CLOSE WINDOW

Gpb034.017
བོད་ཡིག

rgya gar skad du bo d+hi tsit+ta ma hA san d+hi kha sa me a lang ka ra tan tra rA dza nA ma/ bod skad du/ byang chub kyi sems rdzogs pa chen po mkha' mnyam klong gi rgyud kyi rgyal po zhes bya ba/ bcom ldan 'das dpal rdo rje sems dpa' la phyag 'tshal lo// 'di skad bdag gis thos pa'i dus gcig na/ de bzhin gshegs pa dgra bcom pa yang dag par rdzogs pa'i sangs rgyas bcom ldan 'das gsang ba'i longs spyod mnga' mdzad cing mi phyed pa chen po/chos thams cad dang gnyis su med par bzhugs pa/ nam mkha'i mtha' klas par longs sbyod pa/ sku gsung thugs kyi gsang ba rdo rje ltar rnam par bskyings pa/ khams gsum pa bde ba chen po'i klong du shar bar mkhyen pa/rnam pa thams cad mkhyen cing byin rlabs zad pa mi mnga' ba'i dbang phyug/ 'gro ba nyon mongs pa rgyu 'bras kyi ye shes chen por spyor ba/ nam mkha'i dbyings la mnga' mdzad pa'i thabs mnga' ba'i rgyal po/'jig rten nyi ma shar ba'i ma rig pa'i mun pa sel ba/ ye shes kyi nyi mas kun la thugs rje chen pos brdal ba/ de bzhin nyid kyi nam mkha' chen pos 'jog pa des/ 'og min chos dbyings gzhal yas khang// ye shes rin chen las byung ba// nam mkha'i mtha' dang mnyam pa'i gnas// ye shes rang byung rang snang bas// phyi dang nang med kun tu snang// thams cad thig ler 'dus pa'i phyir// bum pa 'khyil ba lta bur gnas// rang byung nyi zla 'od 'bar zhing// che ba'i rin chen gdan gyis bteg/ rta babs dril bu ba dan dang// 'phan dang rnga yab dra phyed dang// rtsig pa lha dang lha mor ldan// ma rig mun pa dbyings sel ba// nyi zla'i 'od zer grangs med 'phro// ye shes bar ba'i gzhal yas na// 'gyur ba med pa'i lhun du bzhugs// nam mkha' dang ni mnyam pa'i gnas// mkha' mnyam klong la rtag zhugs pas// nam mkha'i mtha' la longs spyod cing/ thams cad mkhyen pa'i ye shes mtsho// rnam par snang mdzad mi bskyod pa// rin chen 'byung dang snang mtha' yas// don yod grub pa rim bzhin tu// 'byung chen klong du mnyam par bzhugs// gzhan yang gsang bdag rdo rje 'chang// sems dpa' sems ma rdul snyed dang/ khro bo khro mo mkha' mnyam dang/ khams gsum mtha' yas skye bo dang// grangs med rdul phran dang mnyam pa// chos kyi dbyings dang mnyam par bzhugs// rdo rje 'chang chen gsang ba 'chang// kun dang mnyam nyid mnyam pa'i sku// bde chen chos dbyings mnyam sbyor ba// thig le'i skye med klong du mnyam// 'gyur ba med pa'i chos kyi sku// thig le gcig gi rang bzhin pas// spro ba med cing bsdu ba med// sku gsung lnga sogs rnam grangs kyang// bde chen sems nyid klong gi ngang// sku dang gsung thugs zab mo yang// spros pa med pa'i thig ler gcig/ ston pa dpag med rgyas pa yang// gnas ni de bzhin dbyings nyid ngang// 'khor ni grangs med rdul snyed dang// dus ni dbyings nyid rang snang ngang// sdud pa dbyings 'dus bde chen ngang// bstan pa khyab gdal rdzogs pa'i ngang// stong chen rab 'byam mkha' mnyam klong// zhugs pa med pas slar mi ldog/ de phyir ston pa gnas dus nga// bshad pa'i chos nga nyan pa nga// nga las nga snang nga 'gag med// ngas byas ngar 'dus nga la rol// e ma'o/ rang byung 'od gsal ma byas de bzhin dbyings nyid bcos med snying po nga// gdod nas bsgribs med dge sdig las kyis bcos med bdag nyid rdzogs chen klong// mnyam dang mi mnyam rang byung dag pa chos dbyings ye shes mkha' mnyam klong// gang yang ma yin gang du'ang ma 'gag pa bde chen kun gzhi zab mo'i klong// ho byang chub kyi sems mkha' mnyam klong gi rgyud chen po las/ gleng gzhi'i le'u ste dang po'o//// de nas gsang bdag stobs po che// snying po byang chub dpal ldan sku// rdo rje 'chang chen rdo rje sems dpa' la// pad+ma'i sbyin ldan dngas pas zhus// gtso bo rdo rje 'dzin rgyal po// dpag tu med pa'i rdo rje 'chang// gsang ba'i yang gsang sems nyid nga// chos sku brjod bral dbyings nyid klong// 'od gsal thig le kun la snyoms// thig le drug ldan dbyings na bzhugs// che ba lnga ldan spags pa'i sku// nges pa gcig las 'da' ba med/ khyod ni nam mkha'i rang bzhin te// bde min sdug min blang dor med// skye med 'gag med rtag chad med/kha dog dbyibs med spros las 'das// de phyir kyi kyi bcom ldan 'das// yi ge med pa'i rgyud 'di gsungs// skye 'gag med pa'i don 'di rtsol// rig pa'i rang byung klong 'di ston// rang byung klong chen don dgrol mdzod// ci phyir rang byung dag pa'i mkha'/1/ ci phyir sems kyi klong chen shar/2/ gang phyir bslab tu med gsungs ci/3/ gang phyir skye shi 'du 'bral med/4/ ci phyir bgrod rtsol ye nas med/5/ theg pa'i rgyal po cho ga gang/6/ ye sangs rgyas pa'i klong 'di gang/7/ sangs rgyas sems can ji ltar gcig7/ mkha' mnyam gnas pa'i tshul 'di ltar/9/ dpe dang tshul gyi tshad ma gang/10/ rtog dang sgrib pa ji ltar blta/11 khyab pa chen po'i tshad ci lags/12/ 'bras bu yod med tshul ji lta/13/ de yi 14mtshan nyid snang 15tshul ci// nam mkha'i mtha' dang mnyam sbyor bas// 'gro ba skyob pa'i tshul nyid ci/16/ skal ldan bstan pa'i gnas 'di ci/17/ 'jug pa'i lam tshul ji ltar bde/18/ thabs la dgag sgrub ji lta bu// spyod dang dam tshig khyad par ci// shes rab sbyor ba'i tshul ji ltar// mthar phyin gnas pa'i man ngag du// ye shes nyi ma bcom ldan 'das// rang byung thig le bcom ldan 'das// rang byung rgyal ba'i bcom ldan 'das// rgyu med rkyen bral bcom ldan 'das// rtsol ba'i chu bo 'joms pa'i mchog/gdod nas dag pa de bzhin gshegs// nam mkha'i mtha' rab la 'byor ba// yid bzhin nor bu kun 'chang ba// dpag med nam mkha' rgyas pa'i mdzod// 'ching grol med pas ye sangs rgyas// che ba'i che ba kun la khyab// bsgom du med de thig le'i don// brjod du med pas tshig dang bral// stong chen nyid pas stong rtog bral// nam mkha' rang byung rtag pa'i sku// kun gyi thugs rje khyab ba'i phyir// 'dod chags nam mkha' mnyam sbyor bas// mtha' dang bral bas dbu ma'i lam// kun byed sangs rgyas kun gyi mchog/ nam mkha' las byung rang byung ba// kun 'dus bya bral rdzogs pa'i klong// bsdu mdzad khyab mdzad nad sel ba// sangs rgyas kun pas sngar sangs rgyas// kun gyi bdag po rmad du byung// rdo rje nyi chen 'bar ba ltar// kun la snang bas spong len med// nam mkha' rgyas pa'i mtha' dang mtshungs// bstan pa'i 'byung gnas rdzogs pa'i lung// mkha' ltar khyab cing kun la bzhugs// skye med ye shes rdo rje sems// chos sku klong yangs pad+ma'i ngang// dus gsum dus med dus kyi dbyings// kun tu bzang po chos nyid ngang// dbye bsal blang dor med pa'i sa// sku ni khams gsum kun la khyab// gsung ni nam mkha'i khams su sbyor// thugs ni rnam pa kun mkhyen nyid// yon tan 'phrin las kun la snang// yang rab sbyangs mtha' 'dir rdzogs phyir// bde chen klong gi rgyud gsungs te// mthar thug med pa'i 'gro gang dag/ bya bral lam la gnas mdzad rigs// byang chub kyi sems mkha' mnyam klong gi rgyud chen po las// rgyud kyi snying po bstan pa'i le'u ste gnyis pa'o//// de skad gsol pa gnas gyur te// rdo rje 'chang chen chos kyi sku// rdo rje sems dpa' dpal dang ldan// rgyal ba kun gyi sangs rgyas sku// nam mkha'i mtha' dang mnyam sbyor bas/ khams gsum 'gro ba ma lus kun// snying por rang byung ma rtogs phyir// mtha' thug med pa'i mun par 'khyams// de rtogs bya phyir legs par bshad// legs so rang byung sems dpa' legs// rgyud kyi don bsdus snying po legs// mi 'gal don dang 'thun pa legs// de phyir nges par legs so legs// kun gyi rgyu rkyen lnga byung ba// de nyid rang byung bdag nyid che// bdag nyid rang byung yin pa'i phyir// de phyir gzhan med rang byung ngo// skye dang rten dang smin sdud g.yo// dbang po yul dang gzung 'dzin 'thas// rtogs pa nam mkha' mnyam sbyor ba// rang las rang byung dag pa'i klong// bde dang sdug bsngal btang snyoms dang// g.yo med rtag chad khams gsum dang// rigs drug rgyud lnga skye ba bzhi// rang nyid snang bas rang byung nyid// tshad med bzhi dang bsdu ba dang// las dang sa dang pha rol phyin// bsam gtan tshad med byang chub phyogs// rang byung sems nyid dag pa'i klong// chags sdang lnga dang 'dod yon lnga/ khams dang 'du byed la sogs pa// ma 'dres rang mtshan so so yang// rang byung kun byed byang chub sems// lugs dang lugs min tshul gyur pas// phyin nang gnyis su slos 'khrul bzung// 'bras bu gnyis thob snang med klong// klong las lhag pa'i don gzhan med// gzhi rtogs gzhi bzhugs 'bras thob ste// bdag don grub pas mya ngan 'das// 'gags phyir thar pa ro bral yang// rang byung mkha' mnyam klong du gcig/ gnyis rtogs lam lnga sa bcu yis// pha rol phyin drug bcur ldan pas// mthar thug med par bgrod btsal yang// rang byung nyid la thams cad 'dus// dka' thub nyid kyis lus gdungs shing// mtho dman gtsang sme'i tshul bzung nas// ma lus gsum 'dod don du nyams// de nyid mkha' mnyam klong gi ngang// gnyis bzhugs rjes 'thun tshul 'dzin cing// lta spyod gnyis ka bye brag spyod// phra men gnas spyod ri bzhi 'dzin// rtog pas phye yang rang byung ngang// mtshan ma'i cho ga lnga yi tshul// 'og min sangs rgyas gzugs su ldang// de nyid rtog pa'i gzugs yin te// rang byung sems nyid klong gi sku/ khams dang 'du byed rang gi lha// ma skyes ngang la khro zhing skyes// ngang nyid rang byung sems las med// dbyings las ye shes skur ldang ba// mkha' la gza' skar bkram ba'i tshul// don du gnyis med gcig gi ngang// de nyid rang byung byang chub sems// stong phrag brgyad cu rtsa bzhi dang// bcu gnyis sde gsum rgyud gsum sogs// grangs las 'das pas cir brtags kyang// rang byung dag pa'i klong du 'dus// mkha' mnyam klong dang mnyam sbyor bas// nam mkha' rgyu rkyen med pa ltar// sems la gdod nas rgyu rkyen med// ma skyes mi dmigs cir mi dgos// rang byung dag pa'i snying po la// shugs dang phyed byas rang bzhin nyid// sgro skur dag pas mnyam pa'i ngang// de ltar mi 'dzin mtha' la 'das// snang med ma btsal chos dbyings ni// ma btsal gzhag pas 'bras bu yin// btsal na tshi chad don med phyir// mkha' mnyam 'bras bu ga la 'grub// gang phyir rang byung byang chub ni/ kha dog ma yin dbyibs ma yin// snang ba med pa'i snying po ste// gnyis med btsal bral byang chub yin// brtag med rang byung snying po la// ji ltar brtags pas don dang 'gal// rtog med rang byung don rtogs pas// lam lnga sa bcu bgrod mi dgos// ji snyed ting 'dzin 'bum phrag dang// zhi gnas lhag mthong 'byung 'jug gis// bskal pa grangs med btsal gyur kyang// rang las 'byung gis gzhan du min// btsal du med pa'i snying po la// 'dzin rtsol med pa'i sems kyis gnas// bya byed med pa'i chos nyid la// rang byung btsal med dbyings kyi gnas// rang byung rang gis rang dmigs pas// dmigs su med pa'i snying po ni// btsal du med par rang las byung// brtag tu med de yul dang bral// bsgom du med de chos dbyings klong// bsgrub tu med de ye sangs rgyas// spong dang sbyong dang 'byed dang slob// dag dang dbang byed spong len med// de nyid rtogs pa'i rgyun 'brangs nas// gdod nas byang chub ga la yin// ye mthong byas zin bkod pa zin// grub zin ye sangs rgyas zin pas// bsgrub bcing btsal du ye nas med// rang byung dag pas mthong cha zad// de yang 'dzin pa'i chos nyid yin// 'dzin med chos kyi snying po la// chos kyi sgo mor brdar brtags kyang// chos kyi phung po zad mtha' med// rtog pa'i 'du shes gang skyes kyang// mkha' mnyam klong du ye gcig ste// bzang ngan blang dor ye bral nas// bcos 'dzin med de ye shes klong/ khyung gis gar 'phur nam mkha'i dbyings// nya yis gar 'phyos rgya mtsho'i 'jings// rtog pa ci skye chos kyi dbyings// sems kyis gar bltas ye shes klong// mkha' mnyam dbyings las 'da' ba med// rgyal ba'i yon tan rmad byung ba// kun kyang rang byung dag pa'i dbyings// zhing khams mtha' yas rdul snyed nas// dpag tu med pa'i rgyal ba rnams// de bzhin nyid la gnas mdzad pa// rang byung sems nyid klong gi ngang// mtshan dang dpe byad 'od 'bar ba// tshogs gnyis rdzogs pa'i rgyal ba rnams// rtog dang gdul bya'i dbang gis snang// kun kyang snying po rang la gnas// nam mkha' khyab pa'i de bzhin gshegs// gang phyir rgyal ba de rnams ni// sku gsung thugs so yon tan dang// 'phrin las stobs dang mi 'jig dang// smon lam dbang mkhyen grangs las 'das// nam mkha'i khams dang mnyam sbyor bas// 'bras bu grangs med rtsol ba med// de phyir mkha' mnyam de bzhin gshegs// rang byung dag pa'i dbyings nyid yin// gang phyir mthar thug med pa yang// rang byung dbyings las gar ma yin// rgyu dang rkyen gyis bslad pa med// rang byung ye shes brjod dang bral// mi gnas ye shes bde chen po// ye shes nyid pas gdod btsal med// kun mkhyen nyid pas bsgribs dang bral// rang byung nyid pas gzhan pa med// mnyam nyid mkha' ltar gnas pa'i don// thig le gcig pas spro bsdu bral// skye shi med pas rtag chen po// zlums dang cha shas med pa dang// kun tu brdal dang ma nor dang// ma bcos gcig gi ngang gnas pas// thig le chen po mnyam nyid klong// mkha' la nyi ma 'bum brdal zhing// 'khor ba'i mun pa dus gcig 'joms// kun gsal me long 'od po che// rang las rang gsal rang gi ngang/ khyab brdal rdo rje sems dpa'i mchog/ zla ba dri med zhal mnga' zhing// nam mkha' klong yangs kun gyi bla// 'di ni rang byung ye shes te// kun bzang rdo rje sems dpas bshad// ces gsungs so// byang chub kyi sems mkha' mnyam klong gi rgyud chen po las// rang byung gi ye shes bstan pa'i le'u ste gsum pa'o//// de nas gzhan yang bshad bya ba// sems kyi klong chen kun tu rgyas// sel med pa dang zab pa dang// rgya chen rlabs ldan 'khrug pa med// ma bcos dag pas klong gi don// sna tshogs nyid phyir de sems nyid// 'dod dang sdang rmongs mthong phrag dog/sems nyid dag phyir spang ba med// mi sdug byams dang 'byed pa dang// dma' dang yangs sems blang sa med// dbang po lnga yi spyod yul la// mkha' mnyam klong chen mnyam sbyor bas// bdag nyid nam mkha'i spyod yul la// ci la'ang chags shing len pa med// mtho dang yangs dang kun 'byung dang// rtog par dka' dang blang gyur dang// rtog med kun khyab de nyid phyir// nam mkha' 'byung ba'i rgyal po yin// de bzhin sems nyid rang byang ste// de ltar snang phyir thig le gcig/ dpe don 'dra phyir don la'ang 'thun// de yang rang byung sems nyid yin// sra dang mi shigs bskyed pa dang// bzang ngan med dang rten pa'i phyir// sa ni 'byung ba'i skyed gzhi yin// de nyid rtog yin sems nyid klong// de bzhin sems nyid de bzhin nyid// de nyid 'byung ba chen por bshad// sdud dang rlabs dang zab 'byung dang// lan tshwa ro gcig ji bzhin du// sems nyid de dang 'drar mtshungs te/ khyab bdag 'chang chen dpa' bos bshad// smin dang sreg dang dro ba dang// ngo bo med la don byed nus// de yang rang byung chen po yin// de nyid kun byed byang chub sems// bskyed dang 'thor yeng kun gyi rten// thogs med mgyogs par rgyug pa ltar// rang byung sems kyang de bzhin te// de nyid byang chub sems nyid klong// grol dang ma graul la sogs pa// gnyis su rtog pa thams cad mtha'// mtha' bral dbus ma'ang de bzhin te// dbus yod mtha' yas de bzhin 'byung// sems kyi klong las ci yang snang// mnyam nyid ngang las 'dod dgur bsgyur// ma bcos ma yengs gnas pa gsum// de nyid rnam par rtog pa yin// gang yang ma yin de bzhin nyid// ji srid mtshan ma g.yo ba kun// rang byung sems kyi klong brdal bas// ye shes nyid la nyid spyod de// bcos pa med de ye shes klong// dmyal ba'i sdug bsngal ci mthong yang// ye shes rol ba nyid yin na// bde sdug mtshan ma ci byung yang// smos ci dgos te de nyid yin// thams cad snang na snang du zad// ye shes rol ba ma 'gags pa'o// kun kyang stong na stong du zad// rtag pa'i ngo bo ye nas med// rtag na rtag ste chos kyi dbyings// 'gyur ba med pa'i lhun la gnas// chad na chad de chad dang bral// byang chub nyid de log rgyun chad// kun kyang rang bzhin ye shes klong// klong las ma byung chos med cing// klong nyid ma yin gcig kyang med// klong du ma 'dus gang yang med/ de phyir rang byung bcos med klong// klong gis klong gi don rtogs pas// klong la skye shi 'du 'bral med// klong la yengs med bsgom pa'ang med// klong la bgrod med btsal du med// ma bcos byang chub snying po la// gang ltar brtags pas tshig gi mtha'// mthar rtog mtha' ste dbus 'dzin mtha'// de ltar brtags pas dbus mi rnyed// dbus 'dod mtha' dang bral mi srid// mtha' dbus klong du nges par 'dus// sems kyis sems tshol ci zhig rnyed// sems de rnyed na 'khrul pa'i lam// 'khrul par mthong nyid 'khrul pa ste// ma 'khrul pa yang 'khrul pa'i chos// nges par klong gi don brtags na// 'khrul rgyu med pas 'khrul pa med// sems la dmigs med spyad du med// dbus la mi gnas mtha' mi spong// mi rtog mi gnas cir mi bsam// mi bsam mi 'brang ngang gis zhi// sems kyi klong la bdag gzhan med// ting 'dzin klong la yengs pa med// spyod pa'i klong la spang blang med// mnyam nyid klong la che chung med// thig le'i klong la spro bsdu med// lta ba'i klong la gza' gtad med// 'phrin las klong la bya btsal med// rtogs pa'i klong la gzung 'dzin med// kun kyang ye shes chen po'i klong// klong yangs nam mkha'i rang bzhin la// sprul pa'i cho 'phrul gang byung ba// de nyid ye shes chen por rtogs// lta ba'i ngo bo brjod du med// ting 'dzin gsal la yengs pa med// spyod pa 'dzin dang chags pa med// de ltar sus rtogs sangs rgyas yin// 'gro drug sangs rgyas yin par nges// rang sems btsal med chos skur nges// thams cad bdag nyid chen por nges// nges pa rnyed nas 'gyur mi srid// gang phyir bde chen myong 'dod pas// ma bcos ma brtags ma yengs pa// gsal ba bzhi ldan rnal 'byor pas// gzhag pa'i thabs su shes par bya// byung tshor rtog pa rkun bu dang// ched du byas dang shugs las byung// rang las byung ste ngo bo stong// byung tshor tshor ba gdeng gis zhi// bsam du med pa'i rang bzhin ni// bsam pas ci bsam rtog pa'i rgyun// bsam du med dang gzhan med dang// 'gal phyir ci yang mi bsam mo// soms shig bsams pa ma byed cig/ ma chags pa la chags pa med// chags pa la yang chags pa med// chu la ri mo bris pa ltar// gsal bar byung yang dmigs dang bral// sangs rgyas ma lus kun 'dus pas// mtha' thug med pa'i chos bstan nas// so sor 'tsham pa 'dul mod kyang// nges pa'i don la gcig las med// mkha' mnyam klong du kun 'dus pas// gnyis par bsam pa ye nas med// gcig tu bsam du med pa nyid// mi bsam pa nyid bsam pa'i mtha'// yi ge med pa'i rgyud las ni// ji ltar 'thun pa de ltar grags/kha dog rigs brgyud kun bral ba// yi ge'i mtha' ru ci ste rung// gang zhig med pa nyid yod ces// byis ba sgro skur gnyis kar 'dod// ye shes mtha' bral stong nyid la// yod dam med ces ci byar yod// sgom zhes dmigs 'joms chags sems la// bral 'dod chags pa spong nyid chags// ma chags pa nyid chags yin na// chags pa btsal bas gting mi rnyed// gting mtha' med pa'i nam mkha' la// dmigs 'dzin sgom 'dod byis pa'i las// ched byas byang chub thob 'dod pas// rgya mtsho'i thigs pa bgrang ba 'dra// yod pas ma yin med pas min// gnyis kas kyang ni ma yin te// mtha' med 'dzin bral snying po yis// byang chub chos kyi dbyings nyid mthong// de bzhin ma bcos mnyam nyid yang// gang ltar mthong ba de ltar yin// gang phyir brtags na de min te// gnyis ka rtog pa nyid kyi mtha'// dbus mtha' med pa'i sems nyid la// de ltar 'dod pas 'khrul pa'i lam// dgag pa'ang de ltar yin shes pas// 'di ltar ci yang mi gzung ngo// gang phyir mkhyen ldan dam pa yis// nges pa'i klong 'di mthong ma thag/lung thob rgyal sras dam pa ste// smra ba'i seng ge rgol ba 'joms// bdud bzhi choms kyis da ma rtsol// dngos grub thob kyi da ma rtsol// bdud rtsi 'thungs kyis da ma slob// kun bzang rig pa'i spyod yul las// dman pa'i spyod yul ga la yin// byang chub kyi sems mkha' mnyam klong gi rgyu chen po las/ sems kyi klong bstan pa'i le'u ste bzhi pa'o//// de nas gzhan yang bshad bya ba// byang chub kyi ni bslab pa ste// bslab tu med pa'i bslab pa de// bslab par nges pa nyid yin no// bslab cing goms pa med pa ni// rang byung ma bcos sems nyid yin// 'di ni kun byed rgyal po ste// nges par 'di zhes bstan du med// med par bstan dmigs bcings byed pa// ma bcings bcings pa'i mdud pas bsdam// btsal zhing bslad pas slar zhing dam// bcings med grol med ye nas gnas// 'gro bas dug tu kun brtags te// ye nas de bzhin bdud rtsir gnas// de nyid sems nyid dam pa ste/ khyab par gnas pa'i so dang bral// sems la skye shi gdod nas med// sems la dmigs su ye nas med// sems la rigs brgyud ye nas med// sems la kha dog ye nas med// sems la mtshon du ye nas med// sems la brjod pa'i tha snyad med// sems la gnas dang gza' gtad med// sems la 'pho zhing 'gyur ba med// sems la sems kyis brtag tu med// sems la btsal zhing bsgrub tu med// sems la ltung sgrib gol sa med// sems la dge dang sdig ba med// yod pa gdags pa med bzhin du// med pa nyid kyang yong ma yin// rtag pa med cing chad pa'ang med// sems la bgrod pa ye nas med/ sems la sems kyis bsgom du med// sems la gzhag ba med pa'ang med// sems la rgyu rkyen ye nas med// nam mkha' rgyas pa'i mtha' bzhin du// gdod nas ma khyab med par gnas// bslab pa med pas bslab tu med// sangs rgyas med de chos kyang med// dge 'dun yang ni de bzhin te// lam dang sa dang tshad kyang med// med pa ma yin snying po'i don// 'di ni thog ma tha ma med// grol ba rang byung zhi ba'i lam// re dog med pas 'dab chags nyid// mkha' la thogs pa med bzhin no// bskal pa kun gyi sngon rol du// nga nyid gcig pu sngon du byung// nga med pa yi sngon rol na// dus gsum sangs rgyas ming yang med// nga med pa yi sngon rol na/ khams gsum rgyud drug ye nas med// nga med pa yi sngon rol na// 'byung ba lnga po ye nas med// nga med pa yi sngon rol na// brtags pa'i mtshan ma ye nas med// nga med pa yi sngon rol na// mtho rig ngan song ye nas med// nga med pa yi sngon rol na// byad par ma lus kun med pa'o// de phyir nga nyid pu gcig ste// nga la goms pas bslab pa rdzogs// mthar thug med pas mgyogs bgrod kyang// chos kyi dbyings las gar ma phyin// bskal ba'i me ri 'bar ba yis/ khams gsum phyogs bcu kun bsregs kyang nga la bsregs dang tshig pa med// de nyid byang chub snying po'i sku// bskal ba'i chub 'khrug kun bkrus kyang// nga yi ljags kyi mtha' ma rlan// dus gsum sangs rgyas sras po pa// dus gcig lto bar gsol na yang// mnyam nyid dbyings la mi g.yo bas// 'grangs bsgrib med pa nga yi lto/ khams gsum rgyud drug klong na nyal// dug lnga dug gsum lto na 'phyo// theg pa'i bye brag gcig tu rdzogs// kun kyang ye shes gsal ba'i ngang// smra ba'i seng ge ri dgas rgyal// zil gnon gcig pu rang byung ba// theg pa'i spyi gcod mkha' ltar yangs// ye sangs rgyas so btsal du med// nyi ma'i snying por rang gnas pa// 'od la btsal ba mi dgos ltar// bslab pa gcig pa'i don rig na// bslab pa ma lus gcig la rdzogs// yang dag sangs rgyas lam rig pas// 'dod chags zhe sdang gti mug dang// nga rgyal phrag dog chen po rnams// gang phyir sangs rgyas lam yin pas// de dag 'dod pa'i skyes bu yis// rang byung byang chub chen po la// kun la sbubs dang ltas ngan brlag/ mi 'byed mtho dman rtog pa med// gang phyir 'khrul pa'i dug lnga ni// ye nas ye shes rang snang bas// nyi ma'i dkyil na mun stong bzhin// 'khrul dang ma 'khrul gnyis ka med// 'dod chags zhe sdang gti mug kyang// gang phyir sku gsum ngo bo'i phyir// dbang du med de nyid kyi dbyings// ye nas chos dbyings dam pa nyid// rang byung dbyings kyi rol pa yis// 'dod yon nam mkha' mnyam sbyor bas// rang las byung ba'i longs spyod la// rang gi rol pa cir yang mdzad// ye shes dbyings la chags pa dang// thugs rje dbyings la chags pa dang// ting 'dzin rlung du chags pa ni// chags med chags pa dam pa yin// rtog pa'i dra ba 'joms pa dang// ma rig pa nyid rig par 'joms// ched 'joms mnyam pa'ang bcos byas nas// zhi ba chen po'i ngang la gnas// nga dang bdag tu mi 'byed cing// chos dbyings ye shes mi 'byed la// mnyam gzhag yul du mi 'byed pa// klungs su zhugs pa dam tshig yin// lta ba mngon par mtho ba dang// ting 'dzin yengs med klung gnas dang// rnam rtog ri bos mi bskyod pa// ye shes gdeng dang ldan pa yin// chos dbyings gzung 'dzin med pa dang// lta ba phyogs rigs las 'das pa// ting 'dzin rnam rtog mi chud pa// 'di ni theg chen phrag dog go/ rig pa klung las ma yengs shing// ye shes dbyings las ma yengs la// kun kyang mnyam par ma yengs na// chos kyi klung la gnas pa yin// sems nyid chos sku yin pa dang// myong tshor sgo gsum kun longs spyod// nges la don med sprul ba'i phyir// ku kyang sku gsum las mi 'da'// de phyir gang la de bslabs pa// bslab pa'i sgo ni mtha' yas pa// nges par 'dir 'dus nges pa ste// de la nges par bslab par bya// gang phyir bslab pa'i mtha' gsungs pa// gcig la dus gcig kun rdzogs pas// bslab mtha' rdul dang grangs mnyam pa// 'dir 'dus rdzogs pa ngo mtshar che// theg pa'i bral thabs cha mnyam pa// nges par thig le gcig bsdus la// gcig gi don la gang gnas pa// thos pa bsam pa 'dir mi dgos// ye nas lhag pa'i dam tshig la// ma skyes pa dang mi gnas dang// gdod nas 'dar med rang bzhin la// dam tshig grangs kyis bsrung dang bral// brgyad khri bzhi stong kun bstan yang// ye nas mkha' mnyam klong 'dir gcig/thig le gcig la gang gnas pa// ye nas gcig pas 'thun bsdebs la// rang sems chos dbyings mngag mkhas pa// mtha' yas kun la de mkhas pas// rtsa ba chos dbyings 'dir 'dus pas// tshig la mkhas par bya mi dgos// mngon sum mthong med mthong ba'i mig/ thos pa mi rigs snyad dang bral// 'di ltar mkhas pa'i rnal 'byor la// lta ba gza' gtad gdod nas bral// bsgom du med pa'i chos dbyings la// sgom dang mi sgom tha dad med// ye nas ma bcos snying po la// sgom pa 'khrul te log pa'i lam// nam mkha' mtha' yas spyod pa la// spyad dang mi spyad ris med de// thogs chags med de rtog pa'i las// dor dang mi dor 'dzin pa 'khrul// ye nas che btsan bdag gyur cig/ nga las ma byung med pa dang// rang gis rang la dbang sgyur bas// rim pa dbang gi bgrod dang bral// dmigs dang shes bya bsgrub pa'i don// rang byung sems nyid rang shar bas// bsgrub cing btsal ba gdod nas med// de phyir don grub man ngag 'khrul// ye nas thig le'i rang bzhin la// spros pa med cing bsdu ba med// gcig tu 'dzin pa'ang 'khrul pa'i lam// de phyir dgos pa 'di la med// rig pa mtshan mar ma 'brangs pas// rang byung ye shes gnas su rdzogs// byang chub kyi sems mkha' mnyam klong gi rgyud chen po las// bslab tu med pa'i le'u ste lnga pa'o// 3// de nas gzhan yang bshad bya ba// skye shi 'du 'bral med pa'i don// rang byung rtog bral ye shes la// lta 'dod rtog pa 'khrul pa'i lam// gdod nas rgyu dang rkyen med pas// thams cad skye shi snang ba med// gdod nas med pa'i chos 'di la// yod dang med ces ci byar yod// skye ba med pa'i chos nyid la// skye zhes ston pa 'khrul pa'i lam// gdod nas ma skyes snying po la// skyes pa'i ngo bo ji ltar 'grub// ma skyes pa nyid des mtshon yang// de ltar de nyid mtha' yin te// nges pa'i don la gang gnas pa// ma skyes pa yi snying po la// skye ba med pas 'gags pa'ang med// der snang de nyid snying po la// dgag dang mi dgag rtog pa'i lam// mkha' la bya lam tshul bzhin du// skyes dang ma skyes 'gag pa med// ma bcos ma nor chos kyi dbyings// mnyam nyid chos sku tha snyad bral// bstan pa de kun tha snyad yin// skye shi 'khrul 'khrul 'khor ba'i lam// de dag gnyis par dbyer med par// gdod nas skye shi med pa'i thugs// 'dzam bu gser gling ji bzhin no// rang byung rmad grags snying po ni// rgyal ba kun gyi rje btsun pas// yongs la snyoms pa'i thugs rje 'byung// mkha' la nyi ma 'bum brdal bzhin// rang byung thugs rje byin rlabs kyis// rang bzhin 'dul dang thugs rjes 'dul// thabs dang drag shul nyid dag gis// gcig kyang yal bar dor mi mdzad// zla ba skye 'bri med pa la// 'khrul pas skye 'brir mthong ba ltar// ma skyes snying po byang chub la// skye shir 'dogs pa glo bur yin// ma rtog log rtogs phyogs rtogs pa// yang dag ma rtogs sems can la// thabs kyis 'dod dgur gyur pa'i dpal// de yang rang byung sems nyid yin// nam mkha' yangs pa'i mtshan nyid la// cho 'phrul mtshan ma ci snang yang// 'gag pa med par 'byung mod kyi// de nyid nam mkha'i rang bzhin yin// 'bab chu lu ma lteng ka dang// mtsho dang chu mig la sogs pa// chu dang gsher bar bye brag med// gzugs dang rgyun dang bum pa dang// mi mthun byed brag mtha' yas pa// 'dod dgur spyod cing 'dod dgur bsgyur// de nyid gser du gcig pa ltar// skye shi 'du 'bral dge sdig dang// chags dang ma chags blang dang dor// yod med rtag chad la sogs pa// rang byung ye shes nyid du gcig/ mkha' mnyam klong gi dkyil 'khor la// skye shi mtshan ma gdod nas dag/ gang zhig dag par rol ba ni// nam mkha' dag la 'khrul 'dod 'dra// skye shi spangs nas med 'dod pa// gzugs 'gags nas ni grib 'tshor 'dra// skye shi med pa nyid rtogs na// skye shi'i rtog pa smos ci dgos// bde sdug khyad par gang byung ba// so sor snang ba ma'i gag go/ rang byung ye shes chen po yin// de las gzhan pa yod ma yin// theg pa'i bye brag cir bstan pa// so sor don drug bya ba med// de kun rdzogs chen ngang yin pas// mkha' mnyam klong du nges par 'dus// rang byung chos dbyings nam mkha' la// rnam rtog rdul gyis gos pa med// skyon nyid yon tan chen po la// g.yo mtshan byang chub chen por 'gyur// ji ltar pad+ma dmar po la// 'dam skyes nyes pa gdod nas dag/ 'jam dang legs dang mdog gsal dang// bsil dang mi snyed ring du 'tsho// de nyid yon tan de las byung// rnam rtog ye shes chos nyid la// chos nyid dgag par ga la 'gyur// bsam gyis mi khyab chos 'di la// bsam pas mtha' thug ga la 'byung// skye shi nyid kyang chos nyid klong// sdug bsngal nyid kyang byang chub lam// byung tshor ma bcos bdal ba'i dbyings// nyon mongs lnga yang ye shes klong/khams gsum ye nas chos dbyings su// 'gro drug rgyal ba'i sras por shar// shar med nub med de bzhin nyid// de nyid rang byung rol par gcig/ de ltar nges pa ci zhe na// bsam gyis mi khyab dbyings shes pas// de la mtshon du rung mod kyi// bsam mi khyab la bsams pas phyin// kun bzhi nam mkha'i dkyil 'khor ni// rang byung 'od kyi dkyil 'khor 'phro// 'gro drug byang chub snying por sgral// 'khor ba gdod nas dag par sbyangs// gang ltar snang ba ye shes rol// ji ltar snang ba kun bzang nyid// mi chags mi dgos bde ba che// 'di ni byang chub sems kyi lung// ring du btsal bas ci zhig rnyed// rnyed du med pa'i chos dbyings la// byang chub snying por de ma thag/ btsal bas rang byung rang la thug/ rang gsal ye shes gzhal yas su// nyi ma 'bum gyi 'od gsal bas// ma rig 'khor ba gdod nas med// de yang rang byung dag pa yin// gdod nas rtag pa chen po la// skye shi gnyis su gang gis btags// ye nas stong chen mchog nyid la// stong nyid smra ba'ang gol ba'i lam// gdod nas rang byung ye shes la// rgyu dang rkyen du su yis btags// don nyid rang byung skye shi med// 'du 'bral med par ma rtogs par// log rtog tshig gis btsan thabs kyis// skye shi med par sgro btags te// log rtog sgra phyir blo 'brangs pas// dge sdig gdod nas med ces smra// skur 'debs dmyal ba chen por lhung// gang zhig blang dor med par spyod// de nyid blang dor chen po ste// ched du byas pas blang dor bas// log par ltung ba'i gags chen yin// gang zhig de nyid don rtogs pas// log spyod byang chub lam du 'gyur// zin pas rtsol ba'i ri bo 'joms// bdud kyi spyod pa'ang byang chub na// gzhan lta smos pa ci zhig dgos// blang dang dor ba rtogs pa nyid// gang ltar spyod kyang ya mi nga// dge dang sdig par mi 'byed de// mnyam nyid snying por ye gcig phyir// mnyam par ma gzhag ma yengs la// ting 'dzin mtshan mar btags pa zad// ting 'dzin mnyam pa'i ngang nyid la// pha rol phyin bcu dus gcig rdzogs// sa bcu bgrod med dus gcig rdzogs// gang la'ang mi gnas de bzhin nyid// stong pa'i stong pa 'du shes spangs// rtog pa'i du shes kun bral bas// ma yengs mnyam par gzhag pa'i ngang// 'du shes bral ba'i dbyings la rdzogs// sgom bral gsal yang rnam rtog med// mtshon pa'i tshig bral mnyam pa'i gter// ci yang ma yin kun kyang yin// bsam dang bral lo dmigs su med// bya bral rig pa mchog gi klong// chos nyid ma bcos yul bral bas// chos dang chos can gdags su med// mnyam nyid rig pa bde ba'i klung// gnyis med ye shes cir mi gnas// stong pa'i 'du shes dman pa'i sems// rang byung rtsol bral lhun grub la// mchog bral nyid du mtshon dang bral// bsam bral rig pa cir mi dgongs// dus tshad gcig la 'od 'bar lung// ma skyes dbyings la 'chi ba med// 'du 'bral med pa dbyings kyi ngang// stong pa'i stong pa mtha' dbus med// ye shes nyi ma dus gcig 'char// byang chub kyi sems mkha' mnyam klong gi rgyud chen po las// skye shi med pa'i le'u ste drug pa'o//// de nas gzhan yang bshad bya ba// bgrod bral ye shes mchog gi lam// lam dang lam gyi gol sa yis// rtsol bral rig pa don la sbyor// don tshul dpe yis mnyam sbyar nas// mkha' mnyam klong gi don la 'jug/ phyi nang snod bcud chos kyi sku// rang byung rig pa mchog gi klong// bya bral gza' ba'i yul las 'das// rang byung rig pa mchog gi lam// mtshon bral nyams ldan ye shes ni// nam mkha'i mtha' las longs spyod cing/ khams gsum gsang ba'i thar lam du// 'gro 'ong med pa'i ye shes gsal// rim pas ma yin dus gcig gnas// spro med bsdu med de bzhin nyid// phyi nang med de chos kyi dbyings// rang byung ye shes gsal ba'i 'od// nam mkha' khyab pa'i dus gcig bdal// rang gsal rgyal po'i ngo bo gsum// sku gsum rang 'char rig pa'i rtsal// ye gnas pa dang rtogs pa'i don// don gyi lam du shes par bya// don ni ma nor dbu ma'i lam// ji bzhin klung du zhugs pa rtogs// brtags na rig pa gsal ba'i brtags// cir yang gsal la gang yang med// rang byung 'od gsal mnyam par zad// mtshan ma'i tha snyad yul las 'das// dmigs bral dbu ma drang po'i lam// phyogs bral nam mkha' rgyas pa'i mtha'// gsal la dmigs 'jug bral ba'i lung// sgro med skur bral rig pa'i klong// bya bral rdzogs [(]pa[)]don gyi lung// rig pa gsal ba'i nyams dang ldan// brjod med ma brjod dag pa las// brjod pa'i sgra yis 'khor lo can// brjod pa'i mtshan ma'i khyad par gyis// brjod med rig pa gtan la 'bebs// brjod med brjod pa'i don yin yang// brjod med brjod pas gtan la 'bebs// brjod med chos dbyings lam rtogs na// brjod dang mi brjod kun dang bral// brjod pa rgyal po gsung mchog la// dgag dang bsgrub par 'dzin mi byed// brjod pas brjod med rtogs pa'i tshul// pra kri gsal bar shes par bya// brjod med brjod pa'i 'khrul tshig gis// ji bzhin rig pa ma mtshon na// rang gsal ye shes mchog gi sgo// rtog med thabs kyi lam dang bral// lung dang bla ma'i man ngag gis// ji bzhin rig pa'i mthu med par// rang rtogs log pa'i sgra tshig gis// gsang ba spyod pa phung ba'i rgyud// long bas long ba khrid pa ltar// log pa'i g.yang sa chen por lhung// 'jig rten bcas kar 'gyur ba dang// gsang ba 'jig pa'i rgyu ru 'gyur// ji bzhin ma yin bslad pa yin// yang dag nges pa'i don mi mthong// 'dres pa'i theg par gyur ba'i mthus// 'jig rten phra men theg par 'gyur// rdzogs chen ma bcos don dang 'gal// 'gyur med gsang ba'i don las nyams// rig pa rang gsal klung dang phral// rnam rtog rtsol ba'i lcags kyis bsdams// ji ltar mar me gsal ba bzhin// 'dzin med rkyen bral stobs kyis 'jug/ 'bab chu lta bu'i man ngag gis// ji ltar gnas pa de ltar gzhag/rin chen sa gzhi 'bar ba ltar// kun kyang de bzhin nyid du gsal// pad+ma dmar po lta bu yi// de lta nyid ni chags dang bral// ka la ping ka ji bzhin du// gdod nas ma sbyangs cig car rdzogs// ma bcos gser gyi rang bzhin ltar// kun kyang rang gsal gcig tu gnas// nyi ma'i snying po ji bzhin du// thugs rje 'gro 'ong med par brdal// rgya mtsho chen po'i rba rlabs ltar// cir yang snang zhing nyid du 'dus// nor bu rin chen 'bar ba ltar// gdod nas dpag med lhun gyis rdzogs// shel ltar dag pa'i rang bzhin la// ji ltar bltas pa de ltar snang// mi 'gyur nag po'i rang bzhin la// chos dbyings ma bcos rkyen dang bral// lan tshwa ldan pa'i rgya mtsho ltar// ye shes rnam grol ro dang ldan// nam mkha' rgya chen ji bzhin du// bcos med ye gsal nyid du gnas// bya byed med pa'i tshul gyis su// rang gsal rig pa'i don la 'jug/ 'byung 'jug med pa'i rnal 'byor gyis// ji ltar mnyam pa nyid du gsal// yul sems gnyis med thug phrad lung// ma brtags rang gsal 'od po che// brtags na mnyam pa'i don dang 'gal// ri bo mes bsregs man ngag gis// mnyam nyid rol ba'i zhing du blta// tsan dan nags tshal man ngag gis// kun kyang rang gsal mi g.yo'i lung// chu drag lta bu'i man ngag gis// g.yeng dang drug po'i don du gsungs// dran med rig pa'i man ngag ni// ma bcos rang gsal gzhag pas go/ yul med rang gsal mchog gi klong// 'byung 'jug med pa'i thabs kyis go/rang byung ma bcos rdzogs chen la// kun rtog brtags pa grub ma grub// mtshan ma'i tshig gi khyad par las// don la rtogs pa rtag chad lam// rang byung byang chub sems nyid ni// kun brtags nyid du snang mod kyis// ye shes nyid phyir mtha' dang bral// ma grub snying ma'i snying po ltar// gnas kyang 'khrul pa'i ngo bo snang// 'khor ba blo bur nyid yin na// mya ngan 'das pa de bzhin te// thug pa med par 'gyur ba dang// mu stegs blo bur chad par ltung// gang 'dzin de nyid ltung ba'i rgyu// 'dzin bral ltung med 'jigs dang bral// phyogs bral chos la phyogs 'dzin pa// rang byung phyogs med nyid dang 'gal// kun brtags dngos la ma grub na// 'khor ba'i sems can ci las 'byung// thams cad 'khor ba dong sprugs las// bstan pa'i chos kyi gang la dgos// 'khor ba rang gsal lhun grub la// dgag sgrub mkha' la mthos 'jal 'dra// dngos la ma grub da lta yod// tha ma stong pa nyid lta zhes// mthar 'dzin long ba grong khyer pa// mu stegs chad pa'i khab yin no// rang gsal gzhan gsal gnyis ka mtha'// mkhyen pas dbus la'ang gnas mi 'gyur// rang gsal rang 'dzin mtha' yin la// gzhan gsal gzhan byung rgyu rkyen mtha'// de dag ma rabs byis ba'i sems// de yi rang byung don mi mthong// btsal bas byang chub sems mi rnyed// ma btsal bas kyang de bzhin min// btsal dang ma btsal dbu ma'i lam// ye shes 'od gsal grub par 'grub// phyogs bral mnyam pa'i chos dbyings la// bdag gzhan las dang rgyu rkyen gyis// btsal yang mi rnyed long ba yis// zas 'dod rdo dang phrad pa'i tshul// cir snang rang byung sems nyid la// bden bzhi spong len tshul bzung nas// rim pas rang don thob byas pas// grub thob kyi yi sems dang 'dra// rten 'brel 'gag pa'i tshul gyis ni// kun bzang sems nyid rol ba la// bkag pas rang sa'i 'bras thob pa// dpa' min g.yul du gnas dang mtshungs// bden gnyis tshul bzung spyod pa yis// sa bcu bgrod nas 'bras thob pa// thams cad sgyu ma nyid 'dzin pa// rmi lam spyod yul nus dang 'dra// ye nas rig pa'i chos dbyings la// dag dang ma dag tshul bzung na// mtho dman grub pa'i rim pa yis// don la 'dod pa'i tshul bzung ni// long ba rgyal sar gzhag dang mtshungs// gnyis 'dzin rig pa'i khyad par gyis// gnyis med rgyal ba'i ye shes la// gnyis kyis 'bras bu grub 'dod pa// phra men pa yi tshul dang mtshungs// ye nas rig pa ka dag la// spong len phyag rgya cha gnyis pa// bsgrubs pas 'bras bu thob 'dod pa// chu dang 'o ma 'dres mtshungs 'dra// bde mnyam thabs dang shes rab kyis// rig pa'i ting 'dzin nyid sbyangs na// yab yum rol pas don 'dod pas// 'jig rten dbang po bde dang mtshungs// dbyings dang ye shes rgyu 'bras kyis// ye nas rang gsal dkyil 'khor la// 'od kyis ting 'dzin bgrod 'dod pa// glang chen por nas rjes lta'i tshul// 'di kun blun po'i mi rnams kyis// nor bu rin chen yon tan la// tshod kyis spyod pa'i tshul dang 'dra// shes par mi 'gyur byis pa yin// rtsol ba'i chu bo'i bogs pa dka'// dkyil 'khor mtha' dbus rtsol ba dang// rtog pa gnas 'gyur don rtags 'byed// sgo phugs dbyings dang ye shes 'byed// yab yum 'byed dang kha dog grangs// 'khor ba ru bzlog rtog pa yis// thabs la brten dang dam tshig grangs// don gnyer mchod pa nyi 'grim dang// rab 'bring gsum dang bdag gzhan byed// tshogs la re rtsol bden ris 'byed// dbang gnyis rim thob sa bgrod dang// spyod pa spong len la sogs pa// bcings dang thar ba'i lam dang bral// lhun grub phyogs ris mi mnga' ba// ji ltar bltas pa de ltar gsal// rang la mi rtsol gzhan mi rtsol// rtsol ba'i mtha' spangs mnyam pa'i tshul// gdod nas rig pa rang gsal bas// 'khor ba'i ye shes snying por bltas// snying po rang byung ma yengs pas// ting 'dzin 'khor lo rgyun mi 'chad// lhun grub rig pa dbang bskur bas// rig pa rang dbang gdod nas thob// thig le bsrung mtshams bral 'dzin med// nyams pa med pas bskang du'ang med// ma grub grub par byar med klung// grub pa don du gnyer ba med// spyad yul kun bral ye shes mnyes// mchod pa ye zin bya dang bral// ma 'dres yongs rdzogs thig ler gsal// dkyil 'khor chen por gdod nas dag/'khor ba sangs rgyas ye grub pa// grub pa thob zin sgrub tu med// mdzad pa'i byin brlabs rang 'char bas// don du bya ba'i 'phrin las med// phyi nang skye 'gro'i spyod pa kun// rgyal ba'i 'dzad par ye nas shar// ye nas chos sku mchog gi lam// bdag nyid chen por lhun grub pas// lam lnga sa bcu sbyang du med// ma bcos mchog gi sa la gnas// sa bcu so sor phye ba yang// rang byung byang chub sems kyi cha// dman pa spro ba skyed pa'i phyir// gcig gi yon tan bgrang bar zad// gzhi gcig mthong tshul bsam mi khyab// mkha' mnyam klong gi don la 'dus// byang chub kyi sems mkha' mnyam klong gi rgyud chen po las/bgrod cing btsal du med pa'i le'u ste bdun pa'o//// de nas gzhan yang bshad bya ba// rang byung theg pa'i rgyal po la// thams cad ye shes rang snang bas// dngos la che chung mi gnas shing// de bzhin nyid du dbyer med kyang// rtogs dang ma rtogs khyad par gyis// che chung khyad par so sor grags// gzhi lam mthar thug don nyid la// sgra mthun don spags khyad par gyis// mthun dang mi mthun so sor grags// rdzogs chen rtogs na gcig las med// gzhi dang gzhi yis gol sa yis/ khyad par 'phags pa'i che ba can// rnam smin bag chags sa bon ldan// cis kyang dgos ba bzhin du 'dod// dgur gnas rgyud dang bcas pa ste// skad cig can dang gnas 'gyur dang// spros pa'i mtshan ma chad pa dang// sangs rgyas sems can rgyu 'bras can// rgyu dang bskyed pa'i gzhi zhes bstan// rnam smin bag chags cor btags kyang// mkha' mnyam klong la gnyis su med// rnam smin bag chags rnams bcad pas// 'khor ba sangs rgyas zhing du gsal// cis kyang ma gos pad+ma ltar// dus gsum ma bcos snying po bas// mi 'gyur chos nyid dag pa'i phyir// las kyi dbang du ga la 'gyur// gdod nas rang gsal chos sku las// byin rlabs 'bras bu kun gsal te// ye sangs rgyas las btsal med cing// rgyu dang 'bras bu'i chos mi gnas// rang byung mtha' bral ye shes la// rgyun dang rgyun bral rtog pa ni// nam mkha' yod med rtsol ba 'dra// gnyis ka'i mtha' bral skye 'gag med// rang byung ma skyes ye shes la// snga phyi 'gag pa'i chos med de// tshig gi mtha' la'ang mi gnas pa// bcos med de bzhin nyid kyi tshul// rtog pa ye shes lam 'gyur na// rdo las gser du 'gyur dang 'dra// gdod nas dag pas bsgyur med de// rtsol bral ye sangs rgyas pa'i klong// snying po rang byung 'od gsal la// sangs rgyas sems can gnyis med cing// lam gyis bcos shing bsgyur du med// chos sku ma bcos gdod nas gnas// rdo rje nyi ma'i snying po ltar// gdod nas rig pa 'od gsal la// gnyis pa'i chos dang bral bas na// bde ba chen por rang bzhin gnas// lam yang tshig lam don lam ste// de re gol sa ngo bo nyid// zhi gnas 'phags pa che ba yis// theg pa'i rgyal po yin par 'dod// tshig lam mtshon pa'i sgo mo yis// don lam brjod bral ye shes la// brjod bral ye shes nyid du gzigs// de ltar gsal na don gyi lam// gsal ba'i dkyil 'khor dbus mtha' med// gang yang ma yin de bzhin nyid// sku gsum rang bzhin khyab gdal la// blo yi rang bzhin cir yang mi khyab bsam// brjod bral rang byung snying po la// snang rtags zhen pa'i chos med par// ma bcos rang gsal ma yengs par// gnas pa don gyi lam yin no// gsal dang mi gsal cha 'dzin cing// zhi gnas lhag mthong cha gzung nas// ye shes rim par 'char ba ni// ltos pa don gyi lam yin no// phyogs 'dzin theg pa rim brgyad kyis// rang rang rtog pa'i mnyam gzhag pas/ phyogs 'dzin zhen pa'i rnam rtog gis// bltas pa'i lam ni rnam rtog yin// gang zhig gnyis pa'i chos yod la// re dang dogs pa'i cha 'dzin la// gol dang sgrib pa de la yod// thams cad ye shes rang gsal la// gol dang sgrib pa'i chos med par// gdod nas dag pa'i don rtogs na// gol dang sgrib pa'i chos mi gnas// don ni brda bral rig pa'i lam// rig pa khu chas sems kyis nyams// rig pa'i ye shes 'od du 'bar// gsal la dmigs 'jug mi gnas pa'o// nges pa mi slu bden pa'i tshig/ nges lung man ngag rig pa'i nyams// nges par mtshon pa'i sgra tshig gis// mtshon pas tshig gi lam du 'dod// brjod med chos dbyings rang gsal la// de brjod gol bas ji bzhin nyid// rang byung rig pa'i 'khor lo can// mtshon pas mtshon pa'i tshig gi lam// ma bcos mthong ba'i yul med la// ji ltar bltas pa phyin ci log/ phyogs kyi 'du shes zhen pa can// phyogs bral mnyam pa mthong mi 'gyur// rdzogs chen gdod nas rang gsal la// phyogs ris med par gsal bar bdal// gnyis med ye shes zhen bral bas// lta ba gdong nas dag pa che// ye nas chos dbyings kun bzang la// zhen pa'i spong len mi gnas shing// spong gegs spyong sogs mi gnas la// mtha' yi spyod pa de ltar brtags// gang ltar brtags kyang nor ba'i lam// ji ltar spyang pa 'khrul pa'i chos// ye nas gnyis med dgag bral la// ma chags byang chub yan du khye// ma chags dag pa'i don mkhyen pas// 'khor ba rang grol snying por spyod// gsung dang thugs sogs rtsol ba yis// dbus mtha' mtshan ma'i dkyil 'khor la// 'khrul pa'i zhen pas cir brtags kyang// yang sgoms yang bshig byis pa'i tshul// ma bcos rang byang dkyil 'khor ni// ma skyes gdod nas sku gsung thugs// rtsol bral rig pa'i dkyil 'khor la// mtha' dbus med pa khyad par 'phags// ji ltar dam pa'i rigs can de// rgyal po dge slong sa ri sogs// tshig rdzas sngags kyi dbang bskur bas// rtsol ba'i chu bo'i 'dam du zin// brgyud pa chags pa'i las kyis khrid// 'khor ba gnas rab dgu ru brgyud// srid pa log pa 'khor ba'i lam// ye shes rang dbang rgyal po ni// ye nas 'gro ba kun la gnas// de dag tshig gi brda sprad pas// skad cig nyid la mngon sangs rgyas// 'khor ba ma spangs longs spyod la// rig pa gzungs kyi dbang thob pas// bcos med rang gsal dbang thob nas// bskur thob med pas gdod nas 'phags// dman pa'i khyad par gang dag gis// rig pa rang dbangagang dag la// de yi rtsal gyis brtags pas na// brtags pas 'khor ba'i 'dam du zin// gcig 'phags thig le gcig gis 'phags// kun 'dus theg pa'i yang rtses 'phags// rtsol bral lhun gyis grub pas 'phags// tshe lnga ldan pas 'phags pa ste// phun sum tshogs pa nyid kyis 'phags// nyi ma'i snying po 'bar ba ltar// gdod nas sgrib med dag las 'phags// mkha' la khyung chen lding ba ltar// gang ltar spyod pa de ltar bde// gcong rong ye shes snying por gsal// bde sdug longs spyod bde chen rgyan// ma 'phros nyi ma'i dkyil 'khor ltar// rang gsal byin rlabs phyogs bcur 'phro// gang tshe mkha' mnyam gsal ba'i dbyings// pra krid gsal bas bstan pa'i tshe// 'gyur med snying po rang gsal lung// ji bzhin rig pas gsal bar shes// 'do 'bar snying po mchog gi lung// rang rig nyi ma phyogs med gsal// 'khor ba dus gcig snying por gsal// kun kyang gnyis med rig par gsal// gnyis med ye shes rang byung ni// rig pa klong bdal cig car 'gyur// 'dod 'byung rin chen phung po la// rtsol bcas theg pa'i khyad par gyis// gang brtags de nyid rnam rtog ste// btsal med dbyig dang phrad mi 'gyur// che chung med pa'i klong bdal nas// che ba'i chen po rang bzhin gnas// che chung gnyis kyi khyad par la// rtsod pa chung du byis pa ste/ khyad par 'phags te don rtogs phyir// che chung bye brag dbye ba gces// rtsol bral ye shes 'bungs pa la// gnyis 'dzin khyad par mi gnas te/ khyad par 'phags dang de bstan phyir// dgag dang bsgrub pa rab tu ces// brda don phrad tshe dgag bsgrub la// phral ba'i don la de dag med// gang zhig gnyis med rig pa ste// rtogs pa'i don phyir de bzhin no// nam mkha' rdo rje rnal 'byor pas// ye shes gsal ba nyams myong yang// rig pa brjod bral sems kyi ngang// rang snang gsal ba nyid du zad// rang byung 'od gsal brjod med la// zhen pa'i rtog pa rnam bcad de// rang gsal 'byung 'jug med par gsal// gang yang ma yin de nyid yin// ma btsal rig pa mngon sum pa// ji bzhin lung la gnyis pa med// gsal bar shes te rgyu ba bcad// gnyis med ye shes gcig la rdzogs// gzhag gzhan med pa'i snying po'i lung// gsal bar shes pas the tsom med// rang byung sems kyi mi long ni// ji ltar bltas gsal rtogs 'jug bcang// ting 'dzin rig pa rang gsal lung// dga' ba med par gsal shes bya// mi g.yo rnal 'byor mchog gi lam// skyon bral rig pa 'khor lo'i gter// rig pa rang gsal mngon sum gsal// bde ba'i nyams myong rang las 'char// spyad med sgyu ma rang bzhin zhi// mi rtsol rig pa'i gdeng du gnas// rgyud lung man ngag gcig la rdzogs// gser gling dag par nyi shar ltar// gsal la brjod bral mnyam pa'i dbyings// kun rig rang gsal rdzogs pa'i lung// sems can ye nas sangs rgyas la// rnam rtog rtsol bas ji ste btsal// kun la ye shes rgyu ba can// 'phrul tshig sgra yi nges pa yis// rang rang nges pa'i don bstan la// bla ma'i zhal nas nges par shes// kun gsal ye shes khyab gnas kyang// ji bzhin rlung du ma rtogs pas// 'phrul tshig rig pa'i lde mig ste// nges pa'i sgra tshig mchog tu gces// rtogs pa'i khyad par gang gang gis// don nyid gang gang de dag la// ma yengs goms pas gsal 'gyur te// de dang der ni rim par 'gyur// gang gis gang du phyogs tsam gyis// phyogs 'dzin drang ba'i 'du shes 'di// gang btsal ma grub ma btsal min// gang yang ma rnyed ngal ba'i rgyu// rang byung 'od gsal bde chen klong// gdod nas nyi ma'i snying po ltar// nam mkha' dang ni mnyam pa'i gnas// mtha' dbus che chung yongs kyis med// rgyu ba med pa'i ye shes kyis// rim pa ma yin dus gcig gsal// rgyu las ma byung rkyen mi dmigs// nam mkha'i mtha' bzhin khyab par bdal// mkha' la nyi ma stong shar ltar// sgrib med kun snang dus gcig gsal// dbus mtha' bral ba'i snying po la// rang gsal dus gcig 'od gsal bas// dus gcig kun mkhyen gsal bar 'char// ye gsal 'gyur med g.yung drung las// yon tan nyi ma'i 'od ltar 'byung// rtsol bral nor bu lta bu las// 'dod pa'i longs spyod char du 'bebs// yon tan lhun grub chen po las// thugs rje nam mkha' lta bur bdal// byin rlabs nyi ma stong ltar gsal// mdzad spyod phyogs med lhun gyi grub// ma bsgribs ye shes kun 'dus pas// 'khor lo rang gsal 'od la zhugs// de nyid don gyi 'og min te// mngon par mtho bas dpag mi rigs// yang dag 'og min chos kyi dbyings// yang dag med pa'i dkyil 'khor te// dbus mtha' bral ba'i gzhal yas khang// ye shes 'bar ba'i rgyan dang ldan// dus gsum sangs rgyas bzhugs pa'i gnas// rig pa 'od gsal mchog tu bzhugs// byang chub kyi sems mkha' mnyam klong gi rgyud chen po las/che ba bstan pa'i le'u ste brgyad pa'o//// de nas gzhan yang bshad bya ba// ye sangs rgyas pa'i klong yin te// de nyid nges par ma rtogs na// btsal ba don med ngal ba'i rgyu// rin chen gser gling dag pa ltar// byang chub sems kyi rang bzhin la// bsgrib bral ye sangs rgyas pa'i don// sems med pa yi don zhes bya// mkha' mnyam klong gi dkyil 'khor la// ye shes gsal ba mnyam sbyar pas// dngos dbang ji bzhin rig pa las// ye shes gsal pa'i sgron ma yis// mtshon pa'i rig pa 'od 'bar bas// rtogs pa nges pa nyid du 'char// rang byung 'od gsal dag pa la// sgro dang skur ba'i chos mi gnas// kun bral rang gsal dkyil 'khor te// ma bcos 'od gsal rig pa'i klungs// nyi ma'i snying po lta bu ste// kun 'byung nam mkha' lta bu yis// ye shes gsang ba'i tshul du gnas// gnyis med ye shes gsang ba'i don// g.yo med rang gsal mchog gi ngang// nam mkha' gsal ba'i tshul bzhin du// mtha' dbus med par khyab par gnas// kun gyi snying po gcig pa ltar// kun kyang snying por rang gsal gcig/ye shes rig pa 'od du 'bar// dngos po bzhi gzhag chos 'di la// ji bzhin rang gsal don du gnas// bsam pa'i rtog pas ma bslad pas// dngos po zhes pa'i ming du mtshon// bsam bral rig pa cir mi dgongs// yul med rgyu ba rnam par bcad// rig pa gsal ba'i ye shes te// bsam gyis mi khyab dus na gnas// dus gsum brtags pa tshig gi lam// ma bcos don la tha snyad bral// snying po bya bral gcig nyid la// btags pa'i tha snyad rnam par bcad// ngo bo gnas tshul ming nges pas// dus dang ldan pa'i tshul nyid la// bsam gyis mi khyab nyid du bstan// rang byung rdo rje 'di gsal la// shin tu rnal 'byor mchog gi lam// bgrod bral 'od gsal rtogs 'dod pas// don 'di nges par nyams su blang// man ngag rim bzhi'i tshul gyis ni// rang gsal don la mnyam sbyar nas// 'od gsal ji bzhin nyid la 'jug/nges pa'i don la shes par bya// rang byung 'od gsal gcig pu la// rnam rtog dbye ba mi gnas na// nges pa'i don la ma nges pa'i// bkri ba'i don phyir de dag bstan// pra krid sgra yi don nyid ni// nges dang ma nges khyad par gyis// sems nyid ma bcos rang gsal la// ma bsgribs ji bzhin nyid du gsal// yin min dgag sgrub rtsol ba yis// rnam rtog blang dor theg pa brgyad// rang rang lta spyod sgor zhugs nas// rang sa'i 'bras bu thob 'dod pas// ma nges rim 'jug rtsol ba can// tshig don 'brel ba'i khyad par gyis// ji bzhin mi g.yo mchog nyid la// mi rtog ye shes lhun gyis grub// bskyod med rig pa ci bder gnas// 'phrul tshig pra nyid sgra yis ni// spyad bsam bral ba'i rang gsal la// ci rtogs kun rtog khyad par can// sgra don 'grel ba'i 'khor lo yis// rang gsal mchog gi don du bskor// yi ge gda' bral don 'di ni// brjod bral bstan pa'i sgra yis rtogs// sgra bral bstan pa'i rgya mtsho ni// kun kyang rang la 'khor zhing 'du// dman pa'i blo spangs khyad par gyis// ji bzhin sgra yis don la sbyor// dran rtogs rig pa'i 'khor lo yis// kun la bskor zhing dbyings la 'bibs// 'di ni mtshan pa'i sgo mo ste// pra krid sgra yi man ngag gis// nges pa'i drod tshad gang yin pa// bla ma'i zhal las shes par byin// tshig brda phrad pa'i rig pa ni// mi rtog brda 'jal go zhing rtogs// ye shes gsal ba kun dang 'brel// ye shes snying po don du nyams// rig kyang nges pa ma rnyed na// chu la ri mo ji lta bar// stobs med nus gzhan de nyid ni// de ma thag tu med par 'gyur// ji ltar gser la gser mthong ba// nges rnyed the tsom bral ba ltar// don la nges pa'i blo yis ni// 'khrul med de ni nges pa'i don// brda 'jal gdeng ldan rgyu 'bras kyis// de med 'byung bar mi 'gyur te// de de slob pa'i tshul gyis bstan// de nyid ngang de de rim med// nges pa mi slu bden pa'i tshig/ mi g.yo bstan pa'i gdeng gi don// de nyid nges pa'i drod tshad ni// bla ma mnyes pas shes par bya// don rtogs ldan pa'i khyad par gyis// rang byung rig pa rgyu rkyen bral// gsal byed sgron ma ma yin la// rgyu rkyen gzhan gyi chos mi gnas// dgu ru gnas pa'i rang nyams ni// rang byung nyi ma 'char ba ltar// rten med rig pa rang gsal te// kun la mnyam par thal phyung ste// nges pa'i dus tshod ma shes te// mkha' la thibs kyis 'gags pa ltar// sbas pa'i don de gsal mi 'gyur// gyad kyi nor bu mi shes pas// dbul po bsgyur ba ji bzhin du// rang gsal klong la rtag gnas kyang// nges pa'i man ngag ma rnyed na// de yis nges pa'i don mi rnyed// bla ma mnyes pa'i thabs ldan pa// gang 'dod nges pa'i man ngag la// rna brgyud man ngag gnod par byed// de min long ba lam 'tshol bzhin// ye shes rten med 'od gsal skyes// ma 'gags rig pa'i klong na gsal// de nyid rig pa thal phyung ste// dus tshod bla mas bshad par bya// de ltar gsal bstan mi g.yo ba// dang po nas btsams lnga gsum par// 'phel dang mi 'phel cung zad med// ye shes me lce 'od 'bar gsal// gang yang ma yin dus gcig pa// rang gsal snying po mchog gi lung// brjod med rig pa'i klong na gnas// dang po brtags pa'i ting nge 'dzin// gnyis pa phra men lta bu ste// gsum pa btang snyoms g.yo med lung// bzhi pa 'bab chu mi 'phro ltar// lnga pa nam mkha'i klong bdal 'dra// rig pa gcig gi khyad par las// snang tshul sgo nas so sor phye// nges par rtogs na gser gling ltar// rtogs pa'i 'bras bu'i tshul yin no// ye shes klong brdal man ngag ni// nus pa'i mthar thug dgongs pa ste// nges pa'i nyams drod gang yin pa// nges par zhal las shes par bya// ji ltar bltas pas ye shes klong// rtsol bral rig pa mngon sum dbyings// 'byung 'jug dmigs pa'i yul dang bral// rgya phug mda' na ko sha glong// rin chen 'kha' 'gro rgyu ba'i phug/ ye shes rgya mtsho'i gnas mchog tu// rdo rje sems dpa' mngon bstan nas// yang sprul gang zag thugs sras la// rgyal thabs spyi blugs dbang bskur nas// thugs kyi rig pa mngon bstan te// bsrung med dam tshig la bkod nas// rnam grol sa la bde bar gshegs// wA rA NA si'i gling phug tu// dgon phug bye ma 'dab sna tshogs// gyad yul mgo ma sa la'i yul// nai rany+dza na'i 'gram logs dang// in dra rgya lung brtsegs pa ru// klu yi rgyal po rgya mtsho dang// in dra bo d+hi la sogs pa// rim 'jug ye shes skye 'gag can// rdzas dang tshig gi dbang bskur te// 'khor bar dgu brgyud ltung par 'gyur// 'di yang mtshan ma log pa'i lam// brda don rig pa'i khyad par gyis// 'gro med rang sar don la sbyor// ye nas rag par ma 'jal na// nan brtags dbang bsgom rtog pa'i lam// bde chags rgyud pas khrid pa yis// mi thar 'khor ba'i gnas su ltung// gdung med skyabs ni mkha' ltar gnas// rang gsal 'od la rtag tu bzhugs// zab la brtag dka' rgya mtsho'i tshul// yon tan zad med gter ldan zhing// rna brgyud thugs kyi bcud 'dzin pas// 'khor ba rang gsal snying por mkhyen// shes rab rig pa'i 'khor lo yis// chos dbyings ye shes gsal bar bskor// 'phrul tshig rim pa'i 'khor lo yis// zla ba chu ltar 'pho mdzad cing// bdud rtsi bcud ldan gter sgo ni// rin chen phung po mnyes pas dbye// skal med gsang ba'i dam sri la// bskal pa bye ba phrag brgya ru// thugs kyi bde ba mi spro zhing// rang gsal 'od 'di dbyings su sba// g.yo byed ldan pa'i gter khang du// rin chen gsal ba'i 'od 'bar kyang// de ma thag tu 'od kyang nub// smag tu 'thibs pa nyid du 'gyur// de bzhin rna brgyud man ngag 'di// gang gis gang la bstan pa na// rin chen gsal ba'i 'od nub nas// 'khor ba'-i mun pa'i khams su ltung// pra krid tshig dang nges pa'i gdeng// rig pa thal byung ye shes klong// brdal ba'i man ngag bzhir bshad do// rin chen 'bar ba'i gzhal yas su// dag cig gtsang ma'i bum pa der// rin chen gsal ba'i 'od 'bar nas// gter khyim phung po gsal bar byed// bla ma slob ma brtag pa gnyis// gdams ngag phog pa rnam bzhi yis// mthar phyin rig pa'i 'bras bur gsal// rang bzhin gter khyim phung po la// gsal byed brgya yis snang ba ltar// lhun grub rang gsal ye shes te// 'bras bu btsal med 'char bar 'gyur// ma bcos brtags med rang gsal ni// spros med chos kyi sku ru 'char// 'dod spyod bde ba'i rol pa nyid// rdzogs longs spyod pa'i sku ru gsal// rjes su snang bas don byed nus// 'gro 'dul sprul sku'i ngo bor bshad// gang ltar ma bcos sems nyid ni// chos sku nyid du gnas pa'i tshe// gnas ni chos dbyings chen po ste// spros bral 'bar ba'i gzhal yas so// mtha' dbus med par de la bshad// rang byung byang chub sems 'khor la// bstan pa phyi nang gsang ba gsum// rang gsal byin gyis brlabs kyis bshad// sangs rgyas sems can thams cad dang// phyi nang snod bcud ma lus pa// kun kyang rang gsal rig pa'i zhing// nam mkha'i mtha' dang mnyam pa'o// longs spyod chen po thug pa med// bde chen rol par bzhugs pa'i tshe// gnas ni 'og min rig pa ste// 'khor ni sa mtha'i sems dpa' yin// bstan pa phyi yi theg pa gsum// brjod bral rig pa'i dgongs pas bshad// rang gsal ting 'dzin gdeng gis go/ rang gi ngo bos gsal bar bsgom// zhing khams bde bas khyab tshad do// 'dzam gling rdo rje gdan stengs su// drang don sangs rgyas tshul bstan nas/ lam gnyis thob dang 'gro drug la// bstan pa sna tshogs theg pa gsum// tshig dang yi ges mngon du bstan// gsang ba thugs kyi yang snying 'di// rgyal ba rigs 'dzin gang zag gsum// dgongs dang rigs dang rna brgyud de// thugs kyi rig pa mngon bstan pa// mdo don rnam pa lnga ru bshad// lo rgyus don dang rtsa ba dang// yo ga'i don dang dgos ched dang// tshig gi don du bshad pa'o// lo rgyus lo rgyus nyid du ste/ khungs dang bshad pa nyid du'o// rtsa ba 'du 'phrog gcig tu ste// spro bsdu gcig gi tshul du'o// yo ga bye brag 'byed pa'i tshul// dgag dang bsgrub pa'i tshul du'o// dgos ched btsal bral rtogs pa'i phyir// tshig don brjod pa'i tshul gyis ni// rang gsal rang lam mngon par gnas// byang chub kyi sems mkha' mnyam klong gi rgyud chen po las/ ye nas sangs rgyas pa la klong gi don phyung ba'i le'u ste dgu pa'o//// de nas gzhan yang bshad bya ba// sangs rgyas sems can gcig pa'i tshul// nges par yang dag bshad par bya// gcig dang snang tshul rtogs pa yis// de nyid shes par bya phyir bshad// phyi nang snod bcud thams cad kun// ngo bo spros bral snying por gnas// ji ltar nyi ma'i snying po ltar// 'khor ba ma spangs gdod nas dag/ rang byung mchog gi snying po ni// mig g.yo ba nyid sku yi rgya// brjod bral gsung gi phyag rgya ste// mi rtog rnam grol thugs kyi rgya// rang byung rig pa mchog la rdzogs// rang byung lnga dang yul lnga dang// phyi nang snod bcud ma lus pa// rang rig rang gsal nyid la rdzogs// bzang ngan bde sdug gcig la rdzogs// rang gsal mkhyen ldan snying por rdzogs// gcig rdzogs byang chub sems la rdzogs// gnyis rdzogs theg pa'i bye brag rdzogs// gsum rdzogs sku gsum gleng gzhi rdzogs// rang gsal rig pa gcig la rdzogs// ye shes rdzogs pa'i lung gis ni// ye shes gcig tu gsal bar bstan// rang gsal nyag gcig dri ma med// dang po rgyu rkyen med pas na// tha mar dgag cing 'phro ba med// kun 'du ye shes me long la// gnyis pa'i chos dag gdod nas bral// ye shes dri med 'od du 'bar// gzung 'dzin mtshan ma rnam par bcad// yul med 'dzin bral rig pa'i ngang// ma rig rig pa gnyis med lung// brjod bral sgra yi 'khor lo can// sangs rgyas sems can gnyis med de// bde chen rang gsal gcig tu gnas// rang byung mchog gi dkyil 'khor la// yul shes snang btags chos mi gnas// kun 'byung nam mkha' lta bu'i 'od// ma skyes ye shes dkyil 'khor las// rnam grol rig pa'i phyag rgya can// ye shes snying por rdzogs pa'i lung// 'od 'bar gsal ba'i ngang tshul can// rang byung rnam dag dkyil 'khor ro// 'khor ba nyid na ye sangs rgyas// ma bcos ma sbyangs gdod nas dag/ rdzogs lung byang chub sems kyi lung// sems kyi lung la gnyis med pas// rnam grol nam mkha' lta bu'i tshul// gdod nas dag pa'i rang bzhin la// rang gsal 'od kyi nyi ma 'char// ye shes 'od gsal dkyil 'khor la// 'phel sgrib dag pa'i chos mi gnas// ma rtogs rtogs pa lam du gcig/ chu rlabs tha dad gcig pa ltar// ma 'dres yongs su rdzogs par gcig/ rdo rje mchog gi spyod yul las// bsgribs dang dag pa'i chos dbyings kyis// mtha' bral ye shes klong gi ngang// bdag nyid lhun grub chen po la// phyogs 'dzin rig pa gdod nas dag/ye nas dag pas sgrib mi sbyong// lhun gyis grub pas tshogs mi sog/ rgyu dang rkyen la rag mi lus// sangs rgyas sems can la sogs pa// ye nas lhun grub chen por gcig/ rang byung rig pa phyogs med gsal// lam dang gnyen pos sbyang du med// gang yang ma yin rang gsal lung// mtha' dbus med de de bzhin nyid// brjod bral mtshan ma'i lung las 'das// kun kyang ye shes mchog tu gsal// gnyis pa'i spyod yul gdod nas stong// ye shes mchog gi dkyil 'khor la// kun snang rang byung lhun rdzogs pas// 'od gsal mchog tu lhun grub kyang// mig gis mig bzhin de ltar gyur// gdod nas dag pa'i rang bzhin la// rtogs dang ma rtogs khyad par gyis// bde sdug mtshan ma so sor snang// rang gsal mchog gi dkyil 'khor la// nges par snang rtags phral nas kyang// ji bzhin rig pa'i phyag rgya yis// 'khor ba ye shes rang gsal mkhyen// 'das dang ma 'das ji ltar snang// ye shes rang gsal rdzogs pa'i lung// 'di nyid ma bcos ji bzhin la// ma bcos ye shes snying por gzigs// 'khrul dang ma 'khrul tha snyad kyang// de bzhin nyid la gdags su med// gnyis med gcig gi rang bzhin la// dag dang ma dag khyad par gyis// bye brag rim par bsam mi khyab// dag pa ye shes nyid du gzigs// 'khor ba'i shes pa blo bur ba// rang bzhin ma yin rkyen gyis snang// dngos la de ltar mi gnas kyang// rnam par rtog pa'i ngo la snang// rang byung gcig gi ngo bo la// rol ba'i bye brag ma rtogs par// zhen pa'i chos su phyin ci log/ gcig la gnyis su 'khrul pa'i mthus// 'gro drug zhen pas don mi mthong// zla ba gnyis su mthong ba dang// dung la ser por mthong ba dang// dngos la de ltar mi gnas kyang// zhen pa log pa'i bsam pas mthong// log pa'i gom pa'i nus mthu yis// 'khor ba'i gnas rab dgu ru brgyud// yang dag ma yin kun brtags kyis// mi gnas chos la gnas par mthong// med las yod par brtags pa yis// thag pa la ni sprul bzhin du// de la yod pa ma yin kyang// log pa'i shes pas de ltar mthong/ khams gsum log pa nyid du 'khrul// rang byung ye shes rnam lnga la// rang byung ma rtogs zhen pa ltar// brtags pas blo rtog zhen dbang gis// 'bras bu khams gsum 'khor bar snang// rang gsal rig pa'i mthu med par// log pa'i kun brtags bsam mi khyab// log pa'i 'du shes phyogs brgyad kyis// yang dag chos dbyings bslad gyur nas// rang 'dod 'bras bu mthar thug kyang// 'khor ba'i gnas rab brgyud de snang// sems kyi ye shes rab gsal la// ye shes klong gi 'ong brdal nas// 'gro drug ye shes gsal bar gnas// snang ba ma bcos brtags pas dben// ma bslad ji bzhin mi g.yo la// rnam brtags mtshan ma'i chos mi gnas// 'gro med 'ong med dbyings kyi klong// bsam 'das brjod bral de bzhin nyid// byang chub sems su kun gsal bas// gnyis med ye shes gcig la rdzogs// dmyal ba'i ye shes kun gsal nas// bde sdug mtshan ma cir mi dgongs// snang ba ma bcos chos sku'i ngang// rig pa'i sgra tshig bsam mi khyab// ye shes rig pa'i klong du gsal// dngos po mkha' mnyam byang chub sems// 'di la mtha' dang dbus med de// phyi dang nang med de bzhin nyid// dbus med mtha' bral rang gi lung// ye shes rig pa sgro 'dogs gcod// rig pa'i 'khor lo rang la 'khor// rna brgyud rig pa'i 'phrul tshig 'di// dang po stong pa byang chub sems// kun bzang nyid la rang gsal lung// de nas rdo rje sems dpa' la// don gyi 'og min chen por ni// ma brjod byin gyis brlabs kyis bshad// de nas rang snang rgyal ba la// rig pa'i 'og min nyid du ni// ye shes rdzogs lung gtan la phab// phyin nang sems su gsal bar byas// ma bcos ngang la ji bzhin bzhugs// de bzhin ting 'dzin dam pas brgyud// lha gnas gtsang ma nyams dga' bar// ar mo lig ldan rin chen gyi// rin chen phung po nyams dga' bar// de ba bzang skyong lha yi bu// sems dag can zhes bya bar bshad// kun dga' snying po bya ba yin// rtsol med sems kyi don sgom zhing// stong nyid seng ge'i sgra sgrogs pa// skal ldan rig pa ltas gsum shar// sprul pa brgya byin spyir thim zhing// tshangs pa lhor thim gyur ba'i mthus// phyogs bcu'i rgyal bas byin brlabs pas// sprul pas the tshom bcad nas ni// rtsol sems bral ba'i don la bzhugs// de nas brgya byin dbang po yis// phyogs bcu'i rgyal ba bskul ba'i mthus// sems dpa' dngos shar gsang bdag phyung// rin chen 'bar bas dbang bskur nas// zhing khams bgrod med the tsom bcad// de nas thugs rje'i byin rlabs kyis// rin chen 'bar ba'i mchod rten de// bang rim bzhin dang ldan pa'i dbus// gser gyi 'khor lo'i gdan stengs su// rin chen 'khor lo'i bsil bkab nas// dus mtha'i skad cig nyid la ni// klong dgu mkha' mnyam sems kyi rgyud// byin gyis brlabs kyis bshad pa yin// yang sprul sras la bstan pa'i phyir// de yi thugs rje'i byin rlabs kyis// d+ha na ko sha'i gling phug tu// rgyal gyi rigs can sku yi sras// thun mtha' dang po'i di 'char tshe// 'dab chags phra men lus ldan pas// byin brlabs dgyes par gyur nas ni// thugs mtshan ye shes lnga rtags gsal// de nyid gnyis med 'dres pas spangs// dpe byad mtshan ldan lha yi bu// stong nyid rtsol bral bstan pa'i sgrogs// dga' rab rdo rje ston pa'i mchog/ rdo rje sems dpa' nyid du gsungs// ya mtshan sprul ba'i phug de ru// yang sprul skal ldan gang zag la// rig pa 'od gsal dkyil 'khor du// byin rlabs ye shes sgo phye la// rdo rje gsang ba'i lam la bzhag/ bsrung med rig pa'i sdom pa phog/ye shes mi rtog rig pa'i dor// skye shi med pa'i rang ngo bstan// rgyal thabs spyi blugs dbang bskur nas// bgrod med sangs rgyas sa la bzhag/ rnam brgyud thugs kyi nying khu blud// sems kyi gting du gsang ba bzhag/zhing khams kun tu bde bar spyod// de nas rna brgyud rin chen ni// thugs rje 'dzam gling rgyas 'gyur nas// 'dzam gling dbus su skal med nub// skal ldan byang chub sems dpa'i rigs// rnam grol sa la 'gro bar 'gyur// yang gsang thugs kyi rgyud 'di ni// dri med rtogs dka'i bstan pa la// rna brgyud 'khrul tshig mi ldan par// spyad bas sgra dang don med tshig/ spyod cing yongs la spel byas na// mgyogs 'gro'i so mtshams 'das pa ltar// bar do srid pa'i chos med par// rdo rje'i gnas su ltung gyur nas// thar pa'i rigs dang kun tu bral// de nas brda don bstan pa'i phyir// yi ge med pa'i rgyud mnyan nas// gser dang 'dra ba'i snod de'i sa// rna brgyud gdams ngag nod par bya// brda don dgrol ba'i rim pa yis// rang gi rin chen bstan byas nas// rig pa'i 'od gsal brda don sprad// pra krid gsal ba'i don ldan pas// 'khor ba ye sangs rgyas par gsal// bu mo byams pa'i rang bzhin la// dmigs pas lhun grub rnyed pa ltar// kun la yod par shes par gyis// rang gsal ye shes snying po la// rang byung sgra yis ngos bzung nas// ma spyad gyi nar bzhag pas 'grub// sgra yi rjes 'brengs ma log par// nges pa de yi mtshams su bzhag/ thams cad byang chub sems su gsal// rig pa kun nas 'khyil bar gnas// thig le 'od gsal gcig la gsan// de nyid sgra bral thugs la rdzogs/ 'od gsal rig pa gcig tu mnyam// dang po yul phrad rjes mi rtog/ kun kyang de dang 'dra ba ste// gzhag thabs mtshan nyid gang yin pa// rdo rje bla mas brjod par bya// sangs rgyas sems can gcig pa la// 'khrul pa'i blo yis so sor brtags// nges pa gcig las mi gnas te// ma btsal lhun gyis grub par rtogs// theg pa'i khyad par gang dag gis// rtsol med rin chen phung po la// gang dang gang du ci btsal ba// ltas pa'i rang 'bras thob par 'gyur// dper na gtsug gi nor bu ni// bdag po mnyes pa gang byas pa// de dag de yi yon tan cha// 'tshams pa nyid du thob par 'gyur// dbyig nyid nor bu'i bdag po la// cha shas ma yin lhun gyis grub// 'bad rtsol med pa'i thabs chen gyis// gang yang bdag nyid chen por rtogs// de rtogs rtsol bral 'khor lo bzhugs// nyi ma'i 'od ltar lhun gyis grub// rang sems ye shes mtha' bral la// mtha' yis 'du shes gang mi gnas// ye shes rig pa'i gdeng med na// dgra ru rdo rje sems dpa' 'byung// rig pa ma bcos bde mchog la// spong len gnyis po gdod nas dag/ mi g.yo rnal 'byor mchog gi thugs// spyad 'dzin med pa'i ngang la gnas// ma bsags ma spyad lhun gyis grub// rdo rje 'od gsal yangs pa med// byang chub kyi sems mkha' mnyam klong gi rgyud chen po las// sangs rgyas dang sems can rig pa gcig la rdzogs par bstan pa'i le'u ste bcu pa'o//// de nas gzhan yang bshad bya ba// rdo rje sems dpa' bcom ldan 'das// dgyes chen 'od gsal mkha' la bzhugs// mtha' dbus med dpa'i dkyil 'khoraspro// nam mkha'i mtha' dang rab mnyam pa// kun la gnas pa'i tshul nyid ni// snying po kun la khyab dang mtshungs// rang bzhin ngo bo nges pa dang// dpe dang tshad kyis btags pa yis// mkha' mnyam klong gi dkyil 'khor la// ye shes rig pa 'od gsal mchog/brtags dang ma bcos nges pa dang// mtshon pas nges par shes par bya// 'jig rten brtags pa'i rang bzhin dag/ kun la yod par brtags pa'i chos// nyi ma'i snying po dag pa la// mun pa'i gzhi mdo ma yin kyang// 'khrul pas mun pa'i tshogs su mthong// de bzhin byis pa'i rang bzhin gyis// 'gro drug zhen pa'i rang 'thad kyis// tha dad sdug tu zhen pas brtags// la las rtag chad byed par brtags// la las bden bzhi spong bar brtags// la las 'gegs pa'i tshul du brtags// la las bden gnyis tshul gzung nas// bskal pa grangs med gsum gyi bar// lam lnga sa bcu sbyangs byas nas// bgrod pas rnyed pa'i yul du brtags// la las spyod lam dag pa yis// mtho dman rim pa'i tshul gzung nas// skye ba kun tu bgrod pa yis// thob par 'dod pa'i tshul du brtags/ kho bo lta bu'i rnal 'byor pas// gcig la gnyis kyi khyad par gyis// bgrod pas nges med phra men gyis// rang gi 'bras bu grub par brtags// blang dor rim pa'i tshul gyis ni// yan lag dgu dang rigs byin rlabs// lhar snang gsal ba'i khyad par gyis// nges pa'i 'dod pa'i tshul gyis brtags// la las rim bskyed gsum skyed dang// 'dod chags chen po'i ting 'dzin gyis// skye bzhi lha yi dkyil 'khor du// rang rgyud dag pas grub par brtags// la las dbyings dang ye shes nyid// rgyu 'bras 'od kyi ting 'dzin gyis// grangs 'das 'od kyi dkyil 'khor nyid// sgom pas grub pa nyid du brtags// brtags phyir kun brtags nyid du rtog/'khor ba'i shes pa ma rabs la// ye shes rig pa 'od nub nas// 'khor ba'i tha mar mdud pas bcings// thar pa'i rig dang gtan du bral// ye shes rig pa khyad par can// nam mkha' mtha' ltar kun khyab pas// byang chub sems su mtshungs par gnas// mkha' mnyam rig pa klong du 'khyil// gsal khyab rig pa'i 'od mtha' yas// gsang ba'i rig pa gter dang ldan// kun kyang rang gsal rig pa'i sgo// bsam mi khyab la chos kyi dbyings// bsam med dran med mi g.yo ba// gnyis med ye shes chos kyi dbyings// nam mkha' rdo rje ma bcos pa// rang gsal ye shes gsang ba'i ngang// kun khyab zab mo mchog gi lung// rig pa rnal 'byor cir mi lta// dgongs pa mi g.yo rgyal ba'i dgongs// mi bsam mi spyad cir mi dgongs// spros med byin brlabs phyogs bcur brdal// bsam pa ma yin mi bsam min// gnyis ka ma yin gsang ba'i lung// gdod nas dag pa'i ye shes ni// rgyu rkyen gnyen po'i chos med de// brtags pa bsam gyis mi khyab pas// nam mkha'i dkyil 'khor 'gyur med klong/ khyab pa chen po chos kyi sku// gnyis med ye shes gsang ba nyid// cir snang rig pa rang byung pas// rang rig ma bcos mi gnas pa// 'di la mtha' dbus med pa dang// phyogs ris nye ring 'dzin pa dang// mi rtog khyab par gnas pa dang// gsal la dmigs su med pa dang// 'di la tshad dang che chung sogs// gang yang yod pa ma yin na// gang gi gsang ba'i dbyings nyid la// phyogs kyi 'du shes gang bsam pa// de ni log pa'i grong khyer te// phyogs log rang bzhin log pa dang// gzhan rkyen log pa'i 'du shes kyis// rang byung rig pa'i 'od la bsgribs// 'khor ba nyid na mya ngan 'das// longs spyod bde ba'i ngang du gnas// 'di kun ye shes rol pa la// bde ba chen por gang spyod pa// rmad byung rol pa'i spyod pa yin// sangs rgyas sems can la sogs pa// brtags pas don 'di ma mthong ste// rang gsal ye shes snying po ni// thams cad brdal ba mchog gi ngang// de nyid mkha' mnyam klong gi ngang// ji bzhin pa dang brgyud pa yis// mtshon pa'i thabs kyi brda tshig gis// ji bzhin rig par gsal bstan nas// rigs chen rgyal ba'i lung thob pas// ma bcos ji bzhin rang bzhag lung// rig pas ma spyad rjes mi 'brang// bsam spyad mi bya lhug par gnas// rang gsal rkyen bral ma yin par// brda sgo rtog pa'i rjes mi 'brang// gnyen pos mi bcos tshad mas min// brjod med tshig gi lde mig gis// brjod med brjod pas brjod bral rtogs// rang gzhag 'od gsal ting 'dzin te// mtshan ma bcos pa'i blos mi rtogs// ye shes gsang mchog ma yin par// rnam rtog zhen pa'i chos mi gnas// de nyid ma bcos dgongs pa la// cog bzhag rig pa'i sgra yis go/ de nyid mtshon pa'i thabs nyid ni// bla ma'i dgongs pa nyid las shes// chu la chu bzhag ji bzhin du// gnyis med rig pa gcig tu 'bar// nges pa'i drod tshad gang yin pa// bla ma gnyes byas thabs kyis rtogs// gtad med bzung med yul mi 'jog/ ma yengs gsal bar thag chod na// mnyam bzhag nges pa can gyi mtshan// gyin ma bcos pa nyid do// rgyud pa thabs kyi khyad par gyis// rtsol ba'i las can gang dag la// 'khrul gyi me long bltas pa bzhin// mngon sum ye shes chen po la// bcos pa'i thabs kyis gsal bar 'dzin// rna brgyud rdo rje lung gis ni// ma bcos bcos ma'i sgo nas ni// mtshon pa'i sgo mo bsam yas pa// gdul ba'i thabs su gsungs pa yin// rna brgyud man ngag brgyud ma chad// brgyud pa gsum gyi lugs kyis ni// 'khor ba'i chu bo bsgral ba'i phyir// rdo rje zab pa 'dra bar gnas// rgyal ba'i dgongs pa ji bzhin pa// sgro skur bral ba lung gi don// ye nas rgyal thabs gnas pas na// rna brgyud lung gi rgyal po yin// thabs sbyor rig pa 'phrul gyi sgo// gang 'dod mos pa de la bstan// 'dod sbyor mos pa'i tshul gyis ni// mthar ni nam mkha' lta bur bzhugs// rgyal thabs spyi blugs tshangs pa'i dbang// ma brjod dgongs pa'i byin brlabs kyis// ji bzhin nyid du dbang bskur nas// dus mtha'i cha la rdzogs sangs rgyas// ngo bo bcos med snying po ni// ma btsal rig pa'i gdeng gis gnas// 'khor min mya ngan 'das pa'ang med// brjod med bsam bral rig pa'i klung// gang la'ang bsam shing spyad du med// rang gsal ye shes snying po la// brjod pa sgra yi tha snyad kyis// mtshon pa lam gyi rgyud dang bral// ci yang yin no gang yang rung// gzhi lam 'bras bu kun dang 'brel// brjod dang rang rig ye shes la// sgra yi 'khor lo rang bzhin 'char// lhun grub rang gsal dgongs pa la// bsam brjod 'dzin pa'i 'du shes med// 'dod pa'i blo yis gang sbyor ba// dman pa'i shes pa rim brgyad de// theg chen nam mkha' rdo rje de// btsal bas thob par ga la 'gyur// rna brgyud thugs kyi rin chen 'di// rna rgyud 'phrul tshig mi ldan par// rang rtags log pa'i 'du shes kyis// brtags pas mi grol ltung ba'i rgyud// rang gsal nges pa'i don bral nas// gzhan yang nges med gnyis ka ltung// de phyir bla ma mnyes byas nas// don la ji bzhin 'jug pa yis// sgra tshig mtshan ma la brten nas// rang gsal rig pa rtogs par 'gyur// nges pa rnyed na 'gyur ba med// 'khor ba'i 'jigs bral g.yang sa med// de ni nges pa'i don zhes bya// nam mkha' lta bu'i chos nyid la// mtha' dbus spros ba rnam par bcad// nyi ma'i snying po ji bzhin du// 'khor ba ka dag ye sangs rgyas// snang srid gsal ba'i me long ltar// phyogs rigs med par gsal bar 'char// tag k+sha ka yi spyi gtsug ltar// btsal med 'bras bu lhun gyis grub// rgya mtsho lta bu'i rang bzhin pas// mi g.yo rlabs 'byung gcig gi ngang// nam mkha'i khyud chen ji bzhin du/ khobs 'og 'du zhing btsal 'jigs med// rtsal chen rdzogs pa'i seng ge ltar// zil gnon gcig pur lhun gyis rdzogs// rin chen dag pa'i gser gling ltar// tha dad rnam pa gcig tu gsal// dgongs pa nam mkha'i mtha' mnyam la// tshad dang dpag tu ga la yod// 'di la che chung tshad med la// 'di la mtha' dbus yod ma yin// 'di la dmigs pa'ang med pas na// byin rlabs nyid kyang de bzhin no// zhing khams sku gsung thugs nyid dang// yon tan 'phrin las thugs rje dang// phyogs rigs med pa de nyid do// byang chub kyi sems mkha' mnyam klong gi rgyud chen po las// byang chub sems nam mkha' dang mnyam pa'i gnas tshul bstan pa'i le'u ste bcu gcig pa'o//// de nas gzhan yang bshad bya ba// de bzhin dpe dang tshad ma dang// bstan pa'i don du bzhag tshul lo// kun 'dus rang gsal de bzhin nyid// spro bsdu med pa'i dbyings la gsang// 'du 'brel med pas gcig la rdzogs// rang byung rmad grags dkyil 'khor ni// gang ltar bstan pas gcig tu gsal// rnam dag 'od gsal dkyil 'khor la// mtha' dbus che chung yongs kyi med// rang byung btsal bral lhun grub la// rnam rtog 'khor ba rnam par bcad// bcos pa med dang spros med dang// ye nas de ltar snang ba dang// zhen par brtags pa'i chos med par// de bzhin ny-id ces rnam par bsgrags// gsal la dbus mtha' med pa yi// de bzhin nyid de kun gyi ngang// kun gyi bdag nyid gsang ba'i thugs// ye shes che mchog spyod yul te// gzung 'dzin med pa'i chos med de// sangs rgyas dgongs ba thugs kyi mchog/ gsang ba'i yang gsang ye shes na// kun la gsal ba khyab par gnas// mi g.yo thig le chen po'i ngang// phyag rgya rig pa mchog la rdzogs// gsang ba mchog gi ye shes ni// ma skyes a yi don de go/ btsal bral rig pa'i ngo bo yang// phyogs dang phyogs bral gnyis ka med// brjod med brjod pa'i dngos gzhi can// brjod bral sgra yi ngo bo can// gang gis bstan pas de ltar go/ skye 'gro phyi nang snod bcud kun// chen po lngar 'dus de nyid ni// de nyid 'byung ba so sor yang// nam mkha'i ngang du 'dus pa ltar// 'das dang ma 'das cir gsal ba// rang rig rang gsal dbyings su brdal// sku gsum bye brag cir bstan pa// ma skyes stong pa'i ngang du gsal// 'ching grol med pa dbu ma'i lam// mtha' gsum bral ba'i ye sangs rgyas// yul bral rig pa cir mi dgongs// 'dzin bral spyod pa mtha' las 'das// rig pa'i ye shes bsam mi khyab// ma skyes ye shes don dang ldan// ci yang yid la nges pa med// ma brtags kun dang mnyam du skyes// brtags na ma brtags don dang bral// mi bsam mi dgongs spyod dang bral// mnyam nyid gsal ba'i ngang la bzhugs// de bzhin ma bcos ye shes la// dpe dang mtshon pa'i mtshan ma yis// bcos sam ma bcos don mi gsal// nam mkha'i dpe dang tshig gis gsal// mkha' la 'gyur 'jig mi mnga' ltar// ye gsal rdo rje 'gyur 'jig med// ma skyes khyab brdal nam mkha' ltar// bde chen ye shes dang 'dra ba// 'du 'bral 'gro 'ong mi gnas shing// mi gnas nam mkha'i dbyings la bzhugs// kun 'dus dbyings chen rtag pa'i tshul// 'od gsal de 'drar cir mi dgongs// chu bo dag ni pad+ma dang// rin chen gl-ing dang khyung nyid dang// sa gzhi ri rab nyi zla ltar// nor bu lta bu'i mtshan nyid ni// mtshon pa dpe yi tshul du bshad// rang bzhin dag dang rgyun ma chad// rang gi mtshan nyid mi 'da' zhing// ma btsal bzhag pas skyon rnams zhi// de dag de yi tshul du bshad// rang bzhin dag pas ma chag dang// skyon dang mnyam du gnas pa dang// mthong ba dga' ba bskyed pa'i phyir// de dag de yi tshul du bshad// ma 'dres gcig tu gsal ba dang// ye nas dag dang sel med dang// de ming med dang ro gcig pas// de yang nges par mtshon pa'i lung// btsal med pa dang gcig par min// gza' med 'jigs bral nam mkha' spyod// zil gnon khobs 'od 'dus pa'i phyir// nges pa dpa' ba'i tshig tu bsgrags// bzang ngan med dang kun skyed dang// rten dang kun spyod rtogs spyod bral// chags sdang rnam rtog mi gnas pas// mtshon pa dpe yi tshig tu gsungs// mthong dang lhag par 'phags pa dang// mi bskyod pa dang rdzogs bral dang// mthong dang rtogs par dka' bas na// nges par rtogs pa'i tshul du gcig/ gsal dang khyad par ma btsal bar// 'od ldan mun pa gdod nas bral// phyogs med snang bas kun tu brdal// de dang 'dra bar dpe yi don// rang byung btsal med zad mi shes// 'phel 'grib phyogs ris med pa dang// kun gyi re skong bsam bral bas// de dag nye bar mtshon pa yin// gsang ba'i ye shes zab mo la// sgra dang tshad ma gtan tshigs dag/ shes rab rjes dpags lung nyid kyis// gtan la phebs pa ma yin te// nges par gsang ba'i mngon sum la// rjes dpags rig pa nor ba'i lam// nges don sangs rgyas dgongs pa la// drang don gang zag bsam pa yis// btsal med dang la rtsol bas 'jug/ 'di don log pas nges ma rnyed// gsang ba ye shes brjod bral la// mtshan ma'i tha snyad mi 'jug kyang// de nyid tshig gi lde mig gis// brjod par rig pa'i 'khor lor gsal// bya bral rdzogs lung ma bcos pa// rang gi nges pa'i don gyis mtshon// brgyud pa'i bya bral rdzogs lung la// ji bzhin nges pa'i gtan tshigs ni// 'bad rtsol bral bar don go bas// rin chen 'bar ba'i ngo bo ston// ma bcos bya bral rdzogs lung ni// gnyis med ye shes gsang ba'i don// sgro skur med pa'i bka' lung gis// bcos med gsal ba'i don la sbyor// rig pa bya bral rdzogs lung ni// rang gsal rtsol bral ji bzhin pa// ma bcos 'od brdal ji bzhin du// rang gsal lung gis ji bzhin gnas// ma bcos nges pa'i gtan tshigs ni// nam mkha'i ngo bo stong pa la// thun mong tshad mas mi gzhal gyi// rang bzhin nyid kyis gsal bar ston// chos sku snang ba'i rang bzhin ni// ye nas ma bcos ji bzhin pa// rang bzhin nyid kyis gtan la 'bebs// de rtogs sangs rgyas kun dang mnyam// nyi ma'i rang bzhin gsal ba ni// rang gi rang bzhin gsal bar 'gyur// de bzhin rang gsal ye shes kyang// bcom med rang gi rang bzhin snang// ma bcos rig pa'i don med na// bcos pa'i rnal 'byor pa yi lam// bcos pa med dang rang bzhin gsal// rkyen bral rang gi rig pa ni// ma bcos gsang ba'i rig pa yin// de bzhin nyid la ji bzhin du// ma bcos don la mi 'jug par// sgra dang brda sgo rtog pa yis// rang gsal ye shes don dang bral// ye shes snying por kun 'dus pas// rang gsal ye shes ma yin pa// snang brtags zhen pa'i chos gnas na// 'khrul pas byang chub ji ltar rnyed// kun brtags goms pa'i rang nyams kyis// rang gsal brtags med snying po la// mnyan bshad brjod pa ci byas kyang// rgya mtsho rbas bsgribs tshul du mthong// ma mthong gang mthong cir mi mthong// gsal yang kun bral 'di dang bral// ma mthong ba nyid mthong ba'i mtha'// mthong ba nyid kyang ma mthong mtha'// mtha' bral dbu ma mtha' yi lam// nam mkha' rdo rje dkyil 'khor la// mtha' dbus yod med cir mi mthong// rang gsal rig pa mtha' dbus med// ye shes rig pa phyogs ris med// gsal ba'i rig pa sgrib byed med// ma bcos rnal ma bsam du med// rang byung rig pa thal byung ba// rim pas ma yin dus gcig gsal// bdag gzhan mi dmigs cir mi dgongs// gsal bral rig pa thams cad gsal// nyams myong rig pa rnam rtog bral// mngon sum gsal yang dmigs su med// rang byung ye shes rang gsal lung// gsal ba'i rig pa ting 'dzin mchog/ rdo rje nyi 'od 'bar ba ltar// gsal ba dmigs med 'du shes chod// ma bsams pa nyid bsam pa'i mtha'// ma rtogs pa nyid rtogs pa'i klong// rgyu ba med pa'i ye shes ni// mkha' ltar brdal ba'i tshul du gsal// gang yang ma bkag mngon sum gsal// mi ldog mi 'jug de bzhin nyid// btang snyoms bar ma'i tshul du gnas// mtshan ma sgra yi rjes 'brangs pas// ma bcos ngang la phyin ci log/ ma bcos rig pa dam bcas nas// mngon sum don la phyed yul bsgoms// ma bcos don la bsam pas bcos// dmigs med don la dmigs par gzung// btsal bral yul las gtan du gol// rna brgyud lung gi rjes 'brangs nas// de ma thag tu rig pa 'char// 'od 'bar ye shes mchog gi lam// snying po mchog las ma yengs pa'o// ji bzhin brjod pa thams cad ni// ye shes rdzogs pa nyid kyi mtha'// gnyis med ye shes rdzogs pa la// mtha' dbus zhen pa rnam pa bcad// rang gsal don la gang zhen pa// bde ba'i yul la zhen chags pas// chags dang ma chags tshig gi mtha'// rang gsal don las mi 'da' 'o// brtag gnyis sbyang dang gsol ba gdab// gnang sbyin gdam ngag phog pa yis// nges pa'i don la bzhag pa'o// ma bcos ji bzhin dkyil 'khor la// ma btsal lhun grub tshul nyid du// gnyis med rig pa'i drod tshad kyis// ma yengs gyi nar gnas pa'o// ma btsal rig pa mngon sum la// yul med thug phrad rang gsal gyis// 'dzin bral dbu ma'i ting 'dzin gyis// rgya mtsho 'jings dang 'dra bar gsal// gsal lam mi g.yo yul bral ba// rnam par mi rtog mchog gi lung// ma btsal rang byung yul gyi tshol// mtha' dbus mi bsam rig par gsal// skal ldan rig pa rab spyangs pa// lus dang srog la mi lta zhing// snying dag snying dung 'dres pa la// gnang sbyin gsang bar nan chags bya// gang gis gsang ba'i dam nyams na// de ma thag tu 'jig pa dang// 'jig rten bcas ka chen por 'gyur// de yi bsam pa brtag pa dang// snod ngan zhe bcad bskrad pa dang// gsang ba'i don dang mi 'gal dang// 'jig rten bka' chags spyang ba'i phyir// spyod lam tshig dang rdzas rnams kyis// spyang ba'i rim pa rab tu bya// nges dang ma nges brtag pa'i phyir// bsregs bcad brdar ba'i gser bzhin du// de dang de ru dbye ba'i phyir// 'di dag rab tu ces pa yin// dbang lung rdzogs pa'i bla ma la// legs par mnyes par byas nas ni// bdag nyid rab tu bsgral ba'i phyir// gdam ngag 'dod par gsol ba gdab// bral du gtong ba mi nus na// de la rna brgyud lung byin pas// bar chad chen po 'byung ba dang// de ma thag tu brlags par 'gyur// rin chen 'bar ba'i gdan khri la// lung dang bla ma bzhag nas ni// 'dod pa'i longs spyod phul byas nas// rna brgyud man ngag nod par bya// lung bstan bla ma de yis kyang// rang rang rig pa'i rang brtags la// gang du gang du mthun spyor ba'i// so so rang rig man ngag spyin// ci yang don la mi rtogs pa'i// 'phrul gyi blo 'dra'i man ngag sbyin// lus ngag btsal med mi g.yo ba'i// steng chu lta bu'i man ngag sbyin// phyi nang 'du byed gang bstan la// rig pa gtod pa'i man ngag sbyin// dbang po tha mal stobs ldan la// dus gcig smin pa'i gdam ngag sbyin// snod ldan phra man ting 'dzin la// spyod lam ting 'dzin bstan par bya// gzhan yang gang dang gang yin pa// de dang de yi man ngag sbyin// mnyes pa'i yo byad lus dang srog/ 'phangs med sems kyis mi gtong na// de la man ngag snod med pas// tshig gcig tsam yang mi bstan no// byams dang snying rje'i bdag nyid can// dbang dang dam tshig ldan pa dang// thabs mkhas rdzu 'phrul byin rlabs che// zab la rkyen thub 'khrug pa med// rtsol bral rig pa klungs su son// yengs dang re dogs rnam par bcad// dam pa'i mdzod dang gter ldan zhing// rna brgyud lung la mchog tu goms// spyi blugs tshangs pa'i dbang la mkhas// 'di ni lung bstan slob dpon no// smra brjod don la gang goms kyang// rdo rje dam tshig mi ldan na// rdo rje slob dpon de nyid kyang// nges par ngan 'gro nyid du skye// rdo rje slob ma'i mtshan nyid la// dad dang dam tshig snying rjer ldan// ngang tshul bzang la khong mi khro// spyod thub ser sna spangs pa dang// gser ltar mi 'gyur brtan pa'i blo// nges pa gcig la 'di gtad do// gnyis las 'phel bar mi bya'o// dad med chags pa che ba dang// dad med khro gtum rang bzhin ngan// grags dang mtshan ma'i tshig la dga'// snying rje med pa'i gang zag la// spel zhing bstan par mi bya'o// byang chub kyi sems mkha' mnyam klong gi rgyud chen po las// dpe dang 'jug tshul bstan pa'i le'u ste bcu gnyis pa'o//// de nas bzhan yang bshad bya ba// rnam dag sems kyi dkyil 'khor la// mtshan ma'i rnam rtog ngo bo nyid// snang tshul lta ba mthar phyin pa'o// rang byung bsam pa'i yul 'dzin med// gnyis bral 'du med mnyam pa'i ngang// ci yang ma yin rig pa'i ngang// rig pa ma yin ma rig min// phyogs med byams snyoms rgyas pa'i blos// rang byung rig pa'i 'khor lo na// spong len med pa'i tshul du bzhugs// snying po mnyam nyid gsang ba'i mchog/ zab mo'i sbros bral mtha' dbus med// stong pa'i 'du shes rnam bral ba'i// sems dpa' mi bskyod pa yi klong// bsams pa rtogs pas cir mi bsam// thabs bral kun la rgyas btab pas// snying po'i snying po mchog gi sku// mkha' dbyings rnam dag ye shes la// zhen pa'i rnam par cir mi gnas// brtags pa ma yin de bzhin nyid// bya bral nam mkha' nyid kyi klong// btsal bral sems la ngo bo med// mtshan ma'i gzung 'dzin yul las 'das// gang yang ma bcos snying po la// spyad cing brtags pas gting mtha' med// gsang ba'i yang gsang yul med pa// rmad byung rab zab mtha' dbus med// gsang ba'i 'pho 'gyur med pa'i gter// rang byung rig pa don du rdzogs// dus gsum ye shes nyag gcig la// tha snyad gdags pa'i lam dang bral// rtog dang mi rtog kun bral bas// thams cad rang byung snying po mchog/ spros med byang chub snying po la// mtshan ma tshig gi sgro skur med// snang grags srid pa'i rang bzhin ni// rang byung sems nyid dag pa'i sku// rnam par rtog pa'i sems nyid ni// gang ltar brtags pa de ltar snang// cir yang 'gyur lta snang mod kyis// ngo bo mi 'gyur snying po nyid// brtags pas brtags phyir don mi mthong// chu la rkyen gyis bskyod pa ltar// 'khrul pa'i shes pa mthong mod kyis// dngos la grub pa kun gyis stong// gdod nas stong pa'i rang bzhin ni// kun 'byung rig pa dbyings kyi klong// sprin dang nam mkha' ngo bo ltar// de lta bu yi tshul du mthong// de bzhin gsal ba'i ngo bo nyid// ma rtogs pa yi dbang gis bslad// de nyid gnyis med snying po rdzogs// sangs rgyas kun gyi snying po ste// sems can kun gyi dngos gzhi yin// ji bzhin g.yo med snying po ni// rang gsal lung la 'dzin pa med// rang gsal bcos med ye gnas la// bcos pa'i blo bur rnam rtog pas// mkha' la bsgribs shing 'thibs pa yang// de nyid snying po rang byung lung// 'dod sbyor blo yis gang btsal ba// chad du byas pa'i mdud pa yin// kun bzang rol pa cir yang 'char// mkha' la gza' skar bkram ltar gsal// kun 'byung nam mkha'i snying po ni// bya bral rdzogs chen rang bzhin gnas// rang byung rig pa'i ngo bo la// cir yang gsal la cir yang min// dung la ser po ji bzhin du// med la yod par brtags pa'i snang// dngos po mi gnas rang bzhin la// gnas par mdzin pas rim brgyad pa'o// byis pa lag pas 'drid pa ltar// log rtog drang ba'i don du bstan// 'khrul pa gzhi la yod med ces// gcod pa nam mkha'i mtha' 'tshol 'dra// log par brtags pa'i snang tshul dang// rang bzhin ma bcos snang tshul dang// rtog pa'i blo la snang ba med// bye brag ma phyed gti mug blo// dngos po ma bcos rang snang la// la las byed pa nyid du brtags// la las log pa drug tu brtags// la las rtag chad gnyis su brtags// ye nas gcig tu gnas pa las// spong dang len pa nyid du brtags// la las skye 'jig med pa la// rten 'brel dgag sgrub gnyis su brtags// la las bgrod med sbyong ba la// bgrod cing sbyong ba nyid du brtags// gzung 'dzin med pa'i dngos po la// gzung dang 'dzin pa nyid du brtags// blang dor med pa'i mnyam nyid la// blang dang dor ba nyid du brtags// gnyis med rig pa nyag gcig la// thabs dang shes rab gnyis su brtags// rgyu dang rkyen bral rig pa la// dbyings dang ye shes 'khrul pa'i lam// 'di ltar brtags pa'i snang tshul te// rtog 'dzin pa la rtog par snang// thag pa sprul du 'dzin pa bzhin// rnam par rtog pa'i ngo la snang// rdzogs pa'i sems kyi rang bzhin ni// rnam rtog 'dzin pa'i bla med de// kun bzang rol ba cir yang snang// 'od gsal ma bcos chen po yin// gdod nas brtags pa'i dri med de// ma bcos rang byung rig pa yin// rin chen gser gling ji bzhin du// mi 'gyur sel med de ltar snang// ma skyes rang byung rol pa yis// rang la mi rtog gzhan mi rtog/mi rtog mnyam pa'i ngo bor snang// ye nas ma bcos dag pa nyid// nam mkha' ma bcos dag pa ltar// ma bcos snang ba de ltar gnas// ji ltar nam mkha'i blo bzhin du// brtags pa'i blo kun zad 'gyur na// ye shes gsal ba mtha' dbus med// gsang ba'i rig pa bsam mi khyab// ma bcos blo la snang brtags med// ji bzhin pa la mi g.yo na// ma bcos gsang ba'i lung yin no// nam mkha' stong pa chen po ru// bsam zhing spyad pas mi thebs te// rang bzhin nyid du khungs kyis thebs// brtags na gang brtags rtog pa ste// ma brtags snang ba rol ba yin// bsam zhing spyad pa kun las grol// mi 'dzin mi spyad de bzhin nyid// rang shar nyi ma'i snying po ltar// ma bcos rang gsal nyid du mkhyen// nam mkha' gsang ba'i rnal 'byor pas// ma bcos don gyi ngo bo mkhyen// cir snang sems kyi rang bzhin la// lta zhing spyad pa kun dang bral// dmigs dang bsam pa'i yul las 'das// rang gsal ngang la gnyis med pas// 'byung 'jug rig pa'i rjes mi 'jug/ ma bcos sems lung gsal pa la// ma bcos lung gi mkhyen dang bral// rang gsal rig pa mngon sum la// rtags dang tshig gi mtshon dang bral// ma brtags gsal ba spyan gyi mchog/ mthong med dmigs pa'i yul dang bral// kun kyang rang byung snying po la// chags pa ye shes ngo bor gsal// sangs rgyas sems can gnyis med pas// rang byung snying po nyid du mthong// mtha' dbus med pa'i rig pa la// gnyis med rig pa gcig tu mthong// la las log par brtags dbang gis// la las byed pa nod du mthong// la las rtag dang chad par mthong// la las tha dad don du mthong// la las dgag pa'i tshul du mthong// la las longs spyod yul du mthong// la las mi spong len par mthong// la las thabs las dbang byed mthong// la las rgyud dang 'bras bur mthong// 'di kun log par mthong ba ste// med las yod cing bden par mthong// brdzun pa yang dag bden par 'dzin// zla ba gnyis par mi gnas kyang// gnyis su mthong ba log pa'i lam// rtogs pas ye shes don du mthong// rang las gzhan pa mi mthong zhing// ma mthong ba nyid snying por mthong// gsal la ma 'dres yongs rdzogs pas// nam mkha'i cho 'phrul nyid dang 'dra// ci yang ma bsam ma bcad pas/ rang gzhag rig pa dus gcig 'char// mthar phyin gsang ba'i rig pa yang// gdod nas mthar phyin rig pa la// mthar phyin ye shes shugs kyis gsal// snang ba sems su mthar phyin la// ye shes gsal ba'i rang bzhin la// mun pa'i rtags pa gdod nas med// rang gzhag rig pa'i me long la// chos kun snang zhing ma 'dres gsal// mthar phyin gsang ba sems kyi lam// gdod nas 'bras bu mthar phyin pas// btsal dang bsgrub pa'i khar ma lus// byang chub sems kyi rang bzhin ni// 'od gsal rtog pa rnam par dag/rgyu 'bras mthar phyin lhun rdzogs pas// 'dod pa'i yon tan rang bzhin tshang// ma bgrod sangs rgyas mthar phyin pas// lam dang sa bcu bgrang du med// rnam par rtog pas brtags pa ni// bgrod pas mthar phyin thob par 'dod// ma bcos ye shes mchog gi sa// btsal ba'i las kyis thob pa min// sbyangs med lhun gyis grub pa'i sa// sbyang zhing bgrod pa'i yul ma yin// dgongs pa gsang ba'i nges lung la// snying po kun 'dus gsang ba'i mchog/ chos kun 'dus pa'i lus pa med// dgongs pa mthar phyin man ngag ni// ma bcos gyi nar bzhag pas na// bsam med rig pa mthar phyin pas// dgongs pa mi 'gyur bde ba'i klung// nges par bsam zhing rtag tu med// sgom tshe dang du mi blang zhing// mi bsgom yengs pa rnam par bcad// mi g.yo brtan pa'i klung zhugs na// yengs ba med do ye sangs rgyas// rang gsal rig pa 'du shes med// bsam med rig pa klong du rdzogs// gang zhig gang la gnas pa la// bla mas de yi drod tshad bshad// de nas gang du'ang 'du shes bcad// phrag brgya dus gcig rdzogs pa'i lung// mkha' mnyam klong la rtag tu bzhugs// la las dge sdig med par brtags// gsang ba'i 'du 'phro mi dmigs shing// thug phrad rig pa gsal ba'i sems// mkha' ltar dag pas bcos pa med// bcos na brtags pa'i grong khyer ba// bsam bral rig pa dpangs dma' ba// btang snyoms sgrib pa 'phangs dmas pa// gling bzhi skye med bzhi dag dang// mun pa'i khams su lhung par 'gyur// gal te bsgribs na 'ching 'gyur te// gsal bar klong na grol bar nges// de dag bar gyi gnas tshul ni// bla ma rdo rjes dgrol bar byas// tshig tu ma bstan rang gzhag lung// rtag tu gsal yang ngos gzung med// gsal byed bla mas ma mtshon na// rang gzhan lug de rig pa med// ched du byas dang btang snyoms dang// chags dang 'dzin pa de nyid ni// rnyog pa bzhi bral dang ma'i blo// 'byung 'jug med par ye shes gsal// cir yang gsal la ngo bzung med// rig pa ma bcos klung du son// mtshan 'dzin yul la rnam par bcad// gsang ba brjod bral rig pa ni// ma bstan rig pa thabs kyi go/ de nyid mthar phyin sems kyi lam// ma bgrod rig pa cig car rdzogs// byang chub kyi sems mkha' mnyam klong gi rgyud chen po las/ rtog pa dang sgrib pa med par bstan pa'i le'u ste bcu gsum pa'o//// de nas gzhan yang bshad bya ba/ khyab pa chos sku tshad dpag med// nam mkha' chen po ji bzhin du/ khyab pa sems nyid de dang 'dra// tshad med sems kyi rang bzhin ni// bdag gzhan don gnyis mi mnga' ba// mkha' la nyi zla'i dkyil 'khor la// tshad med tshad bral phyogs su rdzogs// mtha' bral nam mkha' chen po ltar/ khyab par gsal yang dmigs dang bral// rdo rje sems dpa' nam mkha' che// gsang ba'i snying po mchog gi lung// ye shes mkha' mnyam sgra don med// sku gsum rig pa 'gyur med klong// bcos med snying po mkha' ltar yangs// rig pa rgya mtsho klung ltar zab// zab mo gsang ba'i rang bzhin ni// chos kun ma btsal rig par shar// de nyid thim 'gyur mi mngon zhing// gsal ba dmigs pa kun dang bral// dgongs 'du sems kyi me long la// rol pa phyogs ris med par 'char// kun khyab rig pa chos kyi dbyings// mtha' la thug pa mi gnas shing// dbyings la'ang bri ba yod ma yin// nam mkha' mi 'gyur rtag pa ltar// sems nyid dus gsum ma bcos gnas// gang 'dir mkha' mnyam klong gi don// rtag dka' rig pa'i snying po la// grags pa'i chos brgyad gtsor gzhag nas// gsang ba'i bstan pa 'phel 'gyur na// mthong yul 'di la brlag pa dang// bar ma srid pa'i chos med par// lta spyod sgra bzhir log spyod pas// gnam lcags lta bur yud kyis ltung// rdo rje dam tshig mi ldan par// rna brgyud gsang ba spyad byas na// gnyis ka sprel mar ltung gyur nas// de ni thar pa ga la 'gyur// rang gsal rig pa'i don med par// bdag gzhan chags sdang nga rgyal gyis// mkhas 'dod dregs pa'i rlom sems kyis// mtho dman phyogs ris blo skye nas// de la skyob par nus sam ci// yang dag theg pa'i snying po la// man ngag nges pa'i don med pas// sgra la brtags nas don la spyod// nges par ltung 'gyur thar pa min// dmus long ngam grog snyeg pa la// gang zhig bkri bas mi 'jug na// de yi rjes 'brang mi ldog pas// de yang sdug bsngal 'dod dam ci// ma bcos rig pa'i rnal 'byor pas// rdzogs chen sems kyi rang bzhin ni// mtha' bral dbus la'ang mi gnas pas// tshad dang bral ba'i tshad yin no// gsang don rig pa bsam mi khyab// snying po 'byung ba'i dkyil 'khor ni// ma bcos gsang ba nyid kyi sgo// rig pa lde mig nyid kyi phye// man ngag rin chen 'bar ba nyid// btsal bral ji bzhin lhun grub pas// ma btsal rig pa rang bzhin gzhag pas 'grub// ma bcos gsang ba'i blo med na// bcos pas gsang don 'di dang bral// rdzogs chen thugs kyi snying po la// ma bsgribs ye shes mkha' ltar dag/ma btsal gdod nas ngo bos stong// mi dmigs brjod bral rig pa'i klong// tshegs med dus gcig sa non pas// che ba'i yon tan cig car gsal// brjod bral gsang ba'i chos nyid ni// 'di dang 'di zhes ngos gzung med// gsang ba'i man ngag gsang chen 'di// rang byung rig pa ma yin pa// de nyid rnyed pa ma yin la// rang byung gsal ba yul med pas// rig pa'i ye shes dmigs dang bral// ye shes dbyings las ma g.yos pas// bsam gyis mi khyab dus gcig mkhyen// snying po'i don las mi 'da' bas// rang gsal snying po mi g.yo'i lung// bsam bral dbyings las ma g.yos pas// rang byung g.yo med thugs rje yis// 'gro ba dbyings kyi thar lam ston// rtag pa mi 'gyur nam mkha' ni// gsang ba rang byung nam mkha' che// thogs med bsam pa kun dang bral// bsam bral 'du shes kun dang bral// rig pa kun gsal phyogs med snyoms// rnam rtog gtod 'dzin mi mnga' yang// ma btsal ma g.yos ji bzhin du// g.yo med rang byung gsang ba las// bsam pa'i 'du shes ma lus mkhyen// mkhan po nam mkha' rdul bral zhing// srid pa'i dra ba rnam par gcod// gzhan med rang byung dag pa'i dbyings// bsam pa'i dri ma kun bral bas// ye shes dben pa'i ngo bo nyid// 'dod 'byung cir gsal phyogs ris med// ma bcos snying po bsam pa zad// gang yin de nyid rnam dag pas// 'du shes bral ba'i dbyings mtha' thug/ ji ltar blo yis dran pa nyid// de dag kun bral rang gi blo// ye shes gsal ba mthar phyin pa// sems kyi lung la gnyis med pa// gnyis 'dzin rtog pa phyin ci log/ zhes bral rang byung ye shes la// bsam pa'i khyad par ci byung ba// rang byung gsal ba'i ngo bor lta// rig med mtha' bral don gyi gzhi// 'di dag byang chub sems nyid de// ma rtogs byed pas lhun gyis grub// zhen pa med pas de bzhin nyid// ye shes dbyings sbyor 'dzin pa med// kun khyab gsang ba'i thig le yis// ma khyab med pas dus gcig nyid// bdag med gzhan bral de bzhin nyid// lhun gyis grub pas yul las 'das// rang byung byin rlabs ngo mtshar che// kun 'dus rig pa'i gong zhes bya// bdag bkrol don mthong gsal mthar phyin// bsams pa'i 'du shes dus gcig zad// 'di dag ma lus sems nyid du// nges par rtogs na sems nyid mthong// thob pas rang bsam ma yin kyang// brda don dgrol ba'i khyad par gyis// gsal bya gsal byed de bzhin du// mthong bas kun bral 'bras bu gnas// kun khyab gsal bar gnas mod kyang// gsal byed rkyen dang mi ldan na// rang byung don dang mi phrad cing// phyogs med nyi ma mi 'char te// rgyal po long ba'i brgyan bzhin no// ye nas ma bcos chos sku la// 'khor ba kun rtog gnas pa bzhin// rang la rang gi rang mthar phyin// rang gi gdeng la rang dbang ltar// rang la rdzogs so gzhan ci dgos// gter khyim snang ba de bzhin te// de las yod pa ma yin no// rdo rje ngag dang mi ldan zhing// rim med dus gcig gdeng med par// mtshan ma sgra yi gtan tshigs kyis// ltung zhing nges pa rnyed mi 'gyur// mnyes pa'i yo byad sngon song zhing// dbang lung bla ma'i pad+ma'i zhabs// rtag tu gzhibs pa'i rnal 'byor pas// gsang ba rdzogs ba'i don 'di shes/ bum pas bzhibs pas gsal bcud 'dus// de bzhin bla ma'i zhal shes pas// 'di don rtogs so 'di kun rtogs// dus gcig gsal ba nyid du mkhyen// de bzhin gsal ba'i rnal 'byor pas// brda don tshig mtshan mi mnga' bar// 'on kyang ji bzhin rig par ston// shes kyang rang byung gsal bar shes// ma mthong kun mthong rang bzhin mthong// yul bral rig pa nyag gcig la// rtog dang mi rtog mi gnas te// phyogs med gcig las mi 'da' 'o// bdag nyid yin pas gzhan mi tshol// lhun gyis grub pas yul ma tshol// rang byung nyid par rgyu rkyen bral// dus gcig gnas pas rim 'gro med// gsang ba'i rang bzhin rtogs par dka'// gdod nas thob pa'i dbang mi bskur// byin ldan ye shes byin mi rlob// spyan drangs med pas ye nas gnas// rang nyid dgyes pas mchod mi byed// gnyis med rig pa bstim dang bral// ji ltar de la de mthong ltar// bdag nyid lhun grub ye shes klong// ma lus rig pa gsal bar thim// 'di la gnyis med gcig tu 'bar// nyams myong rig pa ci yang med// rdo rje rin chen 'bar ba ltar// ci yang yin la ci yang 'byung// gsang ba rang byung rnam par dag/thig le gcig tu rdzogs pa'i lung// ye shes rang 'bar ngo mtshar che// snying po rang byung don du mthong// bsam pa med pa'i chos dbyings la// bsam dang mi bsam gdod nas stong// gnyis med thig ler 'od gsal bas// rig pa'i snying po nyi mar shar// ma lus mtha' dag nyid kyi phyir// gcig tu 'dus so 'di ltar mthong// bde chen rol pa'i khyad par las// rang byung g.yo med thugs rje'i sa// ma 'dres mkha' la gza' skar bkram// ma 'dres snying por rdzogs par mthong// snying po'i don du dbye ba med// gdul bya'i dus na so sor spyod// gnyis ka rang byung snying por thim// rang gsal gnyis med de bzhin nyid// rig pa don rnyed bsam mi khyab// rang byung rig pa gsal ba nyams// brjod pa blo yi dus gcig gsal/ khyab par gsal lo dmigs btug bcad// ting 'dzin stong pa ma rabs sems// rang gzhag rig pa bsam mi khyab// mi 'byung mi 'jug cir mi bsam// bde mchog rol pa gcig tu 'khyil// kun kyang rang byung rig pa'i 'od// phyogs ris med par khyab pa yis// dus gcig nyid du gsal bar 'char// mi 'gag mi skye yul mi tshol// rang gzhag dmigs bral rkyen med lung// ma btsal rang gzhag gshugs las 'byung// ma yengs brtson 'grus yu ba can// gcig gi rang bzhin khyab pa'i ngang// gnyis med rig pa bsam mi khyab// bde ba rdzogs chen rang bzhin ngang// thig le bde mchog don du rdzogs// brjod bral rig pa'i 'khor lo la// bsam bral rig pas gsal par mthong// re dogs 'dzin pa rnam par bcad// thab sbyor gol thabs mtha' yas ba// rdo rje bla ma'i zhal gyis gsal// gdul bya tshe na skabs kyis spyod// nges pa'i dus na phyogs ris med// rang gzhan sems byung sems nyid lung// bya bral rdzogs lung sems gter gsum// dngos la khyad par mi gnas te// bsam pa'i ngo la mthun par snang// ting 'dzin bde ba rig pa'i gter// rim med dus gcig gsal ba'i nyams// rkyen med bar chad kun dang bral// tshul gsum don la mnyam gzhag pas// 'bad med bral bas lhun rdzogs pas// drod gsum rtags gsum shes pa drug/ ma btsalabyin gyis brlabs las byung// man ngag gzhi la gnas bcas pas// bzhi gsal ngo bo dmigs 'dzin med// gang yang yin no ci yang rung// thams cad gsal la ngos 'dzin med// kun bzangarig pa'i ye shes la// mtha' dbus med pa'i sems kyis 'jug/rang byung rig pa 'od gsal ba// 'du shes med pa'i dbyings la gtugs// dngos bsam gnyis med mi gnas pa// rtogs mi rtogs kyi khyad par gyis// de lta nyid du so sor snang// rig pa'i don la phyogs ris med// mthar phyin byang chub sems kyi lam// btsal med rang bzhin lhun gyis grub// thig le gcig gi rang bzhin la// ma bcos lhun gyis grub pa yin// rin chen 'bar ba'i lhun grub ltar// ma btsal grub pa'i ye shes la// rtsol ba'i rnam grangs kun gyis ston// gdod nas dag pa mthar phyin pas// mtshan 'dzin rnam pa kun gyis dben// rang byung rig pa 'od gsal la// log rtog mtshan ma'i spros dang bral// kun bzang 'bar ba'i ye shes la// 'byung 'jug rig pa'i tshul gyis gnas// rig pa mthar phyin sems kyi nyams// dpe bzhi'i tshul gyis nyams myong pa// rang snang rig pa'i nyams su zad// de dag rig pa'i don du 'dod// gsang ba mthar phyin kun gyi lam// thams cad ye nas lhun gyis grub// ye sangs rgyas pas btsal du med// lhun gyis grub pas gzhan mi tshol// smon du med pas yul dang bral// rang byung nyid las rgyu rkyen med// 'dus ma byas pas 'jig ba med// dmigs pa med pas yul mi tshol// re ba med pas rtsol mi byed// bsam spyod 'du shes mi gnas te// ye shes gsang bar kun rdzogs pas// gsang ba'i rig pa'i klong zhes bya// bcos med ngang du sangs rgyas pa// ldan pa de dag tsam du zad// shes rig dran rtogs snying por rdzogs// dus gsum snying po lhun rdzogs pas// mthar phyin sems las dbye ba med// de nyid rtogs pas mthar phyin la// bral dang ma bral la sogs pa// kun kyang rang byung rig pa yin// snying po rang byung dgongs pa la// rtag tu gsal nas lta ba yin// lhun gyis grub par 'bras bu yin// rtsol dang bral bas dngos grub yin// gdod nas dag pas sbyang mi dgos// ye nas mthar phyin sgom mi dgos// rang byung yul las mi rtog pas// bsam pa'i 'du shes kun gyis stong// ma yengs rig pa'i klung du zhugs// 'du 'bral med pa chos kyi dbyings// mar me lta bu lung thob nas// lhun gyis grub pas zhugs pa yin// nam mkha' mi 'gyur rtag pa ltar// ma bcos 'pho 'gyur med pa'i sku// mkha' mnyam ngang du kun 'dus ltar// rang sems ma bcos snying por 'dus// rgyu rkyen dag pa ji bzhin du/ khyab pa chen po rgyu rkyen med// ma 'dres nam mkha' cho 'phrul ltar// g.yo ba med cing byin rlabs 'byung// ye nas med pa ji bzhin du// ma bcos dag pa chen por gsal// ji bzhin gsang ba'i nam mkha' ltar// rang byung gsang ba'i snying po sku// gang yang ma spangs dag pa'i sku// dus gsum 'pho 'gyur med par gnas// rang gsang mtshon pa'i dpe nyid de// ma bcos rang bzhin dag pa la// bcos ma'i 'du shes phyin ci log/ bsam pa'i 'du shes ma lus zad// ye shes gsal ba'i dbyings mthar phyin// rang 'bar byin rlabs rmad po che// 'du 'bral med pas dbyings la 'khor// ma bcos gsang ba'i sgra tshig gis// ji bzhin nam mkha' rang snang ston// 'di la mtha' dang dbus med pas// nam mkha' dang ni mnyam pa'i rgyud// ji ltar nyi 'od 'bar ba ltar// ma bsags lhun gyis grub par gnas// thugs rje nam mkha'i mtha' ltar brdal// rang byung lhun grub dbyings nyid la// 'bad pa med pa'i byin rlabs nyid// rang bzhin shugs kyis 'byung ba yin// rang byung rig pa'i snying po las// ji ltar bsams pa de ltar snang// kun 'byung nam mkha' lta bu'i 'od// su yi rig pa ye sangs rgyas// don ni rang rig sems kyi lung// rang rig de yang 'di mnyam bcad// nges par gzhan la bstan du med// dmigs dang bral lo mngon sum dbyings// dbyings las rig pa'i don la zhugs// nges pa'i don la de ma thag/ gsang ba rang byung dbyings la 'dus// ma bcos gsang ba mthar phyin pa'o// byang chub kyi sems mkha' mnyam klong gi rgyud chen po las/ khyab pa chen po'i tshad bstan pa'i le'u ste bcu bzhi pa'o//// de nas gzhan yang bshad bya ba// 'bras bu yod med bshad bya ba// lhun grub ye shes chen po la// bltos pa'i 'bras bu rim pa med// rgyu nyid 'bras bu mthar phyin pas// ma btsal gdod nas dag pa yin// phyogs ris can gyi 'bras bu min// lhun gyis grub pa'i 'bras bu yin// rang rig gdod nas lhun grub pas// btsal ba'i ngo bo kun gyis stong// bsgrubs pas grub pa'i 'bras bu min// nyi ma'i 'od ltar rang bzhin grub// rim par smin pa'i 'bras bu min// dus gcig smin pa'i 'bras bu yin// 'dab chags rgyal po ji bzhin du// dus gcig smon pas rim pa med// bsags pa ma yin 'dod nas rdzogs// spong len bcas pa'i 'bras bu min// spong len med pa'i 'bras bu yin// kun gyis myong ba'i 'bras bu min// lhun grub gsang ba'i 'bras bu yin// gzhan las byung ba'i 'bras bu min// rang las byung ba'i 'bras bu yin// btsal bas bsgrubs pa'i 'bras bu min// rang bzhin ye gnas 'bras bu yin// ma bcos ye nas 'bras bu yin// 'dab gshog nyi shu rtsa lnga yod// de dag dus gcig smin pa'i phyir// de bzhin rdzogs chen rnal 'byor pas// rtogs ba tsam gyi 'bras bu yin// bden bzhir rim par goms pa yis// mthong sgoms spong pa'i rim pa yis// 'gog pa'i 'bras bu de nyid kyis// rim pa bzhi yi 'bras bur 'dod// phyi nang rten 'brel ting 'dzin gyis// de bkab stong pa bzab mo la// rang don gnyis med mthar phyin kyang// lhun gyis grub pa'i 'bras bu min// bde gnyis 'brel ba'i thabs chen gyis// pha rol phyin bcu spyad pa yis// bcu bgrod sa bcu sbyangs pa yis// thob pa lhun grub 'bras bu min// phyi nang dag pa'i tshul bzung nas// mtho dman rim pa'i 'bras thob cing// blang dor che chung rim pa de// lhun gyis grub pa'i 'bras bu min// gnyis med don la gnyis brtags nas// lta spyod 'brel pa'i don byed pas// rang sa'i 'bras bu thob mod kyang// de yang lhun grub 'bras bu min// byin rlabs gnyis mthong sems dpa' yis// grogs mthong grub pas gzhan las len// blang dor sems dpa'i rnal 'byor pas// blang dor med pa'i 'bras bu min// bskyed pa'i bskyed dang rdzogs pa dang// rdzogs pa'i bskyed dang rdzogs pa 'di// 'du 'phrod rig pa'i dkyil 'khor gsum// byin rlabs dbang dang ldan pa la// mchod bzlas spro bsdu thig le yis// ched spyangs grub pa gsum thob pas// gnas 'gyur chen byas rtogs 'dzin gyis// thob kyang lhun gyis grub pa yin// ye shes gsang ba'i dkyil 'khor bzhi// thabs dang shes rab kha sbyor gnyis// gong du 'khyil zhing 'og tu 'dzag/bde ba 'dzag cing gsum rdzogs rgyas/ khas phub mi shigs haM dkar dbus// bcu drug gnyis ka ka li ldan// thabs kyis shes rab mchog la sbyor// 'phen dang sdud pa'i sbyor bas gsal// brgyad gnyis ldan pa'i 'dab ma la// gsung gi yi ge gyen 'byung dbus// a li 'phreng bas de bzhin bskor// g.yas g.yon bskor zhing dbus su 'khyil// spro zhing rang gi dbyings la thim// longs spyod 'byung zhing bde ba rgyas// mi shigs 'khor lo 'dab ma brgyad// chos nyid ye shes yon tan rtsa// rang rgyud bzhi la yan lag brgyad/ khams gsum 'khor ba'i sa bon drug/ sku gsung thugs kyi yi ge gsum// dngas ma 'byung ba'i snying po lnga/ kha dog dbyings dang snyigs ma dag/ thig le'i rang bzhin 'od du 'bar// 'khor ba'i sa bon kun spyangs nas// dwangs ma'i yi ge 'od du 'bar// thig le rang bzhin med par thim// mi shigs hUM ldan cha lnga pa// rang byung rig pa bde ba'i dbyings// bde mchog ro mnyam chu kar rdzogs// ye shes snying po nyid du thim// a N+ri su tre pri du dza// hUM oM rang gi gnas su shes// rgyu ba bzhi yi tshul du gnas// kun kyang 'od du 'bar nas kyang// thig le byang chub sems su gnas// sprul pa dang po gnyis ldan pa// srid pa dang ma'i gnas na yod// thur du khyab byed dbus yin no// yi ge 'phreng ba'i bskor tshul dang// kA li 'phreng bas dbus 'dab nas// phrag gnyis khyab pas gnas pa yin// kun kyang sku gsung thugs su 'brel// thabs dang shes rab gnyis med 'od// gsang ba mchog gi lam las byung// 'khor lo bzhin du 'khyil byas nas// 'byung dang 'bar ba steng 'og tu// gyen du 'bar zhing thur du 'phyo// thig le rim par mtshams sbyar nas// bde ba chen po'i 'bem la phog/'pho ba brgyad dang bcu drug gis// sbyang bzung nges pa'i drod thob nas// 'dar dang rdul dang ba spu ldang// skad 'gags mdog gsal mdangs legs pas// rtsa bug nam mkha' ltar gsal na// ye shes khyab brdal kun tu bzang// mtha' dbus med pa'i don du mthong// snying po rang bzhin med par gsal// de nas ma bcos rang 'bar skye// thob bya rang yin grub pa yin// lhun gyis grub pa'i 'bras bu med// phyag rgya shes gsal che chung zhing// mdangs legs dri zhim kos ko phra// smad che so legs skad snyan pa// gzhan gyis ma spyad dag pa la// dbang bskur byin brlabs chos bshad cing// dbang bskur gdams ngag legs par bstim// bstan chos cha rdzogs rtags byung nas// phyag rgya bzhi ldan nges sbyar nas// rtags ldan 'byung 'jug dbugs goms pas// lhan cig skyes pa'i 'dod chags ro// rang byung bde ba thob 'dod pas// des kyang bde mchog mi rtogs te// rgyal dang de yi cha bzhin no// rang byung 'bras bu mi 'gyur te// bim pa ra yi 'bras bzhin no// de ltar mtshan mas rgyud sbyangs nas// gsal bar chos nyid don mthong nas// sa bgrod lam sbyangs mnyam sbyar te// thob pa rdo rje 'bras bur bcas// 'gro don ma lus lhun grub cing// lhun grub sku gsum ngang gnas pas// bdag gzhan don la rdzogs byed kyang// blang don med pa'i 'bras bu yin// dbyings dang ye shes rgyu 'bras kyis// byin brlabs 'od kyi ting 'dzin dang// grangs dang rim pa nges med pas// rol ba rang 'char bshad pa yang// gzung ba'i tshad byas rtogs pa yin// blang dor med pa'i 'bras bu min// sgro skur mtshan ma'i lam du ltung// ma grub ngang la grub par btags// gnyis med don la gnyis par gzung// rang byung sa la rgyu yis skyed// lhun grub ngang la rtsol bar bya// ma bcos ngang la gnyis 'dzin bcos// brjod bral ngang la tshig tu brjod// btsal med dang du ched du rtsol// bskyed nas rig pa'i dkyil 'khor la// cig par rim gyis bskyed bzhi 'khrul// gzhan na med pa'i spyan 'dren cing// rang las med bzhin gzhan du tshol// bgrod med don la rim par bgrod// spyad med don la spyad pa'i rgyun// phyi nang med las spro bsdu byas// gcig gi don la so sor gzung// grangs med ngang las grangs 'dzin 'khrul// gro skur 'das pa'i ye shes la// mtshan ma mtha' yi sgro skur 'dogs// blang dor bral ba'i ye shes la// blang dang dor ba gnyis su phye// ci rigs thabs kyi rim pa yis// 'dzin sems dag gi lcags bkrol yang// goms pa'i bag chags bcings dang 'dra// bcos ma'i bag chags sbyor ba yis// ma bcos gsang ba'i don mi rnyed// thob bya rang las ma yin na// rgyu dang 'bras bu'i mdud pas bcings// 'di kun 'bras bu nges pa min// lhun grub ye shes 'bras bu ni// ma bcos rig pa chos kyi sku// longs spyod rdzogs pa bde chen sku// thugs rje snang ba sprul pa nyid// tag k+sha ka yi nor bu ltar// ma bsags lhun gyis grub par gnas// rtsol ba'i chu bo mi gnas pas// btsal bas grub pa'i 'bras bu min// thams cad sems su lhun rdzogs pas// gzhan las 'ongs ba'i 'bras bu min// bgrod med rang bzhag bcu gcig la// rim pas smin pa'i 'bras bu min// gcig dang du ma med pas na// grangs bcas 'bras bu ma yin no// bcu yi rim sogs sems nyid la// bgrod pas thob pa'i 'bras bu min// rgyu rkyen bral ba'i rang bzhin pas// bskyed bya skyed byed 'bras bu min// ma bcos lhun gyis grub pa'i phyir// bcos ma'i spyor bas thob pa min// sbyan drangs ma yin ye nas gnas// kun khyab nam mkha' lta bu bas// phyogs ris bcas pa'i 'bras bu min// thams cad ye shes rang gsal la// rnam par dbye ba mi gnas na// gdul bya'i dbang gis dbye bar snang// rnam par rtog pa'i dbang gis na// gang ltar brtags pa de ltar snang// btsal bas mi rnyed rang la thug/ rang byung nyid kyis gsal bar byas// ye shes lhun gyi grub par gsal// rmad byung rol ba'i sku gsung thugs// ma btsal lhun gyis grub par shar// 'dod pa'i don kun mthar phyin pas// cir snang lhun grub thig le rgyan// dus gcig gsal bas rim pa med// rang gsal rig pa'i khyad par gyis// sa bgrod sa rnams dus gcig mnan// ma btsal 'bras bu'i cir snang yang// nges par gsal la dngos gzhi med// 'od gsal gdod nas rnam dag pas// mtha' yi mun pa ye nas dag/mtha' bral sems su lhun rdzogs pas// cig par 'gro don bya dang bral// zad med gter la longs spyod pas// yon tan nam mkha'i mtha' dang mnyam// dus gsum gcig ste khyad med pas// thug pa med par rang bzhin gnas// 'dod zhen rnam rtog mi mnga' yang// thugs rje nyi ma'i 'od ltar khyab// dngos la khyad par mi gnas kyang// bsam pa gdul bya'i re ba skong// byin brlabs rin chen 'dod dgur bsgyur// snang ba sems su mthar phyin pas// yul dang yul can gdod nas med// rnam par rol pa cir yang snang// rang byung nyid pas gzhan pa med// chos skur gdod nas kun gnas pas// bsgoms kyang dmigs pa ngal ba'i las// thig le gcig tu kun 'dus pas// 'bras bu ma rtsal grub par 'dus// rig pa 'od 'bar chen po las// 'gro 'dul thugs rje'i dkyil 'khor spro// bdag gzhan lhun grub mi g.yo ba// 'bras bu nyid las 'bras bu 'byung// rang la rdzogs par re dogs med// che chung med pas kun la snyoms// gtsang sme med par bdud rtsi'i mchog/ rnam par dag pas skyon yon bral// thams cad sgrol bas thar pa'i gru// yangs pa'i ye shes phyogs bral rgyas// rang dbang thob pas dbang dang bral// sku gsum sems nyid lhun rdzogs pas// rnam par dbye ba'i tha snyad med// bdag nyid don la dbyer med pas// gnyis ka theg chen sems kyi lung// 'bras bu rin chen lhun grub pas// gdod nas lhun grub chen po nyid// kun yin gang yang ma yin pas// ci yang yin no rnam kun bcad// rang byung lhun grub 'bras bu ni// kun la mthun par skabs kyis 'byung// kun 'byung ma btsal lhun grub pas// rang gzhan rig pa bsam mi khyab// phyogs ris med pa'i ye shes la// gzhan med rig pa rjes su dpags// mngon sum rig pa rdzogs lung la// mtshan bral mnyam pa'i stobs kyis gnas// shing tog smin pa'i 'bras bu ltar// chen byas ma yin shugs kyis 'grub// ji ltar nyi ma'i 'od bzhin no// gnyis med rig pa'i chos dbyings la// sangs rgyas sems can gnyis med pas// rgyu 'bras tha snyad kun gyis stong// dran dang dngos 'dzin rnam par dag/ mi skye mi 'gag bcos med klong// ma bsags gdod nas lhun rdzogs pas// rim pas thob pa'i 'bras bu min// spros bral ma yin lhun gyis grub// rang rgyud ma yin stobs chen po// kun kyang ye nas lhun grub pas// gnyis 'dzin rtog pa kun gyi stong// ma bcos sems kyi khyad par la// yon tan btsal med 'bras bur gsal// thams cad sems su lhun grub pas// bdag gzhan re ba kun gyis skong// rang byung smin pa'i 'bras bu ni// rtsol ba'i rnam grangs ji snyed kyang// ye shes 'od gsal ma yin pa// gang yang yod pa ma yin no// 'dod pas len dang lhun gyis grub// rtogs dang ma rtogs khyad par yin// gdod nas bdag nyid lhun grub la// 'phel 'grib med pa snying po yin// rtogs par dka' bas gsang ba yin// ma btsal gnas pas lhun grub yin// ma bcos gnas pa ye shes yin// dmigs 'dzin med pas stong lta yin// bems po men pas rig pa gsal// thams cad 'jug pa ma yin te// rang bzhin 'grub pas dngos grub yin// de nyid gsal bas lta ba yin// 'da' ba med pas dam tshig yin// blang dor med pas spyod pa yin// rang snang dbyer med dkyil 'khor yin// rang dbang thob pas dbang yin te// lhun gyis grub pas 'phrin las yin// yengs ba med pas ting 'dzin te// thams cad lhun gyis grub pa la// bzang ngan blang dor gang la yod// kun bzang 'bar ba'i ye shes la// gnyis 'dzin rtog par gol ba'i lam// mtha' rnams ma bsams lhun grub la// ltung dang 'jig pa'i 'du shes med// 'bras bu'i ngo bor rang shar bas// re dogs 'du shes kun gyis stong// dngos grub byin brlabs bsam mi khyab// lhun grub r-in chen 'bras bu'o// byang chub kyi sems mkha' mnyam klong gi rgyud chen po las/ 'bras bu yod med kyi khyad par bstan pa'i le'u ste bco lnga pa'o// 13// de nas gzhan yang bshad bya ba// de yi mtshan nyid bshad bya ba// rang bzhag 'bras bu gnyis ka dang// gdul bya'i tshe dang snang tshul dang// mtshan nyid med pa'i mtshan nyid ni// nam mkha' lta bu'i sems dang bral// kun gyi mtshan nyid 'di yin pas// 'di yi mtshan nyid dmigs dang bral// kun gyi mtshan nyid kun 'dzin la// rang gi mtshan nyid rang gi 'dzin// byang chub sems kyi ngo bo yang// dmigs bral rig pa'i mtshan nyid 'dzin// spyi dang rang gi mtshan nyid ni// dbye ba med pa'i don yin yang// 'dul ba'i dbang gis snang ba yin// thams cad rang byung rig pa'i phyir// dus gcig mkhyen pa'i ye shes kyis// gnyis med rig par 'dod nas gsal// rang rig gsal ba'i mtshan nyid do// rang byung rig pa 'od gsal ba// phyogs med ye shes khyab par gdal// rgyu med rdo rje rkyen dang bral// rang byung rig pa'i mtshan nyid do// bdag gzhan rtsol med sems la lus// ye shes dbyings su gcig pa la// bya byed khyab par mi gnas pas// ma bcos sems kyi khyad par yin// mtshan med ngang la mtshan nyid med// me med tsha ba mi srid la// mtshan gzhi med pa'i chos dbyings la// mtshan nyid med pa'i rang bzhin yin// bdag gzhan med par dbyings gcig par// mtshan nyid yod med gang gis mtshon// ye sangs rgyas pa'i bdag nyid la// btsal ba med par rang bzhin gnas// gnyis med bdag nyid chen por grub// ma btsal sems la rang bzhin tshang// rang la mi gnas gzhan mi gnas// rang rig 'od gsal bsam mi khyab// bstan pa rgya mtsho rig pa'i klungs// ma bcos sems kyi mtshan nyid la// bcos ma'i 'du shes kun gyis stong// theg chen sems kyi mtshan nyid ni// gang yang yin no rnam kun bcas// ci yang yin no khyab par gnas// sems nyid ma bcos gsang bar gnas// mtha' dbus med pa'i gzhal yas la// rang byung chen po'i snying por bzhugs// rol ba ngos gzung ma yin te// ci yang med la cir yang 'byung// ye shes snying po nyi ma shar// ma lus thig le chen po nyid// ma bsams ma sbyangs ji bzhin nyid// ma bcos ma bslad gsang ba'i don// thams cad thig le'i bdag nyid las// nyid las spro zhing dbyings las bsdu// nyid las ma yin bdag nyid che// rang byung ma btsal de bzhin nyid// byang chub sems kyi klong brdal pas// klong dgu bstan pa gcig la rdzogs// 'dus shing 'phel 'grib mi gnas pas// gsang ba kun 'dus rig pa'i gter// rdo rje kun 'dus chos kyi dbyings// dman pa'i khyad par gang dag gis/ rnams grangs khyad par ci bstan pa// de dag de yi khyad par te// de dag de la bstan pa yis// rnam rtog sgro skur bral ba yis// nus pa'i khyad par ma 'dres par// de dag tsam du bden pa ste// de yang dngos grub yod ma yin// 'jig rten 'das dang 'jig rten pa// gang dgas so so'i nus pa dag/ ma btsal rang bzhin lhun grub pas// gnyis med ngang du ye sangs rgyas// rnam rtog brtags pa'i mtshan nyid kyang// brtags pa'i mtshan ma rang 'dzin la// ma bcos don gyi ngo bo yang// de dag rang gi ngo bor 'dzin// bde sdug grol dang ma grol rtsol// kun kyang rang rang ngo bo 'dzin// sa chu me rlung nam mkha' yang// ye nas rang gi ngo bo 'dzin// rang gi lam sogs thabs ngo bo// rang bzhin ma 'dres so sor snang// de dag ma 'dres rang mtshan nyid// ma yin yin la cha las 'das// rol ba'i byin rlabs cir yang 'char// 'dzad pa'i byin rlabs phyogs ris med// thugs rje'i byin rlabs 'di ltar 'bro// gzhan pa med pa'i dang po ste// gnyis par gnyis ka med pa ste// gsum par de dag kun dang bral// bzhi par kun la ji bzhin pa// stong pa chen po rnam kun ldan// gang ltar bltas pa de bzhin snang// de yang dngos grub yod ma yin// rgya mtsho'i rlabs ltar ngo mtshar che// ci yang med las ci yang 'byung// rig pa'i byin rlabs cir yang gsal// rdzogs te rang bzhin lhun grub las// nyi ma'i 'od ltar rang bzhin snang// rol pa ma 'dres khyad par che// snang ba kun bzang rol ba la// dran pa'i rnam rtog cir mi lta// byung tshor g.yo 'gog ma lus la// rang byung rig pa dbyings la thim// rang 'bar gcig pa ma yin pa// kun gyi 'du shes rnam par bcad// rang gi mtshan nyid ma 'dres pa// sbyi yi rdzogs pa lhun gyis grub// gang zhig zhen pa rnam bcad pa// rang rig 'brel pa rjes su dpags// mngon sum rig pa mchog gi shes// rgyu ba med de gsal bar mthong// rjes 'breng rig pa'i 'du shes med// rang rig stong pa rnam kun ldan// btang gzung bral lo yengs pa med// rang bzhin ye nas lhun grub pas// ma btsal rig pa mngon sum la// rnam rtog 'dzin pa'i dra ba kun// rdo rje 'od gsal lung gis gcod// mtshan ma'i zhes pa'i sgro skur med// 'ching 'bral dus gcig rdzogs pa'i mchog/snying po gsang ba'i don la rdzogs// bde chen ngang la bya bral med// gcig tu gnas so ye sangs rgyas// chos nyid rig pa bde chen po/ khyab pa'i thig le 'od kyi ngang// 'gyur ba med do nam mkha' ltar// brjod du med do dmigs dang bral// sku gsum gcig pas dbye ba med// bstan pa rang byung thugs kyi mchog/ sangs rgyas sems can gcig pa'i 'khor// kun 'dus rig pa chos kyi dbyings// rig bral rig pa sgro skur med// chos rnams rang bzhin dag pas na// 'khor dang myang 'das ye nas med// rang bzhin lhun gyi grub pas na// bya bral mtshan ma kun las 'das// longs spyod chen por lhun grub par// rang byung bdag nyid chen por myong// rig pa'i ye shes 'od gsal sems// nyam myong rig pa'i 'du shes med// bsam spyod bral bas dgongs pa'i klong// gdod nas dag pas chos skur gnas// sgro dang skur pa dag pa yis// rang gi mtshan nyid bshad pa yin// gdod nas ma bsags rdzogs pas na// 'bras bu nyid la 'bras bu 'byung// gcig pas rgyu 'bras khyad par med// gnyis mthong mtshan ma gol ba'i lam// gang zhig rtsol ba'i khyad par gyis// lhun grub rang gsal bde chen po// mtshan 'dzin zhen pa ci btsal yang// nges par 'bras bu mi 'byung ngo// gcig la yon tan snang tshul gyis// so sor phye ba gcig las med// chos sku ma bcos sems nyid de// 'od gsal bde chen dag pa yin// zhing khams sangs rgyas sems can kun// lhun gyis grub pas rang bzhin yin// gnas ni yang dag 'og min te// dpag med 'bar ba'i gzhal yas so// sangs rgyas sems can gnyis med pas// chos sku lhun grub chen po'i 'khor// bstan par bya ba'i yul rnams kun// rang byung lhun grub theg par 'chad// dus gsum gcig pa khyad med de// bsam gyis mi khyab dus na shes// longs spyod bde mchog sems nyid de// bde mchog lhun grub chen po yin// zhing khams stong gsum phrag brgya ste// nges pa'i don la bye brag med// gnas ni 'og min chen po ste// rin chen 'bar ba'i gzhal yas so// bzod 'das sa bcu dang po'o// gsang ba'i lam du zhugs pa la// bstan pa gsang ba'i rang bzhin gsum// brjod bral dgongs pa'i tshul gyis bshad// dus ni dus gsum mi 'gyur te// de dag snying po rdzogs par du// sprul ba sems 'byung rang bzhin te// thugs rje kun la mthun par snang// zhing khams 'dzam gling phrag brgya ste// nges pa'i don la che chung med// gnas ni 'dzam gling gdan la rdzogs// gdul dbang gar bzhugs de nyid de// de nyid rnam bzhi'i tshul du'o// bstan pa bkri drang theg pa gsum// tshig dbyings dag gis mchod par byed// dus ni lnga brgya'i dus nyid du// nges pa'i don la dbye ba med// 'di dag gcig tu lhun grub pas// rtsol ba'i re dogs kun gyi stong// lam med rim med gcig par 'jug/ mkha' ltar gnas so chos kyi dbyings// lhun gyis grub pa'i 'bras bu la// 'dod pa'i sems kyi re ba med// sku gsum mtshan ma cir brtags kyang// rang byung sems las gzhan med do// rang byung rig pa'i khyad par las// cir gsal rig pa ci yang min// rang byung rig pa dbyings la thim// grangs dang rtogs pa'i mtha' las 'das// ma brtags ma zhen dri ma med// lhun gyis grub pas 'bras bu la// dgag dang bsgrub pa kun dang bral// ma btsal ma bsgrubs ye nas dag/ ma skyes rang byung ye nas grub// gdod nas rang byung snying po la// 'dzin brtags chos rnams kun gyi stong// chos nyid rang bzhin sems nyid de// sems nyid rdzogs chen rang nyid du// bcos ma'i thabs kyis ma yin te// ma bcos rdzogs pas gtan la 'bebs// de nyid nges pa'i 'bras bu ste// ma btsal lhun gyis grub par gnas// de dag 'bras bu'i mtshan nyid do// 'jigs pa dang ni 'das pa yi// chos rnams gcig tu lhun grub pas// gnyis pa'i gnas pa mi gnas te// bde ba chen por lhun gyis grub// spyi yi mtshan nyid bsam yas pa// bye brag khyad par ma 'dres kyang// gcig ste rnam pa yongs kyis med// rdzogs te rang bzhin lhun gyis grub// ma skyes pa dang ma byung dang// mi gnas nyams myong khyad par gsal// sems nyid snying por ye rdzogs pas// gnyis rdzogs khyad par phye ba med/ khyab pa chen po chos kyi sku// nam mkha' gsal ba'i ngo bo bzhin// gnyis med ye shes bde chen po// bsam bral dbu ma mi g.yo ba// mtha' gsum kun gyi snying por rdzogs// 'phel 'grib med pas gsal ba bzhin// rang rig rang byung rgyu rkyen med// dri med rang gsal bsam gtan ni// skye med rang gsal snying po la// dran med rgyu med rig pa yis// dus gsum rig pa'i gter la spyod// gsang ba gsang chen rang byung nyid// rang byung gdod nas rnam par dag/ bde chen rol par rang snang la// ma bcos legs par gnas pa yin// gnyis med sems la dbye ba med// 'byed pa med pas rang gi thugs// ma bcos thugs la gdod nas gnas// phyogs ris gnyis 'dzin mi mnga' bas// ye nas thugs rjes khyab par bdal// dbyings 'jug med pas 'gro 'ongs spaungs// don du gcig pas dbye ba med// gsal rig ye shes nyid du 'char// sku gsung rig pa thugs la rdzogs/ khyab bdag ro mnyam thig le che// kun 'dus rig pa sems kyi klong// cir snang lhun grub rdzogs pas ni// rang gsal nyag gcig dri ma med// gcig pas rnam par dbye ba med// rdzogs pa'i don la gnyis med na// rnam par rtogs pas brtags dbang gis// bsam pa'i khyad par ji lta bar// de dag ji lta bzhin du mthong// dngos la de ltar mi gnas kyang// thag pa la ni sbrul bzhin no// ji ltar 'khrul pa'i rang bzhin dag/ 'jam pa'i rang bzhin nyid dag la// grang ba'i rlung gis bskyod pa ltar// phyin ci log gis de ltar mthong// gdul bya'i bsam pas de bzhin du// res 'ga' zhi la re 'ga' chags// res 'ga' drag la res 'ga' khro// 'dod la longs spyod mtshan nyid ni// dngos dag sems la khyad par med// dmyal ba'i tsha sregs rang bzhin dag/ des 'dul thabs la snang ba yang// de dag rang bzhin sems nyid pas// bde chen ngang las g.yos pa med// yi dags gdung ba'i ye shes kyang// thugs rjes 'khor ba bsgral ba'i phyir// de dag nyid la snang ba yang// byang chub sems las gzhan ma yin// dud 'gro ma rig gti mug pas// mi khom sdug bsngal nyams myong ba// thugs rje chen po'i byin rlabs te// bde chen nyid las gzhan ma yin// gling bzhi'i mi yi rang bzhin dag/ g.yeng dang 'gyur ba'i rang bzhin te// thugs rjes 'dod lngar byin brlabs nas// de dag sems nyid rang bzhin yin// gtum 'khrug phrag dog lha ma yin// 'thab rtsod sdug bsngal myong 'gyur yang// de dag byang chub sems yin pas// gdul bya'i ngo la snang ba yin// lha gnas bde ba ji snyed pa// le los ltung ba'i sdug bsngal snang// de dag sems nyid rang snang bas// gdul bya'i ngo la khyad par snang// thabs dang shes rab nyid snang bas// gdul bya nyid nas ye sangs rgyas// gdod nas dag pa'i don nyid la// gcig la gnyis par 'du shes par// kun brtags log par zhen par 'gyur// ji ltar snang ba de ltar min// gang ltar rtogs pa de ltar gsal// kun kyang bdag nyid chen po yin// rdo rje sems dpa' mkha' mnyam klong gi rgyud chen po las// de kho na nyid chos nyid bde ba chen po'i mtshan nyid bstan pa'i le'u ste bcu drug pa'o// 14// de nas gzhan yang bshad bya ba// zhen dang ma zhen khyad par gyis// snang tshul legs par bshad par bya// gnyis ka'i mtha' bral chos kyi dbyings// snang bzhi rig pa chos kyi dbyings// stong nyid bya bral gnyis su med// mi 'byed thig le kun nas zlum// ma btsal rig pa mngon sum la// zhen pa brtags pa'i dbang gis na// rtog pa rtog pa'i ngo bor snang// nyi ma la ni mun pa'am// zla ba gnyis su mthong ba'am// dung la ser por snang ba'am// thag pa la ni sprul bzhin no// dngos la yod pa ma yin kyang// rtog pas de ltar snang ba yin// med la yod pa'i tshul gyur pas// thog ma med pa'i dus nas nyams// rin chen 'bar ba'i dus nas nub// rtog pa'i dra ba'i mdud pas bcings// dam pas dgrol ba ma byas par// 'khor ba'i mun pa'i thibs kyis 'gags// de nyid sprad par ma byas pas// rang byung lhun grub stong par 'gyur// thams cad 'od gsal dag pa la// rin chen sems kyi rang bzhin dang// rnam rtog zhe sdang brtags dbang gis// tsha grang myong ba'i sdug bsngal gyis// bde ba'i reg pa mi gnas kyang// rnam par rtog pa'i ngo bo las// dngos la rgyu 'bras grub pa med// chags sdang ser sna rnam dag pas// 'dzin bral 'jig pa'i rang bzhin la// med las yod par rnam brtags pas// ser sna 'dzin rtogs dbang gis na// mi gtsang rtsub bkres myong bar 'gyur// dngos la de ltar mi gnas pas// bsam rtog dbang gis snang ba yin// 'byed med ye shes chen po la// ma rtogs gti mug 'thibs pa yis// rin chen mthong ba'i lam dang bral// bkol spyad la sogs sdug bsngal myong// bya byed rmi lam gnod pa ltar// 'khrul pa'i snang ba ma rtogs pas// dngos la ma grub ye nas stong// ji ltar snang yang dngos la med// 'on kyang de ltar snang bar zad// chags dang g.yeng bral lhun grub pas// ma mthong log par rtogs pa yis// 'gyur dang rnam par g.yeng ba yis// gling bzhi mi yi sdug bsngal myong// ngo bo rang gsal lhun grub la// 'gyur sogs zhen pa mi gnas pas// med la yod pa'i tshul du mthong// dngos la mi gnas bsam spyod bral// thams cad rang byung snying po bas// yangs dog khyad par mi gnas pas// gnyis med ngang la gnyis par gsung// zhen bral don la log par zhen// 'thab rtsod phyogs ris gdug par mthong// de ltar rtsub drag sdug bsngal myong// rang byung rol ba'i khyad par las// dngos su ma grub stong par mthong// bya bral sems nyid rdzogs pa la// bya dang mi byed mi gnas te// ma rtogs log par zhen pa dang// le lo 'du byed g.yeng ba yis// ltung ba'i sdug bsngal dag myong yang// rang byung nyid las gzhan med pas// ltung dang mi ltung kun bral te// dngos la mi gnas ye nas stong// stong dang mi stong rnam rtog nyid// rab gsal gnyis med ye shes la// cir yang 'dzin pa'i bsam pas bcings// log par rtogs pa'i dbang gis na// gnyis med don la gnyis par gzung// kun kyang log pa'i lam du zhugs// ngo bo med par rang bzhin dag/ byas pa mi 'gyur mi shigs pas// ther zug rtag pa phyin ci log/ smig rgyu dag la zhen pa 'dra// shin tu stong pa rgyun chad kyis// mthar zad log pa'i grong khyer bas// rgyu 'bras log 'dod chad pa'i khams// sdig chen smyon pa'i 'du shes gnyis// thag pa la ni sprul bzhin du// 'khrul 'khor log pa'i 'du shes kyis// myur 'dzin 'di dag ltung ba'i rgyu// byas pas ngal ba don med yin// gnyis med don la gnyis gzung nas// nyon mongs ched du spangs pa yis// bzhi yi rim par thob lta zhing// rnam par 'gog pa'i ngo bo can// 'dus byas gong bu'i gzugs nyid la// tha dad cha shas brtags pa yis// rang 'dod 'bras bu grub pa snang// mthar thug 'bras bu de la med// rang bzhin ma skyes rang bzhin la// skye 'gag rim pa'i tshul bzung nas// rgyu 'bras 'byung 'jug rim pa yis// 'dod pa'i 'bras bu mthar thug kyang// ma rtogs bden pa'i don las nyams// mthar thug 'bras bu de la med// bden gnyis mi gnas tshul rtogs shing// zhi gnas lhag mthong 'brel ba yis// pha rol phyin bcu'i rang bzhin gyis// sa bcu mthar phyin sangs rgyas la// rang sa thob kyang mthar mi phyin// bden par smras kyang log pa'i lam// bcos shing bslad pas 'khrul ba'i rgyu// rdzun pas bden bslus 'khor ba ltung// rang byung gnyis med rang bzhin la// shes pa gnyid 'dod gzung 'dzin snang// mi 'gyur brtan pa'i rtag lta can// dung la ser por zhen pa ltar// rang rig don med mdongs pa ltar// de nyid dam par yod pa yis// stong pa'i 'du shes ma rabs sems// rtag chad 'khor ba'i g.yang sa yin// gnyis med don la gnyis gzung nas// mthod man rim pa'i tshul gyis ni// grub pa rim 'dod dag pa nyid// ma dag bas bsgrubs gol ba'i lam// gnyis 'dzin gdon gyis zin pa yis// gtsang ma'i dka' thub gang zag la// dbang bskur mtshan ma'i lam bstan yang// byis ba 'khor ba'i g.yang sar ltung// gnyis pas gnyis med don dang bral// brdzun pas bden pa'i don mi rnyed// lta spyod rang bzhin sems nyid la// gnyis 'dzin goms pa'i ting 'dzin gyis// bzlas bsgoms ched byas rtogs pa yis// rdo rje 'dzin pa'i sa thob pa// rang sa mthar phyin yin mod kyang// mthar thug 'bras bu de la'ang med// zhen pas ma bcad don mi mthong// btsal bas lhun grub don mi rnyed// lhun gyis grub pa'i rang bzhin la// rig pa'i cho 'phrul snang zhes nas// ched byas rtogs pa'i long rtags te// gtsang sme blang dor gnyis 'dzin cing// mtshan ma don la spyod pa ni// mching bus gser la mtshon dang 'dra// bya med rdzogs pa'i rang bzhin la// ched byas rnam rtog log pa'i lam// rnam rtog don gyis gzung ba yin// rtsol bas 'khor ba'i 'dam du zin// rang 'dod 'bras bu mthar phyin kyang// lhun gyis grub pa'i 'bras bu min// ma bcos rdzogs chen gnyis med la// thabs dang shes rab rang bzhin gyis// gnyis med don la gnyis par gzung// gdod nas zin la bzod bsgrub med// grangs med don la grangs su gzung// rang byung don la rgyu yis bskyed// lhun grub don la rtsol bar byed// dmigs med don la dmigs par gzung// mtshan med don la mtshan mar bsgoms// bdag gzhan med la der 'dzin rtogs// thob pa rang las ma yin na// 'bras bu grangs bcas gzhan gsol zhing// re dogs bcas pa'i ting 'dzin gyis// ma btsal lhun grub don dang 'gal// sa bgrod mthar thug ngal ba'i rgyu// lhun gyis grub ba'i don dang 'gal// rang 'dod 'bras bu mthar thug kyang// lhun gyis grub pa'i 'bras bu min// dbyings nyid dag pa'i rang bzhin la// ye shes dag pa'i rang bzhin gsal// rgyu 'bras dag pa'i rang bzhin gyis// grangs 'das pa yi lhar snang ba// rig pa rang gsal 'od du 'bar// rim pas ma yin dus gcig gsal// 'di dag 'od kyi ting 'dzin te// rgyu 'bras dus gcig skyed snang ba// rgyu 'bras khyad par med pa dang// blo bur 'dra ba'i tshul gyur pas// gang gzung ba de log pa'i lam// rang gis thob bya mngon gyur kyang// gdod nas lhun grub 'bras bu min// 'di dag log pa'i grong khyer ba// med las yod pa'i tshul du snang// dung la ser por snang ba bzhin// 'khrul pas gnyis med don mi mthong// bim pa ra yi 'brus bzhin du// smin kyang 'bras bu mi 'byungs pas// rang sems gnyis med rtogs par gyis// ma bcos sems kyi rang bzhin la// rol ba'i byin rlabs cir snang ba// ma bkag bde chen ngang du 'dus// bkag pa med do de ltar yin// ma bcos sems kyi rang bzhin ni// rang rig 'od gsal phyogs ris med// ma btsal rig pa lhun gyis grub// rang gzhag rig pa phyogs med gsal// snang ba ma bcos dbyings na gnas// dran pa dbang sgyur zhi ba'i ngang// 'du 'bral med pa'i ngang la gnas/khyab par gsal la dngos gzhi med// phyogs med rig pa 'od ltar 'char// btsal med bde gshegs lhun gyis grub// ye shes gsal ba'i rang bzhin ni// brtag par dka' la brjod du med// ma bcos snang ba brtags pa min// ting 'dzin log pa'i lam pa yin// rol ba'i dus na cir yang rung// thugs rje'i yul la phyogs ris med// mdzad pa'i dus na lhun gyis grub// lta ba rang byung rdzogs pa'i lung// re dogs 'du shes rnam par bcad// 'du shes med pa'i rang bzhin gyis// yengs pa med do ci bde zhog/ spyod pa'i dus na blang dor med// dkyil 'khor lhun grub bskyed du med// dbang bskur rang byung lhun gyis rdzogs// rang bzhin lhun grub dam tshig la// bsrung dang mi bsrung 'du shes med// lhun gyis grub pa'i 'bras bu la// btsal zhing bsgrub pa kun dang bral// rang byung rol pa'i yo byad kyis// gdod nas rang byung mchod par gnas// bgrod med lam gyi rang bzhin ni// don gcig rtogs pas dus gcig phyin// dmigs pa med pa'i ting 'dzin ni// gsal la dmigs pa kun dang bral// btsal med 'phrin las rang bzhin ni// gdod nas rdzogs pas bya ba zin// ma bcos sems la bya btsal med// rang bzhin phyogs med khyab par bdal// chu la rkyen gyis bsgyur ba ltar// ma yengs yin no lhun gyis grub// bkag pa med do rang las gsal// rtsol bas don 'dod gang zag la// btsal bas 'dod pa grub par ston// lhun gyis grub pa'i rnal 'byor la// ji bzhin ma bcos grol bar ston// 'dod dang zhen pas bcings pa la// thugs rje byin rlabs de ltar ston// mtshan ma'i grangs la dga' ba la// sku gsum grangs dang mtshan ma ston// shes rab chen po'i gang zag la// bsam gyis mi khyab tshig tu ston// log rtog 'khrul pas 'dul ba la// log rtog zhen pa nyid du ston// rang bzhin lhun grub byin rlabs la// phyogs dang grangs la nges pa med// ji ltar bltas pas de ltar snang// gnyis med rig pa bsam mi khyab// mthong thos rtog pa kun dang bral// gdul bya'i don la phyogs ris med// dngos la rang gsal rnal ma lung// ma bcos gsang ba'i rang bzhin ni// gdod nas rdzogs pa chen por gnas// snang grags zhen brtags rang bzhin ni// bde chen lhun gyis grub par gnas// lhun grub ma bcos rdzogs chen la// btsal ba'i rnam pa ci snang yang// rang byung rdzogs chen rjes 'brangs nas// yangs dog bral ba'i don la rdzogs// gnyis pa med do bdag nyid lung// ngo bo bde mchog snying por gsal// snying po gdod nas rang byung sems// 'phel 'grib med pas gcig gi ngang// bcos pa med pas ci bder zhog khyung chen nam mkha' rtsal rdzogs ltar// g.yang sa med par lam du bde// bde mchog rol pa'i snang tshul ni// nam mkha' dang ni mnyam pa'i gnas// lhun grub rol pa cir yang snang// byang chub kyi sems mkha' mnyam klong gi rgyud chen po las// byang chub sems kyi snang tshul bstan pa'i le'u ste bcu bdun pa'o// 15// de nas gzhan yang bshad bya ba// dpal ldan nam mkha' rgyas pa yi// 'gro ba yang dag skyob pa'i tshul// 'di dag yang dag bshad par bya// rang gsal nyag gcig dri med las// thugs rje skyob pa'i yul dang bral// ma rtogs log pa'i sems can la// ji ltar mthun pa de ltar snang// rtogs ma rtogs kyi khyad par gyis// mthong tshul khyad par bsam mi khyab// thams cad rang byung snying po mchog/ bde mchog gsang ba'i dbyings su gnas// rang byung thig le dri ma spangs// thig le rdzogs pa gnyis su med// ma bcos gsang ba rig pa'i rten// 'du 'bral med par lhun gyis rdzogs// gsang ba'i rig pa mtha' dbus med// kun rdzogs 'od gsal chen po nyid// zhen rtags dri ma kun gyis dben// gsang ba'i yang gsang thig le'i ngang// spros bsdu med par gcig par gsal// kun kyang thig ler rdzogs pa'i ngang// thugs rje 'gro ba'i don mi byed// 'gro drug rang byung snying po la// rnam rtog mtshan 'dzin mi mnga' bas// rang byung gsang ba'i don la rdzogs// thogs med rig pa 'od gsal la// rang byung thugs rje phyogs ris med/ khyab par gnas so ye sangs rgyas// gsang ba'i thig le dbyings kyis brgyan// ye shes rdzogs pa mchog la bzhugs/ khyab bya yul can yul med pas// rang byung rdzogs pa nyid kyi sku// sdug bsngal zad pas bde klong 'khyil// sems su mnyam pas phyogs ris med// lhun gyis grub pas ma bsams rdzogs// ye shes gsang ba'i rang bzhin la// sangs rgyas sems can gnyis med pas// thugs rje khyab pa'i yul dang bral// rang byung snying po dri ma med// bsam dang sgrub pa ga la yod// thams cad rang byung dbyings la thug/ rang byung nyid pas gzhan dang bral// rang gsal nyid pas yul dang bral// rang gsal ye shes rgyu rkyen med// thig le nyid pas spro bsdu med// thams cad chos skur rdzogs pa'i phyin// mtshan ma tshig gi lam las 'das// chos nyid ngang la gnyis med pas// spros med thig le chen po'i ngang// rang rig 'od gsal thams cad mkhyen// thugs rje khyab pa'i yul las 'das// mtha' dbus mi mnga' cir mi dgongs// dran dang rig pa'i 'du shes med// chos sku ngang las 'gyur med pas// ma bcos thig le'i rdo rje yin// rang byung ngang las spros med pas// ye shes sku las spros med gsal// rang byung rig pa dngos med par// thams cad gcig pa'i chos kyi dbyings// 'byung 'jug mi mnga' gsang ba'i lam// sku dang gsung thugs rang bzhin dang// lus ngag yid gsum rang bzhin nyid// gdod nas byang chub chen por gcig/ spros bral chos dbyings mu mtha' med// rnam pa lhun grub byang chub sems// gzung 'dzin spros pa rnam par bcad// rang byung thogs med khyab par bdal// sgrib med dag pa'i nam mkha' ltar// 'gyur med klong du ye sangs rgyas// nyi ma'i snying po dag pa ltar// 'khor ba nyid na ye sangs rgyas// ma bcos rang byung rgyal po yis/ khyab par brdal la dngos po med// thams cad rang byung ye shes la// mtha' bral dbyings kyi 'du shes med// ye shes thig le nyi ma shar// chos sku snying po don la rdzogs/ khams gsum rang byung snying po la// thugs rje 'byung ba'i yul dang bral// rang byung thabs kyi spyod pa ni// ma zin pa yi chos rnams med// rang byung thugs rje kun la khyab// bskyab cing skye ba ga la yod// kun kyang bde chen zab mo bas// bde mchog mu mtha' med pa'i dbyings// rang byung bstan pa rgyun mi 'chad// ma byung bstan pa gcig la rdzogs// tshig dang yi ge kun bral yang// mtshan ma rtogs pa'i lam dang 'brel// sangs rgyas sems can gcig pa'i phyir// brtag cing mthong ba log pa'i lam// dus gsum sangs rgyas dgongs pa ni// rang byung thig le nyi ma shar// bdag 'dzin zhen pa mi mnga' yang// thugs rje byin rlabs 'dod dgur bsgyur// ye shes mu mtha' med par 'jug/ye shes khyab brdal kun tu bzang// rang byung thugs rje'i byin rlabs la// phyogs 'dzin log pa'i 'du shes kyis// thams cad rang byung snying po la// bdag dang byed pa dus su brtags// gnyis med bde mchog 'od gsal la// tha dad rdzas mthong 'khrul ba'i lam// rgyu rkyen bral ba'i rang byung la// rgyu rkyen skye 'gag dgag sgrub pa// sgro skur mtshan ma'i lam 'di dag/ bde mchog myu gu sreg par byed// rang rig dus gsum brtag 'dod cing// yul nyid 'khrul ba'i rmi lam 'dod// yul nyid logs na grub pa med// shes pa 'khrul pa nyid yin pas// ye shes nyid kyang de bzhin te// rtag pa'i mtha' nyid grub pa yin// gang zhig byis pa'i phyogs 'dzin pas// yod par smra zhing med par 'dod// sa rdo gser btub ma yin ltar// [}]snga phyi rang gi tshig gis gsal// cir yang ma yin stong chen po// mtha' bral gtan tshigs bzhis gshigs pas// ma grub mi gnas gzhig stong pa// chad pa dbu ma gnyis kyang mtha'// gnyis med don la gnyis par mthong// bzang ngan med la bzang ngan byas// gtsang sme med las gtsang smer bzung// zin pa'i ngang las rtsol ba med// ma nges pa yi don gnyis kyis// gnyis kyi nges pa gcig la sgrub// 'phra men nges med nges par gzung// brdzun pa'i don la bden par mthong// rang sems lhun grub chen po la// byin rlabs nges pa'i cha 'dzin cing// blang dor med pa'i rang bzhin la// blang dor rtog 'dzin gnyis su mthong// gnyis med ye shes chen po la// thabs dang shes rab gnyis 'byed cing/ched byas rnam rtog de nyid kyang// rang gis byas pa'i rtog pa las// mthong ba sgyu mkhan ri mo bzhin// rgyu 'bras dag pa'i chos dbyings la// dbyings ni dag pa rgyur lta la// ye shes dag pa 'bras bur lte// rgyu 'bras 'khrul ba'i lta ba mthong// la las gdug rtsub sreg pa mthong// la las sregs dang sgribs pa mthong// la las mi gtsang klung du mthong// la las bkol spyad gyen thur mthong// la las sa chu rgyu 'bras mthong// la las 'thab rtsod gdug par mthong// la las yid 'ong 'bar ba yi// rin chen 'bar ba nyid du mthong// dngos la ther zug ma yin kyang// thag pa la ni sprul bzhin no// dag pa dag la dag par snang// thams cad rang byung rig pa'i phyir// snying po rang byung rdzogs pa'i lung// snang srid sems su gtan la 'bebs// rnam rtog zhen pa mi mnga' bar// rang byung gsang ba'i lung du shes// ye shes 'od gsal rnam par dag/ bdag 'dzin zhen pa kun gyis stong// sems nyid rdzogs pa'i khyad par las// rol pa'i khyad par cir snang ba// rang las sprul zhing rang las 'du// thig le rig pa gcig la rdzogs// nges pa'i don la de ma thag/ ma bcos rig pa mchog gis rtogs// rnam rtog 'od gsal mkhyen pa'i thugs// ma bcos ji bzhin nyid kyis gsal// zab mo'i thig le gcig gi ngang// lhun gyis rdzogs pas dbye ba med// tshig tu ma yin don la rdzogs// tha ma zhen pa dag pa'i phyir// ye shes tshig spangs bde ba'i klong// snang srid mtshan ma ma lus pa// phyi nang med par sems su rtogs// tha dad ma yin gcig tu gnas// snang ba ma bkag dbyings la gsal// de dag tha dad ma yin te// rang byung rang gsal don las med// ma bcos bde mchog gsang ba'i lam// bdag gzhan med par nyid kyis rtogs// kun 'dus b+ha ga'i thig le'i klong// gzhan min bdag min rdzogs pa'i klong// gzhan med don kun bdag la rdzogs// rang byung 'khor lo rdzogs pa'i lam// spros med snying po don nyid du// dus gcig rtogs pas khyad par med// 'gro drug zhen pa'i sdug bsngal yang// rang byung rdzogs par shes pa'i phyir// zhen dang nyam nga'i 'du shes med// sangs rgyas sems can gcig pa la// log par mthong ba'i tshul gnyis kyis// thogs med dus nas rin chen bral// bdag 'dzin zhen pa'i lcags kyis bsdams// las dang nyon mongs gdos kyis gzung// gsal byed 'bar bas snang byas kyang// long bas ci yang mi mthong ltar// gdod nas gnyis med ye shes la// zhen rtogs log pas don mi mthong// 'dzin chags zhen pas 'khor lo yis// sdug bsngal 'bras bu rgyun mi 'chad// dngos med sems kyi khyad par la// log pa'i 'du shes bsam dbang gis// gang ltar brtag pa bzhin du snang// dngos la gnas pa ma yin pas// zhen pa stug la gnas pa yis// de dag ngo la snang ba yin// log pa'i dra ba sprin phung gis// rang gsal rig pa'i 'od la bsgribs// ye shes rdzogs lung dgongs pa la// rna brgyud gdams pa'i lung med na// rjes dpags lung dang gtan tshigs dang// zhen pa dman pa'i sgra tshig gis// rang brtags log pa'i 'du shes dang// bla ma rdo rje'i lung med par// gsang ba spros shing gsal byed cing// rang gsal rig pa'i 'od kyang nub// rdzogs chen theg pa'i don ma rtogs// mtshan ma sgra yi tshig la gnas// rang byung snying po'i don dang bral// rdo la gser du zhen pa ltar// 'khor ba'i mun pa'i khams su 'khyams// ma bcos gsang ba'i lam dang bral// long ba ngam grog snyoms dang mtshungs// 'di la bla ma gang bltos pa// gsang ba'i gdams ngag nub gyur nas// mun pa'i khams su 'khyam par 'gyur// dus ngan tha ma 'jig rten du// mos chung nyon mongs stobs drag pas// de tshe gang zag ma lus pa// 'khor ba'i rgya mtsho bsgrul ba'i phyir// rna brgyud sems nyid rdzogs pa'i lung// bde mchog gdams ngag thob pa yis// ma bskyod bde bar bzhag pas ni// rnam grol sa la 'gro bar 'gyur// skal med gdams ngag bral ba rnams// ngan 'gro log par 'khyam par 'gyur// byang chub kyi sems mkha' mnyam klong gi rgyud chen po las/ thugs rje 'gro ba skyabs tu med pa'i le'u ste bco brgyad pa'o// 16// de nas gzhan yang bshad bya ba// gang zag khyad par nyid ni bshad// rdo rje bla ma'i mtshan nyid ni// nges par yang dag brjod bar bya// brda don sprod pa'i slob dpon ni// rna brgyud dbang gis rgyud thob cing// dul dang gus dang snying rjer ldan// shes rab dam tshig lung ldan zhing// gdams ngag thob cing snod rig pa// gter 'chang snod kun gsal shes pa// bskal pa grangs med sngon rol nas// rdzogs chen don la sbyor sbyong ba// theg pa'i bye brag 'byed la mkhas// thugs rje 'gro ba sgrol la brtson/ khe dang grags pa mi gnyer zhing// gsang thub man ngag 'tsho mkhas pa// rna brgyud spyi blugs tshangs dbang thob// 'di ni bla ma'i rgyal po yin// bla ma ngan pa'i mtshan nyid ni// ngang thung dad dang dam tshig med// le lo gsang ba'i lung med cing/ khe dang grags pa gtsor 'jog cing// dregs dang phrag dog nga rgyal che// don med bslad pas 'chal ba'i tshig/ dbang dang gdams ngag mi ldan zhing// theg pa'i bye brag mi phyed dang// sbyangs pa'i shes rab med pa dang// rna brgyud gdams ngag mi ldan zhing// rang rtag log pa zhen pa yis// sgra dang tshad ma gtan tshigs dang// mtshan mar zhen pa'i sgra tshig gis// rdzogs chen sems kyi lung la spyod// log par zhen pa'i sgra tshig gis// gang ltar brjod pa log pa'i tshig/bdag nyid rtogs pa'i gdeng med par// gzhan bsgral gnyis ka ltung bar 'gyur// lung ldan bla ma des kyang ni// dus gsum rgyal ba'i gter lung la// rin chen mig dang mi ldan pas// mi chos 'brel ba gtsor gzung nas/khe dang grags pas spel byas nas// rdo rje khab tu lhung gyur nas// thar ba'i rigs dang gtan du bral// rang sems bla ma kun gyi bdag/ rang byung sems nyid rdzogs pa la// ma rten grub pa'i sangs rgyas med// dus gsum bla ma sems kyi ngang// de nyid ye shes rgyal po la// 'dod pa'i don kun re ba med// 'dod pa kun 'byung rin chen gter// sems nyid pa yi rang bzhin ni// rig pa sgra tshig mi mnga' bas// ji bzhin mnyam pa'i ngo bor ston// ji ltar chu la chu bzhin du// rang bzhag rig pa'i khyad par min// chos nyid rig pa mi 'gyur ba// rang byung rdzogs pa'i sems nyid ni// yon tan kun rdzogs rang bzhin ldan// ma bcos rig pa'i gdeng med na// tshig gi bla mas ci brjod kyang// rang rig ye shes mi ldan na// rnam par grol ba'i don mi 'byung// 'dod pa'i don kun lhun rdzogs pa'i// rin chen rdzogs pa'i rang bzhin dag/ rgyu las ma byung gdod nas dag/ rkyen gyis mi shigs 'gyur ba med// ye shes gnyis med rdzogs lung la// ma lus kun 'dus rnam par dag/ bcos pa med do ye sangs rgyas// bdag nyid yin no gzhan kun bcad// rin chen bla ma 'dod pa rdzogs// kun 'byung rin chen lta bu'i ngang// long ba u lu spra sha kas// dmigs su bral bas lam stor ltar// rang gsal rdzogs pa'i lung med na// thar pa'i lam dang kun tu bral// kun rdzogs dbyings la bcos pa med// rang bzhag rig pa'i sems rang bzhin// byang chub sems kyi rang bzhin ni/ khyad par gsal la dngos bzhi med// rang sems rgyal ba kun gyi dngos// gsang ba rang gi sems kyi lung// rig pa rang bzhag rdzogs lung ni// bsam gyis mi khyab dus na shes// slob ma ngan pa'i mtshan nyid ni// dad dang dam tshig mi ldan zhing// rdzas la chags sems che ba dang// blo chung gsar du zhugs pa dang// mos gus don du mi gnyer dang/ khe dang grags pa'i don byed dang// gus sems gdung med nga rgyal can/ khengs dang dregs pa'i spyod yul can// gsang ba spel bar byed pa dang// gdeng med spyod pa gnyer ba dang// chags ldang log pa'i nga rgyal can// 'di la gsang ba gtong pa dang// dam bca' gsang ba'i rgya ral na// na rag rdo rje gtan zhing ste// thar pa'i rigs ni ga la yod// rnam smin skye ba 'di la 'byung// dam can rdo rje mkha' 'gro'i tshogs// 'dus nas srog la 'bebs par 'gyur// slob ma rin chen sems rang bzhin// dad dang dam tshig ldan pa dang// rdzogs chen don la mos pa dang// shes rab 'byed pa'i don la brtson// gdams ngag don nyid thob gyur na// lus dang srog kyang mi 'phangs na// longs spyod 'du 'dzin smos ci dgos// rdo rje dam pa'i sems ldan zhing// mtsho chen gser gyi 'og gzhi ltar// mi 'gyur brtan pa'i sems kyis gzung// 'du 'bral med pa'i sems kyis brtan// yangs shing rgya che zab cing 'phra// snying rje che la 'phangs pa med// bsgo ba nyan cing gsang ba thub// rigs nges spyod dam dgon par sdod// mi chos 'brel ba'i ched mi byed// 'di la gsang ba bstan gyur na// rigs nges theg pa'i sras su 'gyur// gsang ba'i rig pa gter ldan yang// dam tshig ma ldan rdo rje ni// sprel ma g.yang du ltung ba zhin// bdag gzhan rdo rje khab tu 'gro// mgyogs 'gro so mtshams 'das pa'am// skyes bu thabs kyi brkyang bskum ltar// bar ma srid pa'i chos med par// ngan 'grau log par 'khyams par 'gyur// gsang ba phyal par gtong ba dang// sgro dang skur pas 'chad pa dang// rna brgyud gdams ngag bral ba dang// lta spyod 'brel ba'i don med par// rdo rje bla ma de dag ni// na rag rdo rje'i khams su lhung// gang zhig gsang ba nyams ldan pa// rang gsal rig pa'i don ldan zhing// lta spyod 'brel ba'i gdeng ldan pa// rnam grol sa la 'gro bar 'gyur// rigs nges skyes bu skal ldan bu// rgya sras gcig las ma gtogs pa// mang yang gsum las 'di mi gtad// nges par rig pa gcig la'o// skal ldan 'bad ba med par grol// sgo nga'i nang gi khyung phrug ltar// 'khor ba nyid na sangs rgyas sa// gcong rong sdug bsngal bde mchog lam// bde chen rtsol bral lhun rdzogs pa// ma bgrod rim med dus gcig gnan// dman pa'i blo spangs khyad par blo// kun grol 'bad med bde mchog dbyings// bdag nyid ma bcos thabs kyi lam// rdo rje dus dang tshig gi sprad// bde mchog gsang ba ngo mtshar che// rgyal thabs spyi blugs tshangs pa'i dbang// rim pa med par dus gcig smin// thig le rgyu rkyen med par gsal// ma bslad bzhag pa'i thabs kyis go/ 'di ni thabs rgyal rin chen te// rtsol dang bral ba'i dngos grub ste// rdo rje gdams pa'i lung gis shes/ rdo rje gang zag mtshan nyid yin// byang chub kyi sems mkha' mnyam klong gi rgyud chen po las// skal ldan 'bad pa med par grol bar bstan pa'i le'u ste bcu dgu pa'o// 17// de nas gzhan yang bshad bya ba// 'jug pa'i tshul dag khyad par dag/ nges par yang dag bshad par bya// 'byung 'jug med pa'i mtshan nyid dang// ci yang yin no gang yang rung// thams cad lhun gyis grub par gnas// thams cad ye shes mchog gi ngang// rang byung ma bcos gsang ba'i lam// brjod med tshig gi yul mi 'jug/ 'byung 'jug mi mda' thig ler gcig/ rang byung mchog gi dkyil 'khor la// zhen pa'i brtsol bas 'jug tu med// chos kyi dbyings la yul med pas// rtog spyod bsam yul kun las 'das// ye shes phyogs dang yul med pas// bsam pa'i ting 'dzin 'jug tu med// byang chub sems la bgrod med pas// sa bgrod lam la 'jug tu med// nam mkha' lta bu'i chos nyid la// bgrod pas phyin par ga la 'gyur// rtsol bral lhun gyis grub pa la// rtsol med shes pa ci mi 'jug/ lta ba yul med rang gsal la// lta ba'i 'du shes 'jug tu med// spyod yul sems su lhun grub pas// spyod yul spyad pas 'jug tu med// bsrung bral rig pa'i dam tshig la// bsrung ba'i 'du shes kun dang bral// dbang bskur bral ba'i klong nyid la// dbang bskur rtsol ba kun dang bral// rang gsal rang byung dkyil 'khor la// rtsol ba'i rnam grangs 'jug tu med// lhun gyis grub pa'i rang bzhin la// ched bsgrub mtshan rtog yul las 'das// lhun gyis grub pa'i 'phrin las la// ched du byas pa'i 'phrin las med// rang bzhin lhun gyis grub pa la// rnam grangs mang po rtsol ba yis// ji ltar btsal kyang log pa'i lam// srin bu dar gyis bcings bzhin no// 'gro drug khams gsum sems can la// rang byung 'od kyis khyab par gnas// ji ltar rang bzhin gcig pa la// nus pa'i stob kyis so sor snang// ji ltar 'dul ba'i khyad par gyis// rig pa'i brda don so sor sprad// ji ltar mos pa bzhin du bstan// don la gcig tu mnyam par gnas// gcig ste rnam pa yongs su med// 'di ltar rtogs pa'i rang bzhin gyis// ji ltar spyod pa de ltar yin// bsgom med rig pa'i chos dbyings la// sgom pa'i 'du shes rtag tu med// byang chub sems su kun mnyam pas/ khyad med rang gsal nyag gcig la// ji ltar snang yang nyam nga med// bsam bral rig pa'i dbyings la gnas// su zhig thugs kyi khyad par las// gang ltar gsal yang dbyings la 'jug/ ji ltar spyad kyang nges par stong// rang byung gnyis med dgongs pa la// ma yengs mnyam pa'i sems kyis gnas// dus gsum chos dbyings bde chen la// ji ltar snang ba rtog dbang bskur// thig le cig tu bzlums pa na// gcig don shes pas kun don shes// goms pas 'byung 'jug khyad par med// nyams myong re dogs bsam pa bcad// rgyu ba med pas bags kyis bzhag/ mtha' bral 'du shes kun gyis dben// byar med byas zin lhun grub pas// bkag pa med do bag yangs yin// theg pa'i rnam grangs gral bsnyams pa// sems nyid rdzogs pa'i theg par 'dus// ci yang yin no gang yang rung// bsam pa'i dbang la ngais pa med// dngos la kun yin gang yang min// ji ltar snang ba'i ngo bo la// ma tsal rang bzhin gzhag na bde// lhun grub gsum la goms pa yis// glang chen ma bskyod bzhin bzhag na// ye shes klong gsal dbyings su thim// rtsol med lhun rdzogs bde ba'i ngang// gdod nas lhun rdzogs bde ba che// ma bcos rang bzhin rdzogs pa'i phyir// ma btsal rang bzhin gzhag pas rtogs// du ma rigs kyi rtog pa dag/ sgo rnams kun tu rgyu ba ste// ma bkag rig pa dbyings la rdzogs// gnyid med gsal bar bar chad med// mtha' dbus kun bral de bzhin nyid// rang byung ye shes rdzogs pa'i klong// thig le gcig gi khyad par gnas// byang chub sems kyi ngo bo ni// dmigs med bsam pa'i rgyu ba bcad// rang bzhag dgongs pa gnas par bya// tha mal zhen pa ma ldog na// rang gsal rig pas kun khyab kyang// bag chags sgrib pa'i ngo bo yin// ma mthong 'khor bar 'khyams pa yin// ye shes snying po rang rdzogs la// rdo rje gsang ba'i tshig gis mtshon// nges pa rnyed nas rang gzhag blos// zhen pa'i dri ma rnam par bcad// byang chub kyi sems mkha' mnyam klong gi rgyud chen po las// bde mchog 'jug pa'i lam gyi khyad par bstan pa'i le'u ste nyi shu pa'o// 18// de nas gzhan yang bshad bya ba// dgag sgrub rig pa tha dad nyid// thams cad rang byung rdzogs pa'i phyir// thig le gcig las g.yos pa med// dgag pa med cing sgrub pa med// zhen pa med cing brtags pa med// snang ba med cing bsam pa med// bdag gzhan 'du shes kun bral bas// ye shes rang byung dgongs pas gnas// sgo drug mtshan ma ci byung yang// rang bzhin rig pa'i sems kyis gzhag/mtshan ma'i byung tsho'i bde mchog sems// ngo mtshar rang rig byang chub sems// gnyis med ye shes klong du 'khyil// thig le rdzogs pa'i rang bzhin gyis// rang byung g.yo med sems kyis blta// rang byung snying po rdzogs pa'i lung// snying po'i don ni de ma thag/ byed pa med pa'i man ngag ste// dgag sgrub dbye ba kun dang bral// bsam gzhag mi bya rang bzhin gzhag/ lus sems ngag gi bya btsal med// dga' brod chags sdang kun bral bas// rang byung don la ji bzhin du// g.yo bral rig pa mngon sum la// bcos med snying po don la gsal// sangs rgyas sems// can gnyis med cing// nyon mongs ye shes dgag sgrub med// thugs rje byin rlabs rmad po che// gsang ba'i thig le 'du 'phro med// sems dang sems las byung ba kun// rang byung rig pa 'od du 'bar// drod dang rtags la mi rten te// rang byung rdzogs pa'i cho 'phrul yin// ma bcos rang bzhin ngang la 'byung// ma byung ma btsal 'gog pa med// thogs med bsam pa kun dang bral// rnam par mi rtog cir mi bsam// stong 'dzin rig pa ma rabs sems ma btsal rig pa'i bsam pa zad// de dag byang chub sems nyid la// bsam pa'i 'du shes kun gyis stong// mi spong mi 'gegs mi spyong zhing// dgag sgrub btsal ba kun gyis stong// ji ltar snang ba de ltar yin// dran 'byung 'du shes mi mnga' bas// ma btsal ma bsgrubs ji bzhin nyid// snying po'i klong la gnyis med pas// dgag sgrub lta ba log pa'i lam// mtshan ma'i 'du shes cir yang snang// kun gyi snying por rdzogs pa yin// thig le dbyings la g.yo ba med// nyon mongs rang byung snying por gsal// de la phyogs bral dgag tu med// ye shes rang byung rdzogs pa'i lam// ma bsgrubs rang bzhin lhun gyis grub// 'byed ba med pa'i ngo bo las// ji ltar snang yang ngo bo stong// gleng bral rang byung rdzogs pa las// 'byed med thabs dang ldan pa yis// rig pa rang bzhin gzhag pas na// skyon yon rig pa lhun rdzogs pas// ma btsal rig bzhin thabs dang ldan// rang byung yin pas dgag tu'ang med// lhun gyis rdzogs pas sgrub tu'ang med// ma btsal ma bsgrubs phyogs med khyab// rig pa rdzogs pa'i dkyil 'khor ni// yengs pa med par re dogs bcad// rang byung rig pa'i rgyu ba kun// ma yengs mnyam pa'i sems kyis blta// stong nyid kun ldan nga rgyal gyis// ma bsgribs rang bzhin gsal bar gnas// bying rgod 'gags 'brangs tshol mi tshol// spro bsdu re dogs g.yeng chags 'dzin// ched bya shugs 'byung la sogs pa// rang byung rdzogs par gcig par blta// thig le gcig par kun rdzogs pas// spong len bsam pa rang bzhin zhing// gang tshe byis pa'i rang bzhin gyis// gang de nga la spong ba dang// rang byung nyid la dgag pa dang// rdzogs chen ngang la che chung dang// gcig gi ngang la gnyis su spyod// bde chen ngang las blang dor byas// gnyis med smra zhing gnyis su 'dod// dbyings gcig ngang la rgyu 'bras 'dod// de dag spong len dgag sgrub pa// bde ba chen po'i srog dang bral// rang byung bde mchog don las nyams// rtsol ba'i chu bo 'dam du zin// 'khor ba'i chu bo brgyud byas nas// btsal med lhun grub don dang 'gal// dmigs med mtshan ma'i log pas bsgribs// drang don 'jig rten 'khor bar ltung// rang gsal nyag gcig dri med la// dngos 'dzin bsam pa zhen dbang gis/ khams gsum 'khor ba gcong rong du// 'du byed bsam pa'i mtha' yis ltung// bya byed g.yeng ba mi gnas pas// bde mchog rig pa'i ngang du gsal// rtsol ba'i rnam grangs ci skyes pa// rang byung g.yo med bsam pa yis// zhen med bya bral 'du shes med// dgongs pa ma mthong thig le'i klong// rjes dpags rig pa ci yang min// thogs med shes rab rang rig lung// rang rig 'brel bas rjes su dpags// ma bcos gsang ba rang rig sems// thig le gcig la rdzogs par gnas// ye nas rdzogs so rang bzhin med// snying po rang byung gsang ba ni// dgongs pas rang bzhag rnal ma'i ngang// ji bzhin ma bcos rang bzhag na// rang bzhag 'khor lo ye gnas pas// btsal med rang bzhin bsam mthar phyin// rang gzhag grub pa'i 'bras bu 'byung// gdul bya'i mos pa tha dad la// ji ltar 'dul ba de ltar snang// brgyud pa'i thabs kyis khyad par du// rang bzhin ma mthong me long ltar// drang ba'i thabs su bstan par zad// rang byung rig pa'i brda phrad nas// mtshan ma'i sgra tshig rjes mi 'brang// rang bzhag 'khor lo ye gnas pas// btsal med rang bzhin bsam mthar phyin// rtsa ba sems nyid rdzogs pa'i phyir// thig le'i lung la dbye ba med// sku gsum rig par lhun rdzogs pas// gzhan du rtsol ba'i 'du shes spangs// rang byung rdzogs pa'i snying po la// brtags pa'i mun pa ye dag pas// rang byung rig pa'i yon tan la// nyon mongs rnam rtog dgag tu'ang med// byang chub kyi sems mkha' mnyam klong gi rgyud chen po las/ rdzogs pa chen po la dgag sgrub med par bstan pa'i le'u ste nyi shu gcig pa'o// 19// de nas gzhan yang bshad bya ba// spyod pa bde mchog btsal bral ba// rnam rtog rtsol bas ci btsal ba// rang byung rig pa'i don las nyams// brkam chags rang gi sreg ma spongs// rang byung bde chen don dang 'gal// stong nyid nam mkha'i ngo bo la// lus ngag sems kyi bya btsal gyis// brkam chags 'dod pa skye zhes nas// spangs pas bde chen don dang 'gal// a ti yo ga bde chen ni// spang du med pa byang chub sems// rdzogs chen spong bar byed pa ni// nyan thos dag tu gol bar bshad// skye 'gag med pa'i chos nyid la// rgyu rkyen rten 'brel rim pa yis// rang byung chos la dgag sgrub med// a ti yo ga bde chen ni// dgag sgrub bral ba'i byang chub sems// rdzogs chen dgag sgrub byed pa ni// rang rgyal dag tu gol bar bshad// ma bcos rang byung sems nyid la// sa dang phal rol phyin bcu la// grangs med bskal pa gsum gyi bar// sbyangs pas 'bras bu 'grub par 'dod// a ti yo ga bde chen ni// spangs thob med pa'i byung chub sems// rdzogs chen sbyongs par byed pa ni// mdo sde dag tu gol bar bshad// phyi nang med pa'i dbyings gcig la// dam tshig ye shes phyi nang gis// gzung 'dzin dag pa rnam gsum gyis// bsgrubs pas 'bras bu thob pa ltar// a ti yo ga bde chen ni// gzung 'dzin dag pa'i byang chub sems// rdzogs chen gzung 'dzin byed pa ni// bya ba'i rgyud du gol bar bshad// gnyis su med pa'i ngo bo la// gnyis 'dzin lta spyod khyad par gyis// kri yar spyod cing yo gar sgrub// rang gi 'bras bu grub par 'dod// a ti yo ga bde chen ni// gnyis su med pa'i byang chub sems// rdzogs chen gnyis su 'byed pa ni// u pa ya ru gol bar bshad// chos sku kun bzangs bde chen ni// byin rlabs ting 'dzin gtsor byas nas// blang dor bcas pa'i rang bzhin gyis// stug po bkod pa thob par 'dod// a ti yo ga bde chen ni// blang dor med pa'i byang chub sems// rdzogs chen blang dor byed pa ni// rnal 'byor rgyud du gol bar bshad// rtsol bral lhun gyis grub pa la// ye nas yin la bzod bsgrubs rtsol// thabs dang shes rab rang bzhin gyis// rigs lnga'i 'bras bu thob par 'dod// a ti yo ga bde chen ni// rtsol sgrub 'das pa'i byang chub sems// rdzogs chen rtsol sgrub byed pa ni// ma hA yo gar gol bar bshad// rang byung rgyu rkyen bral ba la// dbyings dang ye shes rgyu 'bras gyis// lha dag grangs med der snang nas// 'bras bu bla med thob par 'dod// a ti yo ga bde chen ni// rgyu 'bras 'das pa'i byang chub sems// rdzogs chen rgyu 'bras 'byed pa ni// a nu yo gar gol bar bshad// rtsol sgrub 'das pa'i bde chen ni// rang rig nyid pas yul dang bral// rang las byung bas spang du med// bdag nyid snang bas dgag sgrub med// gdod nas dag pas sbyang mi dgos// dbyings su gcig pas gzung 'dzin med// sems su gcig pas gnyis snang bral// kun bzang rol pas blang dor med// lhun gyis grub pas rtsol sgrub med// rang byung ngang la rgyu 'bras 'das// rang byung rdzogs pa'i snying po la// gdod nas rdzogs pas rang bzhin med// yon tan mtsho rlabs tshul du snang// thugs rjes 'gro 'ong med par brdal// tshad las 'das pa'i sku gsung thugs// rig pa'i gter chen tshang ba'i zhal// ma btsal lhun gyis grub par gnas// ma byas rang byung rdzogs pa'i gter// ma btsal ji bzhin nyid du gnas// 'dod pa'i sems la gang mthong tshor// rang byung rig pa'i 'od du thim// rang byung sems las mi g.yo na// spyod pa ci la'ang thogs pa med// rang byung rdzogs pa'i spyod pa ni// nam mkha' la bcos sems ldan pas// ji ltar spyad kyang nges par stong// mkha' la khyung 'phur ji bzhin no// byang chub kyi sems mkha' mnyam klong gi rgyud chen po las// spyod pa'i khyad par bstan pa'i le'u ste nyi shu gnyis pa'o// 10// de nas gzhan yang bshad bya ba// rdo rje bsrung bral dam tshig ni// mkha' mnyam rang byung chen po ltar// 'da' med rang bzhin rig pa'i klong// 'da' med dam tshig chen po las// 'das na rdo rjer ltung par 'gyur// thams cad rang sems rdzogs pa'i phyir// bsrung bral phyogs med cing yang min// 'da' ba med pas bsrung ba'ang med// phyogs gcig bral bas phyogs kun bral// gang zhig bsrung ba'i mtshams gzung nas// bsrung bral don la srung bar byed// rang byung rig pa'i dam tshig ni// 'da' ba med cing bsrung ba'ang med// ma bcos 'gyur med dam tshig la// bcos pa'i dam tshig phyin ci log/ rang byung rdzogs pa'i dam tshig ni// 'dul ba'i dbang gis tshul khrims dang// dam tshig sdom pa mtha' yas pa// 'dul ba'i dbang gis don la rdzogs// gcig la gnyis su bsrung ba dang// gzung 'dzin nyid du bsrung ba dang// grangs med pa la grangs su bsrung// phyogs med don la phyogs 'dzin byed// mi mkhas log pa'i 'jig rten pas// gang ltar bsrung ba rtog pa'i grangs// ma bsrungs don la nyams pa med// gdod nas rdzogs pas bsrung ba med// gang yang bsrung dang mi bsrung zhes// phyogs med rang byung rdzogs pa'i klong// thams cad dor ba med pa'i phyir// kun kyang bde chen mchog tu bsrung// ched byas 'dzin rtog goms pa'i nad// btsal zhing spyad cing goms pa'i nad// bsrung bral rig pa'i dam tshig la// phyogs dang rgya yongs ma chad pa'i// nam mkha' lta bur khyab bdal te// bsrung dang mi bsrung tha snyad bcad// rang gsal gnyan bral snying po lung// ma brjod go bas rgyal ba'i gsung// ma bsrungs thub pa'i ngo mtshar can/ khams gsum sku gsum rig pa la// phyogs ris nges pa'i chos ma yin// gang ltar ci yang ma yin pas// bsam spyad bral ba'i dam pa la// rtsol bas 'das pas tshig par 'gyur// 'di dag phyogs med dam tshig ste// phyogs bcas rnams kyi yul ma yin// ma bcos rtsol bral dam tshig ni// bcos ma'i rtsol ba'i yul ma yin// gcig ste snying po rdzogs pa'i lung// rnam pa'i khyad par ji lta ba// ma 'dres snying po'i don la rdzogs// don du ye shes rdzogs par gsal// rang byung rgyu bral thig le'i klong// snying po gcig la kun rdzogs pas// bsrung sdom dam tshig rang bzhin tshang// tha dad dbye ba mi gnas kyang// rtsol bral rig pa'i khyad par las// bsrung ba'i rnam rtog kun gyis stong// gdod nas 'da' med rang bzhin la// ma yengs gnas pas bsrungs ba zin// gdod nas dam par ye gnas pas// nyon mongs rtog pa gdod nas tshig/lhun grub ngang la rtsol ba med// zin pas bsrung ba bya mi dgos// lhun grub ngang las 'da' med pas// lhun gyis grub pa'i dam tshig yin// byang chub kyi sems mkha' mnyam klong gi rgyud chen po las/bsrung med dam tshig gi khyad par bstan pa'i le'u ste nyi shu gsum pa'o// 11// de nas gzhan yang bshad bya ba// thos bsam bsgom pa'i shes rab kyis// rang byung rig pa sbyang med kyang// yongs rdzogs gsal bas ngo mtshar 'byung// brjod bral gsang ba'i chos nyid dag/ sgra dang gtan tshigs yul yin te// rtog spyod yul du ma gyur pas// tshig dang yi ge'i yul las 'das// brjod bral rang rig gsang ba'i nyams// thos med brjod bral rig pa'i gter// 'jig rten log par gol ba dang// mtshan ma sgra la zhugs pa dang// rna brgyud gdams ngag mi ldan la// bshad dang nyan pa gnyis ka ltung// brjod bral chos kyi dbyings nyid dag/ brjod med mtshon ba'i yul nyid min// 'khor ba'i gzeb kyis bcings gyur ba// brjod med brjod pas don de rtogs// rang byung sems nyid gsal ba la// brjod dang brjod bral tha dad min// rang byung rdzogs pa'i klong ldan na// gang ltar brjod pa brjod bral yin// tha dad rig pa mi gnas kyang// de ltar rtogs pa'i gang zag la// gnyis med gtan la phab pa yis// rang byung thig le gsal bar 'gyur// bsam du med pa'i chos nyid la// bsam pa'i rtog pa gol ba'i lam// spyad med ye shes rdzogs pa la// dus gsum rgyal ba'ang spyad mi mdzad// dus gsum rgyal ba'i dgongs pa yang// rtog spyod 'du shes bral las byung// brtags cing spyad pa'i yul med de// rang byung gsang ba'i klong yin pas// bsam spyod rtog pa mtha' yi lam// mtha' spangs dbus ma'ang de bzhin no// rang byung rdzogs pa'i sgra ldan la// lung rigs man ngag gtan tshigs kyis/ khyad par 'phags pa'i don go na// mi 'gyur gdeng la klong du rtogs// rtogs pa'i ngo la gnyis med na// gnyis su 'dzin pa log pa'i chos// ma bshad ma brtags rang zhi ba// bsam pa'i 'du shes mi gnas pa// bsam pa'i rang bzhin gsal ba'i sems// rang la spyod cing rang la sems// don gcig rtogs pas kun rtogs te// gcig mthong kun mthong thams cad gsal// rang byung rdzogs par ngo shes nas// de min gnyis pa'i chos mi gnas// thun mong theg pa ma lus pa// bsam spyad skar ma lta bu la// med kyang log par shes pa'i mthus// gcong rong mun pa'i khams su ltung// bsgom du med pa'i sems nyid la// bsgom pas rnyed par ga la 'gyur// ma bskyod rang gzhag rig pa'i sems// ma btsal nyid kyis gsal ba yin// snang med lhun grub sems nyid ni// gsal bar bzhag pas lhun grub 'byung// 'du shes bsams pas ma bzung zhing// nyams myong rjes 'brangs rnam rtog bcad// bsam pa med cing mi bsam med// spros med thig le chen po la// goms pas g.yeng ba rnam par bcad// bsgom du med pa'i chos dbyings la// bsgoms kyang skyon med nam mkha' 'dra// dri med rang byung bsam gtan ni// rang byung ci dgar gzhag pas 'grub// rang byung rdzogs pa'i sgom pa la// sna tshogs rtog pa'i sems byung na// rdzogs pa sems kyi ngo bor blta// 'byung 'jug rig pa cir mi bsam// de ni sgom pa nyid du bshad// byang chub kyi sems mkha' mnyam klong gi rgyud chen po las// shes rab kyis sbyang du med pa'i le'u ste nyi shu bzhi pa'o// 12// de nas gzhan yang bshad bya ba// mthar phyin gsang ba'i man ngag ni// rgyu mthar phyin te bsgrub tu med// man ngag mthar phyin btsal du med// 'bras bu mthar phyin gdod nas rdzogs// yongs rdzogs gsang ba'i rgyud nyid ni// gdod nas mthar phyin btsal du med// rgyu 'bras gdod nas lhun rdzogs pas// yongs rdzogs rgyu ni lhun grub nyid// ma bcos yongs su rdzogs pa la// gsal byed rgyu yis mnyam sbyar nas// gter khyim phung po snang byed ltar// lhun gyis grub pa'i yon tan ltar// 'khor ba ma bcos lhun grub la// brtags pa'i bag chags blo bur ba// sdug bsngal bde la log 'khrul te// dung la ser por mthong ba bzhin// 'di la skye 'gag gnas pa med// rang byung sems nyid khyad par las// 'dod pa'i don kun re ba med// btsal med gnag pas mngon sangs rgyas// rang rig mthong las gzhan min no// gzhan rtog skyes pa'i rgyu 'bras kyis// mtha' bral nam mkha' lta bu la// rtsol chags zhen pa'i 'du shes kyis// bgrod pas thob par ga la 'gyur// sgra bral ma bcos gsang ba'i don// sgra nyid kyis ni gsal bar bstan// gang la dga' ba nyid kyis de// gzhan du bstan par ma bsrungs so// lteng chung gsal ba'i rnal 'byor pas// mi 'gro rang bzhag gnas pa'i lung// mi g.yo mchog gi rnal 'byor pas// bla mas nges par bstan par bya// tha ma'i dus dang thog ma'i dus// dus gsum rig pa mnyam du blta// dus gsum bzhi 'dzin man ngag ste// bla ma nyid la 'dud par bya// brda don sprad pa'i dus su ni// btsal med gnas pa'i man ngag sbyin// ye shes rol ba'i rang snang la// bla ma'i zhal las shes par bya// ji bzhin chu ltar gzhag pa yis// de ma thag tu gnas par 'gyur// rin chen sprad pa'i cho ga ste// rna brgyud gdams ngag nod par bya// dus tshod rnam pa 'du shes kun// 'bab chu lta bur dbang sgyur na// rang byung thug phrad nyid du 'gyur// nges pa'i drod tshad zhal nas 'byung// 'phrul gyi me long lta ba 'am// shel gyi tshon rkyen phrad pa ltar// gnas skabs gang dang mthun pa yi// man ngag lung gis gtan la dbab// ji ltar gnas pa de bltas la// gang la dmigs pa bzhin la gzhag/ de yi drod tshad gang yin pa// nges pa nyid du bstan par bya// nges pa'i don la mi 'gyur na// gdeng du 'gyur ba'i drod yin te// dang po chu drag 'bab pa'am// cang shes shugs kyis dkrugs pa lam// mkha' la gnam lcags 'byings ba bzhin// gnyis pa dal ba'i chu bzhin te// rkyen gyis ji ltar bsgyur ba ltar// gsum pa la ni mi g.yo ba// rgya mtsho gting ltar gnas pa'o// bzhi pa nam mkha' klong yangs 'dra// drod tshad gang yang mi 'phro ba'o// dmigs pa yan lag mi 'jug pa'o// byung tshor ma bkag rang zhi ba'o// mdor na ma yengs mi 'jug pa'o// ma bsags gdod nas lhun grub pas// btsal zhing bsgrubs pa'i 'bras bu yin// rgyu rkyen med par rang byung bas// bskyed cing smin pa'i 'bras bu min// 'dod 'byung nor bu rin chen ltar// lhun gyis grub pa'i 'bras bu min// ma btsal lhun grub 'bras bu yin// ma bcos gdod nas dag pa yin// byang chub kyi sems mkha' mnyam klong gi rgyud chen po las// mthar phyin pa'i man ngag bstan pa'i le'u ste nyi shu lnga pa'o//// de nas bcom ldan 'das kyis 'khor mang po la bstan pa dam pa 'di gtad pa'i phyir// 'di skad ces bka' stsal to// kye ma ho 'dus pa'i ngo mtshar rnams// rdzogs chen bstan pa bstan pa'i mdzod// rang byung rig pa gcig pa'i lung// tshig gcig don kun rdzogs pa'i mdzod// sems nyid rdzogs pa'i rang bzhin la// dgu lung brgyud pa'i sems kyi gter// rang la rdzogs pas gzhan gyis gsal// 'phrul gyi me longs dgu bskor ltar// gang du gsal yang dbyings la rdzogs// rang la chad cing rang la ston// ston pa gnas dus 'khor bstan pa// rang byung sems nyid rdzogs pa'i klong// gsang mdzod rig pa thugs la gsal// brgyud pa bya bral logs pa'i lung// rdo rje sems dpa' dgongs pa'i mdzod// sgro 'dogs skur 'debs rnam par gcod// rdo rje sems dpa' de bzhin gshegs// mkha' mnyam klong la mnyam sbyor bas// 'gro ba rang byung snying po'i mdzod// thugs rjes mdzad pa 'dod dgur bsgyur// bstan pa'i me long sems kyi gter// theg pa'i yang rtse lung gi bcud// nam mkha' dang ni mnyam pa'i rgyud// gsang ba kun 'dus rig pa'i klong// ye shes 'od gsal chen po 'di// dad dang dam tshig ldan pa yis// grags pa'i chos brgyad rnam spangs pa// lus dang srog la mi blta ba'i// rgyal tshab nges pa gcig la gtad// ces gsungs so// byang chub kyi sems mkha' mnyam klong gi rgyud chen po las/ rgyud gtad pa'i le'u ste nyi shu drug pa'o//// byang chub kyi sems rdzogs pa chen po/ rdo rje sems dpa' mkha' mnyam klong gi rgyud ces bya ba rdzogs so//// 'da' he na yi 'du khang du// sprul pa'i sku shri sing ha dang// dge slong be ro tsa na yis// rgyud 'di legs par bsgyur byas pas// mtha' yas sems can thams cad kun// rang grol bde ba thob par shog/ rgyud kyi rgyal po chen po mkha' mnyam klong gi rgyud 'di/ rgyud kyi man ngag yin te/

CLOSE WINDOW