CLOSE WINDOW

Gpb034.024
བོད་ཡིག

/ // rgya gar skad du/ dz+nyA na pra b+ha rat+na tan tra nA ma/ bod skad du/ ye shes rin chen 'od kyi rgyud ces bya ba// ye shes rin po che gang yin pa de la phyag 'tshal lo// 'di skad bshad pa'i dus gcig na/ rin po che'i gnas ye shes kyi klong// mtha' dbus med pa'i gzhal yas khang na// bcom ldan 'das mngon rdzogs rgyal po bzhugs te// rang bzhin gyi 'khor dang// don gyi 'khor dang/ 'dod pa'i 'khor ro// rgyu'i byang chub sems dpa' dang// lam gyi byang chub sems dpa' dang/ 'bras bu'i byang chub sems dpa' dang thabs gcig tu bzhugs so// de nas lha'i bu sems lhag can gyis/ mngon rdzogs rgyal po la 'di skad ces gsol to// gsung gi sangs rgyas thams cad kyis// rgyu yi don rnams mthar phyung nas// rgyu med don ni mi gsung ba// thugs rje'i mkhyen pa mi mnga' 'am// ngo bo'i sangs rgyas thams cad kyis// lam gyi don rnams mthar phyung nas// 'bras bu'i don ni mi gsung ba// thugs rje'i yon tan mi mnga' 'am// rin chen lta bu'i skal ldan la// rgyu med 'bras bu gsung du gsol// ces gsol pa dang// de nas mngon rdzogs rgyal pos// sems lhag can la bka' stsal pa// gsung gi sangs rgyas thams cad kyi// ye shes rang bzhin khyod yin pas// ye shes kun gyi mdzad par sher// sku yi sangs rgyas thams cad kyi// ye shes rin chen khyod yin pas// chos rnams byang chub sems la snang// thugs kyi sangs rgyas thams cad kyi// ma g.yos ye shes dang ldan pas// ye shes rmad byung nyid du shar// don gcig yon tan kun gyi bdag/ rin chen 'bar ba thabs kyi sgo/ ye shes mkhyen pa'i thabs ldan pas// rtsol med ye shes ngo sprad kyis// ye shes stong pa'i ngo bo la// tha snyad brjod pa'i tshig bral yang// ma rtogs pa la mtshon pa'i phyir// gsung gi brjod pa gsal ba yis// mun khung gser sgron lta bur bshad// rang bzhin ngo bo thugs rje ni// ston pa phun sum tshogs par bshad// 'das dang ma byon da ltar ni// dus ni phun sum tshogs par bshad// thams cad sdud dang khyad par 'phags/ khang bzangs sprul ba bzhugs pa ni// gnas ni phun sum tshogs par bshad// rang rgyud 'brel dang don gyis cig/ 'dod pas bsdus pa'i 'khor rnams ni// 'khor ni phun sum tshogs par bshad// gcig dang 'bral dang gtan la 'bebs// ma tshang med dang dgos pa tshang// rgyud ni phun sum tshogs par bshad// ci yang ma yin byang chub sems// rtsis gdab blo dang bral ba ni// lta ba phun sum tshogs par bshad// ye shes rgyun la bar ma chad// don las bzhan du ma bkol ba// ting 'dzin phun sum tshogs par bshad// bya ba'i spyod pa rnam dag cing// blang dang dor ba rnam dag ni// spyod pa phun sum tshogs par bshad// ye shes dri ma med pa la// re dogs blo dang bral ba ni// 'bras bu phun sum tshogs par bshad// ye shes gang du rgya ma chad// thams cad 'byung ba'i gzhir gyur ba// gzhi ni phun sum tshogs par bshad// thams cad kun du ma bsgribs shing// ye shes rang du snang ba ni// ye shes phun sum tshogs par bshad// rtogs pa gzhan gyis g.yog tu med// snying po phun sum tshogs par bshad// rtogs pa gzhan las rag las med// sgom med phun sum tshogs par bshad// 'dod pa'i don 'byung rin po che// yon tan phun sum tshogs par bshad// 'khor ba brdar bcad ye shes ni// 'khor 'das phun sum tshogs par bshad// sangs rgyas thugs kyi snying po'i bcud// ye shes rang bzhin rtogs par gyis// zhes gsungs pa dang// sems lhag can gyis 'di skad ces gsol to// sku gsung rig pa'i byin brlabs te// skal ldan don du ji ltar 'char// zhes gsol pa dang/bcom ldan 'das mngon rdzogs rgyal pos bka' stsal ba/ yid bzhin nor bu'i dgos 'dod bzhin// thugs rje'i byin rlabs rim rgyud pas// ston pa'i gsung dang byin brlabs kyis// rang snang nyi ma lta bur gsal// gsal byed rin chen snang ba 'di// mtha' yas sems can thams cad la// mnyam pa'i tshul gyis gnas mod kyang// skal ldan snod ldan rnal 'byor pa// thugs rje'i byin rlabs shugs kyi shar// rin chen snang ba rang 'bar 'di// 'gro ba'i bla ma 'das gyur yang// 'gro ba mos pa la gnas nas// mos ba'i rnal 'byor yang rab la// snying po sgom du med par bshad// gting ltar mi gsal rin po che// skal ldan rnal 'byor mos 'jug gis// rtog med mthong ba'i lam rtogs dang// bgrod med 'bras bu rang snang yin// snang ba gsum gyi dkyil 'khor las// bde gshegs gsum gyi sku ldan pas// rnam grol 'bras bu rang bzhag yin// gzhi nas ma g.yos rang bzhin grub// bsam med rang gzhag med pa'i ngang// bde chen mi rtog rgyu ba bral// yid la mi byed snang ba dag/ rig pa ma 'gags ye shes gsal// dbang po rang snang rgyal ba'i sems// 'gro ba kun la rang bzhin gnas// mthong ba log pa gzhan yod kyang// sangs rgyas dang po gzhan las min// chos nyid sku la 'gyur ba med// rang rig bde ba chen po'i ngang// rgyu la mi gnas mthar thug pa// theg chen rdzogs pa'i 'bras bu yin// rin chen gsung gis shes 'gyur te// bsam med brjod bya'i snying po'i don// kun gyi brjod bya'i sems kyi dbyings// rang rang mos pa'i sems kyis rtogs// lam gyi rtsol bas 'bras bu 'tshol// rang rang mos pa'i sa la gnas// smon pa'i 'dod pa re ba zhig/ snying po'i lam la 'dod pas bral// yid la mi byed rang bzhin gnas// rig pa'i zer gyis 'da' ba med// ces gsungs so// ye shes rin po che'i 'od las/ gleng gzhi phun sum tshogs pa'i le'u ste dang po'o//// de nas yang sems lhag can gyis// mngon rdzogs rgyal po la gsol pa/ sems kyi gzhi ni gang/ 'khor 'das kyi chos kyi byed pa po ni gang gis byas pa yin// gang nas byung/ mngon rdzogs rang la byed pa'i mkhan po yod dam med byas na ji ltar gnas/zhes gsol pa dang// mngon rdzogs rgyal pos chos thams cad gtan la 'bebs pa'i ting nge 'dzin la bzhugs nas 'di skad ces bka' stsal to// thams cad nga yis byas pa yin// nga'i rang bzhin sus kyang ma byas// thams cad nga las byung ba yin// nga'i rang bzhin su las kyang ma byung// thams cad nga las shar ba ste// nga'i rang bzhin su la'ang ma shar ro// thams cad nga las snang ba ste// nga las sus yang snang ba med// thams cad nga yis phye ba ste// nga ni sus kyang phye ba min// thams cad nga yis bsdus ba ste// nga ni sus kyang bsdus pa min// thams cad nga yis brtags pa ste// nga ni sus kyang brtags pa yin// thams cad nga yis rtogs pa ste// nga ni sus kyang rtogs pa med// thams cad nga yis sgoms pa ste// nga ni sus kyang ma sgoms pa'o// thams cad nga yis mthong ba ste// nga ni sus kyang ma mthong ba'o// thams cad nga ni yin pa ste// nga ni ci yang ma yin pa'o// thams cad nga yis bltas pa ste// nga ni sus kyang ma bltas pa'o// thams cad nga yis sgom pa ste// nga ni sus kyang sgom ma btug/ thams cad nga yis spyad yin te// nga ni sus kyang spyad ma yin// thams cad nga yis bzung ba ste// nga ni sus kyang ma bzung pa'o// mngon rdzogs nga yi ye shes ni// 'di shar 'di 'byung thams cad gsal// thams cad gtan la 'bebs pa'i phyir// bstan pa yongs kyi snying po yin// nga yi ye shes rang bzhin ni// kun gsal sgrib pa med pas ni// ye shes sgrib med 'od du shar// kun 'byung zad pa med pas ni// yid bzhin nor bu rin po che// kun gsal yid bzhin 'od dang chas// 'dod pa'i re ba skong ba yi// ye shes yid bzhin rin po che// 'phel 'grib med pa'i chos nyid ni// 'byung gnas rgya mtsho'i dbyings dang mnyam// stong zhing gang yang rgya ma chad// ye shes nam mkha'i mtha' dang mnyam// ma chad rgyun du rang byung bas// ye shes ye nas chu bo'i rgyun// gsal la bar mtshams med pa yis// rig pa rang gsal sgron ma'i 'od// gzhan skyon sel ma zhugs pa ni// rin chen gser gling gling du phyin// gang zhig lung ni ma myong la// bo zhing zad pa'ang ma myong bas// 'dod cing zhen pa ma myong pa'o// ye shes rin po che'i 'od las/ gzhi'i gnas lugs bstan pa'i le'u ste gnyis pa'o//// de nas yang sems lhag can gyis// mngon rdzogs rgyal po la 'di skad ces gsol to// ting 'dzin nyams su ma blangs pa'i// ma bsgoms ye shes 'char ba'i don// 'dus pa'i 'khor la bstan du gsol// ces gsol pa dang// mngon rdzogs rgyal pos sgom du med pa'i ting nge 'dzin la snyoms par zhugs nas 'di skad ces bka' stsal to// sgom med don la bya ba bral// sgom du med pa'i snying po 'di// rang bzhag sems kyi rigs pas shes// rdo rje bka' ni rtogs pa'i lam// byed pa bral la gnyer ba'i sems// tshul bzangs rtsol la gang gnas pa// byed pa'i don dang phrad gyur nas// bya ba'i rang bzhin shes par bya// rgyal ba'i dgongs pa rigs pa nyid// gsum dbye byed pa'i 'od kyis mthong// gsum gyi 'od gsal bzhi yi lam// byed dang bral ba nyid la gnas// lam gyi lam gyi 'bras bu mthong// 'bras bu'i dgongs pa rgyal ba'i thugs// bsam med rang gzhag rig pa'i ngang// bde chen mi rtog rgyu ba bral// yid la mi byed snang ba dag/ rig pa ma 'gags ye shes gsal// 'gro ba kun la rang bzhin gnas// sprul sku dang po gzhan las min// kun bzang rgyal ba'i dgongs pa nyid// ye shes ngo bos bzung byas la// dran ba'i tshul gyis nyams su blangs// 'phen pa dang po'i dus na'o// rin chen gsum gyi brtag pa las// thabs kyi bye brag shes gyur na// thog ma'i ye shes ji bzhin no// dkyil 'khor lnga yi ye shes 'phro// de ldan rgyal ba'i gral du gnas// thugs rje kun ldan rnyog ma med// dngos po dus gsum 'gyur ba med// gsang ba'i ye shes sgom du med// spyad pa bral ba'i dus na shes// gtang bzhag rang bzhin bya ba bral// 'khor ba'i rnam par mi sems te// mya ngan 'das pa'i rgyu ba bral// rdzogs pa'i dgongs pa bya ba med// dus gsum ma yengs srog tu sems// blang dor mi mnga' lta ba med// rang bzhin lta ba'i rgyal po yin// mi rtsol grangs med drang po'i lam// gang gis ma bcos lugs kyi lam// snying po ye shes rin chen 'od// 'od gsal rig pa'i dkyil 'khor lnga// chags pa la sogs nyon mongs lnga// mthar thug mtha' ma'i dus na mthong// gang skyes dus na yul mi spyad// mi 'gag ngo bo nyid la bzhag/ rin chen gsang ba'i chos kyi sku// ma bcos rang bzhin gzung 'dzin bral// rdzogs pa longs spyod ngo bo'i sku// sprul sku gang la ngos gzung med// dbyer med rig pa gcig la gnas// 'dzin dang bral ba'i mngon sum pa// chags dang bral ba'i bde ba che// tha snyad bral ba'i thabs kyis mtshon// rtsol dang bral pa'i spyod pas blang// spro bsdu med pa'i dgongs par gnas// snang ba rgya mtsho chen po bzhin// rang bzhag rig pa de bzhin no// yon tan sna tshogs nam mkha' bzhin// dus gsum 'gyur med kun tu bzang// sangs rgyas sems can gnyis su med// 'khor ba nyid na rang bzhin dag/ rin chen dag pa ji bzhin no// ji ltar bcos kyang 'gyur ba med// rang bzhin chos nyid ngo bo la// sgro skur 'debs pa nged kyis med// 'dzin pa'i spyod pas log par bslad// rang byung kun mkhyen rig pa'i thugs// 'gyur med 'gro ba kun la gnas// mkha' 'dra ye shes lhun gyi grub// grub med chos sku chen po la// bsrung med dam tshig rang gzhag na// mtha' med dbus med rig par gsal// rgyal ba kun gyi ngo bo la// sems can kun gyi rang bzhin yin// ye shes rig pa rtogs gyur nas// thugs rje mdzad pa'i lam yang ston// sems kyi 'bras bu rang bzhag ste// 'dod pa'i rtsol bas grub mi byed// byang chub sems kyi lam chen ni// rnam dag ye shes dgongs pa'i lam// thun mongs 'gro ba yongs la gnas// dus gsum sangs rgyas sems las byung// bgrod med rang rig ye shes lam// rang 'dod bltas pas grub pa med// rdzogs pa'i lam la gang gnas pa// bsam gyis mi khyab rang gzhag pa// yid la mi byed yengs pa med// rnal 'byor rdzogs pa bcos med la// 'dod rtsol thig le spro bsdu med// ye nas rdzogs pa rnam dag la// bsam gtan yan lag kun dang bral// rnam rtog 'dzin pa rang bzhin zhi// ye shes btsal med bde ba la// sgom med snying po bde ba gnas// gang spyod thabs la ma bstan yang// rin chen snang ba'i thabs kyis shes// brda don tshig la gnas gyur yang// thig le bde ldan nyid la 'char// rtog spyod yan lag the rtsom bral// sems kyi dga' bde rtsol ba med// bde ba'i mtshan nyid chos skur gsal// ye shes gsang ba'i thabs kyis shes// sems kyi bag chags ka nas dag/ 'gyur med rin chen gling bzhin gnas// sems kyi ye shes gter kha phye// zhes gsungs so// ye shes rin po che 'od kyi rgyud las/sgom du med pa'i le'u ste gsum pa'o//// de nas yang sems lhag can gyis/ mngon rdzogs rgyal po la gsol ba/ yang dag pa'i lta ba ni gang// de gtan la ji ltar dbab// 'dus pa'i 'khor la bstan du gsol// ces gsol pa dang// mngon rdzogs rgyal pos ltar ru med pa'i ting nge 'dzin la bzhugs nas 'di skad ces bka' stsal to// rang byung rig pa 'od gsal la// lta med rig pa gdod nas gnas// ye shes rang gnas bde ba che// kun mkhyen me long lta bu nyid// ma lus snang ba'i rang bzhin dag/ sems kyi chos nyid bde bar gnas// kun bzang nyag cig cer ma mthong// mthong med gsal ba'i me long nyid// dngos po med pa'i rig pa nyid// 'dra 'am mi 'dra'i rgyu gang nyid/ bdag gam gzhan nam de nyid gang// grub bam ma grub ji ltar bskyed// de ltar grub na thug pa med// de ltar med na gang zhig ni// gnyis po de bzhin ri bong rwa// gang gzhan rgyu las grub pas na// gcig gam du ma gang du grub// 'jig rten rgyu 'bras chos bzhin na// yang dag ye shes brdzun nam ci// de ltar bdag lta log pa bzhin// spang bya nyid 'gyur yang dag min// mi mthun gnas pa'i chos yin pas// lta ba nyid 'gyur de nyid rig/ de ltar min na gang zhig 'thad// bskyed pa'i rim pa gang gnas nas// rdzogs pa'i lam la gang 'jug pa// gang gis gang la gang zhig gnas// rtsol bas bskyed pa de nyid dam// ye shes rig pa'i don la 'jug/ de nyid yin na de lta mod// de ltar min na gang zhig 'thad// thams cad thams cad grub pa'am// ma yin de la 'thad pa gang// rjes mthun rgyu'i sa mi gnas na// de bzhin rjes mthun nyid du 'gyur// des na seng ge phrug gu bzhin// sku gsum lhun grub bde ba'i lam// rtsol ba'i 'bras bu mthar phyung nas// 'jig rten chos la de bzhin no// spang bya'i 'bras bu yin pas na/ khyod la dag pa'i ye shes gang// de ltar nyid na rtag par 'gyur// des na rang byung rdzogs pa'i lam// rgyu la mi gnas rtsol ba med// rang gnas ye shes gdod nas grub// grub pa'i rang bzhin bskyed mi dgos// zhes gsungs so// ye shes rin po che 'od kyi rgyud las/ lta ba bstan pa'i le'u ste bzhi pa'o//// de nas yang sems lhag can gyis/ mngon rdzogs rgyal po la gsol pa/ rgyu 'bras gnyis la ma bsgrubs pa'i// ma bsgrubs mthar thug 'bras bu ni// 'dus pa'i 'khor la bstan du gsol// de nas mngon rdzogs rgyal pos ma bsgrubs lhun gyis grub pa'i ting nge 'dzin la bzhugs nas 'di skad ces bka' stsal to// ye gsal nam mkha'i rang bzhin las// zla ba'i gzugs 'dra ngang gis 'byung// dbyings kyi 'bras bu bsam mi khyab// mi rtogs par ba'i dkyil 'khor nas// che ba'i sku gsum mu mtha' med// chos sku rang rig ye nas dag/ longs spyod rang rig bde ba nyid// sprul ba chu zla lta bur snang// dbyer med rig pa gcig gi ngang// ye shes rig pa thugs phrad du// rin chen snang bas gzhag par bya// brjod bral rig pa mthong ba nyid// ma btsal rang byung bde ba nyid// yi ge med pa'i gsung mchog ste// kun bzang rgyal ba'i dgongs pa ston// mi rtog don 'jal goms shing rtogs// yi ge med dang rig pa'i gsung// don gyi chos nyid 'jal bas ston// gsang sngags gter gyi mdzod 'dzin pa// rgyal ba'i drag sngags tha snyad bral// sngags kyi go bral nus mthu ldan// las bzhi med pa'i don gyis bsgrubs// rgyu med 'bras bu mthar thug yin// zhes gsungs so// ye shes rin po che 'od kyi rgyud las/'bras bu bstan pa'i le'u ste lnga pa'o//// de nas yang sems lhag can gyis/ mngon rdzogs rgyal po la gsol ba/ ye shes ji ltar rtogs pa la// ting 'dzin nyams su ji ltar blang// 'dus pa'i 'khor la bstan du gsol// ces gsol ba dang// mngon rdzogs rgyal pos rtogs pa las ting nge 'dzin bkol du med pa'i ngang la bzhugs nas bka' stsal pa/ rig pa mtha' bral dkyil 'khor 'dir// zhain med tshul gyis 'jug na bde// dang po rang sems tshul la brtag/ gnyis pa bla ma'i gdam pa sbyin// gsum pa brda don ngo bo sprad// dkyil 'khor drug gi ye shes la// sgra yi mtha' la gzhag par bya// myang ba med pa'i rnam pa yin// tshor ba bral ba'i rig bya'o// phyi rol tshul bzhin nges par 'gyur// tha mar dran bsam rgyu ba bral// dpa' brtul za byed sems lta bu// shes pa dang bzhag ma dul ba// stag mo lta bu'i sems la ni// ye shes rol pa ma 'gags pas// rtsol med ye shes rig pa'i ngang/ de nas rang bzhin cog bzhag go/ dngos po ci ltar snang ba yang// rtsi gdab med pa nyid du mthong// dus gsum sangs rgyas ma lus pa'i// thugs la 'jog pa'i man ngag bcud// ye shes shar bas rang la rdzogs// rtsol bral rig pa mi rtog pa// ma bcos rang snang bde ba'i klong// ye shes lhun grub klong du shar// rang byung nam mkha' lta bur khyab// rang rig gsal ba'i ngang la gnas// spros bral ye shes theg pa che// rnam rtog bral ba'i rig pa gsal// rang rig ci yang mi rtog pa// ye shes rang gi gnas su gsal// ci yang mi rtog sems su smin// ci yang ma yin dmigs su med// rnam rtog sems kyi rgyu ba bral// rig pa'i ye shes 'dzin pa bral// rang snang rol pa'i byang chub sems// rgyu ma ye shes bde ba'i klong// rang rig ye shes 'dzin pa yin// rang byung sgyu ma mngon sum gsal// lhun grub sgyu ma bcos pa med// bde ba'i sgyu ma rang rig nyid// thams cad ye shes sems su shar// rig pa'i ye shes don gsal bas// thams cad ye shes nyid du mthong// ye shes ma yin gang yang med/ khams gsum dngos po ye shes nyid// ye shes rig pa'i thabs kyis shes// 'khrul ba'i sa nas bkol byas la// ye shes rgyal ba'i gral du bzhag/ma bcos sku gsung thugs su gnas// rang rig sems kyi 'bar ba nyid// ye shes sems kyi phur ba 'debs// rnam rtog bzhon pa rlung dang bral// dngos grub bde ba rang byung nyid// thar ba'i lam mchog byang chub sems// 'bras bu mthar phyin rig pa nyid// rang byung sems kyi ji bzhin la// rnam par rig pa thabs kyis gnas// bcos med dgongs pa bde chen 'di// mngon sum mthong la ngos gzung med// rang shar dngos por grub pa med// bde chen rig pa ma mthong ste// 'di dang bral na rtogs pa nyid// bka' yi don dang de mi ldan// dmus long mdun na gzugs snang bzhin// 'bras bu mthar phyin yongs ma yin// kun bzang rgyal ba'i don dang 'gal// rang gsal dgongs pa'i thugs ma reg/ 'dzin pa'i cha la gang gnas kyang// 'khor ba'i 'bras bu nyid du 'gyur// rang 'dod don gyi mthar mi phyin// ye shes gsang ba bde ba'i sa// 'dod pas mi 'grub mthong ba med// 'dod med rang bzhin nyid la 'grub// shes pa rang lugs so ma nyid// kun bzang rgyal ba'i dgongs pa'o// tha mal shes pa 'di nyid la// bsam pa'i sems med rang bzhag yin// nges pa'i gzhi ni don la gnas// zhes gsungs so// rin po che 'od kyi rgyud las/ ting nge 'dzin bkol ba med pa'i le'u ste drug pa'o//// de nas yang sems lhag can gyis/ mngon rdzogs rgyal po la 'di skad ces gsol to// snying po de kho na nyid la 'khor 'das kyi bye brag mchis sam// zhes gsol ba dang/ mngon rdzogs rgyal pos bye brag med pa'i ting nge 'dzin la bzhugs nas bka' stsal pa/yid ches bla ma nyid la gus// rin chen gdams ngag gter du 'chang// lung gi dgongs pa'i don gsal te// rig pa rang gsal gtan la 'bebs// mi 'gyur rdo rje sems la 'chang// ston pa rang rig nyid yin pas// rig pa'i don la sems mi 'jug/ phyi rol 'di rtsol sems dang bral// rdzogs pa'i bka' la yid mi 'gyur// bla ma rin chen srog tu 'dzin// mos pas rang gi 'dod pa btang// rin chen gter gyi ngo bo 'di// srog dang bral ba'i kha bzhin bsdam// rang sems byang chub sems 'di la// ye shes ma rig tha dad med// 'khrul dang ma 'khrul sems su gcig/ zhen rtogs brtags pa sna tshogs dang// ye shes 'di gsal ngo bo nyid// 'di gsal rang byung sems su gcig/ byang chub sems la ngo bo bral// don ldan ye shes nyid du mthong// bsams pas brtags pa sna tshogs pa// bag chags log pa'i rkyen gyis mthong// rang rig ye shes 'jug pa dang// brtags pa'i bag chags dang po ni// sgrib pa ma lus bzhin grub cing// byang chub sems kyi mtshan nyid la// thog ma dang bral tha ma med// thog med 'khor ba'i rang bzhin 'di// byang chub sems la ye nas dag/ sems nyid nam mkha' lta bu la// blo bur gzugs brnyan sprin gyis bsgribs// ngo bo ma yin rkyen gyis snang// dpe don de yi rang bzhin 'dra// rang bzhin bral ba ma yin te// dus gsum ma yin nam mkha' bzhin// blang dor gnyis med mnyam pa nyid// byang chub sems kyi ye shes la// snying po mnyam nyid ye sangs rgyas// snying po don la sgom du med// don gyi rang bzhin gnyis su med// sems kyi rang bzhin rtog pa nyid// rtog pa ye shes nyid du 'char// rtsol med 'bras bu mthar thug nyid// bka' yi bcud bsdus snying po nyid// rgya mtsho bzhin du bdud rtsi 'dus// snying po'i don 'di gsang ba'i bcud// gsal ba'i sgron ma snying po 'di// ma 'dus 'dus pa'i dgongs pa yin// snying po gsung gis rtogs bya ba// sems nyid rang byung snying po nyid// phyi nang gsang ba'i dkyil 'khor 'dus// mtha' dbus mi mnga' snying por gsal// rang byung rdzogs pa'i dgongs par gnas// ye shes snying po mkha' 'dra ba// mtha' dbus mi mnga' blang dor med// mi len snying po'i bdag nyid gsal// bka' yi bcud 'dus snying po 'di// rang bzhin snying po sman chen rtogs// 'khor ba'i zug rngu 'byin pa'i mchog/byang chub sems kyi sman med na// rtsol ba'i 'jug pa'i mtho ris rgyu// sman chen rang la gnas bzhin du// mi rtog gzhan nas tshol bar byed// rnyed pas rang sems sman du mthong// rtog pa gzhan nas ma 'ongs te// rang byung mthong ba thog ma med// spros bral nam mkha' lta bur gnas// rgyal ba'i sku dang rang bzhin ldan// gzung 'dzin bral ba'i ngang la bzhugs// bde ba'i don la ma chags rol// snang ba ye shes rig par gnas// byang chub sems kyi sman chen 'di// ye shes rgyal ba'i dgongs pa ste// dus gsum sangs rgyas lam du bde// bsam gyis mi khyab dgongs pa ni// shes pa rang bzhag so ma nyid// snying po'i don rtogs bya ba bral// rang gsal rig pa'i ngang la bzhugs// bcos med 'dzin bral spro bsdu med// byang chub rgyu bral snying po med// kun 'byung rig pa 'pho 'gyur med// thugs rje rang byung ye shes nyid// rtsol bral rang snang byin rlabs 'byung// phyogs ris mi mnga' kun la khyab// snying po nyid du kun sgrol mdzad// byams pas chos nyid drung du skyabs// dge bas rang rig mi 'bral ba// blang dor gnyis med btang snyoms che// rang byung snying po 'khor lo la// rtog bral 'khor ba rang bzhin dag/ thugs rje sems can don mi mdzad// dngos po mi mnga' rang byung sems// 'od gsal snying po rdzogs pa 'di// rin chen gsung gis brtags pas shes// 'gro drug sems can thams cad la// rang gnas ye shes ye ldan pas// rtag pa gsum gyis shes par 'gyur// ming gis mtshon la sems la ye shes tshol// dngos po gang yang rung ba la// brtags pas rang log shes par 'gyur// rin chen bzhin du 'gyur ba med// lce mnan nang yig sgra la sogs// de bzhin gnas skyabs bzhin du yang// snying po ye shes gsung bar bya// snying po'i gsung gi don dang 'brel// skal ldan rin chen lta bu yis// grub mtha' ngan la gnas dus su// 'di yis don kun rig par gyis// 'di yis rang sems ma rig na// sgra 'am tshad ma gang gis kyang// gzhi nyid rang byung 'gyur ba med// rtogs pas rang byung sems kyi lam// ma yengs byang chub sems su gsal// rang byung 'bras bu mthar phyin pa// 'gro don mdzad la rtogs pa grol// 'od gsal dbyer med gcig gi ngang// zhes gsungs so// ye shes rin po che 'od kyi rgyud las// snying po de kho na nyid bstan pa'i le'u ste bdun pa'o//// de nas yang sems lhag can gyis// mngon rdzogs rgyal po la 'di skad ces gsol to// snying po rtogs pa'i yon tan ji ltar 'byung/ zhes gsol pas/ mngon rdzogs rgyal pos yon tan ji ltar 'char ba'i ting nge 'dzin la bzhugs nas bka' stsal ba/byang chub sems kyi rang bzhin bde// bag chags 'khrul ba'i dbang gis 'di// brtags pas sna tshogs med bzhin 'gyur// sems kyi bag chags cir yang snang// rig pa 'od gsal 'gyur ba med// sna tshogs snang ba'i rang bzhin 'di// snying po gsum gyis brjod bya ste// 'khrul pa ma yin log snang bas// rang rig byang chub sems su gsal// rtog pa'i rtsa ba byang chub sems// rang rig sems la rtog par 'khrul// thog ma med dus bag chags dang// rin chen gdam ngag rkyen med pas// rtog med snying po sems la goms// thag pa sbrul min snang ba bzhin// sna tshogs snang ba'i rang bzhin 'di// chos nyid yin pas dbyer med pas// dgongs pa gsal ba'i sems nyid 'di// chos nyid ma yin bag mi snang// thams cad snang ba'i ngo bo 'di// ye shes snying po nyid du mthang// ngo bo nyid la brjod pa bral// rang bzhin rnam dag rig pa la// brjod med don la ma brjod na// rig pa'i don la 'jal ba med// brjod pa'i sgra la sems drangs nas// ma bcos rang bzhin chos nyid mthong// rang rig sems la don rtogs nas// 'jug thabs mi gnyis tshul gyis gnas// cir yang rdzogs pa bde ba che// phyogs su ma lhung gzung ba'i sems// rdzogs pa'i ye shes snying po la// rig pa'i lam med mthar phyin pa// rang byung 'jug pa rtogs pa la// de nyid snying po'i don ldan pas// 'dod pa'i tshogs la yid mi 'jug/ de bzhin pha rol phyin pa drug/ rang byung rdzogs pa'i sems la gnas// bsam bral mi rtog dgongs pa la// de nyid pha rol phyin drug ldan// mi rtog 'dzin med tshul la gnas// mi sgom rig pa rgyun mi 'chad// dmigs med ye shes pha rol phyin// sems nyid stong pa dngos med la// chos dang chos can mi gnas pas// dbyer med bstan pa'i snying po'i don// dngos med ye shes 'gag ma yin// bden rdzun gnyis kyi mtha' mi 'dzin// snying po'i don la 'dod pa bral// kun bzang ye shes 'od gsal ba// bsam bral ye shes rdzogs pa yis// ye shes ma bcos byang chub sems// mi 'gyur chos nyid dbyings kyi thugs// mi 'gag ye shes rig pa'i gsung// dbyer med chos sku gzung 'dzin bral// sku gsung thugs bral sku gsung thugs// phyi nang mi mnga' rang gsal nyid// 'byung 'jug mi mnga' rang bzhin gnas// dbang po ngo la snang ba rnams// chos nyid byang chub sems su mthong// nyon mongs lnga po ye shes lam// thams cad byang chub sems kyi zhing// sangs rgyas nyid las gzhan ma yin// zhes gsungs so// ye shes rin po che 'od kyi rgyud las// snying po rtogs pa'i yon tan bstan pa'i le'u ste brgyad pa'o//// de nas yang sems lhag can gyis// mngon rdzogs rgyal po la gsol pa// ye shes snying po rang bzhin la// rnam dag spyod pa ji ltar 'char// ces gsol pa dang// mngon rdzogs rgyal pos spyad du med pa'i ting nge 'dzin la bzhugs nas bka' stsal ba/dag pa'i sems la btsal med de// btsal ba'i kun rdzob grub ma yin// dam pa'i don la gang 'jug pas// gsang ba rdzogs pa'i don nyid la// rin chen gsang ba nyid mi dmigs// ngais pa'i gdams ngag zab mo yis// btsal med rang bzhag rtsal ba dang// mi sgom rang lugs sgom pa dang// mi gnas tshul la 'dug pa dang// bzhag med mnyam par bzhag pa dang// sgom med don la gyi na ba// dge dang mi dge'i rnam rtog bral// byang chub sems kyi mtshan nyid do// rang byung byang chub btsal ba min// byang chub 'dod na byang chub med// de dag don gyi snying po 'di// btsal zhing rnyed par mi 'gyur te// zhen sems nyid na 'byung mi 'gyur// bya ba mthong ba'i ye shes ni// nyal ba'i bsam gtan 'khor lo bde// ma lus byang chub sems kyi ngang// chos nyid byang chub sems bzhag na// dngos med byang chub rang byung dang// 'dus ma byas pa bde ba'i klong// sems nyid bsam med brjod las 'das// ye nas ma dag bsam las 'das// rdzogs pa'i rnal 'byor rig pa yis// de la ma brtsal gnas nas bsgoms// rig pa dbyings la yan bzhag na// rtsol ba'i nad bral sgom pa yin// de bas snying po dri ma med// rig pa rang gsal nyid du sgom// 'od gsal sems la gnas gyur na// rnam rtog mtshan ma rang bzhin zhi// skye ba med pa'i phyag rgya yis// rang snang spyod pa kun bzang 'grub// dngos med dngos la mi dmigs shing// dbu ma'i sems bral rgyu ba bral// sems kyi rgyu ba med pas na// thams cad rang byung stong pa nyid// sems nyid rig pa rang byung ba// 'gyur med sgom med gsal bas na// yi ge med pa'i snying po snang// dam pa byang chub sems la gnas// rgyal ba'i dam tshig ma bcos pa// bsrung ba med pa'i tshul gyis bsrungs// 'gyur ba med pa'i phyag rgya la// 'gyur ba med pa'i don gyis 'debs// mtha' dbus med pa'i dkyil 'khor la// ye shes 'phro 'du med par gsal// bsam bral rang bzhag rgyal ba'i thugs// byang chub sems las 'da' ba med// gzhan nas rnyed par mi 'gyur te// brtags na rang sems nyid la thug/ gzhi la rang 'dod gzhan 'dod bral// rang sems rig pa 'gyur ba med// ji bzhin mi rtog chos kyi sku// bya bral lhun grub ji bzhin gnas// rang byung 'od gsal ye nas dag/ cir yang mi dgongs bsam mi khyab// shes rab klong du gyur pas grub// snying po byang chub rang bzhin la// sgom med rang bzhag thugs su bde// rig dang 'khor lo bde ba dang// byin rlabs gnyis 'dod dag pa dang// bden gnyis rig pa phra mo yis// rang gnas rig pa tshol ba nyid// rnam rtog yin te don la med// chags pas blos bzung dag gis gol// nges pa spros bral rang byung sems// chags pas lam gyi don mi mthong// blang dor med pa'i spyod pa yang// nges par gzung nas blang dor nyid// rang rig bsam bral bzhag pa ste// don dngos 'dzin pa zhen pa gnas// rang byung 'od gsal snying po 'di// mtshan ma med pa'i rang bzhin pas// rtsol ba 'dod pa'i chags pa bral// thig le 'dod rtsol spro bsdu med// rang rig rtsol bral bde ba'i sems// sgom du med par snyoms 'jug pas// bde ba'i bsam gtan chen po yin// bsam gtan rol la ma chags pas// chags med ye shes rdzogs pa'i lam// byang chub sems kyi rang bzhin 'di// sgom med shes rab chen pos 'grub// rang gsal ye shes rig pa 'di// ngo bo ma grub med shel 'dra// dngos med ye shes song bas grol// gzugs sogs snang ba brtags pa yin// dngos po rang bzhin thams cad ni// chos nyid byang chub sems kyis grol// de nyid bsgrubs pa'i thabs su ni// snying po rig pa nyid shar bas// mtha' yi mun pa ngang gis dag/ sgrub med rang byung bsgrub pa 'di/ khams gsum 'od gsal thugs su grub// rang sems rig pa'i spyod par bde// ye shes spyod pa rang bzhag nyid// gsal na 'dod pa'i mtha' mi 'gegs// thugs rje tshogs kyis bsod nams 'di// rang byung rig pa rtogs gyur na// 'gro ba drang phyir rgyun mi gcad// snying po don gyi sems rig na// ye shes mtha' phyin 'bras bu gnas// mtshan dang dpe byad rang bzhin grub// sprul pa rang 'dod cir yang 'byung// chu gsal ri mo can bzhin no// yi ge lus can de bzhin gshegs// me long gzugs snang 'gro ba grol// ye shes rang byung de bzhin gshegs// ye shes mthar phyin de bzhin gshegs// yan lag med pa'i rtsis las 'das// zhes gsungs so// ye shes rin po che 'od kyi rgyud las// spyod pa ye shes kyi le'u ste dgu pa'o//// de nas yang sems lhag can gyis gsol pa// 'khor 'das kyi chos thams cad ni gcig dang tha dad pa gang lags// zhes gsol pas// mngon rdzogs rgyal pos bye brag med pa'i ting nge 'dzin la bzhugs nas bka' stsal pa/ mthar phyin dgongs pa ye shes gsal// dgongs pa rang bzhag ye sangs rgyas// rig pa rang gsal chos rnams la// gang du'ang bsam du med par gnas// de ltar byang chub sems nyid la// ma rig med pas 'khor ba med// sems can skye ba'i rgyu mi gnas// rang byung sems la rtog par bzhugs// srid pa'i chos la rgyu med pas// mya ngan 'das pa'i lam dang bral// ma skyes pa yi chaus rnams la// nam yang skye bar mi 'gyur te// sangs rgyas sems can rang bzhin gcig/sems kyi rang bzhin gsal ba 'di// snying po'i don la rmad du byung// rang byung che ba'i bdag nyid sku// rang rig bde ba rdzogs pa che// thugs rje snang ba sprul pa'i sku// ngo bo ma grub gsang ba'i sems// snang dang mi snang dbyer med do// yod dang med pa byang chub sems// don dang rtags la sogs pa rnams// rnam pa tha dad bag chags snang// yang dag ma yin 'khrul ba'i sems// bsam pa'i dbang gis der 'gyur ro// bde gshegs ye shes gsang ba 'dis// ma mthong rnam rtog spros 'tshol bas// stong nyid rig pa'i man ngag sbyin// dran rtog rlung gi rgyu ba bral// mtha' ru ma skyes bsam gtan bya// chos dang chos nyid gang yang min// nam mkha' lta bur bdag med pa// ye shes stong pa'i ngo bo'o// rang bzhin stong pa mtshan ma med// rnam par gsum ldan bde ba che// sgom med bzhi yi lam du 'jug/ sgom med lam la gnas pas na// mi sgom 'bras bu ngang gis 'char// yon tan nam mkha'i mtha' dang mnyam// rang rig ye shes snang ba la// 'bar ba'i dkyil 'khor rang bzhin gnas// rgyun gyi 'khor lo sku yi ngang// bag chags grags pa gang dag go/ dran rin gsang ba ting 'dzin nyid// mi zad 'khor lo bsam du med// sgro bral stong nyid gzhi gnas la// 'du shes med 'jug mnyam bzhag la// sgom med zhig gnas lhag mthong 'brel// mos 'jug lam la gang gnas dang// mi rtog gsal ba don gyis go/ bsam dang bral ba'i ye shes ni// snying po don la rtogs bzhin 'jug/ thabs bral rig pa'i rtsol bas tshol// ra gan gser 'dod ji bzhin no// 'dod ba'i sems dang ma bral na// snying po'i don la bdag 'dzin byed// bde ba'i sems la re ba na// rtog pa'i rjes 'jug zhi gnas yin// rang lus sems su ma rtogs na// 'dra 'bag lha yi rnam pa'i gzugs// lus kyi dben pas chos nyid tshol// rang lus sems su shes pas na// gang na gnas kyang sems nyid bden// snang srid sems kyis shes pas na// dbang po rang bzhin yan ye shes gsal// snying po don gyi rang bzhin la// ci yang ma sgom gang yang men/ khyu mchog sems ltar ma bcos pa// rang bzhin rig pa'i 'khor lo nyid// dus gsum du yang mnyam gzhag med// gang yang mi 'dzin bdag po med// snying po don kyi rang bzhin la// skyon dang yon tan gnyis med pas// rdzogs chen lta ba blang dor med// 'jug min ting 'dzin ma yengs pa// 'od gsal sgom med sems nyid yin// rang byung thugs kyis ma bcos pa// rnam dag rgyal ba'i sku gsung thugs// btsal med snying po'i don las 'byung// byang chub sems kyi don nyid la// nges pa'i theg gcig snying po'i don// bsam pa'i theg pa sna tshogs pa// drang ba nyid 'gyur nges pa min// ngo bo nyid la mtho dman med// mos 'jug bsam pas rtogs par zad// sems nyid nyag gcig phyogs bral ba// du ma'i 'bras med lam du med// ma bcos rnal 'byor rdzogs pa'i lam// mi gnas rang bzhin sems su gcig/ ma bgrod mthar phyin 'bras bu yin// rgyu rkyen bral bas skye 'jig med// gdod nas rang byung snying por gsal// rigs drug ji ltar snang ba dang// mya ngan 'das pa'i rang bzhin gnyis// dbyer med rang bzhin sems su gcig/ rigs drug sems kyi rtog pa dang// ye shes rang gsal rig pa ni/ khyad par med de snying po gcig khams gsum 'khor ba'i rnam pa dang// mya ngan 'das pa'i ye shes gnyis// rtogs ma rtogs kyis gnyis su byung// rtog pas rang sems nyid la thug/ ces gsungs so// ye shes rin po che 'od kyi rgyud las/chos thams cad gnyis su med pa'i le'u ste bcu pa'o//// de nas yang sems lhag can gyis/ mngon rdzogs rgyal po la gsol ba// byang chub sems kyi rang bzhin la// mthar thug la bzla ji ltar lags// zhes gsol ba dang// mngon rdzogs rgyal pos ye shes mthar thug pa'i ting nge 'dzin la bzhugs nas bka' stsal ba/ gzhan 'dod re ba'i rtsol ba bral// rang sems rnam dag ye sangs rgyas// kun bzang rgyal ba'i sems nyid bde// mtha' yas sems can thams cad la// rgyal ba'i ye shes rang chas ldan// bsam bral rang lugs cir mi dgongs// ye nas nam mkha'i mtha' dang mnyam// yid la mi byed bya ba btang// 'khor ba mya ngan 'das pa yi// rnam rtog phra rags cir snang yang// rang bzhag bsam bral nyid du bde// chu yi snang ba ji bzhin du// phra rags rnam rtog ye shes nyid// rang rig gnyug ma pad+ma ltar// 'khor bar gnas kyang gdod nas dag/ mtshan ma'i rnam pa ci byung yang// chu shing lta bur snying po med// rang rig 'thibs pa'i 'khor ba na// rig pa mar me lta bur gsal// rnam par rtog pa cir 'gyur yang// ye shes gnyug ma rgyun mi 'chad// nam langs sems dang mun pa bzhin// ye shes 'od gsal de bzhin no// ma bsgrubs 'od gsal shugs kyis 'byung// skal ldan ma bcos rnal 'byor pas// sems nyid seng dkar ltar gnas pa// lus ngag rtsol ba ngang gis zhi// sgom med ye shes mi rtog pa// shes rab gsal ba'i snying por phyin// mthar phyin sgom med rang byung ba// dri med rgyal ba'i ye shes gsal// rang gnas 'gro ba yongs la khyab// nam mkha' lta bur dbyer med pa// 'gro ba yongs la gzhan pa med// rtog med ngang la rang shar ba'i// ye shes bde ba'i mtshan nyid can// 'dzin pa dag byed ye shes ni// ma bcos ngang gis sgom med gsal// bde ba'i rang bzhin rtog pa bral// rang gnas ye shes 'od gsal sems// mthong bas the tsom rgyu ba bral// ye shes rang gnas sgrib pa med// thams cad ye shes gsal mthong bas// snying po don la gol sa med// rnam dag rig pa'i 'khor lo 'di// rtsol bral rang byung ye shes yin// rang byung ye shes kun gyi bdag/ lus dang bral bas yan lag med// sgro skur bral bas dngos gzhi can// snying po kun bral kun gyi bdag/ ma bcos rig pa'i ting 'dzin gsal// bya ba med bzhin don kun rdzogs// rang byung gnyug ma kun gyi gzhi// bgrod med rnam grol lhun grub lam// ji bzhin kun rdzogs 'bras bu nyid// thig le dbyer med gcig gi ngang// sems nyid bya bral rdzogs pa'i gter// bde ba'i ye shes mi rtog thugs// skal ldan dang po nyid na rdzogs// 'gro drug 'khor ba'i rtog lta dang// rgyal ba'i ye shes mya ngan 'das// bde chen rig pa gcig gi ngang// rang byung ji bzhin ma bcos pa// lhun rdzogs spros pa med pa'i ngang// bsam du med pa'i ye shes 'di// rnam par rtog pa'i rgyu ba bral// dus gsum mi mnga' rgyun mi chad// sems nyid sgrib pa'i lam mchog 'di// dbyer med kun la ldan bzhin du// snang ba'i lam med 'khor bar 'khyams// sdug bsngal rtsol ba'i nad kyis gdungs// des na ston pa'i sgron ma 'di// snang ba'i ye shes gsal bar gyis// kun la mi bstan gsang ba'o// snod ldan 'ga' la gdams shing gtad// ces gsungs so// ye shes rin po che 'od kyi rgyud las/ snying po la bzla ba'i le'u ste bcu gcig pa'o//// rin po che 'od kyi rgyud ces bya ba rdzogs so//// rgya gar gyi mkhan po shrI sing+ha dang// lo tsa ba bai ro tsa nas d+ha he na'i 'du khang du bsgyur ba'o/

CLOSE WINDOW