CLOSE WINDOW

Gpb029.003
བོད་ཡིག

rgya gar skad du/ ma ma tan tra tse tA marge nA ma/ bod skad du/ ma mo lam rgyud lung zhes bya ba/ yum mu kha le la phyag 'tshal lo// 'di skad bdag gis thos pa'i dus gcig na/ bcom ldan 'das de bzhin gshegs pa thams cad kyi sku dang gsung dang/thugs rdo rje btsun mo'i b+ha ga la bzhugs te/ de'i tshe nam mkha' las sgra chen po sna tshogs pa dang gzugs sna tshogs pa byung ste/ 'jig rten gyi mu kha le la sogs pa las la gnas pa'i mkha' 'gro ma'i tshogs thams cad dang/rig pa ting nge 'dzin gyi mu kha le la sogs pa'i rtsa la gnas pa'i mkha' 'gro ma thams cad dang/ ye shes kyi mu kha le la sogs pa'i 'bras bu la gnas pa'i mkha' 'gro ma thams cad dang/'phags pa spyan ras gzigs la byang chub sems dpa' thams cad dang/ kun dga' bo la sogs pa nyan thos dang rang rgyal ba thams cad dang/ mi mjed kyi bdag po tshangs pa dang/lha rnams kyi dbang po brgya byin la sogs te lha thams cad dang/ sgra gcan la sogs lha ma yin thams cad dang/ nyi ma la sogs pa gza' thams cad dang/ smin drug la sogs pa skar ma thams cad dang/ha ri ka sogs te gnod sbyin thams cad dang/ lang ka mgrin bcu la sogs te srin po thams cad dang/ gzhan yang lha ma srin sde brgyad dang/ lha 'dres gnyan bcu las kyi rdzu 'phrul gyi mthu dang ldan pa thams cad sgra dang gzugs des bskul nas yum chen mo mu kha le dang/yab mngon rdzogs lha'i thad du 'dus par gyur to// de nas 'jig rten pa kun gyi yab dang yum gyi sku mdog dang rgyan la sogs pa de dag gis 'jigs shing skrag ste 'dar zhing dngangs bzhin du 'khod do// lha dang byang chub sems dpa' rnams ni/ yab dang yum la ngo mtshar cher skyes te/ lha la sogs pa'i mchod pa sna tshogs pas mchod de/kun gyis bskor ba lan gsum byas nas gnas so// de nas yang nam mkha' las sems can ma mo 'dul ba spyi mthun gyi smon lam dang/ las dang ta thA ga ta'i thugs rje'i sprul pa'i ngang nyid kyis sgra chen po sna tshogs byung nas/yab mngon rdzogs lha yi rgyal po bskul lo// de'i tshe 'jig rten 'dir yangs cher g.yos te sems can long bas gzugs mthong ba la sogs bkra shis pa sna tshogs kyang byung ngo// de nas yab kyis yum la sems can gyi dug gsum rnam par sbyar ba zhes bya ba'i bskor ba lan gsum byas te/ ha ha dang he he la sogs pa'i rol pa'i gsung dang yum chen mo mu kha le la gsol pa/ma mos 'dul ba'i sems can la// ma mo'i srid pa bka' stsal na// ma mos 'dul ba'i sems can la// ma mo bgrod pa'i lam dang yang// de bzhin ma mo brten pa yis// ma mo thob pa'i 'bras bu dang// sa dang lam dang 'bras bu yin// rtags dang tshad dang ngo bo dang// de yis spang ba'i rnam rtog dang// de la bar du gcod pa'i bdud// ma mo la 'jug gang zag dang// 'di rnams khyod kyis bshad du gsol// de nas yum chen mos gnas der 'dus pa'i 'khor de dag la 'di skad ces gsungs so// gsang ba las kyang cher gsang shin tu gsang ba'i yang gsang ba/ zab pa rab tu zab pa kun tu zab pa zab pa'i yang zab pa/phra ba kun tu phra ba/ kun nas phra ba'i yang phra ba dang/ grol ba ye nas grol ba/ nges par grol ba'i yang grol ba ste/ gsang sngags ma mo'i dbang bzhin dang/ bcu drug gi rang bzhin gyi ma mo bzhi dang/bcu drug la sogs pa dang/ nga yis bshad kyi legs par nyon la yid la zung zhig gal te ngas gsang sngags ma mo bshad dam shes sam/ le lo 'am grags pa'am/ snyoms las la sogs pas tshul ma yin par bshad na mkha' 'gro khros pa'i bar chod ces bya ste/nga yi mgo tshal pa brgya dang snying dum bu stong dang/ lce dus kyi mes tshig ste shi nas na rag tu 'tshed par 'gyur la/ de bzhin du khyad kyang nga'i bka' gnang pa thob par bya ba'i phyir baiDUr+ya la sogs pa'i me tog dbul ba dang/bsod nams dang ye shes kyi tshogs bsag pa'i phyir gleng gzhi dang/ gzhung dang/ rjes su yi rang ba'i tshogs kyi 'khor lo bskor ba dang bar gcod nyer bar zhi ba dang/gnas skabs kyi dam tshig nyams pa bskang ba'i phyir/ gtor ma dang maN+Dal tshul bzhin du byas te lus tsog pur 'dug nas/ sems ma yengs par rna ba gtad de/ ngag bsgrims te nyon la/ de ltar mnyan zhing go bas dga' ba dang sgrub pa lhur byas na dngos grub thams cad 'byung bar nges pa'o// khyod kyis de ltar ma byas na gong gi mkha' 'gro khros pa'i chad pas mgo tshal pa brgya dang/snying dum bu stong dang/ lus sems gzhan dus kyi mes tshig ste na rag tu sreg par 'gyur ro zhes gsungs nas/ thams cad snod du rung ba zhes bya ba'i dbang bskur nas/ lam rnam par dbye ba zhes bya ba'i ting nge 'dzin la snyoms par bzhugs so// de nas ting nge 'dzin de'i mthus lam dbu'i gtsug nas/ ma mo'i lus kyi dbang gi lam rnam par spyod pa zhes bya ba'i sgra dang 'od zer dkar po byung ngo// de bzhin du mgrin pa'i gling bu gser gyi bum pa las ngag gi dbang gi lam rnam par spyod pa zhes bya ba'i 'od zer dmar pau dmar po 'dra ba sgra dang bcas pa byung ngo// thugs ka'i dpal gyi be'u las sems kyi dbang gi lam rnam par 'byed pa zhes bya ba'i 'od zer kha dog nag po nag po 'dra bar sgra dang bcas pa byung ngo// sku'i lte ba las kyang ye shes kyi dbang gi lam rnam par 'byed pa zhes bya ba'i 'od zer dmar ser dmar ser 'dra ba byung te ma mo'i lam la sogs pa bka' stsal pa/nyon cig skal ldan dad pa can// las dang smon lam mthu btsan pa'i// brtan pa'i sems ldan brtul zhugs can// pha rol phyin bcu la sogs pa'i// thun mongs bsrung bya'i tshul khrims ldan// khyad par gsang sngags ma mo yi// bsrung ba'i dam tshig ldan pa yis// bgrod pa'i lam ni 'di ltar yin// sku yi lam dang 'brel pa yi// ma mo bskyed pa'i rim pa ste// de yang re zhig rnam pa bzhi// gsang ba gzugs brnyan gyi bskyed dang// cher gsang dag pa skyed pa'i bskyed// shin tu gsang ba rang bzhin gyis// dag pa'i ma mo lam yin te// gsang ba'i yang dag gsang ba ni// gsang ba bskyed pa'i dkyil 'khor yin// de yang 'di ltar shes par bya// gnas bzhir sa la byas pa yi// shar phyogs 'khor lo'i rtsibs steng sogs// rang bzhin ma mo tha dad pa// de la bsgom bsgrub bzlas pa ni// rang gi gzugs brnyan yin pas na// gzugs brnyan dam pas bskyed pa ste// 'di yis rnam rtog rags pa 'gegs// sman mo lnga bcu'i rang bzhin te// tshogs kyi lam zhes de la grags// bskyed pa dag pa'i dkyil 'khor ni// rang gi lus kyi gnas rnams su// ma mo rang rang sa bon las// ma mo rang rang skur bskyed de// lus ni 'dom gang gru bzhi ste// g.yas g.yon steng 'og sgo la sogs// bdud rtsi lnga dang mtshon sna lnga// yang na kha dog rnam pa lnga// ka ba brgyad ni rkang brgyad de// rgyus pa thig gi rang bzhin yin// nying lag dur khrod rang bzhin la// yan lag de bzhin rgyan du shes// yi ge las bskyed bskyed par grags// 'di yis gzugs brnyan rnam rtog 'joms// ma mo bcu bzhi'i rang bzhin te// sbyor ba'i lam gyi cha gnyis te// drod dang rtse mo yin par 'dod// rang bzhin dag pa'i bskyed pa ni// rang gi lus kyi gnas rnams su// rang gi snang ba'i dag pa las// rang gi khams dang phung po dang// 'byung ba rnam pa 'gags pa dang// ma mo sku yi snang bar gsal// phung po la sogs dag pa na// ma mo dag pa'i dkyil 'khor yin// ma mo ye nas rang bzhin gnas// de la rang bzhin bskyed par grags// gong gi bskyed pa'i dag pa la// phung po la sogs rim de la// rang rang ming gi yi ger bsam// de la ma mo mkhas par 'dod// 'di ni dbyings kyi yum drug ste// sbyor ba'i lam gyi cha gnyis te// bzod pa dang ni chos kyi mchog/ de nas gsang ba'i bskyed pa ni// rang gi tsit+ta'i gzhal yas su// ma mo bdun cu rtsa brgyad snang// rang bzhin dag pa'i dkyil 'khor 'dzom// mu kha le yi rang bzhin te// mthong ba'i lam gyi bdag nyid yin// de ltar lam gsum bgrod pa ni// ma mo bskyed pa'i rim pa yin// de ltar gyur pa gang la yang// mkhas pas 'di ltar shes par bya// tshogs kyi lam la lam bzhi ste// ting nge 'dzin la sogs pas ni// rang gsal ye shes la sbyor bas// tshogs kyi lam gyi sbyor lam yin// rnam rtog gang gis ma bskyod pa// tshogs kyi bar chad med pa'i lam// rang gsal ye shes zangs kar skyes// tshogs kyi grol lam yin par 'dod// gang las ye shes khyad par 'phags// tshogs kyi khyad par lam du 'dod// sbyor lam mthong lam de bzhin no// de ltar bskyed pa'i rim de yang// 'di ltar mkhas pas shes par bya// sems can rang sems gol ba las// theg pa'i rim pa du ma dang// snang ba du mar rang sems snang// mu stegs can la chad pa dang// rtag pa'i rang bzhin rang sems snang// nyan thos 'di ltar snang ba la// phra rab rdul du rang sems snang// rang rgyal rten cing 'brel pa ru// rang sems gol bar snang ba yis// theg chen 'byung bzhi rgyu 'bras kyis// sgyu ma'i snod bcud snang bar 'dod// kri ya dang ni yo ga gnyis// ting 'dzin sngags dang phyag rgya las// lha dang gzhal yas khang par 'dod// thabs dang che ba'i bde ba'i cha gnyis te// de ltar mu stegs can lta nas// gsang sngags thabs kyi 'dod pa'i bar// nges par rang sems gol ba ste// shes rab rnal 'byor ma mo yis// rang sems gol sa las grol ba// snod kyi 'jig rten gzhal yas khang// rin chen sna lnga las grub pa'i// khang pa brtsegs pa gnyis 'gyur can// gsal zhing dag la rang bzhin med// rang bzhin lhun grub ye nas gsal// gru bzhi pa la sgo bzhi pa// rta babs bzhi dang yang dag ldan// dur khrod brgyad dang shing brgyad dang/ phyogs skyong brgyad dang klu brgyad dang/ char pa sprin brgyad de bzhin te// dra ba dra ba phyed pa dang// kha khyer dang ni lha mo lnga// gzhan yang rgyan gyi rnams pa kun// rdzogs par rang gi sems snang ba// 'di ni shes rab ma mo'o// snod kyi snang ba dag pa ste// dper na sbrul gyi snang ba la// thag pa'i snang bar snang ba bzhin// ngam glogs g.yang sar snang ba las// gzhal yas khang du snang bar 'dod// de bzhin bcud kyi sems can kyang// rgyal rigs mu kha le ra snang// bram ze'i rigs ni ma mo drug/ rje rigs ma mo bcu bzhi la// dmangs rigs sman mo'i rigs su snang// rgyal rigs la sogs bu dang tsha// mu kha le la sogs pa yi// rang rang thugs kyi nyi ma las// ye shes sems ma ting 'dzin sems// ma mo gnyis su snang ba na// rang sems ma mor gyur pa ste// de tshe bcud kyi snang ba dag/ de ltar snang ba ma dag pas// tshig tu sna tshogs smra byed pa// 'di ni rang dam rang gis 'das// mthong ba'i chos la dmyal sogs 'tshed// dper na chu yi sgra tsam gyi// skom pa'i gdung ba sel ba med// de bzhin sgra dang tha snyad kyis// dngos po'i de nyid rtogs ma yin// de ltar snod bcud dag pa yang// nges par kun la snang ba min// gzhal yas khang gi mtshan nyid kyang// ji ltar gnas par shes gyur cing// rgyan la sogs pa'i mtshan nyid kyang// ji ltar shes pa de ltar yang// phung po khams la sogs pa yi// dag pa sgyu ma'i rang bzhin can// snang la rang bzhin med pa la// gsal la rtog pa med pa ru// shes pa dag la ma mor snang// de yang sems gnas rim pa la// ma brten snang bar mi 'gyur te// sgom pa'i thun dang mtshams dang yang// bying ba dang ni rgod pa dang// sems kyi sgra rnams shes bya ba// de tsam sems kyi gnas sa btsal// de ltar ma byas rang nyon mongs// 'di dang phyi ma 'bras bu med// man ngag thabs kyi yan lag rdzogs// rang sems nges par ma mor snang// de tshe sangs rgyas sems can med// 'khor dang mya ngan 'das pa med// ma mo rdzogs pa de bzhin te// rdzogs chen bya bral rdzogs pa las// ma mo bskyed pa ji bzhin du// thabs dang man ngag mkhas pas sbyar// de ltar gzugs brnyan la sogs pa// dbang po rab 'bring rim par gsungs// de nas bskyed pa'i byed pa yang// skye gnas kyi ni rnam pa bzhi// yab dang yum gyi mkha' las ni// sbyor ba'i byang sems dkar dmar las// gzugs brnyan ma mo'i sku bskyed pa// gzugs brnyan gyis ni mngal skyes yin// yi ge las ni ma mor gyur// gzugs brnyan gyis ni drod skyes yin// yi ge las ni phyag mtshan te// phyag mtshan las ni ma mo'i sku// sgong skyes tshul gyis ma mo'i sku'o// skad cig las ni ma mo'i sku// brdzus skyes tshul gyi ma mo yin// skye ba rnam bzhi 'khor ba ste// 'khor ba'i rgyud 'di gcad pa'i phyir// ma mo skye ba rnam bzhir gsungs// srid pa bar dor las dang po// lha dang dmyal ba rgyun gcad phyir// ma mo brdzus skyes gsungs pa yin// mi dang dud 'gro phal cher dang// tshangs pa'i sgo nga lugs bcug la/ gnod sbyin phal cher rgyun bcad phyir// ma mo mngal nas bskyed pa bstan// bya dang zer mo la sogs pa// de bzhin tshangs pa'i sgong nga dag/ rgyun gcod ma mo'i sgong skyes gsungs// shig dang sro ma srin bu sogs// rgyud gcad ma mo'i drod skyes bstan// de ltar skye ba rnam bzhi yang// brdzus skyes ma mo mu kha le// yang ni ma mo drod gsher las// bcu bzhi ma mo sgong skyes las// lnga bcu mngal nas skye bar 'dod// 'di yang dbang po rab 'bring la// rab kyis phyi dang nang gnyis bsgom// 'bring gis nang gi lha rnams bsgom// tha ma dbus kyi yab yum la// de nas sku yi cha nas ni// tha ma spyan la sems gtad te// de la sems gnas rtags byung na// zla ba tshes nas 'phel ba bzhin// nang nas phyi ru rdzogs par bsgom// brdzus skyes la sogs kun la khyab// de ltar ma mo'i bsgoms pa la// sems bzung yan lag bsam mi khyab// de ltar ma mo'i lam gsum las// ma mo bzhi po'i lam byung ste// zab pa ma mo'i rtsa yin te// rab tu zab pa rlung yin la// kun tu zab pa thig le yin// zab pa'i zab pa byang chub sems// de dag rdzogs pa'i rim pa yi// mu kha le la sogs pa yin// bsgom pa'i lam du shes par bya// de dag rim par dbye bar bya// dang po rtsa la rnam pa bzhi// snyigs ma'i rtsa ni dngas ma dag/bdun cu rtsa gnyis yin pa ste// brgya dang nyi shu dwangs ma'i rtsa// dwangs ma la ni dngas ma'i rtsa// sum cu rtsa gnyis yin par 'dod// snying po'i rtsa ni rnam pa gsum// de yang ma mo'i rigs bzhi yin// snyigs ma'i rtsa la bad mkhris gnas// dwangs ma'i rtsa na rkang dang tshil/ dwangs ma'i dwangs ma byang chub sems// snying po'i rtsa na sku gsung thugs// dper na shing gi myu gu las// sdong po yan lag la sogs skyes// de bzhin snying po'i rtsa las ni// 'khor lo dang ni thig le chags// lte bar ye shes thig le ni// gzhom med aM gi rnam pa las// 'khor lo drug cu rtsa bzhir chags// thabs dang shes rab dngas ma las// phra mo'i dwangs ma drug cu bzhi// sprul pa'i sku yi tshul can gnas// snying gar gzhom med hUM gi tshul// 'byung ba'i dwangs ma lnga 'dus tshul// de las 'dab brgyad 'khor lo'i tshul// rnam shes dwangs ma brgyad kyi dngos// chos kyi sku yi tshul can no// mgrin par aM gi rang bzhin las// phung po lnga yi dwangs ma 'dus// de las 'dab ma bcu drug tshul// ro yi dwangs ma bcu drug 'dus// longs spyod rdzogs pa'i sku yi tshul// spyi bor oM gyi rnam pa la// byang sems dkar dmar rnam pa las// bad mkhris dwangs ma sum cu gnyis// bde ba chen po'i sku yi tshul// 'khor lo bzhi la sku bzhi gnas// de ltar rtsa rnams 'khor lo rnams// shes na rtsa dang 'khor lo la// rang sems gnas te bskyed rim 'gags// rtsa yi bsgom pa'i lam du 'dod// rlung ni rigs gcig rigs gnyis gsum// rigs bzhi nas bzung nyi khri'-i bar// rtsa yi lam byung sna ru bgrang// dgag pa la yang rtsa ru shes pa ste// rdzogs pa'i rim pa 'di dag la// bla ma'i man ngag ma rnyed na// sems gnas rnyed par mi 'gyur ro// de ltar rtsa dang rlung la yang// dbang po rab 'bring phye ba yis// nyin mtshan bsgom pa bsam mi khyab// thig le hUM las tsit+tar gyur// snying ni rtse bzlog mgrin pa na// srog gi skar khung kha phye nas// der dmigs thig le'i rnal 'byor yin// gsang ba'i rdo rje pad+ma yi// b+ha ga'am ni ze 'bru la// byang sems dkar dmar sgom byed pa// byang chub sems kyi sgom lam yin// rtsa nas byang chub sems kyi bar// de dag kun gyi mtshan nyid kyang// mkhas pas shes par bya ba ste// mtshan nyid nges tshig las dang tshul// dbye ba la sogs rnam pa bcu// mtshan nyid rgyas par shes par bya// de dag sgom pa'i lam yin te// rtsa ni sgom pa'i sbyor lam yin// rlung ni sgom pa'i bar chad med// thig le rnam par grol ba ste// byang sems khyad par lam yin pas// mkhas pas rdzogs la nan tan bya// rdzogs pa las su rung ba na// de la bskyed pa dgag sgrub med// rang sems rdzogs par snang tsam na// bskyed pa'i ma mo ming yang med// de phyir bskyed pa gol sa yin// rdzogs pa'i lam gyi tshul la yang// skye ba bzhi yi rim par sbyar// rtsa dang rlung gi thig le las// ye shes rgyan gyi rnam pa ste// rtsa ni rtsi skya lta bu la// yi ge zil pa lta bur gnas// lte bar ka yi sde tshan la// spyi bo dang ni mgrin pa ru// a yi sde tshan rnam par gnas// snying gar a gcig gzhan ma ka/ lte bar shes rab ngo bo las// snying gar thabs kyi sbyor bas brgyan// mgrin pa yum gyi rang bzhin la// spyi bor yab kyi rgyan gyis brgyan// thabs dang shes rab kha sbyor las// ma mo rang gsal ye shes cha// yab dang yum gyi kha sbyar ba// ma mo lhun grub chos kyi cha// snyigs ma'i rtsa rnams 'gro 'dod kyi// rtsa ba 'jongs mo lta bu la// sbom phra bad mkhris rtsa las shes// brgya dang nyi shu dar dkar gyi// skud pa tsam du nges pa yin// dbyibs ni pad+ma 'khor lo 'dra// sum cu rtsa gnyis dar dkar gyi// rtsa ba phra ste ring thung yang// sor gnyis mkhas pas shes par bya// snying bo'i rtsa ni yungs kar tsam// tshangs pa'i bu ga nas sor gnyis// skyes nas sna rtse'i bar du gnas// dbu ma shing gi rnam pa la// g.yas g.yon sbrul gyi rnam par gnas// go ro tsa na dbus na gnas// mgrin pa'i gling du nas de bzhin// sgal tshigs dbyug pa la brten gnas// 'di dag gnas pa'i tshul rnams kyang// sangs rgyas sgom te ma mdzad la// sems can sgrin te ma bcos pas// rang bzhin gnas te ma mor 'dod// rang bzhin ma mo'i don rtogs nas// bskyed pa'i ma mo gol dang sgrib// rlung la sogs pa kun la sbyar// de dag sgom lam yin par bshad// de nas 'bras bu'i lam bshad de// sgom lam ngag dbang rang bzhin las// 'bras lam sems kyi ngo bo thob// phra ba dang po'i bde ba ste// kun tu phra ba mchog gi bde// kun nas phra ba bde bral bde// phra ba'i phra ba lhan cig bde// 'di dag 'bras bu'i lam yin te// dang po bde ba mu kha le// gnyis pa g.yang sa ma mo drug/ gsum pa ma mo bcu bzhi ste// bzhi pa lnga bcu yin par 'dod// 'dod chags chen po gcig nyid la// bde ba'i bye brag bzhi ru byung// rdo rje'i rtsa bar phyin pa la// dang po'i bde bar 'dod pa yin// rdo rje'i sked par phyin pa las// mchog gi bde bar 'dod pa yin// b+ha ga'i nang du gnyis pa dang// gsum pa bskyod pa'i bde ba yin// ma mo'i rang bzhin de shes na// zab mo'i ma mo'i gol sa ste// de la gnas pa yod ma yin/ ji ltar snang zhing srid pa nas// rdo rje pad+ma sbyod pa'i bar// thams cad ma mor rang gsal te// de ltar rtogs na dngos grub nye// rang gsal ma mo ma rtogs pas// ma mor smra ba thang re chad// ma mor spyod pa snying re rje// de la sems gnas rim pa yang// bde ba dang po nas bzung nas// rim gyi rang sems bde ba ru// gnas kyi bar du goms par bslab// goms nas rang sems bde ba ste// bde lam ma mo yin par nges// mtshan ma'i rnam rtog de la med// rnam rtog gsum las grol bas na/ de las grol ba'i ma mor 'dod// 'jig rten chags pa la sogs pa// spong ba'i sems bcu de la yod// de dag 'bras bu'i lam la yang// sbyor lam la sogs gong dang 'dra// ma mo lam rgyud lung las// sngon du 'gro ba'i lam bstan pa'i le'u ste dang pa'o//// de nas drug pa rnam grol lam// grol ba me long ye shes te// dag cing gsal la rnyog pa med// ye nas grol ba mnyam pa nyid// blang dang dor ba'i chos rnams med// nges par grol ba so sor rtogs// gol dang dngos kyi chos rnams ni// so sor rtogs pa'i nges pa'o// grol ba'i grol ba dag pa na// bya ba nan tan ye shes te// chos dbyings ye shes bya ba yin// de la nan tan ye shes yin// de ltar ye shes lnga yi ngang// grol ba'i ma mo yin par gsungs// chu ni ye nas dngas pa las// glo bur rnyog mas dngas ma yin// de bzhin rang gi sems nyid kyang// ye nas grol ba'i rang bzhin pas// grol ba'i ma mo yin par bshad// de ltar grol ba'i ma mo la// blang bar bya ba ye nas med// dor ba'ang ye nas yod ma yin// blang dor med pa'i ngo bo ste// ma bcos rang bzhin lhun gyis grub// bya btsal bral ba'i stong pa nyid// ma mo kun gyi yang rje mo// 'di las sku la sogs par snang// snang tsam nyid na snang ba med// snang na med las snang ba mtshar// skye ba med las skyes pa med// de lta'i ma mo grol lam la// mkhas pas dang po bla ma las// man ngag btsal te gtan la dbab// de nas mos pa yid la bya// mos pa'i yid ni rnam rtog ste// 'di nyid 'gags pas 'di nyid thob// 'di nyid rtog bral lhun gyis grub// ma mo lhun gyis grub pa'i sku// 'di thob bya ba'i 'bras bu med// 'di rtogs rtogs pa'i bya ba med// 'di dag ma mo'i rang gnas yin// de la yid ches nan tan gyis// ma mo lam rgyud lung las/ grol ba'i lam bstan pa'i le'u ste gnyis pa'o//// de nas ma mo'i sa bstan pa// rnam rtog las kyis mi shigs pa'i// phyir na ma mo'i sa zhes bya// de ni sa yi mtshan nyid de// 'jig rten 'das pa'i yon tan kun// brten min skye ba'i phyi rim mam// yang na gong ma gong ma yis// mtshan nyid brten pa'i phyir na ni// sa yi mtshan nyid las byung bas// brtan pas sa yi las su gsungs// sra ba sa yi mtshan nyid de// de ltar skyes bus shes gyur na// ma mo'i sa la mkhas pa yin// sa la mkhas par ma 'ongs na// brtan dang sra bar mi 'gyur te// de ltar sa la mi gnas par// ma mo sgrub pa snying re rje// re zhig sa la rnam pa gsum// 'jig rten rig 'dzin sa dang yang// ma mo bya bral rdzogs pa'i sa// 'jig rten 'das pa'i rig 'dzin sa// de ltar sa ni rnam pa gsum// bcu bdun sa yi rang bzhin 'dod// 'jig rten rig 'dzin sa la gnyis// tshogs kyi rig 'dzin sa dang yang/sbyor ba rig 'dzin sa dang gnyis/ rang gi sems kyi cha gnyis te// sems ni sna tshogs bag chags te// bag chags dag ni sems kyi cha// bem po ma yin sems su 'dod// ye shes cha gnyis sa gnyis yin// 'jig rten 'das pa'i rig 'dzin sa// bcu po'i rang bzhin nges pa ste// rab tu dga' dang dri ma med// 'od byed pa dang 'od 'phro dang// sbyang dka' drug pa ring du song// bdun pa mi g.yo legs pa'i blo// de bzhin dgu dang bcu pa'i bar// rig 'dzin sa bcuyin par gsungs// bya bral rdzogs pa'i sa lnga ste// mi 'gyur chos nyid dbyings kyi sa// dang po sa yi rang bzhin ni// me long ye shes dag pa'i sa// bya bral rdzogs pa'i sa gnyis so// blang dor bral ba mnyam pa'i sa// gsum pa yin te gol dang dngos// so so rtogs pa sa bzhi yin// bya ba nan tan sra zhing brtan// lnga pa sa yi rang bzhin yin// de ltar lnga dang bcu dang gnyis// sa yi rang bzhin de dag kyang// tha dad yod pa ma yin te// rang sems dag pa'i cha las ni// sa yi rim pa 'byung 'gyur te// rang sems dag pa'i cha med par// sa yi rang bzhin gang 'dod pa// de ni dmu cor smra ba yin// sa dang sems su dbye ba yang// nam yang yod pa ma yin no// shes shing rig pa'i phyir na sems// sra zhing brtan pa'i phyir na sa// 'gro zhing bgrod pa'i phyir na lam// de tsam de yi cha la ni// sa dang lam gyi tha snyad btags// don dam gang yang yod ma yin// yod na gong ma 'byung mi 'gyur// 'og ma nyid kyang de bzhin no// de dag sa yi rim pa'o// ma mo lam rgyud lung las/ ma mo'i sa bstan pa'i le'u ste gsum pa'o//// de nas yang dag rab bshad pa// ma mo'i 'bras bu'i rim pa yang// rnam pa lnga ru dbye ba las// tshogs lam dbang gi 'bras bu ste// sbyor lam tshogs kyi 'bras bu yin// mthong lam sbyor ba'i 'bras bu yin// sgom lam mthong ba'i 'bras bu la// sgom pa'i 'bras bu 'bras bu'i lam// 'bras bu'i lam gyi 'bras bu ni// bya bral rdzogs pa yin par 'dod// 'di ni lam gyi 'bras bu ste// snga ma rgyu ste phyi ma lam// 'bras bu yin par thams cad 'dod// lam 'bras rgyu 'bras ji bzhin du// sa yi rgyu 'bras de bzhin te// mtshan nyid 'bras bu bzhi bcu gnyis/ 'bras bu 'di dag thams cad kyang// rang gi sems kyi cha yin te// sems las gzhan pa'i rgyu 'bras ni// gang yang yod pa ma yin no// de ltar 'bras bu 'dod pas kyang// sems kyi man ngag btsal bar bya// sems kyi man ngag rnyed gyur na// 'bras bu tha snyad btags pa tsam// sems las gzhan pa gang yang med// de ltar sems rtogs 'bras bu ni// thob bya nam yang yod ma yin// thob bya med pa'i 'bras bu ni// rang rig rang gsal ye nas grub// 'di ni 'bras rab rang bzhin dag/ dag pa med las dag pa'i tshul// skye ba med las skyes pa'i tshul// snang ba med las snang ba'i tshul// tshul la btags nas 'bras bur btags// btags pa yod pa ma yin te// man ngag can gyis shes par bya// ma mo'i 'bras bu bstan pa ste// de las gzhan pa'i smra ba dag/ bud med tshul las grub pa yis// ma mo'i gzugs la ma mor 'dod// rgyan la sogs pa de bzhin 'dod// de ni mi shes mun pas bsgribs// gzugs ni ma mo ma yin te// thams cad sems su rang bzhin phyir// gzugs kyi ma mo gol ba yin// gzugs ni sems kyi snang ba ste// dper na byad kyi gzugs brnyan bzhin// de ltar rgyu 'bras gang 'dod kyang// sems kyi rtsa ba byang chub sems// skye med stong pa'i rtsa ba btsal// rtsa ba rnyed na rtse mo nyams// 'bras thob 'bras bu'i khyad par 'byung// 'byung ba med las byung ba mtshar// thob pa med las thob pa mtshar// rig pa med las rang rig mtshar// gsal ba med las rang gsal mtshar// de lta'i 'bras rab dam pa 'di// 'bras thob 'bras bu'i nang na thob// ma mo lam rgyud lung las/ma mo'i 'bras bu bstan pa'i le'u ste bzhi pa'o//// de nas yang dag rab bshad pa// sa dang lam gyi ngo bo ni// dran pa nyer gzhag bzhi dang yang// spong ba bzhi dang rdzu 'phrul gyi// rkang pa bzhi dang tshogs lam gyi// mtshan nyid yin par 'dod pa'o// ngo bo sems kyi rang bzhin yin// de yang 'di ltar shes par bya// lus dran nye bar gzhag pa yang// ma mo lus dran nyer gzhag ste// mi brjed phyir na dran pa ste// kun la tshul 'di shes par bya// sbyor ba'i lam gyi mtshan nyid bcu// dbang po lnga dang stobs lnga ste// ngo bo sems las gzhan ma yin// mthong ba'i lam la bdun yin la// bsgom pa'i lam yang lnga yin te// 'bras bu lam gyi mtshan nyid ni// gsum du mkhas pas shes par bya// bya bral rdzogs pa'i mtshan nyid ni// stong pa ma bcos lhun grub yin// ma mo'i mtshan nyid rtogs pa la// mtshan ma mi 'byung gang yang med// dper na me las du ba bzhin// du bas mtshon pa'i me dang ni// mtshan mas mtshan pa'i mtshan nyid dang// gol sa gang yang yod ma yin// de bas dang po'i mtshan nyid la// mkhas pas nan tan bya ba yin// mtshan nyid las ni mtshan ma 'byung// mtshan ma'i sgo nas mtshan nyid la// gnas pa yin par rtogs pa skye// rtogs pas sgro dang skur pa spong// spangs pas ngan 'gro srid lam sgrol// mtshan ma med pa'i mtshan nyid ni// pi lu ra dang pi tha ra// mu stegs pa yi sgrub pa yin// mtshan nyid dbye ba de ltar te// spyi yi mtshan nyid 'di ltar yin// ma nu sa ra'i don ma rtogs// rang sems gol ba'i snang ba las// sgyu ma rang gsal yul la rol// rang rang sgyu mar snang ba la// gong ma gong mas gzhal ba na// 'og ma 'og mas med par snang// med pa snang du mi rung ste// gol bas yod pa lta bur snang// smig rgyu 'dzin pa'i shes pa bzhin// med pa snang bas ngo mtshar te// grol ba shes pas ngo mtshar ro// gol ba'i ngo mtshar dman pa ni// las kyi cho 'phrul ngo mtshar te// gol ba khyad par ngo mtshar che// bla ma'i man ngag ngo mtshar che// ma mo bskyed dang rdzogs pa dang// rdzogs chen yang ni gol ba ste// ting 'dzin cho 'phrul ngo mtshar che// ting 'dzin cho 'phrul ngo mtshar can// dri za'i grong khyer ji bzhin du// snang ste med pa kho na'o// de ltar med pa'i ting 'dzin la// bsgom dang bzlas pas ci zhig bya// med pas yongs grub 'gyur ba na// bla ma'i man ngag ci la dgos// de dag rig pa bden mod kyis// re zhig 'di ltar shes par bya// med pa gsung pa gnyis pa la// re zhig yod pa gnyis pa yin// gol ba dngos po gnyis pa la// dngos po'i gnas pa bzhi pa ste// gol ba'i dngos por mi 'gyur zhing// med pas yod par mi 'gyur kyang// mdzub mos zla ba ston pa ltar// yod pa'i mtshan nyid tshol ba ltar// med pa thabs kyi yan lag yin// dngos po'i gnas thabs tshol ba las// gol ba thabs kyi bye brag yin// dper na sA lu'i sa bon las// sA lu'i 'bras bu 'byung ba la// sa gzhi dang ni lud dang chu// rmod pa la sogs rim pa kun// sA lu'i 'bras bur mi 'gyur te// sA lu'i rgyu la sa lu yi// 'bras bu 'byung ba'i thabs su snang// de bzhin rtog bcas gsum pa yang// bzhi po rtogs med 'byung ba'i rtags// yin par 'das pa'i sangs rgyas gsungs// ji ltar snang ba'i rnam rtog 'di// skye ba'i rim pa ma bkag par// rnam rtog myos pa'i sems 'di yis// stong pa lhun grub ji ltar rtogs// de phyir bskyed pa med pa yod// yod pa zab pa ma yin te// don byed mi nus med dang 'dra// med pas dman pa ma yin te// don byed phyir na yod kyang 'dra// bskyed pa'i rnam rtog phra ba 'di// rdzogs pa'i rim pas ma bsal bar// skye med rtogs par mi 'gyur te// bskyed pa'i rtogs pas nyams phyir ro// rdzogs dang rdzogs chen de bzhin te// rnam rtog rlung 'di ma 'gags par// ye shes me 'di 'bar mi 'gyur// ye shes me 'di ma 'bar na// ma rig mun sel mi 'gyur te// ma rig mun pa ma bsal bar// rang rig rang gsal rang las 'byung// rang rig rang gis ma gsal bar// sku la sogs pa'i tha snyad med// dper na bu ga'i rlung ma bkag/mar me 'bar bar mi 'gyur la// mar me 'bar bar ma gyur na// mun pa bsal bar mi 'gyur ro// bskyed pa'i rim par mi gnas kyang// sbyin pa'i tshogs la 'bad de bslab// de yis rang sems smin par 'gyur// smin pas rnam rtog nyer zhi nas// bskyed pa'i rim par legs gnas 'gyur// lam gyi ngo bo de lta bu// gang gis mi shes dmu cor du// thabs dang bral ba'i stong pa ni// nam mkha'i gos can 'dod pa yin// ma mo lam rgyud lung las/ lam gyi mtshan nyid bstan pa'i le'u ste lnga pa'o//// de nas ma mo'i sa dang lam// 'bras bu'i rtags ni bshad par bya// sbyin dang tshul khrims la sogs kyis// sa yi mtshan nyid de dag la// 'khor gsum rnam par dag pa sogs// sa bcu'i rtags su shes par bya// byams dang snying rje dang po'i rtags// dga' dang btang snyoms 'jig rten gyi// rig 'dzin sa ni gnyis pa'i rtags// gser gyi sa gzhi mnan na nem// btegs na 'bar ba la sogs pa// bya bral lhun grub sa yi rtags// de ltar sa yi rtags bstan nas// 'bras bu'i rtags ni 'di lta ste// dang por snang ba 'gags pa las// bskyed pa'i rim pa gang snang ba// ma mo bskyed pa'i rtags yin te// bskyed pa la sogs snang ba 'gags// rdzogs pa'i tshul du gang snang ba// de ni ma mo'i 'bras bu'i rtags// rtogs pa'i snang ba la sogs 'gags// rdzogs pa chen por gang snang ba// rdzogs pa chen po'i 'bras bu'i rtags// blang dor gang yang med pa ste// bya bral rdzogs pa'i 'bras bu'i rtags// de ltar 'bras bu'i rtags bshad nas// lam gyi rtags ni 'di ltar te// dang po tshogs kyi lam rtags kyang// thun mong brgyad dang thun mong min// bzhi ni nges par skye ba ste// tshogs kyi lam la ye gnas na// lus la phyi nang srin 'bu med// skra dkar med de mthon mthing 'dra// gnyer ma med de lo brgya thub// khams kyi zas bral gnyid med sogs// thun mong rtags brgyad 'byung ba'o// lus la drod dang rdul la sogs// thun mong ma yin rtags rnams 'byung// de bzhin sbyor ba'i lam rtags ni// thun mong brgyad dang thun mong min// bzhi ste bcu gnyis nges par 'byung// mthong lam thun mong rtags rnams dang// thun mong ma yin rtags rnams ni// mthong ba'i lam gyi mtshan nyid bzhin// ji ltar 'jig rten snang ba bzhi// dang po sprin gyi rnam pa la// gnyis pa du ba lta bu ste// gsum pa glog gi rnam pa la// bzhi pa mar me lta bur snang// de rnams mthong ba'i lam rtags so// thun mong rtags rnams kun la sbyar// de nas sgom pa'i lam rnams ni// bsgom pa lam gyi mtshan nyid ni// ji ltar bsgom pa gnas gyur pa// lam gyi mtshan nyid de nyid du// ji ltar 'jig rten grags pa snang// dang por sprin gyi rnam pa ste// gnyis pa du ba lta bu la// gsum pa glog gi rnam pa la// bzhi pa mar me lta bur snang// de ni sgom pa'i lam rtags so// de nas 'bras bu'i lam rtags kyang// re zhig 'di ltar shes par bya// 'bras bu lam gyi mtshan nyid la// sems ni nges par gnas pas na// 'bras bu lam gyi ngo bo ru// phyi dang nang du snang ba mthong// dang por sprin gyi rnam par mthong// gnyis pa du ba lta bu ste// gsum pa srin bu me khyer la// bzhi pa mar me lta bu ste// don dang 'brel pa'i rtags yin no// bya bral rdzogs pa'i lam rtags ni// ji ltar 'di ltar snang ba kun// bya bral lam gyi mtshan nyid de// stong pa nam mkha' lta bur snang// de ltar rgyud na bya bral rdzogs// dngos por smras pa yod ma yin// dngos por 'dod pas dngos ma grub// dngos med dngos po'i dngos stobs yin// mtshan ma stong par snang ba'i tshe// phyi dang nang gi chos rnams kun// stong pa nyid du gyur ram ci// 'gro ba rol pa rnam 'jig cing// 'khor ba'i dong sprug 'gyur ram ci// de ni de ltar ma yin te// phyi dang nang du snang ba yang// rang gi sems kyi snang ba ste// snang ba logs na yod ma yin// dper na skar khung khang pa dang// ra ba la sogs snang ba yang// thab kyi me yi snang ba ste// me nyid med par gyur pa na// me yi snang ba med par 'gyur// ji srid me ni yod par ru// me yi snang ba yod par 'gyur// de phyir rang sems rtog pas stong// phyi nang dngos po de bzhin stong// rang sems stong par ma gyur na// phyi nang stong par mi 'gyur ro// rang sems stong par gyur pa'i tshe// phyi dang nang du snang ba yi// rang gi rtog pas stong pa las// chad lta'i stong pa de ma yin// rang gi rtog pas stong pa'i phyir// phyi nang chos ni med pa yin// phyi nang chos rnams yod kyang med pa'i phyir// 'gro ba'i rol pa mi 'jig cing// 'khor ba dong sprug mi 'gyur ro// dper na mig gis gzugs la bltas// de ni gzugs su snang ba ste// mig gzugs gzugs kyi snang bas stong// gzugs kyi snang bas stong pa las// phyi nang gzugs med ma yin no// de bzhin rang sems rtogs pas stong// phyi nang chos ni med ma yin// 'di ni mtshan nyid rgyal po yin// rang sems mar me ltar snang sogs// dngos po'i mtshan mar gsungs pa yin// sku la sogs pa sna tshogs 'byung// mngon par shes pa drug skyes te// sngon gyi gnas ni shes pa dang// gzhan gyi sems kyang shes pa dang// 'chi 'pho dang ni skye ba dang// rdzu 'phrul gyi ni mngon shes dang// gzhan yang mngon par shes pa yang/ mig gis 'jig rten gzugs rnams ni// skad cig gcig la mthong ba dang/ rna bas sgra ni sna tshogs thos// sna yis sna tshogs dri tshor zhing// lce yis sna tshogs ro myong zhing/lus kyi reg bya rtogs par 'gyur// de dag rtags kyi rim pa'o// ma mo'i rgyud lung las/ ma mo'i rtags bstan pa'i le'u ste drug pa'o//// de ltar ma mo'i rtags bstan pa// lam thob pa yi tshad bshad pa// mnyam gzhag dang ni rjes thob ste// rjes thob 'gro dang za dang nyal// kun tu bzang mo'i gzugs brnyan gyis// bskyed pa'i rim pa'i snang ba ste// tshogs kyi lam gyi mthar phyin tshad// de bzhin dag pas bskyed pa la// 'gro 'dug la sogs la sems pa// sbyor ba'i lam gyi mthar phyin tshad// de las sems kyi khyad 'phags te// dag pa rang bzhin bskyed pa la// nyin mtshan rtag tu sems gnas pa// sbyor lam cha gnyis mthar phyin tshad// yin pa nyid du the tshom med// bskyed pa tsit+ta'i dkyil 'khor la// lo dang bskal par sems gnas pa// mthong ba'i lam gyi mthar phyin tshad// rtsa dang rlung sogs ngo bo ru// rtag tu mi 'gyur sems gnas pa// sgom pa'i lam gyi mthar phyin tshad// yin pa nyid du rnam par 'dod// rang sems rtag tu gang gnas pa// 'bras bu lam gyi mthar phyin tshad// yin pa nyid du the tshom med// bya bral rdzogs pa'i ngo bo ru// ji srid 'khor ba stongs kyi bar// ye shes ngang du gnas pa de// bya bral rdzogs pa'i mthar phyin tshad// yin pa nyid du shes par bya// de ltar tshad dang mi ldan pas// rang 'dod bsam pa sna tshogs kyis// las la sogs pa khas 'ches shing// sgro dang skur pa'i mtha' la gnas// 'di ni log lta ma rungs pa// mthong ba'i chos la dmyal sogs 'tshed// de bas lam dang lam gyi tshad// man ngag can las shes par bya// man ngag yod na bsam gtan bya// med na 'bad med bzlas sogs bya// tha mal pa yi spyod pa la// skad cig gnas par ma gsungs so// dper na rgyal po'i rgyal bu yang// rgyal bu'i bya ba kho na las// rigs ngan bya ba spangs nas gnas// 'di bzhin ma mo'i lam 'di ni// 'jig rten lam gzhan bgrod ma yin// lam gzhan bgrod dang skye ba med// de bas 'bad pa thams cad kyis// ma mo'i lam la nan tan bya// de bas rang la lam rnams skyes// skyes tshul tshad du phyin pa dang// 'bras bu rang byung thob par 'gyur// rang byung sangs rgyas mtshan nyid de/ de bas ma mo la sogs sangs rgyas dang/ tha dad med pas gang yang med// de ni mthar phyin 'bras bu'i tshad// yin te rtogs la sogs pa kun// brtan dang sra ba'i sa yi yang// mthar phyin pa yi tshad yin no// stong pa nam mkha' lta bur snang// mtshan ma mthar phyin pa yi tshad// yin no de ltar nan tan gyis// de dag mthar phyin pa yi yin// ma mo lam rgyud lung las// mthar phyin pa'i tshad bstan pa'i le'u ste bdun pa'o//// de nas yang dag rab bshad pa// de yis spangs pa'i rnam rtogs kyang// 'di ltar shes par bya ba ste// mthong ba'i lam las spang ba ni// ji ltar 'jig rten grags pa dang// mdo sde kr-i ya yo ga dang// gnyi ga rgyu dang thabs kyi ni// lam rnams 'di ltar rnam rtog ste// de dag spangs nas ma mo yi// mthong ba'i lam na gang gnas pa// spong ba dang po yin par nges// ma mo mthong ba'i lam pa yi// mnyam gzhag rjes thob ma lus pa// sbyor ba'i lam gyi rnam rtog ste// rnam rtog de nyid spangs nas kyang// sbyor ba'i lam nyid nyams su blangs// thun mong rnam rtog 'og ma bzhin// de ni sbyor las spang bya'o// sbyor ba'i lam gyi mtshan nyid gang// mthong ba'i lam pa'i rnam rtog las// mthong ba'i lam pas de nyid spang// rnam rtog gnyis pas thun mong ste// thun mong yin phyir gnyis ka spang// mthong ba'i lam gyi mtshan nyid gang// sgom pa'i lam pa'i rnam rtog yin// rtogs pa yin phyir de nyid spang// rnam rtog gsum ni thun mong la// gsum po de nyid spang bar gsung// sgom pa'i lam gyi mtshan nyid gang// 'bras bu'i lam gyi rnam rtog ste// 'bras bu'i lam pas de nyid spang// 'bras bu'i lam spong thun mong bzhi// spang ba ru ni sangs rgyas gsungs/ 'bras bu'i lam gyi mtshan nyid ni// bya bral rdzogs pa'i rnam rtog yin// bya bral rdzogs pa'i de nyid spong// thun mong lnga yang de bzhin no// spang bar bya ba'i rnam rtog kyang// yod nas spang ngam med nas spong// gong mas 'og ma ji ltar spong// de ltar 'di dag shes par bya// rnam par rtog pa'i ngo bo yang// ye nas yod pa ma yin te// dper na 'jig rten grags pa yang// ka ba brtsigs pa re rde sogs// phyi ru snang ba de dag dang// skyes pa bud med ma ning sogs// nang du snang ba de dag ni// tshogs kyi lam pa'i rnam rtog las// de dag ye nas yod ma yin// rang sems gol ba'i snang ba ste// sems dang med de gol nas sems// gol sa sad na sems med ste// snang ba ye nas yod ma yin// de ltar med par rtogs pa la// spong ba'i tha snyad btags pa ste// spang ba dngos su ma yin no// med la rtogs nas spong yod na// med pa spong du mi 'dod ste// gnyis ka dngos po yin pa'i phyir// med pa la yang spang ba med// med las yod pa ltar snang ba// de dag rtogs pa la spong zhes// rnam par 'dren pa rnams kyis gsungs// mthong bas bskyed pa'i rim pa yang// sbyor ba'i lam pa'i rnam rtog la// tshogs kyi bskyed pa'i rim de yang// dngos su yod pa ma yin te// rang sems snang ba dag pa las// bskyed pa'i ma mo sku ltar snang// snang ste snang la rang bzhin med// med pa dngos su spang ba med/ med pa rtogs la spong zhes btags// btags pa nam yang yod ma yin// de ltar sbyor ba'i lam de yang// mthong ba'i lam gyi rnam rtog ste// spong ba la sogs de bzhin no// gong ma rnams dang de bzhin sbyar// gnas skabs rang sems gol ba ste// de yang re zhig gol sa btsal// sems bzung yan lag bsam mi khyab// gol sa bsam gyis mi khyab bo// gong mas 'og ma spong ba yang// 'og ma'i rnam rtog 'gags tsam na// gong ma'i rnam par rtog pa ste// de yi cha tsam la dngos nas// gong ma'i ye shes snang ba yi// 'og ma'i rnam rtog spang zhes btags// ma mo'i dngos po rang gnas la// spong dang rnam rtog tha snyad med// rang sems gol ba'i bye brag la// rnam rtog spang zhes grags pa yin// don dam pa yi mtshan nyid ni// rnam rtog nyid ni ma mo la// ma mo nyid ni rnam rtog yin// de ltar rtogs na grol ba las// gzhan pa'i lta bas grol ba med// grol ba zhes pa tha snyad de// tha snyad spang ba rang gsal yin// de dag shes rab ma mo yis// rnam rtog spong ba'i mtshan nyid do// ma mo lam rgyud lung las/rnam par rtogs pa spang ba'i tshul bstan pa'i le'u brgyad pa'o//// de nas yang dag rab bshad pa// de la bar du gcod pa'i bdud// mkhas pas 'di ltar shes par bya// bdud ni rnam pa bzhi yin te// 'dod chags zhe sdang la sogs pa// phal pa nyon mongs bdud yin te// 'dod chags chen po la sogs pa// ma mo rang gsal bya bral rdzogs// ji ltar gol ba'i ma mo de// bla ma lha yi bu yi bdud// skyes med don la gang gol ba// skye ba yin phyir 'chi bdag 'dud// stong pa gcig las gang gol nas// sna tshogs du mar gang 'dzin pa// de ni phung po'i bdud du grags// de dag bdud bzhi'i ngo bo ste// tshogs kyi lam la bdud bzhi ste/ tshogs kyi skabs kyi nyon mongs drug/ nyon mongs pa yi bdud yin te// nyon mongs bdud kyang ma bral na// rang sems bde bar mi 'gyur ro// tshogs kyi nyer len phung po sogs// phung po'i bdud du rig par bya// tshogs kyi gol sgrib gang ston pa// bla ma lha yi bu yi bdud// tshogs lam dam par skye ba med// skye ba med las gang skyes pa// 'chi bdag bdud du rig par bya// de lta bu yi bdud bzhi byung ba yang// lha yi bu yi bdud yin pas// dad pa dang ni rtsol ba dang/ gser dngul la sogs rin chen dang// rta dang glang po la sogs pas// lha yi bu yi bdud spangs te/ bla ma dam pa rtag tu bsten/man ngag gter gyi rtsa ba bcad// bdud kyi 'jigs pa rtag tu spang// 'jigs pa'i bdud bzhi gzhom pa yang// dam pa'i bla ma las shes bya// de nas sbyor ba'i bdud bzhi yang// sbyor ba'i skabs kyi nyon mongs drug/nyon mongs pa yi bdud du grags// sbyor ba'i lam gyi gol ba ni// ston pa bla ma lha yi bdud// nyon mongs skye ba yang de nyid// sbyor lam zab mo skye ba med// skye ba med las skye bar gol// 'di dag 'chi bdag bdud yin te// 'di yang 'di las byung ba yin// sbyor ba'i lam gyi nyer len sogs// rnam rtog du ma phung po'i bdud// de yang lha yi bu las byung/ de ltar bdud kyi rtsa ba yang// lha yi bu yi bdud yin pas/mig dang 'dra ba'i bla ma la/ mos pa dang ba la sogs bya// bdud kyis 'jigs pas skrag par bya// skrag nas bdud gzhom bde thabs btsal// de nas mthong ba'i bdud bzhi yang// mthong ba'i gol ba gang ston pa// bla ma 'dra bas lha yi bdud// 'phral du dga' bde lha dang 'dra// bde la bar chod bdud du 'gyur// de las nyon mongs bdud 'byung ste// gol lam grub pa sems nyon mongs// nyon mongs pa yi bdud du 'gyur// sdug bsngal bskyed pa nyon mongs te// dge la bar du gcod pas bdud// 'di yang bdud kyi rtsa ba ste// nyon mongs dbang gis gsum po 'byung// de ltar gyur pa'i nyon mongs 'di/ nam yang mi gzhom ma yin no// des bstan lam gol du ma ni// phung po'i bdud du nges pa ste// du ma 'dus pas phung po ste// de yi bar du gcod pas bdud// bdud de myur du ma bcom na// 'khor bar skye ba skad cig med// des bstan gol bas skye ba ste// 'di ni 'chi bdag bdud yin no// skye med ma rtogs 'chi ba ste// tshe la bar chod bdud yin no// skye med chos la gnas gyur na// 'chi bdag bdud nispre dang 'dra// de ni mthong ba'i bdud bzhi yin// de nas sgom lam 'dud bzhi yang// sgom pa'i lam la gol ba ston// bslu ba'i bla ma lha yi bdud// de yis bstan pas sems nyon mongs/ nyon mongs bdud du shes par bya// nyon mongs dbang gis 'chi ba 'byung// de ni 'chi bdag bdud yin no// sgom pa'i lam gyi nyer len ni// de nyid phung po'i bdud yin te// phung po ma gtogs bdud gzhan ni// nam yang yod pa ma yin no// de ltar 'dud kyi rtsa ba ni// phung po'i bdud du nges pa yin// bdud ma bcom par sa dang lam// nam yang bgrod par mi 'gyur ro// de nas 'bras bu'i bdud bzhi yang// 'bras bu gol bar gang ston pa'i// bsog pa'i bla ma lha yi bdud// de ltar 'bras lam bsgrubs pa las// sems can nyon mongs nyon mongs bdud// des ni skye ba'i g.yang sar lhung// 'chi bdag bdud du nges pa'o// de yi sna tshogs du ma yis// phung po'i bdud du nges pa'o// de ni 'bras bu'i bdud bzhi'o// bya bral rdzogs pa'i bdud bzhi ni// bya bral rdzogs pa gol ba ru// ston pa lha yi bu yi bdud// de las sems pa sems nyon mongs// nyon mongs pa yi bdud yin te// nyon mongs du ma phung po'i bdud// phung pos 'jigs pa'achi bdag bdud// 'di ni 'byung ba'i bdud bzhi ste// bdud bzhi bcom par ma byas na// ma mo'i mtshan ma rnyed mi 'gyur// ma mo ma rnyed bde mi rnyed// stong pa ma rnyed dngos mi rnyed// nye bar 'tsho bas srog yin te// srog la bar du gcod pas bdud// 'jigs shing skrag par byed pas bdud// lhung zhing bar du gcod pas bdud// lam log g.yang sar 'khrid pas bdud// rang rig rang gsal 'joms pas 'dud// ye shes sgron ma gsod pas bdud// de lta'i bdud kyi ma 'jigs par// bdud kyi mtshan nyid shes par bya// bya bral lhun rdzogs rang rig las// rang sems gol bas bdud ltar snang// sems las gzhan pa'i bdud dag ni// gang yang yod pa ma yin no// dper na sman dang sngags dag las// skyes pa dang ni bud med snang// de bzhin rang sems gol ba las// 'chi dag la sogs bdud ltar snang// snang yang sems las gzhan med kyis// rang gi gol ba'i sems bcom na// bdud kyi phung po 'jigs par 'gyur// de phyir bdud 'joms mthu dang rtsal// su la'ang yod pa ma yin gyi// bla ma dam pa rtag tu bsten// dam pa'i don la yid ches bya// dman pa'i lta ba dor bar bya// mchog gi lta ba dang du blang// ma rig mun pa rab bsal bya// de ltar shes na bdud la ni// skyes bus 'jigs par mi bya'o// bdud med rang gi sems yin na// de las 'jigs pa su zhig skye// de ltar mtshan nyid ma shes shing// rtogs par yang ni ma gyur na// mi 'jigs par yang ma yin pa// mi gnod pa yang ma yin no// des na bya bral lhun grub las// rang sems bdud du ji ltar 'gyur// rang sems ye nas stong pa ste// der rtogs rkyen dang yang mi 'phrad// gol ba'i rkyen dang der 'phrad pas// de ltar rang sems bdud du snang// rtogs pa'i rkyen ni rnam pa bzhi// dam pa'i rgyud don de dang gcig/ bla ma dam pa de dang gnyis// dam pa'i rdo rje spun dang gsum// man ngag gdams pa de dang bzhi// 'di bzhi rtogs pa'i rkyen bzhi ste// 'di dang ma 'phrad rang sems gol// gol ba'i rkyen dang ye nas 'phrad// de yang rnam pa bzhi yin te// bdag dang rtog pa ril po sogs// der 'dzin log pa'i shes pa ni// 'di ni log pa'i rgyud don te// ye nas yod par rgyal bas gsungs// pha dang ma dang dgra dang gnyen// 'di ni log pa'i bla ma ste// 'khor ba thogs med dus nas yod// spun dang chung ma la sogs pa// 'di dag log pa rdo rje'i spun// dang po nyid nas yod pa'o/ mi chos bla ma'i chos rnams ni// de dag gol ba'i man ngag ste// ye nas yod pa de nyid shes// de ltar gol ba'i rkyen bzhi ni// dang po nyid nas yod pa ste/ 2/ dper na lus dang grib ma bzhin// gol ba'i rkyen gyis rang sems gol// rang sems gol bas 'jigs pa ste// 'jigs dang skrag dang rang sems bdud// de ltar ma shes ma mo bsgrubs// bsgrubs kyang ma mo mi 'grub ste// nam mkha'i me tog tshol ba bzhin// de dag ngal ba don med yin// de bas 'bad pa thams cad kyis// dam pa'i rgyud kyi rjes 'brang zhing// bla ma dam pa rtag tu bsten// de las man ngag dam pa btsal// dam pa'i grogs kyang rtag tu 'grog/ 'di ni rang sems rtogs pa'i rkyen// rkyen bzhi yin par nga yis gsungs// de ltar sems nyid rtogs pa na// bdud ces bya ba ming yang med// 'jigs pa la sogs de bzhin no// gnyen ces bya ba ming yang med// dgra bo la sogs de bzhin no// da ltar bla ma dam pa las// rang sems rtogs pa'i rnal 'byor pas// dgra dang bdud kyi sde dang stobs// rang sems ngang gis 'jigs par 'gyur// dper na sgyu mo'i sbyor ba shes// sgyu mar snang yang yang dag gi/ rtog pa log nas sgyu mar 'dzin// de bzhin bdud kyi man ngag shes// re zhig bdud du snang byed kyang// tha dad bdud kyi zhen pa log/ rang sems bdud du snang ba 'dzin// rang sems bdud du shes pa las// tha dad bdud kyi 'jigs dang bral// bdud kyi bjigs pa ma skyes na// dngos grub nye ba'i rgyu ru 'gyur// de dag bdud kyi bye brag go/ ma mo lam rgyud lung las/ ma mo lam gyi bdud bstan pa'i le'u ste dgu pa'o//// de nas ma mo 'jug pa yi// gang zag legs par bshad bya ba// ye shes ma mo sgom bya ba'i// gang zag 'di ltar shes par bya// dad dang brtson 'grus che ba dang// ngo tsha shes shing khrel yod dang// mi dge'i bya ba kun sdom zhing// lus ngag dge la dam tshig sdom// byang sems snying rje dga' sems ldan// dus drug dam tshig gtan du bsrung// dkon mchog spyi chang dang du len// dman pa rnams la snying rje ldan// dregs pa nga rgyal gdul dka' 'dul// pha rol phyin bcu brgyud la skyes// rig pa'i brtul bzhugs mngon du bya// gtor ma maN+Dal rtag tu byed/ bla ma mnyes pa'i thabs la mkhas// rdo rje spun la dga' sems che/ bud med tshogs la smod mi bya// ma mo'i dam tshig dbang rnams thob// rgya chen chos la mos pa bskyed// blo gros zab cing rgya che la// man ngag mtha' ru phyin pa yis// gang zag ye shes lam la 'jug/ las kyi ma mo sgrub pa yi// gang zag mtshan nyid 'di ltar brtags// 'jigs med snying stobs che ba yis// lus sems ngag ni rig pa dang// snying rje shas chung gsod la dga'// rnam rtog shas chung gnyid yang chung// ma zhum pa la 'jigs pa med// gsod la dga' zhing sha khrag la// rtag tu rol par byed pa dang// dur khrod ngam grog la sogs pa'i// gnas la dga' zhing sdug sran che// ma mo'i dam rdzas tshol ba la// nyin mtshan srog kyang 'dor bar byed// las kyi ma mo'i mtshan nyid mkhas// bsnyen dang bsgrubs pa la sogs pa'i// las kyi sgrub pa kun la mkhas// srog dang thun gyi las sogs pa'i// las kyi kha tshar kun la mkhas// ma mo spyi dang bye brag gi/ dam tshig rtag tu bsrung la brtson// rtag tu gnas su rgyan rgya 'khrul 'grams shing// mchod dang gtor ma rgyun mi gcod// ma mo rgyu ba'i dus shes shing// rgyu ba'i dus su gtor ma gtong// thun yang dbab pa shes pa dang// zla ba drug dang lo gcig gam// lo gsum stan ni drod mi yal// sbrid dang mi tshig bar mi gcod// thun gyi skabs su gnyid de bzhin// brang brdung 'o dod rtag tu 'bod// cho nges sems 'khrug mchi ma gtong// dur khrod chas la dga' zhing rol// cha lugs bdud dang srin po 'dra// sha rtsa nag la ral pa kham// mngon spyod las kyi man ngag gi/ bla ma rtag tu bsnyen cing bsten// dad dang brtson 'grus che ba la// g.yeng dang blo rgod sems med pa/ las kyi ma mo bsgrub pa yi/ gang zag 'di ni yin par gsungs// de ltar gyur pa'i gang zag gis// gsang gso las kyi rim pa dang// dbab gcad las kyi mtha' rnams kyis// 'grub par 'di la the tshom med// the tshom spang ba'i las rnams ni// 'grub par mkhas pas shes par bya// de dag ma mo sgrub pa yis// gang zag mtshan nyid bstan pa'o// gang zag mtshan nyid ma shes shing// mtshan nyid mi ldan slob ma la// ma mo'i sgrub pa ston byed pas// de yi bla ma dmu cor te// slob dpon phung ste slob ma phung// gnyis ka phung byed dmyal bar skye// dper na seng ge'i 'o ma yang// rin chen snod du bzho bya zhing// rdza dang kham phyi'i snod du min// rdza ma chags la 'o ma 'bo// de bzhin gsang ba'i ma mo yis// man ngag snying khu kun la min// phyal ba'i man ngag wa dang 'dra// ma mo lam rgyud lung las/gang zag bstan pa'i le'u ste bcu pa'o//// de nas ma mo bsgom pa dang// las kyi ma mo sgrub pa yi// thun dang thun mtshams 'di lta ste// bud med bal ni skyen pa drug/ yud tsam yin te yud tsam drug/skad cig yin te skad cig drug/ thang gcig yin te thang gcig drug/ dang po thun du mkhas pas bzung// mtshams ni thun pas ring du bya// gsal la rnam par ma 'dres pa// dang po'i thun la sems zin na// gnyis pa'i thun la thang gcig ni// nyis 'gyur gyis ni ring bar bya// mtshams kyang thun dang mnyam par bya// de la rtog med sems gnas na// de yi nyes 'gyur thun la bsam// mtshams ni phyed kyis ring bar bsam// de bzhin rang gsal sems gnas na// de yis sun 'gyur thun du bsam// mtshams ni thang gcig bcu ru bya// de la rang rig rang gsal na// thun ni bzhi 'gyur gyur pa ste// de la mtshams kyi ming yang med// tho rangs skya rengs shar tsam nas// dgongs ka'am ni sros kyi bar// rang sems yul la gnas par 'byung// nam sros thun ni skad cig ste// nyin mtshan thun ni phyed par 'gyur// de nas zla ba phyed dang gcig/ de nas zla ba'i thun 'phel nas// lo yi thun dang lo 'phal dang// bskal pa'i bar du thun 'phel te// tshes gcig la ni rang sems thob// dang po thang gcig bcu yi thun/ de yang nyin thun bzhi yi tshul// tho rangs dang ni nyi shar mtshams// zan zos nas ni nyin phyed bar// thun gnyis pa yi mtshams yin te// nyin phyed nas ni nyi ma rgas// gsum pa'i thun mtshams yin par 'dod// de ltar 'gyur ba'i thun bzhi yang// ma mo bzhi yi rang bzhin te// thun gnyis pa la sogs pa yang// thun bzhi kun la sbyar bar bya// thun der bsgom pa'i sbyor ba yang// man ngag can gyis 'di ltar bya// man ngag legs par thob pa dang// khyad par can gyi gnas btsal te// bar chad gang yang med pa'i gnas// bde zhing 'jam pa'i stan la yang// legs pa'i gos dang zas bshams la// ngal dub skyo ba'i sems spangs te// gnyid dang myos pa ma yin pa// lus ngag sems ni bde ba dang// gzhan gyis g.yengs par ma yin par// rang sems dul zhing gnas pa yis// dus gsum stan la legs 'dug ste/dang por lus sems cha la dbab// de nas dmigs pa'i dkyil 'khor la// rang gi sems ni bab kyi gtad// mgal me yi ni 'khor lo ltar// yul la rab tu rgyug pa'i sems// de nyid las ni bzlog nas su// dmigs pa'i yul la rang bab gtad// de ltar yang yang bsgom pa dang// ting 'dzin sems kyi bdud gnyis 'byung// bying ba rang sems snub pa'i bdud// rgod pa rang sems khrid pa'i bdud// de ltar gyur pa'i bdud gnyis ni// mkhas pas 'di ltar gsal bar bya// gnyid dang rmugs pa 'thibs pa gsum// 'di ni bying ba'i rnam grangs te// chen po 'bring dang chung ngu ste// de dag dgu ru rim pas dbye// 'di ni bsal ba'ang rnam gsum ste// chen po bskor ba byas pas sel/ 'bring po byad la chu gtor te// chung ngu lus bsigs mig phye sel// de nas rgod pa bcum pa yang// che 'bring gong bzhin shes bya ste// chen po 'jigs pa chen pos bsal// 'bring po spro ba chen pos te// chung ngu shes pa sbrims pas sel// de ltar byas na ma mo 'grub// de ltar ma gyur gol bas ni// 'bras bu mi 'byung rang rgyud rlag/dper na ral gri'i 'khrul 'khor bzhin/ de bas 'bad med nan tan bya// dpa' bo dag gam rig 'dzin gyis// bsregs bcad brdar ba'i gser bzhin du// yongs su brtag nas ma mo'i lam// blang bar bya yis mos pa'am// dad pa tsam gyis 'jug pa min// zhugs na phung ba kho na ste// 'jig rten 'di ru bkra mi shis// ma mo 'khor gyis phyag mi zer// ma mo'i chos la skur pa 'debs// zab mo'i don yang 'dor bar byed// las kyi ma mo kha gting 'khrug/ 'jig rten dag tu rims dang nad// thog dang ser ba sa g.yos sogs// bkra mi shis pa'i rtags rnams 'byung// de bas 'bad med bla ma bkur// bla ma las ni man ngag 'byung// man ngag las ni lam dang sa// skye ba nyid du the tshom med// ma mo lam rgyud lung las// ye shes ma mo bsgom pa'i thun bstan pa'i le'u ste bcu gcig pa'o//// de nas las kyi ma mo yi// thun mtshams 'di ltar shes bya ste// nyin thun spongs pa gang yin pa// las kyi ma mo thun tshod spyad// bye brag 'di ltar shes par bya// nam sros srod ni 'khor gyi bar// dmu dang sman mo phal cher rgyu// thun mtshams dang po yin par nges// srod nas nam gyi 'jing gi bar// btsan dang sman mo thams cad rgyu// thun mtshams gnyis pa yin par 'dod// 'jing nas nam phyed bar du yang// bdud dang bcu bzhi rgyu ba'i dus// thun mtshams gsum pa yin par gsungs// nam phyed nas ni tho rangs par// rgyal po dang ni ma mo drug/ rgyu ba'i dus de thun bzhi pa// de ltar rgyu ba'i thun bzhi ni// las kyi ma mo'i thun dang mtshams// thun dang rang sems ma g.yengs par// sngags dang ting 'dzin bar mi gcad// las kyi ma mo sgrub pa dang// bkra shis nyin mo'i dus spangs nas// mtshan mo bar gcod dus yin te// nyin mo bkra shis la sogs pa// mtshan mo yi dwags gdon gyi dus// dus der bsgrubs na nye bar 'grub// dper na mi la bdud 'gro na// rkun ma la sogs nub mo 'gro// gzhan ni nyin mo don grub ste// wa sogs mtshan mo don 'grub ltar// ye shes ma mo nyin mo bsgom// las kyi ma mo mtshan mo bsgrub// dngos grub so so myur phyir ro// de ltar mtshan mo'i dus de yang// dus ni bzhi ru shes bya ste// dang po bsnyen pa'i dus su yang// sgrub pa yi ni de bzhin dus// las kyi dus dang las kyi lnga// dus bzhir thun yang bzhi pa ste// de yi 'og ma'i thun rnams la// nyin mo spong ba mtshan mo'i dus// nyin mo dam tshig nyams par 'gyur// de yang rgyu ba'i dus su yang// gzhan la ngal ba don med yin// bsnyen pa'i dus bzhi'i ma mo ste// dmigs nas sngags kyi bar mi gcad// glal kyang ma shor bsgrubs pa yis// ma mo rang dbang med par 'gugs// rang dbang med par rnam pa mang// sngags dang rdzas dang ting 'dzin dang// tshig dang man ngag thun la sogs// 'di ni thun gyi rang dbang med// sgrub pa'i skabs su tha dad spongs// las kyi skabs su dgra la ste/lhag ma'i skabs su me lha yin// ma mo lam rgyud lung las/ las kyi ma mo'i thun bstan pa'i le'u ste bcu gnyis pa'o//// de nas yang dag bshad bya ba// ma mo las kyi rdzu 'phrul ni// mkhas pas 'di ltar shes par bya// rdo rje me yi rdzu 'phrul ni// mu zi sbyor ba mkhas pa yis// rdo rje las kun me la reg/ rdo rje me ru 'bar bar nges// mi mthong ba yi rdzu 'phrul ni// 'ug pa ma nyams bum par 'jug/lam gyi sum mdor dong brus te// mi yis mi mthong nam phyed sba// de nas ro de rul ba dang// mi yis ma mthong bar blangs nas// rang gi mi blta lag pa yis// rus pa gang nyid brdar byas nas// rang gi dpral bar bskus byas na// sus kyang mthong bar mi 'gyur ro// de ni spyi ru 'od dbyung bar// 'dab chags dngul bya'i sbyor ba las// gang du 'gro dang ji tsam 'dod// 'od ni nges par 'byung ba'o// khang pa'i nang du 'od 'dod na// gsal ba'i 'od zer dang ba'i rdo// de las 'od ni sngon dmar 'byung// ma mo 'od kyi rdzu 'phrul lo// 'bras bu mchog gi khu ba yis// shog bu dag la yi ge'am// rang gi ci 'dod gzugs bris la// de nas phyi bdar legs par bya// nag po mtshur gyi chu nas dbyung// gang 'dod yi ge'i gzugs rnams 'byung// de ni yi ge'i rdzu 'phrul yin// shing gi phur pa dag la ni// rtse mor rdzas kyi rdo rje bcug/ rgya mdud bar mar me gzhob sku// rdo dang lcags dang shing la sogs// gang la btab pa thebs pa ste// rgya mdud mtshams su gdon mi za// de ni phur pa'i rdzu 'phrul te// rang gzhan phur pas btab pa ni// he ru ka dang rig 'dzin 'grub// gzhan gyis grub pa ma yin no// phur pa me yi rdzu 'phrul ni// chu shing snying po ma nyams pa// de las phur pa'i gzugs byas te// dar dmar ras kyis gril byas te// snang ba gang yang med pa yi// mun par phur pa de bzhag na// nges par me ru snang ba ste// snang ba dag las ma yin no// de dag ma mo'i rdzu 'phrul te// thams cad rdzas kyi sbyor ba ste// rdzu 'phrul yin phyir rtog pa med// 'jigs pa 'byung bas mthu ru bstan// 'jigs las rnam rtog skrag pa 'byung// rnam rtog skrag las gdon 'jug ste// gdon las nad bzhugs na nas 'chi// 'chi ba mthu yi dngos grub yin// gzhan yang sngags kyi rdzu 'phrul dang// sngags dang rdzas kyi rdzu 'phrul dang// zor gyis rdzu 'phrul la sogs pa// man ngag can las shes par bya// de ltar rdzu 'phrul bstan pas kyang// mu stegs rdzu 'phrul nga rgyal bcag/ma mo lam rgyud lung las/ ma mo'i rdzu 'phrul bstan pa'i le'u ste bcu gsum pa'o//// de ltar lam gyi rgyud lung las// le'u bcu gsum gsungs pa yi// ma mo spyi yi don de yang// bcu drug bar du gsungs pa'i don// ye shes ma mo bsgom pa yi// spyi dang bye brag gnyis ka yin// las kyi ma mo'i sgrub pa yis// spyi dang bye brag gnyis ka yin// thun mong bshad par shes bya yi// sgom dang sgrub par byed pa la// ma mo spyi dang bye brag la// dbye ba yod pa ma yin no// spyi ni ma mo spyi sgrub ste/ bye brag bye brag sgrub pa yin// bsgrub par bya ba ma mo la// sgrub par byas pas sgrub thabs yin// sgrub thabs man ngag gdon las shes// man ngag bla ma'i zhal la rag/ zhal ni thugs kyi dkyil nas 'byung// de bas ma mo sgrub 'dod na// bla ma'i thugs bzung thabs la 'bad// thugs bzung thabs ni 'di lta ste// rang gi rang rgyal rigs dang che// khe dang grags pa la sogs spang// rang gi rdzas dang longs spyod dang// bu dang chung ma nor gyi dbyig/ rang gi lus dang yid kyis kyang// de yis thugs bsrung legs par bya// 'gro dang 'dug pa'i spyod lam la// skyel dang bsu dang gdan stabs dang// zas kyi phud phul bag gyis blta// mdor na de dang ci mthun bya// mkhas pas bye brag shes par bya// gzhan yang bla ma'i gnyen 'dun dang// rdzas dang longs spyod thams cad la// mkhas pas 'di ltar shes par bya// gnyen 'dun bu dang chung ma la// jo bo'am yi dam lha yi tshul// de la mchod dang bsnyen dang bkur// bla ma'i gnyen dang de bzhin te// bla ma de las khyad par 'phags// bla ma'i rdzas ni dug bzhin du// spyad du mi rung reg mi rung// gyag tu mi rung stor mi rung// de ltar spyod na dam tshig ldan// dam tshig sngags kyi sa gzhi yin// de las bsgoms bsgrubs dngos grub 'byung// gsang sngags spyod pa'i rnal 'byor pas// bag ma gsar pa'i tshul bzhin du// de ltar spyad na dam tshig ldan// sgom sgrub dus su rnal 'byor pas// bya rnams mnongs pa'i tshul bzhin du// bla ma bsten pa'i rnal 'byor pas// rang gi mig gi 'bras bu bzhin// mig gi 'bras bu gces pa bzhin// man ngag dam pa de bas 'phangs// man ngag don la sgrub 'dod na// rdzas dang yo byad chags mi bya// rdzas dang yo byad btsal dka' zhing// rnyed nas rang la phangs pa ltar// man ngag dam pa btsal dka' zhing// rnyed nas spel ba bde bas dka'// bu dang chung ma snying sdug ste// rdo rje mkha' 'gro de bas sdug/ zas dang rdzas kyis tshim pa las// lus sems bde bar snang ba ste/ gnyis med ye shes ro rtogs na// de yi bde ba de yis 'phel// bde ba bla ma las rtogs phyir// dam pa'i bla ma rtag tu bsten// ma mo lam rgyud lung las/ thams cad ma mo spyi dang bye brag tu bstan pa'i le'u ste bcu bzhi pa'o//// rgya gar gyi mkhas grub gu h+ya gsang ba dang 'brog mis bsgyur ba'o//// rdzogs so//

CLOSE WINDOW