CLOSE WINDOW

Gpb006.020
བོད་ཡིག

rgya gar skad du/ badzra prA gra tan+t+ra nA ma/ bod skad du/ rdo rje yang rtse'i rgyud ces bya ba/ bcom ldan 'das rdo rje 'chang chen po la phyag 'tshal lo// 'di skad bdag gis thos pa'i dus gcig na// snying po rdo rje 'chang chen po// chos sku kun tu bzang po de// rang byung 'phrul gyi rdo rje'i sku// gnyis med mnyam par rang byung gnas// gnyis med snang ba rang byung 'khor// brjod gsung med pa rang byung chos// snga phyi med pa snying po'i dus// mi nub rgyal mtshan rdo rje'i sku ru gsal// phyi med nang med 'og min kun tu nang// snga phyi dus mnyam snying po sprul pa'i 'khor// zhing khams rang gsal rig cha kha dog gsal// gdul bya med pa'i chos rnams rang byung chos skur bzhugs// de nas kun byed rdo rje 'chang// rdo rje sems dpas rang byung 'phrul gyi me tog phul// sprul pa'i sprul pas rang byung du bskor te// kye kye ston pa rdo rje 'chang// 'khor bar 'khrul 'khor sems can la// thugs rje chen pos mi gzigs sam// nyid kyi sngon gyi thugs dam btsan// sems can sangs rgyas thob bya'i phyir// sku gsung thugs dang yon tan las// snying po ngos bzung cha rkyen las// nyid kyis rdzogs par bstan du gsol// de nas kun bzang rdo rje 'chang// rang byung 'phrul gyi skur bzhengs nas// sprul pa'i 'khor dang yang sprul 'khor// 'dus pa'i tshogs la bka' stsal pa// rang byung snying po byang chub sems// rgyal bar gyur pa'i snying po yin// stong pa'i chos nyid dam pa yin// snang ba ma 'gags lhun gyis grub// gnyis su med pa'i dam pa yin// 'khor ba'i bcud phyung bde gshegs rgyud// sku dang gsung dang thugs dang ni// yon tan dang ni phrin las kyi// snying po gsum du bsdu ba dang// de yi cha rkyen bstan par bya// zhes gsungs so// rdo rje yang rtse'i rgyud las/ zhus pa dang lan gyi le'u ste dang po'o//// rdo rje 'chang bas bka' stsal pa// nyon cig rdo rje sems dpa' khyod// rang byung 'phrul gyi snying po'i sku// rang byung snying po gsum las byung// pha dang ma dang rang dang gsum// pha ni thabs chen kun tu bzang// ma ni shes rab kun bzang yum// bu ni gnyis med rang byung hUM// rdo rje 'chang ba nyid kyi sku// zhes gsungs so// yang bka' stsal pa// nyon cig sems dpa' rdo rje 'chang// dkyil 'khor chen po yangs pa yin// bum pa bzang po che ba'i mchog/ ye shes sku ste rang byung ba// snying po sku bzhir rang byung bsgrags// skye med 'phrul gyi rang byung sku// rin chen 'phrul gyi rang byung sku// rdo rje 'phrul gyi snying po'i sku// rang byung 'phrul gyi snying po'i sku// rang byung hUM du lhun grub yin// sgom spyod rtogs pa bskyed rdzogs las// de nas kun grol dgongs pa'i mchog/ 'gyu dran 'dzin chags gdeng du gyis// 'gyu dran 'dzin chags goms byed na// rtsa rlung thig le gsal bar byed// pha rtsa ma rtsa rang rtsa gsum// thabs dang shes rab ye shes gsum// ro ma rkyang ma kun 'dar gsum// la la ra sa d+hU ti gsum// rtsa dang rlung dang thig le gsum// dkar dang dmar dang mthing dang gsum// hUM dang snying po rang byung rtsal// thams cad 'dus pa gcig med ston// a ti yo ga yul med khrol// zhes gsungs so// rdo rje yang rtse'i rgyud las/rang byung sku'i mtshon pa'i le'u ste gnyis pa'o//// rdo rje 'chang bas bka' stsal pa// nyon cig rdo rje sems dpa' khyod// brjod pa kun gyi rgyu yi mchog/ hUM zhes ma bslabs rang byung skad// sangs rgyas gsung la sems can sku// ye nas rang byung 'phrul gyi sgra// gzhi nas 'bras bu lam gyi rgyu// ming gi snying po 'phrul gyi tshig/ ngo mtshar chen po rmad du byung// zhes bka' stsal pas// kye kye ston pa rdo rje 'chang// snying po gang lags nye snying gang// yang snying gang lags bstan tu gsol// kun byed rdo rjes bka' stsal pa// tshig kun rab tu gsal bar byed// 'bru lnga ma hA sku lnga'i sngags// rigs lnga phyogs dang dug lnga byung// lnga ldan don gyi snying po yin// 'bru gsum nye ba'i snying po yin// gsum sgrol a nu'i dgongs pa bstan// sku gsum dug gsum pha mar rang// gsum sgrol rig sngags gzungs sngags yin// 'bru gcig a ti yul med sgra// gcig med yul dang 'brel ba'i sngags// bla na med pa'i rang byung snying// yang snying 'phrul gyi snying po yin// 'byung lnga sku lnga phyogs lnga ye shes lnga// 'bru brgyad snying po dag tu bzla// hUM dang ru lu sbrel ba'i glu// srod dang tho rangs dus drug blangs// 'bru gsum srog rtsol gnas pas bzlas/ u nan dbang bskur spro bsdu a// gsang sngags gzungs sngags rig sngags bsdebs// sngags rnams gang yang mgo bo gnon// 'bru gcig yid la rang byung sngags// 'gyu dran 'dzin chags kun dang 'grogs// rgyu rtsa gzhi nyid 'dzin pa'i sngags// ma btags kun gyi rang sgra yin// phyi ltar brda ru mig la ston// nang ltar rtag tu lus la sbyor// gsang ba yid tshogs sgra ru sgrogs// don du chos nyid snying po hUM// zhes gsungs so// rdo rje yang rtse'i rgyud las/ gsung mtshon pa'i le'u ste gsum pa'o//// kun byed rgyal pos bka' stsal pa// nyon cig rdo rje sems dpa' khyod// gnyis med gnyis su med par ston// rdo rje hUM ste hU~M zhes sgrogs// ngo bo stong pa blta ba yin// yul med phyogs lhung med pa yin// hUM du 'dzin pa ting 'dzin yin// 'gyu dran 'dzin chags yengs pa med// log lta gcod pas 'khor lo yin// rang byung ngos 'dzin 'khor lo gnyis// rang sems bsgrub pas dam rdzas yin// de dang mi ldan dam rdzas yin// yid la skyob pas sngags kyang yin// gsang sngags rig sngags gzungs sngags so// dbugs kyi 'phro 'du bzla lugs yin// 'gro 'ong gnas pa hUM gi stobs// na ru son na phrin las yin// grub rtags mngon du 'di ka rang// sems la dbang thob mngag pa yin// 'gyus dran dbang thob dbang gi mchog/ hUM du dngos thon mngon rtags yin// sku dang gsung dang thugs sogs hUM// ma grub ting 'dzin spog pa yin// brtson 'grus brtson med yengs pa med// a la thim pas gzir ba yin// rang byung skye ba med par shes// dgongs par skyol na shi sa yin// gcig med gang yang yin pa'i hUM// ci yang yin no gang yang rung// su zhig thugs kyi dkyil 'khor du// rten dang ldan no khyad par che// rang byung skye med snying po yin// zhes gsungs so// rdo rje yang rtse'i rgyud las// thugs mtshon pa'i le'u ste bzhi pa'o//// rdo rje 'chang bas bka' stsal pa// nyon cig badzra sa twa khyod// nor bu rin chen 'od 'bar bshad// sa yi snying po 'gro ba 'dzin// sangs rgyas kun gyi snying po che// dper na nor bu rin chen gling// sa rdo mi gnas rin po che// rang byung snying po sus rtogs pa// 'khrul snang dge sdig gang yang med// chos nyid chos dbyings snying po'i klong// gang ltar byas kyang snying po'i grogs// dper na me la shing bsnan 'dra// gang zhig rang byung ngo shes pa// zhi rgyas dbang drag phrin las 'grub// nang 'jil lus bde 'byung ba lnga// 'du bas mi tshugs rdo rje 'dra// srog snying rang byung ngo shes na// lha dang klu dang gza' dang bdud// gnod sbyin srin po dmu dang btsan// rgyal po ma mo lha srin kun// khrims la gnas kyi rgyal po 'dra// rang byung snying po sus 'chang ba// bsod nams longs spyod 'khor rdzas 'phel// dgra med sus mthong pha dang ma// nor bu rin chen 'chang ba 'dra// lo zla gza' skar dus tshod med// sprin med mkha' dkyil nyi ma 'dra// gang la snang sngags rang byung sngags// 'byung ba 'khrugs pa'i glog dang 'dra// zhes gsungs so// rdo rje yang rtse'i rgyud las/ thams cad yon tan du mtshon pa'i le'u ste lnga pa'o//// rdo rje 'chang gis bka' stsal pa// nyon cig badzra satwa khyod// las rnams ldan par tshogs pa ni// snying po sgyu ma'i rdzas dang 'dra// gcig la mthong snang 'char lugs yang// dper na nor bu rin po che// 'chang bas yon tan 'byung ba 'dra// dpa' bo gcig pa rin po che// zhi dang rgyas pa drag po'i las// gang la bya ba de nyid snang// thogs pa med par 'grub par 'gyur// rnam smin 'byung ba 'khrugs pa'i gdon// de yi yon tan mngon du snang// dper na nyi mas khyab pa 'dra// rnam smin sgrib pa'i nad dang gdon// snying po rtogs pa'i gang zag la// de yi don rtags bstan pa ni// dper na rmi lam sad pa 'dra// goms rtags brtan par 'byung ba yin// sgrib pa sbyong ba drag zhan yin// dge sdig gnyis po mnyam nyid na// rnam par smin pa'i 'bun pa dengs// nam mkhar khu rlangs dengs pa 'dra// nad ni 'byung ba'i rang bzhin 'gyur// lus kun thig le rgyas pa 'dra// gdon kun rgyal po zin pa yin// dmangs dang me lam rtsi sbur 'dra// snying po rang byung sus rtogs pa// rin chen gser gling phyin pa 'dra// zhes gsungs so// rdo rje yang rtse'i rgyud las/ phrin las mdor bstan pa'i le'u ste drug pa'o//// rdo rje 'chang bas bka' stsal pa// nyon cig badzra sa twa khyod// ma bu gnyis kyi sbyor sgrol gyis// snying po chos kyi sku ru sgrol// phyir mi ldog pa phyir mi 'ong// 'dren pa'i thugs rje rgyun mi chad// 'gyu dran chos kyi dbyings su sbyor// chags pa rang byung klong du grol// gnyis su med pa'i mchod pa yin// 'gyu dran 'dzin chags dbang du gyis// rig pa rtsal gyi dbang bskur yin// lha dang bum pa rig ma dang// gzhan la ltos 'gyur chos ma yin// rang byung ngos zin 'khrul pa med// 'gyu dran rang sbyang rang sgrol dbang// 'dzin chags do chad snying po'i yul// 'dzin med 'gyu ba rang byung dbang// bdag med yul grol ye shes dbang// dbang gi rgyal po rang byung dbang// sangs rgyas re med dbang mchog yin// zhes gsungs so// rdo rje yang rtse'i rgyud las/ dbang sbyor sgrol rtsa ba mtshon pa'i le'u ste bdun pa'o//// rdo rje 'chang bas bka' stsal pa// nyon cig badzra sa twa khyod// ci yang yin ni gang yang rung// mdun dang rgyab dang phyogs bcu ru// gang ltar snang yang snying po nyid// snying po snang ba rang byung yin// ci yang med do gang yang snang// med btags 'khrul pa rdzun pa'i chos// ming tsam 'di zhes mtshon na ni// rdo rje sems dpa' mtshon du med// gcig ni kun gyi rang bzhin yin// gcig po rang yang gang du 'dug/ ming med yul dang bral bar gyis// yul snang gzugs ni srog gi gzhi// yul du bden pa gang na 'dug/ rdul tsam 'dug na srog la shor// srog gi la shan phyed par gyis// ming btags chos kun snying po'i gzhi// ming yig sgra bsgrags gang la bden// gcig tsam bden na ming la 'khor// tshig gi sgro 'dogs chod par gyis// gnyis med gnyis su med par ston// bstan pas yul med mtshon tshig gang// bden par sus smra 'khrul pas chog/ dngos po dngos med gnyis ka gcig/stong nyid smra ba'i khyu mchog yin// rang byung 'phrul gyi snying po'i sku// gang ltar snang ba snying po'i brda'// 'dren pa'i thugs rje 'gag pa med// ye shes sku ste rang byung yin// zhes gsungs so// rdo rje yang rtse'i rgyud las/lta ba la bzla ba'i le'u ste brgyad pa'o//// de nas rdo rje 'chang kun tu bzang po nyid// mtshon pa'i lam gyi ting nge 'dzin la snyoms par zhugs nas// rdo rje sems dpa' la bka' stsal pa// gcig ni kun gyi rang bzhin te// byed pa sems can kun don byed// phan 'dod sems can gnyes gshin pa// rang byung 'phrul gyi snying po'i sku// ting 'dzin gsum gyi sgo nas bskyed// sku gsal gdul bya la dmigs la// mchod sbyin tshogs sogs rgyun du bya// tshogs gnyis tshogs ni bsag par bya// mchod rten sku gdung gdab par bya// rang byung snying po'i tsha tshwa dang// rgyu rkyen 'byung lnga'i tsha tshwa gdab// gtor ma phyi nang gnyis ka bya// chu gtor klu gtor dmar gtor dang// rdo rje tshogs kyi 'khor lo bskor// 'byor bshams dngos po bsam pa tshogs// 'gyu dran 'dzin chags za tshogs bya// gtsang ma khrus kyi las byed na// rin chen gang ldan bum pa der// srod dang tho rangs chu blangs la// snying pos byin brlab dag par bkru// me dang rlung dang sa dang bdud rtsi kun// khrus su rnal 'byor gang bde bya// bsrung ba gsang ba'i rdzas dang sngags// dpa' bo gcig pa'i las rim bya// mdze nad gdug pa'i las gso na// zhi drag gnyis kyi las la 'jug/ klu rigs nad rigs mchod gsad dgrol// nad kyi gnod lugs bcos ka bya// bsgrub la bar chod dgra byung na// lan gsum 'pham blang 'gyod med bya// de nas dkon mchog dpang btsugs la// rlung ldog pa yi dus su bsgral// rang gis ma nges rbod gtong na// snying po 'phrul gyi sku bsgom la// hUM la b+h+yo bzlog rbad btags na// skye ka sdom sdig ji bzhin 'gyur// 'byung ba 'khrugs pa'i nad 'don na// yi ge drug pa'i gnad kyis gdon// stod smad bar gyi gdon lugs yin// tsha grang spyod pa bsams pas sbyangs// 'khor lo lnga yi rtsa sgo la// drod gdon grang ba pho mo'i nad// bcud len zas ni grogs yin no// rnam smin las kyang sbyangs par nges// 'byung 'khrugs gdon la the mi tshom// bar chod gdon gyi nad byung sems 'khrugs na// gdon ngos bzung ba shin tu gces// srog snying gsal ba rab tu gces// gang yin de la gtad pa gces// lus nyams mtshan ma 'byung bar 'gyur// 'khor lo srog gnad snying pos gtems// rjes med mchod pa'i bye brag bya// byang chub chen po'i grogs su 'gyur// kho yi cho 'phrul nga ru khrol// nga ni cir snang cir 'dug ltos/ 'gyu dran 'dzin chags yul dang bral// ming med tshig gi rtog pa zad// rtogs shig rtogs shig skal ldan bu// zhes gsungs so// rdo rje yang rtse'i rgyud las/ las thams cad pa'i skabs kyi le'u ste dgu pa'o//// rdo rje 'chang bas bka' stsal pa// nyon cig badzra sa twa khyod// dus gsum bde gshegs gsang chen ni// 'bum las 'ga' yis rtogs par dka'// 'gyur med rang byung snying po 'di// gang du gyur kyang rang byung nyid// gcig ni kun gyi rang bzhin te// sprul pa'i 'khor lo sna tshogs 'chang// mi 'gyur ba yi snying po dang// sku gsung thugs dang rgyas pa lnga// re re la yang gsum gsum ste// ting 'dzin 'phro 'du rdzas dang gsum// sprul pa yin pas cir yang 'gyur// rang byung gdeng dang ldan par gyis// rang byung snying po srog dang ming// zung du gzhug pas rang gshed bya'o// thabs dang shes rab gnyis med do// dpa' bo gcig pa'i 'khor lo ni// yul med ming dang bral ba las// rang byung snying po gcig pur rtogs// gcig pu rang yang phyogs dang bral// gang yang yin no ci yang rung// rang byung snying po'i 'khor ba lo/ gdeng chen rtogs pa'i 'khor lo yin// sku gsung thugs kyi 'khor lo ni// sku srog 'khor lo yul la bskor// gsung ming 'khor lo tshig la bskor// thugs kyi 'khor lo rtogs pas bskor// gsum tshan sku gsung thugs shes bya// thabs dang shes rab ye shes gsum// de la yon tan nor bu 'dra// sna tshogs thugs rje las su mdzad// yon tan phrin las 'khor lo yin// re re la yang gsum gsum du// cha ldan phr-in las sgo nas bstan// 'jig rten dregs pa gzhom pa dang// 'byung ba 'khrugs pa gzhom pa'o// 'di ni phyag na rdo rje dang// khro bo la sogs gshin rje las// dpa' bo gcig pa rang byung thugs// rgyu dang snag tsha smyu gur ldan// thig bskor rim pa lnga ru bskor// 'khor lo rtsibs bzhi brgyad cu drug/ sum cu rtsa gnyis drug cu bzhi// dpa' bo gcig pa sum bsgril bri// g.yas dang g.yon dang rang byung gzer// lha dang yig 'bru mtshon cha me// dug lnga 'byung ba skabs dang sbyar// bsam pa spro 'bar rdzas gsum bya// dpa' bo gcig pa'i 'khor lo yin// zhes gsungs so// rdo rje yang rtse'i rgyud las/ thugs kyi 'khor lo'i le'u ste bcu pa'o//// de nas yang ni bshad bya ba// nyon cig badzra sa twa khyod// rdzas ni rgya shog ro ras dang// gro ga sa lnga las dang sbyar// bsam pa ting nge 'dzin gyi las// rin chen 'phrul gyi snying po bsgom// sems dpa' gsum ni gsal bar bya// ting 'dzin rnam gsum sems dpa'i mkhar// yi dam zhi khro dus dang sbyar// de nas spro bsdu dbugs la bskyon// ba spu la sogs kun nas spro// re re'i sgo nas grangs med spro// spro bsdu dbugs kyi 'khor lor 'dod// 'khor lo'i rnam pa grangs mang yang// g.yas bskor g.yon bskor cho lu gsum// steng gcod 'og gcod phyogs gcod gsum// dkrug dang bzlog dang rnal ma dgu/rkyang pa dang ni bcu ru bshad// 'khor lo bskor ba'i man ngag yin// pha bskor ma bskor rang bskor gsum// 'khor lo mdo yis bsdu bar bya// rang byung dmigs pa snying po'i klong// yul med ming dang bral tsa na// 'gyu dran 'dzin chags 'khor ba la// zhes gsungs so// rdo rje yang rtse'i rgyud las/ 'khor lo'i gdams pa'i le'u ste bcu gcig pa'o//// de nas yang dag bshad bya ba// nyon cig badzra sa twa khyod// sku gsum 'khor lo bstan pa ni// mi skye chos can a yi bskor// rdzas tshogs rgyu ni ldan pa la// thig skor rim pa lnga'am drug/ lte ba rtsibs bzhi brgyad bcu drug/ sum cu rtsa gnyis drug cu bzhi/a ni skye med a sbyor bkod// shi sa bstan pa'i 'khor lor bshad// dbyangs yig drug cu brgyad pa la// bcu drug 'jam dpal yi dam sngags// bcu gnyis shi sa bstan pa dngos// drug pa 'khor lo lnga rdzogs nyid// skye med 'gag pa med pa'i chos// a ni chos kyi dbyings su gnas// sa ni chos nyid 'gyur ba med// ha ni 'gag med a ha chas// a ni skye med gnas su ldog/ skye 'byung med pa a ha ma// zhes gsungs so// rdo rje yang rtse'i rgyud las/ gsung gi 'khor lo'i le'u ste bcu gnyis pa'o//// de nas yang dag bshad bya ba// sku yi 'khor lo bstan pa ni// rdzas dang snag tsha tshogs pa la// thig le skor rim gong dang 'dra// lte ba rtsibs bzhi dpa' bo lnga// brgyad pa tshogs brgyad sems dpa' brgyad// gang bsgrub 'khor gyi lha tshogs so// bcu drug khro bcu thub pa drug/ sum cu gnyis la dbang mo mkha' 'gro bzhi// sku yi 'khor lo yin par 'dod// 'bru lnga gtso byas 'khor lo lnga// yon tan phrin las de bzhin shes// rin chen lta bur yon tan 'byung// sa tshon gang bsgrub yi dam sngags// 'khor lo gang 'dra de la dgod// yon tan 'khor lo yin par 'chad// thugs rje'i byin rlabs cir yang ston// gang brtsam las de 'grub par 'gyur// has mtshon gang bsgrub gsang ba'i gnas// phrin las 'khor lo yin par 'dod// thig bskor lnga ru rdzogs par bris// lte ba hUM la bzhi brgyad hUM// bcu drug ha la so gnyis hi// nad gdon thugs kyi 'khor lo yin// zhes gsungs so// rdo rje yang rtse'i rgyud las/ 'khor lo rdzogs pa'i le'u ste bcu gsum pa'o//// de nas ston pas bka' stsal pa// nyon cig rdo rje sems dpa' khyod// thugs rjes 'gro ba 'dzin pa na// dam tshig can gyi slob bu la// thugs rje can gyi slob dpon gyis// dam bsre gnang ba sems bskyed bya// dad ldan bus kyang yid 'thad nor gyis bslu// bla ma mchod dang chos skyong bskang// sbyin pa dge ba tshogs gsog bya// sdig sbyangs chos ni chags pa'i rten// de ltar tshul dang ldan par bya// bla ma thugs rje byams ldan des// brda dang ngag gis slob bu bsral// brda bstan yul du dmigs pa bstan// ngag brjod lce rtses rna bar dkrugs// shes rab can gyis bu la bstim// phyi ltar snying po brda ru ston// nang ltar lus dang rtsa rlung sprod// gsang bar yi ge snying po khrol// don du chos nyid snying por 'dus// lnga bskor gsum sgrom 'phrang du chug/ rang thog zangs kyi wa nas drongs// 'thor ba thams cad de la sdus// sku dang bum pa dkyil 'khor dang// dbyibs dang phyag mtshan sna tshogs gzugs// pad+ma dang ni rdo rje dang// rin chen rgya gram ral gri mda'// kha TAM phur pa zhing dbyug dang// gzhu dang dril bu zhags pa dang// lcags kyu zhags pa dgra s+t+wa dang// zlum po gru bzhi zla gam dang// gru gsum la sogs sna tshogs pa// kha dog la sogs de dang mtshungs// snang ba sna tshogs snying po nyid// snang ba yod med de la brtags// gcig po kun tu snang bas chog/ ces gsungs so// rdo rje yang rtse'i rgyud las/ snang ba snying por bstan pa'i le'u ste bcu bzhi pa'o//// kun byed rgyal po kun bzang gis// sems dpa'i 'khor la bka' stsal pa// nyon cig rdo rje sems dpa' khyod// srid pa lus kyi grub tshul ni// rang byung rgyu rkyen snying po 'di// rang byung rgyu ba sna tshol tshe// 'khrul pa'i lus rten 'od las len// 'gyu ba rgyu la dkar dmar rkyen// rgyu ba bar dor rkyen dang 'dzom// pho mo'i 'du 'phrod gzhal yas 'od// bar do de la snang log 'dzin// bdun phrag zla dgu ngo bcu ni// lus su rdzogs te ma las phrul// nang nas shes pa phyir mi gsal// zhag dang zla ba lo yis 'grib// gzung 'dzin shes pa je rags song// dug lnga chags ldang gzung 'dzin spyod// shes rab rtog dpyod dge sdig go/ de ltar snying po lus kyi rgyu// ha gnyis kha sprad lus kyi rgyu// byang khog stod du brda sprad gsal// 'a dang zhabs skyed ro smad rkang// gu gu thig le zla tshes mgo/ 'greng bu na ro rtsa dang skra// de ltar snying po nyid las grub// brda ru snying gi bu la ston// pha rtsa ma rtsa rang rtsa gsum// lus dang sems kyi gzhi ma yin// rgyu ba rlung gi rtsal rdzogs tshad// tha ma thig le rang gi sems// dang po rgyu las 'bras bu smin// pha rtsa shel gyi chu 'bab 'dra// tshad du smin pas smin dus yin// thod pa dbang mo sgal tshigs sbubs// rus pa'i rtsal rdzogs sen mo yin// rkang dang rkang mar klad gzhung nas// thig le nya mig bcud kyi mchog/ la la rtsa ste sgal tshigs sbubs// ro ma dkar mo thabs rtsa ba// bde ba gsal ba rags pa g.yas// ma rtsa btsod kyi thag pa 'dra// tshad du smin pa mdzod spu yin// don snying nang rol sha yi sbubs// dngas snyigs rlung rgyu rgyus mang bsgrags// rtsal rdzogs pags pa ba spu skra// sha dang don snying rtsa las khrag/ thig le dmar po zla tshigs 'dzin// ra sa rkyang ma dmar ser srog pa rtsa// don snying 'khor lo lnga dang 'brel// 'gag med rlung bzung shes rab mchog/stong pa ma rtsa rags pa g.yon// de nyid zung 'brel sgrog rus lpags// de ltar lus po 'byung ba lnga las grub// snying po hUM gi sgra 'di rtags// sems can kun gyi sgra ru hUM// sangs rgyas kun gyi thugs su hUM// stong pa gsal ba 'gag med hUM// chos min snying po rang 'byung hUM// rang byung rtogs na grol bar 'gyur// mi 'gyur mthing ga rang gi rtsa// a wa d+hU tI kun 'dar ma// ye shes lnga rgyu tshon gyi sku// 'od lnga 'ja' tshon nyi zer 'dra// pha ma gnyis kyi par na rgyu// rdo rje pad+ma tshangs bug sgo// 'khor lo lnga dang 'brel ba'i rtsa// bzhi brgyad bcu drug sum cu gnyis// drug cu rtsa bzhi lte ba'o// nyi khri chig stong rgyas pa'i rtsa// byang sems thig le rgyu ba rlung// rdo rje hUM gi rtsal du bshad// ces gsungs so// rdo rje yang rtse'i rgyud las/ snying po lus kyi grub tshul gyi le'u ste bco lnga pa'o//// kun byed kun tu bzang pos bka' stsal pa// nyon cig rdo rje sems dpa' khyod// sangs rgyas gsung la sems can sgra// snying po sgra yi gdams pa 'di// snying po yin par gzhi ru bcas// gang snang ming du btags pa kun// snying po'i chos su bsgrub par bya// tshig tu yi ge ming du btags// btags sgra gang brjod snying po'i sgra// gzhi dang sgrub byed gzhan 'phrang bsdam// yi ge'i tshogs sogs grogs su 'gyur// ka kha ga g+ha nga/ tsa tsha dza dz+ha nya/ Ta Tha Da D+ha Na/ ta tha da d+ha na/ pa pha ba b+ha ma/ ya ra la wa/ sha Sha sa ha/ k+Sha/ a A/ i I/ u U/ e A+ai/ o A+au/ ri r-I/ li l-I/ aM AH/ de dag snying po hUM gi grogs// sku gsum khyab byed rgya ma chad/ nga ni rang byung snying po'i chos// gcod byed cha ldan 'joms par byed// 'khor ba mya ngan 'das pa nya// gtan 'bebs thig le dus la babs// yod med gnyis la 'jug pa na// rig pa gnas lugs 'khor ba'i rgyu// skyed par byed pa chos nyid ma// rtsa ba nyams myong 'dzin pa yin// gnas lugs snying po wa nas drongs// zha 'a za byed stong pa'i dbyings// sku gsum mya ngan 'das pa nya// thugs rje gnas lugs shes rab shugs// sa ni 'gyur ba med par brtan// ha ni 'gag med snying po'i dbyings// skye ba med pas snying po aH// mgo 'dren bod bde skabs su 'byed// 'dzin pa mkhyen byed gcod pa dang// 'brel khyab sdud pa snying po'i grogs// snying po med pa gang zhig brjod// yi ge med pa srog snying gang// yig 'bru med pa gzugs snang ci// srog dang snying po'i gdams pa yin// srog ni gzugs la snying po ming// gzugs nas gzung na snying pos bod// ces gsungs so// rdo rje yang rtse'i rgyud las/ gsang ba sgra dang srog gi le'u ste bcu drug pa'o//// de nas ston pas bka' stsal pa// nyon cig sems dpa' rdo rje che// rdo rje hUM ste hUM zhes sgrogs// thig le nyag gcig man ngag ni// bsgom du ci yang med pa la// yengs pa med pa'i man ngag bstan// rdo rje 'phrul gyi snying po'i sku// rdo rje skye med 'gag med thugs// rdo rje bzhi bskor ma yengs bzlas// rdo rje rdo rje shub bu dang// gnod pa 'gog byed a tir bzlas// sems dpa'i sku gsal bla ma dran// rdo rje'i bzlas pa rang sor bzlas// rdo rje shub bu'i bzlas pa ni// so dang mchu ni mnyam sbyar la// lce yi rtse mos cung zad bskul// tshig gi sgra ni bskyung pa'i glu// rdo rje shub bu'i bzlas pa'o// 'gog pa dag gi bzlas pa ni// nad dang gdon ngos bzung ba las// stod 'phang smad bskyur bar nas gdon// bsreg gsad char dbab mchod par dbul// 'gyu dran 'dzin chags rnam rtog 'gog/ 'gyu dran 'dzin chags gang snang la// yod med gang 'dug ci 'dug brtags// nga dang snying po rang byung chos// gzugs med srog chod snang ba med// tshig med ming bral snying po rig/ a ni skye med bzlas pa'o// gsang sngags rig sngags gzungs sngags kun// gang bzlas snying po hUM gi rta// yi ge 'bru yi sgra ltar ro// chen po 'thug po ring po thung// drang po bzlog pa rnal ma rnams// kun kyang snying po hUM gi sgra// gsang bar bzlas dang 'brug ltar sgrogs// rang sor tshig gsal chod pa bzla// zhes gsungs so// rdo rje yang rtse'i rgyud las/bzla lugs kyi le'u ste bcu bdun pa'o//// de nas ston pas bka' stsal pa// nyon cig badzra sa twa khyod// ngo bo'i rgyud dang tshig gi rgyud// rgyud kun gyi ni bdag po dang// lta ba phyogs dang bral ba'i chos// ma bris dkyil 'khor snang ba'i mchog/ dbang mchog snying po rang byung dbang// 'gyu dran 'dzin chags yengs med sgrogs// dam tshig 'khu 'phrigs spangs pa'i gdeng// spyod pa shugs 'byung tshul 'chos med// phrin las 'gro don rdzogs pa yi// gsang sngags snying po hUM gi rgyud// 'brel dang ma tshang med pa yin// yongs su rdzogs pas ma tshang med// bsnyen pa nye bsnyen bsgrub pa las// bskyed dang rdzogs dang rdzogs pa che// 'di ni a ti snying po'i rgyud// gsang sngags bstan pa dar ba'i dus// dus kyi snyigs ma las ngan byed// rgyal po mnga' bri dmangs kun rang dgar spyod// de dus nga yi rgyud 'di dar bar 'gyur// ma nyams gsang thub re dogs bral// grol bar 'gyur te the tshom med// chos kyi zong byed slob dpon 'phrag tshong byed// sdig la mi 'dzem tshul 'chos dge ba byed// mched kyi khrel med slob dpon mnyes mi byed// dngos gsum rjes 'brel ngan song dmyal ba'i gnas// zhes gsungs so// rdo rje yang rtse'i rgyud las/ rgyud kyi don bsdus pa dang dar dus kyi le'u ste bco brgyad pa'o//// kun byed ston pas bka' stsal pa// 'khor tshogs badzra sa twa khyod nyon cig/ snying po gang du gyur pas sangs rgyas thugs// rtsa ba 'dus pas sems can gzhi// myang 'das thugs la 'khor ba'i dbugs// gong du gyur dang gong na med// rtse mo zang thal rin chen tog/ sangs rgyas thams cad dgongs pa gcig/ sems can kun gyi yid du gnas// 'khor ba'i gsham du 'dus pa yin// 'gro drug khams gsum hUM gi skad// mi mthun pa dang ga la srid// stong pa sems kyi rang rtsal yin// rtse mo gar 'gyur rtsa ba gsham du 'dus// dus kyi tha mar snying po dar bar nges// gces pa'i man ngag bla med snying po'i rgyud// snyigs ma'i dus su chos 'di 'byung bar 'gyur// zhes gsungs so// rdo rje sems dpas 'di skad zhus// de ltar chos 'di 'byung ba ni// byin gyis rlabs kyis 'byung mi 'byung// gang gi sa phyogs dar bar 'gyur// gang zag gang gis 'dzin pa lags// zhes zhus pas// rdo rje 'chang bas 'di skad gsungs// byin gyis rlabs kyis 'byung bar 'gyur// nga nyid sprul pa rdo rje sems// rdo rje 'chang ba bar ma khyod// khyod nyid sprul pa rdo rje'i rigs// pad+ma'i ming la rdo rje'i sku// rgyal rigs o rgyan rdo rje 'chang// rdo rje 'chang ba tha ma des// sa 'dul bod yul rgyal po dang// blon po sprul sku gcig la gtod// de nas skal ldan rim brgyud nas// gsang sngags bka' 'chol dus su dar// zhes gsungs so// rdo rje yang rtse'i rgyud las/ chos kyi dar sa 'byung dus kyi le'u ste bcu dgu pa'o//// yang ston pas bka' stsal pa// nyon cig rdo rje sems dpa'i tshogs// snying po chos min rang byung 'di// dper na nor bu rin chen 'dra// thams cad mi 'byung gang yang med// 'gyur ba med pas gser dang 'dra// gang ltar dpyad kyang snying po nyid// rang byung rang bzhin nam mkha' 'dra// stong pa dngos por snang bar byed// sgyu ma mkhan gyi dpe dang 'dra// gcig las thams cad sprul par snang// rgya mtshor gza' skar shar ba 'dra// zab la ma 'dres kun gsal chos// nam mkhar sprin 'dus thog dang 'dra// dngos po'i rdzas kun rlag par byed// sman gyi rgyal po dze ta 'dra// gang la reg pa sman du 'gyur// 'khor los sgyur ba'i rgyal po 'dra// log lta dgra bgegs 'dul bar byed// nam mkhar nyi ma shar ba 'dra// ma rig sdig sgrib sbyong ba'o// sman gyi rgyal po ga bur 'dra// rtogs dang ma rtogs khyad par che// thang khad mnyam po'i chu dang 'dra// gang dang gang yang gdul bya'i chos// snying po 'di ni kun gyi las// zhi rgyas dbang dang mngon spyod ston// 'di ni srung ba bla na med// hUM brjod dpa' bo gzhan gyis min// hUM bsgom rdo rje 'jig 'dral med// hUM rtogs nam mkha' gcad du med// dri chen dri chu byang sems bzang// gla ba tshil chen gu gul dang// rta bon mu zi bsku zhing brtag/ sman drug bu ram ka ra ni// tsha grang gnyis la sbyar zhing btang// rtsa chu gnyis kyis nad ngos bzung// srin bya 'ug pa pho rog mig/ mig mthong gdon ngos bzung ba'i rdzas// gu gul rta bon tshil chen ni// gdon bsreg yi dwags kha chings rdzas// 'o ma can dang tsher ma can// sbyin bsreg zhi drag gnyis kyi rdzas// ro g.yam thod pa ming dang gzugs// rgya gram dpa' bo bco lngas bris// mnan pa rdo rje kha gnon rdzas// khrag dang dug sna sngo dang chu// lo thog rlung la bskur pa'i rdzas// nyung dkar nyung nag mda' phur khrag/srog la zor thun gsad pa'i rdzas// hUM bsgom hUM brjod me dpung mtshon// thog ris sdigs mdzub ser ba bzlog/ ces gsungs so// rdo rje sems dpas 'di skad zhus// ston pas gsungs pa'i rgyud 'di la// mtshan du ji skad gzung bar bgyi// 'khor tshogs 'di la nges par gsung// zhes zhus pas// kun tu bzang pos bka' stsal pa// ngas bshad snying po don gyi rgyud// sangs rgyas dgongs pa 'dus pa'i chos// dgongs pa 'dus pa'i rgyud du zung// gsang ba'i snying po chos min ston// gsang ba snying po'i rgyud du zung// rang byung snying po rdo rje ston// rang byung snying po'i rgyud du zung// 'og min gnas kyi dang por gsungs// rdo rje yang rtse'i rgyud du zung// zhes gsungs nas bka' stsal pa// gsang sngags 'di bab chol la spyod// dam tshig nyams pa'i chos byed kun// na rag yi dwags dkrugs par shog/mi bzad srin po bdud mo yis// grogs dang bu tsha 'khor du shog/ yid 'ong grogs dang bral bar shog/ ming btags lha srin sde brgyad kyis// rtag tu 'tshe zhing snying 'byin shog/ byams pa'i gnyen med mi rnams kun// rtag tu dgra yi las byed shog/ bu dang slob bu bslabs 'gying ste// srin bya'i skad bzhin snyan med shog/ 'byung ba 'khrugs pas 'du ba'i nad// rtag tu lus la 'byung bar shog/ gdug pa klu dang dgras yar dang// rtag tu lus sems bde med shog/ bla ma mnyes byed lus srog nor// rig pa dam tshig gtsang mar bsrung// 'khor drug yang phyir mi ldog par// dge spyod grogs rnyed 'khor rnyed shog/lha srin 'khor byed bar chad sel bar shog/ mgo nag byams nas rgyal po'i bka' bzhin shog/ nad med lus bde nyams myong rang 'bar shog/ klu 'go bsod nams dge rgyas shog/ ces gsungs so// rdo rje yang rtse'i rgyud las/ dpe dang srung rdzas rgyud mtshan smon lam gyi le'u ste nyi shu pa'o//// de nas ston pa kun byed rdo rje 'chang// 'od gsal kha dog snying po'i 'od// hUM las kha dog lngar bstan nas// rdo rje 'chang ba dang po'i sku ru bzhugs// hUM las ha 'byung a ru rtogs// zhes gsungs so// rdo rje sems dpa' 'khor dang/ mkha' 'gro ma rdo rje drag mo la sogs pa rigs lnga'i mkha' 'gro ma dang/rdo rje rigs kyi lha brgya stong gis/ me tog dang mchod pa'i tshogs kyis mchod cing mngon par bstod pa/ ston pa'i ston pa rdo rje 'chang// kun tu bzang po kun byed sku// snying po'i chos 'chang rdo rje'i thugs// snying po skye med sku la bstod// 'dus pa'i 'khor la rgyud bshad ngo mtshar che// rang byung snying po hUM de rdo rje'i rgyud// gsang ba mngon du ston pa man ngag chos// 'khor tshogs 'di la gnang ba yi rang ngo// zhes gsungs so// ston pa nyid mya ngan las 'das so// de nas rdo rje sems dpas// kye ma kyi hud kyi hud ces gsungs shing// mi snang mi 'khor rdo rje 'chang// phyir mi ldog pa kun tu bzang// snying po chos dbyings rdo rje'i sku// byin gyis rlabs kyis gzung bar zhu// zhes gsungs nas rgyud 'di bsdus nas sprul pa'i sku pad+ma 'byung gnas la gsungs so// rdo rje yang rtse'i rgyud las/ rjes su yi rang ba'i le'u ste nyer gcig pa'o/

CLOSE WINDOW