CLOSE WINDOW

Gpb034.015
བོད་ཡིག

/// u u u rak+shi ka i tu u Tu//// rgya gar skad du/ badzra sa twa/ kha se mahA rA dza puSh+ti tan+t+ra/ bod skad du// rdo rje sems dpa' nam mkha'i che rgyal po rgyas pa'i rgyud/ bcom ldan 'das dpal kun tu bzang po bde ba chen po la phyag 'tshal lo// 'di skad bdag gis thos pa'i dus gcig na/ bcom ldan 'das de bzhin gshegs pa yang dag par rdzogs pa'i sangs rgyas kun tu bzang pos bsam gyis mi khyab pa'i ting nge 'dzin la snyoms par zhugs so// 'og min gnas mchog khyad par can// chos kyi dbyings kyi pho brang gi/ ye shes sgrib med gzhal yas na// nyid kyi rang bzhin chos sku dang// nyid kyi ngo bo longs sku dang// nyid kyi thugs rje sprul sku dang// rdo rje sems dpa' la sogs pa// 'byed pa med pa'i 'khor rnams dang// thig le chen po gcig tu bzhugs// de nas rdo rje sems dpas zhus pa/ ston pa'i ston pa kun tu bzang po lags// ston pa nyid kyang thig le sbros pa med// bstan pa kun kyang thig le spros pa med// dus dang gnas kyang thig le spros pa med// thams cad kun kyang thig le spros med na// ston pa'i ston pas ci zhig ston par mdzad// 'khor du 'khod pa'i 'khor ni ci la 'khor// 'khor la ston pa ci zhig ston par byed// dus dang gnas ni gcig pa ji lta bu// zhes zhus pas// rdo rje sems dpa' la sogs kyi/ khyad par gyur pa'i 'khor rnams la// bcom ldan 'das kyi ljags rtse yis// gsang ba 'di ni rab tu bsgrags// 'di ni gsang ba thams cad kyi// gsang chen rab tu nges pa yin// kun tu bzang po nga nyid ni// ston pa dang ni bstan pa dang// 'khor dang dus dang gnas dang ni// nga las byung ba'i thig le ste// nga yi rang bzhin thig le yin// thig le ye nas spros pa med// snying po ma spros thig le yin// kun las khyad par gyur pa yi// che ba'i yon tan rdzogs pa'i mchog/ chos rnams kun gyi de bzhin nyid// mchog gi snying pos thugs brgyud pa/ khyad par 'khor gyis de bzhin 'dzin// yang dag don gyi snying po ni// gang nas btsal yang mi rnyed de// rang rig sgrib med dag pa yin// de la rtag 'grus goms pa ni// bsnyen pa dam pa de yin te// de ni ma nor lam yin par// kun tu bzang pos rab tu bsngags// 'gro ba'i sdug bsngal byang chub sems// kun tu chub pas rnam par rol// de la skyod pa med bzhin du// nam mkha'i mtha' ltar mnyam par gnas// mkha' 'dra skyon med rang rig 'di// mi shigs rdo rje'i snying po ste// mi 'bral mchog gi snying po yin// gleng bral 'di la gang nags pa// rdo rje snying po sra ba'i mchog/ rdo rje ye shes dkyil 'khor ldan// rnal 'byor de ni skal ba bzang// sangs rgyas kun dang mnyam 'gyur ba'i// rnam pa kun ldan mchog gi sku// gang yang 'byed pa med pa yi// chos skus kun tu khyab pa'i phyir// rang bzhin lhun grub yul la rol// mthong thos reg dang dran pa yis// sdig pa kun las rnam par grol// gdod nas rnam dag grol ba'i lam// 'gro ba kun la rang bzhin gnas// phyin ci log tu rnam brtags kyang// grol ba rang byung gzhan las min// yang dag don gyi snying po 'di// thams cad mkhyen pa'i ye shes kyis// bya byed med par lhun gyis grub// 'bras bu kun tu bzang po'i sku// zhes gsungs so// rdo rje sems dpa' nam mkha' che rgyal po rgyas pa'i rgyud las// gleng gzhi'i le'u ste dang po'o//// de nas bcom ldan 'das kyis rdo rje snying po'i ting nge 'dzin la snyoms par zhugs nas ched du brjod pa 'di nyid brjod do// lhun gyis gnas pa'i bde chen te// mngon sum mi gnas kun tu khyab// rang byung ye shes rtsa med pas// dbyings dang ye shes don las 'das// rtsol sems bde ba bla med kyang// de ni de sgrib skyon chen yin// tshig gi tha snyad med pa'i phyir// dge dang sdig las rnam par grol// lhun gyis rdzogs pa'i ngo bo de// spyod dang lta dang 'jug rtsol med// gang la'ang 'byed pa med pas na// rang byung ye shes rtsal med pas// dbyings dang ye shes don las 'das// mi rtog ye shes chen po las// dge ba'i 'bras bu bstan med pas// bgrod cing sbyong ba'i lam dang bral// yin pa'i don nyid gzhig tu med// lta ba zhe'am snying po'ang min// nam mkha'i ming yang 'thob pa med// bya bral lhun grub mchog gi sku// tha snyad mi 'byod gcig gi ngang// gang du'ang ma grub ma gsal bas// cir yang ma grub de bzhin no// de bzhin snying po chen po nyid// dus gsum rgyal ba'-i gnas su che// sangs rgyas de ni lam 'dra bar// mchog gi snying po de nyid ni// 'gro drug de yi rang bzhin no// de ltar de bzhin de yi phyir// de la de bstan de yang 'thob// de ni snying po de bas na// de las de byung ngo mtshar che// sngon gyi de dang da lta'i de// de bzhin de yi gnas su che// de ltar de yi lam 'dra bar// de ni de yi rang bzhin no// de dang 'dra ba yongs kyis lam// zla ba las byung rten bcas pa'i// sku yi phyag rgyar snang ba des// cir yang ma grub de bzhin no// zhes gsungs so// rdo rje sems dpa' nam mkha' che rgyal po rgyas pa'i rgyud las/ lhun grub rtsol bral gyi le'u ste gnyis pa'o//// de nas bcom ldan 'das shin tu zab pa'i ting nge 'dzin la snyoms par zhugs nas ched du brjod pa 'di nyid brjod do// 'di ni gsang chen rab nges pa'i// chub par gnas pas bcom ldan 'das// 'gro ba kun la rang bzhin gnas// phyin ci log tu rnam brtags kyang// grol ba rang byung gzhan las min// btsal du med pa'i snying po 'di// 'gro ba'i sdug bsngal byang chub sems// kun tu khyab pas rnam par rol// de la bskyod pa med bzhin du// nam mkha'i mtha' ltar mnyam par gnas// chos sku cir yang mi dmigs te// 'khor ba mya ngan 'das pa'i chos// de la gting dpag med pa'i klong// cis kyang gzhig tu med pa ste// de la sems can rnam par rtog/ ji ltar 'thad pa kun 'byung bas// kun gyi yid bzhin nor bu ste// thams cad mnyam pa gnyis su med// mnyam dbyings dbyer med chen po'i dbyings// bsdus nas 'dus par byas pa med// chos kyi sku nyid cir mi dmigs// ma skyes mi 'gag cir mi dgongs// gang yang mi 'byed mnyam chen po// ji bzhin 'byung ba yid bzhin nor// 'byung 'jug mi 'gag cir yang snang// mchog gi snying po ma nor don// dam pa yin te spros dang bral// de la 'gog pa med bzhin du// kun 'byung rin chen phung po 'bar// kun klong kun 'dus kun gyi klong// rdo rje 'dus pa bde chen sku// mnyam snyoms 'dus ba byas pa'i ngang// mnyam dbyings ye shes chen po'i mchog/mi dmigs mi skye snang ba med// mchog gi snying po dam pa yin// de bzhin nyid kyang dbu mar min// mi dmigs bden pa gnyis mi mnga'// bden gnyis ldan pa sa brgyad pa'i// byang chub sems dpa' la yang med// ces gsungs so// rdo rje sems dpa' nam mkha' che rgyal po rgyas pa'i rgyud las/ gsang ba mngon du bstan pa'i le'u ste gsum pa'o//// de nas bcom ldan 'das kyis don gyi snying po'i ting nge 'dzin la snyoms par zhugs nas ched du brjod pa 'di brjod do// bsgom du dngos po med pa ste// tshig gis de la mtshon du med// de la dbyings med ye shes gsog/ ngag gi smra ba thams cad sgrib// mi lta mi spyod mi srung zhing// mi sgom ba nyid snying po yin// cir yang spyad du med pa la// dmigs par bya ba yod pa min// sbyang zhing btsal ba'i gnas med de// ye sbyangs khams gsum ye sangs rgyas// dbang po'i spyod yul ma yin te// tshig gis mtshon par ga la 'gyur// sgom zhes gdags su med pa yin// tshig gis mtshon tu med pa'i phyir// ngag tu ci smra thams cad dang/// dbyings dang ye shes nyid kyang bsog/'di ni sgrib pa'i skyon chen yin// chos rnams rang bzhin nyid kyis stong// ngo bo nyid kyis mthur ldan pa'i// rnam par dag pa'i bdag nyid de// lam gyis bcos su med pa la// theg dman rtog bzhin pa yis// rang rgyud 'dod gzhung phyin ci log/ so sor phye nas rnam brtags kyang// lo 'dab rtsa ba mdor bsdus pa'i// ye shes mchog gi dam pa 'dir// ma bsgrubs lhun gyis rdzogs pa las// grol bar bya thams gzhan las min// dam tshig nor bu rin po che// sa gzhi rgya mtsho rdo rje gru// phyal pa gcig pu stong pa rdzogs// thams cad nam mkha'i mtshan nyid de// sna tshogs 'jig rten khams g.yo dang// rgyal ba mngon byung thams cad kun// nam mkha'i dbyings su ma gyur pa// dus bzhi phyogs bcu gang na'ang med// rgyal sras yab yum la sogs pa// thams cad nam mkha'i ngang du thim// de shes de las mi 'da' ba// ye shes bla med rmad po che// 'byung ba chen po bcom ldan 'das// chub par gnas pas bcom ldan 'das// 'gro ba kun la rang bzhin gnas// phyin ci log tu rnam brtags kyang// mdor bsdus dam pa ma lus las// grol ba rang byung gzhan las med// gnyis med byang chub mchog 'byung ba// ye shes mi 'gyur thig le 'di/ khyab gnas gcig pu stong pa rdzogs// zad med rin chen gter yin te// kun la khyab cing sna tshogs smin// 'di ni bcom ldan 'das nyid do// sems can snying po yin pa'i phyir// 'gro ba kun la rang bzhin nas// zhes gsungs so// rdo rje sems dpa' nam mkha' che rgyal po rgyas pa'i rgyud las/gab pa gsang ba mngon du byung ba'i le'u ste bzhi pa'o//// de nas bcom ldan 'das kyis skyon gyis ma gos pa'i ting nges 'dzin la snyoms par zhugs nas ched du brjod pa 'di brjod do// bla med theg pa'i mchog nyid las// nyon mongs lnga dang ldan pa yis// las su gnyer byas chog de la// bsgrub par bya ba khyad par te// de nyid mchog tu gyur pa la// bsgrub par byed pa bla na med// gtsang dang sme ba'i ba'i blo med na// de ni theg mchog lta la mkhas// de la skyon gyis bsgor med pas// ji ltar las ngan sbyod pa rnams// bla med theg pa'i snod du bsngags// rang gi byang chub sems rtogs nas// gnas su rnam par dag 'gyur na// ma sring bu mo sbyar bas ni// bla na med pa'i gnas su 'gro// gtsang sme med pa'i zas za zhing// dge slong 'khrug cing skur byed pa// sangs rgyas med pa'i zhing la sbyor// lta khang mdo sde sreg byed cing// sdig pa 'bar ba su spyod pa// theg pa'i don la mkhas pa ste// rang sems brtan po rnam dag na// spyad pa'i skyon gyis mi gos te// sangs rgyas mnyes te chos kyang 'dzin// bla med lam la ye nas gnas// bde gshegs rgyal ba'i sku nyid las// dpag cing sgrin du rung min phyir// skyon gyis bsgo ru med pa ste// yang sangs rgyas dang ye sangs rgyas// 'dus ma byas pa'i snying po 'di// bsgrub tu med de bsgrub par gsungs// de rtogs sgrubs ma thag tu ni// rgyal ba rnams dang dbyer med de// mtshams med lnga yis sgrib mi nus// chos rnams kun gyi don spyod pa// de ni shin tu de ba'i don// yang dag chos mchog de bzhin nyid// gtsang sme med pa kun spyad cing// snying rje med par kun bsad pa// mchog gi mchog ste mchog gi sku// de bzhin gshegs pa kun gyi sku'o// zhes gsungs so// rdo rje sems dpa' nam mkha' che rgyal po rgyas pa'i rgyud las/sdig pa'i 'khor lo bskor ba bla na med pa'i theg pa ste le'u lnga pa'o//// de nas yang bcom ldan 'das kyis dkyil 'khor thams cad la khu ba dang bshang gcis mchod na rgyal po yin pa'i ji ting nge 'dzin la snyoms par zhugs nas chad du brjod pa 'di brjod do// rang gi byang chub sems rtogs nas// rang byung ye shes rang shar na// bdag las dkyil 'khor med shes te// dkyil 'khor bdag po bdag nyid la// tsan dan dri rnams dbul mi bya// 'dod yon lnga pos mchod bya zhing// mnyam pa'i grub rdzas bshad gci yis// lus sku bra zhing mchod byed pa// des ni rigs rnams kun mnyes te// nges med snod sar snod rnying du// bshang gci mi gtsang khu khrag rnams// blo ldan mkhas pas rab bkang ste// bdag nyid dkyil 'khor chen po la// nyin re nub re dbul bar bya// mi dmigs mkha' dbyings rnam par dag/ rang byung ye shes klong na 'phyo// ngang gis shar cing de bzhin 'byung// mkhas pas mi gtsang sna tshogs pa// snod sar snod rnying nang blugs nas// bdag la bdag gis mchod byas na// rgyal ba'i dkyil 'khor ma lus mnyes// thabs la mkhas pa chen po yis// rang rig dkyil 'khor rang gi sems// gdod nas lhun gyis grub pa de// bdag nyid dkyil 'khor yin pa la// mi gtsang bas ni mchod byas pas// 'bum brgya'i dkyil 'khor mchod pa dang// kun grub dngos grub rang gis sems// rmad byung dngos grub chen po 'dis// bdag mchod dkyil 'khor khyad par las// dkyil 'khor rab tu 'bar ba yi/ khro bdag chen pos lus bzung nas// yi ge sngon du bris pa bzhin// dbang po'i sngon du 'byung 'gyur yang// zhi ba ma bcos chos kyi sku// 'pho 'gyur med pa mthong yin pas// 'dus ma byas pa'i chos nyid ni// 'di zhes mi mtshon tshig las 'das// sku yi phyag brgya rdzogs par gsal// nyon mongs lnga nyid rgyal ba'i zhing// nyon mongs la sogs mya ngan 'das// byang chub sangs rgyas gzhan nas min// 'dod chags la sogs dkyil 'khor nyid// dkyil 'khor chen po mchog gi mchog/ gang zhig de la 'jug byed pa// snying po'i dkyil na nor bu ltar// yid la 'thad pa sna tshogs 'grub// gsang sngags bdag blo mi 'gyur ba// kun gzhi rig pa'i nyi ma shar// dkyil 'khor bdag por cir yang snang// snang med ma skyes dbyings su rdzogs// zhes gsungs so// rdo rje sems dpa' nam mkha' che rgyal po rgyas pa'i rgyud las/mchod pa mi dmigs par bstan pa'i le'u ste drug pa'o//// de nas bcom ldan 'das kyis bsgom du med pa'i ting nge 'dzin la snyoms par zhugs nas ched du brjod pa 'di brjod do// sangs rgyas byang chub gang bsgrub pa// yi ge med pa'i don la blta// snying po med pa'i gsung la brtag/ snang ba med pa'i chos nyid la// ma btsal bzhag na sgom pa yin// de dang der ni rnam btsal na// de las de bzhin de mi 'byung// yang dag sangs rgyas lam ring 'byung// cir yang mi snang nam mkha'i dbyings// de bzhin bde chen spros dang bral// mi dmigs snang med chos nyid la// sgom pa yid la mi 'byung ba// ma btsal bzhag na sgom pa'o// nang dang phyi rol don nyid la// chags med gnas pa bde ba'i las// de la gang 'gog thar lam mchog/ sangs rgyas kun dang de zhing dang// ston pa rdo rje kun gyi thugs// ye shes lnga ldan snying po'i snying// gsung ba'i snying po nges pa yin// 'bras bu kun gyi lam gyur pa// ye shes rdo rje mkha' 'dra ste// cir yang mi dmigs gti mug las// dus bzhi sangs rgyas ma lus kyis// bskal pa gsum du btsal gyur kyang// sangs rgyas kyis kyang mi gzigs te// dmigs med nam mkha' lta bu'i dbus// dmigs su med pa rnyed nas smin// sangs rgyas byang chub sems dpa' nyid// dgongs su med pa'i don la dgongs// dpyad du med pa'i don la spyad// gzhig tu med pa'i snying pos gzhig/ bsam du med pa'i don la bsam// gang yang btsal du med pa'i ngang// de bzhin bzhag na bsgom zhes bya// mi skye mi 'gag rnam par dag/ gdod nas brjod du med pa la// sgra ming tshogs las 'das pa'i phyir// rang gi ngo bor bstan du med// ye nas 'jigs med thog rgal bas// dpa' bo skyes bu bla med sa// de la sbyangs pa mi dgos te// dngos med ngo bo nyin kyis bdag/ mi 'gyur rdo rje theg pa 'di// theg pa'i mchog ste bla na med// gdod nas stong pa'i chos nyid la// dngos por bstan par ma gsungs te// de las mi 'gag rgyal ba 'byung// mi chags mi rtogs mi gnas pas// ting 'dzin ro la chags mi gnas// bdud rtsi byang chub sems nyid ni// bsam med mi bsam bsgom du med// shes rab thabs kyi tshigs las 'das// de phyir sems la sangs rgyas med// e ma'o tha snyad rdul tsam yang// 'di la med pas sgro skur med// nyan cing dmigs bya'i yul med pas// bslab par bya ba yod pa min// byang chub sems la gting dpag med// ji snyed brjod pa'i yul las 'das// ming du gdags pa'i rten med pas// sgo phugs ma 'khrul dam pa'i mchog/ bden pa rnam gnyis bsgrub mi dgos// yi ges mtshon du rdul tsam med// brtags par dka' la yong par min// drang srong rnams kyis bsam du yang// ma bsams thig le sgro med pas// byang chub yin zhes bsam mi rung// zhes gsungs so// rdo rje sems dpa' nam mkha' che rgyal po rgyas pa'i rgyud las/ bsam zhing bsgom du med pa'i le'u ste bdun pa'o//// de nas bcom ldan 'das kyis bsam zhing bsgom du yod pa'i ting nge 'dzin la snyoms par zhugs nas ched du brjod pa 'di brjod do// skye med byang chub sems ni sna tshogs gzhi// 'di zhes mtshon du med pas sangs rgyas sku'o// grub pa'i mtha' la spyod pa med pa lam gyi mchog/ bsam pa gang yang yod pa min na dgongs pa'i phul// rang byung thams cad sna tshogs 'byung ba'i gzhi nyid gzhi// 'di zhes mtshon cing dpag tu med pas dam pa'i klong// byang chub sems ni cir yang med de snang mtha' yas// grub pa'i sa ste grub par mi 'dod lam gyi mchog/ bsam du med pa'i don la bsam mi bya// bsam med g.yo ba med pa dgongs pa ste// lhun grub dam pa sangs rgyas rang byung gi/ byang chub sems de sna tshogs 'byung ba nyid// glog bzhin myur ba'i rnam rtog sna tshogs pa// ji ltar rgyu zhing snang yang ma bcos pa// bsam med gyi nar bzhag pa sangs rgyas thugs// dka' phyir sla zhing sli phyir dka' ba 'di// bde gshegs nyid kyis dgongs su med pa na// bde gshegs thugs nyid rgyal ba'i dgongs pa ste// sems can rig pa g.yo ba med pa nyid// rgyal ba'i thugs de de la mi bsam zhing// de la gnas par mi bya btsal mi bya// rang rig sangs rgyas zhes par rab nges na// mchog mi bsam zhing grub pa'i mchog mi spyad// grub pa de yang 'di zhes bstan du med// bsam zhing mi bsam de bzhin bsam pa bya// bsam pa'i snying po gang na'ang med pa de// yul las mi btsal de bzhin gnas mi bya// rang rig snying po rang gi klong nas btsal// rang rig de yang nges par gnas tsam na// gnas pa de yang grub pa'i tshig las 'das// yod pa'i chos ni sus kyang bsgrub mi dgos// med pa'i chos ni gang nas btsal mi rnyed// dpyad pas thog tu phebs rung ma yin pa// dpyad pa'i rjes su snyeg byed thar ba'i gegs// btsal bas rnyed par bya ba'i yul mid pas// btsal bas thar par 'dod ba bus pa'i las// kun tu bzang po'i chos nyid chen po 'di// chos kyi snying po bstan pas yul med pas// yid kyi rnam shes shin tu myur ba yi// bsam pas kyang ni shin tu snyeg par dka'// chos kyi snyingapo gang yang dngos min las// chags pa'i cha lugs phyag rgya ngang gis 'char// gzhan gyi yul med snying po'i yul mchog 'di// bstan cing brjod par dka' la dmigs su rdul tsam med// gang la'ang ma chags de la chags pa yi// yul med de las phyag rgya'i sku 'bar ba// dam pa sangs rgyas yin zhes 'di las ni// lhag par rgyal ba nyid kyis bshad du med// sa sa mtshon pas grub re ye nas 'khrul// snying po'i yul med grub pa'i mtha' dang bral// btsal bas thar par 'dod pa bus pa'i las// kun tu bzang po'i chos nyid chen po la// dpyad pas rjes su snyeg pa thar pa'i gegs// don dang mi don bde dang mi bde nyid// 'di la yongs kyis med pas bsgom mi bya// mi bsam mi yengs mi blta mi bsgom par// ji bzhin thig ler ma bcos de bzhin bzhag/ ces gsungs so// rdo rje sems dpa' nam mkha' che rgyal po rgyas pa'i rgyud las/ bsam zhing bsgom du yod pa'i le'u ste brgyad pa'o//// de nas bcom ldan 'das kyis mchog tu gyur ba'i ting nge 'dzin la snyoms par zhugs nas ched du brjod pa 'di brjod do// e ma'o tha snyad rdul tsam yang// 'di la med pas sgro skur med// mnyen cing dmigs bya'i yul med pas// bslab par bya ba yod pa min// byang chub sems la gting dpag med// ming du gdags pa'i rten med pas// ji snyed brjod pa'i yul las 'das// tshig dang yi ges mtshon du med// bstan du med pa'i chos nyid la// yid kyis 'jog pa mi 'byung na// de ni bla med snying po yis/ 'da' bar mi mdzad dam pa'i klong// ye shes phyag rgyar mi snang bas// shes rab thabs kyis gzung du med// de la dgongs su yod pa min// mi dgongs pa nyid dgongs pa'i mchog/ ye nas mnyam gnas dgongs pa'i mchog/ ma bsams thig le sgro med pas// brtag par dka' la yod pa min// drang srong rnams kyis bsam du'ang med// gzhan gyis yod min lta ba la// 'di zhes lta bar mi byed cing// 'thob pa nyid kyang 'dod min na// de ni mchog gi snying po 'thob// e ma'o sems kyi spyod yul 'di// bskal pa 'bum brgyar btsal ba bas// ye shes thig le gsal snyoms na// yud kyis snying po thob par 'gyur// byang chub sems ni g.yo ba med// 'khor bar shi ba slong ba'i rtsi// 'di la cir yang bsam med pas// sus kyang mi bsam bsgom du'ang med// de phyir sems las ma gtogs pa'i// sangs rgyas logs na yod pa min// phyi nang gnyis na mi gnas pas// ye nas btsal ba'i gnas med do// bdud rtsi byang chub sems nyid ni// sa le bar yang bsam du med// bsam med mi bsam bsgom du med// dbyings dang ye shes nyid las 'das// de bzhin bsam med snying po la// cir yang ma bsam de bzhin pa// de bzhin nyid du gnas pa de// de ni bsam med snying po'i mchog/ bsam par bya ba gang na'ang med// stong pa nyid dang chos kyi dbyings// rang rig snying po de bzhin nyid// cir yang mi g.yo'i klong nas btsal// byang chub 'dod pa'i thams chen ni// lung bstan mi 'byung bstan du med// yang dag sangs rgyas de dkyil nas// sprul pa po yang sdod sangs rgyas// drang zhing dam par mi 'gyur ba'i// de la chos kyi snying po yod// 'phags la mi ring lhang nge'i lam// 'phags pa rnams kyi khongs na gnas// sgrub rtsol gzung 'dzin las 'das pa// bla med sangs rgyas 'dod pa'i thabs// ye shes klong yangs chen po'i yul// theg pa kun gyi mchog tu bsngags// zhes gsungs so// rdo rje sems dpa' nam mkha' che rgyal po rgyas pa'i rgyud las/ bsam spyod las 'das pa'i le'u ste dgu pa'o//// de nas yang bcom ldan 'das kyis chos thams cad rang bzhin gyis rnam par dag pa'i ting nge 'dzin la snyoms par zhugs nas ched du brjod pa 'di brjod do// dka' thub sdug bsngal 'di la dpyad mi dgos// tshogs bsag rgyu la bltos pa 'khrul ba'i lam// gzhan nas bshad pas thob re 'khrul pa'i chos// sangs rgyas gzhan nas thob re nor ba'i lam// kun rdzog tshig la spyod pa rtogs pa'i rgyun// de lta'i yul can sangs rgyas mthong ba med// yang dag bde gshegs cir yang me dmigs pas// sangs rgyas ston pas ming du btags pas nor// ston pas bstan pas byang chub lam mi rnyed// mi gnas mi dmigs skye 'gag med pa'i don// brjod cing dpag tu med pa gsung du'ang med// ston pa'i zhal nas gsungs zhes bya ba 'gal// e ma mtho ris bgrod pa'i rgyu des byang chub lam mi rnyed// mi g.yo rang bzhin gnas pas sman chen ma byas na// dug gsum nad kyis 'tsho ba'i klags yongs med// 'khrul rtogs kham la re ba 'khrul ba'i rgyun// btsal nas byang chub 'dod pa rtog pa'i gzhi// bde ba'i mchog ni bsam rdzogs yul dang bral// byang chub 'khrul pa ye rngam chos la za// de lta'i yul can sangs rgyas mthong ba med// zad med mi zad zad mtha' med pa de// cir yang mi smra cir yang snang ba la// 'dul ba mdo sder btags pa ye nas nor// theg pa'i rim pa bya ba gting nas med// dkon mchog gsum med dbang po'i spyod yul min// gzugs med chos skus bshad pa gting med kyang// me long chu zla bzhin du lha tshogs kyis// bshad par snang zhing theg pa bsam mi khyab// bsam gtan ting 'dzin ro la chags mi rung// ye rdzogs byang chub sems kyi rang bzhin de// ye sangs rgyas pa rang gi sems yin zhing// byang chub 'khrul pa yi rngam chos la za// ga bur rong du rig pa ma shar na// ston pas bstan pas yi ge rtog pa'i rgyun// rdo rje sems dpa' rang gi byang chub sems// rgyal ba sangs rgyas rnams kyi gshegs lam 'di// nang dang phyi rol don la yong mi spyod// ston pas bstan du 'di yi ming mi rnyed// 'di zhes bstan du gang yang 'brel pa med// bstan par go bar byar min gsung tshig min// skye zhing 'pho ba'i chos min gcig pur snang// snying po'i rang bzhin gnas pa chos kyi sku// zhes gsungs so// rdo rje sems dpa' nam mkha' che rgyal po rgyas pa'i rgyud las/chos thams cad rnam par dag pa'i le'u ste bcu pa'o//// de nas bcom ldan 'das kyis bya ba med pa'i ting nge 'dzin la snyoms par zhugs nas ched du brjod pa 'di brjod do// mngon sum kun tu mi rtog yangs pa'i snying po la// gzung ba'i yul med sems kyi gnas kyang med// chos sku kun tu khyab pas bsnan pa'i chos med de// rang byung mi dmigs yul la ji bzhin gnas// ngo mtshar mthong ba'i yul med de la mthong ba'i mig/rnam pa'i rnam pa med pas snying po'i yul yang med// sku nyid sku ru snang yang yan lag med pa'i sku// mtha' la mtshon du med pas dbyings la bri ba med// chos 'di yi ro la nyams phag bstan pa dka' ste smrar yang med// mkha' 'dra chos kyi dbyings te dbyings med ye shes bral// stong pa'i stong pa yin te stong nyid kyang med// sgom par yid kyis gzung med yul med bsam du med// spyod pa'i rjes su rnyog pa thar pa'i gegs// btsal bas thar par 'dod pa bus pa'i las// chos kyi snying po gang yang dngos min pas// chags pa'i cha lugs phyag rgya ngang gis 'char// mya ngan 'das dang 'khor ba sna tshogs pa// ye nas dbyer med dkyil 'khor gsum du gdus// me tog mdangs ma nyams par bung ba rgyas tshul du// mi gnyis chos sku ye nas ma g.yos las// che ba'i yon tan gzugs kyi sku gnyis rgyas// chos rnams sna tshogs mya ngan 'das 'khor ba// dkyil 'khor chen po rnam pa gsum du bsgom// chos rnams thams cad sgyu ma'i rang bzhin du// chu zla'i tshul du snang stong mi dmigs gnas// mi dmigs dmigasapa nyid na sna tshogs snang// de bzhin gshegs par ye nas kun mnyam pas// sems can bsad pa ye nas nam mkha' nyid/ khams gsum 'gul ba bsad pa nam mkhar zha// kun 'byung mi bskyod sangs rgyas zhing dag tu// rang bzhin yongs kyis dag pa rigs kyi mchog/ sku gsung thugs kyi bdag po rdo rje'i sku// bde gshegs ngo bo nyid gtsang gos med pa// rgyal mchog 'grub 'gyur 'di la the tshom med// gzhan gyi yul med snying po'i yul mchog 'di// bstan cing brjod par dka' la dmigs su rdul tsam med// nam mkha' yin pas bsam pas bzhag tu med// shin tu myur ba'i bsam pas bsnyag par dka'// nyon mongs lnga nyid ye nas snying po'i chos// snying po'i snying po yin te chos kyi sku// ye nas rang bzhin med de rang bzhin gnas// kun nas se ru med de phyogs bcu kun dang bral// rdul phran gcig la rdul zhugs gong bu'i rdul// rdul bsog mi 'dod dus bzhir mthong ba'ang 'khrul// ngo mtshar kun bsdus kun dang ldan pa yis// mthong ba'i yul med ye nas mthong ba'i mig/'byung ba'i rnam pa'i rnam grangs mang po med// snying po'i yul lha med pas chos kyi sku// gang yang med pas ro 'di bstan par dka'// 'di 'dra'i yul ni smra bsam brjod las 'das// zhes gsungs so// rdo rje sems dpa' nam mkha' che rgyal po rgyas pa'i rgyud las/ bya med lhun gyis rdzogs pa'i le'u ste bcu gcig pa'o//// de nas bcom ldan 'das kyis mi g.yo ba'i ting nge 'dzin la snyoms par zhugs nas ched du brjod pa 'di brjod do// yangs so che'o mi 'gyur bde ba'i klong// ye nas gnas so sus kyang gzhom du med// rnam par dag go cis kyang bsgrib tu med// gdod nas dag pas gnyen pos ci la sbyangs// rang gi sems las ma gtogs chos med phyir// rang gi sems 'di gdod nas dag 'gyur na// nyan thos mchog chen bsad pa rgyal ba'i sras// sangs rgyas 'bum bsad pa'ang byang chub lam// mi dmigs rang byung ye shes 'bum la rol// mi 'gyur snying po nam mkha'i dbyings la rol// nyan thos bsgral ba ma yin bde ba'i mchog/ gang la'ang spong len med pa thar pa'i lam// 'dzin rtog spong ba med pa chos kyi dbyings// rang rig chen po'i klong du ye nas dag 'gyur na// sems can nyan thos mchog 'di shin tu bsad pas ni// rnam par ma grol thar ba'i lam bsal nas// mi 'gyur snying po snang mdzad kho nar gyur// sems can sangs rgyas dbyer med rnam dag pa'i// mi 'byed snying po 'di las nyams min pa'i// mi 'gyur rgyun gyi snying po ye nas ldan gyur na// mchog min mchog phan bsad pa bde ba'i mchog/ yang dag nyid las rgyal ba'i sku bzhengs te// rang rig phyag rgya'i sku yi 'od 'bar ba'i// lag gnyis dbu la dkyil 'khor kun 'bar bas// snying pos brjod byas lag pa'i 'du byed kyis// bskyod byas rnam par dag par gyur tsam na// snang srid mchog gsum bsgral ba ci byas kyang// bsgral bar bya ba rdul tsam med pa ste// nam mkha' la ni nam mkha' bsgral ba'o/ khams gsum sems can ma lus kun bsgral yang// rdo rje sems dpa' nyid kyi skur gyur te// ye nas rnam par grol ba'i lam mchog yin// zhes gsungs so// rdo rje sems dpa' nam mkha' che rgyal po rgyas pa'i rgyud las/ sgrol ba bstan pa'i le'u ste bcu gnyis pa'o//// de nas yang bcom ldan 'das kyis dpag tu med pa'i ting nge 'dzin la snyoms par zhugs nas ched du brjod pa 'di brjod do// gsang sngags rang bzhin bdag blo mi 'gyur ba// kun gzhi'i gting nas rig pa'i nyi ma shar ba des// dkyil 'khor kun gyi bdag po cir yang snang// cir yang snang yang snang med ma skyes dbyings su rdzogs// de ni sngags kyi dam tshig lta spyod ma nyams de nyid de// lta ba'i don la mkhas pa de ni nye lam pa// yi ge med pa'i don la yid kyis blta// snying po med pa'i yid la rig pas brtag/ rig pa med pa'i gsung la skye ba med// de bzhin skye med don la rig pa rnal du bzhag/rig dang ye shes sna tshogs sprul pa ni// rdo rje lta bu'i don la blo gnas pas// yang dag sangs rgyas rgyu 'bras mi 'byed pa'i// yi ge mtshon du med pa'i chos las 'byung// de phyir sprul pa sna tshogs skyes bur snang ba nyid// sprul pa'i cha lugs nges par mi snang ste// 'gro ba 'dul phyir sna tshogs cir yang snang// snang med sprul pa 'byung ba'i rgyu de dpag mi lang// yi ge'i 'phro 'du 'byung 'jug la sogs pa// bsam pa'i 'byung 'jug mi 'byung de bzhin du// bsam gtan nyid du 'dus pas bsams pa med// rnam snang la sogs rigs kyi sku lnga yang// sku lnga mkha' dbyings dag pa'i klong chen du// sangs rgyas lnga dang mnyam pa nyid yin phyir// sangs rgyas mchog gi gnas mchog dam pa ni// thams cad b+ha ga yangs pa'i klong yin phyir// sku gcig bsgoms pas dbyings kyang gsal bar 'gyur// mi 'gyur mi shig rdo rje nam mkha'i klong// thams cad ma lus lhun gyis rdzogs pa'i dkyil po che// 'khor lo kun bskur sangs rgyas de las sku yang 'bar// mi 'gyur rang rig cir yang mi 'gyur mnyam pa'i ngang la gnas pa ste// mi dmigs btang snyoms klong der rang rig mnyam gzhag na// sangs rgyas yang dag rdzogs pa chen po'i mchog dang 'dra bar ston pas gsungs// zhes gsungs so// rdo rje sems dpa' nam mkha' che rgyal po rgyas pa'i rgyud las/thams cad klong du gyur ba'i le'u ste bcu gsum pa'o//// de nas bcom ldan 'das kyis btsal du med pa'i ting nge 'dzin la snyoms par zhugs nas ched du brjod pa 'di brjod do// cir yang mi snang gsal ba nam mkha'i ngo bo nyid// de bzhin bde chen spros bral nam mkha'i ngo bo nyid 'di ni// cir yang mi dmigs snang med chos nyid la// bsgom pa yid la mi 'byung ma btsal gzhag na bsgom// nyan thos rang rgyal mdo sde rten gzugs snang bar 'dod ba de dang ni// kri ya a nu la sogs bskyed rtogs rnam par grol 'dod pas// 'jug sgo lta tshogs 'bras bu dag par re ba kun la rnam btsal na// btsal ba de las de bzhin ngang gis gnas pa'i rdzogs pa'i don mi 'byung// yang dag rang byung ci yang mi 'gag sangs rgyas de dang lam ring 'gyur// shes rab thabs med zhig gnas lhag mthong mnyam snyoms shing// yun ring dka' bas don la btsal nas reg 'dod pas// nyan thos byang chub sems dpas btsal bas nyams// gsang ba rnam bzhi skur skyed phyag rgya 'char bar 'dod pa mchog gi skyon// bde mchog de ni gang la'ang chags pa med// de bzhin nyid la chags gnas kun la rol pa bde ba'i lam// mchog gi snying po de la gang 'gog thar pa'i lam mchog nyid/ khams gsum ma lus ye nas rnam grol bas// sangs rgyas lhun rdzogs snang srid rgya yis btab// mi 'gyur kun tu bzang po 'dus ma byas pa'i ngang nyid kyis// ye shes chos kyi dbyings la ye rol 'khor ba'ang rol bya'i phyir// ye nas kun bzangs de dpag med brtan g.yo gnyis kyi gzhi// gang la'ang mi chags ting 'dzin ror mi gnas// mi rtog mi chags mi gnas pa yang grol// don gyi snying po mar gyi yang zhun lta bu mtshon du med pa de// ga bur rang rig klong nas shar bar ma gyur na tshig dang yi ges mtshon pa 'di yis don mi rnyed// rna bas mnyan cing shes pas mi chod pas// lce yi dbang pos brjod du rdul tsam med/ khams gsum las 'das nor bu rin po che// gang nas btsal kyang rnyed par mi 'gyur te// tshig tu bsngo ba'i cha shas tsam yang med pa'i phyir// 'di zhes bsgom pa bstan du rdul tsam med// ces gsungs so// rdo rje sems dpa' nam mkha' che rgyal po rgyas pa'i rgyud las/btsal ba dang bral ba'i le'u ste bcu bzhi pa'o//// de nas bcom ldan 'das kyis g.yo ba med pa'i ting nge 'dzin la snyoms par zhugs nas ched du brjod pa 'di brjod do// byang chub sems kyi rang bzhin kun bzang la// snang srid snod bcud chos nyid rang bzhin te// ma yal ma zhi rang bzhin zhi ba med// chos rnams thams cad ma yal ma zhi bar// rang bzhin gsal te ngo bo g.yos pa med// chos nyid rang bzhin spros med zhi ba ste// ma yal ma zhi rang bzhin spros pa med// rang byung ye shes ma bsgrib gsal ba de// mkha' la ma yal ma zhi zhi ba med// ston pa kun tu bzang po nga nyid ni// thams cad byang chub sems las g.yos pa med// rang byung ye shes rgyu rkyen med pa de// rgyu dang 'bras bu kun las shin tu rgyal// rgyu 'bras theg pa can la shin tu gsang// sems nyid ma 'gags nam mkha'i dbyings nas rgyal// rgyu 'bras can la mi smra shin tu gsang// ma skyes rdo rje chos kyi dbyings nas rgyal// rgyu 'bras can la mi smra shin tu gsang// snang srid snod bcud ma bcos chos nyid rgyal// rgyu 'bras can la mi smra shin tu gsang// nam mkha' sa chu me rlung snang ba lnga// byang chub sems kyi ngo bor shin tu rgyal// rgyu 'bras can la mi smra shin tu gsang/ khams gsum dus gsum sku gsung thugs su rgyal// rgyu 'bras can la mi smra shin tu gsang// rang bzhin gsal te ngo bo g.yos pa med// g.yos med chos la rgyu 'bras sgrub byed pa// de ni nga yi lung min 'dod lung yin// nga ni 'dod pa med pas kun grub ste// mi 'dod 'dod pa med par rang bzhin 'grub// 'grub ces bya ba nga yis smras pa med// rgyu 'bras grub 'dod rnams kyi tshig tu'o// nga yi sgro dang skur pa dgra ru che// yod dang med dang grub dang ma grub dang/sgro dang skur pa btags pa thams cad kun// mi rtog las ni mnyam pa nyid du gnas// mnyam pa nyid las ma gtogs dgongs pa ni// sangs rgyas kun gyi mes po ngas ma gsungs// zhes gsungs so// rdo rje sems dpa' nam mkha' che rgyal po rgyas pa'i rgyud las// chos rnams g.yos pa med pa'i le'u ste bco lnga pa'o//// de nas bcom ldan 'das kyis mi dmigs pa'i ting nge 'dzin la snyoms par zhugs nas ched du brjod pa 'di brjod do// sangs rgyas kun gyi sku gsung thugs dang ni// sems can rnam kyi lus ngag yid gsum la// bzang ngan che chung khyad par yong ma gsungs/ ma gsungs sangs rgyas dgongs pa kun mi ston// gsungs pa thams cad nga yi ngo bo gsungs// nga yi ngo bo chos rnams thams cad yin// rang bzhin rnam dag mnyam pa'i rgyal po de// mi 'gyur rang bzhin chags pa kun dang bral// gzung ba'i yul med sems kyi gnas kyang med// rang gi sems ni nam mkha'i rang bzhin te// mtha' la thug pa med pas dbyings la bri ba med// rang sems nam mkha'i rang bzhin rnyed mi rigs// chos kyi rang bzhin kun kyang de lta ste// ji bzhin pa las kun kyang g.yos ba med// chos kyi rol pa ting 'dzin ci byas kyang// ji bzhin pa la ngo bo 'gyur ba med// 'gyur med lhag pa'i stobs cig cher 'gyur na// ting 'dzin gcig gis 'khor ba lhag ma med// smra yang ji bzhin pa la 'gyur ba med// rang bzhin che ba'i yul la rang bzhin gnas// rang bzhin ma bcos pa yi ming yin la// che ba ma bcos pa la che zhes brjod/de la mngon sum mthong bar su 'dod par// 'dod pa de ni chags pa'i gnas yin te// de la mi rtog mnyam pa'i dgongs pa med// chos nyid rang bzhin ye nas gnas pa la// nga btsal bsam pa sdod sgrub byed pa ni// rang sems gzhan du tshol bar byed pa yin// de yis chos kyi dbyings dang nam mkha'i khams/ khams gsum gnas dang srid pa'i chos bshig kyang// rang sems rang bzhin gnas pa de mi rnyed// mi rtog chos nyid mnyam pa nyid du mnyam// mnyam pas chos dang chos min gcig kyang med// sems can rgyu med sangs rgyas 'bras bu med// rgyu 'bras ston pa'i ston pa nyid lung nor// de bas nga las byung ba'i chos mnyam pas// nga las byung ba bzang ngan med mnyam gcig/ ces gsungs so// rdo rje sems dpa' nam mkha' che rgyal po rgyas pa'i rgyud las/ mnyam pa nyid kyi le'u ste bcu drug pa'o//// de nas bcom ldan 'das kyis mi 'gyur ba'i ting nge 'dzin la snyoms par zhugs nas ched du brjod pa 'di brjod do// nga yi chos nyid de bzhin nyid gcig la// rtog par bya ba'i thabs ni gzhi ma grub// lta ba'i chos nyid mthong ba'i gzhi ma byed// des ni mthong bar bya ba'i thabs yin te// ma skyes dmigs par bya ba'i yul med pas// blta bas de bzhin nyid la mthong ba med// dam tshig rang skyon sel ba'i gzhi ma byed// des ni bar chad med pa'i thabs yin te// de bzhin nyid la bsrung ba'i yul med pas// srungs pas de bzhin nyid la thub pa med// las ni grub par byed pa'i gzhi ma byed// btsal bas 'grub par byed pa'i thabs yin te// de bzhin nyid la btsal ba'i yul med pas// de bzhin nyid la las kyi grub pa med// lam gyis bgrod par byed pa'i gzhi ma byed// de ni gnas su phyin pa'i thabs yin te// de bzhin nyid la lam gyis bgrod med phyir// bgrod pas phyin pa de bzhin nyid ma yin// sa ni gnas par byed pa'i gzhi ma byed// des ni bgrod mi dgos pa'i thams yin te// de bzhin nyid la thams cad kun gnas pas// gnas par bya ba'i sa la sbyang du med// ye shes rtogs par byed pa'i gzhi ma byed// chos nyid rig par bya ba'i thams yin te// de bzhin nyid la rtogs pa'i yul med pas// rang byung ye shes yul la rtog pa med// byang chub sems ni chos kyi gzhi yin pas// theg pa so so'i lta spyod drug drug gis// lta spyod gzhi ma drug la btsal byas kyang// de bzhin nyid la btsal ba'i yul med pas// btsal bas de bzhin nyid la bcos pa'i phyir// rang sems gzhi ma'i bcos med dang mi 'phrad// ces gsungs so// rdo rje sems dpa' nam mkha' che rgyal po rgyas pa'i rgyud las/ gzhi ma kun tu bzang po yin par bstan pa'i le'u ste bcu bdun pa'o//// de nas bcom ldan 'das kyis bya ba med pa'i ting nge 'dzin la snyoms par zhugs nas ched du brjod pa 'di brjod do// lta ba bsgom du med ces bstan pa ni// chos kyi rtsa ba sems las med pa'i phyir// rang gis rang la bstan du med pa ni// rang sems yul ni nga yis bstan pa med// des na lta ba bsgom du med pa yin// dam tshig bsrung du med par bstan pa ni// thams cad lhun grub srung ba'i tshig las 'das// bsrungs bas mi thub rang gi sems mi khegs// rang byang ye shes yin pas bsrung du med// des na dam tshig bsrung du med pa yin// 'phrin las btsal du med ces bstan pa ni// rdzogs chen rgyu 'bras ye nas 'das pa'i phyir// 'phrin las rgyu las sgrubs nas 'bras bu 'dod// rdzogs chen 'bras bu 'dod pa med pa'i phyir// 'phrin las btsal du med ces bstan pa yin// lam la bgrod du med ces bstan pa ni// dus gsum sangs rgyas khams gsum sems can la// bgrod pas byang chub sems kyi lam la bgrod// sems su sangs rgyas sems can gnyis las med// des ni sems kyi sems kyi lam mi bgrod// sa la sbyang du med ces bstan pa ni// chos nyid byang chubasems kyi sa 'di la// sbyangs pas thob par 'dod pa rgyu 'bras can// chos dbyings byang chub sems kyi sa 'di la// sbyang bcos byas ba grub par ngas ma bstan// ye shes yul la mi rtog ces bstan pa// yul de ye nas rang byung ye shes te// rang byung ye shes ye nas yul dang bral// ye shes la ni ye nas yul ma mchis// dus gsum sangs rgyas thams cad dang/ khams gsum sems can thams cad kun// klong chen sems kyi gnas de la// mi gnas pa ni gcig kyang med// kun gyi gnas dang sa yin te// 'du 'bral med par de na bzhugs// de la sbyang zhing bgrod mi dgos// de la sbyang zhing bgrod gyur na// rang sems de la 'chos pa ste// bcos pas rang sems 'byongs me 'gyur// ces gsungs so// rdo rje sems dpa' nam mkha' che rgyal po rgyas pa'i rgyud las/ bcos pa med par bstan pa'i le'u ste bco brgyad pa'o//// de nas bcom ldan 'das kyi bya med rdzogs pa'i ting nge 'dzin la snyoms par zhugs nas ched du brjod pa 'di brjod do// bya med yul ni mi gnas nam mkha' 'dra// mi gnas dmigs pa'i yul med mi rtog chos kyi lam// bsngo ba'i cha shas phra mo'i yul las 'byung ba ste// rtog sgom chos kyi sku la khyad par don med pas// rang byung ye shes kun tu ji bzhin gnas// bya bral yul la mi gnas gnyen pos bcos su med// yan lag chos kyi dbang gis snying po yul 'tshol zhing// rnam pa cir yang mi rtog thabs kyis de la rol// snying po rang bzhin 'byung bas chos sku gzhan na med// rdul phran gcig la gces shing phyogs bcu kun dang bral// mi gnas don nyid legs pa'i ye shes rang 'byung ste// mngon sum kun tu mi rtog legs pa'i snying po la// rnam dag lam der zhugs nas mnyam pa'i rgyal po thob// mi 'gyur 'gyur ba med pas chags pa'i gnas med de// de bzhin gzung ba'i yul med sems kyi gnas kyang med// mngon sum mthong bar 'dod pas rgyu la rtag tu bsgom// bsgom chags bde ba de las mnyam pa'i don mi 'byung// sku gcig kun tu khyab pas bsnan pa'i chos med de// mtha' la thug pa med pas dbyings la bri ba med// chos kyi rol bas nyam bag lhag pa'i gnas med de// rang byung che ba'i yul la kun tu ji bzhin gnas// ngo mtshar mthong ba'i yul med de la mthong ba'i mig/gang la thos par mi rigs bsnyad pa kun dang bral// chos dang chos min rtug tu 'dres shing dbyer med mtshungs// don dam chos zhes lhag pa'i gnas zhes bshad pa med// 'khrul dang byang chub lam de rtog pas thob pa med// rang byung ye shes nyid kyang tshig gi mtha' dang bral// ye nas sangs rgyas bdag nyid mngon sum gnas pa la// grub ma gzugs kyi dpe bzhin de las rtog pa 'byung// med de med pa ma yin med pa'i snying po 'byung// stong ste stong pa ma yin stong pa'i yul la gnas// nam mkha'i rang bzhin de las 'byung ba'i dran pa skye// bya bral zin pa'i bde ba 'dod pa med pas len// bza' ba'i yul med de las ye shes 'byung ba rtsom// sngon gyi drang srong rjes su chags pa'i yid kyang 'jog/ rnam rtsol 'bad pa'i gdung bas kun tu zin ta re// rang bzhin lam der zhugs pas thams cad mkhyen pa med// ji bzhin pa zhes rnam rtog de phyir rtog bsgom pa// bde ba chen po 'dod pas chags pa'i nad yin te// mi g.yo mnyam par gnas pa'i sman zhes ma byas na// mtho ris bgrod pa'i rgyud des nyon mongs zin par 'gyur// lam med lam du zhugs ba rnams kyi nad che ba// phyin par 'dod pas ri dgas smig sgya snyeg pa 'dra// rnyed pa'i yul med 'jig rten gsum las mi 'byung zhing// sa bcur bltos pa'i gnas kyang byang chub bsgrib pa yin// shin tu myur ba'i ye shes bsam pa kun dang bral// bshes gnyen kun las 'byung ba'i nor bu rin chen bzhin// dmigs pa med cing 'gyur ba'i gnas la mi ltos par// rang gi rang bzhin legs par re ba thams cad skaung// brtags nas med la bzhag na legs ba'i 'byung ba che// dngos su mi snang chags pa'i cha lugs kun la ston// bdag dang gzhan du bral ba'i ston mkhan rin chen mdzod// thams cad grub ba'i yul zhes bdag med snying rjer bstan// nang nas ma g.yos nal du btsal ba'i yul med de// yul phyir chags pa yul la bsngo ba'i dmigs pa med// mi 'byung mi 'jug bdag med snying rje de yis ni// gzhan gyi nor min mi 'ong ye nas gnas pa yin// bde ba 'dod pas bde la rgyab kyi phyogs// bde ba zin te bde bas bde ba tshol// byang chub 'khrul ba ye rngam chos la za// 'di lta'i yul can sangs rgyas mthong ba min// sangs rgyas med pas sangs rgyas ming yang med// sangs rgyas ston pas ming du btags ba nor// sangs rgyas gzhan nas thob byed nor ba'i lam// gzugs med chos skus bshad pa rdul tsam med// zin dang chags dang bral dang zhi// dngos po med dang rnam par spong// bdud rtsi chen po'i rang bzhin pas// bza' ba'i thabs la rag pa med// yangs so che'o chos chen po// chung ngu rnams kyi gnyen po yin// che la dmigs pa'i cha snyams nas// chung che de rnams dmigs dang bral// gsungs dang rgyas la dmigs dang snang// sgyu mkhan ri mo'i rnam pa bzhin// 'byung 'jug ye shes bying rmugs pa'i// de yi dbang las skye bar 'gyur// 'di ni theg pa kun gyi rgyal// gtang ngo gzhag go rang bzhin te// 'dod pa med cing len pa med// brod pa rdul tsam mi skyed de/ khyung chen nam mkhar lding ba bzhin// spro ba med cing bsdu ba med// stong bar mi dogs bza' ba med// rgya mtsho bzhin du ye gnas la// chos rnams sna tshogs 'byung par byed// yon tan nam mkha'i mtha' dang mnyam// bsdu ba'i gnas su nges pa med// byang chub snying po de ma thag/ ting 'dzin rgyal po chen po 'byung// snang ba rgya mtsho chen po bzhin// mi rtog nam mkha'i mtha' ltar yangs// kun tu bzang po'i spyod yul la// skye zhing 'pho ba'i chos med de// rgyu rkyen yan lag bcu gnyis po// skur par bshad pas btags pa yin// 'khrul pa rnams kyi sgo tsam du// mkhas pas de bzhin shes par gyis// 'gro ba rgyud drug snang ba yang// dad pa'i lam du shes par bya// 'dod spyod snying rjes brlan pas na// gang du dga' bar byang chub spyod// shan pa smad 'tshong mtshams med pa/ kha na ma tho 'jig rten spongs// yongs su rdzogs pa chos kyi rtsi// bde ba che las gzhan med do// yong chos thams cad de bas na// chos kyi rang bzhin de yin pas// chos kyi chos nyid btsal ba dang// nam mkhas nam mkha' btsal ba dang// gzhan la bltos pa'i chos rnams ni// mes mes gsod pa dang 'dra ste// shin tu dka' ba'i las byed pa'o// rnam par mi rtog snying po 'di// yongs kyi rgyud la spas pa med// mi len byang chub spyod rnams la// rnam pa kun tu rang bzhin gnas// zhes gsungs so// rdo rje sems dpa' nam mkha' che rgyal po rgyas pa'i rgyud las// bya med rdzogs pa'i gnas yul med kyi le'u ste bcu dgu pa'o//// de nas bcom ldan 'das kyis bya ba med pa'i ting nge 'dzin la snyoms par zhugs nas ched du brjod pa 'di brjod do// chos rnams thams cad ngang las byung bas na// ji ltar snang ba'i chos rnams thams cad kun// ye nas rnam par dbyings kyi ngang du bstan// phyi dang nang kun ye nas chos kyi dbyings// ye nas rnam par dag pa'i spyod yul la// sangs rgyas dang ni sems can gnyis su med// lam dang gnyis pos bcos su ga la yod// bsgrub med rtsal sbrug smon pa med pas na// bya med lhun rdzogs snga ma de nyid ston// rtog spyod rnam rtog gnyis med chos dbyings la// log rtog byis pa'i spyod pas ci zhig bslu// 'khrul pas nor ba'i lam du bstan pa yang gong du bstan pa'i lam chen de las mi gnyis pas// mnyam par shes pa sangs rgyas kun gyi rje// nga dang bdag tu bstan pa mu stegs 'khrul ba'i lam// phyin pa'i yul med rtogs pa'i dus med pas// chos nyid chos tshol rnyed par ga la 'gyur// tshad mar ma gyur slob dpon spre'u 'dra'i lung// bstan dang lam nor rtog pa zin ta re// de bas gser la nag tshur btang ba yi// slob dpon yang dag ston pa'i rin chen de// rin thang dpag tu med pas bslu bar 'os// zhes gsungs so// rdo rje sems dpa' nam mkha' che rgyal po rgyas pa'i rgyud las// bya byed rnam dag dbyings kyi le'u ste nyi shu pa'o//// de nas bcom ldan 'das kyis rdzogs pa lhun grub kyi ting nge 'dzin la snyoms par zhugs nas ched du brjod pa 'di brjod do// sna tshogs rang bzhin mi gnyis kyang// cha shas nyid du spros dang bral// ji bzhin pa zhes mi rtog kyang// rnam par snang mdzad kun tu bzang// zin pas rtsol ba'i nad spangs te// lhun gyis gnas pas bzhag pa yin// ces gsungs so// rdo rje sems dpa' nam mkha' che rgyal po rgyas pa'i rgyud las/ bya med rdzogs pa lhun gyis grub pa'i le'u ste nyer gcig pa'o//// de nas bcom ldan 'das kyis ma skyes pa'i ting nge 'dzin la snyoms par zhugs nas ched du brjod pa 'di brjod do// bsam 'das brjod du med pa'i byang chub sems// ston pa'i sgron mar gyur pa'i kun gyis rab bsngags pa// chos kyi snying por gyur pas 'jam dpal gzhon nu nyid// bya bral lhun rdzogs bde ba'i lhun la gnas// tshul khrims la sogs spyod pa rgya mtsho'i gzhir gyur pa// ji snyed rnam par grol ba'i lam ston pa// bde gshegs yul du gyur cing mtshungs lam de// de med mi 'gyur de phyir nga ni rnam grol mchog gi lam// phra zhing shes dka' kun gyi lam ste mi rtog rtog las 'das// mi gnas mi dmigs spros med bsam pa kun dang bral// tshig gis mi phegs dbyibs dang kha dog spyod yul min// bstan cing brtag par dka' la brjod du rdul tsam min// sngon gyi drang srong lam du gang zhugs pa// bsgom chags lam gyi nad kyis zin ta re// ston pa'i lung bzhin tshig gi mtha' spyod lam du de mthong na// de ni rtog pa'i rgyud 'brangs smig sgyu snyeg pa 'dra// yang dag lam ni tshig gis mtshon du med// yang dag nyid du bstan pa nga yis 'khrul// dag dang ma dag gnyis med 'dres shing mtshungs// rnam pa cir yang mi 'byed ye shes gti mug dang// thogs med gsal ba'i mar me bsam pa kun dang bral// ngang gis mi g.yo rmugs shing ting 'dzin rgyal por gnas// mngon sum mthong byed mngon sum mthong ba'i mig/ de phyir thams cad mkhyen pa'i spyan zhes de la bya// mtha' dang dbus med yangs pa'i rang bzhin shes// mi len mi 'dor mnyam pa'i rgyal por gnas// sems dang bag chags gnyis med 'dres shing mtshungs// 'dzin pas brtags shing snang ba'i chos rnams ni// rang gi rkyen gyis snang bas mi 'dor spong mi byed// cir yang mi dgongs thabs kyis de la rol// kun dang mi mthun yongs kyis spong ba'i chos// nyon mongs lnga dang mtshams med lnga po yi// rnam dag lam der zhugs nas mnyam pa'i rgyal po thob// bud med la sogs kun kyang yong mi spyod// lo rgyus don nyid tshad ma'i blor bzhag nas// ting 'dzin gsum po brtags nas grub pa'i mtha' spyod pa// rtsol bral lung las gol zhes 'khrul pa yin// bya bral lhun rdzogs bde ba'i yul la gnas// ye shes rang byung che ba'i snying po nyid// mi g.yo mi 'gyur bsnyad pa kun dang bral// bya bral zin pa'i yul la ji bzhin gnas// thams cad thig le chen po yi// rang bzhin ye nas yin pas na// spro pa med cing bsdu ba med// skye ba med la 'gag pa med// 'gag pa med par de bzhin gnas// rnam par mi rtog snying po 'di// nam mkha' bzhin du ye gnas pas// rtog pa'i smra bsam yul las 'das// zhes gsungs so// rdo rje sems dpa' nam mkha' che rgyal po rgyas pa'i rgyud las/ bya byed rdzogs pa bsgom du med pa'i le'u ste nyer gnyis pa'o//// de nas bcom ldan 'das kyis yul la dmigs su med pa'i ting nge 'dzin la snyoms par zhugs ched du brjod pa 'di brjod do// ji ltar snang ba'i chos rnams ni// rang gi byang chub sems yin pas// de la lta ba'i yul ma yin// mi rtog pas na mnyam pa nyid// de bzhin nam mkha'i dgongs pa ste// rnal 'byor zhes ni de la bya// dbang po'i ngo la snang ba rnams// rang gsal de la mi rtog pas// de yang nam mkha'i dgongs pa rnams// rnal 'byor de bzhin nyid du gnas// tshig dang yi ge'i don rtogs pas// rtog med mnyam pa de bzhin nyid// de yang nam mkha'i dgongs par gnas// rnal 'byor ma bcos bsam med bzhag/ bsam du med pa'i don 'di ni// snang ba rgya mtsho chen po ste// mi rtog nam mkha'i mtha' ltar yangs// nam mkha' bzhin du ye gnas so// zhes gsungs so// rdo rje sems dpa' nam mkha' che rgyal po rgyas pa'i rgyud las/ tshig bshad bzhi pa'i dbang bskur ba dang lta ba yul med kyi le'u ste nyer gsum pa'o//// de nas bcom ldan 'das kyis don ma byas par grub pa'i ting nge 'dzin la snyoms par zhugs nas ched du brjod pa 'di brjod do// ji ltar snang ba de bzhin nyid du gcig/ gcig la su yang 'chos par ma byed cig/ ma bcos mnyam ba'i rgyal po de la ni// mi rtog chos sku'i dgongs pa bde la gnas// zhes gsungs so// rdo rje sems dpa' nam mkha' che rgyal po rgyas pa'i rgyud las/ nges tshig bzhi ba'i le'u ste nyer bzhi pa'o//// de nas bcom ldan 'das la/rdo rje sems dpas 'di skad ces gsol to// e ma ho ngo mtshar che'o// rgyal po rgyas pa'i rgyud 'di ni tshig tu mi gnas ba de sems can skal ba chung ba lags sam/ sems dpa' chen po rgyud 'di tshig dang yi ger bri las 'das pas dus kyi tha ma la 'byung yang srid// mi 'byung yang srid/ 'byung na yang gang zag gcig la 'byung la// de gang dang yang ma bral ba'o// de 'byung ba'i tshe mi dmigs pa'i stobs dang/ mi dmigs pa'i shes rab dang// mi dmigs pa'i btang snyoms dang/ mi dmigs pa'i rig pa rang gsal te mi yul thams cad ma skyes pa'i chos nyid las rang bzhin gyis mi 'da' ba dang// rang bzhin gyis mi nyams pa dang/rang bzhin gyis phyogs med par gyur to// rgyud 'di thos pa'i sems can thams cad kun tu bzang po'i rang bzhin du gyur nas 'da' ba med pa'i sangs rgyas su gyur to// rgyud 'di thos pa'i yid rang byung ye shes su gyur nas/gnyis su med pa ma btsal ba'i thig ler gyur to// rdo rje sems dpa' la sogs pa'i 'khor rnams rjes su rang ngo// rgyud yongs su gtad pa'i le'u ste nyer lnga pa'o/

CLOSE WINDOW