CLOSE WINDOW

Gpb033.015
བོད་ཡིག

/ chig brgyud ma gtogs spel ba min/ kha thaM///// saM skr-i ta lha'i skad du/ sarba b+ha dra sa man+ta/ bod skad du/ kun tu bzang mo klong gsal 'bar ma nyi ma'i rgyud/ ha shang skad du/du ran ha sing d+ha ra/ rgya nag skad du/ a b+ha la sa rgya nam pa/ u rgyan gyi skad du/ d+ha na saM g+ha la/ bya ka lan+d+ha ka'i skad du/ e du ra b+ha ga sha naM b+ha/kha che'i skad du/ sa ta ra b+ha da ling ka man sing+ga la'i skad du/ spos ha ra na tri/ rgya gar skad du/ sa mun tan+t+ra nA ma/ bod skad du/ kun tu bzang mo klong gsal 'bar ma nyi ma'i gsang rgyud ces bya ba/kun 'dus rig stong gi klong la phyag 'tshal lo// 'di skad bdag gis thos pa'i dus gcig na/ 'khor 'das kun gyi thog mar ni// rang byung byas pa med pa las// kun tu bzang mo rig stong klong// stong pa nyid kyi gzhi ma ni// tshad med gsal ba'i dkyil 'khor che// kun bzang b+ha ga yangs pa'i klong// mi 'byed 'byed pa med pa'i chos// so so ma yin tha mi dad// snang ba bkod pa chen po'i yul// ye nas rang gsal rig pa'i sku// stong gsal mdangs lnga rdzogs pa'i lha// kun tu bzang mo zhal phyag rdzogs// thig le stong pa'i klong dkyil du// nyag gcig zang thal chen po'i sku// kun tu bzang po 'od mi 'gyur// rig stong gsal ba'i sku ru shar// ma 'gags rang rtsal kun tu snang// 'gag med gsal ba'i sgra tshig tu// brjod du med pa'i don 'di gsungs// e ma nyon cig snang ba rnams// mtshan ma med pa'i klong yangs su// 'das shing bshad du med par gsal// spros pa gzung 'dzin bral ba'i klong// chos rnams smra brjod bral la gdags// lung dang rtogs pa bstan du med// ma bcos pa yi klong nyid du// 'dus shing rtsol sgrub med par gsal// man ngag thams cad btsal du med// ma bslad pa yi klong yangs su// lta sgom spyod 'bras med par gsal// snang ba thabs kyi rigs klong la// gnas lugs zang thal sku rnams shar// dus gsum 'pho 'gyur med pa'i klong// sku gsum ye shes lnga ldan gsal// kun 'byung 'gag pa med pa'i klong// sna tshogs rol pa ma 'gags gsal// 'bar ba ye shes chen po la// nyi ma lta bu'i gsang rgyud 'di// stong pa'i klong na gsal ba'i chos// co ga dgu 'gyur skad kyi tshul// sgra bzhi ldan pa'i don ni gsum// kra tha ni kra tha ni/ ces pa sgra'i dbyangs nyid bstan pa'o// tra tha ma ni tra tha ma ni/des ni sgra yi sgrub byed bstan// ma na tra tha ma na tra tha/ des ni sgra yi rang bzhin gsal/ ti ti ti ti ti dri/ des ni sgra bzhi phan skyed bstan// sgra don bzhi po de dag la// spyi dang rang gi mtshan nyid chos// snang ba rnams kyi thugs su chud// ces ni sems med rig stong gi/ dgu 'gyur co ga'i skad kyis 'di gsungs so// 'di skad snang ba'i bdag po nyid kyis thos pa'i dus gcig na// chos nyid bde chen kun bzang yum// b+ha ga chos 'byung yangs pa ru// thabs kyi thig le nyag gcig sku// rig pa ma 'gags snang stong gzugs// nam mkha'i dkyil du nam mkha'i sku// chos dbyings ye shes snying po can// me long ye shes gsal stong sku// mnyam nyid ye shes snang stong dngos// sor rtogs ye shes ma 'gags rdzogs// bya grub ye shes rtsal rdzogs lhun// rin chen gsang ba'i sbubs su gsal// stong pa'i yul du gsal ba'i mdangs// stong gsal lnga ldan snang ba'i sku// yum chen kun tu bzang mor bzhugs// de tshe de yi dus nyid du// chos sku'i 'khor ni 'di ltar ro// mi snang ba yi snang ba ni// snang ba chen po bkod pa'i 'khor// rig pa rdo rje rnon po dang// rig pa rdo rje lug rgyud dang// rig pa rdo rje rang snang dang// rig pa rdo rje cog bzhag dang// rig pa thogs pa med pa dang// rig pa cir snang sku gsung thugs// de dag thams cad ngo bo'i sku// rig pa nyag gcig kun bzang mo// ngo bo'i 'khor ni bsam las 'das// gsal stong snang stong bde stong dang// grag stong rig stong rnam pa lnga// dkar dmar ser dang ljang gu dang// mthing ga lnga po ye shes lnga// 'od lnga la sogs ngo bo'i 'khor// ye shes gsum ldan tshul du snang// phyi yul yul snang dag pa'i 'khor// bde gshegs rigs dang rdo rje'i rigs// rin chen rigs dang pad+ma'i rigs// las kyi rigs dang rnam pa lnga// rigs gsum mgon po la sogs pa// rig stong kun tu bzang mo dang// gsal stong kun tu bzang mo dang// snang stong kun tu bzang mo dang// bde stong kun tu bzang mo dang// grag stong kun tu bzang mo dang// mkha' 'gro sde lnga la sogs dang// yul snang 'dus pa'i thub drug dang// 'gro 'dul thugs rje sprul pa'i sku// mang zhing dpag tu med pa dang// gzung 'dzin 'khor ni 'di lta ste// ma rig pa dang sems dang ni// yid dang nyon mongs 'dzin pa dang// rnam rtog mi dge bcu la sogs// de dag snang ba'i 'khor rnams ni// yul dang shes pa dran pa dang// mthong byed nyan byed snom byed dang// myong byed 'du byed la sogs dang// gzugs sgra dri ro reg bya chos// lha dang lha min dri zar bcas// 'dul ba mdo sde mngon pa dang// 'jig tshogs sum brgya drug cu dang// nyan rang byams sems kr-i u yog/ma hA a nu a ti dang/ snang ba ma 'gags pa yi 'khor// rnam pa sna tshogs nyid du snang// yul dang yul can thams cad dang// thabs cig tu ni bzhugs pa'o// kun tu bzang mo klong gsal 'bar ma nyi ma'i gsang rgyud las/gleng gzhi'i le'u ste dang po'o//// de nas rig stong nyag gcig sku// kun bzang yum lnga 'dus pa las// 'khor rnams kun las lhag pa yin// 'od zer gzhon nu khro gnyer mas// sgra bzhi 'dus pa'i rang skad kyis// tshig brjod rim pa 'di gsol to// kye kye rig stong kun bzang mo// chos sku'i gnas lugs gsung du gsol// zhus pa'i lan du bka' stsal pa// kye ho ye shes mkha' 'gro ma// nyi ma'i snying po khro gnyer ma// chos sku'i gnas lugs ngas bstan gyi// legs par yang dag nyid du zung// chos sku'i mtshan nyid 'di ltar ro// ngo bo rang bzhin thugs rje gsum// ye shes gsum ldan tshul du bzhugs// ngo bo ka dag ye shes ni// ma rig rtog pa kun dang bral// ngo bo mi 'gyur lhang nge ba/ kha dog mtshan ma'i yul dang bral// rgya chad phyogs lhung bral ba ste// mtha' dbus rgya khyon kun las 'das// skye med yangs pa chen po'i klong// nam mkha' lta bur shes par gyis// rang bzhin lhun grub ye shes ni// stong gdangs rang gsal rjen par gnas// rang bzhin snying po sang nge ba// zang thal dbyer med tshul du bzhugs// stong pa ngos bzung bral ba la// gsal ba bdag 'dzin med pa ru// ye shes lnga yi rang mal bzhugs// stong pa'i ye shes mtshon du med// gsal ba'i ye shes dgag sgrub bral// gnyis med ye shes dbye bsal bral// sor rtogs ye shes 'od kyi khyim// kun grub ye shes gzhi la rdzogs// phyi rgya ma ral 'od kyi khyim// nang du 'od lnga ma 'gags gsal// stong gsal chos sku'i ngang du gsal// thugs rje kun khyab yeshes ni// rig rtsal ye shes 'od lnga shar// me long sor rtog mnyam pa nyid// bya grub chos dbyings ngang du khyab// thugs rje kun khyab lam me ba// stong dang gsal dang ma 'gags pa// kun bzang yum gyi klong du shar// shar ba med pa'i ye shes lnga// nub pa med pa'i dbyings su gsal// gsal ba med pa'i rig pa ni// sgrib g.yogs med pa'i klong du gsal// rtag pa ma yin ngo bo rang sar stong// chad pa ma yin ye shes nang du gsal// gnyis ka ma yin gnyis mtha' zad// des ni chos sku'i gnas lugs bzhugs tshul gtan la phab pa'i le'u ste gnyis pa'o//// sa ma ya// yang gcig kun tu bzang mo la/ khro gnyer ma yis yang gsol pa// chos sku'i gnas lugs de ltar na/ kun gzhi gtan la phab pa longs sku'i gnas lugs gsung du gsol// zhus pa'i lan du bka' g+Nal pa// nyon cig snang ba khro gnyer ma// thugs rje zhi ba'i ngang las ma g.yos kyang// snang ba 'dul phyir khro mor shar// ye shes lnga yi gnyer mas brgyan/ khyod ni nga yi gsal snang sku// legs par yang dag yid la zung// stong pa'i yul la gsal ba'i mdangs// ye shes lnga yi mu khyud ldan// rang bzhin babs kyis snang ba'i zhing// lhun grub gdal ba chen po'i dbyings// sna tshogs ma 'dres yongs rdzogs shing// 'thug po bkod pa'i gnas nyid du// shar mtho lho gzhol nub 'bur ba// byang dma' dbus spungs lhun 'thug pa// dbus su bsdus nas mtha' ru yal ba ltar// mtha' ru bsdus nas dbus su yal// gdos bcas med par sprin 'khrigs ltar// rgya zho mnan ltar rgya mtsho ltar// mer mer khyom khyom 'gul 'gul 'phrig/ yom yom ldeg ldeg spar spar 'phar// 'ja' 'od smig rgyu za 'og gur// gnyis ka ma yin gnyis 'dzin bral// de ni longs sku'i gnas lugs so// rgyud chen klong gsal 'bar ma las// longs sku lhun grub chen po'i gnas lugs bstan pa'i le'u ste gsum pa'o//// yang gcig kun tu bzang mo la/ khro gnyer ma yis yang gsol ba// longs sku'i gnas lugs de ltar na// sprul sku'i gnas lugs gsung du gsol// zhus pa'i lan du bka' stsal pa// kye ho khro gnyer ma khyod nyon// ngas bstan yid la legs par zung// sprul sku'i gnas lugs 'di ltar ro// spyir na chos sku'i sprul pa ni// 'gag med ye shes longs skur shar// longs sku'i rig rtsal ma 'gags pas// sprul pa gang la gang 'dul du// zhi dang khro dang rab tu khro// 'od zer sprul pa bsam las 'das// bya ba byed dang bya ba rdzogs// nyon mongs 'dul ba'i gnyen por shar// tshad med bzhi dang phar phyin drug/dbang po rab 'bring tha ma gsum// don sbyor sku gsum rang ngo sprad// sde gsum rim dgu'i chos rnams kun// nyon mongs zad par bya phyir bshad/ klong gsal 'bar ma nyi ma'i gsang rgyud las/sprul sku sna tshogs kun khyab kyi le'u ste bzhi pa'o//// de nas kun tu bzang mo la// 'od kyi snying po thabs kyi cha// snang ba'i cho 'phrul rig pa'i sku// mkha' 'gro lnga yis yang zhus pa// kye kye rig stong kun bzang mo// sku gsum bzhugs tshul de ltar na// sku gsum gcig rdzogs gsung du gsol// zhus pa'i lan du bka' stsal pa// kye ho ye shes mkha' 'gro ma// ma yengs brtan por yid la zung// chos sku'i ngo bo stong pa yin// dper na nam mkha'i dkyil dang 'dra// longs sku'i ngo bo gsal ba yin// dper na bar snang khams dang 'dra// sprul sku'i ngo bo thugs rje yin// dper na nyi zla gza' skar 'dra// de ltar sku gsum 'du 'bral med// snying po ye shes gsum dang ldan// chos sku ye shes bsam 'das brjod med dang// longs sku ye shes ma 'dres so sor gsal// sprul sku'i ye shes gang yang sgyur du btub// de ltar ye shes lnga dang ldan// stong dang gsal dang khyab pa gsum// dbyer med nyag gcig ngang du rdzogs// de ltar sku gsum de dag la// 'das pa'i sku gsum la sna gtad/ ma 'ongs sku gsum la rgyab bstan/ da ltar gyi sku gsum la longs spyod/de ltar dus gsum sku gsum nyid// mnyam pa nyid kyi ye shes yin// thog ma'i ka dag gsal stong khyab// de yi don kyang sku gsum ste// thog ma zhes pa 'khor 'das med// ka dag ces pas chos kyi sku// gsal stong zhes pas longs spyod rdzogs/ khyab ces pa ni sprul pa'i sku// dbyer med gcig gi tshul du gnas// rkyen med pa yi snang ba gsum// du ma ro gcig tshul du bzhugs// de ltar sku gsum gcig tu dril// ma g.yos pa yi chos su dang// ma 'khrul pa yi sangs rgyas dang// ma 'gags pa yi sprul sku dang// rnam pa gsum gyi ngo bo ni// ngo bo nyid 'gyur lhang nge ba// dang po rang nas ma g.yos pa// rig pa nyid kyang ma g.yos pa// snang ba thams cad dus gcig rdzogs// snang ba'i yul rnams khyab par gsal// rang bzhin lhun grub chen po yin// de yi klong nas bkrag shar ba// lnga ldan tshom bu'i dkyil 'khor rgyas// thig le rnam dag dmigs su med// dpag med dmigs med grangs las 'das// de yi dkyil du rig pa'i sku// lnga lnga yab dang yum sbyor dang// sku rkyang phyed sku dbu rgyan dang// smin dang ma smin smin pa'i rgyu// thig le thig phran lu gu rgyud// lcags tshags 'bar ba nya mig ris// rgya mtsho gza' skar za 'og gur// mdzes pa'i ri mo sna tshogs brgyan// spyir yang longs sku'i cha lugs ni// ye shes rnam pa lnga dang ldan// ye shes lnga rdzogs grub pa'i lha// gsal stong dag pa 'ja' 'od sku// snang la rang zhin med pas rdos bcas dag/ ye shes zhal phyag rdzogs pa'i zhi khror gsal// zhal ni kun tu zhal la mdun rgyab med// ye shes rang gsal mkhyen pa'i mdzad pa mdzad// lar yang longs sku'i mtshan nyid ni// yab lnga yum lnga tshom bu lnga// yi ge shes rab rtog pa lnga// gzhi lnga lam lnga 'bras bu lnga// gnas lnga yul lnga ngo bo lnga// stong gsal 'gag pa med pas yongs// ye shes lnga la spyod pas spyod// bya rtsal kun las 'das pas rdzogs// rtag pa ma yin rdos bcas bral// gzung du med cing bcang du med// gcad du med cing gcad du med// chad pa ma yin dngos su gsal// skye ba med las thams cad skyes// ye shes thams cad skad cig rdzogs// rang bzhin bab kyi snang ba 'di// yangs par lhung la phyogs lhung med// dkar bar snang la rigs mi 'dzin// ser bar snang la yon tan rdzogs// dmar bar snang la sgo ma 'gags// ljang gur snang la ma btsal grub// mthing gar snang la cha che ba// stong par snang la phyogs ris med// gsal bar snang la dngos po med// lnga ru ye shes snang la kha dog med// zlum por snang la gzugs su med// ma 'gags pa la skyon mtshang med// sku lngar snang la gzugs med pa// stong par snang la bem po med// 'od lngar gsal la kha dog med// stong pa'i ngang la bem ma 'gags// bem po'i ngang la stong ma 'gags// gsal ba'i ngang la mun ma 'gags// mun pa'i ngang la gsal ma 'gags// bag gi stong la kun tu 'char// ma 'dres pa la 'dres su snang// kun la khyab cing gcig tu 'dus// dag gsal 'khrul pa ma 'gags pa// 'khrul la dag pa ma 'gags pa// stong la snang ba ma 'gags pa// snang la stong pa ma 'gags pa// snang stong gnyis su med la gcig ma yin// gcig tu bsdus shing gnyis su shar// gnas 'gyu la sogs de dang 'dra// de ltar sangs rgyas sems can gnyis// gcig gi ngo la gcig ma 'gags// thabs shes thugs rje go ma 'gags// gzhi snang chen po'i gnas lugs so// kun tu bzang po klong gsal 'bar ma nyi ma'i gsang rgyud las/ gzhi sku gsum gcig dril gyi bzhugs tshul gyi le'u ste lnga pa'o//// yang gcig kun tu bzang mo la// ye shes mkha' 'gros yang gsol pa// kye kye rig stong kun bzang mo// 'khor 'das gnyis su med gang du// sku gsum ye shes gsum ldan la// ka dag sgrib med zang thal bzhugs// de ltar gsungs pa ma 'khrul pa// sems can 'khrul lugs gsung du gsol// zhus pa'i lan du bka' stsal pa// nyon cig ye shes mkha' 'gro lnga// kye ma nga la 'khrul med kyang// nga yi rtsal las 'khrul pa ltar du byung// dper na nam mkha' dwangs pa la// sprin dang khu rlangs med mod kyang// glo bur sprin dang khu rlangs byung// gzhi la ma rig med mod kyang// thugs rje rtsal du shar ba las// ma rig pa zhes glo bur byung// gzhi yi ngo bo rang rtsal shar// phyi rgya dum gcig ral ba la// lhun grub ces bya'i gzhi ma shar// thugs rje'i rang rtsal rdzogs pa la// snang ba chen po zhig tu gnas// de ltar shar lugs chen po brgyad// thugs rje ltar shar go ma 'gags// 'od ltar shar bas snang ma 'gags// ye shes ltar du shar bas na// longs spyod rdzogs pa'i yul ma 'gags// sku ltar shar bas dngos ma 'gags// gcig tu ma yin gnyis mtha' zad// gnyis su ma yin gcig mtha' zad// gnyis med ltar shar nges pa med// mtha' grol ltar shar thabs ma 'gags// dag pa ltar du shar bas na// ye shes 'jug pa'i sgo ma 'gags// ma dag pa ltar shar ba yin// thugs rje 'dod yon sgo ma 'gags// de lta bu yi snang ba sna tshogs pa// sku yi 'od zer la chags te// nang gi gzhon nu bum pa'i sku// shes bya rgya ni ral pa ste// phyi lhun grub chen por gnas pa'o// de rtsal longs spyod rdzogs snang 'char// de rtsal yon tan ma 'gags pas// rang bzhin sprul pa'i sku rnams srid// de yi thugs la ma 'gags pas// ma dag pa yi snang lugs byung// de las snang ba'i 'khrul tshul mang// dag pa rnams la lhun grub ste// ma dag rnams lnga rigs drug shar// de ltar lhun grub gcig po la// snang lugs rnam pa bzhi ru snang// ye shes gsal ba'i yul lnga las// gnyis 'dzin sems can byung ba'o// de tshe rkyen bzhi 'dus pa las// 'khrul pa'i gzhi ma bzhi ru 'byung// rgyu yi rkyen ni lhun grub dang// dmigs pa'i rkyen ni 'od snang nyid// bdag po'i rkyen ni thugs rje rang// de gsum dus gcig mtshungs pas na// mtshungs pa de ma thag gi rkyen// rkyen bzhis 'khrul pa'i dus tshod ni// rig dang ma rig gnyis 'dzin gnyis// lhun grub yul la shar dus 'khrul// 'khrul gzhi rnam pa mang bshad kyang// lhun grub dang ni thugs rje'o// de yang 'di ltar 'khrul lugs bshad// lhun grub chen po'i nang dbyings su// ma rig 'gyu ba rig rig po// thugs rje sprul pa'i rtsal du shar// nang du 'gyu byed de shes ni// phyi yi yul snang rnams la brtags// 'od khyim ye shes lnga po la// re re bzhin du rtog dpyod btang// 'od khyim pha gi nga yin nam// yang na gzhan ma zhig yin nam// nga ni 'od las byung ba'am// yang na rang la 'od byung ngam// snang ba thams cad rang yin nam// yang na bzhin snang yin nam bsam// de la yid du 'gyus pa las// rnam rtog gcig la gcig mthud nas// rnam rtog lu gu rgyud du 'brel// lhun grub dag kyang rtog pas bsdums// 'byung bzhi'i sa bon rnam bzhi chags// 'byung bzhi res 'dus res byed pas// 'byung ba de rnams rags su song// lhun grub nyid kyang bem po'i nang du 'thums// bem po dag kyang rigs drug rgya yi 'thums// sdug bsngal res mos 'khor ba'o// kun tu bzang mo klong gsal 'bar ma nyi ma'i gsang rgyud las/gzhi las 'khrul pa byung tshul gyi le'u ste drug pa'o//// de nas yang 'byung lnga'i bdag mo rigs bzhi'i mkha' 'gro mas zhus pa// kye kye kun bzang nyi ma'i klong// gzhi la 'khrul tshul bshad na yang// phyi snod 'ablig rten 'khrul tshul du// zhus pa'i lan du bka' k+p+ral pa// kye ho 'byung bzhi'i bdag mo nyon// gzhi yi rlung dang rig pa'i rtsal// shes pa bdag tu bzung ba'i sems// nang nas ye shes lnga la bzung// me long ye shes chu yi gzhi// mnyam nyid ye shes sa yi gzhi// sor rtogs ye shes me yi gzhi// bya grub ye shes rlung gi gzhi// chos dbyings ye shes nam mkha' gzhi// ye shes lnga la bdag bzung dang// nga min nga 'dra gnyis 'dzin byung// gnyis 'dzin rtog pa'i cha la ni// e raM yaM khaM su ru gsal// 'byung bzhi gzhi ma rnam lnga ni// der 'dzin bdag tu song ba las// 'byung lnga bem po can du grub// ye shes lnga po gsal ma nus// 'byung lngas hril gyis 'thums pa'o// kun tu bzang mo klong gsal 'bar ma nyi ma'i gsang rgyud las/ phyi snod du 'khrul pa'i le'u ste bdun pa'o///// yang gcig kun tu bzang mo la// rtog tshogs mkha' 'gro lngas gsol pa// ye shes lnga po 'byung lngar 'khrul// de yi 'khrul lugs bshad na yang// nang bcud 'khrul lugs gsung du gsol// zhus pa'i lan du bka' stsal pa// kye kye 'byung lnga'i bdag mo ni// rtog tshogs gnyis 'dzin mkha' 'gro nyon// ye shes rtsal gyi thugs rje las// rlung sems yid du 'gyus pa las// bem stong nam mkha' chos 'byung bshad// nam mkha'i rtsal shugs rdzogs pa las// shugs ldan brgyad khri 'byung bzhi bzung// de ni lte bar drod rlan byung// rlan la drod kyi ngar yang btags// drod la rlan gyi rtsal rgyas pas// zil pa phrom phrom la sogs kyang// nges bsdus res bshigs byas pa las// rgya mtsho chen po chags pa'o// rgya mtsho rlung gis bskyod pa las// bsrubs shing rlangs pa'i lbu ba la// dbang chen gser gyi sa gzhi brdal// dwangs ma rnams la rin chen lnga// snyigs ma rnams la sa dang rdo// rim pa bzhin du chags pa'o// 'byung ba lnga yi nang shed nas// dwangs ma dud rlangs lag ngar tsam// yar la chad cing 'dril ba las// 'od skor rba phub tsam pa gnyis// gcig ni snang la rang bzhin med// de la skye mched mu bzhi chags// 'od gnyis pa la mtho ris gnas bcu chags// de nas 'od gsum gyi rtsal// 'gyur ba sems yid sna tshogs 'gyu// yid kyi spyan gyis kun la gzigs// gzigs pas srid pa 'od kyi gzugs// sgo nga kha dog lnga ldan mthong// de nyid mdzes par mthong nas su// yid kyis sbyor ba byas pa la// mdzes pa'i chags sems sgo ngar 'thums// nyi ma rab snang ma yi tshul// zla ba dri med pa yi tshul// phyi ltar shed bu shed la sogs// nang ltar 'dod chags bya sgong dang// zhe sdang sbrul gyi sgo nga dang// gsang ba ltar na thabs shes gnyis// de dus za ba'i zas med pas// 'dod pa'i yon tan lnga la spyad// sa chu me rlung bzhi po la// gzugs sgra dri ro 'dod yon bzhi// nam mkha' dag la reg dang lnga// 'dod pa'i kha lo phyir ma log/ 'dod yon lnga yang yul lngar 'khrul// 'dod pa'i kha lo nang du log/ nang du 'dzin pa'i sems su song// phyi ru bzung ba'i yul lnga dang// nang du bzung ba'i dug lnga gnyis// gzung 'dzin gnyis la nyon mongs byung// chu la bdag bzung zhe sdang byung// sa la bdag bzung nga rgyal byung// me la bdag bzung 'dod chags byung// rlung la bdag bzung phrag dog byung// nam mkha' bdag bzung gti mug byung// gzung 'dzin gnyis la khong khro byung// de drug 'bras bu rigs drug smin// zhe sdang cha la dmyal ba rnams// nga rgyal cha la lha rnams dang// 'dod chags cha la yi dwags rnams// phrag dog cha la lha ma yin/khong khro'i cha la lha mi gnyis// gti mug cha la byol song ngo// 'gro ba rigs drug dpag tu med// dmyal ba rnams la gshin rje byung// lha la bya dang dbang phyug byung// yi dwags rnams la mo 'dre byung// pho 'dre rnams kyang zhor la byung// lha ma yin la gza' srin byung// byong song rnams la glu gnyan byung// 'gro ba rig drug de dag la// nga dang bdag tu bzung ba la// lha la pham lhung sdug bsngal dang// lha ma yin la 'khrug rtsod dang// mi la brel phongs sdug bsngal dang// byol song rnams la glen lkugs dang// yi dwags rnams la bkres skom dang// dmyal ba rnams la btso bsreg dang// 'khor ba nyid du 'khor ba'o// srid pa'i rtsa ba gzung 'dzin gyis// nang bcud sems can bsdus pa'o// klong gsal 'bar ma nyi ma'i gsang rgyud las/ snang ba bcud du 'khrul pa'i le'u ste brgyad pa'o///// yang gcig kun tu bzang mo la// 'byung lnga'i bdag mos 'di skad gsol// snod bcud de ltar 'khrul pa las// ma 'khrul ye shes gnas lugs ston// zhus pa'i lan du bka' stsal pa// kye ho 'byung lnga'i bdag mo nyon// sa rdo ri brag snyigs ma yin// de yi dwangs ma rtsi thog yin// 'byung ba chu 'di snyigs ma yin// de yi dwangs ma zla chu yin// 'byung ba me 'di snyigs ma yin// de yi dwangs ma nyi ma yin// 'byung ba rlung 'di snyigs ma yin// de yi dngas ma rang rtsal yin// 'byung ba nam mkha'i snyigs ma yin// de yi dwangs ma 'ja' tshon yin// phyi ltar 'byung ba rnam pa lnga// nang ltar ye shes rnam pa lnga// gsang ba ltar na 'ja' tshon lnga// yang gsang ltar na mkha' 'gro lnga/ bla med ltar na srog yig lnga// de ltar 'byung lnga la sogs lnga// byas pa med pa'i nam mkha' la// byung ba med pa'i ye shes shar// don gyi snying po ma 'dres pa// lnga ldan chu yi dkyil 'khor rgyas// gzung 'dzin bral ba'i bar snang la// ma 'dres yongs rdzogs sku gsum shar// 'khrul snang thams cad zhing khams lnga// chos nyid brdal ba chen po'i zhing// dag dang ma dag gnyis 'dzin bral// stong gsal mdangs lnga rdzogs pa ru// lhun grub 'od kyi gong bur gsal/ khams gsum thams cad dag pa'i zhing// srid gsum thams cad dag pa yi// stong gsum thams cad sku gsum dang// zhes kun tu bzang pos bka' stsal to// yang gcig phyi snod zhing khams la// dag pa'i zhing khams gnas tshul bshad// 'byung bzhi'i bdag mo yang nyon cig/ 'di nas shar phyogs 'jig rten khams// zhing khams ming ni mngon par dga'// sprul sku'i zhing khams yangs pa der// gzhal yas khang ni 'di lta ste// shar ri dkar po shel las grub// gru bzhi sgo bzhi rta babs ldan// sa gzhi thams cad rin po che// yid du 'ong zhing lta na sdug/ rin po che yi them skas dang// phyogs bzhir seng skar chen po bzhi// gseng ka'i nang du nyi ma shar// rin chen shel gyi khyim dang 'thab// nang du ye shes 'od lngar ldan// gzhal yas de yi phyi rim du// yan lag brgyad ldan chu bo dang// dri zhim khrus kyi rdzing bu dang// 'tsho byed sman gyi ldum ra yaud// de la nad kyis nyen pa rnams// 'thungs bkrus zos pas nad rnams byang// de yi phyi ma lcags ri la// mtsho lu chen po brgyad yod de// de yi nang na bya yi rigs// rnam pa sna tshogs nyid du ste// bya yi rgyal po ngang pa dang// 'thing ril dag dang ka ti dang// rma bya ne tso shang shang dang/ khu byug ri skegs la sogs pa// bya rig stong phrag brgyad cu dang// yid 'ong bya ni 'di lta ste// kang ka ri dang zer mo dang// wa ba dang bya skad dri'u skad// ki ting gser gyi rdo rje'i gzugs// de la sogs pa bya yi rigs// g.yu ltar sngo la dung ltar dkar// bye ru ltar dang in dra dang// rigs ldan bya la yid du 'ong// gsung snyan rnam pa sna tshogs sgrogs// de dag rnams kyi phyi rim du// rin chen bdun gyi lcags ri yod// de dag rnams kyi dbus su ni// rin chen bdun gyi khri rkang yod// chos 'chad pa yin bstan pa yod// pho brang de yi gtso bo ni// sprul sku rdo rje sems dpa' zhes// mtshan dang dpe byad ldan pa la// rdo rje rigs kyi 'khor gyis bskor// srod la rgyu yi chos rnams gsung// nyin phyed 'bras bu'i chos rnams gsung// de ltar dus bzhir thun bzhi'o// de ru gnas pa'i byang sems rnams// skye ba gcig gis thogs pa'o// lo yang lnga brgya lnga bcu thub// zhing khams de ni khyad par 'phags// skom rnams bdud rtsi'i chu 'thungs pas// skom pa'i tshad pa med pa'o// ting 'dzin gtsang ma'i zas za bas// zas zhes bya ba'i ming yang med// 'dod yon lnga la longs spyod pas// ltogs 'phyugs bya ba'i ming yang med// gzhal yas de yi zur bzhi la// mu tig chen po rnam bzhi yod// bar snang thams cad g.yer khas sprel// sprel thag rlung gis bskyon tsam las// yid 'ong sna tshogs sgra dang ldan// phyogs bzhir rab brtan sna tshogs bzhi// rlung gis bskyod pa'i dri zhim 'thib// zhing khams de yi yon tan ni// dpag med bsam las 'das pa'o// zhing khams gnas dang bcas pa de// 'di nas shar gyi phyogs rol du// dpag tshad lnga brgya 'das pa'i steng// rig pa rang snang yul na bzhugs// de ru skyes pa'i byang sems rnams// sum cu rtsa gsum dag dang ni// longs spyod thams cad mnyam pa'o// de ni sa la gnas pa yis// shar phyogs mngon dga'i zhing 'khod do// yang gcig rigs bzhi'i bdag mo dang// 'byung lnga'i bdag mo thams cad nyon// 'di nas lho yi phyogs rol du// dpal dang ldan pa'i zhing khams ni// rin chen gser las grub pa las// yon tan thams cad shar dang gcig/ rigs kyi sprul sku rin chen 'byung// 'khor du rin chen mkha' 'gros bskor/ kha dog gtso bo ma gtogs pa// gong dang 'dra bas rigs par bya// yang gcig 'byung lnga'i bdag mos nyon// 'di nas nub phyogs phyogs rol na// pad+ma brtsegs pa'i zhing khams na// pad+ma rA ga dag las grub// ston pa snang ba mtha' yas so// 'khor ni pad+ma'i rigs mchog go/ yon tan grub tshul thams cad kun// shar dang 'dra bar rdzogs pa'o// yang gcig 'byung lnga'i bdag mo nyon// 'di nas byang gi phyogs rol na// las rab brtsegs pa'i zhing khams yod// in+d+ra nI la'i gzhal yas khang// sprul sku don yod grub pa la// las kyi rigs kyi 'khor gyis bskor// gnas kyi yon tan brjod tshul rnams// mngon dga' dag dang mtshungs pa'o// yang gcig 'byung lnga'i bdag mo nyon// 'di nas dbus kyi phyogs rol na// 'thug po bkod pa'i zhing khams na// bai DUr+ya las grub pa ste// sprul sku rnam snang chen po la// bud+d+ha rigs kyi 'khor gyis bskor// yon tan thams cad shar dang gcig/ rigs lnga'i zhing khams lnga po ni// shar dkar lho ser nub dmar byang ljang dbus mthing// kun kyang ma 'dres mtshan nyid 'dzin// zhing khams lnga po 'di dag la// sems rigs rnam pa gsum med do// 'jig rten pa yi sems med do// dri ma dwangs pas sems med do// mtha' bzhi dri ma'i sems med do// rigs drug nyon mongs drug med do// rkyen bzhi rkyen gsum la sogs med// ces so// kun tu bzang mo klong gsal 'bar ma nyi ma'i gsang rgyud las/ phyi snod du 'khrul pa'i yul lnga la ma 'khrul pa'i sprul sku'i zhing khams la gnas pa'i byang chub sems dpa' rnams gnas tshul bstan pa'i le'u ste dgu pa'o//// yang gcig kun tu bzang mo la// rtsal snang mkha' 'gro lngas gsol pa// zhi ba'i gnas tshul gsungs na yang/khro bo'i gnas tshul gsung du gsol// zhus pa'i lan du bka' stsal pa// nyon cig rigs mdangs mkha' 'gro lnga// zhi ba'i zhing khams lnga po yis// rang rang mdun gyi bar snang du// sprul sku khro bo'i zhing khams yod// ming ni dur khrod me ri 'bar// de ru gzhal yas khang chen po// thod pa'i khang pa gru bzhi pa// thod skam kun gyis 'gram bzhi byas// rnying pa kun gyis bar rtsigs byas// cang lo can gyis kha bad byas// rgya dang 'phang du dpag tu med// gnam lcags gzer btab rak+tas byug/ nyi zla'i ka gdan 'od dang bcas// chu srin ka zhu lha brgyad gdung// gza' brgyad ka ba rgyu skar phyam// mchog gi dral ma zhing chen g.yogs// nyin bzhin rlung 'tshub mtshan me 'bar// gzhal yas de yi zur bzhi ru// zhing chen gdugs dang thod pa'i g.yog/ lha mo lha ni gar stabs sgyur// sa gzhi thams cad rak+ta'i mtsho// zhing chen zhing chung brdal ba'i klong// gzhal yas de yi nang nyid du// gzhon nu dpa' bo stobs dang ldan// thugs rje zhi bar ma g.yos kyang// sku ni khro bo'i cha lugs bstan// mkha' 'gro khro bo'i tshogs kyis bskor// mkha' 'gro pUrna nyer zhi dang// tshangs pa nyid ni dung mgrin can// drang srong zla 'od gzhon nu dang// e ka tsa ti spun drug dang// de yi bran mo bcu bzhi dang// g.yog mo lnga bcu rtsa brgyad dang// yang g.yog 'bum khri 'bum stong dang// mkha' 'gro ma yi 'du tshogs ni// bskal pa zhing gi rdul snyed du// bye ba dung phyur grangs med bskor/ khro bo de yi thugs sprul ni// phyag na rdo rje la sogs te/ khro bo dpag tu med pas bskor// 'khor gyi sde tshogs dag la yang// yang gsang bla na med pa'i chos// klong gsal nyi ma 'di nyid kyis// zhi ba sprul pa'i sku rnams ni// grol ba'i byed pa thams cad kyang/khro bo rnams kyi gnyer ma ni// ye shes ldan pa sha stag go/ dbang po tha ma thams cad ni// 'di la bred cing dngangs pas na// zhi ba rigs lnga'i zhing khams su// skye ba len pa sha stag go/de ni dbyings dang ye shes dang// thugs rje'i dgongs spyod bstan pa'o// kun tu bzang mo klong gsal 'bar ma nyi ma'i gsang rgyud las/ dbyings la khro bo gnas pa'i le'u ste bcu pa'o//// sa ma ya// yang gcig kun tu bzang mo la// mkha' 'gro rigs lngas yang zhus pa// kye kye kun tu bzang mo che// phyi snod 'byung ba lnga po la// ma 'khrul zhi khro gnas pa la// nang bcud sems can cir mi grol// zhus pa'i lan du bka' stsol cig/kye ho mkha' 'gro rigs lnga nyon// nang bcud rang grol nyid yin te// ma rig pa yi snang ba las// zhing khams de dag dgrar langs te// zhing khams gzhan du 'dod pa las// gong gi zhing khams de dag 'og/dpag tshad gcig gi cha ru ni// lam ma dag pa'i zhing khams yod// mi gtsang ba yi khang pa ni// rgya khyon dpag tu med pa'o// ro myags lam la 'khyil ba'i nang// sems can gzugs ni sna tshogs yod// dug gsum nad kyis gdungs pa'o// sems can la la phar la 'pho// sems can sna tshogs tshul la 'jug/ zas nor longs spyod sdug pa yod// gting rum mtshon char snag khrag 'bab// dug gsum dag las byung ba yi// ma dag pa yi khams lnga chos// de la skyes pa'i nyon mongs ni// stong phrag brgyad cu rang khar spyod// rtsa ba ma rig rgyu las byung// de lta bu yi gnas nyid du// sems can ma dag lhung ba'i gnas// de dang rig dang ma rig gnyis// rig pa rnams la sku dang ye shes dang// zhi khro'i zhing khams drug po dang// dag pa'i zhing khams bsam las 'das// snang ba thams cad sangs rgyas dang// byang chub sems dpa' sems ma dang// lha dang lha mo'i zhing du gsal// ma rig pa la ma dag yul// dug lnga dug gsum yul du shar// de yang dper na 'di lta ste// gang gis gang nyid ma rig na// rang gis rang nyid ma rig go/rig na sangs rgyas ma rig 'khor// rtogs na mya 'das ma rtogs sdug/ sems can sangs rgyas gnyis bar du// rta rnga brgyar gshags cha gcig tsam// sa 'og gser gyi rlangs pa'am// byi ba'i kha rlangs tsam pa'am// bya phod rkyen med 'gul ba tsam// de ni rig dang ma rig dpe// bar du de tsam gcig las med// ces kun tu bzang mo klong gsal 'bar ma nyi ma'i gsang rgyud las/dag pa'i zhing khams drug la dngangs nas/ ma dag pa'i zhing khams su gyur pa'i le'u ste bcu gcig pa'o///// yang gcig kun tu bzang mo la// 'khor tshogs kun gyis yang zhus pa// kye kye bzang mo yangs pa'i klong// dag dang ma dag gnyis bar dang// rig dang ma rig gnyis bar dang// rtogs dang ma rtogs gnyis bar du/ khyad par cung yang mi 'dug pas// bdag la der rtog nger bzung ste// rang la rang skyes rang byas pas// bdag rkyen dair rkyen der 'dzin gyis// 'dzin pa'i rgya dang bcas pa'o// dper na me stag ngan pas kyang// rkyen dang bsdongs na stong gsum 'tshig/ de bzhin rang rig ma rig rkyen// ma rig rig na rig par 'dug/ rig pa rkyen dang bral gyur na// snang srid thams cad chos sku'i zhing// gcig shes kun grol rig snang nyid// de ltar gcig tu 'dug pa la// bcud kyi sems can thams cad la// sku dang ye shes gnas tshul zhu// de skad ces ni zhus pa dang// chos nyid kun tu bzang mo nyid// lhun grub gnas nas sku bzhengs te// zhal phyag rnam par sku sprul te// sku yi mkha' la gsung gi zer// thugs kyi dbyings nas rang shar te// 'dus pa'i 'khor la 'di skad do// kye ho 'dus pa'i 'khor tshogs nyon// sems can lus ltar gnas pa la// bde bar gshegs pa'i sa bon gnas// de yang dwangs snyigs gnyis su dbye// phyi 'byung lnga po nang dang sbyar// sha 'di sa yi rang bzhin te// sha rus spu lpags snyigs ma yin// de yi dwangs ma rtsa gsum ste// dbu ma chos nyid spyi bor gnas/ khrag 'di chu yi rang bzhin te/khrag dang chu ser snyigs ma yin// de yi dwangs ma bzhi bstan khrag/ rang bzhin thig le snying la gnas// drod 'di me yi rang bzhin te// rang drod 'di ni snyigs ma yin// de yi dwangs ma bde byed me// ra sna'i rnam par lte bar gnas// dbugs 'di rlung gi rang bzhin te// 'gyu byed 'di nyid snyigs ma yin// de yis dwangs ma kun gy-i rtsal// lus rnams kun la khyab par gnas// sems 'di nam mkha'i rang bzhin te// stong pa had po snyigs ma yin// de yi dwangs ma bzhi yi rten// thig le stong gsal snying dkyil gnas// lar ni phyi nang 'byung ba lnga// lnga 'dus mtshan ma sbyar ba la// nyon mongs lnga dang yid drug la// ye shes lnga yi bdag nyid do// 'byung bzhis bsdus pa'i lus po la// sems kyi rgyu byas rlung gi rta// sa yis gzhi byas khrag gis bskyed// me yis smin pa'i sgyu lus 'di// phyi 'byung lnga dang sbyar ba la// gnyis med sku dang ye shes lnga// ma 'gags rang rtsal rdzogs par 'char// ces so// kun tu bzang mo klong gsal 'bar ma nyi ma'i gsang rgyud las/ nang bcud sems can gyi 'byung ba'i dwangs snyigs phye ba dang/ye shes ngos bzung ba'i le'u ste bcu gnyis pa'o//// yang gcig klong nas bka' stsal pa// kye ho 'dus pa'i 'khor tshogs nyon// srid pa'i rtsa ba bdag 'dzin nyid// phyi nang kun brtags ye stong grol// stong pa nyid kyi snying po ni// thig le nyag gcig sku ru rdzogs// de yang bdag 'dzin rgyu yis 'thums// rgya 'di bkrol ba'i man ngag ni// stong nyid rnam pa bcu drug yin// phar phyin drug la bco brgyad yin// chos rnams kun gyi de bzhin nyid// nang 'dzin sems kyis stong pas na// nang gi stong pa nyid yin no// phyi yi yul du 'dzin pas stong pas na// phyi yi stong pa nyid yin no// phyi nang bar gyi dbang po lngar// 'dzin pa stong pas gnyis su med// phyi nang med pa'i stong pa nyid// de dag thams cad spangs pa ru// 'dzin pa dag kyang stong pas na// gnyis su med pa'i stong pa nyid// 'byung ba chen po gling bzhi dang// ri rab dag kyang lhag par yang// chags pa 'dzin pas stong pas na// chen po stong pa nyid du'o// de la kun rdzob sgrib g.yogs kyi// stong pas don dam stong nyid do// dge rtsa'i blo sems rnam pa stong// 'dus byas stong pa nyid du'o// 'dus ma byas kyi dge ba yang// rlom sems dag gis stong pas na// 'dus ma byas kyi stong nyid do// mtha' las 'das kyi 'dzin pas stong// mtha' las 'das kyi stong pa nyid do// thog ma bar dang tha ma ru// sems can rnams kyi don byed par// 'dzin pa thams cad stong pas na// thog ma dang ni tha ma med// stong pa nyid du shes par bya// mya ngan dag las 'das pa'i tshe// sems can kun gyi don mi 'dor// dor ba stong ste dor ba med// stong pa nyid ces yang bdag go/ snang ba thams cad rang bzhin gyis// gnas pa'i rigs ni stong pas na// rang bzhin stong pa nyid du'o// 'khor 'dus chos rnams thams cad kun// yod par 'dzin pa stong pas na// chos rnams thams cad stong nyid do// sangs rgyas rnams la mtshan dpe byad// rang gi mtshan nyid yod pa ru// 'dzin pa stong pas rang gi mtshan nyid stong// chos rnams mi dmigs pa ru ni// spu tsam 'dzin pa stong pas na// mi dmigs pa yi stong pa nyid do// dngos po med pa'i 'dzin pa rnams// mtha' de stong pas dngos po med// ngo bo nyid kyis stong pa'o// de dag thams cad gcig tu dril// nang gi dwangs ma'i dwangs ma yin// yang gcig bcud du dril ba yis// de la thig le nyag gcig zer// don du sku gsum ngo bo yin// thig ni chos sku ka dag go/le ni longs sku rang snang ngo// nyag ni sprul sku kun khyab po// gcig ni sku gsum 'du 'bral med// sems can kun gyi rgyud la gnas// zhes don dam pa'i sku gsum gcig tu dril ba gnas pa'i le'u ste bcu gsum pa'o//// yang gcig kun tu bzang mo la// 'khor tshogs 'dus pas yang zhus pa// kye kye de stong kun bzang yum// ma grub thog ma'i gong dag tu// kun khyab ye shes gnas pa la// 'khrul med 'khrul dang gnas pa'i tshul// spyi sdom rim pa gsung na yang// sems can kun gyis mi go bas// bye brag rgyas par gsung du gsol// zhus pa'i lan du bka' stsal pa// kye ho 'dus pa'i 'khor tshogs nyon// thog ma'i ka dag gsal stong khyab// 'khrul pa ka nas dag pa la// ye shes nyid la ma rig 'khrul// ye shes gsal ba'i yul lnga las// gnyis 'dzin sems can byung ba'o// bdag rtog der rtog der 'dzin gyis// ye shes lnga la yul lngar 'khrul// yul dang rkyen bzhi shar ba las// 'byung ba lnga yi sa bon rgyas// ye shes lnga yang 'byung bzhis 'thums// 'byung bzhi'i rtsal las snod bcud chags// snod bcud kun gyi dwangs ma las// nyi ma dang ni zla ba gnyis// yab yum tsha grangs nyi mtshan 'byed// de yang snod bcud rtsal yin phyir// 'dzam gling bye ba phrag brgyar khyab/ nyi ma me yi dwangs ma yin// zla ba chu yi dwangs ma yin// gza' skar sa yi dwangs ma yin// rlungs mdangs yin pas rgyu ba'o// 'byung bzhi gcig grogs gcig yin pas// 'byung bzhi rgyas dus nyi ma ring// 'byung bzhi snyoms dus nyin mtshan mnyam// 'byung bzhi 'khrug dus nyi ma thung// drod mdangs thams cad nyams pa'o// 'byung bzhi byer dus nyi zla 'grib/ kha char bu yug thams cad kun// 'byung ba bzhi yi rtsal yin phyir// dbyar ni 'byung ba rgyas pa'i dus// rtsi thog lo 'bras rgyas pa'o// ston ni 'byung bzhi snyoms pa'i dus// 'bras bu thams cad bcud du smin// dgun la 'byung bzhi 'khrugs pa ste// rtsi bcud thams cad nyams pa'o// dpyid gsum 'byung ba byer ba ste// mdangs stobs thams cad nyams pa'o// de rnams 'byung bzhi'i dar gud do// byer zug rnams kyang de dang 'dra// bskal pa lo zla zhag za ma// byer dang zug dang snyoms pa'o// 'khrugs pa dag kyang bzhi ru 'dus// bskal pa'i byer zur 'di lta ste// bskal pa 'jig dus byer pa yin// bskal pa chags dus zug pa yin// bskal pa gnas dus snyoms pa yin// bskal pa stongs dus khrugs pa'o// lo yi byer zug 'di ltar ro// bya sprel khyi yi lo la byer// stag yos rta yi lo la zug/ byi phag glang gi lo la snyoms// 'brug sbrul lug gi lo la 'khrugs// zla ba'i byer zug 'di ltar ro// dpyid zla gsum la 'byung bzhi byer// dbyar zla gsum la 'byung bzhi zug/ ston zla gsum la 'byung bzhi snyoms// dgun zla gsum la 'byung bzhi 'khrugs// zhag gi byer zug 'di ltar ro// nam langs nyi shar 'byung bzhi byer// nyin par 'byung bzhi snyoms pa'o// dgongs mo 'byung bzhi 'khrugs pa dang// nam phyed 'byung ba zug pa'o// zhi rgyas dbang drag las rnams kun// 'byung bzhi dag gi byed la sogs// des na byer zug brtsi bar bya// byer pa'i dus su zhi ba 'grub// zug pa'i dus su rgyas par 'grub// snyoms pa'i dus su dbang rnams 'grub// 'khrugs pa'i dus su drag po'o// de ltar dus rnams sbyar shes na// 'byung bzhi thams cad dbang du sdud// kun tu bzang mo klong gsal 'bar ma nyi ma'i gsang rgyud las/ 'byung bzhi rnams kyi byed las kyis dar gud/ 'pho 'gyur yod pa'i rgyu/ byer zug snyoms 'jug rtsi ba'i le'u ste bcu bzhi pa'o//// yang gcig kun tu bzang mo yis// 'khor gyi tshogs la yang gsungs pa// kye ma snang ba'i 'khor tshogs nyon// da ni 'byung bzhi bshad par bya// de yang bshad lugs 'di ltar ro// 'byung ba phyi nang bar gsum la// phyi dang nang dang gsang ba gsum// dar gud 'pho 'gyur yong ba'i rgyu// bem po dag ni 'dod g.yos pas// shed bu shed la rog ces pa// thabs shes nyi zla kha sbyor bar// 'byung bzhi dmigs pa'i rkyen g.yos te// 'byung ba lnga la skye gnas bzhi// rigs drug sems can dpag med skyed// sas ni lus kyi gzhi byas te// 'phel bas sha rus lpags par smin// chus ni lus kun bsdus pa ste// 'phel bas khrag dang chu ser smin// mes ni lus kun smin pa'o// 'phel bas drod ni rgyas par 'dod// rlung gis lus kun 'degs pa ste// 'phel bas sbubs su smin par 'dod// nam mkha' rang bzhin 'phel 'grib med// de ltar 'byung bzhi'i byed las kyis/ khams gsum pa yi khang pa ru// rgyud drug sems can re mos 'khor// ming dang gzugs kyi 'dam la chags// rang ngo ma shes rang rgyud 'khrul// 'khrul pa'i lus kyi grub tshul ni// ma rig 'gyu ba rig rig po// don la rig pa'i rtsal yin kyang// rlung la rta byas yid du 'gyur// der 'dzin rlung sems 'gyus pa las// nyon mongs lnga dang yid drug dang// 'dod pa'i chags sems bsdongs nas su// gti mug dag gis gzhi bcas nas// zhe sdang dag gis dpung bskyed de// nga rgyal dag gis nga bdag nas// 'dod chags dag gis rab sbyar te// phrag dog dag gis rab bsgrims nas// sems zhes bya ba hrig hrig po// me dang 'dra ba hur hur po// sa dang 'dra ba tig tig po// chu dang 'dra ba myur myur po// nam mkha' 'dra ste phyal phyal po// lnga 'dus lus sems sbyor ba la// 'dod chags dag ni rab g.yos te// pha ma'i bde ba 'bar ba'i dus// pha yi thig le zho ltar lug/ rgyu yi thig le yungs 'bru tsam// zla ba'i tshul du mngal la babs// ma yi rak+ta dkar dmar gnyis// rgyu yi rak+ta sran ma tsam// dmar la dngas pa nyi ma'i tshul// zla nyi gnyis ni thabs shes te// ga'u kha sbyor tshul du gnas// de gnyis bar du rlung sems gnyis// don la ye shes rang rtsal te// ga'u kha sbyor bar du 'thums// yi ge a yi tshul du tshud// dran pa byung tshor thams cad 'gags// lha khang nang du tshud par sems// bde ba chen po'i ngang du gnas// sems yid thogs pa can du song// mngal rgyar ma 'thums bar du ni// srid pa'i bar do zhes bya ste// sngon du srid pa'i sha gzugs can// dbang po kun tshang yid kyi lus// thogs med pa ru kun tu rgyu// de yang dag dang ma dag gnyis// mngal dang rgyu rkyen gcig pa'o// dag pa ye shes 'khor lugs dang// ma dag rigs drug 'khor tshul lo// de yang rang dbang can dang ni// rang dbang med pa'i 'jug tshul lo// rang dbang can du 'thums pa ni// dran bzhin mngal sgor bltams pa dang// dran bzhin 'gro don dgongs pa dang// dran bzhin sbubs su 'tshang rgya dang// dran bzhin lhun grub 'tshang rgya dang/ dran bzhin mngal du 'tshang rgya dang// dran bzhin rang dbang can la nges pa med// rigs drug la sogs nges pa med// skye ba rnam bzhi gang yang rung// dag pa ye shes 'jug sgo'o// rang dbang med pa'i 'khor lugs ni// las ngan dbang gis lus ngan len// mngal sgo bsdam pa'i dbang med pas// srid pa las kyi 'phen len gyis// ma rabs rigs ngan mdze yugs sam/ khyi phag byol song gcan gzan rnams// 'bu sbrang la sogs srog chags rnams// mi gtsang 'dam skyag ma rungs par// skye ba rnam bzhi gang yang rung// rang ngo ma shes rang rgyud 'khrul// ma dag pa yi mngal rgyar 'thums// de ni dbang med 'khor lugs so// de ltar rnam pa yar mar gnyis// yar gyi ka dag chos sku yin// mar gyi ka dag rdo rje dmyal// de bzhin skye ba rnam pa bzhi// yar dang mar gnyis shes par bya// yar gyi sgong skyes rdo rje sems// mar gyi sgong skyes bya dang srin// yar gyi brdzus skyes sprul sku lnga// mar gyi rdzus skyes yi dwags tshogs// yar gyi drod skyes mi lha tshogs// mar gyi drod skyes 'bu srin tshogs// yar gyi rlan skyes chu yi lha// mar gyi rlan skyes grang dmyal dang// yar gyi mngal skyes sprul sku drug/ mar gyi mngal skyes nyon mongs drug/ 'dra ba 'dra ste nor la re// de ltar mngal du ma zhugs par// rlung sems dbyer med ye shes lnga// mngon par shes pa drug dang ldan// de tshe rjes dran drug po gces// rjes dran mngal rgyar 'thums pa ni// mi lus len pa'i rlung sems dang// pha ma'i thig le dkar dmar dang// rgyu rkyen bzhi po 'dzom pa la// 'byung ba bzhi yi lus su song// mtshal dang zho gnyis bsres pa ltar// 'byung bzhis res bsdus res bshigs pas// mer mer po dang nur nur po// gor gor po dang ltar ltar po// mkhrang 'gyur khyab 'jug rus sbal ltar// rim pa bzhin du lus sems chags// zhag ni bdun tshan bcu bzhi'i bar// 'byung bzhi lus rnams rim bzhin bskyed// lus la rtsa chags rtsa la thig/ de la sku dang ye shes so// rlung ni kun la khyab par chags// de ltar zla dgu ngo bcu la// mngal de btsog pa'i 'du shes kyi// lus rdzogs mngal nas phyi la 'byon// 'phul byed rlung gis mar la 'phul// mgo mjug log nas phyir la 'byung// de nas mngal gyi rgya dang bral// sngar gyi bag chags srab tu song// phyis kyi nyer len ngo ma phrad// shes pa sngar las mi gsal cing// rtsa rlung kun gyi stobs ma skyes/ khams kyi dwangs snyigs ma phye bas// nad gdon mi mthun sna tshogs sdang// de nas khams kyi zas skom gsos// dwangs mas khams kyi nus pa bskyed// snyigs mas lus kyi stobs bskyed de// lus sems rim bzhin bskyed pa dang// dug lnga dug gsum nyon mongs rnams// rim bzhin rdza dreg lta bur chags// rig rtsal nyid kyang dug lngas 'thums// dper na mar me rdza phub 'dra// lus rdzogs me yi lus de nyid// dang po 'byung bzhis skyed par byed// bar du 'byung bzhi snyoms par gnas// tha ma 'byung 'khrug byer bas 'joms// zhes kun tu bzang mo klong gsal 'bar ma nyi ma'i gsang rgyud las/ nang bcud sems can gyi chags tshul nang 'byung bzhis bsdus pa'i lus rang dbang can dang/rang dbang med pa'i 'khrul tshul gyi le'u ste bco lnga pa'o//// kun tu bzang mos yang gsungs pa// kye ma 'dus pa'i 'khor tshogs nyon// rten gzhi lus kyi 'khrul tshul las// de bzhin gshegs pa'i sa bon dang// sku dang ye shes gsum brtsegs nas// 'byung bzhis gar khyab lus kyis khyab// lus kyis gar khyab rtsa yis khyab// rtsa yis gar khyab rlung gis khyab// rlung gis gar khyab thig les khyab// thig les gar khyab sku yis khyab// lus ni sku gsum lus yin te// sku gsum yi ge gsum dang ldan// mi lus rin chen de dag ni// mngal zhugs byang chub lnga ldan no// zla ba dgu ni theg dgu ste// ngo bcu sa bcu'i tshul du'o// skye gnas rang bzhin sprul pa'i sku// ye shes chen po'i 'byung gnas yin// lus can kun la bzang ngan med// bde gshegs snying pos kun la khyab// ngo bo rang bzhin thugs rje gsum// til la mar gyis khyab bzhin gnas// ye nas rang rig ye shes la// da lta 'khrul kyang ye shes rtsal// ma rig grol tshe 'byung bzhi'i lus// lha med ye shes lnga ru zlog/ sems can rang rgyud rtog tshogs rnams// sangs rgyas grangs las 'das pa'o// phung po 'byung ba yab yum bcu// dug lnga ser sna thub pa drug/ tshogs brgyad sems dpa' yab yum brgyad// sgo bzhi sgo ba yab yum bzhi// mig gnyis nyi ma zla ba gnyis// rang byung rig pa'i rang rtsal la// sku lnga dang ni ye shes lnga// 'od lnga kha dog rlung lnga dang// yi ge shes rab rtog pa lnga// gzhi lnga lam lnga 'bras bu lnga// rig pa'i ye shes sku lnga shar// rnam snang mi bskyod rin chen 'byung// snang ba mtha' yas don yod grub// phung po bzhi dang skye mched kun// rgyal ba'i dkyil 'khor chen por gnas// zhes kun tu bzang mo klong gsal 'bar ma nyi ma'i gsang rgyud las/rten lus kyi dkyil 'khor la/ sku dang ye shes gnas tshul bstan pa'i le'u ste bcu drug pa'o//// yang gcig 'dus pa'i 'khor tshogs la// kun tu bzang mos yang gsungs pa/ kye kye rig pa'i 'khor tshogs nyon// da ni rtsa yi ngo sprod bstan// spyir na rtsa bshad thams cad kun// don la yod pa ma yin te// dmigs pa'i rten du bshad par bya// lus la gnas pa'i rtsa rnams ni// bye ba ther 'bum gnas pa'o// de rnams tshur la bsdus pa yis// stong phrag brgya dang bcu gnyis gnas// de yang tshur la bsdus pa yis// lus kyi dkyil 'khor lnga ru 'dus// spyi bo bde chen 'khor lo ru// rtsa 'dab sum brgya drug cu gnas// mgrin pa longs spyod 'khor lo ru// rtsa 'dab brgyad gnyis bcu drug gnas// snying ga chos kyi 'khor lo ru// rtsa 'dab sum cu so gnyis gnas// lte ba sprul pa'i 'khor lo ru// rtsa 'dab drug cu rtsa bzhi gnas// gsang gnas bde chen 'khor lo ru// rtsa 'dab nyi shu rtsa brgyad gnas// 'khor lo lnga po de yi dbus// rtsa gsum ka ba srog shing tshul// ro ma g.yas la rkyang ma g.yon// kun 'dar ma ni dbus su gnas// ro ma chu la rkyang ma sa// kun 'dar ma ni rlung gis skyed// shel sbubs can ni zhor la'o// phyi ltar 'khor lo lnga po ru// dbus su 'byung yig lnga ldan gnas// laM/ raM/ e/ b+h+rUM/ su/ khaM/ nang ltar khams gsum/ eM/ raM/ yaM/ gsang ba ltar na mkha' 'gro lnga// ha ri ni sa/ yang gsang ltar na yab yum gnyis/ ra/ tsa/ hri/ ya/ bla med ltar na grangs las 'das// lar ni rtsa mdud de dag las// ye shes 'od kyi gong bu ni// bsam yul 'das pa gnas pa'o// de rnams rtsa yi phyi shar yin// nyung ngu bsdus na snying la 'dus// sems can kun gyi lus kyi dkyil// tsit+ta rin chen gzhal yas su// rtsa ni stong phrag grangs mang yang/khyad par rtsa chung bzhi ru 'dus// de la rkyang ma kun 'dar ma// ka ri shel sbubs can dang bzhi// 'di bzhi'i nang du khyad par du// snang rig mngon sum ye shes ni// gnas shing rlung gi rta la zhon// 'od zer nyi zer tshul du ni// rtsa la lam byas mig la zhugs// nam mkha'i dbyings su rgya ral nas// sku gsum ngo bo rjen par snang// zhes kun tu bzang mo klong gsal 'bar ma nyi ma'i gsang rgyud las/lus kyi rtsa gnad bshad pa'i le'u ste bcu bdun pa'o//// yang gcig 'dus pa'i 'khor tshogs la// kun tu bzang mos bka' stsal pa// kye ma 'dus pa'i 'khor tshogs nyon// rtsa yi nang du rgyu ba'i rlung// nyi khri dang ni stong phrag gcig/ drug brgya dag tu 'gyu ba yin// 'gyu ba chen po'i rlung du 'dod// de yi byed las rnam pa gnyis// gyen rgyu thur sel las rnams byed// rtsa nas nges par 'gyu ba ni// 'bum phrag gcig dang khri phrag gnyis// stong phrag drug dang brgya phrag drug/ rtsa nas nges par 'gyu ba ste// 'gyu ba chung ba'i rlung du 'dod// mkhas pas rlung gnad brtag pa gces// ye shes rlung la kha dog med// 'on kyang 'di ltar shes par bya// sa chu me rlung chu rlung dang// nam mkha'i rlung dang rgyu rlung dang// rnam pa lnga la ming lnga ste// srog 'dzin rlung dang me rnams rlung/ khyab byed rlung dang srog 'dzin rlung// dwangs snyigs 'byed pa'i rlung dang lnga// re re la yang lnga lnga ste// 'khor lo lnga la rtsa lnga gnas// yin kyang ye shes lnga ru 'dus// ye shes lnga yang bya grub dang// don la reg pa'i ngo bor gnas// rlung zhes rig pa'i rang rtsal yin// thams cad rlung gi byed las so// rtsa dang rlung dang sems dang gsum// tha dad bshad kyang gcig tu 'dus/ khyab pa'i rlung lnga snying la gnas/ khyab ni lus rnams kun la khyab// rlung ni sems kyi rta pho yin// 'gyu ni rtsa gsum nang du 'gyu/ khyab ni stong gsum yongs la khyab// ces rlung gi gnas lug ngo sprad pa'i le'u ste bco brgyad pa'o//// yang gcig 'dus pa'i 'khor tshogs la// kun tu bzang mos bka' stsal pa// kye kye 'dus pa'i snang rig nyon// ye shes rtsal gyis lus grub pas// de la rtsa grub thig les khyab// rgyu yi thig le yi ger gnas// de la sku dang ye shes kyi// thig le dag ni gnas pa'o/khyad par rtsa gsum 'khor lo lngar// gzhi yi thig le bzang po dang// lam gyi thig le bzang po dang// bzang po rnams kyi rtse mo dang// bzang po rgyan dang ldan pa yang// rtsa rnams kun gyi nang na gnas// spyir na thig le 'od ltar gnas// rtsa re'i nang na rlung re gnas// rlung re'i rtsa la thig le re// thig le sku dang ye shes so// thig le chos nyid lta 'dod na// don dam dang ni kun rdzob gnyis// don dam thig le chos kyi sku// thig le stong pa'i sgron ma'o// thig ni chos sku 'pho 'gyur med// le ni longs skur gsal ba dang// nyag ni sprul sku kun la khyab// gcig ni sku gsum gcig tu 'ong// kun rdzob thig le 'di ltar ro// pho la thig le dngos su 'bab// mo la bde ba rgyas pa'i dus// rna bug g.yas su 'bab par 'gyur// kun rdzob thig le de nyid ni// 'byung ba lnga yi dngas ma yin// de la yi ge thig le gnas// kun rdzob thig le sbyangs pa yis// don dam yi ge thig le mjal// 'dod chags can gyi rnal 'byor las// rig ma mtshan nyid ldan pa la// kun rdzob rgyu yi thig le ni// phab cing gzungu dang zlog pa dang// rtsa la btab cing rlung la bsre// stong nyid brten bya blo bya blo rjes bcad// lus dang sems gnyis go bzlog bya// de ltar byas pa'i yon tan ni// chos sku thig le nyag gcig thob// sku gsum rdo rje gnas par mthong// spyir yang thig yang theg le'i mtshan nyid ni// grangs can rnam pa bcu drug ste// grangs med spu yi grangs dang mnyam// 'das dang ma 'das gnyis kyi srog/ don dam kun rdzob gnyis su med// rgyu yi thig le yi ger gnas// rtsa dang rlung dang thig le gsum// phyi ltar 'byung ba rnam lnga yin// nang ltar yum chen rnam lnga yin// gsang ba ltar na khro bo yin// yang gsang ltar na ye shes lnga// yang gcig rgyu yi thig le ni// phyi ltar 'khor lo lnga yin no// nang ltar thig le lnga yin no// gsang ba ltar na ye shes lnga// a ha ri ni sarba ces pa'o// yang gsang ltar na mkha' 'gro lnga// yang gcig rgyu yi thig le ni// phyi ltar 'byung ba lnga yin no// nang ltar nyon mongs dug lnga yin// gsang ba ltar na sku lnga ste// yang gsang ltar na ye shes lnga// de ltar rig thog ngo yang sprad// ces kun tu bzang mo klong gsal 'bar ma nyi ma'i gsang rgyud las/thig le ngo sprad pa'i le'u ste bcu dgu pa'o////// yang gcig kun tu bzang mo yis// rig snang 'khor la 'di skad do// kye kye 'dus pa'i 'khor tshogs nyon// da ni yi ge'i gnas lugs bshad// rtsa rlung thig le gsum gyi rtsal// ye shes 'od kyi gong bu gnas// yi ge'i grangs ni bsam las 'das// bye ba ther 'bum sa ya ste// bsdus na grangs can 'di ltar ro// a/ ha/ 'a/ sa/ sha/ ma/ oM AHhUM/ de ltar yi ge rnam pa dgu// 'gag med lam la de bzhin gshegs// yi ge'i sgra ni stong pas tshig las 'das// a/ ha/ 'a/ sa/ sha ma/ oM AHhUM/ chos thams cad skye 'gag gnyis su med pa'i yi ge rang shar ba'o// a/ ma/ 'a/ sa/ sha na/ d+ha ma/ sarba/ ka ma/ b+ha ni/ sarba/ g+ha ta/ d+ha sa ni/ sarba/ ya sho d+ha ni/ sarba/ sa/ saM/ 'u/ b+ha/ b+ha su/ d+ha na/ sarba/ pan tri/ pa ra/ sarba/ Da du Na/ye/ sarba/ sha sarba/ ya/ ka du/ gla/ oM swa ra/ sho ta ni/ U+oM/ sku gsum 'dus ma byas pa'i ye shes nam mkha' nas rang shar ba'o// A+oM/ ko sho ma ti yI/ a pra b+ha na sarba nya na du ya yA/ don mtshon du med pa'i yi ge'o// nga ni ji tsam mo stam ma nus pa/ sarba d+harma kA ya ma ti saM b+ha ra/ sku yongs su mya ngan las 'das pa'i yi ge rang shar ba'o// 'o de dreg mi lha ha ad ma ko sha tsakra la ki/ gsung rnam par dag pa'i yi ges rig yongs su dag pa mya ngan las 'da' ba'o// shri badzra mu tad te se nya/ prad nya pa ra sa dus stan ka ti/ thugs mnyam pa nyid kyi ye shes rang shar ba'o// maM g+haM ha sa hUM/ yon tan mi zad pa'i ye shes rang shar ba'o// saM ta ka phu mu ska'u ma ha du b+ha ri ke ta ke ta/ d+ha thiM/ a d+ha thiM/ phrin las thogs pa med pa'i yi ge rang shar ba 'o// a/ 'a/ ha/ sha sa ma/ yi ge drug pa rdo rje'i sgra// sangs rgyas pa yi thabs bstan pa'o// a bag kya/ e ma ki ri/ ma ta b+ha/ si Sha si ta sa mi ta/ su ru su ru kun d+ha li/ ma su ma su/ i kA ra li su/ b+ha sa ti i/ tsa ka ra b+hu li ye/ sa mun ta/ tsar+ya su g+ha yA+e/ b+hi ta sa na/ 'byang b+hu li yA+e/ sa ka ri ru ka na/ma ta si bi ta ne/ pa ra khi hi sa ha/ la sa kha ra ta ka la na/ sa b+hu da ra ta/ me g+he tsa ra sa staM phurgya g+ha ta ra A+e/ pa sha sbyang pa ra na/ b+ha hi ti/ saM ma/ smin sa g+hu ti ta ba la/ gu ra g+ha ta/ sa ga kha ra sa na laM/ na ra na ra na I tha ra ba ti la/ sid d+ha sid d+ha/ b+he sa ta yas laM/ b+hud d+ha b+hud d+ha/ tsha tsha sha pa ge laM/ sa sa ri rI/ li lI/ i I/ ma ma ra ra rA/ kun tu bzang mo'i gzungs zhes bya ba/ btags pas sangs rgya ba'i gdams ngag yang dag pa'o// A+oM a ga na ya ma/ i yin na mo sa nyi tsam sa tsa sa raM sa hA/ btags pas grol ba'i yi ge rnams// bstan pa gang la babs pa yin// rin chen bzhu ba'i khu bas bri// su yi lus la btags pa rnams// nges par grol bar 'gyur ba'o// kun tu bzang mo klong gsal 'bar ma nyi ma'i gsang rgyud las// yi ge'i ngo sprod kyi le'u ste nyi shu pa'o//// yang gcig kun tu bzang mo yis// snang srid 'khor la 'di skad do// nyon cig snang srid 'khor rnams nyon// ye shes lnga las 'byung lnga grub// 'byung ba lnga las lus grub ste// lus la rtsa grub rtsa nang rlung// rlung la thig le yi ge'i tshul// de rnams kun gyi rang rtsal la// sku dang ye shes sm-in pa'o// de yang gnas tshul 'di ltar ro// 'jig rten khams gyi sems can la// de bzhin gshegs pa'i snying po ni// sku dang ye shes rtsa dang rlung// thig le nyag gcig sku rnams ni// rang chas su ni 'di ltar gnas// til la mar gyis khyab bzhin no// lus can rnams la bstan nas ni// gnas ni snying gi dkyil du gnas// phyi ni rgya yang ma bdal la// nang du 'od lnga ma 'gags pa// kun bzang ga'u kha sbyor du// dper na bse yi ga'u bzhin/ kha sbyor tshul du gnas pa'o// ga'u de yi dkyil shed du// 'od lnga'i dkyil du zhi ba'i sku// yungs 'bru tsam gcig 'od du gnas// de ni rigs pa'i gnas lugs so// rig pa'i sku ni bum sku 'dra// ye shes bum nang mar me 'dra// thugs rje nyi ma'i 'od zer 'dra// de las 'byung ba ye shes ni/ khro bo sku ni yungs 'bru tsam// ma 'gags spyan ni phul dag tsam// 'od dang 'od zer tshul du bzhugs// gnas ni klad pa'i nang du gnas// sku dang ye shes de dag ni// thog ma dag dang gnas pa'o// de las byung ba'i 'od zer ni// nyi ma'i dkyil 'khor lta bu'o// me long dkyil 'khor dwangs pa yis// nya yi mig bzhin gnas pa'o// de yang rig pa dag dang 'brel// tsit+ta snying gi rtse mo nas// rtsa ni dar dkar skud pa tsam// sgal tshigs 'dab nas yar la yod// de nas rtse'u chung g.yas su zhugs// mgo bo klad pa'i rgya dang 'brel// de yang sna 'dab g.yon nas gnyis// tshang tshing nang nas mig dang 'brel// dar skud ba men rwa 'dra'i dkyil// rgyal mo'i dkyil du rtsa de zug/snang ba yi ni 'char byed lam// rkyen gyis ma bsgribs sems can mig/ ming ni rgyang zhags chu sgron zer// snying la ye shes gnas pa de// lam ni rtsa la zhugs nas su// thon ni ye shes mig la thon// gsal ni nam mkha'i dbyings su gsal// dper na me long dkyil 'khor dwangs pa la// gang bstan rkyen ni 'char ba bzhin// de bzhin rnam dag stong pa'i nam mkha' la// don ni snying po ma 'dres tshom bu lnga// ma skyes rdzogs pa'i tshul du gsal// 'di rnams rang chas yin pas gzhan du ma tshol zhig/ rang byung rang shar ye shes 'od// rkyen gyis ma bsgribs zang thal nyid// thig le thig phran 'od kyi mu khyud bcas// nyi zlas brgyan pa'i rin chen khang pa ru// 'od lnga ma 'bres ye shes tshom bur gsal// lnga ldan tshom bu'i lha tshogs rnams// dpag med dmigs med bsam yul bral// phyi nang med par zang thal snang// zhi khro sprul pa yang sprul tshogs// rang gi 'od dang zer bzhin du// rang chas rnams su rnam par snang// 'char byed 'byung tshul mi 'gag pa// dbang po rnams dang 'brel ba'i tshul// snang ba'i yul dang gsal bar snang// kun gyi spyan la 'char ba'o// chos nyid stong pa'i nam mkha' la// rig pa ye shes zang ma gdal// ye shes 'od snang kun tu gdal// rigs drug lus kyang 'od kyi sku// bem po rnams kyang ye shes lus// zang thal nyid du gnas pa'o// kun tu bzang mo klong gsal 'bar ba nyi ma'i gsang rgyud las/ rtsa dang rlung gi thig le dang/ sku dang ye shes gnas tshul dang/ lam dang 'char sgo yul gang gsal nges par gsungs pa'i le'u ste nyer gcig pa'o////// de nas 'byung lnga'i 'khor tshogs dang// snang ba chen po'i 'khor la sogs// 'khor tshogs 'dus pas yang gsol pa// kye ho kye ho kye ma klong/ ma skyes pa'i nam mkha'/ ma 'gags pa'i snang ba/ kun la chags pa'i rig pa/ sku gsum gcig tu rdzogs pa'i mkha' klong/ de lta bu'i sku dang ye shes/sku'i sku mchog/ de lta bu'i sangs rgyas rang la rang chas su gnas pa las/ ma rig pa yod lags sam zhus pa'i lan du bka' stsal pa/ kye kye 'byung ba'i bdag mo nyon// legs par dgongs la thugs su chud// srog gis bsdus pa'i sems can la// nyon mongs ma rig shes cher gnas// rten ni gzugs phung dag la brten// gnas ni glo snying bar du gnas// ma rig pa dang sems dang yid// rnam pa gsum du gnas pa'o// ma rig rkyang pa med pa ste// sems kyis bag chags thams cad sdud// ye shes nyid la sgrib par byed// yid kyis yul rtog gnyis su 'dzin// rig snang nyid la sgrib par byed// de gsum gcig tu 'dus pa las// ma rig pa zhes bya ba ste// de ni 'khor ba'i ngo bo yin// de la dug lnga khong khro drug/ nyon mongs bag chags thams cad chags// kun gzhi dang ni 'dzin pa byung// nyon mongs rnam rtog de rnams ni// lam ni gang du byung ba ni// glo snying gnyis su 'brel ba'i bar// rtsa srog dmar po zhes bya ba// sog sbug tsam gyi nang nas yar// ma rig rnam rtog thams cad 'gyu// de ni sgal tshigs g.yon nas yar// rtse'u chung g.yon pa dag nas 'brel// de nas sna 'dab g.yon pa nas// gyes te kha sna gnyis la zug/ rnam par rtog pa thams cad ni// dbugs kyi rta la zhon byas nas// nyon mongs brgyad khri bzhi stong 'gyu// dug lnga khong khro rang gar spyod// yul rkyen rnams la brten byas nas// gzung ba'i yul dang 'dzin pa'i sems// thams cad sogs pa'i gzhi ma ni// rnam pa gsum du dbye ba ste// ye thog dang po'i kun gzhi ni// rig pa'i snang ba sdud cing bsogs// sbyor ba don gyi kun gzhi ni// nyon mongs sna tshogs sogs par byed// nyon mongs sogs pa'i kun gzhi ni// phung po khams la brten byas nas// nyon mongs du ma'i rten gnas byed// dper na rigs ngan khye'u bzhin// sgo nga'i yul la sems kyis bzung// snang yul du ma nyid du bzung// de phyir khams gsum khang pa ru// 'khor ba nyid du 'khor ba'o// de rnams dbang du ma shor bas// rig pa nam mkhar brdal bar bya// bar snang khams su ye shes ngos bzung ngo// zhes ma dag pa'i sems can thams cad la/ nyon mongs par rang khar shas che bas na/ ma rig pa dang sems dang/ yid gsum gyi gnas lam yul bstan pa'i le'u ste nyer gnyis pa'o//// sa ma ya/ gter rgya/ sbas rgya/ zab rgya/ gtad rgya/ dam rgya/// u rgyan pad+mo le'u nyer gsum pa 'di nyid la/ rgyud thams cad kyi mtha' bsdus pa ste// klong gsal gsum pa zla shel dang/ khyad par kun tu bzang mo'i rgyud// klong gsal 'bar ma'i rgyud dag las// ma grub thog ma'i gong dag tu// kun khyab ye shes gnas pa las// 'khrul med 'khrul dang gnas pa'i tshul// lam dang 'char sgo yul gang gsal// rkyen gyi bar chad ji lta bu// zhes pa'i tshig rkang dgu po la// da ni rkyain gyi bar chad bstan// gal te rnal 'byor gang zhig rnams// rang ngo ma shes rang rgyud 'khrul// snang ba rtog pa'i yul la shor// stong pa dngos po mtshan mar shor// bdag 'dzin gnyis kyi bar chad nas// bag chags rim pa bsal dka' bas// de la nyams len 'di ltar gces// nyams len gong 'phel grol ba'i rtags// bar chad byung na rgyud 'di nyid// rim pa ltar du ngo yang sprad// legs par ngo ni ma 'phrod na// bag chags gar sbyin 'byar sla bas// 'gogs par dka' ba nyid du 'gyur// sems la sangs rgyas gnas gyur kyang// ma bsgoms bar du b+hu ni tha// rang rig ye shes yin gyur kyang// ma bltas bar du gsal mi 'gyur// dper na til 'bru yungs 'bru la// mar ni ye nas gnas gyur kyang// ma btsir bar du mar mi 'byung// 'o ma mar gyi rang bzhin te// ma bsrubs bar du mar mi 'byung// sa la drod rlan ldan gyur kyang// so nam ma byas 'bru mi 'khrungs// lus po sangs rgyas zhing khams kyang// ma sbyangs bar du las mi dag/ ngag rnams chos kyi rang sgra ste// ma gsal bar du don mi rtogs// yid ni kun tu bzang mo ste// ma rtogs bar du brda mi 'jal// de ltar don ni bsgom par bya// zhes so// kun tu bzang mo nyi ma'i gsang rgyud las// zhal gdams gnad du bslab pa'i le'u ste nyer gsum pa'o//// de nas ston pa kun tu bzang mo/ yum gyi mkha' nas klong rdol te// sku yi dbyings nas gsung gi zer// thugs kyi klong nas rig pa'i ljags// dgu 'gyur lcog chung gro mo'i skad// snang ba'i yul na chos kyi sgra// rang skad du ni 'di skad do// kye ma 'byung lnga'i bdag mo nyon// snang ba gzugs kyi sku shar bas// ngo bo nyid kyi 'khor tshogs dgongs// dus gsum sangs rgyas thugs kyi bcud// gsang ba yang gsang bla na med// kun tu bzang mo snying gi thig/ mthar thug a ti'i dgongs pa 'di// tshig dang yi ger mi 'os kyang// snyigs ma'i sems can 'jug pa'i phyir// ma bcos lhug par mthong zhes pas// pad 'byung bdag gis gsal bar bkod// lha lcam pad gsal yi dam mdzod// rdo rje spre chung thugs la 'chang// rgya po yab yum gsang mdzod cig/nam zhig rkyen gyis bar chod na// rgyud 'di 'gro ba yongs kyi dpal/ khyad par glang lug khyi 'brug bzhi// stag sprel bya yi lo pa dang// rigs lnga pha rol phyin drug ming// rnam pa bcu gcig dpal du shog/smon lam re re bcugs pa dbyings la gsol// de nas yum gyis gsungs pa'i chos rnams ni// snying po gcig tu bsdus pa'o// zab mo gnad kyi gdams pa 'di// dus gsum sangs rgyas dgongs pa yin// mkha' 'gro rnams kyi snying khrag yin// yum chen bzhi yi snying bcud do// mkha' 'gro sde lnga'i thugs la sbos// rdo rje 'chang gis don 'di shod// longs sku rigs lngas rgya 'di khrol// dga' rab rdo rjes rgyud 'di zung// sing ha nyid kyis chog don shod// pad+ma'i mtshan gyis yi ger thob// snyigs ma'i dus su chos 'di dar// ku su lu yi don ched du// nga yis don 'di bshad par bya// snang ba ye shes blta ba'i phyir// nyams len rim pa 'di ltar ro// ma rig sems yid rnam pa gsum// nam mkha' gar khyab gsum gyis khyab// gsum po gar khyab nyon mongs khyab// sems can nyon mongs gsum sdong yin// de dag thams cad bsdu ba na// nyon mongs brgyad khri bzhi stong yin// de yang bsdus na dug lngar 'dus// de yang bsdus na dug gsum yin// de yang bsdus na gzung 'dzin gnyis// de yang rnam rtog gcig tu 'dus// rnam rtog nyid kyang ma rig pa// ma rig pa la rten byas nas// gzung 'dzin thag pa dam du bsdams// ngan song gsum gyi sgrog tu bcug/ 'khor ba nyid du 'khor ba'o// 'khor ba de la skyob pa'i thabs// dkon mchog gsum po ma gtogs pa// gzhan ma skyob gzhan mi 'dug pas// nyon mongs rnam rtog sdug bsngal gyis// gang du khyab pa thams cad kun// 'phags pa'i thugs rjes khyab pa'o// thugs rjes gar khyab sku yis khyab// sku yi gar khyab zer gyis khyab// de rnams bsdus par gyur pa na// gsang sngags kun gyi gnad 'dus pas// gsang sngags gnad rgyud ces su grags// 'di ni nor bu rin po che// 'di ni mun pa'i sgron me'o// mngon sum rang gnad bcar phog tu// ston par byed pa'i rgyud 'di la// thugs nas thugs su brgyud pa'i phyir// rgyal ba dgongs pa'i brgyud pa tshang// brda' nas brda ru brgyud pas na// brda' yi brgyud pa zam ma chad// snyan nas snyan du brgyud pas na// snyan khung brgyud pa zam ma chad// gter nas gter du brgyud pa'i phyir// gter gyi brgyud pa zam ma chad// 'di med dbang gzhi bskur ba kun// lag rdum gser gling phyin pa 'dra/ kha brag lam la zhugs pa'am// brag skam so nam byas pa 'dra// rgyud 'di rin chen gser gyis bris// rtag tu mi 'bral lus la bcang// rgyun du ma yengs don rnams bsgom// rgyud 'di reg pa tsam gyis kyang// yum chen nga dang 'du 'bral med// 'dzin chags skyes bu bud+d+ha 'o// rgyun du gus pa'i mchod pa yis/ khyim mam yul gnas sa phyogs der// mthun rkyen yon tan dpag med 'byung// phyi ma bar do med par grol// rgyud 'di su yis klog pa de// lta ba'i don ni khong du chud// rgyud 'di su yis bris pa'i mi// phyi ma sprul pa'i sku thob 'gyur// rgyud 'di gang na gnas pa na// mkha' 'gro chos skyong sprin ltar 'khrigs// lha dang lha mos mchod pa byed// de lta bu yi rgyud chen 'di// bla ma mi 'khur rang che 'dzin// dam tshig nyams dang rdzun po che// bril ma nor chung tshang rdzangs so// sgom sgrub mi nus chang nag srid// shes rab che yang nyams len dor// 'bul ba mi nus stong zhus byed// dad gus med cing g.yo khram sgyur// blo mi brtan cing snying rus med// de lta bu la bka' 'di gsang// blo chung brkam dreng can la gsang// skal med rang 'dod can la gsang// dam nyams lag tu shor ba na// gsang sngags thams cad bka' 'chol nas// mkha' 'gro 'khrugs te mi dge 'byung// bka' srung 'khrug cing srid mi sreg/ de bas rab gsang nan chags bya// gtad par bya ba'i snod ldan ni// mkha' 'gro sde lnga rnams la gtad// rig rtsal mkha' 'gro khyed rnams kyis// spyan ras gzigs kyi sprul pa mchog/ pad+ma thod phreng rtsal la gtod// des kyang rin chen gter du gdams// nam zhig dus kyi tha ma la// sems can nyon mongs rang gar spyod// chos zhugs mang yang chos brgyad sgrub// sgom chen sgom sgrub yal bar dor// dge bshes thams cad bzang rdzus 'debs// gsang sngags khrom bshad rang gar spyod// mtshan nyid sde gsum chos la yang// dge bcu pha rol phyin drug dang// lam lnga sa bcu spyod mkhan med// bdag 'dzin rtog pas khengs pa'i tshe// 'dus byas skyes bu las 'phro can// rgyu 'bras chos mkhyen rig gnas mkhas// blo che blo ldan blo gsal ba// 'jam dpal nyid kyi sprul pa mchog/ theg chen a ti'i don spyod pa// bla med ti la'i bdag po la// bka' 'di gtod cig sa ma ya// des kyang don bcud lnga ldan pa'i// bu mchog rnams la rim gyis gtod// ces gsungs so// de nas yum chen nyid chos sku skye med kyi mkha' klong du dmigs med du yal te/ ye shes kyi mkha' 'gro ma rigs lnga yang yi rangs te/ 'khor rnams kyis kyang mngon par bstod de/ dbang bzhi thob ste 'khor bcas kyis yon tan thams cad rdzogs nas/ slar yang 'khor ba dong nas sprug pa la 'jug cing/ sems can rnams smin grol la bkod do// theg pa kun gyi mthar thug/ rmad byung snying po'i bstan pa/mkha' 'gro gsang thig klong gsal 'bar ma nyi ma'i gsang rgyud las/ le'u brgya drug cu rtsa drug pa las/ dbang bzhi'i le'u gsang sngags gnad rgyud ces bya ba'i mjug yongs su gtad pa'i le'u ste nyi shu rtsa bzhi pa'o//// sa ma ya/ rgya rgya rgya/ gter rgya/ sbas rgya/ zab rgya/ dam rgya/ blags srung shan pa nag po dang/ gza' bdud dug gi spu gri 'bar ba/ dam can rdo rje legs pa gsum gyis bka' 'di yi srung ma gyis shig/thub par srungs shig/

CLOSE WINDOW