CLOSE WINDOW

Gpb011.006
བོད་ཡིག

/ a+thi+-i/ !phrin las thams cad kyi rgyal po skabs sbyor bdun pa'i rgyud/ bcom ldan 'das dpal kun tu bzang po la phyag 'tshal lo// 'di skad bdag gis shes pa'i dus gcig na/ bcom ldan 'das yid byed pa po rang byung gi gnas na bzhugs pa la/ yid kyi sras gnyis su med pas 'di skad ces gsol to// bcom ldan 'das de bzhin gshegs pa thams cad kyi phrin las kyi rgyal po'i skabs sbyor bdun pa'i rgyud ces bgyi ba de gang lags/sku'i phrin las kyi skabs sbyor ba gang lags/ gsung gi phrin las kyi skabs sbyor ba gang lags/ thugs kyi phrin las kyi skabs sbyor ba gang lags/ blta ba'i phrin las kyi skabs sbyor ba gang lags/bsgrub pa'i phrin las kyi skabs sbyor ba gang lags/ spyod pa'i phrin las kyi skabs sbyor ba gang lags/ bcom ldan 'das kyis lung bstan du gsol/ bde bar gshegs pas lung bstan du gsol/bcom ldan 'das kyis bka' stsal pa/ sras mchog dam pa nyon cig/ skabs sbyor bdun pa'i rgyud 'di ni/ phyogs bcu dus gsum gyi bde bar gshegs pa rnams kyis kyang gsungs shing bshad la gsungs pa yang mi mnga'/ngas kyang bshad la bshad pa yang med do// de ci'i phyir zhe na/ rtag pa can gyi mtshan nyid ma yin pa'i phyir te/ des na rigs kyi bu phrin las zhes bya ba yang/ dmigs su med pa'i man ngag las ma gtogs par/ 'dus byas kyi mtshan ma'i las su bstan pa ma yin te/ de la sku'i phrin las kyi skabs sbyor ba 'di yid la zung zhig/ de la sangs rgyas kyi sku gang yin pa ni sems can gyi lus la/sems can gyi lus gang yin pa de ni bdag ste/ bdag gi phung po langs kyang rung/ 'dug kyang rung/ 'gro yang rung/ 'grengs kyang rung/ gnas kyang rung/ mi gnas kyang rung/rol kyang rung ste/ phrin las kyi skabs sbyor nyid du mdzad pa ste/ de ci'i phyir zhe na/ lus langs na skye ba med pa chos kyi dbyings nas bzhengs pa'i sku ste/ don chos nyid du sbyor ba'i phrin las so// lus 'dug na yum kun tu bzang mo'i rang bzhin dag pa'i mkha' la bzhugs pa'i sku ste/yab yum du sbyor ba'i phrin las so// lus 'gro na thugs rje chen pos yongs la khyab pas sprul pa'i sku ste/ thabs dang shes rab tu sbyor ba'i phrin las so// lus 'grengs na/ bde chen longs spyod pa'i sku ste/ yab yum gnyis su med par sbyor ba'i phrin las so// lus gnas na dbyings dang ye shes gnyis su med pa'i chos kyi sku ste/ gnyis su med pa'i phrin las so// lus mi gnas na ma skyes pa'i chos nyid mngon par byang chub pa'i sku ste/ ye shes chos nyid du dbyer med pa'i phrin las so// lus rol na/ 'chi ba med pa rdo rje'i sku ste/ lus dngos su snang ba thams cad rdo rje'i rigs te/sangs rgyas spyan dang gnyis su med de/ me long lta bu'i ye shes kyi phrin las so// lus thams cad du rlan zhing sdud pa thams cad ni/ rin po che'i rigs te mA ma kI dang gnyis su med de mnyam pa nyid kyi ye shes kyi phrin las so// lus la drod 'byung ba thams cad ni/ pad+ma'i rigs te gos dkar mo dang gnyis su med pa'i so sor rtogs pa'i ye shes kyi phrin las so// lus kun tu spyod tub tub pa thams cad ni/las kyi rigs te dam tshig sgrol ma dang gnyis su med de bya ba nan tan gyi ye shes kyi phrin las so// lus gzhig na/ rang bzhin med pa thams cad ni de bzhin gshegs pa'i rigs te/kun tu bzang mo dang gnyis su med de stong pa nyid kyi ye shes kyi phrin las so// de bas na lus sku'i phrin las thams cad ni yang dag pa'i phrin las la yengs pa med par mdzad de/ de la 'di skad ces brjod par bya'o// gdod nas ma skyes rnam dag dbyings kyi sku// yongs la khyab pas thugs rje sprul pa'i sku// thabs mkhas rol pas longs spyod rdzogs pa'i sku// skye shi med pas rdo rje sems kyi sku// don dam rtogs pas mngon par byang chub sku// gnyis med g.yung drung bde chen chos kyi sku// sku lnga dbyer med rol pa'i phrin las kyi// don dam phrin las yengs pa med par mdzad// lus kyi bsgul bskyod phyag rgya'i dkyil 'khor la// sku yi phrin las cir yang g.yos pa med// ma lus thabs su bsgyur ba'i phrin las kyis// gang zhig bsgral ba byang chub de thob nas// srog bcad nyid kyis thar lam bde ba thob// lus kyi spyad pas sangs rgyas zhing du grags// sku yi rol pas bde chen 'du 'bral med// snying po byang chub ma bkag yan du khye// don la 'dus ma byas pa'i rang bzhin la// ma lus yongs la snyoms pa'i phrin las mchog/na dang tsha bas sdug bsngal na// dngos po mtshan ma'i nad 'jom pa// 'di yang sku yi phrin las mchog/ bkres dang skom pas sdug bsngal na// chos nyid dngos po mtshan bsgribs pas// 'di yang sku yi phrin las mchog/ rgas dang rgud pas sdug bsngal ni// rtag chad don gyi mthar sbyor bas// 'di yang sku yi phrin las mchog/ grang dang 'dar bas sdug bsngal na// mtshan mar zhen pa rang spyod pas// 'di yang sku yi phrin las mchog/ skye dang 'chi bas sdug bsngal na// mi rtag gdon gyi mthar sbyor bas// 'di yang sku yi phrin las mchog/ bde dang skyid pa'i longs spyod dang// dro dang 'jam pa'i longs spyod dang// ro dang 'dod par longs spyod na// chos nyid don gyi ro tshor bas// 'di yang sku yi phrin las mchog/ sku yi phrin las 'di shes pa'i// rnal 'byor blo ldan gang spyod pa// don la the tshom med par 'grub// dgongs dang sku dang dus gsum du// 'du 'bral med pa'i phrin las mdzad// yengs pa med par bsgrub pa'i klong// gang zhig 'di dang mi ldan pa// thar pa'i dus med 'ching ba'i rgyu// legs par spyad kyang sdig pa'i shas// bsgrubs kyang don med g.yeng ba'i rgyu// 'di la gang zhig goms byed pas// nyes par spyad kyang legs pa'i lam// ma bsgrubs par yang grub pa'i gdeng// g.yung drung sku yi gter btsugs pa'o// sku yi skabs sbyor dang po'o//// da ni gsung gi skabs sbyor yid la zung zhigade la sangs rgyas kyi gsung gang yin pa sems can gyi ngag yin la/ sems can gyi ngag gang yin pa bdag gis smra ba ste/bdag gis smra ba brjod kyang rung/ ma brjod kyang rung/ bden par smras kyang rung/ rdzun par smras kyang rung/ snyan par smras kyang rung/ mi snyan par smras kyang rung/ sgra lhang lhang por smras kyang rung/gsang ste shub bur brjod kyang rung/ gang zag gi sgren tshig tu smras kyang rung/ man ngag gi chos nyid du brjod kyang rung/ 'dod chags kyi sbyor sngags su brjod kyang rung/ bzhad gad kyi bre mo'i gtam du smras kyang rung/zhe sdang gi khro gtum dang byams pa'i gtam ngag tu smras kyang rung ste/ phrin las kyi rgyal po skabs sbyor nyid du mdzad pa ste/ de ci'i phyir zhe na/ de ni 'di ltar ngag smra zhing brjod na/ skye ba med pa'i chos kyi dbyings rum nas/'gro ba 'dul ba'i thabs su thugs kyis dgongs nas/ mgur gyi bum pa las phyung/ ljags kyi dbang po la bkram nas/ snod kyi rim par bsgrags pas/ ngag gsung chos kyi 'khor lo bskor ba'i phrin las so// ngag gis ma brjod cing ma glengs na/ gsung chos nyid bden pa'i don la tshig tu ma gsungs pas kyang don go bar bzhed pas/ ma g.yos pa'i chos nyid kyi gsung la/skye ba med pa'i gsung cang mi gsung bar bzhugs pas/ ngag gsung brjod pa med pa'i phrin las so// ngag gis bden par smra na/ mar khu khol ma'i nang du chu mi gnas pa bzhin du/ chos nyid la rdzun gsung du mi mnga' ste/ci gsungs pa don dang ldan pas/ rdzun med pa'i rang bzhin te/ gsung bden pa'i phrin las so// ngag gis rdzun du smras shing brjod na/ gsung rab dam pa'i chos kyis nyon mongs pa 'khor ba'i chos bslu zhing 'brid la/rdzun dang 'dra ba yin pas/ gsung 'khor ba 'dren pa'i phrin las so// ngag gis snyan par smras shing brjod na/ chos nyid kyi byin rlabs kyis 'gro ba kun gyi yid tshim pa'i rang bzhin pas/dbang po tshim zhing go bar byed pas snyan par smra ba ste gsung kun dang mthun pa'i phrin las so// ngag gis mi snyan par smras shing brjod na/ dper na dgra sdang ba nyid kyang dge ba'i bshes gnyen la/mi snyan par smras pa nyid ni/ rgyu la shes pa che bas/ 'bras bu 'khor bar chags kyis dogs pas mi snyan par brjod pa ste gsung chags pa dang bral ba'i phrin las so// ngag gis sgra lhang lhang por brjod na'ang/sgras dbang po tshim zhing sgra mthar stong pa dang 'dra bar/ chos nyid skye ba med pa'i don gyis pha rol gyi yid tshim par byed cing/ chos thams cad rang bzhin gyis sgra mthar stong ste/ des sgra lhang lhang por brjod pas/gsung go bar sgrogs pa'i phrin las so// ngag gis gsang ste shub bur brjod de snying po ma yin pa'i snying po yid la bzlas pas/ gsang ste shub bur brjod pa ste gsung gsang ba'i snying po sngags kyi phrin las so// gang zag gis sgren tshig tu smras na/ 'dul ba'i dus la gang la bab par gsung ji skad bsgyur du rung bas/ don du mi 'gal na ni tshig nyid kyang sgren tshig tu smra ba ste gsung thabs mkhas pa'i phrin las so// man ngag gi chos nyid du brjod na/ chos kyi 'khor lo gsung dbyangs brgya dang ldan pas/ dbang po rab 'bring gsum la ji ltar 'dul ba bzhin go ba ni chos nyid du brjod pa ste/ gsung chos kyi 'khor lo bskor ba'i phrin las so// ngag 'dod chags kyi sbyor sngags su brjod na/ thams cad yab yum gyi tshul du sbyor ba'i brda skad du smra ba ste/ gnyis su med pa'i chos rnams kyi rang bzhin pas/ 'dod chags kyi sbyor sngags su brjod pa ste gsung gnyis su med pa'i phrin las so// ngag bzhad gad kyi bre mo'i gtam du brjod na/ dgyes pa chen po chos nyid kyi sgra brnyan du bstan pa ste/ rang bzhin gyis bstan pa nyon mongs pa rang ga mas mi dka' ba med pas/bzhad gad bre mo'i gtam du smra ba ste gsung dgyes pa chen po'i phrin las so// ngag zhe sdang gi khro gtum dang byams pa'i gtam ngag tu brjod pa ni/ gzung 'dzin gyi rnam par rtog pa sun phyung ba dang/ chos nyid zug rngu med pa'i snying rje bzung bas khro gtum dang gdams ngag smra ba ste gsung ji ltar 'dul ba bzhin du mdzad pa'i phrin las mdzad pa'o// de bas man ngag gsung gi phrin las mdzad pa ni/thams cad chos nyid du phrin las yengs pa med par mdzad pa ste/ de la 'di skad ces brjod par bya'o// rang bzhin spros bral de bzhin gshegs rnams kyi gsung/ brjod med ma skyes ye nas stong pa'i gzhi// tshig dang yi ger ma brtags mtshan ma med// dngos med ma skyes chos rnams 'byung ba'i mdzod// thabs la mkhas pas yongs la khyab par sgrogs// 'gro ba'i don mdzad gsung rab bdud rtsi'i bcud// ma rig log rtog kha lo gyen la bsgyur// dam pa chos kyi yon tan brjod mi langs// ji snyed brjod pas gsung rab rgya mtsho ste// theg pa'i bye brag blo la snang bar 'gyur// don 'di gang zhig blo la 'chang ba dang// nges par sems la gsal ba'i rnal 'byor des// ji snyed brjod pa chos kyi sgo mo la// pha rol gzhan gyis shes pas grol ba yis// gsung rab don dang ldan pa rgyal bas gsungs// gang zhig 'di dang ma ldan chos smra ba// bden par smras kyang pha rol mi go ste// dper na rgyal po ma yin dmangs rnams kyis// bden par smras kyang nyan pa med pa ltar// 'di dag mi shes rnal 'byor gzhan rnams kyis// don dang ldan yang gang yang 'dul ba med// zhal nas ci gsungs gsung rab bdud rtsi la// gzhan la ci brjod man ngag ston pa'i mchog/ tshig gi sgra skad skye med chos kyi dbyings// don gyi bden pas ngar 'dzin rtog pa med// lung dang ldan pas brjod pa don gyi dbang// bla ma'i lung las phyung ste bstan par bya'o// 'di dang mi ldan chos ston pa// dam chos nyams pa'i rgyur 'gyur ro// bshad kyang don med g.yengs pa'i rgyu// 'di ltar rtogs nas gang smra ba// log par bstan kyang nges pa'i lung// spros pa med pa'i chos mdzod de// man ngag bdud rtsi'i char phab pa'o// gsung gi skabs sbyor gnyis pa'o//// da ni thugs kyi phrin las kyi skabs sbyor 'di yid la zung zhig/ de la sangs rgyas kyi thugs gang yin sems can gyi yid la/ sems can gyi yid gang yin pa bdag gi sems te/ bdag gis bsams kyang rung/ma bsams kyang rung/ yid la dran yang rung/ ma dran yang rung/ nyon mongs pa lnga'i sems skyes kyang rung/ ma skyes kyang rung/ bzang por bsams kyang rung/ ngan par bsams kyang rung/gtsang bar bsams kyang rung/ mi gtsang bar bsam kyang rung/ dga' bar bsams kyang rung/ mi dga' bar bsams kyang rung/ skye bar bsams kyang rung/ 'chi bar bsams kyang rung/ rung bar bsams kyang rung/ mi rung bar bsams kyang rung/ skyes par bsams kyang rung/ bud med dang ma ning la sogs pa 'gro ba rigs drug tu bsams kyang rung/ ma bsams kyang rung/ gzugs dang kha dog la sogs pa yul dang dbyings su bsams kyang rung/ma bsams kyang rung ste/ phrin las kyi rgyal po skabs sbyor ba nyid du mdzad de/ de ci'i phyir zhe na/ de ni 'di ltar yid la bsams na/ chos nyid kyi klong na rig pa'i ye shes ma brjod pa'i dgongs pa rgyun mi 'chad pa ste yid rnal 'byor gyi dgongs pa la bzhugs pa'i phrin las so// yid kyis ma bsams pa 'dzin rtog med pa'i shes rab kyis rang bzhin byung tshor spong ba'i thabs la mkhas pa'i rol pa ste rnam par mi rtog smra bsam brjod las 'das pa'o// yod ces sgro ma btags/ med ces skur pa ma btab/ ci la yang sems kyis mi rtog pa'i sgo nas phrin las so// yid dam sems kyis dran na rang byung gi ye shes btsal ba med par rang byung ba ste/ mtshan ma med pa las mtshan ma med pa'i dbyings bye brag/ skye ba med pa las skye ba'i cho 'phrul du sems la ci dran snying rje chen po'i rang bzhin te/snang la rang bzhin med la phyogs dang ris med par khyab pas/ de tsam na phyogs dang ris su ma bzung bas thugs kun snang gi dgongs pa'i phrin las so// sems la nyon mongs pa lnga'i sems skyes na/nyon mongs pa nyid rgyu'i byang chub sems kyi rtsa ba ma nor ba ste/ sems 'dod chags na chos nyid spros pa med pa blo la snang ba'i 'dod chags pas/ gsung byang chub sems kyi rgyu/ sems zhe sdang na rnam par rtog pa'i mtshan ma mi gnas par sun 'byin pas/thabs mkhas pa'i zhe sdang yin pas/ thugs byang chub sems kyi rgyu/ sems gti mug na/ gzung 'dzin gyi rnam par rtog pa mgo rmongs shing mi gnas par/gti mug pas sku byang chub sems kyi rgyu/ sems nga rgyal na/ che ba'i yon tan gang gis kyang dpag gis mi langs pas/ gang gi dbang du mi btang bas/ yon tan byang chub sems kyi rgyu/ de nyid rgyu 'bras kyi don mi dmigs pa'i ye shes shes rab kyi sa zin pas/thugs ting nge 'dzin gyi dgongs pa'i phrin las so// sems de ltar ma skyes na gleng brjod kyi bsam pa ril dang bral bas/ thugs thig le chen po'i dgongs pa'i phrin las so// sems kyis bzang por bsams na de bzhin gshegs pa'i sku dang ye shes dang mdzad spyod la sogs pa blta bas mi ngoms pa'i don bzang po// gsal la rtogs par snang la rang bzhin med pas/thugs yongs su rdzogs pa'i ting nge 'dzin du dgongs pa'i phrin las so// sems kyis ngan par bsams na/ ngan pa nyid kyang rgyu nas bdas pas bzang po la/ bzang po nyid kyi 'bras bu nas ded pas ngan pa la thug pas/de yang gnyis su med pas thugs mnyam pa nyid dgongs pa'i phrin las so// sems kyis mi gtsang bar bsam na/ mi gtsang ba nyid kyang gtsang ba gtsang ba yang dag par shes pas/mi gtsang ba nyid don che ba yin pas/ thugs kun tu bzang po'i dgongs pa'i phrin las so// tshig kha shas chad// de ltar dbang thob pa la mi dga' bas/ de yang tha mi dad pas thugs gnyis su med pa'i dgongs pa'i phrin las so// sems skye ba yang bsams na rang bzhin med pa las skyes pas/ sku gsung thugs su byin gyis brlabs pas thugs byin gyis brlabs pa'i cho 'phrul du dgongs pa'i phrin las so/sems 'chi bar bsams na/ 'gyur ba med pa chos kyi skur ni dngos po dang mtshan ma thams cad ma skyes par 'chi bas/ thugs chos kyi sku'i phrin las so// sems rung bar bsams na/ thams cad du gsal la mi bsgrib pas/ting nge 'dzin gyi cho 'phrul bas/ thugs ting nge 'dzin gyi cho 'phrul du dgongs pa'i phrin las so// sems kyis mi rung bar bsams na yang/ tshig chad song/ so de las mi zhan pas/ thugs dbyer med pa'i dgongs pa'i phrin las so// sems kyis skyes pa dang bud med la sogs pa 'gro ba rigs drug gi sems su bsams na/ sems can gyi gzugs nyid sangs rgyas yin la/ 'gro ba rigs drug dang ye shes drug dang rigs lnga rang yin pas/thugs kyi dkyil 'khor du dgongs pa'i phrin las so// sems kyi spyod pa bsgom du bsams na/ ma bskyed kyang rtogs pa la tshang bas/ thugs bskyed bsgom dang bral ba'i dgongs pa'i phrin las so// sems gzugs dang kha dog la sogs pa yul dang dbyibs su bsams na/ rgya khyon dpag tu med pa'i gzhal yas khang rgyan dang kha dog gis brgyad pa'i rang bzhin pas/thugs ye nas lhun gyis grub pa'i gzhal yas khang du dgongs pa'i phrin las so// sems kyis ma bsams na/ gzhi nyid snying po byang chub kyi rang bzhin la/ ye nas byas zin pa la thugs btsal ba med cing/bskyed bsgom dang bral bas dgongs pa'i phrin las so// de bas na yid thugs kyi phrin las ni/ thams cad du ye shes kyi phrin las las yengs pa med par mdzad do// de la 'di skad ces brjod par bya'o// rang rig ye shes bde gshegs rnams kyi thugs// mi brjed ma yengs don gyi snying por rtogs// rang rig spros bral 'dzin med ye shes la// thabs mkhas bde chen byang chub sems rnams 'byung// thugs rje chen pos yongs la khyab par mdzad// 'gro ba'i don rdzogs thugs kyi phrin las ni/ mun pa'i sgo phye kha lo gyen du bsgyur// ye shes thugs kyi yon tan brjod mi langs// ci ltar dgongs pa ye shes rgya mtsho ste// dgongs pa'i man ngag yid la snang bar 'gyur// nges pa'i don 'di gang zhig rtogs pa dang// don la goms pa'i skyes bu chen po des// ci ltar bsams kyang dgongs pa'i klong du 'gyur// sems can gzhan gyi don kyang byed par nus// yang dag don dang ldan par rgyal bas gsungs// gang zhig 'di dag mi ldan thugs dgongs pa// don du bcos kyang shes par mi 'gyur te// dper na tshangs pa ma yin ngan rnams yin// legs par spyad kyang nyes par gyur pa dag/ 'di ltar ma rtogs gang zag gzhan rnams kyis// gzhung du bsgoms kyang gang yang 'grub pa med// sems la ci dran dgongs pa'i rgya mtsho la// gzhan la ci bsam rnal 'byor dgongs pa'i pul// sems kyi dran rtog thig le spros pa med// don gyi dgongs pas phyogs re'i rtog pa spangs// bka' dang 'tshams par brjod pa don du 'gyur// ston pa'i bka' las phyung ste bshad par bya'o// 'di dang mi ldan sems kyis sgom/ tshe chad ltung ba'i rgyur 'gyur ro// bsgoms kyang don med yengs pa'i rgyu// 'di ltar rtogs nas gang sgom pa// log par bsams kyang nges pa'i sa// kun tu bzang po'i thugs nyid la// sems kyi dgongs pa mthar phyin pa'o// thugs kyi skabs sbyor gsum pa'o//// da ni lta ba'i phrin las kyi skabs sbyor ba 'di yid la zung zhig/de ltar sangs rgyas kyi lta ba nyid sems can gyi yid du gcod la/ sems can gyi yid kyang sangs rgyas kyi lta bar yangs pa/ bdag cag gi lta ba chos thams cad la/ yod par blta yang rung/ med par blta yang rung/bde bar blta yang rung/ sdug bsngal du blta yang rung/ rtag par blta yang rung/ mi rtag par blta yang rung ste/ phrin las kyi skabs sbyor nyid du mdzad pa ste/ de ci'i phyir zhe na/ chos thams cad yod par blta na/chos thams cad ye nas sangs rgyas par yod par blta ba'i rgyu/ rnam par dag pa'i phrin las so// lta bas chos thams cad med par blta ba/ bdag nyid chen por lhun gyis grub par sangs rgyas pa la/ngan song 'khor ba'i sdug bsngal ye nas med par blta ba'i 'bras bu rnam par dag pa'i phrin las so// lta bas chos thams cad la bde bar blta ba ni/ 'dzam bu'i gling du gser du 'gyur na/ rdo btsal gyis mi rnyed pa bzhin/lta ba'i rgyal po 'di la sdug bsngal med cing/ thams cad du legs pa'i rang bzhin pas/ ci ltar snang ba bde bar gyur pas lta ba'i klong du gnas pa'i phrin las so// lta bas chos thams cad la sdug bsngal du blta na/bcos pa med pa g.yung drung du lta ba las ma gtogs pa/ zin chags dang rtsol sgrub sdug bsngal bas/ lta ba gdengs su gyur pa'i phrin las so// lta bas chos thams cad la rtag par blta na/skye shi 'pho 'gyur med pa'i chos kyi sku de ni/ dus gsum du 'pho 'gyur med par rtag pas/ lta ba ma yengs pa'i phrin las so// lta bas chos thams cad la chad par blta na/ dngos po dang mtshan ma rgyu dang 'bras bu la sogs pa rang bzhin bde ba chen po'i ngang du mi gnas par chad pas/ lta ba mngon du gyur pa'i phrin las so// don ldan bka' las bkrol te bshad par bya'o// 'jig rten med par gang blta ba// 'di yang blta ba'i phrin las yin// 'pho 'gyur med par gang blta ba// 'di yang lta ba'i phrin las yin// skye shi med par gang blta ba// 'di yang lta ba'i phrin las yin// bya btsal med par gang blta ba// 'di yang lta ba'i phrin las yin// yangs dog med par gang blta ba// 'di yang lta ba'i phrin las yin// rgyu 'bras med par gang blta ba// 'di yang lta ba'i phrin las yin// thams cad nga yin gang shes pa// 'di yang lta ba'i phrin las yin// lta ba'i rgyal po nam mkha' che// yongs la khyab cing dogs pa med// phyogs la brdal zhing dogs pa med// lta ba 'di la gang gnas pa// de ni lta ba'i phrin las yin// 'di dang mi ldan skye bo rnams// ci ltar bltas kyang dogs pa'i lam// don gyi shes pa 'byung bar dkon// 'di ni 'dren pa'i lam mchog tu// rgyal ba nyid kyis snying por gsungs// 'di 'dra zhes bstan dka' ba'i phyir// lta ba'i skabs sbyor bzhi pa'o//// da ni bsgrub pa phrin las kyi skabs sbyor 'di yid la zung zhig/ de la sangs rgyas kyi bsgrub pa gang yin pa/ sems can gyi rtsol ba yin la/ sems can gyi rtsol ba nyid kyang sangs rgyas kyi bsgrub par 'gyur bas/ sku dang phyag rgyar bsgrubs kyang rung/ ma bsgrubs kyang rung/ bsgrubs pa'i phrin las rdzogs kyang rung/ ma rdzogs kyang rung/ bsgrubs pa'i phrin las kyi skabs sbyor nyid du mdzad pa ste/de ci'i phyir zhe na/ de ni 'di ltar bsgrub pa sku dang phyag rgyar bsgrubs na/ sku dang phyag rgya la sogs pa thams cad byung yang bdag nyid las byung la/ chos thams cad kyang bdag nyid kyis thob par rang la rang chas su yod pas/bsgrub pa'i gzhung ma nor ba'i phrin las so// bsgrubs pa'i phrin las rdzogs na rig pa'i klong du gyur pa la/ las dang bya ba tshang zhing don dang man ngag rdzogs pas bsgrub pa thogs chags med pa'i phrin las so// bsgrubs pa'i phrin las ma rdzogs na/ don gyi man ngag nang nas shar ba la/ gnyis su med cing rtsol ba las ma grub pas/ ma rdzogs su zad pas/bsgrub pa btsal du med pa'i phrin las so// bsgrubs pa'i dngos grub thob pa'i don yin pas/ shes pa gdengs su chud/ rig pa nang nas gsal/ man ngag nges par thob pas/ bsgrub pa mthar phyin pa'i phrin las so// bsgrubs pa'i dngos grub ma thob na/ ye nas lhun gyis grub pa'i dngos grub la/ grub kyang gzhan du ma spangs la/ ma grub kyang med cing lus pa'i rgyu med pas/ bsgrub pa tshang zhing rdzogs pa'i phrin las so// de bas na bsgrubs pa'i phrin las dus gsum du yengs pa med par 'grub pa ste/ de la 'di skad ces brjod par bya'o// bsgrubs pa'i rgyal po sangs rgyas rnams kyi bka'/ tshul 'chang gzhung las phye ste bshad par bya'o// rgyu nyid dag pa gang bsgrub pa// 'di yang sgrub pa'i phrin las yin// rtsol bsgrub med par gang bsgrub pa// 'di yang sgrub pa'i phrin las yin/ ma btsal bzhag pas gang bsgrub pa// 'di yang sgrub pa'i phrin las yin// bcos med snying por gang bsgrub pa// 'di yang sgrub pa'i phrin las yin// mnyam pa nyid du gang bsgrub pa// 'di yang sgrub pa'i phrin las yin// thig le chen por gang bsgrub pa// 'di yang sgrub pa'i phrin las yin// ma bkag klong du gang bsgrub pa// 'di yang sgrub pa'i phrin las yin// kun tu bzang por gang bsgrub pa// 'di yang sgrub pa'i phrin las yin// bsgrub pa'i rgyal po rtsol ba yang// thams cad bsgrubs pas thams cad 'grub// grub tsam nyid na grub pa med// bsgrub pa med tsam rdzogs kyang rdzogs// snying po byang chub bcos med pa'i// rgyu 'bras med pa'i dngos grub 'di// sangs rgyas byang chub nyid kyis mkhyen// gang la phyogs char bstan pa 'di// de ni bde gshegs snying po min// don dang mthun pa'i rnal 'byor pa// don la the tshom med pa'i blos// sngags pa blo ldan 'di ltar bsgrub// de ni nam mkhar 'gro zhes bshad// pha dang ma la sogs pa dang// bu dang chung ma gang yin pa// yid 'ong chags pa'i gnas med de// rtog pas bsgral la bsgrub pa brtsam// byang chub snying por 'grub ces bshad// de skad ces ston pas bka' stsal pa/ rdo rje sems dpa' rtog pa skyes nas/ bcom ldan 'das la 'di skad ces gsol to// bcom ldan 'das pha ma la sogs pa/ mtshams med pa lnga'i las de/bsgrub pa'i mchog tu gsungs pa de/ e ma ho ngo mtshar lags na zhes gsol pa dang/ bcom ldan 'das kyis bka' stsal pa/ rdo rje sems dpa' pha ma rig pa dang/ ma 'dod chags dang/ bu snying rje dang/ chung ma nyon mongs pa dang/ yid 'ong gnyen sdug rtag chad rnams ni/ rang bzhin gyis mi gnas pas ni/ ma skyes pa nyid yid rang byung du bsgral na/ snying po byang chub sems kyi don ma nor bar rtogs pa yin te/ des na 'di skad ces bshad par bya'o// rnal 'byor rtog pas bsgrub pa na// pha bsgral ma bsgral gdod nas dag/ chung ma bu bsgral rnam rtog med/ yid 'ong gnyen bsgral bde ba thob/ 'di mtshams shig nas bsgrub pa'i mthar dang spyod pa'i skabs sbyor gyi dbu ma tshang/sangs rgyas 'bras bu thag mi ring// goms pa'i ye shes sus spyod pa/ spyod pa don dang mi 'gal ba'i phrin las so// spyod pa nang gi sems dran rtsol du mi spyad na/ rnam par mi rtog pa'i don gyi ye shes sus kyang ma byas ma bcos pas/rang bzhin mi 'gyur ba'i don la spyod pas/ spyod pa rtsol bsgrub dang bral ba'i phrin las so// spyod pas thams cad la gnyis su med par spyod na/phyi'i yul dang nang gi sems gnyis su med pas/ stong pa'i zhing nang gi sems dang/ phyi'i yul gnyis su med pas ma bcos pa/ de yang gnyis su med pa'i byang chub sems su lhun gyis grub pas/ 'du 'bral med pa'i klong de nyid 'dus ma byas par spyod pas/spyod pa mthar phyin pa'i phrin las so// spyod pa gnyis su med par mi spyod na// ye nas spyad zin pa la/ da rtsol ba nan tan du 'gyur ba de/ de dag rgyu 'bras gang la yang rag ma lus pa'i don du yin pas/spyod pa ma yengs par grub pa'i phrin las so// de bas na spyod pa'i phrin las ni/ thams cad du bde ba chen po'i rgyan gyis longs spyod spyod pa ste/ de la 'di skad ces brjod par bya'o// spyod pa'i rgyal po bde gshegs rnams kyi las// rnal 'byor thugs kyi sgrom bu dam pa las// nges par gsal ba'i lde mig sgo phye nas// rgyal ba'i bka' las phyung ste bshad par bya'o// phyi nang chos rnams thams cad la// dmigs pa med par gang spyod pa// 'dir yang spyod pa'i phrin las yin// 'khor ba'i las rnams thams cad la// rtogs dang ldan pas gang spyod pa// 'dir yang spyod pa'i phrin las yin// bdag dang gzhan du snang ba rnams// gnyis su med par gang spyod pa// 'dir yang spyod pa'i phrin las yin// phyogs dang ris su snang ba rnams// gnyis med rgyal por gang spyod pa// 'dir yang spyod pa'i phrin las yin// las rnams sangs rgyas las yin pa// spyod pa sangs rgyas nyid du spyod// rol pas thabs dang shes rab la// 'dod pa thabs kyis longs spyod pa'i// spyod pa gnyis su med par spyod// de bas rnal 'byor rdzogs ldan gyis// spyod pa'i phrin las brtsams so// hUM rang gi sems nyid gdod nas ma dag na// phyogs tsam bsgoms pas dag mi 'gyur// chos nyid bcos med ye nas yin shes na// de bzhin nyid kyi ting 'dzin ma bsgoms gsal// thabs kyi rtsa bar snying rjer ma shar na// 'phral du phyogs chas yongs la khyab mi 'gyur// gdal ba chen po'i blo yis spyir khyab na// kun tu snang gi ting 'dzin ma bsgoms gsal// rgyu nyid dag pa'i don nyid ma shes na// 'phral gyi dmigs pas rang rig gsal mi 'gyur// ye nas yin par rang sems gsal rtogs na// rgyu yi ting nge 'dzin nyid ma bsgoms gsal// rang rig gis yongs la ma brdal na// 'phral du yum mchog bskyed pa'i sku mi rdzogs// shes rab pha rol phyin par dbyer med na// snying rje'i yum mchog thabs dang shes rab rdzogs// sems kyi dbang phyug 'dod dgur bsgyur ba ma shes na// 'phral du thabs kyi ye shes lnga yi dbang mi chags/ kun gzhi phyogs bcur dbang bsgyur bas// ye 'byams chen po'i dbang mchog ma lus rdzogs// bde ba'i byin rlabs thig ler ma brlabs na// 'phral du dgongs pas sku gsung thugs mi rlob// rang byung bde bas khams gsum byin rlabs pas// sku gsum byin rlabs cho 'phrul rang bzhin tshang// yid kyi mchod pas stong gsum ma khyab na// 'phral du yud tsam bde ba rnyed mi 'gyur// yongs la khyab pa'i mnyes pa rgyun med na// mchod pa'i cho 'phrul don du ma bsgoms tshang// dgongs pa yid kyi ting 'dzin ma gsal na// 'phral du 'phro 'dus rig pa'i lha mi gsal// chos nyid rang gsal don gyi gting go na// ting nge 'dzin gyi cho 'phrul ma bsgoms gsal// don gyi bsnyen pa khong nas ma shes na// 'phral du mtshan mar brjod pas grub pa min// yid kyi bzlas brjod dus dang rgyun med na// rnal 'byor bsnyen pa'i cho ga yang dag rdzogs// rnam smin las kyis bdas pa'i srin po dang// nyon mongs 'dam gnas 'khor ba'i rU tra rnams// rtogs dang ldan pa'i lta bas ma btul na// mtshan mar bsgoms pas rtog pa'i gnas mi 'byongs// rnal 'byor rnams la don du 'di ltar bde// ma skyes phyir na thams cad gsalagasang bar yin namabar rigs// dngos po med pas 'di dag btul ba'i rdzas// zhen chags che bas mi bzhag bsgral bar bya'o// log par lta ba'i don gyi tsit+ta dbyung/ rgyu 'bras bslu bas phung po dug gsum sbyangs// nyon mongs rtsad bcad nang khrol thabs kyis drangs// dgongs pa'i ting 'dzin gsal bas don du gcig/ nam mkha'i mtha' ltar kun tu thug pa med// skye med byang chub sems ni yan du khye// mtha' la thug pa med cing dbyings las g.yos pa med// chos sku 'gyur med dus gsum klong na bzhugs// byang chub nyid de don du 'khrul pa med// ma bcos thig le dur khrod gcig tu 'khyil// rtag chad mtshan mar ma yin klong nas bdal// 'du 'bral med pa'i byang chub sems chen po// bde ba chen po'i drod ni nyams su myong// mi skye mi 'gag klong du phrin las rdzogs// thig le dgu ni dbyings su gsal// rnam shes dgu ni klong na 'phyo// he ru dgu ni rol pa mdzad// ye shes dgu ni mya ngan 'das// theg pa dgu ni don la gsol// phrin las dgu ni mkha' la rdzogs// lung chen dgu ni bka' las bkrol// zla gam dgu ni yum gyi dbyings// snang gsal dgu ni rig pa'i gdeng// dag go skyes bu chen po'i lha// rdo rje la yang nyid sbyor nas// rang gi don du bsgrubs pa'i lha// gzhan na sangs rgyas gnyis med pas// dus gsum rgyal bas 'di bsngags pa'o//// de nas rdo rje sems dpas 'di skad ces gsol to// e ma ho ngo mtshar rab 'byams kyis// sangs rgyas spyod pa khyad par che// ci ltar spyad kyang don dang mthun// 'dren pa'i lha la phyag 'tshal lo// zhes gsol to// de nas bcom ldan 'das kyis/ khams gsum gyi sems can thams cad rnam par dag pa ma rtogs pas/ las dang spyod pa thams cad 'khor ba'i rgyur gol bas/ rnal 'byor pa gsar bus don ma rtogs pas the tshom za ba la/gang zag ras chod mkhan gyis bka' phyin ci log tu bslad/ rgyu 'bras log par khrid/ drag shul gyis btsan thabs la ston pa 'jig rten gyi sgron mas kyang ma thul/nga rgyal gyi btsan tshig la byams pa'i ting nge 'dzin gyis kyang ma zhi/ gti mug gi ched ngag la zhi ba'i chos kyis kyang ma grol ba/ lta ba med pa'i ras chod/ dam tshig nyams pa'i gzu lums/ spyod pa rtsing pa'i tho cho/man ngag med pa'i btsan sbyor/ snying rje med pa'i btsan sgrol/ thar pa'i lam nub cing bden pa'i shan shor ba'i gang zag srin po'i spyod pa byed rnams dang por thabs kyis 'dul ba'i phyir/ hUM he he phaT b+h+yo// de nas drag pos 'dul bar mdzad pa'i phyir/ gu h+ya he ru ka rU tra tsal pa ha na ha na hUM phaT/ de nas mngon spyod kyis 'dul ba'i phyir/ gu h+ya rU tra mA ra ya pra b+han+dza na pra we sha ya swA hA/ de nas rnam shes hUM/ de nas phung po b+h+rUM/ de nas dug gsum phaT/ de nas lta bas 'dul bar mdzad pa'i phyir/ zhi zhi de ma mA A/ de nas don dang mthun par bya ba'i phyir 'di skad ces bka' stsal to// dang por gang yin nga yin pa// nga ni rgyal ba kun gyi yab// bar du thams cad ngas spyod pas// nga ni thams cad kun gyi rje// tha mar thabs kyis ngas 'dul ba// nga ni rnal 'byor yongs kyi dpon// khams gsum dag na nga dbang che// nga yi gong na su yang med// srid gsum char ltar phab kyang nga mi 'chi// khams gsum chu ltar 'brug kyang nga mi 'khyer// rgyud drug me ltar 'bar kyang nga mi 'tshig/ stong gsum rlung ltar 'phyo yang nga mi bskyod// dug gsum mun ltar 'thibs kyang nga mi 'thob// ye shes nyi ma shar yang gsal rgyu med// ma rig mun pa byung yang gnag rgyu med// skye shi ris su bcad kyang 'ching ba med// nyon mongs dug gsum gnas kyang yengs pa med// dngos grub rnam gsum yin yang chags pa med// chos sku 'gyur med 'grub kyang btsal ba med// rang byung nyid du gnas pas rag mi lus// snying po lhun gyis grub pas rten mi bca'// rnal 'byor spyod pa'i phrin las ni// dang po tha ma med pa la// yengs pa med pa'i las spyod pa// 'di ni phrin las dang po'o// yid kyi shes pa gsal btab nas// gsang chen nges pa'i don rig pa// 'di ni phrin las gnyis pa'o// rnal 'byor bla ma blo ldan la// lung dang mthun pa'i don bstan pa// 'di ni phrin las gsum pa'o// gzhan yang phrin las 'di spyod pa// rgyud 'di nyan par gang byed pa// snod kyi rim pa 'di dag go/dang por dad pa'i yon gyis bsten// bar du slob dpon mig ltar khur// tha mar man ngag gting nas nos// lta ba'i man ngag gdeng du tshud// sgrub pa'i man ngag phul du phyin// spyod pa'i man ngag gzhung du spyod// mtshan nyid ngang tshul bzang la shis// yongs la phrag yangs dogs pa med// kun dang mthun la spyod lam gsal// rang shes bskyungs la gzhan mi smod// dam la gnas shing bsgrubs l a brtson// g.yo med khong skyon rnam par spang// bka' bzhin byed dang don dang mthun// 'di dag bshad pa'i snod yin no// snod med rnams kyi rim pa ni// don med khyod la bshad par bya'o// dang por dad pa'i gzhung med pas// dbul bar mi dga' gzhan yang sdom// man ngag lung med gzhogs slong byed// ston pa'i bka' med yug sa'i tshig/ khe dang grags pa'i mtshan nyid pas// bla ma bkur bar mi sems shing// rang nyid che 'dod tshul 'chos byed// bka' la mi nyan 'khor kun bsgyur// phan pa med pa'i tshig rnams kyis// grogs po rnams kyi zhe gcod cing// bsnyen bsgrub rtsol ba ma byas par// mkhas par 'chos nas gzhan la smod// gsang ba'i bka' 'chal yongs su 'khyams// man ngag gsang 'dzag phyal par btang// mtshan nyid ngang tshul ngan pa der// 'di dag bshad kyang go mi 'gyur// kham sa la sogs snod nang du// seng ge'i 'o ma bzhos pa ltar// snod kyang chag la bcud kyang 'bo// de bas rin chen snod nang du// bcud mi bo bar gnas pa bzhin// bka' bzhin mi ldan rnal 'byor pa// bka' gsang yul du bstan mi bya// nyams pa'i rgyur 'gyur tshig par nges// de bas snod dang ldan pa yi// don gyi gter du 'di bcang ngo// 'di ni spyod pa'i phrin las te// 'jam por spyad na zhi ba'i las// mang bar spyad na rgyas pa'i las// kun gyi bzlums na dbang gi las// drag por spyod na mngon spyod las// ma spyad bzhag na chos nyid las// spyod pa'i phrin las mthar rdzogs pas// 'di ltar spyod pa'i phrin las yin// spyod pa'i rgyal po bde ba yin// kun la rol cing thams cad 'grub// sbyangs su spyod cing yangs pa med// snod dang mthun pas thams cad 'grub// spyod pa 'di la gang gnas pa// de ni mi 'ching grol bar 'gyur// rnal 'byor tshogs gnyis rdzogs pa yis// nges pa'i gzhung du de 'gyur ro// 'di dang mi ldan gang zag rnams// ci ltar spyod pa log pa'i lam// thar pa'i dus med 'o dod 'bod// 'khor bar khyams pa'i log pa'i chos// mnar med nyams par der 'gyur ro// de la dngos grub 'byung bar dka'// bus pas nor bas 'khrul pa'i chos// shin tu mtha' ring spyod par dka'// glang chen 'dam du zhugs pa bzhin// yan lag g.yab pas phyi phyir dam// 'di 'dra mi shes glen pa yis// dpyad cing btsal kyang phyi phyir dam// de bas rnal 'byor skal ba bzang// thams cad kun gyi snying po mchog/ ston pa nyid kyis 'di bsngags pas// snod ngan rnams la mi bstan pa'i// spyod pa'i skabs sbyor drug pa'o//// da ni dam tshig gi skabs sbyor 'di yid la zung zhig/ de la sangs rgyas kyi dam tshig gang yin pa sems can gyi sdom pa yin la/sems can gyi sdom pa gang yin pa sangs rgyas kyi dam tshig yin te/ rtsa ba dang yan lag gi dam tshig bsrungs kyang rung/ ma bsrungs kyang rung/ nyams kyang rung/ ma nyams kyang rung/ shes kyang rung/ mi shes kyang rung ste/ phrin las kyi rgyal po skabs sbyor nyid du mdzad pa de/ de ci'i phyir zhe na/ de ni 'di ltar te dam tshig shes na/ dam pa ni sangs rgyas des zhal nas gsungs pa'i tshig yin pas/ dam tshig chos rnams sgrogs pa'i phrin las so// dam tshig 'di dag ma shes na/ yang dag pa ma nor ba'i chos nyid de ni/ tshig dang yi ger bri ba las 'das pas// dam tshig chos nyid kyi phrin las so// rtsa ba dang yan lag gi dam tshig 'di ltar bsrungs na/thams cad du ma g.yos pa'i don yin pas/ tsheg dang yi ge gzung 'dzin gyi rtog pa bsrung bas/ dam tshig bka' dang mthun pa'i phrin las so// dam tshig 'di dag mi bsrung na/thams cad du bdag nyid byang chub sems su snang bas/ gzhan gang yang ma grub pas ci zhig bsrung ste/ dam tshig 'da' ba med pa'i phrin las so// dam tshig 'di dag nyams na'ang// rtogs pa klong du grol/ brtsams pa mthar phyin nas/ dngos grub las su rung bas/ dam tshig ma nyams pa'i phrin las so// dam tshig 'di dag nyams na'ang/ ye rgya chen pos thams cad la btab pas/ nyams pa'i rgyu med pas dam tshig bsrung du med pa'i phrin las so/de bas dam tshig gi phrin las thams cad ni/ thams cad nas thams cad du bsrung du med cing ma nyam pa'i dam tshig ste/ de la 'di skad ces brjod par bya'o// dam tshig rgyal po lhun grub snying po mchog/gsang chen nges pa 'da' med dam pa las// don gyi skyes bus zhus pas rab bkrol nas// mi yis seng+ges kun la bstan par bya'o// dngos po mtshan ma thams cad la// 'da' ba med par gang bsrung ba// 'di yang dam tshig phrin las yin// nyon mongs zug rngu thams cad la// g.yos pa med par gang bsrung ba// 'di yang dam tshig phrin las yin// lung dang mthun pa yang byed pa// 'di yang dam tshig phrin las yin// shes pa sgo yangs chos dang mthun// 'di yang dam tshig phrin las yin// gtsang sme med par gang za ba// 'di yang dam tshig phrin las yin// bzang ngan med par gang sbyor ba// 'di yang dam tshig phrin las yin// byams sdang med par gang sgrol ba// 'di yang dam tshig phrin las yin// spang len med par gang bgrod pa// 'di yang dam tshig phrin las yin// thogs chags med par gang spyod pa// 'di yang dam tshig phrin las yin// chags sdang med par gang shes pa// 'di yang dam tshig phrin las yin// nogs dang ldan pas gang thub pa// 'di yang dam tshig phrin las yin// snod dang ldan pas don 'byin na// 'di yang dam tshig phrin las yin// nges pa'i klong las yengs med par// 'di yang dam tshig phrin las yin// rgyud 'di 'dzin nam 'chang ba dang// klog gam rab tu bsgrub pa dang// yid la shes pa gang yin pa// 'di yang dam tshig phrin las yin// sngags pa blo ldan dad pa can// zang zing nor la chags med pa// 'di yang dam tshig phrin las yin// g.yo sgyu zol spang bden pa'i lam// 'di yang dam tshig phrin las yin// dngos po'i chos rnams thams cad kun// skye ba med par gang shes pa// 'di yang dam tshig phrin las yin// dam tshig phrin las mi shes pas// bslab pa ni las rnams log par byed// sgros med chos la ya ga 'dogs// rang bzhin med la phyogs char 'dzin// mnyam pa nyid la blang dor byed// nges pa'i don la dbye bsring can// bla ma'i lung med nga rgyal tshig/ rang shes byed 'dod nges pa med// log pa'i lam tshol bden pa nub// yongs la phrag dog kun dang 'gras// dam tshig tshul med nyams pa'i zhing// 'khor ba'i chos rten log pa'i lam// shes rab don med 'chal ba'i tshig/don med yug sa mu su na// don dang mthun pa'i gtan tshigs med// mu med gang zag smyo ba'i tshig/ des ni 'khor ba'i sgo phye bas// lag nas bzung la mngon du bsgal// sems nyid bdag dang gcig pa'i phyir// snying khrag khar yang btung bar bya'o// de dag bsgral na bde chen thob// de yang dam tshig phrin las yin// bzhag na nyams pa'i rgyur 'gyur ro/ de nas bston pa mnyam gzhag gis// rdo rje slob dpon bka' 'di bshad// yid bzhin rin chen 'byung ba yi// slob dpon blo ldan man ngag can// nges pa'i sgo 'byed gang yin pa// phangs med yon gyis sna drangs nas// lus ngag yid gsum phung po rnams// de la gus pas dbul bar bya'o// slob dpon de la mchod byas na/ phyogs bcu'i sangs rgyas mchod dang 'dra// bla ma de la phyag byas na// sangs rgyas bkur sti byas pa yin// rdo rje slob dpon brnyas byas na/sangs rgyas thams cad bslus dang 'dra// slob dpon bkur bar ma byas shing// man ngag nges pa ma thob par// gang zhig lung la spyod pa ni// 'bras bu med cing brlag par 'gyur// dus gsum nam du'ang mi 'bral zhing// bla ma de la yon gyis bslu// thugs nyid byang chub sems drang bas// rgyal ba kun la mchod dang 'dra// gnyis med dngos grub de yis thob// sangs rgyas nyid du de 'gyur ro// de nas rig pa'i bu mchog des// rgyud 'di gzhung dang bstun par mnyan// legs par bsgrims la sems la 'chang// sngags dang phyag rgya rgyun med pas// dus dang grangs dang bskal pa yis// 'di dag nams kyang bar mi gcad// gsang ba la ni dbyer med kyang// dam tshig nyams la gsang ba dang// snod du min la shin tu gsang// spyad par bya ba de dag la// gang yin rim par gsal rtogs nas// nges par phye ste bshad pa'i phyir/lung las bkrol te bshad par bya'o// de skad ces bka' stsal pa dang// rdo rje sems dpas gsol pa// bcom ldan 'das chos thams cad rgyu dang bral te/ ye nas lhun gyis grub pa'i ngo bo lags na/ de ci'i slad du dam tshig gi rim par phye ba lags/ bcom ldan 'das kyis bka' stsal pa/ rdo rje sems dpa' phyogs bcu dus gsum gyi bde bar gshegs pa thams cad ni/ mdzad pa thams cad mi mdzad pa yin/de ci'i phyir zhe na/ de ni 'dzin chags mi mnga' ba'i don no// sems dpa' chen po ba'i don rtogs gshegs pa rnams ni/ mi mdzad pa thams cad mdzad pa yin/ de ci'i phyir zhe na/ skye ba med pa las skye ba'i cho 'phrul du 'byung ba'i don no// sems dpa' chen po/ phyogs bcu dus gsum gyi bde bar gshegs pa thams cad ni/ zhal nas gsungs pa thams cad ma gsungs pa yin te/ de ni 'di lta ste/ chos nyid stong pa la ci yang gsung du mi mnga' ba'i don to// sems dpa' chen po/ bde bar gshegs pa rnams ni/ mi gsung ba gsung ba yin/ de ci'i phyir zhe na/ de ni ting nge 'dzin gyi sgo nas chos ston pas ma yengs pa'i blo gsal bar byed pa'i don to// sems dpa' chen po/ phyogs bcu'i bde bar gshegs pa ni bzhugs pa mi bzhugs pa yin/ de ci'i phyir zhe na/ de la snang la rang bzhin med pa'o// sems dpa' chen po/ bde bar gshegs pa ni/ ma bzhugs pa bzhugs pa yin te/ de ci'i phyir zhe na/ de ni thugs nam mkha' lta bus kun la khyab la/ mngon par shes pa'i ye shes lnga dang ldan pas/ ji ltar brtags pa bzhin/mtshan dang dpe byad dang ldan pa'i don to// sems dpa' chen po/ bde bar gshegs pa rnams kyi dam tshig 'di dag bsrung ba mi bsrung ba yin/ de ci'i phyir zhe na/ de ni mnyam pa nyid kyi don la 'da' zhing nyams pa med pa'i don to// sems dpa' chen po/ de bzhin du chos thams cad yod pa med pa yin/ de ci'i phyir zhe na/ de ni dngos por ma grub cing/ rtag pa can ma yin pa'i don no// sems dpa' chen po/chos thams cad med pa yod pa yin/ de ci'i phyir zhe na/ de ni stong nyid chad pa nyid dngos po'i rgyur 'gyur ba'i phyir ro// sems dpa' chen po/ chos thams cad snang ba mi snang ba yin/ de ci'i phyir zhe na/ mi rtag pa'i mtshan nyid do// sems dpa' chen po/ chos thams cad mi snang ba snang ba yin// de ci'i phyir zhe na/ nyon mongs pa phyin ci log gi las btsan pa'o// sems dpa' chen po/ chos thams cad don mi dmigs pa'i gtan tshigs kyis so sor 'grel te ji skad gsung la/gang du yang gsung ba med pa'i don to// de skad ces bka' stsal pas/ rdo rje sems dpa'i rtogs pa'i bag chags byang ngo// de nas yang bcom ldan 'das kyis 'di skad ces bka' stsal to// dam tshig 'di dag gang bsrung ba// de ni ma nyams thar bar 'gyur// sngags pa dam tshig mthar phyin pa'i/ sa ma ya yi gzhung du 'gyur// gal te gzhung 'di ma shes pas// ci ltar bsrungs kyang nyams par 'gyur// dmyal ba'i spyod pa ya re nga// 'khor ba'i sdug bsngal bzod blag med// de las thar bar rab tu bka'// nor pas lam nor bar khrid pa// 'khrul pas byang chub nyid las gol// thams cad kun gyis brtag dka' bar// snying po'i lung du 'di bstan pas// snod dang ldan la bstan pa'i phyir// dam tshig skabs sbyor bdun pa'o//// bcom ldan 'das kyis rgyud kyi phan yon 'di skad ces bka' stsal to// sems dpa' chen po/ rgyud 'di gang zhig 'dzin pa na/ sangs rgyas thams cad kyi sku gsung thugs kyi phrin las nyid yongs su rdzogs par 'dzin pa ste/ de ni chos kyi dbyings dang tha mi dad do// rang byung gi ye shes kyang btsal ba med par lhun gyis grub pas/ phyogs bcu dus gsum gyi sangs rgyas thams cad kyi thugs ye shes kyang rgyud 'di nyid yin la/ rgyud 'di yang thugs ye shes te/rgyud 'di 'dzin pa la thams cad kyis bdag nyid ston pa 'jig rten gyi mgon zhes bstod de/ dus gsum du phan yon che bar gyis bshigade skad ces bka' stsal pa dang/ rdo rje sems dpa' la sogs pa gnyis su med pa'i 'khor thams cad phrin las kyi rgyal po mthar dus gcig tu rdzogs nas/ma bcos pa'i klong dgongs pa lhun gyis grub nas bzhugs so// 'di lta bu'i rgyud 'di ston pa gang gis kyang zhal nas ma gsungs/gsung bar yang mi 'gyur la/ ston pa nyid kyis gsungs shing bstan pas/ de nyid kyi don de nyid la yid ches nas/ de nyid la gsal bar gyur to// de bzhin gshegs pa thams cad kyi sku dang gsung dang thugs la sogs pa'i phrin las kyi rgyal po skabs sbyor bdun pa'i rgyud/nges par bstan pa'i 'bras bu bskor ba rdzogs so//// rdo rje yang dbang gter gyi lags/

CLOSE WINDOW