CLOSE WINDOW

Gpb022.003
བོད་ཡིག

rgya gar skad du/ shrI pad+ma ma he shwa ra duSh+ta rak+Shi ta ni rA kr-i taM gu Na tan+t+ra nA ma/ bod skad du/ dpal pad+ma dbang chen dregs pa srung bzlog yon tan gyi rgyud ces bya ba/ lhun gyis grub pa'i sangs rgyas dkyil 'khor chen po dgu'i lha tshogs rnams la phyag 'tshal lo// 'di skad bdag gis thos pa'i dus gcig na/ bcom ldan 'das de bzhin gshegs pa thams cad kyi sku gsung thugs rdo rje'i bdag nyid yon tan phrin las ma lus pa'i bdag po de ni/'di ltar de bzhin gshegs pa thams cad kyi rdo rje btsun mo'i b+ha ga la dus gsum 'du 'bral med pa chen por bzhugs so// de nyid las brjod kyis mi lang ba'i 'khor gyi grangs dang bcas nas bzhugs pa ni/'di lta ste/ bde gshegs kham rgya mo dang/ rdo rje'i kham rgya mo dang/ rin po che'i kham rgya mo dang/ pad+ma'i kham rgya mo dang/ las kyi kham rgya mo dang/ sna tshogs kham rgya mo dang/ kham rgya mo mkha' 'gro ma chen mo drug dang/ gzhan yang long ba rgyab sbrel chen po brgyad dang bcas pa ni 'di lta ste/ mi bskyod long ba rgyab sbrel dang/ rdo rje long ba rgyab sbrel dang/ dkon mchog dpal 'dzin long ba rgyab sbrel dang/rin chen long ba rgyab sbrai+el dang/ tshe mtha' yas pa'i long ba rgyab sbrel dang/ pad+ma'i long ba rgyab sbrail dang/ grub par gdon mi za ba'i long ba rgyab sbrel dang/ lam gyi long ba rgyab sbrel dang/rigs bzhi'i rgyal ba las long ba rgyab sbrail gnyis gnyis su sprul pa'i byang chub sems dpa' rnams dpa' bo'i cha lugs kyis 'gro ba 'dul ba dang/ gzhan yang dmus long 'khor ba drug cu dang bcas pa ni 'di lta ste/bde gshegs rdo rje'i rigs kyi dmus long bcwa lnga dang/ bde gshegs rin chen rigs kyi dmus long bcwa lnga dang/ bde gshegs pad+ma'i rigs kyi dmus long bcwa lnga dang// bde gshegs las kyi rigs kyi dmus long bcwa lnga ste/rigs bzhi'i byang chub sems dpa' rnams dpa' bo'i skur sprul nas sems can gyi don mdzad pa dang/ gzhan yang za byed dpal gyi khyi brgyad la ye shes sprul pa'i khyi bcus bskor ba rnams dang/gzhan yang sgo ba chen po bzhi rnams ni 'di lta ste/ theg chen dgu dang ldan pa'i phyir na mgo dgu brtsegs pa'i rkang gcig pa dang/ rnam par thar pa brgyad dang ldan pa'i phyir na mgo brgyad lag brgyad rkang brgyad pa dang/ye shes drug dang ldan pa'i phyir na mgo drug lag drug rkang drug pa dang/ sku gsung thugs dang ldan pa'i phyir na mgo gsum lag gsum rkang gsum pa dang/ gzhan yang sprul pa'i me 'brug dang/rlung 'brug dang/ yang sprul bse'i byan lag dmar po dang bcas pa rnams ni/ rje btsun ma pad+ma gzi ldan ma'i mkha' bde ba chen po las 'gro ba'i don du sprul nas bzhugs so// de nas yum pad+ma gzi ldan mas rdo rje'i glu 'dis rnam par bskul to// don dam chos nyid spros pa med pa las// rig dang ma rig sgyu ma'i khyad par gyis// rol pa'i 'byung gnas 'khor ba mya ngan 'das// las kyi dbang gi dregs pa khams gsum gnas// dbang chen che mchog khyad par bstan pa'i phyir// dregs pa thams cad dbang du bsdu nas ni// sangs rgyas bstan pa bsrung ba'i dus la bab// mi rtog chos kyi sku las phyag rgyar bzhes// zhes bskul lo// de nas bcom ldan 'das pad+ma dbang chen nyid sku skye ba med pa nam mkha' lta bu'i ngang nas/ gzugs sku ye shes sgyu ma'i skur bzhengs te/ sngags kyi rgyal po 'di nyid kyi sku gsung thugs rdo rje las byung ngo// oM pad+ma ma hA shrI he ru ka sarba duSh+tAn ta ga ha na da ha pa tsa hUM phaT/ sku'i gsang sngags so// oM pad+ma shrI he ru ka hrIHha ha hUM phaT/ gsung gi sngags so// oM hu lu hu lu hUM phaT/e A ra li hriM dzaH/ thugs kyi sngags so// oM pad+mAn+ta kr-ita shrI he ru ka he he ru ru kaM kaM pad+ma DA ki ni dz+wa la shaM b+ha ra ba shaM ni hUM/ yon tan gyi sngags so// oM hri tha pad+mAn+ta kr-i ta di ma da ri hrIHha ya grI wa e ka dza TI hu lu hu lu hUM hrIHdza dzaH phrin las kyi sngags so// gsang sngags rnam pa lnga brjod pas/ 'jig rten khams rnams g.yo 'gul ldeg/ dregs pa can rnams snying 'dzag pas// dbang chen po la skyabs su dang// rang rang srog rnams nye bar dbul// a ya ma la du ru tsa sha na la/ phul nas bran du khas blangs te// sangs rgyas bstan pa bsrung ba yi// bka' yi srung mar dam bcas so// de nas 'khor la rab gzigs nas// lta ba dang ni spyod pa dang// dbang gi dkyil 'khor dam tshig dang// sgrub dang phrin las rab bshad bya// snod kyi 'jig rten chos kyi dbyings// 'gyur ba med pas chos kyi dbyings// thugs rje rgyun chad med pas dbyings// nyes pa'i skyon rnams bral bas dbyings// phrin las thogs pa med pas dbyings// chos rnams 'byung khungs gyur pas dbyings// bcud kyi sems can ye shes sku// kun gzhi 'gyur med chos kyi sku// yid ni rang byung ye shes sku// nyon mongs lnga rnams longs spyod rdzogs// sgo lnga cir snang sprul pa'i sku// tshogs brgyad sku gsum lhun gyis grub// zhe sdang dmyal ba'i 'jig rten 'di// 'gyur med rdo rje me long gsal// ser snas chags pa yi dwags gnas// mnyam nyid ye shes rin chen 'byung// gti mug byol song lam gnas pa// chos dbyings rtag pa rnam snang mdzad// 'dod chags mi ste bde bar spyod// so sor kun rtog snang mtha' yas// nga rgyal lha dang lha ma yin// bya ba nan tan don yod grub// rigs lngar rtogs pa 'di kun kyang// 'gro ba drug la rang bzhin gnas// 'gro drug gzugs su snang ba kun// pad+ma dbang chen nga yi sku// lha yi srog ni a dkar po// ri rab rtse gnas rol mo spyod// lha min su ser srog ldan pa// ri rab khong seng gnas nas 'khrugs// gling bzhir mi gnas ljang gu nr-i// phyi nang 'dod yon las la chags// byol song dud kha du yi tshogs// phyi yi rgya mtsho'i nang na gnas// yi dwags pred mar bkres shing skom// grong khyer seng skya'i gnas na spyod// dmyal ba'i tri nag tsha grang can// rdo rje gdan 'og gnas pa yang// 'gro drug srog las gsung du 'byung// de yang dbang chen nga yi gsung// rig drug sems kyi snang ba yang// pad+ma dbang chen nga yi thugs// gzugs khams tshangs pa'i gnas bzhi rnams// bsam gtan mu bzhi oM du gnas// gzugs med skye mched mu bzhi AH/ khams gsum lus dang ngag yid rnams// dbang chen sku gsung thugs su gnas// rnal 'byor sgrub pa'i blo can gyis// gnyis su med par blta bya'o// dpal pad+ma dbang chen dregs pa srung bzlog gi rgyud las gleng gzhi dang gleng bslang ba dang/ dregs pa dbang du bsdus shing gsang ba'i sngags dang chos nyid yang dag pa'i lta dgongs bstan pa'i le'u ste dang po'o//// de nas bcom ldan 'das pad+ma dbang chen 'khor 'das kyi bdag po chen po de la dor ba'i ting nge 'dzin la zhugs nas 'di skad ces gsungs so// rnal 'byor bla ma bstan pa'i tshe// brtson 'grus chen po'i spyod pas spyad// 'dod pa'i longs spyod lnga rnams kyang// chags med gus pa'i spyod pa yis// bla ma mnyes par bya phyir dbul// srog lus srog dang chung ma dang// bu dang bu mo ma la sogs// rdo rje slob dpon bla ma la// lus ngag yid gsum mnyes yon 'bul// chags med bung pa'i spyod pa spyad// rnal 'byor sde snod mnyan bsam tshe// lkog nyal pha ma'i spyod pa spyad// kha sbub skyon spangs mnyan par brtson// gzhog ral skyon dor bsam pas 'bad// zhabs rdol bkag la yang yang bsam// dug can bcud ni za mi btub// dug med zas skom lus kyi bcud// gsang zhing snod ldan rnams la spel// dgos 'dod 'byung ba'i nor bu'am// dpag bsam shing dang bum pa bzang// 'dod pa thams cad 'byung ba yang// klu dang lha dbang gnod sbyin ltar// rnal 'byor spyod pa spyad par bya'o// rnal 'byor dgongs bsgrub byed pa'i tshe// drang srong dka' thub brtul zhugs som// mu stegs brtul zhugs spyod pa ltar// lus ngag yid gsum 'bad byas nas// 'dod pa ma 'grub bar du bsgrub// bsam gtan mnyam par 'jog pa'i tshe// til bum sgron ma lta bur spyad// rjes gcod rnam bzhi mdzad pa'i dus// rgyun chad med par chu bo bzhin// gzhung bzhin mthun pa'i spyod pas spyad// lus dang grib ma mi 'bral ltar// sems nyid lha dang bral ba mi bya// rnal 'byor gsang sngags zlos pa'i dus// bul ba ma yin myur ba min// che chung sgra yi skyon spangs nas// bung ba rdza mar bcug pa bzhin// stong gsum gang ba'i 'od zer gyis// mchod pa 'bul zhing dngos grub len// mtsho nang char pa babs pa ltar// dngos grub rlabs chen 'khrigs sprin 'thibs// mgal me'i 'khor lo'i spyod pa bya// rnal 'byor dam tshig nyams pa dang// nam yang 'grogs par mi bya ste// lhan cig mi gnas mtshon pa'i dpe// sgron me dang ni mun pa dang// dug dang sman dang chu dang me// sha ba khyi dang dgra zun bzhin// dam tshig nyams dang 'grogs mi bya// wa yi brtul zhugs spyod pa yis// grib can nam lus dor bar spyad// spyod pa 'di ni gsang sngags la// mchog tu gces par rab tu bshad// mu stegs lta bu'i spyod pa yis// zhing bcu ma lus sgrol bar bya// ma hA de ba'i spyod pa yis// gzungs ma mtshan ldan la sbyar ba// kr-iSh+Na sA rwa'i sbyor ba yis// 'gro drug snying rjes bskyang bar bya// gar mkhan lta bu'i spyod pa yis// 'gro ba so sor mthun par gdul// ming sring lta bu'i spyod pa yis// rdo rje'i mched lcam bskyang bar bya// dpa' bo lta bu'i spyod pa yis// bar chad dgra bgegs gzhom par bya// btson rdz-i lta bu'i spyod pa yis// rtsa ba yan lag dam tshig bsrung// byan mo mdzangs pa'i spyod pa yis// dam rdzas ma lus tshang bar bsags// rtag par bsam sbyor spyod pa dang// mgon po kun tu rgyu ba dang// spyod pa ma lus thams cad kun// shes bzhin rnam par spyad par bya'o// zhes gsungs so// pad+ma dbang chen dregs pa srung bzlog gi rgyud las/ lus ngag yid gsum gyi spyod pa bstan pa'i le'u ste gnyis pa'o//// de nas bcom ldan 'das kyis rim par bgrod pa 'di rnal 'byor pa'i ched du gsungs so// sems can ma lus thams cad la// lus la dbang bzhi rdzogs pas na// dbang bzhi yang dag sbyin par bya// phyi dang nang dang gsang ba dang// de kho na yi dbang du gsungs// brgyud rnams kun gyi don bsdus so// sems can khams ni ma lus pa'i// lus la rtsa yi dkyil 'khor gnas// bum pa'i dbang yang bskur ba ni// bum pa mi bskyod chu yi dbang// lus kyi bag chags dag par byed// cod pan rin chen 'byung gnas dbang// bdud bzhi'i tshogs las rgyal bar byed// rdo rje snang ba mtha' yas dbang// ltag khung 'chi bdag bdud kyang 'joms// dril bu don yod grub pa'i dbang// chos rnams sgra yang sgrogs par mdzad// gzugs phung rnam par snang mdzad nyid// de la rdo rje'i ming yang btags// dur khrod chas brgyad dbang bskur bas// dur khrod bdag por yang dag grub// kha T+wAM ga ni lha yi sku// shes rab DA ma ru yi sgras// thabs dang shes rab gnyis med par// ma dang mkha' 'gro dbang du sdud// de sogs mtha' yas dbang rnams kun// mdor bsdus rig pa'i dbang lngar gnas// de thob lus kyi sgrib pa dag/ bskyed pa'i rim pa bsgom par dbang// nang gi dbang bskur bshad pa na// bla ma bde ba 'byongs pa ni// rlung gis thig le 'dren par nus// sems can thams cad ma lus kyi// lus la yi ge gnas pas na// yi ge rab tu sbyor ba yis// rtsa gsum bde ba'i khu ba sbyang// gzungs ma mtshan dang ldan pa la// lus kyi sbyor bas dal bus bsrub// ting 'dzin brtan pas nang du gzud// byang sems thig le mkhar 'bebs nas// rab ni ba dang be'u 'dra// 'bring ni bung ba me tog bzhin// tha mas bya dang bye'u ltar blangs// hU~M las lhar gsal lus la thim// de dag gis ni dri ma dag/bzlas pa'i gsang sngags bgrang bar nus// gsang ba'i dbang yang rab brjod bya// srid gsum sems can ma lus la// lus khams bdud rtsi gnas pa yang// khams dgu 'dus pa'i dwangs ma ni// bdud rtsi lnga ni rigs lnga yab// 'byung ba bzhi ni yum du gnas// bsnyen pas gzungs ma btsal bar bya// nye ba'i bsnyen pas yum de yi// gzugs sgra dri la brtag bya zhing// de ba bsgom par byas nas ni// bsgrub pas b+ha gar ling+ga bzhag/ rjes su dran pas bsgom par bya// sangs rgyas mnyes par mchod pa dang// sems can bde bas khyab par bya// bsgrub chen rdo rje pad+ma bsrub// thig le dbab cing gzung bar bya// bde ba dang ni mchog tu bde// rnam par rtog bral bde ba dang// lhan cig skyes bde ye shes bzung// dbang de gang thob par gyur pas// yid kyi dri ma dag pa yin// de kho na yi dbang bshad na// srid gsum khams kyi sems can rnams// lus la srog dang rtsol ba gnas// srog gi rlung ni sems nyid yin// rtsol ba phyi nang rgyu ba las// bzung nas bde ba gyen du bzlog/ mdoms kyi sba ba sbubs su nub// lte ba rgya phor bzhin du mkhregs// ro stod seng ge'i khog pa 'dra// lce yis zhal gyi gdong yang khebs// smin mtshams mdzod spu bsgrub pa dang// dbu yi gtsug gtor brtan pa'i dus// thig le g.yas 'khyil dung gi gzugs// rang lus rgyal ba'i zhing khams na// 'khor 'das thams cad so sor gsal// ma 'dres nam mkha'i 'ja' lta bu// dbyer med bde ba chen por thim// sangs rgyas kun gyi bstan pa rnams// dus 'dir rang la nyams su myong// de nyid pad+ma dbang chen yin// dbang ni thob par gyur pa na// lus dang ngag dang yid gsum gyi// dri ma ma lus dag pa yin// thams cad dag ces bya ba yang// dngos po gsal dag ma yin te// rgyud nas dag par byed pa yang// dper na sa bon btab pa la// dus su mang por gyur pa ltar// dbang gi sa bon btab pa yis// rnal 'byor lus la lo tog smin// zhes gsungs so// pad+ma dbang chen dregs pa srung bzlog gi rgyud las/ dbang bskur ba'i le'u rtse gsum pa'o//// de nas bcom ldan 'das kyis dkyil 'khor 'di gsungs so// dkyil 'khor rab tu gang shes 'dod// snying po chos sku dri med dkyil// longs spyod rgyal ba rigs lnga 'khor// rang bzhin mthar phyin 'bras bu yin// snod kyi 'jig rten gzhal yas khang// bcud kyi sems can lhar gnas par// rnal 'byor gang gis rtogs pa de// rang bzhin nyid kyi dkyil 'khor yin// rang bzhin dkyil 'khor chen po de// rtogs par mi ldan gang zag la// mtshon phyir gzugs brnyan dkyil 'khor bstan// lugs ma bris sku 'bur dang thags// mkhas pas byas na sangs rgyas mthong// bde gshegs sku bzhengs byin rlabs che// 'byor pa mi ldan gang zag la// rdul tshon dkyil 'khor chen po bstan// rab tu zlum po'i lte ba la// pad+ma gar gyi dbang phyug che// 'khor lo drug dang gru chad ldan// rtsibs drug khams rgya chen po drug/ bar khyams gnyis dang sgo bzhir bcas// dang po long ba dmus long la// gnyis par dpal gyi khyi brgyad dang// ye shes sprul pa'i khyi bcur gnas// sgo bzhir sgo srung bzhi rnams ni// mkhas pas bkod nas bri bar bya// rta babs dur khrod rdo ra dang// me dpung 'bar bas rab tu 'khrigs// yang na thugs kyi dkyil 'khor ni// dbus su pad+ma gsang ba'i sku// hrIHni pad+ma nyi shu bzhi// zur bzhi rin chen khri rkang ni// gru chad bzhi ru rnam par gnas// bar khyams dang po thod rus la// 'khor gyi long pa brgyad po dang// dmus long drug cu dgod pa yong// phyogs rer bco lnga bco lnga gnas// gnyis par me dpung khyi spyang la// sgo bzhi sgo ba rta babs dang// dur khrod me dpung 'bar bas 'khrigs// dkyil 'khor 'di ni gzi brjid can// nyi zla bzhin du gzi mdangs che// rnal 'byor spros pa skyung nas gnas// ting 'dzin dkyil 'khor rab tu bsgom// pad+ma dbang ngam rta mgrin dbang// gang la mos pa rab tu bsam// bsdus la dga' ba'i rnal 'byor pas// pad+ma dbang chen sku gcig pa// dbu lnga phyag ni bcu drug pa// zhabs brgyad pa ni bsgom par bya// yang na blo chung mos pa can// rta mgrin g.yas dkar g.yon sngo ba// dbus ma pad+ma rA ga'i sku// rdo rje kha T+wAM sbrul zhags g.yas// dril bu dung dmar lcags sgrogs g.yon// pad+ma ral gri yum la 'khril// 'di ltar bsgom par byed pa de// sangs rgyas thob par gdon mi za// rnam par smin pa'i rig 'dzin ni// rang sems lha skur nang du smin// bag chags lus ni phyi na gsal// brkos phor nang gi sAts+tsha 'dra// yul ni sangs rgyas gdul zhing ste// bla ma dam pas 'dul bar mdzad// tshe la dbang ba'i rig 'dzin ni// rang don lo ni stong dang ni// drug brgyar rang gi don du bzhugs// gzhan gyi don du bzhugs 'dod na// byis pa lo brgyad lon tsam du// brgya brgya dag tu bsnur zhing gnas// pad+ma dag la brdzus nas skye// lha mi'i lus ni khyad par can// skye ba bzhes nas 'gro don mdzad// sprul pa sku yi bla ma la// zhing khams kun tu dam chos nyan// phyag rgya chen po'i rig 'dzin ni// rang lus sangs rgyas bsgom 'dzin pa// longs spyod rdzogs sku rigs lnga'i 'khor// rgyal ba rnams las chos kyang nyan// shar na mngon par dga' ba'i zhing// rdo rje sems dpa'i sras su 'khrungs// lho na dpal dang ldan pa ste// rin chen 'byung ldan 'khor na gnas// nub na bde ba chen po na// snang mtha' yas la chos kyang nyan// byang na rnam dag bkod pa ru// don yod grub pa'i rigs su skye// dbus phyogs byang chub snying po ru// rnam par snang mdzad zhal mthong nas// phyag rgya chen po'i rig 'dzin nyid// rang lus lha skur smin pa'o// lhun gyis grub pa'i rig 'dzin ni// mnyam par gzhag tshe chos kyi sku// langs tshe longs spyod rdzogs lus thob// zhing khams nam mkha'i mtha' dang mnyam// rgyan dang gdan dang 'od zer sogs// sangs rgyas che pa'i yon tan thob// ces gsungs so// pad+ma dbang chen dregs pa srung bzlog gi rgyud las/dkyil 'khor gyi le'u ste bzhi pa'o//// de nas bcom ldan 'das kyis dam tshig 'di dag gsungs so// shel sgong dkar po dri med 'di// 'dam du nam yang bying mi bya// yid bzhin nor bu re skong ba// ma rnyed bar du btsal bar bya// chu bo rab med sgrol mkhan la// drin ni nams kyang bkur bar bya// rin chen gser gyi sgrom bu la// zhabs su bug pa brtol mi bya// lha yi dbang po'i lcags chen po// 'khyogs kyang bsrang bar mi bya'o// me tog u dum wa ra la// lag gis brtse bar mi bya'o// tsan+dan smug po'i sdong po la// bud shing bya ba'i sems mi gtong// lcags kyi thu lum 'bar ba la// lag pas gzung bar mi bya'o// gser gyi ri la 'bab pa'i chu// nams kyang btung bar mi bya'o// seng ge dkar mo'i nyal shul du// mal ni bca' bar mi bya'o// rgya mtsho chen po'i 'dzing chu la// gru ni sad par mi bya'o// rin po che yi za ma tog/ dug gis sbyang bar mi bya'o// khyad par dam tshig bcu gnyis 'di// rnal 'byor dam la gnas pa yis// rang gi srog bzhin rtag tu bsrung// ma bsrungs nyams pa'i chad bas 'phog/rdo rje dmyal bar ltung bar 'gyur// bsrungs na yon tan bsam mi khyab// mchog dang thun mong dngos grub 'thob// ces gsungs so// pad+ma dbang chen dregs pa srung bzlog gi rgyud las/ sa gzhi rin po che lta bu'i dam tshig bstan pa'i le'u lnga pa'o//// de nas bcom ldan 'das kyis bsgrub pa rnam par bkod pa'i ting nge 'dzin la snyoms par zhugs nas 'di gsungs so// bsgrub pa'i don yang gnyis yod de// mchog gi bsgrub pa bya ba dang// thun mong dngos grub bsgrub pa'o// mchog gi bsgrub pa rnam pa gnyis// bskyed pa'i rim pa bsgom pa dang// rdzogs pa'i rim pa bzang po bsgom// bskyed pa'i rim pa bsgom bya ba// sku gsung thugs rje'i 'byung tshul gyis// ting 'dzin rnam gsum bsgom par bya// yul nyid sangs rgyas zhing khams yin// 'byung ba rim brtsegs steng du ni// dbang chen gzhal yas khang yang bsgom// rin chen khri rkang seng ge dang// pad+ma nyi zla'i gdan steng du// gar gyi dbang phyug chen po bsam// dbu lnga dmar po gshog pa bzhi// phyag ni bcu drug zhabs brgyad dang// sku la bkod pa'i dkyil 'khor dgu// 'khor ni kham rgya chen mo drug/ long ba brgyad dang de yi 'khor// dmus long drug cu lcags spyang brgyad// ye shes sprul pa'i khyi bcu dang// sgo ba bzhi dang me rlung 'brug/ yang sprul bse yi byan lag rnams// rim par bskyed nas brtan par dmigs// de nas spyan drangs bzhugs su gsol// phyag dang mchod pas mnyes par bya// des nas bzlas brjod bsnyen pa dbul// bstod cing bshags nas phrin las bcol// dam tshig bsdus la ye shes gshegs// spyod lam kun tu lha nyid bsam// phyi rabs sngags 'chang sgrub pa la// ngas ni khyod la gsal bar bshad// rdzogs rim bsgom pa'i rnal 'byor pas// gang zag gzer dang sgom thabs dang// 'bras bu bzhi ni dpa' bos bshad// brtson 'grus can dang le lo can// brtson 'grus can gyi gang zag ni// tshe 'dir mngon par 'tshang rgya bar// yan lag rnam pa brgyad ldan dgos// rgyu la nus pa thogs med pas// sngon nas bsod nams bsags pa dang// rigs kyang khyad par can du 'khrungs// longs spyod 'byor ba che ba dang// gtong phod tshe dang tshe ring ba// brtson 'grus che zhing dad pa che// de brgyad ldan pa'i gang zag la// brtson 'grus can gyi gang zag ste// bsgyur ba bdun gyi sangs rgyas te// sngags kyis skur yang bsgyur ba dang// rang lus byin gyis rlobs pa dang// ngag kyang byin gyis rlobs pa dang// sems nyid byin gyis rlobs pa dang// kun rdzob bde chen byin gyis rlobs// 'od gsal bar ni byin gyis rlobs// zung du 'jug par byin rlobs so// le lo can gyi gang zag de// srid pa bar dor 'tshang rgya bas// yan lag bdun dang man ngag gnyis// yan lag bdun dang ldan par bya// gnas pa dmigs pa 'od gsal gsum// zung 'jug rigs drug grong khyer dgab// rdo rje sems dpar bsgom pa gsum// 'od gsal zung 'jug rtse brag bsgom// man ngag gnyis bsgom bar do la// bsgyur ba rnam pa gnyis bya ste// ye shes lha skur bsgyur ba dang// zung 'jug sku ru bsgyur ba'o// gzer ni rnam pa gnyis gdab ste// tshe 'di'i gzer dang bar do'i gzer// tshe 'di'i gzer gnyis gdab pa ni// blta ba bsgom du med pa dang// spyod pa yengs su med pa gnyis// rnal 'byor brtson 'grus can gyi gzer// bar do'i dus su gzer gsum ni// rigs drug grong khyer gcad pa dang// bar do'i lus ni yi dam bsgom// 'od gsal zung 'jug rtse bral bsgom// gang zag le lo can gyi ni// gzer 'di bar ma do ru gdab// sgom thabs rnam pa gnyis yod de// rnal 'byor chen po'i sgom thabs dang// srid pa bar do'i sgom thabs so// rnal 'byor chen po'i sgom thabs gsum// lta ba spyod pa ting nge 'dzin// lta ba'i mthar thug rnam pa gnyis// brdar btags pa yi lta ba ni// theg pa so so'i blta ba nyid// brdar ma btags pa'i lta ba ni// rnal 'byor chen po'i blta ba yin// kho na nyid kyi ting 'dzin dang// de dang rjes mthun spyod pa dang// 'od gsal zung 'jug ming can rnams// ming can gcig tu gyur pa ni// rnal 'byor pa yis yongs shes bya// spyod pa'i mtha' ru thug pa ni// 'od gsal ba dang zung 'jug yin// ting nge 'dzin la rnam pa brgyad// gsol gdab sems don rlung dang ni// ril po rjes gzhig snang ba dang// mtshan bcas mtshan ma med pa'o// bla ma la ni gsol ba gdab// byin rlabs 'byung ba'i gzhi ma yin// sha dang rus pa khrag rnams kyang// khong stong khyed kyi sku la med// nam mkha' la ni 'ja' tshon ltar// khyod kyi sku ni ston par mdzad// sems don shes par ma byas na// rnal 'byor lam du ji ltar bya// sems kyi ngo bo chos skur gcig/ sgo ni dbang po rnam lngar 'byung// spyod yul snang ba rnam pa gnyis// snang ba gnyis dang mi snang gnyis// 'khrul bar 'byung ba'i snang ba ni// khams gsum grong khyer gsum du snang// ma 'khrul pa yi snang ba ni// sems nyid 'od gsal rang bzhin nyid// mi snang ba la gnyis yod de// 'khrul ba dag gis mi snang ba// ri bong ra dang mo gsham bu// nam mkha'i me tog rus sbal spu// seng ge'i kha chu la sogs pa// mi srid pa yi chos rnams yin// ma 'khrul ba yi snang ba ni// 'dus ma byas pa'i chos nyid ni// nam mkhar 'dzin pa dang bral ba// chos sku dri ma med pa'o// sems can rnams kyi srog gyur pa// rlung zhes bya bas las kun byed// 'di ni rnam shes bzhon rta ste// lnga yi bdag nyid bcu ming can// rang bzhin phra ba brgya dang ni// drug cu them pa 'di dag ni// rlung gi bzhon pa'i rgyu yin te// nyin dang mtshan du rgyu ba yi// de yang ji ltar rab rgyu ba// srog 'dzin rlung ni srog gyur pas// sems dang tha dad med par gcig/ rtogs dang ma rtogs khyad par gyis// 'khor 'das kun gyi las byed de// rlung rnams kun gzhi nyon mongs dang// yid dang sgo lnga snang ba ni// rlung rnams phra ba'i gzugs kyis ni// shes dang yang dag 'dres gyur nas// dbang po'i lam las byung nas ni// yul rnams kun la 'jug par 'gyur// rtsa ba'i phung po'i rlung lnga ni// srog 'dzin me mnyam khyab par byed// gyen dang thur du rgyu bar 'dod// yan lag dbang po'i rlung lnga ni// mig la me yi rlung rgyu bas// gzugs rnams thams cad mthong bar byed// rna bar rlung gi rlung rgyu bas// sgra rnams thams cad thos par byed// sna la sa yi rlung rgyu bas// dri rnams ma lus tshor bar byed// lce la chu yi rlung rgyu bas// ro rnams thams cad myong bar byed// lus la nam mkha'i rlung rgyu pas// reg bya ma lus nyams su myong// phyi dang nang gi rtog pa rnams// rtsa la rlung zhon rgyu bar byed// rang bzhin rtog bcas brgyad cu nyid// rlung gi bzhon rtas nyin mtshan rgyu// de phyir rlung zin bsgom par 'gyur// ril por 'dzin pa'i rnam pa ni// mgo bo nas ni rkang pa'i bar// ji srid snying gar phyin gyi bar// rnal 'byor yang dag mtha' la 'jug/ ril por 'dzin pa zhes bshad do// de bzhin rjes su gzhig pa ni// ji ltar dbugs kyi me long la// mtha' nas rim gyi dbus khyim ltar// rnal 'byor yang dag mtha' la 'jug/ rjes su gzhig pa zhes bshad do// sems de kun tu snang ba ni// sgo lngas yul la so sor spyod// rang bzhin kun tu snang ba ni// yid kyi rnam shes ma g.yos pa'o// mtshan bcas bsgom pa 'di ltar bya// mtshan bcas nyid du bsgom pa dang// mtshan bcas mtshan ma med par bsgyur// mtshan bcas 'byung ba'i cho ga dang// byung nas brtan par bya ba'o// mtshan bcas 'byung ba'i cho ga ni// bltas pas spang bar bya ba dang// ma bslad pa yi gang zag la// sems gzung la sogs bltas pas 'ong// bsgom pas spang bar bya ba yang// ma bslad gang zag bsgom dgos pas// glo bur sku la blta zhing bsgom// bshur bas 'ong bar bya ba ni// ji ltar sprin ni sna tshogs pa// mdog dang dbyibs ni tha dad pas// nam mkha'i ngang las byung nas ni// de nyid du ni thim par 'gyur// de bzhin rang bzhin thams cad kun// don ni brgyad cu de la yang// 'dod chags rtogs pa bzhi bcu dang// zhe sdang sum cu rtsa gsum dang// gti mug rtog pa bdun sogs pa// snang ba gsum gyi rgyu can te// ma lus yul la gzhug nas ni// 'od gsal bar ni 'jug par 'gyur// de 'dra'i rang bzhin ma shes pas// mi shes mun pas khebs nas ni// dge dang mi dge'i las byas nas// 'gro ba lngar ni 'khor bar 'gyur// thabs chen rgyud dang ldan pa la// nyon mongs byang chub yan lag bshad// log gnon dgos na bya bar bshad// snang ba sku la blta bar bya// mi snang rang gi lus la bya// dbugs la skyon de ma byung na// de la log gnon bya ba ni// mi de dpyad dgos gos kyis zhag gsum gril// sems ni mi 'phro btub tshad dgug/de nas sku brtan bar 'di nas chad skyon zhig byung ngam/ de yis 'od// mtshan ma can gyi man ngag ni// dang po sku la blta bar bya// bltas pas goms pa thob gyur nas// bdag nyid sku ru bsgom par bya// bdag nyid sku la goms gyur nas// de nas dkyil 'khor gzhug par bya// rnam par smin pa'i lam pa de// dkyil 'khor bcug la dbang bskur ba// thun mong dbang dang thun min dbang// rig pa'i dbang lnga sku gsung thugs// mtshan ma can gyi man ngag yin// de ltar thob pa'i rting la ni// de ltar brtan pa'i cho ga bya// dgun gyi nyi ma sum cha bya// dbyar gyi nyi ma cha bzhi bya// lugs sku kun la glo glor lta// mang por bsgom dang chen por bsgom// rang nyid lha yi skur bsgom mo// de ltar thob pa'i rting la ni// mtshan bcas mtshan med bsgyur ba ni// mtshan ma can la brten na ni// mtshan ma med par rab tu skye// myur bar 'dod na spyod pa bya// sku de myur bar mtshan med 'dod// brtan pa'i cho ga ma byas par// sku yi snang ba bya ba dang// mi snang nam mkha' bshur spyod bya// des ni myur bar mtshan med 'gro// zla ba tsam mam lo phyed 'dod// brtan pa byas kyang bshur ba yis// spyod pa la ni nan tan bya// des ni mtshan ma nub nas ni// gang du zhen med mtshan ma med// lo gcig tsam nas mtshan med 'ong// mtshan med rang la gtad cing bsgom// mtshan ma rang bzhin nyid kyis 'gag/ mtshan med mi rtog par ni spyod// spyod pa bya dang bshur ba dang// gtad nas bsgom pa gsum po nges// mtshan bcas thun mong dngos grub thob// 'jig rten dregs pa'i nus mthu dang// mtshan ma lha sku la dga' na// brtan pa'i cho ga byas la ni// mdo tsam bsgom dang res mi bsgom// mi gsal na yang de ltar bsgom// sems ni 'phro ba dgag par bya// gnyis su med pa'i spyod pa bya// spros bcas dang ni spros med dang// shin tu spros med spyod pa bya// mtshan ma la ni nan tan brtag/ de la mtshan med shugs kyis 'char// rnam par grol ba'i lam de ni// de kho na nyid man ngag dang// de dang rjes mthun spyod pa'o// mtshan ma med la man ngag gnyis// bar chad dgra bsal lam nyid bsgom// de la bar chod dgrar yang bzhi// dgra 'dul ba yi man ngag dang// dgra de brtson du bzung ba dang// dgra ni tshar yang gcad pa dang// dgra la dgrar mi 'dzin pa yin// dgra 'dul ba ni bshur ba gnyis// phyi bshur ba dang nang bshur ro// phyi yi bshur la rnam gnyis te// mngon sum bshur bar bya ba ni// dbang po rlung la 'chor nyan yod// lkog tu gyur pa'i bshur ba ni// yul gzhan lkog tu gyur pa'o// nang gi bshur ba gnyis yod de// gzugs can dag la bshur ba ni// rtog pa rags pa gzugs can byung// rnal 'byor pa yis ma thub na// shar ba dang ni nan tan bya// spros bral dag la bshur ba ni// rtog pa byung na sna la gtad// yang yang bshur te bshig par bya// rtog pa byung tshor man ngag go/dgra bo btson bzung spyod pa gnyis// phyi dang nang gi spyod pa'o// phyi'i spyod sgo lnga'i rnam shes ni// yul la mi gtang rang lugs 'jug/ nang gi spyod pa sems mi 'phro// dgra de tshar yang gcod par bya// mi dmigs pa yis dus dang ni// 'od gsal dus su byung bas so// dgra la dgrar mi 'dzin pa ni// gzugs sogs rnam par rtog pa ni// byung yang dgrar mi 'dzin pa ste// zung du 'jug pa'i dus na'o// 'dul dang btson du bzung ba gnyis// mnyam par ma bzhag dus su'o// tshar gcod dgrar mi 'dzin pa gnyis// mnyam par gzhag pa'i dus na'o// lam nyid bsgom pa'i mtshan med bzhi// gnas pa dang ni mi dmigs pa// 'od gsal zung du 'jug pa'o// gnas pa sems ni bshur bar bya// bshur ba tshad du phyin tsam na// sems ni rang log nyid du gyur// bshur ba tshad du phyin pa yin// la la tshad du phyin pas 'thob// la la bden pa'i sgo nas 'thob/ la la shes pa 'tshams pas 'thob/ la la kha bo dag gis thob// la lar spros pa bcad pas thob// de dang rjes mthun spyod pa gsum// spros bcas spyod pa mtshan mar spyod// spros med spyod pa gsang spyod de// shin tu spros med spyod pa yin// bus pa rnams la ma bstan te// nus pa med pas spyod mi nus// rgad po rnams la ma bstan te// rgas pa'i phyir na nus pa shor// rnal 'byor min la mi bstan te// le lo can gyi spyod yul min// shin tu spros med ma yengs pa// rnal 'byor pa la bstan pa yin// bsgom pa thams cad de las byung// lta ba bsgom du med pa ni// spyod pa yengs su med pa yin// mtshan ma med pa'i man ngag yin// de na gnyis med bsgom par bya// gnyis med bsgom pa'i rting la ni// dang por sems ni gnas pa skye// de nas sems ni dmigs pa skye// dmigs pa skyes pa'i rt-ing la ni// rang bzhin gyis ni 'od gsal skye// 'od gsal skyes pa'i rting la ni// zung 'jug bsgom pa skye bar 'gyur// mtshan med pa yi man ngag yin// le lo can gyi rnal 'byor pa// bar dor 'tshang rgya'i 'ching ba gnyis// rim gyis 'ching dang cig car 'ching// shi ba don dam bden pa yin// skye ba ma lus kun rdzob yin// skyes pa zung 'jug dbyer med do// de la rim gyis 'chi ba yang// phung po khams dang skye mched rnams// 'byung ba chen po bzhi la thim// 'byung ba chen po bzhi po yang// sa ni chu la thim par 'gyur// chu ni me la thim par 'gyur// me ni rlung la thim par 'gyur// rlung ni rnam par shes la thim// rnam shes snang ba de la thim// snang ba snang ba mched la thim// snang mched snang ba thob la thim// snang ba thob pa bya ba ni// thams cad stong pa nyid la thim// der ni yongs rdzogs rnal 'byor gyis// gsol ba'i don ni bshad bya ste// stong pa gsum po rnam dag gang// 'od gsal ba ni 'di bshad do// bsam gtan 'di ni bsam gtan min// 'dis ni mthar thug mi thob ste// nam mkha' lta bur phyogs gyur pas// 'od gsal ba ni 'di dmigs shing// 'od gsal ba ni gnas thob pas// rab dga' gzugs su skye bar 'gyur// de tshe rab dga' rdo rje'i sku// kun gyi dbang phyug thob par 'gyur// 'das pa dang ni ma 'ongs pa// da lta byung ba'i srid pa gsum// 'od gsal ba ni rnam dag pas// skad cig gcig la ma lus mthong// thams cad stong pa 'od gsal ba// shi ba shes rab pha rol phyin// bde bar gshegs pa'i snying po yin// rnal 'byor pa yi grogs yin no// de las chos sku 'byung ba ni// bar ma do yi sku yin te// ji ltar chu rlung dwangs pa las// nya dag myur du 'phar ba ltar// de bzhin thams cad stong gsal las// rgyu 'dra ba ni 'byung bar bshad// sngon 'byung srid pa'i sha gzugs can// dbang po kun tshang thogs med ldan// rigs mthun lha mig dag pas mthong// bar ma do yi sku de yin// 'gro ba rigs drug grong khyer te// gnyis su med pa'i spyod pas bcad// spros pa'i rnam pa chod gyur nas// bar ma do yi sku de ni// rdo rje sems dpa'i sku ru bsgom// tshe 'di nyid kyis thams cad mkhyen// sangs rgyas zhing nas mi ldog pas// bar ma do ru mngon 'tshang rgya// 'od gsal ba ni bsgom par bya// zung 'jug sku yang 'byung bar 'gyur// kun rdzob dang ni don dam dag/ so so'i cha yis phye gyur na// yang dag nyid du 'dres gyur pas// zung du 'jug par de bshad do// zung du 'jug pa gnyis yod de// slob bzhin pa dang mi slob pa// mi slob pa ru gyur tsam na// bar ma do ru mngon sangs rgyas// snang ba tsam dang gsal ba tsam// snang la rang bzhin med pa gnyis// sangs rgyas zhing nas mi ldog pas// bar ma do ru mngon sangs rgya// 'bras bu sku gsum thob 'gyur ba// chos sku dri ma med pa dang// longs sku rgyal ba rigs lnga dang// sprul sku mdzad pa mthar phyin skus// bdag gzhan ma lus bsrung ba dang// bgegs dang bar chad bzlog pas na// bdag don dregs pa srung bzlog yin// zhes gsungs so// pad+ma dbang chen dregs pa srung bzlog gi rgyud las/ mchog gi dngos grub bsgrub pa ste le'u drug pa'o//// de nas bcos ldan 'das dpal pad+ma dbang chen gyis thun mong gi dngos grub bdag gzhan gyi bar chod srung bzlog 'di gsungs so// gti mug klu gnyan sa bdag dang// 'dod chags ma mo bdud mo dang// zhe sdang gshin rje la sogs pa'i// rang gi bar chod srung ba dang// phas kyi sbyor ba bzlog par gsungs// oM sngags sor bzhag a kro te ka ya man+ta ka e sa ra hU~M phaT/ e te pro te ya sa nan sra trod kwa rak+Sha rak+Sha/ pho rgyud thams cad srung ba'i sngags so// oM a ne be shaM traM be shaM ru be shaM be shaM ru be shaM ka thuM b+h+yo// ta pa yi mu li du ru ru hU~M phaT/ karma tsan+Da mu ti du ru hU~M phaT/ rak+sha mu te ru lu ru lu hUM b+h+yo hUM/ e ga dza Ti tsa ra li pa la mi sha dgra bo la phaT/ nag mo re ma ti pad+ma mi ta ru ti ru ti re ma ti ha rbad b+h+yo// mo rgyud thams cad srung ba'i sngags so// oM ga ru Da tsa le tsa le/ ta ki tsa ra bi tsa te hu ya hu ya/ hu lu hu lu/ su ru te su ru te/ rak+Sha rak+Sha/ klu gnyan sa bdag thams cad srung ba'i sngags so// e ka du na bzlog/suM tri rA dza ya bzlog/ a kro te ka shri many+dzu ya ma rA dza bzlog/ yaM te rgyur thag khrol ba ling du bzlog/ sa ma ya su ma tri bzlog/ pho rgyud thams cad bzlog pa'i sngags so// oM tsa dur ma ma snying na bzlog/ma mo tsa ra ya bzlog/ k+Sha na trag rag mo zlog/ rak+Sha re ma ti sha na mu ru b+h+yo// rag mo klad khri sa la tsa ya zlog/ mo rgyud thams cad bzlog pa'i sngags so// oM ga ru Ta tsa le tsa le sa nA ga du na zlog ta ki tsa te bai te su me ra tsa bzlog hu ya hu ya sa khrag ra tsa ya zlog/hu lu hu lu nA ga ra tsa ya zlog/ su ru te su ru te sa nA ga rA tsa ya bzlog/ klu thams cad dril te bzlog pa'i sngags so// de nas rang gshed dbab pa ni// gshin rje skyes pa'i lto bar bri// rabs chad thod pa'i nang du stsal// seng ldeng phur pas gzir ba'i sngags// ya ma trig nan/ yA hur thums dza/ mA ra ya rbad/ ma mo zhing gi pags pa la// bud med lto bar 'khor lo bri// snel gri'i thod pa'i nang du stsal// seng ldeng phur pas gdab pa'i sngags/ ma ma ru lu trig nan/ ma hur thums dza/ mA ra ya rbad/ mu stegs bon po'i lto bar bri// mon thod nang du dug chus brdeg/tir ti ka trig nan/ tha hur thums dza/ mA ra ya rbad// lha ni pi wang khog pa'am// shing sdong nang du bri bar bya// mi dkar lto bar bris nas ni// mdzo rtol thod pa'i nang du gzhug/ gtor mas brdeg par byas nas ni// shing gi phur pas gdab par bya// de pa trig nan/ a hur thums dza/ mA ra ya rbad// ra dkar lto bar bri ba yang// srin po srin mo'i gzugs bris nas// rabs chad thod par lcags phyes brab// gri lcags phur pas brdeg pa'i sngags// ra ga ta trig nan/ ra hu ra thums dza/ mA ra ya rbad/ rag mo trig nan/ rA hur thums dza/ mA ra ya rbad/ bdud po rta nag lto bar bris// g.yag rur gu gul dud pas bdug/skyer phur thogs la sngags 'dis gzir/ ru tra treg nan/ du hur thums dza/ mA ra ya rbad/ bdud mo 'bri yi lto bar bris// dre'u thod yung kar dud pas bdug/ lcags phur thogs la sngags 'dis gzir/dun ting trig nan/ du hur thums dza/ mA ra ya rbad// gnod sbyin pho mo gzir ba ni// kha nas me 'bar lto bar bri// mi tshil dud pas rta thod bdug/ mchog phur sngags 'dis gzir bar bya// yak+sha trig nan/ k+Sha hur thums dza/ mA ra ya rbad/ yag mo trig nan/ k+Sha hur thums dza/ mA ra ya rbad/ btsan ni sha ba'i lto bar bris// mu zi'i dud pas 'khor lor bdug/ sha ru'i nang du lcags phur gzir/ yaM tri trig nan/ tsa hur thums dza/ mA ra ya rbad/ rgyal po ra dkar g.yang gzhir bris// byi ba'i thod par yungs kar thun// lcags phur gzir ba'i sngags 'di'o// rA tsa trig nan/ tsa hur thums dza/ mA ra ya rbad/ dmu ni phug ron lto bar bri// rta nag thod par zangs phye'i thun// bdug nas bri zhing brab pa'i sngags// mun mun trig nan/ sa hur thums dza/ mA ra ya rbad/ rdo rje legs pa ra kham ltor// khyi nag thod par yungs kar bdug/seng ldeng phur par sngags 'dis gzir/ badzra swa d+hu trig nan/ tri hur thums dza/ mA ra ya rbad// rigs ngan ban de'i lto bar bris/ mdzo thod gtor zor ral gris brdeg/ ru tra trig nan/ nr-i hur thums dza/mA ra ya rbad/ yul bdag lug nag lto bar bri// rabs chad thod par mtshon sna tshogs// skye tshe thun brab sngags 'dis gzir/ ro li trig nan/ tri hur thums dza/ mA ra ya rbad/ 'gong po bus pa'i lto bar bri// phong bu'i thod par sre long thun/ haM shaM trig nan/ tri hur thums dza/ mA ra ya rbad/ dam sri khyi dmar lto bar bri// khyi thod nang du mchog phur gzer// khyi dmar brun gyi thum gyis brab/ ru tri trig nan/ tri hur thums dza/ mA ra ya rbad/ klu ni tshangs pa'i lto bar bri// glang dmar rA na gla rtsis byugs// rta rmig thun gyis brdeg par bya// nA ga trig nan/ phu hur thums dza/ mA ra ya rbad/ gnyan ni sdig pa'i lto bar bri// spre'u'i thod par sna tshogs thun// gar+b+ha trig nan/ sa hur thums dza/ mA ra ya rbad// sa bdag sbas pa'i lto bar bri// phag thod nang du khyi nag brun// dug sna tshogs kyis brab par bya/ sa ga trig nan/ su hur thums dza/mA ra ya rbad/ dregs pa spyi la gzir ba ni// rA hu la yi lto bar bri// ra rog thod par spyang lag brab// ra mchin dkar gsum mngar gyis brab// badzra sarba duSh+tAn trig nan/ e hur thums dza/ mA ra ya rbad// gal te rdzas rnams ma tshogs na// gzugs rnams gang byed bris nas ni// kham sa rdza yi gru gsum gzhug/ zhag grangs nyi shu rtsa gcig tu// phur pas gzir nas rang gshed 'bebs// kun la me chu 'gal ba stsogs// sarba duSh+tAn tsit+ta rbad na/ sarba tsi na tsit+ta rbad nan/ sha truM mA ra ya rbad nan/ de nas rang rangs gnas su mnan// thog dang ser ba dbab pa ni// rA hu la yi lto bar gzir/ badzra sarba duSh+tAn/ tsit+ta rbad nan/ phrom phrom hril hril shar shar kruM kruM phob/ drag pos gzir ba'o// badzra sarba duSh+tAn trig nan/ phrom phrom hril hril shar shar sruM phob// rang bzhin gyis gzir ba'o// badzra sarba duSh+tAn/ tsit+ta rbad nan/ sarba bi na tsit+ta rbad nan/ phrom phrom hril hril shar shar sruM phob/ btsan thabs su gzir ba'o// sarba bi na tsit+ta rbad nan/ sarba duSh+tAn tsit+ta rbad nan/ phrom phrom hril hril shar shar sruM phob/ spogs pas gzir ba'o// ltas ngan sna tshogs gtong ba ni/ thod par ltas ngan sna tshogs gzugs/ a ya ma du ru tsa sha na la/ e tsa thun phob/ trig nan e dza thun phob/ hur thums dza/ mA ra ya rbad// ces gsungs so// pad+ma dbang chen dregs pa srung bzlog gi rgyud las/ thun mong gi bsgrub pa'i le'u ste bdun pa'o//// de nas bcom ldan 'das kyis phrin las 'di dag yongs su gsungs so// gti mug can gyi sems can la// zhi ba'i las kyis gdul ba bya// chu rlung rgyu ba'i dus dag tu// yA yi tshogs kyi dkyil 'khor bya// nga rgyal can la rgyas pa'i las// sa rlung rgyu ba'i dus su ni// ma yi tshogs kyi dkyil 'khor du// tshe dang bsod nams dbang thang spel// 'dod chags can la dbang gi las// me rlung rgyu ba'i dus su bya// baM gyi tshogs kyi dkyil 'khor du// yul khams bud med rgyal po bsdu// zhe sdang can la drag po'i las// rlung gi rlung rgyus g.yeng zhing 'thor// e yi tshogs kyi dkyil 'khor du// dgra bgegs ma lus bsgral bar bya// phrin las bzhi yi dus dag tu// bdag nyid phyag rgya bzhi ldan bsgom// gtso bo phyag rgya chen po ste// lhun gyis grub pa'i dkyil 'khor bsgom// yul na dam tshig phyag rgya ste// yab ni don las mi 'da' bsgom/ 'phro 'du las kyi phyag rgya ste// mchod 'bul sgrib sbyang dngos grub blang// de dag ma lus cir snang yang// chos nyid ngang las ma g.yos kyang// zhi ba chos nyid phyag rgya yin// 'khor dang mya ngan 'das pa'i chos// phyag rgya bzhi la 'phros shing 'dus// e waM ma yA'i yi ge bzhis// gsang sngags rgyud rnams spros shing rgyas// bsdus nas phyag rgya bzhi ru gsal// e ni drag po'i tshar yang gcod// waM ni ma lus dbang du sdud// ma yis rjes bzung rgyas par mdzod// yA ni thams cad zhi bar gnas// chos rnams skye ba med pa na// phrin las rnam bzhi'i chos rnams rtog/ zhes gsungs so// pad+ma dbang chen dregs pa bsrung bzlog gi rgyud las/ phrin las kyi le'u ste brgyad pa'o//// de nas 'khor rnams dgyes nas/ ston pas sangs rgyas rdo rje 'chang chen po lhun gyis grub pa'i dkyil 'khor la/me tog man+da ra ba dang man+da rab chen po/ ku mu dA dang/ nor bu rin po che mthon ka dang mthon ka chen po dang/ rin po che sna tshogs pa dang/bdud rtsi rnam pa lnga dang/ sha rnam pa lngas mchod nas/ thams cad rjes su yi rang bar gyur to// ston pa sangs rgyas kun gyi ngo bo nyid de ni chos kyi sku dri ma med pa'i ngang du bzhugs so// 'khor rnams ni sangs rgyas kyi bstan pa bsrung bar mdzad do// pad+ma dbang chen dregs pa srung bzlog gi rgyud las// rjes su yi rang ba'i le'u ste dgu pa'o//// pad+ma dbang chen dregs pa srung bzlog gi rgyud rdzogs so/

CLOSE WINDOW