CLOSE WINDOW

Gpb022.007
བོད་ཡིག

rgya gar skad du/ ma he sha sa mU'u dA ya ma hA tan+t+ra nA ma/ bod skad du/ dbang chen 'dus pa'i rgyu chen po zhes bya ba dpal rdo rje sems dpa' la phyag 'tshal lo// 'di skad bdag gis thos pa'i dus gcig na/ rnal 'byor gyi dbang phyug chen po ji ltar dngos grub dam pa thob par 'dod na/ chos thams cad rang bzhin gyis rnam par dag pa'i stong pa nyid las langs te/ yi ge hUM du bsgom la/ yid kyis bar snang gi khams thams cad gser gyi seng ge spyan gsum pa la 'od zer 'bar ba 'khrigs pa drug gi steng du rin po che'i khri phyogs bcur 'od 'bar ba'i steng du pad+ma le brgan 'od phyogs bcur 'bar ba/de bas zhabs gang tsam gyis mtho ba'i steng du/ma las nyi ma'i dkyil 'khor gcig tu gyur pa dmigs la/ de'i steng du sbyor ba'i dbang phyug chen po/ rgyan thams cad kyis brgyan pa/ rdo rje sems dpa'i phyag rgya badzra hUM zhes pa 'dis bcings nas/mngon sum du bsgrub pa'o// hUM zhes bzlas pa tsam gyis phyogs bzhi mtshams bzhir rin po che'i ka ba 'phang du dpags tshad brgyad khri bzhi stong bas kyang dpags pa/ ka ba gcig la yang sprin med pa'i nyi ma bdun bdun gyis brgyan pa/'od zer stong gsum gyi stong chen po bas kyang dpag par dmigs pa/ stong gsum gyi stong chen po'i 'jig rten gyi khams thams cad na/ skye gnas bzhi las skyes pa'i sems can thams cad dang nyan thos dang rang sangs rgyas dang/rigs ngan thams cad dang rigs med pa'i rnam par rtog pa'i bag chags hUM zhes zer ba las/ bskal pa'i me 'bar ba mang pos brgyan pa'o// g.yas kyi gshog pa gnyis ni/ steng ma rin po che'i rgyu las byung bar nga rgyal bskyed do// 'og ma sems can thams cad 'dul ba'i thabs la mkhas pa yin pas/ rgyun mi chad par rdo rje 'bar bas 'joms pa'o// the'u gshog rnams ni gang gi snying la 'dren pa yin pas rdo rje lcags kyu rnon po'i mchog kyang yin la/ sgrol ba'i thabs ma brtson pa yin pas grol ba dam pa'o// phyag g.yon gyi dang po ni sdigs pa'i mdzub mo la bskal pa'i me chen po 'bar ba'o// gcig gis ni lu gu rgyud kyi zhags pa'o// gcig gis ni thod pa khrag gis bkang ba'o// bdag nyid chen po'i zhal du 'bul lo// gcig gis ni khra bo chen po brgyad kyi snying dang rgyu ma kun lhan cig du tshang bar bcug nas za'o// gcig gis ni rdo rje kha TAM ga dang/ rngai'u chung dang/ lcags kyu lhan cig tu bzung ste gang gi snying nas 'dren pa'o// phyag g.yas dang g.yon pa brgyad char yang sbrul nag po dang sngo bkra dag gis brgyan pa'o// kha nas byang hUM gis sgra grags par sha stag go/ de dag gis snying po 'di brjod par bya'o// oM ha ha ru lu ru lu phaT dzaHzhes brjod pas/ snga phyi'i brgya byin dang/ tshangs pa dang/ phra men ma'i 'khor mang po dbang du bsdus nas/ gzhan yang tshogs kyi dkyil 'khor mang po sprin phung bzhin du dbang du 'dus nas/ de'i steng du bdag nyid chen pos hUM thang gcig bzlas pas zhabs dmar po brgyad dus gcig la byung bar bsam mo// de nas shar phyogs kyi khams 'dul ba'i zhabs ni/ drag shul dpal 'bar ldan pas stag gi gdong gis dkris te/ shar phyogs kyi hUM kA ra'i snying gar rdog pas brdzis te nyam thag pa'i 'bod sgrog chen po 'don pa'o// shar lho mtshams su Ar+ya a tsa le mdog sngo skya gan rkyal du mnan pa'i snying gar zhabs kyi bol man chod nub par dmigs te/zhabs baiDUr+ya sngon po zhu bas g.yogs pa'o// zhabs gcig ni lho phyogs gyi khams 'dul ba yin pas rdo rje rtse lnga pa'i na bzas bklubs te ya mAn+ta ka'i snying gar rdog pas mnan pas zhabs kyi bol man chad nub pa'o// zhabs gcig gis lho nub kyi nI la daN+Da'i snying gar rdog pas mnan te 'bod sgrog gi sgrar 'byin par dmigs la zhabs pas khrab smug pos sgrib pa'o// zhabs gcig ni rdo rje phur par dmigs pas sbrul nag pos dkris pas pad+ma kuN+Da li mdog nag po'i snying gar btsugs nas 'khor mang po dbang du 'dus pa'o// nub byang mtshams kyi 'dod pa'i khams dbang du bsdu ba'i phyir zhabs dmar po'i mthil gnyis khro bo chen po'i khar dmigs la/rkang pa'i nang gzhal yas khang du dmigs la/ zhabs kyi mthil nas kha dog dmar po las 'od 'phro bas 'dod pa'i rgyal po'i mgo rkang gi nang du song ba dmigs la/rdo rje mche bas bcom par bltas nas 'khor mang po 'phrog par byed do// zhabs gcig ni chu srin gyi smad g.yogs can byang phyogs su brkyangs pas a mr-i ta kuN+Da li kha bub tu mnan nas/ rdog pas 'gel ba thams cad bcom nas/ bol man chad rlon pa'i nang du nub par dmigs la/ sdug bsngal thams cad myong bar byas te/ phyi ma'i dus na rnal 'byor dbang phyug chen po thob par gyur cig par smon lam 'debs so// zhabs gcig ni 'dod pa'i lha mos phyag byas la gzig gi mgo yis dkris te/ byang shar mtshams su ma hA ba la'i ldan par mnan pas dung chen po bcom ste/ 'khor gyi lha mo'i tshogs dang/ma sring mo dang chung ma dang bu mo dang tsha bo tsha mo rnams 'phrog go/ gshog pa g.yas dang g.yon pa'i steng ma ni/ rin po che'i rgyu las byung ba 'dod chags chen po yin no// gshog pa 'og ma khro bo'i rgyu las byung bas rdo rje drag po'i tshogs yin no// the'u gshog rnams ni 'dod pa'i gtso bo yin pas shes rab kyi mchog dang sbyor ba'o// spyi'i gshog pa bzhi char gyi bar bar ni sbrul nag po'i rgyu las byung ba'o// bar bar ni rdo rje rtse lnga pa las byas pa'o// bar bar ni rin po che'i rgyu las byas pa'i nyi ma stong gis bklubs pa'o// 'di dag thams cad kyi bzlas pa ni/ oM dz+wa la dz+wa la badzra hUM/ oM badzra a mo g+ha hUM/ zhes brjod cing las thams cad bcol lo// gong ma'i rdo rje'i grwa la 'og min lha mo glog 'gyu ma/ de la he ru ka khro bo thams cad kyi bzlas pa ni 'di yin no// A+oM ru lu ru lu hUM phaT/ e ma ra li hrIM hUM dza/ nye ba'i snying po bzhi 'bum byas na las nus so// de lta bas na dpal chen he ru ka khro bo mtha' dag gi mchog/ chos kyi dbyings yin pas/ 'dod chags chen po sbyor ba/ zhe sdang mchog la brtson pa/ nga rgyal gyi dbang du 'dus pa/ phrag dog gi 'dod pa'i dbang po tshur bcas nas/ dpal dbang chen pad+ma he ru ka nyid sgrub par dam bcas te/ dpal chen po'i sgrub pa la brtson pa la sdang ba dang gnod pa'i bgegs rnams tshar gcod pa ni/ dpal chen po nyid byung bas drag po'i bgegs rnams kyi dbang du 'dus par mi 'gyur ro// des na dpal pad+ma he ru ka la brtson zhing sgrub par byed pa'i rgyal sras kyi mthu bo che zhig byung nas/ des dngos grub kyi khyad par gcig sbyin par gyis/ma 'jigs shig dang 'dod pa'i dbang po thob par bya'o// zhes gsungs pa ni/ sngon mkhan po mkhas pa zhig gis sngon pad+ma he ru ka bsgrubs te he ru ka'i dngos grub kyi mchog thob po// man ngag gi gzhung ni 'di yin no// de la 'di lta bu dag 'byung ste/ bud med kyi tshogs mang po dag rgyan rnam pa sna tshogs kyis brgyan te/ rab tu mdzes pa mang po dag rgyan mdzes par brgyan nas/'ong srid kyis des chags pa'i sems bskyed cing/ bar bar du phra men ma'i tshogs mang po dag mi'i thod pa mang pos brgyan te/ lag na thod khrag dang mi'i thod pa mang po thogs/ mig gdugs pa'i 'bru tshugs su blta zhing/mi snyan pa'i tshul gyis bdag la gsad do// bza'o brdeg go/ tshig chad dam/ thams cad 'od zer des bcom btags nas bla na med pa'i byang chub las bkod pa'i thabs 'dis bya'o// nyi ma'i dkyil 'khor gyi steng du bdag nyid rdo rje sems dpa'i rang bzhin yang dag yin la khams gsum gyi bdag po chen po yang dag kyang yin zhing/ khro bo chen po yang dag yin no zhes dmigs la/ nyi ma'i dkyil 'khor gyi steng du snga ma'i rgyan thams cad kyis brgyan pa/rdo rje sems dpa'i rang bzhin las/ sku mdog dmar po dbu lnga phyag bcu drug tu dmigs la rin po che dang/ rdo rje'i rgyu las byung ba'i gshog pa bzhi yang bskyed par bya ste/dbu lnga po'i bzhi ni phyogs bzhir 'bar ba'i gzugs kyis blta'o/ dbus ma'i klad par/ rin po che'i gzhal yas khang du byin gyis brlabs nas/ dpal rnam par snang mdzad bzhugs par dmigs la/thod pa'i ngos bzhi rgyan thams cad kyis brgyan pa'i/ rdo rje sems dpa' sku mdog dmar po phyag rgya tshul bzhin du bcas nas bsgom mo// g.yas g.yon gyi dbu ni sku mdog dmar po/spyan gsum du dmigs la/ ral pa dmar po'i dbus nas/ rta mgo ljang gu re re byung bar bsam mo// lhag par rta mgrin dngos su byung bar bsams te/ hUM rdo rje hUM zhes bya ba'i sgra grags pa tsam gyis/ nub phyogs kyi phra men ma rnams kyis/'khor mang po'i klu thams cad drag po'i brtul zhugs kyis dbang du 'du bar bya'o// lho dang byang du blta ba'i mgo yang hUM hUM zhes bya ba'i sgra 'byin pas/ gnod sbyin gyi 'khor thams cad dang grul bum gyi 'khor thams cad dang/phra men gyi 'khor thams cad kyis/ hUM hUM zhes bsgrags pa tsam gyis zhabs 'og tu song bar dmigs la gnas la bstab par bya'o// shar phyogs su blta ba'i mchog dmar po spyan gsum pa'i zhal nas kyang/hUM zhes bya ba'i sgra drag po bsgrag cing ljags 'dril ba tsam gyis kyang/ spyi gtsug tu rdo rje kha T+wAM ga 'bar ba gsum gnas par bsam mo// yang shar phyogs su 'bar ba'i gzugs kyis blta bar bya'o// smin ma glog bzhin 'bar ba/ smin mtshams kyi bar khro gnyer gyi rlabs bskyod par bya ste/ rdo rje 'bar ba'i tshig gi hUM zhes brjod pa tsam gyis brgya byin dang/ tshangs pa dang/ de'i gnas thams cad/ phra men ma'i 'khor dang bcas pa zhabs 'og tu song bar dmigs la/ gnas la bstab par bya'o// hUM kA ra rgyud dbang du bsdu ba'i phyir/ phyag rgyas bcings la dbang po cher nga rgyal bskyed do// phyag bcu drug la g.yas g.yon gnyis na rdo rje lcags kyu'i phyag rgyas 'gugs pa'o// phyag g.yas gcig na sbrul nag gi zhags pa bsnams pa'o// phyag g.yas pa gcig na rnge'u chung dang kha T+wAM gcig tu 'dzin pa'o// phyag g.yas pa gcig na thod rlon khrag gis bskang ba nas dung nang bsres pas/ 'jig rten gyi khams thams cad rab 'byams mtha' klas pa'i 'od zer bdud rtsir byin gyis brlabs te za ba'o// phyag g.yas pa bzhi ni/ rgyun mi chad par zlos shing rdo rje 'bar bas brdeg go/ phyag g.yas pa'i dpung rgyan dang/ gdu gu sbrul nag po mi sdug pa kha nas zer ba mang po srid kyis/de la ma 'jigs par khro bo chen po'i sku sgoms shig dang/ bdag nyid ting nge 'dzin las ma g.yos pa dang/ 'khor thams cad kyis rang dbang med par phyag byed kyis dngos grub dang po gcig dang sbyor ro// de'i 'og tu gnod sbyin gyi tshul ston cing ral pa 'bar ba la/ mi mgo mang pos lus brgyan cing/ lag na rdo rje dang ral gri thogs pa dag mi'i rgyu ma ske nas 'dogs shing/ sbrul nag po dag lus la za ba'i rnam par snang ba dag 'byung bas dkris te/rtsib ma skra tshom dam du bsdam pa dag 'ong gis/ de la ma 'jigs shig dang/ dngos grub dam pa gnyis pa thob pa yin no// de nas gnod sbyin dang grul bum gyi dbang por 'gyur ba yin no// bar snang la gnas pa'i lha khro bo rnams kyis sdigs pa dang/ gnod pa sna tshogs 'dra ba byed do// lha gshegs pa dag gis sgra drag po dag 'brug gi sgra sgrogs pa dang/ sbrul nag po dag me dang dug kha nas skyugs pa dang/a la la zer zhing sgra 'byin pa dang/ mig g.yas g.yon nyi mar gyur te 'bar ba'i gzugs kyi blta ba dang/ lto ba phyes nas mi ro gsar rnying dag ston pa dang/ pho mo'i mtshan ma thams cad za ba'i khar sgyur nas/'jigs tshogs kyi mche ba 'dar ba/ rkang pa phur par gyur te/ bdag la 'debs shing gnod par byed par de ltas mgo mi lpags rlon pas g.yogs shing/ lag pas rdo rje brdegs pa dag 'ong gis ma 'jigs shig dang/dngos grub gsum pa thob pa yin no// de ni lha thams cad kyi dbang por gyur to// dbang chen 'dus pa'i rgyud las/ de man chad kyis dpal dbang chen pad+ma he ru ka'i gal po las/sgrub pa don gyi le'u ste dang po'o//// sku gsung thugs kyi cho 'phrul cir yang bsgyur zhing cir yang ston pa thams cad du gnas te/ gcig tu ma nges pa'i phyir na/thugs kyi che ba nyid dang/ sku'i che ba nyid la sogs te/ sku gsung thugs gang yang ma 'gags pa'i sgo nas/ byin rlabs so sor 'byung ste/ khams gsum rnam par gnon rab tu gnon to// dper na nyan thos kyi dge 'dun rnams kyis/ blta ba theg pa chen po ma mthong ste/ 'dul ba nyi chol gnas pa'i sgo nas sbyangs pa'i bar snang la gnas pa gnod sbyin mthu bo che shin tu nye'o zhes dran pa nye bar gzhag pa/dge ba chung ba la gsal bar 'byung ngo// de bzhin du sbyar te/ nyan thos kyi dge 'dun rnams las/ de bzhin gshegs pa dam tshig la gnas pa'i khro bo rnams shin tu rlabs che'o// de yang ci'i phyir zhe na/nyan thos skyes bu chen po rnams kyis zhi ba phyogs gcig pa'i ting nge 'dzin gyis ni/ dmangs rigs rnams 'dul ba dang/ nyan thos kyi sa la bzhag pa rnams/ gdon nus par zad kyi/ bla na med pa'i theg pa chen po'i don mi skyod pas/khro bo chen po rnams kyis rnal 'byor gyi dbang phyug chen po rnams spyod pa'i ye shes bla na med pa ston pa'i yon tan thogs pa med par spyod pas/ nyan thos pa'i mi nye'o// rgyu'i dus na yang mi nye'o// de bzhin rnal 'byor gyi dbang phyug chen po ni/ snying ga'i nyi ma'i dkyil 'khor du gyur pa las/ stong gsum gyi stong chen po'i 'jig rten gyi khams thams cad sa ler snang bzhin du me long lta bu'i ye shes dang sbyor/sems can gyi gnas dang/ lha klu gnod sbyin la sogs pa/ sems can gyi rgyu la snang ba thams cad kyang bdag gi ye shes la snang bar zad kyi/ gzhan sus kyang snang bar mi nus so// shAkya thub pa'i ye shes kyi dus yin no// dper na ri rab lhun po'i rtser/ dpal snang mdzad kyi skur brlabs nas/ lha'i rigs 'dzin gnas pa'i dus ni/ nga'i rnal 'byor gyi dbang phyug chen po yin no// zhes sems bskyed do// bdag dang 'khor thams cad dbu mthon mthing lta bur gyur te/ bar snang gi khams bkang ste/ phyogs bzhi mtshams bzhi khro bo dang/ khro mos bkang ste/ gser gyi seng ge spyan gsum pa dang/glang po che dang/ rta dang/ rma bya dang/ nam mkha'am lding la sogs pa'i khri steng/ grangs med pa la gnas pa'i dus na/ 'og min gyi gnas na khro bo rnam par rgyal ba/ rdo rje rab tu 'bar ba zhes bya ba/sku mdog dud kar sbyor ba dbu gsum la tshar gsum pa/ tshar gsum nyid kyang bus pa'i mgo rlon pa btags pa zhig las tshar gsum du gyur pa'o// lag pa bar bar ni bcu drug pa/ bar bar ni zhi ba'i ting nge 'dzin/bar bar me long lta bu'i ye shes/ bar bar ni klong chen po/ bar bar ni bar snang gi khams lta bu/ ye shes hUM gi tshogs kyis khengs par byed pa dang/ bar bar ni thibs pos stong gsum gyi stong chen po'i 'jig rten gyi khams thams cad bdag gis lto bo che'i gzhal med khang du tshud pa/mche ba dkar po srid pa ma lus pa'i yar thal sum cu rtsa gnyis kyi steng du gtsigs pa/ ral pa dmar po dpag gis mi lang bas sangs rgyas kyi zhing thams cad zil gyis gnon pa bar bar du rdo rje'i rgyan thams cad kyis brgyan pa/rnam par snang mdzad chen po nges par bsgying pas rdo rje'i gnas thams cad rab tu sra bar gyur pas nam mkha' khengs pa rab tu 'khrugs par byed pa/chos kyi dbyings dur khrod chen po zil gyis gnon par byed pa/ zhab bgring rdo rje'i rol mo byed pa khrag khrig/ rjes su 'breng ba/ rigs sngags kyi rgyal po rta mgrin dang rdo rje khro bo thams cad thabs gcig tu gshegs pa'i dus na/mda' shur du 'phangs na/ sum cu rtsa gsum gyi lha thams cad/ mkha' dag pa byed pa'i gnas la bzhugs pa'i tshe na/ ye shes kyi lha la bltas nas/ bar snang gi khams bdag gi lha'i gzhal yas khang/ nyi ma'i 'od zer mtshams kyi bar tshigs na dpal rnam par snang mdzad ces bya ba/ seng ge'i gdan dang rin po che'i gzhal med khang na/'khor dang ldan te bzhugs pa/ longs spyod rdzogs pa'i sku bstan to// dpal rnam par snang mdzad lcang lo can gyi pho brang na lha'i 'khor mang po dang ldan te/ nga ni byang chub mchog dang ldan pas/ 'di las gong na med do// zhes nga rgyal skyes pa'i tshe na/ khro bo'i 'khor rnams kyi ye shes la snang bar gyur te/ de dag kyang nga rgyal gzhom zhing/ rigs gcig pa'i mnyam pa nyid kyi ye shes don rtog par bya ba'i phyir/thabs 'di lta bus 'dul lo// rdo rje khro bo he ru ka khams gsum rnam par rgyal bas/ bar snang gi khams thams cad yi ge hUM gis bkang ste/ bdag nyid chen po bus pa'i tshul du cha byad du bzhugs nas sems kyi ye shes la snang ba'i tshad ni nyi ma 'bum 'dus pa'i dkyil 'khor bas kyang gsal bar byas la bdag gi 'khor gyi lha mo grangs med pa rnams kyang bdag gi lus la 'dus nas phyag bzhi pa sku lus thams cad kyang sbrul nag po khros pas spyangs pa lus kyi yan lag thams cad kyang thod rlon gyi phreng bas brgyan pa dbu gsum pa ste/g.yas dmar g.yon nag po dbus mthing ga spyan gsum gsum thad gar drang por gnas pa/dbu'i ral pa las me stag phyogs bcur 'phro ba/ phyag bzhis g.yas pa dang po rnge'u chung/ 'og ma na mdung rtse gsum pa/ g.yon gyi dang po rdo rje rtse dgu pa/ tha ma na rgyu ma'i zhags pa thogs pas/'di skad ces smras so// tshar gsum can gyi rnge'u chung gis// lcang lo can gyi pho brang 'joms// snang mdzad chen po a la la// gnod sbyin chen po a la la// chos kyi dbyings nyid a la la// sangs rgyas bden tshig a la la// sems dpa' chen po a la la// zhes smras nas/ rnge'u chung lan gsum brdungs pas/ snga mas lcang lo can gyi 'khor thams cad kyang/ rdul phra mo cha shas tsam du gyes te/stong pa bdag med par gyur pa dang/ bar snang gi khams yi ge hUM gis bkang ba rnams de las/ hUM hUM zhes bya ba'i sgrar gyur pa las/ sngar rdul phra mo cha shas su gyur pa de dag thams cad dbang du 'dus nas/de dag thams cad tri shUl dang zhags pa thogs pa sha stag tu gyur pa ste/ stong pa bdag med par gyur pa dang/ de dag thams cad kyang he ru ka'i 'khor du 'dus te/ rigs gcig tu nges par byas so// rdo rje rnam par rgyal ba khro bo chen po bcom ldan 'das rdo rje rnam par snang mdzad la snyoms par zhugs te/khro bo'i rgyan thams cad kyis brgyan pa/ dbu mthon mthing lcang lo rin po che'i kha la reg pa dang/ in+d+ra nI la'i rgyu las byung ba dang/rin po che thams cad kyi lcang los brgyan pa rin po che 'bar ba lngas gtsug phud byas pa/ se mo do dang do shal dang/ mgur chu la sogs pa thams cad kyi 'od gcig gis kyang phyogs bcur 'khrigs pa/smad g.yogs me tog ut+pal dang/ pad+ma dang/ dpung rgyan dang/ pad+ma stong du sbel bas smad g.yogs byas pa/ zhabs kyi mthil nas 'od gcig gis kyang/ phyogs bcur 'khrigs pa 'od zer bye ba phrag drug cu dus gcig tu 'gyed pa/'od zer rnams kyis kyang lha klu bye ba khrag khrig zil gyis gnon par byed pa'i ting nge 'dzin la snyoms par zhugs nas/ nyi ma'i tshogs sprin phung bzhin du 'dus pa'i steng du/bdag nyid byang chub mchog gi phyag rgya bcings nas/ oM AHhUM/ zhes brjod pas tshul bzhin du gnas par bya'o// de nas bdag gi zhabs kyi sprul pas/ khro bo chen pos brgyad mnan pa de dag kyang/ lus kyi gzugs dgu ma lags/ rmi lam bzhin du bor te/ yang dag pa'i dbang gis/ gzhan thams cad zil gyis gnon par byed pa'i/ ji las kyang mi shigs pa'i hUM kA ra brgyad du dbang bskur te/ phyogs bzhi gling brgyad bla 'og tu dbang thob par bya'o// de ltar rnal 'byor gyi dbang phyug chen pos thabs phra ba ni mtshan nyid med par dbyings gcig ste/ ming dang mtshan mas mi thogs par tshul bzhin shes par bya'o// chos kyi dbyings mnyam par nyid yin pa las/ dkon mchog dpal dang gtsug tor dang/ lang kar shes pa bsam gtan dgra bcom pa rnams kyis so sor phye ba las/ rnal 'byor mkhas pa'i dbang phyug ni// bdud rnams thams cad rab tu 'joms// bde gshegs mya ngan 'das rnams dang// bdud rnams thams cad 'joms pa'i lha// dper na rnal 'byor dbang phyug chen po rnams thabs rnam pa sna tshogs pa la tshangs pa brgya byin la sogs pas yang dang yang du mchod pa dang/des ci bya ba yod pa'i bsgo ba thams cad dag byed/ bran gyi tshogs ni de yin no// dper na dam tshig mchog rab ni// smad par bya ba ma yin te// khams gsum kun gyi dbang phyug ma// btsun mo rab tu sdud pa las// drag tu smra ba gang byed pa// sgeg pa'i tshogs kyis brgyan nas su// sri zhu sems kyi gdung ba la// ye shes tshogs kyis rab 'byor ba// mnyam pa'i dbyings nyid ye shes te// gnyis ka nges par mnyam na ni// stong gsum dbang bsgyur gdon mi za// 'jig rten khams na rgya mtsho bzhin// gzugs med kun la nam mkha'i sgra// dper na rang gi gnas khang du// rang gi gur gum chag chag gdab// rang gi dri rnams maN+Dal bya// me tog phreng bas kun tu brgyan// spos dang du ru a ga ru// li shi dang ni ga bur dang// dza ti pha la mchog tu bsngags// lag pa phur pa mchog yin te// zhi ba sor drug zlum po bya// rgyas pa sor brgyad zur yang brgyad// dbang la zla gam nges par bzang// drag po la ni sor drug pa'o// kun kyang rtse mor hUM bzhag ste// ngos su ha ha ru lu ru lu bsgom// rgya mdud thogs tu oM bsam ste// pho nya'i 'od zer dud kha spro// hUM dang phaT kyi sgra sgrogs shing// bskal pa'i brag cha chen po bzhin// kun kyang rtse mor hUM bzhag ste// mig gsum po la lcag sder can// mgo gsum po la rkang gsum po// mi sha za zhing bdud khyim 'joms// bltas pas bdud rnams tshig par byed// klu yi gnas rnams rab tu 'joms// mgo brgya po la lag brgya ba// rkang brgya po la mig kyang brgya// lag pa rdo rje phur pa 'dzin// rta mgrin gnas ni nges par 'joms/ rkang drug po la mgo drug po// lag pa drug la mig kyang drug/ lag pa drug gis rgyud drug 'joms// g.yon pa gsum ni gtor ma 'thor// g.yas pa gsum ni phur pa 'dzin// mgyogs pa'i rlung gi shugs dang 'dra// 'di rnams khro bo'i pho nya yin// ha ha ru lu'i sgra sgrogs shing// rang gi phyogs la song ba'i tshe// khro bo kun kyang nges par 'chi// gang nas gang du 'gro ba'i tshe// rang gi rkang pa phur pa yin// lcags kyi phur par rab tu grags// 'od zer dud kha reg na ni// tshangs pa'i gnas kyang rab tu 'joms// lag pa g.yon pa brkyang nas ni// phra men rnams kyang 'khor dang bcas// kun kyang ral pa 'bar ba la// lcags kyi dgra s+t+wa rab thogs te// zhing chen rab tu 'dzin pa'o// byang gi phyogs su rgyug pa ni// lcags kyi khyi ste rkang gsum pa'o// lcags kyi lus la nyi ma'i gzugs// phub kyi lcags kyu 'dril ba bzhin// bang ni glog gis bskyod du med// skad ni nam mkha'i 'brug pas che// rab tu mi srun 'di dag gis// phyag na rdo rje'i mthu yang 'phrog/ rkang gcig gyen du bsgreng ba ni// ya bdud chen po'i snying nas 'dren// dmyal tshogs me dpung rtsad nas gcod// rkang gcig mthur du brkyang ba yi// ma bdud chen po'i snying nas 'dren// dmyal tshogs me dpung rtsad nas gcod// rkang gcig thad kar byung ba yi// dgra bo rnams kyi snying nas 'dren// 'byung po dag kyang dmyal thag chod// sku ni lcags thag 'khril pa 'dra// tshems ni spu gri bshibs pa 'dra// mdangs la za zhing rengs par rgyug/ gnod sbyin mang po bsgral ba'i mchog/ de ni dpal gyi pho na ste// 'jig ten khams su za ba yi// gnod sbyin kun gyi rting na rgyug/glo snying nang khrol 'byin cing za// bar snang dkyil du khros pa'i tshe// nyi zla kun kyang thang la bzlog/ gza' skar kun kyang dum bur gcod// shin tu 'khrugs shing rbad pa'i tshe// bdud kyi snying khrag dron mo 'thung// bar snang khams na gnod sbyin kun// rdul phran phra mo bzhin du brlag/ dza la dza la yak+Sha khA hi/ de bas 'di rnams bstan pa'i phyir// dbang chen nyid kyis bka' stsal pa// glu bro dam tshig mchog yin te// sgrub pa'i cho ga rdzogs pa'i tshe// sa yi 'og tu 'dom gsum bya// bru yin nam// bar bar rdo rje sems dpa' che// cha lugs ci 'dra 'khor dang bcas// sems kyis mnyam par dgod par bya// phra men 'khor tshogs mang po kun// gnod sbyin mang po dang rol bar mdzad nas/ mang po bdag nyid rnam par rgyal ba'i ting nge 'dzin la zhugs/ sku mdog dkar por bsgyur byas te// glu dang bro ni bstan par bya'i// 'khor mang po dang mnyam par 'dug pa'i dus na/bdag gi sku mdog dmar por bsgyur ro// lam du zhugs te 'gro ba'i dus na/ sku mdog ljang gur bsgyur te/ he he zhes bya ste dgod cing 'gro'o// gang du phyin pa'i dbus su hUM zhes bya ste 'dug par bya'o// 'on tang ma mo thams cad dbang du bsgyur bas nyal ba'i dus na a zhes bya ste tsog tsog por yud tsam zhig gnas par bya'o// bdag nyid gser btso ma'i kha dog bzhin du 'tsher bar 'gyur te/kun tu bzang mo nam mkha' la langs nas/ mngon sum du 'dzum par mdzad nas snyan par smra ba dang/ 'dod sbyor gyi longs spyod rtse mo yang byas par bsam mo// sa'i 'og tu mda' 'phangs pas// gnam gyi steng gi lha bran 'chi// spyod lam sgrub pa 'di ltar ro// mtshon thogs kun gyi rgyal po ste// ral gri 'dzin pa'i rgyal por gyur// 'jam dpal 'khor gyis phyag byas pa'o// gzhan zhig nges par sgrol ba ni// rdo rje srin po'i ting 'dzin bsgom// rak+sha mig gis blta bar bya// kha nas sngags kyi tshig zlos shing// pha rol rnam shes hUM gis drang// snying gar thim pa dmigs byas na// pha rol mngon sum 'chi bar 'gyur// mgo dang mig dang rkang lag dag/ ya mAn+ta ka'i 'khor la dbul// gzhan rnams lhag par gang yod pa// he ru ka dpal dbul bar bya// mgo dgu po la rkang gcig po// lus nag po la 'od phung nag/ ral pa nag cing mche ba nag/ mig kyang nag cing lus nag po// mgyogs ni rlung gis bskyad du med// 'di dag pho nya'i mchog yin te// zhum pa med pa'i stobs chen 'joms// 'di dag dpal gyi pho nya ste// g.yon pa gsum ni lcags skyu 'dzin// g.yas pa gsum ni s+t+wa gri phyar// yan lag sbrul nag mchog gis brgyan// lcags kyu rnams kyis snying nas 'dren// g.yas kyi s+t+wa gris nges par 'joms// 'di ni sgo srung mchog yin te// pho nya kun tu mngag par bya// bgegs rnams nges par phung bar byed// gnod sbyin phra men 'khor bcas kyis// bdag la rab tu gtses gyur na// phag gi brtul zhugs chen po ni// sa yi 'og tu mngon sum bya// las kyi hUM zhes brjod par bya// mAM sa dag kyang mang du bza'// nam mkha' la ni sems dpa' bsam// bgrang phreng glad la bskor bar bya// de ltar byas na bdag rgyal zhing// nad gtong rnams ni 'chi bar 'gyur// rkang gcig dag gi pho nya ni// kha dog zla ba ci 'dra ste// gcig la gcig ni rab tu 'khril// yang na lag pa sprel te 'gro// mig kyang med de cang mi smra// long ba kun gyi mchog yin te// stangs stabs dag gi pho nya ni// lan 'ga' drag tu mngags pa'i tshe// gnyis ka bsdongs te der phyin nas// gang la dmigs pa len par bya// sus kyang bzlog par mi 'gyur ro// gnod sbyin rnams ni 'khol 'dod na// gnod sbyin gzugs ni khrag gis bri// dur khrod chen po mngon sum du// de yi snying gar phur mnan nas// 'gugs pa'i brtul zhugs hUM zhes bzlas// ma 'ongs bar du bzlas na ni// zhag bdun dag gis khug par 'gyur// gnod sbyin kun la ci dgar spyad// bdag gi bran dang 'dra bar 'gyur// phra men rnams ni 'khol 'dod na// phra men gzugs ni khrag gis bris// yan lag phur pas btab nas ni// snying gar rdog pas rab mnan te// dgugs pa'i brtul zhugs hUM zhes bzlas// zhag bdun gyis ni nges par 'ong// phra men rnams ni dga' bar 'khol// khong gis 'gal na khong rnams 'chi// bdag gis 'gal na bdag nyid nyams// 'gro nyal 'dug sdod ci byed kyang// 'khor dang bcas pa'i bsnyen pa bzlas// nangs par mal nas langs nas kyang// yi dam mnos pa'i sa phyogs su// gom gsum 'phags na dran par bya// bshang gci byed pa'i sa rnams su// dri chen lag tu blangs nas kyang// phyogs bcu kun tu kha bltas te// sus ma mthong bar khams gsum bza'// dri chu khyor ba gang dag ni// sum ma mthong bar thengs gsum btung// shin tu dben pa'i sa phyogs su// yan lag bzhi ni sa la gzugs// phag skad thengs gsum ngur bar bya// ru lu ru lu tshal pa tshal pa/kha ya kha ya/ rak+ta rak+ta/ b+han+d+ha b+han+d+ha/ ma tang kha ru shag/ kha kha khA hi zhes byang gi phyogs su kha bltas te/ gnod sbyin dbang du bsdu ba'i phyir// dri chen mdun du bzhag nas ni// mi skad thengs gsum bos nas na// ru lu ru lu kha long kha kha long kha/ ku ku rak+sha 'grin/ ha la ha la khA hi/ nyin dang mtshan du thug phrad du// rigs ma 'chol bar sbyor bar bya// skye bos mthong na dam tshig nyams// sus ma mthong na dngos grub yin// byang chub sems ni lce la bzhag/ dus dang rnam pa med par ni// sbyor ba kho nas las su bya// skabs la bab pa'i dus dus su// dur khrod gnas su byug par bya// zhing dang b+han+d+ha mang po bsogs// rang gi sman sangs gang yin pa// skye bo rnams la thag bsrings nas// srod dang tho rangs nam gyi gung// ro dang nyin phyed dgong ka'i dus// dbyangs kyi skad du shes par bya// dus drug kun tu rnge'u chung brdung// srod la 'khor gsum bro brdung ste// nub kyi phyogs su kha bltas la// rta skad 'tsher ba'i glu snyan blangs// ru lu'i bsnyen pa 'bum bzlas shing// snum chen gsur gyi spos me btang// nam gyi gung la mi nyal bar// phrin las gong ma bzhin du bzlas// byang gi phyogs su kha bltas te// dbyangs kyis shin tu brdung bar bya// de yang bsnyen pa gong ma bzhin// dus la bab pa'i bro mchod la// phyi nang drag tu mtshams bcad nas// rnge'u chung ldir ldir lan gsum brdung// dbyangs ni yid tsam gdung bar bya// de yang dus drug kun tu blangs// sha khrag gtor ma mchod pa bshams// glu bro shar gyi phyogs su dbul// gtor ma cha gsum btang ba yis// nyi ma phyed kyi dus su ni// lho yi phyogs su kha bltas te// grul bum skad ni gtso ru bya// phrin las dgongs pa gong ma bzhin// dngos mchod dus la bab pa'i tshe// sgrin po klog pa'i cho ga bya// ha cang skad ni mi che ba// de yang rnge'u chung dir dir brdung// dbyangs ni yid tsam gdung bar blangs// de yang dus drug kun tu yang// gsang ba'i mchod pa rgyun mi gcad// mi yi bu mo bsten par bya// lan 'ga' de dang ma ldan na// ku ku ra dang ra la sogs// ba dang bud med gang yang rung// shin tu dgon gnas med pa'i tshe// byes dang 'gron po byed pa dang// lus la sprul pa'i lha mo yis// sbyar ba'i dam tshig mi gcad do// 'di ltar byas na dngos grub thob// rgyun dang rgyun mi gcad par ro// sman ni lus la bsrel bar bya// sgrub pa chen po byed pa'i tshe// srog la bab pa'i gal yod kyang// dam bcas de ni ma byung tshe// mi dang 'phrad par mi bya ste// gtam dang kha rlangs 'dres pa bcad// de ltar byung na zhag gsum du// bdag gi phyag rgya 'bral mi bya// phyag nad dag gis 'chi bar 'gyur// las su dam rdzas bsags par bya// grangs ni tshad ni 'di ltar te// zhing pa pho nya bslab pa bzhin// b+han d+ha bcu gsum lcang lo can// dgu las nyung na 'gal bar bshad// dung chen mtshan dang ldan pa la// ngas thob pa yi yo byad rung// zhal bzhi'i gdong gas med pa la// kha dog tshon gyis mdog bsgyur te// yang na lnga'am drug tsam mam// min na dgu 'am bcu gcig go/ phyogs skyong gzhung dang mthun par bstan// mchog phur grangs kyang de bzhin te// thod pa bu ga med pa la// kha dog tshon gyis mdog bsgyur te// mthug srab chung ba'i zlum po ni// dkyil 'khor dbus su bzhag par shes// skyon med gzhan ni phyogs mtshams dgod// sman dang rak+ta dri chu dag/mAM sa dkyil 'khor khyab par dgram// stegs bu'i tshad ni 'di yin no// 'dom gang gru bzhi lham pa ru// dbus su 'khor lo zur drug bri// yang na pad+ma kha brgyad bri// bar khyams kun tu thod pa bri// sgo bzhi chu srin kha yang bri// thod pa'i phyi rim re re bri// de yi tha ma rdo rjes bskor// le'u tshe dgu pa yan chad bgyi'o// dbang chen 'dus pa'i tan+t+ra las/ gal po las rgyud kyi le'u ste gnyis pa'o//// thog mar gzhal yas khang bsgom ste// tshangs pa chen po mngon sum du// dmigs pa'i ting 'dzin sngags kyis bsgral// nyan thos mdo sde kri ya dang// theg pa chen po yo ga dang// gsang ba yi ni theg pa gsum// gzhung dang mthun pa'i gzhal yas khang// sgo bzhi rta babs mu khyud bcas// drag po khro bo'i khyams la sogs// tshangs pa'i gdung chen gshag tu gtams// yang na tshangs pa'i gzhal yas ni// brgya byin lha yi dbang po bsgral// khyab 'jug chen po 'khor dang bcas// theg mchog a nu yo ga yi// lugs las byung ba'i gzhal yas bsgom// yang na tshangs pa'i gzhal yas ni// theg chen rgyal po a ti'i gzhung// khyab dang gnas dang 'byung la sogs// rnam pa gsum pa'i gzhal yas khang// snod bcud 'byung ba'i yum du gsal// ting 'dzin gsal bas skad cig la// bskyed nas gsang ba yum gyi mkha'// b+ha ga dgyes pa'i ngang du bsgom// de yi dkyil du bdag po dmigs// de la rang bzhin med pa ste// nam mkha' lta bur rab rtogs nas// gzhal yas khang ni zhes gsungs so// dbang chen 'dus pa'i tan+t+ra las/ gzhal yas khang tshangs pa'i le'u ste gsum pa'o//// skal par ldan pa'i rnal 'byor pas// log rtog dngos po gzhom pa dang// cho 'phrul mngon du bstan pa'i phyir// hUM mdzad chen po'i tan+t+ra las// skal ba'i thog thos thog gsal ba'i// le'u dgongs pa'i rgyud dang mthun pa'i phyir// dang po ting 'dzin rnam gsum las// rgyu yi ting 'dzin hUM dmar gsal// de yi skad cig ting 'dzin las// kha dog lnga yi 'bru bsgom ste// dbang chen dkyil 'khor rim pa bzhin// kha dog gsum po'i 'bru nyid las// dbang po rkyen dang 'tshams pa'i gnas// thug pa med pa'i gzhal yas khang// chos kyi dbyings dang mnyam par bskyed// de yin nang du dmigs pa yang// cho ga gsum dang ldan pa'i hUM// de las zhe sdang rdo rje'i sku// rgyu las pad+ma he ru ka/ pad+ma shrI he ru ka/ ha ha hUM dza/ sa bon sngags kyis gsal bar gyur// hUM hrIHphaT/ A+oM a hrIHma dza dza hu lu dza shan bra be sha ya/ badzra badzra dz+wa la/ yak+sha badzra hUM b+h+yo/ badzra hUM/ A ra li a ling a hi ni sha tsa ta ka ba ma ti tsakra/ sku bskyed gsal bar gyur pa dang// log rtog gzhom phyir 'di gsungs so// thog ser 'bar ba dbab pa'i phyir// hUM/ dbang chen rgyal po thog thog 'bebs// hUM dang phaT kyis srid gsum 'khor ba 'jig/ hUM mdzad hUM gi byin rlabs bsam mi khyab// rdo rje khrag 'thung khrag gi rgya mtsho skem// rdo rje mtshon chen gnam lcags mthur 'dril ba// gsang sngags log par lta ba'i bdud rnams 'joms// 'jig rten 'di dang pha rol gnyis su yang// gdung ba sel cing dug gsum rtsad nas gcod// ma hA tsaN+Da sarba duSh+taM/ ta ka ha na pa tsa hUM phaT/ log rtog dregs pa bsgral nas kyang// rab tu rngam pa'i tshig gis bsngags// skrag cing dbang du 'dus par 'gyur// tshangs pa la sogs lha chen rnams// thog thog dbang gis myos gyur te// sems ni bla med gnas su spar// tsakra zhes ni sngags dag gis// dbang gi sku bskyed che btsan sku// shangs kyi sgo nas thog thog 'khril// 'khor ba lus kyi rnam rtog bcom// A+oM gyis nyes byas thams cad sbyangs// hUM gis sems kyi gzung 'dzin spang// swA yis nga rgyal ri bo bshig/ hA yis phrag dog gnas su dag/ khams gsum rgyud drug ma lus kun// ye shes mtshon cha thog thog gis// sgrol bar ma gyur cig kyang med// nan tan thugs rjes bskyed pa'i phyir// 'khor ba'i dong sprug chen po mdzad// mngon spyod ya mtshan chen po yis// mchog dang tsa ra 'byor tshogs la// nan tan gyis ni pra be sha/hUM gis rgyal sras gzhon nu'o// g.yung drung lta bu'i sku yang thob// 'du 'bral med pa'i dbyings su'o// de nas phung po bshig bya ste// lhag ma brgyad la bro brgyad brdungs// mgo la ling+ga gnon pa'i bro// tsit+ta 'khor ba'i bro mo che// rnam shes ta kr-ita brgyad bro'o// yan lag lha mo za byed stabs// nang khrol ngan song gnas kyi bro// g.yang gzhi ma mo 'khrug pa brdung// brla bzhir khro bo zil gnon bya// oM nA sha ya s+t+wam b+ha ya na/ yak+sha sum b+ha/ gan di ri ri sha/ b+han+d+ha di ri sha hUM kA ra pra be sha phaT/ b+ha ga wAn/ ma hA ts+tshin+da hUM ts+tshin+da hUM phaT/ kro d+ha ni kro d+ha ni hUM phaT/ tshogs dang gtor ma'i las kyang bya// thog mngon ser ba 'bebs pa yi// rdo rje dUr mo'i ting nge 'dzin// gsal nas sngags ni bzlas par bya// ma hA tsaN+Da sarba duSh+tAn/ ha na ta ka pa tsa hUM phaT/ dz+wa la raM/ raM dz+wa la hUM rak+Sha rak+Sha hUM raM/ dzi na ta mo raM/ ma hA ru lu sha/ e h+ye hi b+ha ga wAn/ gser la btab te gtor ma bya// de yi tshig kyang rab tu brjod// ang+ku sha zhes bgrang bar bya// las ni nges par bsgrub bya na// mkha' lding rdzas la dpang btsug ste// chu mig lkugs pa'i klu la gtad// thog thog 'bebs shing dgra bo 'chi// nges par 'di la the tshom med// dbang chen 'dus pa'i rgyud las/ thog 'bebs kyi le'u ste bzhi pa'o//// gnod sbyin phra men 'khor bcas kyis// bdag la rab tu gtses gyur na// dka' thub brtul zhugs smyon pa yis// sa yi 'og tu 'dom gsum bya// las kyi hUM zhes cung zad 'das// mAM sa dag kyang mang du bza'// nam mkha' las ni sems dpa' bsam// bgrang 'phreng klad la lan gsum bskor// de ltar byas na bdag rgyal zhing// nad gtong rnams ni 'chi bar 'gyur// khyi yi brtul zhugs chen po yis// ru lu ru lu kha tang kha/ ku ku rak+Sha rak+Sha g+h+r-i h+Na g+h+r-i h+Na/ha la ha la/ dz+wa la kha khA hi/ nyin dang mtshan du thug phrad du// rigs ma 'chol bar spyod par bya// skye bos mthong na dam tshig nyams// sus ma mthong na dngos grub yin// sbyor ba'i byang sems lce la bzhag/rang gis dben ri gang yin pa// skye bo'i gnas dang thags bsrings te// dgug pa'i brtul zhugs chen po yis// dbyangs kyang drag tu blang bar bya// bya yi brtul zhugs chen po yis// dbyangs kyang drag tu blang bar bya// rta yi brtul zhugs chen po yis// khams gsum dum bur gtub par bya// phag gi brtul zhugs chen po ni// srid gsum khron du brko bar bya// khyi yi brtul zhugs chen po yis// dmyal khams zas su za bar bya// srod dang tho rangs bro brdung pa// dka' thub smyon pa'i bro brdung ste// ru lu'i bsnyen pa 'bum bzlas te// gnod sbyin phra men 'khor bcas kyang// bdag gi de ni dbang du 'gyur// klu dbang gi skad byang du gzugs// khyi yi dka' thub smyon pa yis// nub tu rta skad 'tsher ba bya// rta yi bro ste dang po yin// nam gyi gung la phag skad dbyung// phag gi brtul zhugs chen po ste// gnod sbyin bran du 'khol ba yin// de ltar byas na brtul zhugs su// hUM zhes bya ba'i brtul zhugs kyis// hUM zhes bya ba'i dkyil 'khor kun// bdag gi lus la gzhug par bya// dus la bab pa'i bros mchod la// rnge'u chung lan gsum brdung bar bya// de nas dgra bgegs 'dul ba'i phyir// brtul zhugs ting 'dzin zhugs nas kyang// glu bro dam tshig bzhin du blang// sgrub pa chen po'i bar chod la// brtul zhugs chen pos bsgral nas kyang// dus gsum rgyal ba'i sras su bskyed// lho yi phyogs su kha bltas nas// grul bum skad du ku co 'don// dka' thub chen po yin pa'i phyir// su dang gtam yang de mi bya// smyon pa'i tshul du mchongs pa yis// gnod sbyin phra men rnams kyang brgyal// nam yang bdag gi dbang du 'gyur// nyan thos dbang du bsdu ba'i phyir// sngags kyi dka' thub chen po yis// bdud rtsi lnga la longs spyod bya// ma spangs par n-i dbang du bsdu// nan dbang drag shul smyon thabs su// su dang 'phrad pa sbyor zhing bsgral// 'di ni dpal gyi thugs dam ste// rgyun mi 'chad par spyad na ni// bdag gi ji ltar 'dod pa bzhin// dka' thub bsrungs pas dngos grub po// 'di la som nyi ci ste za// dbang chen 'dus pa'i tan+t+ra las/ dka' thub smyon pa'i le'u ste lnga pa'o//// skal dang ldan pa'i sgrub pa pos// klu rgyal zil gyis gnon pa'i phyir// gzhung las byung ba'i ting 'dzin bsgom// hUM las phyag rgya gdan dang bcas// dmar po'i dbu lnga phyag bcu drug/ gsal bar bsgom pa'i byin rlabs kyis// klu chen dbang du bsdu ba'o// phyag rgya klu rnams rab tu bsnams// de ltar gsal bas ma lus bsgral// klu yi rigs bcas dbang du bsdus// g.yas kyi dbang po bsnams pa ni// klu chen rgyal rigs dang du bsnams// g.yas kyi dang 'og dung skyong bsnams// de yi 'og ma stobs rgyu bsnams// 'khor ba 'di las sgrol ba'i bdag pos so// de yi 'og mas nor rgyas bu// 'og mas ma dros bu bsnams pa'o// sog ma med kyang rab tu bsnams// 'og mas stobs ldan rab tu bsnams// 'og ma nyid kyis gzi ldan 'dzin// g.yon gyi phyag na 'dzin pa ni// thog mar kar ko Ta bsnams pa'o// 'og mas blta na sdug kyang 'dzin// 'og mas stobs rgyu rab tu bsnams// 'og mas zla ba can yang 'dzin// 'og mas dung skyong rab tu bsnams// 'og mas gang ba bzang po ste// de 'og nor bu'i mgrin yang bsnams// klu yi rgyal po de rnams ni// snying gar dbang gi zhabs kyis brkyang// tsham rngams stabs dang chas pa'o// rdzogs pa chen po yin pa'i phyir// sku bskyod 'og tu gzhal yas khang// sbrul nag grub pa'i 'byam klas pa'i// mtha' dang mnyam par dmigs par bya// de yi dbus su bsgom pa yang// gtso bo yab yum 'khor dang bcas// hUM las rdzogs pa'i tshul du bskyed// de nas gsang ba'i bsnyen pa dbul// bsnyen pa'i sngags ni 'di dag ni// pad+ma ma hA shrI he ru ka/e ga de ma hUM sa ma ya ho// nA ga pra be sha dza zhes bya/ rdzu 'phrul mchog dang phyag rgya dang// drag po'i phrin las nyi tshe ba// sgrub pa'i dus su klu yang bsgom// bsnyen pa chos kyi dbyings nas grangs// rdzu 'phrul 'phrog phyir bsnyen par zhugs// klu rnams dbang du bsdu ba'i phyir// mgrin sngon la sogs rnam shes ni// gser zhun lta bur gyur nas ni// gzi ldan b+ha ga'i dbyings su blan// gnas kyi rang bzhin lhun gyis grub// sku yi gshog pa mkha' dang mnyam// bar nas gser gyi me tog 'phro// bye mas 'jigs zhes de la sngags// khyung ltar gnas pas klu chen gnon// dbang du gnas pas klu rgyal 'dul// rdzu 'phrul phrogs pas dngos grub thob// klu'i le'u zhes pa brjod// dkyil 'khor bsdu ba snga ma bzhin// hUM gi spro bsdus dbyings su bstim// dbang chen 'dus pa'i tan+t+ra las/ klu rgyal rdzu 'phrul gyi le'u ste drug pa'o//// tshangs pa gnas kyi pho brang gis// tshangs pa dbyangs kyi klu drug ni// breng nge ba dang dung nge ba// shad+ha ba dang gardza ba// cang kar de dang pang ka de// glu drug blangs las don drug 'grub// breng nge ba yi glu blangs pas// tshangs pa lha yi dkyil 'khor nas// sku yi dngos grub chen po thob// dung nge ba yi glu blangs pas// brgya byin lha yi dbang po yi// gsung gi dngos grub chen po thob// sha d+ha ba yi glu blangs pas// rgyal po chen po bzhi rnams kyi// yon tan chen po'i dngos grub thob// gardza ba yi glu blangs pas// phyogs skyong chen po bcu rnams kyi// yon tan chen po'i dngos grub thob// cang ka de'i glu blangs pas// 'bum phrag yangs pa'i mkha' 'gro ma'i// dngos grub brlabs chen 'khrigs pa thob// pang ka de'u'i glu blangs pas// srid pa dbang sdud bro mo che// dregs pa'i yul dag dbang du sdud// pad+ma gar gyi bro drug ni// bdud bzhi thal bar brlag pa ni// 'khor ba'i phyi nas 'dren pa'i bro// breng nge ba yi glu dang sbyar// sdug bsngal nad sel thugs rje'i bro// dung nge ba yi glu dang sbyar// thugs dam dbyings su bskul ba'i bro// sha d+ha ba yi glu dang sbyar// ye shes rgyan gyi bro mo che// gardza ba yi glu dang sbyar// tshangs pa dbyangs kyi glu dang sbyar// ma mo 'khrugs pa'i bro mo che// cang ka de'u'i glu dang sbyar// lang+ka bsgral ba'i bro mo che// pang ka de'u'i glu dang sbyar// tshangs pa dbyangs kyi glu blangs nas// pad+ma gar gyi bro brdungs pas// khams gsum ma lus dbang du 'gyur// dbang chen 'dus pa'i tan+t+ra las/ bu mo drug gi glu blangs kyi bro zhes bya ba'i le'u ste bdun pa'o//// stong gsum 'jig rten rab 'byams kun// mthu chen lang ka'i rgyal po yi// khyad par rdzu 'phrul rnam 'phrul te// gnyen por gyur pa gzhan med nas// gzhan las bzang ba'i tan+t+ra las// nges pa'i lung du gsang ba'i le'u// lang ka gnon pa zhes kyang bya// srin po mnan phyir 'di gsungs so// dang po ting 'dzin rnam gsum las// rgyu yi ting 'dzin dmigs pa yang// cho ga gsum dang ldan pa'i hUM// 'phro 'du rdo rje rab tu dmigs// de las gar yi glu gsal zhing// dbu lnga bcu drug bsgom pa yang// snying po sngags kyi 'phros par bsgom// hrIHphaT oM AHhUM/ lu raM a badzra e A ra li dza// de las spro bsdu gsal ba las// rgyu ru brtan par gyur pa dang// nyid kyis 'dul bar zhal 'ches te// sdigs mdzub nam mkhar phyar ba yang// bskal pa'i me lce 'bar ba las// a la la yi thog thog 'khrugs// de yang thugs rje gsang ba'i thabs// klu dang nam mkha'i snying nas 'dren// sgrol sngags drag pos rab tu bsgral// 'dren pa'i snying pos tsit+ta phyung// srin po bzhi yang rnam par sprul// me sbrul rnams su de bzhin te// phung po las ni gzhal yas khang// tshogs brgyad dur khrod brgyad du grags// bka' dang mthun pa'i gzhal yas su// rgyan dang cha lugs gsungs pa bzhin// de yi nang du dmigs pa yang// 'khor lo 'bar ba'i gzhal yas bsgom// gsang ba'i rdzas dang mchod par bcas// 'khor lo yon tan bsam mi khyab// lce la rtsibs dang gru chad dang// mu khyud bar khyams sgo khyud bcas// sbas shing dbyings su bstim byas te// dbyings nas 'bar ba'i sku yang bskyed// skad cig ma yi ting 'dzin las// hUMM las sku bskyed 'bar ba yis// klu dang lang ka bcad gtub ste// nyon mongs lnga yang gnan par bya// de ltar bzlas nas mnan nas kyang// 'khor gyi lha mos bstod pa gsungs// bsdu bar bya ba'i lung du grags// 'bar ba'i zhabs gang 'od lta bu// mchod rten chen po bzhi la 'dus// long ba'i tshogs la rim pa bzhin// nga su ra bzhin bdag nyid de// skye ba med pa'i dbyings la bsdu// dkyil 'khor bsdu bar gsungs pa yi// mchod rten sgo khyud rim pa bzhin// de nas bsgrub rdzas bsu ba yang// sha khri mnan pa'i khrag la bsu// khrag dang tsan ni snga ma bzhin// las kyi gnan pa bya ba'i phyir// spro ba'i thabs ni 'di dag go/ sku gsung thugs dang phyag rgya 'phro// mtshon cha la sogs snga ma bzhin// las kyi rnam pa bya ba'i phyir// klu dang srin po mnan pa'i thabs// hom khung dag tu mnan pa'i phyir// ling+ga'i gnas su mnan par bya// me lha gzhung bzhin bsgoms la bzhag/ rab gnas sbyin sreg bya ba'am// rnga yi rol mos drangs te bya'o// mi mthun phyogs bzhi hUM du gtams// dkyil 'khor bsdu ba bstan pa'i phyir// sgo lnga la sogs dbus nas len// dbang chen 'dus pa'i tan+t+ra las/ lang+ka'i le'u ste brgyad pa'o//// thod rgal 'jigs pa'i phrin las kyis// rnal 'byor dgra bo 'dul ba'i phyir// rgyud las 'byung ba'i nges pa'i lung// 'di dag gis ni bkres skoms 'joms// bde ba chen pos thugs rje'i le'u// phra men rngams thabs zhes kyang bya// de la nyi ma 'bum gyis rab bskor ba// srid gsum ma lus bsreg pa'i dbang dang ldan// sprin med gsal ba'i 'od zer 'bar ba 'phro// de steng pad+ma kha stong ldan pa las// rdo rje rtse gcig pad+ma'i snying por gnas// de dbus hUM las byol song skye gnas 'jom// 'di ni gsal byed nyi zla 'od kyi lung// pad+ma'i lte bar gnas pa'i rdo rje'i dkyil// hUM las 'od 'phros mi rnams bag chags sbyangs// 'khor lo rtsibs stong ldan pa'i hUM du grags// de'i steng b+huM las yid bzhin gzhal yas khang// rgyal chen phyogs skyong la sogs ka dang gdung// me ri thod phreng la sogs sbrul gyis brgyan// de'i dbus rdo rje sems dpa'i phyag rgyar gsal// de ni rdo rje sems dpa'i lung du grags// de las hUM gi 'od zer gsal ba las// zhe sdang rdo rje'i sku ru thun mong bsgoms nas kyang// shangs nang khro bo hUM drug sgra 'thon pas// rgyud drug gnas pa'i 'khor ba'i rtsad gcod do// spros nas rim pa bzhin du thim byas nas// khro bor gyur pa'i hUM gi le'u'o// hUM de las 'bar ba'i sku bskyed gsal ba las// ljags kyi dkyil du hUM las rin po che// A+oM la sogs pa'i 'phro 'du las// dpal chen 'bar ba'i skur gsal te// khang bu lnga dang ldan par dmigs// de dbus rta mgo ljang gur bsgom// sbrul nag stong gis rgyan du mdzes// thod pa tshar gsum brjid par ldan// zhing lpags g.yas na sham thabs can// phyi nang gshog pa nam mkha'i mtha' dang mnyam// gsang ba'i lha mo rdo rje dra ba can// 'gro ba ma lus dbang du sdud pa'i yum// bcu drug phyag na mchod cha sna tshogs bsnams// zhe sdang gdug pa'i dgra bgegs mang po 'dul// zhabs kyi chas dang khro bo brgyad gnon sbyor// dpa' bo la sogs ting 'dzin brgyad dang sbyar// 'khor gyi me 'brug rlung 'brug la sogs ni// rang sngags snying pos phyogs mtshams thim par ro// klu 'brug sngon po rtsa ba'i sngags kyis bsgom// rlung gi sha ba ljang gu rab tu sngags// long ba rgyab 'brel mang po dmigs pa yang// yang sprul bya ba 'bum dang bcas pa ste// phyogs bzhi nas ni rnam par 'khrugs pa'o// phyi rim dmus long 'khor ba can// shwa ri ka li sgras bskyed cing// mtha' dbus med par khyab pa'o// kham rgya chen mo drug rnams ni// dkyil 'khor grwa rnams su yang gsal// ye shes dpal gyi khyi brgyad ni// phyogs bzhi dang ni mtshams nas dgyes// ma lus dgra rnams mche bas gcod// phyi rim lcags kyi spyang mo brgyad// dgra bo rnams la rbad par bya// de ltar phyag rgya rdzogs pa dang// sku nyid 'khor la sbas pa ste// phyogs bzhi dbus lnga khang bur sba// rta mgo la sogs rim pa bzhin// de yang chos kyi dbyings su bsdu// da ni phur pa'i las bya ste// rgya mdud 'khor lo'i tshul du sba// spyi bor pad+ma khrag 'thung ste// zur brgyad logs brgyad rgyab 'brel tshogs// rgya mdud 'og mar dmus long dmigs// rtse mor lcags kyi khyi mo bsam// ngos la lcags kyi spyang mo ste// rtse mor khro bo dmigs bya la// mgo dgu brtsegs pa zur la'o// da ni bsdu bar bya ba yang// sgo srung spyang mo nyid la'o// spyang mo zhabs kyi chas brgyad la'o// spyang mo rnam shes brgyad po la'o// de yang dur khrod brgyad la 'dus// dur khrod ye shes chen po ste// de yang mi gnas ye shes la'o// me 'brug gshog pa nyid la 'dus// gshog pa sku yi rgyan la'o// de yang tshon sna lnga la 'dus// tshon sna dbu rgyan lnga la'o// de yang rin chen khang bu ste// de yang sku gsung thugs la bsdu// de yang chos kyi dbyings su bsdu// dbyings kyang kun gzhi nyid du ste// mi dmigs chos sku chen por gnas// dbang chen 'dus pa'i tan+t+ra las/yan lag spros pa'i le'u ste dgu pa'o//// A+oM d+harma d+hA tu b+ha ga maN+Da la gu h+ya si ti hUM zhes brjod pas/ rin po che'i gzhal yas khang nam mkha' dang mnyam pa gcig bsgom/ yang 'od zer grangs med pa gcig 'phros nas yang 'dus pa las// badzra satwa hUM/ ya tha badzra sarba ta thA ga ta/ ta thA a hUM zhes brjod pas/ bcom ldan 'das rdo rje sems dpa' dbu gsum phyag drug pa/ g.yas dang po rdo rje bar ma 'khor lo/tha ma rin po che/ g.yon dang po dril bu/ bar ma pad+ma/ tha ma ral gri sku rnams rgyan thams cad kyis brgyan pa zhig bsgom/ hUM drag tu brjod pas lha'i shangs nas/ hUM dmar po 'jig rten gyi khams gang bar bsgom/'phros 'dus pa las 'di skad do/ hUM gis srid gsum ma lus dbang du bsdus/ hUM gis nyon mongs dug gsum mun khang 'joms/ hUM gis thams cad 'jigs shing thams cad bsdu/ hUM gis bla med byang chub gnas su sgrol/hUM gis ngan song gnas kun stongs par byed/ hUM gis dus gsum rgyal ba thams cad bskyed// A+oM pad+ma shrI he ru ka/ pad+ma da ra hrIM zhes brjod pas/ bcom ldan 'das pad+ma he ru ka sku che la yan lag rags pa/sku mdog nyi ma dmar thag 'dra ba/ dbu lnga phyag bcu drug pa zhabs dmar po brgyad pa zhig gsal bar bsgom/ de nas lag pa g.yon pa'i mdzub mo bsgrengs nas/ khams gsum sdigs par byas nas 'di skad du/phyag rgya chen po 'dis bcings la// khro rgyal dkyil 'khor thams cad kyis// bdud ni rnam par sdigs zhes bya// phung byed thams cad 'jigs par byed// bdud dang mu stegs thams cad 'jigs par byed// bgegs dang log 'dren thams cad 'jigs par byed// thams cad ma lus dbang du sdud/ oM pad+ma shrI he ru ka/ da sha pa la te dzo ba le ma ma he me dra/ dpyid ka ste pa pa shang ku ru hUM zhes brjod pas/shar dri za/ lhor gshin rje/ nub klu dbang/ byang gnod sbyin la sogs pa rnams/ gcer bu lhags pas btang ba bzhin/ rdzu 'phrul bsnyen cing mthur ldan pas// thugs rje chen pos nan tan gyis// rgyud drug gnas su bsgral ba dang// sdang ba'i dgra bgegs gsad pa'i phyir// pha rol snying dag dbyung bar bya// dmar chen khrag dang bcas pa yang// zhal du gsol zhing 'dren par bya// dmar 'byin le'u zhes de la sngags// rdzogs pa'i ting 'dzin skad cig mas// bdag nyid phyag rgya'i skur bsgoms la// hUM zhes pa ni rdzogs pa'o// dbyings las ye shes gzhug tshul du// du mar brjod cing drang bar bya// khA hi raM las 'od 'phros 'dus// dza yi lcags kyus drang ba yang// rdo bar lcags ni 'du tshul du// du mar brjod cing drang bar bya// bdag gi phyag rgya gsal ba dang// 'dren zhing sgrol ba'i pho nya ni// gang yang rung ba'i sems can de'i// lus ngag yid la rbad par bya// rta mchog rol pa'i shangs lnga yang// rlung gi mgo la spyang ki'i gdong// mche ba bdud kyi snying rtsa gcod// rna ba sbrul gyi 'dzul khung nas// sbrul gyi mi la spyang ki'i gdong// kha rlangs sprin gyi dkyil 'khor nas// 'od kyi mi la gzha' tshon gdong// ral pa khrag gi zar bu la// khrag gi mig la spyang ki'i gdong// spyan mig gru gsum 'bar ba la// zangs kyi mi la spyang ki'i gdong// kha la ro sha rbad/ dgung tri dun dun rbad/ gang la bya ba'i sems can de'i// lus ngag yid la rbad par bya// bdag nyid phyag rgyar gsal ba dang// 'dren cing sgrol ba'i pho nya ni// gshog pa rdo rje gdengs pa yis// pho nya yid mgyogs rlung bas myur// lcags kyi mig la mkha' gshog can// phyag ni bcu drug 'bar ba las// lcags kyi khyi mo brgyad sprul pa// lcags gshog khyung gi 'dab ma can// sku gsung thugs las sprul pa ni// la la byan lag mgo bo la// lus ni lcags kyi spyang mor sprul// la la khyung gi mgo bo la// lus ni zangs kyi wa mor sprul// la la khra yi mgo bo la// lus ni dril nag rkang gsum pa'o// la la khra yi mgo bo la// lus ni sdig pa rkang gcig pa// la la chun lag mgo bo la// lus ni dung gi spyang mor sprul// la la chu byi'i mgo bo la// lus bo bcu drug tshang mar sprul// la la bzhad kyi mgo bo la// lus ni byi ru'i seng ger sprul// la la kang ka'i mgo bo la// lus ni lcags dri'u rkang gsum po// la la 'ug pa'i mgo bo la// lus ni dung phag dkar mor sprul// la la pu shud mgo bo la// lus ni lcags kyi sdig par sprul// la la mthing ril mgo bo la// lus ni drel nag rkang gsum pa'o// la la skyin gyi mgo bo la// lug ni byi la rtsal po che// la la bya rgod mgo bo la// lus ni gser stag ser por sprul// gang la bya ba'i sems can de'i// rgyud drug 'khor ba'i rtsad bcad nas// dmyal khams bcu drug khrims bsad de// thugs rje chen pos byin brlabs te// 'di la byin gyis brlabs nas kyang// dmar ser 'byin pa'i pho nya 'gyed// dus las ma g.yel phrin las mdzad// bdag kyang phyag rgyar gsal byas la// gnod sbyin pa yi gsang sngags bzlas// las 'grub pa la the tshom med// rdo rje sder mo can gyis gsang sngags kyis drang ngo// dbang chen 'dus pa'i tan+t+ra las/ dmar byin gyi le'u ste bcu pa'o//// skal bar ldan pa'i rnal 'byor pas// rigs gnyis lung gi brgyud pa'i lung// chos kun gnyis med mnyam pa las// 'dzin rtog dngos po tha ba ni// zhing la gnas 'gyur gsungs pa ni// gdeng dang ldan na tha dad med// sa bon las ni 'bras bu'i tshul// rtog pa'i klong du 'dres pa las// 'grub 'gyur 'di la the tshom med// snang mdzad las gyur kun tu gzigs// byang chub sems dpa' nyid la rdzogs// mi bskyod pa sogs shar du'o// rin chen 'byung ba lho nyid do// mtha' yas la sogs nub tu'o// don yon byang gi phyogs su 'gyur// 'byung ba yum gyi gnas gyur pa// sa bon las ni myu gu'i tshul// bzang mo las gyur gzi dang ldan// spyan ni 'gyu ba glog 'gyu ste// mA ma kI ni dra ba 'gyur// na bza' dkar mo sder mo can// sgrol ma las byung gshog pa can// yab yum bcu ni rab sbyor te// skyes pa'i dbyings su bstan pa las// byang chub sems ni chags pa'i gzhi// rta mgo ljang gu yin par grags// dbu lnga ye shes lnga yi dbyings// sems dpa' brgyad 'tshar dmus long tshogs// sems ma las gyur rgyab 'brel te// sems dpa' sems ma ldan sbyor bas// byang chub sems ni chags pa'i rgyu// mkha' la 'phros pa'i 'od zer ni// sprul pa yin par spyang mo brgyad// dbyings su 'dren pa'i ye shes kyi// lcags kyu la sogs sgo ma bzhi// bsgyur bas dbu dgu rab tu brtsegs// sprul sku thub drug las sprul pa// kham rgya dag tu sprul pa yin// gnas ni ma nor chos kyi dbyings su don rtogs na// dbyings la ye shes rol pa ni// gnas 'gyur mchog gi le'u zhes bya// zhi ba mi g.yo chos sku las// khro bor gyur pa'i dkyil 'khor 'dir// ston pa'i bka' dang mi 'gal bar// phyi rabs rnal 'byor skal rab la// nges pa'i lung du brtsams pa ste// rtogs na the tshom med par 'grub// dbang chen 'dus pa'i tan+t+ra las/ zhi ba gnas 'gyur mchog gi le'u ste bcu gcig pa'o//// rig 'dzin dbang phyug chen po yi// snyan khung brgyud nas 'gro don du// khrag 'thung chen po hUM gi le'u// blta ba chen po 'di gsungs pa'o// hUM las 'byung ba yum gyi dbyings// gzhal yas hUM nyid b+ha ga'i klong// 'dus ma byas te rnam par dag/ hUM las khrag 'thung rigs bzhir 'bar// spros med thig ler gnas pa'i phyir// ma bcos lhun gyis grub par gnas// ma tshogs hUM gis dbang phyug ma// seng ge lta bu'i sgra sgrogs shing// sgra nyid sgra ltar stong ba'i phyir// stong pa'i ye shes rnam par dag/ mnga' bdag chen po hUM nyid de// thams cad yongs su khyab pa'i phir// thugs rje'i nyi ma rnam par dag/ hUM las pad+ma kha stong ldan// gsang ba b+ha gar lhun gyis grub// nyi zla dum bur brtsegs pa yang// shes rab thabs su 'brel ba yi// phyag rgya bskyod pa'i dkyil 'khor che// hUM las zhe sdang rdo rje'i sku// 'bar byed chen por gyur pa ni// skye med chos dbyings rnam par dag/ sprul pa'i 'khor tshogs thams cad kyang// ye shes thugs kyi rang bzhin te// thig le hUM las rgyan gyis bye brag rnams// dbyings las ye shes 'jug par byed// dbyings nyid lhun gyis grub pa'i rgyan// hUM las 'bar ba'i skur gyur pas// chos sku gcig pur sbyor ba'i don// hUM las dbu lngar snang ba ni// ye shes lnga nyid dbyings la byon// hUM las spyan lngar grags pa yang// dbang po yul lngar rnam par grags// hUM las ljags lngar grags pa yang// dbang po ro la sbyor ba'o// hUM las shangs lnga'i 'tshubs ma yang// dbang po dri la rnam par dag/ hUM las snyan lngar gsan pa yang// ma 'gags sgra la ci bder sbyor// hUM las zhal lngar gdangs pa yang// srid gsum dbyings su za ba'o// hUM las rta mgo ljang gu yang// tshangs pa dbang du bsdu nas ni// ma chags dbyings la ye shes rol// e ma ho ya mtshan dbang gi sku// sna tshogs cir yang ston mod kyi// spros med thig le rnam dag pas// 'di ni rnam dag hU~M gi le'u'o// thams cad stong pa'i dbyings su blta// dbang chen 'dus pa'i tan+t+ra las/ khrag 'thung gi le'u ste bcu gnyis pa'o//// skal dang ldan pa'i rnal 'byor pas// 'gro drug thabs kyis 'dul ba yang// ngan song gnas nas 'dren pa'i phyir// bskyed rdzogs chen po 'di gsungs so// ting 'dzin bskyed pa'i sa bon sngags// e dang yaM sogs rim pa bzhin// ma nor tsam du bsgom par bya'o// b+h+rUM las rin chen gzhal yas khang// rin chen rgyan la sogs pas mdzes// de yi nang du dmigs pa ni// tsakra la sogs 'khor lo che// rtsibs dang rtsibs kyi mu khyud dang// lte ba bar khyams sgo khyud sogs// rdo rje dbyings kyi dkyil 'khor ldan// lte ba zlum por gyur pa la// dpa' bo hUM las rdo rje che// de las phyag rgya bskyed pa ni// zhe sdang rgyal po rnam par bsgom// 'khor lo mdun gyi dang po ni// dpa' bo oM las 'khor lo che// ma skyes pa las phyag rgya'i sku bskyed pa// gti mug rgyal po rnam par bsgom// g.yas su lta ba'i 'khor lo la// dpa' bo swA las rin chen che// de la phyag rgya'i skur bskyed pa// nga rgyal rgyal po rnam par bsgom// nub tu lta ba'i 'khor lo la// dpa' bo A+oM las pad+ma ste// de las phyag rgya'i skur bskyed pa// 'dod chags rgyal po rnam par bsgom// g.yon gyi rtsibs la dmigs pa ni// dpa' bo hA las rgya gram ste// de las phyag rgya'i skur bskyed pa// phrag dog rgyal po rnam par bsgom// dpa' bo 'bru lngar gyur pa'i sku// yab yum phyag rgyar sbyor ba las// byang chub sems kyi sa bon ni// dbang chen pad+ma gar gyi sku// rdzogs pa chen po bsgom pa yang// dpa' bo lnga las bskyed pa ni// rtags su dbu lnga rab tu brtag/ hUM las kun tu thal ba'i dbu// 'dod khams dbang du sdud pa'o// oM las dri za gnon pa'i dbu// swA las grul bum dbang du sdud// AM las klu yang grol bar byed// hA las gnod sbyin dbang po 'dul// thar ba brgyad dang ldan pa'i zhabs// khro bo brgyad la khyab par sbyor// bkra shis yum dang sprul pa'i 'khor// dbang chen sku la yongs su rdzogs// dbang chen 'dus pa'i tan+t+ra las/ bskyed rdzogs kyi le'u ste bcu gsum pa'o//// thugs rje byin rlabs rmad po che// 'jig rten yongs grags mdzad pa che// sngon gyi las dbang drag po yis// gzung dang 'dzin pa'i rnam rtog dang// lhan cig ldan pa'i bag chags rnams// mnan pa'i don du 'di gsungs so// mtshan yang gdon gzir drag po'i le'u// phyi rabs sngags 'chang rnal 'byor pa'i// don du cho ga 'di rnams so// na sha s+t+waM b+ha na d+ha yak+sha sum+b+ha na/ gan+da ri ri sha shan+da re sha ma ma tsa dur nan/ sum+b+ha ni sum+b+ha hUM/ skad cig ma yi ting 'dzin gyis// 'bar ba chen por bdag bskyed la// lnga dang bcu drug phyag char ldan// ting 'dzin brgyad kyi byin rlabs las// dmar pa'i mdangs dang ldan pa'i zhabs// bag chags mi ldang gnon pa'i phyir// tsham rngams chen po 'di skad brjod// mtshungs med che ba'i khyad par rab ston cing// nga rgyal dpa' bsnyems bdud kyi dpung bcom nas// 'jig rten 'das pa'i khro bo brgyad// che ba'i rtags dang ldan pas dbang phyug yang che mnan// bdag nyid chen por gsal ba las// zhabs dmar po brgyad 'bar ba'i chas dang ldan par dmigs la/ 'di skad ces bskul zhing gzir bar bya'o// 'dul ba'i zhabs brgyad phyogs mtshams brgyad du bgrad// snying gar mkhrig ma nub phyir sgal rtsib khong du 'joms// sdug bsngal nyam thag 'bod sgrog di ri ri// zhes brjod pas/ tsham rngams chen po dang bcas pas/ lan cig gzir bar bya'o// gdul ba'i zhabs gcig shar du bgrad// dpa' bo stag gi chas dang ldan// hUM kA ra la rnam par gzir// tsham rngams chen po mnyam par sbyor// gdul ba'i zhabs gcig shar lho mtshams// gnod gdug zlog byed lcags dang ldan// Ar+ya a tsa la nub par gzir// tsham rngams chen po mnyam par sbyor// gdul ba'i zhabs gcig lho phyogs su// shes rab ting 'dzin chas dang ldan// ya mAn+ta ka'i snying gar gzir// tsham rngams chen po mnyam par sbyor// gdul bya'i zhabs gcig lho nub mtshams// dbang gi bse khrab chas dang ldan// nI la daN+Di'i snying gar nub// tsham rngams chen pos mnyam par sbyor// gdug pa'i zhabs gcig nub tu bgrad// dpa' brjid sbrul gyis chas dang ldan// pad+ma kuN+Da li yi snying gar nub// tsham rngams chen po mnyam par sbyor// gdul bya'i zhabs gcig nub byang mtshams// dmar gsal che ba'i chas dang ldan// TAk+ki rA dza'i b+han+d+ha mnan// mche bas phye ma bzhin du btags// tsham rngams chen po mnyam par sbyor// gdul bya'i zhabs gcig byang du bgrad// mnyem lcug chu skyes chas dang ldan// oM mr-i ta mgrin sgal rtsib bcom// tsham rngams chen po mnyam par sbyor// gdul bya'i zhabs gcig byang shar mtshams// gtum chen gzig gi chas dang ldan// ma hA ba la'i ldan par gzir// 'khor rnams dbang du bsdus nas kyang// tsham rngams chen po mnyam par sbyor// hUM kA ra pra be sha phaT nan/ ar+ya a tsa la pra be sha phaT nan/ ya mAn+ta ka pra be sha phaT nan/ nI la daN+Da pra be sha phaT nan/ pad+ma kuN+Da li pra be sha phaT nan/ DAk+ki rA dza pra be sha phaT nan/ a mr-i ta kuN+Da li pra be sha phaT nan/ ma hA ba la bra be sha phaT nan// phyag rgya chen po'i skur bsgoms la// gzir gnon drag po'i las byas na// sdug bsngal chu bo'i rgyun skam pa// sngon gyi rgyal ba rnams kyi bka'// zhi bas thams cad tshim par brjod// rgyas pas ma lus mngon sangs rgyas// dbang du ma bsdus gang yang med// mngon spyod byin rlabs rmad po che// thabs la mkhas pa'i mdzad spyod kyis// bsad cing mnan pa ma lus kun// phra mo'i sku med sku don byas// slar 'dus chos kyi dbyings su thim// dmigs su med pa'i chos skur bsgom// dbang chen 'dus pa'i tan+t+ra las/ gdon gzir drag po'i le'u ste bcu bzhi pa'o//// rgyud la goms shing don la yid ches kyang// dbang bskur dbang rtags lag tu ma byin na// nor bu'i rgyal sa zin par ga la 'gyur// de bas dbang gi khyad par 'di gsungs so// rnam grangs bcu po 'di dag ni// rgyal thabs spyi blugs theg pa'i dbang// bskur ba tsam gyis thob pa'o// de la thabs gang gis dbang ba dang/ don ched ci la dbang ba dang/dbang gi dngos gzhi bstan pa dang/ dbang gi grangs bstan pa dang/ dbang gi rtags bstan pa dang// dbang yul spyi la bsgyur bas bstan pa dang/ dbang bskur ba'i thabs bstan pa dang/ dbang gi khyad par dang/dbang gi man ngag dang/ dbang gi yon tan bstan pa'o// de lta bas na phyi nang gsang ba'i theg pa'i rim pa ji snyed gsungs mod kyang/ de'i nang nas 'bras bu'i theg rgyal gsang sngags zhes/ 'bras bu'i theg rgyal nang nas dbang bskur gces/shes dbang med rlom sems kyi sa// kha cig ya ma brla dang gsob 'dra la// don dang ldan pa'i skyes bu dbang chen la// rtags dang 'brel pas dbang bskur shin tu rigs// dbang med kha cig rang dbang zos gyur cing// thug thub khong longs shes thob chod bzhag nas// tshe gzhi med bzhin yod pa'i las spyod pa// ngan song gsum gyi sa bon 'di yin pas// srid lam 'khyams shing chos lam ring pas na// bka' la brten nas dbang med bka' rkun la// dbang lung tshad mar gyur pa'i skyes bu yis// bskur yang mi thob nong bu'i spyod pa bzhin// thob par mi 'gyur chags par mi 'gyur ro// dbang chen 'dus pa'i tan+t+ra las/ dbang gi khyad par gyi le'u ste bco lnga pa'o//// rmad byung byang chub sems kyi le'u// 'bar ba'i dbu lnga rmad du byung ba ni// ye shes lnga dang yab lnga dbang por sbyor// mnyam pa chen po'i ngang du lhan ner bsgom// 'bar ba'i ral pa rmad du byung ba ni// dbyings las ma g.yos chos sku mnyam pa la// khro bo mun dza'i cod pan bye ba 'bum// sprul sku'i 'gro drug sgrol bar lhan ner bsgom// 'bar ba'i shangs lnga rmad du byung ba ni// dbang po dri dang gnyis med sbyor ba yis// gsung ba mchog gi bye brag so sor yang// tshor pa nyams su myong zhing tshim gyur nas// skye 'gag med pa'i ngang la lhan ner bsgom// 'bar ba'i snyan lnga rmad du byung ba ni// gsan pa ma 'gags sgra mtha' so so yang// de nyid sgra mtha' stong pa chos kyi sku// med la zad med shes par lhan ner bsgom// 'bar ba'i zhal lnga rmad du byung ba ni// hom lnga 'brel pas sdug bsngal bsreg pa'i phyir// 'bar ba'i me dpung rab tu 'phro ba yi// sprul pa'i 'phro 'du nyid du snang mod kyi// gar yang ma 'phros dbyings su lhan ner bsgom// 'bar ba'i ljags lnga rmad du byung ba ni// bden pa'i don ston gsung rab mang po 'chad// sde snod rgyud la rmongs pa mi mnga' ba'i// le brgan ljang nag sgrol bar bsgom// 'bar ba'i ag tshom rmad du byung ba ni// chos sku mtshan ma med pa'i ngo bo las// gzugs sku gzha' tshon lta bur sprul par bsgom// 'bar ba'i tshems lnga rmad du byung ba ni// 'khor ba rtsad gcod ye shes chen po lngas// skye med don rtogs dbyings su bzhugs pa'i phyir// ma g.yos chos kyi dbyings su lhan ner bsgom// 'bar ba'i phyag mtshan rmad du byung ba ni// rdo rje lcags kyu sbrul gyi zhags pa dang// khro chen snying 'byin rdo rje kha T+wAM 'dzin// thod rlon khrag dang rdo rje lu gu rgyud// rdo rje be con dang ni rnge'u chung 'dzin// me yi zhags pa dang ni khyung gi khra// sdigs mdzub rtse la me 'bar khaT+wAM 'khrol// rdo rje rtse lnga rtse dgu pa dang ni// rtse gsum rtse gcig 'bar ba gsor zhing brdeg/so so'i phyag mtshan mngon du gsal ba yang// snang tsam nyid la rang bzhin med pas na// stong pa chen po'i thig le sa ler bsgom// 'bar ba'i sku rgyan rmad du byung ba ni// rdo rje rin chen las byung gshog pa dang// thod rlon sbrul dang glang chen stag la sogs// rngom brjid ldan pa'i cha lugs cir ston pa// nam mkha' lta bu'i dbyings su lhan ner bsgom// 'bar ba'i zhabs lnga rmad du byung ba ni// phyin ci log pa'i dngos po gzhom pa ni// rdo rje mtshan ma sna tshogs mtshan med pas// so so'i na bza' go cha ci 'dra ba// ye shes dbyings la sbyor ba nyid du bsgom// 'bar ba'i gdan khri rmad du byung ba ni// gzhan gyi dngos grub bdag gir bya ba dang// mnyam pa chen po'i don la dgod pa'i phyir// dbyings dang ye shes gnyis su med par bsgom// 'bar ba'i gzhal yas rmad du byung ba ni// sna tshogs mang po'i rgyan dag dgram pa yang// nam mkha'i mtha' dang dbyer med stong pas na// spros med thig le byang chub sems su bsgom// de ltar bas na rmad du byung ba'o// dbang chen 'dus pa'i tan+t+ra las/ rmad du byung ba'i le'u ste bcu drug pa'o//// rtse rgyal bstan pa'i theg pa las// ya rgyal ma hA yo ga'i gzhung// ma spangs lhan cig bsgrub pa ni// sgrub thabs zab mo'i spyi bstan pa// phun sum tshogs pa'i le'u 'di gsungs so// sgrub pa chen po gang mdzad kyang// phun sum tshogs dang ldan nas brtsam// gnas phun sum tshogs pa btsal ba dang/ dus phun sum tshogs pa btsal ba dang// 'khor phun sum tshogs pa dang ldan pa btsal ba dang/rdzas phun sum tshogs pa btsal ba dang/ yo byad phun sum tshogs pa bsags pa dang/ ting 'dzin phun sum tshogs pa gsal ba dang/ phrin las phun sum tshogs pa spyad pa dang/ dngos grub phun sum tshogs pa bsdu ba'o// de lta bas na sgrub pa chen po'i dus dag tu// gnas ma rtag dang dus las yol// 'khor dang mi ldan rdzas mi rnyed// yo byad ma tshang ting 'dzin g.yel// phr-in las ma grub dngos grub yal// 'di rnams bsgrub pa'i skyon brgyad do// phyi rabs sngags 'chang sgrub pa pos// don la yid ches ma gyur kyang// thos la rtse gcig sems kyis ni// rtags dang phun sum tshogs byas nas// sgrub pa'i 'bras bu yal mi 'gyur// 'di la the tshom ci ste za// dbang chen 'dus pa'i tan+t+ra las/ phun sum tshogs pa'i le'u ste bcu bdun pa'o//// dngos grub brnyes pa'i rnal 'byor pas// rigs gnyis rgyud pa'i tan+t+ra las// ro sbyor bdud rtsi bya ba'i phyir// sgrub thabs gsang ba 'di gsungs so// dang por phun sum tshogs ldan nas// yid du 'ong ba'i dgon gnas su// bslang dang byin gyis brlab pa dang// mtshams la sogs pa'i rim pa bzhin// maN+Dal 'dom gang gru bzhi pa// bka' dang mthun pa'i chag chag btab// thig bzhi btag pa'i mtha' skor la// rU tra rnam gsum bsnol te mnan// dbus su zla gam bzhi pa ste// de dbus mthing nag gru gsum pa'o// kha bzhi pa la sbyin sreg bya'o// mtha' skor 'bar ba'i 'od kyis so// mthun pa'i rdzas rnams gnas pa'i sar// drug gnyis ldan pa'i ting 'dzin gyis// mtshan mas btab ste hUM zhes bskor// brtul zhugs chen po spros pas ni// gar gyi dbang phyug chen po'i bro// brdungs pa tsam gyis las rnams 'grub// phud nyul chen pos las mdzad mnyes// bdag nyid chen po'i skur bsgoms nas// gtsug gi rta mgo ljang gu las// rta yi brtul zhugs chen po ste// hrIHzhes du mar brjod cing bsdu// bdag nyid chen po'i skur bsgoms nas// zhabs las sprul pa'i khyi brgyad kyis// bag chags gnas su sbyang ba'i phyir// khyi yi brtul zhugs chen po ste// ku ku rA zhes rbad cing brdung// bdag nyid chen po'i skur bsgoms nas// gshog pa rdo rje gtams pa las// gzung 'dzin gnas su gsad pa'i phyir// bya yi brtul zhugs chen po yang// dzaHzhes brjod cing mgyogs par ro// bdag nyid chen po'i skur bsgoms la// mi dmigs sku yi sbrul mgo las// phag gi brtul zhugs chen po yis// gti mug gnas su sbyang ba'i phyir// dgug pa'i brtul zhugs hUM dang bcas par brdung// chas brgyad las kyi spyang mor dmigs// thod pa dbye ba sder mo nyid// ngan song gnas kyi 'dul phyir sbyor// ting 'dzin phyag rgyar bcas pas dbye// rdzogs nas maN+Dal nyid du dgram// rten ni drug gsum nyid du ste// lnga ni zla gam bzhi pa la'o// snyigs ma bar khyams grwa bzhi la// rtse mo ma traM ka la'o// sgo zur la ni brdeg pa rnams// sgo yi nang rol rdo rje ste// phyag mtshan bcu drug phrag gnyis la'o// yan lag bar du ba su ta// 'od la rak+ta khrag dang bcas// shun chen bla re nyid du'o// rdzi ma skra dang kha spu rnams// mchod pa'i phyir na gtor ma'o// sul mang dbang gi b+han+d+ha la// phyi ma rak+tar bcas pa rnams// g.yos sam yang na brdzis pa la// steng nas bcings te rgyas btab ste// sku gsum thod pa shar phyogs su// rak+ta chang dang sbyar ba la// steng nas rdo rje rgya gram btab// gling gsum pa ni lho phyogs te// rak+ta 'o mar sbyar ba la// steng nas rin chen rgyas btab nas// dbang du bsdu ba'i b+han+d+ha ru// rak+ta sbrang rtsi mar la sogs// steng nas pad+ma'i rgyas btab nas// gling bzhi rgya gram byang phyogs te// rak+ta mngar dang cha bsnyams pa// steng nas las kyi rgyas btab po// rdzogs nas ting 'dzin chas su bsal// mtshams dang bsrungs dang go cha'o// phyag rgya bskyed dang go cha dang// drod tshad bslang dang thugs rje dbab// tshe gnas bstim dang lnga pa'o// yang nas yang du bsnyen par bya// phrin las skabs dang sbyar nas bcom// dbang dang the tshom mi za ste// zhi ba ma yang dkyil 'khor gyi// 'phro 'du rim gyis bsnyem pas sbyang// bskul dang don byas 'dus pa dang// cho ga gsum gyis snang mdzad sku// sems su zhu nas dbyings su thim// skye med dbyings nas dngos med sku// hUM du gyur nas rtse lnga 'bar// bskul nas don byas mi bskyod sku// sems su zhu nas dbyings nyid do// skye med dbyings nas dngos med sku// swA las rin chen zur brgyad 'phro// bskul dang don byas 'byung ldan nyid// sems su zhu nas dbyings nyid do// skye med dbyings nas dngos med sku// AM las pad+mar gsal ba dang// bskul dang don byas snang mtha' yas// sems su zhu nas dbyings nyid do// skye med dbyings nas gnyis med sku// hA las rgya gram 'bar 'phro bas// bskul nas don byas don grub pa'o// sems su zhu nas dbyings nyid do// 'phro 'du gsal dang las su rung// dngos grub 'grub nas myan gan 'das// mang du spel phyir bsnyen par bya// grub nas dngos grub gsol ba dang// brtan par bya phyir bdud rtsi'i snod// yum gyi gsang ba'i tshig tu'o// sngags dang ldan pas dbang bskur te// gnas lnga dag tu bstim par bya// de nas rgya bshig mdud pa dgrol// bkra shis mtshan dang ldan pa'i yum// dar la babs pas skul ba'i dbyangs// pra be sha yis mdud pa dgrol// cha gcig 'phags pa mchod phyir dbul// cha gcig slob dpon nyid la'o// gcig ni yongs la sbyin par gsungs// de nas bdud rtsi dam pa'i snod// de ni spyi bor blangs nas kyang// bkra shis tshigs su bcad pa bsgrag/ rang bzhin dkyil 'khor rdzogs pa yang// gzugs brnyan bud+d+ha nyid la 'bul// tsit+ta la sogs rang bzhin rdzas// rang bzhin mchod pa nyid du'o// rna ba sgra yi mchod pa yis// glog 'gyu nyid de dbyings su bstim// dri ni a mi d+he ba ste// spros pa med pa'i ngang la'o// mig ni rdo rje sder mo ste// mtha' gnyis bral ba'i dbyings su gzhag/ lce ni rdo rje dra ba mo// mi 'gyur dbyings su yang dag nyid// rang bzhin mchod pa rdzogs par ldan// gzugs brnyan dkyil 'khor dra ba la// yongs su bsngo bar bya ba ni// pho ba shar phyogs par khyams na// dbyangs dang bcas pas dbul ba ni// rdo rje kham rgya chen mo la// phul bas gzi ldan dbyings su thim// grod pa lho phyogs nyid la ste// rin chen kham rgya chen mo la// dbyangs dang bcas pa snga ma bzhin// phul bas gzi ldan dbyings su thim// gnye ma nub nas snga ma bzhin// ma chags pad+ma'i kham rgya la// phul bas gzi ldan b+ha ga la'o// long ka byang nas rim pa bzhin// don rab lhun grub kham rgya la// dbyangs kyis bstod nas mnyes par bya'o// gzi ldan la ni 'du 'phro'i tshul// sul mang shar lho mtshams su ste// de bzhin kham rgya nyid la'o// dbyings dang ldan pa'i ye shes dang// rgyu ma lho nub mtshams su ste// de bzhin kham rgya nyid la mchod// lgang pa ye shes kham rgya la'o// dbyangs dang tshig ldan snga ma'i ngang// sgal tshigs phyogs bzhi gru chad la// long ba'i tshogs la dbul ba yang// dbyangs dang ldan pa'i tshig dag gis// ye shes lnga yi ngang la gzhag/ dkyil 'khor yan lag bar bar nas// dmus long tshogs la dbul ba ni// ne'u seg dbyangs dang ldan pa yis// phul bas ye shes lnga yi dbyings la sbyor// gsang ba'i chu ba nang sgo nas// dbu dgu rab tu brtsegs pa la/ dbyangs kyi mnyes par snga ma'i tshul// me ri la ni ba su ta// spyang mo brgyad la mchod pa yang// dbyangs tshig ldan pas dbyings la thim// khrag gi lce yi bar bar nas// za byed ye shes ku ku rA// brgyad la dbyangs kyi mchod pa yang// ma skyes dbyings la thim par bya// bsdu ba'i thabs ni 'di dag gsungs// dbyings kyi cho 'phrul rab spros te// mtha' skor za byed ye shes kyi// spyang mo mgo dgu brtsegs pa la// dbu dgu nyid kyang dmus long ste// dmus long long ba'i tshogs la 'phros// long ba kham rgya chen mo la// de nyid gtso bo yab yum la'o// yum yang dpal be'u'i thugs la bsdu// dpal be'u skye med dbyings su ste// brjod pa med pa'i dbyings su thim// bdag dang dkyil 'khor ji bzhin te// bdag nyid maN+Dal nyid las 'phros// maN+Dal zla gam nyid la ste// zla gam gzi ldan yum gyi mkha'// yang na bdag nyid chen pos te// skye ba med pa'i dbyings su thim// maN+Dal ye shes lnga la 'du// dam rdzas gsang ba'i b+ha gar bsdu// yongs su spros zhing bsdu ba rnams// skye ba med pa'i ngang la gzhag/ cung zad skye med bsgoms nas kyang// gong ma bzhin du rim par bsdu// dbang bskur ba dang 'byung ba dang// tshe dang dngos grub len pa dang// bzod par gsol dang smon lam gdab// gtor ma gtang ba gzhung bzhin bya// dbang chen 'dus pa'i tan+t+ra las/ro sbyor bdud rtsi'i le'u ste bco brgyad pa'o//// rigs 'dzin go 'phang thob pa yis// rim gnyis lung gi brgyud pa'i lung// sa bon las ni 'bras bu bzhin// khrag 'thung 'bar ba'i dkyil 'khor las// dbang chen dbang gi dkyil 'khor rgyud// dur khrod 'bar ba'i gzhal yas las// lha chen 'khor bcas bsgral ba'i phyir// rgyal mtshan lnga dang ka bar bcas// 'phan dang za ram bla re rnams// khams gsum dbang du sdud par gyur// hUM las rin chen khri bzhi yang// 'khor ba thabs kyis gnon pa dang// srin po ru tra sgrol ba dang// khyad par gzhan las 'phags pa'i phyir// khrag 'thung chen po'i sku bzhir brgyud// dbang phyug nyi shu rtsa brgyad ni// thabs kyi rtsal 'phang seng ger brgyud/ seng ge'i khri brgyad ni// gdan khri bzhi chen 'khril skyong ni// nyi zla pad+ma brtsegs par brgyud// zhe sdang khrag 'thung 'bar ba'i sku// ngag gi dbang phyug nyid du brgyud// kro d+hI shwa ri la sogs yum// gzi ldan gsang ba'i yum nyid do// rigs la dbang rnams mi za bar// thams cad yongs su rdzogs pa'i phyir// khrag 'thung lnga po'i dbu la brgyud// khro bo chen po mthu chen brgyad// bsgral nas zhabs kyi gdan la brgyud// rdzogs pa chen po yin pa'i phyir// ting 'dzin brgyad dang ldan par dmigs// rgyan gyi bye brag mang po rnams// rdo rje rin chen las byung ba'i// gshog pa dag tu rnam par brgyud// sgo ba khro bo yab yum brgyad// dbu lnga brtsegs pa'i rkang gcig po// 'jigs kyang// rigs dang bcas pa nyid du brgyud// rgyas 'debs la sogs lha mo ni// kham rgya chen mor brgyud pas te// sprul pa yang sprul bsam yas pa// long ba'i tshogs dang khyi spyang du// brgyud pa yin zhes 'dren pas bstan// phra men bcu drug thugs kyi yum// phyag rgya bcu drug dkyil 'khor du// lcags kyi rdo rje la sogs pa'i// phyag mtshan bcu drug nyid du brgyud// gsang ba bas kyang ches gsang ba// yang gsang thugs la gab pa ste// 'di ni man ngag brgyud pa'i lung// rjes su rnal 'byor rnams kyis spyod// dbang chen 'dus pa'i tan+t+ra las/ rigs 'dzin go 'phang thob pa'i le'u ste bcu dgu pa'o//// mkha' ldan chen pos gsungs pa las// 'da' dka' dam tshig le'u gsungs// rnal 'byor gang zhig rtsom pa yang// mnyam pa chen po rtogs pa yang// don las nam yang 'da' mi bya// bsdams par bya ba'i dam tshig ni// srog gi phyir yang mi 'da' ba'i// sna tshogs dngos po snang ba yang// dngos po med pa'i skur gsal bas// rtogs pa'i don las yongs mi 'da'// sgra mtha' sna tshogs sgrogs pa yang// smra ba med pa'i gsung du rig/ rig pa'i don las 'da' mi bya// bsam du med pa'i sems gang yin// de ni thugs kyi rang bzhin te// de las 'da' ba ma yin no// sku gsung thugs las ma g.yos kyang// che ba'i yon tan sna tshogs 'byung// 'on kyang zad med 'phel med pas// yon tan dam tshig yin par grags// de las 'da' bar yongs mi bya// rtsol ba med pa'i las gang yin// de ni thabs kyi spyod pa bas// phrin las dam tshig 'da' dka' 'o// lnga po 'di la gang gnas pa// rnal 'byor skal ldan dam pa'o// bsgrub bya'i dam tshig chen po ni// byang chub sems dang sha rnams dang// khrag dang dri chu dri chen po// dbang po lnga dang bcas pa ni// bde gshegs lnga yi thugs dam ste// bsgrub la gnas pas mi spang zhing// 'da' bar bya ba ma yin no// brtul zhugs dam tshig chen po ni// dka' thum sdom la gnas pa'i phyir// bdud rtsi dam rdzas rkyen bcas la// thogs pa med pa'i brtul zhugs kyis// spang len med par rol bya'o// bsnyen pa'i dam tshig chen po ni// lha dang rdzas dang tshe la sogs// snying po yig 'bru bcas pa rnams// gnyis su med par rtogs byas nas// mnyam pa chen po'i dbyings su gzhag/spyad par bya ba'i dam tshig ni// pad+ma can dang dung can ma// ban glang ma dang ri mo can// bu mo mig ring la sogs kun// phrad par gyur nas sbyar ba yang// mthong ba tsam gyi dam tshig ste// dbang po'i yul dang shes mtshon ldan// bsgrub par bya ba'i dam tshig ni// nyon mongs lnga po gnas su dag/ sku dang ye shes ldan sbyor zhing// thams cad lha yi phyag rgyar gsal// shes par bya ba'i dam tshig ni// 'khor ba'i chos lnga ma spangs shing// spyad pas grol te mya ngan 'das// phyi nang snod bcud ma lus kun// phyag rgya chen po'i dkyil 'khor ro// dang du blang ba'i dam tshig ni// ta na ga Na la sogs spyad pa yang// 'das pa'i sangs rgyas rnams kyi bka'// ma byin pa yang blang ba dang// mi tshangs pa yang spyad bya zhing// lha dang slob dpon mched la sogs// 'tshe la rdzun gyi tshig smra zhing// brlang po gang gis zher gdab po// glu bro gsang ba'i dam tshig ni// dbyings nyid gsang ba'i sa gzhi la// b+hud+d+ha khrag 'thung rol pa'i bro// gti mug gnas su 'joms pa ste// 'da' dka' sku yi dam tshig go/ me long gsal ba'i sa gzhi la// rdo rje khrag 'thung rol ba'i bro// zhe sdang gnas su 'joms pa ste// 'da' dka' thugs kyi dam tshig go/ mnyam pa chen po'i sa gzhi la// rin chen khrag 'thung rol pa'i bro// nga rgyal gnas su 'joms pa ste// yon tan lhun grub dam tshig go/ so sor rtogs pa'i sa gzhi la// pad+ma khrag 'thung rol pa'i bro// 'dod chags gnas su 'joms pa'i bro// sgra mtha' chub pa'i dam tshig go/ nan tan chen po'i sa gzhi la// karma khrag 'thung rol pa'i bro// phrag dog gnas su 'joms pa ste// phrin las 'da' dka'i dam tshig go/ stong nyid ye shes sa gzhi la// dbang chen khrag 'thung rol pa'i bro// dug lnga gnas su 'joms pa ste// sku lnga lhun sbyor dam tshig go/ dbyings phyug lnga yi sa gzhi la// ye shes lnga yi bro brdungs shing// dug lnga 'joms pa'i glu blangs pas// sdug bsngal chu bo'i gzhung bskams nas// 'khor ba'i rgya mtsho gting bskams te// sku gsung thugs su rgyas btab nas// bde ba chen por rnam sbyar te// dmyal tshogs me dpung gnas su bsad// 'di ni dpal gyi bro mo che// thos pa tsam gyis rtogs pa dang// brdungs pa tsam gyis thugs dam skong// 'di ni glu bro'i dam tshig ste// thams cad chos sku gdal ba che// dbang chen 'dus pa'i tan+t+ra las/ 'da' dka' dam tshig gi le'u ste nyi shu pa'o//// tshe la dbang thob rig 'dzin brnyes pa'i sa// dus gsum rgyal ba mnyes par bya ba dang// rnal 'byor phyi rabs dngos grub thob pa'i phyir// rdo rje gsang ba'i le'u 'di gsungs so// cho ga srung dang ting 'dzin bcas pa'i sa// bdag nyid phyag rgya chen po'i nga rgyal bskyed// de la ye shes rgyan gyi glu blangs pa// oM// gtsug tu 'khor lo rtsibs brgyad 'bar// cho ga gsum ldan snang mdzad che// yab yum gnyis med sbyor ba las// 'khor lo snying gi dbus su bsgom// de yang rang bzhin med par dmigs// hUM/ dpral bar rdo rje rtse lnga 'bar// cho ga gsum ldan sems dpa' che// yab yum gnyis med sbyor ba las// rdo rje snying gi dkyil du bsgom// de yang rang bzhin med par dmigs// swA/ g.yas su rin chen zur drug 'bar// cho ga gsum ldan rin po che// yab yum gnyis med sbyor ba las// rin chen snying gi dbus su bsgom// de la rang bzhin med pang dmigs// AM/ rgyab tu pad+ma 'bab brgyad 'bar// cho ga gsum ldan mtha' yas che// yab yum gnyis med sbyor ba las// pad+ma snying gi dbus su bsgom// de la rang bzhin med par dmigs// hA/ g.yon du rdo rje rgya gram 'bar// cho ga gsum ldan don yod grub// yab yum gnyis med rol pa las// rgya gram snying gi dbus su bsgom// de las rang bzhin med par dmigs// sku gsung yon tan phrin las lnga// rigs lnga dpal gyi glu blangs pas// gsang ba'i yum gyi bro brdungs shing// dpa' bo 'bru lngas dbang bskur bas// thams cad ma lus phyag rgya'i sku// lus pa med pa chos kyi dbyings// hrIH/ rta mgrin gtsug na nor bu 'bar// cho ga gsum ldan ha ya grI// yab yum gnyis med rol pa las// nor bu snying gi dbus su bsgom// de la rang bzhin med par dmigs// hUM// g.yas pa brgyad na lcags kyu 'bar// cho ga gsum ldan phra men ma// gtso dang gnyis med 'khril pa las// lcags kyu snying gi dbus su bsgom// de la rang bzhin med par dmigs// g.yon pa brgyad na mtshon cha 'bar// cho ga gsum ldan badzra ste// gtso dang gnyis med 'khril ba las// mtshon cha snying gi dbus su bsgom// de la rang bzhin med par dmigs// hUM/ truM/ zhabs brgyad pho nya za byed brgyad// cho ga gsum dang lan pa mo// gtso dang gnyis med 'khril ba las// chas brgyad snying gi dbus su bsgom// de la rang bzhin med par dmigs// phaT/ sku gsung thugs las rnam 'phrul ba'i// sgo skyong khro bo mgo dgu brtsegs// kham rgya mo dang long ba'i tshogs// dmus long dang ni khyi spyang tshogs// dpal chen sku la rab tu 'bar// cho ga gsum ldan sprul tshogs ldan// de yang yab yum sbyor ba las// 'khor rnams snying gi dkyil du bsgom// de la rang bzhin med par dmigs// 'di ni ye shes rgyan gyi glu'o// rgyan nyid ye shes glu blangs pas// skad cig ma yi ting 'dzin gyis// bdag nyid phyag rgya rta mchog 'bar// A+oM/ 'khor lo ye shes can rnams kyis// 'khor lo rdo rje bsgom byas na// de nyid chos sku nam mkha' che ho// hUM/ rdo rje ye shes can rnams kyis// rdo rje rdo rje bsgom byas na// de nyid chos nyid ngang la rdzogs ho/ swA/ rin chen ye shes can rnams kyis// rin chen rdo rje bsgom byas na// de nyid longs spyod lhun gyis 'grub ho// AM/ pad+ma ye shes can rnams ni// pad+ma rdo rje bsgom byas na// de nyid brten par gyur pa med// hA// rgya gram ye shes can rnams ni// rgya gram rdo rje bsgom byas na// de nyid sprul sku ngo mtshar che ho// rgyan nyid ye shes glu blangs pas// bskul dang don byas 'dus pa dang// thams cad a ste dngos med sku// stong pa chen po'i ngang la gzhag ho// dbang chen 'dus pa'i tan+t+ra las/glu'i le'u ste nyer gcig pa'o//// tshar gsum pa yi rnga brdungs pas// lcang lo can gyi pho brang 'joms// snang mdzad chen po a la la// zhes brjod de/ gzhung bzhin lnga'i don shes par bya'o// dang por rgyu dang rang bzhin dang// don dang bsgom dang grangs dang ni// bsnyen par bya dang thabs la sogs// bdun po 'di la rnga zhes bya// de la rnga yi rgyu dag ni// phyi yi rgyu dang nang gi rgyu// gsang ba'i rgyu dang gsum du bstan// rang bzhin la yang gsum gsum ste// rnga'i rang bzhin dang/ skad kyi rang bzhin dang/ lcags kyi rang bzhin no// don la yang gnyis te/ rnga kun nas zlum por gyur pa dang/ rnga kun nas yongs su rnam par grags pa'o// bsgom pa la yang gsum ste/ blta bar bsgom pa dang/ lha'i sku phyag rgyar bsgom pa dang/ sprul pa bsgom pa dang/ rnga'i grangs la yang gsum ste/ sgrub pa las kyi rnga dang/gsang ba yum gyi rnga dang/ rol mo dbyangs kyi rnga'o// bsnyen pa la yang gnyis te/ bsnyen pa dang nye ba'i bsnyen pa'o// brdung thabs la yang rnam pa drug ste/ dpal chen rang bzhin gyi rnga brdung thabs dang/ dur khrod ma mo'i brdung thabs dang/ rbod gtong pho nya rbad pa'i brdung thabs bstan pa'o// phra men gau ri lang ka 'du ba'i brdungs thabs dang// phyogs skyong zil gyis mnan pa'i brdung thabs dang// dngos grub nye bar len pa'i brdung thabs dang drug tu gsungs so// dbang chen 'dus pa'i tan+t+ra las/ rnga brdung ba'i le'u ste nyer gnyis pa'o//// dbang gi rnal 'byor pa rnams kyis// gnod sbyin rnams ni 'khor 'dod na// gnod sbyin gzugs ni khrag gis bri// dur khrod chen por mngon sum du// dur khrod dkyil 'khor gru bzhi ste// dbus kyi gru gsum mthing nag la// mtha' skor zla gam brgyad kyis bskor// dbus su yum chen gzi ldan ma// zla gam brgyad la bzhag pa yang// mtshan dang ldan pa'i b+han d+ha la// bsgrub pa'i ma mo brgyad bris te// dur khrod ma mo dgod pa yang// shar du rdo rje sder mo dang// lho ru ma mo glog 'gyu ma// nub tu rdo rje dra ba mo// byang du ar mo de la bzhag/ shar lho mtshams su dgod pa yang// rdo rje kham rgya chen mo'o// lho nub mtshams su dgod pa yang// rin chen kham rgya dgod par bya// nub byang mtshams su pad+ma rgya// byang shar mtshams su las kyi rgya// phyi rim bar khyams chen po la// zla gam dmar po bcu drug la// phra men bcu drug rim pa bzhin// sgo bzhir zla gam bzhi bris te// steng du lcags kyu la sogs dgod// de ltar bsham pa'i dkyil 'khor du// gnod sbyin gzugs ni khrag gis bri// snying gar rdog phur mnan nas su// dgug pa'i brtul zhugs hUM bzlas pas// gnod sbyin ma 'ongs par du ni// sdod na zhag bdun nas khugs 'gyur// gnod sbyin kun la ci dgar spyod// rnal 'byor pa yi bran du 'gyur// phra men rnams ni 'khol 'dod na// dkyil 'khor de yi dbus dag tu// ro ras gro ga shing shun la/ phra men gzugs ni khrag gis bri// dbang po yan lag phur pas gdab// snying gar rdog pas mnan nas ni// dgug pa'i brtul zhugs hUM zhes bzlas// gong ma bzhin du bdun gyis 'ong// bdag nyid ji ltar 'dod pa bzhin// phra men rnams ni ci dgar 'khor// khong gis 'gal na khong dag 'chi// bdag gis nyams na bdag nyid nyams// ma mo sgrub pa'i dus dag tu// nang par mal nas langs nas kyang// yi dam gnas pa'i sa phyogs su// goms gsum 'phags nas sku gsum dran// bshang gci byed pa'i sa phyogs su// dri chen lag tu blangs nas su// sus ma mthong bar khams gsum bza'// dri chu khyor ba gang blugs nas// sus ma mthong bar thengs gsum btung// phra men chen mo bkol ba'i phyir// shin tu dben pa'i dur khrod du// rkang gcig sa la btsugs nas kyang// phag skad thengs gsum ngur bar bya// byang gi phyogs su kha bltas te// gnod sbyin dbang du bsdu ba'i phyir// dri chen mdun du bzhag nas kyang// khyi skad thengs gsum zug par bya// nub kyi phyogs su kha bltas te// rta skad 'tsher ba'i glu dbyangs blangs// phra men rnams la ci dgar spyod// 'di ni ma mo bskol ba'i le'u'o// dkyil 'khor 'di la bkram pa yang// dbus su bkram pa 'di dag ste// gnyis ldan byang chub sems chen po// 'o ma dang ni bsres la gzhag/'phyar zhing ma mo rten dbyangs blangs// phyogs bzhir bdud rtsi bzhi rnams ni// rim pa bzhin du zla gam la'o// yi ge'i 'phro 'du byas nas kyang// ma mo rten dbyangs blangs shing 'phyar// mtha' skor shar lho mtshams su ni// rdzas su khyo tshe bcu drug la// raka ta khrag dang bsres pa yi// snga ma bzhin du 'phyar zhing gzhag/ phyi rim phra men bcu drug la// rdzas su khyo tsho bcu drug dgod// de yi steng du snying po bri// rak+ta khrag dang bsres pa yi// kha ches bos la 'phyar zhing gzhag/ sgo ba rnams ni dgod pa yang// byang skya gnag bcas bris pa la// kha li li bos 'phyar la gzhag/ 'di ltar rtogs nas bsgom pa dang// gnod sbyin byan mo las byed dang// ma mo mngag gzhug drag mo las byed dang// 'grub 'gyur 'di la the tshom med// gtor ma cho ga gzhung bzhin bya// slob mar rak+tas dbang bskur ro// dngos grub brten phyir bzlas pa las// srod la 'khor gsum bro brdung pa// tho rangs sbyor ba'i las kyang bya// byang chub sems kyi dbang bskur na// dngos grub rab tu brtan par 'gyur// dbang chen 'dus pa'i tan+t+ra las/ ma mo bkol ba'i le'u ste nyi shu gsum pa'o//// chas kyi blo dag las grol tshig zab mo dang// gdug byed pho nya'i le'u// bskul ba'i las dag 'bad pa'i phyir// gdug byed zhabs kyi 'od zer ni// dpal mchog drag shul stag gi chas// khro bo yab yum sbyor ba'i byin rlabs las// stag mgo dmar po dbu lnga me ltar 'bar// stag lag khro mo zhe sdang glog stong 'khyug/ rkang gcig mgyogs ma shin tu mi bzad de// shar phyogs khyab par rgyug cing dpal gyi bka' nyan ma// dri za dbang sdud gdon bgegs thal bar rlog/ gdug byed zhabs kyi 'od zer 'phros pas ni// gnod gdug zlog byed rgya bye'u lcags kyi chas// khro bo yab yum sbyor ba'i byin rlabs las// lcags mgo sngon po dbu lnga me ltar 'bar// lcags lag khro mo zhe sdang glog stong 'khyug/ rkang gcig mgyogs ma shin tu mi bzad de// shar lho khyab par rgug cing dpal gyi bka' nyan ma// drang srong dbang sdud gdon bgegs thal bar rlog/ gdug byed zhabs kyi 'od zer 'phros pa ni// shes rab ting 'dzin rdo rje 'chol ba'i chas// khro bo yab yum sbyor ba'i byin rlabs las// rdo rje dmar mo dbu lnga me ltar 'bar// rdo rje lag pas zhe sdang glog stong 'khyug/ rkang gcig mgyogs ma shin tu mi bzad de// lho phyogs khyab par rgyug cing dpal gyi bka' nyan ma// gshin rje dbang du sdud cing gdon bgegs thal bar rlog/ gdug byed zhabs kyi 'od zer 'phros pa ni// rngom brjid gnyen lcug sbrul nag 'khyil ba'i chas// khro bo yab yum sbyor ba'i byin rlabs las// sbrul mgo nag po'i dbu lnga me ltar 'bar// sbrul nag khro mo zhe sdang glog stong 'khyug/ rkang gcig mgyogs ma shin tu mi bzad de// lho nub khyab par rgyug cing dpal gyi bka' nyan ma// srin por dbang sdud gdon bgegs thal bar rlog/gdug byed zhabs kyi 'od zer 'phros pa ni// dbang gi bse khrab gzi ldan bgrad pa'i chas// khro bo yab yum sbyor ba'i byin rlabs kyis// bse mgo dmar po dbu lnga me ltar 'bar// bse lag khro mo zhe sdang glog stong 'khyug/ rkang gcig mgyogs ma shin tu mi bzad de// nub phyogs khyab par rgyug cing dpal gyi bka' nyan ma// klu srin dbang sdud gdon bgegs thal bar rlog/gdug byed zhabs kyi 'od zer 'phros pa ni// za byed chen po ting 'dzin mche ba'i chas// khro bo yab yum sbyor ba'i byin rlabs las// za byed mche ba'i dbu lnga me ltar 'bar// mche ba'i lag pa zhe sdang glog stong 'khyug/rkang gcig mgyogs ma shin tu mi bzad de// nub byang khyab par rgyug cing dpal gyi bka' nyan ma// rlung lha dbang sdud gdon bgegs thal bar rlog/ gdug byed zhabs kyi 'od zer 'phros pa ni// gzi ldan shu kan smad g.yogs dar gyi chas// khro bo yab yum sbyor ba'i byin rlabs las// drang srong dmar po dbu lnga me ltar 'bar// dar lag khro mo zhe sdang glog stong 'khyug/ rkang gcig mgyogs ma shin tu mi bzad de// byang phyogs khyab par rgyug cing dpal gyi bka' nyan ma// gnod sbyin dbang sdud gdon bgegs thal bar rlog/ gdug byed zhabs kyi 'od zer 'phros pa ni// gcan gzan rgyal bo gdug pa gzig gi chas// khro bo yab yum sbyor ba'i byin rlabs las// gzig mgo khra mo dbu lnga me ltar 'bar// gzig lag khro mo zhe sdang glog stong 'khyug/ rkang gcig mgyogs ma shin tu mi bzad de// byang shar khyab par rgyug cing dpal gyi bka' nyan ma// dbang ldan dbang sdud gdon bgegs thal bar rlog/ phyogs bzhi mtshams brgyad dregs pa'i dpung 'joms ma// za byed mche bas bdud kyi dpung tshogs 'joms// nga rgyal bsnyems pas pha rol zil gyis gnon// thugs chom 'brug sgras srin po'i thod rus 'joms// dzaHhUM baM hoHsa srin po dbang du sdud// hUM dang phaT kyis srid gsum 'khor ba 'jig/ phrin las dus la bab po gshegs su gsol// ma ma bgyis pas ma mo bskul// dza dza bgyis pas khro bo rbad// ha ha bgyis pas pho nya 'gyed// hrIHhrIHbgyis pas rta mgrin rngam// b+h+yo b+h+yo bgyis pas dbang phyug 'bod// dbyangs su tshangs pa'i glu drug blang// las su dgra bgegs ma lus bsgral// rtags su gsang ba'i rnga chung brdung// dpal gyi phrin las dus la bab// dbang chen 'dus pa'i tan+t+ra las/ chas kyi pho nya mngag pa'i le'u ste nyi shu rtsa bzhi pa'o//// tshad mar gyur pa'i rnal 'byor pas// hUM mdzad chen po'i tan+t+ra las// nye bar bsgrub pa'i man ngag ni// sbyor ba'i dam tshig 'di gsungs so// phyi rabs skal bar rab ldan pa'i// mi nyams tsam du bcas pa las// the tshom med cing nges par 'grub// lus ngag yid gsum rgya che la// dbyings nas gsang ba'i yum bskyed pa// snying po 'bru dang bcas pas so// mnyam pas mnyam pa'i phyag rgyar gsal// gnyis su med pa'i sbyor ba'i phyir// gsang ba'i rtse mor oM ser po// ye shes lnga yi sa bon bsam// rdo rje rtse lngar gyur par dmigs// de dkyil a las zla ba ste// thabs kyi phyag rgya'i cho 'phrul lo// gzi ldan gsang ba e gru gsum// de dkyil ma la nyi ma ste// de'i steng baM las pad+mar btag/ shes rab phyag rgya'i cho 'phrul lo// sku bskyed phyag rgya gsal ba las// so sor gsal ba'i brdas mtshon te// bstod cing bskul nas ldan byas na// oM dang muM gyi 'phro 'du las// cho ga gsum gyis byin rlabs nas// pra be sha yi sgo dbye la// 'dab brgya pad+ma nyi mar bcas// de dbus gsang ba'i rdo rje dbul// hUM gis gsor cing ha yis bskyod// yang dang yang du bskyod pa yis// sku gsum dbyings su bsdu ba'o// hUM ni yab kyi byang chub sems// go ro tsa na'i dbyings nas bton// srog dag gsang ba'i dbyings su sbyangs// ljags kyi dbang por 'khyil pa yang// nA sa'i dbyings nas klad par bskul// tshor ba nyams su myong nas ni// sgal ba'i rtsa ru brgyud nas kyang// gsang ba'i rdo rje'i lam du byung// b+ha ga gsang ba'i dkyil 'khor du// yang dang yang du spro zhing bsdu// nyi ma zla ba pad+ma dang// rdo rje la sogs 'dren pa dang// sbyor ba'i byang chub rab spros pas// phyogs bcu rgyal ba'i thugs dam bskul// mtha' yas sems can las don byas// slar 'dus phyag rgya'i skur gyur pas// ye shes sems dpa' tshon gang pa'o// de yang yab yum sbyor ba las// byang chub sems ni sprin chen blangs// rdzas las tshe yi dngos grub gsol// 'di ni sbyor ba'i lung du grags// byang chub sems kyi 'od zer las// slar yang yum gyi dbyings su thim// de las phyag rgya'i skur bsgoms pas// dong tshe tsam gyi zla dkyil du// ye shes sems dpa' tshon gang dmar// 'bru gsum tsam gyi spro mtshams la// g.yas pa yid bzhin nor bu bsnams// g.yon pa rin chen za ma tog/ de ltar dkyil 'khor gsal ba dang// sprul pas gzhan gyi don byas nas// thams cad ma lus phyag rgya'i skur// sbyor ba chen pos bskyed pa'o// rdzogs nas mthol bshags bzod par gsol// za byed thams cad chos kyi dbyings// dbang chen 'dus pa'i tan+t+ra las/ sbyor ba'i le'u ste nyi shu rtsa lnga pa'o//// dpal mchog pad+ma he ru ka'i// sku gsung thugs kyi rngom brjid ni// skye med thabs kyi phyag rgya che// 'di ni dpa' bo chen po'i sku// khro bo rngom brjid rgyal po'i le'u// blo dang ldan pa'i rnal 'byor gyis// sku la rngom brjid bzhir grags pa// nam mkha'i rang bzhin phyag rgya rngom// cir yang bsgyur ba'i bzhugs thabs rngom// zil gyis gnon pa'i gdan mchog rngom// tsham rngams chen po stabs kyi rngom// gsung la rngam pa bzhir grags pa// hom lngar 'brel bas zhal gyi rngom// zla gam cir yang bsgyur ba ljags kyi rngom// skye shi rtsad nas gcod pa tshems kyi rngom// gsung sgra 'brug ltar sgrogs pa dbyangs kyi rdom// thugs kyi rngam pa bzhir grags pa// ting 'dzin nam mkha' rgyan gyi skar ltar rngom// phrin las rgya mtsho rgyan gyi rlabs ltar rngom// yon tan sa gzhi rtsi shing lta bur rngom// mdzad pa rol mo rgyan gyi gar stabs rngom// yon tan rngam pa bzhir grags pa// rU tra bcom pa'i gnas lngar rngom// lha chen mnan pa'i gdan gyi rngom// khams gsum bsgral ba'i zhing gi rngom// rtog 'joms spyod pa'i brtul zhugs rngom// sku yi brjid pa bzhir grags pa// sku che yan lag rags pas brjid kyang che// grangs mang rkyen dang mtshams pas brjid kyang che// bkur 'os gtso bor mthong bas brjid kyang che// khyad zhugs bla ma yin pas brjid kyang che// gsung gi brjid pa bzhir grags pa// gdangs tshe stong gsum gang bas1 brjid kyang che// tshig myur 2the tshom gcod pas3 brjid kyang che// gsal bas 4mtha' gnyis spangs pas brjid kyang che// thugs kyi brjid pa bzhir grags pa// yangs pa re dogs med pas brjid kyang che// thugs rje thugs dam mthar phyin brjid kyang che// ma bkag sa ler mkhyen pas brjid kyang che// ma rmongs cir yang sprul pas brjid kyang che// yon tan brjid pa bzhir grags pa// med pa zad mi shes pas brjid kyang che// gcig las 'dod dgur bsgyur bas brjid kyang che// gnod sbyor pham par mdzad pas brjid kyang che// thabs mkhas skyon gyis ma gos brjid kyang che// phrin las brjid pa bzhir grags pa// mi bsnyengs nyams bag rol pas brjid kyang che// 'khor ba yun ring mi brnyengs brjid kyang che// mgo skyabs rgyun du mdzad pas brjid kyang che// dgongs pa'i don rnams 'grub pas brjid kyang che// de ltar dpa' chen yon tan sum cu rtsa drug gis// dug gsum sku gsung thugs su sbyar// sdug bsngal bde ba chen por gcad// dbyings las ye shes chen po ste// ngan 'gro mtho ris skyas btab pas// dmyal tshogs dongs sprugs chen po mdzad// rgyal ba gang gi thugs rjes kyang// 'di la rdul tsam bskyad du med// srid gsum dbang du bsdus nas ni// khams gsum dus gcig dbyings su thim// thig le chos skur ye gnas pas// dbang chen zhes kyang 'di la bsngags// dbang chen 'dus pa'i tan+t+ra las/ khro bo rngam brjid rgyal po'i le'u ste nyi shu rtsa drug pa'o//// dngos grub bsnyems pa'i rnal 'byor pas// rta mchog rol pa'i tan+t+ra las/ rdo rje tshe mchog sgrub pa'i phyir// nges pa'i don la 'di gsungs so// bkra shis gsang chen che yi lung// gzi mdangs ldan pa sgrub pa'o// yid du 'ong ba'i gnas mchog tu// phun sum tshogs dang ldan byas nas// bkra shis dkyil 'khor zlum po la// 'dom gang tshad dang ldan pa'o// pad+ma 'dab ma brgyad pa la// steng du zla gam re re dkod// phyogs bzhi'i zla gam bzhi po la// gshog pa mo la sogs pa bzhi// steng du b+han d+ha bzhi dang bcas// mtshams kyi zla gam bzhi po la// za byed la sogs yum bzhi yang// b+han d+ha bzhi la rdo rjes mtshan// shin tu brtags te dgod par bya// dbus kyi lte ba zlum po la// yum mchog gzi ldan pad+ma can// zla gam kha sprod thod par bcas// snying po sngags dang bcas pa dgod// mtshan ma med pa'i chos sku la// mtshan ma'i rnam rtog mi mnga' yang// bdud dang gshin rje'i 'dul ba dang// tshe dang bsod nams brtan pa'i phyir// rdo rje'i ra bas kun tu bskor// rnal 'byor gang zhig skal yod la// dkyil 'khor 'di yi don yang bshad// rdzas las dngos grub gsol ba dang// tshe yi rig 'dzin thob pa'i phyir// tshe bum b+han d+ha srubs med la// mgul chings gsang ba'i ras kyis dkri// nang du dpa' bo sman dang bcas// snying po yum gyi skur bskyed cing// gsang ba'i bsnyen la dgu 'bum dbul// bum par bsdu zhing dbyings su bstim// sbyor ba'i byang chub sems dang bcas// mkha' la spro zhing dbyings su bstim// de las sems dpa'i skur bsgom pa// tshon gang sku yis stong gsum dgang// tshe gnas sprug pa'i dgongs pa ste// spel ba'i cho ga yin par gsungs// rnal 'byor yab yum sbyor ba'i sems// dmar po hrIHdang ldan spros nas// gzi ldan thugs kar bstim byas te// gnyis su med par gyur pa ni// stim pa'i cho ga yin par gsungs// sbyor ba'i sems la 'du 'phro ni// khams gsum gang nas 'dus pa dang// gzi ldan lte ba'i gzhal yas su// thim gyur rgya gram gtams pas gcad// bdud dang mu stegs gang gis kyang// 'di la mthong bar mi nus pas// sba ba'i cho ga yin par gsungs// sbyor ba'i byang chub lcags kyu 'phros// dzaHdzaHsprin phung 'du 'phro las// klu dang srin po 'khor bcas kyi// cho dang gzi byin bkug nas kyang// bum pa'i gzi ldan thugs gar bcug/ 'di ni dgug pa'i cho gar gsungs// sbyor ba'i sems las hUM dkar spros// de las rtse gsum rdo rje lcags kyu yis// tshe nyams 'degs pa'i sbror ba yis// lus ngag yid gsum brlabs nas ni// sku gsung thugs su gsal ba dang// nr-i yang hUM du byin brlabs te// shin tu gang ngam rgyas pa ni/ gso ba'i cho ga yin par gsungs// thams cad gcig tu gyur pa dang// mnyam nyid chos sku dag pa yis// srid gsum dbang du gyur pa ni// dbang du bsdu ba'i cho ga yin// cir snang ci srid byang chub sems// de las phyag rgya'i dkyil 'khor che// g.yo dang mi g.yo sna tshogs kun// mi nub ldan pa'i A yuH'od// dmar pos dbang bsdus rgyas btab pa// rgyas btab cho ga yin par gsungs// thams cad ma lus gzi ldan yum// dkyil 'khor bum par bcas pa kun// mi dmigs gzi ldan mkha' la 'khyil// tshon gang gsal ba'i skur bskyed nas// mu tig nas tsam phyag na bsnams// de nyid ye shes phyag rgya la// gnyis su med par gyur pa dang// skye med chos skur rtogs pa ni// gnas kyi cho ga yin par gsungs// so so'i pho nya gtang ba yang// spel ba'i dus na gshog pa mo// bstim pa'i dus na dra ba can// sba ba'i dus na sder mo can// dgug pa'i dus na glog 'gyu ma// gso ba'i dus ni mgo brnyan can// dbang du bsdu ba dmar mo'i tshogs// rgyas 'debs dus na gsang yum bzhi'o// bsgrub pa chen po rdzogs pa dang// dngos grub gsol dang dbang bskur dang// smon lam gdab dang pra la sogs// phrin las gzhol dang gtor ma gtang// gzhung las byung ba bzhin du bya// dbang chen 'dus pa'i tan+t+ra las/ bkra shis tshe'i lung gi le'u ste nyi shu rtsa bdun pa'o//// phyi rabs sngags 'chang bsgrub pa pos// dpal chen 'khor bcas bsgrub pa dang// tshe dang gzi brjid spel ba'i phyir// gzi brjid che ba'i le'u gsungs// dang po phun sum tshogs ldan nas// bka' dang mthun pa'i dgon gnas su// dkyil 'khor 'dom gang gru bzhi la// dbus su gru gsum tshad du ni// khru gsum khru gang 'phang du brtsig/ ngos su zla gam bzhi pa la/ bar khyams sgo dang sgo khyud bcas// me dpung 'bar bas mtha' bskor zhing// shin tu mdzes dang ldan par bri// lag cha phun sum tshogs bris la// gzi ldan mtshan dang ldan pa des// thod pa ma gas khyad par can// lcang lo 'bar bas brgyan pa lnga// dbus dang phyogs bzhi'i zla gam la'o// sman dang dza gad rgun chang dang// mar dang sbrang rtsi 'o ma las// ji tsam 'byor ba'i yo byad rnams// gong ma'i snod rnams rab tu dgang// de nas rnal 'byor dbang phyug gis// tshe dang gzi brjid spel ba'i phyir// thabs la mkhas pas 'di skad gsungs// sbyang dang spel dang bsgom pa dang// yig 'byu 'phro 'dus bkug pa dang// rigs kyi pho nya btang ba dang// bsnyen pa'i grangs rnams rgyas btab dang// phra dang rig pa mngon sum du// bltas pas lhan ne gsal ba'o// de la sbyang bar bya ba yang// sngags dang phyag rgya'i pho nya dang// chos nyid dag pa'i ngang gis so// spel ba'i don dang rang bzhin ni// chos kyi dbyings las ma g.yos kyang// mtshan ma'i phyag rgya mkha' ltar khyab// de ni spel ba'i lung zhes bya// bsgom par bya ba 'di dag ste// snod bcud yum gyi dbyings su bsgom// snang srid phyag rgya'i tshogs su bsgom// yig 'bru spro bar bya ba ni// A yuHdmar po dbang gi sku// bskyed pa'i sa bon nyid du spro// bskul dang don byas bsdu ba dang// gzi dang ldan ma'i dpal be'u nas// sems dpa'i sku dang ldan par bya// 'di ni bsdu ba'i lung du gsungs// rigs kyi pho nya btang ba ni// shar nas rdo rje pho nya mo// gshog pa'i lus la rdo rje sbrul gyi gdong// rgyan la sogs pa'ang de bzhin bskul// lho nas rin chen gshog pa mo// gshog pa'i lus la rdo rje rin chen gdong// rgyan la sogs pa'ang de bzhin bskul// nub nas sbrul nag gshog pa mo// gshog pa'i lus la sbrul gyi gdong// rgyan la sogs pa de bzhin bskul// byang nas rdo rje the'u gshog ma// sprul pa'i lus la the'u gshog gdong// rgyan la sogs pa de bzhin sprul// dbus nas mgyogs pa'i bka' nyan ma// mu men lus la 'khor lo'i gdong// rgyan la sogs bde bzhin sprul// bsnyen pa'i grangs ni 'di drug ste// A yuHsems kyi rang bzhin te// gdod nas ma skyes nam mkha'i rang bzhin la// puN+ye ma bkag ci bder yin// rtogs nas zhag gcig drug stong ste// de ltar rtogs nas grangs rdzogs te// mkhas ldan chen pos rgyas btab nas// thams cad mnyam nyid chos sku la// gcig tu bsdus nas gzi ldan rgya// thugs kar rdo rje rgya gram gyis// 'gyur ba med par bstim la bzhag/ 'phral ma dbab par bya ba ni// rin chen me tog dor nas kyang// gang la bab pa'i tshe dbang bskur// rig pas sku gsal 'bar ba dang// lta ba thams cad sangs rgyas pa'o// de ltar bskur zhing don bya'o// yid la gang gi bya ba dang// yang na dpal gyi thugs ka nas// lcags kyu zhags pa pho nya rnams// tshe dang gzi mdangs 'phrog phyer bskul// lcags kyus bskul bas gshin rje 'dzin// zhags pa thogs pas 'byung po 'joms// sgrog gis thams cad 'joms par byed// dril bus lus sems spro ba bskyed// tshe la bar chad byed pa'i bgegs// gang na gnas pa thams cad kun// bkug nas rnam shes a dkar dmigs// 'phro 'du byas nas slar 'dus nas// A yuHskye med dang por gnas// 'dus nas chos kyi dbyings su thim// tshe dang gzi brjid 'phel rgyas shing// sdug bsngal bde bar byin brlabs nas// gzi brjid 'di la sngags rdzas dang// sman la sogs pa'i bye brag rnams// mkhas ldan chen po 'di ltar ro// sna tshogs mtshan mar snang ba ni// rdzas dang lag cha'i mtshan ma kun// so so'i mtshan ma mngon sum las// sgyu ma lta bur mngon byas te// sgyu ma nyid la sgyu ma rol// ye shes nyid la ye shes thim// thim gyur dbyings nas phyag rgya che// 'di ni byang chub sems kyi rgyu// ma btang bzhin du yongs la gsal// skye shi med pa'i chos skur dmigs// 'du 'bral med pa'i gsung du 'gyur// 'gyur ba med pa'i sku brnyes nas// dbang chen 'dus pa'i tan+t+ra las// gzi byin tshe'i le'u ste nyi shu rtsa brgyad pa'o//// bsdus na yid bzhin rin po che// yid bzhin gter du gyur pas sbas pa yin// phrin las zhi khro lta bu yang// sprul pa mang po ji ltar ston pa yang// dus gsum sgrol ba'i nus mthu bsam yas kyang// lhun gyis grub pa'i dbyings su sbas pa yin// snang srid 'khor ba'i chos rnams ma lus pa// yab yum bde ba'i ngang du ro gcig ste// rtag par bden pa'i byin rlabs chen po yang// ye nas btsal ba med par lhun gyis gnas// sdug bsngal nyid kyang bde ba'i longs spyod dpal// ma btsal gzhan na man ngag sbas pa yin// lta ba 'di la skal ldan gang gnas pa// da lta nyid du lta ba dbye bsal med// spyod pa 'di la su zhig gang brtson pa// da lta nyid nas phrin las lhun gyis grub// dam tshig 'di la skyes bu gang sdom pa// klong du gyur pas bsrung du med pa'o// ngang gis ma ltos dngos grub yin pas na// ma bsgrub lhun gyis grub pas bzhag pa yin// chos rnams thams cad 'byung ba ro gcig pas// sa chu la sogs rnam pa tha dad pa// mtshan ma mngon du gsal bar gyur na yang// don gyi lha mo bzhi yi dbyings la rdzogs// man ngag sbas pa'i lung du grags pa'o// sa la gnas pa'i skyes bu yang// rab kyi gdams ngag rna brgyud pa// 'di rtags tshe rabs nges pa'i rnal 'byor pas// rigs dang tshad ma sbyor ba'i nges blo yin// sems kyi gting du zhen pa gyur pa ni// sbas pa'i man ngag snod dang mi 'gal bas// lta bas ji ltar chod bzhin gdon mi za// dbang chen 'dus pa'i tan+t+ra las// man ngag sbas pa'i le'u ste nyi shu rtsa dgu pa'o//// lta ba rgya mtsho'i le'u 'di// snod ldan rnal 'byor don du gsungs// bden pa gnyis kyi lam mtshon te// sa dang sa yi rim pa bzhin// bgrod nas phyin par 'dod pa gang// mdongs pas nam mkhar bsnyeg pa bzhin// phyin pa'i gnas med khyab pa la// gnas las 'phos pa med pas nas// lta ba rgya mtsho bzhin du blta// rten cing 'brel bar bcas pa yi// phyi nang 'bras bu rgyur bcas kun// lugs dang lugs las ldog pa ni// sa yi rim par 'dod pa dag/smig rgyu bzhin du chur dmigs te// phrad par mi 'gyur phyin mi 'gyur// 'on kyang ma bgrod sar bzhag pas// lta ba rgya mtsho bzhin du blta// dmigs su med par dmigs bya ba// de nyid dmigs pa chen po ste// mtshan ma med dang bcas pa yang// mtshon pa yul dang bral lo zhes// thams cad dmigs pa'i yul las 'das// bla med go 'phang bgrod pa yang// ma bgrod phyin pas bla na med// lta ba rgya mtsho bzhin du blta// dag pa'i don phyir rang gi rig rtogs pas// bran dang rje bo lta bu'i tshul gyis kyang// sangs rgyas sa yi go rim btsal btar 'dod// phyi nang dag pa'i rgyu rkyen tshogs pa yis// mtho ris lha yi gnas thob gang yin pa// lta ba 'di yi lung du lhan ne ba// rgya mtsho bzhin du g.yo ba med par blta// de nyid gzhi dang ldan par bsgom pa yang// gang la mi rtog ci la mi chags te// me long bzhin du rig pa mngon sum yal// 'bras bu lam du ma nor rtsol ba ni// bsgom pa'i mthu yod 'phags lam ring ba yang// lta ba rgya mtsho bzhin du blta// byin rlabs chen po sangs rgyas khyad par can// thams cad lha yi dngos grub pas// rig pa sgom par bcas pa yis// sa dang sa yi rim pa bgrod pa yang// theg pa mchog gi ngang la ye gnas pas// lta ba rgya mtsho bzhin du zab mor blta// 'byung dang 'byung 'gyur yab yum yin pas na// drug lnga nyid kyang ye nas sangs rgyas pas// sdug bsngal chu bor bying ba'i 'gro ba rnams// sgrol dang sbyor ba'i phrin las zab mo yis// zhing bcu gnas su sgrol ba'i sangs rgyas kyang// lta ba 'di yi ngang du sangs rgyas pas// lta ba rgya mtsho bzhin du lhun gyis grub// sna tshogs kun tu bzang po rdo rje sems// de nyid ma skyes pa ni yum gyi mkha'// snang la rang bzhin med par yab kyi dbyings// de yang dbyer med 'bras bu sku gsung thugs// rtsol dang bral ba'i sa la dgod pa yang// lta ba'i ngang la rgya mtsho ji bzhin du// rgya mtsho chen por chu bo kun 'bab ltar// theg pa'i rgyal po kun tu bzang po 'di// bde mchog lhun gyis grub pa'i man ngag pas// ming dang mtshan ma'i spyod yul ma yin te// dbye ba med pa'i ngang du rdzogs sangs rgyas// lta ba rgya mtsho'i ting 'dzin ye nas dag/ de bas lta ba rgya mtsho bzhin du blta// gu ya sa ma ya yi thugs ka nas// skal ldan 'ga' yi don du gsungs pa ni// snod min phal gyi spyod yul ma yin pas// chu srin dang ni nor bu rin chen tshul// rgya mtsho'i gting gi rdo ltar khar phyung min// rmongs shing 'chal bas gal te khar phyung na// rang gzhan ngan song gsum du nges 'khyams na// gdeng dang ldan pa'i skyes bu'i tugs la brnag/ dbang chen 'dus pa'i tan+t+ra las// lta bu rgya mtsho'i le'u ste sum cu pa'o//// dngos grub brnyes pa'i rnal 'byor dbang phyug gis// sgrub pa'i man ngag sbas pa ni// phyi rabs rnal 'byor skal rab la// snyan khyung brgyud nas gsungs pa dag/ man ngag sbas pa'i le'u zhes bya ste// sngon tshe man ngag sbas pa'i bka'// dbang phyug go 'phang thob pa'i rgyu// sku gsung thugs su bsgrub pa la// bdud dang gshin rje dregs pa yis// dngos grub bar du gcod pa la// dpal gyi thugs rjes nan tan gyis// bdud dang srin po bsgral ba dang// phyi rabs sngags 'chang sgrub pa po// dbang phyug gral du bzhag pa'i phyir// sbas pa'i tan+t+ra gsungs pa las// man ngag sbas pa 'di rnams so// pho brang rin chen gzhal yas khang// gdan dang 'byung bar gyur pa rnams// dbang chen nyid kyi sku bskyed pa'i// 'byung lnga yi ge hUM la sbas// rigs la dbang ba'i he ru ka/ rin chen khri bzhir sbas pa'o// ma tshogs dbang phyug nyi shu brgyad// 'degs pa'i gdan du sbas par bshad// ma bdun gsang ba'i phyag rgya yang// nyi ma bdun du sbas pa yin// gdan khri pad+mar brtsegs pa yang// shes rab yum gyi rang bzhin te// gsang ba yum gyi b+ha gar sbas// zhe sdang rdo rje'i phyag rgya yang// man ngag gsang bar brgyud pas ni// gar gyi dbang phyug sku la sbas// rdo rje dbyings kyi dkyil 'khor rnams// dbu lnga'i gzhal yas nyid la sbas// khro rgyal thabs kyis brgyud pa'i sku// dmar po srog gi rang bzhin ni// ha ya grI ba'i rta mgor sbas// hU~M kA ra dang khro bo brgyad// 'khor ba zil gyis gnan pa'i phyir// chas dang ting 'dzin zhabs su sbas// dur khrod gsang ba'i yum rnams ni// lha mo bzhi yang rab brgyud nas// rin chen gshog par sbas pa'o// ta krita bcu drug khros pa yang// dur khrod phra men bcu drug ni// thabs dang shes rab tshul gyis su// phyag mtshan bcu drug nyid la sbas// sprul pa'i 'khor du grags pa kun// long ba'i tshogs su sbas pa'o// sgo ba chen po yum dang bcas// mgo dgu brtsegs pa nyid du sbas// bka' nyan las kyi mngag gzhug ma// cir yang snang zhing mdzad pa pas// dmigs pa bzhin du gzhal nas ni// dngos po med pa'i thig le che// phyi nang snod bcud ma lus phyag rgya'i sku// dngos dang dngos med mtshan ma thams cad kyang// dang po nyid kyang skye 'gag med pa'i ngang// dbyings nas ma g.yos g.yos pa'i mthu dang bral// mnyam pa chen por gcig pas sbas pa yin// de lta bas na don la mi gnyis kyang// sgra mtha' mang po ji skad brjod pa ni// de nyid sgra mthar stong pas brjod du med// bsam du brjod med chos dbyings nam mkha' 'dra// de yi ngang las rdul tsam ma g.yos kyang// byin rlabs so so'i rigs dang kha dog kun// ma 'dres bzhin du bye brag gsal ba yang// ngo bo gcig nyid du mar sbas pa yin// 'bar ba'i byin rlabs rmad du byung ba ni// che ba'i yon tan dpag gis mi lang bas// 'ub kyis gcig par dbyer med pa// stong pa chen po'i 'bras bu mya ngan 'das// gsal ba'i phyag mtshan bcu drug 'bar ba ni// sprul pas klu srin 'dul bar khro bsar yang// ye shes dbyings la sbyor ba mya ngan 'das// dbu rgyan tshar gsum phreng bas bklubs pa ni// dug sum sgrol zhing mdzes par snang ba yang// dngos gzhi byang chub sems su mya ngan 'das// na bza' rdo rje'i go chas brgyan pa ni// gdul byar thabs su brjid par bstan pa yang// rang bzhin nyid ni chos skur gcig pa'i phyir// ma skyes sems kyi ngang la mya ngan 'das// rta mgo ljang gu'i rgyan gyi bye brag kyang// 'khor ba mya ngan 'das par 'dzin pa'i phyir// rak+ta yum gyi klong du mya ngan 'das// sbrul nag gdu bu la sogs brgyan pa rnams// klu rgyal dbang du bsdu phyir snang ba ni// bkra shis klu yi rgyal sa gzung ba'i phyir// nag po ser po dmar po bsnams pa yang// mtshan ma chos kyi dbyings su mya ngan 'das// stong khams khyab pa'i ral pa dmar po yang// spyan dang shangs dang snyan la sogs pa yi// dbang po lnga yi khyab pa'i bye brag las// mtshan ma'i cho 'phrul mang por rab tu sprul// spyi mthun lnga lnga so so'i snang ba yang// stong pa chen po'i dbyings su mya ngan 'das// 'khor dang sprul pa'i khyad par ma lus kun// snang tsam nyid nas cir yang mi dmigs pas// gzi ldan yum gyi dbyings su mya ngan 'das// phyag rgya la sogs mtshan ma thams cad kun// kun bzang gnyis med nam mkha'i dbyings yangs na// rtsol ba med par lhun gyis grub pa'i phyir// gsang ba myang 'das zhes ston pas gsungs// dbang chen 'dus pa'i tan+t+ra las// mya ngan 'das pa'i le'u ste so gcig pa'o//// rigs gnyis lung gi brgyud pa las// dngos grub ldan pa'i rnal 'byor pas// lta ba byang chub sems le'u// zab mo'i don du 'di gsungs so// ting 'dzin thabs kyi brgyud pa'i bye brag las// dbang chen dkyil 'khor rim pa cir snang ba// yab yum gnyis med byang chub sems su blta// gzhal yas yid bzhin lhun gyis grub pa yang// skyon med yon tan phun sum tshogs ldan pas// yab yum gnyis med byang chub sems su blta// me ri dmar po phyogs bzhir 'phro ba yang// stong khams yongs su bsreg pa'i mthur ldan pas// yab yum gnyis med byang chub sems su blta// me sbrul dmar po nag por snang ba yang// zhe sdang gdug pa'i dgra bgegs 'dul ba dang// gnyen po gzhan na med pa'i mthur ldan pas// yab yum gnyis med byang chub sems su blta// ka ba gdung ma nyi mas brgyan pa yang// rgyal ba'i dkyil 'khor 'degs pa'i mthu ldan pas// yab yum gnyis med byang chub sems su blta// 'phan dang za ra tshag dang ba dan dang// bla re rgyal mtshan la sogs mang po kun// chos kyi ru mtshon chen po 'phyar ba yis// bdud bzhi bsnyal ba'i mgo bo gnan pa'i phyir// gdug pa'i gnyen po gzhan med pas// pha rol zil gyis gnon pa'i mthu// yab yum gnyis med byang chub sems su blta// rin chen khri rkang phyogs bzhir gsal ba yang// sprin med nyi bdun gsal ba'i mthur ldan pa'i// yab yum gnyis med byang chub sems su blta// gser gyi seng ge nyi shu bzhir snang ba// stobs kyi dpag tshad gzhan las 'phags pa'i phyir// theg pa'i nang nas rgyal po'i blta ba ste// theg pa phra mo 'dul ba'i mthu ldan pas// yab yum gnyis med byang chub sems su blta// pad+ma kha stong ldan par snang ba yang// sna tshogs 'byung zhing skye ba'i rgyu dang ldan// nyes pa'i skyon dang bral ba'i mthu yod pas// yab yum gnyis med byang chub sems su blta// yid bzhin rin chen nyi zla'i 'od snang bas// 'jig rten yongs su sgron ltar 'bar ba yang// stong gsum mun nag sel ba'i mthu ldan pas// yab yum gnyis med byang chub sems su blta// zhe sdang rdo rje phyag rgya'i skur gsal bas// rgyal ba mang po thugs kyi dngos gzhi ste// gcig las 'dod dgur bsgyur ba'i mthu ldan pas// yab yum gnyis med byang chub sems su blta// rmad byung pad+ma gar gyi skur gsal bas// khams gsum ma lus dbang du bsdu ba dang// ngan song gnas su stongs pa'i mthu ldan pas// yab yum gnyis med byang chub sems su blta// dbu gtsug rta mgo ljang gur bstan pa ni// klu yi rgyal po'i rdzu 'phrul 'phrog pa dang// thugs rje chags pas 'gro ba sgrol ba'i mthu// yab yum gnyis med byang chub sems su blta// rdo rje rin chen las byung gshog pa ni// rdzu 'phrul la sogs gar yang thogs pa med// myur ba'i shugs ldan nam mkha'i dbyings phyug ma// thugs rje kun la snyoms pa'i mthur ldan pa'i// yab yum gnyis med byang chub sems su blta// bcu drug phyag na mtshon cha bsnams pa yang// phra men bcu drug dbyings la rol pa dang// mi mthun gnyen pos 'dul ba'i mthur ldan pas// yab yum gnyis med byang chub su blta// thod pa tshar gsum 'phreng ba ldan pa ni// dug gsum tshogs la zhen pa bzlog pa dang// dug gsum dbyings su sgrol ba'i mthu yod pas// yab yum gnyis med byang chub sems su blta// mnyen lcug sbrul gyi chun por snang ba yang// sku la zhe sdang gdug pa mi mnga' yang// mi mthun dregs pa zhi bar bya ba dang// klu dbang 'khor gyis dbang bskur mthur ldan pas// yab yum gnyis med byang chub sems su blta// zhabs kyi khro brgyad gzir gnon gtong ba yang// sa bcu 'das shing pha rol phyin rdzogs te// dbang bcu rim par rdzogs pa'i mthu ldan pas// yab yum gnyis med byang chub sems su blta// phyag rgya chen por gcig tu ma nges pas// 'khor gyi pho nya yang sprul mang po yang// dbang gi sku gsung thugs las ma g.yos kyang// log rtog 'dul phyir rnam par sprul pa ni// sku gsum nyid las g.yos pa med pas na// thams cad ma lus spros med thig le che// 'byung ba lnga la sogs pas bsdus pa kun// ye nas spros med byang chub sems su blta// blta ba 'di la gang zhig goms pa ni// da lta nyid du lha dang skal ba mnyam// dbang chen 'dus pa'i tan+t+ra las// blta ba byang chub sems kyi le'u ste so gnyis pa'o//// phun sum tshogs pa lnga ldan pa// de yang gsang bar shes par bya// maN+Dal zla gam bye brag kyang// mkhas pas dbyings su shes par bya// de phyir bsgrub pa zab mo'am// nye lam zhes kyang de la brjod// de ltar gyur pa'i dkyil 'khor du// dbang gi rgyal po'i sku bskyed cing// gdan lnga rim gyis bkod pa yang// zab mo'i don du shes par bya// rdzogs pa chen po yin pa'i phyir// gzhal yas brdal ba chos kyi dbyings// nam mkha' lta bur gnas mi dmigs// de lta'i dbus su sku bskyed pa// pad+ma gar gyi dbang phyug dang// gnyis su med par gzi dang ldan// rtogs nas gdeng du lon pa ni// zab mo zhes kyang de la brjod// de nas yum rnams bsgrub pa yang// dra ba can la sogs pa bzhi// spros dang bral bar shes par bya// zab mo zhes ni mkhas pas gsungs// dkyil 'khor chen po yin pa'i phyir// sgo srung khro bo mgo dbu brtsegs// theg chen dgu yi rim pa bzhin// de nyid gsang bar shes par bya// de phyir theg rgyal nye lam pa// de ltar dkyil 'khor rdzogs pa dang// rgyal po 'khor dang ldan pa bzhin// phyi rol long ba rgyab 'brel yang// chos skur gcig pas tha dad min// de yi phyi rim dmus long rnams// mi 'gyur dbyings su mya ngan 'das// 'khor ba ma spangs mya ngan 'das// de phyir dmus long 'khor ba can// phyi rim kham rgya chen mo drug/ gzi ldan sprul par grags pas na// nyung dkar tshul bzhin zlum por bzhugs// 'khor ba dbyings su thim pa'i phyir// phyi rim spyang mo sgrub pa ni// zhabs kyi sprul pa yin pas na// pho nyar bzang zhing mngag par mgyogs// de yang chos nyid yin pa'i phyir// zab mo'i don du shes par bya// khyi brgyad bkye zhing bsgrub pa yang// gsang ba'i sprul pa yin pa'i phyir// phra men sprul par shes par bya// sprul pa me 'brug nag po rnams// yab yum 'du 'bral med pa yi// sprul pa yin par bstan pa yang// yang gsang srid pa'i rgyal mor thim// rtsa ba'i dkyil 'khor bsgrub pa ni// phung po lnga nyid gzhal yas khang// tsit+ta dpal be'u sems kyi rten// dbang chen yab yum phyag rgyar gsal// ma bzhi bu brgyad dbyings phyug bzhi// de yang mtshan med spros dang bral// dbu lnga rigs lnga yab yum lnga// de yang mtshan med spros dang bral// rnam shes brgyad po gnas pa yang// long ba rgyab 'brel ye nas dag/ dmus long 'khor bar ye nas gnas// zhabs kyi chas brgyad gnas su ngag/ lcags kyi spyang mor ye nas gnas// khyi brgyad sbyang mo brgyad dang gcig/ zhabs kyi sprul par rab tu grags// de rnams rtsa bar bsdus pa'i phyir// zab mor bsgrub par shes par bya'o// yang ni zab mo zhes bya ba// dbyings las ye shes bsgrub pa'i phyir// ye shes dbyings su bzhugs pa la// rtag tu gzi ldan thugs kar sbas// zab mo zhes kyang de la bsngags// long ba rgyab 'brel ye shes 'khor// mgo dgu brtsegs pa yan chad kun// 'khor ni chos kyi dbyings su thim// gtso bo yab yum ye shes te// dbyings la ye shes sbyor ba'i phyir// stong pa chen po rab bsgoms nas// zab mo zhes kyang de la brjod// de yang dbyings las ma g.yos kyang// mtshan ma'i dngos po bshig pa dang// log par lta ba gzhom pa'i phyir// pho nya rnams zhes bshad pa'o// bdag nyid chen por rab rtogs te// rtsol ba med pa dbyings gcig na// pho nya zhes kyang de la bya// bya dang byed pa mi dmigs shing// 'phro 'du la sogs mi brtsam na// dgye ba zhes kyang de la bya// pho nya'i don drug bshad pa ni// sku dang rngam dang ye shes dang// bsgrub dang sprul pa yig 'bru'o// yang na pho nya gsum du bshad// don dang las dang rigs la sogs// pho nya rnams ni dgye bar bya// zhes pa bshad bsgrub byang chub sems// zab mo'i le'u zhes kyang bya'o// dbang chen 'dus pa'i tan+t+ra las/nye lam byang chub sems kyi le'u ste sum cu so gsum pa'o//// skal dang ldan pa'i rnal 'byor sgrub pa pos// ro bsregs thal ba bsgrub pa'i phyir// hUM mdzad rol ba'i le'u ste// bsdus te gsungs pa'i sgrub thabs ni// phun sum tshogs pa lngar ldan pa'i// yid du 'ong ba'i dam pa rtsal// dang po sa bslang dbang bya byin gyis brlab// brtag pa'i gnas kyi maN+Dal yang// 'dom gang gru bzhi khyud 'khor bcas// steng du rak+ta'i go ma ye// chags pa'i dam tshig sngags kyis byug/ de nas mtshan dang ldan pa'i yum// khrus byas dar ldan gos kyis bklub// dur khrod bka' dang mthun pa yi// gsang ba'i thig skud bkal nas kyang// spyi bo bzhag ste dbang bskur bas// chags pa chen por mchod pa'i sngags// lan gsum bzlas te gzi ldan du// gyur pa dmigs te dgyes par bya// zla gam kha sprod zlum po la// dkyil du he zhal gru gsum pa// gru gsum 'phang du brtseg par bya// sa tshon mgar ba'i so dog gam// yang na sbram chen bsregs pa'i sa// nag po'i sa las he zhal bri// mU la rak+tas zla gam bkang// 'od phung mtha' bskor sprugs nas sngags// dmar po yon tan dbang du sdud// he yi dbus su sngags pa'i rdzas// dmar po dbang dang ldan pa'i shing// bshus la sogs pa'i snum por bsngo// he yi dbus su yangs par bshams// de yi 'gram mam steng dag tu// thod pa rnam gnyis bcu dang ldan// 'phro 'du dmigs pa'i steng du gzhag/ mtha' skor me ri dmar po la// phur pa dang ni rdzas rnams dgram// me sngags btab ste gzhag par bya// gsang ba'i gzungs thag dmar po gcig/ zla gam steng du longs spyod dgram// de nas thal ba bsgrub pa'i phyir// bam gyi ri bo'i shar phyogs su// ma mo'i gom pa drug cu'i sar// rdo rje'i 'gros su song nas su// rdo rje dpung gi sa phyogs su// bcu drug rol ba'i pho nya 'gyed// bkra shis chen po'i rngam bros bskor// yi ge hUM gis rngam khro'am// phyung nas shul du dmigs pa yang// khro bo'i rdzas la dmigs nas gdab// byang shar mtshams su bshig pa las// lu gu rgyud kyi bro bskor te// dur khrod dag las spyan drangs te// bshig nas mngon spyod legs par bsgom// snying ni dran pa'i rten yin pas// he yi steng du gzhag par bya// b+han d+ha bzang po lnga yi rten// phral nas zla gam dbus su gzhag/ gzi ldan sa yi lha mo lnga// steng du dbang po lnga yang gzhag/ re'u cha la ni nang khrol te// rkang lag sgo bzhi rnams su'o// thog thag tu ni sgal rtsib ste// me ri la ni rgyu phreng ngo// shun gyi yang dang rlung gi phyogs// sna tshogs yam shing brdzangs nas gzhag/ de nas thal ba'i sa bon mchog/ de yi khrod du 'brug rus dang// byi la ba glang rnga mo dang// mkha' lding la sogs 'bras bu lnga// nyi ma la sogs sa yang ste// mar la sogs pa byug la stsal// mtshan dang ldan pa'i shes rab kyis// thal mo sbyar nas 'di skad do// bU dza me/ de yi 'og tu me yi lha// rgyal po bsgom pa'i ting nge 'dzin// snying po bzlas te g.yogs nas bsdam// bsnyen pa nyi khri bton nas kyang// mchod cing sbyin pa'i las bya'o// ting 'dzin mchod pas tshims byas nas// de nas rdzas kyi dam pas mchod// mtshan nyid gsum pa'i shes rab kyi// tsit+ta blangs te rus par bcas// phul nas bdag la dbyings su bsam// mtshan dang rus pa de bzhin te// rna ba dang ni rus dang mig/ lce dang sna dang khrag la sogs// sha dang rkang yang de bzhin te// tshil dang skra la sogs pa dbul// de nas ba su ta yi rdzas// mtshan dang ldan pas blangs te dbul// pho nya mchod pa'i sbyin sreg ste// gtun khung chen mor snga ma bzhin// de nas bgegs chen brdung ba'i phyir// rtse 'jo bro yang 'di skad do// ha na da ha ba tsa hUM phaT// mchod la sogs pa'i shes tshogs ldan// gang yang rung pa drang ba'i phyir// snying la rtse 'jo thabs kyi bro// lu gu rgyud kyis 'di skad do// ang+ku sha dzaH/ de nas dbang po lnga rnams la// rtse 'jo'i tshul gyis gar byed cing// brjid pa'i stabs kyis 'di skad do// pA sha hUM/ s+pho Ta baM/ g+haN+De hoH// de dag zhing bcu sgrol ba'i tshig/dkyil 'khor de yi don yang bshad// 'dom gang gru bzhi gru chad can// zla gam kha sprod gsang ba'i mkha'// zlum po spros pa med pa'i don// he ni dbyings phyug gzi ldan dbyings// yam shing byang chub sems su shes// me ni gnyis med sprul pa yin// dam rdzas lha mo mang po dgram// de nas rus pa'i yon tan bshad// 'bras bu lnga ni rigs lngar bshad// rus sbal klu chen zil gyis gnon// 'brug ni mkha' 'gro dbang du sdud// byi las phra men dngos grub 'du// ba glang stobs kyis bgegs chen 'dul// rnga mo srin po'i mtha' yang 'phrog/ 'dab chags pho nya mngag pa'i mchog/ mi rus thal ba'i dus su za// de nas sbyin bsreg bya ba ni// rA ga pU dza s+pha ra Na hUM dzaHdzaH// mchod cing bsreg pa'i las bya'o// de nas thugs dam gzhung bzhin bskul// de yi dus su dgod pa yang// rU tra can gyi snod nang du// rus pa btags pa'i phye ma blug/dmigs pa gzhung las byung ba bzhin// nang du blugs nas dus la gzhag/ de nas rdo rje lcam dral gyis// bskor te dbyangs blang dbus su gzhug/ de nas dkyil 'khor rdzogs pa yang// rdo rje'i go tshags gzhung bzhin spel// phrin las bcol ba lnga ma bzhin// yab yum gnyis med sbyor ba las// sems kyi kha dog dkar po'i yi ge ste// hrIH// mkha' mnyam spros shing slar yang bsdu// dngos po med cing stong par gyur par dmigs// lha mo mgo dgu ma dang rol pa las// byang chub sems ni gu h+ya dmar po spro// rus pa mtshan med rA ga bzhin// dra ba mo dang gnyis med rol pa las// byang chub sems ni hUM gis stong khams gang// bskul zhing 'dus byas 'bar ba 'phros par dmigs// a mo de bas gnyis med gnyis gyur nas// sems ni kha dog dkar dmar bsnol ma yang// skar tshogs lta bur rab tu 'khrigs pas bskul// bsdus pas tshims gyur btso ma'i kha dog bzhin// sder mo can gyi sa ltar byang chub sems// rin chen zhun ma lta bur bskul sbyangs nas// dngos min byang chub sems su zhu// de nas dngos grub blang ba'i phyir// sgrub pa de yi mtshan ldan yo byad pas// rA ga pU dza zhes brjod cing// thal chen 'od du zhu bar dmigs// taM las rlung gis btegs nas kyang// gzi ldan gsang ba b+ha ga las// rang bzhin med pa'i chos skur gsal// mthar phyin bsnyems shing 'gro rgyud sbyang// slar yang mi g.yo dbyings su thim// de nas gsang ba'i mdud pa grol// snum la 'phel gyur grub pa'i rtags// nyung na spogs shing ting 'dzin las// grub nas ngo la mtshan mas gdab// mtshan ldan lag mthil a bsams te// bros bskor dbang skur byin gyis brlab// de nas dngos grub go skabs dbye// sa ma ye pad+ma d+ha ra pU tsa me/dang po de bI bstan par bya// de nas tshe dang rim pa bzhin// chad na bar chad chen po 'byung// lhag na rim pa bzhin du 'gro// rdo rje slob dpon yab yum dang// mched dang dgongs pa'i tshad dang sbyar// de nas lus la rtag bcangs na// sku gsung thugs kyi dngos grub thob// lus kyang dar la bab cing sra// longs spyod ldan zhing bde skyid 'gyur// de nas lhag ma'i gtor ma gtang// dkyil 'khor bsdu zhing bkra shis gsol// yab bar mi dor ma mo bstan// glu dang dbyangs dang rnga la sogs// rtsed 'jo mang po lugs bzhin bya// dbang chen 'dus pa'i tan+t+ra las thal chen bsgrub pa'i le'u ste sum cu so bzhi pa'o//// dang po phun sum tshogs ldan nas// dkyil 'khor tshad dang ldan pa la// thig bzhi btab pas le'u tshe dgu// dbus su gru gsum 'bar ba'o// rgya yi tshad ni khru gang la// 'phang du kha khyer mkhyid gang ba'o// kha dog mdzes pa'i tshon rtsi lnga// le tshe brgyad la rim pa bzhin// dbus su mthing nag yig 'bru bcas// rgyan dang gdags pa la sogs pas// mtshan dang ldan pa'i yam shing dang// dbang dang ldan pa'i b+han d+ha rnams// he yi dbus su brdzangs la dgab// dpal dang ma mo mchod pa'i rdzas// byang chub sems dang rdo rje'i chu// zil dngar rak+ta sha la sogs// rim par bkram pa'i sa phyogs ni// dbus su byang chub sems chen po// shar gyi gling la rdo rje chu// zil pa rak+ta lho phyogs su// sha ni nub tu dgram par bsngags// dri la sogs pa byang du'o// sha khrag gtor ma la sogs kun// 'bar ba'i dkyil 'khor thog thag tu// pho nya rim pa bzhin du dgod// skad cig ma yi ting 'dzin gyis// bsgom dang bsnyen dang bsgrub pa dang// 'dzab la sogs pa ma rdzogs tshe// bcu gcig phrin las gzhung bzhin 'bad// bsnyen pa nyi khri rdzogs pa dang// dpal dang ma mo mchod pa'i phyir// sbyin bsreg gzhung bzhin brtson par 'bad// gar gyi dbang phyug chen po la// byang chub sems kyi mchod pa yis// mchod cing bsreg pa'i las bya'o// rdo rje chu ni zi ldan la'o// zil dngar lho yi phyogs su ste// sha chen nub kyi phyogs su dbul// dri la sogs pa byang du dbul// yum bzhi la yang de bzhin te// mchod sbyin bsreg pa'i las bya'o// sha khrag gtor ma pho nya la// mchod cing bsreg pa'i las byas nas// bsnyen pa chos kyi dbyings nas drangs// bsgrub pa gnyis med mnyam par gzhag/ 'dzab ni gzhung bzhin bgrang byar bya// skabs su las ni bcu gcig tsam// zhag grangs dag ni tshang ba dang// dngos grub blang ba'i cho ga dang// dbang bskur ba dang dkyil 'khor nas// rim pa bzhin du dbyung bar bya// de nas gtor ma la sogs pa'o// lhag ma skyong zhing pho nya bsnyen// las kyi go rim ma nor bar// mchod sbyin bsreg pa'i las la 'bad// de nas rdzas dang lag cha dang// dkyil 'khor lha dang bye brag rnams// rim pa bzhin du mtha' nas spro// bskul dang don byas slar 'dus shing// bdag dang bcas par rab zhugs nas// rim pa bzhin du dbus su bstim// snying po dang ni phyag mtshan chas// rten par gyur nas dbyings su gzhag/tshon rtsi dang ni sol ba dang// gzhan pa lhag ma ci yod rnams// thal ba'i tshogs dang bcas pa kun// gru gsum yum gyi mkha' la bstim// de yang mchod sbyin bsreg par sbyar// de nas bshags dang sbyang ba dang// glu bro la sogs longs spyod rnams// ma mo dang ni mkha' 'gro dang// pho nya ma mo bstan pa'i phyir// chas dang ldan par 'bar bar bya'o// dbang chen 'dus pa'i tan+ta las/ sbyin bsreg gi le'u ste sum cu so lnga pa'o//// kun bzhi gtan la bebs pa'i le'u 'di// snga rabs 'das pa'i dgongs pa bstun nas kyang// de yang chos rnams rtsa ba kun gzhir 'dus// kun gzhi'i rtsa ba ye shes lngar snang yang// de lta bu yi don la mnyam bzhag pas// kun gzhi gnas gyur pa yang de bzhin nyid// ye shes lnga nyid de na tshang bas na// ye shes lnga po gcig tu 'dus rig bya// sems can kun gzhi'i rtsa ba don rtogs nas// ye nas sangs rgyas pas na bcos med par// dang po'i sa nyid non par mkhas pas gsungs// gnas skabs de na yod med lta mthar thug/ sems kyi rang bzhin ji ltar yin pa dang// sems la mtshan ma yod med brtag par bya// sems de nyid la blta ba ji lta bu// sems de snang ba yin nam mi snang yin// sems de sangs rgyas yin nam sangs rgyas min// sems las sangs rgyas gud na yod dam med// de ltar blta ba cer gzhag zin bya dgod// de ltar rtogs nas gdeng du gyur pa dang// 'dus byas dge rtsa mi dgag nus tshad spyad// 'on tang chos kun rang gi sems su 'dus// bsams shing bsgoms med ngang la gzhag pa na// cir snang cir srid mtshan med dbyings gcig pas// 'du 'bral med pa'i chos nyid ye sangs rgyas// don dam brjod du med pa ma btsal yang// lhun grub sa de da lta nyid nas non// de lta'i don rtogs nyams su gsal na yang// chos kun sgo dang mi 'gal bstan pa'i phyir// ting 'dzin gsum ldan gol sa'i sgo bkag nas// drod chen gsum gyis sangs rgyas dgongs par myong// de bas ting 'dzin rnam gsum rab bsgom pas// 'bras bu pha rol phyin drug rang bzhin rdzogs// rang sems nam mkha' ma g.yos ngang la gzhag/ 'on tang drang bzhi'i rtog pa ci byung yang// chos nyid ma g.yos rtog pa ma bcad pas// ngang gis ma bcos yongs kyis 'od gsal zhes// snga rabs mkhas ldan rnams kyis rab tu bsngags// yid dang sems la gsal byed ting 'dzin te// yo ga gsum don gnas skabs dbang chen gsal// don de bas na snyan khung rab brgyud nas// sems nyid sangs rgyas don du shes par bya'o// de lta bu yi don rtogs skyes bu la// ci yang mi brtseg yon gyi rnam grangs dbul// 'on tang byas zin don rtogs nas// ye nas bdag nyid rnam par dag ces bya// de la 'dzin chags bde sdug ci byung yang// tshogs gnyis dus gcig rdzogs par dam bca'o// rnam par mi rtog ting 'dzin mtshan ma rnam par dag/chos nyid mngon sum gyur na che yon rgyu mi 'chad// sgrib pa gnyis byang tshogs gnyis rdzogs pas na// phyi nang bshad dang mthun par sa rnams non// 'di ni bde gshegs dgongs spyod zab mo yin// sems can phal gyi spyod yul ma yin no// sangs rgyas rnams kyis mnyam pa'i don rtogs kyang// 'gro ba sems can rnams kyi ma rtogs pas// gdod nas zhen pa'i bag chags sbyang dka' ba// sa dang sa yi 'dod stongs khyad yod gsungs// mnyam par rtogs dang ma rtogs gnyis med gsal dus su// sangs rgyas che ba'i yon tan lhun gyis grub brnyes so// stong dang sa bzhin med cing ma skyes khyad par ci// yod med rtag chad bya btsal la sogs pa// thams cad lhun gyis grub par ye gnas pa'o// rgyu dang 'bras bu cir snang cir srid kyang// bud+d+ha nyag gcig sku yi rgyan du snang// de nyid ma bkag dkyil 'khor rdzogs pa'i tshul// gong 'og la sogs skyon yon gnyis po dag/ rtogs dang ma rtogs re rtsol gnas pa'i ming tsam gyis// rgyu 'bras so sor gsal bar smra na yang// lta spyod mnyam pa'i don de shes bya dgos// lta spyod ye nas 'du 'bral med bzhin du// mi snang snang ba'i spyod yul cir snang yang// phyag rgya'i dkyil 'khor ma gyur gang yang med// gnas skabs de na tshogs rdzogs thabs dang shes rab 'brel// de tsam nyid na dgongs pa chos thams cad// don du ye shes chen po'i sems su 'dus// sems ni ye nas ngang gis ma bcos pas// ting nge 'dzin gyi dmigs pa thams cad bral// de lta bu yi byang chub gnas pa ni// bgrod pa'i sa dang lta ba'i gzugs med pas// mtshan mar btags pa'i skyon yon ma lus mkhyen// theg rgyal yang rtses the tshom gegs bsal zhing// bla med dngos grub chen por la bzla'o// de bas dbu ma'i blta ba cha phra ba// thams cad ma lus dbang du rab bsdus te// gzhal las spags pa'i don du 'di gsungs so// mdo sde la sogs phyi nang yul dag pas// dag pa'i mtshan ma tsam du gnas pa dang// rnal 'byor spyod pas chos rnams sems su 'dus// mtha' gnyis ngang gis bsal zhes smra ba yang// mnyam par rtogs las gud na chos med do// gzhan na yod par 'dod na bag chags skyon yin no// de bas sgos chos so sor cir snang yang/ byis pa'i spyod yul 'khrul snang nyid snang yin// sangs rgyas sems can sgyu ma smig rgyu'i tshul// ye shes skye 'gag med pas nam mkha' bzhin// de yi dus na 'das te mthong ba med// de yang mi snang nyid na skyon med yin// 'khrul ba yin pas btub pa ma yin no// mthong dang ma mthong snang ba rang bzhin med// dgongs spyod zab mo'i man ngag thams cad ni// rang rig ye shes mngon du gsal dus na// dag pa'i ye shes sangs rgyas mthong zhes bya// de ltar ye shes sangs rgyas mthong ba'i tshe// bag chags med cing mthong yul las 'das tshe// bya med snang med mi btsal bzhag pa yin// dmigs pa'i lus med chos lam bag chags spang// mthong tshor bde ba'i lam nyid mu med brdal ba'i dbyings// 'gro ldog spyi tshug ye shes dbyings mi g.yo// de yang tha tshig mdo sde zab mo nang// de lta'i don la sangs rgyas spyod yul mdzad mi mnga'// chos rnams thams cad rig pa'i ye shes snang// des 'brel phran chad gdod nas ma skyes te// rgyu dang 'bras bur btags pa yong ye med// 'di ltar rig na chos nyid lhun gyis grub// don la mnyam par gzhag pa'i skyon chen ni// lung dang 'gal zhing don dang phrad mi 'gyur// don la nges blos khyab par btang ba ni// mi 'gal rang bzhin ye shes dag pa ste// rigs gsal ngang na thams cad gnyis su med// byang chub snying po rgyu 'bras lhun gyis grub pa'o// de yi dus na drod gsum man ngag rdzogs// snang dang mi snang rtag chad la sogs pa// shes rab zab mo nges pa'i gting brtol te// phyi nang the tshom blta ba'i phug gtib bo// 'di yi don la gsang thung sran tshugs shing// tshig dang don du 'brel pas thag chod na// rig 'dzin rdo rje g.yung drung lhun gyis grub// dbang phyug yin pas de la kun phyag 'tshal// g.yo sgyu med par gtsug gi nor bu bzhin// dbang chen 'dus pa'i tan+t+ra las/ kun gzhi gtan la phab pa'i le'u ste sum cu so drug pa'o//// dpal gyi mgur nas gsungs pa'i man ngag 'di// phyi rabs rnal 'byor 'ga' yi spyod yul bas// ming tsam rnal 'byor rnams kyi thun mong min// gtan du nub par mi bya yang dbang gter du sbas shing brgyud/ dbang chen 'dus pa'i tan+t+ra rdzogs so//// rgya gar gyi mkhas pa rag shi sid+d+hi dang/ bod kyi ban+de ku ku rA dzas bsgyur ba'o// phyis gnubs sangs rgyas ye shes kyis kyang zhus shing gtan la phab pa'o//

CLOSE WINDOW