CLOSE WINDOW

Gpb027.014
བོད་ཡིག

// rgya gar skad du/ tan+t+ra rA dza badzra mA le nA ma/ bod skad du/ rgyud kyi rgyal po rdo rje phreng ba zhes bya ba/ dpal 'jigs byed kyi tshogs la phyag 'tshal lo// 'di skad bdag gis thos pa'i dus gcig na/bcom ldan 'das badzra kI la chen po des/ sku dang gsung thugs mi bzad pa drag po rdo rje snying po/ de bzhin gshegs pa thams cad kyi bdag por gyur pa/ kun gyi gtso bor gyur pa/ gtum po mi bzad pa/rgod cing gshe la drag po 'jigs su rung ba de/ b+ha ga'i klong na rtag tu bzhugs so// de nas de dag la khyad par du 'phags pa'i 'khor rnams 'di lta ste/ longs spyod rdzogs pa'i sku dngos su ston pa/bung+d+ha he ru ka dang/ badzra he ka dang/ rat+na he ru ka dang/ pad+ma ka dang/ karma he ka la sogs pa dang/ khro mo'i tshogs dang/ gzhan yang ye shes las su gyur pa'i ma mo ko'u ri ma brgyad dang/seng gdong ma brgyad dang/ lcags kyu la sogs pa bzhi dang/ gsang ba'i yum bzhi la sogs te/ khro mo chen mo gzhan yang chos mang du 'dus so 'god do// 'khod par gyur to// de rnams kyang zhal gsum phyag drug pa/ so so'i kha dog dang cha byad du ldan pa/'bar ba'i gar gyi chas rnams dang ldan pa ste/ 'og min gyi gnas gzhi dang me tog gis brgyan pa/ ye shes lnga las rang bzhin gyis 'od 'byung ba ste/ kha dog rin po che sna tshogs nas/dpag tu med pa dbyibs dang kha dog tu ldan pa/ gru bzhi dang sgo bzhi dang gru chad bzhis brgyan pa/ dur khrod kyi rta babs dang/ them skas dang ldan pa/ mchog chen brgyad kyi ka bas rnam par spras pas/sna tshogs kyi gzugs su gyur pa/ khro mo la sogs pa'i byang chub kyi sems la gyur pa'i rgyan gyis bklubs nas/ nyid las mi gzhan pa'i 'khor rnams/ gong du gsungs pa dang mtshungs pa 'di lta ste/ a la la/ha ha ha/ he he he/ de bzhin gshegs pa bung+d+ha he ru ka dang/ de bzhin gshegs pa badzra he ru ka dang/ de bzhin gshegs pa rat+na he ru ka dang/ de bzhin gshegs pa pad+ma he ru ka dang/ de bzhin gshegs pa karma he ru ka dang/de rnams kyi yum rnams dang/ gnas dang yul la sogs pa'i ma mo rnams dang/ sgo ma'i tshogs dang/ gsang ba'i yum bzhi dang/ gzhan yang dpal gzugs kyi lha mo dang/ sgra'i lha mo dang/dri'i lha mo dang/ ro'i lha mo dang/ reg gi lha mo dang/ chos kyi lha mo la sogs pa'i tshogs rnams dang thabs cig tu bzhugs so// de nas bcom ldan 'das badzra kI la ya chen po des/ longs spyod rdzogs pa'i sku'i cha 'dzin par gnas nas/stong gsum gyi stong chen po'i 'jig rten gyi khams thams cad/ rang gi 'od kyis snang bar byas nas/ khro gnyer gyi zhal 'dzum pa mdzad nas/ gdug pa can zil gyis gnon pa'i ting nge 'dzin la snyoms par zhugs nas mnal lo// kye kye khyod ni khams gsum thams cad sgrol ba'i thugs rje can// sgrol ba'i stobs kyi byams pas kun la sbyor// gnyis med gnas su stobs pas dga' ba kun gyi mchog/chos nyid dbyings su skyol bas btang snyoms chen po pa// zhes gsol pas dpal kI la ya chen po de zhal gsum phyag drug pa/ zhabs bzhi pa sku la dur khrod kyi chas kyis brgyan pa/ gsung drag po'i sngags tshig hU~M hU~M phaTaphaT ha la b+h+yo ru lu'i sgra sgrogs pa/ thugs dug lnga la sogs pa gdug pa'i tshogs 'od zer du ma du mas spang rtsi mes bsreg pa bzhin du bsregs pa de dus gsum gyi bde bar gshegs pa thams cad kyis mthong/kun gyis gzigs shing mthong bar gyur to// de la de bzhin gshegs pa bud+d+ha he ru ka la sogs pa'i khro bo thams cad dang/ khro mo'i tshogs thams cad dang/ 'khor gyi lha mo du mas phyag btsal nas/mchod pa'i tshogs mang pos mchod de/ gsang ba phyi'i mchod pa dang/ gsang ba nang gi mchod pa dang/ gsang ba gsang ba'i mchod pas mchod nas/ phyag 'tshal nas 'di skad ces gsol to// de bzhin gshegs pa kun gyi gnas// de bzhin gshegs pa gsang ba'i mchog/ de bzhin gshegs pa mdzod kyi bdag/ chos rnams kun gyi snying po 'di/ dpa' bo khyod kyis bshad du gsol/ de skad ces gsol pas/ dpa' bo nyid kyis gsol ba btab par mkhyen nas/ rdo rje lta bu'i ting nge 'dzin la snyoms par zhugs so// zhugs ma thag tu chos nyid kyi sgra 'di skad ces phyung ngo/ A+o~M ma hA shu n+ya tA dz+nyA na badzra sa b+hA wa At+ma kou0f85haM/chos su snang ba'i dngos po kun// ngo bo nyid kyis stong pa la// gzung dang 'dzin pa rnam spangs te// rang bzhin gyis ni stong pa yin// des 'khor rnams kyang zil gyis mnan to// rgyud kyi rgyal po rdo rje phreng ba las/gleng gzhi'i le'u ste dang po'o//// de nas bcom ldan 'das badzra kI la yas/ da ltar gyi bstan pa 'di la rU tra la sogs pa'i gdug pa can dang/ nyi zla la sogs pa'i ma rungs pas/rnal 'byor pa la 'tshe ba dang/ srog 'phrogs pa gzigs nas/ nyid kyi thugs kyi dpal be'u nas hU~M bcu mngon par phyung nas/ gdug pa'i tshogs kyi rgyal po rnams gdan du bya ba'i phyir na/sa blangs btsal sa sbyang dang/ maN+Dal rtsigs dang bri ba lnga// de yi sngon du rgyal chen bzhi// tho bzhi brtsigs la gtor ma sbyin// de nas dam sri gnan pa dang// sgo byang la sogs bya ba ni// phyi yi mtshams su bshad pa'o// de nas gsang ba nang gi mtshams// thun mong dang ni khyad par ro// nyi zla'i spyan dang dbang chen dang// ma mo'i mtshams dang khro bo ni// kun gyi rjes 'jug ting 'dzin las// de nas gsang ba'i bdag po ni// chen po nyid kyis 'di skad zhus// kye kye dpa' bo gdug pa sgrol ba'i mchog/ nyid kyi thugs rje dpal be'u nas// 'khor lo sa bon A+o~M las skyes/ A+o~M tsakra phaT/ smig rgyu bzhin du 'khor ba las// gdug pa'i tshogs rnams gshegs pa yis// rdul phran bzhin du brlag par bya'o// ma las nyi ma'i dkyil 'khor ni// gcig las mgal me'i tshul du ni// me stag bzhin du 'phros pa las// nyi ma'i maN+Dal bcu phyung ste// hU~M bcu'i tshogs ni rab 'phros te// khro bo bcu yi rgyu mchog ste// hU~M hU~M hU~M hU~M hU~M/ hU~M hU~M hU~M hU~M hU~M/ A+o~M sum+b+ha ni sum+b+ha hU~M/ gr-ih+na gr-ih+na hU~M/ gr-ih+Na pa ya gr-ih+Na pa ya hU~M/ A na ya ho/ b+ha ga wAn/ bid+ya rA dza hU~M phaT/nyi zla la sogs phyogs skyong bcu// bkug nas khro bo'i gdan du bting/ khro bo sngags ni rab brjod pas/ khro bo bcu ni bskyed pa ste// phyag tu bdud rtsi 'khyil pa yis// phyag cha phur pa bcu bskur bas// phyogs skyong byi bcings bsnol ba la// thal phyung phur pa btab nas ni// bgegs kyi rgyal po brlag par 'gyur// bgegs rnams dpag tshad ji snyed par// rnam par tshig nas 'bros par 'gyur// de nas me dpung rgyal po yis// 'jig rten khams ni rab bkang bas// rnam par brgyal nas 'bros par 'gyur// de ni bka' yi 'khor lo bshad// dkyil 'khor bris nas phyag rgya dgod// phyogs skyong yang ni bkugs nas su// phur pa bcu la sngags bzlas te// bkug pa'i steng du 'debs byed pa// las ni 'di skad bcol bar bya'o// hU~M steng phyogs bya ba'i ya gi na// nyi zla bya ba'i mi bgrung pas// dkyil 'khor la ni ngo gnag zer// sgrub pa po la bar chod zer// de yi 'dul skal chen po ni// khro bo chen po hU~M ka ra// zhal gsum phyag drug zhabs bzhir bgrad// mche btsigs rngams pa'i cha lugs kyis// 'khor ba ril mid mdzad pa'o// nyi zla pho ni sgrol bar bgyi// nyi zla mo ni gdan la spyod// lha srin rnams ni gdan du bsgral// bsgral nas blud bu rgyal mtshan byas// de ltar rnam par rgyal ba la// sogs pa'i khro bo rnams la ni// gong gi las rnams bsgo bar bya'o// de ltar byas nas btab gyur na// phyogs bzhi mtshams brgyad steng 'og bcur// bgegs kyi rgyal po mnan gyur na// gnod byed gzhan lta smos ci dgos// zhes gsungs so// rgyud kyi rgyal po rdo rje phreng ba las/ bstan pa la gnod pa'i bdud btul ba'i le'u ste gnyis pa'o//// de nas bcom ldan 'das badzra kI la ya chen pos/ rnam par rtog pa med pa dpa' bar 'gro ba'i ting nge 'dzin la snyoms par zhugs pas/lha srin sde brgyad bred sngangs nas/ rnal 'byor pa la rnam par 'tshe ba dang/ srog dang mdangs 'phrog pa rnams phyis mi phyed par khas blangs so// gsang ba'i bdag pos zhus pa/ dpal badzra kI la ya chen pos bka' bstsol dang zhes zhus pas/ gsang ba'i bdag po khyod legs so/ khas len mi shes sam/ gsang ba'i bdag po khas len pa ni 'di rnams so// lha dang/ klu dang/ lha ma yin dang/ nam mkha' lding dang/ mi 'am ci dang/ lto 'phye chen po dang/ gnod sbyin dang/ yi dwags dang dri za dang/ sha za dang 'byung po dang/ skem 'byed dang/brjed byed dang/ smyo byed dang/ mkha' 'gro ma la sogs pa rnams kyis khas blangs so// rgyu 'bras ma rtogs pas de ltar snang ngo// rgyud kyi rgyal po rdo rje phreng ba las/ dam la gnas pa'i le'u ste gsum pa'o//// de nas bcom ldan 'das kI la ya chen pos/don dam pa'i ting nge 'dzin la snyoms par zhugs nas/ khro mo chen po'i ting nge 'dzin du mdzad nas/ gnas drug nas 'od zer bye ba drug cu bkye'o// de bkye bas 'od zer rigs lnga'i tshogs la phog rigs lnga'i yang gnas drug tu 'phros pas gnas gang nas/de'i 'od zer yang gci?g nas gcig la 'dus pas/ yi ge'i tshogs dpag tu med par gyur to// gyur ma thag tu yi ge 'dus pas 'od zer yang 'dus nas/yi ge hUM gcig tu 'dus so// de nas yang rigs lnga'i tshogs las 'od zer yang nas yang du 'phros 'dus pas sgra phrin las rnam bzhi'i sngags/ A+o~M badzra kI li kI la ya sarba big+h+nAn baM hU~M hU~M phaT/ces brjod pas sgra 'dus so// 'dus nas 'dus ma thag tu dpal rdo rje gzhon nu zhal gsum phyag drug zhabs bzhi/ dur khrod kyi chas brgyad kyis brgyan pa/ khro bo thams cad 'dus pa bas kyang gzi mdangs che ba ni phyag rgya gsum 'dus pa ste/khro bo dngos po yang dag pa'i khro bo'o// shin tu brjid pa'o// gsang ba'i yang gsang ba'i khro bo chen po ste/ dus gsum gyi bde bar gshegs pa thams cad kyi gsung gi snying po yang yin no// thugs kyi snying po yang yin no// sku'i snying po yang yin no// yon tan gyi snying po yang yin no// phrin las kyi snying po yang yin no// de'i phyir rgyud 'dir gsungs pa/'brel ba'i phyir na gsungs pa ste// sku gsung thugs dang yon tan las// chos kyi sku dang gzugs kyi sku// rgyu dang thabs dang 'bras bu la// 'brel ba'i phyir na rgyud ces bya// rgyud ces grags pa 'brel pa ste// gcig la gcig 'brel rgyud kyi don// rab 'brel de ni rnam gsum ste// des na rgyud du grags pa'o// rgyud kyi rgyal po rdo rje phreng ba las/ dom dam pa'i ngang las rgyud du grags pa/ dpal rdo rje gzhon nu rigs lnga'i tshogs su dus gsum gyi bde bar gshegs pa las phyag rgya'i gzugs su bstan pa'i le'u ste bzhi pa'o//// de nas yang gsang ba'i bdag pos/ badzra ka'i la ya chen po la 'di skad ces gsol to// kye dpa' bo chen po hU~M kA ra la sogs pa'i khro bo chen po 'di rnams ji ltar 'byung ba lags/ sus bskyed pa lags/ su zhig 'dul ba lags/ gang las grub pa lags/ ye shes gang gi ngo bo lags/rnam par dag pa gang lags/ nyon mongs pa gang sbyong ba lags/ rdo rje phreng ba zhes bya ba ji lta bu lags/ gang las rnam par dag pa lags/ de skad zhus pa dang/ badzra kI la yas 'di skad ces bka' stsal to// legs so legs so gsang ba'i bdag/ ma 'ongs don du zhus pa legs so// nga yis bshad kyi khyod kyis nyon/ khro bo chen po 'di rnams kyang// skye ba rnam bzhi las byung ba'o// 'di rnams rdo rje gsang bas bskyed pa'o// 'di rnams bgegs kyi rgyal po rnams 'dul ba'i don du 'tshal lo// 'di rnams ni ma 'ongs pa'i don du 'tshal lo// rnam par shes pa'i tshogs brgyad las grub pa'o// rnam par rgyal ba ni me long lta bu'i ye shes kyi 'bras bu'o// gshin rje gshed ni mnyam pa nyid kyi ye shes kyi 'bras bu'o// ha ya grI wa ni so sor rtog pa'i ye shes kyi 'bras bu'o// bdud rtsi 'khyil ba ni bya ba nan tan gyi ye shes kyi 'bras bu'o// hU~M kA ra ni chos kyi dbyings kyi ye shes kyi 'bras bu'o// gzhan dag ni gzung ba'i cha las grub pa'o// 'di rnams ni zhe sdang la sogs pa rnam par dag pa'o// 'di rnams ni zhe sdang la sogs pa'i gnyen po'o// sku gsum gyi mtshan nyid yin pas phreng ba'o// 'dus byas las rnam par dag pa'o// zhes gsungs nas/ khro mchog 'bar ba'i ting nge 'dzin la snyoms par zhugs so// zhugs ma thag tu mnyam pa chen po'i skur bzhengs te/gsang ba'i bdag pos zhus pa/ bcom ldan chen po nyag re gcig khyod nyid ye shes gang las grub// dpa' bo chen pos bka' stsol dang// ya mtshan chen po'i chos nyid shod// ces gsol to// bcom ldan 'das kyis bka' stsal pa// bdag gi mtshan nyid rtogs dka' ba/ khyod kyi zhus pa ya mtshan che// rang byung chen po'i ye shes las// dpa' bo nga ni grub pa'o// rgyud kyi rgyal po rdo rje phreng ba las/khro bo rnam par rgyal ba gleng gzhi'i ste le'u lnga pa'o//// de nas yang bcom ldan 'das gsang ba'i bdag pos/ khro bcu'i dngos po zhus pa/ khro rgyal 'jigs byed kI la ya/ khams gsum sgrol mdzad dpal gyi thugs ka nas/khro bo sprul pa mang po dbyung du gsol/ zhes zhus so// de mkhyen nas kI la ya chen pos/ 'dod chags chen po'i ting nge 'dzin la snyoms par zhugs nas/ zhugs ma thag tu/sgyu ma chen mo 'khor lo rgyas 'debs ma dang gnyis su med par 'khril lo// de nas yab yum chags pa yang dag pa'i bde ba chen pos bskul nas gnyis su med par gyur te/ 'khor lo'i dzaHhU~M baM hoHyab yum bde bar gyur to// de yang bde ba chen po'i 'khor lo la sogs pa bzhu nas/ rdo rje'i bu ga la gnas pa de/ yum gyi mkha' la phab nas/ byang chub kyi sems 'od zer dkar dmar gyi rnam pa mang du bde ba chen po'i gnas su mang du 'phros pas/de las yi ge'i tshogs du ma du mas gnas de dag gang bar byas so// gang ma thag tu zhus nas/ yab kyi gsang bar 'dus so// yum gyi mkha' la dkar dmar 'dril lo// de la yum gyis hU~M hU~M zhes pa bcu phyung ngo// de nas dngos po rdo rje gzhon nu ste/ kI la ya chen pos 'di skad ces brjod do// A+oM badzra kro d+ha hU~M kA ra hU~M/ gardza gardza hU~M phaT/ A+o~M badzra kro d+ha bi dza ya hUM/ ha na ha na hU~M phaT/A+o~M badzra kro d+ha ya mAn+ta ka hU~M/ pa tsa pa tsa hU~M phaT/ A+oM badzra kro d+ha ha ya grI wa hU~M/ hu lu hu lu hU~M phaT/ A+oM badzra kro d+ha a mr-i ta kuN+Da li hU~M/ tsin+d+ha tsin+d+ha hU~M phaT/ A+o~M badzra kro d+ha nI la daN+Da hU~M/ da ha da ha hU~M phaT/ A+o~M badzra kro d+ha Ar+ya a tsa la hU~M/b+han+d+ha b+han+d+ha hU~M phaT/ o~M badzra kro d+ha a pa ra dzi ta hU~M/ tiSh+Tha tiSh+Tha hU~M phaT/ A+oM badzra kro d+ha trai lo kya bi dza ya hU~M/ b+hin+d+ha b+hin+d+ha hU~M phaT/ A+o~M badzra kro d+ha ma hA ba la hU~M/ s+pho Ta s+pho Ta hU~M phaT/ de nas dur khrod kyi rgyal po'i chas kyis rnam par brgyan pa'o// de nas gsang ba'i bdag pos/ a ho su kha bcom ldan 'das// dngos grub thams cad khyod la 'dud/ khro bcu'i mtshan nyid khyod kyi bshad du gsol// legs so khro rgyal gsang ba'i bdag/legs so khro rgyal kun gyi gtso// legs so chos rnams kun gyi rgyu// legs so gdug pa 'dul ba'i bdud// ces gsungs nas// dgongs pa chos kyi skur gyur te/ rgyud kyi rgyal po rdo rje phreng ba las/snying po sngags kyi le'u ste drug pa'o//// de nas rdo rje phreng ba'i rgyud las/ khro bo rnams kyi rnam par dag pa'i mtshan nyid gsang ba'i bdag pos zhus pa de bshad do// kI la yas bka' stsal pa/gti mug rnam par dag pa yi// hU~M kA ra yi mdog dang rgya// g.yas pa ser zhing g.yon pa dmar// rtsa ba'i zhal ni dkar po'o// dang po me dpung rig ma 'khyud// 'khor lo ral gri g.yas pa ste// rin chen pad+ma g.yon na'o// stobs po che yi mtshan nyid kyang// g.yas dkar g.yon dmar rtsa zhal gnag/ dang po me dpung rig ma 'khyud// g.yas pa tri shUl ral gri 'dzin// g.yon pa rin chen pad+ma'o// rnam par rgyal ba dkar ba ste// g.yas pa gnag cing g.yon pa dmar// dang po me dpung rig ma 'khyud// g.yas pa dbyug to ral gri la// rin chen pad+ma g.yon pa ste// zhe sdang rnam par dag pa'o// shar gyi rtsibs su gzhag par bya// nga rgyal rnam par dag pa ni// lho phyogs gshin rje mthar byed ni// dang po me dpung rig ma 'khyud// g.yas pa gnag cing g.yon pa dmar// rtsa ba'i zhal ni ser ba ste// g.yas pa tho ba ral gri la// g.yon pa rin chen pad+ma'o// 'dod chags rnam par dag pa ni// nub phyogs rta mgrin rgyal po ni// g.yas pa dkar la g.yon pa sngo// rtsa ba'i zhal ni dmar ba ste// dang po me dpung rig ma 'khyud// pad+ma dang ni ral gri g.yas// 'khor lo rin chen g.yon pa na'o// phrag dog rnam par dag pa ni// bdud rtsi 'khyil ba zhal dbus ljang// g.yas dang g.yon ni dkar dang dmar// dang po me dpung rig ma 'khyud// g.yas pa rgya gram ral gri 'dzin// g.yon pa pad+ma rin chen te// byang phyogs gdan la brkyang bskum bzhugs// zhe sdang cha 'dzin dag byed pa// me yi phyogs su dbyug sngon can// g.yas dang g.yon ni dkar dang dmar// dang po me dpung rig ma 'khyud// sku zhal dbus ni ser la dmar// g.yas na dbyug pa ral gri ste// g.yon na rin chen pad+ma'o// nga rgyal cha 'dzin mi g.yo mgon// bden bral phyogs na yang dag gnas// g.yas dkar g.yon dmar ser ba'i zhal// dang po me dpung rig ma 'khyud// 'khor lo ral gri g.yas na'o// rin chen pad+ma g.yon na'o// 'dod chags cha 'dzin gzhan mi thub// g.yas pa dkar la g.yon pa dmar// skra dang dbu ni dmar ljang la// dang po me dpung rig ma 'khyud// rdo rje ral gri g.yas na'o// rin chen pad+ma g.yon na'o// rlung lha'i mtshams su yang dag gnas// phrag dog cha ni dag byed pa// dbang po'i grwar ni gzhag bya ste/ khams gsum rnam rgyal zhal gsum pa// zhal g.yas dkar la g.yon pa dmar// sku dang dbu ni ljang skya la// dang po me dpung rig ma 'khyud// lcags kyu ral gri rin chen pad// g.yas dang g.yon gyi phyag tu bsnams// gti mug cha ni dag byed pa/ khro bo chen po stobs chen yang// yang dag nyid du 'og tu gsungs// thams cad rdo rje'i go cha ste/ khro mo rnams kyi rigs dang mdog/so so'i kha dog ji bzhin no// rang re'i lag cha lag na bsnams// zhes gsungs nas/ de nyid du mi snang bar gyur to// rgyud kyi rgyal po rdo rje phreng ba las/ khro bo rnams kyi zhal dang phyag la sogs pa rnam par dag pa'i le'u ste bdun pa'o//// de nas bcom ldan 'das badzra kI la ya chen po de/ cho 'phrul snang ba zhes bya ba'i ting nge 'dzin la snyoms par zhugs nas/ de rnams kyi sprul pa sbyor ba mo bdag po rnams dga' bar byed pa/de bzhin gshegs pa'i btsun mo dam pa dpal rdo rje sgra 'byin ma dang/ rdo rje snyems ma dang/ rdo rje dur khrod bdag mo dang/ rdo rje gtum mo dang/ rdo rje bskul byed ma dang/ rdo rje sder mo dang/ rdo rje gtun khung ma dang/ rdo rje mda' snyems pa dang/ rdo rje gsod ma dang/ rdo rje bskyod ma dang/ gnyis su med par bzhugs pa de rnams kyi sprul pa yang/ byang chub kyi sems dkar dmar las grub pa'i phra men ma ste/phag gi mgo can dang/ stag gi mgo can dang/ sha ba'i mgo can dang/ byi la'i mgo can dang/ seng ge'i mgo can dang/ g.yag gi mgo can dang/ gzig gi mgo can dang// spyang ki'i mgo can dang/dred kyi mgo can dang/ dom gyi mgo can dang/ smig bu'i mgo can dang/ bya rgod kyi mgo can dang/ 'ug pa'i mgo can dang/ pu shud kyi mgo can dang/ pha wang mgo can dang/ bya rog gi mgo can dang/khwa ta'i mgo can dang/ khra'i mgo can dang/ sre mo'i mgo can dang/ byi la'i mgo can la sogs pa rnams dang/ yang sprul dang/ sum sprul la sogs pa cho 'phrul 'bar ba'i tshogs kyis dpal rdo rje gzhon nu de la bskor bas dkyil 'khor gyi bdag por bzhugs so// de nas gsang ba'i bdag pos bcom ldan 'das la cho 'phrul 'byung ba 'di ji ltar lags/ zhes gsol pa dang/ kI la yas bka' stsal pa/legs so gsang ba'i bdag po khyod// gang gi don du khyed kyis zhus/ zhes bka' stsal to// gsang ba'i bdag pos gsol pa/ gdug rtsub rnams la phan don du/ khyod kyis bka' stsol bdag gis nyan/ zhes pas kI la chen pos zhe sdang gi 'dzum gyis thams cad du bltas pas/ kI la ya'i ag tshom la sogs pa ba spu'i bu ga thams cad nas/ rdo rje phur bu'i sprul pa dpag tu med pa 'phros pas/ stong gsum gyi stong chen po'i 'jig rten gyi khams thams cad 'gul/g.yos/ ldeg 'phar/ chem chem/ 'ur 'ur/ thug thug gi sgra chen pos bdud rU tra la sogs pa thams cad dus gcig tu brgyal nas/ gan bub tu 'gyel nas khrag tu skyugs so// de nas de dag mi nus bzhin du langs nas/ gcig gis gcig la dris pas/ sus kyang ma shes so// der de dag thams cad the tshom gyi drA bar tshud nas/ 'di su'i mthu yin/ su'i byin gyis brlabs pa yin/sus btang ba yin/ 'di 'u cag gis su la 'dri/ 'di y-is 'u cag la gnod pa chen po byed pa min nam/ zhes gcig gis gcig la dris pas/ de rnams la 'phags pa spyan ras gzigs dbang phyug gis dpal phyag na rdo rje'i skur sprul nas/phyag g.yas pa gser gyi rdo rje rtse dgu pa bsnams te/ 'di ni nga'i mthu'o// 'di ni nga'i byin gyis brlabs so// 'di ni ngas btang ba yin no// 'di ni khyed kyi bdud yin pas/ khyod kyang bstan pa la gnod pa ma byed cig/ ces bsgo bas/ srin po de rnams kyis bsnyad nas/ gal te khyod pas lhag gzhan pa su yod dris pas/ gsang ba'i bdag pos bka' stsal pa/nga bas kyang lhag pa dus gsum gyi sangs rgyas thams cad 'dus pa'i sras mchog tu gyur pa dpal rdo rje gzhon nu bya ba ni/ chos [[]ches []]nga bas kyang lhag pa yin no// zhes pas/ de rnams kyis sm ras pa/kye ma ma mthong 'jigs pa'i rje btsan khyod/ khyod pas lhag pa yod na ni// bdag cag rnams ni brgyal nas 'chi// zhes smras pas/ ba spu langs nas gan bub tu song ngo// de nas rdo rje gzhon nus phrin las rnam gzhi'i sngags brjod pas/gcig dang gnyis ma yin pa stong gsum gyi stong chen po 'jig rten gyi khams nga ci bas kyang 'gul zhing g.yo ba'i spu'i bu ga nas/ bye ba dung phyur tsam gyi khro bo'i sprul pa yang sprul byung ngo/de rnams kyis 'jig rten gyi khams thams cad shig shig/ nur nur por brlags pas/ bstan pa la gnod pa'i dgra dang bgegs thams cad brlags par byas so// de nas de rnams kyi lus ni gdan du byas/chung ma ni slas dang byi mo dang bran mor byin pa ni/ 'khor dbang phyug ma la sogs pa'o// rdo rje gsang ba'i bka' las ni// sus kyang 'da' bar mi nus so// rgyud kyi rgyal po rdo rje phreng ba las/ sprul pas dregs pa can btul ba'i le'u ste brgyad pa'o//// de nas de bzhin gshegs pa shin tu gsang ba'i ting nge 'dzin la snyoms par zhugs nas/ shin tu gsang ba'i yang gsang ba bskyed pa'i rdzogs pa 'di lta bu gsungs so// gsang ba khams kyi gnas dag tu// sangs rgyas rnams kyi dkyil 'khor te// bskyed pa'i rim pa rdzogs pa dang// bdag gi de nyid kho na'o// byin gyis brlab par bya ba ni// dang por bde chen 'khor lo ni// rang bzhin dkyil 'khor kho na'o// mgrin pa longs spyod 'khor lo ni// phyogs bcu khro bo'i dkyil 'khor ro// snying ga chos kyi 'khor lo ni// bdag nyid rtsa ba'i dkyil 'khor ro// lte ba sprul pa'i 'khor lo ni// phur pa sras rdzas yang kyi dkyil 'khor ro// de nas 'khor lo gsum pa ni// me yi 'khor lo bstan pa yin// 'brub khung las kyi dkyil 'khor ro// de nas 'khor lo drug po ni// gnan pa 'khor lo'i dkyil 'khor ro// de nas 'debs pa'i 'khor lo ni// rtse mo'i b+ha ga nyid du bshad// de la sngags pas bsgrub par bya'o// thabs dang shes rab ldan pas ni// gyen du 'gro dang thur du 'gro// lnga pa gnyis ni bcu ru gyur// srog ni rtsol ba las byung ba'i// rim pa rlung gi de nyid yin// A li kA li la sogs pa// sngags kyi kho na nyid do zhes// de la bdag gi de kho na nyid// nam mkha'i khams kyi dbus dag tu// sangs rgyas gzhal yas rdzogs rjes la// dkyil 'khor shes rab bsgom par bya// de yi dbus su sangs rgyas rnams// man ngag ji bzhin rdzogs pa la// phyag rgya bzhi yi rgyas btab pas// smug po bur 'dra ye shes sems// rang gi gtso ba'i rtags kyis brgyan// shes rab thabs kyi bre brag las// yan lag bzhi ni rab tu 'brel// dkyil 'khor bzhi ni bskyed byas la/ dkyil 'khor bzhi ni ldan pa la/bdag gi de nyid rim gyi rlung// rlung gi de nyid yang dag 'jug/ dang por bdag nyid byin brlabs pas// dkyil 'khor kun dang ldan pa yin// thabs kyi khyad par las byung ba'i// 'khor lo rnams ni rab tu dmigs// chos dang longs spyod sprul pa dang// bde ba chen po'i 'khor lo che// pad+ma'i 'dab ma las byung ba'i// sa bon yi ge rnams kyis brgyan// bde ba chen po'i 'khor lo ni// mtshan ni sum bcu rtsa gnyis yin// mgrin pa pad+ma bcu drug ni// 'phags pa'i lam dang yan lag go/ snying ga'i pad+ma 'dab brgyad ni// bden pa bzhi yi mtshan nyid yin// lte ba'i pad+ma drug cu bzhi// gzugs kyi sku la mtshan bzang po// 'khor lo'i rnam pa kun la ni// dbyangs kyi yi ges gang bar byas// lte ba la ni yi ge haM// de nyid 'gog pa mya ngan 'das// dang po bde ba chen po'i sku// de ltar thob byed 'jug pa la// bum pa'i dbang ni dang po ste// lam gyi 'bras bu'i tshul 'chang ba'i// rigs bzhi'i sa bon phyogs dag tu// ngag gi lam gyi lte bar hri// de nyid las su gsungs pa'i dbang// longs spyod rdzogs pas longs spyod sku// des ni rgyud sde mtha' dag gi/ 'gog pa sel ba'i dbang yin no// gnyis pa gsang ba'i dbang yin te// bden pa bzhi yi rang bzhin can// thugs kyi ye shes rtse gcig pas// lte ba'i steng du yi ge hU~M// thabs dang shes rab mtha' dag sdud// de nyid rnam pa kun 'byung ba// chos kyi sku yi bdag nyid las// gsum pa shes rab ye shes dbang// thun mong mtshan dang ldan pa yis// rnam pa gnyis su gyur pas na// phyogs mtshams dag ni rigs rnams kyis// sa bon nyid kyis mtshan pa la// lte bar A+o~M yig rnam par bsam// sdug bsngal bdag nyid ldan pas na// sprul pas don mdzad rnam par dag/ bzhi pa'i don nyid yin pa'i dbang// dang po mdo rgyud nyan pa'i dbang// bum pa'i dbang du yang dag gsungs// gnyis pa dam rdzas brten pa'i dbang// gsang ba'i dbang du yang dag gsungs// gsum pa nyams su myong ba'i dbang// shes rab ye shes dbang du gsungs// bzhi pa de rnams smin pa'i dbang// bden pa bzhi yi bye brag gis// chos dang ye shes rnams ldan pa'o// de ltar rdzogs pa'i byin rlabs kyis// yan lag bzhi yi rang bzhin dang// snying po phyag rgya sngags rigs dang// cho 'phrul bzhi rnams ldan pas na// dgos don 'brel par rab grub pa'o// rim pa gnyis dang rab ldan zhing// brjod bya thams cad 'dus pa yin// lus kyi rtsa ni ji snyed pa// sum brgya drug cur ldan pa la// bdag po bcu drug bstan pa yin// de nyid gsum gyi bdag po lha// thabs dang shes rab bde chen rtsa// de ni rnam pa gsum du 'du// bdud rtsi lnga yi dwangs ma bas// bdud rtsi lnga ni 'byung bar byed// de nyid bdud rtsi lngar 'gyur ro// 'byung ba lnga yi rang bzhin dang/ kha dog lnga yi rang bzhin gyis// gyen dang thur du rgyu ba'i rlung// srog dang rtsol ba zhes bshad de// rnam pa bcu pa gnyis su 'gyur// de yi 'byung ba'i rim pa yin// gsang ba'i gnas ni thams cad du// sngags kyi de nyid yang dag 'jug/ zung 'jug ting 'dzin la gnas pas// sems la dmigs pa thob byed de// gang du bslab par mi bya'o// sngags kyi de nyid gang yin pa// rnal 'byor rnams kyis shes par gyis// gang las sangs rgyas gnas gyur pa// de nyid gsang ba dam pa ste// de bzhin gshegs pa'i spyod pa yin// blun po rnams kyis mi mthong ste// rnal 'byor rnams kyis de shes nas// yang dag don la zhugs pa yin// stong nyid ngo bor yi gnas na// tshad med bzhi yang zil gyis mnon// 'dod chags chen po'i tshul gyis ni// ye shes chen po thob par byed// phyag rgya bzhi dang yan lag bzhi// de ltar chos kyi sku dang ni// thun mong mchog tu gsungs pa yin// de nyid sa bon bdag nyid pas// phra mo'i thig ler gnas par byed// 'di ni sangs rgyas thams cad kyi// byang chub chen po bla na med// sku gsung thugs su bdag sbyor bas// sngags la dmigs pa thob par 'gyur// sngags la dmigs pa'i bdag nyid kyis// stong nyid ye shes thob par byed// de bzhin gsang sngags sgom pa pos// bde chen 'khor lo rgyun bzhu nas// rim pa bzhin du babs gyur te// byang chub sems kyi rang bzhin dag/sbyor ba'i lhums su phaT kyis 'phang// pad+ma zla ba kha sbyor bas// tshangs pa'i bu ga kha sbub nas// 'od zer 'phro 'du'i sbyor ba yis// dbugs ni thig le nyid du bzhag/ yang na sngags la dmigs pa yis// byang chub sems kyi rang bzhin dag/ gsang ba'i gnas su zhu bar byed// 'od zer rnams kyis rang bzhin gyis// byang chub sems ni zhu mdzad de// mi rtog ye shes skye bar byed// lus dang ngag dang sems rnams ni// sngags la dmigs pa'i mtshan ma dag/ 'dar zhing sprug pa 'phar ba dang// bar snang dag la 'phyo bar byed// de nyid zhi bar gyur pa dang/ khams kyi zas dang rnam bral te// bying rgod dbugs ni rab zhi nas// dal bar rgyu ba 'byung gyur te// de nas drod tshad dang po ni// smig sgyu lta bu mthong ba dang// du ba lta bu mthong ba dang// srin bu lta bu'i mtshan ma dang// mar me lta bu'i mtshan ma dang// nam mkha' bzhin du dwangs pa ni// rtogs na chos sku bde ba che// ye shes sku mchog de nyid las// zla ba drug dang bcu gnyis dang// bco brgyad dag gis 'grub par 'gyur// gang tshe des kyang ma grub na// drag shul tshul gyis bsgrub par bya// zhes sgyu ma chen por bdag gis gsungs so// ji ltar blo ni dman gyur kyang// mi tshe 'di yis 'grub pa yin// gdon mi za bar the tshom med// ces smras pa'o// sgyu ma chen po'i thabs mchog ste// 'di ni rgyal ba thams cad kyi// skyed pa'i zhing du rnam par grags// dam pa gsang chen gyi rgyud chen po rdo rje phreng ba zhes bya ba las/ gsang ba'i man ngag mchog gi thabs chen po las man ngag gi le'u ste dgu pa'o//// de nas yang gsang ba'i bdag pos// bcom ldan 'das la a la la ho dpa' bo chen po khyod ni sangs rgyas kun gyi rje btsan no// sangs rgyas kun gyi gdung ngo// sangs rgyas kun gyi lam mo// sangs rgyas kun gyi bdag po'o// zhes gsol nas/ sangs rgyas bcom ldan 'das badzra kI la ya chen po khyod la/ bdag cag zhu bar 'tshal lo// yang dag par zhu bar 'tshal lo// rje btsan khyod kyis bka' stsol cig/bcom ldan 'das gzugs dang kha dogs gang lags/ dbyibs dang ring thung gang lags/ kun rdzob bya ba gang lags/ don dam bya ba ci lags/ chos nyid bya ba ci lags/ ye shes bya ba gang las grub pa lags/ 'dus byas kyi dngos po gang lags/ 'dus ma byas kyi dngos po gang lags/ rdo rje bya ba gang lags/ phur pa bya ba ci lags/ de rnams kyi dngos po ci lags/ bcom ldan 'das kyis bshad du gsol/bde bar gshegs pas bshad du gsol/ kI la ya yis bshad du gsol/ zhes zhus so// de nas bcom ldan 'das kyis thams cad kyi rang bzhin mnyam pa chos kyi sku'i ting nge 'dzin la snyoms par zhugs so// de nas bcom ldan 'das kyis bka' stsal pa/ legs so legs so gsang ba'i bdag/ chos can rnam pa kun kyang nga// gzugs dang kha dog rnam pa nga/ dbyibs dang ring thung rnam pa nga// kun rdzob tha snyad thams cad nga// rnam grangs don dam thams cad nga// spros med chos kyi sku yang nga// 'dus byas rnam dag ye shes nga// 'dus ma byas pa'i dngos po nga// mi shigs rdo rje chos nyid nga// kun 'debs pa yi phur pa nga// mdor na chos rnams thams cad nga// chos kyi sku las ma gtogs pa// sangs rgyas bya ba gud na med// mdor na gzugs sku rnam gnyis ni// 'gro ba 'dul ba'i dbang tsam mo// mtshan dang dpe byad 'dul ba'i chos// las dang dkyil 'khor spros pa yis// rmongs pa 'dul ba'i dbang du bstan// mdor na ma dag sems can la// sangs rgyas sa dang dmyal ba'i gnas// so sor bstan kyang mthong ba med// 'dod cing chags pa'i sems can ni// yang dag don gyi chos bsgrubs kyang// lha gnas gsum las yongs mi 'da'// chos rnams kun gyi rtsa ba ni// gzhi rtsa med pa'i sems nyid de// chos rnams kun gyi gzhi yin no// de rtogs rang byung ye shes ni// btsal mi dgos par rang la gnas// rtogs na mngon sangs rgyas pa yin// sangs rgyas gzhan la rag mi lus// ma rtogs pa yi sems can ni// dmus long nyi ma lta bu yin// sems can sangs rgyas rgyu yin te// bya btsal med na 'khor ba'i rgyu// dper na 'o ma mar yin te// lag gi rtsol bas ma bsgrubs na// mar gyi dngos po ga la yod// dper na 'bru mar thams cad kyang// dngos po'i las rnams ji bzhin par// mang po 'dus pas mar du 'gyur// de bzhin rnal 'byor thams cad kyang// skas kyi rim pa ji bzhin du// sa dang lam la mi gnas na// sangs rgyas bya ba thob mi 'gyur// de bas rnal 'byor thabs ldan gyis// bskal pa mang po du ma ru// skas kyi rim pa bzhin du bgrod// sngon tshe sangs rgyas thams cad kyang// lam dang sa la brten byas nas// byang chub myur du thob pa yin// mar me mdzad dang shAkya thub// ma 'ongs byams pa'ang de bzhin te// dper na dpa' bos 'da' 'phangs pa// sa la lhung ba'i gnas med ltar// bya btsal dag gis 'phangs gyur na// gcig nas gcig tu bgrod nas ni// rdo rje lta bu sa thob ste// smon lam stobs kyis 'byung bar 'gyur// de skad dpa' bos yang dag gsungs// de nas yang bcom ldan 'das la gsang ba'i bdag pos gsol pa/kye kye khro rgyal kI la ya// de ltar thams cad gcig gyur na// gzugs kyi kha dog sngi ltar lags// sgra yi rnam pa ji ltar lags// dri yi rnam pa ji ltar lags// ro yi rnam pa ji ltar lags// reg bya'i rnam pa sngi ltar lags/ chos kyi rnam pa ji ltar lags// zhes gsol pa dang/ kI la yas/ gsang ba'i bdag po nga la nyon cig/ chos kyi rnam pa thams cad nga// gzugs kyi rnam pa thams cad nga// sgra yi rnam pa thams cad nga// dri yi rnam pa thams cad nga// ro yi rnam pa thams cad nga// reg bya'i rnam pa thams cad nga// mdor na dngos po thams cad nga// yul gyi rnam pa thams cad nga// zhes gsungs so// rgyud kyi rgyal po rdo rje phreng ba las/ chos thams cad kun nas nyon mongs pa dang/ rnam par byang ba thams cad gcig gi ngo bor mya ngan las 'da' bar bstan pa'i le'u ste bcu pa'o//// de nas yang bcom ldan 'das kyis/ dpa' bo chen po'i rnal 'byor du byas nas/ brjid pa'i khro bo bcus 'khor ba thams cad ru bzlog pa dang/ srid pa thams cad bro zlog pa'i thabs/dgra bgegs rnam gnyis rdul du brlag pa 'di gsungs so// lcags kyi gze ma rkang brgyad kyis// de yi rnam shes dag par bya/ khams dang skye mched mya ngan 'das// 'khor ba dong sprug srid pa bre yang bzlog/rten gyi phur pa bcu gnyis la// dbang bskur byin brlab tshul bzhin bya// byug bdug brdeg pa yang ni bya// las kyi bya ba gzhung yang bsrang// khyad par man ngag 'di bstan bya// dpal gyi phur pa bdud 'dul dang// 'dus pa gnyis gsum yang kyi sras mchog dang/ khyad par khro bo bcu yis gdab// lha tshogs mang po'i ngo bo ru// sbams pa'i phur pa bzhi po ni// zur bzhir dpa' bo tshul du bzhag/ ma rig pa ni dpal gyis gdab// 'du byed la ni rnam rgyal lo// rnam par shes pa dbyug pas so// ming dang gzugs la gshin rjes gdab// skye mched la ni mi g.yo ba// reg pa la ni rta mgrin mchog/ tshor ba la ni gzhan mi thub// sred pa la ni bdud rtsi dpal/ len pa la ni khams gsum rgyal// srid pa la ni stobs po che// skye ba la ni phur pa mchog/ de ltar thebs par gyur na ni// skye ba la sogs 'khrul pa rnams// 'khor ba las ni mya ngan 'das// gsang ba'i bdag pos yang gsol pa// rje btsun chen po kI la ya// gdab pa'i gnas rnams gang la bgyi// kI la ya yis bshad du gsol// kI la ya yis bka' stsal pa// legs so gsang ba'i bdag po nyon// snying ga spyi bo lce dang dpung// dbang po drug la sogs pa la/ go rim bzhin du gdab par bya// dug dang ske tshe yungs kar dang// lcags phye zangs phye rdo phye dang// gu gul tshil chen rgya skyegs so// de nas sngags dang phyag rgya dang// don yod grub pa'i pho brang gis// gnon pa'i las rnams tshul bzhin bya/ A+o~M badzra yak+sha kro d+ha kha kha kha ha ha ha hU~M hU~M hU~M phaT phaT phaT/ de nas rdo rje be con gyi// sngags dang phyag rgya yang dag bya// A+o~M badzra kro d+ha ma hA ba la/ ha na ha na/ pa tsa pa tsa/ b+hin+d+ha b+hin+d+ha/ sa ma ya tsin lam b+ho da ra u tsuSh+ma kro d+ha hU~M phaT/ bsgo ba'i tshig gis bsgo bar bya/ A+o~M badzra su me ru hU~M hU~M sa ya ya s+t+waM/gser gyi ri rab chen po ni// gru bzhi lham pa'i steng nyid du// don yod grub pa 'khor bcas bsgom// de ltar las rnams zin gyur nas// rnal 'byor dbang phyug chen po yis// phur pa'i rtse mo yar bstan te// lan gsum mgo la bskor byas pas/ khams gsum thams cad hU~M gis bkang// sems can don byas 'phags pa mchod// rim gyis 'dus pas bdun tsho gsum// de yang gcig tu 'dus pa ni// man ngag dam pa yin pa'o// de nyid bsdu ba'i man ngag ni// sang ha ra Na hU~M/ bsdus nas nan tan bya ba ni// rnam gsum tshul du nan tan bya'o// de ni dbang bskur dam pa yin/ A+oM kA ya badzra swa b+hA wa At+ma kou0f85 haM/A+o~M wA ka badzra swa wa At+ma kou0f85haM/ A+oM tsit+ta badzra swa b+hA wa At+ma kou0f85haM/ de ltar nan tan byas gyur na// gso ba'i dam pa kho na'o// gsang ba'i bdag pos gsol pa// e ma ho dpal ch en kI la ya// bsgral ba'i sems can ji ltar gso// kI la ya yis bshad du gsol// kI la ya yis bka' stsal pa// nyon cig gsang bdag phyag rdo rje// nga yi yid las byung ba 'di// chos nyid kyi bden pa'o// gsang sngags kyi mthu'o// sangs rgyas kyis byin rlabs so// a b+hi tsa ra'i dus la bab pa'o// gnag pa de kho na la'o// kI la ya ni nyi shu gcig/ brjod pas de yi bag chags sbyangs// gsum gyi ngo bor snang bas na// tshon gyi gru gu bzhin du 'dus// gcig tu snang bas ye shes te// longs spyod rdzogs pa'i sku yang yin// so sor snang bas sprul pa'o// dmar po la sogs 'od zer rnams// thugs dang ye shes ngo bor 'dus// spyod pa kun gyi mchog kyang yin// lta ba kun gyi rgyan yang yin/ kha dog sku dang dpe byad dang// mtshan rnams kun gyi rgyu yang yin// rdo rje phra mo la sogs te// rdo rje sems dpa' ci 'dra bar// 'phro 'du las kyi sbyor ba las// he ru ka ni zhal gsum pa// tshon gang ba cig gsal ba las// yaM gyis btegs nas phaT kyis 'phangs// grub pa'i mtha' ni gcig pa'o// de skad dpa' bos yang dag gsungs// rgyud rdo rje phreng ba zhes bya ba// 'khor ba thams cad ru zlog pa'i phur pa// dgra bgegs thams cad thal bar rlogs pa'i thabs te/ 'khor ba sgo dgag pa'i le'u ste bcu gcig pa'o//// de nas yang bcom ldan 'das kyis/gzir ba'i snying po 'di gsungs so// A+o~M dz+wa la dz+wa la/ s+phu Ta s+phu Ta/ ni ra ni ra ni ni/ sarba na ga sa ra sa ra sa ra/ ni ra ni ra/ ni ni/ badzra tsit+ta N-i N-i N-i ra N-i N-iH de ni gzir ba'i sngags so// de nas yang bcom ldan 'das kyis/ de bzhin gshegs pa'i sku dang gsung thugs kyi snying po 'di gsungs so// A+o~M badzra kI la kI la ya/ dz+wa la dz+wa la/ pra dz+wa la pra dz+wa la/ s+phu Ta s+phu Ta/ sarba na pa pa na hU~M phaT/de bzhin gshegs pa thams cad kyi sku'i snying po'o// A+oM badzra kI li kI la ya bya g+h+ri pa la ya sarba duSh+tAn hr-i da shod+ha ya hUM/ de bzhin gshegs pa thams cad kyi gsung gi snying po 'di gsungs so// A+o~M badzra kI li kI la ya tsit+ta hU~M tsit+ta hU~M/ de bzhin gshegs pa thams cad kyi thugs kyi snying po'o// de nas yang phrin las kyi sngags sku dang gsung dang thugs la sogs pas gab pa'i thabs 'di gsungs so// A+o~M badzra kI li kI la ya sarba duSh+tan hU~M/ A+o~M badzra kI li kI la ya/ su ru su ru u tsuSh+ma kro d+ha hU~M/ A+o~M badzra kI la kI la ya/ bid bid hU~M/ A+o~M badzra kI li kI la ya/ ang+ku sha tsin+d+ha tsin+d+ha hU~M/ A+o~M badzra kI li kI la ya/ mA ra ya mA ra ya hU~M/A+o~M na maHsa man+ta bi sho ta bai ra bai ra hU~M hU~M/ zhes gsungs so// de nas yang phrin las gzir ba'i sngags 'di gsungs so// A+o~M badzra kI li kA la ya/ ta thA ya ta thA ya hU~M phaT/ grogs dang phrol cig pa'i sngags so// A+o~M badzra kI li kI la ya/ ha sa ya ra na/ ha ta na hU~M phaT/ A+o~M badzra kI li kI la ya/ shi g+h+raM na ya hU~M phaT/ A+o~M badzra kI li kI la ya/ dz+wa la pa dz+wa la pa ya hU~M hU~M phaT/ A+o~M badzra kI li kI la ya/ A we sha ya A we sha ya hU~M phaT/A+o~M badzra kI li kI la ya/ b+hin+d+ha ya b+hin+d+ha ya hU~M phaT/ zhes gsungs so/ de nas yang bcom ldan 'das la gsang ba'i bdag pos gsol pa/ kye ma rje btsun dpa' bo khyod// ma 'ongs pa yi sems can la// phan gdags don du khyod kyis gsungs// de yi don de ci ltar lags// gzugs can snying po ji ltar gnas// gzugs med snying po ji ltar gnas// legs so legs so gsang ba'i bdag/ rnal 'byor dam la gnas pa la// bar chod byed cing 'tshe ba rnams// bstan pa 'jig cing gnod byed pa// gzugs can dang ni gzugs med la// gdug pa'i snying po gang na gnas// nga yis bshad kyi khyod kyis nyon// zhes bka' stsal pa/ ma rungs sems can snying po ni// 'byung ba bzhi las bskyed pa yi// phung po'i dkyil na tsit+ta gnas// tsit+ta'i dkyil na 'od tshon gang// de yi dkyil na nyon mongs pa/ khrag gi sbal pa chags pa'i gzhi// byi'u len pa'i mgo tsam zhig/ de ni rtsa yi rgya mdud yin// de nang khrag gi dwangs ma ste// dwangs ma de la dbugs kyi rta// rta de la ni shes pa zhon// de tshe bkrag dang gzi mdangs dang// rtsi bcud thams cad rgya 'dra ba// nang na sbas nas 'dug pa ste// snying po gsum gyis gzir gnan bya// de ni gzugs can dgra la'o// gzugs med bgegs kyi gnas lugs ni// de ni gzugs can med phyir du// rtsa la brten pa ma yin no// de nas yang gsang ba'i bdag pos// bcom ldan 'das la/ kye kye sangs rgyas 'dra ba'i ston pa med// dam chos 'dra ba'i sgrol thabs med// dge 'dun 'dra ba'i sgrub byed med// gsang sngags 'dra ba'i mthu stobs med// 'di yi sangs rgyas ji lta bu// dam chos mdo sde gang gi bka'// sgrub byed dge 'dun ji lta bu// mthu ni gsang sngags gang gis byin// zhes gsol pas/legs so gsang ba'i bdag po khyod// 'di yis sangs rgyas nga yin no// dus gsum rgyal ba'i phur pa'i bdag/ sgrol ba bla na med pa'o// gsungs so cog ni phur pa'i chos// dge 'dun sgrub byed kI la ya// dam tshig srung byed sgrub pa bzhi// gsungs so cog gi byin rlab ni// gsang ba mchog gi kI la ya// de rnams phun sum tshogs par ni// bsgrubs na mi 'grub gang yang med// ces bka' stsal to// rgyud kyi rgyal po rdo rje phreng ba las/ gnan gzer snying po sngags kyi le'u ste bcu gnyis pa'o//// de nas yang bcom ldan 'das la gsang ba'i bdag pos gsol pa/ bcom ldan badzra kI la ya// A be sha ya ji ltar lags// shI g+h+rin bya ba ci yi don// dz+wa la ces pa gang la gsungs// ta thA ya ni ji ltar lags// ha sa bya ba dgongs pa'i don// b+hin+d+ha bya ba la sogs pa// gzir mnan gsang ba'i don bka' stsol// gsang ba nga yis zhus so 'tshal// kI la ya yis bshad du gsol// zhes zhus pas// legs so gsang ba'i bdag po// khyod yid yang dag par soms shig/ de yis bshad par bya'o// A we sha yis dgug par bya// shi g+h+nin ces pas bcing par bya// dz+wa la ces pas gzir bar bya// ta thA ya yis mngag par bya// ha sa zhes pas dbye bar bya// b+hin+d+ha zhes pas gdab par bya// de rnams stong stong tshang ba dang// bram ze'am ni yang na ni// stong par 'dod pa'i rnal 'byor pas// gdol pa'i khang pa mes bsregs na// stong tshigs las ni der bya ste// smad 'tshong ma yi ldum ra ru// nyung dkar rgyal po hor skyed la// rnam snang mdzad dang mi bskyod pa/ kha sbyar dbus su dril nas su// stong stong tshang nas brdeg par bya// rnal 'byor dbang phyug chen po yis// g.yon pa'i lag pa mda' ltar brkyang// sog srog yang dmar rgyal po gnam la bstan// thabs dang shes rab brtsegs pa yis// hor dkyil du ni mda' bzhag nas// ting 'dzin stobs kyis 'phang byas te// rnal 'byor dpa' bos 'di skad brjod// hU~M rnal 'byor gtso la mnga' mdzad pa'i// rkang med mkha' la rgyug cing 'dril ba yi// yungs kar rgyal po gser gyis mda'// 'bru gcig las ni khro bo stong 'phros pa// rab tu sra mkhregs rdo rje'i brag stengs na// shin tu mi bzad khro bo gtum rngam tshogs// de dag kun kyang zhal gsum phyag drug pa// 'jigs byed mtshon cha mang po phyag na bsnams// thugs kyi pho nya mchog yin te// don du gnyer ba'i dgra bgegs kun// myur du sod la drag tu khug/g.yas g.yon rgyab la yab yum bcu// gnyis med 'khril ba'i byin rlabs 'phro 'du las// nyung dkar rgyal po khro rgyal gtso// mngag pa'i rgyal po thugs rje can/ rdo rje spyan yang// A+o~M AHhU~M gis byin brlabs nas/khro bo chen por dbang bskur te// sdang ba'i dgra bgegs thal bar rlog/ ces gsungs so// rgyud kyi rgyal po rdo rje phreng ba las// gzir ba sngags kyi le'u ste bcu gsum pa'o//// de nas yang kI la ya chen pos/ b+ha ga tsaN+Da 'khor lo e'i ting nge 'dzin la snyoms par zhugs nas/ ched du brjod pa 'di ched du brjod do// ma mthong 'gro ba drang ba'i phyir// dkyil 'khor la sogs bya ba yi// sa chog la sogs dkyil 'khor la// gnas kyi bya ba btsal ba ni// gzhung bzhin ba yi thig la sogs// 'khor lo rtsibs brgyad e ru bcas// gru chad rdo rje ra bas bskor/ khyams ni rnam pa bzhi ru btang// dbus kyi chos kyi 'khor lo ni// chos kyi sku yi rtags yin te// lha dang ye shes dkyil 'khor rnams// rnal 'byor dpa' bos shes par bya// dur khrod la sogs rgyan rnams ni// yang dag nyid du dgod par bya// lha rnams dgod pa'i thabs kyang btsal// hom dang mnan pa zor dang 'debs// dkyil 'khor lnga ni 'brel bar bya// de nas gcad pa'i mtshams kyang bya// bdud rtsi gtor ma rak+ta brlab// phur pa rnams la lha rnams gzhug/ rnal 'byor gzhung bzhin byas nas ni// rnal 'byor bzhi dang bsnyen bsgrub bzhi// lam lnga dag dang tshul bstun nas// sangs rgyas nyid kyis bkri bar bya// bdag don rdzogs nas gzhan don ni// grub mtha' gcig tu bstan pa'o// rten 'brel 'khor ba dgag pa ni// ye sangs rgyas kyis sngon nas gsungs// rgyud kyi rgyal po rdo rje phreng ba las/ dkyil 'khor gyi bca' gzhi bstan pas/'khor ba'i sgo dgag pa dang/ rten 'brel rtsa ba gcad pa'i le'u ste bcu bzhi pa'o//// de nas yang bcom ldan 'das kyi byin rlabs cho 'phrul dbang gi ting nge 'dzin la snyoms par zhugs nas/ 'di skad ces gsungs so// rdzas la byin gyis brlabs nas ni// phyi yi phur pa nang dbang bskur// de nyid sangs rgyas dngos po ste// drang ba'i don gyis sangs rgyas ni// 'gro ba'i don du byin brlab bya// bye brag so sor bshad pa ni// sgrub byed sgrub mkhan sgrub gzhi gsum// dang por chos skur byin gyis brlab// rkyen gyi sngags kyang brjod par bya// dngos po thams cad stong pa'o// de nas longs spyod rdzogs pa'i sku// hU~M las 'od zer 'phro 'du yis// rigs lngar byin gyis brlab pa'o// de nas sras mchog kI la ya// sku mdog gdan khri chas dang ldan// sngags kyi 'phro 'dus bskyed pa ni// sprul pa kho na nges pa yin// gnas gsum dag tu dbang bskur nas// sku gsung thugs dang yang ldan te// de la nan tan bskyed par bya// sngon sangs rgyas kyis de skad gsungs// ngos gsum hU~M gsum yi ge'i tshogs// 'phro 'dus las kyi sbyor ba las// byang chub sems kyi gzhir gyur pa// rtse mo nyid la bsam par bya// dus gsum rgyal ba thams cad kyang// yi ge'i sgra nyid brjod pa las/ khro bo bye ba stong byung ste// phur pa nyid la bstim par bya// o~M laM hU~M laM s+t+waM laM b+han+d+ha ma hA kA ya wag wAn/ shri kri byi kri badzra hU~M kA ra/ hU~M hU~M phaT phaT/ badzra kI li kI la ya/ dzaHhU~M baM hoH sarba big+h+nAn baM hU~M phaT/ badzra kI li kI la ya/ hU~M hU~M phaT phaT/ badzra hU~M kA ra a a a/khro mo bzhi yi byin gyis rlabs kyis// ri rab bzhin du brtan par 'gyur// rnal 'byor dpa' bo'i lag pa la// thabs dang shes rab dkyil 'khor te// yab yum bcu yi sbyor ba las// 'khor lo gsang ba'i dbang skur ro// bsnyen pa bye bas ya dang// bdun 'bum grangs ni brjod med kyis// phur pa'i sku la btsud pa dang// 'phags pa'i thugs dam rgyud bskul ba// mtha' ru phyin pa'i bsnyen pa'o// de nas yang kI la yas rang bzhin gyi bstod pa 'di gsungs so/khams gsum gdug pa bsgral ba'i phyir// srid gsum phur bu'i rtogs pa'i ngang// tsham rngams gzi byin glog ltar 'bar// lag tu blangs te dril nas kyang// yum bzhi'i phyag rgyas byin brlabs nas// dril bas khams gsum sgrol bar 'gyur// srid pa gsum yang gsal 'tsher na/ khro bo'i phur pas rab brgyan te/ khams gsum dbang du yang dag sdud// srid pa gsum yang thabs shes bya// bskyed pa med pa'i ri rab kyis// mkha' yi gtum khung bde ba ru// lha yang rung ste myos brgyal nas// byang chub sems kyi phur bu yis// ma btab bzhin tu lhun gyi rdzogs// mnyam pa'i rgyal pos spags te bsgral// 'dzin chags thams cad rnam par grol// 'di ni byang chub sems kyi mthu// ma lus phur pa thebs shes bya// dpa' bo chen pos btul nas ni// shin tu bsgral nas dgyes bstar te// za byed kun la bstab par mdzad/ kha kha kha/ ha ha ha/ kha raM khA hi/ bstab pa dang bstod pa 'di ni phrin las bsam gyis mi khyab pa'i sgo nas bstod pa'o/ khro rgyal 'jigs byed badzra kI la ya// sdug bsngal 'joms mdzad spyi bo'i rgya mdud ni// srid gsum ma lus dbyings su bsgral mdzad pa// ma skyes lhun gyis grub par gzi byin bskyed// rked pa rgya mdud zur drug ye shes drug/ chu srin kha dang sbrul gyi chun pos brgyan// ma bcos lhun gyis grub pa'i gzhal yas khang// 'byung ba yum gyi lhums su gzi byin bskyed// zur bzhi logs bzhi khro mo brgyad kyis ni// rnam shes tshogs brgyad dur khrod brgyad du sgrol// sdug bsngal brgyad po gnas su bsgral nas kyang// bcu drug rol pa'i pho nyar gzi byin bskyed// rtse mo zur gsum sku gsung thugs kyi ngang// dug gsum 'khor ba'i btson ra go dral nas// lus ngag yid gsum bag chags gtan sbyangs nas// sa gsum zil gyis mnan pa'i gzi byin bskyed// ma bcos lhun gyis grub pa'i kI la ya// zhi bas spa bkong rgyas pas zil gyis mnon// dbang gis mngon sum drag pos tshar bcod pa// gang la dmigs pa'i dgra bgegs rlag par byed// kI la ya yis mchod pa bzhes su gsol// zhes gsungs so// rgyud kyi rgyal po rdo rje phreng ba las/ byin gyis brlab pa dang/ dbang bskur ba dang/ bstod pa'i le'u ste bco lnga pa'o//// de nas yang bcom ldan 'das kI la ya'i rgyal pos bka' stsal pa/ nyon cig gsang bdag phyag rdo rje// bsgral ba'i rdzas mchog dam pa la// rten 'brel nus pa'i rdzas mchog gis// btab na shin tu rlag par 'gyur// des na byug bdug brdeg dang gsum// gzhung las 'byung bar nga yis smras// zhes bka' stsal to// de nas bstod pa'i rgyal po 'dis ched du brjod do// dIp+ta tsakra phur pa'i lha// dmar po gcer bu ral pa can// kun kyang khro bo chen po la// zhal gsum phyag kyang drug pa ste// ral gri'i skra la phur pa'i so// lte ba yan chad chas rnams ni// na bza' rdo rje go chas gtams// lte ba man chad chas rnams ni// ut+pal sngon po'i mdog 'dra ba// 'bar ba'i phreng bas 'khrigs pa'i 'od// lcags kyi phur pa zur gsum pa// btab na lha yang rlag pa'i phyir// gnod byed bgegs la smos ci dgos// kI la ya mA ra ya phaT// byug bdug brdeg pa'i sgo nas bstod pa'o// de nas yang bcom ldan 'das kI la ya'i bdag po des/ sangs rgyas kun gyi gzugs kyis brgyan pa/ smra mgon kun gyi blon por gyur pa/ byang chub sems dpa' rnams kyis mes por gyur pa/ sems can kun gyi sman par gyur pa de la/ 'dus pa'i 'khor rnams kyis mgrin gcig tu/dbyangs gcig gi sgo nas bstod pa/ zung rngu med pa'i sku gzugs la// dur khrod chas sam dpe byad kyis// sku yi dpa' bo khyod nyid la// sku 'dul khyod la phyag 'tshal bstod// gsung ba med pa'i nga ro yis// brjod pa thams cad sngags kyi tshogs// ha dang he dang b+h+yo dang dza// A+oM dang AHhU~M gang gsungs pas// gsungs 'dul khyod la phyag 'tshal bstod// thugs kyis ma bsams gcig kyang med// chos can chos nyid 'byed pa mkhyen// ri bo'i rdul dang rgya mtsho'i thigs// mya ngan 'das mkhyen khyod phyag 'tshal// zhes gsol pas/ 'khor rnams la gzigs nas/ ci yang mi gsung bar sku gsung thugs kyi ngang la mi snang bar gyur to// de nas phyag na rdo rjes gsol pa/ 'u cag 'khor 'dus pa rnams kyis/ kI la yas gsungs pa 'di bcang bar bya'o// mchod pa la sogs pa thams cad bya'o// ma 'ongs pa la phan par bya'o// de ltar byas nas dus ma yin par 'jigs pa thams cad dang sems can rnams 'bral lo// zhes gsungs nas 'khor rnams kyang mi snang bar gyur to// rgyud kyi rgyal po rdo rje phreng ba'i rgyud rnam par rgyal ba'i rtog pa/bshad pa dang bshad pa'i man ngag/ thun mong dang thun mong ma yin pa las kyang thun mong ma yin pa/ khyad par dang khyad par ma yin pa las kyang khyad par de/dam pa gsang chen gyi rgyud rdo rje phreng ba zhes bya ba/ rnam par rgyal ba'i rtog pa'i le'u ste bcu drug pa'o//// rdzogs so// rgya gar gyi mkhan po dz+nyA na gar+b+ha dang/ bod kyi lo ts+tsha ba ban+de bai ro tsa nas bsgyur ba las/

CLOSE WINDOW