CLOSE WINDOW

Gpb003.003
བོད་ཡིག

rgya gar skad du// ma hA san+ti sa man+ta b+ha dra dz+nyA na pra ka Ta shAstu stan+t+ra nA ma/ bod skad du/ rdzogs pa chen po kun tu bzang po ye shes gsal bar ston pa'i rgyud ces bya ba/ bcom ldan 'das dpal kun tu bzang po mnyam nyid chos kyi sku la phyag 'tshal lo// 'di skad bdag gis thos pa'i dus gcig na/ bcom ldan 'das dpal kun tu bzang po gsang ba mchog gi bdag po/ dus gsum pa nyid kyi ngo bo/ sku gsum gyi rang bzhin/ye shes lnga'i bdag nyid can/ rol pa'i rdzu 'phrul la mnga' brnyes pa de nyid/ don chos nyid skye ba med pa las rtags ye shes 'gag pa med pa'i chos 'phrul du bzhugs so// de yang 'og min gyi gnas gsang ba mchog gi dkyil 'khor chen po/dus gsum gyi sangs rgyas rgyal ba rnams gshegs shing bzhugs te/ bzhugs par gyur ba'i gnas/ dbyibs dang kha dog tha dad pa las ngo bo nyid gcig pa ste/de dag dbyings las ye shes gsal ba'i gzhal yas khang/ khyab pa gdal ba chen po de na/ 'khor rdo rje 'dzin pa dang/ 'khor lo 'dzin pa dang/ rin chen 'dzin pa dang/ pad ma 'dzin pa dang/ rgya gram 'dzin pa la sogs pa til mar khyab pa ltar gnas so// de'i tshe de'i dus na rdo rje 'dzin pa la sangs rgyas kun gyi zhu ba por/ bka' bsgos te thabs gcig tu bzhugs so// rdzogs pa chen po kun tu bzang po ye shes gsal bar ston pa'i rgyud las/gleng gzhi'i le'u ste dang po'o//// de nas bcom ldan 'das dpal gsang ba mchog gi bdag po dus gsum dang 'khor ba dang mya ngan las 'das pa'i bdag po des chos thams cad la rdzu 'phrul gyis kun la khyab par gzigs pas rnam par gzigs so// de bzhin du gzigs pas/ chos thams cad byang chub sems kyi mtshan nyid/ stong gsal chen po'i rang bzhin/smra bsam las 'das pa'i de bzhin nyid/ de kho nyid kyi ting nge 'dzin la snyoms par zhugs so// de nas rdo rje 'dzin pa rang gi bstan las langs te/ 'di skad ces gsol to// kye kye bcom ldan 'das gsang ba mchog gi bdag nyid kyis/ye shes gsal bar ston pa'i don// gsal stong chen po'i bdag nyid de// rim pas bdag 'dud bshad du gsol// zhes gsol pas/ bcom ldan 'das dpal kun tu bzang pos/gsang ba mchog gi bdag po la bka' stsal pa// nyon cig rdo rje 'dzin pa khyod// gus pas nyon la yid la zung// chos nyid ye shes gsal ba ni// 'khor 'das kun gyi rtsa ba byang chub sems nyid de// rtsa ba de yi don rtogs na// lta ba sems nyid nam mkha' yin// sgom pa sems nyid yul med gsal// spyod pa sems nyid rgya mtsho'i 'jing// 'bras bu sems nyid sku dang ye shes ngang// de nyid ma rtogs 'khor bar snang// zhes gsungs so// kun tu bzang po ye shes gsal bar ston pa'i rgyud las/ gleng bslang nas lan gsungs pa'i le'u ste gnyis pa'o//// de nas yang bcom ldan 'das dpal kun tu bzang po des/rdo rje 'dzin la sogs pa rigs lnga'i sangs rgyas la bka' stsal pa// sems nyid rtogs dang ma rtogs las// 'khor ba dang ni mya ngan 'das// gzhi ni stong gsal ming ma thogs// gang du ma grub ga bur tshul// mnyam pa nyid kyi rang bzhin las// mtshan ma rang sar grol ba yis// stong gsal kun tu sangs rgyas te// sku gsum zhing khams dag tu gnas// ma rtogs pa la 'khrul pa'i ye shes te// kun gzhi 'od kyi khang bu nas// ma rig pa yis 'khrul pa ni// dran pa phra mo'i rgyun byung nas// 'gyu ba dran pas ngar 'dzin byung// ngar 'dzin dag las 'khor bar 'khyams// ming ma thogs kyi chos nyid nas// 'char sgo rnam pa gnyis su byung// de yang ma rig ye shes te// ma rig ye shes tha dad med// so sor dbye ba rnam pa tsam// ma rtogs pa la lam du gcig/ rtogs na byang chub chen po'i lam// zhes gsungs so// kun tu bzang po ye shes gsal bar ston pa'i rgyud las/ 'khor 'das gyes pa'i lugs bstan pa'i le'u ste gsum pa'o//// de nas yang rdo rje 'dzin pas bka' stsal pa/ de ltar gsungs pa'i don de la// ming ma thogs kyi gzhi nyid nas// 'char sgo gnyis su byung ba yang// gzhi dang 'khrul pa'i mtshan nyid ste// gzhi las 'khrul pa grub ma grub// mthun pa'i dpe ni ci yis mtshon// 'khrul pa rtsad nas ji ltar bcad// ces gsol pas/ kun bzang nyid kyis bka' stsal pa// gzhi ni nges par chos sku ste// 'khrul pa yid rtog glo bur yin// des na 'khrul pa gzhi la yang// gdod nas ma grub glo bur yin// gzhi ni rig pa'i rgyun yin te// 'khrul pa rnam rtog dum bur snang// dper na smig thag tho yor bzhin// chu sbrul mi ru 'dzin bzhin no// 'khrul pa rtsad nas bcad pa ni// blta bsgom spyod pa'i rim pa yis// 'khrul pa log ste 'bras bu yang// sku gsum ye shes lnga ldan 'gyur// zhes gsungs so// rdzogs pa chen po ye shes gsal bar ston pa'i rgyud las/ 'khrul pa ldog thabs kyi le'u ste bzhi pa'o//// de nas gzhan yang bka' stsal pa// blta bsgom spyod pa'i rim pa yang// blta ba dbyer med rang grol te// khyung chen nam mkhar lding dang 'dra// de yang ji ltar 'dug ce na// snang srid nges med phyi nang sems// sems la ngos bzung med pa'o// de nyid 'dzin med rang shar du// ngang gis grol te blo las 'das// lta ba de nyid mi ldan na// bya sgro rlung gis khyer dang mtshungs// tshig tu ma song don la sbyar bas na// bsgom pa 'dzin med rang grol te// gar sbyin sbrang ma chags dang 'dra// bram ze skud pa 'khal ba bzhin// shes pa klod la gar bder bzhag/ bsgoms pa de ltar ma ldan na// lag rdum brag la 'dzegs pa 'dra ba'o// mnyam bzhag dang ni rjes thob med// de ltar byung na bsgom pa'i mchog/ bying rmugs rgod pa'i dgra byung yang// rang gi de nyid shes pas sel/ zhes gsungs so/rdzogs pa chen po kun tu bzang po ye shes gsal bar ston pa'i rgyud las blta bsgom bstan pa'i le'u ste lnga pa'o//// de nas spyod pa bshad par bya ste// spyod pa rang byung lhug pa ste// bi shwa karma'i bzo dang 'dra// tshul 'chos med pa'i ngang nyid de// thabs dang shes rab mthun par bya// spyod pa de dang ma ldan na// dmus long brag la 'dzegs dang mthun// ji bzhin pa yis lta ba la// de bzhin pa yis blo bzhag ste// de yis ngang las ma yengs pa// sangs rgyas sa la gnas pa yin// zhes gsungs so// rdzogs pa chen po kun tu bzang po/ ye shes gsal bar ston pa'i rgyud las/ spyod pa'i man ngag dang bcas pa'i le'u ste drug pa'o//// de ltar gsang ba mchog gi bdag pos bka' stsal pa/ rigs lnga'i sangs rgyas kyis/ bcom ldan 'das la rang rang gi sems kyi rtogs tshad 'di smras so// e ma bde gshegs bcom ldan 'das// sangs rgyas kun gyi byang chub sems// tshig dang yi ge'i spyod yul min// de la gdod nas rtogs pa'i gnas med do// zhes rdo rje sems dpas smras so/ e ma chos kun stong pa'i bdag/ rang gi ngo bo brjod du med// brjod med de ni sna tshogs pa'i// chos rnams kun la khyab par gnas// zhes 'khor lo 'dzin pas smras so// e ma mnyam nyid byang chub sems// ming du btags pa'i chos rnams kun// mnyam pa nyid la gnas byas phyir// mnyam pa nyid las gzhan med do// zhes rin chen 'dzin pas smras so// e ma chos su snang ba kun// rang gi ngo bo yul las 'das// de nyid byang chub sems nyid ni// mkhas pas bsgom na rtogs par 'gyur// zhes pad+ma 'dzin pas smras so// e ma chos kun sems nyid de// nges pa med de dngos rtogs bral// de nyid dag pa'i ye shes rang bzhin te// mkhas pas ci dga' bsgoms na 'grub// ces rgya gram 'dzin pas smras so// des nas dpal gsang ba mchog gi bdag pos bka' stsal pa/ rang gi sems gsal ba'i ngang nyid shin tu rdzogs pa shin tu legs// phyogs bcu'i 'jig rten gang nas kyang// sangs rgyas rnyed par mi 'gyur ro// sems nyid rtogs pa sangs rgyas mchog/ ces gsungs so// rdzogs pa chen po kun tu bzang po/ ye shes gsal bar ston pa'i rgyud las/ byin rlabs kyis 'khor rnams kyis rang rang gi rtogs tshad phul ba'i le'u ste bdun pa'o//// de nas rdo rje 'dzin pas yang gsol pa// kye kye bcom ldan rdo rje 'chang// blta bsgom spyod pa de dag la// 'bras bu'i rim pa ji ltar lags// de dag bsgom pa'i rnal 'byor pas// 'chi ka'i rtags dang bar do'i dus// rim pa bdag la bshad du gsol// nyon cig dpal ldan rdo rje 'dzin// ma 'ongs pa yi don ched du// khyod kyis don zhus ya mtshan che// gus pas rab tu nyon la yid la zung// 'bras bu sku gsum ye shes lnga// chos sku stong gsal zung du 'jug/ chos sku bde chen rdo rje 'chang// sprul skus 'gro ba rigs drug 'dul// ye shes lnga ldan yon tan cha nas ldan// de nyid rang gi sems nyid de// logs nas 'byung ba ma yin no// 'chi rtags rim pa bstan pa ni// nyams len rnal 'byor nyid kyi rtags// sa ni chu la thim pa yis// lus ni mi theg ldang mi nus// chu nyid me la thim pa'i dus su ni// kha sna skams te nang bkrag shor// me nyid rlung la thim dus su// lus kyi drod stor yal bar 'gyur// rlung ni rnam shes la thim tshe// dbugs sdud mi shes rngam pa brtsegs// de yi dus su dran pa bskyed par bya// de nas dbugs ni chad pa dang// rnam shes snang ba dag la thim// snang ba mched pa dag la thim// mched pa thob pa dag la thim// thob pa chos sku dag la thim// de dus chos sku de nyid ni// shin tu gsal la ngos bzung bral// stong gsal 'dzin med rang gsal de// ngo yis zin pas mngon shes drug/ shar nas rig pa'i dbang mchog thob// man ngag dam pa ldan gyur na// de ni sangs rgyas sa la gnas// bcu bzhi spyir chib sa yang non// bgrod du med pa'i lam mchog yin// gal te stong gsal ma zin cing// 'gyu ba byung na 'gro drug tu// rang gi las kyis lus len te// 'khor ba'i mtha' la zad pa med// ces gsungs so// rdzogs pa chen po kun tu bzang po ye shes gsal bar ston pa'i rgyud las/ phyi rabs rnal 'byor pa'i 'chi rtags bstan pa'i le'u ste brgyad pa'o//// de nas yang rdo rje 'dzin pas gsol pa// kye kye rdo rje gsang ba mchog gi bdag/ stong gsal rig pa'i ye shes de// ngo yis gzung na ji ltar gzung// de nyid la ni gang du bzla// zhes gsol pas/ bcom ldan 'das gsang ba mchog gis bka' stsal pa/ stong gsal rig pa chen po de// kun gzhi gnyis kyi ngos nas bzung// ye nyid don gyi kun gzhi dang// sbyor ba rkyen gyi kun gzhi ni// sems can thams cad la yin te// sngar gyi bag chags dag dang ni// phyis kyi nyon mongs rnam rtog dang// dper na sa dang chu 'dres la// rnyog mar gyur pa dag dang mthun// de gsum dag dang chos sku 'dres// da ni chos sku ma yin te// de nyid don gyi kun gzhi ni// dper na chu ni rnyog ma dwangs pa bzhin// bag chags rtog pa nyon mongs kyis// ma bslad pa yi shes pa de// ma rtogs pa yi zug rngu med// 'dzin med rang shar chos kyi sku// shes pa rang lugs glod byas pas// shes pa dngas sangs bde ba la// ma zhen rtogs pa'i zug rngu med// dben pa'i gnas su thun bcad la// dang po kho na bsgom par bya// de la ngang gis gnas pa la// sgo lnga gsal la 'dzin pa med// de yi ngang la gnas par bya// de nas brtan par gyur pa dang// yul gyi snying po thams cad kun// ltar snang bun ne long nge tsam// de yi ngang du gnas tsam na// 'byams thub pa yi rnal 'byor te// de la bsgom du ga la yod// ye shes 'gyu ba ma zin na// bsgoms kyang sgom par ga la 'gyur// ma bsgoms rang sgom byung tsam na// bsgom du med pa'i sgom pa yin// de nyid gdeng du gyur pa ni// blta ru med pa'i lta ba yin// de nyid ngang du gnas pa ni// spyad du med pa'i spyod pa yin// de ltar gyur na sangs rgyas yin// zhes gsungs so/ rdzogs pa chen po kun tu bzang po ye shes gsal bar ston pa'i rgyud las/ ye shes ngos bzung ba'i le'u ste dgu pa'o//// de nas gzhan yang bshad kyis nyon// de nyid la bzla'i rim pa ni// sangs rgyas sa la gnas 'dod na// zung 'jug nyid du la chen bzla// stong gsal ngang la gnas tsa na// snying rje ngang gis 'byung ba ni// stong dang snying rje zung 'jug yin// de nyid 'dzin med rang shar gnas pa ni// bde stong zung du 'jug pa yin// gsal ba dang ni stong pa dag/ gnyis su med na zung 'jug yin// lta ba dang ni spyod pa dag/ gnyis med zung 'jug nyid du la bzla'o// thabs dang shes rab zung du 'jug/ ma zhen blo las 'das pa ni// stong gsal chos sku bde chen yin// rig pa stong gsal bde ba la// snang ba 'dzin med rang shar na// gnyis med bde ba chen po la// thun du bcad la bsgom du med// bar bar sems kyis sems la bya ra bya// bya ra ba la ngos gzung med// de yi ngang la gnas pa des// mtha' dbus med pa'i dgongs pa ste// gang ltar snang ba chos kyi sku// gang myong rig pa longs sku yin// sna tshogs shar ba sprul sku yin// de gsum dbyer med rdo rje'i sku// snang tshad sku la grag tshad gsung// dran rtog thugs kyi dkyil 'khor yin// bgrod du med pa'i sa chen non// zhes gsungs so// rdzogs pa chen po kun tu bzang po ye shes gsal bar ston pa'i rgyud las/la bzla ba'i le'u ste bcu pa'o//// de nas gzhan yang gus pas nyon la yid la zung// rdzogs pa chen po'i gdam ngag 'di// theg pa kun las khyad par 'phags// kun gyi dngos gzhir shar bas na// lta ba khyad par 'phags pa ni// 'dzin med rang shar zung 'jug yin// bsgom pa khyad par 'phags pa ni// rig pa yul med blo las 'das// spyod pa khyad par 'phags pa ni// spyod pa rang byung lhug pa'i ngang// kun las khyad 'phags bsam mi khyab// 'bras bu khyad par 'phags pa ni// dbyer med sku las khyad 'phags bgrod du med// sa las khyad par thob med pa// rang byung ye shes blo las grol// 'di ltar snang ba'i sems nyid de// sems las logs na rdul tsam med// phyi yis sgro 'dogs chod pa yin// de dag 'dzin med rang shar las// sems ni kha dog dbyibs dang bral// rtag pa ma yin dngos po med// chad pa ma yin rig cing gsal// nang gi sgro 'dogs chod pa yin// stong dang gsal ba dbyer med pas// zung 'jug bde chen chos sku ste// gsang ba'i sgro 'dogs chod pa yin// de dag 'dzin med rang shar bas// blo yi spyod yul dag las 'das// rang byung ye shes btsal med pa// mthar thug sgro 'dogs chod pa yin// de ni khyad 'phags lta ba'i don// de yi ngang la gnas pa ni// bsgom pa'i khyad 'phags don nyid yin// de yi ngang la ma yengs nas// gar bder rig pa gnas pa ni// spyod pa khyad par 'phags pa'i don// de yi don la slebs pa ni// 'bras bu khyad par 'phags pa'i don// de la bgrod dang thob rgyu med// lam dang sa yi khyad par 'phags pa yin// 'di ni lam mchog dam pa ste// ri bran thams cad lta 'dod na// ri bo'i rtse la 'dzegs pa bzhin// theg pa 'og ma shes 'dod na// a ti yo ga'i don la blta// zhes gsungs so// rdzogs pa chen po kun tu bzang po ye shes gsal bar ston pa'i rgyud las/ khyad par 'phags pa'i le'u ste bcu gcig pa'o//// de nas yang dpal kun tu bzang po chos kyi sku des/ 'khor rnams la bka' stsal pa/ nga'i rgyud 'di ni rgyud thams cad las khyad par 'phags pa yin te/ de ci'i phyir zhe na/ log pa'i lam ni rtag chad du zhen pa/nyan thos la sogs pa a nu man chad ni phyogs su 'dzin te/ yang dag pa'i don dang 'gal te/ rgyud 'di ni stong gsal bde ba chen po/ dus gsum gyi sangs rgyas thams cad kyi dgongs pa dril te gcig tu bstan pa yin pas/kun tu bzang po ye shes gsal bar ston pa'i rgyud ces bya bar zung zhig/ nga'i rgyud 'di ni rtags tsam 'dzin pa'i dus su/ gang zag skal ba dang ldan pa rnams kyis spyod par 'gyur ro// de yang rgyud 'di ston pa'i dus su/ gang zag skal ba dang ldan pa rnams la/ rig pa rtsal gyi dbang gsum bskur la/ dam tshig la gnas par bya'o zhes bka' stsal pa dang/ rdo rje 'dzin pa la sogs pa rnams yi rangs te/rang rang gis stong gsal chen po'i don rtogs nas/ sku gsum ye shes lnga'i ngang du sangs rgyas par gyur to// de ltar du gyur nas/ dpal rdo rje 'chang la 'khor rnams kyis rdo rje'i tshig tu bstod pa ni// e ma ho bdud bzhi bcom nas yon tan ldan// mtshan ma'i dngos po kun las 'das// stong gsal bde ba'i bdag nyid can// thams cad mkhyen la dad pas bstod// ces rdo rje'i tshig gis bstod par gyur to// rdzogs pa chen po kun tu bzang po ye shes gsal bar ston pa'i rgyud las/ rgyud yongs su gtad pa'i le'u ste bcu gnyis pa'o//// dus gsum sangs rgyas kyi dgongs pa gcig tu dril ba'i rgyud ces bya ba rdzogs so// bdag 'dra sangs rgyas ye shes kyis// gu ru shrI sid+ha la// dad pas mnyes byas rgyud 'di gnang////

CLOSE WINDOW