CLOSE WINDOW

Gpb012.011
བོད་ཡིག

bod skad du/ gsang ba'i snying po de kho na nyid nges pa'o// bcom ldan 'das dpal kun tu bzang po la phyag 'tshal lo// 'di skad bshad pa'i dus na/ de bzhin gshegs pa yang dag par rdzogs pa'i sangs rgyas bcom ldan 'das/longs spyod chen po/ phyogs bcu dus bzhi'i de bzhin gshegs pa thams cad kyi sku dang/ gsung dang/ thugs rdo rje'i bdag nyid/ ma lus mi lus lus pa med pa thams cad dang/so so ma yin tha mi dad dbyer med pa'i rang bzhin te/ 'og min gyi gnas mtha' dang dbus med pa na/ gzhi tshad med pa'i ye shes kyi 'khor lo gsal ba la/ ye shes rin po che 'bar ba'i gzhal yas khang/rgya phyogs bcur yongs su ma chad pa/ yon tan dpag tu med par rgyas pa'i phyir gru bzhir gyur pa/ lhag pa'i ye shes rin po che'i glo 'bur gyis mdzes pa/ rtse mo phyogs bcu'i dus bzhi'i sangs rgyas kyi dkyil 'khor ma lus pa thams cad/so so ma yin ngo bo nyid gcig pa'i ye shes kun tu 'khyil pa/ ye shes bsam gyis mi khyab pa'i ye shes rin po che'i dbyibs dang/ kha dog la sogs pa rnam pa tha dad pa'i bye brag dang khyad par du gyur pas spags pa/tshad dpag tu med pa/ ye shes rin po che sna tshogs kyi phreng ba dang/ chun 'phyang dang/ shar bu'i rgyan dang/ gzugs sna tshogs dang/ sgra sna tshogs dang/ dri sna tshogs dang/ ro sna tshogs dang/ reg bya sna tshogs kyis phyogs bcur 'khrigs par rang byung la/ mi sgrib par gsal ba'i rgyan bsam gyis mi khyab pas bklubs pa/ rnam par thar pa bzhi'i sgo nas 'jug pa'i sgo khyud can/rnam par thar pa brgyad kyi rta babs dang ldan pa/ phyi dang nang med par kun tu yang nang du gyur pa na/ mi 'jigs pa seng ge'i khri dang// stobs glang po che'i khri dang/ rdzu 'phrul rta'i khri dang/dbang rma bya'i khri dang/ thogs pa med pa nam mkha' lding gi khri dang/ rang bzhin gyis 'od gsal ba nyi zla'i dkyil 'khor dang/ gos pa med pa pad+ma rin po che'i gdan la/ sku mdun dang rgyab med pa/thams cad du yang zhal thal le bar gsal zhing mtshan dang dpe byad dang ldan pa/ bsam gyi mi khyab pa thams cad du/ sku gsung thugs sna tshogs par kun tu snang ba/ thabs dang shes rab kyi zhabs gnyis mnyam pa'i brtul zhugs kyi skyil mo krung du bzhugs pa/ye shes drug gi phyag ye shes rin po che'i phyag rgya 'bar ba can/ sku gsung thugs bsam gyis mi khyab pa'i dbu gsum dang ldan pa// bcom ldan 'das de bzhin gshegs pa rnam par shes pa'i rgyal po dang/de bzhin gshegs pa gzugs kyi rgyal po dang/ de bzhin gshegs pa tshor ba'i rgyal po dang/ de bzhin gshegs pa 'du shes kyi rgyal po dang/ de bzhin gshegs pa 'du byed kyi rgyal po dang/de dag kun kyang mthing ga dang/ dkar po dang/ ser po dang/ le brgan dang/ ljang gu'i mdog tu 'tsher ba/ btsun mo dam pa snang ba'i dbyings dang/ sra ba'i dbyings dang/mnyen pa'i dbyings dang/ dro ba'i dbyings dang/ bskyod pa'i dbyings la sogs pa btsun mo'i tshogs dang gnyis su med par chos kyi dbyings kun tu mtha' yas par khyab pa ni/ 'di lta ste/ dper na til gyi gang bu bzhin du gang nas khyab par bzhugs so// de nas byang chub chen po rdo rje mthong ba dang/ byang chub chen po rdo rje thos pa dang/ byang chub chen po rdo rje snom pa dang/ byang chub chen po rdo rje myong ba dang/ btsun mo mthong bar bya ba dang/ mnyan par bya ba dang/ bsnam par bya ba dang/ myang bar bya ba'i tshogs dang/ byang chub chen po rdo rje mthong byed dang/ byang chub chen po rdo rje thos byed dang/ byang chub chen po rdo rje snom byed dang/byang chub chen po rdo rje myong byed dang/ btsun mo 'das pa dang/ da ltar dang/ 'byung ba dang/ ma byon pa'i tshogs dang// 'joms pa chen po rdo rje reg pa dang/ 'joms pa chen po rdo rje reg byed dang/'joms pa chen po rdo rje reg bya dang/ 'joms pa chen po rdo rje reg shes dang/ btsun mo rtag par ma yin pa dang/ chad par ma yin pa dang/ bdag tu ma yin pa dang/ mtshan mar ma yin pa la sogs pa/ de lta bu'i thugs kyi tshogs brjod kyis mi lang ba dang gnyis su med par bzhugs so// de nas de bzhin gshegs pa btsun mo'i tshogs dang gnyis su med pa'i gsang ba'i dkyil 'khor de dag nyid kyi gsang ba 'di nyid sku dang gsung dang thugs dang yon tan dang 'phrin las rdo rje las phyung ngo// e e ma e ma ho/ de bzhin nyid kyi dbyings nyid dbang sgyur ye shes dkyil 'khor thugs rje'i ngang// rang snang ba nyid ting 'dzin gzugs brnyan sgyu ma rnam dag gsal ba ni// sku gsung thugs dang yon tan 'phrin las sel med pa yi yon tan yid bzhin rin po che// mi zad par ldan rgyan gyi 'khor lo rdo rje mchog gi gnas nyid do// zhes rdo rje gsang ba'i tshig tu'o// gsang ba'i snying po de kho na nyid nges pa las gleng gzhi'i le'u ste dang po'o//// de nas bcom ldan 'das byed pa po rdo rje yid kun tu bzang po/ thams cad ma lus pa'i rang bzhin gyi tshul rdo rjes/btsun mo bya ba mo chos kun tu bzang mo la 'jug par gyur to// zhugs pas phyogs bcu dus bzhi'i de bzhin gshegs pa ma lus pa thams cad gcig gi rang bzhin dbyer med pas de bzhin gshegs pa nyid/de bzhin gshegs pa nyid la ched du brjod pa 'di brjod do// e ma ho/ rdo rje phung po'i yan lag ni// rdzogs pa'i sangs rgyas lnga ru grags// skye mched khams rnams mang po kun// byang chub sems dpa'i dkyil 'khor nyid// sa chu spyan dang mA ma kI// me rlung gos dkar sgrol ma ste// nam mkha' dbyings kyi dbang phyug ma// srid gsum ye nas sangs rgyas zhing// thams cad ma lus chos so cog/sangs rgyas nyid las gzhan ma yin// sangs rgyas nyid las gzhan pa'i chos// sangs rgyas nyid kyis mi brnyes so// zhes brjod pas/ de bzhin gshegs pa thams cad mnyes par gyur to// de nas btsun mo bya ba mo chos kun tu bzang mo/bcom ldan 'das yid kun du bzang po dang gnyis su med par gyur nas/ ched du brjod pa 'di brjod do// kye ma'o phyogs bcu stong khams ye nas dben// srid pa gsum nyid dag pa'i zhing// snyigs ma lnga nyid bde ldan gnas// phung po lnga nyid rdzogs sangs rgyas// thams cad mchog gi snying po las// gzhan du rgyal ba'i chos mi btsal// nyid las gzhan zhes bya ba'i chos// btsal kyang rgyal bas mi brnyes so// zhes brjod pas thams cad ye nas sangs rgyas par de bzhin gshegs pa nyid kyis mkhyen to// de nas gnyis su med pa'i bdag nyid chen pos ye nas sangs rgyas pa'i sems ye shes su bskyed pa 'di gsungs so// e ma ho ngo mtshar rmad kyi chos// rdzogs pa'i sangs rgyas kun gyi gsang// skye ba med las thams cad skyes// skyes pa nyid na skye ba med// e ma ho ngo mtshar rmad kyi chos// rdzogs pa'i sangs rgyas kun gyi gsang// 'gag pa med las thams cad 'gag/ 'gag pa nyid na 'gag pa med// e ma ho ngo mtshar rmad kyi chos// rdzogs pa'i sangs rgyas kun gyi gsang// gnas pa med las thams cad gnas// gnas pa nyid na gnas pa med// e ma ho ngo mtshar rmad kyi chos// rdzogs pa'i sangs rgyas kun gyi gsang// dmigs pa med las thams cad dmigs// dmigs pa nyid na dmigs pa med// e ma ho ngo mtshar rmad kyi chos// rdzogs pa'i sangs rgyas kun gyi gsang// 'gro 'ong med pas 'gro dang 'ong// 'gro 'ong nyid na 'gro 'ong med// ces brjod pas// de bzhin gshegs pa thams cad dang btsun mo'i tshogs thams cad kyang mnyes pas khyab par gyur to// de nas de bzhin gshegs pa thams cad/ btsun mo'i tshogs thams cad dang bcas pas ched du brjod pa 'di brjod do// e ma ho ye nas gsang ba'i chos// sna tshogs snang la rang bzhin gsang// ngo bo nyid kyis rab tu gsang// gzhan du min las shin tu gsang// zhes brjod pas/ de bzhin gshegs pa thams cad dang/chos thams cad ye nas sangs rgyas pa'i ngo bo nyid du gcig pa'i mtshan nyid yin pas dbyer med na'ang/ 'gro ba'i rnam par rtog pa ma rig pa las/ 'gro ba lnga'i ris bsam gyis mi khyab par smin pa la/thugs rje chen po sangs rgyas kyi ye shes chen po skyes nas/ ched du brjod pa 'di brjod do// e ma ho bde gshegs snying po las// rang gi rnam rtog las kyis sprul// sna tshogs lus dang longs spyod dang// gnas dang sdug bsngal la sogs pa// bdag dang bdag gir so sor 'dzin// sus kyang ma bcings bcings med de// bcing bar bya ba yod ma yin// rnam rtog bdag tu 'dzin pa yis// nan gyis mkha' la mdud pa 'dor// bcings med rnam par grol med pa'i// ye nas lhun rdzogs sangs rgyas chos// bstan phyir spro ba sna tshogs mdzad// ces de bzhin gshegs pa nyid de bzhin gshegs pa nyid la ched du gleng ngo// gsang ba'i snying po de kho na nyid nges pa las don dam pa dang kun rdzob kyi byang chub sems ye shes su bskyed pa'i le'u ste gnyis pa'o//// de nas de bzhin gshegs pa thams cad las/thugs rje chen po'i byin gyis brlabs zhes bya ba'i/ rig pa'i skyes bu thub pa drug/ de bzhin gshegs pa'i sku dang gsung dang thugs rdo rje las 'thon to// 'thon nas kyang las kyi dbang gis snel gzhi dang yan man gyi 'jig rten drug gi phyogs bcu mtha' yas mu med pa'i stong gsum gyi stong chen po re rer/thub pa chen po bcom ldan 'das re res 'dul ba rnam pa bzhis 'gro ba lnga'i don mdzad de/ bltams pa dang/rab tu byung ba dang/ dka' thub mdzad pa dang/ sangs rgyas pa dang/ bdud btul ba dang/ chos kyi 'khor lo bskor ba dang/ cho 'phrul chen po bstan pa dang/ mya ngan 'das pa la sogs par ston pa'i thub pas/dus bzhi kun tu mkhyen pa dang/ thams cad kyi sems kyi rgyud kun tu mkhyen pa dang/ rdzu 'phrul gyi spyan gyis thams cad kun tu gzigs pa dang/ rdzu 'phrul gyi snyan gyis kun tu gsan pa dang/rdzu 'phrul gyi tshogs kun tu don spyod pa dang/ zag pa med pa kun tu bzang po'i spyod pa rdzogs pa'i mngon par shes pa chen po drug dang/ kun tu sku bsam gyis mi khyab pa dang/ kun tu thugs bsam gyis mi khyab pa dang/kun tu zhal bsam gyis mi khyab pa dang/ kun tu gsung bsam gyis mi khyab pa dang ldan pa/ bsam gyis mi khyab pa grangs med pa phyogs bcur snang bar gyur to// thams cad kyang 'di lta ste/ 'dul ba'i dbang gis lha dang mi'i theg pa dang/ nyan thos kyi theg pa dang/ rang byang chub kyi theg pa dang/ byang chub sems dpa'i theg pa dang/ bla na med pa'i theg pas/ ma rig pa'i rnam par rtog pa nyon mongs pa stong phrag brgyad cu rtsa bzhi'i gnyen por/chos stong phrag brgyad cu rtsa bzhi gsungs so// gsung ngo// gsung bar 'gyur ro// de dag thams cad kyang gzung ba dang 'dzin pa'i phyi nang gi rten cing 'brel bar 'byung ba 'dzin pa 'khrul pa las 'dogs pa dang/las dang las kyi 'bras bu chud mi za ba dang/ las dang las kyi 'bras bu mi gos/ gos par mi 'gyur/ gos su med par ston pa'i mthar thug go/ de nas de bzhin gshegs pa thams cad kyis ched du brjod pa 'di brjod do// ji snyed 'jig rten 'khrul pa'i chos// ma rig rtog pa'i gzung 'dzin gyis// phyi nang rten 'brel gnyis su 'khor// mi mthun bde sdug myong bar 'gyur// rang bzhin nyid las nyams pa med// yang dag sgyu ma'i tshul gnyis su// bdag dang bdag gi gzhan med de// rnam dag dbyings nyid tshul gcig go/ bdag dang bdag gi gzhan rnams ni// log par rtog pa tsam nyid las// phra zhing zab pa'ang yod ma yin// log rtog nyid la nyid spyod pas// gzhan du g.yo ba ci yang med// log rtog rgyu 'bras rgyun nyid kyang// gzhi rtsa med dbyings skad cig ma// rnam par dag pa'i dbyings nyid tshul// nyid la dbang sgyur nyid spyod phyir// bdag dang gzhan dang rtog pa'i rgyun// rnam dag bla med theg pa'i mchog/ theg pa bzhi yi nges 'byung la// theg pa gcig gi 'bras bur gnas// yang dag rtogs pas rab brtags na// rang bzhin med las cir yang 'grub// sangs rgyas mya ngan yongs mi 'da'// chos kyang nub par mi 'gyur te// ma rig smin mdzad 'dul ba'i phyir// byung nas mya ngan 'da' bar ston// 'dul ba mdo sde chos mngon dang// dam tshig sgrub dang grub pa dang// sku dang gsung dang thugs kyi rgyud// phyogs bcu kun tu rab grags pa// gsang ba'i snying po las 'phros te// rang bzhin gsang ba'i snying po 'di// sde snod kun dang rgyud kun gyi// 'byung gnas gtan la nges par 'bebs// chos rnams ming du btags pa tsam// ston pas don dang mthun phyogs su// ming dang tshig tu btags nas bstan// ston ming tshig la dngos po med// ces brjod do// de nas de bzhin gshegs pa gnyis su med pa'i dkyil 'khor de dag nyid kyis gsang ba 'di nyid/ sku dang gsung dang thugs yon tan phrin las rdo rje las phyung ngo// a ho// srid rtse'i nyes dmigs bdag tu rtogs las 'phros// rgyud drug skye 'gag lus dang longs spyod dang// gnas dang sdug bsngal 'khrul 'khor la sogs pa// log rtog nyid las gzhan du ci yang med// stong nyid bdag med ye mkhyen rang rig thugs// dmigs bya dmigs byed med par dran dbang bsgyur// ngo mtshar sku gsung yon tan zhing khams las// gzhan na med de de nyid de ltar yin// zhes rdo rje gsang ba'i tshig tu'o// zhes brjod pas/ thub pa drug gi sprul pa grangs med pa dang/ de bzhin gshegs pa thams cad kyis gsungs pa yang de dag tu 'dus par de bzhin gshegs pa nyid kyis mkhyen to// gsang ba'i snying po de kho na nyid nges pa las chos thams cad gtan la phab pa'i le'u ste gsum pa'o//// de nas de bzhin gshegs pa thams cad dgongs pa gcig tu gyur nas/mnyam pa chen po'i tshul rdo rje'i dbyings su/ chos thams cad ye nas sangs rgyas pa'i ting nge 'dzin las mi g.yo bar/ chos thams cad ming tsam du gnas pa'i yi ge 'phreng ba'i 'khor lo zhes bya ba 'di/sku dang gsung dang thugs rdo rje las phyung ngo// aH rab tu brtan gyur a dkar las// shin tu phra ba'i a rnams spro// phyogs bcu gang bar gsal gyur nas// bsdus kyang 'phel 'grib med par brtan// de las ming tshogs gsal 'bar kun// spro zhing bsdu ba'ang de bzhin no// 'di ni rdo rje dngos grub kyi// brtan 'byung ye shes rgyu yin no// aH/ ka kha ga g+ha nga/ tsa tsha dza dz+ha nya/ Ta Tha Da D+ha Na/ ta tha da d+ha na/pa pha ba b+ha ma/ ya wa ra la/ sha Sha sa ha/ k+ShaH i I/ u U/ e ai// o au/ 'di dag phyung bas// 'jig rten drug gi phyogs bcu mtha' yas pa/ rnam pa drug tu g.yos// rab tu g.yos/ kun tu g.yos nas/ chos thams cad ming gi mtshan nyid tsam du gyur to// ho de nas de bzhin gshegs pa thams cad kyis ched du brjod pa 'di brjod do// a ni stong dang mi stong gi/ dbu ma'ang dmigs su yod ma yin// thams cad ming tsam sangs rgyas kun// yi ge 'phreng ba nyid la gnas// a nyid sna tshogs bar snang ba'i// ka la sogs pa bzhi bcu gnyis// sgra yi ming gis thams cad bsdus// mngon rdzogs rgyal por de nyid nges// e ma ho ngo mtshar ya mtshan gyi// 'phrul chen bzhi bcu rtsa lnga'i ming// tshig rnams ma lus 'dzin pa'i gnas// sna tshogs don chen smra zhing ston// dngos med yi ge'i rang bzhin sems// bdag med mtha' bral mi dmigs kyang// dbyibs dang kha dog ming tshogs kyis// rol pa cir yang sprul cing ston// phyogs bcu dus bzhir gshegs pa yi// ye shes sems dpa'i sku gsung thugs// dkyil 'khor bzhi bcu rtsa lnga nyid// yi ge 'go nas k+Sha la rdzogs// sems kyi rang bzhin yi ge ste// yi ge dngos po yod ma yin// dmigs med de nyid sna tshogs pa'i// sku gsung thugs kyi 'khor lo che// sku gsung thugs ni ngo mtshar gyi// ya mtshan 'phrul chen rab 'gugs pa'o// dbyings la dbyings kyis bris pa ste// yi ge zhes ni de phyir brjod// mgo ni ma nor lam yin te// tig ni shes rab ming du smra// shad ni thabs chen tshigs su gcod// a ni skye med de bzhin dbyings// Tha ni sgyu 'phrul rdo rje nyid// Ta ni snang ba'i sgyu 'phrul nyid// Da ni sgyu 'phrul yid bzhin nyid// D+ha ni sgyu 'phrul rnam dag nyid// Na ni kun du sgyu 'phrul nyid// tha ni dra bas mngon rdzogs nyid// ta ni dra bas brtan pa nyid// da ni dra bas lham me nyid// d+ha ni dra bas 'khril ba nyid// na ni dra bas kun du 'gyur// ka ni spyan gyi thugs kyi mchog/ kha ni snyan gyi thugs kyi mchog/ ga ni shangs kyi thugs kyi mchog/g+ha ni ljags kyi thugs kyi mchog/ nga ni thugs kyang 'jig byed pa'o// tsa ni spyan gyi sku yi mchog/ tsha ni snyan gyi sku yi mchog/ dza ni shangs kyi sku yi mchog/ dz+ha ni ljags kyi sku yi mchog/nya ni sku yang 'jig byed pa'o// pa ni spyan gyi gsung gi mchog/ pha ni snyan gyi gsung gi mchog/ ba ni shangs kyi gsung gi mchog/ b+ha ni ljags kyi gsung gi mchog/ ma ni gsung yang 'jig par byed// ya ni skye ba rnam par dag/wa ni gnas pa dag pa yin// ra ni 'jigs pa dag pa ste/ la ni stong pa dag pa'o// sha ni rtag med dag pa ste// Sha ni chad pa'ang yod ma yin// sa ni mtha' bral bdag med pa// ha ni mtshan ma med pa nyid// k+Sha ni ye shes thugs kyi thugs// i ni rdul snyed lha rnams su// I ni rdul snyed lha ma yin// u ni rdul snyed mi rnams su// U ni rdul snyed byol song rnams// e ni rdul snyed yi dwags su// ai ni rdul snyed dmyal ba rnams// o ni thams cad 'jig par byed// au ni thams cad zhig pa yin// yi ge 'khor lo tshogs chen 'dis// sku gsung thugs kyi 'phreng ba bsdus// zhes brjod do// a ho/ de nas de bzhin gshegs pa btsun mo'i tshogs dang gnyis su med pa'i dkyil 'khor de dag nyid kyi gsang ba 'di nyid/sku gsung thugs yon tan 'phrin las rdo rje las byung ngo// a ho/ thabs dang shes rab dgyes sprin byang chub sems tshogs rgyu 'khor lo// 'bras bu rgyal ba smin grub ngo mtshar ming tshogs bzhi bcu gnyis// 'dus ma byas nyid 'dus byas rdo rje dkyil 'khor 'byin pa'i dam// 'da' bar mi mdzad dbang med rgyu rkyen 'tshogs pa'i mthu chen yin// a ho/ rdo rje gsang ba'i tshig tu'o// zhes brjod pas/ de bzhin gshegs pa thams cad yi ge'i 'khor lor gyur to// gsang ba'i snying po de kho na nyid nges pa las yi ge phreng ba'i 'khor lo bkod pa'i le'u ste bzhi pa'o//// de nas yi ge 'khor lo'i sprin bkod pa las sgyu 'phrul rnam par 'phro ba 'di ched du brjod do// rtsa ba med pa'i sems nyid ni// chos rnams kun gyi rtsa ba yin// sems nyid yi ge'i rang bzhin te// yi ge yid bzhin rin chen sprin// sgyu 'phrul dkyil 'khor bzhi bcu gnyis// dra ba'i dkyil 'khor mngon rdzogs pas// phyogs bcu dus bzhi rdzogs pa yi// dkyil 'khor thams cad 'grub par 'gyur// bdud rtsir 'gyur zhing 'byung ba dang// bzhi brgya rtsa bzhi'i nad sel cing// longs spyod 'byung zhing ngan song sbyong// ci yang gzhan du 'gyur ba 'grub// nam mkha' rdo rje sra 'byung zhing// 'bar nas me yang 'tshig pa dang// chur 'gyur 'bab pa'ang de bzhin te// 'jig rten khams ni 'thor ba dang// thams cad stongs shing ltung bar 'gyur// dgug dang btang dang bcing dang dgrol// gso dang gsad dang 'pham dang rgyal// ting 'dzin 'di yis byed par 'gyur// de nyid ye shes rang snang ba'i// ming tshig gzugs sogs yid bzhin gyi// mun la snang byung ji bzhin du// 'gyur ba gser 'gyur sman gyi tshul// ston pa mchod brtson rtogs pa gsal// dam tshig sngags dang phyag rgya rnams// ma nyams shes shing yo byad ldan// 'grub 'gyur mi ldan don med brlag/ dus gsum rgyal bas thugs chud pa'i// dngos grub mchog gi snying po ni// zad pa'i dus med yid bzhin mdzod// 'phel 'grib med par 'byung ba ste// dngos po med las dngos po'i sprin// sna tshogs rnam par 'byung zhing 'gyur// dngos rnams nyid ni dngos med par// rtogs pa'i dbang sgyur ting 'dzin yin// gang gis dmigs med mi shes pa// de yis chos kyi dbyings mi shes// de phyir dngos dang dngos med pa// 'jig pas dmigs med shes par gyis// gzhi rtsa med pa'i sems nyid ni// pho mo ma yin ma ning min// mtshan med ma yin rigs brgyud min// kha dog ma yin dbyibs ma yin// gnas su ma yin gang yang min// de bzhin nyid dbyings ye shes te// thabs kyi phyag rgya kun gyi rgyu// thabs las thabs byung thabs bsam yas// tha dad min las tha dad pa'i// nang dang nang gi phyi rol gyi// dkyil 'khor bsam yas ye shes rol// 'jigs med kun bzang phyag rgya'i mchog/ gang gis glang chen myos 'dra'i sems// mnyam par gzhag pas btul nas su// sngags dang phyag rgya rab brten na// dngos grub ya mtshan chen por 'gyur// zhes brjod pas/ de bzhin gshegs pa nyid gzigs mos mnyes par gyur to// gsang ba'i snying po de kho na nyid nges pa las sgyu 'phrul dra ba sgrub pa'i ting nge 'dzin gyi le'u ste lnga pa'o//// de nas de bzhin gshegs pa thams cad kyi rang bzhin gcig dang du ma med pa'i bdag nyid thams cad kyis/ 'jig rten drug gi phyogs bcu thams cad la/ nyid kyi che ba'i dkyil 'khor dbyung bar bzheng nas/ched du brjod pa 'di brjod do// ye shes phyogs bzhi dbus brtags te// dkyil 'khor bsam yas lhun grub ni// rdzogs chen rtogs pa'i rnal 'byor pas// kun 'byung dkyil 'khor chen por spyod// 'khor lo rtsibs bzhi myu khyud bcas// gru chad bzhis brgyan bar khyams dang// kun tu gru bzhi sgo khyud ldan// rol mo sna tshogs sprin phung bzhin// dkyil 'khor bzhi bcu gnyis kyis brgyan// seng ge glang chen rta dang khyung// nam mkha' lding gi khri chen la// nyi zla pad+ma rin po che// gdan la rdzogs dang sems dpa'i tshul// 'khor lo rgyal po rgyal mo dang// g.yas nas mthong thos snom pa dang// myong dang btsun mo'i tshogs su bcas// gru chad la ni mthong byed dang// thos byed snom byed myong byed rnams// btsun mo'i tshogs dang bcas par gnas// bar khyams la ni thub drug dang// mdun dang rgyab tu byed pa dang// bya ba dag ni gnas par bstan// sgo khyud bzhi la 'dzoms pa ni// btsun mo'i tshogs dang ldan par gnas// rdo rje 'khor lo rin po che// pad+ma ral gri dril bu 'bar// ut+pal klu shing la sogs mtshan// mdzes tshul mnyes pa'i yo byad 'dzin// mthing ga dkar po ser le brgan// ljang gu la sogs sna tshogs pa'i// mnyen lcug 'khril ldem gzhon tshul can// gsal 'tsher lhun sdug gzi byin ldan// 'od zer 'phro ba'i tshogs chen po// 'bar ba'i phreng bas 'khrigs pa ste// mtha' dbus med par khyab pa yi// dkyil 'khor bsam yas lhun gyis grub// sku yi phyag rgya che mchog ni// de bzhin dbyings las ma g.yos kyang// yang dag thar pa'i gzugs sku dang// 'gro ba ma lus gdul ba'i phyir// mthun byas sku ni sna tshogs ston// ston nyid sgyu ma mig yor tshul// tshul nyid dbyings las g.yos pa med/ ma g.yos bzhin du sna tshogs pa'i// de'i tshe mi mthun sna tshogs la// so sor 'dra bar snang ba ni// de bzhin nyid kyis ma bcos kyang// las 'phro'i dbang gis so sor snang// dper na me long chu zla bzhin// de tshe 'gro drug thams cad la// sdig spong gzugs su snang bar bstan// nyan thos rnams la dgra bcom gzugs// rang rgyal rnams la bse ru'i tshul// gzhan yang theg mchog rim pa bzhin// 'og min bla med gnas mchog tu// sku ni rnam par snang mdzad tshul// byang chub sems dpa'i 'khor rnams la// de bzhin gsung mchog mi smra ste// sku yis chos rnams mjal bar ston// me long bstan pa'i tshul bzhin du// dngos kyi mdog ngan thams cad sel// 'khor gyis de bzhin sku bltas na// byang chub sgrub pa gting dpag med// me long bzhin du sku la snang// de nas sa bcu rim gyis 'byang// bla med byang chub yang dag thob// chos sku dpag med brjod du med// longs sku zad med yid bzhin gter// sprul pa bye ba bsam mi khyab// mtshan dang dpe byad thams cad rdzogs// spyod yul kun du maN+Da la// tshogs chen , gnyis kyang rdzogs par rol// thabs dang shes rab sa yi mchog/ de la sogs pa bsam yas mchog/ skye shi med pa'i g.yung drung sku// nyon mongs kun gyi zhing du gnas// zad mi shes pa'i gter du 'gyur// rdo rje rig pa 'dzin pa'i sku// thams cad dbyer med mnyam pa'i sku// thams cad mkhyen pa'i ye shes sku// de tshe sku lnga kun kyang rdzogs// zhes brjod pas/ 'jig rten drug gi phyogs bcu mtha' yas mu med pa thams cad du dkyil 'khor brjod kyis mi lang ba/zhing gi rdul snyed du gsal bar gyur to// de nas de bzhin gshegs pa btsun mo'i tshogs dang gnyis su med pa'i dkyil 'khor de dag nyid kyi gsang ba 'di nyid sku gsung thugs yon tan 'phrin las rdo rje las phyung ngo// a ho/ dmigs bya dmigs byed mi dmigs dpag med bsam mi khyab// ye shes rang rig dkyil 'khor sna tshogs brjod mi lang// mnyam dang mi mnyam kun khyab khyab med khyab pa'i dbyings// ye nas kun gsal dkyil 'khor rnam spros spros pa med// ces rdo rje gsang ba'i tshig tu'o// gsang ba'i snying po de kho na nyid nges pa las dkyil 'khor spros pa'i le'u ste drug pa'o//// de nas de bzhin gshegs pa btsun mo'i tshogs dang bcas pa thams cad kyi sku dang gsung dang thugs rdo rje las 'di dag phyung ngo/ b+h+rAMbi shwa bi shud+d+he/ hUM badzra d+h+r-ika/ oM dzin dzig/ swa rat+na d+h+r-ika/aM a ro lika/ hA pradz+nyA d+h+r-ika/ muM d+hA tI shwa ri/ lAM dwe Sha ra ti/ mAM mo ha ra ti/ pyAM rA ga ra ti/ tAM badzra ra ti/ k+Shi hi rA dza yaH traM A gar+b+ha yaH hri ha hUM pad+ma pa da maH dziM ku ru paN hriH hUM lA s+ya sa ma ya s+t+waM/ traM mA l+ye sa ma ya hoH hrI gI ti rA gou0f85haM/a nr-i ti rA ga yA mi// mai d+ha ra Ne swA hA/ th+l+hiM nis+sa raM b+ha ya swA hA/ hUM sa rA dza ya swA hA/ muM shrI aM rA gA ya swA hA/ dzaHd+hU pe pra be shA/ hUM puSh+pe a be shA/ baM dI pa su khi nI/ hoHgan+d+he tsit+ta/hUM ya1mAn+ta kr-ita phaT/ hUM big+h+naM2n+ta kr-ita phaT/ hUM pad+mAn+ta3kr-ita phaT/ hUM pradz+nyan+ta kr-ita4phaT/ oM ma5hA badzra d+ha ro ma hA kro d+hI shwa rI dz+wa la nI hUM phaT/ oM ma hA rat+na d+ha ro ma hA kro d+hi shwa rI dz+wa la nI hUM phaT/ oM ma hA pad+ma d+ha ro ma hA kro d+d+hi shwa rI dz+wa la nI hUM phaT/oM ma hA karma d+ha ra ma hA kro d+d+hi shwa rI dz+wa la nI hUM phaT/ hUM hUM hUM badzra tsit+ta oM/ a a a badzrI b+ha dra sa man+ta aH oM mu ne kr-iM swA hA/ oM mu ne hUM trUM swA hA// oM mu ne sruM swA hA/ oM mu ne braM swA hA/oM mu ne k+ShaMswA hA/ oM mu na ye swA hA/ oM e h+ye hi b+ha ga bAn/ ma hA kA ru Ni kA dr-i sh+ya hoH sa ma ya staM/ dzaHhUM baM hoH oM aM hUM swA hA/ ba ba ba ba ba/ dzra dzra dzra dzra dzra/ sa sa sa sa sa/ ma ma ma ma ma/ ya ya ya ya ya/ oM aM hUM swA hA/ oM ye shes rgyal po sku gsung thugs// yon tan 'phrin las rmad po che// de nyid du ni mnyam sbyor bas// phyag rgya chen por bdag sbyor cig/ oM badzra sa ma ya hUM/ oM badzra sa ma ya s+t+waM/ oM badzra sa ma ya hoH dzaHhUM baM hoH zhes brjod pas/gsung gi dkyil 'khor 'di dag gis// 'jig rten drug gi phyogs bcu thams cad khyab par grags so// rab tu grags so// kun du grags so// de nas bcom ldan 'das byed pa po rdo rje dang/bya ba mo rdo rje gnyis su med pa'i dkyil 'khor la thim par mdzad do// de nas phyogs bcu dus bzhi'i de bzhin gshegs pa'i bdag nyid chen pos bdag nyid chen po'i ye shes dang byin bsdu ba zhes bya ba 'di sku dang gsung dang thugs rdo rje sgyu 'phrul dra bas las phyung ngo// oM ma hA shU n+ya tA dz+nyA na badzra swa b+hA ba At+ma kou0f85 haM/ oM ma hA A dar+sha dz+nyA na badzra swa b+hA ba At+ma1kou0f85 haM/ oM ma hA3pra t+ya pek+Sha NA d z+nyA na badzra swa b+hA ba At+ma kou0f85 haM/oM ma hA sa ma tA dz+nyA na badzra swa b+hA ba At+ma2kou0f85haM/ oM ma hA4kr-i t+yA nuSh+ThA na dz+nyA na badzra swa b+hA ba At+ma kou0f85 haM/ oM sarba ta thA' ga ta ma hA' kA ya badzra swa b+hA ba At+ma kou0f85 haM/ oM sarba ta thA ga ta ma hA bA ka badzra swa b+hA pa At+ma kou0f85haM/oM sarba ta thA ga ta ma hA tsit+ta badzra swa b+hA ba At+ma kou0f85haM/ oM sarba ta thA ga ta ma hA a nu rA ga Na badzra swa b+hA ba At+ma kou0f85haM/ oM sarba ta thA ga ta ma hA' pU dza badzra swa b+hA ba At+ma kou0f85haM/ zhes brjod pas/ thim par gyur gsal bar gyur 'bar bar gyur to// e ma ho ngo mtshar rmad kyi chos// rdzogs pa'i sangs rgyas kun gyi gsung// sgra dang ming tshig kun las 'das// sna tshogs sgra rnams gsal bar 'byung// gsung gcig dkyil 'khor yan lag ni// bsam gyis mi khyab kun du khyab// sgra dang ming tshig so sor grags// thams cad gsung gi phyag rgya'i mchog/ rgyud mchog sgyu 'phrul dra ba las// bde ldan gsung gi don byung ba'ang// thams cad pad+ma'i ngang gyur na// grol thar lam dang 'khor ba'i sgra// ji skad brjod kyang gsung mchog ste// theg pa mtho dman thams cad dang// log 'gro ma lus thams cad skad// byang chub rdo rje gsung du bsdus// bsdus nyid phyogs bcur rnam par grags// sgra nyid ma chags ngang du gsungs// gsung ba nyid na brjod du med// brjod med de nyid sna tshogs sgra// kun la grags shing so sor mjal// dper na de bzhin sprin sangs bzhin// gsung gcig sgra yis so sor go/ de ni gsung mchog rgyal po yin// theg pa mtho dman bsam yas kyang// de bzhin nyid las ma gsungs te// gdul bya'i thabs su so sor thos// ji ltar gsung rab kun brjod kyang// de bzhin nyid kyis gsung pa med// yi ge med dang rig pa'i gsung// ljags kyi rtse mor ma phyung yang// thugs rje gsung gi byin rlabs kyis// 'gro don sna tshogs so sor gsal// gsal nyid gsung gi rdo rje'i mchog/ de bzhin gsung gi 'gro don rnams// de bzhin ngang las ma g.yos kyang// dper na brag ca'i sgra bzhin no// gsang ba'i snying po de kho na nyid nges pa las dkyil 'khor bsdus pa dang gsang sngags kyi le'u ste bdun pa'o//// de nas de bzhin gshegs pa thams cad kyis/ yan lag thams cad dkyil 'khor du lhun gyis grub par byin gyis rlobs pa zhes bya ba 'di ched du brjod do// sgyu 'phrul dra ba'i mngon rdzogs pa// thams cad byang chub mchog gi rgya// gsang ba de nyid nges pa yi// snying po'i phyag rgya 'da' dka'o// mi bskyod nyi ma'i dkyil yi ge// rin chen zla ba'i dkyil yi ge// lnga gnyis zung du spros pa las// sbyar bas phyag rgya 'byung ba'i rgyu// oM dang muM gnyis rtse sbyar te// 'bru brgyad bsnol nas rtse sprad pa// rgyal ba kun dang mnyam sbyor ba'i// bde ba chen po sbyin pa'i rgya// 'bru bzhi sbas nas thugs kar bkan// hUM bsgreng rtse mor rdo rje 'bar// zla brtul 'bru sbas dril gsil zhing// 'khril ba'i tshul gyis chos la brten// 'bru bzhi sbas nas thugs kar bkan// mUM bsgreng rtse mor dril gsil 'bar// nyi ma 'bru lnga las su 'khril// btud de 'dzum pa'i mdangs kyis blta// 'bru bzhi sbas nas thugs kar bkan/ A+oM bsgreng rtse mor 'khor lo 'bar// zla brtul 'bru sbas dril gsil zhing// 'khril ba'i tshul gyis chos la brten// 'bru bzhi sbas nas thugs kar bkan// yAM bsgreng rtse mor dril gsil 'bar// nyi ma 'bru lnga las su 'khril// btud de 'dzum pa'i mdangs kyis blta// 'bru bzhi sbas nas thugs kar bkan// swAM bsgreng rtse mor rin chen 'bar// zla brtul 'bru sbas dril bsil zhing// 'khril pa'i tshul gyis chos la brten// 'bru bzhi sbas nas thugs kar bkan// sgreng rtse mor dril gsil 'bar// nyi ma 'bru lnga las su 'khril// btud de 'dzum pa'i mdangs kyis blta// 'bru bzhi sbas nas thugs kar bkan// AM bsgreng rtse mor pad+ma 'bar// zla brtul 'bru sbas dril gsil zhing// 'khrul ba'i tshul gyis chos la brten// 'bru bzhi sbas nas thugs kar bkan// bye bsgreng rtse mor dril gsil 'bar// nyi ma 'bru lnga las su 'khril// btud de 'dzum pa'i mdangs kyis blta// 'bru bzhi sbas nas thugs kar bkan// ha bsgreng rtse mor ral gri 'bar// zla brtul 'bru sbas dril gsil zhing// 'khril ba'i tshul gyis chos la brten// 'bru bzhi sbas nas thugs kar bkan// taM bsgreng rtse mor dril gsil 'bar// nyi ma 'bru lnga las su 'khr-il// bdud de 'dzum pa'i mdangs kyis blta// ut+pal klu shing la sogs mtshan// rin chen myu gu ral gri 'bar// pad+ma dkar po rdo rje 'bar// chos kyi 'khor lo rin chen te// gzugs mdzes rin chen 'phreng ba dang/ pi wang gar mkhan mchog nyid de// me tog 'phreng dang spos mchod ma// mar me byug pa la sogs pa'i// las la 'khril zhing chos la bstan// dbu rnams 'byo zhing 'dud pa'i tshul// gong gi phyag rgya chen po bzhin// gnyis med dbyings kyi ngang du 'khril// sgo bzhi'i khro bo'i phyag rgya ni// nr-i mgo gdengs dang rdo rje gnon// thod sbrul chen po gnon pa dang// rdo rje rgya gram las kyi gnon// lcags kyu zhags pa s+pho Ta ho// sgo bzhir gnas pa de dag kyang// 'dud tshul 'khril pa gong ma bzhin// thub drug phyag rgya sna tshogs te// mdor bsdus phyag rgya drug tu bstan// yum ni dmigs med chos kyi dbyings// kun bzang mnyam gzhag ye shes 'phro// yum 'gyur mnyam rdzogs pad+ma'i skyil// gzhan yang phyag rgya sna tshogs te// yang na de bzhin gshegs nyid dam// yang na rdo rje thal mo nyid// phyag rgya chen po'i tshogs mchog ni// thabs dang shes rab ldan 'byor na// ma bskyod ma bsgul thams cad kun// phyag rgya chen po'i ngang du gnas// yan lag bzhi bcu rtsa gnyis ldan// de nyid yan lag spros bdag ste// bzhi bcu rtsa gnyis gsum 'phror 'gyur// de ltar ldan pa'i gtso mchog gis// rgyal ba rgyal mchog de bzhin du// bcu gnyis drug gi 'od 'phro 'bar// de la sogs te bsam mi khyab// phyogs bcu dus bzhi bsam yas su// 'dul ba'i don rnams so sor ston// theg pa mtho dman thams cad dang// phyin ci log rnams bsam yas dang// zhi khro'i tshogs chen thams cad la// so sor mthun byas kun tu snang// dper na gar mkhan nyid 'dra ba// lus la ma bkod sna tshogs ston// mdor na phyag rgya thams cad ni// 'di zhes gcig ces brjod du med// gnyis dang gsum du rnam par 'phrau// bskyod dang spro pa'ang de bzhin te// mdor na sgul skyod thams cad kun// phyag rgya chen po'i ngang du gnas// gnas nyid mi gnas gnas pa'ang min// de skad dag mchog nyid kyis bshad// gsang ba'i snying po de kho na nyid nges pa las yan lag thams cad dkyil 'khor du byin gyis brlabs nas phyag rgya spros pa'i le'u ste brgyad pa'o//// de nas de bzhin gshegs pa dgyes pa chen pos/rdo rje gsang ba'i dam tshig bkod pa la snyoms par zhugs nas/ ched du brjod pa 'di brjod do// shin tu phra ba'i dam tshig mchog/ phyag rgya chen po'i phyag mthil du// thugs kyi dkyil 'khor dam pa de// sor ni bzhi yi tshad du bya// 'bru lnga spos lnga rin chen lnga// snying po lnga dang sman lnga dang// bdud rtsi lnga nyid rab bsnyams la// rig pas thig ni gdab par bya// lte ba rtsibs dang ldan pa yi// rtsibs bzhi 'khor lo mu khyud bcas// gru chad bzhi dang gru bzhi pa// bar khyams sgo khyud ldan par bya// sen zlum tsam gyi nyi zla la// tsa na'i 'bru tsam pad+ma'i gdan// yungs 'bru tsam gyi yi ge las// phyag rgya til 'bru tsam du bri// bcos bu'i ras ni sna tshogs dang// rgyan 'phreng btung dang bro bas bskor// glu tshig bro gar rol mo yi// sprin phung tshogs kyis rab tu mchod// yum dang 'jo ma sems ma yis// ji ltar 'dod pa'i las bzhin mchod// dbyibs dang kha dog mtshan ldan par// zhal du gyur pa'i me bus la// bza' btung bro ba'i tshogs rnams kyis// las bzhi'i mchod pa rab tu sbyin// khro bo'i dkyil 'khor de bzhin te// shin tu phra la sbyangs pa yis// bsam yas dag la'ang de bzhin bya// rig pas dpag pa tsam du'o// mchod pa'i phyag rgya chen po ni// sems kyi yid bzhin sprin tshogs kyis// phyogs bcu thams cad sangs rgyas zhing// mnyen 'jam reg na bde ba yi// sna tshogs rin po che yi gzhi// mdzes par bris shing spras pa dang// kun 'byung rin chen phung por 'bar// dbyibs legs rdzing bu bro mchog bsil// rin chen khang pa sna tshogs dang// rgyan dang dpag bsam ljon pa'i tshal// glu dbyangs tshigs su bcad pa'i sgra// bla bre rgyal mtshan na bza' gdugs// do shal dpung rgyan se mo do// bza' dang btung ba'i mchog rnams dang// rang la mdzes par brgyan pa yi// lha dang lha mo rdul snyed kyis// bro gar la sogs bsam yas kyis// phyogs bcu nam mkha'i khams bkang nas// dkyil 'khor kun la rgyas par dbul// skal ldan gsal ba'i khyad par gyis// rim gyis yang na cig car du// chos kyi dbyings dang mnyam sbyor zhing// mchod pa'i phyag rgya chen por bsgom// gsal ldan ma'am byin brlabs la// stong gsum yungs 'brur gzhug tshul du// dbyings nas dkyil 'khor spyan drangs mchod// mnyes nas grub pa'i dam tshig mchog/ bdag nyid chen po mchod pa yis// sangs rgyas dkyil 'khor ma lus mnyes// srid gsum 'gro ba thams cad la// dga' ba chen pos khyab par 'gyur// sgyu 'phrul drwa ba brten pa yis// phyogs bcu dus bzhir gshegs pa yi// sangs rgyas dkyil 'khor ma lus dang// khams gsum 'gro rnams mngon du 'gyur// lus ngag sems dang chos thams cad// gang na'ang mi gnas mi dmigs pa// mig yor tshul du sbyor ba yis// nam mkha' la ni nam mkha' bsgom// kun byas dbang phyug rig pas 'jug/de nas slob ma gzhug par bya// de nas rigs kyi bu mchog des// rgyal srid dang ni rang gi lus// bu dang chung ma nor gyi dbyig/ rab tu gces dang yid 'thad dbul// dbang phyug longs spyod lngas mchod na// dkyil 'khor thams cad mchod pa yin// nye ba'i dkyil 'khor smos ci dgos// nyes pa thams cad dag par 'gyur// dad brtson brtul zhugs rab rtogs na// phan pa'i dbang sbyin nus pa'i dbang// rim pa bzhin du sbyin par bya// snying rjes chud ma zos par gzung// yang na thal mo rab bsnol nas// phyag rgya chen po'i phang dung ni// dkyil 'khor mdzub gang tshad du yang// mkhas pas cho ga ji bzhin bya// yang na sa gzhi rab mnyam la// dkyil 'khor khru gang tshad du bya// yang na lus gang tshad du ste// yang na lus ni gsum gyi tshad// phur bu srad bu tshon phye dang// gos rgyan mdzes pa'i yid 'ong grogs// thig gdab cho ga phun sum tshogs// mkhas ldan chen pos bsgrims te bya// yang na khru ni bcu drug dang// nyi shu'am nyi shu rtsa lngar bya// rigs kyi dkyil 'khor lnga rnams bsgom// sku gsung thugs ldan gzugs kyang dgod// yang na rgyang grags dpag tshad dam// nam mkha'i dbyings ni bsam yas par// sangs rgyas dkyil 'khor sna tshogs bsgom// ma mthong rmongs la bstan phyir mtshon/ kha dog nyi shu rtsa lnga'am// lnga yi tshon gyis bri bar bya// 'dul ba'i cho ga bzhin du dgye// ting 'dzin rol mo mtha' yas mchog/ yi ge'am gdan nam snying po'am// phyag rgya'am sku gsung thugs ldan par// byin rlabs ya mtshan rmad po che// 'grub 'gyur sangs rgyas kun gyi dam// sa la sogs las phyag rgyar byas// rnam grol rim pa thob 'gyur na// dag pa'i ye shes kyis sbyangs pas// smos ci dgos te 'di nyid yin// phyogs dus dkyil 'khor bdag nyid che// mi dmigs thugs kyi dkyil 'khor las// dkyil 'khor thams cad spyan drang ngo// rang snang dbyer med dkyil 'khor la// 'jug pa'i mtshan nyid mnyam sbyor bas// phyogs dus kun nas gshegs pa yi// bsnyen pa'i dkyil 'khor rab tu rdzogs// nye bar gyur pa'i dam tshig mchog/ dpag bsam shing dang yid bzhin gyi// rin po che dang 'byung ba kun// de dag rdzas yod ma yin te/rang sems bsod nams brtan pa yin// ngo mtshar cho 'phrul rmad kyi chos// gzhan na yod 'ongs ma yin te// thabs la brten pa'i shes rab nyid// de lta bu yi ngang du 'byung// shes rab dbyings kyi de bzhin nyid// thabs kyi phyag rgyar gyur pa'i phyir// ye shes la ni ye shes rol// ye shes rol pa nyid kyang gsog/ rgyal ba sngon byung skyob pa dang// byin rlabs ston pa'ang de bzhin te/ bya byed nus pa'i gzi byin gyis// sgyu ma rdo rje btsan po'i mchog/ cho ga lnga ni rdzogs byas shing// yo byad lnga ni rdzogs par ldan// sngags kyi yan lag lnga rdzogs pas// ma nyams 'jug la rab brtson na// zhag ni sum cu phrag drug gam// bcu gnyis bcu bzhi bcu drug gis// dbang sgyur rigs kyi dam pa 'grub// de tshe bcu drug tshun chad kyis// sku lnga lhun gyis rdzogs pa ni// ye shes thig le de nyid la// ye shes thig le nyid snang ba// bsam gyis mi khyab mtha' yas mchog/ phyogs bcu dus bzhi mngon rdzogs pa'i// zhing khams rnam dag bsam yas dang/ rgya dang bral ba'i gzhal yas khang// 'khor lo'i rgyan dang rol mo'i tshogs// dkyil 'khor ma lus bsam yas kun// mthong nas nye bar mnyes pa dang// rgya chen gsung la don byung ba'ang// mthun pa'i ye shes rang snang ba'o// gcig dang du mar bral ba yi// mtha' dang dbus med de bzhin nyid// sangs rgyas kyis kyang mi gzigs te// rang byung ye shes gnas med snang// log par rtog btags rnam dag cing// ye shes dbyings las mi gzhan phyir// thugs rje chen pos 'brel bas na// 'gro drug dus gnas ma lus snang// bde ba chen po'i dkyil 'khor ni// stangs dpyal gnyis sam yang na lnga// byas te dad ldan rab zhugs na// 'dod pa yid 'ong mnyam par 'gyur// skal pa mnyam pa'i ye shes de// gnyer na nye bar 'byung ba yi// ya mtshan chen po 'byung bar nges// dad med nyams na phung bar 'gyur// zhes ched du brjod do// gsang ba'i snying po de kho na nyid nges pa las rdo rje bkod pa'i gsang ba'i dam tshig gi le'u ste dgu pa'o//// de nas bcom ldan 'das dgyes pa chen po rgyal po sbyin pa zhes bya ba'i ting nge 'dzin la snyoms par zhugs nas ched du brjod pa 'di brjod do// shes rab thabs kyi phyag rgya las// bde ba'i 'bru tshogs gsal ba'i rgyun// rdo rje'i lam nas pad+mar 'khyil// rtse nas bstim zhing dkyil 'khor bsgyur// nyan byed 'khor lo'i gzhal yas su// gsal ba'i thig le ngo bo nyid// trAM gi phyag rgya'i tshogs mchog las// rin chen dkyil 'khor gsal spro thim// trAM gsang ba gsang chen gsang mchog gang// gsang ba kun la'ang mnyan par bya// gsang ba'i don nyid brtag pa las// gzhan du smra bar bya ba min// gsal ba'i 'khor lo'i gzhal yas su// gsal ba'i thig le'i ngo bo nyid// yi ge 'phreng ba'i tshogs mchog las// rigs kyi dkyil 'khor gsal 'phro thim// oM dus gsum rgyal ba'i sras chen po// sku gsum thugs kyi rdo rje gzung// rgyal ba thams cad mnyes mchod la// rgyal ba kun dang mnyam par sbyor// lag pa'i 'khor lo'i gzhal yas su// gsal ba'i thig le'i ngo bo nyid// hAM gi phyag rgya'i tshogs mchog las// las kyi dkyil 'khor gsal 'phro thim// oM khyod ni rdo rje las yin gyis// las rnams ma lus kun gyis shig/ pho nya mang po'i 'du 'phro kun// khyod kyi dgos pa byed pa yin// smra byed 'khor lo'i gzhal yas su// gsal ba'i thig le'i ngo bo nyid// hrIHyi phyag rgya'i tshogs mchog las// chos kyi 'khor lo gsal spro thim// oM chos kyi bdud rtsi bla med kyis// dad ldan skyes bu ngoms par byos// rab 'bring tha ma'i blo can la// mthun par gsang bsgrags gzhan du min// bskyod chen 'khor lo'i gzhal yas su// gsal ba'i thig le'i ngo bo nyid// hUM oM swA AM hA rnams las// dkyil 'khor lnga dang khro 'phreng bsgom// oM phyogs bcu dus bzhi thams cad kyi// sku gsung thugs kyi rdo rje che// dkyil 'khor kun gyi byed pa po// dkyil 'khor kun gyi sbyin pa spyod// slob dpon mnyes par ma byas shing// dbang rnams thob par ma byas par// nyan pa la sogs rtsom pa rnams// 'bras bu med cing brlag par 'gyur// dbu rgyan cod pan phreng ba dang/ go cha rgyal mtshan phyag rgya dang// gdugs dang bum pa bza' btung dang/snying po lnga yis dbang bskur na// dus 'di phyin chad rgyal ba'i sras// ngan song thams cad med pa dang// tshe ring bde ba phun sum tshogs// mtho ris thar ba'i bdag por 'gyur// zhes brjod do// gsang ba'i snying po de kho na nyid nges pa las dbang sbyin pa'i le'u ste bcu pa'o//// de nas de bzhin gshegs pa dgyes pa chen po sgyu 'phrul dra ba'i rgyal po bsgyur ba zhes bya ba'i ting nge 'dzin la snyoms par zhugs nas/ched du brjod pa 'di brjod do// rgyu gcig pa dang yig 'bru'i tshul// byin gyis brlabs dang mngon sum par// rab tu rtog pa rnam bzhi yis// thams cad mngon rdzogs rgyal po che// yan lag dbang po rnam shes kun// rnam smin oM du shes par bya// rdzogs pa'i dkyil 'khor nyid du bsgom// yang na khro bo'i dkyil 'khor bsgom// gzugs sgra dri ro reg la sogs// rnam smin mUMdu shes par bya// yum gyi dkyil 'khor nyid du bsgom// yang na khro mo'i dkyil 'khor bsgom// gos rgyan bza' btung glu dang tshig/ bro gar tshogs kyi sprin phung la// hUM du shes pas rab spyad na// ngo mtshar 'byung ba'i dkyil 'khor mnyes// lha mo klu mo rigs ngan mo// dbye'am yang na mi dbye bar// bsnyen pa dang ni nye bsnyen dang/ sgrub pa dang ni sgrub chen po// yum gyi pad+ma'i dkyil 'khor du// bde ba thugs kyi dkyil 'khor spro// sangs rgyas sprin tshogs ma lus la// dgyes mnyam mchog gi sbyin pas bstim// sgrub ba'i nyi zla snying po de// dkyil 'khor rdo rje'i lce yis blang// mkha' 'gro gsal 'bar tshe la sogs// yid bzhin sprin gyi bdag por 'gyur// zhing gyur mchog dang mchog phran rnams// nyi zla'i dkyil du mkhas pas gzhag/ nga rgyal lag gi 'du byed bsgom// hUM du gyur pas rnam par dag/ dbyings su thim nas phyag rgya 'bar// skur gyur 'od zer 'phro bas brjid// gtsug tu rnam par rgyal ba bsgom// ngo mtsharangan 'gro thar ba'i thabs// ye nas skye med de bzhin nyid// sgyu mar snang ba mig yor tshul// sbyor sgrol bya ba kun byas kyang// rdul cha tsam yang byas pa med// snod bcud rgyud rnams dag rtogs shing// mnyam gnyis lhag pa'i mnyam gnyis kyis// dkyil 'khor kun du bzang po'i zhing// byed spyod tshogs chen gnyis gyur nas// yan lag ma nyams yo byad ldan// cho ga rdzogs par shes pa yi// rnal 'byor tshogs pa'i dkyil 'khor gyis// nges par legs pa'i dgos pa 'grub// lnga dang lnga yi sbyor ba yi// tshom bu lnga yi lha bkod la// khro bo bcu dang khro mo bcu// 'khor lo'i tshul du rnam par bsgom// de bzhin rigs dang rdo rje'i rigs// pad+ma'i rigs te sku gsung thugs// khro bo tshogs dang ldan pa yi// tshom bu gsum gyi lha rnams bsgom// rigs kyi rigs te rigs kyi gtso// thugs kyi thugs te thugs kyi mchog/ khro bo tshogs dang ldan pa yi// tshom bu gcig pa'i lha rnams bsgom// khro bo khro mo'i tshogs chen po// pho nya phyag brnyan bka' nyan tshogs// ci bgyi la sogs tshogs rnams kyis// dngos grub las rnams rdzogs par byed// rnal 'byor sngags 'chang dngos grub ni// mnyam rdzogs lhun grub ngang gnas shing// spyod pas ci la'ang thogs med pa'i// thams cad ye nas dbyer med pa'o// rdo rje'i rigs su thams cad dkyil// 'od 'phro 'bar bar rab tu bsgom// chags med tshul gyis bstim par bya// gnyis med gyur nas phyag rgya che// yang na sku gsung thugs nyid de// thams cad ma lus sku gsung thugs// ting 'dzin gsal 'bar 'od zer 'phro// gnyis med dbyings kyi ngang du thim// rigs 'dzin dngos grub mchog thob 'gyur// dkyil 'khor ma lus 'bar ba 'grub// nyon mongs sdug bsngal sel bar byed// rdo rje'i rigs su skye ba'i gnas// sngags 'chang dngos grub yang dag ni// thabs dang shes rab thams cad kyis// dkyil 'khor lnga dang khro 'phreng bsgom// chags pa med pa'i tshul gyis ni// 'od zer rnam pa mang po 'phro// gnyis su med par bstim par bya// dngos grub mchog gi snying po 'grub// rnal 'byor thabs dang shes rab kyis// de bzhin gshegs dang yum du bsgom// sems dpa' sems ma nyid du bsgom// so so'i sngags dang phyag rgya dang// ting 'dzin yang dag so sor gsal// gnas dang longs spyod ci bde dang// ma nyams blo ni rab ldan pas// dang por dam nos bzhin du bya// le lo sgyid snyoms med pa yi// the tshom med par bsgrubs byas na// dkyil 'khor thams cad 'grub par 'gyur// rdo rje gsang mchog dam pa 'thob// sgrub pa'i zhag dang tshes grangs ni// rgyud las smos pa bzhin du bshad// rdo rje gsang ba'i tshig tu'o// zhes de bzhin gshegs pa nyid la de bzhin gshegs pa nyid ched du gleng ngo// gsang ba'i snying po de kho na nyid nges pa las tshogs kyi dkyil 'khor gyi le'u ste bcu gcig pa'o//// de nas de bzhin gshegs pa dgyes pa chen po rol mo'i sprin rnam par spros te/ rgyan bkod pa'i ting nge 'dzin la snyoms par zhugs nas ched du brjod pa 'di brjod do// sgyu 'phrul dra bas mngon rdzogs pa'i// dkyil 'khor brtan pa'i ting nge 'dzin// bro gar phyag rgya'i 'du 'phro yis// 'dzul lam nam mkhar 'gro bar 'gyur// glu tshig sgra yi phyag rgyas ni// chos kyi dngos grub thob par 'gyur// rgyan dang bgo ba'i phyag rgya yis// 'bar ba'i rgyal po thub med 'grub// bza' dang btung ba'i phyag rgyas ni// yid bzhin sku dang bdud rtsi 'grub// A li kA li'i phyag rgya yis// thams cad thams cad 'grub par 'gyur// shes 'jug mtshan nyid 'byor pa'i gzungs// 'bras bu smin byed rgyu dang rkyen// nus mthu can du gang gyur pa// rig 'dzin rgyal ba'i zhing du grags// mi dang lha dang tshangs pa yi// skye ba rnam dag 'dzin mod kyang// khyad par sa la gnas 'gyur yin// pha rol phyin pa kun tu rdzogs// thabs dang shes rab thabs kyi mchog/shes rab mchog gi mchog gyur pa'i// sa yi khyad par bcu dang gsum// rgyu 'bras khyad par lhun gyis rdzogs// mkha' dkyil dngas pa'i dbyings nyi zla// ye shes rgyal po stangs dpyal bsgom// rgyal ba'i dkyil 'khor thams cad kun// ma lus par ni bsgom par 'gyur// dus bzhi phyogs bcu gang nas kyang// rdzogs pa'i sangs rgyas rnyed mi 'gyur// sems nyid rdzogs pa'i sangs rgyas te// sangs rgyas gzhan nas ma tshol cig/dkyil 'khor kun tu rab sbyor bas// dkyil 'khor thams cad 'grub par 'gyur// cho ga lhag gam ma tshang na'ang// skyon nyid dag ste nyes pa med// ces ched du brjod pas rol mo'i sprin gyis mnyes par gyur to// gsang ba'i snying po de kho na nyid nges pa las tshogs bsgrub pa'i le'u ste bcu gnyis pa'o//// de nas de bzhin gshegs pa phyogs bcu dus bzhi'i sku dang gsung dang thugs rdo rje'i dkyil 'khor thams cad gcig tu 'dus nas dgyes pa chen pos/chos thams cad ye nas rdzogs pa chen por lhun gyis grub pa'i dam tshig shin tu gsang ba'i snying po sprin bkod pa'i ting nge 'dzin la snyoms par zhugs nas ched du brjod pa 'di brjod do// ma rtogs pa dang log par rtogs// phyogs rtogs yang dag nyid ma rtogs// 'dul ba dgongs pa gsang ba dang// rang bzhin gsang ba'i don rnams ni// yi ge sgra btags ming tshogs la// brten pa'i tshig gis rab mtshon te// khong nas gab spas don 'byin pa// ston pa rdo rje'i thugs la gnas// dkyil 'khor ldan pa'i dkyil 'khor gyis// dkyil 'khor la ni dkyil 'khor bsgom// dkyil 'khor dkyil 'khor las byung ba'i// thugs kyi dkyil 'khor dkyil 'khor mchog/ gsang ba'i thig le dkyil 'khor dbyings// 'byung ba shes rab rigs kyi yum// chen po rigs kyi de bzhin te// byang chub sems ni rdo rje'i tshogs// dbang po yul dus rig parnams// kun tu bzang po'i dkyil 'khor la// bdag nyid chen po lhag pa yi// thugs kyi ye shes lngas lta zhing// snying po thig le mnyam sbyor bas// bde ba'i ye shes rol mo yis// ye shes dgyes la mchod par 'bul// zag pa med pa'i bsod nams kyis// ye shes sgyu ma rang snang ba// rol mo'i dkyil 'khor mtha' yas mchog/gsang ba'i thig le nyid kyi dbyings// de ni sangs rgyas kun gyi dngos// phyogs bcu dus bzhir mngon rdzogs pa'i// sku gsung yon tan 'phrin las thugs// ma lus bdag nyid zhal mthong ba// dbang sgyur mchog nyid dam pa yin// dkyil 'khor la gnas dkyil 'khor nyid// rdzogs pa'i dkyil 'khor lhun gyis grub// rgyun du dkyil 'khor ma lus thogs// rdzogs pa'i dkyil 'khor mnyam sbyor bas// thugs rje'i dkyil 'khor yongs kyis 'byung// phyogs dus dkyil 'khor 'dul ba'i mgon// sgyu ma'i dkyil 'khor sgrol ba yi// bya byed med par dkyil 'khor spyod// ye shes rdzogs pa'i dkyil 'khor la// thos bsam sgom pa'i mnyam sbyor gyis// rang byung kun dam lhun gyis grub// 'di ni sangs rgyas thams cad kyis// 'da' bar mi mdzad dam tshig mchog/ gang zhig 'di la mos gyur pa// sangs rgyas dkyil 'khor thams cad kyis// phyogs dus kun nas thams cad du// dkyil 'khor ma lus bsnyen pa yi// nye ba'i sras su dgongs par 'gyur// bskal pa zhing gi rdul snyed du// shin tu sbyangs la rab gnas shing// dkyil 'khor ma lus bsnyen pa yi// 'bras bu gsang chen 'di yin te// 'jig rten drug gi phyogs bcu na// 'das dang da ltar byung ba yi// rgyal ba'i dkyil 'khor ma lus pa// bsnyen nas sku lnga lhun gyis rdzogs// 'byung dang ma 'ongs thams cad kun// 'di yis lhun gyis grub par 'gyur// 'di ni gsang chen nges pa yi// 'bras bu lam du gyur pa yin// rgyal ba'i dkyil 'khor ma lus la// 'di las gsang ba'i nges don med// btsal kyang rgyal bas mi brnyes so// kun gyi phyag rgya chen po mchog/ thos bsam bsgom la rab sbyangs pa'i// shes rab mig ldan rnams kyis zung// snod ldan ngang tshul bzang la brtan// lus dang longs spyod gtong la sbyin// gzhan du nam yang sbyin mi bya// rmongs la 'phyar bas gal te sbyin// dus min par ni srog zad nas// sregs dang sbrebs la yun ring gnas// zhes de bzhin gshegs pa nyid kyis de bzhin gshegs pa nyid la ched du brjod do// gsang ba'i snying po de kho na nyid nges pa las shin tu gsang ba man ngag gi snying po'i le'u ste bcu gsum pa'o//// de nas de bzhin gshegs pa thams cad nyid kyi dkyil 'khor la dgyes pa chen po'i glu 'di blangs so// oM phyogs bcu dus bzhi rdzogs pa yi// ye shes dkyil 'khor thig le che// bsod nams dkyil 'khor sku yi tshogs// snang stong thig le kun tu rdzogs hoH/oM rdo rje bsod nams thig le che// rdo rje ye shes dkyil 'khor ldan// rdo rje sgra chen mtha' yas pa// rdo rje rgyal po thig le che hoH/ oM sku gsung thugs kyi rdzogs pa che// yon tan 'phrin las kun tu rdzogs// ye nas lhun rdzogs kun tu bzang// 'dus pa'i tshogs chen thig le che hoH/ oM mi dmigs sgyu 'phrul mnyam pa'i dbyings// mtha' yas kun nas sna tshogs spro// mtha' yas kun nas lhun gyis thim// sna tshogs sku gsung thugs chen po hoH/ oM phyogs bcu'i 'jig rten rdul snyed du// rgyal ba'i don rnams rdul phran snyed// sprul pa'i rdul phran bsam yas kyis// skad cig yud la lhun gyis grub hoH/oM thams cad ma lus sku gsung thugs// sku gsung thugs kyi bdag nyid che// sku gsung thugs kyis kun tu khyab// sku gsung thugs kyi thig le che hoH/ zhes bsgrags so// gsang ba'i snying po de kho na nyid nges pa las mnyes pa'i mchod pa'i le'u ste bcu bzhi pa'o//// de nas de bzhin gshegs pa thams cad kyi bdag po sangs rgyas thams cad kyi ngo bo nyid kyis khro bo'i dkyil 'khor mngon par 'du mdzad de/de ci'i phyir zhe na/ bdag tu rmongs pa'i rtogs pa dang/ btags pa la mngon par zhen pas/ yang dag pa'i lam dang bral ba dag/ gab pa'i gsang ba ma rtogs par sbas pa'i gsang ba la mngon par 'chel nas/rgyu dang 'bras bu la rmongs pas/ srid pa'i sa bon rtsub mos 'phangs nas/ mtshams med pa'i rab tu tsha ba'i dmyal bar skyes so// de rab tu tsha ba'i sdug bsngal drag pos gdungs pa dang/'di bas shin tu grang yang ci ma rungs snyam pa'i mod la/ rab tu sbrebs pa dang/ pad+ma ltar gas pa'i sdug bsngal drag po dag gis rab tu gdungs pa de lta bu'i sdug bsngal rab tu tsha ba la sogs pa brgyad dang/shin tu grang ba la sogs pa brgyad po dag tu/ 'jig rten gyi khams brgyud cing bskal pa chen po stong phrag bcu gnyis su myong ngo// de nas rnam par smin pa de zad pa dang/ yi dags ltogs pa dang/ skom pa'i sdug bsngal gyis rab tu nyen pa dang/'dod pa'i dngos po rnams yid du mi 'ong ba dang/ gdug cing rtsub pa'i dngos po sna tshogs su gyur pa dang/ yod med par yang 'gyur zhing/ shin tu rid cing bskams pa dang/lus dang yan lag dang dbang po mi 'tshams par gyur par bskal pa chen po drug tu skyes so// de nas las kyi sgrib pa rtsub mo'i rnam par smin pa de khad kyis bsrabs pa dang/ sngon gyi srid pas mtshams sbyar nas/yi dags srin po chen po rab tu gdug pa gtum po lus gcig la mgo bo brgya pa dang/ mgo sna tshogs pa dang/ lus brgya la mgo bo gcig pa dang/ lus sna tshogs pa dang/ yan lag mang po dang/ yan lag sna tshogs pa dang/ gdug pa'i lag cha sna tshogs pa thogs pa/ 'khor rab tu mang po dang/ 'jigs pa'i gzugs sna tshogs dang/ 'jigs pa'i sgra sna tshogs sgrogs pa/ gzugs dang nga ro dang/ dri dang kha rlangs kyis thams cad skyi bung zhes byed pa/rab tu 'jigs pa'i rlung nag dang/ grang ba dang/ tsha ba'i dbugs kyis phyogs bcu kun tu khams 'khrugs par byed pa/ nad bzhi brgya rtsa bzhi 'debs par byed pa/myos shing nyams par byed pa'i mthus/ klu'i ris dang/ lha ma yin gyi ris dang/ lha'i ris dang/ tshangs pa'i ris dang/ 'od gsal dang/ dge rgyas dang/ 'bras bu che ba man chad dbang du bsdus so// de sngon bsten pa'i stobs kyis thams cad mkhyen pas gzigs nas thugs rjes 'dul bar gyur to// de nas de bzhin gshegs pa che ba'i rdo rje bkod pa'i sgyu 'phrul drwa bas/ 'jig rten drug gi phyogs bcu srid pa gsum gyi bdag po 'dul ba'i nga rgyal chen po'i gzi brjid ston pa'i phyir/de bzhin gshegs pa thams cad kyi sku gsung thugs rdo rje'i bdag po/ bcom ldan 'das dgyes pa chen pos khro bo'i rgyal po'i dkyil 'khor gyi sprin chen po rnam par 'phro ba'i/sgyu 'phrul dra ba'i rgyal po'i ting nge 'dzin la snyoms par zhugs te/ de bzhin nyid kyi dbyings nas/ khro mo dbang phyug chen mo mngon du phyung ste/ hi hi zhes dgyes pa'i gzi mdangs kyis/rin chen pad+ma rgyas par mdzad nas/ gnyis su med par 'khril ba'i dgyes pas thim nas/ byang chub sems kyi sprin las/ hUM hUM hUM bi shwa badzra kro d+ha dz+wa la man+Dal phaT phaT phaT ha la ha la ha la hUM/zhes brjod pas/ 'jig rten drug gi phyogs bcu mtha' yas pa khyab par khro bo'i dkyil 'khor gyi tshogs stong gsum gyi 'jig rten tsam/ phyogs bcu'i rdul phra mo snyad 'thon par gyur nas/ 'jig rten drug gi phyogs bcu thams cad g.yos/rab tu g.yos/ kun du g.yos so// 'ur 'ur/ rab tu 'ur 'ur/ kun du 'ur 'ur ro// chem chem/ rab tu chem chem/ kun tu chem chem mo// shig shig/ rab tu shig shig/kun du shig shig go/ gtor gtor/ rab tu gtor gtor/ kun du gtor gtor ro// 'jig rten drug gi phyogs bcu'i stong khams thams cad na gnas pa'i dbang che ba dang/ gzi brjid che ba dang/ mthu che ba'i dbang phyug chen po la sogs pa thams cad brgyal/rab tu brgyal/ kun du brgyal bar gyur to// de nas bcom ldan 'das dgyes pa chen po nyid/ 'jigs byed chen po shin tu rngam pa skyi bung zhes byed pa'i 'bar ba chen po'i khrag 'thung sku smug nag cir yang 'gyur ba dbu dang phyag dang zhabs stong khams kyi rdul snyed mtshon cha sna tshogs 'dzin pa de dbu gsum phyag drug zhabs bzhir gyur te/dur khrod chen por dgyes nas khrag gi rgya mtsho'i dkyil na/keng rus chen po'i ri rab kyi steng 'bar ba chen po'i klong gi 'khor lo'i dkyil na dbang phyug chen po dang/ dur khrod kyi bdag po dregs pa chen po khyo shug gi gdan la brkyangs bskums su bzhugs so// khro bo'i dkyil 'khor gyi sprun phung de dag kyang/ la la ni dpal khrag 'thung chen por gyur te shar phyogs su bzhugs so// la la ni dpal khrag 'thung chen po rin po cher gyur te lho phyogs su bzhugs so// la la ni dpal khrag 'thung chen po pad+mar gyur te nub phyogs su bzhugs so// la la ni dpal khrag 'thung chen po kun du las su gyur te byang phyogs su bzhugs so// de dag kun kyang 'jigs byed chen po'i cha lugs dang/rngam pa'i nga ro dang/ 'bar ba'i klong na/ dbu gsum phyag drug zhabs bzhis/ dri za dang/ gnod sbyin dang/ srin po dang/ gshin rje la sogs pa khyo shug gis gdan byas pa la brkyangs bskums su bzhugs so/btsun mo khrag 'thung chen mo'i tshogs rnams kyang so so'i sku la 'khrul ba'i tshul gyis bzhugs so// rigs lnga'i rigs lnga'i zhes pa nas ngo mtshar te zhes pa'i bar 'di/rgya 'grel bar bkab/ rong zom/ sman lung pa/ g.yung ston pa'i 'grel pa bzhir mi gsal zhing/ rgya dper yang mthong ba ma byung mod/ sgrol TIka tu snang ba'i rgya dpe mi mthun pa gcig gnyis shig byung ngam snyam/rgya dpe gcig na/ de nas dbang phyug chen po brtse ba can dregs pa chen po zhes bsnon ma yang 'dug go/ he ru ka gcig tu bstim te bsdus nas/ gcig gis mang po 'dul ba'i ngo mtshar te/de nas dregs pa chen po la sogs pa gtum pa'i sems kyis gdug pa'i rdzu 'phrul chen po sna tshogs bstan nas/ mgrin gcig tu gdug pa'i nga ros/ brlang po'i gtum tshig tu smras pa/ thong thong snying rje'i bdag po ci de ltar byed dam zhes 'dzer zhing/shin tu gdug pa'i sems kyis khros nas rngam mo// de nas bcom ldan 'das dgyes pa chen po dbu dgu phyag bco brgyad zhabs brgyad du gnas nas/ rngam pa'i skad kyis thugs rjes 'dul ba'i thabs kyis shin tu khros nas/hUM hUM hUM/ ha ha ha/ khA hi khA hi khA hi/ zhes brjod nas/ dbang phyug chen po la sogs pa/ gdug pa chen po'i tshogs de dag gi snying dang dbang po kun phyung/nang khrol kun drangs/ yan lag kun bcad gtubs nas sha kun zos/ khrag kun 'thungs/ rus pa kun 'chos so// de nas hUM hUM hUM b+h+yo e A ra li dzaHdzaHzhes brjod pas/ phyogs bcu'i 'jig rten gyi khams nam mkha' dang bcas pa yungs 'bru gcig tsam du chud par bsdus so// de nas 'byung po ma lus pa'i rgyal po'i yang rgyal po dregs pa chen po la sogs pa'i chung ma 'byung po thams cad kyi rje mo'i yang rje mo/srin mo chen mo m-i srin mo dang/ tshangs ma dang/ 'khrug mo dang/ dbang mo dang/ 'jug sred mo dang/ gzhon nu mo dang/ dmar mo dang/ bdud rtsi mo dang/ zhi ba mo dang/ be con mo dang/ srin mo dang/ za ba mo dang/dga' ba mo dang/ ra ro khrag 'thung myos ma dang/ gcig pur spyod ma dang/ yid 'phrog ma dang/ grub mo dang/ rlung mo dang/ gsod byed mo dang/ me mo dang// phag mo dang/ rgan byed mo dang/ sna chen mo dang/ chu lha mo dang/ nag mo chen mo dang/ ra mgo dmar ser chen mo dang/ bum rna sngo nag chen mo dang/ gsus 'dzin ser nag chen mo la sogs pa/ bran dang yang bran dang/ g.yog dang yang g.yog 'khor zhing gi rdul snyed kyang bsdus so// de nas bcom ldan 'das dgyes pa chen po dpal khrag 'thung chen pos 'dul ba'i thabs kyis/ yang rigs lnga'i 'jigs byed chen po snang bar byas nas/ de dag kun kyang dgyes pas rol pa'i dkyil 'khor gyi sprin 'byung ba zhes bya ba'i ting nge 'dzin la snyoms par zhugs te sku dang gsung dang thugs rdo rje las 'di byung ngo// oM AHhUM badzra pra be sha a la la hoHzhes brjod pas/ 'byung mo'i rgyal mo rnams shin tu chags pa'i yid g.yos nas/ pad+ma'i dkyil 'khor sdud cing rgyas par gyur nas/ dper na khab len la lcags 'du ba'i tshul du/ bcom ldan 'das dgyes pa chen po dpal khrag 'thung chen po rdo rje'i sku la/sring mo chen mo mi'i srin mo dang/ dmar mo dang/ dga' ba mo dang/ gsod byed mo dang/ nag mo chen mo dang/ dmar ser chen mo dang/ sngo nag chen mo dang/ ser nag chen mo rnams 'khril lo// bcom ldan 'das dpal khrag 'thung chen po de bzhin gshegs pa'i sku la/ tshangs ma dang/ 'khrug mo dang/ dbang mo dang/ 'jug sred mo dang/ gzhon nu mo rnams 'khril lo// bcom ldan 'das dpal khrag 'thung chen po rin po che'i sku la/ bdud rtsi mo dang/ zhi ba mo dang/ be con mo dang/ za ba mo dang/ srin mo rnams 'khril lo// bcom ldan 'das dpal khrag 'thung chen po pad+ma'i sku la/khrag gis myos ma dang/ gcig pur spyod ma dang/ yid 'phrog ma dang/ grub mo dang/ rlung mo rnams 'khril lo// bcom ldan 'das dpal khrag 'thung chen po kun du las kyi sku la/ me mo dang/phag mo dang/ rgan byed mo dang/ sna chen mo dang/ chu lha mo rnams 'khril lo// de nas bcom ldan 'das dgyes pa chen po'i khro bo'i dkyil 'khor de dag gis/ hUM zhes brjod pas/ pad+ma'i dkyil 'khor gyi tshogs bsdus nas shin tu bcum par gyur tau// de nas dgyais te ha zhes brjod pas/ byang chub sems kyi sprin las/ dkar mo'i tshogs dang/ rkun mo'i tshogs dang/ rmongs mo'i tshogs dang/ thal byed mo'i tshogs dang/ spos mo'i tshogs dang/ gtum mo'i tshogs dang/ sme sha can gyi tshogs dang/ ma tshogs me'i tshogs rnams rang rang gi lag cha dang/ ngo mtshar dang bcas nas 'thon to// 'thon nas kyang 'bar ba chen po 'khor lo'i mchan shar phyogs nas 'khor bar 'jigs pa'i gzugs rang gi lag cha dang bcas nas 'khod de/de nas shin tu dgyes nas he zhes brjod pas/ seng gdong chen mo'i tshogs dang/ stag gdong chen mo'i tshogs dang/wa gdong chen mo'i tshogs dang/ khyi gdong chen mo'i tshogs dang/ bzhad gdong chen mo'i tshogs dang/ kang ka'i gdong chen mo'i tshogs dang/ khwa gdong chen mo'i tshogs dang/ 'ug pa'i gdong chen mo'i tshogs dang bcas pa rnams/rang rang gi lag cha dang ngo mtshar dang bcas nas 'thon par gyur to// 'thon nas kyang 'bar ba chen po'i 'khor lo'i phyi rol shar phyogs nas 'khor bar rngam pa'i mdangs kyis 'khod do// de nas shin tu dgyes pas phyogs bcu'i zhing ma lus par khyab nas phaT ces brjod pas/ rdo rje sring 'gro ma'i tshogs dang/ rdo rje gdong mo'i tshogs dang/ rdo rje 'jig rten ma'i tshogs dang/ rdo rje ro langs ma'i tshogs rnams rang rang gi lag cha dang/ngo mtshar du ma bcas nas 'thon par gyur to// 'thon nas kyang 'bar ba'i dkyil 'khor gyi sgor shin tu rngam pa'i gzugs kyis gnas so// de nas dgyes pa chen po'i sprin las phyogs bcu nas phaT ces bsgrags pas/ thams cad khros nas ma mo thams cad kyang rang rang gi gnas ga la ba der yud tsam gyis phyin par bkye'o// de nas bcom ldan 'das dgyes pa chen po dpal khrag 'thung chen po de dag kun thugs rje chen po bdud rtsi 'byung ba zhes bya ba'i ting nge 'dzin la snyoms par zhugs nas/sku dang gsung dang thugs rdo rje las 'di dag phyung ngo// oM badzra ma hA a mr-i ta ma hA kro d+ha aM aM aM zhes brjod pas/ dbang phyug chen po la sogs pa thams cad/ bcom ldan 'das khro bo chen po de dag gis bsnams nas bton te/ mi gtsang ba'i 'dam gyi rgya mtshor chud pa las bsnams nas u tsuSh+ma kro d+ha phyung nas 'dam kun 'thungs te dran pa slar rnyed nas/khro bo'i dkyil 'khor gyi tshogs de dag thams cad kyang dbu dgu brgya phyag stong brgyad brgya/ zhabs brgyad brgya/sku 'bar ba chen po'i dkyil 'khor na bzhugs par mthong ngo// de'i dus su 'jig rten drug gi phyogs bcu'i srid pa kun du dregs pa'i dbang phyug thams cad 'dul ba'i thabs sna tshogs bsam gyis mi khyab par so sor snang bas dus gcig tu btul lo// de nas de dag shin tu 'dar zhing bred pa rab tu zhum pa'i nga ros/ 'bangs su mchi/ 'bangs su mchi/ 'bangs su nan tan ma bgyis na// mgo dang lus ni brgyar 'gas shing// snying yang 'gas shing gtubs gyur cig/ rul myags tshig nas brlag pa dang/ dmyal bar lhung nas 'bod par shog/ ces 'bangs su mchi par mna' bor nas// dkyil 'khor gyis gdan du bzhag go/thams cad kyis mgrin gcig tu yang smras pa/ bdag cag rnams kyi mchis brang dang// ma dang bu mo sring mo rnams// dkyil 'khor chen por bzhes su gsol// dpa' bo lha rje bzhes su gsol// bdag cag so so 'khor bcas kyi// tshogs kyi dkyil 'khor chen po 'di'i// ming tsam 'dzin par byed pa yang// gtsug gi nor bu 'bar ba ltar// g.yo sgyu med cing gus ldan pa'i// sems kyis blangs nas spyi bo yi// gtsug tu bzhag ste bkur bar bgyi// de yi dgos pa ci yang rung// ma lus rdzogs par bdag cag bsgrub// gal te dpa' bo'i spyan snga 'dir// smras pa bzhin du ma bsgrubs na// bdag cag rnams kyi mgo lus snying// bkas gtubs dum bur rul bar mchi'o// zhes smras so// de nas de dag gi chung ma'i tshogs dang/ ma dang sring mo dang bu mo'i tshogs thams cad dkyil 'khor du yud tsam gyis 'ongs nas/thams cad kyis mgrin gcig tu smras pa/ bdag cag 'khor tshogs thams cad kun// dpa' bo chen po'i 'bangs su mchi// dpa' bo chen pos bdag cag la// las kyi dngos grub rtsal du gsol// zhes smras so// de nas bcom ldan 'das dgyes pa chen pos lag tu rdo rje byin nas ming gi dbang bskur te dkyil 'khor gyi phyi rol du bkod do// gsang ba'i snying po de kho na nyid nges pa las khro bo rang bzhin gyi dkyil 'khor gyi sprin rnam par spros pa'i le'u ste bco lnga pa'o//// de nas bcom ldan 'das dgyes pa chen pos dkyil 'khor gyi tshogs chen po 'di dag dam tshig gis grub par bya ba'i phyir// de bzhin gshegs pa khro bo khrag 'thung chen po btsun mo dang bcas pa'i tshogs de dag gi sku dang gsung dang thugs rdo rje ye shes rngam pa las gsung gi dkyil 'khor 'di dag phyung ngo// oM sarba ta thA ga ta ma hA shrI he ru ka/ma hA tsaN+Da sarba duSh+tAn+ta ka ha na da ha pa tsa hUM hUM hUM phaT/ oM badzra ma hA shrI he ru ka ma hA tsaN+Da sarba duSh+tAn+ta ka ha na da ha pa tsa hUM hUM hUM phaT/ oM rat+na ma hA shrI he ru ka ma hA tsaN+Da sarba duSh+tAn+ta ka ha na da ha pa tsa hUM hUM hUM phaT/oM pad+ma ma hA shrI he ru ka ma hA tsaN+Da sarba duSh+tAn+ta ka ha na da ha tsa hUM hUM hUM phaT/ o+oM karma ma hA shrI he ru ka ma hA tsaN+Da sarba duSh+tAn+ta ka ha na da ha pa tsa hUM hUM hUM phaT/ oM sarba ta thA ga ta ma hA kro d+hi shwa rI sarba duSh+tAn hUM phaT// oM ma hA badzra d+ha ra ma hA kro d+hI shwa rI dzra la nI hUM phaT/ oM ma hA sUr+ya rat+na ma hA kro d+hI shwa rI bi da ma hUM phaT/ oM hrI shrut+ta sa man+ta pad+ma ma hA kro d+hi shwa rI khA hi hUM phaT/ oM sarba a mo g+ha ma hA kro d+hi shwa rI bi shwa hUM phaT/oM badzra kau rI ha/ badzra tsau rI ha/ badzra pra mo he ha/ 'di saM skr-i ta dang bstun na cung zad the tshom du snang yang rgyud las saM skr-i ta kho na'i nges pa med pas rong zom gyi gsungs bzhin bcos nas rgod mar bsgyur ba'o// badzra bet+ta lI ha1/ badzra tsaN+Da4lI ha// badzra buk+ka sI2ha/ badzra g+hasma rI ha/ badzra sma sha nI3ha/ badzra5sid+ha mu khI he/ badzra byA g+h+ri mu khI he/ badzra sr-ing+gA la mu khI he/ badzra shwa nA mu khI he/ badzra gr-i D+ha mu khI he/ badzra kang+ga mu khI he/badzra kA ka mu khA he/ badzra u lU ka mu khI he/ oM badzra Ar+ya te dza te da dzaH oM badzra a mu khA hUM/ oM badzra lo ka baM/ oM badzra b+hasmi ba la ya ba du to hoH b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo b+h+yo b+h+yo/ b+h+yo b+h+yo b+h+yo b+h+yo/ oM ru lu ru lu hUM/ e h+ye hi A na ya/ dzaHhUM baM hoHraM/ oM badzra kro d+ha sa ma ya hUM/ oM khro la khros pas zhi mdzad pa// thugs rje khro dbal rngam pa'i tshogs// 'bar ba'i byin rlabs rmad po che// de nyid du ni bdag la stsol// oM badzra kro d+ha sa ma ya s+t+waM/ oM badzra kro d+ha sa ma ya phaT/ oM badzra kro d+ha sa ma ya hoH/ a li u li hA li ta pA li/ daMSh+tA go nA rau dri/ kha raM yo gi nI khA hi hoH/ glu 'di zur chag gi skad yin par rong zom chos bzang bzhed ces lo chen bsod nams rgya mtshos gsung/hU+i ha he phaT/ ces brjod pas/ 'jig rten drug gi phyogs bcu thams cad tshig/ rab tu tshig/ kun du tshig go/'bar/ rab tu 'bar/ kun tu 'bar ro// thams cad du 'bar ba'i dkyil 'khor gyi tshogs kyis gang rab tu gang/ kun du gang bar gyur tau// gsang ba'i snying po de kho na nyid nges pa las khro bo'i tshogs chen po'i gsung gi dkyil 'khor spros pa'i le'u ste bcu drug pa'o//// de nas bcom ldan 'das dgyes pa chen pos/ de dag gi dkyil 'khor bstan pa'i phyir ched du brjod pa 'di brjod do// 'bar ba'i 'khor lo rtsibs bzhi pa// gru chad bzhis ni rnam par brgyan// gru bzhi sgo khyud bzhi dang ldan// 'bar ba'i bar khyams gnyis kyis mdzes// thod sbrul sna tshogs nyi mas brjid// 'bar ba'i 'phrau ba mang po 'khrug/khyu mchog ma he gzig dang stag/ gtum pa dom gyi sbar bas ni// dbang phyug lha chen la sogs bzung// smug nag sngo nag ser nag dang// dmar nag ljang nag 'jigs pa'i sku// dbu gsum phyag drug zhabs bzhi bgrad// ko rlon gos ni sna tshogs gyon// rngam pa'i sgra chen 'jigs par sgrogs// sbrul dang thod phreng nyi zla'i chas// stong gi 'jig rten khor yug bcas// rdo rje dung chen gang ba dang/ ral gri dgra sta gshol la sogs// rang gi lag cha sna tshogs te// btsun mo 'jigs pa'i tshogs dang 'khril// gnas dang yul gyi phyag rgya dang/ sgo bzhi'i phyag rgyas rab mdzes shing// slas dang byi mo bran mo'i tshogs// bcu gnyis dang ni brgyad kyis mdzes// rang gi stan dang lag cha dang// ci bgyi zhes ni chas te gnas// zhes brjod pas/ 'jig rten drug gi phyogs bcu thams cad du 'bar ba'i dkyil 'khor kun tu gsal bar gyur to// gsang ba'i snying po de kho na nyid nges pa las khro bo'i dkyil 'khor bstan pa'i le'u ste bcu bdun pa'o//// de nas bcom ldan 'das dgyes pa chen po'i mnyes pa'i mchod pa chen po 'di ched du brjod do// de la mchod sbyin dam pa ni// thog mar bdag nyid rtogs goms bsgral// de nas gnyis med blo yis ni// blo ngan 'jig rten snying re rje// gnyis su med par bsgral bar bya'o// 'khril pa'i mchod chen mnyam sbyor bas// bdag nyid mnyes pas mnyes par bya// mnyam pa'i grub rdzas chen po dag/ bdag dang mnyam pa'i tshogs la dbul// bza' dang bca' dang btung dang bgo/ longs spyod lnga ldan thams cad ni// dkyil 'khor la ni dkyil 'khor thim// phyogs bcu dus bzhir gshegs pa yi// bde gshegs yon tan rmad po che// gzhan nas yod 'ongs ma yin na// lha srin la sogs smos ci dgos// rnal 'byor las su rung rnams kyis// phyag rgya chen po rdzogs 'gyur zhing// gsal la yid gnyis med pa na// dkyil 'khor chen po 'bar bar 'gyur// zhes brjod pas/ mnyes pa'i mchod pa chen pos 'jig rten drug gi phyogs bcu thams cad khyab par gyur tau// gsang ba'i snying po de kho na nyid nges pa las mchod sbyin dam pa bstan pa'i le'u ste bco brgyad pa'o//// de nas bcom ldan 'das dgyes pa chen pos sngags 'chang rnams don yod par bya ba'i phyir dam tshig chen po 'di ched du brjod do// bla med theg par rab nges na// nyon mongs las rnams kun spyod kyang// byas la mi sogs tshogs 'gyur te// tshul khrims sdom pa phun sum tshogs// bla med mchog gi dam tshig tu// 'dul ba'i dbang gis tshul khrims dang// ji snyed sdom pa bsam yas pa// ma lus kun 'das rnam par dag/ yod med dbu ma mi dmigs shing// sgyu ma mig yor lta bu'i tshul// srog med srog kyang gcad du med// srog dang skyes bu log rtog tsam// bden pa gnyis ka dbyer med pas// 'phrul dga'i tshul te tha dad min// gzhan dang ma byin med pa'i phyir// blangs med thams cad nyid kyi dbyings// chos rnams sgyu ma lta bu la// ming dang tshig tu btags pa rdzun// rdzun nyid la ni brdzun spyod pa// rdzun zhes btags tsam yod ma yin// ma chags pa la chags pa dang// chags pa nyid na chags pa med// de ni tshangs mchog rgyal po ste// shin tu chags pa chen po yin// bla med mi spang bla ma bkur// sngags dang phyag rgya rgyun mi gcad// yang dag lam du zhugs la byams// gsang ba'i don phyir smra mi bya// 'di ni rtsa ba lnga rnams te// bsgrub dang bsrung ba'i dam tshig mchog/ gti mug chags dang zhe sdang dang// nga rgyal phrag dog mi spong ngo// dkar rtsi dmar rtsi dri sha chen// dag pa'i snod chu mi dor ro// yan lag bcu yi dam tshig ste// ye nas dag mnyam rtogs par spyad// bsrung zhing bsgrub pa'i dam tshig la// rtsa ba yin te rigs med 'gyur// mi spang mi dor lnga gnyis ni// yan lag dam tshig 'da' dka' 'o// mnyam la mnyam par sbyor ba yi// mnyam pa'i dam tshig la gnas na// mnyam rdzogs chen po thob 'gyur bas// 'das na sangs rgyas ma yin no// rtsa ba nyams pa'i 'chal pa dag/gos la nye bar mi brtson dang// skad cig yud tsam smra mi byed// nyams gyur nyes pa brjod mi lang// rtsa ba'i dam tshig nyams gyur na// bsgrub pa thams cad log par 'gyur// yid du mi 'ong sna tshogs pa'i// 'bras bu mi 'dod bzhin du 'du// yan lag dam tshig nyams gyur na// 'bras bu med cing ngan song ltung// dam tshig rnams ni rdo rje che// sangs rgyas kun gyi bdag nyid yin// rtsa ba'i dam tshig lnga la ni// gcig la'ang gnyis dang bcu phrag gsum// yan lag dam tshig lnga gnyis la// gcig la'ang bcu phrag gnyis su dbye// dam tshig 'di ni rmad po che// 'jig rten drug gi phyogs bcu na// srid gsum 'gro ba ji snyed pa// rtog 'dul dam tshig de snyed spros// gzhan yang rgyal mchog kun bzang gi/ thams cad ma lus phyag rgya yis// sgrub med mchog dam ma lus 'grub// de la sogs pa mtha' yas mchog/rgyal pa'i rigs mchog 'dzin pa de// 'jig rten gtso dang 'khor gyis bkur// dam pa'i mchog dang dam pa yis// sras dang spun dgongs byin gyis rlob// bde gshegs nyid kyi yul la zhugs// 'jigs med kun tu bzang por sbyor// ji bzhin nyid dang 'dul ba'i thabs// ji snyed sdom pa bsam yas 'dus// ma lus rnams dang lhun gyis grub// nyams na bskangs pas rdzogs pa dang// de la sogs pa mtha' yas mchog/ces brjod pas// de bzhin gshegs pa nyid de bzhin gshegs pa nyid la 'dus par gyur to// gsang ba'i snying po de kho na nyid nges pa las dam tshig gi le'u ste bcu dgu pa'o//// de nas de bzhin gshegs pa bcom ldan 'das dgyes pa chen po lhun gyis grub pa'i dam tshig byin gyis rlob pa zhes bya ba'i ting nge 'dzin la snyoms par zhugs nas ched du brjod pa 'di brjod do// e yi tshogs kyi dkyil 'khor mchog/ 'bar ba gtum chen rngam pa la// khros pa'i yid kyis mchod sbyin bya// sangs rgyas bsod nams sku yang 'jig/ bdud rtsi lnga'am zas lnga la// mtshan ma ming du bcas par bya// bkug nas rdo rje phur bus gdab// rdul du byas la tshogs la dbul// e yi tshogs kyi dkyil 'khor mchog/ lu gu rgyud du sbrel bsdams nas// bcings gyur bskyod nas phyogs bcur g.yos// myos nas gas te 'tshig par 'gyur// baM gyi tshogs kyi dkyil 'khor mchog/ 'bar ba gzi brjid lhun chen la// chags pa'i yid kyis mchod sbyin bya// rdo rje gsung yang dbang du 'gyur// bdud rtsi lnga'am zas lnga la// mtshan ma ming du bcas par bya// rdo rje chags pa'i phur pas gdab// chags pa'i tshogs la thim par dbul// baM gyi tshogs kyi dkyil 'khor du// lu gu rgyud du sbrel nas bsdams// 'gugs 'gyur rdo rje'ang phyi bzhin 'brangs// ci 'dod de bzhin 'ong bar 'gyur// ma yi tshogs kyi dkyil 'khor mchog/ 'bar ba 'du 'phro gzi chen la// dga' ba'i yid kyis mchod sbyin bya// yon tan nam mkha'i mtha' dang mnyam// bdud rtsi lnga'am zas lnga la// mtshan ma ming dang bcas pa bya// yon tan yid bzhin gter du brtags// nga rgyal dga' 'phro'i phur pa gdab// rdo rje'i gzi chen 'phel bar dbul// ma yi tshogs kyi dkyil 'khor du// lu gu rgyud du sbrel bsdams bskyod// gzi brjid 'bar ba'i 'phrul chen spro// yid bzhin nam mkha' gang bar 'gyur// ya yi tshogs kyi dkyil 'khor mchog/ gsal ba'i gzi brjid 'tsher ba la// dang ba'i yid kyis mchod sbyin bya// gtum chen rngam pa'ang lhan ner 'gyur// bdud rtsi lnga'am zas lnga la// gtum rngam 'khrug pa'i ngo bor brtag/ lhan ner gsal ba'i phur bus gdab// 'bar ba lhan ne'i tshogs la dbul// ya yi tshogs kyi dkyil 'khor du// lu gu rgyud du sbrel bsdams nas// 'bar ba lhan ne'i byin gyis khyab/ thams cad g.yo ba med par byed// slas dang byi mo bran mo'i tshogs// lhag ma'i mchod sbyin 'dod pa sbyin// rang gi dam tshig rab bsgrags nas/ gang 'dod las de byed par bsgo// sngon tshe dpal chen he ru ka/ shin tu gdug cing gtum bag can// thams cad ma lus 'dul mdzad pa'i// dbang dang byin rlabs rmad po che// lha chen la sogs dbang du bsdus// 'khor rnams dbang phyug slas su byas// so so'i las rnams bskos pa de// ji ltar dam bcas khas blangs pa'i// ma thogs myur du mngon par phyung// dam bcas bzhin du ma byas na// ji ltar dam bcas mna' bor ba'i// sdom bcas de las 'da' bar 'gyur// dam tshig de las 'das gyur na// mgo lus snying yang tshal pa bdun// yak+Sha khro bos gtubs par 'gyur// de bas rnal 'byor sngags 'chang gis// ji ltar bcol ba bzhin du byos// las de mngon du ma byas na// rang gis mna' bor khas blangs bzhin// rul myags tshigs nas dmyal bar 'gro// rnal 'byor dam la gnas gyur pa'i// las rnams yongs su bya ba dang/ 'khor rnams bu gcig bzhin du skyong// phra men ma yang dngos grub 'thob// bcol ba'i las rnams mngon du byos// zhes bsgo'o/ khro bo sgrub pa'i las kyi gtso bo ni 'di yin no/ khrag 'thung chen po la sogs pa'i// bro gar glu tshig chen pos ni// thams cad thams cad ci 'dod pa// thams cad thams cad byed pa yin// mdzod ldan chen mo la sogs pa'i// bro gar glu tshig chen mos ni// 'du bar 'dod na 'du bar byed// 'phel bar 'dod na 'phel bar byed// spos mo chen mo la sogs pa'i// bro gar glu tshig chen mos ni// lhan ner 'dod na lhan ner byed// rmugs par 'dod na rmugs par byed// seng gdong chen mo la sogs pa'i// bro gar glu tshig chen mos ni// thams cad kun la za bar byed// rdul cha tsam yang med par byed// bzhad gdod chen mo la sogs pa'i// bro gar glu tshig chen mos ni// thams cad ma lus 'byin par byed// kun la rab tu nyams par byed// slas dang byi mo bran mo'i tshogs// bro gar glu tshig chen mos ni// rbad cing gtang bar bya ba ste// thams cad thams cad byed pa yin// ljon pa dang ni lcug phran tshal// sdong gcig dang ni me reg drung// dang bas dga' ba chags pa dang/ khros pas kA li rab tu bya// zhes brjod pas// de bzhin gshegs pa nyid la de bzhin gshegs pa nyid sbyong bar gyur to// gsang ba'i snying po de kho na nyid nges pa las lhun gyis grub pa'i 'phrin las byin gyis rlob pa zhes bya ba'i le'u ste nyi shu pa'o//// de nas bcom ldan 'das dgyes pa chen po'i tshogs kyi dkyil 'khor gyis shin tu rngam pa'i mdangs kyis glu 'di blangs so// hUM gtum chen dus mtha'i me chen 'bar// 'od zer nyi ma 'bum gyi gzi// khro gnyer glog stong 'gyu ba bzhin// mche ba zangs yag za byed che hoH// hUM rngam pa'i nga ro 'brug stong ldir// gtum chen ri rab 'bum bsnyil skad// a la ha la'i gad rgyangs che// skyugs pa'i 'thor rlung g.yeng ba che hoH// hUM khro bo'i shes rab 'od po che// ye shes dkyil 'khor kun tu gsal// 'bar ba'i ye shes kun tu 'joms// sna tshogs ye shes thig le che hoH// hUM khro bo rgyal po sprin chen po// 'phros pa'i dkyil 'khor char chen 'debs// dkyil 'khor yid bzhin 'byung ba'i gter// sna tshogs khros pa'i thig le che hoH// hUM bdud kun gyi ni bdag chen po// bdud kyi bdud de bdud rnams 'joms// 'jigs pa'i tshogs kyang 'jigs byed pa// 'jigs byed chen po thig le che hoH// hUM rdo rje brag chen sra ba po// rdo rje chu bo sdud chen po// rdo rje me ste kun 'bar che// rdo rje rlung ste 'thor rlung che hoH// zhes ched du glu blangs so// gsang ba'i snying po de kho na nyid nges pa las khro bo la bstod pa'i le'u ste nyi shu gcig pa'o//// de nas bcom ldan 'das dgyes pa chen pos de bzhin gshegs pa nyid la gsang sngags kyi rgyal po brtan par gzung ba 'di ched du brjod do// kye kye phyogs bcu dus bzhi'i rang bzhin 'di// de bzhin gshegs pa'i ngo bo nyid// gzung 'dzin spros la 'chel pa yis// rnam rtog zhags pas so sor 'dzin// sa rnams khyad par bkod pa yang// gsang ba'i snying por 'gro ba'i lam// ye shes ngo mtshar rab 'byams kyis// don du mi 'gyur yongs ma gsungs// de bzhin gshegs pa thams cad kyi// phyag rgya gsang chen snying po 'di// rtogs nas smra bar gang byed pa// de nyid nga yin dbang yang rdzogs// de bzhin gshegs pa thams cad la// gsang ba 'di las gzhan mi mnga'// sgro dang skur pa zhi ba yi// gsang ba'i snying po de kho na// nyid de nges pa'i dbyings nas phyung// de ni nges par lung bstan te// sras ni thugs las skyes pa yin// sa rab rigs pa 'dzin la gnas// zhes brjod pas/ de bzhin gshegs pa thams cad dbyer med par dgyes nas dus bzhi mnyam pa nyid kyi dbyings/sku gsung thugs lhun stug po bkod pa'i rgyan nyid du bzhugs so// 'phags pa rtog pa'i rgyal po sgyu 'phrul dra ba le'u stong phrag brgya pa las mtshan nyid dang rgyud thams cad kyi lung gi spyi de bzhin gshegs pa thams cad kyi gsang ba gsang ba'i snying po de kho nyid nges pa las thams cad ma lus par 'phros te 'khor lo bskor ba de dag gi 'bras bu'i mchog g.yung TI ka na rdzogs so zhes pa re zhig rong zom zin pa la dgongs pa 'dra'o// gsang ba'i snying po de kho na nyid nges pa las mnyes pa dang yongs su gzung ba'i le'u ste nyi shu gnyis pa'o//// ! na maH shrI gu ra be rat+na trA yA ya// bsil ldan 'di na sde snod 'dzin rnams kyi// nang na rgyu skar rgyal po gang ba ltar// kun nas thal le rab tu gsal ba yi// mkhas chen bcom ldan ral gri rgyal gyur cig/spyan sngar zhu ba/ dpal gsang ba snying po'i rgyud kyi rgya dpe bris la bskur gsungs pa la/ dpe de ta la'i lo ma la yi ge wa rtu la shin tu legs pa bris pa/ snga dus su byon pas/ yi ge la la zubs/le'u dgu pa'i stod nas ta la'i byang bu gcig kyang chad/ mjug kyang ma rdzogs pa zhig gda'// 'on kyang le'u nyi shus rdzogs nas ma 'gyur pa le'u gnyis rdzogs su nye ba zhig gda'/ des kyang ji tsam rdzogs ma 'tshal/gnyis po 'di la 'bru thug bgyis na cung zad go'am snyam par gda' ste ma bgyis/ 'ga' zhig la cung zad bgyis pa 'di dag la yang nor ba mchis pas de rnams legs par 'chos pa dang/ 'di gnyis legs par bsgyur ba yang zhu/ gzhan mtshams sbyor ma byas pa dang/ tshigs bcad la shad ma bris pa rnams rgya dpe la ji ltar 'dug pa bzhin bris pa legs so// dad zhus kyang bgyis so// rgyud kun snying po dpal ldan 'dus pa dang// dbyer med rgyud chen 'di lta bu dang gzhan// zab mo'i rgyud dang theg chen chos rnams dang// mjal nas tshul bzhin sgrub pa byed par shog/// sangs rgyas la phyag 'tshal lo// gnas gtsang steng gi 'og min nyams dga' bar// kun bzang rdo rje sems dpas gsungs pa'i bka'// rgyud rgyal gsang snying rgya dpe ma rnyed pas// bod kyis byas zhes gangs ri'i khrod 'dir grags// bcom ldan ral gri rgya dpe legs btsal nas// gzhung 'di 'dzin pa'i sngags 'chang rnams la bstan// paN chen bi shwa mi tra la sogs pa'i// gzhung gi sgrub byed gsang snying sgrub par ltos// sngon gyi lo paN mang gzigs blo gros can// rgya bod gnyis su mkhas la legs sbyangs pas// dpe 'di ma rnyed yid bzhin rin chen 'dra// rgyud 'dir 'jug pa'i mun sel nyi ma yin// sangs rgyas gsang ba nyi 'od seng ge yis// phyi ma'i rgyud dang mthun pa'i 'grel pa mdzad// 'di gnyis spangs nas rang gar 'chad pa rnams// shes rab 'chal pa nor ba'i 'phreng ba yin// rna ring 'chong drug spyad gzhung ma mthong bas// 'chong drug gzhung mtshams shes pa med ces grags// 'chong drug shes par 'dod pa'i blo gsal rnams// gzur gnas blo yis kho bo'i drung du byon// bcom ldan ral gris bkod/ chos kyi rgyal po bcom ldan ral gri'i phyag dpe la gtugs shing bris so//// mang+ga laM// ! gsang snying rgya dpe'i 'gyur byang bzhugs so// na mo gu ra we// phun sum tshogs dpal thugs kyi gsang ba'i mdzod// theg pa'i bcud 'dus man ngag snying po'i dbyings// ma nor gsal byed gzhan min de kho na// rang nyid ngo bos nges pa'i don la 'dud// rdo rje sems dpa' sgyu 'phrul dra ba rtsa ba'i rgyud dpal gsang ba'i snying po de kho na nyid nges pa 'di la/o rgyan gyi mkhan po pad+ma saM b+ha wa dang/ cog ro klu'i rgyal mtshan gyi 'gyur dang/ paN+Di ta bi shwa mi tra dang/ lots+tsha ba pa gor bai ro tsa na'i 'gyur dang/ paN+Di ta bi mA la mi tra dang/ lo ts+tsha ba rma rin chen mchog gi 'gyur yod ces grags na'ang/deng sang gi dpe rnams kyi mjug na lo paN 'di dang 'dis bsgyur ces pa'i mtshan bkod pa ni mi 'dug mod/ des na'ang rgyud kyi tshig don legs par khong du chud cing mkhas grub brnyes pa'i lo paN ches che ba zhig gis bsgyur bar kho rtogs so// 'dir rgya gar gyi dpe rnyed pa'i tshul ni/ mkhas pa'i dbang phyug dam pa bcom ldan ral gris/ nyi 'od seng ge'i rgya cher 'grel dang/bi shwa mi tra'i 'grel chen dang/ sangs rgyas gsang ba'i rnam dbye 'grel dang/ pad+ma'i rnam bshad 'grel dang/ sgeg pa rdo rje'i 'grel pa par khabs dang/ bi ma la'i 'grel chung pi na ta ra ta dang/ tiSh+ta ma ti'i ber ka 'grel dang/ gzhan yang rong zom chos kyi bzang po'i dkon cog 'grel rnams gzigs pa dang/ khyad par dpal gsang ba 'dus pa'i 'grel pa paN+Di ta bi shwa mi tras mdzad par/ rgyud 'di'i khungs mang du drangs pa gzigs pas/rtsad gcod pas rkyen byas nas kun la yang yang du glengs pas/ nam zhig bod yul dbus kyi sa cha bzang dang nye ba na/ mi mgar ba seng ge 'od kyi slob brgyud sngags pa'i dge ba'i bshes gnyen rta ston pa zhes grags pa zhig na re/gsang ba snying po'i rgya dpe bsam yas na bdag gi zhang po sngags pa zhig la 'dug ces glengs pa la/ de'i rgyu mtshan dris pas/ rtse lngar 'gro zer ba'i a tsa ra bod skad kyang cha tsam shes pa 'ga' zhig lha sa nas byung gda' ste/bsam yas su re zhig bsdad nas dbu rtse'i rgya dpe rnams la blta zhing 'dug pas/ bdag gi zhang pos ci 'dug ces dris pas/ rgya gar skad du/ gu h+ya gar+g+ha/ bod kyi skad du gsang ba snying po zhes bya bar 'gro'am zer bas/ gsang ba snying po'i rgya dpe yin nges snyam nas yi dam du bzung bdog ces zhus pas/ de ma thag par long zhig par bsgos shing/des kyang rings pa'i tshul gyis blangs te phul pas gzigs te mnyes shing/ rgya dpe ta la'i lo ma la yi ge wa rtu la shin tu legs par bris pa sngon rgyal po snga dar gyi dus su byon pas/ rnyings pas yig 'bru la la zubs shing/ le'u dgu pa'i stod nas ta la'i byang bu gcig chad pa/ mjug le'u nyi shu pa rdzogs su nye ba nas kyang ma tshang ba zhig 'dug pas/ ches cher mnyes pa chen po thob ste/ slar yang rgya dpe yar 'brog pa sha gang lots+tsha ba shes rab bzang po zhes grags pa/sngar gyi sbyangs pa'i sa bon sad pa/ tshe 'dir lots+tsha'i tshul 'bad pa chung ngus shes pa zhig byung ba de la sngon gyi rgya dpe 'di 'dug pas 'bru len gyi sa la bskur zhes bsgos shing/des kyang ji ltar gsungs pa bzhin bris/ 'gyur mchan ci rigs kyang btab/ phyi mo'i gnas la mi gsal ba rnams bu dper yang de ltar btab/ brda sprad cing grub pa dang/na maH shrI gu ra we rat+na tra yA ya/ bsil ldan 'di na sde snod 'dzin rnams kyi// nang na rgyu skar rgyal po gang ba ltar// kun nas thal le rab tu gsal ba yi// mkhas mchog bcom ldan ral gri rgyal gyur cig/spyan sngar zhu ba/ dpal gsang ba snying po'i rgya dpe 'dra len du gyis la bris la bskur gsungs pa la/ 'bru thug bgyis nas bris shing/ mtshams sbyor ma byas pa dang/ tshigs bcad la shad ma bris pa rnams rgya dpe na ji ltar 'dug pa bzhin bris pa lags shing/snga 'gyur dang 'bru thug bgyis na zubs pa rnams go'am snyam pa gda' ste ma bgyis/ dang zhus kyang dag par bgyis lags shing/ sgro skur bsal phyir kun la spel ba zhu/rgyud kun snying po dpal ldan 'dus pa dang/ dbyer med rgyud chen 'di lta bu dang gzhan/ zab mo'i chos dang theg chen chos rnams la// mjal nas bka' bzhin sgrub pa byed par shog/ces pa'i zhu yig dang rgya dpe bcom ldan pa'i phyag tu phul zhing/ bcom ldan pas gang gi tshe sngags pa'i dge ba'i bshes gnyen mang po shab jo mo lha khang du cher 'dus pa de'i tshe/ rgyud 'di'i rgya dpe bskur nas/'di rigs 'dzin chen po pad+ma saM b+ha wa'i phyag dper 'dug cing/ rgyud rnam dag yin pa'i rgyu mtshan dang bcas te bsnyad pas/ khong rnams na re bod na rgyud 'di la da lta rgya dpe yod dam med kyang rung gi kho bo cag rnams la ni sngar nas kyang som nyi med zer ro// de nas ring zhig lon pa'i tshe/ byang ri pa shes rab rgya mtshos rgya dpe de bcom ldan pa'i phyag nas zhus/ thar ba lots+tsha ba'i drung du phyin te/ sngon gyi dam pa rnams kyis bsgyur ba dang/rgya dpe'i nang na mang nyung la sogs pa'i dregs yod par 'dug pa dang/ 'chong drug gi the tshom bsal ba'i phyir khyed kyis kyang bsgyur bar zhu zhes bskul ba la brten nas/nyi 'od seng ge'i 'grel chen dang/ sangs rgyas gsang ba'i 'grel pa dang/ sgeg pa rdo rje'i 'grel pa dang/ snga 'gyur rnams dpang por byas nas/ snga 'gyur na med cing rgya dpe 'di na yod pa thams cad bsgyur/'dir byung 'thad cing snga 'gyur na yod pa'i tshig ci rigs rnams snga 'gyur bzhin bris/ snga 'gyur snga phyi nas ring po nas bsgyur te/ bsgyur ba rnams kho bos rgya dpe ltar bkod do// yang le'u gsum pa nas/bdag dang bdag gi gzhan rnams ni/ drug pa nas/ kun 'byung dkyil 'khor chen por spyod// ces dang/ bdun pa nas/ dper na de bzhin sbrid sangs bzhin// zhes dang/ dgu pa nas/ so so thig le de nyid la// zhes dang/ bcu bdun pa nas/ 'bar ba'i khro bo mang po 'khrug ces dang/ mtha' ma nas/ de bzhin gshegs thams cad dbyer med par dgyes nas zhes dang/ yang 'phags pa rtog pa'i rgyal po zhes pa nas/'bras bu'i mchog gi bar rgya dpe 'di na mi snang la/ le'u dgu pa'i 'go nas de nas slob ma gzhug par bya// zhes pa'i rgya dpe byang bu gcig chad pa'ang 'gyur rnying las bas bas pa yin no// yang rgya dpe 'di'i le'u bzhi par/rgya gar gyi yi ge lnga bcu dang/ de dag gi don bshad kyang tshang bar byung ba dang/ bco lnga par mjug bsdu pa'i tshigs su bcad pa lnga byung ba dang/ 'chong drug kyang rgya dpe 'di nas tshang bar byung zhing/rgya 'grel nyi 'od la sogs par ma byung bas/ rgya dpe la yang rgyas bsdus gnyis su yod par gsal zhing/ bod du dpe mkhyud byas zhes pa mi bden cing/ gzhung rgyas bsdus bstan pa yin no// de bas na gzu lums dang/ ral chod dang/ mun sprul la sogs pa 'khor ba'i rgyu rnams spangs nas bsam pa rnam par dag pas bsgyur ba yin te/ de bas mtho ba la phrag dog dang/ mnyam pa la 'gran sems dang/dman pa la brnyas pa la sogs pa'i blo spangs te/ kho bos 'gyur 'di la bltas na tshig don gyi cha 'ga' zhig la phan par 'gyur srid pas blo gsal zhing gzu bor gnas pa rnams kyis 'dri ba dang/ 'chang ba dang// bklag pa dang/ ston pa dang/ kun chub par mdzad pa zhu/ dpal gsang ba snying po'i de kho na nyid nges pa'i rgyud kyi rgyal po chen po 'di/ byang ri pa dge ba'i bshes gnyen shes rab rgya mtshos bskul ba'i ngor/mang du thos pa'i lots+tsha ba gnas brtan nyi ma rgyal mtshan dpal bzang pos thar pa'i gling du bsgyur te legs par gtan la phab pa'o//// gsang ba'i snying po de kho na nyid rnam par nges pa'i rgyud chen po/chen po'i chen po kun tu bzang po'i gsung mchog zab mo 'di// 'di nyid ston pa dgyes pas ched du brjod cing brjod pas gsungs// gsung bzhin gsung rab kun gyi mchog gyur 'di ni 'og min du// dang po bstan nas slar yang gsang 'dzin gsang ba'i bdag po'i mthus// in+d+ra b+hu ti ku ku rA dza 'byor pa'i dbang po mgo mas// pho brang dam pa o D+yan gnas su chos 'di'i dbu brnyes shing// ku ku rA dzas tan tra bco brgyad legs par bkrol nas ni// slar yang gangs ri'i khrod 'dir lha sras khri srong lde'u btsan dus// pad+ma dri med bshes gnyen la sogs dar bar mdzad// de nas ring zhig lon pa'i dus na rgya dpe 'di/mang thos bcom ldan ral gris brtson pa chen pos rnyed// de yi phyag dpe shes rab rgya mtshos gus pas zhus nas ni// bsgyur ces bskul nas kho bos tshul 'di legs par bsgyur// de las byung ba'i dge bas sangs rgyas dge ba'i chos// sa mchog rigs 'dzin dbang po ster ba'i lam gcig pu// zhi khro rab 'byams 'phrin las rnam bzhi 'byung ba'i gnas// ya mtshan cho 'phrul sna tshogs 'byung ba'i gsang sngags dpal// dpal 'di yi ni don rtogs dpal mchog kun du bzang po yi// sa la 'dzegs nas sa mchog dbang po'i gnas thob nas// sa 'og sa steng sa bla'i 'gro ba thams cad la// sa bzhin skyo ba med pas yang yang smin byed shog/// yang 'dir smras pa/ gsang sngags snga 'gyur sgyu 'phrul drwa ba yi// rgyud rgyal dpal ldan gsang ba snying po 'di// 'dzin pa'i sngags 'chang rnams la bka' nyid du// rtsod pa med mod 'on kyang snga dus su// skad gnyis smra ba lhas btsas la sogs pas/ zur pa'i sar chos slob bcu byon pas g.yog bcol ba'i snying nang yin par grags// skyon bzhi yod ces rgya dpe ma mthong phyir// bod kyis byas zhes gangs can 'dir bsgrags pas// mkhas rlom 'ga' yang the tshom gnas su gyur// dus phyis gangs ri'i khrod 'drir mkhas pa'i mchog/ zab dang rgya che'i gsung rab rnam 'byed cing// bstan pa'i khur 'dzin mkhas pa'i 'dun sa na// rgyal mtshan ltar mtho dpal ldan ral gri yis// rgya dpe legs rnyed rtsod bral nyi zla ltar// kun la gsal mdzad gtsug gi rgyan du mchod// ma nges bskyar nas skyon bzhi'i gegs sel pa// dpal ldan gsang ba'i snying po sgrub pa'ang mdzad// de phy-ir 'di na rtog ge smra ba rnams// don la spyod pa'i blo gros ring byas nas// gsang snying bod kyis byas zhes bsgrags pa rnams// chu rlabs bzhin du ngal ba don med gyur// de rjes skad gnyis smra ba mkhyen pa'i dpal// blo gros nyi ma gnas lnga'i 'od zer can// brtul zhugs rgyal mtshan 'dzin pa nor bus spud// 'dod dgu dpal 'byung bzang po'i mthu can la// gzhung 'di 'dzin pa bshes gnyen ma thogs pa// shAkya'-i dge bsnyen pra dz+nyA sA ga ras// lhag bsam dag pas rab bskul gsol btab nas// rgyud kun snying po 'di nyid bsgyur pa yin// 'di yi ched du bya ba 'gyur rnying la// sngon gyi 'gyur mdzad mkhas grub brnyes pa'o// gzhan phan byams brtse'i thugs ldan de dag gis// don 'gyur gtsor mdzad rgya dpe 'di nyid dang// mthun dang mi mthun bod skad dag mi dag/ la la skad rnying gis bsgribs go ba dka'// dpe 'dir sngar med tshig dga' yod skyong zhing// 'chong drug la sogs ji ltar nges dka' phyir// sgra bsgyur gtso byas gzhung 'di bsgyur mod kyi// 'on kyang snga 'gyur gzhung na mi bzhugs pa'i// tshig 'ga' 'gyur 'di'i rgya dpe 'di la mthong// de phyir rgya dpe rgyas bsdus shes par gyis// 'di 'dra'i tshul la mtshar du 'dzin par nges// rtog dpyod mi ldan kha cig 'di skad du// 'di la sngon chad sgro skur byung bas na// da lta rgya dpe yod dam med kyang rung// snyigs dus skye bo som nyi sel dka' bas// gsar 'gyur 'bad pa'ang ngal ba don med de// 'di la 'chad nyan skyong ba'ang mi 'byung la// gzhan yang snga 'gyur gzhung gi tshig 'di la// 'di ltar bsgyur ces ga sha byed pa'ang srid// de dag phal cher gang zag rjes 'brang zhing// thos pa'i nor bral chags sdang cher ma yis// blo mig lkugs pas nges don shes bya'i gsung// ji bzhin lta bar mi nus kho nar zad// de'i phyir blo gsal rnams kyis rgyud 'di'i 'gyur// gsar rnying sdebs la gzur gnas blo yis spyod// bstan pa'i nyi ma phan bde'i 'od zer can// shar ri'i rtse nas nub ri'i sa 'dzin rtser// nye ba'i dus 'dir 'di 'dra'i rgyud zab mo// 'chad nyan bsgom par brtson pa de dag gi/bsod nams tshad kyis gzung bar mi nus pas// tshig don mkhas pas gzhan la'ang bsnyad par bya'o// de ltar rnam dag gsal bas rab snyam dge ba'i shes bya kun// kun nas gzigs pa'i spyan yangs rgyal ba'i spyi gzugs rigs rnams kun gyi bdag/bdag gzhan 'gro bas myur thob bde gshegs kun gyi thugs rje'i bcud// gsang bcud ma nor nges pa'i bka' 'di rab ston zhi ba'ang bskul bar shog/kun kyang lam 'dis grol gyur cig/ thar pa lotsA ba'i 'gyur byang ngo//// rang sems dag pa'i 'og min zhing khams su// rang rig dpal ldan khyab bdag rdo rje sems// ye shes lnga mdangs shel la 'ja' tshon bzhin// ma 'dres gsal bar 'char ba'i dkyil 'khor cher/ 1/ ston pa'i dgongs pas yongs bstan rgyud kyi rgyal// rigs 'dzin brda las 'ongs te rgyal po dza'i/ khang steng glengs bam char 'babs snyan khung las// rim byon 'phags bod las ldan rnams kyi rnyed/ 2/ rgyal dbang pad+mas sgra las rab bsgyur cing// dri med bshes gnyen la brten gnyags dang rmas// zhus chen legs mdzad sgyu 'phrul rtsa ba'i rgyud// nges gsang theg pa rim bdun yang rtser son/ 3/ dkar chags 'phang thang ma dang ldan dkar du// gsang sngags nang gi rgyud rnams ches gnyen pas// 'god par ma lus zhes pa snga 'gyur gyi// rgyud las ngos 'dzin gzhan pa bya rgyus dbul/ 4/ thams cad mkhyen pa bu ston rin po ches// la lar zhus dag mdzad bzhed re zhig par// btang snyoms bzhag las gnyis med rnam rgyal zhes// brdzus ma'i rgyud bzhin kun mkhyen bu'i 'gyur gsar kyi gnyis med rnam rgyal ma tshang ba de bsgyur ba'i rgyu mtshan gnyis med rnam rgyal brdzus ma 'di rgyud min pa shes pa'i dgos pa yod tshul gsungs pas so// nges par dbyung ba min/ 5/ sa lo nyin mor byed pas gangs ljongs kyi// chos log mun pa mthar skrod sdom gsum du// gsang chen rnying ma'i chos rnams btang snyoms las// phyag rgya ba bzhin 'bad pas bkag pa med/6/ mkhas pa'i rtser son rig ral thar lo sogs// chos kyi spyan ldan gzur gnas mkhas mang pos// rgya dpe rnyed nas cher bsngags 'gyur bcos rnams// bstan la gces 'dzin thugs kyis 'bad pas mdzad/7/ g.yag zhar rtswa ltar phyogs rer ma gyur pa'i// thub bstan yongs rdzogs yid bzang rtser ba yis// sgrol chen drin las kho bos chos spong gi/ sgrub pas ma sbags zhes gsung dgyes rtse son/8/ rdo rje 'chang dbang dpal 'byor lhun grub kyis// rgyud 'di'i bshad bka' yab la nyer gsan nas// rgya cher spel mdzad theg pa mchog gi bstan// mi nub ring por gnas pa'i sraug shing gyur/ 9/ yid srubs mda' yis snying ga phug min pa// bzang po'i bag chags sad pa'i blo ldan la// phan phyir par gyi chos sbyin 'di spel ba'i// srung ma legs ldan tshogs kyi bdag pos mdzod/ 10/ phyogs bcu dus bzhi'i sangs rgyas kun 'byung gnas// tshogs bsags sgrib sbyangs byas min gdod ma nas// lus can yongs la lhun grub kun tu bzang// rang zhal rang ngo 'phrod par bdag byin rlobs/ 11 zhes theg pa mchog gi bstan pa'i btsas su sgyu 'phrul rtsa rgyud dga' ldan phun tshogs gling du par du brkos pa'i tshe/za hor gyi ban+des sbyar ba'i yi ge pa ni chang khyim pa ngag dbang mkhyen brtse'o//// de ltar rdo rje 'chang ba bod kha ba'i byin rlabs snying la zhugs shing khyab bdag zur chen dang khra tshangs pa rnam gnyis kyis smin grol gyi rim pa stsal bas chos spong gi sgrib pas spags par ma gyur pa'i bka' drin byang chub snying po'i mtha' can du gzhal bar ma nus pa ni kun bzang gdod ma'i ye shes mngon du gyur nas kyang mjal bar spro ba yin no// rgyud kyi rgyal po 'd-i'i par snga sor bskrun par yig nor sogs kyi ma dag pa 'ga' zhig byung ba sngags rnams rgya dpe la brten nas khrus khang lo tsA ba bsod nams rgya mtsho'i sdes zhus dag nan tan mdzad pa'i dpe khungs btsun dang/bod skad la rgya 'grel par bkab/ bod 'grel g.yung TIka gnyis la legs par gtugs nas/rdo rje brag sprul pa'i sku mchog/ 'dar pa lo tsA ba ngag dbang phun tshogs lhun grub/ rnam gling paN chen dkon mchog chos grags gsum gyis zhus dag bgyis skabs dogs gnas rnams 'di gar mig lam du phab ste dpyad gzod pa'i lugs su byas pa'o//// rgya gar skad du/

CLOSE WINDOW