tshwa zhu bar gyur pa dang// chu de srang gis dgang bar bya// chu srang brgya las lhag par ni// rdul phra rab tsam 'byung mi 'gyur// ji ltar thabs las byung ba ni// lcags kyi gong bu shin tu 'bar// de la chu ni ma thebs kyang// tsha ba de nyid du ni thim// bum pa rdza mkhan gyis byas nas// de las so ni ma gtang ba// chus ni gang bar byas na ni// mtshan mo chu de thim par 'gyur// sos ka'i nyi ma'i phyed dus ni// shin tu gdungs pa'i sa gzhi la// dbyar gyi sprin las byung ba yi// char de de nyid du ni thim// dgun dus ji ltar chu yi khams// gsher ba yi ni ngo bo nyid// grang ba sra pa nyid 'gyur te/ gzhan yang de nyid du ni thim// phan ni logs yul brtags pa yi// dbyibs dang kha dog tha dad pa// mes bsregs pa yi ras rnams kyi// thal pa yi ni dbye ba ni// ras bal phung po bsregs nas ni// ji ltar sems ni bsregs byas nas// thal ba'i dbye ba zhes bya ba// cung zad kyang ni mi dmigs so// seng ldeng sha ba 'o can gyi// tsher ma gcig tu byas nas ni// thal ba'i dbye ba mi rnyed do// shin tu bkrus pa'i ras rnams ni// rgya skyegs kyis ni btso bar bya// blangs te srang gis bkar ba na// snga ma las ni lhag mi 'gyur// til gyi phungs po blangs nas ni// 'khor lo yis ni btsir bar bya// 'ba' cha sbyang zhing til mar gyi// tshad ni til dang mtshungs pa yin// chu bum nang du gzugs snang ba// nyi ma 'jig rten pas mthong ste// bum pa chag kyang nyi ma ni// 'jig par 'gyur ba mi dmigs so// de ltar bsod nams srog bdag gis// gang zhig bstan chos la gsum chos// chos sku nam mkha' chen po la// de dag thams cad thim par 'gyur// srog gi 'byung ba zhes bya ba rgyud chen po las/ dpe bstan pa zhes bya ba'i le'u ste dgu pa'o//// de nas gzhan yang bshad bya ba// lta ba gnyis med mchog yin te// gang zhig shes pa tsam gyis ni// rnal 'byor pa rnams mchog ster 'gyur// rang sde pa dang gzhan sde pa'i// dbye bas lta ba rnam gnyis 'dod// rang sde nyan thos bse ru dang// rnal 'byor spyod dang dbu ma dang// bya ba spyod dang rnal 'byor rgyud// rnal 'byor che dang rnal 'byor ma'o// de la dang po rdzas yod lta// gang zag med pa'i rtogs byed yin// gnyis pa 'dzin pa'i cha nyid de// gzung ba'i cha phyedalas byung ba// rnal 'byor spyod pa'i lta ba gang// de ni rnam pa gnyis su grags// rnam pa dang bcas rnam med pa// de rnams kyi de stong pa nyid// bden pa dag la lta ba ni// rgyal ba'i sras kyi rtags su 'dod// gzhan don byed pa'i rtsol ba can// phyogs rnams la ni kun brten pa'o// sngags dang phyag rgya brtson byed pas// bya ba spyod pa la sogs lta// rgyud dang rgyud las bdag gi bu// rnam pa du ma bstan pa yis// de dag rang gi sde pa bstan// gzhan gyi sde pa rnam pa drug/ grags chen mchod 'od rig pa can// bye brag pa dang spyod spyod pa'ang// zhi ba la ste lta bltas rnams// de yi dbye ba bshad par bya// de kho na ni nyi shu bzhi// grangs can pa yi lta bar gnas// mchod 'os lta ba rnam gsum ste// dus gsum du ni bye bas so// rig pa can gyi de kho na// bcu drug yin te gzhan du min// bye brag pa ni rnam pa dgu// lta ba'i de nyid nges par bshad// spyod pa yi ni rnam gnyis te// zhi dang sna tshogs dbye bas so// zhi ba'i lta ba ni/ sum cu rtsa drug rab tu grags// de dag pha rol sde pa yi// mdor bsdus pas ni lta bar bshad// lta ba gnyis po 'di dag ni// dbye nas mtha' yas mkha' rang bzhin// chos kyi sku yi ngo bo nyid// de nyid gcig pus yang dag khyab// de phyir smod pa mi bya dang// kha cig la yang bstod mi bya// dge dang mi dge thams cad ni// nam mkha' chen po gcig pus khyab// srog gi 'byung ba zhes bya ba'i rgyud chen po las/ lta ba gnyis pa bstan pa zhes bya ba'i le'u ste bcu pa'o//// de nas gzhan yang bshad bya ba// brtul zhugs kyi ni mtshan nyid mchog/ gang zhig spyod pa tsam gyis ni// de nyid mchog ni thob par 'gyur// ral can gcer bu mgo reg dang// gtsug phud can dang 'du 'dzi bral// chos gos can dang tshem bu pa// gang gis gos ni skya bo thogs// sbyangs pa'i yon tan bcu gnyis ni// nyan thos rgyal bas gang gsungs pa// shing gi rang bzhin don gsum sogs// kha dog dkar po la sogs gang// de kun bcos ma yin pa ste// mkhas pas yongs su spang bar bya// nyon mongs byed pa de rnams kyis// rnam 'byor yon tan cung zad med// 'ba' zhig khur bu khur phyir dang// ngal ba'i phyir te brtul zhugs yin// lus dub pas ni yid sdug bsngal// de las byang chub rnyed par dka'// gal te kha T+wAM ga la sogs// thogs pas zhi ba thob 'gyur na// de tshe bum tshogs gyo mog rnams// rmongs pas ci phyir thogs mi byed// log pa'i brtul zhugs nga rgyal gyis// lus ngag bas ni gnod 'gyur na// ma rtogs pas 'joms 'khrul pa can// de dag snying rje'i gnas yin no// brtul zhugs zhes bya dngos po rnams// blang dor rnam par spang bya ste// 'dod pa'i yon tan lnga yi tshogs// ji snyed pas ni bstan pa'o// shes rab dang ni yang na thabs// stong pa nyid dam snying rje ste// nam mkha' khyab par gang shes pa// de ni brtul zhugs ldan pa yin// spongs ba 'am ni mi spong ba// rnam par dag gam rnam ma dag/ nam mkha' khyab par gang shes pa// de ni brtul zhugs ldan pa'i mchog/ mi 'am phyugs sam rta 'am ni// ri dwags sam ni bram ze 'am// gdol pa smyug ma mkhan la sogs// de dag thams cad mkha' dang mtshungs// chos kyi sku la gnas pa'i phyir// gang zhig mnyam dang mi mnyam zhes// de ni brtul zhugs can zhes bshad// de la thams ca phyag byed pa'o/ khyab bya dang ni khyab byed dag/ phan tshun du ni tha mi dad// rnal 'byor pa che gang zhig shes// de na kun mthong kun shes pa// nam mkha' thams cad spyod pa gang/de ni brtul zhugs mchog ces bshad// de phyir 'khor ba mya ngan 'das// bcing dang thar pa zad mi zad// chos sku gcig pus kun khyab pa// shes nas phyi rol brtul zhugs spangs// srog 'byung ba ni nam mkha' che// blang dor dag gi rnam spangs pa// kun mkhyen phun sum tshogs ldan pa/ de nyid brtul zhugs la gnas bya// srog gi 'byung ba zhes bya ba'i rgyud chen po las/ brtul zhugs spyod pa zhes bya ba'i le'u ste bcu gcig pa'o//// de nas gzhan yang bshad bya ba// lta ba thams cad ngo bo nyid// chos kyi sku ni nam mkha' che// gang gi dngos grub snod du 'gyur// khyab byed pas ni chos kyi sku// nam mkha' chen po zhes grags so// chos nyid rig pa tha mi dad// dngos po kun la yang dag gnas// de ni thams cad 'di khyab pa// til mar gyis ni til sogs bzhin// brjod du med cing bstan du med// tshig gi lam las spyod yul 'das// nye bar brtags pa'i dbang gis ni// de ni brjod kyang brjod bya min// de nyid kyi phyir khyab pa che// de ni rdo rje 'chang chen 'dod// thams cad du ni snang bas na// de ni rnam par snang mdzad bshad// sangs rgyas rang bzhin 'byung ba'i phyir// der ni rin chen 'byung ldan yin// mtha' yas snang ba ldan pa bas// de ni 'dod chags med par bshad// sems can thams cad don mdzad phyir// de ni don mchog yin par bshad// lus dang tha mi dad pa'i phyir// mthong bas de ni spyan yin no// 'gro ba dang ni dbyer med pas// mA ma kIr ni bstan pa yin// lta ngan dri ma dag pas na// gos dkar mo yang de nyid bshad// 'khor ba'i rgya mtsho las grol bas// nam mkha' che ste grol ba yin// blang dor snying rjes 'joms pas ni// de ni gshin rje mthar byed bshad// tha dad blo ngan rnams 'joms pas// de ni shes rab mthar byed yin// tha mal dngos pos ma gos pas// de ni pad+ma mthar byed yin// nyan thos la sogs lta ba'i bgegs// 'joms pas bgegs ni mthar byed do// kun tu kun nas thams cad ni// kun gzigs dpal dang kun spyod pa// gang phyir chos sku de phyir ni// de ni rdo rje 'chang chen yin// de ltar blo ni rnam spyad na// de nyid du ni gnas par rig/ gzhan du 'khrul pa'i sems kyis ni// 'khor ba la ni ngal ba yin// srog gi 'byung ba zhes bya ba'i rgyud chen po las// lha thams cad kyi ngo bo bstan pa zhes bya ba'i le'u ste bcu gnyis pa'o//// de nas kun tu bzang po stan las langs te bla gos phrag pa gcig tu byas nas/bcom ldan 'das la mchod cing phyag 'tshal nas/ thal mo sbyar nas 'di skad gsol to// bcom ldan the tsom gcig cig ni// bdag gi sems la yang dag gnas// sku drin gyi ni thugs bskyed nas// de ni bdag la sol bar 'dod// dbang po rno ba'i sems can la// sgom pa yod dam med pa de// dbang po bar ma'i sems can dang// de bzhin dbang po dman pa la'o// bcom ldan kun mkhyen bka' stsal pa// rim pa ji bzhin bu khyod nyon// ji ltar cung zad mi sgom pa// ji ltar khyod la bdag gis bshad// sgom pa pos ni bsgom bya bsgoms// bsgom bya med pas sgom byed min// de phyir yang dag bsgom pa yang// don dam par yang grub ma yin// nam mkha' la yang sgom pa med// rang bzhin gyis ni grub phyir ro// bems po rnams la sgom pa med// de med pa ste grub phyir ro// sems la sgom pa yod min te// rang rig pa la de don med// yul rnams sgom par bya ba yin// de dag thog mar grub phyir ro// thog mar grub pa nam mkha' ni// chos kyi sku ni skyon med pas// yod med rtog pa las 'das pa// sgom pa khrel yod chen po yin// phung po khams sogs bcos ma ni// dbyer med pa ni gang zhig gnas// de nyid la ni sgom pa yis// cung zad kyang ni dgos pa med// ma bcos gnyis med ye shes ni// nam mkha' chen po rtag tu bstan// rga shi la sogs gnod pa ni// gang zhig la ni yod ma yin// shel sgong bzhin du dge ba ni// gang zhig la ni dag pa yod// rnal 'byor pa de gang sgom pa// de ni rmongs pa chen po yin// rgyu dang 'bras bu ngo bo dang// ngo bo nyid du gang yin pa// srid par ngo bo rnams gnas pa// de ni mkha' dang mtshungs pa'o// de phyir bdag gis ci sgom ste// thog ma mthong ba cung zad med// sems can kun gyi nam mkha' che// thog ma nyid du thog ma yin// phrag pa'i steng du bu gnas pa// blon po phal gyis ma mthong bas// grong khyer la ni bskor ba'am// de yis skye ba thob 'gyur ba// de bzhin kun khyab de la sogs// thog mar 'gro ba yang dag thob// bsgom pa'i grong khyer bskor ba yis// gdung ba yang dag thob par 'gyur// de phyir dbang po rno sogs la// sgom pa rnam par sel ba yin// de nyid nges pa gang yin pa// sgom pa de ni bstan pa'o// srog gi 'byung ba zhes bya ba'i rgyud chen po las/ dbang po rno ba la sogs pa'i sgom pa sel ba zhes bya ba'i le'u ste bcu gsum pa'o//// de nas gzhan yang bshad bya ba// dbang bskur ba yi cho ga'i rim// spros pa dang bral gang gis ni// dngos grub lag pa'i dkyil gnas 'gyur// dang po yang dag bla ma yi// mtshan nyid khyod la bstan par bya// de nas yang dag lam la gnas// slob ma yi ni mtshan nyid bshad// brtan cing dul ba dang ldan pa// bzod ldan drang po g.yo sgyu med// thos pa mang ba chos 'dzin pa// gtong ba po dang ser sna med// blang dor dag las rnam grol ba// dngos po kun la chags pa med// srog gi 'byung ba nam mkha' che// rtag tu dad pa dang ldan ba'o// slob ma yang ni dad ldan mkhas// bla ma'i bka' ni rjes bsrung ba// lan gcig gzhal bya ston na yang// dran pa dang ni yang dag ldan// gtong sogs yon tan phun sum tshogs// srog 'byung ba la rtag tu dga'// de ltar yon tan khyad par ldan// slob masa'adi 'dra'i bla ma la// mchod pa bkur sti sngon 'gro bas// nam mkha' thob phyir gsol gdab bya// blang dor dag las rnam grol ba// yod dang med dang gnyis ka khyab// srog gi 'byung ba nam mkha' che// slob dpon chen po bdag la stsol// gsol ba gdab pa la mkhas pa'i// de ltar slob ma'i tshig gsan nas// snying rje yi ni sems bskyed cing// de nas bla mas dbang bskur sbyin// khams gsum pa ni thams cad ni// bum pa chen po yin par bshad// de yi rang bzhin yongs shes pas// lta ngan de dag tha mi dad// mgon po khyed la gsol ba gdab// srog gi 'byung ba nam mkha' che// gang zag gang la sbyin pa dang// ji ltar bur ni nan tan bya// bcom ldan 'das kyis bka' stsal pa// slob ma gang la sbyin pa dang// ji ltar nan tan bya ba ste// kun tu bzang po blo gros mchog/ khyod la bstan pas nyan par gyis// dul ba dad pa shes rab can// bstan bcos mang po mthar phyin pa// rnam par rtog pa'i lam bral ba// lhan cig skyes pa'i shes rab ldan// skye ba bdun pa bden par smra// gzhan gzhung mi dga' smra ba po// dkon mchog gsum la dad pa can// rin chen gang zag ces bya ba// srog gi 'byung ba nam mkha' che// de la mtshungs med sbyin par bya// de nas des na rang don phun sum tshogs// gzhan don phun sum tshogs rung 'gyur// ma dad pa dang rmongs pa dang// nga rgyal bag chags bdag nyid can// thos pa chung dang 'jigs pa dang// rtog pa du ma'i rang bzhin can// tsan dan la sogs gang zag la// blo dang ldan pas sbyin mi bya// nor la chags sam bag med dam// rmongs pa 'am ni nga rgyal bas// gal te de rnams la byin na// bla ma dmyal bar 'gro ba yin// gang la sbyin pa de rnams kyang// 'og tu kha bltas ngan song 'gro// de phyir 'bad pa thams cad kyis// yongs su brtags te sbyin par bya// rgyud kyi rgyal po blo bzang bas// gang zhig rang gi yongs brtags te// yang dag slob ma la sbyin bya// de ni rdo rje 'chang 'dra 'gyur// slob mas kyang ni skal ba dang// bde dang grags pa thob par 'gyur// tshe 'dir rtag tu bde ba dang// tshe phyi mar yang grol thob 'gyur// kun tu bzang po blo gros mchog/ srog gi 'byung ba nam mkha' che// rgyud kyi rgyal po nam mkha' che// rgyud kyi rgyal po blangs nas ni// 'gro ba kun la skor bar gyis// kun tu bzang pos de ltar gyis// bcom ldan 'das la zhes gsol pas// chos kyi rnam grangs blangs nas ni// de nas mi smra bar gyur to// de ltar bcom ldan 'das kyis bka' stsal pa dang/sangs rgyas dang byang chub sems dpa' bye ba dgu bcu yi rangs nas/ bcom ldan 'das kyis gsungs pa ste/ srog gi 'byung ba zhes bya ba'i rgyud kyi rgyal po las/ chos kyi sbyin pa dang chos mi sbyin pa brtags pa'i le'u ste bco lnga pa'o//// srog gi 'byung ba zhes bya ba'i rgyud kyi rgyal po chen po rdzogs so//// rgya gar gyi mkhan po gzhon nu bum pa'i zhabs kyis bsgyur ba'o//// bcom ldan 'das mya ngan med pa'i dpal la phyag 'tshal lo/ rgya gar skad du/ rat+na ma hA b+ha wi tan tra nA ma/ bod skad du/ rin po che snang byed kyi rgyud ces bya ba/ bcom ldan 'das gsang bdag che la phyag 'tshal lo// thog ma tha ma med pa kun gyi gzhi// ming dang 'gyu ba med pa'i snying po 'di// rang bzhin lhun gyis grub pa'i chos kyi sku// gsang ba'i gzhal yas chos dbyings pho brang nas// ye sangs rgyas pa'i gsang bdag chen po la// 'khor gsum nang nas sems dpa' rdo rje des// rgyud dang gleng gzhi phun sum tshogs pa dang// sangs rgyas sems can khyad par ji lta bu// zhes gsol pa dang/ye sangs rgyas pa'i gsang bdag chen po yis// 'khor gyi nang nas sems dpa' rdo rje la// bshad pa'i tshig med byin gyis brlabs kyis bshad// rgyud kyi rang bzhin dngos po lnga yis bstan/ / rgyud kyi nges tshig 'brel dang ma tshang med// phun sum tshogs pa'i don ni nges pa'i tshig/ sgra dang yi ge glegs bam dbye ba'i don// gleng gzhi'i don la rnam pa gsum gyis bstan// sngon byung gleng gzhi phun sum tshogs pa lnga// de yi rjes 'jug phun sum tshogs lnga dang// de yi gdung 'tsho phun sum tshogs lnga'o// sngon byung gleng gzhi phun sum tshogs lnga ni// chos sku gsung du med pa'i bstan pa dang// longs sku rang gi ngo bo'i bstan pa dang// sprul sku gsung du brjod pa'i bstan pa'o// med dang ngo bo brjod pa'i bstan pa'o// chos sku skye ba med pa'i ston pa dang// longs sku ye shes mthu yi ston pa dang// sprul sku byin gyis brlabs kyis ston pa'o// longs sku sems dpa' rang rgyud 'brel ba'i 'khor// phyi nang gsang ba chos sku'i 'khor rnams so// sa bcu rigs lnga'i yab yum don gyis gcig pa yi 'khor// phyi nang gsang ba longs spyod rdzogs pa'i 'khor// rigs drug sde brgyad 'dod pa bsdus pa'i 'khor// phyi nang gsang ba sprul pa'i 'khor// chos dbyings rnam par dag pa chos sku'i gnas// khyad par gyur pa'i longs spyod rdzogs pa'i gnas// khang bzang sprul pa sku yi gnas// rnam dag khyad par khang bzang ston pa'i gnas// chos sku byin gyis brlabs kyis bshad pa'i dus// longs sku rang gi ngo bos bshad pa'i dus// sprul sku tshig tu sdebs te bshad pa'i dus// byin rlabs rang ngo tshig sdebs ston pa'i dus// ston pa gsum gyis rjes 'jug rnam gsum ni// phyi nang gsang ba gsum gyi theg pa rnams// rjes 'jug rnam pa gsum gyis ston pa'i don// thugs kyi don nyid ston pa'i sems dpa' dang// sku yi don nyid ston pa he ru ka// gsung gi don nyid ston pa'i kun dga' bo// sku dang gsung thugs rjes 'jug ston pa'o// rab dga' snying po sems dpa' rdo rje'i 'khor// zhi khro rnam gnyis he ru ka yi 'khor// dge slong dge tshul ku dga' bo yi 'khor// rab dga' zhi khro dge slong rjes 'jug 'khor// 'od gsal chos nyid sems dpa' rdo rje'i gnas// e gru gsum pa he ru ka yi gnas/ 'dzam gling phugs pa kun dga' bo yi gnas// 'od gsal e dang 'dzam gling rjes 'jug gnas// sems dpa' rdo rjes rig pas brgyud pa'i dus// he ru ka yi ting 'dzin bskyed pa'i dus// kun dga' bo ni tshig tu sdud pa'i dus// rig pa ting 'dzin tshig ni rjes 'jug dus// gdung 'tsho ma 'ongs dus na 'byung bar 'gyur// ston pa mya ngan 'das 'og tu// yang sprul thugs kyi bstan pa 'byung// skal ldan man ngag bcud 'dzin pa// de yi dus su 'byung 'gyur nga yis bstan// ces gsungs nas// zhal 'dzum pa dang bcas nas bzhugs so// de'i tshe 'khor gyi nang nas sems dpa' rdo rje stan las langs nas 'di skad ces gsol to// rgyud dang phun sum tshogs pa'i don ni ji lta bu// sangs rgyas sems can gzhi ni ji lta bu// de yi khyad par bye brag gang las byung ba lags// zhes gsol pa dang// ye sangs rgyas pa'i gsang bdag chen po yis// tha dad med pa'i sems dpa' rdo rje la// bye brag gzhi med yan lag gnyis su gsungs// thog ma tha ma med pa'i bar do na// ma phye ma phyed snying po mnyam pa nyid// shes med rang gnas rtogs pa med pa'i don// don las shes med shes pa'i rnam pa gcig/ 'gyu mi 'gyu las bag tsam gcig tu 'gyu// 'gyu ba'i 'od las zer gyi tshul du shar// shar pa'i zer la rig pa'i 'char sgo skyes// rlung gis rkyen byas 'char sgo gnyis su byas// shar ba'i shes pa rlung gi rang bzhin 'gyu// ye shes rlung dang ma rig rlung du 'gyu// ye shes rlung 'gyu yid rtog skye ma nus// rig pa zer la thim pas gcod ma nus// zer gyi shes pa ma la bu thim pas// ma bu ngo phrad bar dor ye sangs rgyas// rang bzhin rtog med ye shes rang sar gnas// 'gyu ba'i rlung med rtog pa rang sar grol// snying po'i rang bzhin mnyam pa'i klong nas shar// mnyam pa'i rang bzhin ma shes ma rig rlung// rlung gis rkyen byas rig pa sa ma zin// rig pas ma zin pas yid rtog skye// yin man min nam ming gi rnam pa skyes// ming la brtags pas sems su 'dod pa skyes// btsal ba'i rnam pa gcig tu nyams su myong// gsal ba'i mtshan nyid rnam pa lnga ru shar// gsal ba nyid las gzhan du rgya ma chad// mi g.yo mi 'gyur ma 'gags snang tshul lnga// ldog thabs ma shes yid la 'dod zhen skyes// de rnams stobs kyi 'od gzugs kha mig can// de yi rkyen gyis nyon mongs drug tu skyes// rigs drug sems can 'khrul pa'i 'bras bur snang// zhes gsungs so// rin po che snang byed kyi rgyud las// gleng gzhi dang 'khrul snang gi le'u ste dang po'o//// de nas sems dpa' rdo rje des// gsang bdag chen po la gsol pa// dngos po ji ltar gnas pa'i gnas lugs dang// sangs rgyas sems can gnyis kyi bye brag dang// dpe dang brda yi sgo nas don mtshon ji lta bu// ston pa gsang bdag chen po'i rang bzhin des// 'khor gyi nang nas sems dpa' rdo rje la// gnas lugs bye brag brda dang dpe bstan pa// dar btab bang mdzod rin po che gnas lugs// spu gri so dang shel rgyus nyi zer rtsal// tsan dan gla rtsi sgog pa ni shugs so// spre'u dang chu gnyer rlung ni 'gyu lugs so// thag pa tho yor smig sgyu ni gzhi'o// sbrul dang chu dang mi ni 'khrul pa'o// nyi ma dang mig dang gser ni don no// sprin dang ling tog mun pa ni sgrib g.yogs so// nam langs mtshon bya'i 'khor lo dang// dug la sngags btab ldog thabs so// dbul mo'i gter dang gyad nor dag ni// rang la yod pas ngo ma shes pa'o// 'o ma zla tshub til 'bru mtshon pa'o// nam mkha' shel sgron nyi ma ni// phug sa nam mkha' la blta'o// tshod sprin la zung/ grang dro nyi zla la shes/ zhes gsungs so// rin po che snang byed las/ dpes mtshon pa'i le'u ste gnyis pa'o//// de nas sdud pa sems dpa' rdo rje des// ston pa gsang bdag chen po la// 'khrul pa logs nas gnas lugs don// rtogs pa'i thabs la khyad par yod dam med// ston pa gsang bdag chen po des// sdud pa'i sems dpa' rdo rje la// rtogs pa thabs kyi don bstan pa// rnam shes yul du ma gyur snying po nyid// 'dod pa zhe 'dod bral ba lta ba'i don// phyogs dang ris med klong chen po// rig pa skye shi med pas rang sa zin// yid kyi ming dang bral bas mtshon las 'das// sems kyi 'dod zhen med pa bde ba'i chog/ snang ba'i yul du ma gyur dmigs dang bral// snying po mngon du gsal bar bstan du med// smra brjod tshig las 'das pa'i rin po che// zad med gter la spyod pa'i mdzod po che// snang dang mi snang gnyis su 'dod pa med// rang byung snying po kun gyi gzhi ma yin// gzhi yi rang bzhin yod med mnyam pa'i ngang// mnyam pa'i ngang las kun 'byung mdzod po che// zad med 'dod dgur 'byung ba'i rin po che// rtsal dang yan lag ma 'gags 'char ba'i gzhi// sus kyang ma byas ngang ngam shugs las 'byung// 'gyu mi 'gyu las yid gsum rim par 'gyu// yid gsum nyon mongs 'khrul pa'i gzhi// zhen med gsal ba 'gyu ba med pa'i don// don gyi ngo bo ma rtogs sgribs pas sgrib// ldog pa'i thabs kyis mi gsal mun pas sangs// ldog thabs ma shes rang la yod ma rtogs// thos bsam gsum gyis don mtshon rtogs pa'o// ma bcos rnam dag snying po'i rang bzhin nyid// rang bzhin rtogs par 'dod cing yid 'gyu brtag/ log ma log gis nges shes rang la skye// rang bzhin snying po rang gsal snang ba 'di// rtag chad mtha' las 'das pas yod med grol// yid kyi 'gyu med blo yis byas pa med// rang bzhin rmad byung 'khrul rtog med pa'i don// rig pa ma skyes 'gyur med lhun gyis grub// dngos po mtshan ma dag gi spyod yul min// snying po'i rang bzhin skye ba med pa la// skye ba rig pa rtsal du snang ba yin// chos rnams kun gyi gzhi dang rtsa ba byas// 'khrul rtog mtha' las grol ba'i snying po'i don// mtshan ma'i yul las 'das pas dmigs su med/ 'khrul rtog rnam dag rang bzhin don dang ldan// rtogs ldan ye shes mnyam pa'i klong na 'phyo// zab la gting dpag dka' ba'i don nyid ni// nyon mongs rang bzhin grol ba'i bde ba che// zhe 'dod kun dang bral ba lta ba'i mchog/ yid kyi 'gyu ba chad nas sgom pa'i don// ma bcos 'bad pa bral ba spyod pa'i rgyan// ji bzhin don shar nyams kyi don mchog ldan// snying po'i klaung nas ye shes chos skur shar// zhes gsungs so// rin po che snang byed las// khyad par bstan pa'i le'u ste gsum pa'o//// sdud pa'i sems dpa' rdo rje yis// ston pa gsang bdag chen po la// theg pa rim par byed pa de// gang la dgongs nas phye ba lags// ston pa gsang bdag chen po des// sdud pa sems dpa' rdo rje la// snying po'i rang bzhin ming med mnyam pa la// yan lag mi 'dra rim par phye// mu stegs rang rgyal nyan thos dang// sems tsam dbu ma gnyis kyi don// kri ya u pa yo ga dang// ma hA a nu a ti yo ga rnams// yan lag mi 'dra dbang po rnam par phye// dug gsum 'dul phyir theg pa gsum du phye// dug gsum cha las nyon mongs brgyad khri stong// de 'dul chos sgo brgyad khri bzhi stong ngo// rgyu lam 'bras bu gsum las theg pa gsum// 'dul bya gang la gang 'dul don du bstan// ces gsungs so// rin po che snang byed las/ theg pa'i dbye ba bstan pa'i le'u ste bzhi pa'o//// sdud pa sems dpa' rdo rje des// ston pa gsang bdag chen po la// mu stegs lta ba'i rim pa ji ltar lags// ston pa gsang bdag chen po des// sdud pa'i sems dpa' rdo rje la// mu stegs bye brag rnam pa bzhi// rtag chad thun mong rig byed gtsang ma bzhi// rtag par lta ba'i lta lugs ni// snying po'i rang bzhin ming med mnyam pa la// ma rtogs yan lag snang tshul rtag par 'dod// rgyu med 'bras bu yod pa rtag par 'dod// thams cad phye ba'i rtag pa chen por 'dod// rtag par 'dod pa'i kha dog dbyibs kyi tshad// kha dog tshad ni dkar 'tsher snum la 'dril// tshad ni mthe bong sran ma nyung 'bru tsam// che chung tshad ni lus dang sbyar nas yod// chad par lta ba'i 'dod lugs ni// snying po'i rang bzhin ma rtogs chad lta ni// snang tshul ma lags rig par snang ba de// rig pa glo bur snang ba yin par 'dod// phyi ma rig pa skye shi med par 'dod// dge sdig 'bras bu tshe 'di nyid 'ong ngo// bde skyid nad nyung tshe ring 'byung ba 'bras bur 'dod// dge ba byas pa'i 'bras bu de rang yin// mi dge sdug bsngal nad mang tshe thung cing// sdig pa byas pa'i rnam smin 'bras bu yang// tshe 'dir rang las 'ong bas phyi ma min// lus ngag yid gsum sgo nas dge sdig spyod// tshe 'dir rang la smin nas 'ong bas na// mi dge spang zhing dge ba spyad par bya// dge sdig gnyis kyi 'bras bu so so yang// phyi mar mi 'dod 'bras bu da ltar 'dod// thun mong mu stegs lta ba'i 'dod pa yang// ming med mnyam pa'i ngo bo ma shes pas// yan lag snang tshul rig pa'i bye brag las// rig pa g.yo ba rlung gis g.yos pa yin// rlung gi bcud byas rtsa ni snod du chags// rlung g.yos bde ba'i me 'bar ma g.yos bde// bde ba 'dod pas rlung bkag bde ba bsgom// rig byed gtsang ma'i lta ba ni// snying po rang bzhin ma shes ma gtogs pas// snang tshul rtsal gyi rig pa bsal ba la// shes pa'i dngas ma gcig ni yod par 'dod// don nam rang bzhin shes pa 'gyur ba med// kha dog dbyibs dang mtha' las 'das// rkyen gyis mi shigs tshig gis shes pa dka'// rig pas brtags na shes pa sla// rtag chad mtha' las bral ba'i dngas ma gcig/ de ni don dam rang bzhin lta ba yin// zhes gsungs so// rin po che snang byed las// mu stegs lta ba bstan pa'i le'u ste lnga pa'o//// sdud pa sesam dpa' rdo rje des// ston pa gsang bdag chen po la// nyan thos rang rgyal 'dod lugs ji ltar lags// ston pa gsang bdag chen po des// sdud pa sems dpa' rdo rje la// nyan thos bye brag lta ba rnam pa gnyis// nyan thos bye brag pa dang mdo sde pa// bye brag pa yi 'dod lugs ni// snying po'i rang bzhin mnyam pa nyid las su// yan lag rig pa phra ba'i shes pa la// phyi yi yul dang rang sems so sor mthong// mthong ba'i dbang gis g.yag rnga ni'u gsing snang// nyan thos mdo sde pa yi lta ba ni// rdul phran mi snang gong bu gcig tu snang// 'dod pa'i bdag med cho gas drug yul 'gegs 'dod// rang rgyal theg pa'i lta ba'i 'dod pa ni// phyi yi yul yang 'byung ba rten 'brel rim par snang// bdag med rnam par rig byed 'dod// ces gsungs so// rin po che snang byed las/ nyan thos rang rgyal lta ba bstan pa'i le'u ste drug pa'o//// sdud pa sems dpa' rdo rje des// ston pa gsang bdag chen po la// sems tsam dbu ma'i 'dod pa ji ltar lags// ston pa gsang bdag chen po des// sdud pa'i sems dpa' rdo rje la// sems tsam 'dod lugs lta ba bstan pa ni// rnam bden rnam med lta ba gnyis su 'dod// rnam par bden par 'dod pa'i lta ba ni// rang rig rgyun gyis rtag la skad cig cha mi rtag/ rnam pa'i snang ba sems su bden par 'dod// mtha' bzhi bral ba gzung 'dzin gnyis stong pa// rang rig gsal ba'i ngo bo gcig tu 'dod// rnam pa med pa'i lta ba'i 'dod lugs ni// phyi rol sems kyi rnam pa med pa ru// rang rig bden pa'i shes pa'i ngo bo la// de nyid gzhan du brjod du med pa'i don// gsal byed gzhan la ltos pa su yang med// dbu ma'i lta ba'i 'dod lugs ni// sgyu mar 'dod dang rnal 'byor spyod pa'o// sgyu ma lta bur lta ba'i 'dod lugs ni// snang sems thams cad sgyu ma tsam du 'dod// phyi yi dngos po 'di dag thams cad kyang// yang dag par na rang bzhin grub pa med// yod dang med dang dbus ma yin// kun rdzob chu yi zla ba tsam du yod pa'o// rnal 'byor spyod pa'i lta ba'i 'dod lugs ni// chos rnams thams cad stong pa nyid du 'dod// yod dang med dang ci yang 'dod pa med// ces gsungs so// rin po che snang byed las/ dbu ma'i lta ba bstan pa'i le'u ste bdun pa'o//// sdud pa'i sems dpa' rdo rje yis// ston pa gsang bdag chen po la// bya ba'i rgyud dang gnyis kyi rnal 'byor gyi// lta ba'i 'dod lugs ji ltar 'dod pa lags// ston pa gsang bdag chen po des// sdud pa'i sems dpa' rdo rje la// kri ya'i lta ba'i 'dod pa bstan pa ni// yan lag snang tshul rig pa'i shes pa la// kun rdzob 'di ltar snang ba thams cad kun// rigs gsum lha yi dkyil 'khor snang bar 'dod// don dam dag pa rnam gsum yin par lta// phyi dag gtsang sbra dus tshod bzang// nang dag zas dang bsnyung ba bshal btang dang// rdzas dag yo byad skyon gyis ma gos pa'o// u pa ya yi lta ba'i 'dod lugs bstan pa ni// yan lag rig pa'i snang tshul las// kun rdzob rig bzhi lha'i dkyil 'khor 'dod// rnam shes bzhi las rigs bzhi'i lha ru 'dod// de nas rang bzhin skye 'gag med par 'dod// yo ga'i lta ba'i 'dod lugs bstan pa ni// snying po zer gyi rang bzhin ma rtogs pas// yan lag zer gyi snang tshul rig pa la// kun rdzob rigs lnga lha yi dkyil 'khor 'dod// rnam shes lnga las rigs lnga'i lha ru 'dod// don dam rang bzhin skye 'gag med pa'o// zhes gsungs so// rin po che snang byed las/ kri ya u pa yo ga rnams kyi lta ba bstan pa'i le'u ste brgyad pa'o//// sdud pa sems dpa' rdo rje des// ston pa gsang bdag chen po la// ma hA a nu'i lta ba'i 'dod pa ji ltar lags// ston pa gsang bdag chen po des// sdud pa sems dpa' rdo rje la// ma hA yo ga'i lta ba'i 'dod lugs ni// snying po'i snang tshul rang bzhin ma shes pas// yan lag zer gyi rig pa'i snang tshul la// phyi dang nang dang snod bcud snang ba la// thabs dang shes rab gnyis su 'dod pa ste// phyi dang snod ni thabs kyi rang bzhin 'dod// nang dang bcud ni shes rab rang bzhin 'dod// thabs kyi rang bzhin skyed pa'i rim tshul// shes rab rang bzhin rdzogs pa'i rim par 'dod// thabs dang shes rab gnyis su snang ba yang// snang stong gnyis med zung 'jug lta ba'o// a nu yo ga'i lta ba'i 'dod lugs ni// snying po'i snang tshul rang bzhin ma shes pas// yan lag zer gyi rig pa'i snang tshul la// phyi mi yul ni chos dbyings gzhal yas khang// nang gi bcud ni lha yi rang bzhin yin// gzhal yas khang dang lha yi rang bzhin de gnyis la// dbyings dang ye shes gnyis med blta bar 'dod// ces gsungs so// rin po che snang byed las/ ma hA a nu'i lta ba bstan pa'i le'u ste dgu pa'o//// sdud pa dpa' sems dpa' rdo rje yis// ston pa gsang bdag chen po la// theg pa'i lta ba'i rang bzhin de ltar yin pa la// ma rtogs 'khrul pa'i 'khrul gzhi ji ltar lags// ston pa gsang bdag chen po des// sdud pa sems dpa' rdo rje la// theg pa rnams kyi 'khrul gzhi 'khrul pa ni// snying po yan lag gnyis kyi rang bzhin la// yan lag rig pa'i snang tshul la// 'khrul pa'i gzhi ru 'dod pa ni// yan lag rtag pa mu stegs gzhi// rtag pa'i rang bzhin 'khrul pa'i gzhi dang ni// rkyen dang gzhan phrad gnyis kyi bar nas 'khrul// mu stegs chad pa 'khrul pa ni// 'byung ba rnam lnga gcig tu 'dus pa la// rig pa glo bur byung ba 'khrul pa'i gzhi// lus kyi snang ba phyung ba 'khrul par 'dod// nyan thos 'khrul gzhi'i 'dod lugs ni// snying po yan lag gnyis su gnas pa la// yan lag rig pa'i skye lugs la// rig pa'i phra ba'i yid ni 'khrul pa'i gzhi// bdag rtog rnam gnyis 'dod pa 'khrul pa yin// rnam par rig par 'dod pa 'khrul pa'i gzhi// ma rig rten 'brel bcu gnyis 'khrul ba'o// sems tsam 'khrul gzhi'i 'khrul pa ni// snying po yan lag gnyis su snang ba la// yan lag rig pa'i snang tshul gsal// rang rig rang gsal 'khrul pa'i gzhi ru 'dod// gzung 'dzin gnyis su snang ba 'khrul par 'dod// dbu ma'i 'khrul gzhi 'khrul pa'i 'dod lugs ni// snying po'i yan lag gnas pa la// yan lag rig pa'i shes pa la// gzhig nas stong par 'dod pa 'khrul pa'i gzhi// kun rdzob rnam gnyis 'khrul pa'o// kri yi 'khrul gzhi 'khrul bar 'dod pa ni// snying po yan lag gnyis su snang ba la// snying po'i rang bzhin ma rtogs yan lag ni// rig pa skye 'gag med pa 'khrul pa'i gzhi// gzung ba'i yul min yul 'dzin 'khrul ba'o// u pa ya yi 'khrul gzhi 'khrul ba'i 'dod lugs ni// snying po'i yan lag dag tu gnas pa la// snying po'i rang bzhin ma rtogs yan lag la// rig pa gzung ba med pa 'khrul pa'i gzhi// 'dzin pa'i sems su 'dzin pa 'khrul pa yin// yo ga'i 'khrul gzhi 'khrul pa'i 'dod lugs ni// snying po yan lag dag tu gnas pa la// snying po'i rang bzhin ma rtogs yan lag la// rig pa skye 'gag gnyis med 'khrul pa'i gzhi// rig pa gnyis su snang ba 'khrul pa'o// ma hA yo ga'i 'khrul gzhi 'khrul pa ni// snying po'i yan lag dag tu gnas pa la// snying po'i rang bzhin ma rtogs yan lag la// snang stong gnyis su med pa 'khrul ba'i gzhi// snang sems gnyis su snang ba 'khrul pa'o// a nu yo ga'i 'khrul gzhi'i 'khrul lugs ni// snying po'i yan lag dag tu gnas pa la// snying po'i rang bzhin ma rtogs yan lag la// yan lag snod bcud gnyis med 'khrul pa'i gzhi// snod bcud tha dad snang ba 'khrul pa'o// zhes gsungs so// rin po che snang byed las/ theg pa'i 'khrul gzhi'i 'khrul pa bstan pa'i le'u bcu pa'o/// sdud pa sems dpa' rdo rje yis// ston pa gsang bdag chen po la// theg pa'i 'khrul bar gzung zhing 'khrul snang ba'i// 'khrul pa ldog pa'i thabs ni ji lta bu// ston pa gsang bdag chen po des// sdud pa'i sems dpa' rdo rje la// 'khrul pa ldog thabs 'bras bu 'byung lugs ni// mu stegs 'khrul pa'i ldog thabs ni// dka' thub spyod pas 'khrul pa ldog pa'i thabs// ldog pa'i 'bras bu skye mched mu bzhi'o// nyan thos 'khrul pa ldog thabs 'bras bu ni// bden bzhi'i sgor 'jug nyis brgya lnga bcu srung// bdag med rtogs dang tshogs drug bkag nas bsgom// bsam gtan dang po'i 'phags pa dgra bcom sa// rang rgyal 'khrul pa ldog thabs 'bras bu ni// rten 'brel sgor zhugs lugs 'thun mi mthun bzlog/ chos kyi khams la phyogs gcig bdag med rtogs// bsrung ba'i tshul khrims nyan thos pa dang mthun// tshogs drug yul 'gegs 'gog pa'i snyoms 'jug bsgom// 'bras bu bsam gtan dang po'i sa yang thob// sems tsam 'khrul pa'i ldog thabs 'bras bu ni// bden gnyis sgor zhugs bdag med rnam gnyis rtogs// bsrung ba'i tshul khrims nyi shu srung// 'bras bu don yod grub pa'i sar yang skye// dbu ma'i 'khrul pa ldog thabs 'bras bu ni// bden gnyis sgor 'jug bdag med rnam gnyis rtogs// bsrung ba'i tshul khrims sdom pa nyi shu srung// tshad med bzhi dang stong pa'i rang bzhin sgom// 'bras bu mi che lha gnas skye bar 'dod// kri ya'i 'khrul pa ldog thabs 'bras bu ni// 'jug sgo dag pa gsum gyi sgo nas 'jug/ bsrung ba'i dam tshig rtsa ba yan lag gnyis// rtsa ba lnga dang yan lag bdun// dkon mchog gsum dang byang chub sems// sngags dang phyag rgya rdo rje slob dpon dang// rdo rje dril bu srog phyir mi spang ba'o// khri la mi nyal sha chang bza' btung min// sgog btsong la phug mi bza' spang bar bya// dus bzhi dag tu khrus kyang rgyun mi gcad// lha drug sgo nas bdag nyid lha ru sgom// 'bras bu snang ba mtha' yas zhing du skye// u pa ya yi ldog thabs 'bras bu ni// 'jug pa'i sgo dang dam tshig kri yar spyod// rtog pa'i lta ba yo ga bzhin du lta// 'bras bu mi gdung lha yi gnas su skye ba'o// yo ga'i 'khrul pa ldog thabs 'bras bu ni// rtogs pa'i lta ba skye 'gag med par rtogs// ting 'dzin gtsor byas byang chub sgo nas 'jug/dam tshig dkon mchog gsum dang byang chub sems// nam du yang ni spang bar mi bya zhing// rdo rje slob dpon lha ru dmigs pa dang// mched dang lcam dral ming sring lta ba dang// dbang ma thob par chos rnams mi bshad cing// lta ba dman pa'i gang zag spang bar bya// rdo rje dril bu rtag tu 'chang bya ste// rnal 'byor dam tshig nyams pa de nyid dang// lung pa gcig gi chu la btung mi bya// 'bras bu rin chen 'byung ldan sa ru skye// ma hA yo ga'i 'khrul pa ldog thabs 'bras bu ni// gnyis med sgor zhugs gnyis med lta bar blta// bsrung ba'i dam tshig rtsa ba yan lag gi// sku gsung thugs dang nyi shu rtsa brgyad srung// 'bras bu rdo rje sems dpa'i sa ru skye// a nu yo ga'i ldog thabs 'bras bu ni// gnyis med rnam par dag pa'i sgo ru 'jug/ bsrung ba'i dam tshig snying rje'i sems dang ldan// phung po khams dang skye mched lha ru sgom// 'bras bu rnam par snang mdzad lha ru skye// zhes gsungs so// rin po che snang byed las/ 'khrul pa ldog nas 'bras bu bstan pa'i le'u ste bcu gcig pa'o// sdud pa sems dpa' rdo rje des// ston pa gsang bdag chen po la// theg pa rnams kyi gol sgrib 'khrul ba ji lta bu/ ston pa gsang bdag chen po des// sdud pa sems dpa' rdo rje la// theg pa'i gol sgrib 'khrul dang gsum// nyan thos bdag med lta ba yang// bdag med ma rtogs lta ba yang// nyan thos mu stegs dag tu gol// mu stegs dag tu 'dod pa yang// nyan thos bdag med dag la bsgribs// phrag dog dag ni nyan thos 'khrul// chos la bdag med rang rgyal yang// bdag tu 'dod na rang rgyal bsgribs// nyan thos chos kyi bdag tu gol// chos la bdag 'dod nyan thos kyis// rang rgyal bdag med nyan thos bsgribs// rang rgyal ma rig dag tu 'khrul// gzung 'dzin gnyis bral sems tsam yang// rang rig gsal bar 'dod na yang// sems tsam rang rgyal dag tu gol// rang rgyal rnam par rig byed kyi// sems tsam gzung 'dzin bral la bsgribs// sems tsam zhe sdang dag tu 'khrul// rang bzhin med pa'i dbu ma yang// sems su gsal bar 'dod na yang// dbu ma sesam tsam dag tu gol// gzung 'dzin gnyis bral sems tsam gyis// dbu ma rang bzhin med la bsgribs// dbu ma zhe sdang dag tu 'khrul// skye 'gag med pa'i kri yog kyang// kun rdzob don dam gnyis 'dod na// kri yog dbu ma dag tu gol// dbu ma bden pa gnyis 'dod kyis// kri yog skye 'gag med la bsgribs// kri yog nga rgyal dag tu 'khrul// snang stong gnyis med ma hA ya// don dam skye 'gag med lta ba// ma hA kri yog dag tu gol// kri yog skye 'gag med pa des// ma hA snang stong gnyis la bsgribs// ma hA 'dod chags dag tu 'khrul// snod bcud gnyis med a nu yang// snang stong gnyis su 'dod na yang// a nu ma hA dag tu gol// snang stong gnyis kyi lta ba yis// a nu snod bcud dag la bsgribs// a nu gzung 'dzin dag tu 'khrul// zhes gsungs so// rin po che snang byed las/ theg pa'i gol sgrib 'khrul pa'i le'u ste bcu gnyis pa'o// sdud pa sems dpa' rdo rje yis// ston pa gsang bdag chen po la/a ti yo ga'i snying po la// gol sgrib 'khrul pa yod dam med// ston pa gsang bdag chen po des// sdud pa'i sems dpa' rdo rje la// rtogs na gol sgrib med mod kyang// ma rtogs gol sgrib 'khrul par snang// nges pa thob pa'i theg pa drug/ rdzogs pa chen po'i gol sa de// rdzogs chen nges thob sgrib par bshad// mdo sde dang ni kri ya dang// u pa ya dang yo ga dang/ ma hA yo ga a nu drug/ rdzogs pa chen po'i gol sgrib ste// mdo sde byang chub sems dpa' ni// kun tu 'od kyi sa 'dod pa// bden pa gnyis kyi rtog spyod kyis// chos nyid stong pa rnam par rtog/ a ti'i snying po bde chen la// rtog spyod rtsis gdab med pa'i don// rtsi gdab med pa mdo sdes bsgribs// rtog spyod rtsi gdab med pa ni// mdo sde dag tu gol bar bshad// rtog spyod 'khrul rtsad ma chod pas// rdzogs chen gti mug dag tu 'khrul// kri ya rdo rje 'dzin 'dod na// dag pa rnam gsum sgor zhugs nas// chos nyid dag pa 'dzin pa ste/ gzung 'dzin dag gi yul la gnas// 'khrul 'dzin 'khrul pa med pa'i don// gzung 'dzin med la 'khrul pas bsgribs// rdzogs chen gzung 'dzin byed pa ni// kri ya dag tu gol bar bshad// gzung 'dzin 'khrul rtsad ma chod pas// rdzogs chen yid gnyis dag tu 'khrul// u pa ya yi lta spyod ni/ kri ya spyod la yo ga sgrub// lta spyod 'brel bas don med pas// a ti yo ga'i snying po ni// lta spyod gnyis med byang chub sems// gnyis su med la u pas bsgribs// rdzogs chen gnyis med byed pa ni// u pa ma ru gol bar bshad// gnyis med ye shes ma shar bar// rdzogs chen ya bral dag tu 'khrul// yo ga stug po bkod 'dod pa// mtshan ma yod med sgor zhugs nas// phyag rgya bzhi la gtsor byed do// dbye bsal med la 'jug ma nus// a ti yo ga'i snying po ni// dbye gsal med pa'i byang chub sems// dbye bsal med la yo gas bsgribs// rdzogs chen dbye bsal med pa ni// yo ga dag tu gol bar bshad// dbye bsal med par ma go bas// rdzogs chen gnyis snang dag tu 'khrul// ma hA rdo rje 'chang 'dod pas// ting 'dzin rnam gsum sgor zhugs nas// rang rgyud dag pa'i dkyil 'khor la// bsnyen sgrub rnam bzhi sgrub par byed// a ti yo ga'i snying po ni// rtsol sgrub 'das pa'i byang chub sems// rtsol sgrub 'das la ma hAs bsgribs// rdzogs chen rtsol sgrub med pa ni// ma hA yo gar gol bar bshad// lus ngag 'khrul pa ma zhig pas// rdzogs chen bya btsal dag tu 'khrul// a nu byed med sa 'dod pas// dbyings dang ye shes sgor zhugs nas// rgyu ni dag pa'i dbyings su lta// 'bras bu ye shes dkyil 'khor lta// A ti yo ga'i snying po ni// rgyu 'bras 'das pa'i byang chub sems// rgyu 'bras 'das la a nus bsgribs// rdzogs chen rgyu 'bras gnyis lta ni// a nu yo gar gol bar bshad// rgyu 'bras 'khrul rtsad ma chod pas// rdzogs chen bya rtsal dag tu 'khrul// theg pa'i gol sgrib 'khrul dang gsum// theg pa gcig gi lta ba la// gol sgrib 'khrul pa sum cu yod// lta ba'i gol sgrib 'khrul dang gsum// dam tshig gol sgrib 'khrul dang gsum// 'phrin las gol sgrib 'khrul dang gsum// ye shes gol sgrib 'khrul dang gsum// sa yi gol sgrib 'khrul dang gsum// lam gyi gol sgrib 'khrul dang gsum// phra ba'i gol sgrib 'khrul dang gsum// rgyud kyi gol sgrib 'khrul dang gsum// lung gi gol sgrib 'khrul dang gsum// man ngag gol sgrib 'khrul dang gsum// phye bas sum cu tham pa'o//// de yi mtshan nyid gang dang gang// lta ba dag gi rang bzhin ni// sgom med rang bzhin don la blta// sgom med rang bzhin ma shes na// lta ba dag gi sgrib par bshad// ye nas mnyam pa'i rang bzhin la// zhe 'dod med par mi lta ste// bsgoms nas rtogs par lta ba ni// lta ba dag gi gol sa yin// zhe 'dod rtsi gdab byed pa ni// lta ba dag gi 'khrul par bshad// bsrung mtshams med pa'i dam tshig la// bsrung mtshams med par ma shes na// dam tshig sgrib pa yin par bshad// bsrung mtshams med pa'i dam tshig la// bsrung mtshams med par ma rtogs nas// phyogs mtshams dam tshig bsrung ba ni// dam tshig gol sa yin par bshad// phyogs mtshams bye brag 'byed pa ni// dam tshig 'khrul pa yin par bshad// 'phrin las rang bzhin rtsal med la// rtsol sgrub 'das pa'i 'phrin las la// btsal du med par ma shes na// 'phrin las sgrib pa yin par bshad// btsal du med pa'i rang bzhin la// btsal du med par ma rtogs na// 'phrin las rtsol bar byed pa ni// 'phrin las gol sa yin par bshad// lus ngag 'bad rtsol byed pa ni// 'phrin las 'khrul pa yin par bshad// ye shes dag gi rang bzhin la// ye nas sgrib pa med par gsal// sgrib pa med par ma shes na// ye shes dag gis sgrib par bshad// bsgribs pa med pa'i ye shes la// sgrib pa med par ma rtogs te// mi bskyod gsal bar ma rtogs na// ye shes gol sa yin par bshad// gsal mi gsal du 'dod pa na// ye shes 'khrul pa yin par bshad// sa dang pha rol rang bzhin ni// sbyang zhing bgrod du med pa yin// sbyang bgrod med par ma shes na// sa dang pha rol sgrib par bshad// sbyang bgrod mi dgos sa lam la/ sbyang bgrod mi dgos ma rtogs te// lam gyi rim pa'i rang bzhin ni// bgrod du med par ma shes na// lam gyi sgrib pa yin par bshad// bgrod du med pa'i rang bzhin la// bgrod du med par ma rtogs na// lam la bgrod du yod 'dod na// lam gyi gol sa yin par bshad// bye brag lnga ru 'dod pa ni// lam gyi 'khrul pa yin par bshad// sbyang zhing bgrod par byed pa ni// sa dang pha rol gol sar bshad// gong 'og rim par 'dod pa ni// sa dang pha rol 'khrul par bshad// phra ba dag gi rang bzhin la// gzung 'dzin bral ba'i rang bzhin yin// gzung 'dzin bral bar ma shes na// phra ba dag gi rang bzhin la// phra ba dag gis sgrib par bshad// gzung 'dzin bral ba'i phra ba la// gzung 'dzin bral bar ma rtogs te// phra rab rdul du yod lta na// phra ba'i gol sa yin par bshad// gzung 'dzin bral bar gnyis snang na// phra ba'i sprul pa yin par bshad// rgyud kyi rang bzhin bstan pa ni// sems chos gnyis su med par 'brel// gnyis med 'brel bar ma shes na// rgyud kyi sgrib pa yin par bshad// gnyis su med par 'brel pa la// gnyis med 'brel pa ma rtogs te// chos sems gnyis su mthong ba ni// rgyud kyi gol sa yin par bshad// tha dad rtse gnyis skyes pa ni// rgyud kyi 'khrul pa yin par bshad// lung gi rang bzhin bstan pa ni// gtan la 'bebs shing nges par ston// gtan la 'bebs par ma shes na// lung gi sgrib pa yin par bshad// gtan la 'bebs pa'i lung de la// thog tu phebs par ma rtogs te// gtan la mi phebs zer ba ni// lung gi gol sa yin par bshad// sgra tshig rang 'thad khyer nas ni// don dang mi mthun tshig rjes 'brang// lung gi 'khrul pa yin par bshad// man ngag rang bzhin bstan pa ni// gnyis snang med par la zlos pa// spros pa med par ma shes na// man ngag dag gi sgrib pa yin// sgro skur bral ba'i man ngag la// spros pa med par ma rtogs te// sgro skur yod par ma rtogs te// sgro skur yod par 'dogs pa yin// man ngag dag gi gol sar bshad// spros pa'i mtha' la mngon zhen nas// man ngag 'khrul pa yin par bshad// dbye na de ltar yod mod kyang// bsdu na gsum las med par bshad// 'gro sgo nor ba gol sa yin// gnas don ma rtogs sgrib pa yin// sgo lngar 'khyams pa 'khrul pa yin// dper na don yod lam zhugs na// shar na don yod nub lam phyin// nub phyin shar gyi don mi 'grub// lam rgyus ma shes 'khrul pa byung// zhe 'dod med pa'i don 'dod pas// zhe 'dod mtshan ma'i lam du zhugs// gol sa zhes ni de la bshad// sgro skur gnyis bral rang bzhin la// brjod yod rtog pa'i sgrib pa yin// tshig gi sgro 'dogs ma chod 'khrul// gang zag dbang po khyad par la// sems 'thad theg pa'i rim pa dgu// mi mthun lta spyod so sor bshad// des na gol sgrib 'khrul pa 'byung// zhes gsungs so// rin po che snang byed las/ rdzogs chen ma rtogs shes pa la gol sgrib 'khrul pa bstan pa'i le'u ste bcu gsum pa'o//// sdud pa'i sems dpa' rdo rje des// ston pa gsang bdag chen po la// gol sgrib 'khrul gsum la bzla ji lta bu// ston pa gsang bdag chen po des// sdud pa'i sems dpa' rdo rje la// nges pa'i zhe 'dod ma skyes na// rdzogs chen sgrib pa med par bshad// gong 'og khyad par dbye ru med// theg pa drug gi gol sgrib med// bden gnyis kha tshon gcad du med// snying po'i rang bzhin rtsi gdab med// rang bzhin shes pas sgrib pa med// 'dzin rtog gnyis las grol ba ni// de'i don rtogs gol du med// 'dzin rtog yid gnyis 'khrul par shes// yid rtsad chod na 'khrul du med// gzung dang 'dzin pa 'khrul ba'i chos// de ltar shes pa sgrib tu med// gzung 'dzin yid gnyis ma skyes na// gol dang 'khrul pa med par bshad// snying po'i rang bzhin ma nor bshad// lta spyod bkol med byang chub sems// phyogs cha ya bral ma skyes na// 'dzin gnyis gol sgrib 'khrul pa med// dngos po gang la dbye bsal med// yin min dbye bsal med pa na// dbye bsal gol sgrib 'khrul pa med// lus ngag rtsol sgrub byar med pas// bya btsal gol sgrib 'khrul pa med// rgyu las ma byung 'bras bu mchog/ rgyu 'bras rtsad gcod gol sgrib med// snying po'i rang bzhin gcig shes na// lta ba la sogs bcu po la// gol sgrib 'khrul pa gang yang med// lta ba rtog nas sgom med don// bkol med mnyam pa'i don shar nas// lta ba gol sgrib 'khrul pa med// phyogs dang ris med mnyam pa'i ngang// de yi don la mi 'da' na// dam tshig gol sgrib 'khrul pa med// rtsol sgrub med pa'i snying po la// lus ngag 'bad rtsol med pa la// 'phrin las gol sgrib 'khrul pa med// ma sgribs gsal ba'i ye shes ni// ye nas yin pas bya mi dgos// ye shes gol sgrib 'khrul pa med// bgrod med ye shes mthar phyin don// rim par gnyis su med pa'i mchog/ sa yi gol sgrib 'khrul pa med// yang dag lam la gnas pa la// bye brag rim par ma bgrod na// lam gyi gol sgrib 'khrul pa med// gzung 'dzin gnyis bral byang chub sems// phra rags yid rtog med pa la// phra ba'i gol sgrib 'khrul pa med// gnyis med thig le gcig gi ngang// mnyam pa'i rang bzhin rgya ma chad// rang bzhin rgyun du gnas pa'i mchog/ rgyud kyi gol sgrib 'khrul pa med// ma nor byang chub sems kyi ni// yang dag don ni gtan la 'bebs// lung gi gol sgrib 'khrul pa med// phyogs ris spros pa med pa'i don// sgro skur mtha' las grol ba ni// man ngag gol sgrib 'khrul pa med// gol sgrib bsam gyis mi khyab kyang// 'char ba'i sgo nor gol sa yang// ldog pa'i thabs shes gol du med// gnas don ma rtogs sgrib pa yang// snying po'i don shes gol du med// sgo lnga yul 'dzin 'khrul pa yang// yid rtsad chod pas 'khrul du med// 'gro sgo ma nor yang dag lam// nges pa'i don mthong the tshom bral// thag chod gdeng ldan re dogs med// ces gsungs so// rin po che snang byed las// gol sgrib 'khrul pa las la bzla ba'i le'u ste bcu bzhi pa'o//// sdud pa sems dpa' rdo rje yis// ston pa gsang bdag chen po la// lta sgom gnyis kyi don ni ji lta bu// ston pa gsang bdag chen po des// sdud pa'i sems dpa' rdo rje la// bden pa'i snying po mthong ba lta ba yin// ngang nas 'gro 'ong med pa sgom pa yin// dus gsum cha las 'gro ba rang bzhin lta// yid kyi rgyu ba chad pa sgom pa yin// lta ba'i rang bzhin rtog pa med// sgom pa'i rang bzhin bsam dang bral// lta ba'i rang bzhin 'gyu ba med// sgom pa'i rang bzhin bcos pa med// 'khrul pa rnam par dag pa'i rang bzhin lta// ye shes rgyun chad med pa sgom pa'i don// snying po'i rang bzhin mngon par rtog pa lta// yid kyi 'khrul pa log nas sgom pa'i ngang// rtog pa'i mtha' rnams grol ba lta// mtshan mo'i dri ma gos med sgom// ma bcos rang bzhin lta ba'i don// snang ba'i yul med sgom pa'i mchog/ lta ba'i rang bzhin 'byed pa med// sgom pa mi dmigs ngang la bsgom// lta ba'i rang bzhin 'dod pa med// ma chags ma zhen sgom pa'i don// lta ba'i rang bzhin sgrib pa med// sgom pa'i rang bzhin gsal ba'i ngang// lta ba'i rang bzhin rten pa med// sgom pa'i rang bzhin gnas pa med// bdag dang bdag tu mi rtog pa'i// mnyam pa'i rang bzhin phyogs ris med// chos dang chos can 'dzin pa med// bden dang rdzun par mi lta na// snying po'i don la 'dod pa med// sgrib med ye shes gsal ba'i don// mi bsgom rang gnas rgyun mi 'chad// bsam bral snying po brjod pa med// ma bcos rtsol bral spyad du med// phyi nang mi mnga' rang bzhin gnas// 'byung 'jug mi mnga' gzung 'dzin bral// sgo lnga'i yul du gang snang ba// chos dbyings snang la rang bzhin med// yid kyi bsam pa ci skyes kyang// 'khrul pa'i rnam rtog glo bur ba// yan lag snang tshul cir shar yang// snying po mnyam nyid ngang la gnas// snying po rtsol bral bde ba'i don// sgom med rang lugs ma bcos sems// sgom pa'i ro myong chags sems bral// snang ba'i ltos po thams cad la// dbye gsal med pa'i rang bzhin bde// dngos mtshan med par mi gnas na// mtha' yi 'khrul pa ngang gis dag/ 'das dang ma 'ongs da lta yi// dus gsum cha ru ma gzung na// 'byung 'jug med pa'i bsam gtan bde// 'khrul rtog sangs pa'i rang bzhin ni// bag chags bcas pa ngang gis stongs// zhes gsungs so// rin po che snang byed las/ lta sgom bstan pa'i le'u ste bco lnga pa'o//// sdud pa'i sems dpa' rdo rje des// ston pa gsang bdag chen po la// spyod pa'i sgo nas 'bras bu'i don thob ji lta bu// ston pa gsang bdag chen po des// sdud pa'i sems dpa' rdo rje la// ma bcos sems kyi don mthong na// nam mkha'i rang bzhin spyad pa'o// tha mal rang lugs gzhag pa na// snying po klong na gnas pa'o// mnyam pa'i klong na rang bzhin gnas// ma chags ma zhen 'dod pa med// zug rngu'i rang bzhin ma skyes na// rnam rtog rang sar grol ba'o// rnam smin yul la mi 'jug na// snying rje'i sems dang ldan pa'o// bag chags skyon gyis ma gos na// snying po'i don la phrad pa yin// glo bur 'khrul ba mi skye na// yid kyi 'khrul rtsad chod pa yin// gang la myong ba'i sems med na// ldog thabs gnyis su lon pa yin// seng ge ri bo rgya mtsho dang// me tog ti bya bu chung dang// glang chen smyon pa rma bya sogs// rtogs gcod chod la nyam nga med// snying po'i rang bzhin 'gyu ba bral// ma g.yos ma bcos nyid du bde/

CLOSE WINDOW