CLOSE WINDOW

Gpb003.012
བོད་ཡིག

rgya gar skad du/ pra pany+tsa ts+tshe da pany+tsa se na tan+t+ra/ bod skad du/ spros pa gcod pa sde lnga'i rgyud/ sems kyi rang bzhin shes pa'i kun bzang rdo rje sems dpa' la phyag 'tshal lo// ye nas yongs su brdal ba'i gzhal yas na// mtshon med brjod las 'das pa'i chos sku bzhugs// 'khor gyi dam pa rang gsal khye'u chung gis// bstan pa'i snying po spros gcod sde lnga zhus// dus gsum dbyer med byin brlabs bshad pa'i dus// thog ma mtha' ma med pa'i khyad par don// ma phyed mi phyed snying po mnyam pa nyid// rang bzhin yongs la khyab pa'i stong ra na// ma skyes mi 'gag chos sku lhun grub dbyings// ma mtshon mi mtshon mtshon med chos sku'o// ma bsgrubs mi bsgrub bsgrub med yul dang bral// ma bstan mi bstan bstan du btub pa med// ma bltas mi blta bltar med zhe 'dod med// ma bsgoms mi bsgom bsam med 'gyur med klong// ma spyod mi spyad chags zhen kun dang bral// ma thob mi thob thob rgyu rang la med// ma bstan mi ston gdams ngag zhen 'dzin med// ming med shes med 'gyu med dngos dang bral// mtshon med tshig med bshad med nyan pa med// mtha' med dbus med phyogs med dbyings dang bral// yin med min med mtshon pa'i yul dang bral// bde med sdug med sdug bsngal yongs dang bral// re med dogs med thob med ltung ba yongs dang bral// smrar med brjod med smra brjod yongs dang bral// gsal med mi gsal med de dbyer med ngang// rig dang ma rig gnyis kyang rig stong dbyer med dang// mtshon med mtshon mkhan ming de brjod med dang// shes med rang gnas rtog pa med pa'i don// ye nas yongs khyab kun gyi gzhal yas na// snying po rang bzhin g.yo med chos sku bzhugs// rang bzhin yongs su rdzogs pa'i chos sku'o// kun gzhi mdzod chen chos sku'i klong yangs la// shar ba'i snang tshul sna tshogs cir shar kyang// yul la ma zhen chos sku'i klong du thim// chos nyid klong na chos can longs spyod la// gnyis med rang sa zin te longs spyod rdzogs sku'o// snying po'i ngang la snang tshul cir shar kyang// gzhan du ma bkol chos sku'i klong du thim// bya ba'i cha sangs byar med spros bral rgyas// sna tshogs sprul yang gnyis med sprul sku'o// sku gsum dbyer med gcig ste 'gyur med sangs rgyas so// sku gsum zhing khams zhes ni de la gdags// snying po snang tshul rgya chad med pa la// ma rig dbang gis chos nyid ma rtogs te// ye don ma rig don mi gsal// de phyir ma rig mun par gsungs// rang rkyen g.yo ba'i dbang du song ba yis// yid dpyod rtog pa'i rlung 'phyo bsam mi khyab// rig yid sems kyi snang tshul rnam lnga yis// nyon mongs dug lnga'i dbang du song// de yi dbang gis ma rtogs sems can rnams// skye rga na 'chi'i sdug bsngal la sogs te// lus ni na tsha sdug bsngal dang// sems ni zhe 'dod sdug bsngal dang// snang ba phyogs ris sdug bsngal lo// rig pa yid dang sems dang gsum// rang sa ma zin rnam gsum gyis// yid ni 'khor lo gsum gyi dbang du song// de yi dbang gis sdug bsngal ni// nyon mongs brgyad khri bzhi stong ngo// de yi don du chos sgo brgyad khri bzhi stong gsungs// gsung gi don ni a gcig pu// skye med yin par shes par bya// chos sgo brgyad khri bzhi stong rnams// tra tha ke ru 'dus par bstan// snying po thig le nyag gcig la// gcad bya gcod byed don la mi bdog kyang// chos sku'i klong du thams cad gnas bya'i phyir// rdzogs chen snying po spros gcod sde lnga gsungs// chos kyi snying po yin par shes par gyis// phun sum tshogs dang gzhi yi gnas lugs dang// sangs rgyas sems can gnyis kyang bye brag dang/ gleng gzhi yongs su bkod pa'i le'u ste dang po'o//// de nas 'khor gyi dam pa rang gsal khye'u chung gis// mtshon med brjod las 'das pa'i chos sku la// gleng gzhi'i don ni de ltar na// spros pa gcod pa sde lnga ji ltar lags// zhes gsol pa dang/ mtshon med brjod las 'das pa'i chos skus bka' stsal pa// rang bzhin lhun grub don gyi snying po la// gcad bya gcod byed don la mi bdog kyang// dper na me gcig 'dod pas kyang// me ma brjod pas 'phrad mi 'gyur// de bzhin spros gcod don 'dod la// ma brjod spros pa chod mi 'gyur// snying po rang bzhin rgya chad med pa la// yan lag rig pa'i dbang gis ma rtogs te// lhun grub chos sku rtogs par bya ba'i phyir// nang gi sems dang phyi yi yul// snang zhing srid pa'i chos rnams thams cad dang// rig yid sems kyis btags pa'i dran rtogs thams cad dang// blo yul theg pa brgyad khri bzhi stong kun// de dag thams cad spros pa gcod pa la// 'khor ba'i spros pa yongs su gcod pa dang// theg pa'i spros pa yongs su gcod pa dang// lta ba rnams kyi spros pa yongs su gcod pa dang// sgom spyod 'bras dang gsum gyi spros pa gcod pa dang// man ngag rnams kyi spros pa yongs su bcad pa'o/ spros pa gcod pa sde lnga so sor dbye ba'i le'u ste gnyis pa'o//// de nas 'khor gyi dam pa rang gsal khye'u chung gis// mtshon med brjod las 'das pa'i chos sku la// 'khor ba'i spros gcod ji ltar lags// zhes gsol pa dang// mtshon med brjod las 'das pa'i chos skus bka' stsal pa// snying po rang bzhin lhun grub chos sku la// 'khor ba myang 'das gnyis su mi bdog kyang// rig pa'i mtshan nyid rgya chad med pa yis// snang tshul ma 'gags 'khor ba nyid du shar// de yi don du spros gcod sde lnga byung// khams gsum 'khor ba'i spros pa gcad pa ni// mtha' 'khob kla klor 'khor ba dang// 'bog chol sde yi gnas su 'khor ba dang// dbang po ma tshang gnas su 'khor ba dang// lta ba log pa'i gnas su 'khor ba dang// dmyal khams bco brgyad gnas su 'khor ba dang// yi dwags yul du 'khor ba dang// byol song yul du 'khor ba dang// mi yi yul du 'khor ba dang// lha min yul du 'khor ba dang// lha yi yul du 'khor ba rnams// de sogs khams gsum 'khor ba'i sdug bsngal rnams// las dbang rang sa ma zin gsum gyis lan// chos sku'i klong la 'khor dang ma 'khor med// 'khor ba'i sdug bsngal ji snyed kun// mya ngan 'das par spros pa chod// dmyal ba'i yul du skye ba dang// yi dwags yul du skye ba dang// byol song yul du skye ba dang// mi yi yul du skye ba dang// lha min yul du skye ba dang// lha yi yul du skye ba dang// de la sogs pa skye ba'i sdug bsngal ji snyed rnams// skye med chos sku'i klong du spros pa chod// lus 'dir na tsha'i sdug bsngal la// tsha ba'i nad dang grang ba'i nad// rlung gi nad dang mkhris pa'i nad// lus kyi na tsha ji snyed kun// 'du ba rnam bzhi'i nad yin te// dbugs mi bde dang mkhal ma na// mgo nad mig nad yan lag nad// mdze dang shu ba g.yan pa dang// rims ni nyin gcig pa dang nyin gnyis pa// de dag lus kyi sdug bsngal te// snying po skye med chos sku la// bde dang sdug bsngal gnyis med de// 'byung rkyen glo bur nad yin te// na med tsha med chos nyid dbyings su spros pa chod// skra dkar gnyer 'dus so yang don// lus kyi dpa' shor yan lag 'dar// kha sna chu 'dzag lus gyong ba// kha dbang shor te nyan pa su yang med// bu tsha kun yang sdug rgan shi 'phyi zer// de la sogs te rgas pa'i sdug bsngal rnams// thog ma med pa'i dus mtha' nas// tha mar thug gi bar du gsal// byang chub sems la rgan zhon med pa la// ma rtogs 'khrul pa'i sems la rgas gzhon byung// lo mang 'og rul yin mod kyi// chos sku rgan gzhon med pa'i klong du spros pa chod// me grir shi dang chu grir shi// g.yang la shi dang mtshon grir shi// dus ma yin par 'chi ba brgyad// de la sogs pa 'chi ba'i sdug bsngal rnams// chos sku'i ngang la 'chi 'gyur mi bdog ste// 'chi 'gyur med par spros pa chod// 'khor ba'i sdug bsngal thams cad kun// bde ba chen por spros pa chod/ 'khor ba spros pa gcod pa'i le'u ste gsum pa'o//// de nas rang gsal khye'u chung gis// mtshon med brjod las 'das pa'i chos sku la// theg pa'i spros pa ji ltar gcad// ces gsol pa dang/ mtshon med brjod las 'das pa'i chos skus bka' stsal pa// snying po'i ngang la gcod bya gcod byed gnyis med kyang// byang chub sems la shi dang ma shi med// thog ma med pa'i dus mtha' nas// theg pa'i spros pa yongs su gcod pa ni// brgyad khri bzhi stong theg pa'i sgo// brjod kyis mi langs bsam mi khyab// mdor bsdus spros pa gcod pa ni// yul sems so sor mthong ba'i nyan thos dang// ma rig rten 'brel snang ba'i rang rgyal dang// snang ba sems su 'dus pa'i sems tsam dang// bden pa gnyis su lta ba'i dbu ma dang// dag pa rnam gsum gcod pa'i kri ya dang// mar spyod yar blta'i u pa dang// dag pa chen por gcod pa'i yo ga dang// thabs dang shes rab gnyis med ma hA dang// dbyings dang ye shes gnyis med a nu dgu// 'dod lugs mi mthun lta spyod so so ba// snying po'i rang bzhin kun la khyab pa la// yan lag snang tshul ma 'gags dgu ru shar// theg pa dgu ru shar yang ngan par ma bor te// snying po rang bzhin chos sku'i klong yangs su// dgu 'dus kun 'dus brgyad khri bzhi stong 'dus par chod/theg pa'i spros pa gcod pa'i le'u ste bzhi pa'o//// de nas rang gsal khye'u chung gis// mtshon med brjod las 'das pa'i chos sku la// theg pa rnams kyi lta ba spros pa ji ltar gcad// zhes gsol pa dang// mtshon med brjod las 'das pa'i chos skus bka' stsal pa// theg pa'i lta ba'i spros gcod bstan pa la// nyan thos bye brag lta ba rnam pa gnyis// nyan thos bye brag pa dang mdo sde pa// bye brag pa yis 'dod lugs ni// chos sku lhun grub spros pa med pa la// snang tshul ma 'gags phra ba'i shes pa dang// phyi yi yul dang nang sems so sor mthong// mthong ba'i tshul gyis g.yag rnga ne seng snang// nyan thos mdo sde lta ba ni// rdul phran gong bu gcig pur snang// 'dod pa'i bdag med tshogs drug yul 'geg med// nyan thos de ltar 'dod kyi dgag bsgrub med pa'i ngang du spros pa chod// rang rgyal lta ba'i 'dod pa ni// phyi yi yul yang 'byung ba rten 'brel snang// nang gi sems kyang rten 'brel rim par snang// bdag med rnam par rig byed 'dod// rten 'brel gnyis med klong du spros pa chod// sems tsam lta ba bstan pa ni// rnam bden rnam med gnyis su 'dod// rnam pa bden par 'dod pa'i lta ba ni// rang rig rgyud kyi rtag la skad cig cha mi rtog/ snang ba'i rnam pa sems su bden par 'dod// mtha' bzhi bral ba gzung 'dzin gnyis stong ba// rang rig gsal ba'i ngo bo gcig tu 'dod// rnam pa med pa'i lta ba'i 'dod lugs ni// phyi rol sems kyi rnam pa med pa'i rdul// rang rig bden pa'i shes pa'i ngo bo la// de nyid gzhan du brjod du med pa'i don// gsal byed gzhan la ltos pa ci yang med// gsal stong rgya chad med par spros pa chod// dbu ma'i lta ba'i 'dod lugs ni// sgyu mar 'dod dang rnal 'byor spyod pa'o// sgyu ma lta bu'i lta ba'i 'dod lugs ni// snang sems thams cad sgyu ma tsam du 'dod// phyi yi dngos po 'di dag thams cad kyang// yang dag par ni rang bzhin grub pa med// yod dang med dang dbus ma yin// kun rdzob chu zla tsam du 'dod pa'o// rnal 'byor spyod pa'i lta ba'i 'dod lugs ni// chos rnams thams cad mnyam pa nyid du 'dod// yod dang med dang ci yang 'dod pa med// spang len med pa'i klong du spros pa chod// mtshan nyid sde gsum spros pa gcod pa'i le'u ste lnga pa'o//// de nas rang gsal khye'u chung gis// mtshon med brjod las 'das pa'i chos sku la// kri yog sde gsum lta ba ji ltar lags// sde gsum lta ba'i spros pa gcad du gsol// zhes gsol pa dang// brjod las 'das pa'i chos skus bka' stsal pa// kri ya'i lta ba'i 'dod lugs ni// chos sku'i rang bzhin dngos med rgya chad med pa la// kun rdzob 'di ltar snang ba thams cad kun// rigs gsum dal du snang bar 'dod// don dam dag pa rnam gsum yin par blta// dag pa chen po'i klong du spros pa chod// u pa ya yi lta ba'i 'dod lugs ni// snying po'i rang bzhin rgya chad med pa la// kun rdzob rigs bzhi lha yi dkyil 'khor dang// rnam bzhi las rigs bzhi yi lha ru 'dod// don dam rang bzhin skye 'gag med par 'dod// yo ga'i lta ba'i 'dod lugs bstan pa ni// snying po'i rang bzhin rgya chad med pa la// kun rdzob rigs lnga lha yis dkyil 'khor 'dod// rnam shes lnga las rigs lnga lha ru 'dod// don dam rang bzhin skye 'gag med pa'o// rnam rtog blo la de ltar snang mod kyang// don dam chos kyi dbyings su spros pa chod// kri yog sde gsum spros pa gcod pa'i le'u ste drug pa'o//// 'khor gyi dam pa rang gsal khye'u chung gis// mtshon med brjod las 'das pa'i chos sku la// ma hA a nu'i lta ba spros bcad ji ltar gcod// ces gsol pa dang/ mtshon med brjod las 'das pa'i chos sku yis// 'khor gyi dam pa rang gsal khye'u chung la// snying po rang bzhin rgya chad med pa la// ma hA yo ga'i lta ba'i 'dod lugs ni// phyi dang nang dang snod bcud snang ba la// thabs dang shes rab gnyis su 'dod pa la// phyi dang snod ni thabs kyi rang bzhin 'dod// nang dang bcud ni shes rab rang bzhin 'dod// thabs kyi rang bzhin bskyed pa'i rim pa'i tshul// shes rab rang bzhin rdzogs pa'i rim pa'i tshul// thabs dang shes rab gnyis su snang ba yang// snang stong gnyis med zung 'jug lta bar 'dod// ma hA yo ga'i lta ba'i 'dod pa ste// dbye bsal med pa'i klong du spros pa chod// a nu'i lta ba'i 'dod lugs ni// snying po'i rang bzhin rgya chad med pa la// phyi yi yul ni chos dbyings gzhal yas khang// nang gi bcud ni lha yi rang bzhin yin// gzhal yas khang dang lha yi rang bzhin de gnyis la// dbyings dang ye shes gnyis med lta bar 'dod// a nu'i lta ba'i 'dod pa de// sor zhag chen po'i klong du spros pa chod// ma hA a nu'i lta ba'i spros pa gcod pa'i le'u ste bdun pa'o//// de ni gzhan gzhung spros pa gcad pa'o// de nas 'khor gyi dam pa rang gsal khye'u chung gis// mtshon med brjod las 'das pa'i ston pa la// gzhan gzhung spros gcod sde lnga de ltar na// rang gi gzhung gi 'dod pa'i spros pa gcod pa'i sde lnga ji ltar lags// zhes gsol pa dang/ mtshon med brjod las 'das pa'i ston pa yis// 'khor gyi dam pa rang gsal khye'u chung la// snying po'i rang bzhin lhun grub chos sku la// mtshan nyid ma 'gags snang tshul cir yang 'char// 'char ba'i zer las skye ba'i rig pa skyes// skyes kyang snying po'i don las g.yos pa med// ma 'das snying po ma bcos chos sku la// rang byung rtsal gyis rig pas so sor phye// phye bas spros pa gcod pa'i sde lnga po// rang gzhung nyams su blang ba'i don du bshad// blta ba'i spros pa gcod pa dang// bsgom pa'i spros pa gcod pa dang// spyod pa'i spros pa gcod pa dang// 'bras bu'i spros pa gcod pa dang// man ngag spros pa gcod pa'o// spros pa gcod pa sde lnga so sor phye ba'i le'u ste brgyad pa'o//// rang gsal rig pa'i khye'u chung gis// mtshon med brjod las 'das pa'i chos sku la// lta ba'i spros gcod ji ltar lags// zhes gsol pa dang/ mtshon med brjod las 'das pa'i chos skus bka' stsal pa// brgyad khri bzhi stong theg pa'i sgo// mi mthun lta ba so so ba// brjod kyis mi langs bsam mi khyab// dran brtags lta ba ngas ma bstan// bsam brtags blo yul lta ba rnams// blta bya lta byed thamasacad kun// brjod bya rjod byed thams cad kun// yul snang blos btags thams cad kun// mtshon med brjod las 'das pa yin// zhe 'dod med par spros pa chod// lta ba spros pa gcod pa'i le'u ste dgu pa'o//// 'khor gyi dam pa rang gsal khye'u chung gis// mtshon med brjod las 'das pa'i chos sku la// sgom pa'i spros bcad ji ltar lags// brjod las 'das pa'i chos skus bka' stsal pa// brgyad khri bzhi stong theg pa'i sgo// bsgom pa mi mthun so so ba// brjod kyis mi langs bsam mi khyab// yid kyis btson bzung bsgom pa de// dran pa bzhi 'gyur bsgom pa yin// yid dpyod blos bsgom rtsol ba dang// bsgom yul sgom mkhan rtsol ba dang// bcas bcos yid smon bsgom pa dang// de dag gsum gyi rtsol ba ste// bsam du med pa'i don ma rtogs// ma bsams ma bsgoms don gyi klong dkyil du// bsam bsgom ci yang mi bya ste// ma bsam pa de chos kyi sku// rig med 'gyur med sems med rtog pa med// yid smon ma yin blo yi yul dang bral// bsgom pa ma yin bsgom pa'i yul ma mchis// bsam pas mi rnyed bsam rgyu ci yang med// bsam med rtog med 'gyur med klong du spros pa chod// bsgom pa'i spros pa gcod pa'i le'u ste bcu pa'o//// rang gsal rig pa'i khye'u chung gis/ mtshon med brjod las 'das pa'i chos sku la// spyod pa'i spros pa gcad pa ji ltar lags// zhes gsol pa dang// mtshon med brjod las 'das pa'i chos skus bka' stsal pa// brgyad khri bzhi stong theg pa'i sgo// mi mthun spyod pa ji snyed pa// bcos bya 'dod pa bsgrub pa ste// brjod kyis mi las bsam mi khyab// 'di ru chos skus yongs ma gsungs// snang ba'i yul du cir snang yang// chos dbyings snang la rang bzhin med// rig pa'i sems kyis gar brtags kyang// yid kyi bsam pa glo bur pa// snang sems gnyis su gar snang kyang// ma chags ma zhen spyod pa'i mchog/gang snang yum la ma zhen na// de ni spyod pa'i rgyan du gsungs// gang yang ma spangs ma bsgrubs par// de ni spyod pa'i mchog tu gsungs// cir snang cir rig cir bsam kyang// nang du bdag 'dzin ma skyes na// de ni spyod pa'i snying por gsungs// snang ba sna tshogs cir snang yang// de la sems kyi chags zhen med// de ni spyod pa'i mchog tu gsungs// spyod pa'i rnam grangs ji snyed pa// spyod pa bya ba btang ba'i ngang de la// lus ngag yid gsum rtsol bsgrub mi bya ste// bya ba'i spyod pa ma 'gags la// bya rgyu gang yang mi dmigs te// gang la ma chags ma zhen pa// spyod pa'i mchog ni byar med yin// spyod pa bcos bya ma yin bcos pa med// gang yang bya ba btang ba yi// bya byed spros bral klong du spros pa chod// spyod pa'i spros pa gcod pa'i le'u ste bcu gcig pa'o//// 'khor gyi dam pa rang gsal khye'u chung gis// mtshon med brjod las 'das pa'i chos sku la// 'bras bu'i spros gcod ji ltar lags// zhes gsol pa dang/ mtshon med brjod las 'das pa'i chos skus bka' stsal pa// rang bzhin lhun gyis grub pa'i chos sku la// 'bras bu thob dang ma thob mi mnga' yang// chos sku rgya chad med pa ma rtogs pas// ma 'gags brgyad khri bzhi stong theg pa'i sgo// 'bras bu'i thob lugs ji snyed kun// spangs nas thob pa'i 'bras bu de// yid smon 'bras bu yin par bshad// re dogs 'bras bu ngas ma bshad// rtsol bsgrub 'bras bu ngas ma bshad// 'dod pa'i 'bras bu ngas ma bshad// re ba'i 'bras bu ngas ma bshad// yid smon 'bras bu ngas ma bshad// bsgrub nas thob pa'i 'bras bu ngas ma bshad// chos sku dmigs med mtshon med brjod las 'das// 'bras bu thob bya thob byed gnyis med kyang// rang byung rtsal snang rgya chad med pa yis// re zhig 'bras bu'i ming btags 'di ltar ro// 'bras ni snying po'i don la bya// bu ni yan lag ma 'gags pa// 'bras ni chos nyid dbyings yin te// bu ni chos can mtshan ma'o// 'bras ni chos sku lhun grub la// bu ni rig pa'i snang tshul yin// 'bras ni gzhi mo'i don la bya// rtsal dang zer ni bu yin no// 'bras ni chos kyi dbyings yin te// bu ni rig pa'i ye shes so// 'bras ni thog ma'i dus yin te// bu ni da lta'i shes pa'o// 'bras ni rang gi shes rab ste// bu ni bla ma'i gdams ngag thob// thog ma med pa'i dus nyid nas// rang la rang chas yod pa 'bras yin te// thos bsam bsgom gsum gyis rtogs bu yin no// 'bras bu de dag thams cad kyang// sku gsum 'du 'bral med pa'i klong du spros pa chod// 'bras bu spros pa gcod pa'i le'u ste bcu gnyis pa'o//// 'khor gyi dam pa rang gsal khye'u chung gis// mtshon med brjod las 'das pa'i chos sku la// lta sgom spyod 'bras bzhi yi spros gcod de ltar na// man ngag rnams kyi spros gcod ji lta bu// zhes gsol pa dang/ brjod las 'das pa'i chos skus bka' stsal pa// snying po rang bzhin chos sku klong yangs la// mtshon med brjod las 'das pa ma rtogs te// yan lag snang tshul rgya chad med pa la// mtshon bya mtshon byed don la mi bdog ste// ma mtshon go zhing rtogs par mi 'gyur bas// man ngag spros gcod mtshon te bstan// brgyad khri bzhi stong theg pa'i sgo// de yi man ngag brjod mi langs// bsam gyis mi khyab mtshon las 'das// dran pa bzhir 'gyur man ngag ste// chos sku thob par ma gsungs so// don gyi man ngag bstan pa ni// gnyis snang med pa'i man ngag la// spros pa'i mu las grol ba ni// man ngag rang bzhin yin par bshad// sgro skur bral ba'i man ngag la// spros pa med par rtogs pa ni// man ngag mtshan nyid yin par bshad// sgro skur bral bar rtogs pa ni// spros pa'i mtha' la ma zhen na// man ngag ngo bo yin par bshad// snying po don gyi gnas lugs la// smra bsam brjod pa'i yul las 'das// bsam 'das brjod med rtogs pa ni// man ngag mtshan nyid yin par bshad// phyogs ris spros pa med pa'i don// sgro skur mtha' las grol ba ni// man ngag 'bras bu yin par bshad// mtha' dbus med pa'i klong chen po// rgya chad med pa'i man ngag bsdus// chos kyi dbyings su rang bzhin thim// snying po don gyi klong dkyil du// mtshon med brjod las 'das pa'i man ngag thim// gzhi yi rang bzhin yod med mnyam pa'i ngang// snang srid 'khor 'das thams cad de las byung// byung yang sna tshogs gzhi yi ngang du thim// man ngag brgyad khri bzhi stong yang// zhen 'dzin med pa'i klong du spros pa chod// spros pa gcod pa sde lnga zhes ni de la gdags// sprod pa gcod pa'i sde lnga las// man ngag spros pa gcod pa'i le'u ste bcu gsum pa'o//// 'khor gyi dam par rang gsal khye'u chung gis// mtshon med brjod las 'das pa'i chos sku la// mtshan gyi rnam grangs ji lta bu// zhes gsol pa dang// mtshon med brjod las 'das pa'i chos skus bka' stsal pa// snying po'i ngang la gdags su med pa la// snang tshul ma 'gags rgya chad med pa la// yan lag rig pa'i dbang gis mtshan btags pa// theg pa ma lus 'di nas 'byung ba'i phyir// theg pa spyi yi rgyud chen zhes kyang bya// theg pa thams cad gnya' gcog phyir// gnya' gcog chen po'i rgyud ni zhes kyang bya// theg pa phyi yi don rnams bsdu ba'i phyir/ / spyi ti yo ga zhes kyang bya// lta ba yangs pa'i don rnams ston pa'i phyir// yang ti yo ga'i rgyud chen zhes kyang bya// theg pa thams cad nyag gcig phyir/ / nyag gcig chen po'i rgyud ni zhes kyang bya// lta sgom spyod pa la bzla'i phyir// la zlo chen po'i rgyud chen zhes kyang bya// thams cad spros pa yongs su gcad pa'i phyir// sprod pa gcod pa'i sde lnga zhes kyang bya/ mtshan gyi rnam grangs bstan pa'i le'u ste bcu bzhi pa'o//// spros pa gcod pa sde lnga zhes bya ba'i rgyud rdzogs so//// rgya gar gyi slob dpon gu ru pad+ma sam b+ha wa dang bod kyi lo ts+tsha ba chen po ska ba dpal brtsegs kyis bsgyur cing gtan la phab pa'o// srog dang bral ba'i kha bzhin bsdom// spel ba'i gnas med gter du sbos////

CLOSE WINDOW