CLOSE WINDOW

Gpb034.025
བོད་ཡིག

/// rgya gar skad du/ b+ho d+hi tsit+ta ping ta ki tsa kra tan tra/ bod skad du/ byang chub sems nya mo 'khor lo'i rgyud/ dpal kun tu bzang po la phyag 'tshal lo// 'di skad bshad pa'i dus gcig na/ de bzhin gshegs pa thams cad kyis bcom ldan 'das la/ rdzogs pa chen po byang chub sems thig le chen po/ gang yang ma yin kun gyi bdag nyid/ lhun gyis grub pa'i ye shes dges pa'i rol pa las mnga' mdzad pa chen po des/rang bzhin chos nyid kyi gzhal yas/ rig pa mtha' dbus med pa'i dkyil 'khor/ gsang ba chen po'i ngang/ 'gyur ba med pa byang chub kyi ngo bo la/rdo rje snying po'i 'khor la sogs pa mtha' yas pa dang// 'byed pa mi mnga' ba gcig pa'i tshul gyis bzhugs so// de'i tshe'i bcom ldan 'das dpal kun tu bzang pos/ gser gyi nya mo 'khor lo'i 'od 'byung ba zhes bya ba'i ting nge 'dzin la snyoms par zhugs so// de nas byang chub sems dpa' sems dpa' chen po rdo rje snying pos de ltar mkhyen nas/ bcom ldan 'das la 'di skad ces gsol to// kye ma dus gsum sangs rgyas kyis// rdzogs chen rang byung dri ma med// byang chub sems nyid gsal ba'i ngang// 'dus pa'i tshogs la bshad du gsol// zhes zhus so// de nas yang bcom ldan 'das dpal kun tu bzang po 'gyur ba med pas 'di skad ces bka' stsal to// rang byung rig pa mchog gi sku// tshig tu ma yin don du rdzogs// brjod bral gsang ba'i chos nyid la// sgra yi 'khor los mtshon dang bral// zhes gsungs so// de nas yang byang chub sems dpa' rdo rje snying po des 'di skad ces bka' stsal to// nam mkha'i rang bzhin brjod bral du// rang byung rig pas gsal 'gyur yang// ma rtogs byis pa'i 'gro ba la// brjod med brjod pas go ba ltar// brjod bral chos sems gnyis med la// brjod med mkhas pas rtogs gyur na// ma rig rmongs pa'i theg pa yis// brjod pas de nyid rtogs bya'i phyir// rang byung gsal bar bshad du gsol// zhes zhus so// de nas bcom ldan 'das dpal kun tu bzang pos brjod bral rig pa'i 'khor lo zhes bya ba'i ting nge 'dzin la snyoms par zhugs nas gsungs pa/ bstan zhing rtog dka'i spyod yul ni/sangs rgyas sems can dbyer med de// mtha' dbus bral ba'i snying po la// brjod cing bstan du ye nas med// gsang ba'i nang nas rab tu gsang// dman pa'i spyod yul ma yin pa// sgro 'dogs skur pa rab zhi ba// thog ma tha ma med rang bzhin// rang gi rig pa mchog gi yul// brjod bral sgra dang tshig bral bas// dbyings dang ye shes 'khrul ba'i lam// brjod med brjod pa nor ba'i lam// mtshon cing bshad pa kun las 'das// gzhi rtsa med pa'i kun gzhi la// rgyu 'bras 'dzin pa'i 'khrul pa'i lam// 'bras bu nyid las 'bras bur 'byung// bskyed bya skyed byed rgyu 'bras bral// mun khung rdzas dang gsal byed ltar// bla ma'i ngag gis mtshon par bya// sgra bral bstan pa rgya mtsho'i mdzod// gnyis med ye shes gsal ba ni// kun bral rig pa gcig tu bstan// brjod bral chos kun rgyu yi dbyings// gang zhig yin pa de nyid yin// dus gsum snga phyi khyad par yang// bsam bral nyid kyi dus su bstan// skye med gzhig pa kun bral bas// rtag pa chen po mchog gi sku// sku gsum nam mkha'i 'khor lo can// brjod med btsal bral ye sangs rgyas// gang yang ma yin de nyid yin// dge sdig che chung med pa yis// zhi ba chen po'i ngang la gnas// 'di la ci yang bya mi dgos// mi btsal nam mkha'i bya lam gnas// 'khor ba ye nyid rdo rjer gcig/ gzugs med gzugs te gzugs kyi mchog/ bcom ldan sangs rgyas lhun grub sku// nam mkha'i mtha' ltar khyab bdal bas// sku gsum dbye ba kun dang bral// mi dgos mi bstan byas zin pas// rig pa gsal ba'i 'od la thug/ sems las byung ba'i mtshan nyid kyang/ yan lag 'bum phrag bsam mi khyab// ting 'dzin bsam med 'khor lo gsal// cir snang rig pa'i khyad par las// che chung rnam pa yongs kyis med// kun kyang de dag nyid du gnas// rgya mtsho gting gi nya mo ltar// bag tsha'i rnam pa zhi ba'i sku// rang byung rig pa'i 'khor lo gsal// cir snang rig pa'i khyad par las// che chung rnam pa yongs kyi med// kun kyang de dag nyid du gnas// rgya mtsho gting gi nya mo ltar// bag tsha'i rnam pa zhi ba'i sku// rang byung rig pa'i 'khor lo ltar// bskor bral rig pa'i dbyings la thug/brjod med rang byung don yin yang// brjod bral rig pa brjod pa yis// tshig tu ma yin don la sbyor// 'byor bas zhi ba ma nyams bde// de nyid don la de yis mtshon// gnyis med rig pa'i don du mnyam// nya mo 'khor lo'i rgyud las/ gling gzhi bstan pa'i le'u ste dang po'o//// de nas bcom ldan 'das la/ rdo rje snying pos 'di skad ces gsol to// rdzogs chen sems kyi rang bzhin la// chos kun ye shes gcig pa'i phy-ir// blta zhing brtag pa ma yin yang// lta ba'i khyad par bshad du gsol// de nas bcom ldan 'das dpal kun tu bzang pos ye shes 'khor lo'i ting nge 'dzin la snyoms par zhugs nas gsungs pa/rang bzhin gcig la rtogs tshul gyis// bde dang sdug bsngal khyad par gyis// theg pa'i khyad par gnyis su grags// rtogs pas rig pa gcig las med// bden bzhi ye shes bcu drug gis// mthong dang sgom pa'i spang tshul gyis// rang don grub pa'i mya ngan 'das// spong ba mun pa log pa'i lam// chos dang gang zag khyad par la// gcig dang cha phyed ma rtogs pa// bkag pas rang 'dod mthar phyin kyang// 'di yang rang don gzhan med pa'o// sbyang med rang byung rig pa la// bden gnyis pha rol phyin bcu yis// sbyangs pa'i lam lnga sa bcu yis// sbyong bar 'dod pa byas tshi chad// dbyer med dag pa'i chos sku la// dag dang ma dag tshul 'dzin cing// mtho dman rim pa grub 'dod pas// gnyis med don la gnyis kyi nyams// gnyis 'dzin tshul gyis gcig la bsgrub// nges med tshul gyis nyes pa 'dod// rang gis 'gal ba nyid kyi tshul// rang gsal don las nyams par 'gyur// rang bzhin dag par ma rtogs par// lnga bzhi rim par skur gsal te// gtsang sme'i tshul gyis grub 'dod pa// spong len med pa'i don dang 'gal// dbyings dang ye shes rgyu 'bras kyis// rang byung don la gnyis bzung bas// 'jig rten 'khor ba'i gnas su ltung// gcig la gnyis su bzung bas 'khrul// rnam rtog 'khor lo rgyun mi 'chad// ye shes 'khor lo mu mtha' yas// ting 'dzin 'khor lo bsam mi khyab// rang byung 'khor lo rgyu rkyen bral// bsam bral rig pa'i ye shes la// bsam pa'i 'du shes rtog pa'i rgyun// sgro skur mtshan ma 'khrul ba'i lam// gang brtags phyogs 'dzin rig pa 'khrul// rang byung don la rgyu yis bskyed// rang gsal ngang la gzhan gyis bslad// gsal ba'i sgron ma mun pas bsgribs// bgrod med don la bgrod mtha' ring// bsrung med don la bsrungs mtshams 'dzin// ye nas byas zin byed spyod 'phrul// gnyis med don la gnyis su 'dzin// btsal bral ngang la rtsol sgrub byed// brjod bral ngang la brjod par rtogs// bskyod med ngang la rim par bskyed// lhun grub 'bras bu yul du byed// 'bras bu grangs med grangs su gzung// bskur med rig pa'i rgyal thabs la// ma rtogs rtog pa'i dbang gis bslad// 'dzin bral ngang la 'dzin pas nyams// phyogs bral ngang la phyogs su bzung// 'di kun rang byung don las grol// grang yang ji ltar zhen pa de// srid pa log pa'i lam yin te// 'khor ba mun pa'i nang du ltung// sku yi 'khor lo mtshon dang bral// gsung gi 'khor lo brjod dang bral// thugs kyi 'khor lo bsam mi khyab// ye shes dkyil 'khor lhun gyis grub// rang byung dkyil 'khor rgyu rkyen med// phyogs med lhun grub 'dzin dang bral// rdzogs chen lhun grub dbye ba med// bya med 'phrin las cir snang yang// bgrod bral rig pa'i lam gcig pa// mi lta mi rtsol ci yang med// ma byas pa nyid byas pa yin// ma grol ye nas bcings dang bral// ma skyes mi 'gag mnyam nyid klong// ma btsal mi spyad dgongs pa'i klung// ma bgrod rig pa cig car smin// 'phur skyes lta bu'i rim pa med// lam lnga sa bcu'i rtog pa'i nad// bskyed rdzogs ting 'dzin don gyi nad// blang dor mi skyed chad pa'i nad// mtshan 'dzin rnam rtog 'dam gyi tshul// blta med bsam med sgom du'ang med// dmigs med btsal ba'i yul las 'das// rang byung rig pa gcig la rdzogs// ma lta yul med rang gi dbyings// ma mthong rig pa dbyings kyi rgyan// bsam med ye shes gsal ba'i ngang// mtshan med mtha' dbus kun dang bral// ma mthong yul med lta ba'i klong// sems de gcig dang tha dad min// ye shes rig pa'i 'khor lo la// rtag chad dmigs pa kun dang bral// mtshan 'dzin zhen 'dzin mnyam pa'i zhing du thim// mi mngon rig pa dbyings la gsal// zhes gsungs so// nya mo 'khor lo'i rgyud las/ sems yul gcig par bstan pa'i le'u ste gnyis pa'o//// de nas yang byang chub sems dpa' sems dpa' chen po rdo rje snying pos 'di skad ces gsol to// kye/ rig pa'i rgyal po gsal ba'i ngang// phyogs med khyab pa'i ngo bo la// gnyis par 'dzin pa mi gnas kyang// spyod pa'i khyad par bshad du gsol// zhes zhus so// de nas bcom ldan 'das dpal kun tu bzang pos spyod pa sna tshogs kun bzang 'khor lo zhes bya ba la snyoms par zhugs nas 'di skad ces gsungs so// rang byung thabs kyi spyod pa ni// ji ltar spyad pa de ltar bde// rgya mtsho'i gting gi nya mo ltar// gang ltar byas pa de ltar bde// gang yang bkag pa med par gsal// chags med thabs kyis ma zin na// ci spyad mi grol 'ching ba'i rgyu// rang gsal gzhan med rig pa'i klong// bdag med dbu ma gsal ba'i dbyings// rang bzhin 'gag dang len med pas// spyod pa'i khyad par ci yang gsal// rtsol bral dbu ma'i lam du gnas// pad+ma la ni 'dam bzhin du// ma gos de dang mnyam du gnas// ji ltar ma g.yos gcig tu 'dus// thabs kyi spyod pa mkha' ltar bdal// dge sdig bcos med snying po la// bcos pa'i spyod pa nor pa'i lam// sgo gsum spyod pa bzhi yis ni// gser gyi nya mo lding ba bzhin// dogs med de lta nyid du bde// 'di ltar ye shes spyod pa'o// phyag dang bskor ba'i las mi bya// dkyil 'khor bsnyen pa'i mchod pa dang// mchod dang lus kyi phyag rgya dang// byas pas 'khor ba'i g.yang sar ltung// sngags dang glegs bam bklag pa dang// dbyangs dang tshig bshad brjod pa dang// ngag gi bya ba thams cad ni// mtshan mas bde ba'i don mi 'byung// mtshan ma'i sku yi sbyor ba dang// rlung dang rdo rje bzlas pa dang/thig le yid kyi sbyor ba dag/ ma byas byas pas 'ching grol 'khrul// ci yang mi bya bya mi dgos// mi bsam de bzhin nyid du gzhag/ skyil krung mi bya langs kyang rung// ye nas zin pas btsal mi dgos// mi mchod bdag nyid shes pa yis// kun grol rdzogs chen lam du nye// nya mo 'khor lo byang chub sems// bskor zhing rang byung sems la gtugs// ring du btsal bas don mi rnyed// don gyi don btsal sems las byung// gzhi rtsa med pa'i snying po la// 'khrul pa'i bag chags kun tu stong// rig pa sbyor bas gnyis mi stong// ma skyes mi 'gag rgyu rkyen med// gnyen po la sogs de dang 'dra// bsgrims pas 'ching zhing glod na grol// kun la gnas pas sbas pa'i ngang// ma spyad pa nyid spyad pa ste// sna rtser lta ba'ang spang byas te// ma skyes 'khor lo mnyam du gsal// nyi ma stong gi dkyil 'khor ltar// ma btsal lhun grub gdod nas dag/bcings pa kun tu rtsol bar 'gyur// grol na mi g.yo brtan par gnas// 'di don rtog pa'i skyes bu yis// rig sbyor blo ni bsam mi khyab// rdo rje nyi ma'i snying po ltar// lo lta zil mnan ye sangs rgyas// gang zhig rim pas mnyam sbyar nas// ma sbyar pha bsgral ri lung bsregs/ khams gsum 'gul ba kun bsad nas// rig pa 'od gsal zhing du skye// byas pa zin pas ci ma byed// ye nas grol bas bcings dang bral// ma bstan rig pa klung du go/ ci yang mi bya rang dgar zhog/ dge sdig med pa'i don rtogs na// ji ltar byas kyang gos pa med// gser gyi 'khor lo 'bar ba ltar// gang ltar bskor yang dbyings las med// 'di ltar gsang ba'i rdzogs chen la// gnyis med rig pa bsam mi khyab// gnyis med de nyid ma rtogs par// gang ltar btsal ba log pa'i lam// btsal bral phyogs med lhun grub la// btsal ba'i spyod pa phyin ci log/ mngon sum ye shes gsal ba la// brgyud pa'i shes pas rtogs pa med// gnyis med rang gsal nyag gcig la// gnyis 'dzin rig pas gcig dang 'gal// sgom med ma yengs yul bral la// lta sgom yul gyi lcags kyis bcings// spyad med yal ba'i thabs chen la// spong len spyod pa log 'khrul spyod// dman pa'i blo brgyad phyogs tsam gyis// rang rang zhen pa'i blo khyad kyis// phyogs bral nam mkha'i mtshan nyid la// btsal zhing bcings pas dam du bcings// gang zhig rang byung ye shes la// rgyu 'bras rtog pa'i khyad par gyis// 'jig rten rtsol ba'i lam zhugs pas// gsang ba'i rdzogs mchog don dang bral// ma skyes rang byung ye shes la// skye 'gag mthong ba nor pa'i lam// thams cad gcig tu gsal ba yis// ma bsam mi 'jug cir mi dgongs// rang gsal klong la rtag par bzhugs// rang byung rig pa cir mi bsam// rig pa mtshan ma'i rjes mi 'brang// rdo rje'i rig pa 'od gsal lung// yengs pa med par rang bzhin gnas// kun kyang mnyam par rig pas gsal// 'khor ba chos sku'i ngang du gsal// 'ching ba nyid kyang grol ba'i lam// mar me'i tshul ltar gos pa ni// g.yo med rig pa mchog gi lung// ma bcos gsang ba'i spyod pa la// byas dang ma byas gnyis ka nad// ci spyad rtogs pas ye shes gsal// ma rtogs pa yi rlung du 'gyur// gsang ba nya mo 'khor lo 'di// 'gro kun rang byung dbyings la gnas// 'di ni rang byung byang chub sems// ma bskyed rdzogs pa'i ye shes la// grol ba'i dkyil 'khor yongs rdzogs pas// rang byung dkyil 'khor rmad rdzogs gsal// zhes gsungs so// nya mo 'khor lo'i rgyud las/ spyod pa bde ba chen po bstan pa'i le'u ste gsum pa'o//// de nas yang byang chub sems dpa' rdo rje snying po de nyid kyis 'di skad ces gsol to// rang byung rig pa bsam mi khyab// de nyid bcom med snying po'i don// 'khor lo mi 'gyur gser dang 'dra// de nyid nges par bshad du gsol// zhes zhus so// de nas dpal kun tu bzang po nyid bsam gyis mi khyab pa'i 'khor lo la snyoms par zhugs te/ 'di skad ces gsungs so// rang byung 'khor lo bsam mi khyab// chos nyid 'khor lo sgro skur bral// sku gsum 'khor lo grangs dang bral// 'od gsal 'khor lo dbyings la 'dus// dpe med sgra tshig brjod mtha' med// rgyu med rkyen med 'jig pa med// sku med kun snang rig pa'i ngang// mtshon med brjod du tshig dang bral// gsang ba sgra bral rig pa'i mchog khyab par gsal la rtag tu med// rnal 'byor nges pa'i lung nyid ni// ma bcos bcos pa nor ba'i lam// dag dang ma dag tshig mtha' bral// kun gyi snying po gcig gi sku// nam mkha'i 'khor lo mtshon dang bral// theg pa'i rtsa ba sems nyid dang// 'gro drug khyab pa'i sems nyid ni// rig pa'i 'khor lo kun la sgyur// snying po bya bral rdzogs pa'i lung// 'dzin pa'i tha snyad kun las 'das// sgra bral bstan pa rgya mtsho'i mdzod// dgongs pa gsang ba spyi yi lung// zab mo dgongs pa gsang ba 'di// mi rtog spyod pa'i yul med de// dgongs pa kun 'dus gsang ba'o// zhes gsungs so// de nas yang byang chub sems dpa' rdo rje snying pos 'di skad ces gsol to// kye dus gsum rgyal ba kun gyi yang mes po// kun bzang nyag gcig dgongs pa'i lung 'di la// sangs rgyas sems can chos rnams ma lus pa// ye shes 'od gsal mchog tu ji ltar 'dus// zhes zhus so// de nas bcom ldan 'das dpal kun tu bzang po rig pa 'khor lo bsam gyis mi khyab pa zhes bya ba la snyoms pa zhugs nas 'di skad ces gsungs so// rgyu med rkyen bral rang byung dbyings// rang byung rig pa dbyings kyi don// 'byung 'jug med pa'i dbyings la gsal// gsang ba dam pa nyid du bshad// chos rnams kun gyi rang bzhin ni// rang byung rig pa mu mtha' med// rtsol ba'i yul bral dmigs pa med// bya btsal med pas cir mi dgongs// kun gyi rang bzhin nyag gcig la// 'dod sbyor blo yis goms ltar snang// de ni rig pa mu mtha' med// sangs rgyas sems can gnyis med de// gsangs ba'i dbyings la 'khrul pas brtags// ye shes rdzogs pa'i lung nyid kyis// snang srid sems su gtan la phab// 'gro drug zhen pa'i brtags pa yang// spro bsdu dbyings nyid gsal ba'i ngang// btsal cing spyad pa cir brtags kyang// snying po rang byung dbyings la thug/ lta dgu rang byung nyag gcig la// gang ltar bltas pa'i tshul snang yang// de nyid bsam med ngang du gsal// spyod pa'i bsam pas ci spyad pa// rnam rtog so so'i bag chags kyis// de lta de lta nyid du snang// ma skyes 'khor lo mnyam du gsal// sum brgya drug cu la sogs pa// dbang po bye brag khyad par gyis// bsrung dang mi bsrung kun bral la// gcig pas bsrung dang mi bsrung med// rang byung rig pa'i rgyal po la// rdzas dang mtshan ma sngags rtsol pas// cha gnyis rig pas rtsal bskur yang// rgyal thabs rig pa rang 'char lung// sgrub dang mi sgrub cha 'dzin cing// dngos grub nam mkha'i mtha' bzhin du// btsal yang rang byung dbyings la thug/pha rol phyin dang bsdu ba bzhi// lam dang sa yi rang bzhin la// ci btsal ci sgrib ci bgrod kyang// rang byung rig pa gcig la rdzogs// ma bsgribs gsal ba'i rang bzhin la// sgrib dang mi sgrib mnyam pa la// gnyis 'dzin phyal bar mi dmigs pas// ye shes gsal ba'i rang bzhin yin// rang byung rig pa'i dkyil 'khor la// phyogs dang mtha' dbus chos mi gnas// grangs med rgyal ba'i dkyil 'khor yang// rig pa'i 'khor lo nyid la 'dus// rang byung rig pa ma shes na// me tog bdug spos lha bshos nyid// phul kyang rgyal ba ga la bzhes// rang byung ye shes mchod pas khyab// grangs 'das zhing khams sku gsung thugs// ma bskyed rang byung 'bras bu la// smin med nyi ma'i 'od ltar rdzogs// bskyed pa med par ye nas gnas// kye sems dpa' chen po de legs par nyon cig/ nga la ma lta yul med kyis// spyad dang mi spyad med pas na// phyag rgya mi 'ching sngags mi zlaus// smra ba'i tshig dang dag mi 'chol// sa la ma bgrod lam dang bral// ye dbang thob pas dbang ma bskur// btsal med nyid la da ma rtsol// mi gsal med pas ye shes nyid// dkyil 'khor mi bskyed sems mi bsgom// mchod pa mi bya sbyin mi gtang// gang yang mi bya byas pa nad// 'ching ba ci yang ma byed cig/ bsams pas mi bya de bzhin gnas// ma rtsol gyis na nyid du gnas// nyi ma 'od 'bar dbyings la gnas// ma skyes rig pa'i 'khor lo la// ma skyes 'jigs pa med pa'i don// nya mo gsang ba'i dkyil 'khor la// mtha' dag dbus dag gdod nas dag/nya yi spyod yul ji bzhin du// gang ltar gnas pa de ltar bde// rang 'byung ye shes skye 'jig med// lhun grub phyogs ris med par grub// gsang ba'i 'khor lo rig par 'brel// spros bral sems kyi rang bzhin ni// ma skyes rig pa cir mi dgongs// thams cad gcig gi rang bzhin las// g.yo ba med cing cho 'phrul 'byung// rang byung thugs rje g.yo med kyis// ji ltar 'dod pa char du 'bebs// ston pa kun bzang rang bzhin ni// phyi nang snod bcud kun la khyab// sems dbyings byang chub sems kyi ngang// 'bras bu nyid kyi 'bras bur gsal// sems kyi rang bzhin bstan pa ni// mi gnas bsam pa'i yul las 'das// dmigs dang mi dmigs yul dang bral// mtshan med skye 'jig kun dang bral// kun la nya mo 'khor lo la// 'pho 'gyur med pa'i rang bzhin gnas// sems kyis sems btsal sems mi rnyed// sems bskyed sangs rgyas rdzogs pa'i lung// rang sems snying po skye ba med// gdod nas snying po byang chub la// mi btsal rang bzhin kun tu gnas// zhes gsungs so// nya mo 'khor lo'i rgyud las/sems rang bzhin bstan pa'i le'u ste bzhi pa'o//// de nas yang byang chub sems dpa' rdo rje snying pos 'di skad ces gsol to// spyad med gsang ba'i rig pa la// spyod pa bsam gyis mi khyab na// gang ltar spyad pa bde ba'i thabs// bdag cag rnams la bstan du gsol// zhes zhus so// de nas bcom ldan 'das dpal kun tu bzang pos spyad med rig pa'i don bka' stsal ba/ byang chub sems kyi rang bzhin ni// sus kyang shes par mi rung ste// ye shes 'khor lo gsang ba'i ngang// zab cing thig le yongs kyi zlum// gang yang mtshon du med pas na// kun bzangs rgyal bar rtags dang bral// shes dang shes bya'i yul spangs pas// thig le chen po gcig gi ngang// ye shes 'khor lo kun la gsal// 'dzin rtog med pa nyid kyi ngang// sa bon rgyu dang len med pas// rang 'byung 'du 'bral med pa'i dbyings// drug gi dngos po dang bral bas// thig le ma bcos dkyil 'khor de// gzhan med bdag nyid gsang ba'i dbyings// drug gi spyod yul med pas na// so so'i skye bo'i shes yul min// dbyings dang ye shes tha snyad pas// rang byung rig pa'i don dang 'gal// ye shes kun kyang 'dus byas pas// rgyu med rang byung don mi mthong// sku gsum mtshan ma'i tshig yin pas// sku gsum grangs kyi rnam pa med// mtha' dbus med las kyang 'das pas// ma skyes de bzhin nyid las 'das// sangs rgyas rtags pa'ang tha snyad na// gnyis 'dzin tha snyad smos ci dgos// sgom zhing btsal ba kun stong pas// blo yi 'du shes bsam du'ang med// byang chub nyid kyang tshig yin te// mtshon pa'i khyad par ma rtogs pa// cir rtags mtshan ma tshig gi lam// snying po'i don la mtshan ma med// rnam bral mchog dang bar mtha' med// rnam grangs med pas dbyings nyid klong// thams cad gcig tu rdzogs pa na// rdo rje snying po rdzogs pa'i lung// kun 'dus snying po thig le la// 'phros shing 'dus pas kun dang bral// rang byung thabs kyi spyod pa ni// gang ltar yin pa de ltar yin// de kho na nyid gsang ba'i lam// mi 'byung mi 'jug yang dag yul// rang byung rig pa yul med de// gal te 'jug na bslad pa yin// ji bzhin rang byung 'od gsal la// dus gsum rtags pa'i spyod pa med// snying po rig pa'i thig le la// gzung 'dzin spros pa rnam par bcad// phyogs bral phyogs med ye shes gsal// gzugs sogs dbang po spyod yul ba// btags dbang gis ni de ltar snang// blo bur rtog pa'i dbang gis na// rang gsal mun pa'i bags kyis bsgribs// mtshan bral chos kyi dbyings nyid la// rnam rtog mtshon pa'i chos mi gnas// dbang sgyur rig pa smra bsam 'das// mtshan bral kun tu bzang po ni// kun khyab kun gzhi rnam gsal bas// drug sogs ngo bo kun gyi gzhi// kun kyang rig pa gcig la rdzogs// 'gro don thabs kyi spyod pa yang// 'khrul pa yin phyir bya ba med// gang na'ang btsal med snying po la// chos sku nyid kyang tshig gi lam// phra zhing dbang po yul med pas// rtog spyod mtshan ma'i yul las 'das// ma skyes pa nyid skye ba'i mtha'// de nyid don la de dag med// sangs rgyas snying po dag pa las// dbus mtha' mi dmigs rtogs las 'das// gang zag chos la bdag med pa// stong nyid ye shes lhun grub pa// yid kyi spyod yul rnam par zhi// thog ma tha ma spros med pa// de bzhin nyid du 'dus pa nyid// ma skyes don mthong snying po'i lam// ma bcos rig pa'i rlung la gnas// btsal ba med par lhun gyis grub// mchog gsum rig pa gcig gi ngang// mtha' dbus gzhi rtsa kun bral bas// snying po gsang ba thog ma'i lam// rang bzhin gnas pa'i don zhes bya// ma btsal lhun gyis grub pa'i phyir// rtsol spyod bral ba'i dbyings la 'jug/ chos kun rang bzhin rnam par dag/ma mthong ma skyes skye 'jig med// stong nyid rdo rje snying po la// sgyu ma yin dang ma yin zhes// mtha' bral don la mtha' yin rtsod// de don bstan du rung ma yin// byang chub bdag med de bzhin nyid// mi gnas mi dmigs bsam yul bral// ma skyes snying po gang mthong ba/ ma mthong ba nyid mthong ba'i lam// mthong bas btsal med lhun gyis rdzogs// zhes gsungs so// nya mo 'khor lo'i rgyud las// rig pa spyod yul dang bral bar bstan pa'i le'u ste drug pa'o//// de nas byang chub sems dpa' rdo rje snying po la chos kun 'dus pa'i 'khor lo'i don zhu ba 'di skad zhus so// chos kun 'dus pa'i snying po la// 'khor lo'i rnam pa mi gnas na// 'khor lo zhes ni ji ltar mtshon/ khyed kyis nges par bshad du gsol// zhes zhus so// de nas dpal kun tu bzang pos 'khor lo rnam pa med pa zhes bya ba 'di gsungs so// chos kun gang yang mi dmigs pa// de nyid don gyi snying po ste// ma skyes tshig bral don la bzhugs// 'khor lo de bzhin nyid gnas pa// mi 'gag mtshon pa'i 'khor lo can// skye med rang byung dkyil 'khor de// ma mthong rig pa dbyings la gsal// mi gnas sems kyi rang bzhin ni// ma bcos gsang ba'i dkyil 'khor yin// mi bskyed 'khor lo dbus gnas pa// sku gsum gyi'ang rnam pa med// dus gsum sangs rgyas snying po nyid// dkyil dang 'khor gyi tha snyad bral/ khams gsum snod bcud mtha' yas pa// byang chub sems kyi dkyil 'khor yin// 'dod chags zhe sdang gti mug dang// nga rgyal phrag dog chen po yang// rang byung sems nyid ngo bo bas// snying po mchog gi dkyil 'khor ro// chos sku nyid du'ang mi lta na// gzugs sku dkyil 'khor 'khrul pa'i lam// ye nas ting 'dzin gsal ba la// sku gsum mtshan ma kun dang bral// ye nas mtshan bral chos nyid la// zhi dang khro bo nor ba'i lam// zhi ba mchog gi dkyil 'khor la// mtshan ma'i zug rngu gsal du med// ye sangs rgyas pa'i chos nyid la// da ltas rgyas byar ga la yod// ma bskyed lhun grub dkyil 'khor la// rim bskyed dkyil 'khor byed pa la// yum bzang yum gyi dkyil 'khor la// snod dang gzhal yas bya dang bral// sgril med rang byung rig pa la// ting 'dzin dkyil 'khor cir mi bsam// ma bskyed rig pa'i dkyil 'khor la// sku gsung dkyil 'khor dbye ba med// gnyis med thig le 'od dpag med// bden dang brdzun med chos dbyings la// gnyis mthong 'khrul ba tha snyad chad// ci yang bskyed pa mi mnga' bas// rtsol ba'i chu bo kun las brgal// rims kyis ma yin cig char gsal// rnam par mi rtog grol ba'i lam// mi sbyong mi sbyor rig par gsal// mi rtog ting 'dzin dga' dang bral// 'dzin pa'i dra ba rnam par bcad// gser gyi 'khor lo 'bar ba ltar// kun tu bskor yang dbyings la 'dus// lhun gyis grub pas mi rtsol te// yul med rig pa lta dang bral// bgrod med rig pa gcig la rdzogs// rang gsal lung la sgom mi byed// ye nas dag pas sgrib mi sbyong// rang yin rig pa yul mi tshol// spang med rig pa'i sems nyid la// dgag dang sgrub pa'i chos mi gnas// rdzogs pa chen po'i dkyil 'khor la// 'jug dang mi 'jug gnyis med cing// sbyang zhing sgrub pa'i chos med pas// ti ni 'khor lo rig pa sbyor// sangs rgyas sems can gnyis med pas// spyan drangs ma yin gdod nas gnas// bgrod med spyod bzhin ma chags pas// pad+ma spyan gyi sa zhes bya// chos rnam kun gyi rang bzhin nyid// rnam pa kun ldan ngo bos stong// chos rnams ma lus thams cad kun// gnyis med rig par sbyor ba'i tshe// go bar gyur pas ma yengs don// ye nyid byang chub sems nyid la// rgyu 'bras dbyer med gcig tu 'dus// tshig dang yi ge las 'das pas// snang srid thams cad ye sangs rgyas// btsal med thig le ngang la gnas// rang bzhin gyis ni rnam dag cing// mkha' ltar dag pa'i dkyil 'khor la// mi dmigs mi gnas chos kyi dbyings// 'gro 'ong mi dmigs cir mi gnas// 'khor dang mya ngan 'das pa'i chos// ma bcos pa ni ji bzhin nyid// rang rig rig pa yul la bral/ khyad par ji bzhin pa zhes bya// snang med rig pa'i dbyings nyid ni// ye nas dmigs pa'i yul las 'das// spyod las 'das pas spyad du med// sgra dang ming tshig 'das pas na// brjod pa'i tha snyad kun las 'das// ye shes rtags bral chos kyi dbyings// gang yang mi gnas mthar mi gnas// rdo rje 'od gsal dkyil 'khor ni// sku gsung mtshan ma'i tshig las 'das// skye med rang byung dkyil 'khor ni// rang byung 'khor lo mtshon dang bral// zhes gsungs so// nya mo 'khor lo'i rgyud las/ ye shes 'khor lo mtshan ma med pa'i le'u ste bdun pa'o//// de nas yang byang chub sems dpa' rdo rje snying pos/ dpal kun tu bzang po la 'di skad ces zhus so// rang byung rig pa'i khyad par la// bskur thob bya ba mi gnas na// rim pa'i dbang ni ji lta bu// 'dus pa'i tshogs la legs par gsungs// zhes zhus so// de nas dpal kun tu bzang pos rig pa thal phyungs ye shes 'khor lo zhes bya ba la bzhugs nas 'di skad ces gsungs so// 'khrul pa'i rgyu bral mi gnas pas// 'khor dang mya ngan 'das pa med// rnam rtog mtshan ma mi gnas pas// 'khor ba ye sangs rgyas pa'i sa// sangs rgyas sems can gnyis med pas// rdo rje 'gro don bya dang bral// rig pa'i rtsal gyis kun khyab pas// bskur rtsol thob pa'i dbang mi dgos// rig pa'i rgyal po ye dbang la// brda don sprad pa'i khyad par gyis// rin chen gsal byed ji bzhin du// rna brgyud rgyal thabs tshangs ba'i dbang// bskur thob med par rang bzhin gsal// rang bzhag gsal ba'i sems nyid la// ji bzhin rig pa nyid kyis go/ chos so cog gi rang bzhin ni// sems nyid ma yin chos mi gnas// gnyis med gcig gi don la ni// yin dang ma yin chos med de// rdo rje rig pa'i rang dbang la// bskur thob ces pa'i chos dang bral// rang sems bcos med snying po la// 'jug dang mi 'jug kun dang bral// rdzas dang ting 'dzin khyad par gyis// ye gnas rang byung chen po la// rtsol ba'i khyad par ci bstan pa// de dag rnam rtog 'khor ba'i lam// rgyal thabs rig pa'i don med na// rang sa'i dbang de mthar ma phyin// rtsol ba'i lam de thar ba med// chags pa'i dbang des thams cad 'ching// nor ba'i tshul des 'khor bar ltung// gsang ba'i thabs dang mi ldan na// rang gnas rig pa'i don mi mthong// bskur med gsang ba'i rang dbang la// bskur dang rtsol ba'i gol sa de// de bzhin thabs dang bral ba yis// bskur med ma shes sgrib pa yin// gol sgrib gnyis kyi mtha' gsal te// rang byung byang chub snying po la// ma yengs rang bzhag rig pas gnas/ khams gsum srid gsum thig le gcig/ spros med bsdu med yengs ba med// rgyal thabs gsang ba'i khyad par gyis// rang byung rig pa shugs kyis gsal// kun nas gsang ba'i 'khor lo la// 'jug pa'i dkyil 'khor nyams kyis gsal// ci yang yin no su yang rung// kun kyang thig le chen po la// bde chen gsal bas gol sgrib med// gdod nas rdzogs pa'i rang bzhin la// btsal ba'i khyad bar gang zhig yod// sUr+ya 'od dang tsan tra ltar// gdod nas ma bsags lhun gyis rdzogs// rig pa dbang gi khyad par yang// gzhi lam 'bras bu tshul dag gis// dngos la khyad par mi gnas na// bsam pa'i ngo la so sor grags// ye nas 'gyur med lhun grub la// ji ltar snang ba dbang gi klong// rig pa rang dbang de ltar bsgyur// bcos med dbang gi rang bzhin no// gsal byed brda yid don nyid kyis// ma bcos gsang ba'i don 'di la// mkhas pas shes pa tsam zhig tu// dngos la mtshon pa kun dang bral// 'bras bu rin chen 'bar ba ltar// mthar phyin gzhi nas rdzogs pa'i phyir// btsal med lhun grub chen po la// rig pa thabs kyis 'dod dgur bsgyur// 'di yang thabs ldan rig pa'i dbang// gsal bar shes te dmigs dang bral// brjod bral sems kyi rang bzhin la/ mos pa'i khyad par ji bzhin du// de ltar sgra dang tha snyad du// 'dul ba'i dbang gis gnas pa de// rang byung sems kyi ngo bo la// bkag pa med do mngon sum dbyings// rang bzhin sgyu ma rtags sgyu ma// ltos pa'i ye shes sgyu ma dang// sgyu ma rdo rje btsan po mchog/ 'di kun kun brtags 'khor ba'i lam// gsang ba'i rig pa'i thabs ldan na// rin chen 'od gsal snying po ltar// ma rig log pa'i chos mi gnas// 'khor ba 'od gsal bde chen la// rnam rtog sgrib pas ci la sgrib// gdod nas btsal bral lhun grub la// zhen pa'i 'dzin rtog ci zhig nad// rang sems bcos med chos skur sprad// 'dod spyod longs spyod rdzogs pa ste// don byed sprul ba'i tshul gyis ni// sprad pa gsum zhes bya ba yin// ma bcos gsang ba'i sgo mo dang// mtshon pa tshig gi sgo mo dang// rig pa lhun gyi grub ba'i sgo// thos pas phye zhing bsams pas 'grol// bsgoms pas rnyed pa lde mig go/ mthong dang ma bcos mi gnas dang// mi 'gag nyams myong rjes mi 'breng// rdzogs chen sgom pa'i yan lag drug/ rig pa man ngag gsang ba ni// 'gyur med gsum gyi dgongs par bshad// rnam par dbye dang la bzla dang// de nyid sprad dang don 'byin dang// nges pa gcig tu bshad pa ni// rdzogs pa sems kyi rang bzhin bshad// drang don nges don gnyis nyid kyi// brgyad dang dgu dang gcig bstan pas// rdzogs pa'i sems kyi rang bzhin la// nges pa gcig tu bshad pa'o// zhes gsungs so// nya mo 'khor lo'i rgyud las/ rgya thabs gsang ba sgo'i le'u ste brgyad pa'o//// de nas byang chub sems dpa' chen po rdo rje snying po des/ bcom ldan 'das dpal kun tu bzang po la 'di skad ces gsol to// e ma sangs rgyas thams cad kyi// rdzogs pa sems kyi rang bzhin la// grub sgrub khyad par mi gnas na// de ltar rtogs tshul bshad du gsol// zhes zhus so// de nas dpal kun tu bzang pos lhun gyis grub pa gsang ba'i 'khor lo zhes bya ba'i ting nge 'dzin la snyoms par zhugs nas 'di skad ces gsungs so// kye sems dpa' chen po nyon cig/ dus gsum sangs rgyas thams cad kyi// rdzogs chen sems kyi rang bzhin ni// chos kun 'dus pa'i snying po ste// kun 'dus gsang ba'i 'khor lo nyid// lhun grub gsum gyi ngo bo la// zin chags rtsol ba'i chos mi gnas// mi gnas sems kyi rang bzhin ni// kun gyi rgyu 'bras 'dus pa'i lung// rdzogs pas rtsol sgrub kun dang bral// ye nas yin pas dang mi rtsol// sgrub tu med pa'i rtsol sems bral// smon du med pas rang la rdzogs// dmigs su med pas yul dang bral// gnyis med gcig ste rnam pa med// bde sdug med pas spong mi byed// rang byung rig pas dgag pa med// ye nas dag pas sgrib mi sbyong// gnyis med ngang la gnyis mi 'dzin// lta spyod so so gcig dang 'gal// gcig pas spong len kun dang bral// rim pas ma bskyed rdzogs pa'i ngang// sku gsung 'khor lo mtshan ma'i lam// ye nas rdzogs pas bskyed du med// spyan drangs ma yin ye nas gnas// ye nas thob pas grub mi rtsol// mchod dang sbyin pa med par rdzogs// ma bsgrubs lhun gyis grub pa la// rtsol ba'i spyod pas ci zhig bya// thabs bral gsang ba'i rgyas btab pas// rtog ge'i phyogs 'dzin 'dis mi shes// btsal bral lhun grub ye shes la// phyogs mtshams nges pa'i chos mi gnas// 'du shes 'dzin pa kun bral zhing// ma bcos dag pa nyid du gsal// ye nas dag pas mi sbyong zhing// rim pa ma yin dus gcig gsal// gang mtshon thabs kyi khyad par gyis// btsal med lhun gyis grub pa mtshon// gsal byed don de dbyings la 'dus// gang yang sbyang zhing sgrub med de// byas pa thams cad 'khrul pa'i lam// rin chen 'bar ba'i byin brlabs ltar// ma btsal lhun gyis grub par gnas// ye nas ma byas rang bzhin gsal// 'gro 'ong med pa'i rang bzhin ni// rig pa spros bral sems nyid do// 'byung 'jug med pa'i dbyings de nyid// chos rnams kun gyi rang bzhin shar// rang rig ma bcos ji bzhin nyid// nam mkha' lta bu'i rang bzhin te// byas bsam dmigs pa kun las 'das// gang yang ma yin de bzhin nyid// rnam dag lhun grub gsang ba la// rig pa ma bcos gsal bas grub// ma bsgrubs dag pas ye nas gnas// bsam spyod mtha' las rnam grol zhing// ma bsams spyod pa'i yul med de// bskor zhing rang byung dbyings la thug/'phel zhing sgrib pa'i chos med de// sems nyid ye gsal rtag pa'i sku// ye nas 'od gsal rang bzhin pas// bsgribs dang ma bsgribs chos dang bral// rang byung rdzogs pa'i rang bzhin pas// rgyu rkyen med par rang byung sems// dmigs shing bsam pa'i yul med pas// 'du shes mtshan ma kun gyi stong// sangs rgyas sems can gnyis med pas// lam dang btsal bas sbyang du med// gnyis med 'od kyis kun bdal bas// gsal dang mi gsal gnyis ka med// dang por 'khrul pa'i rgyu med pas// 'khor ba spang dang gsal ba med// dus gsum sems su gcig rdzogs pas// brtags pa'i tha snyad kun gyis stong// nyon mongs ta la'i mgo bcad pas// 'khor ba rtsad bcad ye sangs rgyas// rnam rtog mtshan ma cir snang yang// ye shes 'od gsal nyid las med// rig pa ma bcos rlung ltar bzhag/ spyod lam ma bcos lhug par bzhag/ma yengs btsal bral dgongs pas bzhag/ dgongs ba'i bzhag tshul gsum du bshad// brda don sprod dang phrad pa dang// klung zhugs phral ba'i don gsum gyis// ma bcos gsang pa'i don la sbyor// dngos la gcig pa'i tshul du gnas// bcos dang ma bcos don nyid ni// gang zag bsam pa'i khyad par gyis// rim pas bgrod dang gcig tu rdzogs// gsang ba'i don du dbye ba med// rjed 'brang gnyis kyi tshul gyis ni// bcos ma med pa'i don gyis bzhag/ rang bzhin rnam pa mtshan nyid kyis// lhun grub gsum la goms pa yis// sku gsum rig pa'i don la sbyor// brtags pas phye ste don du gcig/gzhi dang lam dang 'bras bu ni// de de bsam pa'i dbang gis na// ji ltar 'thad par snang bas te// dngos po dag la dbye ba med// tshig dang don gyi khyad par las// mtshon dang de nyid gsal gyur pas// gsal byed rin chen 'bar ba bstan// lag mthil gter dang sprad pa zad// sku gsung rang la lhun rdzogs pa// sprad pa gsum gyi don la sbyor// rim gyis sbyong dang cig car 'jug/ drang dang nges par bstan pa'i lung// mngon sum gsal dang rgyud pa'i thabs// 'jig rten 'das dang 'jig rten pas// mtshan ma sgra yi 'khor los mtshon// sems nyid rdzogs pa'i rang bzhin ni// bshad pa'i yan lag brgyad yin no// ma 'dres yongs su rdzogs pa dang// chos kun rang bzhin gcig pa dang// dgongs pa'i don la bzhag pa ni// phyi nang gsang ba'i sgo gsum yin// cir snang ye shes lhun rdzogs pas// rgya mtsho'i rlabs dang 'dra bar bshad// chos kun rang bzhin nyid rdzogs pas// rin chen gser gling lta bur bshad// gsal la mi g.yo mnyam nyid pas// dgongs pa nyi ma shar bar bshad// gsang ba'i rang byung dgongs pa la// rang bzhag rig pas gnas par bya// mi g.yo rig pa'i dkyil 'khor du// ci yang yin no gang yang rung// 'dzin med rig pa mngon sum dbyings// ma bsgrubs lhun gyis grub pa la// btsal zhing bsgrub par gdod nas stong// zhes gsungs so// nya mo 'khor lo'i rgyud las/ sgrub med lhun rdzogs kyi le'u ste dgu pa'o//// de nas yang bcom ldan 'das de bzhin gshegs pa lhun gyis grub pa la/rdo rje snying pos gsol ba btab po// dug gsum ma btsal byang chub sems// 'gyur med sems kyi rang bzhin la// bgrod med lhun grub gsang nyid kyis// lam gyi rang bzhin gsal bar gsungs// zhes zhus so// de nas de bzhin gshegs pa lhun gyis grub pas 'di skad ces gsungs so// kye sems dpa' chen po/ btsal med sems kyi rang bzhin la// btsal zhing bsgrub ba zhen pa'i chos// bgrod bral sems nyid rdzogs pa la// lam lnga sa bcu rtogs pa'i nad// mtha' bral nam mkha'i rang bzhin la// bgrod pas phyin par ga la 'gyur// ma bgrod lhun rdzogs sems kyi sa// rang bzhin grub pas bcos pa med// gdod nas dag pas sgrib mi sbyang// lhun gyis grub pas tshogs mi sog/ zag med sems kyi rang bzhin la// sgro dang skur pa zhi ba'i sa// kun 'dus sems kyi me long la// rin chen 'phrul gyi nyams ldan pas// ma bgrod rig pa'i sa la sbyor// rdzogs pa sems kyi rang bzhin la// rtsol med che ba'i yon tan rnams// rang byung rig pa sems su rdzogs// ye nas rdzogs so btsal dang bral// snying po rang byung sems nyid la// 'du 'bral med pa'i chos mi gnas// sbyang med sa yi yon tan 'phel// lhun rdzogs sems kyi rang bzhin la// sa dang lam zhes gdags su med// phyogs ris rig pa'i chos dang bral// gsang ba'i 'khor lo thabs kyi sgo// lde mig gsang bas dbye bar bya// gang snang rig pa'i don la rdzogs// phye bas lcags bkrol thar pa'i lam// nges phyin gsang ba'i dbyings la zhugs// cir snang sems su lhun rdzogs pas// rnam par dbye ba'i chos dang bral// ye shes rdzogs lung gcig tu gsal// mtha' dbus zhen pa rnam par dag/ rig sbyor blo ni bsam mi khyab// ma spyad rig pa mchog gi bzhugs// ma yengs rang bzhag dgongs pa yin// mtha' bral dbu ma'i snying po la// dmigs 'jug rtsol ba kun dang bral// rtsal bral rig pa gsang ba'i sgo// sgra bral brjod med nyams kyi dbye// 'jug dang mi 'jug rnam spyad pas// dbyings nyid grol ba lam gyi phugs// 'jug med sa nyid lhun rdzogs pas// bgrod dang mi bgrod kun dang bral// ye nas ma bcos dag pa la// bcos lam bcos mas sbyang du med// yengs med gsang ba'i dgongs pa las// sgom dang mi sgom yul las 'das// mngon sum 'bras bur rang gsal la// drod dang rtags la ci ste brten// gsang ba lhun grub ye shes la// spong len dgag sgrub log pa'i chos// dgongs pa lhun grub gsang ba la// mtshan ma sgra yis ji ltar mtshon// sems kyi rnam grangs gang sgo nas// de nyid sgo nas ji ltar bstan// thabs ldan mkhas pa'i skyes bu yis// lag pa'i gter dang phrad par mtshungs// de nyid rtsa bral lhun grub lam// ma bgrod ye nas rdzogs pa'i lam// gsang ba kun 'dus gter gyi lam// bya bral rdzogs pas lhun gyis grub// gdod nas rdzogs pa'i rang bzhin la// rim gyis bgrod pa log pa'i lam// gsang ba ma bcos rang bzhin ni// drang bzhag rig pas klungs su 'jug/ rtsol ba'i lam gyis thob pa yin// ma btsal gdod nas dag pa'i thugs// bcos pa med de lhun gyis mnos// rdzogs pa nyi ma'i snying po ltar// ye rdzogs byin brlabs lhun gyis grub// gdod nas ma bsags lhun grub la// grub dang mi grub kun gyis stong// 'dod dgur bsgyur zhing thabs mi spong// drang gnas rig pa gter la spyod// ye nas kun 'byung lhun grub ni// nam mkha' gsang ba chen po ltar// phyogs 'dzin rim pas thob ma yis// ma bcings gsang ba thabs kyis grol// zhes gsungs so// nya mo 'khor lo rgyud las// bgrod cing sbyang du med pa'i le'u ste bcu pa'o//// de nas byang chub sems dpa' sems dpa' chen dpa' chen po rdo rje snying pos 'di skad ces gsol te// dus gsum sangs rgyas thams cad kyis// snying po dri med rnam par dag/ rang gsal ye shes nyag gcig las// rnam par phye ba'i dgongs pa gang// thugs rjes bdag la gzung mdzod de// nges pa'i don la dgod du gsol// zhes zhus so// de nas bcom ldan 'das dpal kun tu bzang pos/ ye shes gsal bar 'grel pa zhes bya ba'i ting nge 'dzin la gnas nas 'di skad ces gsungs so// kye sems dpa' chen po de legs par nyon cig/ rdzogs chen sems kyi rang bzhin la// dngos la dbye ba mi gnas kyang// bsam pa'i rtogs pa'i khyad par gyis// rnam par dbye ba'i tshul gyis mtshon// de nyid gzhi dang 'jug byed lam// rin chen lhun grub 'bras bur bshad// gdod nas dbyer med rang bzhin ni// kun gzhi rig pa'i 'od gsal de// ma bcos rang gsal lhun grub pa// bzhi pas gzhi nyid rdzogs lung bshad// 'jug pa thabs kyi lam 'di nyid// brda sprad gsang ba rig pa'i thabs// lta dang ting 'dzin spyod pa dang// dam tshig dbang dang sgrub pa dang// dkyil 'khor 'phrin las sgrib pa yis// rtsol bral rig pa nyid la sbyor// rang gsal theg pa'i snying po la// gnyis 'dzin rig pa mi gnas kyang// rang gsal shes rab gnyis gsal bas// lta ba gza' gtad bral ba'i lung// gnyis pa sems yul rig pas bstan// gnyis pa rig pa goms pa yis// brda phrad rig pa'i gdeng can gyis// ting 'dzin rang gsal lung 'jug pas// gsum pa ting 'dzin gter gyi lung// lta dang ting 'dzin gdeng ldan pas// rang gsal nyag gcig ma rtogs par// med phyir ltung ba'i 'jigs med pas// drug pa spyod yul bral ba'i lung// dus gsum de las mi 'da' zhing// ma yengs rgyal ba'i dgongs pa ni// dus gsum lhag pa'i sdom pa rdzogs// bcu bzhi'i rig pa dam tshig go/ dam tshig bsrung bral brda med pas// rig pa gnyis med cig car 'jug/ de yi brda phrad rig pa ni// brgyad pa dbang gi khyad par bshad// 'jug pa thabs kyi lam 'di dag/ brda phrad gsang ba rig pa'i thabs// lta dang ting 'dzin spyod pa dang// dam tshig dbang dang sgrub pa dang// dkyil 'khor 'phrin las bgrod pa yis// rtsol bral rig pa nyid la sbyor// rang gsal theg pa'i snying po la// gnyis 'dzin rig pa mi gnas kyang// rang gsal shes rab gnyis gsal bas// lta ba gza' gtad bral ba'i lung// gnyis pa sems yul rig pas bstan// gnyis pa rig pa goms pa yi// brda phrad rig pa'i gdeng can gyis// ting 'dzin rang gsal lung 'jug pas// gsum pa ting 'dzin gter gyi lung// lta dang ting 'dzin gdeng ldan pas// rang gsal nyag gcig ma gtogs pa// med phyir ltung ba'i 'jigs med pas// drug pa spyod yul bral ba'i lung// dus gsum de las mi 'da' zhing// ma yengs rgyal ba'i dgongs pa ni// dus gsum lhag pa'i sdom pa rdzogs// bcu bzhi rig pa'i dam tshig go/ dam tshig bsrung bral 'da' med pas// rig pa gnyis med cig car 'jug/ de yi brda phrad rig pa ni// brgyad kyi dbang gi khyad par bshad// brda phrad rig pa'i gsang nyams de// ma yengs 'bab chu'i tshul bzhin du// ma bsgrubs de ltar gnas pa ni// dgu pa gsang bas grub pa yin// ma bsgrubs rang gsal mnyam pa nyid// sku gsum 'khor lo bsam mi khyab// rig pas de ltar gsal gyur ba// mtshan med rig pa'i 'khor lo can// sku gsung mdzad pa mi 'gag kyang// bya bral 'phrin las lhun rdzogs pas// rtsal bral rig pa'i 'phrin las ni// bdun gnyis gcig tu nges par bstan// de ltar thabs kyi khyad par gyis// bgrod pas phyin par mi 'gyur gyis// ma bcos ye nas bla ma'i sa// sa lam bcu pa nyid du shes// 'bras bu lhun grub chen po la// ye shes ngo bo snang tshul de// de dag nges par dbye bar bya// rang gsal rig pa mchog gi nyams// thams cad gsal ba'i ngo bo ste// bcu gnyis ye shes rig pa'i lung// snang tshul nor bu rin chen ltar// phyogs ris mi mnga' lhun grub pas// ji ltar bltas pa de ltar snang// bcu drug 'bras bu gsang ba po// kun kyang thig le byang chub sems// rang gsal dri med gsang ba'i nyams// ma bcos rig pa mngon sum pa// thams cad 'dus pa lnga pa'o// zhes gsungs so// nya mo 'khor lo'i rgyud las// ye shes 'brel ba'i le'u ste bcu gcig pa'o//// de nas yang byang chub sems dpa' sems dpa' chen po rdo rje snying pos 'di skad ces gsol to// dus gsum sangs rgyas thams cad kyi// mkhyen pa'i ye shes spyod yul la// 'di dang 'di zhes mi gnas kyang// gsang ba'i ye shes bsam mi khyab// de nyid mtshon zhing shes pa'i phyir// bdag la nges par gsal bar gsungs// zhes zhus so// de nas bcom ldan 'das dpal kun tu bzang pos/ gsang ba'i rig pa bsam gyis mi khyab ba zhes bya ba'i ting nge 'dzin la snyoms par zhugs nas 'di skad ces gsungs so// kye sems dpa' chen po/ gsang ba'i thabs kyis mnyam sbyar nas// rang byung rig pa bsam mi khyab// rang byung rig pa nyag gcig la// yon tan khyad par bgrang med kyang// bsam pa'i tshul nas phye ba yis// mkha' la gza' skar bkram pa 'dra// gcig la snang zhing nyid du 'du// gsang ba'i 'khor lo dbye ba med// rig pa'i ye shes gsang ba la// dbye dang bsdu bar mi byed de// dngos la'ang de ltar mi gnas so// phyogs ris med pa'i ye shes ni// nam mkha' lta bur kun la khyab// mtshan nyid cig yang ma yin te// ye nas rig pas gsal bar shes// don de shes pas ye shes so// mi shes pa nyid ye shes te// bgrod pa rig pas gsal bar mthong// shes pa rgyu ba bcad pas na// de ma thag tu rig pa 'char// rang byung don la g.yo med mchog gi don// ma yengs gsal ba mngon sum du// rang nyams nyid la de ltar snang// ye nas rig pa'i 'khor lo la// rnam rtog zhen pa'i chos med pas// ye nas rang gsal ye shes te// bsgribs pa'i chos kyis gdod nas stong// stong nyid ye shes mtshan mas dben// chos dbyings ye shes ma bcos pa// me long ye shes mi rtog gsal// mnyam nyid rig pa sems su gsal// so sor rtog pa ma 'dres gsal// bya ba nan tan mthar phyin pa'o// rang byung ye shes rgyu rkyen bral// lhun grub ye shes phyogs ris med// bsam pa'i ye shes bsam mi khyab// rang gsal ye shes dmigs dang bral// gang yang ma yin de bzhin nyid// ma bcos sems kyi rang bzhin la// ma yengs gsal bar gnas pas grub// ma gzhag rig pas shugs kyis gsal// ma btsal chu ltar rnyog dang bral// bdag gzhan phyogs ris mi mnga' bas// phyogs med gsal ba'i ye shes so// mi 'phro mi bsdu rig par gsal// shes pa ma yin mi shes min// mtha' bral dbu ma'i lam du gsal// gsal ba'i ye shes mtha' dbus med// brjod bral ye shes sgra las 'das// thams cad ye shes yin pas na// gnyis pa ma yin rig par gcig/mkha' ltar dag pa'i g.yung drung la// sbyang zhing bgrod pa'i yul las 'das// spyad rtsol rig pas ci spyad pa// phyogs bcas 'khor ba'i lam du ltung// phyogs bral ye shes ma shar na// phyogs 'dzin gsang ba'i lam las gol// ma bcos gsang ba'i ye shes ni// rig pa rang gsal nyag gcig pa// ma bcos rnal du gzhag pas gsal// 'gyur med klong du zhugs pas gol// rang byung rig pa nyag gcig la// phyogs 'dzin zhen pa'i rtsol brgyad kyis// brtag bral ngang la cir ma brtags// gang ltar gzung ba phyin ci log/ 'du shes ma lus kun bral la// bsam zhing spyod pa'i yul las grol// kun 'dus gsang ba'i ye shes la// rtog spyod nam mkha' mtha' tshol 'dra// dus gsum rig pa rang gsal la// rdzogs pas dbye bas chos mi gnas// gang ltar gsal yang ye shes yin// zhes gsungs so// nya mo 'khor lo'i rgyud las// ye shes bstan pa'i le'u ste bcu gnyis pa'o//// de nas byang chung sems dpa'i sems dpa' chen po rdo rje snying pos 'di skad ces gsol to// kye ma sangs rgyas thams cad kyis// rang gsal nyag gcig dri med las// dngos po gsum du mi gnas na// rnam par phye ba'i dgongs pa gang// zhes zhus so// de nas bcom ldan 'das kyis lhun gyis grub pa'i ting nge 'dzin la snyoms par zhugs nas 'di skad ces gsungs so// kye sems dpa' chen po nyon cig/ chos kun rang byung rdzogs pa'i lung// bdag nyid lhun grub nyag gcig la// rnam par dbye ba mi gnas na// rtog pa'i ngo la gsum du byung// dngos nyid mi g.yo bde chen la// grangs dang mtshan ma 'dzin pa nyid// ye shes lhun rdzogs don dang 'gal// thams cad sems nyid snang bas na// sems ma yin pa'i chos mi gnas// nam mkha'i dbyings kyi tshul dang mthun// bdag gzhan mi mnga' phyogs ris med// rtog pa'i ngo la so sor snang// rtogs na rang gsal gcig las med// kun gzhi sems kyi rang bzhin la// brjod pa'i tha snyad kun dang bral// de nyid sgra yi 'khor los bstan// brjod 'byung sgra yi 'khor lor bstan// lam med rim med cig car 'jug/ mkha' 'dra'i sems la bgrod du med// rang byung rig pa rgyu rkyen med// kun 'dus rig pa sems kyi gter// 'od gsal rig pa dbyings la 'du// klaung dgu bstan pa'i sgo mo yang// sems nyid rig pa gzhi la rdzogs// ma bcos rdzogs pa'i rang bzhin ni// lhun gyis grub pa'i byang chub sems// ci yang yin no rnam kun bcas// gang ltar yin pa de ltar yin// thams cad khyab pa'i byang chub sems/ khyab par gsal la rang bzhin med// 'du 'bral med pas dbyings kyi lung// kun kyang mnyam nyid byang chub la// sgro dang skur pa ci zhig yod// de nyid ma yin mi gnas pas// kun kyang de dang mnyam du gsal// kun rdzogs bya bral rdzogs lung ni// gcig la kun tu khyab par bdal// gsang ba thabs kyi me long gis// gsal la 'dzin pa kun gyis dben// mdo 'dus sems kyi rtsa ba ni// chos rnams kun gyi snying po yin// rang byung mchog gi dgongs pa ni// bcos pa med do mkha' ltar bzhag/bsam bral mkha' ltar gnas pa ni// rig pa'i 'od gsal dbyings kyi ngang// sems kyis sgrib par mi bya zhing// glod na grol bar the tshom med// rdo rje dam pa'i rigs can la// mkha' ltar khyab bdal man ngag gis// gnang bkag med pa'i spyod ba bstan// 'di la grol 'gyur the tshom med// rdo rje bla ma mi 'dzin zhing// gsang ba'i man ngag 'phel 'gyur na// 'di la rdo rje dmyal ba'i gnas// 'grub 'gyur the tshom med par 'gro// dam tshig mi ldan rdo rje yang// gsang ba'i dam sri gang byed pa// rdo rje dmyal ba nyid kyi gnas// gnyis ka bar mtshams med par ltung// dad dang dam tshig ldan pa dang// mi g.yo sems la dad pa dang// gsang ba 'phel bar mi byed pa'i// rgyal tshab nges pa gcig la gtad// snod dang mi ldan slob ma ni// dam pa kun gyi dgra yin pas// bstan na 'jigs pa chen po nyid// mthong dang ma mthong gnyis kar byung// 'di la rang gsal klong gi don// 'phyar zhing gcam pas bshad byas na// de yi rnam smin ma bstan te// bstan na myos pa nyid du 'gyur// rdo rje dam pa'i rigs can la// rtsol bral rig pa sems kyi lung// yang gsang thugs kyi nyid khu 'di// rna brgyud 'phrul mig ldan pa yis// legs par sems kyi dkyil du bzhag/ mi g.yo gsal bar gzung ba yin// yon tan nam mkha'i mtha' dang mnyam// kun bzang rgyal bas mchog tu gsungs// zhes gsungs so// nya mo 'khor lo'i rgyud las/ thams cad 'dus par bstan pa'i le'u ste bcu gsum pa'o//// de nas yang byang chub sems dpa' rdo rje snying pos bcom ldan 'das dpal kun tu bzang po la 'di ska ces gsol to// dus gsum sangs rgyas thams cad kyis// sku gsung gsang ba rig pa ste// phyogs med bsrung bral dam tshig 'di// 'dus pa'i tshogs la legs par gsungs// zhes zhus so// de nas yang bcom ldan 'das kyis 'da' ba med pa'i ting 'dzin la snyoms par zhugs te 'di skad ces gsungs so// kye sems dpa' chen po legs par nyon// dus gsum sangs rgyas thams cad kyis// srung sdom dam tshig mtha' yas pa// sku gsung thugs su nges par 'dus// de nyid rig pa'i dam tshig go/ de nyid lhag pa'i dam tshig bzhi// ma bcos lhun grub dam tshig la// bsrung dang mi bsrung phyogs bral bas// 'da' ba med par lhun gyis rdzogs// bdag nyid rig pa ma yin pa// bsrung dang mi bsrung med pa'i phyir// gnyis ka ma yin phyir mi dgongs// bsrung bral rig pa'i dam tshig ni// bsrungs pas mkhan la tshad 'dor 'dra// bsrung du med pas mi bsrung zhing// de nyid ma 'dzin 'dzin dang bral// nam mkha'i mtha' ltar bsrung med pas// nam mkha' rdo rje dam tshig mchog/ ye nas thub pas bsrung du med// gsang ba'i rig pa'i dam tshig la// bsrung dang mi bsrung log pa'i chos// bsrungs pas grub pa ma yin zhing// de bzhin ma bsrungs 'da' ba med// 'gro 'dul thabs kyi dam tshig la// mi bsrung med pa'i don rtogs nas// kun thub thabs kyi dam tshig ste// ji ltar mthun pa de ltar yin// bsrung dang mi bsrung chos med pas// nam mkha'i rgyal po'i dam tshig 'di// phyogs med bdal ba ma bcos dang// gang zhig phyogs su srung ba ni// ched byas phyogs 'dzin bsrung ba'i chos// phyogs bcas 'khor ba'i dam tshig yin// ma bcos gsang ba'i dam tshig la// phyogs ris che chung yongs kyis med// mkhyen pa'i phyogs bral dam tshig ni// ma bcos ngang la rdzogs par ldan// kun 'dus sems kyi me long la// sgrib pa med par rang bzhin 'char// dus gsum mnyam par rang gsal dang// ma 'dres khyad par so sor gzigs// ji bzhin pa dang ji snyed pa// snying po rang gsal rdzogs pa'i lung// sems kyi lung la gnyis med kyang// ji ltar bltas pa de ltar snang// 'gro 'dul phyogs med dam tshig la// mdzad pa ngos gzung mi mnga' ste// de nyid mthong tshul khyad par gyis// phyogs ris med par rang bzhin 'char// ji ltar sna tshogs 'dul gyur ba// de lta de ltar mngon par snang// ji bzhin nyi la phyogs med bas// thugs rje rang snang phyogs ris med// bdag nyid chen po kun 'dus pa// rang gsal gcig las 'das pa med// gcig po ye shes rdzogs pa nyid// rnam par 'byed pa'i chos dang bral// de nyid rig pa'i dam tshig ste// ye shes gsang ba'i ngo bo yin// dri med dam tshig chen po la// rnam rtog zhen pa'i chos mi gnas// sems nyid rdzogs pa'i rang bzhin la// kun rdzogs rang gsal snying por rdzogs// gcig pu'i ngang las mi 'da' na// rdzogs chen dam tshig chen po nyid// gcig bu yin par rab tu bsgra gas// lhun grub dam tshig chen po la// ma bsrungs rdzogs pas rang bzhin tshang// phyogs ris med pas lhun gyis grub// btsal du med pas lhun gyis grub// gdod nas rdzogs pas lhun gyis grub// bsrung bral lhun rdzogs dam tshig la// gang ltar bsrungs pa phyin ci log/bsrungs med chos la bsrungs pas bslad// btsal med chos la rtsol bas bcings// 'dzin med chos la 'dzin pas gzung// gcig gi don la gnyis su spyad// bgraud rtsol bral ba'i dam tshig la// bgrod pas ltun grub dam tshig 'khrul// bya bral chos la byas pas nor// de phyir dam pa'i rdo rje yin// lhag pa'i dam tshig mi ldan na// phyogs kyi dam tshig gang srungs kyang// sprel ma g.yang du lhung ba bzhin/khams gsum 'khor ba'i gnas su ltung// zhes gsungs so// nya mo 'khor lo'i rgyud las/ lhun grub bsrung bral rig par rdzogs pa bstan pa'i le'u ste bcu bzhi ba'o//// de nas byang chub sems dpa' rdo rje snying po des 'di skad ces gsol ba btab bo// dus gsum sangs rgyas thams cad kyi// sku gsung thugs kyi mdzad pa la// brjod pa'i mtshan ma mi mnga' yang// dman pa'i blo la ci 'tsham par// 'phrul tshig sgra yi pra krid kyis// btsal med sems kyi'i 'phrin las 'di// 'dus pa'i tshogs la bshad du gsol// zhes zhus pa las/ de bzhin gshegs pa kun tu bzang pos 'di skad ces gsungs so// kye sems dpa' chen po/ btsal med sems kyi rang bzhin la// bya byed 'phrin las mi gnas kyang// lhun grub sems kyi byin brlabs las// btsal med 'phrin las phyogs bcur bdal// bya bral rdzogs pa'i 'phrin las ni// yin no dgag bral lhun gyis grub// chu dang rol ba lhun grub bltar// byas pa med par rang bzhin gsal// btsal bral sems kyi 'phrin las ni/ khyab par gsal la dngos po med// dper na nyi ma'i 'od dang mtshungs// gsang ba rig pa'i rjes su mthun// byas ba zin pas bya mi dgos// lhun gyis grub pas btsal mi dgos// ye nas dag pas sbyang mi dgos/ khams gsum rig par gcig pas na// 'phrin las rnam bzhi bya mi dgos// 'gro drug sems su sangs rgyas dang// snying rjes 'gro don bya dang bral// ye nas byar med bya dang bral// dngos la de ltar mi gnas kyang/ khyab pa'i gdul bya'i snang ba la// lhun grub rin chen 'bar ba ltar// btsal med byin gyis brlabs kyis 'byung// gdul bya'i dus na skabs kyis mthun// lhun grub dus na phyogs ris med// sku gsung mdzad pa mtha' yas pa// lhun grub sems kyi mdzad pa yin// lhun grub mdzad pa ma rtogs na// phyogs 'dzin mdzad pas don mi mthong// bya bral gsang ba'i mdzad pa ni// gang yang min no de ltar yin// thabs ldan rig pa gter gyi dbyings// bag yangs thabs la 'gag pa med// ma rig log pa drangs thabs su// thabs kyi mdzad pa bsam mi khyab// mu stegs dman pa'i mdzad spyod kyang// rol pa bde mchog nyid yin na// gzhan lta smos pa ci zhig dgos// gsang don btags na bde ba'i sa// de ma thag tu lhun gyi grub// ma chags thabs kyi mdzad pa ni// ci yang yin no gang yang rung// ma bcos thabs kyi 'phrin las la// bya dang mi bya ci la yod// bdag med gzhan med rig pa'i klong// bsam zhing spyad med de bzhin nyid// phyi nang kun bral chos kyi dbyings/ khyab par gsal la ngos gzung med// mi 'byung mi 'jug dgongs pa'i klong// bya med ma ma yengs dran bsam bral// rang gzhag rig pa gyi nar gnas// bya bral rig pa'i 'phrin las te// ma bcos rig pa thabs kyi sa// zhes gsungs so// nya mo 'khor lo'i rgyud las/bya btsal bral bar bstan pa'i le'u ste bco lnga pa'o//// de nas yang byang chub sems dpa' rdo rje snying pos/ bcom ldan 'das la 'di skad ces gsol to// kye ma sangs rgyas thams cad kyi// rang byung nyag gcig dri med la// rtsol zhing sgrub pa'i chos med pa'i// rang byung 'bras bu ji ltar smon// zhes zhus so// de nas de bzhin gshegs pa kun tu bzang pos// 'dus pa'i tshogs la 'di skad ces gsungs so// kye sems dpa' chen po/ gdod nas ma btsal lhun grub pas// bgrod pas thob pa'i 'bras bu min// rgyu rkyen med pa'i rang byung bas// skye zhing 'jig pa'i 'bras bu min// thams cad byang chub snying po bas// gzhan las thob pa'i 'bras bu min// dus gsum cig car lhun rdzogs pas// rim par thob pa'i 'bras bu min// thog ma tha ma'i tshad med pas// grangs dang tshad kyi 'bras bu min// ma btsal rang bzhin lhun grub pas// btsal zhing sgrub pa'i 'bras bu min// dang por skye ba'i rgyu med pas// tha mar 'jig cing 'gag pa med// rang byung lhun grub 'bras bu ni// gdod nas lhun grub rang 'char bas// 'byung ba lnga la rag ma las// sku gsung thugs la rten mi 'cha'// gsal byed rig pa'i sgron ma yis// gter khyim phung po gsal byed ltar// dman pa'i blo spangs gang dag la// lag gi nor bu bstan dang mtshungs// tak+Sha ka yi nor bu ltar// ma bsags lhun grub byin rlabs can// 'dzin rtog zhen pa mi mnga' yang// byin rlabs rgya mtsho'i tshul du snang// sur+ya 'od kyi snying po ltar// gdod nas rdzogs pa'i byin brlabs nyid// 'gro 'ong med par snang ba las// rgyu 'bras rim pa ga la yod// 'bras bu nyid la 'bras bu 'byung// gdod nas lhun rdzogs snying po la// rgyu dang 'bras lta ga la yod// rin chen gser gyi gong bu ltar// ji ltar snang yang dbyings la 'dus/ khyab ba ro yi tshul bzhin du// kun kyang chos sku nyid la 'dus// rang byung ye shes rtogs gyur na// lhun grub ye nas btsal mi dgos// lhun grub rin chen snying po ltar// ma btsal lhun rdzogs kun tu bzang// zhes gsungs so// nya mo 'khor lo'i rgyud las// lhun gyis grub pa'i le'u ste bcu drug pa'o//// de nas 'dus pa'i tshogs/ bcom ldan 'das bde ba chen pos 'di skad ces gsungs so// kye 'dus ba'i tshogs chen po/ gsang mdzod rig pa thugs kyi gter// thams cad byang chub sems kyi lung// bde chen rdzogs pa klong gi mdo// gsang ba rig pa thabs kyi dbyig/bya bral rdzogs lung yang snying ste// gsang ba kun 'dus rdzogs pa ste// nya mo 'khor lo gsang ba'i rgyud// med las kun 'byung rang gsal bas// zad med gter chen mdzod yin te// thams cad sems su gsal bas na// byang chub sems kyi rdzogs lung la// bde chen ngang du kun rdzogs pas// sel med rig pa klong gi mdo// rtog ge'i spyod yul ma yin zhing// btsal med thams kyis kun 'byung ba'o// thams cad rdzogs pa'i byang chub sems// rgyal ba'i snying po sems kyi lung// sgro skur med par bshad pa yin// zab mo brtag dka'i spyod yul la// ma 'dus pa yi chos med pas// rdzogs chen kun 'dus theg pa'i rtse// rgya mtsho gting gi nya mo ltar// btsal bral rig pa dbyings la rgyu// spyod lam 'gag med nyam nga med// ji ltar gnas pa legs pa'i lam// 'khor lo sgro 'dogs skur pa gcod// dus gsum rgyal ba'i dgongs pa yis// gsang ba thugs kyi rna rgyud 'di// rin chen gser gyi snod chen du// rtsal 'chang 'o ma blug pa ltar// yang gsang rig pa'i gter du bzhag/ rigs nges rgyal tshab cig la gtad// bstan pa'i yang snying snying ltar gzung// zhes gsungs so// nya mo 'khor lo'i rgyud las/ rgyud gzung ba'i le'u ste ste bcu bdun pa'o//// byang chub kyi sems rdzogs pa chen po kun 'dus gser gyi nya mo 'khor lo bskor ba'i rgyud chen po rdzogs so//// dgon phug gi bka' rgyud 'di rnam 'di rnams kyang bstan pa'i yang snying gi yang snying yin pas// spel na mkha' 'gro shrI dza mun tas mngon sum du snying 'byin no/

CLOSE WINDOW