CLOSE WINDOW

Gpb017.007
བོད་ཡིག

// u rgyan gsang ba brda'i skad du// rgya gar skad du/ g+hu ru d+he wa DAk+ki ni sarba tsit+ta tan+t+ra ga ga nA bar+t+ta bistA ra nA ma/bod skad du/ bla ma yi dam mkha' 'gro thams cad kyi thugs rgyud nam mkha'i klong yangs zhes bya ba/ bcom ldan 'das thog med kyi mgon po 'od mi 'gyur ba/ gzi brjid mtha' yas pa'i dbang phyug gi rgyal po'i sku gsung thugs yon tan phrin las thams cad yongs su rdzogs pa'i snying po g.yo ba med pa la phyag 'tshal lo// zhing khams rnam par dag pa rgyan bkod pa'i pho brang brtsegs pa/ steng 'og phyogs mtshams dbus la sogs pa phyogs dang bral zhing/ rgya yongs su ma chad pa/ gsal la 'od 'bar zhing rnam pa rab tu bkra ba rgyan gyi lhun po rab tu brjid pa'i zhing/ snang yul du bkra ba las kyang/gzung 'dzin ngos bzung dang bral ba'i klong yangs pa chen por/ gdod nas ting nge 'dzin rnam par g.yo ba mi mnga' zhing/ dus gsum mnyam pa nyid du bzhugs nas/ phyogs bral gyi gdul bya la gsal 'grib med cing/mnyam par dgongs nas/ bzod par dka' zhing ltos pa med par gzigs nas/ mnyam pa chen po'i mdzad pa bsnyel ba med par mdzad pa'i ston pa bcom ldan 'das yangs pa chen po mtha' yas pa'i mgon la/byang chub sems dpa'i sprul pa'i 'khor rnam par snang mdzad dang/ mi bskyod pa dang/ rin chen 'od mdzod dang 'dod chags bral ba dang/ don rab 'dzin pa la sogs pa'i rigs lnga'i sems dpa' dang/chos dbyings rdo rje ma dang/ gzugs rdo rje ma dang/ sgra rdo rje ma dang/ dri rdo rje ma dang/ ro rdo rje ma dang/ reg rdo rje ma ste rigs kyi sems ma la sogs pa/ sprul pa rang snang gi dkyil 'khor gyi rol pa las byung ba'i 'khor rnams kyis/dus mi mnyam pa dang mnyam par byung ba rang byung dgongs pa klong gi 'od zer kun tu rnam par bkra ba'i tshe/ bcom ldan 'das kyi sku gsung thugs kyi dkyil 'khor las 'od zer dkar po dang/'od zer dmar po dang/ 'od zer mthing ga rab tu 'phro zhing 'khor sems dpa' dang/ sems ma rnams kyi gnas gsum du thim pa'i tshe/ sprul pa rang byung gi 'khor rnams rang snang gi dkyil 'khor las langs shing/gnas lugs kyi che ba rang la bstan pa'i don dam nam mkha'i klong yangs lta bu'i dgongs pa gtan la dbab par gsol bas/ de nyid du nyid kyi thugs yangs pa chen po mtha' yas pa'i dkyil 'khor nas/'od zer kha dog sna tshogs pa'i 'phro 'du phyogs thams cad du khyab par mdzad de gsungs pa/ e ma bsam brjod bral ba'i 'khor// sems dpa' dang ni sems ma nyon// nga yi klong las rab spros pa// nga yi klong las rang shar ba// dkyil 'khor nga yi dbyings las gsal// 'phro 'du nga yi dbyings las snang// rang byung nga la thams cad rdzogs// rdzogs pa'i ye shes don rab bzung// bla ma yi dam mkha' 'gro thams cad kyi thugs rgyud nam mkha' klongs yangs las/ gleng gzhi'i le'u ste dang po'o// a+thi+-i/// rang snang sprul pa'i 'khor rnams nyon// spros med spros dang bral ba'i don// spros bral ye shes chen po ni// spros pa med pa'i rnal 'byor pas// sems kyi spros pa bcad de bsgom// de bsgom gnad du bsnun pa la// ngo sprod gtan la dbab don du// mtshan nyid ldan pa'i bla ma gces// dus gsum sangs rgyas ma lus kyang// mtshan nyid ldan pa'i bla ma la// gus btud 'bras bu rdzogs sangs rgyas// de phyir mtshan nyid kun ldan pa'i// bla ma de yi sku yi cha// mdzes shing bag dro lhun chags pa// spyod lam gdul bya'i yid dang mthun// gang la gang 'dul thabs la mkhas// gsung gi cha yang 'jam zhing snyan// 'jig rten 'chal gtam bre mo nyung// nges don chos kyi gsung char 'bebs// rgyal ba rnams kyi gsung dang mthun// de bzhin thugs kyang mkha' ltar dag/ lta bsgom gzhi 'bras don dang ldan// rang 'dod bral zhing gzhan don la// brtse bas skyo dub med par brtson// mdor na mdzad pa'i rnam thar rnams// bla med theg mchog chos dang mthun// de ltar ldan pa'i bla ma btsal// rnyed nas lus ngag yid gsum gyis// dgongs dang mnyes pa mtha' dag bsgrub// bkur sti yon gyis dgyes par bya// thugs sun mi dbyung sdom la gnas// de yi rjes 'jug bka' srol 'dzin// de ltar bla ma bsten pa yi// bde legs bsam 'phel yid smon 'grub// bla ma yi dam mkha' 'gro thams cad kyi thugs rgyud nam mkha' klong yangs las/mtshan nyid ldan pa'i bla ma btsal nas bsten tshul bstan pa'i le'u ste gnyis pa'o// a+thi+-i/// mtshan nyid ldan pa'i bla ma la// phyi nang don 'dzom chos yod kyang// snod ldan slob ma ma 'dzom na// rnam grol 'bras bu mi 'byung phyir// gdul bya snod ldan slob ma gces// de yang dad brtson shes rab che// blo yangs ser sna 'dzin chags chung// chos spyod brtson 'grus skyo dub med// bla ma la gus 'gro la brtse// dam tshig la gnas g.yo sgyu med/ khrel 'dzem ngo tsha chad gzhung btsan// 'jig rten chos la yid mi 'jug/ 'khrul phyir mi 'brang nyon mongs srab// yab yob mi byed 'gran sems bral// de sogs yon tan dpag med cing// bla ma mgo yi thod bzhin khur// mched dang grogs la dag snang che// gdams pa khong gi snying ltar 'chang// dam tshig mig 'bras lta bur btsa'// bsgo ba'i bka' nyan mnyen lcug ldan// brtsam pa mthar dbyung phyi thag ring// rang nyid pham khur gzhan sems 'dzin// de ltar 'dzin pa'i gang zag ni// skal ldan bde gshegs thugs kyi sras// snod kyi rab mchog gdams pa'i chos// lhug par sbyin cing thabs kyis bskyang// nyams len srang la rim gyis gcur// 'bras bu don mchog gtan la phab// rgyal ba rnams kyi nges lung sbyin// yon tan de las log pa yi// skyon gyi rnam pa mang tshogs pa'i// dam med slob ma rgyang thag bsring// de ltar blang dang dor ba yis// slob ma'i mtshan nyid legs par brtag/ bla ma yi dam mkha' 'gro thams cad kyi thugs rgyud nam mkha' klong yangs las/mtshan nyid ldan pa'i slob ma brtag cing spang blangs bstan pa'i le'u ste gsum pa'o// a+thi+-i/// mtshan nyid ldan pa'i bla ma yis// gnas dus khyad par can 'dzom tshe// snod ldan rigs mthun slob ma la// spros bcas phyi yi bum dbang bskur// lus smin lha yi phyag rgyas gdab// ngag smin sngags kyi phyag rgyas gdab// sems smin chos kyi phyag rgyas gdab// dkyil 'khor yo byad rdzas tshogs pa// longs spyod rgyan gyi phyag rgyas gdab// zab mo g+ha Na'i yo byad kyis// ye shes lha yi dgyes pa bskang// stangs stabs gar gyis mnyes par bya// dpa' bo thabs kyi bde ba dang// dpa' mo shes rab stong nyid kyis// gnyis med rol pa'i rtsal la bslab// spros pa rnam pa sna tshogs kyis// bya ba du ma la zhugs pa'i// spros pa thabs kyis bcad nas ni// spros dang bral ba'i dkyil 'khor gyi// ngang du rim gyis gzung bar bya// dpa' bo yab dang dpa' mo yum// gnyis med rnam rol sems dpa' yis// ye shes myur du phab pa na// phab rtags 'dar dang 'khrab pa dang// yid rab g.yo zhing 'phar sogs 'byung// de la rab tu brtan sems bzung// spros bcas bum pa'i phyi dbang gis// 'bad pa dang bcas 'bras bu 'byung// bla ma yi dam mkha' 'gro thams cad kyi thugs rgyud nam mkha' klong yangs las// smin byed spros bcas bum dbang gi le'u ste bzhi pa'o// a+thi+-i/// yang ni yang dag bshad bya ba// mtshan nyid ldan pa'i bla ma yis// snod ldan skyes bu nyer gcig la// yo byad dkyil 'khor la sogs pa// dam rdzas rnam pa mang tshogs pa'i// smin byed spros med nang gi dbang// yab yum gsang ba'i dkyil 'khor la// brten nas rim gyis bskur bar bya// de yang phyi nang 'jug pa dang// dmigs pa'i 'phro 'du dag la bslab// slob mas dad bdun bskyed nas kyang// bla ma dgyes pa'i maN+Dal phul// gsol ba gdab cing gus pa bskyed// bla ma yab dang yum bcas pa'i// lha yi nga rgyal ldan pa pos// gsang ba'i ye shes bdud rtsi'i rgyun// thabs shes slob ma'i lce steng dbab// brda dang bcas pa'i ye shes bskyed// bde dang stong par ngo sprad pas// lus ngag yid gsum rab smin zhing/ khyad par ngag la nus pa 'bar// dpal dang gzi brjid rab 'phro zhing// dbang don dran pas don 'bras 'grub// e ma zla gsang thig le yis// bde chen ye shes yang dag mchog/ 'bad med myur du skye bar 'gyur// de skyes spros med ngang la gzhag/ gzhag bya bzhag byed med bzhin du// rnam par rang grol lhug par 'char// de ni spros med nang gi dbang// gdul bya ngag grol ye shes brnyes// bla ma yi dam mkha' 'gro thams cad kyi thugs rgyud nam mkha' klong yangs las/smin byed spros med gsang dbang gi le'u ste lnga pa'o// a+thi+-i/// yang ni mtshan ldan bla ma yis// rgyu rkyen nus stobs ldan byas te// snod ldan skyes bu bdun dag la// gsang ba shes rab ye shes dbang// shes rab gzungs la ma brten nas// bskyed rdzogs mnyam grol lhug par bskur// de yang bla ma he ru ka/ dpa' bo yum dang bcas pa la// rin chen dag pa'i maN+Dal sogs// dga' ston dgyes pa'i yon dbul zhing// thal mo sbyar nas gsol ba gdab// bla mas bde ba'i ye shes dbab// slob ma dad ldan skyes mchog gis// lus ngag yid gsum 'khrul 'khor sbyang// lus sbyangs ngag la phan pa dang// ngag sbyang sems la phan byas nas// dbab bskyil bzlog dang dgram pa la// mkhas shing goms pas dbang lung blang// pad+ma rdo rje mchu sbyor nas// ngo sprod rgya yis thebs par bya// dga' bzhi'i ye shes nyams ngos bzung// bde stong zag pa med pa yi// gnas lugs ngang du mnyam par bzhag/ g.yo med rig pa'i 'khrul 'khor bskor// gsang don b+ha ga'i dkyil 'khor du// mnyam gnas bde ba'i lha mo la// mchod pa 'bul zhing dgyes pa bskang// bcud 'bras bde rol dngos grub blangs// ro myong bcud kyi 'khor lo bskor// bag chags sems kyi 'khrul pa bshig/bdag po bsad nas longs spyod 'phrog/ ma rnams chos kyi dbyings su bskyal// e ma shes rab ye shes kyi// dbang don thugs kyi phur du 'chang// 'bras bu nus pa'i gdeng ldan 'gyur/ bla ma yi dam mkha' 'gro thams cad kyi thugs rgyud nam mkha' klong yangs las/smin byed rab tu spros med shes rab ye shes kyi dbang gi le'u ste drug pa'o// a+thi+-i/// de nyid rab tu spros med kyi// tshig dbang snod ldan skyes bu la// mtshan nyid ldan pa'i bla mas bskur// gzhi rdzogs sems kyi dkyil 'khor du// rang byung rol pa'i lhar gsal zhing// mtha' bral don thob bla ma la// 'byor tshogs lus dang longs spyod kyi// maN+Dal ltos pa med par 'bul// gdung ba'i tshig gis gsol ba gdab// brda don tshig dbang ngo sprod gdab// nyams gsal ye shes 'khor lo bskor// 'khor 'das phyam gdal ngang la gzhag/don dam byang chub sems dkyil du// mtshan ma bral ba'i dbang mchog gis// lus ngag yid gsum smin nas kyang// phyi nang snod bcud brda don sprad// snang srid tshogs kyi 'khor lo bskor// bdag gzhan mnyam gsal dbyings kyi ngang// 'bras bu sku gsum ye shes lnga// zhing dang bcas par lhun gyis rdzogs// de ltar bzhi rdzogs dbang bsgrub pas// dpon slob dga' bde'i gsal nyams bskyang// gtang rag rtse dga' glu bro 'khrab// bkra shis bsngo sogs mtha' rgyas kyi// rim pas las rjes dbyings su bskyal// bla ma yi dam mkha' 'gro thams cad kyi thugs rgyud nam mkha' klong yangs las/ smin byed de kho na nyid kyi tshig dbang rin po che'i le'u ste bdun pa'o// a+thi+-i/// dbang rnams thob pa'i rnal 'byor pas// gsang chen dam tshig rim pa rnams// dang du blang zhing tshul bzhin bsrung// sku gsung thugs dang yon tan dang// phrin las rnam pa lnga nyid kyi// rtsa ba yan lag phra mor bcas// phyi dang nang dang gsang ba dang// de nyid la sogs gang dang gang// dus gsum lus ngag yid gsum gyis// mnyam sbyor rmad du byung ba'i klong// spang blang mtshan nyid shes byas pas// blang dor med par rab tshul dang// spang blang bcas pa'i 'bring po dang// bshags dang sdom bcas tha ma yis// sgrib pa med pa'i don sems bya// yun dang skad cig la sogs pa'i// dus kyi sa mtshams gcad pa dang// sa mtshams gcad du med tshul gyis// yang nas yang du dran shes bya// gal te nyams pa lo tshigs yol// 'gyur dang bcas pa'i chag nyams las// de 'gyur rang lo'i grangs tshad kyis// rdzas dang bcas pa'i bshags pas byang// ltung bar mi 'gyur sor chud nas// dngos grub yang dag brnyes pa yin// rang lo nges par nyams 'das na// des ni ma bshags na rag spyod// de phyir lo zla zhag dus kyis// nyams 'gyur sa mtshams ma 'das par// 'gyod de gang bshags bde legs 'gyur// ma nyams yon tan rtsis las 'das// nyams kyang bshags pas yon tan 'byung// nyams kyang bshags par ma byas dang// bshags kyang bla mas ma gnang na// bla ma nyid dang bcas pa ni// rdo rje dmyal ba'i yang gting du// 'tshod pa'i sdug bsngal rtsis las 'das// bshags par byed dang ma nyams bsrung// sdom par byed pa'i thabs mchog ni// dpal dang ldan pa'i spyod yul lo// bla ma yi dam mkha' 'gro thams cad kyi thugs rgyud nam mkha' klong yangs las/ dam tshig ma nyams par byed pa dang/ nyams na bshags par bstan pa'i le'u ste brgyad pa'o// a+thi+-i/// dgongs klong yang dag mchog gi don// grol byed rmad du byung ba las// rang snang rtsal chen rdzogs 'dod pas// gtan la dbab pa'i dang po ni// chos nyid rol pa ngos bzung ba'i// rnal 'byor rgyal po rnams kyis blta// gdod nas yang dag chen po la// spang blang gtang gzhag ming mtha' bral// de bzhin ngos 'dzin bya byed bral// rgyu rkyen las 'das phyogs lhung bral// smra bsam las 'das de bzhin nyid// ye klong kun bzang rab snang zhing// brda dang rtags kyis mtshon du med// gzhi snang rang gsal 'od chen po// spros dang bral ba'i ngang du gdal// e ma gdod nas rnam dag pa// smra brjod bral ba a la la// bla ma yi dam mkha' 'gro thams cad kyi thugs rgyud nam mkha' klong yangs las/ gdod ma'i dgongs pa ngos bzung ba'i le'u ste dgu pa'o// a+thi+-i/// spyi gzhi chen po ngos gzung ba// rnam pa drug dang yang dag ldan// 'di ni 'dod chen gzhi nyid de// sna tshogs snang zhen 'chol bar rol// 'on kyang sna tshogs snang ba yi// ri mo dag la ngos bzung nas// du ma nyid du gzhir ma grub// kun tu mkhyen snang rang gsal la// yul dang yul can 'du 'phrod pa'i// brda las skad du grags pa bzhin// zad mtha' bral ba'i gzhi mar gyur// bsdus pas mig sogs dbang po la// de yul gzugs sogs rnam pa drug/ de las spros pa mang byung 'gyur// rnam pa du mar rab grags pa'i// nam mkha'i mtha' 'tshol ji bzhin no// bla ma yi dam mkha' 'gro thams cad kyi thugs rgyud nam mkha' klong yangs las/gzhi sna tshogs su smra ba sun dbyung bar bstan pa'i le'u ste bcu pa'o// a+thi+-i/// 'khor 'das spyi gzhi ngos 'dzin pa// rtogs na grol zhes lung ma bstan// ma rtogs 'khrul zhes sgro ma btags// btang snyoms lung ma bstan du gnas// dper na til la mar khyab bzhin// lo 'dab myu gu gang yang min// 'bras bu yin yang rgyur ldog bzhin// bde dang sdug bsngal gang yang min// rkyen gyis ma bslad cang mi spro// rkyen gyis nam bskul phra mo ldang// de la der snang 'byung ba ste// sna tshogs las kyi 'khrul 'khor srid// de sogs gang du'ang ma yin la// sgro btags ming sogs min shes pas/ khong gyur yid spris sgong rgyar 'thum// de ni 'khor 'das spyi gzhi ste// rtogs te sangs rgyas gyur pa med// ma rtogs 'khor ba de ma 'khyams// btang snyoms nyid du gnas pa nyid// gti mug chen po'i mun snang la// ma rig 'thibs pa'i dra bas g.yogs// ye shes sgrib mun bag la zha// spyi gzhi mnyam pa nyid du'o// bla ma yi dam mkha' 'gro thams cad kyi thugs rgyud nam mkha' klongs yangs las/'khor 'das gnyis kyi spyi gzhi bstan pa'i le'u ste bcu gcig pa'o// a+thi+-i/// ye thog dang po'i sangs rgyas ni// grol gzhi 'pho dang 'gyur med pa'i// rang byung rang grol dgongs pa'i klong// rnam dag chos kyi dbyings las gsal// 'phro 'du ye shes thugs rje yis// rtsal dang cho 'phrul du ma 'gyed// rang byung ye shes rang grol gyi// rang rtsal 'phro 'du 'od po che// kun khyab chen po gting mi g.yo// mdzad pa med pa'i 'od zer gyis// mkha' mnyam 'gro la mkha' ltar khyab// gdod nas rang shes rig pa'i klong// 'dod chags zhe sdang gti mug sogs// nyon mongs rang 'jil rang rtsal rdzogs// de bzhin de la ye shes kyi// rol pa rang rtsal cho 'phrul yang// de nyid de las ma g.yos par// re re la yang lnga lnga ru// 'brel pa 'od dang bcas par snang// zang dang thal mar chos kun la// phyogs dang ris su ma chad khyab// thugs rje zhal phyag bcas pa yang// rgyan dang cha lugs mtshan dper bcas// gdul bya rab snang gdal bar snang// 'bring dang tha mar bcas pa ste// re re bzhin du gsum gsum ste// dgu la dgur snang gcig la gcig/ brgya sogs de bzhin rtsis 'das kyi// mthar thug yul dang yul can dang// rab gsal gang dang gang 'dul snang// 'khrul bya 'khrul byed las 'das shing// grol bya grol byed las 'das pa'i// 'khrul grol rang babs ming mtha' bral// ka dag lhun grub rol par bzhugs// ye thog bzang po'i grol gzhi ste// bya byed bya rtsol las 'das so// bla ma yi dam mkha' 'gro thams cad kyi thugs rgyud nam mkha' klong yangs las/ dag pa sangs rgyas kyi grol gzhi bstan pa'i le'u ste bcu gnyis pa'o// a+thi+-i/// ma rtogs sems can 'khrul gzhi ni// nga med pa la nga ru bzung// ngar 'dzin thol skyes lang long las// nga yi 'dzin pa zhugs pa ste// dper na sprin med nam mkha' la// thol skyes glo bur lhags pa'i sprin// gcig la gnyis 'phel cher rgyas nas// nam mkha'i khams kun khyab par byas// de las char dang tshubs ma'i tshogs// rtsis las 'das pa byung bzhin du// ming med pa la ming btags 'khrul// gcig las gnyis kyis ming gi tshogs// phung po 'dus las grangs dang gzugs// rnam pa du mar g.yos pa yis// nga dang khyod dang phan tshun bcas// de las cher langs sred pa sogs// thun mong sna tshogs las su snang// dmigs pa can dang 'dzin pa'i rkyen// 'bras bu sna tshogs rgyu ru 'khrul// yul can bdag por 'dzin pa yis// rkyen las sna tshogs ming byung 'khrul// de la de dmigs sna tshogs blo// thol skyes de la der 'dzin zhugs// de ma thag tu bdag rkyen gyis// yul dngayul can sprul pa ste// phan tshun gcig la gcig ltos pas// rnga dang dbyug gu 'phrad pa las// sgra 'byung ma phrad mi grag ste// bdag ces kun rtog phra mo las// bdag ces gnyis su snang las 'khrul// de yis de bskyed de sogs 'byung// de nas rim nas rim bzhin du// lha mi la sogs 'gro ba dang// mngal dang sgong skyes la sogs pa'i// rnam pa sna tshogs skyes nas 'khrul// las kyi 'phen sdud dpag med spyod// skye rga na 'chi'i rba klong 'khrugs// ma rtogs 'khrul pa lu gu rgyud// bag la nyal gyi rlung langs pas// rab tu g.yo zhing 'khrugs pa yis// byer sdug las kyi 'khrul 'khor las// zad med 'phel med 'khor bar 'khor// spyi tsam las n-i de bzhin te// sgos btsal las kyi mtha' gcod pa'i// srid pa'i sgo nga rdol bzhin du/ la la zad dang 'phel 'grib ston// la la zad pa rang zad de// rang snang rang ngo shes nas ni// rgyu dang rkyen gyi mtha' gcod 'gyur// bla ma yi dam mkha' 'gro thams cad kyi thugs rgyud nam mkha' klong yangs las/ ma rtogs sems can gyi 'khrul gzhi bstan pa'i le'u ste bcu gsum pa'o// a+thi+-i/// 'khrul pa de las zlog pa'i thabs// dang po sngon du 'gro ba'i las// 'khor 'das ru shan phye ba ste// lus sbyang sems la phan pa'i phyir// lus kyi gnad la goms bya zhing// sku gsum bdag nyid gnas pa yis// 'dug stangs rnam pa gsum la bslab// lus nyid grol ba rnam grol phyir// chos kyi sku yi bzhugs stangs su// rnam pa gsum du shes par bya// chos sku'i chos sku rnam rol las// gyad bzhi ar la gtad nas kyang// seng+ge gyad kyi mchong stabs bslab// chos sku'i longs sku'i stangs stabs la/ khro rgyal dpal chen rngam pa'i stangs// rkang lag grad de mkha' la gtad// chos sku'i sprul sku'i 'dug stangs su// seng+ge 'gying bag bcas pa'i tshul// de ltar rnam gsum gang bslab kyang// a 'bras smin phrag mkha' la gtad// g.yo med dal brel med par bzhag/ de bzhin longs sku'i 'dug stangs su// glang chen nyal ba chos kyi sku// stag mo'i ngar stangs longs spyod rdzogs/ khyung chen mkha' lding sprul pa'i sku// de gsum gang la rtsal sbyang yang// a 'bras zur la phab cing gzir// sprul sku'i bzhugs stangs rnam pa gsum// chos sku drang srong tsog pu la// longs sku skyil dkrung mnyam par gnas// sprul sku'i skyil krung gyen du bkyed// lag pa rgyab kyi ka chen btsug/ de ltar rnam gsum gang byed kyang// a 'bras sna phrag mthur du phab// mdor na rdo rje lus kyi gnad// rtsa gzhi rang babs klod nas kyang// g.yo med gdan la gnas par bya// mig gi a 'bras las mi bkol// ldeb btsum med par gnad la gzir// lus gcud 'phur dang mnye ba dang// skabs su sbyong ba'i las la brtson// mnyen lcug ldan pa'i gnas lugs kyis// gdar sha bcad nas gtan la phebs// yon tan ting 'dzin 'phel ba'o// bla ma yi dam mkha' 'gro thams cad kyi thugs rgyud nam mkha' klong yang las/ lus 'khor 'das ru shan dbye zhing gtan la dbab par bstan pa'i le'u ste bcu bzhi pa'o// a+thi+-i/// sngon du 'gro ba'i spyod pa las// 'khor 'das ru shan byed pa'i thabs// ngag sbyang sems la phan pa'i phyir// ngag gi gnad la goms par bya// rlung ro drag po'i shugs phyung bas// mda' ltar steng 'og g.yas g.yon du// gsum gsum dag gis dbyung bar bya// de nas g.yo med gnas la dbab// gsang ba'i 'jam rlung nar gyis drangs// rdzogs nas lhod kyis glod la bzhag/ rdzing gi chu ltar bskyil nas kyang// dgang nas cung zad bzhag pa la// nus pa rdzogs nas dal gyis dbyung// de ltar 'byin 'jug gnas byed pa// drag la yun thung ma yin cing// dal la rgyun bsring tshod dang sbyar// rang babs gshis la dbab pa gces// yang ni 'byin 'jug gang tshe yang// ched du ma yin rang lugs kyis// gtan la dbab pas las la sbyar// me dang chu dang rlung dag dang// nam mkha' sa yi rlung rnams kun// gang dang gang tshe so so yi// dus dang sprad de gnad la gzir// steng dang 'og dang phyogs mtshams dang// g.yas g.yon ring thung mnyam pa nyid// gang la gang dang de la des// sa mtshams rab tu shes pa gces// chu dus me dang me dus chu// rlung dus sa dang sa dus rlung// de ni 'khrul par byed pa'am// yang ni gang stongs khod mi snyoms// ma snyoms gang yang las mi rung// 'bras bu log par 'byung ba yin// me dus rlung dang rlung dus chu// sa dus nam mkha'i rlung shes pas// nam mkha' go 'byed kun la'o// g.yas g.yon 'pho dang 'jug pa'i dus// pho mo ma ning sbyor ba yi// grangs la bslab cing rtsal sbyang bya// 'di yi gnad dang ma ldan na// skyon gyi phung po bsags par 'gyur// des na de la rim gyis bslab// goms nas ru shan 'byed par 'gyur// bla ma yi dam mkha' 'gro thams cad kyi thugs rgyud nam mkha' klong yangs las/ngag 'khor 'das ru shan dbye zhing gtan la dbab pa bstan pa'i le'u ste bco lnga pa'o// a+thi+-i/// yang ni sems gnad sngon 'gro'i las// 'khor 'das ru shan 'byed pa'i thabs// lus dang ngag gi gnad ldan pas// dang po dran bsam 'dzin pa spur// sngar byas 'das pa'i chos rnams kyi// rjes dpyod rtog pa du ma spro// phyir 'gyur byed pa du ma yi// mno bsam 'phro 'du dpag med bya// gang la gang dang de la de'i// rtsal snang 'khrul pa sna tshogs byed// da lta'i byed pa du ma yi// bsam blo dran zhes mang po dang// lcags kyu lta bur 'gugs pa dang// ral gri lta bur rno ba dang// phrug shad so mangs lta bu dang// glang chen lta bur 'gying ba dang// stag mo lta bur ngar ba dang// seng+ge lta bur rtsal ba dang/ khyung phrug lta bur lding ba ste// skyi ser lta bur 'phyo la sogs// sna tshogs rnam pa du ma la// spro zhing bsdus pas ha sha bcad// bar du sems kyi spros pa bcad// sngar 'das zin pa'i rjes mi bcad// phyis 'byung cha med gdos thag bcad// da lta'i dran rig so ma la// cer gyis rang gi rang la gzir// yid bsam dran pa par pur sogs// glog ltar 'khyug cing bya ltar lding// phyi nang snang ba'i ri mo la// yo lang 'gyed pa'i shes rig 'di// byung gnas 'gro ba la sogs dang// dbyibs dang kha dog rnam pa can// yod med yin min tha snyad dang// gcig dang du mar snang ba dang// skye 'chi dgag bsgrub 'dug mi 'dug/ phyi nang la sogs gtad khungs gang// yin min gyu log mtha' bcad de// gnas lugs khung du sbur bar bya// des ni kho yi mtshangs rdol te// gnas lugs ngang la yin lugs kyi// ye gzhi'i steng du phebs par 'gyur// de ltar gtan la phebs pa'i ngang// ma bcos spros bslad mi bya bar// gang shar ngang la klod de bzhag/ bcing dang grol ba med par gzhag/ gzhag bya 'jog byed med pa dang// bya rtsol 'dzin pa med pa ste// nga dang nga yir med pa dang// bdag gzhan ris su ma phyes dang// bzang ngan rtogs pas ma sbags par// rang babs gshis kyi steng du klong// gnas lugs sems kyi ru shan phyed// 'khor 'das rgyab gyes don thog phebs// cog bzhag rgyal po'i ngang du thim// bla ma yi dam mkha' 'gro thams cad kyi thugs rgyud nam mkha' klong yangs las/yid 'khor 'das ru shan dbye zhing gtan la phab pa'i le'u ste bcu drug pa'o// a+thi+-i/// lus ngag yid gsum gnad gzir nas// gtan la pheb pa'i skyes bu la// gnas lugs ye gzhi'i ngo bo bstan// dkar dang nag po'i chos ma grub// 'khor dang 'das pa'i rkyen las 'das// steng 'og la sogs phyogs mtshams bral// dbyibs dang che chung la sogs pa'i// gzugs kyi rnam pa ngos gzung med// gang nas gang du song ba dang// gang dang gang du 'ong ba dang// gang dang gang du sdod pa dang// 'gro dang 'dug pa la sogs te// rnam pa 'di dang 'di lta zhes// bltar med mtshon du med pa dang// ming dang yi ge'i tha snyad dang// bdag dang gzhan zhes bya ba dang// 'khor dang 'das pa nyid dang ni// de yi rgyu rkyen lo ma dang// rtsa ba sdong po yal ga sogs// gang du yang ni ma grub pas// brjod pa kun las 'das pa'o// bla ma yi dam mkha' 'gro thams cad kyi thugs rgyud nam mkha' klong yangs las/ sems gnas lugs kyi ngo bo gtan la phebs pa'i le'u ste bcu bdun pa'o// a+thi+-i/// ngo bo stong pa'i rang mdangs las// rang bzhin gsal snang 'od du shar// rnam pa bkra ba rig byed gsal// sna tshogs snang dang snang yul dang// phra dang rags dang 'phrigs pa dang// rnam pa du ma'i gzugs 'char zhing// ring dang thung dang mnyam pa dang// lham me lhan ne lhang nge ba// re dang dogs pa med pa dang// phyogs dang ris su ma chad cing// yang ni rnam par snang ba la// gzung yul ma grub kun tu gdal// mig dang rna ba sna dang lce// lus dang yid kyi yul rnams kyis// gsal cha phra dang rags la sogs// ma 'gags so sor sa le ba// lham me hrig ge wa ler snang// gzugs la rnam pa sna tshogs dang// de bzhin sgra dang dri dang ro// reg bya chos te gang dang gang// sgrib g.yogs med par rang shar zhing// ma 'dres so sor snang ba la// gcig dang du ma'i grangs mtha' zad// dpa' brtul ba dang stobs bskyed dang// skad cig srid rtsa mthar thug pa// me long gzugs brnyan chu zla bzhin// rang gsal bkrag mdangs 'od po che// bzhin gyi dkyil 'khor rab rgyas pa// ma byas byas pa med par snang// ma bris bris pa med par bkra// ma bzos bzos pa med par legs// ma phyin phyin pa med par sleb// ma bltas bltas pa med par mthong// ma nyan nyan pa med par thos// ma bsnam mnam pa med par dku// ma zos khros pa med par bro// ma reg reg pa med par tshor// ma dran dran pa med par rig/ snang srid bsam yul med par shar// ma bu chu dang 'o ma 'dres// rang snang dkyil 'khor nyid la rdzogs// e ma ngo mtshar snang ba'i chos// rang bzhin snang stong chu zla bzhin// byas byung med par rang snang ngo// bla ma yi dam mkha' 'gro thams cad kyi thugs rgyud nam mkha' klong yangs las/ sems kyi rang bzhin gsal stong 'dzin med du gtan la dbab pa'i le'u ste bco brgyad pa'o// a+thi+-i/// thugs rje rnam par 'gag med pa'i// rang gdangs 'od kyi dkyil 'khor las// 'char sgo ma 'gags cir yang shar// shar dang grol ba du ma yang// rgya mtsho rba rlabs chu nyer bzhin// rtsol med rang shar rang grol ba// 'phro dang 'du ba'i cho 'phrul can// phra dang rags pa'i gya gyu ba// mthong ba med la rgyug cing spyod// rig rig po dang rur rur po// 'phro dang 'du dang gnas pa dang// sna tshogs ri mo ma bris kyang// bris la wal wal shar ba bzhin// yang ni gtang gzhag gzung 'dzin bral// 'phags pa'i thugs rje chen po yang// dkyil 'khor de las g.yos pa med// rigs drug 'khor ba'i rtog tshogs kyang// dkyil 'khor de las logs na min// 'das dang ma 'ongs da ltar gyi// bya byed bya ba du ma yang// sna tshogs shar grol sprul pa'i sku// mdor na 'phro 'du mang po dag/ rtsol med rang shar de bzhin gshegs// 'gag pa med las gang yang snang// de ltar gsal dang stong pa dang// rnam pa 'gag pa med pa kun// longs spyod rdzogs dang chos kyi sku// sprul pa'i sku ste sku gsum mo// rang byung nyid kyi dbyings las snang// snang zhing dkyil 'khor nyid la thim// de las de ltar grol thag bcad// yin min la sogs gang la yang// bya rtsol 'dzin pa med pa'i klong// rang babs lhug par klod la gzhag/ rab 'bring tha ma'i klod tshul gyis// sku gsum ye shes mngon du shar// 'gag pa song bar rtsal chen gyis// rab 'byams gdal khyab mkha' ltar gnas// ngo bo rang bzhin thugs rje rnams// 'pho 'gyur med par ka nas dag/ ka dag chen po'i ye klong las// gang shar rol pa'i rtsal 'phros pas// 'od kyi gdul bya rnams la snang// gang la gang dang de la des// so sor re dang 'dod pa bskang// bskal pa du ma'i sangs rgyas kyi// rnam thar mdzad pa'i phrin las kun// skad cig de yi klong du rdzogs// rtsol ba med par der sangs rgyas// byas med 'gro don lhun gyis grub// e ma ngo mtshar thugs rje'i dpal// snang srid 'khor 'das chos rnams kun// skad cig de la khregs chod nas// btang snyoms phyal pa med par grol// bya rtsol 'dzin med rgya yan chos// 'di ni kun gyi yang rtse ste// seng phrug snying gi rtsal chen rdzogs// bla ma yi dam mkha' 'gro thams cad kyi thugs rgyud nam mkha' klong yangs las/ sems kyi rtsal ma 'gags par thugs rje'i 'char tshul dang/gnas lugs kyi steng nas yin lugs ngo sprad de/ sems kyi bzhag thabs kyi gnad bstan pa'i le'u ste bcu dgu pa'o// a+thi+-i/// gnas lugs gzhi thog pheb nas kyang// ma bu 'dres pa'i rnal 'byor kun// yid dpyod 'dzin pa'i khungs 'byin pa// mngon sum rang gnad gtan la dbab// ye shes rang snang mngom sum gzir// gzhi gnas mchong gur smug po'i dbus// mtshan dang dpe byad dpal 'bar zhing// gsal dag sgrib g.yogs med pa'i sku// 'khor dang gtso bo la sogs pa'i// mu khyud rnam rig rab tu 'bar// nang gsal ye shes rig pa'i lha// lham me lhan ne lhang nge ba// mtshan dang dpe byad rdzogs pa de// snang ba dag pa rtsa yi lam// shel sbug rkyen dang bral ba las// zang mar thal nas chu yi sgo// gzugs snang yul can b+h+r-i gu ta// ma bsgribs hu re dang gsal ba// tal mar don cing dbyings kyi yul// rkyen bral nam mkha' dag pa'i klong// mkha' dbyings ngang las 'char ba ste// 'khor dang sprul pa yang sprul ba// 'od dang 'od khyim zer dang bcas// 'khor lo nya mig zer thag ris// dra ba dra ba phyed pa dang// mig mang ris las zab gur bzhin// mda' mdung mtshon cha'i rnam par gzengs// de dag rnams kyi dkyil 'khor dbus// rma bya'i mdongs 'dra 'od lnga 'khrigs/ khyad par mngon sum ye shes kyi// ti la nyag gcig ye shes don// snum la 'dril zhing phra la grim// gsal 'tsher lhun sdug 'od po che// lu gu rgyud kyi 'khor dang bcas// mu tig chun 'phyang lta bur gsal// g.yo dang 'gul dang 'phrigs par bcas// mngon sum yang dag nges pa'i don// yid dpyod tshig gi mtha' las 'das// dpal dang yangs pa'i dkyil 'khor can// sangs rgyas kun gyi ye shes sku// sgrib bral rjen par lhang nger snang// zhing khams yangs par tshom bu'i tshul// yid gnyis 'dun pa bral ba yang// 'khor 'das rgyab gyes yang dag snang// rdzogs pa'i sangs rgyas kun gyi gsang// gsang chen 'od du de 'bar ro// bla ma yi dam mkha' 'gro thams cad kyi thugs rgyud nam mkha' klongs yangs las// chos nyid ye shes mngon sum gyi snang ba ngos 'dzin pa'i le'u ste nyi shu pa'o// a+thi+-i/// mngon sum rig pa'i sku mthong nas// sku gsum 'dug stangs dgu ldan zhing// sems rig gtan la dbab byas te// snang ba'i thig le g.yo med de// gsal snang mig gi btson bzung nas// mdung tshugs 'ben la ma yengs gtad// thog mar yad yud lang long 'char// bar du de dag dal gyis pheb// tha ma g.yo med btsan sa zin// cher 'phel gong nas gong bzhin du// lnga lnga'am ni dgu la sogs// tshom bu lta bur cher snang zhing// yul khams yul gru khyab pa dang// yi ge'i tshogs dang phyag mtshan dang// phyed sku dang ni sku rkyang gi/ rnam pa du mar 'char ba ste// rim bzhin sku rkyang yab dang yum// longs spyod rdzogs pa'i cha lugs las// 'khor dang sprul par bcas te snang// dbu brtsegs phyag mang rnam pa can// che la rags shing phra la zhib// 'od sku 'ja' dang zer thag bcas// rim gyi rim gyis 'phel bar 'byung// dkar ser dmar ljang mthing ga'i mdog kha dog sna tshogs snam bur 'gyur// dper na zla ba yar 'phel ltar// 'phel bar 'gyur dang bcas pa'o// bla ma yi dam mkha' 'gro thams cad kyi thugs rgyud nam mkha' klong yangs las/ nyams kyi mthong snang gong du 'phel ba'i tshul bstan pa'i le'u ste nyer gcig pa'o// a+thi+-i/// gong nas gong du 'phel ba yi// nyams kyi snang ba rdzogs nas ni// gang la zhen dang dngos bral bas// 'dzin pa med pa'i rang snang du// de dag che chung skye 'bri med// tshad la phebs nas g.yo 'gul bral// rnal 'byor lus ngag yid rnams ni// smra brjod bral ba nyid du 'gyur// dpal ldan dkyil 'khor lhun gyis grub// ye shes rang snang 'khrul pa dag/snang srid bya rtsol 'dzin pa bral// nyin dang mtshan mo'i snang mtha' zad// zas skom gos kyi zhen pa dang// nyon mongs chags sred ngang gis zhi// zla ba nya rgyas lta bu ste// de nas dgung la shul mi mtshon// ting 'dzin rtsal rdzogs mngon shes 'char// phyi dang nang med mnyam par gdal// tshogs drug cho 'phrul nyal gyis zhi/ tshogs drug rang grol gtan la pheb// rig pa yang dag tshad la pheb// 'phel 'grib med par dkyil 'khor rdzogs// bla ma yi dam mkha' 'gro thams cad kyi thugs rgyud nam mkha' klong yangs las/ rig pa ye shes kyi dkyil 'khor tshad la pheb par bstan pa'i le'u ste nyer gnyis pa'o// a+thi+-i/// dbyings kyi dkyil 'khor rab rdzogs nas// phyi dang nang med kun tu yang// gdal ba chen po'i klong du thim// ye gzhi'i steng du rtsal chen rdzogs// chos zad blo zad 'khrul pa zad// zad pa'i dkyil 'khor mtha' yas nas// yod pa ma yin med ma yin// gnyis snang kun gyi mtha' las 'das// yod ces kun rdzob ma yin la// med ces phyang du de ma chad// gang yang mtha' las 'das pa'o// sgro btags zhen chos phra mo tsam// gtan du yod pa ma yin zhing// snang srid 'khor 'das chos rnams kun// nyid kyi klong du yangs par thim// rtsal chen ya nga med par rdzogs// dpa' shugs chen po'i dkyil 'khor zad// zad cing stong pa'ang ma yin te// ming gi rnam grangs las 'das nas// brjod bya rjod byed brjod pa las// 'das pa'i ngang du thim pa'o// re re'i snang tshul ma yin par// gting rdzogs yangs pa'i klong du dag/phyi yi yul snang 'khrul zad par// nang gi ye shes yongs su rdzogs// ye shes dang ni nyon mongs kyang// dbye ba med par mnyam pa ni// chos nyid yangs pa'i ngang du zad// dpa' bar 'gro dang rdo rje 'dzin// mi g.yo gting gsal dngos 'dzin bral// tha snyad dri ma zad nas kyang// byas med byas pa kun las 'das// phung po kun kyang dus gcig zhig/ gsang chen bskal pa'i dkyil 'khor zhig/yangs shing gsal la rnyog pa med// e ma sgrib g.yogs dang bral ba'i// mkhas pa'i tshig dang rdzun tshig dang// ya nga bag tsha re dang dogs// mtha' dbus la sogs 'gro ldog rnams// dus 'dir zung zad ye klong grol// kun chub rgyu yi he ru yang// dus 'dir snang tsam ma yin la// sgro btags nyid las 'das pa'o// zang ma dang ni thal ba nyid// bla ma lha dang DAk+ki ya// dkyil 'khor nyid kyang zang thal bar// snang ba rdzogs nas ye shes kyi// thugs rje zhal phyag skur shar bas// ye shes snang ba'i cha ma 'gags// 'dzin cha thams cad zad pa'o// bla ma yi dam mkha' 'gro thams cad kyi thugs rgyud nam mkha' klong yangs las/chos nyid zad snang gi dkyil 'khor rdzogs nas/ 'dzin cha thams cad kyi mtha' rdzogs par bstan pa'i le'u ste nyer gsum pa'o// a+thi+-i/// zag pa zad pa zhes bya bar// dang po 'dzin cha mtha' yas kyang// rtsal gyi dkyil 'khor rdzogs pa'i tshe// bag chags bcas pa'i 'dzin cha ni// phra mo tsam yang mi snang bar// dkyil 'khor dbyings su thim nas ni// 'dzin dang 'dzin pa zad pa las// chos nyid zad pa zhes bya ste// de ltar 'dzin pa rang zad nas// bdag tu rtog dang gzhan du rtog/ phyi nang gang dang bdag gzhan sogs// phan tshun dbye ba med klong du// gzhi snang ye shes zhes bya ba// gsal la dag cing rnyog ma med// rab rib bag chags gtan zad pa'i// ye shes 'od gsal lam me ba// 'khor 'das yongs grol gdal ba las// dkyil 'khor du ma'i 'char sgo can// ye nas rab tu shes pa'i phyir// gzhi snang ye shes rnam par dag/ kun 'dus sems dpa'i rgyal po ste// ye shes rnams kyi rtsa ba zug/ 'di las 'phro dang 'du med kyang// gsal ba 'od kyi dkyil 'khor bkra// de las 'du dang 'phro ba yis// ye shes dbye ba du mar 'phro// gdul bya du ma'i spyod yul du// ye shes du ma'i dkyil 'khor yang// sku dang 'od du bcas par ro// bla ma yi dam mkha' 'gro thams cad kyi thugs rgyud nam mkha' klong yangs las/gzhi snang gi ye shes bstan pa'i le'u ste nyer bzhi pa'o// a+thi+-i/// gzhi snang ye shes chen po las// chos kyi dbyings kyi ye shes zhes// mtha' dbus med par mnyam gdal zhing// snang srid 'khor 'das dkyil 'khor rnams// sgrib g.yogs bral ba lam me ba// spyi zlum ye shes rab 'byams su// rang rdzogs sa ler shes pa ste// dbyings las rab snang thugs rje yi// rtsal 'phro zer gyis gdul bya yi// re dang 'dod pa bskang ba'o// de la chos dbyings ye shes nyid// spyi zlum mtha' dbus med pa'o// gti mug mi shes mun pa sangs// shes bya'i dkyil 'khor ma lus rgyas// gdod nas rnam dag spros bral zhing// spros dang yang dag de bzhin nyid// chos dbyings rab 'byams ye shes so// bla ma yi dam mkha' 'gro thams cad kyi thugs rgyud nam mkha' klong yangs las/ chos kyi dbyings kyi ye shes bstan pa'i le'u ste nyer lnga pa'o// a+thi+-i/// me long lta bu'i ye shes kyang// 'char sgo rnam pa du ma yi// rol pa ma 'gags sa le ba// rab rib mun pa rab sangs nas// snang ngor gsal tsam ma yin par// gting gsal ye shes chen po'i don// thams cad rang la rang bzhin snang// gsal la ma 'dres so sor snang// 'phro dang 'du dang rlabs g.yo ba// phyogs dang ris chad ma yin cing// 'khor mo yug la gsal ba ste// snang la rang bzhin ma grub gsal// gsal la 'dzin pa med par khyab// bdag dang bdag rkyen yul 'das par// sgo rnams gang yang ma 'gags shing// lhug pa nyid du snang ba las// me long lta bu'i ye shes te// bsgrib bya sgrib byed bsgrib pa las// 'das shing rang snang dkyil 'khor rdzogs// yul dang yul can gnyis mnyam par// gsal la ma 'dres shar ba'o// bla ma yi dam mkha' 'gro thams cad kyi thugs rgyud nam mkha' klong yangs las/me long lta bu'i ye shes bstan pa'i le'u ste nyer drug pa'o// a+thi+-i/// mnyam pa nyid kyi ye shes ni// 'khor ba gting mtha' med pa dang// 'das pa dkar po'i chos rnams kun// phan tshun phyogs su ma chad par// ris med mnyam nyid chen por gnas// gting gsal chen po'i gdangs las kyang// sna tshogs bkra ba'i 'phro 'du yang// mnyam nyid spang dang blang med par// ye shes gcig pa'i klong du grol// mnyam dang mi mnyam ris med la// mnyam pa nyid ces bya ba ste// de dag ye nas shes pa la// mnyam pa nyid kyi ye shes zhes// ming du btags par zad pa ste// don la yangs dang dogs med cing// phyogs dang ris dang nga khyod med// bzang dang ngan pa la sogs te// mdor na gnyis snang las 'das pas// gting gsal ye nas dag pa'i klong// mnyam pa nyid kyi ye shes so// bla ma yi dam mkha' 'gro thams cad kyi thugs rgyud nam mkha' klong yangs las/ mnyam pa nyid kyi ye shes bstan pa'i le'u ste nyer bdun pa'o// a+thi+-i/// so sor rtogs pa'i ye shes ni// dbyings gsal chen po'i rol pa las// rtsal gyi 'phro 'du 'gyed pa dang// de dang de yi cho 'phrul las// rnam pa du mar snang ba kun// ma 'dres 'dres pa med bzhin du// gsal 'grib med par so sor snang// rang las rang nyid 'od shar bas// chags pa med cing bral med par// 'od snang las kyang 'od kyi mdangs// g.yos pa med par bkra lam mer// ye gdangs nyid du rab shes pas// rnam par rig bkra 'du dang 'phro// phra zhing grim dang yang zhing g.yo// so so nyid las so sor snang// srid bral gzhir snang 'phro 'du yis// ye shes dag pas rtogs dang grol// rnam par rig byed ma 'gags par// so so rtogs pa'i ye shes nyid// rang byung dbyings las rang shar ba'o// bla ma yi dam mkha' 'gro thams cad kyi thugs rgyud nam mkha' klong yangs las/ so sor rtogs pa'i ye shes bstan pa'i le'u ste nyer brgyad pa'o// a+thi+-i/// bya ba grub pa'i ye shes ni// phrin las las kyang phrin las kyi// 'du 'phro rang snang rtsal po che// sprul dang yang sprul kun nas sprul// gdul bya gdul ba 'dul byed kyis// dkyil 'khor sna tshogs rang snang zhing// 'bras bu yang dag de bzhin nyid// rtsol bral chen por lhun gyis grub// byas pa med kyang rang gshis las// rang byunga'adus ma byas su snang// de bas bya byed rtsol bral bas// bya ba byed cing byed pa bya// yang dag chen po grub pas ni// de ni yang dag ye gdangs su// shes dang rnam rig rnam par bkra// bya ba grub pa'i ye shes nyid// grangs mtha' las kyang rnam zad pa// bdag rtog ma yin gzhan ma yin// bdag gzhan ris la yod ma yin// yang dag yang grol las rnams zad// de las bya ba grub pa ste// ye shes nyid ni sgrib pa bral// kun nas yang yang bskyar gzhi med// rgyan dang bcas pa'i rol pa ste// 'di kun gtang gzhag med pa yin// bya ba med la byung ba med// byas pa med pas bskyar gzhi med// de phyir 'khrul pa rang dag pas// ye shes rnam par grol ba'o// bla ma yi dam mkha' 'gro thams cad kyi thugs rgyud nam mkha' klong yangs las/bya ba grub pa'i ye shes bstan pa'i le'u ste nyer dgu pa'o// a+thi+-i/// yang dag ye shes bden ma mthong// bar ma do ru 'khyams pa la// bar do gnad kyi don bstan pa// bar ma do yi dbye ba dang// sa mtshams gnas lugs snang lugs te// skye gnas bar do 'chi kha yi// bar do dang ni chos nyid kyi// bar do srid pa'i bar do ste// de ltar dbye ba rnam pa bzhi// de la bar do'i sa mtshams ni// ma la skyes nas 'chi kha yi// nad kyis btab pa tshun chad du// skye gnas bar do zhes bya ste// phyi nas 'byung bzhi rim gyis thim// nang dbugs chad pa tshun chad du// 'chi kha ma yi bar do yin// de nas nang gi dbugs chad nas// lhun grub snang ba tshun chad du// chos nyid bar do'i sa mtshams yin// de nas mngal du tshud pa tshun// srid pa bar do'i sa mtshams yin// de nas bar do'i gnas lugs ni// gdos bcas sha khrag lus grub pas// ye shes snang ba 'gag pa ste// phung po khams dang skye mched dang/ rtog tshogs 'phro 'du du ma ste// yul dang yul can 'thab pa ni// skye gnas bar do'i gnas lugs so// rlung mkhris ban kan 'dus pa sogs// 'chi rkyen gnad kyis 'byung ba rnams// rab tu 'khrugs shing lus ngag yid// sdug bsngal tshor ba dpag med myong// 'chi kha bar do'i gnas lugs yin// bdag dang bdag gir 'dzin pa yi// phung po lus kyi rten bor nas// rang las rang dbang dus der thob// skad cig chos nyid bden don mthong// chos nyid bar dor longs spyod las// chos nyid bar do'i gnas lugs yin// sngon gyi bag chags las dbang gis// gzugs gcig yod snyam srid pa'i lus// dbang po tshang zhing thogs pa med// yul rnams kun la thogs med rgyug/rnam shes bya sgro rlung bskyod bzhin// dri za yid yud ban ma bun// srid pa bar do'i gnas lugs so// gnas lugs de las snang lugs ni// skye gnas bar do'i snang lugs su// rang bzhin babs kyi gnas pa las// phung po khams dang skye mched dang// nyon mongs la sogs rnams kun// yul las snang zhen kun tu spyod// 'chi kha bar do'i snang lugs kyang// shes pa rtse gcig mi gnas pas// smig sgyu g.yo ltar ban bun dang// lang long zang zing du mar snang// rab tu g.yo zhing 'phrigs pa 'ong// chos nyid bar do'i snang lugs su// rang snang chos nyid rol pa'i klong// rang rtsal ma 'gags sna tshogs te/ kha dog sna tshogs 'bar ba'i 'od// sku dang ye shes thig le dang// zer dang chos nyid rang sgra ste// 'ur ting sing khrol dpag tu med// 'byed dang phyed pa rang grol nyid// rang shar grol nas bden pa mthong// srid pa bar do'i snang lugs la// rmi lam nyid kyi snang ba ltar// yad yud phyad phyod sna tshogs pa// yid yul bden snang 'char ba ste// rigs drug gang dang gang skye bar// de dang de yi snang ba 'char// so sor dmigs yul rang rang gi/las kyi 'phen sdud snang ba'o// de ltar bar ma do ru yang// rab 'bring tha ma yang mtha' yi// skyes bu rtsal sbyang lam sna bzung// skye gnas nyid nas bye brag dbye// nges par 'khrul pa'i snang ba dag/ye shes rang rtsal ngo yis bzung// rab la shar grol 'bring po glod// tha ma rang gi rang sa bzung// yang mtha' smon lam rtsal chen sbyang// 'phar dang bgrod la bzung bas kyang// g.yo ba med pa'i ting 'dzin gyis// gang la goms pa de 'grub 'gyur// 'bras bu nges pa'i gdeng chen ni// skad cig nyid la zin pa gces// bla ma yi dam mkha' 'gro thams cad kyi thugs rgyud nam mkha' klong yangs las/ bar do bstan pa'i le'u ste sum cu pa'o// a+thi+-i/// nyams su len pa'i gnad bstan pa// rgyu dang rkyen las gyur pa yi// las kyi sgrib pa sbyong ba ste// lus kyis lus nyid ar la gtad// ngag gis ngag nyid btson du bzung// sems kyis sems nyid gtan la phab// spyi 'dus sgo gsum gtan la dbab// nges shes chen po'i ting 'dzin gyis// 'dun pa bla ma 'bral med bsten// blo sna bstung zhing mi rtag bsgom// gzhan don blo bskyed rang 'khris bcad// 'dod yon zhen pa'i 'ching ba gcod// bag chags mngon zhen g.yeng la bor// gnas lugs ye shes dran bsam bzung// gang shar blo bral ngang la gzhag/'khor gsum gang shar rgyas btab pas// ye klong nyid du mngon sangs rgya// 'bras bu rang babs lhun gyis grub// ma bcos yangs pa chen po'i don// sa chen rab tu gnon pa yin// bla ma yi dam mkha' 'gro thams cad kyi thugs rgyud nam mkha' klong yangs las/nyams len gyi gnad bstan pa'i le'u ste so gcig pa'o// a+thi+-i/// tshe rabs las kyi 'bras bu las// nag po zad pa'i sbyangs stobs kyis// rang grol phyag rgya chen po bstan// gnas lugs gzhi yi phyag chen ni// ngo bo mi g.yo 'gyur ba med// rol pa ma 'gags sna tshogs kun// chu zla me long gzugs brnyan ltar// bya rtsol 'dzin pa med par 'char// ye nas rab rib med pa'i klong// kun gsal gdal khyab 'od po che// sems can kun la thun mong snang/ khyad par dal 'byor ldan pa yi// lus can kun la rtsal du zhugs// g.yo med gting gsal chen po ste// nam mkha' rgya mtsho ri rgyal tshul// thogs dang gos pa med pa'o// bla ma yi dam mkha' 'gro thams cad kyi thugs rgyud nam mkha' klong yangs las/ gzhi gnas lugs kyi phyag rgya chen po bstan pa'i le'u ste so gnyis pa'o// a+thi+-i/// bgrod byed lam gyi phyag rgya che// gang shar rnam pa sna tshogs kun// chu la ri mo bris pa dang// mkha' la bya tshogs 'gro ba'i rjes// mtsho la kha ba babs pa ltar// gang shar lam gyi rol pa rnams// gang shar rang grol phyag rgya che// snang yul ma 'gags gzung yul bral// ngang las ngang nyid thim pa ste// ngang shar rol pa'i gnad thebs pas// lam gyi 'char tshul ma 'gags pa'i// ma ma chen mor gnas pa'o// bla ma yi dam mkha' 'gro thams cad kyi thugs rgyud nam mkha' klong yangs las/ lam phyag rgya chen po shar grol gyi gnad bstan pa'i le'u ste so gsum pa'o// a+thi+-i/// 'bras bu rang sangs rgyas pa'i sku// phyag rgya chen po yangs pa'i klong// gzhi las rnam par ma g.yos par// rang bab gshis la 'gyur med chos// lus ngag yid kyi rnam rol kun// mkha' la sprin tshogs dengs pa ltar// 'bad rtsol med par rang sa zin// g.yo 'gul med par gtan la pheb// re dogs med pas lam rtsal rdzogs// rgyu rkyen las 'das phyag rgya che// 'bras bu phyag rgya chen po ste// ma bcos rang bab lhun gyis grub// dpe bral nam mkha'i dkyil 'khor bzhin// gting rdzogs chen por rab mnyam bzang// bla ma yi dam mkha' 'gro thams cad kyi thugs rgyud nam mkha' klong yangs las/'bras bu phyag rgya chen po bstan pa'i le'u ste so bzhi pa'o// a+thi+-i/// de ltar gzhi lam 'bras bu yi// phyag rgya che la mnga' brnyes pas// nyams len lam gyi bogs dbyung ba// lus ngag yid gsum mnyam gnas pas// g.yo med bsam gtan ngang la bzhag/ tshogs drug yul la yid mi spro// gang shar mnyam pa nyid gnas pa// dmigs pa rtse gcig mi gtad par// phyam gdal ro gcig don la bzhag/ de la spyod lam ci bder spyod// phyi nang yul dang yul can kun// spang blang dgag bsgrub med pa'i ngang// 'gyu ba dngas sangs nyid gnas pas// spro bsdu'i spros pa rang chod de// re dogs blang dor las 'das 'gyur// nyon mongs la sogs rang sar dengs// ye shes ngang gnas lhun gyis grub// gsal 'grib med pa'i nyams las kyang// sna tshogs shar grol rtogs pa 'char// blta ba'i gdeng chen rnyed pa 'byung// bsgom pa gshis lugs rang bab 'char// spyod pa 'bad rtsol las 'das 'byung// 'bras bu re dogs 'dzin pa bral// de kun lam gyi rtsal sbyong ste// bdag don rtogs pa'i ye shes kyis// ngang bsgom gdal ba lhug par 'char// bla ma yi dam mkha' 'gro thams cad kyi thugs rgyud nam mkha' klong yangs las/ lam nyams len bogs dbyung ba bstan pa'i le'u ste so lnga pa'o// a+thi+-i/// nyams len lam gyi rtsal 'byongs nas// cir snang grogs su shar nas kyang// 'bras bu btsan sa zin pa ni// snang srid 'khor 'das chos rnams kun// du ma ro gcig mnyam gnas pas// yangs pa chen po'i gnas lugs la// rang bab gshis la g.yo med bzhag/ rnam mkhyen rdzogs pa'i sangs rgyas dang// srid pa yang mtha'i sems can kun// mnyam nyid gcig pa'i ngang du ste// de bzhin gdeng ldan rnal 'byor pas// yar la re dang mar la dogs// re dogs med pa'i ting 'dzin gyis// snang srid thams cad rgya yis gdab// gtad pa med pa'i ngang la bzhag/ gsal 'grib med pa'i ngang la gzhag/ rang yan yin pa'i ngang la gzhag/rang sa zin pa'i ngang la gzhag/ bcos bslad med pa'i ngang la gzhag/ blang dang dor ba med par gzhag/ de ltar de yi gnas lugs la// ye shes ngang bsgom chen po zhes// 'bras bu btsan sa zin pa ste// rnam kun ye shes mchog gi don// lam 'gag sgrol nas dmigs su skyol// bla ma yi dam mkha' 'gro thams cad kyi thugs rgyud nam mkha' klong yangs las/ 'bras bu ye gzhi'i steng du btsan sa zin pa'i le'u ste so drug pa'o// a+thi+-i/// gzhi lam 'bras bu'i don ldan zhing// phyir mi ldog pa'i gdeng chen gyis// phrin las gzhan don 'byung byed pa'i// ngang las thugs rje'i rlabs g.yo zhing// lus la lus te rdo rje yi// rtsal chen pha lam g.yos pa ltar// cho 'phrul sna tshogs 'gyed pa dang// ya ma zung rnams ston pa'o// 'gag med gsung gi rtsal 'phros pas// sgra la dbang 'byor tshangs pa'i dbyangs// gdul bya dpag tu med rnams kyi// so so'i skad du rnam par sgrogs// chos rnams kun gyi de bzhin nyid// gdal bas don rtogs smin grol byed// 'gyur med rol pa ye shes thugs// sna tshogs 'gro ba'i lam rgyud du// re re la ni re rer snang// thams cad mkhyen lnga shugs las 'byung// 'gro 'dul rtsal snang dpag tu med// rtsol bral chen po'i 'gro don gyis// ngan song dong sprug chen por ro// bla ma yi dam mkha' 'gro thams cad kyi thugs rgyud nam mkha' klong yangs las/don thob the tshom med pa'i dgongs pa des 'gro don shugs 'byung du mdzad par bstan pa'i le'u ste so bdun pa'o// a+thi+-i/// spyod pa spyod nas don 'byung ba// yang dag don ni yang dag bshad// gang gis nyams su len pa yi// ma bu dad brtson snying rjer ldan// phongs med bdag lus thed la bor// re ltos nyam nga bag tsha med// 'jig rten chos la mthun mi 'jug/snang ba'i chos la zhen mi chags// legs nyes rtsis gdab bral ba yi// yang dag nges pa'i chos la 'jug/ snang zhen 'khri ba rbad kyis bcad// gang la'ang nyam nga med par bya// spobs pa'i gzengs chen bstod pa gnad// bla ma yi dam mkha' 'gro thams cad kyi thugs rgyud nam mkha' klong yangs las/ nyams su len pa'i gang zag bstan pa'i le'u ste so brgyad pa'o// a+thi+-i/// yang dag blang dor med pa yi// chos mchog nyams len brtson pa'i gnas// rab la dben zhing nyams dga' ba'i// 'bring la gnyan zhing rtsub pa ste// tha mar rang mthun stabs dang bstun// ya ma zung gi gnas rnams su// nyams len drod dang mi ldan spang// 'jig rten skye bos bgrod pa'i sa// yid gnyis 'jug pas mi bsten spang// dam nyams gnas mal mi gtsang sa// bsgrub la bar chad 'jug pas spang// mdor na skyon yon legs brtags te// dang po legs pa'i gnas mchog btsal// de nas rang la rang shes nas// ya nga la sogs 'jigs pa spang// de nas bstan pa thob pa yis// nges med gnas kyi bdam ris spang// tshong dus la sogs g.yeng ba'i sa// ma rungs lha 'dre mi gsum kun// 'gyu srang 'du sa chen po bsten// des ni yang dag don chen 'grub// nges pa rnyed nas gdeng chen thob// bla ma yi dam mkha' 'gro thams cad kyi thugs rgyud nam mkha' klong yangs las/nyams len gyi gnas bstan pa'i le'u ste so dgu pa'o// a+thi+-i/// tshul ldan legs pa'i skyes mchog de// dmigs pa'i gnas der slebs pa dang// rig pa rten dang phral nas kyang// sems nyid chos kyi dbyings su 'phang// mkha' ltar khyab pa'i ngang la gzhag/ gces 'dzin lus kyi gdung ba bcad// sa rdo lta bur lings kyis dor// snang srid 'khor 'das chos rnams kun// gy-i na tsam du bun gyis bskyur// gtad med rig pa dbyings su spur// phyi nang snang zhen 'khri ba bcad// yul med dmigs gtad bral bar bzhag/ rga nad 'chi sogs 'dun pa bshig/rang bab ngang du bskyur la btang// cog bzhag chen por la thag bcad// mdor na gdal ba chen po'i ngang// mtha' bral yongs grol gnad la gzir// blang dor la sogs blo las bskyung// bla ma yi dam mkha' 'gro thams cad kyi thugs rgyud nam mkha' klong yangs las rig pa rten dang phral nas blta ba'i la thag gcad par bstan pa'i le'u ste bzhi bcu pa'o// a+thi+-i/// la thag chod pa'i dus nyid na// mi gtsang rdzas kyi phung po ste// bdag lus 'byung ba'i grong khyer bshig/ ye shes lha rnams dbyings su spar// dag pa bdud rtsir dmigs pas bsgyur// thugs rje rtsal gyi dgongs pa yis// lhas 'dod lha la mchod byas shing// 'dres 'dod 'dre la ltos med sbyin// len chags rigs drug sems can la// pham rgyal rtsod 'then med sems kyis// ya nga khu 'khrigs spangs la sbyin// re dang ltos pa med pa yis// gang la sbyin dang gang gis sbyin// gang ltar sbyin pa'i tshul rnams kyis// 'du 'phro chos nyid bden pa'i mthu'i// dpung dang bcas pa'i byin rlabs kyis// kun kyang bden 'bras mchog la reg/ bla ma yi dam mkha' 'gro thams cad kyi thugs rgyud nam mkha' klong yangs las/bdag rtog 'khrul pa'i gces 'dzin bshig nas lha 'dre'i 'khrul cha bcad pa'i le'u ste zhe gcig pa'o// a+thi+-i/// de ltar de la rab brtson pa// bdud dang bdud kyi rigs kyi lha// mi dang 'dre ru snang yang rung// cho 'phrul rnam 'phrul du ma yis// skabs tshol glags lta byed pa na// de dang de la dmigs pa gtad// bdag dang phan tshun dbyer med bsre// byams sems snying rje'i rtsal gyis bzung// bden mthong yang dag chos la gzud// slar yang dmigs pa sprul bsgyur gyis// gang la gang dgos ci 'dod kyi// re ltos med pa'i sbyin pa btang// bdag gzhan re dogs nye ring gi/blang dor 'dzin pa'i rtod phur phyung// gang dang gang du 'brel bcas pas// rnam dag rgyal ba'i zhing du bskyal// rnam grol legs pa'i lam la sbyor// byang chub chos kyi sa bon gdab// las 'bras dkar po'i bag chags bzhag/ bla ma yi dam mkha' 'gro thams cad kyi thugs rgyud nam mkha' klong yangs las/ bdud ngos bzung zhing gnyen po byams snying rjes thog brdzis btang ba'i le'u ste zhe gnyis pa'o// a+thi+-i/// gdod nas rnam dag ye shes mchog/ gtang gzhag bral ba'i gdeng thob nas// yul phyir bltas pas ya nga min// blo bral rang grol dbyings nyid las// snyems med ye grol gcig thag chod// dgongs klong mkha' ltar dag pa'i ngang// gzhi rtsa bral ba'i cog bzhag pa// cir snang rang sar grol ba yis// snang srid 'khor 'das gtan la phab// lha med 'dre med rang thag chod// snyems bral chos kyi dbyings su thim// ma la bu bzhag ji bzhin du// bza' ngan du ma ro gcig go/ bla ma yi dam mkha' 'gro thams cad kyi thugs rgyud nam mkha' klong yangs las/ snang srid 'khor 'das thams cad rang nyid kyi steng du la thag gcad de 'khor 'das gtan la dbab pa'i le'u ste zhe gsum pa'o// a+thi+-i/// gnas skabs spyad pa spyod pa'i bus// bcos pa med par spyad pa'i thabs// rang 'khris thag pa rbad kyis bcad// gang shar yul la ltos pa bral// lus spyod rang lugs gtan la dbab// bcos med gzhi thog rang shar bas// gnas skabs yul gyi bya ba las// 'bad dang rtsol ba med tshul gyis// shugs la spyod pa gnad yin zhing// ngag gibre mo zungs zad pas// 'khrul pa yul phyir mi spro bar// smra brjod gtang gzhag med pa'i ngang/ rang bab mal du tsan ne ba// ka ku shab shub med par gzhag/ngag spyod bla med yang dag don// bklag dang sdebs su bsgrig par bya// yid dpyod nyon mongs rang gar min// rab 'bring tha ma'i blo can gyis// rang grol gnyen po 'bad med dang// 'bad bcas kyis ni lam du 'khyor// gang la ya nga khu 'phrigs med// spyod pa babs mal nyid du spyod// spang blang dgag bsgrub med par gzhag/ rnam grol thabs dang ldan spyad pas// yang dag lam du 'jug pa'o// bla ma yi dam mkha' 'gro thams cad kyi thugs rgyud nam mkha' klong yangs las/ tshul chos 'dzin pa phral nas spyod pa rang bab tu bskyang bar bstan pa'i le'u ste zhe bzhi pa'o// a+thi+-i/// yang dag don gyi lta ba dang// gnas lugs babs kyi ngang bsgom dang// bya rtsol bral ba'i spyod pa dang// gzhi thog phebs pa'i 'bras bu ste// gang dang gang la bsngags pa la// snyems kyi 'dun pa 'dug mi 'dug/ mi 'dug thag chod snyems bral te// snyems bdud ma chod lam la 'khyam// rang snyems rang la skad cig gcad// gcad tshul gang shar rtog tshogs kun// bcing grol med pa'i lhug pa las// lhag ma med par la thag gcad// lhag mar bcas pa'i dmigs pa yis// snyems dang bcas te yid gnyis 'gyur// 'dun pa gang la gang gtad pa// de dang de la der dmigs med// yangs dang dog pa med par yang// mi bzo bzo ba med par bzhag/ bzos pa'i chos kyang yid gnyis rgyu// re dang dogs par de 'gyur ro// 'khor dang 'das pa gang la yang// re ltos snyam snyems med par gzhag/ ltos pa can de re ba'i rgyu// de la shugs kyis dogs pa 'byung// re dogs ltos pa can gyis ni// lta bsgom spyod 'bras 'jur bus bcings// 'jur bu'i mdud pa rang grol nas// gnyis 'dzin grongs 'das grangs mtha' zad// ming dang ming tshogs phung po zhig/ gnyis 'dzin la 'das chen po'o// bla ma yi dam mkha' 'gro thams cad kyi thugs rgyud nam mkha' klong yangs las/ gnyis 'dzin blang dor gyi snyems thag gcad nas gnas lugs yang dag gi gdeng chen bca' ba'i le'u ste zhe lnga pa'o// a+thi+-i/// 'bras bu yang dag mchog gi lam// bgrod par 'dod pa'i thog ma nyid// lus gnad rtsa ba'i dra ba brtag/ rgyu dang rkyen las byung ba ste// 'dus tshogs srid pa'i rtsa ba las// bag chags las kyi 'du 'phrod kyis// lus gcig blangs pa las kyi lus// rnam smin sha khrag phung po la// gnas lugs yang dag don bzhugs pas// ma dag las kyi rgyu rlung gis// 'phro 'du bya byed du ma spyod// des kyang 'khrul 'khor nyid du 'khor// de dag 'khrul 'khor bshig pa'i thabs// byang chub rgyun rlung dag pa'i gzhi// 'phro 'dus rdo rje'i lus bsgrub pa// mi 'gyur g.yung drung rdo rje'i sku// thabs dang shes rab las byung ba'i// ye shes stsal las byung ba yis// sprul dang yang sprul gzhir snang zhing// sha khrag la sogs du ma'o// de las lam snang ye shes kyi// grong khyer rtsa yi dra mig ste// sdong po dang ni yal ga las// gyes shing mtshon pa mang du ste// 'khor lo lnga la sogs pa yi// stong phrag bdun cu rtsa gnyis kyang// thad ka thad ka'i khyim du gnas// so so'i gang dang gang gi rten// spyi bo dang ni rkang pa'i mthar// rnam par bkram nas don kun byed// grangs can dang ni grangs med pa// stobs dang stobs min khyad par ro// bla ma yi dam mkha' 'gro thams cad kyi thugs rgyud nam mkha' klong yangs las/rdo rje lus gzhi rten du gyur pa las/ lam rtsal rtsa'i 'char tshul bstan pa'i le'u ste zhe drug pa'o// a+thi+-i/// gnas pa rtsa la rgyu ba yi// rlung gi chags tshul rim pa las// rgyu dang rnam par rgyu ba dang// phra rags la sogs rnam mang yang// nyi khri chig stong drug brgya las// rtsa ba yan lag gnyis la 'dus// rtsa ba lnga dang yan lag lnga// so sor las kun rnam par byed// nam mkha' rlung me chu dang sa// stobs kyi rnam par rtsal byed pa// gyen mthur me mnyam srog dang ni/ khyab byed las kyi rlung dang bcas// 'phro 'du rnam par bkra ba las// las kun byed cing 'phen dang sdud// byer zug sgang gshongs sna tshogs las// phyi dang nang las kun tu rgyu// bzang ngan las kyi 'phro 'du kun// rba rlabs lta bur rab tu 'khrugs// byed pa byas shing las kyis las// las la rnam par spel ba dang// sdud pa dang yang 'khrugs mar ni// thog ma bar dang mtha' rim bzhin// g.yo ba can dang g.yo ba med// rab tu brtan pas las kun byed// las dang las ma yin pa dang// las las rnam par 'phros pa dang// byang chub lam gyi rtsal nyid kyang// de dang de las rnam par 'byung// phra mo la sogs thun mong gi/ sbyor ba dpag tu med pa yang// de yi rnam grangs thabs las 'byung// de dag mkhas pas shes par bya// kun rdzob dang ni don dam gyi// nor gyi snying po spel dang sdud// de dang de yi shugs las 'byung// g.yas dang g.yon du 'pho ba dang// mnyam par rab tu gnas pa las// de yi yan lag yab dang yum// gnyis med mnyam par gnas pa rnams// dus las ma g.yos las la sbyar// skye 'chi rgas rgud na sogs kyis// skye dang sdud pa'ang de dang de'i// byed pa phra rag las byung bas// btson du 'dzin dang rtsal sbyong dang// dus la babs tshe las sbyor gyi// 'byin 'jug bskyel ba'i las la gzab// mkha' la 'phur dang me yi las// chu dang brag la thogs med sogs// sna tshogs rdzu 'phrul thun mong dang// mngon sum gnad la mkhas byed dang// nyi zla btson du bzung ba yi// 'khrul 'khor la sogs gang dang gang// de dang de sogs las rnams kun// stobs chen de yi rtsal las 'byung// de dang de tshul brtson pas 'bad// bla ma yi dam mkha' 'gro thams cad kyi thugs rgyud nam mkha' klong yangs las/rlung gi rgyu ba dang byed pa bstan pa'i le'u ste zhe bdun pa'o// a+thi+-i/// yang dag rnam par nges pa dang// ma nges pa ste du ma yis// thig le gang dang stong pa dang// rgyu dang rnam par rgyu ba dang// rang babs gshis la gnas pa dang// 'phel dang mi 'phel la sogs kyang// rnam par rig byed 'phro 'du las// phra rags byed pa sna tshogs so// bcu drug grangs las byed can du// drug las rgyu dang 'bras bu nyid// byed pa'i rkyen las snang bar 'gyur// g.yo ba med pa brgyad nyid kyis// rnam par rig byed 'phro dang 'du// ye shes nyid dang sprul pa dang// yang sprul 'phro 'du yang yang ston// ma dag dug lnga dang yang gzhan// las kyi 'khrul 'khor sna tshogs bskyed// dag dang ma dag khyad par las// 'khrul 'khor zhig dang ma zhig gi// khyad par la sogs mang po dang// bde dang sdug bsngal btang snyoms byed// rnam par grol dang ma grol dang// rjes dang rjes dpag dag gis shes// ye shes rgyu ba don dam dang// las kyi rgyu ba kun rdzob la// thig le rnam gnyis gcig la gcig/mdung khyim lta bur brten nas gnas// rgyu las ye shes skye ba dang// ye shes rtsal las rgyu 'byung bas// byed pa rkyen gyi 'phro 'du las// sangs rgyas nyid dang sems can dang// de las rnam par gyes pa yi// rnam grangs dpag tu med pa'i phyir// spel dang sgyur dang las la sbyar// mkhas pas gnad dang ldan pa yis// nges par le lo med par brtsam// mchog dang de bzhin thun mong sogs// gang 'dod 'bras bu nges par 'byung// bla ma yi dam mkha' 'gro thams cad kyi thugs rgyud nam mkha' klong yangs las/ kun rdzob rgyu'i thig le dang don dam ye shes kyi thig le bstan pa'i le'u ste zhe brgyad pa'o// a+thi+-i/// rtsa ni khyim dang 'dra ba la// rlung ni bdag po lta bu yis// nor dang 'dra ba'i thig le nyid// rtsal sbyang nyams su len pa'i gnad// lus ngag yid gsum gtan la dbab// pheb nas rim bzhin las la sbyar// bdag dang de bzhin gzhan zhig gi/ mtshan nyid rnam par ldan par sbyor// 'byongs nas kun rdzob don dam nyid// gnyis mnyam nyid du gtan la dbab// de ltar gtan la sus phebs pa// mchog dang thun mong las kun 'byung// bla ma yi dam mkha' 'gro thams cad kyi thugs rgyud nam mkha' klong yangs las/ rtsa rlung thig le nyams su blangs nas gtan la dbab pa'i le'u ste zhe dgu pa'o// a+thi+-i/// rtsa nyid gtan la dbab pa la// lus kyi rtsal sbyang rab tu gces// til mar byugs dang 'phur ba yi// dang po sman dang dri sbyar bas// lus kyi mgo mjug dag par sbyang// de nas mnye dang bsub pa dang// sprug dang bskor dang g.yug pa dang// rgyug dang mchongs dang mnyed pa ste// gcan gzan tshul dang mkha' lding dang// rta dang lug dang chu srin sogs// rnam 'gyur sprug pa'i las la yang// rnam par rol la sogs pa yi// rtsal sbyong 'khrul 'khor dpag med bslab// yang rtsal dang ni lus zungs kyi// shed skyed pa yi sbyor ba la// rab tu nyin mtshan med par 'bad// bla ma yi dam mkha' 'gro thams cad kyi thugs rgyud nam mkha' klong yangs las/lus rtsal sbyong ba'i 'khrul 'khor bsten pa'i le'u ste lnga bcu pa'o// a+thi+-i/// ngag gi rtsal sbyong rlung la bslab// ro rnams mda' ltar 'phang bas sbyang// gsar pa gzhu ltar bkug pas bzung// rdzing ltar me yis gnas su bskyil// dal ba phab cing drag tu gcun// stod dang smad dang bar dag dang// yan lag rnams la rim bzhin dgram// ngal dang dub dang g.yo ba dang// rab tu 'khrugs pa med par bya// gal te nas ni sor bzhag pa// slar yang bum lto'i las byed 'gyur// kun la de ltar ma yin gyis// skyes bu gang dang gang dag gi/ rgyud dang so sor gang rigs bstun// dar dang ma dar snyoms pa dang// bzang dang ngan dang tshod can te// gang dang gang rigs mkhas pas bslab// drag zhan la sogs 'gres kyis shes// brtson 'grus dang ni dbang po yi// byed pa stobs kyi khyad par yang// rigs dang mi rigs de bzhin dpyad// rlung gis gang dang stongs pa yi// lus rtsal stong ra'i dmigs pa gtad// g.yo bar gyur nas phab la bzhag/ gzhan gyi sbyor bas tshad la phab// bla ma yi dam mkha' 'gro thams cad kyi thugs rgyud nam mkha' klong yangs las/ngag rtsal sbyong ba rlung la bslab pa'i le'u ste nga gcig pa'o// a+thi+-i/// nyams pa med pa'i khams rnams la// zag pa med pa'i rtsal la bslab// dang po 'phel ba'i sbyor ba dang// de nas de dag dbab pa dang// bskyil dang bzlog dang dgram pa dang// tha ma las la sbyar ba yi// go rim yang dag rtsal chen sbyang// ting 'dzin dang ni 'khrul 'khor dang// kun la rlung gi sbyor ba dang// la lar rdzas kyi sbyor ba bsngags// gang dang gang yang de dang de'i// rtsol ba rab 'bring tha sogs sbyar// ngan dang bzang dang 'bring po las// byed pa gnad kyi man ngag mchog/nyams pa med pa'i rtsal sbyong gis// las la ji ltar sbyor na'ang// nges par mchog la gnas par 'gyur// nyams par gyur pa'i rtsol ba yis// nyams pa chen por gyur nas ni// mchog dang yang dag mi ldan nas// thun mong rnams kyang de bzhin no// sman mar la sogs sbyor ba dang// lus ngag gnad las 'byung bas shes// bla ma yi dam mkha' 'gro thams cad kyi thugs rgyud nam mkha' klong yangs las/ khams byang chub kyi sems rtsal sbyong bstan pa'i le'u ste nga gnyis pa'o// a+thi+-i/// lus kyi 'khrul 'khor la brten nas// rtsa rnams dag par byed pa dang// ngag gi rlung sbyor la brten nas// rlung rnams dag par byed pa dang// yid kyi thig le la brten nas/ khams rnams dag par byed pa ste// de dag sdebs dang bcas pa yis// lus ngag yid gsum lhan cig pas// bskyed dang rdzogs dang rdzogs pa che// lhan cig nyams su blang bar bya// dang po rtsal la su goms par// kun kyang zung du chud pa yin// zung 'jug dbu ma nyid dag pas// rtsa dag sprul pa'i sku nyid dang// rlung dag de bzhin longs spyod sku// thig le dag pa chos sku ste// sku gsum zung 'jug chen po yis// lus ngag yid gsum gnas dag nas// rdo rje gsum gyi bdag nyid can// 'bral ba med pa'i ye shes brnyes// gzhi bral gcig tu dril ba la// lam rtags yon tan zhar la ste// dper na ljon shing rgyas pa la// yal 'dab shun lpags mi 'dod kyang// zhar la byung dang mtshungs pa ste// sa lam ma bgrod ye bgrod du// thabs 'dis 'gyur ro rnal 'byor pa// rtsa dag rlung dag thig le dag/ ye shes rol pa ngang gis 'char// rgyu dang rkyen las gyur pa dang// blta dang sgom spyod 'bras bu'i gnad// gcig las ma lus yongs su rdzogs// 'di phyi bar gyi gnas lugs kyang// nges don bcud du yang dag 'gyur// rtsa las yang dag rlung ldan pas// thig le'i las rnams 'grub pa ste// gcig dril rtsal gyi ye shes lnga// nyon mongs lngar bcas dbyer med pas// gnas dang ldan pa 'dis 'gyur ro// g.yo dang 'gyu ste bde stong gi/ zag med yon tan rab snang ngo// bla ma yi dam mkha' 'gro thams cad kyithugs rgyud nam mkha' klong yangs las/ rtsa rlung thig le dbyer med du dril nas gtan la dbab cing nyams su len par bstan pa'i le'u ste nga gsum pa'o// a+thi+-i/// nyams len gnad kyi thog ma nyid// rang gis lus rtsal legs sbyangs pas// goms shing 'dris nas brtan pa dang// rigs dang ldan pa'i mi mo la// brten nas sbyang bar byed pa yang// lus ngag yid gsum skyon med cing// yon tan mang po rab tshang zhing// dar la babs nas skyon ma zhugs// bde ba'i yon tan sbyin nus pa// rnal 'byor rang rang yid mthun la// smin dang grol ba'i sgor zhugs shing// dal gyis thabs kyi lam la sbyang// dang por g.yo ba'i rtsal sbyang dang// bar du 'phel ba'i 'khrul 'khor dang// tha ma las la sbyar ba yis// mkhas pas yang dang yang gcun la// bcud dang dngas ma yang dag blang// dga' ba bzhi yi ye shes las// legs par rim gyis gtan la dbab// dngas ma dang ni snyigs ma rnams// skyon sel yon tan bcas pas blang// snyigs ma'i snyigs ma yang yang dor// dngas ma'i dngas ma dbyings su bskyal// bde dang sdug bsngal rnam pa gnyis// gnyis med gcig tu gyur nas kyang// mnyam nyid gdal ba chen por gnas// de ltar dang por rang lus dang// de nas rim par gzhan lus la// brten nas lam gyi rtsal sbyang zhing// gnyis med dbyings su bsre bar bya// de dang yang dag nges ldan pa'i// sna tshogs las kyi rim pa yang// mngon shes la sogs las la sbyar// gtan la pheb nas gzhan don spyad// 'bras bu sku gsum ngang du bskyal// bla ma yi dam mkha' 'gro thams cad kyi thugs rgyud nam mkha' klong yangs las/rang lus dang gzhan lus la brten nas nyams len gyi rtsal sbyang ba bstan pa'i le'u ste nga bzhi pa'o// a+thi+-i/// nyams len gnad la gzir ba la// myong ba rnam pa gsum 'byung ste// dang po bde ba'i ye shes 'char// lus med yod du mi tshor dang// lus la mtshon cha'i char babs kyang// bde ba'i ye shes 'phel grogs byed// zug rngu med pa'i yon tan gyi// rnam pa dpag med lus la 'byung// ngag la bde ba 'bar ba ni// rlung la rang dbang 'byor thob pas// ring dang thung dang gar gtad du// nges par lam du 'gro ba dang// nus pa'i stobs 'bar gre lce bde// snyan mthun rang gzhan kun dga' byed// yid bde zug rngu kun dang bral// dga' ba bzhi dang ye shes lnga// nyams kyi rtsal chen 'bar bar 'gyur// de ltar lus ngag yid gsum dang// de dang de yi rol pa las// bde ba zag bcas zag pa med// zung du 'jug pa la sogs pa'i// 'bras bu rnam par grol gyur te// mtshan dang dpe byad rgyan du byas// phyi nang gsangaba'i brda don 'phrod// bla ma yi dam mkha' 'gro thams cad kyi thugs rgyud nam mkha' klongs yangs las/bde nyams 'char bar bstan pa'i le'u ste nga lnga pa'o// a+thi+-i/// de nas myong ba gnyis pa la// phyi nang gzhan sogs gsal ba yis// nyams len gnad kyi ngos zin 'gyur// phyi ru gsal dang nang du gsal// de las gzhan par gsal ba ste// mngon sum pa dang nyams snang dang// rang bab 'od du gsal ba sogs// dbang po'i spyod yul gang la yang// nye ring med par gsal la sogs// rnam par bkra la rig byed gsal// phyogs dang ris su ma chad pa// mnyam pa nyid du rang bab gsal// dgag dang bsgrub pa med par ni// sa le hrig ge lham me ba// lha yang zhal phyag sku mdog bcas// rgyan dang cha lugs gsal ba dang// 'od zer rab tu 'phro ba yang// rang snang zer dang bcas pa las// phyis 'byung ba dang yang dag gsal// gzung dang 'dzin pa med par gsal// g.yo 'khrul yangs dog med par gsal// rang gzhan dbyer med 'dres par gsal// sangs rgyas sems can med par gsal// rab mnyam yangs pa chen po la// dgag dang bsgrub pa med par yang// rang snang dag pa nyid gsal bas// sgrib g.yogs mun sangs e ma ho// bla ma yi dam mkha' 'gro thams cad kyi thugs rgyud nam mkha' klong yangs las gsal nyams 'char bar bstan pa'i le'u ste nga drug pa'o// a+thi+-i/// gsum pa gnas lugs ma thog tu// stong nyams zhen pa med 'char ba// bde dang gsal ba g.yo med par// mi rtog stong pa'i ye shes kyis// mnyam nyid ngang la gnas par 'gyur// rags dang phra ba'i rang bzhin can// ngang du gnas pa ngang gis 'phro// 'du 'phrau'i rol pa sna tshogs kyang// gzhag pa med par mnyam gnas pa// nam mkha'i cho 'phrul du ma yang// byas pa med par rang shar zhing// rang yal rang sar dengs pa ltar// gzhi las snang ba'i dngos po kun// bde ba'i cho 'phrul du ma dang// de bzhin cho 'phrul lang long yang// gzhi nyid ngang du rang dngas pas// 'bad rtsol bral ba'i rang stong ste// dngos dang dngos min mtha' bral ba'i// ye shes rang grol rang shar nyid// dngos la de bzhin nyid snang ba// 'khrul pa dag pa'i 'du 'phro las// gzung 'dzin bcas pa ma yin no// ye stong dag pa'i klong rdol nas// nyag gcig de kun gshis la shar// shar ba de nyid rang bab grol// de ltar bde gsal stong pa'i ngang// mi rtog ye shes bla ma yin// bla ma yi dam mkha' 'gro thams cad kyi thugs rgyud nam mkha' klong yangs las/stong pa nyid ye dag gdal khyab du bstan pa'i le'u ste nga bdun pa'o// a+thi+-i/// bde stong zag pa med pa yi// ye shes rang sa zin pa'i gnad// gshis la g.yo ba med bzhin du// bcas bcos bzo med lhug pa'i klong// rang gsal nyid du gnas par gzhag/ bdag rkyen dang ni gzhan rkyen dang// de bzhin 'du 'phro du ma rnams// gcig la gcig brten yin pa'i phyir// de dag rang bab bcos med par// rang rang gnas las g.yo med du// dal la phab nas gzhag pa yis// dang por g.yo dang bar du gnas// tha ma brtan pa thob nas kyang// 'bras bu rgyu yi ye shes las// rtsal snang dpag tu med shar bas// snying po chos sku mnyam pa nyid// longs sku gsal dag rkyen dang bral// sprul sku rol pa 'gag med las// yang sprul cho 'phrul bcas pa snang// sku gsum ye shes lnga nyid las// mya ngan 'das dang mya ngan 'da'// kun nas mya ngan 'das pa ba// rdzogs pa'i 'bras bu yang dag go/ gnas skabs yul gyi 'bras bu yang// tshe la dbang 'byor 'thob pa dang// longs spyod nyid la dbang 'byor pa// thun mong gang dang gang dag rnams// rtsol med rang byung lhug par ro// 'dod dang 'dod chags rnam bral yang// 'dod chags nyid las ma g.yos par// 'dod chags rang sar de grol zhing// chags pas chags pa dbang du ste// chags pas sems can rang grol 'gyur// de bas 'dod la chags bral ba// rang babs chags pa med par 'chang// chags pa'i 'bras bu bde gsal nas// mi rtog ye shes ting 'dzin skye// de nas kun nas kun bzang ba// yab yum la sogs dkyil 'khor gyi// gzhi snang nyid du mngon 'bras 'grub// e ma don dam kun rdzob kyi// dbye bsal mtshan 'dzin phra rags dang// 'khor ba'i yo lang du ma dang// de bzhin mya ngan 'das pa yi// thugs rje'i cho 'phrul ma lus pa// thams cad thams cad dbyings su nub// bla ma yi dam mkha' 'gro thams cad kyi thugs rgyud nam mkha' klong yangs las/ 'khor 'das thams cad bde stong zag med kyi dbyings su bskyal nas 'bras bu sku gsum ye shes lngar rdzogs par bstan pa'i le'u ste nga brgyad pa'o// a+thi+-i/// yang dag bla med byang chub don// sku gsum ye shes bla ma yi// 'bras bu bsgrub par bla med pa'i// lam gyi 'gal rkyen bar chad rigs// bdud dang bdud kyi rigs rnams kyi// cho 'phrul du ma bzlog pa'i thabs// rnal 'byor rgyal pos 'di ltar blta// gzhi las g.yos pa med pa'i ngang// lus ngag yid la ji ltar gyi// zang zing rnam pa ci byung yang// ci mi snyam pa rdo rje'i thugs// rtsal chen gnam lcags bu yug las// phra rdul rab tu gtor shes pas// ji mi snyam pa'i gdeng gis bcad// yangs dang dog dang phra rags sogs// lo ma sprul pa'i 'khor los bcad// sprul pa las kyang sprul pa yi// cho 'phrul de yang nga yis bcad// yod las med dang med las byung// de dag bdag rtog bshig las grol// mnyam yangs chen por ngang bzhag pas// kun kyang chu la chu thim ltar// de yod ma yin de med min// yod med blang dor las 'das pas// cho 'phrul bzlog pa'i dpa' bo yin// ya nga g.yang sa gcod pa yin// 'khu 'phrigs zhen pa bzlog pa yin// gegs sel gnad kyi mthar thug yin// de las gzhan yang lam gyi cha// rtsal gyi sbyor ba du ma dang// rdzas kyi rnam grangs phra mo rnams// rang rang gnad thog mkhas pas dbab// dpa' bo g.yul la chas pa la// go mtshonalta bu'i man ngag go/ bla ma yi dam mkha' 'gro thams cad kyi thugs rgyud nam mkha' klong yangs las/ byang chub lam gyi gegs sel ba'i le'u ste nga dgu pa'o// a+thi+-i/// e ma e ma bcom ldan 'das// bcom ldan dpag med rgyal po kye// ma rtog log par rtog pa yi// skye 'gro ma lus 'dul don du// yang dag mthar thug theg pa'i chos// gdul bya gang dang gang 'tshams pa// so sor lta bsgom spyod 'bras bcas// gzhi snang ye shes chen po'i gnad// gdod nas dag pa'i yang snying mchog/ dri med lam mchog bgrod pa'i thabs// g.yo ba med pa'i ngang nyid las// sku las 'od byung phyogs bcur bkyes// gsung las chos kyi 'brug sgra sgrogs// thugs rje brtse ba chen po yis// bdag cag 'dus pa'i 'khor rnams la// lhang nger rtsal bas rjes yi rang// bdag cag sprul pa'i 'khor dang yang// yang 'khor gdul bya'i zhing gyur pa// lha dang klu dang gnod sbyin dang// mi dang dri za grul bum sogs// rjes su yi rang mngon par bstod// bla ma yi dam mkha' 'gro thams cad kyi thugs rgyud nam mkha' klong yangs las/ rjes su yi rang zhing mngon par bstod pa'i le'u ste drug cu pa'o// a+thi+-i/// thugs kyi bcud dri ma med pa'i rgyud kyi rgyal po nam mkha' klong yangs zhes bya ba/bdag 'dra pad+ma 'byung gnas kyis bsgyur ba rdzogs so// rta nag dregs pa sde brgyad tshogs kyis bka'i bya ra mdzod// gter rkun bka' la ras chod gzu lum byed pa byung na dbang po snubs/sa ma ya/ rgya rgya rgya/ d+ha thim/ bdag 'dra sangs rgyas rdo rjes me mo yos kyi lo dgun zla tha chung glang zla'i tshes brgyad yos kyi nyi ma 'brug gi dus su bla dkar dung gi sgo mo klu btsan gyi gnas sgo nas gdan drangs pa'o// rdzas snod ni klus phul ba'i rdo rje'i 'dag pa las byas shing/ lha'i gos kyis spun bsres shing/ mthing rtsis byug pa'i gwa'u ste/ 'di lus la bcangs pa tsam gyis mi ma yin pa rnams kyis mi mthong ba'i sgrib shing du 'gyur bas/lha sras nyid kyi lus la bcang bar bya zhing/ rgyud kyi shog dril lung bstan dkar chag them byang/ gser gyi rdo rje nor bu rin chen rnams/ rtsa ba rgyud 'dzin gyi bu'i lag tu 'grim par byas sam/mchog gi rnal 'byor pa gang rung gi lag tu gtad de// bstan pa'i btsas su ma 'phyugs par chongs shig/ de dag gal te ya bral zhing 'thor na byin rlabs kyi rgyud zam 'chad par 'gyur ro//// sa ma ya/ d+ha thim///

CLOSE WINDOW