CLOSE WINDOW

Gpb007.003
བོད་ཡིག

/ 'byung po kun 'dul gyi rgyud ces bya ba rdzogs so//// rgya gar skad du// de ba tan+d+ra b+hi She ka ta rat+na tsakra nA ma// bod skad du// lha rgyud dbang rin po che'i 'khor lo zhes bya ba// bcom ldan 'das dpal kun tu bzang po la phyag 'tshal lo// 'di skad bdag gis thos pa'i dus gcig na// chos kyi dbyings gdal ba chen po'i pho brang na// rgya yongs su ma chad pa'i zhing khams// gser gyi 'od zer rab tu 'phro ba zhes bya ba// baiDUr+ya zhun mas rang nan du byas pa'i sa gzhi// ma 'dres pa yongs su rdzogs pa'i gnas chen po// gser la rin po ches spras pa'i gnas de na bcom ldan 'das kun tu bzang po bzhugs te// 'khor nyid las mi gzhan pa'i 'khor// ye shes rnam pa lnga la sogs te rgyal sras sprul pa'i 'khor// rdo rje sems dpa' dang// dbang med dad pas 'dus pa'i 'khor mkha' 'gro ma rdo rje drag mo khro gnyer gdong zhes bya ba dang// sgrol ma dang 'od zer can dang// phag gdong ce spyang la sogs te// dur khrod kyi bdag mo glog gi phreng ba la sogs pas bskor te// de yi tshe de'i dus su gsang ba'i bdag pos bcom ldan 'das la gsol pa// kye bcom ldan 'das kun tu bzang po lags// bdag cag 'khor dang bcas pa la// dbang bskur brda dang bcas pa bstan du gsol// zhes zhus pas// kun tu bzang pos bka' stsal pa// rgyal thabs spyi blugs dbang dang ni// sprul sku thug phrad dbang dang ni// rig pa rtsal gyi dbang dang ni// mtshan ma zil gnon dbang dang ni// dbul mo gter gyi dbang dang ni// rgyal po'i bka' rtags dbang dang ni// blon po'i bka' chad dbang dang ni// btsun po dpa' mo'i dbang bstan to// zhes gsungs so// dbang rin po che 'khor lo'i rgyud las// gleng gzhi'i le'u ste dang po'o//// bcom ldan 'das kyis bka' stsal pa// rgyal thabs spyi blugs dbang bstan pa/ sngon rgya gar yul grong khyer ser skya zhes pa ru// rgyal po'i phrug gu ltad mo la phyin pas// rgyal bu rkang 'khyams so// sprang po dang khyad med do// de nas blon pos ngo shes so// rgyal bu la khrus byas te dbang bskur ro// dus de tshun chod du mnga' 'og tu 'dus so// dpe de bzhin du// thog ma sangs rgyas kyi spyi sa nas// 'gyu ba'i 'od lnga mthong ba las// 'khor ba'i 'khrul pa la sogs spyad// 'gro drug gnas las thar ba med// de nas ngo sprad bstan pa yis// sangs rgyas sa yi dbang bskur bas// rgyal thabs ye shes dbang bskur yin// ye shes dbang bskur zang thal bstan// 'khor ba'i mtshan ma rang sar grol// rang grol thig le'i rtse mor chib// rtse mor chib pas mtshan ma dngas// ye shes ye shes khyad par che// ye shes zang thal rang la shar// 'gyu ba spangs nas ye shes gang// gzung 'dzin spangs nas gnyis med gang// ma rig spangs nas rig pa gang// dug lnga spangs nas ye shes gang// phung po lnga spangs sku lnga gang// sgo lnga spangs nas zang thal gang// 'byung lnga spangs nas zhing khams gang// rtog bcas spangs nas rtog med gang// sprang po spangs nas rgyal po gang// sems can spangs nas sangs rgyas gang// de rnams gdams pas zin pa na// dbyer med rang grol chos las 'das// zhes gsungs so// dbang rin po che 'khor lo'i rgyud las// rgyal thabs spyi blugs kyi dbang gi le'u ste gnyis pa'o//// de nas bka' stsal pa// gsang ba'i bdag po khyod nyon cig/ sprul sku thug phrad dbang bstan pa// dper na ral gri'i rgyal po kha mang de// lcags sna lnga las grub pa yin// mgar ba bi shwa karma ltar// bzo sna dgu las ma rmongs pas// chu la grang ba ga pur chu// me la tsha ba tsan+dan me// de rnams tshogs nas brdungs pa yin// ral gri kha mangs chen po des// ma brgyab 'od kyis thams cad gcod// de bzhin 'gyu ba sna tshogs de// dug lnga lam du ngo sprod pa'i// bcom ldan rdo rje sems dpa' yis// tshogs brgyad 'gyu ba dag dang dgu/ thabs ma 'gags pas snang ba che// de las gcod pas shes rab yin// de gnyis zung du 'brel ba ni// gnyis med rang snang chen po de// ma bsgoms ye shes zang thal 'char// mig ni ye shes zang thal yin// rna ba me long lta bu yin// sna ni mnyam nyid ye shes yin// lce ni kun rtog ye shes yin// 'og sgo bya ba grub pa yin// yid ni lhag mthong ye shes yin// yid ni rang byung ye shes yin// kun gzhi chos dbyings ye shes yin// 'gyu ba rang rig ye shes yin// nyon mongs brgyad khri bzhi stong gis// 'khor ba'i 'dam las mi thar bas// thar pa chen po'i sa bon yin// chos kyi sgo mo brgyad khri yang// thugs rje'i gzungs kyi thag pa yin// rtsa ba gcig las lo ma stong// sangs rgyas stong dang rtsa gcig gis// yang dag snying po gcig las med// yang snying srog gi 'bru gcig yin// lha srin sde brgyad srog gi 'bru gcig po// de shes pas ni srog kun dbang du 'dus// tshogs brgyad theg pa brgyad du bstan// theg pa'i rtsa ba a ti yo gar 'dus// tshogs brgyad rtsa ba 'gyu ba gcig pur 'dus// mig ni 'gyur med khrag med pas// nag po khrag med bya ba yin// rna bas mnyan nas blo dang bgros// des ni nga rgyal sna tshogs skye// rgyal po blo gros spyan gcig yin// lce ni rnam shes thams cad sgrub// sgra skad sna tshogs 'byin pa yis// gyad kyi gsung mchog dmar po yin// sna yi rnam shes stag dang 'dra// nags khrod dri la myang bas na// des na stag gu spyan gcig yin// 'og sgor thams cad 'byin cing brlabs pa dang// dri mi zhim pas gnod sbyin kun la sgrib// yid kyi rnam shes thams cad du// slebs shing dbugs la brten pas na// ha nu pags bshu rkang mgyogs yin// yid ni 'khor bar rgyu zhing kun bslu bas// klu rgyal dga' bo kun bslu yin// tshogs bdun kun gzhi dag la 'dus pa na// srid pa'i rgyal mo kun 'du ma dang brgyad// lha srin sde brgyad rang la shar ba yin// sde brgyad dpon po dbang phyug chen po yin// de rnams srog bcad dbang du bsdu ba'i phyir// dbang phyug chen po dbang du bsdus// srid pa'i rgyal mo dbyings su bstim// lha srin sde brgyad srog snying brgyad// yang snying 'bru gcig pa la dril// yang snying dpa' bo 'bru gcig ha// du dang tri dang ya dang shu dang ni// tsi dang ma dang na dang k+Sha dang brgyad// yang snying dpa' bo 'bru gcig yin// 'bru gcig pa la dbang bskur na// lha brgyad tshangs pa'i dbang thob 'gyur// tshangs pa dung gi thor tshugs can// lha ni zug rngu med pa yin// tshangs pa ye shes zang thal yin// dung ni dri ma med pa yin// thor tshugs gong na med pa yin// de ni cir yang sprul pas na// sprul sku thug phrad dbang zhes bshad// ces gsungs so// dbang rin po che'i rgyud las/ sprul sku thug phrad lha srin sde brgyad dbang phyug chen po'i dbang du bsdus te bstan pa'i le'u ste gsum pa'o//// de nas yang bka' stsal pa/ gsang ba'i bdag po nyon cig/ rig pa rtsal gyi dbang bskur bstan pa ni// dper na rus sbal rtsal dang ldan pa la// 'khar gzhong nang du bcug gyur na// 'khar gzhong rang bzhin 'jam pa dang// rus sbal rkang lag 'jam pa yis// rus sbal de yi khug mi nus// de bzhin rig pa rang rtsal dbang/snang ba zang thal snang zhen ldog/ rang snang ye shes zang thal de// phyi nang med pas sangs rgyas yul med shar// rig pa rang grol shar bas mngon zhen ldog/ rig pa zang thal snang srid 'ub chub klong du thim// 'gyur med rig pa'i rtsal chen rdzogs nas ni// gdams pas dbang du gyur pas sangs rgyas yul med shar// rig pa rang dbang gyur pas mkha' la ral bskor 'dra// seng ge'i phru gru rum na gnas pa ltar// sangs rgyas dgongs pa khong du rdzogs pa yin// rus sbal rkang lag nang du bskums pa ltar// 'gyu ba sangs pas rig pa khong du grol// mtshan ma'i rnam par rtog pa ci skyes kyang// chos nyid 'od gsal gnad kyi dam pa yin// rig pa'i rang sgo ma shes ma rig bdud// rang sgor rang snang shes pas rtsi// dug lnga khong khro bdud ltar 'byung// rang byung ye shes shar bas rtsi// rnam rtog 'khor ba ma rig bdud// rang rig ye shes rang shar rtsi// sde brgyad bsdongs pas nad dang bdud// rang rig ye shes lha yi lha// lhag pa'i lha ni bla ma'i rtsi// chags sdang gzugs kyi phung po dang// bar chad byed pa'i bgegs ni bdud// 'gyur med rig pa bzlog pas rtsi// rlung mkhris bad kan 'dus pas bdud// 'gyu ba zang thal shes pas rtsi// 'byung ba rnam lnga bdud du shar// bla ma'i thabs mi 'gag pas rtsi// snang ba dkar dmar bdud du shar// bltas pas zang thal rtsi yin no// des na rig pa rang rtsal dbang// zhes gsungs so// dbang ye shes 'khor lo'i rgyud las// rig pa rtsal gyi le'u ste bzhi pa'o//// de nas bka' stsal pa// gsang ba'i bdag po nyon cig/ mtshan ma zil gnon dbang bstan pa// dper na nyi ma shar ba yis// mun pa'i smag rum rang sar grol// nyi ma'i snying po mkha' la shar// thugs rje'i 'od kyis kun la gdal// phyogs med rgyu zhing ris mi mnga'// nyi ma'i 'od zer khyab gdal des// mun pa skad cig ma la sel// de bzhin ye shes thig le'i dbang// shes rab skad cig gcig gis thob// shes bya 'gag pa med pa de// de ni shes rab dbang yin te// shes rab dbang chen bskur ba yis// ma rig mun pa rang sar grol// ye shes khyab gdal chen po yin// thugs rje 'gag med shes rab dbang// phyogs med ye shes zang thal shar// chos min ye shes nyid du shar// ma rig ye shes nyid du shar// phyi yi shes rab gdams pa'i dbang// mtshan ma zil gnon thabs kyi dbang// nang gi shes rab rtog chod dbang// snang ba lam du slong ba'i dbang// gsang ba shes rab 'gyu ba'i dbang// ye shes lam du slong pa'i dbang// phyi yi dbang mchog ma thob na// snang ba'i rgya la 'ching ste 'chi// nang gi dbang mchog ma thob na// chags sdang rgya la 'ching ste 'chi// gsang ba'i dbang mchog ma thob na// nyams myong rgya la 'ching ste 'chi// dbang mchog rang grol ma bskur na// gdams pa'i rgya la 'ching ste 'chi// phyi yi dbang mchog thob pa la// rang dbang 'od gsal dpang po dgos// mkha' 'gro dbang du 'dus pa yid ches yin// snang ba zang thal 'char ba ngo sprod yin// 'gro drug g.yang sa chod pa sgom chen yin// rig pa'i lam sna zin pa yon tan yin// sangs rgyas rang snang shar ba 'bras bu yin// nang gi dbang mchog thob pa la// chags sdang rang grol dpang po dgos// rig pa rang dbang thob pa yid ches yin// dug lnga zang thal shar ba ngo sprod yin// rgyud drug chags sdang grol ba dgos pa yin// sangs rgyas dgongs pa gang shar 'bras bu y-in// gsang ba'i dbang mchog thob pa la// 'gyu ba dngas sangs dpang po dgos// ye shes zang thal shar ba yid ches yin// 'gyu ba rang sar grol bas ngo sprod yin// ma rig rtsad nas chod pas dgos pa yin// 'das pa lnga ru shar bas 'bras bu yin// dbang mchog rang grol thob pa la// thig le nyag gcig dpang po dgos// thig le rang snang yid ches yin// chos med rang grol ngo sprod yin// rtsol med nyag gcig yon tan yin// chos las 'das pas 'bras bu'i mchog/ rgya bzhi dres thag bcad pa yin// zhes gsungs so// dbang rin po che 'khor lo'i rgyud las/ mtshan ma zil gyis gnon pa'i dbang gi le'u ste lnga pa'o//// de nas yang bka' stsal pa// gsang ba'i bdag po khyod nyon cig/dbul mo nor gyi dbang bskur bstan pa ni// dbul mo bde ba skyong pa yis// gser gyis sgyed pu phug tu bcug/ mo rang kha zas mi la tshol// shin tu dbul zhing nyam thag nas// grong khyer kun tu nyal pa las// nang ma gcig la sgyed pu de// ngo shes pa yis dbul ba sel// de bzhin 'gro drug 'khyams pa yi// ma rig rgan mo long ma des// rig pa'i ye shes ngo ma shes// chos spyod spyod cing mtho ris 'tshol// 'bras bu 'khor bar nyam thag pas// 'gro drug 'khrul par spyod pa la// bla ma'i gsang dbang skad cig gis// 'khor ba'i sdug bsngal grol bar byed// rang snang thig le nyams kyi gzer// 'gyur ba med pa'i dgos pa yod// rtogs pa ye shes kun gyi gzer// 'phel 'grib med pa'i dgongs pa yod// bying rmugs med pa ye shes gzer// bsgom mi dgos pa'i dgos pa yod// gnyis med ye shes rang byung gzer// spyad mi dgos pa'i dgos pa yod// snang srid gzhir bzhengs rang grol gzer// 'bras bu thob med dgos pa yod// tshogs drug lhug pa gdams pa'i gzer// dgag tu med pa'i dgos pa yod// 'gyu ba lta stangs gnad kyi gzer// 'dre rkun ngos 'dzin dgos pa yod// 'gyu ba zang thal gdams pa'i gzer// nyams kyis mi 'chings dgos pa yod// lhan skyes rtsa rlung thig le'i gzer// btsal mi dgos pa'i dgos pa yod// chos la 'das pa'i ngo sprod gzer// kha mi 'phyar ba'i dgos pa yod// ces gsungs so// dbang rin po che 'khor lo'i rgyud las// dbul mo gter gyi dbang gi le'u ste drug pa'o//// de nas yang ngag bshad bya ba// gsang ba'i bdag po khyod nyon cig/ rgyal po bka' rtags dbang bstan pa// rgyal pos btsun mo blangs nas ni// dbang bskur khrus sogs byas tsam na// skyes pa bsam gyis mi khyab kyang// btsun mo de la 'jug mi nus// rgyal po'i bka' rtags phyag rgya'i dbang zhes bya// de bzhin bla ma dam pa yis// rig pa'i ye shes ngo sprad na// snang ba rnam pa sna tshogs kyis// gnod pa 'byung bar mi 'gyur ro// nyon mongs brgyad khri bzhi stong yang// phyag rgya'i dbang la 'da' mi nus// mi 'da' ye shes thugs kyi rgya// gnyis med ye shes gsung gi rgya// mi bskyod pa ni sku yi rgya// mi 'da' bas na yul gyi rgya// rgya bzhi gnad kyis thebs tsa na// rgyal po'i bka' rtags phyag rgya bzhin// sus kyang 'da' bar mi nus so// gdams pa bka' yi gzer dang rgya// rnal 'byor snod dang ldan la gdab// rig pa ye shes lha yi gzer dang rgya// lha srin sde brgyad srog la gdab// phung byed sde brgyad srog rtsa bcad// byin rgyud nyams myongs ye shes gzer dang rgya// mkha' 'gro rnams kyi srog la gdab// mkha' 'gro'i srog rtsa ma chod na// ya ma dam sri gdon du che// thugs rgyud gdams pa gnad kyi gzer dang rgya// 'khor ba rnam bzhi'i srog la gdab// 'khor ba'i srog rtsa ma chod na// 'gro drug 'khrul pa g.yang sa che// snyan rgyud ngo sprod gnad kyi gzer dang rgya// tshogs kyi 'khor lo dbang bskur dus su gdab// bla ma'i gdams pa ma chod na// theg pa'i srog la thug pa med// dpe rgyud gdams pa gags dang them gyi rgya// mtshon par byed pa dang po'i dus su gdabs// dpe yang mthun dpe khyad par che// yid ma ches pa'i srog rtsa bcad// gnad la 'bebs pa'i gzer dang rgya// mi gcig po yi srog la gdab// thams cad bcad pas ga la langs// gcig chod pa yis khams gsum sgrol// srog gi ngo bo 'dzin pa yin// nges pa'i tshig ni rngub pa yin// dbye ba rnams pa gsum yin te// 'jig pa dang ni 'jig rten 'das// yang dag shes rab srog chen po// mthun dpe dra ba'i snying po 'dra// de ni thun mong srog yin no// khyad par srog ni rnam pa gsum// 'gyu ba'i srog dang lus kyi srog/ dbugs gang ba yi srog dang gsum// mchog gi srog ni 'di lta ste// 'gyu bas bzung ba 'khrul pa'i srog/ 'gyu ba zang thal nyams kyi srog/ ye shes rang snang thig le'i srog/ thig le'i srog can 'pho 'gyur med// rgyal po'i phyag rgya dbang gi srog/ ces gsungs so// dbang rin po che 'khor lo'i rgyud las// bka' rtags phyag rgya'i le'u ste bdun pa'o//// de nas yang dag bshad bya ba// nyon cig gsang ba'i bdag po khyod// blon po bka' chad dbang bstan pa// dper na blon pos rgyal po'i khrims bcas na// dmangs kyis khrims las 'da' mi nus// gal te khrims las 'das pa na// chad pa thengs gcig bcad pa yis// de nas sus kyang 'da' mi nus// de bzhin ye shes ngo sprod na// rtog pa skye ba'i sa mi rnyed// gal te skyes na ngo sprad pas// phyis ni skye bar mi nus so// yang dag nges pa'i ngo sprod 'di// dper na gser la nag tshur bzhin// phyis ni g.ya' yi skyon dang bral// de bzhin ma rig ye shes bstan// phyis ni 'khor bar mi ltung ngo// 'khor ba'i bag chags rtog pa yin// bag chags srog rtsa ma chod na// 'khor ba'i 'dam du bying bar mchi// de la gnad kyi gdams pa bstan pa ni// nyon mongs brgyad khri bzhi stong chags sdang lnga// lnga po gsum du 'dus te ma rig pa// de yang ngo bo rtsal dang las dang gnas// lam dang sgo dang skyon dang 'bras bu brgyad// mi dge lung ma bstan dang dge ba dang// mtshan bcas mtshan med rnal 'byor dang// dge bcu spyod pa'i gang zag dang// sdig bcu chags sdang sgo nas spyod pa dang// lung du ma bstan sdig sogs byed pa rnams// las dang las kyi 'bras bur bstan par bya// rig pa'i ngo bo rtsal dang las dang gnas// lam dang sgo dang yon tan 'bras bu brgyad// rtogs pa ye shes khong gsal shes rab me bo yin// 'bras bu phyir mi ldog pas ye shes dbang po yin// 'gyu ba dkar nag glo rtsa'i mtshams na gnas// lhan cig skyes pa'i lha dang lhan skyes 'dre// de gnyis lhan skyes lhan cig kha sbyor 'khyud nas yod// 'dre dang bsdongs pa'i dbang po rnam shes brgyad kyis byed// lha dang bsdongs pa'i dbang po rig pa'i lha yis byed// lha 'dre gnyis kyi dbang po kun tu rgyu yis byed// phyi yi lha 'dre sel ba la// snang ba thug phrad dbang po dgos// 'od gsal 'khor lo yid ches dgos// snang ba rang dag 'bras bu'i mchog/ nges pa'i shes pa khong nas 'char// nang gi na tsha sel ba la// rig pa'i 'od gsal 'khor lo dgos// gang na sel ba dpa' bo yin// nad rnams sel ba'i dgos pa yod// bar mi chod pa 'bras bu yin// bar gyi rnam rtog sel ba la// tshogs drug 'od gsal 'khor lo dgos// rtog pa rang grol 'khor lo dgos// rang byung thig le'i 'bras bu yin// rtsol ba'i rtog pa sel ba la// 'gyu ba 'od gsal 'khor lo dgos// rang byung rang snang dgos pa yod// 'gyu ba dngas sangs dbang po yin// 'das pa rnam lnga 'bras bu'i mchog/ 'khor lo thams cad gcod pa ltar// 'gyu ba'i 'khor los 'khor ba gcod// ces gsungs so// dbang rin po che 'khor lo'i rgyud las// blon po'i bka' chad kyi dbang gi le'u ste brgyad pa'o//// de nas yang dag bshad bya ba// nyon cig gsang ba'i bdag po khyod// dper na mo btsun dpa' bo'i dbang brten pa// dpa' bo rtsal dang ldan pa la// mo btsun mdzes mas g.yo brtsam nas// mo yi phar la glag btsal yang// skyes pa rnams kyis 'jug mi nus// de bzhin ye shes dbang thob na// dug lnga sna tshogs rang dbang 'dus// 'gyu ba btsal bas mi rnyed de// btsal bas ye shes grogs su shar// dug lnga'i mtshan ma rang sar grol// 'gyu ba bya ba ming yang med// snang srid thig le'i klong du grol// dug lnga skye sa ming yang med// phyi nang med par rang snang bas// nyams su myong dgu'i yul mi rnyed// thams cad thig le'i ngang du grol// tha snyad tshig tshogs yul na med// dpe las 'das pa'i ye shes yin// rnam rtog ye shes 'char ba la// rlung gi gdams pa'i dbang po dgos// rlung gi ngo bo g.yo ba'o// nges pa'i tshig ni 'degs bskyod do// dbye ba gzhi lam 'bras bu'o// 'bras bu rnam pa gnyis yin te// ma rig rlung dang ye shes rlung// ma rig 'gyu ba'i rlung chen de// mi 'gag bskyod pas 'gyu ba'i rlung// dug lnga khong khro'i rlung rgyu bas// glo sgang gnyis la dbugs can rgyu// dbugs rgyu ma rig thugs ka la// 'gyus pa rnam rtog ma rig rlung// nyon mong brgyad khri bzhi stong rgyu// srog rtsa dbugs med rlung rgyu ba// khug pa 'khor ba'i rlung rgyu'o// mdzod spu ye shes rlung rgyu ba// 'das pa lnga yi rlung rgyu'o// snying nas ye shes rlung rgyu ba// zang thal 'gag pa med pa'i rlung// snying mtshams shes rab rlung rgyu ba// shes bya 'gag pa med pa'i rlung// glo mtshams ye shes rlung rgyu bas// thogs pa med pa'i ye shes rlung// mgrin pa ye shes rlung rgyu bas// rtog pa 'gag pa med pa'i rlung// kha sna dbugs chen rlung rgyu ste// 'gro ba 'ong pa gnas pa rgyu// glo sgang dbugs chen rlung rgyu ba// skye ba gcod pa gnas pa ru// snying nas 'gyu ba 'gag med rlung// 'char ba 'dug pa gnas pa rgyu// de nas gsang lam 'od lnga'i rlung// rtog med shes pa'i rlung rgyu'o// mdzod spu 'gyu ba'i dkar dmar rlung// lkog tu 'gyu ba'i rlung rgyu'o// mig la ye shes zang thal rlung// 'gag med ye shes mngon gyur rgyu// rna ba chos nyid rlung rgyu'o// snying ga shes rab rlung rgyu'o// smad na 'khor ba'i rlung rgyu'o// ro stod mya ngan 'das pa'i rlung// bar na 'khor 'das ru gcod rlung// 'gag pa med par rgyu ba yin// zhes gsungs so// dbang rin po che 'khor lo'i rgyud las// rlung dang dpa' bo dbang gi le'u ste dgu pa'o//// de nas bka' stsal pa// gsang ba'i bdag po khyod nyon cig/ rtsa yi mdor bsdus ngo sprod bstan par bya// de la rtsa yi ngo bo stong pa yin// nges pa'i tshig ni gnas pa'o// mtshan nyid gnyis su med pa'o// dbye ba rnam pa gsum yin te// dpe ni dra ba'i tshul bzhin no// thun mong khyad par mchog dang gsum// thun mong 'khor lo bzhi la gnas// de yang bsdu na gsum du 'dus// rkyang ma ro ma kun 'dar ma// khyad par rtsa la bsdu na gsum// rna ba chos kyi rtsa dang ni// snying ga shes rab rtsa dang ni// mig la ye shes rtsa dang gsum// snying la shes rab rtsa gnas pa// rtsa chen bzhi ru gyes pa yin/ rna ba chos nyid rtsa dang 'brel// mig ni ye shes rtsa dang 'brel// mgrin pa chos nyid rtsa dang 'brel// glo sgang skyon yon rtsa dang 'brel// mig la ye shes rtsa gnas pas// kha dog lnga dang ldan pa ni// rtags kyi ye shes phyi ru shar// mgrin pa 'od du shar ba ni// longs sku gzhi la gab pa'i rtsa// snying ga chos gsum 'dus pa ni// chos sku'i rtsa ste rang chas yin// 'gyu ba stong pa'i lam sna ste// de ni rtsa ba'i lam chen yin// glo snying gnyis kyi mtshams shed na// sbu gu lta bu'i rtsa gnas te// de la 'gyu ba brtan pa yin// glo bar song bas sgrog 'dra'i rtsa// skye ba gcod pa gnas pa'i rtsa// mgrin pa gnyis mtshon lta bu'i rtsa// dbugs kyi 'gro 'ong gnas pa'i rtsa// mgrin pa ba thag sbrel 'dra'i rtsa// 'od lnga rang chas gnas pa'i rtsa// bde chen ka ba bcug 'dra'i rtsa// thig le'i rang gdangs rlangs pa rgyu// mdzod spu ye shes zar bu'i rtsa// 'gyur ba rang byung gnas pa'i rtsa// bar do'i 'od gsal gnas pa'i rtsa// 'gyu ba stong pa rtsa yi rgyu// rtsa yi srog dang srog gi rten// de gnyis 'brel bas tshe dang zungs// tshe srog rtsa dang zungs chad rtsa// sbyor sgrol 'gro ldog shes par bya// chos nyid ma bu sprad pa la// rtsa rlung gnyis kyi gdams pa dgos// tshe zungs rtsa gcod shes pa dgos// chos nyid bar do'i ngo sprod gces// bar do tshad la phebs tsa na// chos nyid ma bu 'phrad pa yin// ye shes tshad la phebs tsam na// rnam rtog rang sar grol ba yin// thos pa tshad la phebs pa na// sgro 'dogs thag pa chod pa yin// 'od gsal tshad la phebs tsam na// sangs rgyas zhing khams shar ba yin// gnyis med tshad la phebs tsam na// sangs rgyas yul med shar ba yin// rnam rtag tshad la phebs tsam na// snang ba'i zhen pa log pa yin/ gdams pa tshad la phebs tsam na// nyams myong khong nas shar ba yin// byin rlabs tshad la phebs tsam na// 'khor ba'i zhen pa log pa yin// bka' rgyud tshad la phebs tsam na// sangs rgyas dgongs pa shar ba yin// thugs rgyud tshad la phebs tsam na// skye rgyun thag pa chod pa yin// snyan rgyud tshad la phebs tsam na// ye shes khong nas shar ba yin// ye shes ye shes khyad par che// rgyun chad med na ye shes yin// snang ba tshad la phebs tsam na// mkha' 'gro dbang du 'dus pa yin// go ba tshad la phebs tsam na// rig 'dzin dbang du 'dus pa yin// rtogs pa tshad la phebs tsam na// sangs rgyas rang la rnyed pa yin// shar ba tshad la phebs tsam na// mtshan ma rang sar grol ba yin// grol ba tshad la phebs tsam na// thams cad mkhyen pa thob pa yin// tshad ma gtan la phebs tsam na// phyir mi ldog pa'i dgongs pa 'char// zhes gsungs so// dbang rin po che 'khor lo'i rgyud las// rtsa dang tshad ma'i le'u ste bcu pa'o//// de nas yang dag bshad bya ba// nyon cig gsang ba'i bdag po khyod// thig le'i gdams ngag bstan pa ni// phyi nang gsang ba rnam pa gsum// de yang ngo bo nges tshig dang// dbye ba mthun pa'i dpe dang bzhi// thig le'i ngo bo gsal ba yin// nges tshig 'gyur med bde ba yin/ dbye ba thun mong khyad par mchog/ dpe ni thig dang 'dra ba'o// thun mong thig le dbab pa dang// gzung ba dang ni bzlog pa dang// dgram pa dang ni gtong ba'o// dngas ma gzung dang snyigs ma gtan// de las ye shes ngos 'dzin pa// thun mong thig ler shes par bya// khyad par thig le rnam pa gsum// gzhi yi thig le ngo bo yin// rgyu yi thig le 'gyu ba gsal// lam gyi thig le 'od lnga gsal// de ni phra thig zags thig yin// dngos po gzhi lam 'bras bu gsum// rig pa 'od gsal gzhi yi thig le yin// snang ba 'od gsal lam gyi thig le yin// ye shes 'od gsal 'bras bu'i thig le yin// zhi ba 'od gsal gnad kyi thig le yin// 'gyus tshad rang gsal gdams pa'i thig le yin// dbyer med rang gsal bka' rgyud thig le yin// 'gyu ba tshad la phebs tsam na// ye shes mthil du phebs pa yin// thig le tshad la phebs tsam na// chad pa'i gol sa chod pa yin// rtsa rgyud tshad la phebs tsam na// rtag pa'i gol sa chod pa yin// rlung rgyud tshad la phebs tsam na// mtha' bzhi'i gol sa chod pa yin// rtsa yi gdams ngag bstan tsam na// chos sku'i dgongs pa shar ba yin// thig le'i gdams pa bstan tsam na// longs sku mngon du byung ba yin// rlung gi gdams ngag bstan tsam na// sprul sku khong nas shar ba yin// mchog ni 'du 'bral med pa yin// zhes gsungs so// dbang rin po che 'khor lo'i rgyud las// thig le'i gdams pa sku gsum ngo sprod kyi le'u ste bcu gcig pa'o//// de nas yang bka' stsal pa// gsang ba'i bdag po nyon cig/ dbang gi chu bo bzhi po bstan par bya// de la brda' yi chu bo chen po bzhi// gang gA pak+Shu si tra sin+d+hu te// gang gA glang po'i kha nas 'bab// sin+d+hu rma bya'i kha nas 'bab// si tA seng ge'i kha nas 'bab// pak+Shu rta yi kha nas 'bab// de bzhi ti se'i gangs la gnas// rgyun chad med pa'i brda' yi dbang// rtags ni klad pa dung khang la// rna ba glang chen nyal ba 'dra// mig ni rma bya me tog bza' ba 'dra// kha ni seng ge gnam du mchong pa 'dra// sna ni rta sngon thur du rgyug pa 'dra// gti mug 'dod chags zhe sdang dang// nga rgyal chu bzhi rtag tu 'bab// rtogs pa ye shes rnam pa bzhi// rgyun mi chad pas dbang gi chu// de bzhin snying la rig pa'i ye shes gnas// chos nyid rtsa na rma bya 'dra// thabs kyi rtsa ni glang chen 'dra// ye shes rtsa ni seng ge 'dra// skyon yon rtsa ni rta mchog 'dra// chos nyid rtsa la 'od lnga rgyu// ye shes rtsa la 'gyu ba rgyu// skyon yon rtsa la nyon mongs rgyu// glo bur rtsa la rnam shes rgyu// rtsa ni srog chags chen po bzhi// 'gyu ba la sogs chu bzhi 'bab// dbang gi chu bo chen po bzhi// rgyun chad med pa'i dbang bskur bzhi// da ni dbang gi yon tan bstan te// a ni ti se'i gangs dang 'dra// wa dang 'a dang du dang ni// yi ge bzhi po dbang dngos yin// don ni tshig dbang gsang dbang thabs// shes rab bum pa'i dbang dang lnga// rtsa dang yi ge dbang gsum po// phyi nang gsang ba'i dbang bskur yin// rtags dang brda' dang don dang gsum// bskur thabs dbang rdzas thim lugs gsum// lha dang lus la bskur ba ni// lus kyi zhen pa ldog pa yin// ye shes chos kyi dbang bskur bas// lha yi rang rgyud ldog pa yin// chos dbang sems la bskur ba ni// dug lnga rang sar dag pa yin// dbang gi chu bzhi bstan pa ni// btsal mi dgos pa'i yon tan yod// dbang lnga dngos su bstan pa ni// ngo sprod kha mi 'khyar ba'i gzer// dbang lnga lam du blang pa ni// byin rlabs rang la 'byung ba yin// lhan cig skyes pa rnam bzhi ni// thun mong ma yin khyad par min// mchog gi 'bras bu thob pa yin// gzhi lam 'bras bu bstan pa ni// rnal 'byor rab 'bring dgongs so yin// zhes gsungs so// dbang rin po che 'khor lo'i rgyud las// lha rgyud chung ngu'i le'u ste bcu gnyis pa'o//// gsang ba'i bdag po nyon cig/ lha rgyud dbang rin po che'i 'khor lo zhes bya ba 'di// tshig nyung la don che// brtags dka' la gting zab pa'i man ngag/ thams cad ma tshang ba med pa'i rgyud// bka' las mi 'da' zhing brtag dka' ba'i lung// thams cad gtan la 'bebs pas rgyud lung gi tshad mar zung zhig/ces gdams so// rdo rje sems dpa' rjes su yi rang nas bstod pa// ston pa kun rig chos kyi rje// sna tshogs ngo sprod rgyud kyi rgyal po 'di// byin gyis rlabs kyi brgyud pa ngo mtshar che// byin rlabs sprul sku 'gro don mdzad la phyag 'tshal bstod// ces gsungs so// dbang rin po che 'khor lo'i rgyud las/ rjes su yi rang nas bstod pa'i le'u ste bcu gsum pa'o// rdzogs so////

CLOSE WINDOW