CLOSE WINDOW

Gpb030.002
བོད་ཡིག

/// ! bcom ldan 'das dpal kun tu bzang mo la phyag 'tshal lo// 'das pa'i dus ma byung ba'i sngon rol na/ sems can thams cad sems mya ngan las bzla ba dang/the tshom bcad pa bcad pa'i phyir/ rdo rje sems dpas gsol pa/ gnod 'dul lha yis yang gsol pa// 'jig rten pa yi chos rnams la// sems nyid mya ngan ji ltar bzla// rtag chad mtha' nyid gang du bsdu// yang dag rdzogs kyis bka' stsol cig/ de skad gsol pa gsan nas kyang// nyag gcig yab kyis bka' stsal pa// snod kyi 'jig rten kun bzang zla// bcud kyi 'jig rten sangs rgyas rgyu// phyi nang snod bcud rnam par dag/rtag chad mtha' gnyis mya ngan 'das// gnod 'dul lha yis yang gsol pa// ston pa rnam gsum gang la bgyi// sdud pa rnam gsum gang la bgyi// gnas zhes bgyi ba ji lta bu// gnas la nges pa du zhig mchis// dus zhes bgyi ba ji lta bu// dus la rnam pa du zhig mchis// yang dag rdzogs kyis bka' stsol cig/ nyon cig g.yung drung yang dag pa// ston pa rnam gsum rig pa'i gter// 'pho 'gyur med pas gnas zhes bya// yang dag don rtogs dus zhes bya// gnod 'dul lha yis yang gsol pa// lha la rnam pa du zhig mchis// 'khor la rnam pa du zhig mchis// lung la rnam pa du zhig mchis// yang dag rdzogs kyis bka' stsol cig/ nyon cig g.yung drung yang dag pa// lha la rnam pa gsum du bstan// 'khor la rnam pa gsum du bstan// lung la rnam pa gsum du bstan// gnod 'dul lha yis yang gsol pa// rgyud ces bya ba ji ltar lags// lung zhes bya ba ji ltar lags// man ngag bgyi ba ji ltar lags// nyon cig g.yung drung yang dag pa// rgyud ces bya ba 'brel pa'i don// lung zhes bya ba ston pa'i bka'// man ngag bya ba la bzla'o// gnod 'dul lha yis yang gsol pa// yum gyi dbyings zhes gang la bgyi// yab kyi mkha' zhes gang la bgyi// 'khor ba'i gnas 'di mi 'tshal na// klong zhes bya ba ji lta bu// nyon cig g.yung drung yang dag pa// 'du 'bral med pa yum gyi dbyings// skye shi med pa yab kyi mkha'// blang dor med pa bde ba'i klong// bde ba chen po don rtogs na// blang dor med pa de yis grub// gnyis med don rtogs de yi ngang// gnod 'dul lha yis yang gsol pa// chos nyid rtogs pa g.yung drung lha// sems nyid rtogs pa'i la dor ba// 'gyur med don chen brjod pa gang// de skad gsol pa gsan nas kyang// mngon rdzogs yab kyis bka' stsal pa// nyon cig g.yung drung yang dag pa// chos nyid rtogs pa'i g.yung drung ba'i// sems nyid don gyi ngo bo la// rdzogs pa'i lta ba la dor ba'o// gnod 'dul lha yis yang gsol pa// ma zhes bya ba gang gi mkha'// mo zhes bya ba gang gi klong// ma mo'i gtan tshigs ji ltar lags// 'byung ba lnga po gang las grub// sangs rgyas rgyu nyid gang gis grub// bde ba chen po ngang nyid las// rgyu rkyen gnyis kyis bskyed lags sam// 'gyur ba lha yi rang nyid las// 'di la 'pho 'gyur mchis lags sam// nyon cig g.yung drung yang dag pa// che bas che ba zab mo 'di// shes rab thabs la brten te grub// ma dang mo yi don rtogs na// ma bgrod sa rnams nges par thob// yid bzhin nor bu ma btsal rnyed// ye shes nyi ma rang la shar// chen po lnga yi ngang nyid du// thams cad ma lus sangs rgyas so// hUM hUM hUM/ gsang ba'i mgur chen po'i le'u ste dang po'o//// ting 'dzin dbang chen dkyil 'khor bskyed// bdag nyid che mchog skur bsgoms la// thams cad ma lus dbang du bsdu// man ngag mdzub tshugs don la rnam pa drug tu bstan// gnod 'dul lha yis yang gsol pa// sems can dus min 'chi ba rnams// de la bzlog na ji ltar bzlog/ bskang ba'i gnas lnga ji ltar lags// yang dag rdzogs kyis bka' stsal pa// de skad gsol pa gnas [[]gsan []]nas kyang// sems can dus min 'chi ba'i tshe// bskang ba'i gnas rnams 'di rnams so// hUM snang srid thams cad yum gyi b+ha g a ste// dus gsum bde gshegs yum gyi dbyings nas bskyed// dbus kyi yum dang che mchog yab yum tshogs// mu mkhar khyab pa'i thugs gsum bdag skong na// thams cad skongs nas dbang dang dngos grub gsol// hUM shar phyogs rdo rje rigs kyi gtso// rdo rje dbyings phyug mi phyed ma// bskang ngo bskal pa'i thugs dam bskang// lho phyogs rin chen rigs kyi gtso// rin chen dbyings phyug mi phyed ma// bskang ngo bskal pa'i thugs dam bskang// nub phyogs pad+ma rigs kyi gtso// pad+ma dbyings phyug mi phyed ma// bskang ngo bskal pa'i thugs dam bskang// byang phyogs las kyi rigs kyi gtso// las kyi dbyings phyug mi phyed ma// bskang ngo bskal pa'i thugs dam bskang// dbyings kyi ma chen brgyad rnams dang// yul gyi sring mo brgyad rnams kyang// bskang ngo bskal pa'i thugs dam bskang// bskal le chung ngu gsang ba mgur chung gi le'u ste gnyis pa'o//// gnod 'dul lha yis yang gsol pa// bstan pa gnyen po 'jig byed cing// lu gu rgyud las 'gal byed pa// sems can kun la gnod byed pa'i// rtag tu gdug pa'i sems can rnams// lus sems so sor dbral ba'i phyir// lha dang dbye ba ji ltar lags// rdzogs sangs rgyas la bdag nyan 'tshal// de skad gsol pa gsan nas kyang// ngo mtshar lha yis bka' stsal pa// rtag tu gdug pa'i sems can rnams// lus sems so sor phral ba'i phyir// dbye ba'i las rnams ngas bstan gyi// nyon cig g.yung drung yang dag pa// 'go ba'i lha dang bral ba'i phyir// bya rog 'ug pa'i dang ru la// a dang nr-i yi yi ge bri// dme ba mgar gyi dreg pas bslan// shog shog tshon gang gru bzhi la// lha dang mi yi ming bris la// tshon skud sna lngas byad du gzhug/ rkang du dza dur bcug nas ni// 'og ti phyin phyogs dag tu bstan// du ra nag po'i rta rkang bsdam// gong ma'i las rnams bskyar la bya// des ni mtshan ma 'byung bar 'gyur// des kyang mtshan ma ma byung na// 'da' ra pa ti'i sog pa la// maN+Da la yi dar gyis dkri// a ti ra yi thag pas bcings// da ra ba ti rgyud pas gdags// sba ma ti yi dud pas bdug/ 'brig sha shing la btags nas kyang// dad [[]dar []]la phyar te sdang mig blta// a ta ra yi lcags kyis b rab// rba na ti yi dud pas bdug/ a ra ma ti'i mda' yis brdeb// gu pa ra yi mgul tu btags// ma la ti yi mdoms nas dbyung// sa 'bar ma yi snying po bzlas// rna mnyan phra ma'i gzugs bris la// lha dang mi yi bar du gzhug/ ma ra Na yi sngags kyi dbye// mtshon ma'i phyag rgya bcas nas su// gzugs la rnam par brdeg par bya'o// rak+Sha tu'i drag sngags kyis gdab// lcags kyu'i phyag rgya gnyis bcings nas// aM ku sha yi sngags kyis drang// zhags pa'i phyag rgya gnyis bcings nas// pA sha hUM gi sngags kyis bcings// lcags sgrog phyag rgya gnyis bcings nas// s+pho Ta baM gyi sngags kyis bsdam// dril bu'i phyag rgya gnyis bcings la// g+haN+De hoHyi sngags kyis gdab// bdag nyid dbang chen skur bsgoms te// spro ba drug rnams gnad la gdab// gong ma'i las rnams bskyar la bya// des ni mtshan ma 'byung bar 'gyur// des kyang mtshan ma ma byung na// 'da' ra bi ti'i sog pa la// nu ta ma yi khrag gis bris// 'da' na nag ni sa dong du gzhug/ che mchog yab yum bsgoms nas ni// sman mo'i sngags dang phyag rgyas gdab// bskul ba'i phrin las gzhung bzhin bya// nye 'byed kyi le'u ste gsum pa'o//// gnod 'dul lha yis yang gsol pa// bstan pa gnyan po 'jig byed cing// lu gu rgyud las 'gal byed pa// sems can kun la gnod byed yid// rtag tu gdug pa'i sems gyur la// nan tur las rnams ji ltar lags// rdzogs sangs rgyas la bdag nyan 'tshal// de skad gsol pa gsan nas kyang// ngo mtshar lha yis bka' stsal pa// rtag tu gdug pa'i sems gyur te// sems can kun la gnod pa la// nan tur las rnams ngas bstan gyis// nyon cig g.yung drung yang dag pa// srog lus rtsa nas skam pa'i phyir// ra sog gro ga shing shun nam// g.yam pa sngon po'i ngos dag la/ khyi khrag ra khrag gsol ba yis// dgra bo'i gzugs dag bris nas ni// tsher ma can gyi shing dag la// rdzas kyi br-ik+Sha'i shing bu la// dmar ti dmar po'i lcag 'bras gdags// dgra bo'i gzugs la brdeg par bya'o// yang na ka sa'i shun pa la// na sa ku ru ta yis ni// 'gro ba'i mkha' 'gro lnga po yang// tsa ra ma ti ti yis ni// lte bar chags 'dzin spun gnyis bri// rkang pa gnyis la ma bdun ni// g.yas pa'i dum bu bzhi po la// phung byed sbas pa'i ma bzhi ni// g.yon pa dum bu bzhi po la/ khros pa'i dbang chen bzhi po ni// gsang ba'i yum bzhi klad pa la// nyi zla thod phreng snying gi dkyil// phra men rgya mtsho mkha' la'o// phung gi bdag mo bzhugs su gsol// phyi ma'i dman mo 'khor rnams kyis// gung rtsibs 'khor dang lo re la'o// a phyi chen po gzhungs pa la'o// dus drug rgyu ba'i dgra bo ni// shwa ba gnyan dang ba glang ngo// 'di rnams nam gyi gung la rgyu// rta dang lug dang ra gsum ni// 'di ni nyin bzhin rgyu ba'o// rje khol drug cu rtsa brgyad dang// dus drug rgyu ba de bzhin no// myur du bzlas pa'i sngags rnams ni// gong gi sngags rnams bzlas pa yin// sngags nyung dag la khri 'bum du// bzlas nas dgra la brdeg par bya// g.yon gyi dme lag bcad nas ni// rang gi dpral ba'i dbyes su bzhag/bdud kyi chas su zhugs nas ni// skra bshig mi gnas mchi ma phyung// de phyogs nyid du bstan pas ni// nga ro drag tu bzlas nas kyang// g.yas pa'i phyag rgya sdigs mdzub kyis// sngags 'di drag tu bzlas la brdeg/ snying la zo zhing lA mA sha/ rol sha khrag 'thung kang ka sha zan/ yang ta sa ra la ho// sha la kyi spyang kra he kra he/ badzra ban+d+ha b+h+yo ru lu ru lu/ sha khrag skams pa'i le'u ste bzhi pa'o//// gnod 'dul lha yis yang gsol pa// dam las 'das pa'i sngags gzer dang// 'jig rten mtshan ma byol pa dang// lha 'dre rdzu 'phrul drag g.yos na// ngan sngags rdzu 'phrul ji ltar bzlog/ rdzogs sangs rgyas la bdag nyan 'tshal// de skad gsol pa gsan nas kyang// ngo mtshar lha yis bka' bstsal pa// dam las 'das pa'i sngags gzer dang// 'jig rten mtshan ma byol ba dang// dregs myos pa yi rdzu 'phrul dag/ bzlog pa'i las rnams ngas bstan gyis// nyon cig g.yung drung yang dag pa// ngan sngags par bu bzlog pa'i phyir// gtan tshigs man ngag 'di gsungs so// ba ko 'dra ba'i maN+Dal byas// 'jig rten mtshan ma byol ba dang// maN+Dal mchod pa gzhung bzhin bya// sAts+tsha ca ti mang du gdab// phyi yi bshags pa gzhung bzhin bya// de nas gsang ba'i mtshams kyang bcad// de nas dkyil 'khor gzhung bzhin bya// nang gi rU pa sarba btang// bskang gso spang skong grangs kyis gdon// bskang ba'i gnas lnga gzhung bzhin bya// ma hA shAn+tiM mchod par bya// ma mor gyur pa kun kyang bskang// yo byad nag po gzhung bzhin btang// rtags dang mtshan ma zhib tu brtags// rtags dang mtshan ma zin pa dang// skong zlog cho ga gzhung bzhin bya// des ni mtshan ma bzlog par 'gyur// de nas bskyar te yang gsungs pa// bskang ba des kyang ma skong na// dbang gi rgyal mo'i skur bsgoms la// rtsa ba gang yin ma mo de// ku sha la ni gzugs byas la// yan lag bsdus te rgya yis bsdam// sman mo lnga bcu rtsa gsum yang// shing shun dag las gzugs byas la// dar ba ti yi rgyud pas gdags// ye shes rje mo bcu bzhi yang// che mchog sku ru bsgoms nas ni// mgo lus bsnol te gdan du gding// des ni ngan sngags bzlog par 'gyur// des kyang las rnams ma grub na// brtags te rtsa ba gang yin la// shog shog dag la gzugs byas la// mchog gi phur pa dag gi brdeg/sman mo lnga bcu rtsa gsum yang// 'jag ma dag la gzugs byas la// zangs kyi phur pa dmar pos gdab// dbus kyi ma mo rnam gsum yang// zhing gi shun pa'i ras ma la/ khrag dang mtshal gyi gzugs byas la// gser ram ser po'i phur pa gdab// des ni ngan sngags zlog par 'gyur// gal te las su ma gyur na// dbus kyi che mchog yab yum gnyis// spra tshil dag la gzugs byas nas// lcags sam nag po'i phur pa yis// thugs ka nyid du gdab par bya// las rnams 'grub par gdon mi za// kI la ya yi sngags brjod nas// chos nyid dbyings su gdab par bya// che mchog rtags kyi phyag rgya yis// 'gyur med dbyings su phur pas gdab// ngan sngags par bu zlog pa'i le'u ste lnga pa'o//// gnod 'dul lha yis yang gsol pa// de ltar par bu bzlog nas ni// sngon du sngags kyi sngags gzer des// tshe srog nyams pa ji ltar gso// rdzogs sangs rgyas la bdag nyan 'tshal// sngon du sngags pa'i sngags gzer des// tshe srog nyams pa gso ba'i phyir// gso ba'i cho ga ngas bstan gyis// nyon cig g.yung drung yang dag pa// stegs bu 'dom gang gru bzhi la// 'khor lo rtsibs brgyad de dbus su// pad+ma chen po 'dab brgyad bri// pad+ma chen po de dbus su// rin chen 'bar ba zur brgyad bri// de dbus zla gam zlum po la// b+han+d+ha mtshan dang ldan pa bzhag/ rin chen 'bar ba'i zur brgyad la// lnga la rtags pa'i rgyal mo lnga// gnyis pa sma sha pra mo ha// gcig la tshe yi snying po bri// pad+ma chen po'i 'dab brgyad la// phyogs bzhir khros pa'i dbang chen bskyed// mtshams su gsang ba'i yum bzhi dgod// 'khor lo chen po rtsibs brgyad la// phyogs bzhir phyag mtshan chen po bzhi// gnyis par rgya mtsho thod phreng dgod// gcig la tshe yi snying po dgod// sman mo phyi ma don gyis sbyar// dkyil 'khor de yi phyi rim du// bkra shis brgyad kyang dgod par bya// sgo bzhir khro bo bzhi yang dgod// til chen me mar rgyun mi gcad// yo byad chen po'i zas rnams la// rtsa ba'i sngags kyis btab la bzhag/ ma mo byon gyis sngags rgyas gdab// u ta'i bya ba'i sngags kyis gdab// dngos grub rtags dang sbyar nas ni// gso bskyed bzang zhing gtams par bya// tshe sgrub pa'i rim pa ste le'u drug pa'o//// gnod 'dul lha yis yang gsol pa// dpa' bo thig le nyams pa dang// thig le'i spyod pa nyams pa rnams// las de slar la zlog pa'i phyir// nyag gcig yab la bdag nyan 'tshal// yang dag rdzogs kyis bka' stsol cig/ de las slar la zlog pa'i phyir// nges pa'i man ngag ngas bstan gyis// nyon cig g.yung drung yang dag pa// rtags dang mtshan ma byung ba'i tshe// bsdam pa'i phyag rgya bkrol nas ni// dgra bo'i yul phyogs bstan pa ni// gro ga shing shun ras la sogs// mi de'i ming rus bris nas ni// de yi lag tu bskur bya'o// shugs sgrol ma yi sngags kyis gdab/ khrag dang dug gi gtor ma yang// rabs chad thod par bshams nas ni// yul sa'i phyogs su gtor ma gtang// snying gi phur pa phyung nas ni// a mr-i ta yis mchod byas nas// dam rdzas tshang ba'i gtor ma la// ku pa ra yi rak+tas sbreng// gang yin phyogs su kha bltas la// gtso bo gzhung bzhin bskul nas ni// lus kyis bsig cing phyag rgyas bsdam/bdag nyid dbang gi skur bsgoms la// dbang drag phyag rgya bcas nas ni// gzugs de nyid la tsham rngams bya// drag shul dbang gis bskyod la btang// 'di ltar ma mo drag shul gyi// dpal gyi dbang gis bsdus la btang// las kyi mi 'grub mi srid do// bsdams pa'i phyag rgyas bkrol nas ni// 'brig sha'i shing gi lcags kyis bsdam// gong ma'i phyag rgya bcas nas ni// rdo rje gnon 'gros gong ma yis// phyogs der gom pa bdun 'gro'o// yab yum sngags kyis btab nas ni// gong gi phyag rgya drag bskul lo// des ni mod la las rnams 'grub// lan gsum byas na na bar 'gyur// lan lnga byas na 'chi bar 'gyur// snying gi phur pa phyung nas ni// lan gsum drag tu dril nas ni// spyi bo'i gtsug tu gdab par bya// lcags sna lnga yi phur bu la// dbang drag las rnams gzhung bzhin bya'o// des ni 'chi bar gdon mi za// mon nam rabs chad thod pa la// nang du ma bdun snying po bri// spyi gtsug nyi zla thod phreng bri// chags 'dzin spun gnyis rna ltag go/ tshon skud gnyis su mig nas gdags// rag sha rU hra'i sngags kyis gdab// gong gi phyag rgya gnyis spel te// drag tu bskul te 'phangs la gtang// zhing gi sha tshil ro sogs kyis// ma mo rnams la gtang rag gtang// las rnams 'grub par gdon mi za// ngan sngags par bus bsad pa'i le'u ste bdun pa'o//// gnod 'dul lha yis yang gsol pa// bstan pa gnyen po 'jig byed cing// lu gu rgyud la 'gal byed pa// sems can kun la gnod bgyid pa// rtag tu gdug pa'i sems can la// nan tur las rnams ji ltar lags// rdzogs sangs rgyas la bdag nyan 'tshal// de skad gsol pa gsan nas kyang// ngo mtshar lha yis bka' stsal pa// rtag tu gdug pa'i sems gyur pas// sems can kun la gnod gyur der// nan tur las rnams ngas bstan gyis// nyon cig g.yung drung yang dag pa// ji ltar yid 'thad gnas su ni// 'bru sna tshogs pa'i mi gzugs la// mkhar thabs mda' yis rab brgyan nas// gling bzang dar dkar chas kyis brgyan// yo byad tshogs pa'i gter cha dang// za 'og mda' yis rnam par brgyan// phyi yi ma hA shAn+tiM bya// ma hA shAn+ting gzhung bzhin brjod// pho rigs rnams la 'di skad skong// sol ba'i dong ni khru gang par// nang du glud phyi rgan du mnan la/ de'i nang du gser ram g.yu brdar la/ dgra gang yin par sogs la gzugs bris la khu bub tu mnan no// de'i steng du rdo rje rgya gram gyis gnon/ des dgra bo'i gzugs bris te 'o dod bos la btang/ las myur bar 'grub bo// snyug rgod la dpag bsam shing gi gzugs byas la/ yang na gro ga la ming rus bris la snying gar glan/gser g.yu gnyis skos rje drang kar la bsngo/ de nas man da la'i dar du gtums la mda' spa tis gdags so// a ti pa ti thag pas gdags so// 'o dod drag tu 'bod/ des ni smyo 'bog drag pos 'debs par 'gyur ro// lcags dang gser g.yu bsres la khol mo zhig 'dzin la bsngos te/ gong du bstan pa'i gzugs dang bsngo ba'i yas stags bsres la rus sbal shun pas gtums la pa ra ti'i dong du gzhug go/ye shes ma mo'i phyag rgyas gdab// de yis dbang po mi gsal ba dang// lce dig pa dang lkugs par 'gyur ro// lcags dang gser dang zangs dang gsum brdar la ya bdud chen po la bsngos la/gong du bstan pa'i gzugs dang bsngo ba'i yas stags bsres la mu la'i dong du gzhug go/ che mchog rtags kyi phyag rgyas gdab/ des ni glo bur du 'chi bar 'gyur ro// 'bru zan bre gang la gling phran bcu gnyis kyi gzugs byas la dkor chas brgyan la yar la shod kyi skyes to re la bsngo'o// de nas 'jag ma la gzugs byas la dgra bo'i ming rus bris la gzugs kyi snying gar glan no// zas la za ba'i tshul byed du gzhug go/'o dod drag tu 'bod do// de ltar byas na glo bur du 'chi bar 'gyur ro// rus pa sna tshogs bsdus nas gshin rje la bsngos nas yas stags de'i gseb tu khams la dgra bo'i gzugs byas la ming rus bris kha bub tu bstan la 'da' 'gengs pa'i tshul du bya'o// ci yang rung ba'i zhing lpags bskon la gshin rje nag po'i sngags kyis gdags so// des grir 'chi'o// mi nor du btags pa'i gzugs byas la/ sa la u ma de wa'i gzugs byas la/ u ma de wa'i steng du bskyon la 'dod chags spyod pa'i tshul du bya'o// ma e pa ni rba na tsa ma ni phaT/ bya ba'i sngags kyis gdab pa'o// mkhal sked na ba dang/ pho mtshan skrangs pa dang/chu 'gags nas 'chi'o// dung gser g.yu dang bswe dang mtshal la sogs pa'i yas stags sna tshogs pa dang dgra bo'i ming rus bris la/ ra ti tsha ra'i pags pas gtums la sa ti sa la ma ran bzlas te de la gdab par bya'o// des ni myur du 'bog par 'gyur ro/ bse dang dung dang lcags dgra bo'i ming bsres te rdza nag po'i nang du bcug la/ ba ta ma na'i sngags kyis btab la bos shing gtad na rbab dang g.yang du 'gro'o// cho ga byed pa'i dus su ma bdun gyi chas su zhugs la ngo khrag gis byugs te/ bdag nyid dbang chen ting 'dzin nam yum mu kha le'i ting 'dzin du zhugs la/ gzhung bzhin bskul la las bcol lo// pho rigs phyi mal las bcol zhing gtad pa yod na 'khu ldog che la rgyang 'gyur bas 'dir ma gsungs so// dgra bo bdud nag po la gtad pa'i le'u ste brgyad pa'o//// chu srin pir gyi kha nang du// gre bar rin chen song ba ltar// bskal par bzhag kyang mi gtong ngo// rmongs pa 'phyar bas byin gyur na// dus med par ni srog zad nas// bskal pa bdun du rlag par 'gyur// gsang ba gtan tshigs zhes bya'o/

CLOSE WINDOW