CLOSE WINDOW

Gpb008.018
བོད་ཡིག

/// bcom ldan 'das bya bral rdzogs pa'i ngang la phyag 'tshal lo// de nas gsang ba'i bdag pos chos nyid kyi ngang las bzhengs te/ phyogs bcur zhal rnam par gzigs nas/ 'di skad ces gsungs so// kye sems dpa' rdo rje nyon cig/ khyod la sogs pa'i 'khor rnams kyis// kun tu bzang po'i don mchog ste// nga yi don 'di rtogs mi 'dra// rtogs mi 'dra bas yid mi ches// nga yi don 'di rtogs par gyis// zhes gsungs so// de nas sems dpa' rdo rjes 'khor gyi nang nas langs te/ 'di skad ces gsol to// 'khor los sgyur rgyal ma mthong na// che zhing gnyen por yid mi ches// 'khor los sgyur rgyal mthong tsam na// gzod cig che zhing gnyen blo skyes// bu ram khar bcug ma mur na// bu ram mngar ba'i ro mi tshor// bu ram khar bcug mur tsam na// gzod cig mngar ba'i ro dang phrad// kun tu bzang po nyid kyi don// ma bshad bar du go mi 'gyur// bshad na gzod cig go ba skye// de don bdag la bstan du gsol// zhes gsol pas/ gsang ba'i bdag pos gsungs pa/ kye sems dpa' chen po nyon cig/ri rnams thams cad blta 'dod na// lhun po'i rtse nas cig char ltos// chu rnams thams cad 'thung 'dod na// rgya mtsho'i chu la ngoms par 'thungs// rdzogs chen 'bras bu 'thob 'dod na// rtsol med sems kyi ngang la zhog/sangs rgyas sa ru 'gro 'dod na// gnyis med lam la zhugs la song// zas med zas la spyod 'dod na// ye shes mngon gyur zas la spyod// chos nyid ngo bo rtogs 'dod na// 'phrul gyi me long 'di la ltos// zhes gsungs so// bang mdzod 'phrul gyi me long las// chos nyid kyi don zhus pa'i le'u ste dang po'o//// de nas sems dpa' rdo rjes 'di skad ces gsol to// kye gsang ba'i bdag po lags// rtag chad gnyis kyi mtha' gang lags// rtag chad mtha' ni gang gis bsal// 'jig rten snang tshul ji ltar lags// 'khrul pa'i 'bras bu ji ltar lags// 'khrul pa'i snang tshul ji ltar lags// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ mngon sum rtog dang bral ba can// mngon sum nyid du grub pa yin// mngon sum nyid las dgag mi rig/gang gis 'geg na chad pa'i mtha'// mngon sum snang yang rmi lam bzhin// snang yang dngos por grub pa med// gang zhig mngon 'dzin rtag pa'i mtha'// rang bzhin gnas pa'i chos nyid la// yod med sgro dang skur ma 'debs// ma dmigs phyir na ngang gis stong// zhes gsungs so// yang gsungs pa// mngon sum rten 'brel rkyen gyis snang// rkyen ma 'dus par snang mi srid// dper na mdung khyim lta bu'o// rmi lam sngar zhen bag chags yin// mthong thos byas phyin bag chags rnams// sngar zhen sems la yod pa'i phyir// rmi lam dag tu snang ba yin/ sngar zhen med na snang mi srid// ces gsungs so// yang gsungs pa// ting 'dzin rtogs pa sngon la bcug/ phyi mas long btags gsal btab pas// ting 'dzin phyag rgyar gsal ba yang// de yang rtogs pa'i 'bras bu yin// zhes gsungs so// yang gsungs pa// tho mi thag sbrul smig rgyu chu// 'dra gzhi tsam la brten nas ni// sngar zhen yid kyi 'khrul snang yin// sngar zhen med na 'khrul mi srid// gal te med kyang 'khrul na ni// ri bong rwa dang mo gsham bu// rus sbal spus kyang 'khrul bar rigs// zhes gsungs so// bang mdzod 'phrul gyi me long las/ 'jig rten gyi snang tshul dang rtag chad kyi mtha' bsal bar bstan pa'i le'u ste gnyis pa'o//// yang gsol pa/ kye kye gsang ba'i bdag po lags// mi rigs rigs par bshad pa gang// rgyu las ma byung 'bras bu dang// sems las ma byung sangs rgyas dang// lung las ma byung man ngag dang// chos sku dri ma yod pa dang// sku dang ye shes 'khrul snang dang// sangs rgyas rtog pa yod pa dang// 'byung bzhis ma bskyed sems can dang// 'gro ba drug la ma gtogs pa'i// sems can yod ni mi srid na// gal te yod na de nyid gang// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ byang chub sems kyi chos nyid de// ye nas sangs rgyas yin pas na// bsod nams rgyu las ma byung bas// rgyu las ma byung 'bras bu yang// mi rigs rigs par bshad pa yin// sems kyi rang byung ye shes de// shes dang dran las byung ba med// sems las ma byung sangs rgyas kyang// mi rigs rigs par bshad pa yin// byang chub sems kyi chos nyid de// nyams su blang ba'i man ngag ste// rgyal ba'i lung la mi ltos par// lung la ma brten man ngag kyang// mi rigs rigs par bshad pa yin// chos skus 'gro ba kun khyab pas// chos sku dri ma yod pa yang// mi rigs rigs par bshad pa yin// sku dang ye shes bzang 'khrul bas// sku dang ye shes 'khrul snang bar// mi rigs rigs par bshad pa yin// dus gsum sangs rgyas thams cad la// snang ba thun mong mi 'gog pas// sangs rgyas rtog pa yod pa yang// mi rigs rigs par bshad pa yin// skye mched mu bzhi'i lha rnams kyang// 'byung ba bzhi la ma ltos pas// 'byung ba bzhi yis ma bskyed pa'i// 'gro drug sems can yod pa yang// mi rigs rigs par bshad pa yin// bar ma do yi srid pa yis// 'gro ba gang gi rgyud ma bzung// 'gro drug ma gtogs sems can yang// mi rigs rigs par bshad pa yin// zhes gsungs so// bang mdzod 'phrul gyi me long las/ mi rigs rigs par bshad pa'i le'u ste gsum pa'o//// yang gsol pa/ kye kye gsang ba'i bdag po lags// sangs rgyas sems can bde sdug bsngal// bzang ngan che chung skyon yon tan// chos dang chos nyid bden rdzun gnyis// phyi yi yul dang nang gi sems// gcig pa lags sam tha dad lags// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ gong du dris pa'i don de dag/ ma rtogs pa la tha dad snang// byang chub kyi ni don rtogs na// thams cad dbyer med gcig gi ngang// zhes gsungs so// bang mdzod 'phrul kyi me long las// gcig pa dang tha dad pa'i mtha' bsal ba'i le'u ste bzhi pa'o//// yang gsol pa/ kye kye gsang ba'i bdag po lags// chos nyid bkol ba med pa la// thig le drug phye mi 'gal lam// che ba yon tan bsam yas la// che ba lngar 'dus mi 'gal lam// chos nyid ngos bzung med pa la// yin pa gsum po mi 'gal lam// gsang ba'i bdag pos bstan du gsol// gsang ba'i bdag pos gsung pa/ kye sems dpa' chen po nyon cig/ chos nyid bkol ba med pa la// thig le drug tu phye ba yang// byang chub sems kyi chos nyid kyi// yon tan cha la brtsis nas phye// de phyir de la 'gal ba med// che ba'i yon tan bsam yas la// che ba lnga ru bsdus pa yang// gzhi ni yo ga bzhi dang sbyar// gcig ni kun gyi la bzla bas// de phyir de la 'gal ba med// chos nyid ngos gzung med pa la// yin pa gsum du bstan pa yang// byang chub sems kyi chos nyid de// kun dang 'brel pas rgyud kyang yin// yang dag lam du zhugs pa yin// bzung du rung bas lung yang yin// nyams su blang ba'i chos nyid du// byang chub sems las med pa'i phyir// de phyir man ngag dam pa yin// des na de la 'gal ba med// sems kyi chos nyid ci bzhin la// de ni kun tu bzang mo yin// rtsal dang nus pa ma 'gags pa// de ni kun tu bzang po yin// ji ltar mtsho dang rlabs bzhin nam// dung dang dkar ba'am gser dang ser// don la bkol ba med par gnas// de phyir de la 'gal ba med// ces gsungs so// bang mdzod 'phrul gyi me long las/ gal po blo rdeg gi le'u ste lnga pa'o//// yang gsol pa/ kye gsang ba'i bdag po lags// chos zhes bgyi ba gang la bgyi// nyid ces bgyi ba gang la bgyi// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ ji ltar snang ba'i chos rnams la// chos zhes ming du btags pa yin// rang bzhin med pa chos nyid yin// chos ni sa yin chos nyid sra ba yin// chos ni chu yin chos nyid gsher ba yin// chos ni me yin chos nyid tsha ba yin// de la sogs pa gzhan yang brtsi bar bya// chos ni byang chub sems yin te// chos nyid rig cing gsal ba'o// de sogs bshad pa'i don rnams ni// chos dang chos nyid gtan la dbab// ces gsungs so/ bang mdzod 'phrul gyi me long las/ chos dang chos nyid bstan pa'i le'u ste drug pa'o//// yang gsol pa/ kye kye gsang ba'i bdag po lags// nyan bsam bsgom pa'i khyad par ci// gsang ba'i bdag pos bstan du gsol// gsang ba'i bdag pos gsungs pa/ kye sems dpa' chen po nyon cig/ don nyid nyams su ma blangs na// ci tsam zab mo'i tshig brjod kyang// don dang mthun par de mi 'gyur// bshad pa tshig gi than pa yin/ zur ka'i 'jag ma 'phyur ba 'dra// bsgoms pas chos nyid don dang ldan// tshig tu brjod nas bshad pa ni// bu ram lo rgyus bshad pa 'dra// bsgoms pa'i gdams ngag phog pa ni// bu ram lag tu gtad pa 'dra// don nyid nyams su blangs pa ni// bu ram khar bcug myong ba 'dra// zhes gsungs so// yang gsungs pa/ ting 'dzin don dang mi ldan na// thos pa mang po'i tshig bsags kyang// byis pas rtsis sogs byed pa 'dra// de yang ye rngam chos la za// chos nyid don dang 'byor pa med// mnyam pas tshig gi go ba skye// bsams pas dpyod pa'i shes rab skye// bsgoms pas don gyi go ba skye// de phyir nyams su blang ba gces// zhes gsungs so// bang mdzod 'phrul gyi me long las// mnyan bsam bsgom pa'i khyad par bstan pa'i le'u ste bdun pa'o//// yang gsol pa/ kye kye gsang ba'i bdag po lags// rdzogs chen rang byung ye shes der// pha rol phyin drug ji ltar 'dus// zhi gnas lhag mthong ji ltar 'dus// phrin las rnam bzhi ji ltar 'dus// sku gdung ring bsrel ji ltar 'dus// sngags kyi don rnams ji ltar 'dus// thabs dang shes rab ji ltar 'dus// bsnyen bsgrub rnam bzhi ji ltar 'dus// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/rig pa khyab gdal snyoms pa ni// sbyin pa'i pha rol phyin pa 'dus// chos nyid ngang las ma yengs pas// tshul khrims pha rol phyin pa 'dus// mtshan ma'i chos la mi skrag pas// bzod pa'i pha rol phyin pa 'dus// shes rig dran pa ma nyams pas// brtson 'grus pha rol phyin pa 'dus// mi g.yo brtan par gnas pas na// bsam gtan pha rol phyin pa 'dus// dmigs med bsam dang bral bas na// shes rab pha rol phyin pa 'dus// zhes gsungs so// yang gsungs pa/ sems kyi rang byung ye shes de// rig pa phyi nang gsal bas lhag mthong yin// gsal ba don la ma yengs zhi gnas yin// zhes gsungs so// yang gsungs pa/ sems kyi rang byung ye shes de// gzung 'dzin med pas zhi ba yin// kun la khyab pas rgyas pa yin// sems la dbang thob dbang yin te// rnam rtog 'joms pas drag po yin// zhes gsungs so// yang gsungs pa/ sku ni ston pa sku gsum ste// nga yi rang bzhin chos sku yin// nga yi ngo bo longs spyod rdzogs// nga yi thugs rje sprul pa'i sku// gdung ni sangs rgyas kun gyi thugs// ma yengs gnas pa ring bsrel yin// zhes gsungs so// yang gsungs pa/ sngags ni rnam pa gsum yin te// rig sngags gsang sngags gzungs sngags so// sems kyis kun la khyab mod kyang// kun gyis rtogs par dka' ba'i phyir// gsang sngags zhes su btags pa yin// de don phyin ci ma log pa// rig sngags zhes su btags pa yin// rtogs pa'i ngang las ma yengs pa// gzung sngags zhes su btags pa yin// de phyir sems ni sngags kyang yin// zhes gsungs so// yang gsungs pa/ snang ba lam du khyer ba thabs yin te// zhen cing chags pa med pa shes rab min// sems ni thabs dang shes rab tshul du gnas// zhes gsungs so// yang gsungs pa/ byang chub sems ni bsnyen pa ste// rtogs pa'i blta ba nye bsnyen yin// nyams su blangs pa sgrub pa yin// mngon du gyur pa sgrub chen yin// de ni bsnyen sgrub tshul dang ldan// zhes gsungs so// yang gsol pa/ kye gsang ba'i bdag po lags// byang chub sems kyi chos nyid de// slob dpon don dang ji ltar ldan// slob bu don dang ji ltar ldan// dkyil 'khor don dang ji ltar ldan// gzhal yas khang dang ji ltar ldan// bag chags tshul du ji ltar gnas// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/slob dpon ma mthong sems nyid mthong// rang sems bla mar gnas pas na// kun gyi slob dpon skal pa bzang// gnyis med slob dpon dam pa ste// log sred can la bka' mi stsol// bsam gyis mi khyab yul slob bu// rdo rje sems dpa'i spun yin pas// rgyal bas sras kyi dam par gsungs// rang rig sems kyi slob bur gnas// zhes gsungs so// yang gsungs pa/ sangs rgyas kun gyi byang chub sems// bla na med par thugs chud pa// de ni dkyil 'khor chen por gsungs// chos nyid byang chub sems dkyil na// rang rig ye shes 'khor gyis bskor// rdo rje rang 'khrungs dkyil 'khor yin// kun gzhi dpal gyi maN+Dal la// rnam shes srad bus thig chen brgyad// ye btab dkyil 'khor rgyun mi 'chad// ces gsungs so// yang gsungs pa// ma bcos ji bzhin sa gzhi la// gsal la mi rtog phyi nang rmang// snang srid sa rdor spungs pa la// dran pa rgyun gyi rtsig pa brtsigs// dran pa yang dag them skas brgyad// bsdu ba rnam thar tshad med sgo// rdzu 'phrul rta babs dag gis brgyan// yang dag brgyad kyi ka ba btsug/ mi 'jigs rig pa'i gdung chen bres// rang byung ye shes dbu rtse 'phags// ye shes lnga dkar mthong nas bcal// theg chen gsang sngags sil snyan sgrogs// bden gnyis khyams kyi nges par mdzes// blo yi rim dang sbyar nas ni// 'og khang bar khang gsum thog rtse// phyi dang nang med kun tu nang// rang byung sems kyi gzhal med khang// zhes gsungs so/ yang gsungs pa// bag chags rgyu ru bstan pa ni// lhan cig skyes pa'i ma rig pa// rkyen ni 'dod yon rnam pa lnga// ngo bo lus ngag yid kyi las// dbye ba dge sdig dkar nag chos// gsog pa'i gzhi ni kun gzhi la// dgong pa'i bdag po yid gnyis te// 'bras bu 'gro ba drug tu smin// zhes gsungs so// bang mdzod 'phrul gyi me long las/ don rnam par brtse ba'i le'u ste brgyad pa'o//// yang gsol pa/ kye kye gsang ba'i bdag po lags// rdzogs chen spyod pa'i rnal 'byor pas// chos rnams kun gyi ngo bo la// rgya gzer rtsi yis ji ltar btab// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/rdzogs chen spyod pa'i rnal 'byor pas// don gyi ngo bo rtogs 'dod na// bse sgrom gsum pa'i lde mig gis// nges pa'i gsang sgau dbye bar bya// nges pa'i gsang sgo phye nas ni// kun gzhi sems kyi nam mkha' la// rang byung ye shes 'od shar ba// nges pa'i gsang mdzod chen po na// mi zad gter chen yod pa mthong// sems kyi rang byung ye shes de// chos rnams kun gyi ngo bor shar// dper na zangs srang brgya dag la// gser srang gcig gi rtsi btang bas// thams cad gser du 'gyur ba bzhin// chos rnams kun gyi ngo bo la// byang chub sems kyi rtsi btang bas// rang byung ye shes chen po'am// chos nyid min pa gang yang med// dper na rin chen gser gling na// thams cad gser las med pa'i phyir// sa rdo btsal kyang mi rnyed 'gyur// de bzhin rdzogs chen rnal 'byor pas// snang srid sems su thag chod na// byang chub sems las ma gtogs pa'i// chos rnams gzhan nas 'tshol ba ni// rgyal bas btsal yang mi rnyaid do// rgyu 'bras snang stong la sogs pa// gcig la gcig gis rgya yis gdab// byang chub sems kyi don rtogs na// sangs rgyas sems can gnyis med mnyam// bde dang sdug bsngal gnyis med mnyam// bzang ngan che chung gnyis med mnyam// skyon dang yon tan gnyis med mnyam// chos dang chos nyid gnyis med mnyam// don dam kun rdzob gnyis med mnyam// phyi nang yul sems gnyis med mnyam// mnyam pas rim par bkod pa med// ji ltar snang ba'i chos rnams kun// byang chub sems su gsal thebs na// rang rgyud 'dzin pa'i zhen pa ldog/chos rnams kun gyi ngo bo la// tshad gsum gtan la phebs pa na// gdeng dang yid ches de la skye// de ni mi 'gyur brtan pa'i gzer/ zhes gsungs so// bang mdzod 'phrul gyi me long las/don gnyis gtan la dbab pa'i le'u ste dgu pa'o//// yang gsol pa/ kye kye gsang ba'i bdag po lags// 'jig rten 'jig rten 'das pa'i gsung// de yi bye brag ji ltar lags// gsang ba'i bdag pos bstan du gsol// gsang ba'i bdag pos gsungs pa// kye sems dpa' chen po nyon cig/ snyan par smra ba tshangs pa'i dbyangs kyi gsung// bdud kyi bu mo la sogs pa// kun kyang chags pa skye bar byed// blo ldan skyes bu gang dag gis// gsung bzhin gtan la phebs gyur na// smra ba'i gtan tshigs rmongs mi 'gyur// bde gshegs rgyal ba sangs rgyas kyis// blo yi rim par dgongs nas ni// rang rang mthun pa'i tshig dgu smras// gang 'thad yul la ldem du bcug/ bde gshegs rgyal ba sangs rgyas kyis// sku drug rnam par sprul nas ni// gsung drug brjod nas 'gro drug 'dren// bde gshegs rgyal ba sangs rgyas kyis// gsung drug dgongs pa'i bshad pa ni// ci bzhin ma yin dgongs pa bshad// dgongs bshad ma yin ci bzhin pa// nges dang ma nges rnam pa can// zhal nas gsungs shig spred sangs la// 'gro bas don rnams so sor go// gong nas gong gi zhen blo ldog/ bde gshegs rgyal ba sangs rgyas kyis// thugs nyid zhi las ma g.yos kyang// 'jigs tshul rngam pa'i skur sprul nas// 'dar 'gyel 'jigs skrag dngangs par byed// snang srid snod bcud thams cad kyi// sgra skad bsam gyis mi khyab pa// kun kyang gsang sngags gsang ba'i tshig/ 'jig rten yongs kyi spyod yul la// sangs rgyas gsung gi zab mo 'byung// rdzogs chen a ti yo ga'i gsung// mchog tu gsung ba'i chos nyid ni// mi gsung mnyam bzhag brjod pa ste// yi ge med pa don gyi gsung// tshig tu brjod pa spangs pa ste// brjod pa kun gyi rgyu gzhi yin// tshig gi dbang po tshig gi bdag/ tshig kun rab tu gsal bar byed// ri rab ri yi rtse mo na// mtshan dang ldan pa'i dpe byad can// zhal gyi sgo nas mi brjod kyang// rang gi ngo bos chos rnams ston// zhes gsungs so// bang mdzod 'phrul gyi me long las// gsung gi yan lag rnam par phye ba'i le'u ste bcu pa'o//// bang mdzod 'phrul gyi me long las// rgyud phyi ma'i phyi mar byas pa/ ma tshang ba kha skong ba rdzogs so//// 'jam dpal bshes gnyen/ shrI sid+ha/ des bi ma la/ des g.yu sgra snying po/ des dz+nyA na ku mA ra/ des sangs rgyas ye shes rin po che/ des sgrags kyi yang rdzong du/ su la yang ma spel bar thugs kyi dgongs pa de la mdzad do// tha ma 'gar sras la yang thugs ma ches par// man ngag bzhag pa'i snod ma rnyed nas/ dar dril bu tshigs su bcad nas sbas so// las 'phro can dang 'phrad par shog/

CLOSE WINDOW