CLOSE WINDOW

Gpb011.008
བོད་ཡིག

rgya gar skad du/ shAn+ti de wa tan+t+ra ma hA nA ma/ bod skad du/ zhi ba lha rgyud chen po zhes bya ba/ bcom ldan 'das dpal kun tu bzang po la phyag 'tshal lo// 'di skad bdag gis bstan pa'i dus gcig na/de bzhin gshegs pa thams cad kyi yab kun tu bzang po de ni/ bcom ldan 'das de bzhin gshegs pa thams cad kyi sku dang gsung dang thugs rdo rje'i snying po/ de bzhin gshegs pa kun gyi btsun mo'i b+ha ga la bzhugs so// bcom ldan 'das de bzhin gshes pa rnam par snang mdzad dang/ yum sangs rgyas spyan ma dang/ rdo rje sems dpa' dang/ yum dbyings phyug ma dang/ rin chen 'byung ldan dang/ yum mA ma ki dang/snang ba mtha' yas dang/ yum gos dkar mo dang/ don yod grub pa dang/ yum dam tshig sgrol ma dang/ nyid las mi gzhan pa'i 'khor rigs lnga'i sangs rgyas yab yum rnams kyang chos kyi dbyings na bzhugs so// byang chub sems dpa' sems dpa' chen po rnams ni/ sa'i snying po dang/ rdo rje sgeg mo dang/ nam mkha'i snying po dang/ rin chen phreng ba dang/ spyan ras gzigs dang/ pad+ma dbyangs mkhan ma dang/phyag na rdo rje dang/ las kyi gar mkhan ma dang/ nang gi byang chub sems dpa' yab yum rnams kyang bzhugs so// byams pa dang/ rdo rje bdug spos ma dang/ sgrib pa rnam par sel ba dang/ rin chen me tog ma dang/kun tu bzang po dang/ pad+ma mar me ma dang/ 'jam dpal dang/ las kyi dri chab ma dang/ phyi'i byang chub sems dpa' sems ma rnams kyang bzhugs so// gzhan yang rigs drug 'dul bar mdzad pa ni/lha'i thub pa srid thub 'dzin dang/ lha ma yin gyi thub pa rnam par rgyal ba dang/ mi'i thub pa shAkya seng+ges mtho ris gnas gsum po 'dul ba'i zhing du yang gzigs so// byol song gi thub pa seng+ge rab brtan dang/yi dwags kyi thub pa kha 'bar rgyal mo dang/ dmyal ba'i thub pa chos kyi rgyal pos ngan song gnas gsum 'dul ba'i zhing du gzigs so// gzhan yang gdug pa can 'dul ba ni gshin rje gshed dang/gsang ba'i yum rgyas 'debs ma dang/ stobs po che rnam par rgyal ba dang/ gsang ba'i yum tshe 'phel ma dang/ rta'i mgrin pa can dang/ gsang ba'i yum za byed ma dang/ bdud rtsi 'khyil ba dang/ gsang ba'i yum rmongs byed ma dang/rig pa'i khro bo khro mos sgo bsrung bar mdzad do// gzhan yang rig 'dzin byang chub sems dpa' mang po dang bcas pa ni dper na til gyi gang bu ltar bzhugs so// zhi ba lha rgyud las gleng gzhi'i le'u ste dang po'o//// de nas bcom ldan 'das dpal rdo rje 'chang chen pos 'khor gyi 'jig rten thams cad la gzigs nas/ rang gi btsun mo la snyoms par zhugs par mdzad do// zhugs ma thag tu 'khor thams cad la bde bas khyab pa ni/la la ni go rim gyi bde ba bzhir shar ro// la la ni phyi nang gi gnas la ltos pa'i bde ba bzhir shar ro// la la ni spang bya la ltos pa'i bde ba bzhir shar ro// la la ni rang gi ngo bo la ltos pa'i bde ba bzhir shar ro// de nas 'khor gyi sangs rgyas dang byang chub sems dpa' rnams ngoms nas 'di skad ces brjod do// mar me mang po khyim du sbar gyur kyang// mig med pa la mun par snang ba bzhin// lhan cig skyes pas kun la khyab mod kyang// nye yang rmongs pa nyid la shin tu ring// skal ngan sems can thabs kyis grol ba'i phyir// dngos po gshis kyi gnas lugs las byung ba'i// ka dag lhun grub rtsol bral chen po'i chos// gnas lugs rang bzhin zhi ba ji ltar gnas// khams gsum sems can rang sems ma reg pa// khams gsum nyon mongs snang ba'i rang bzhin can// rgyu drug sems can skye ba rnam bzhir la// rang rgyud phung po'i zhi ba gang du gnas// rnal 'byor pa ni nyams kyi snang ba la// gdul bya sprul pa'i zhi ba rnam pa ru// sku gsung mi zad rgyan gyi 'khor lo'i thugs// bde bar gshegs pa'i snang ba rnam dag pa// sku gsum sku bzhi sku lngar snang ba yi// mthar phyin 'bras bu'i zhi ba ji ltar bzhugs// skal ngan sems can gdul dka' ba// khyod kyis 'dul ba'i dus la bab// gzhi lam 'bras bu mi shes pa// khyed kyi bstan pa'i dus la bab// ces brjod nas/ ston pa'i zhal du gzigs so// zhi ba lha rgyud chen po las/ gleng slong ba'i le'u ste gnyis pa'o//// de nas bcom ldan 'das dpal rdo rje 'chang chen po ni chos thams cad kyi de kho na nyid ma bcos pa'i gnyug ma dngos po rnams kyi gnas lugs kyi ting nge 'dzin la snyoms par zhugs nas/byang chub sems dpa' rnams 'gro don rdzogs par bya ba'i phyir 'di gsungs so// e ma ho rab tu gsang ba'i chos// gnas lugs ngo bo nyid kyi gzhi// 'khor dang 'das pa kun gyi rgyu// bcings grol med par ngang gis gnas// e ma ho rab tu rtogs pa'i chos// rgyud chen rnal 'byor chen po ni// snod bcud thams cad shes rab tu// phyag rgya ka dag chen por rtogs// e ma ho rab tu rtogs pa'i chos// lung chen rjes su rnal 'byor ni// kun bzang yab yum dbyings ye shes// bde chen sras su sangs rgyas so// e ma ho rab tu mkhyen pa'i chos// man ngag rdzogs pa chen po ni// snang zhing srid pas bsdus pa'i chos// sel med sangs rgyas nyid du gnas// dag pa chen po chos kyi sku// bya rtsol mi mnga' ngang gis rdzogs// e ma ho ngo mtshar rmad kyi chos// chos can mtshan ma'i dngos po rnams// chos nyid ngang du lhun gyis grub// dus gsum rgyal pa ma lus la// lhun grub mchog tu dgongs pas go/ gang yin de las dpag tu med// sangs rgyas kun gyis rab tu bsngags// ye nas lhun gyis grub pa'o// 'khor ba ka dag rin chen gling// mya ngan 'das par der brjod do// nyi ma'i dkyil na mun med ltar// ye shes rang snang ma rtogs pa// nyon mongs 'khor ba ngang gis med// gnas lugs nyid du ka dag pa'o// dngos po gshis kyi gnas lugs nyid// bcing med rnam par grol med pa'i// ye nas lhun grub sangs rgyas chos// bstan phyin spro ba sna tshogs mdzad// ces gsungs so// zhi ba lha rgyud chen po las// gzhi gnas lugs rang bzhin gyis zhi ba bstan pa ste le'u gsum pa'o//// de nas bcom ldan 'das dkon mchog dpal rin chen 'byung ldan nyid/ 'khrul pa thams cad grol bar byed pa'i ting nge 'dzin la snyoms par bzhugs nas/ 'di gsungs so// bde gshegs snying po'i rang bzhin 'di// khams gsum yongs la ye nas gnas// lhan cig skyes pa'i ma rig pa// lus dang grib ma lta bur byung// bskal pa sngon las bsags pa yi// 'khor ba sngon gyi rnam smin byung// las su nyon mongs lnga po yis// 'byung lnga 'dus pa'i phung por smin// snod kyi 'jig rten snang ba yang// sangs rgyas zhing khams yin par shes// shar phyogs mngon par dga' ba'i zhing// lho na dpal ldan nub phyogs bde// byang phyogs rnam dag bkod pa la// dbus kyi byang chub snying por gnas// 'di la sogs pa'i sangs rgyas zhing// gud na med par rab rtogs la// mi dge bcu po khro bcu'i mtshams// nyon mongs lnga po mtshon cha lnga// spyi bo sna tshogs rdo rje la// rkang mthil rdo rje'i sa gzhi la// rtsib ma rdo rje'i ra ba dang// pags pa rdo rje'i gur du phub// ba spu mda' yi dra ba yin// sen mo me dpung rab tu 'bar// lus khams bdud rtsi rnam pa lnga// 'byung ba lnga'am bzhir gnas pa// khams dgu 'dus pa'i dngas ma ni// rang byung bdud rtsi'i mchod pa nyid// dbang po rnam drug 'dod yon drug/ pad+ma rak+ta mchod rdzas nyid// kun gzhi chos kyi pho brang du// yid ni kun bzang rang byung sku// lus dang ngag yid rnam pa gsum// ye nas gshegs par gnas pa'o// rang gi lus nyid 'dom gang la// thams cad tshang bar gnas pa ni// kun gzhi de rting nyon yid med// yid ni rgyu nyid ar gnas so// rkang mthil rlung la sum mdo me// lte ba chu la snying ga sa// sgal tshigs ri rab skra ni me// mi mnyam med pa'i gru bzhi lus// snying ga'i rtsa bzhi sgo bzhi la// rkang brgyad ka ba rnam pa brgyad// mig gnyis pany+tsa re khA la// sna ni rin chen pha gu nyid// so ni drwa ba drwa phyed la// lce chu 'dod yon lha mo 'byung// rna ba rta babs nyid du gnas// snying ni mi 'jigs seng+ge'i gdan// mkhal ma stobs bcu glang po che// mtsher pa rdzu 'phrul rta yi khri// mchin pa dbang bcu rma bya nyid// glo ba thogs med nam mkha' lding// pho ba rin chen khri rkang la// mchin dri dkar nag nyi zla'i gdan// rgyu long chags med pad+ma yin// khyab byed gzugs phung rnam snang mdzad// srog 'dzin rnam shes mi bskyod pa// me mnyam tshor ba rin chen 'byung// gyen rgyu 'du shes snang mtha' yas// thur sel 'du byed don yod grub// sra ba sa ni sangs rgyas spyan// nam mkha' dbyings phyug ma nyid la// mnyen pa'i chu dbyings mA ma ki/ dro ba'i me dbyings gos dkar mo// bskyod pa'i rlung ni dam tshig sgrol// bcud ni yab la snod ni yum// spyad byar gyur pa'i btsun mo yin// rgyu ba sa snying me rlung mig/ gzugs ni sgeg mor gnas pa'o// shin tu rgyu ba nam mkha' nyid// nam snying sna la gnas pa dang// dri ni lha mo phreng ba mo// mngon par rgyu ba spyan ras gzigs// rdo rje myong bar byed pa ste// ro ni lha mo glu len ma// rab tu rgyu ba phyag rdor nyid// rna ba lag nas thos pa la// sgra ni las kyi gar byed ma// rnam shes dbang po'i byang chub sems// yul la snang ba mched pa dang// thob par byed pa snang ba gsum// byams pa me yi rlung du bshad// dpyid ni 'das dus spos me ma// sgrib sel sna yi rlung yin te// de ltar dbyar ni me tog ma// kun bzang me ni mngon par rgyu// 'byung dus ston te mar me ma// 'jam dpal rlung nyid gnas pa yang// ma nges dgun de dri chab ma// dbang por snang ba'i lha 'di kun// rang la ye nas dus spyod yul// yid ni snying rje thabs mchog yab// chos ni stong pa shes rab yum// zhe sdang dmyal bar snang ba yang// thub pas zhe sdang me yang gsod// ser snas yi dwags snang ba yang// nga rgyal ri snyil thub pa yin// gti mug byol song skyes pa la// thub pas gti mug mun pa sel// 'dod chags mi yi skye gnas nyid// 'dod chags dug 'joms shAkya thub// khong khros lha ma yin du skye// bdag zhan bral bas lha min thub// phrag dog lha yi gnas snang bas// phrag dog lcags 'grol lha yi thub// lus kyi 'dus te reg pa ni// rdo rje reg pa gshin rje'i gshed// reg pa sra ba sa yin te// rtog par ma yin lcags kyu ma// lus kyi dbang po reg byed nyid// yab kyi rdo rje stobs po che// gsher par 'byung ba chu nyid ste// chad par ma yin zhags pa ma// lus kyi yul ni reg bya nyid// yum gyi pad+ma rta mgrin dpal// tsha zhing dro ba me yin te// bdag tu ma yin lcags sgrog ma// lus kyi rnam par shes pa ni// dam rdzas dkar dmar bdud rtsi 'khyil// g.yo rlung stong bde'i nam mkha' ni// mtshan mar ma yin dril bu ma// srid gsum khams gsum sems can la// ye nas rang la lhun gyis grub// rang gnas chen po rtogs gyur nas// rang bzhin dkyil 'khor bskyed par bya// de nas bcom ldan 'das dkon mchog dpal gyis/ tshom bu'i dkyil 'khor rang la gnas pa 'di gsungs so// spyi gtsug bde chen dkyil 'khor na// rnam par snang mdzad yab yum la// sgo ba yab yum brgyad kyis bskor// 'di ni sku yi dkyil 'khor te// rtsa dang thig le sngags dang rlung// dbu yi gtsug tor rtse mo ni// rigs bdag kun bzang yab yum la// thub drug sprul pa'i 'khor gyis bskor// 'di ni spyi yi dkyil 'khor yin// mgrin pa longs spyod dkyil 'khor la// snang ba mtha' yas yab yum la// spyan ras gzigs dang glu ma dang// kun bzang mar me ma yis bskor// 'di ni gsung gi dkyil 'khor nyid// gnas rten grub pas g.yo bar grub// snying ga chos kyi 'khor lo la// mi bskyod yab dang yum du bcas// sa yi snying po sgeg mo dang// byams pa bdug spos ma yis bskor// 'khor lo thig le sngags dang rlung// 'di ni thugs kyi dkyil 'khor nyid// lte ba sprul pa'i dkyil 'khor nas// dkon mchog dpal ni yab yum la// nam mkha'i snying po phreng ba ma// sgrib sel me tog ma dang bcas// 'di ni yon tan 'khor bcas te// 'khor lo khams bcud sngags dang rlung// gsang ba me rlung 'khor lo la// grub pa gdon mi za ba la// phyag na rdo rje gar ma dang// 'jam dpal dri chab ma yis bskor// 'khor lo bdud rtsi yi ge g.yos// 'di ni phrin las 'khor lo yin// gnas pa rtsa yi rang bzhin las// dkyil 'khor spros pa bsgom par bya// grub pa sngags kyi yi ge las// tshom bu spros pa bsgom par bya// lus khams bdud rtsi thig le las// zhal phyag spros pa bsgom par bya// snying po rlung gi yan lag las// rnam grangs spros pa bsgom par bya// rnal 'byor blo yi khyad par las// chu las nya ldang ji bzhin du// snying po brjod pas phyag rgyar gsal// cig char lam du bsgom par bya// srid pa mngal nas chags tshul du// lo dang zla ba'i smin pa bzhin// rgyu rkyen 'dus pa las byung ba// rim gyis bslabs te bsgom par bya// zhes gsungs so// zhi ba lha rgyud chen po las/ rang rgyud phung po'i zhi ba sems can thams cad la gnas pa ste le'u bzhi pa'o//// de nas bcom ldan 'das snang ba mtha' yas kyis gdul bya thams cad zhing dag par gzung ba 'di gsungs so// ji ltar gdul bya sprul byung nas// de nyid lam du byas pa yi// chos 'di snod ldan kun don du// rdo rje snying po nyid la bshad// sangs rgyas kun tu bzang po nyid// stong gsum zhing khams grangs med par// thub pa'i dkyil 'khor kun spros nas// khams gsum sems can mtha' yas pa// 'dul phyir dkyil 'khor sna tshogs pa// yid bzhin nor bu bzhin du snang// gang zhig rigs kyis 'dul ba la// gti mug can la bde gshegs rigs// zhe sdang 'dul phyir mi bskyod pa// nga rgyal can la dkon mchog dpal// 'dod chags pad+ma tshe dpag med// phrag dog don grub las kyi rigs// rigs lngar gtogs pa 'di dag gis// 'dod dang thar pa rab sgrub byed// gang gis mtshon pas 'dul ba la// rang bzhin sku mdog snang ba yang// snum zhing dwangs la mdzes shing sdud// dbyibs mdzes mdangs gsal mdog phyed 'phro// gang zhig bsgyur bas 'dul ba la// rtag pa chen po shang+kha ste// mi bskyod in+d+ra nI la'i mdog/ rin chen 'byung ldan btso ma gser// pad+ma rA ga tshe dpag med// don grub in+d+ra nI la yin// rigs mthun mdog tu gnas pa'am// yang na nyi shu rtsa lngar ston// zhal phyag 'dul bar dgongs pa la// chos sku spros pa med pa'i phyir// zhal ni gcig tu bstan pa yin// dbyings dang ye shes 'brel ba'i phyir// phyag ni gnyis su bstan pa yin// thabs dang shes rab mnyam pas na// zhabs kyang rdo rje'i skyil krung bzhugs// bkri drang 'bras bu rnam thar gsum// nges don 'bras bu sku gsum snang// de phyir zhal yang gsum du bstan// nges par chos nyid zhal las 'das// pha rol phyin drug snang ba yang// sbyin pa btang zhing tshul khrims bsrungs// brtson 'grus brtsams zhing bsam gtan bsgoms// bzod pa bsgoms nas shes rab rtogs// rgyu yi lam nas bgrod 'dul ba// rdo rje'i phyag kyang drug tu byung// stong pa nyid kyi ye shes dang// chos dbyings me long lta bu dang// so sor rtog dang mnyam pa nyid// bya ba grub par mthar phyin pas// 'bras bu'i sgo nas mthar phyin pas// rdo rje'i phyag mtshan drug po rnams// dbyings dang ye shes mi 'bral zhing// thabs dang shes rab sbyor ba dang// snang stong zung du 'jug pa dang// yul sems dbyer med snang bas na// gdul bya'i shes par grol mtshon pas// yab yum zhabs dang skyil krung 'khril// rgyan chas 'dul bar gyur pa la// rig pa'i dbang lnga rdzogs pa dang// rigs gcig rigs lnga dbyer med phyir// dbu la rin chen ze'u phrog lnga// kun 'dar nang du sems bzlog pas// gtsug tor thor tshugs yid bzhin 'bar// mu stegs lta ngan rab 'joms pas// mgon po ral pa'i cod pan 'phyang// ro rkyang thabs dang shes rab ldan// phyogs rnams mdzes pa'i cod pan mdzes// rigs rnams bde bas gang bas na// me tog chun pos thod bcings mdzes// byang chub yan lag bdun ldan pas// rna rgyan mgul chu dpung rgyan dang// sku reg dang ni do shal dang// phyag zhabs gdu bus rab tu mdzes// 'phags lam yan lag brgyad ldan pas// bkra shis rtags brgyad lus la rdzogs// cha lugs chen pos brjid pas na// sku yi stod g.yogs rab mdzes shing// gsung gi smad dkris lhub dang ldan// thugs kyi ze'u ldan rnam par bgos// yon tan chos gos bsnams nas ni// mdzad pa las kyi phu rung ldan// zhing khams rnam par dag pas na// rgyab yol zla ba'i dkyil 'khor dang// sna lnga 'od kyis gang bu dang// 'od zer dra bas rab tu spras// gdul bya'i re ba bskang mdzad pas// ba spu'i bu ga re re nas// 'od zer bye ba drug stong 'phro// bde gshegs snang ba sna tshogs ston// mtshan gyi me tog rgyas pa la// dpe byad 'bras bus spras pa'i phyir// sems dpa' yab yum rang gi rig/ sras kyi tshogs kyis kun nas spras// sras tshogs ma lus pa rnams kyang// rigs lnga'i dgongs pa tshang bas na// rigs kyi bdag pos dbu brgyan cing// snyan cha rin chen 'byung ldan la// mgul chu snang ba mtha' yas te// do shal sku reg rnam snang mdzad// phyag zhabs gdu bu don grub la// dbu rgyan mi bskyod pa yi brda// phyag mtshan 'dul bar dgongs pa la// dngos po 'joms pa'i rdo rje dang// rmad byung sgrogs pa'i 'khor lo bskor// dgos 'dod skong ba'i rin po che// skyon gyis ma gos pad+ma 'bar// log lta 'joms pa'i ral gri dang// chos kyi sgra sgrogs dril bu rnams// rigs rnams dbyer med yin pas na// phyag mtshan gcig la kun kyang tshang// sa bcu thob dang rig 'dzin pas// sa snying dkar skya rin chen myug/nam snying mthing ga ral gri 'dzin// spyan gzigs dmar po pad+ma dkar// phyag rdor ljang gu rdo rje bsnams// snang ba gsum gyis grol ba dang// rdzas kyi longs spyod ldan pas na// sgeg mo me long rin chen 'phreng// pad+ma gling dung gar byed las// byams dkar klu shing spos me yum// sgrib sel mthing ga pu sti nyid// yum ni me tog phreng ba nyid// kun bzang dmar skya rin chen snye// yum ni mar me 'od gsal snang// 'jam dpal ljang ser ut+pa la// yum ni dri chab srin mtheb 'thor// rigs bdag thams cad dbyer med pas// kun bzang yab yum mnyam gzhag bya// lha rnams le los g.yengs pa la// brtson 'grus mthar phyin pi wang rol// lha min khong khro 'thab rtsod pa// 'dul phyir bsam gtan go mtshon bsnams// mi rnams 'dod chags bza' btung chags// de phyir tshul khrims gseg par bsnams// byol song gti mug 'thib bsal phyir// po ti shes rab pha rol phyin// yi dwags bkres skom 'jungs pas na// de phyir sbyin pa rin chen sgrom// dmyal ba zhe sdang tsha grang la// me chu bzod pa'i pha rol phyin// 'chi bdag bdud 'dul 'khor ba 'dren// gshin rje thod dbyug lcags kyu yum// stobs chen phung po'i bdud 'dul bas// rdo rje gnon te zhags pa yum// nyon mongs bdud 'joms rta mgrin dpal// thod sbrul bsnams te lcags sgrog yum// lha bdud bdud rtsi 'khyil 'dul bas// rdo rje rgya gram dril bu yum// zhi ba'i mdzad pas 'dul don du// yab kyi sku yi tshul bzhi ni// gsal 'tsher lhun sdug gzi byin ldan// yum gyi tshul lnga ldan pas na// mnyen lcug 'khril ldem gzhon tshul can// thub drug sems dpa' don mdzad pas// 'od zer 'phro ba'i tshogs chen po// sgo skyong gdug pa 'dul bas na// 'bar ba'i 'phreng bas 'khrigs pa ste// spyir ni kun dang kun bzang yum// mtha' dbus med par khyab pa'o// bzhugs thabs 'dul bar dgongs pa las// sangs rgyas rnams ni yab yin pas// rdo rje'i skyil mo krung du bzhugs// rig ma gzungs ma yum rnams ni// pad+ma'i skyil mo krung du bzhugs// byang chub sems dpa' yab yum rnams// sems dpa'i skyil mo krung du bzhugs// thub pa 'gro ba'i don mdzad pas// bzhengs nas gdul byar mthun par bzhugs// sgo ba gdug pa 'dul bas na// yab yum brkyang bskum dor thabs bzhugs// phrin las 'dul bar dgongs pa la// yab lngas phung po byin gyis brlab// yum lngas 'byung ba byin gyis brlab// byang sems rang rgyud bkra shis byed// thub pas nyon mongs 'dul zhing sbyong// kun bzang thabs shes 'brel bar brlab// khro bos mtshams gcod gdug par 'dul// gdan khris 'dul bar dgongs pa dang// chos kyi 'khor lo bskor ba'i gdan// 'og gzhi 'khor lo rtsibs bzhi 'bar// dgos 'dod re ba skong bas na// yid bzhin rin chen khri rkang brtsegs// yon tan che bas bcom pas na// stobs bcu tshang ba glang po'i gdan// mi 'jigs bzhi bcom seng ge nyid// rdzu 'phrul rkang bzhi rta yi gdan// dbang bcu mtshon pas rma bya la// phrin las thogs med nam mkha' lding// sa yi khyad par bgrod pas na// nyi ma zla ba pad+ma'i gdan// 'bras bu'i sa gsum gnon pa'o// gnas kyis 'dul bar dgongs pa la// khyad par 'phags pa'i 'og min gnas// gzhan min rang snang sprul pa'i khyim// gsang ba yum gyi b+ha ga nyid// de nyid kun gzhi pho brang la// gdos pa can las rab grol bas// phyi nang med par gsal ba ni// shel gyi phor par bcud bzhag 'dra// khyad par zhing khams lngar yang snang// zhes gsungs so// zhi ba lha rgyud chen po las// ji ltar gdul bar bya ba sprul par byung ba'i le'u ste lnga pa'o//// de nas bcom ldan 'das rnam par snang mdzad kyis de nyid lam du bya ba 'di dag gsungs so// de bzhin gshegs pa rigs lnga la// lam ni rnam pa gnyis yod de// grol lam lta ba bstan pa dang// thabs lam dbang gis bgrod par bshad// lta ba bden par dbyer med nyid// skor bdun ngo bo nyid du gnas// bder gshegs dkyil 'khor spyan drangs nas// mchod pas rab tu dgyes par bya// rang gi gnas rnams sbyang bar bya// yi ge a dkar las skyes pa// ri rab rtse la lha yi gnas// lha ma yin gyi su ser po// ri rab khong seng nang na gnas// gling bzhi mi ni nr-i sngon po// bzhi dang gling phran bcu gnyis gnas// byol song du yig dud ka ni// phyi yi rgya mtsho'i nang na'o// pre mar las skyes yi dwags rnams// grong khyer ser skya'i gnas na yod// dmyal ba tri yig nag po de// rdo rje gdan gyi 'og na gnas// 'di drug 'dod khams gnas rnams sbyangs/ 'di skor yig skyon zhig yod dam// gzugs khams bsam gtan mu bzhi sogs// yi ge A+oM du shes par bya// gzugs med skye mched mu bzhi A// nyams ni sems la 'char ba yin// gar ni lus la 'char ba yin// sngags ni ngag la 'char ba dang// mthong snang yul la 'char ba la// bag chags rmi lam shar ba ni// khams gsum gnas las nges par grol// 'bru gsum sbyangs na nges par ni// sku gsum gnas la bzhugs par 'gyur// rtogs pas bdag ni bsgral zhes bya// gang zhig thugs rjes gzhan bsgral na// zhing du gyur pa'i bsgral bya rnams// mnyes pa lnga dang stong pa lnga// dgongs pa lnga dang gyur pa lnga// de sogs yum gyi mkha' la 'phangs// sku gsum rgyal ba'i zhing du nges// tshogs chen gnyis kyang rdzogs par 'gyur// thabs kyi lam la sbyor 'dod na// rang don gsal ba rnam pa gsum// gsang dbang shes rab ye shes dang// bde ba chen po'i dbang gsum nyid// gtum mo 'khor lo srog shing gsum// 'di las 'byung ba'i lam yin no// lus kyi 'khrul 'khor legs gnas na// rlung gis me ni rab tu 'bar// k+Sha ni kun tu bzang po nyid// bdud rtsi 'bab pa kun bzang mo// bde ba'i ye shes rol mo yis// rang gi lus kyi lha rnams mnyes// ye shes sgyu ma'i dngos grub ni// rnal 'byor pa yis thob par 'gyur// lus la dkyil 'khor rnam pa bzhi// bsgoms pas bde ba rnam pa bzhi// gsang ba sngags kyi yig 'bru bzhi// snying po rlung gi gnas pa bzhi// dkyil 'khor srog shing rnam pa gsum// lus dang ngag dang yid du gnas// srid pa gsum dang grong khyer gsum// 'khor ba gzung 'dzin 'das pa gsum// gzhan don sbyor ba'i mchod pa 'bul// bde gshegs yum lnga gzungs ma ni// glang po can ma sangs rgyas spyan// dung can ma ni dbyings phyug ma// ri dwags can ma mA ma kI// ri mo can ni gos dkar mo// sna tshogs can ma dam tshig sgrol// sbyor ba nyid ni rigs lnga nyid// rig pa sra ba sa yin te/ de nyid rtag pa rnam par snang// gsher ba chu ste dkon mchog dpal// dro ba me ni tshe dpag med// g.yo ba rlung gi don yod grub// thig le nam mkha' mi bskyod yin// bde ba bcu drug sems dpar shar// phyi yi gnas la ltos pa ni// lus kyi khol bur byams pa skyes// lus la phal cher sgrib sel nyid// kun tu bzang pos lus kun khyab// 'jam dpal snang dngos bde bar 'char// nang gi gnas la ltos pa yum// bde ba spyi mgrin spos ma nyid// mchog bde mgrin snying me tog 'thor// snying ga lte ba mar me gsal// lte ba gsang gnas lhan skyes dri// spang bya ltos pa rnam pa bzhi// sa snying gzugs 'dzin rags rim 'gog/ nam snying bdag rtog rags rim 'gog/gzugs kyi rtog 'gog spyan ras gzigs// bde gsum rtog 'gog phyag rdor nyid// rang gi ngo bor ltos pa bzhi// bde ba rdo rje sgeg mo ma// mchog bde rin chen phreng ba ma// bde bral pad+ma glu len ma// lhan skyes las kyi gar mkhan nyid// skad cig bzhi ru shar ba ni// rnam pa sna tshogs skad cig ma// khro bo gshin rje'i gshed po yin// rnam par nyed pa'i skad cig ma// khro bo stobs chen gzhan mi thub// rnam par smin pa'i skad cig ma// khro bo rta mchog chen po la// mtshan nyid bral ba'i skad cig ma// khro bo bdud rtsi 'khyil ba yin// drod gsum rnam pa bzhir byung ba// 'bar ba'i drod ni rnam pa gnyis// dang po 'bar ba lcags kyu ma// rab tu 'bar ba zhags pa nyid// lcags sgrog thig le g.yo ba'i drod// dril bu thig le brtan pa'i drod// 'gyur ba drug ni thub pa drug/ rgya mtsho ri rab skam pa nyid// chos kyi rgyal pos 'dul ba yin// gling bzhi dbang du bya ba ni// shAkya seng+ges 'gro don mdzad// ro 'dzin rang gi gnas su sbyar// yi dwags kha 'bar 'dul byed do// dbang po'i mchog ni steng du bzhag/lha yi bltas pas tshim pa 'dul// ngag tu stobs kyi hUM drag ring// seng+ge dam ldan 'dul ba la// ting 'dzin hUM phaT mda' gzhu 'phangs// bgad pas tshim pa lha ma yin// kun tu bzang po'i bya ba bzhi// 'bebs pa mi mkhas myur du nyams// gzung ba mi mkhas bde yun thung// bzlog pa mi mkhas chu dang bsdang// dgram pa mi mkhas nad du 'gyur// kun tu bzang mo'i mkhas pa bzhi// dbab par mkhas pas rus sbal 'gros// gzung mkhas lus ngag 'gyur ba gsum// bzlog mkhas dud 'gro'i 'gyur ba bzhi// khyab mkhas rnam grol phyag rgya bca'// 'dod chags thar pa byang chub sems// bzhi bcu rtsa gnyis lhun gyis grub// ces gsungs so// zhi ba lha rgyud chen po las/ lam dbang du bya ba chags lam lha rgyud kyi le'u ste drug pa'o//// de nas bcom ldan 'das de bzhin gshegs pa thams cad kyis/dgongs pa'i phrin las 'di dag yongs su rdzogs par gsungs so// hUM chos nyid spros dang bral ba'i rang bzhin las// cir 'dul thabs kyis bstan pa'i las mdzad pa// bde gshegs dkyil 'khor thig le chen po nas// 'khor 'das byang chub sems kyi rgyun yang 'bebs// longs spyod dkyil 'khor chen po'i zhal hom du// 'dod yon lnga yi mchod pas dgyes mdzad cing// chos dbyings dkyil 'khor chen po'i klong yangs nas// 'khor dang mya ngan 'das pa kun mkhyen zhing// sprul pa'i dkyil 'khor chen po bde ba 'bebs// 'gro drug skyed mdzad mya ngan 'das par 'dren// dkyil 'khor bzhi yi bdag pas phrin las mdzad// dang po sangs rgyas rnam par snang mdzad ni// yi ge A+oM las bskyed nas sku ru snang// sangs rgyas snang mtha' tshe dpag med pa ni// yi ge AHlas bskyed nas gsung du snang// bde gshegs rdo rje sems dpa' mi bskyod pa// 'gyur med hUM las sprul nas thugs su snang// yon tan rin 'byung sangs rgyas dkon mchog dpal// swA las sprul nas yon tan yid bzhin snang// las mdzad grub pa gdon mi za ba ni// hA las skyes nas phrin las mdzad par snang// rigs kyi sangs rgyas lnga yi rang bzhin gyis// grub pa sngags kyi phrin las khyed kyis mdzod// bdud rtsi dri chen gser mdog rnam snang mdzad// mi bskyod byang chub sems kyi khu ba'i sku// sha chen dgos 'dod 'byung ba dgos 'dod sku// pad+ma rak+ta snang ba mtha' yas nyid// dri chu las rab mgon po don yod grub// glang chen mAng sa yum mchog sangs rgyas spyan// bya sha mkha' la 'phyo ba dbyings phyug ma// mgyogs byed rta ni dbyings phyug mA ma ki/ ba glang skyon gyis ma gos na bza' dkar// khyi sha las rab dam tshig sgrol mar snang// khams kyi dngas ma bdud rtsi mchog gi sku// rigs lnga yab yum khyed kyis phrin las mdzod// khyab byed rnam snang sangs rgyas spyan dang 'khril// srog 'dzin mi bskyod yum chen dbyings phyug ma// mi mnyam rin chen 'byung ldan mA ma ki/gyen rgyu snang ba mtha' yas gos dkar ma// thur sel don yod grub pa dam tshig sgrol// rgyu ba sa yi snying po sgeg mo'i sku// byams pa bdug spos ma yi sku ru snang// phyir la ldang ba kun tu bzang po nyid// nang du 'jug pa thub drug 'gro don rdzogs// khong du gnas pa kun tu bzang mo nyid// kha sbyor bzung ba sgo srung yab yum brgyad// bzhi bcu rtsa gnyis rgyal ba thugs dam can// 'du byed snying po'i phrin las khyed kyis mdzod// rtsa gnas dkyil 'khor grub pa'i gzhal yas nas// khams kyi bdud rtsi sangs rgyas sku bzhugs shing// grub pa sngags kyi nus mthu ngag la 'char// snying po rlung gi thugs kyis yongs la khyab// gnas pa rtsa yis sku dbyibs gsal byed cing// khams kyi bdud rtsis rnam pa bde ba dang// sngags kyi yig 'brus rang bzhin stong gsal byed// snying po rlung gis ngo bo zung du 'jug/ lus kyi sgrib sbyangs bum pa'i dbang rnams rdzogs// ngag gi sgrib dag gsang ba'i dbang chen 'bebs// yid kyi sgrib dag shes rab ye shes spyod// lus ngag yid sgrib dag byed bde chen dbang// bdag tu blta ba'i gzung 'dzin rnam spong ba// sangs rgyas bde gshegs khyed kyis byin gyis rlobs// zhes gsungs so// zhi ba lha rgyud chen po las// phrin las bcol ba ste le'u bdun pa'o//// de nas bcom ldan 'das don yod grub pas mthar phyin pa'i ting nge 'dzin la snyoms par zhugs nas 'di gsungs so// bsnyen bsgrub rnam bzhi'i gsang sngags kyis// thun mong rig 'dzin sa thob nas// sku lnga lhun grub nyid du gnas// thugs rjes mdzad byed ma lus 'dul// oM dzi na dzigahUM badzra d+h+r-igaswA rat+na d+h+r-igaAM A ro ligahA pradz+nyA d+h+r-igalAM dwe Sha ra ti/ mUM d+hA twI shwA rI/ mAM mo ha ra ti/ pAM rA ga ra ti/ tAM badzra ra ti/ bsnyen pa'i gsang sngags zhes bya ba/ rgyal ba rigs lnga yab yum gyi// gsang sngags rab tu bzlas gyur na// phung po lnga dang 'byung lngar sbyong// k+ShIM hi rA dza ya/ traM A gar+b+ha ya/ hrIM ha hUM pad+ma pA da ma/ dziM ku ru pA Na/ hUM lA s+ye sa ma ya s+t+waM/ traM mA le sa ma ya hoH/ hrIM gI ti rA gou0f85haM/a nirti rA' ga yA mai/ mai d+ha ra Ne swA hA/ th+l+hiM nis+sa raM b+hA ya swA hA/ hUM swA rA dza ya swA hA/ muM shrI aM rA gA ya swA hA/ dzaHd+hu pe pra be shahUM pUSh+pe A be sha/ baM dI pa su gi rI/ hoHgan+d+he tsit+ta/ nye bsnyen nang gi dbang po yul// phyi yi dbang po dus bzhi rnams// byang chub sems dpa' yab yum gyi// 'khor du nye bar bsnyen pa'o// hUM hUM hUM badzra tsit+ta oM/ a a A badzra b+ha drA sa man ta aH/ oM mu ne kriM swA hA/ oM mu ne hUM truM swA hA/oM mu ne sruM swA hA/ oM mu ne praM swA hA/ oM mu ne k+ShaM swA hA/ oM mu ne ye swA hA/ bsgrub pa kun bzang yab dang yum// thub drug sprul pa'i sangs rgyas rnams// 'gro ba'i don la rab brtson pas// zhi ba'i 'gro don bsgrub par bya// hUM ya mAn+ta kr-ita phaT/ hUM big+h+nAM ta kr-ita phaT/ hUM pad+mAn+ta kr-i ta phaT/ hUM pradz+nyAn+ta kr-i ta phaT/ oM ma hA badzra d+ha ra ma hA kro d+hI shwa rI dz+wa la ni hUM phaT/ oM rat+na d+ha ra ma hA kro d+hI shwa rI dz+wa la ni hUM phaT/ oM pad+ma d+ha ra ma hA kro d+hI shwa rI dz+wa la ni hUM phaT/oM karma d+ha ra ma hA kro d+hI shwa rI dz+wa la ni hUM phaT/ sgrub chen sgo skyong yab dang yum// dkyil 'khor phyi nas las byed pas// phyag rgya bzhis ni kun la khyab// de phyir sgrub chen nyid du 'grub// yid kyis lha yi gzugs bzung ba// seng+ge mngal rgyar tshud pa ltar// khyung gi sgong rgya lta bu ste// rnal 'byor pa ni lus kyi rgya// sgron ma bzlog na spa ba nub// lte ba mkhrang la seng pa'i khog/gdung khebs gtsug tor drug pa ni// nyi zla'i tshe dang mnyam pa yin// rang don stong dang drug brgya nyid// gzhan don lo brgyar gzugs su gnas// bsgoms pas mngon du gyur pa'i lha// gang bsgom lha yi cha byad nyid// dgongs pa nyid la sangs rgyas shing// mnyam par ma bzhag de min pa// rig 'dzin kun gyi rgyal po ste// lhun grub rig pa 'dzin pa'o// chos sku dri ma med pa dang// longs sku 'khor los sgyur rgyal 'dra// sprul pa mdzad pa mthar phyin cing// skye 'jig bral ba rdo rje nyid// yul med rang gsal mngon byang sku// sku lnga lhun gyis grub pa'o// chos ni skye med don gyi gsung// longs spyod dgongs pa brda yis ston// sprul pa tshangs pa'i gsung dbyangs snyan// mngon byang rig pa byin gyis brlabs// 'jigs med dbyer med rdo rje'i gsung// gsung lnga nyid du lhun gyis grub// so sor snang ba gdul bya'i blo// tha dad bya ba gang la yod// bde ba chen po'i thugs dang ni// rnam par mi rtog thugs nyid dang// 'gro ba thams cad sgrol ba dang// mnyam pa chen po'i mchog gnas dang// dbyer med rdo rje'i thugs lngar gnas// tha dad 'dod na tha dad snang// dbyer med 'dod na dbyer med snang// zhing khams dang ni gzhal yas khang// 'od zer dang ni gdan khri rgyan// longs spyod lnga ni yon tan te// bde bar gshegs la rtsol med snang// zhi rgyas dbang dang mngon spyod dang// lhun gyis grub pa'i phrin las yin// phyogs med rang snang zhing khams na// gdung rten rang snang gzhal yas khang// 'od zer sgrib med 'od gsal ba// gdan khri 'bras chos rdzogs rang gdan// rgyan ni ma spangs rang snang rgyan// de yang rnam pa lnga lngar snang// gdal khyab chen po'i mkha' khyab zhing// bde ba can ni 'og min gnas// mos pa can ni rigs drug gnas// phyogs bcur ma lus rigs snang ba// pad+ma can de yum gyi mkha'// yongs rdzogs phyi nang med par snang// 'og min nges pa lnga ldan te// tha dad ma nges sprul sku'i khang// sku nyid 'od de rig pa nyid// yum mkha' skye gnas gzhal yas khang// kun khyab ye shes don 'od zer// kha dog drug ste rtags kyi 'od// dbu phyag las byung 'gro 'dul 'od// 'od rigs kun de rang bzhin 'od// bde chen chos nyid 'od zer ro// mi 'jigs stobs dbang rdzu 'phrul las// de rtags sems can chen po lnga// nyi rkyang khro la pad rkyang thub// chos nyid ji bzhin 'bras bu'i gdan// gsang pad nyi zla thig le'o// rig pa rang snang 'od kyi rgyan// mtshan dang dpe byad rtags kyi rgyan// stod g.yogs smad dkris khrims kyi rgyan// chos rnams ma spangs rang bzhin rgyan// khu ba ye shes las kyi rgyan// chos sku'i phrin las rnam pa lnga// mtshan ma thams cad ngang gis zhi// de nyid shes bya thams cad rgyas// 'bras bu'i chos rnams dbang du 'dus// rtog pa ngang gis rlag byed drag/ bzhi ga lhun grub gsal ya'i las// snang mdzad la sogs rigs lnga po// las lnga sbyar ba dngos snang las// las bzhi'i tshad rgyu bzhi sbyar zhing// bsdu bzhi'i lhun grub phan 'dogs las// las bzhi stongs gnas chags dang 'jig/ rig par lhun grub ngo bo'i las// las bzhi'i rtog dag bde ba rgyas// ye shes rang shar mtshan ma non// rang shar lhun grub dngos kyi las// de ltar 'bras bu nyer lnga'o// gzhan nas yod 'ong ma yin te// 'gro ba gcig nyid re re la'ang// lus ngag yid la nus pa lnga// gnas bzhin ma 'dres yongs rdzogs shes// lhag pa'i chos sku chen po las// rtag pa rgyun du thugs rje skye// sems can rnams kyis de ma rig/ dper na chu bo gang+gA bzhin// longs spyod rdzogs pa'i sku la ni// bskul zhing gsol ba btab pas skye// sprul sku byang chub rnam pa drug/ yul dang phrad na thugs rje skye// mngon byang sku dang rdo rje'i sku// rang bzhin shugs kyis thugs rje skye// zhes gsungs so// zhi ba lha rgyud chen po las// mthar phyin pa'i zhi ba sku lnga lhun gyis grub par bstan pa ste le'u brgyad pa'o//// de nas rdo rje snying po yis// bcom ldan 'das la 'di skad bstod// rtsa rnams gtsug tor mchog tu gyur// sprul pa sku yi rang bzhin nyid// sngags rnams hUM gi gzugs su 'dus// bde chen longs spyod rdzogs par gnas// khams kyi dngas ma bdud rtsi nyid// khams dgu 'dus pa chos kyi sku// snying po rlung rnams rang gdangs mar// dbyer med rdo rje mngon byang chub// rigs bdag dbyer med kun la khyab pa'i sku// ston pa'i bdag nyid kun bzang khyod phyag 'tshal// ye shes lnga las skur snang longs spyod rdzogs// phung po lnga yi rang bzhin nyid du snang// 'byung ba lnga yi yum dang rnam par 'khril// 'chad pa'i skyes bu khyed la bdag phyag 'tshal// chu bo bzhin du rgyun chad med par gnas// dang po de las byung nas bya ba byed// mtha' ma der thim rang gi gnas la bzhugs// 'gro ba'i nad sos mdzad pa sman gyi gnas// 'jig rten thags bzhin snang ba'i rang bzhin can// rgyud rgyal dgongs pa can la phyag 'tshal bstod// bdag sogs rnams kyis ji ltar gzung bar bya// zhes gsol pas/ bcom ldan 'das kyis gsungs pa/ rgyud 'di snod ngan kun la gsang ba dang// dam ldan snod ldan rnams la khyod kyis gtod// ces gsungs pas rjes su yi rang ngo// zhi ba lha rgyud chen po las// rjes su yi rang ba ste le'u dgu pa'o//// zhi ba lha rgyud chen po rdzogs so// rgya gar gyi mkhan po pra ma sa twa las/ lo ts+tsha ba pad+ma ru rtses bsgyur ba'o/

CLOSE WINDOW