CLOSE WINDOW

Gpb033.009
བོད་ཡིག

rgya gar skad du/ u pa de sha sarba sU tra/ shrI ma hA su kha na maH bod skad du/ man ngag thams cad kyi sdom/ dpal bde ba chen po la phyag 'tshal lo// man ngag spyi yi rgya mdud 'di// blo dman rnams kyis ma khrol ba// pho snying 'dra ba'i lta bas bkrol// ma rig tha rams sngon po 'di// rmongs pa rnams kyis mi phyed pa// 'phrul gyi lde mig 'di yis phye// de la thog mar gsang ba'i bdag pos/ nyid kyi byang chub kyi sems bsod nams kyi ngo bo yin pas/sems dpa' rdo rjes rig cing rtogs sam/ zhes bya ba dri ba'i phyir/ 'di skad ces gsungs so// kye sems dpa' rdo rje nyon cig/ nga yi byang chub sems gcig ni// ye shes lnga yi rang bzhin pas// de don khyod kyis rtogs gyur tam// sems dpa' rdo rjes yang gsol pa/ kye gsang ba'i bdag po lags// nyid kyi byang chub sems gcig ni// ye shes lnga yi rang bzhin pa// de don bdag gis rtogs gyur te// sems nyid dbyings nas ma g.yos pa// chos dbyings ye shes yin par rtogs// gsal la rtog pa med pa ni// me long ye shes yin par rtogs// sems la dbye ba med pa ni// mnyam nyid ye shes yin par rtogs// sems nyid cir yang snang ba ni// kun rtog ye shes yin par rtogs// sems kyis kun la dbang bsgyur ba// bya grub ye shes yin par rtogs// zhes gsol to// yang gsungs pa/nga yi byang chub sems gcig ni// bde gshegs rigs lnga'i rang bzhin la// de don khyod kyis rtogs gyur tam// sems dpa' rdo rjes yang gsol pa// kye gsang ba'i bdag po lags// nyid kyi byang chub sems gcig ni// bde gshegs lnga yi rang bzhin pa// de don bdag gis rtogs gyur te// sems nyid cir yang snang ba ni// rnam par snang mdzad yin par rtogs// sems la 'pho 'gyur med pa ni// rdo rje sems dpa' yin par rtogs// che ba'i ye shes byung bas na// rin chen 'byung ldan yin par rtogs// sems kyis kun la khyab pas na// snang ba mtha' yas yin par rtogs// bya btsal med par grub pas na// don yod grub pa yin par rtogs// zhes gsol to// yang gsungs pa/ nga la byang chub sems gcig ni// sangs rgyas sku lnga'i rang bzhin pa// de don khyod kyis rtogs gyur tam// sems dpa' rdo rjes yang gsol pa// kye gsang ba'i bdag po lags/ nyid kyi byang chub sems nyid ni// sangs rgyas sku lnga'i rang bzhin pas// de don bdag gis rtogs gyur te// gzung 'dzin pa yi byang chub sems// de ni chos sku yin par rtogs// gsal la rtog pa med pa ni// longs spyod rdzogs sku yin par rtogs// sems la dbang thob bsgyur nus pa// de ni sprul sku yin par rtogs// rang rig mngon du gyur pa ni// mngon par byang chub sku ru rtogs// sems la nyis skyon med pa ni// rdo rje lta bu'i sku ru rtogs// zhes gsol to// yang gsungs pa/ kye sems dpa' rdo rje nyon cig/ nga yi byang chub sems gcig ni// nyon mongs dug lnga'i rang bzhin pa// de don khyod kyis rtogs gyur tam// sems dpa' rdo rjes yang gsol pa// nyid kyi byang chub sems gcig ni// nyon mongs dug lnga'i rang bzhin pa// de don bdag gis rtogs gyur te// 'dod pa srid gsum sangs rgyas 'dod// chags pa chos nyid ngang la chags// sems ni 'dod chags yin par rtogs// zhe ba byang chub don la zhe// sdang ba 'khor ba'i chos la sdang// sems ni zhe sdang yin par rtogs// gti ba chos nyid don la gti// mug pa 'khor ba'i chos la mug/ sems ni gti mug yin par rtogs// nga ni byang chub sems yin la// rgyal ni theg pa kun las rgyal// sems ni nga rgyal yin par rtogs// phrag ni chos nyid dbyings kyi phrag/ dog pa mtshan ma kun la dog/ sems ni phrag dog yin par rtogs// zhes gsol to// yang gsungs pa/ nga yi byang chub sems 'di ni/ kha dog drug gi rang bzhin te// de don khyod kyis rtogs gyur tam// sems dpa' rdo rjes yang gsol pa// nyid kyi byang chub sems nyid ni/ kha dog drug gi rang bzhin pa// de ni bdag gis rtogs gyur te// byang chub sems kyi chos nyid la// nyon mongs skyon gyis ma gos pas// byang chub sems ni dkar por rtogs// che ba'i ye shes 'byung ba'i phyir// byang chub sems ni ser por rtogs// thugs rje kun la khyab pa'i phyir// byang chub sems ni dmar por rtogs// gang la'ang thogs pa med pa'i phyir// byang chub sems ni ljang gur rtogs// gzhan gyis bsgyur du med pa'i phyir// byang chub sems ni nag por rtogs// sna tshogs cir yang snang ba'i phyir// byang chub sems ni khra bor rtogs// zhes gsol to// yang gsungs pa/ kye sems dpa' chen po nyon cig/ nga yi byang chub sems gcig ni// 'dod spyod lnga yi rang bzhin pas// de don khyod kyis rtogs gyur tam// rdo rje sems dpas yang gsol pa// kye gsang ba'i bdag po lags/ nyid kyi byang chub sems gcig ni// 'dod spyod lnga yi rang bzhin pa// de don bdag gis rtogs gyur pas// snang ba thams cad sems las snang// des na sems nyid gzugs su rtogs// grag pa thams cad sems la grag/ des ni sems nyid sgra ru rtogs// ro phyogs thams cad sems la bro// des na sems nyid ro ru rtogs// dri phyogs thams cad sems la bro// des na sems nyid dri ru rtogs// reg tshogs thams cad sems la reg/ des na sems nyid reg tu rtogs// zhes gsol to// yang gsungs pa/ kye sems dpa' rdo rje nyon cig/nga yi byang chub sems gcig ni// 'byung ba lnga yi rang bzhin la// de don khyod kyis rtogs gyur tam// sems dpa' rdo rjes yang gsol pa// kye gsang ba'i bdag po lags// nyid kyi byang chub sems gcig ni// 'byung ba lnga yi rang bzhin pa// de don bdag gis rtogs gyur te// byang chub sems kyis kun bsdus pas// byang chub sems la kun brten pas// byang chub sems ni chu 'drar rtogs// kun la snyoms shing smin mdzad pa'i// byang chub sems ni me 'drar rtogs// gzugs med khams la rgyu bas ni// byang chub sems ni rlung 'drar rtogs// snang med mkha' la khyab pas ni// byang chub sems ni mkha' 'drar rtogs// zhes gsol to// yang gsungs pa/ kye sems dpa' chen po nyon cig/ nga yi byang chub sems gcig ni// sku lnga mngon du phyung gyur pa// de don khyod kyis rtogs gyur tam// sems dpa' rdo rjes yang gsol pa/kye gsang ba'i bdag po lags/ nyid kyi byang chub sems gcig ni// sku lnga mngon du phyung gyur te// byang chub sems kyi ye shes ni// 'byung chen lnga yi skur phyung nas// tshig dang yi ger mi ston to// rang gi ngo bos chos ston to// bdag tu mi rtog gzhan mi rtog/ mi rtog mnyam pa'i chos ston to// zhes gsol to// yang gsungs pa/ kye rdo rje sems dpa' nyon cig/ nga yi byang chub sems gcig ni/khams gsum dag gi rang bzhin pa// de don khyod kyis rtogs gyur tam// sems dpa' rdo rjes yang gsol pa// kye gsang ba'i bdag po lags// nyid kyi byang chub sems gcig ni/ khams gsum dag gi rang bzhin pa// de don bdag gis rtogs gyur te// byang chub sems kyi chos nyid de// ma skyes stong la skye med pas// de ni gzugs med khams su rtogs// dbang po yul du snang ba ni// de ni gzugs kyi khams su rtogs// de nyid zhen pas bzung ba ni// de ni 'dod pa'i khams su rtogs// zhes gsol to// yang gsungs pa/ kye sems dpa' rdo rje nyon cig/ nga yi byang chub sems gcig ni// sku gsung thugs kyi rang bzhin pa// de don khyod kyis rtogs gyur tam// sems dpa' rdo rjes yang gsol pa/ kye gsang ba'i bdag po lags// nyid kyi byang chub sems gcig ni// sku gsung thugs kyi rang bzhin pa// de ni bdag gis rtogs gyur te// rang bzhin ngo bo thugs rje gsum// sems kyi sku las sku gzhan min// des na sems kyi sku ru rtogs// snod bcud sgra skad sna tshogs pa// sems kyi gsung las gzhan mi grag/ des na sems nyid gsung du rtogs// kun gyis mi rtog mnyam nyid de// byang chub sems kyi thugs yin pas// des na sems ni thugs su rtogs// zhes gsol to// yang gsungs pa/ kye sems dpa' chen po nyon cig/nga yi byang chub sems gcig ni// dus gsum bzhugs pa'i rang bzhin pa// de don khyod kyis rtogs gyur tam// yang sems dpa' rdo rjes gsol pa/ kye gsang ba'i bdag po lags// nyid kyi byang chub sems gcig ni// dus gsum bzhugs pa'i rang bzhin pa// de don bdag gis rtogs gyur te// 'das dang ma byon da ltar gyi// dus gsum dbye ba med pa ru// byang chub sems ni gnas pa'i phyir// sems nyid dus gsum khyab par rtogs// zhes gsol to// yang gsungs pa/ kye sems dpa' rdo rje nyon cig/ nga yi byang chub sems gcig ni// rgyu 'bras lam gyi rang bzhin pas// de don khyod kyis rtogs gyur tam// sems dpa' rdo rjes gsol pa/ kye gsang ba'i bdag po lags// nyid kyi byang chub sems gcig ni// rgyu 'bras lam gyi rang bzhin pa// de don bdag gis rtogs gyur te// sems rtogs sangs rgyas byung ba'i phyir// sems ni sangs rgyas rgyu ru rtogs// ma yis gnas pa lam yin pas// sems ni sangs rgyas lam du rtogs// mngon du gyur pa 'bras bu pas// sems ni 'bras bu yin par rtogs// zhes gsol to// yang gsungs pa/ kye sems dpa' rdo rje nyon cig/ nga yi byang chub sems gcig ni// phun sum tshogs pa'i rang bzhin pa// de skad khyod kyis rtogs gyur tam// sems dpa' rdo rjes gsol pa/kye gsang ba'i bdag po lags// nyid kyi byang chub sems gcig ni// phun sum tshogs pa'i rang bzhin pa// de don bdag gis rtogs gyur te// rang byung ye shes sgrib med pas// ston pa phun sum tshogs par rtogs// rig pa 'du 'bral med pa ni// de 'khor phun sum tshogs par rtogs// sems nyid ma bcos rnal bzhag pas// bstan pa phun sum tshogs par rtogs// zhes gsol to// yang gsungs pa/ kye sems dpa' chen po nyon cig/ nga yi byang chub sems gcig ni// tshul ni ji ltar yin par rtogs// sems dpa' rdo rjes gsol pa/ kye gsang ba'i bdag po lags// nyid kyi byang chub sems gcig ni// tshul ni 'di ltar tshogs gyur te// yin tshul nges pa med pa la// snang tshul cir yang snang bar rtogs// zhes gsol to// yang gsungs pa/ kye sems dpa' rdo rje nyon cig/ yod par rtogs sam med par rtogs// sems dpa' rdo rjes gsol pa/ kye gsang ba'i bdag po lags// nyid kyi byang chub sems gcig ni// mtshan ma'i dngos por med par rtogs// rig pa'i ngo bor yod par rtogs// zhes gsungs so// yang gsungs pa/ kye sems dpa' rdo rje nyon cig/ nga yi byang chub sems rtogs yid ches dad pa ji ltar skye// de don khyod kyis rtogs gyur tam// sems dpa' rdo rjes gsol pa/ kye gsang ba'i bdag po lags// nyid kyi byang chub sems rtogs pas// yid ches dad pa 'di ltar skye// byang chub sems kyi chos nyid kyis// ci ltar snang ba'i chos rnams kun// mi snang ba la mngon du 'byin nus pas// chos kyi snying po yin par yid kyang ches// rgyu las ma byung rkyen gyis ma bskyed pas// rang byung ye shes yin par yid kyang ches// rang bzhin bcu yis rtsal du med pa'i phyir// ma btsal lhun gyis grub par yid kyang ches// chos rnams thams cad gtan la phab pa'i phyir// bstan pa'i sgron me yin par yid kyang ches// nyams su blangs shing blo la bzhag pa'i chos yin pas// man ngag kun gyi rtsa ba yin par yid kyang ches// sde snod kun dang rgyud kun gyi// 'byung gnas gtan la 'bebs pas na// kun gyi spyi 'brel yin par yid kyang ches// rgyu 'bras theg pa can la khyad 'phags pas// theg pa'i nying khu yin par yid kyang ches// dus gsum sangs rgyas thams cad kyi// lam du khyer ba'i chos nyid de// byang chub sems las med pa'i phyir// bstan pa'i yangs chen yin pas yid kyang ches// thams cad nyid du 'dus pa'i phyir// kun gyi rtsa ba yin par yid kyang ches// thams cad nyid kyis byas pa'i phyir// kun gyi mkhan po yin par yid kyang ches// thams cad nyid las byung ba'i phyir// kun gyi 'byung gnas yin par yid kyang ches// thams cad nyid la gnas pa'i phyir// kun gyi gzhi ma yin par yid kyang ches// thams cad las la gyes pa'i phyir// kun gyi sdong po yin par yid kyang ches// thams cad nyid las med pa'i phyir// kun gyi ngo bo yin par yid kyang ches// snang med kun la khyab pas na// brdal ba chen po yin par yid kyang ches// gcig las du mar bgrang du med pa'i phyir// thig le nyag gcig yin par yid kyang ches// dus gsum 'pho 'gyur med par bya ba'i phyir// mi nub rgyal mtshan yin par yid kyang ches// rang la yod cing rtogs par dka' ba'i phyir// gsang ba'i man ngag yin par yid kyang ches// zhes gsol to// de nas sems dpa' rdo rjes gsang ba'i bdag po la 'di skad ces gsol to// kye gsang ba'i bdag po lags// bla med byang chub chen po 'di// bcos pas grub bam ma bcos grub// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ bla med byang chub chen po 'di// bcos pas grub pa ma yin te// ma bcos rnal du bzhag pas grub// sngar 'das sangs rgyas thams cad kyang// ji bzhin pa la bcos pa med// da ltar sangs rgyas thams cad kyang// ji bzhin pa la bcos mi mdzad// ma 'ongs sangs rgyas thams cad kyang// ji bzhin pa la bcos mi 'gyur// gsang ba'i bdag po nga yis kyang// ji bzhin pa la bcos ma myong// sems dpa' chen po khyod kyis kyang// ji bzhin pa las bcos ma byed// sems dpa' chen po rang lus ma bcos pa la lha ma bsgoms// smra ba'i tshig dang ngag ma bcos// kye sems dpa' chen po nyon cig/ chu ma snyogs na dngas/ sems ma bcos na gsal/ lam ma bgrod na nye/ 'bras bu ma dmigs na thob/ kye sems dpa' chen po ji ltar snang ba'i chos rnams kun/de bzhin nyid du gcig pa la// de las su'ang 'chos par ma byed cig/ ma bcos mnyam pa'i rgyal po de la ni/ mi rtog chos sku'i dgongs pa 'di la gnas// ci bzhin pa la bcos ma byed// ji bzhin pa la sus bcos pa// de yis rnal du 'byor pa med// rnal du ma 'byor don mi 'grub// ji bzhin pa la 'chos ma byed// ji bzhin pa la su 'chos pa// de yi mya ngan mi 'da' ste// de ni 'khor ba'i snying po 'grub// kye sems dpa' chen po/ rang las med kyi gzhan ma blta// 'gro sa med kyi cog ge sdod// phugs na 'dug gi sgor ma 'byung// ye nas yin gyis gzod ma 'tshol// rang byung ye shes phugs nas sgor phyung bas// mtshan ma sna tshogs chos dang thug gis phrad// de la brtags shing dpyad byas pas/ khams gsum 'khor ba'i snying po 'grub// rang byung ye shes phugs nas sgor phyung bas// bltar med bltas pas ma mthong sgrib pa 'byung// btsal med btsal bas ma grub gol sa byung// kye sems dpa' chen po'o// byas pa'i spyod pa spyod pa zang ma min// dmigs pa'i ting 'dzin sgom pa zang ma min// gsal ba'i ye shes ye shes zang ma min// bsgrubs pa'i 'bras bu 'bras bu zang ma min// phyogs lhung yod na lta ba zang ma min// 'pho 'gyur yod na chos nyid zang ma min// 'byung ba'i spyod pa spyod pa zang ma min// dmigs pa med na sgom pa zang ma yin// gsal 'grib med na ye shes zang ma yin// lhun gyis grub pa ye shes zang ma yin// phyogs lhung med na lta ba zang ma yin// 'pho 'gyur med na chos nyid zang ma yin// kye sems dpa' chen po de lta bas na/ chos ji bzhin pa'i ngang la blo ji bzhin pa bzhag ste/ dbang po rgya yan/ rig pa khyab gdal/ lus sems bcos pa med par bzhag go/ dbang po yul la yan pa bsdu mi bya// yul dang dbang po mi dbye lhug par bzhag/ chos rnams ngo yis mi bzung gyi nar bzhag/ mnyam gzhag yin la gzhog cig rjes thob rta ltar btsa'// zhes gsungs so// yang gsol pa/ kye gsang ba'i bdag po lags/dpe mtshon tshig gi lde mig gis// don gyi gsang sgo dbye bya ste// de don bdag la bstan du gsol// gsang ba'i bdag pos gsungs pa/ kye sems dpa' chen po nyon cig/ dpe mtshon tshig gi lde mig gis// don gyi gsang sgo dbye bya ste// de don bstan pa 'di lta ste/ mkha' la shar ba'i gzugs sogs rnams// dngas pa'i rgya mtsho chen po ru// de nyid ma 'dres yongs su rdzogs// de bzhin chos rnams thams cad kyang// gnyis med ye shes ngo kha la// de nyid ma 'dres yongs su rdzogs// mkha' la shar ba'i gzugs sogs rnams// dngas pa'i rgya mtsho chen po yis// blang ba med cing dor ba med// gzung ba med cing dor ba med// mkha' la gzugs sogs shar ba rnams// chu nang gzugs brnyan shugs kyis 'byung// kun gzhi mkha' la rig shar bas// rig pa'i rtsal shugs shugs kyis 'byung// mkha' la shar ba'i gzugs sogs dang// chu nang dag gi gzugs brnyan gnyis// gcig pa ma yin tha dad min// de bzhin rig pa'i rgyal po dang// rig pa'i rtsal du snang ba gnyis// gcig pa ma yin tha dad min// dper na nam mkha'i gzugs gcig la// chu nang gzugs brnyan bsam mi khyab// de bzhin rig pa gcig pa la// rig pa'i rtsal shugs bsam mi khyab// dper na chu nang zla ba yang// snang yang de la rang bzhin med// de bzhin rig pa'i rtsal snang ba// snang yang de la rang bzhin med// tshon lnga 'dres pa'i kha dog la// 'di zhes gcig tu ngos gzung med// de bzhin so sor dbyer med kyang// kun bral ci yang ma spangs pa'o// chos rnams 'dus pa'i ye shes la// 'di zhes gcig tu ngos gzung med// de bzhin so sor dbye ba yang// kun bral ci yang ma spangs pa'o// sna tshogs dar gyi ming rnams kyang// za 'og snam bur byas tsam na// sna tshogs dar ming bral nas kyang// snam bur btags pa ji bzhin du// de bzhin chos rnams thams cad kyang// gnyis med ye shes bsdus tsam na// sna tshogs chos kyi ming dang bral nas kyang// gnyis med thig le chen por gcig/ gser las byas pa'i rdzas rnams kun// ming dbyibs la sogs tha dad kyang// ngo bo gser du gcig pa bzhin// sems kyis btags pa'i chos rnams kun// ming dbyibs la sogs tha dad kyang// chos nyid ngo bor dbyer med gcig/ dper na ras snam yug gcig la// tshon gyi rkyen gyis so sor snang// snang yang ras su dbyer med gcig/ de bzhin chos kyi rgyu gcig la// dbang po rkyen gyis so sor snang// chos de ngo bor dbyer med gcig/ shel sgong dag gi drung dag tu/ kha dog sna tshogs ras bzhag pas// gang bzhag rkyen gyis de ltar snang// snang yang shel la 'gyur ba med// de bzhin sems nyid rgyud gcig la// 'gro ba rigs drug so so nas// las bag rkyen gyis so sor snang// chos nyid ngang las 'gyur ba med// rgyu nyid gser du gcig pa la// bzo yi las kyis bsgyur byas te// sku gzugs chen po byas pa'i tshe// gser yang bzo yi rdzas su snang// chol zangs dri snod byas pa'i tshe// gser yang ngan pa'i rdzas su snang// de bzhin chos nyid rgyu gcig la// 'khrul pa can gyis brtags tsam na// yul yang ma dag 'jig rten khams// ngam grog g.yang sa lung khung rnams// ye shes can gyi ngo kha la// yul gyi zhing khams rnam dag ste// bde ba can gyi yul du snang// gnyis med ye shes ngo kha la// snang dang mi snang gnyis su med// sman dang dug tu gcig pa la// la la'i sman yang la la'i dug/ ha la nag po'i dug dag kyang// thabs mkhas bza' legs sman gyi mchog/sman pa'i rgyal po bcud len yang// thabs ma mkhas shing bza' nyes na// ha la nag po'i dug dang mtshungs// 'dod chags zhe sdang gti mug kyang// bskyed pa med pa'i ye shes yin// rang byung ye shes chen po yang// rnam rtog rlung gis bskyod tsam na// 'dod chags zhe sdang gti mug yin// sa 'og gnas pa'i gser dag byang// bdag po med na rdo dang 'dra// dgos pa ci yang che rgyu med// kun la yod pa'i byang chub sems// ye shes med na 'khrul pa yin// dgos pa ci yang che rgyu med// mi g.yo ye shes ldan gyur na// thig le nyag gcig chos kyi sku// byin rlabs yid bzhin nor bu'i tshul// de nas sems dpa' rdo rjes gsang ba'i bdag po la 'di skad ces gsol to// kye gsang ba'i bdag po lags// rdzogs pa chen po'i nges tshig ji ltar lags// de la blang dor yod dam med// gsang ba'i bdag pos gsungs pa// ji ltar nam mkha'i mtshan nyid du// snang nyid ma bgag shong ba ltar// rdzogs pa chen po'i mtshan nyid du// med pa'i chos dang yod pa'i chos// de bzhin srid dang mi srid pa// sangs rgyas sems can bde sdug bsngal// bzang ngan che chung skyon yon tan// lhag ma med par yongs rdzogs pas/ de phyir de la rdzogs zhes bya// rin po che yi gser gling du// thams cad gser las med pa'i phyir// dor du rung ba yod ma yin// rdzogs pa chen po'i chos nyid la// spang ba gang yang med pa'i phyir// dor du rung ba yod ma yin// gnyis med ye shes kho na la// mtshan ma ci yang mi snang phyir// blang du rung ba yod ma yin// ces gsungs so// yang gsol ba/ kye gsang ba'i bdag po lags/ ma 'dres yongs su rdzogs zhes bya// de don bdag la bstan du gsol// gsang ba'i bdag pos gsungs pa/ mkha' la gzugs sogs ma 'dres pa// chu nang phyogs su yongs su rdzogs// 'byung ba rnam bzhi ma 'dres pa// nam mkha'i ngang du yongs su rdzogs// sna tshogs dar sna ma 'dres pa// za 'og snam bur yongs su rdzogs// tshon rtsi rnam lnga ma 'dres pa// dkyil 'khor chen por yongs su rdzogs// rin chen sna bzhi ma 'dres pa// ri bo mchog rab yongs su rdzogs// kun rdzob phyogs nas ma 'dres pa// don dam phyogs su yongs su rdzogs// chos can phyogs nas ma 'dres pa// chos nyid phyogs su yongs su rdzogs// bsam dbang phyogs nas ma 'dres pa// dngos dbang phyogs nas yongs su rdzogs// 'khrul dbang phyogs nas ma 'dres pa// gnyis med phyogs su yongs su rdzogs// brgyad kyi lta spyod ma 'dres pa/ a ti yo gar yongs su rdzogs// yang gsol pa/ kye gsang ba'i bdag po lags/ spyi bcings rgyal po zhes bgyi ba// de don bdag la bstan du gsol/gsang ba'i bdag pos gsungs pa// lam gyi spyi ni grongs kyis bcings// chu dran spyi ni rgya mtshos bcings// ri bdun spyi ni ri bos bcings// 'byung bzhi'i spyi ni nam mkhas bcings// theg pa'i spyi ni a tis bcings// sku gsum spyi ni gsang chen sku yis bcings// ye shes kun gyi spyi dag ni// rang byung ye shes chen pos bcings// snang srid chos kyi spyi dag ni// chos nyid byang chub sems kyis bcings// zhes gsungs so// yang gsol pa/ kye gsang ba'i bdag po lags/ gang zag dag gi bsam dbang dang// chos nyid dag gi dngos dbang gnyis// de don bdag la bstan du gsol// gsang ba'i bdag pos yang gsungs pa// btags pa thams cad blo yis btags// gzung ba thams cad blo yis bzung// phye ba thams cad blo yis phye// brjod pa thams cad blo yis brjod// snang ba thams cad blo la snang// grub pa thams cad blo la grub// dngos dbang de las zlog pa'o// re zhig blo la bsgom bya na// yin tshul nges pa med pa'i phyir// snang tshul cir yang snang ba yin// rgya chad phyogs lhung med pa yin// ma 'dres yongs su rdzogs pa yin// kun bral ci ma blong ba yin// ldan ldog gnyis dang bcas pa yin// de la dbye ba med pa yin// sgro skur kun dang bral ba yin// zhes gsungs so// yang gsol pa/kye gsang ba'i bdag po lags/ phyogs cha can gyi lta ba la// de la bstan par bgyi mi bgyid// bde gshegs gsang ba'i bdag po yis// phyogs cha can du gsungs pa de// nges don lags sam dgongs bshad lags// gsang ba'i bdag pos bstan du gsol// gsang ba'i bdag pos gsungs pa/ phyogs gcig spangs na phyogs gcig bla// phyogs la chags pas phyogs thug mtha'// phyogs ris med pa'i lta ba la// phyogs cha can du gzung ba de// lta ba ngan te lding ba yin// de la bstan par mi bya'o/ khyed la sogs pa'i 'khor rnams kyis/ bsregs bcad brdar ba'i gser bzhin du// yongs su brtags te nga yi bka'// blang bar bya yi gus phyir min// nga yi bka' ni dgongs pa can// yod mtha' dgrol phyir med mtha' bstan// med mtha' dgrol phyir yod ces bstan// gnyis med dgrol phyir nyag gcig bstan// spros dgrol phyir na brjod med bstan// brjod med dgrol phyir kha 'byam bstan// lta ba 'phrul gyi kha 'byam 'di// ji ltar nam mkha'i mdung bskor bzhin// gang ltar skor yang dog pa med// ji ltar 'dam gyi phur pa bzhin// gang ltar bskul yang sgul du btub// lpags pa rlon pa'i mtha' bzhin du// gang ltar 'then yang 'then du btub// ji ltar smyon pa'i tshig bzhin du// gang ltar smras kyang rang dbang che// zhes gsungs so// yang gsol pa/ kye gsang ba'i bdag po lags/ chos kyi sku dang longs spyod rdzogs// sprul pa'i sku dang rnam pa gsum// gcig pa lags sam tha dad lags// chos kyi sku dang chos dbyings sam// gcig pa lags sam tha dad lags// chos kyi sku dang ye shes gnyis// gcig pa lags sam tha dad lags// rang byung ye shes chen po dang// ma rig pa yi 'khrul pa gnyis// gcig pa lags sam tha dad lags// chos can mtshan mar 'dzin pa dang// chos nyid don gyi ngo bo gnyis// gcig pa lags sam tha dad lags/ khams gsum 'khor ba'i sems can dang// dus gsum bzhugs pa'i sangs rgyas gnyis// gcig pa lags sam tha dad lags// gsang ba'i bdag pos bstan du gsol// gsang ba'i bdag pos gsungs pa/ bsam dbang 'khrul pa'i phyogs nas mi gcig tha dad kyang// gnyis med dngos dbang phyogs su thams cad dbyer med gcig/ces gsungs so// yang gsol pa/ kye nam mkha'i dgongs pa nyid ji ltar lags/ byang chub sems kyi bzhugs tshul ni/ gsang ba'i bdag pos bstan du gsol// gsang ba'i bdag pos gsungs pa/ dbang po'i ngo la gang gsal pa// rang gsal de la ma rtogs pa// de bzhin nam mkha'i dgongs par bshad// yul dang dbang po mi 'byed cing// chos nyid ngo yis mi 'dzin na// de bzhin nam mkha'i dgongs par bshad// rig pa nang nas mi g.yo zhing// de bzhin nang du mi rtsol na// de ni nam mkha'i dgongs par bshad// byang chub sems kyi chos nyid de// byang chub sems su zhugs tsam na// thams cad 'byung ba'i bdag nyid bu// chos rnams kun gyi snying por bzhugs// chos kyi sku ru bzhugs tsam na// gzung 'dzin gnyis dang bral bar bzhugs// longs spyod rdzogs skur bzhugs tsam na// 'dod pa'i phun sum tshogs par bzhugs// sprul pa'i sku ru bzhugs tsam na// gang la gang dgos de sprul zhes// dgongs pa phun sum tshogs par bzhugs// rang byung ye shes bzhugs tsam na// gang yang chags pa med par bzhugs// gsal la gzhan rtog med par bzhugs// 'khrul pa'i blo ru bzhugs tsam na// ci ltar snang ba'i chos rnams kun// bden 'dzin blo yis gzung nas bzhugs// zhes gsungs so// yang gsol pa/ kye gsang ba'i bdag po lags/ rang byung ye shes zhes bgyi ba// sa dang sa yi rnam pa rnams// de don bdag la bstan du gsol// gsang ba'i bdag pos gsungs pa/rang byung rgyu rkyen med par ni// ye shes sgrib pa med pa yin// rang byung ye shes chen po la// ting 'dzin bag chags mi sogs 'di// rtsol sgrub dag las mi 'byung bas// rang byung las kyi dbang mi 'gyur// yul 'byung byas 'gyur ye shes de// yul las 'byung zhing gnas 'gyur bas// de la rang byung ming ma btags// sa dang sa yi rim pa dang// bsdus rgyas gsum gyi rim par bstan// kun tu 'od dang pad+ma can// 'khor lo tshogs chen bsdus pa'i tshul// kun tu 'od dang rdo rje 'dzin// stug po bkod dang rdo rje 'chang// dbyer med rang bzhin lhun grub pa// de ni 'bring du bstan pa yin// brgyad dang dgu dang bco lnga ni// rgyas par bstan pa'i sa yin te// rang rang skabs su shes par bya// zhes gsungs so// yang gsungs pa/ kye gsang ba'i bdag po lags// chos kun rtsa ba sems gcig la// de don gang lags bstan du gsol// gsang ba'i bdag pos gsungs pa// sangs rgyas sku dang ye shes dang// sems can lus dang bag chags dang// snang srid chos dang 'byung chen lnga// rtsa ba byang chub sems su gcig/ spros pa med pa'i don du gcig/rgyu ru gcig pas 'bras bur gcig/ dpe ru gcig pas don du gcig/ rtags dang gtan tshigs mthun par gcig/ ces gsungs so// yang gsol pa/ kye gsang ba'i bdag po lags// sku dang ye shes don dam bden// gang gi phyogs nas grags pa lags// sangs rgyas sems can snang srid chos// gang zhig phyogs nas grags pa lags// gsang ba'i bdag pos bstan du gsol// gsang ba'i bdag pos gsungs pa// sku dang ye shes don dam bden// sangs rgyas sems can snang srid chos// bsam dbang phyogs nas grags shing snang// dngos dbang phyogs nas de mi bden// zhes gsungs so// lta ba thams cad kyi gnad man ngag thams cad kyi sdom// tan+t+ra thams cad kyi bcud phyung nas don bsdus pa/ bang mdzod 'phrul gyi lde mig ces bya ba/ gsang ba'i bdag pos sems dpa' rdo rje la gdams ngag rim par phog pa rdzogs so////

CLOSE WINDOW