CLOSE WINDOW

Gpb003.001
བོད་ཡིག

rdzogs pa chen po ma rig mun pa rab tu sel bar byed pa'i lta ba ye shes gting nas rdzogs pa'i rgyud ces bya ba/ rgya gar skad du/ ma hA san+d+h+ya bid+yA ta maHpra t+yA de sha dr-iSh+ti dz+nyA na nim+na pU ra Na tan+t+ra nA ma/ bod skad du/ rdzogs pa chen po ma rig mun pa rab tu sel bar byed pa'i lta ba ye shes gting nas rdzogs pa'i rgyud ces bya ba/bcom ldan 'das dpal kun rig chos kyi rje ye shes kyi sku dang ldan pa de la phyag 'tshal lo// 'di skad go zhing rtogs pa'i dus gcig na// ye nas rang byung kun rig rgyal po de// 'khor 'das don gyi gnas chen du// rang gis rig cing yid ches dad ldan 'khor// gang yang mi brjod bstan pa lhun gyis bzhugs// sangs rgyas sems can ngo bo nyid las byung// chos rnams kun gyi g.yo med rang byung sku// de nyid rang rig rtogs pas kun tu bzang// rang gi ngo bo ye shes ston pa'i mchog/rnal 'byor skal ldan dam pa nges pa'i don// yangs dog snga phyi med pa'i ye shes de// skye 'gag mtha' dbus med pa'i 'og min gyi// rang byung kun khyab chos dbyings gnas kyi mchog/der 'dus chos sku lnga yi byin rlabs kyis// bde gshegs rgyal ba rigs lnga la sogs pa// rig 'dzin sprul pa dad ldan 'khor rnams ni// ma lus ye nas 'dus pa'i 'khor gyi mchog/dus gsum gang yang mi sems ngo bo la// sngar med phyis min ye nas da lta nyid// sems nyid 'dod nas ma bcos rang rig la// dus kyi nang na gcig pa dam pa'i mchog/rang byung chos sku sems la gnas pa'i phyir// yang dag don gyi nges don ye shes de// tshig gis mi mtshon go ba'i gdams ngag ni// sangs rgyas kun gyi chos nyid bstan pa'i mchog/de tshe rdo rje sems dpas don zhus pa// sangs rgyas kun gyi dgongs pa nges pa'i don// ma nor ma bcos rang byung chos sku de// sems can blo yis nges par rtogs pa'i thabs// kun rig ston pa chos rjes bshad du gsol// zhus pa'i don gsan thugs kyi bka' stsal pa// nges don ma nor nges don ngas bshad do// srid gsum mi rnams ma lus thams cad kun// nges pa'i don gyis mi 'dul drang don gyis// gnod bzhin srog ser sdig la phangs med 'bung// dam log mang bas tshe thung bkra mi shis// de dus rdzogs chen snying pos don bshad na// nyan thos rang rgyal byang chub sems dpa' skrag/ rgyud lung rnal 'byor sgro skur 'debs shing 'phya// tshul 'chos sde sangs zhe sdang phrag dog byed// nges don 'di la 'gal sems sdig can rnams// dmyal bar nges 'gro gtan du snying re rje// rgya mtsho kun btsal rin chen rnyed dka' bzhin// snod ldan slob ma dad ldan shin tu dkon// de phyir shin tu gsang ba'i gter du bzhag/ rdzogs pa chen po ma rig mun pa rab tu sel bar byed pa'i lta ba ye shes gting nas rdzogs pa'i rgyud las/don gyi gleng gzhi gsang bar gsungs pa'i le'u ste dang po'o//// de skad gsungs pas 'khor gyi don go nas// gdung ba 'don phyir yid kyis don gsol pa// ma rig las kyis sdug bsngal 'khyams pa'i sems// gzung 'dzin bag chags dbang gis zhen pa la// rnam rtog dra ba gang gis bcad pa'i thabs// thugs rje chen pos mi 'dzin yi re chad// shin tu rnal 'byor bka' bden 'byung ba dka'// sems can tshe thung skye rgas gting nas thug/ ma rig mun pas gtibs pa snying re rje// 'gro drug 'khor ba mi sgrol yi re mug/ rang sems sa 'khor bdag la sa mkhan mdzod// sems can las la thugs rjes yi chad kyang// snying rjes 'gro don thugs rjes mi mdzad dam// sems can lha mi rnams ni shes pa rtsing// dbang po yul la g.yengs pa'i gzung 'dzin gyis// 'tsho ba dkon la nad dang rkyen mang bas// thar lam mi 'thob 'khor bar lhung zhing 'khyams// nges don man ngag rtogs par bya ba'i don// bka' bzhin snod dang ldan par dam bcas pas// ma bsgoms 'bral med nges don thugs rjes gsungs// rdzogs pa chen po'i lta ba ye shes gting nas rdzogs pa'i rgyud las/ 'khor gyis gdung ba bton pa'i le'u ste gnyis pa'o//// de nas 'dus pa'i rdo rje sems dpa' la// thugs kyis gzigs nas nges par bka' stsal pa// bsgom du med pa mi 'bral gdams ngag rgyun// kun bzang nga yi thugs nas brgyud pa yi// nges don byin gyis brlabs pa'i mkhas pa la// rang sems rtogs 'dod slob ma las can gyis// dad pas rang nyid shin tu gus byas nas// lus dang longs spyod srog la mi blta bar// srin mo bu mo la sogs rab rgyan te// rta dang glang po nor gyi dbyig rnams kyang// ser sna med par bla ma dag la 'bul// da yang 'khor gyi snying po nyon// chos phyir brtson 'grus che la dam tshig ldan// blo brtan shes rab che zhing don gsang thub// tshul shis ngang bzang rnams kyi don gyi gter// de dag yon tan brgya ldan slob ma la// rab tu gsang ste don nyid ston pa yi// bla ma mkhas pa mtha' bcu rdzogs pa la// mnyen zhing dul ba thugs rje rab ldan zhing// srid par zhus kyang don rnams zad med pa'i// dam pa'i mdzod kyi gter ldan ston la mkhas// dper na seng ges 'jigs pa rtsad gcod bzhin// blo dngos gcig la gtod la gus par zhus// de yang rdo rje sems dpa' 'khor rnams nyon// yang dag don gyi lta ba gsang ba 'di// gang zag phyin ci log dang lta ba dman// thos pa chung la blo brtul shes rab med// nor phongs kha ral la sogs snod med la// 'di bstan gnyis ka bsreg phyir rab tu gsang// de skad gsungs ma thag tu yid dga' nas// 'khor rnams snod kyi don dang ldan pa ni// khas blangs dam bcas nas ni yid bsdus te// mgrin gcig gsol te lhags nas 'khod gyur to// rdzogs pa chen po lta ba ye shes gting nas rdzogs pa'i rgyud las/snod bcud bstan pa'i le'u ste gsum pa'o//// de nas bcom ldan kun rig rgyal po yis// ched du brjod pa'i don de gsungs pa ni// 'gro drug sems can med pa'i gong rol du// sangs rgyas med pas ye shes ming yang med// rang bzhin lhun grub sangs rgyas ma rig med// de phyir kun bzang nyid kyang glo bur sangs rgyas te// ma bcos 'dod nas mi rtog blos bsgoms kyang// bag la nyal gyi bag chags yod pa'i phyir/// byang chub sems dpa' man chad gdeng med gol// ma rigs sems can rnams ni shes pa rtsing// kun gzhi rnam gsum bag chags mngon rgyu bas// 'og ma'i phra mo'i rnal 'byor shin tu gol// de skad gsang ba'i don gsungs ma thag tu 'khor rnams sems 'grogs nas yid ma rangs te sems kyi don la the tshom du gyur nas/ ting nge 'dzin la yid 'byung bar 'gyur ro// rdzogs pa chen po lta ba ye shes gting nas rdzogs pa'i rgyud las/ ched du brjod pa'i le'u ste bzhi pa'o//// de nas 'dus pa'i rdo rje sems dpa' yis// 'khor ba'i zhen rtog bsal ba'i don ched du// kun rig chos kyi rje la 'di skad gsol// dang po sems kyi kun gzhi ji ltar gnas// de las bag chags kun gzhi ji ltar byung// lus kyi kun gzhi blang tshul ji ltar 'khor// ma rtogs sems can bar dor ji ltar 'khyams// kun rig chos skus nges par bshad du gsol// de don zhus pa thugs chud bka' stsal pa// dang po sems kyi kun gzhi gnas tshul ni// thog ma'i khungs dang da lta tha ma yi// ngo bo nges tshig che chung shas su dbye// mtshan nyid gnyen po las dang rtsal dang yul// dpe rtags sgo nas bstan pa shin tu gsungs// da yang rdo rje sems dpa' yid kyis nyon// dang po sems kyi kun gzhi thog mar yang// gang la mi rtog don gyis ma zin pa// de nyid ma shes lhan cig ma rig pa// der rtog zhugs pas sems kyi kun gzhi byung// de nyid da lta ga na gnas pa'i rten// 'gro drug sems can thams cad ma lus dang// nyan thos rang rgyal byang chub sems dpa' la// kun dang thun mong ma yin tshul du gnas// da yang 'dus pa'i 'khor rnams yid kyis nyon// sems kyi kun gzhi tha ma gar 'gro na// gnyen po ye shes lung ldan rang shar nas// cig car rim gyis nges par nges pa ste// de don ma sbrang sa zin nges pa med// ngo bo bzhi yi don nyid ma shes phyir// shes pa bag chags gnyid log kun gzhi ste// ras dkar la ni snum zhen dpe bzhin du// chos nyid ma rig rtog pa'i ngo bor gnas// de yang 'khor gyi snying po yang nyon cig/ sems kyi kun gzhi nges tshig snang ba la// rnam shes sna tshogs yul la sems pa'i phyir// med pa'i chos la yang dag nges par 'dzin// thag pa la ni sbrul snyam sems 'khrul 'dra// sems can kun la shas ni che chung yod// nyan thos byang chub sems la gnyen po ni// bag nyal phra ba shin tu phra bar gnas// mngon du rgyu ba med pa nyon mongs dag/ rgyu rkyen mtshan nyid mnyen pos 'jig pa'i phyir// tha ma so sor dengs pa dngos po med// da lta kun gzhi ji srid yod kyi bar// rgyun mi 'chad dang dus gsum 'gag pa med// de yang 'khor gyi 'dus pa'i snying po nyon// thun mongs gnyen po'i rigs ni sbyin sogs bzhis// nyon mongs bag chags khad kyis rang zhi stai// bsam gtan shes rab ma rig log lta 'joms// thun mongs ma yin ye shes cig char rdzogs// dge sdig las kyis rgyu mthun gang rung skye// rnam smin las ni rim gyis ma yin te// myur du bar ma chod nas 'bras bu smin// lung du ma bstan 'bras bu nges pa med// da yang rdo rje sems dpa' yid kyis nyon// bag chags bzang ngan rtsal ni rigs drug ste// bde sdug bye brag so sor myong ba la// cha phra rtsal ni nyan thos sems dpa' la// ye shes me long lta bur rang snang gnas// mtshon dpe ras dang mar dang nam mkha' dang// chu dang me long kha dog la sogs rnams// gzhi la rgyu yi rkyen byung ma rig pa// med las byung ba ya mtshan cher gyur to// kun gzhi dngos por med la sems su 'dod// du yod phyir na me yod nges pa bzhin// de las skye ba'i 'bras bu dge sdig la// sems pa'i rtags su lus ngag yid gsum 'grub// da yang 'dus pa'i 'khor rnams yang nyon cig/de dag dbye ba bstan pa blo dman la// yid ches bya phyir mtshon par bstan pa yin// don la ma rig pa la sems su gdags// gzung 'dzin 'khor ba bskyed phyir kun gzhi yin// rdzogs pa chen po lta ba ye shes gting nas rdzogs pa'i rgyud las/ gzhi gnas sems kyi kun gzhi bstan pa'i le'u ste lnga pa'o//// de nas 'dus pa'i 'khor gyi snying po la// kun rig ston pa chos rjes yang gsungs pa// bag chags kun gzhi 'phral byung dang po'i khungs// da lta gnas dang tha mar gar 'gro ba'i// ngo bo mtshan nyid nges tshig las dang dpe// rtags dang gnyen po dbye ba rtsal dang grangs// de dag don du bsdus te gsungs pa yin// de yang rdo rje sems dpa' da yang nyon// thog ma mtha' drug rtog pa las byung ba// gang yang mi rtog shes pa don ma rig/ rang nyid yengs pa'i tshul gyis rtog pa 'phros// mi rtog rang snang sgrib pa bag chags brtas// ma rig bag chags snga ma'i rgyu la brten// 'geg pa ma rig pas ni sdug bsngal 'byung// chos sku mi 'gyur ba la 'khor ba brten// de phyir lus dang sems la bag chags yod// de yang 'dus pa'i snying po yid kyis nyon// tha ma gar 'gro dus la nges med rkyen// ye shes phrad nam rig bag chags brlag/ de med bag chags dag pa'i thabs med de// nyi ma'i snang med mun pa mi 'bros 'dra// ngo bo rdzun la thog mar bden bzung nas// rtog rtog zhen zhen blo brtas rgyud la gnas// de ltar tha mar bag chags rgyun mi 'chad// de phyir 'khor ba 'ba' zhig yang yang skye// mtshan nyid gcig gis gcig bskyed yongs su 'gyur// de yi 'bras bu rim dang so sor smin// rgyu rkyen tshogs dang ye shes mnyen pos 'jig/ bzang ngan che chung ci 'dra de ltar brten// da yang rdo rje sems dpa' yid kyis nyon// bag chags kun gyi gzhi ni rtog pa ste// nges tshig rtog rgyun shin tu cha phra ste// bag tsam la brten rtog pa rags brtas pas// bag chags kun gzhi snang ba yul du 'byung// las ni 'bras bu gang rung smin par byed// de yang thog mar bcas dang thog ma med// gang smin phra rags zil gnon bag chags chung// lung du ma bstan 'bras bu smin mi nus// de dpe nam mkha' sprin dang sa zhag snum// g.ya' rdul lbu ba la sogs bag chags dper// 'dra ba yod kyang don min mtshon par zad// glo bur 'byung phyir yul ni gzhi la med// da yang 'dus pa'i 'khor rnams yid kyis nyon// bag chags kun gzhi'i rtags ni phung po lnga// bag chags rgyu mthun rnam par smin pa ste// phung po lnga dang dus gsum mi 'bral phyir// 'khrul pa brtas pa'i rtags su bstan pa yin// gnyen po thun mong ba dang ma yin gnyis// thun mong dad pa brtson 'grus bzod pa dang// mos pas drangs pa'i ting 'dzin la sogs rnams// thun mong ma yin ye shes ma rig dag/ dbye ba bag la nyal dag mngon gyur gyis// bskyed pas nges par 'grub dang gzhan du gyur// gzhan du ltos dang ngo bos 'grub par 'dod// dbye ba ma nor mi 'gal bstan pa yin// de yang 'dus pa'i snying po sems dpa' nyon// bag chags rtsal kyang shas ni che chung ste// spyi yi sdug bsngal skye rga na 'chi yin// byams bral dgra phrad med btsal mi rnyed pa// gang byung 'khor ba'i bag chags rtsal du gsungs// ming ni grangs la mang du yod mod kyang// bag chags nyon mongs rtog pa skyon dang gsog/sgrib pa ltung ba gol sa 'khrul pa ste// yul yod bar du grangs la thug pa med// da yang rdo rje sems dpa' yang nyon cig/ de dbye snang ba'i 'khrul pa yul las 'byung// de phyir yul sems bar du gol sa gcad// des chod bag chags gzhi la gos pa med// rdzogs pa chen po lta ba ye shes gting nas rdzogs pa'i rgyud las/ 'phral byung bag chags kun gzhi bstan pa'i le'u ste drug pa'o//// de nas 'dus pa'i 'khor la bka' stsal pa// lus kyi kun gzhi dbye ba'i don bstan pa// lus kyi dbye ba ngo bo mtshan nyid dang// de yi las dpe bstan pas rtogs par gsungs// da yang 'dus pa'i 'khor rnams yid kyis nyon// dbye ba rang bzhin bag chags yid kyi lus// thog ma tha ma da lta so so'i khyad// nges par gtan la phab pa'i don bstan phyir// gzugs ni tha dad lus kyi gzhi las byung// ngo bo rtsal shugs tha dad lta bur ni// dngos por snang dang thig le'i rtsal de la// gong gi lus gnyis kyang ni de la brten// re zhig lus kyang bag chags dbang gis snang// de yi mtshan nyid nges par chos sku dang// bag chags lus kyang rang bzhin lus la brten// gcig dang tha dad gnyis ka yin pa'i phyir// 'khor 'das bstan pa de yang de ltar gnas// da yang 'dus pa'i snying po yang nyon cig/sangs rgyas byang chub nyan thos las kyi ni// rdzu 'phrul mtshan dang dpe byad kun gyi gzhi// sems can lus ngag yid kyang de la brten// lus kyi kun gzhi thams cad brten pa'i las// de yis de nyid mtshon pa'i dper gsungs pa// lus kyi kun gzhi rang gnas khyim dang 'dra// nyi ma 'jug pa'i dpe gdal dmigs pa 'dra// nyi zla gza' skar 'char ba'i nam mkha' 'dra// da yang rdo rje sems dpa' yang nyon cig/de dag kun gzhi rnam gsum bstan pa yang// nang gi kun brtags sems kyi kun gzhi bstan// phyi yi kun brtags bag chags kun gzhi byung// zung du 'dzom pas lus kyi kun gzhir 'grub// rdzogs pa chen po lta ba ye shes gting nas rdzogs pa'i rgyud las/nyon mongs lus kyi kun gzhi bstan pa'i le'u ste bdun pa'o//// da yang 'dus pa'i 'khor rnams yang nyon cig/ lung ldan nges pa'i gdams ngag med pa'i mi// skye bo sngags pa btsun pa gang yang rung// kun gzhi rnam gsum bag chags mthu brtas pas// dge ba'i chos spyod las rnams ci spyad kyang// don med khams gsum 'khor bar 'khyams pa'i skyon// de don bshad cing nges par 'grol gyis nyon// sems can 'chi ltas rim par 'byung ba ni// dang po 'byung ba sa ni chu la thim// de rtags phung po gzugs ni mi theg lci// lus kyi bkrag mdangs nyams phyir kha dog log/de nas chu ni me la thim gyur te// kha skams mchu dang lce ni rwa bzhin 'gyur// nyam chung smra ba mi nus khar mi thon// de nas me ni rlung la thim 'gyur te// lus kyis drod shor shin tu grang ba 'byung// de tshe shi 'drad gdon cing mig rtsa zlog/ de nas rlung bzhi rnam shes thim 'gyur te// dbugs ni brtsegs ma thum thum byed pa 'byung// de tshe chags sdang mi mno dgu gcig bsam// gnad gcod drags nas dran pa brlag par 'gyur// 'di ni snang ba nub kha'i dus yin te// de tshe snang ba gnyis ni nyams su myong// dang po snang ba smig rgyu du ba ltar// bun ne long long 'jig rten zhig par mthong// de tshe 'phos ma thag tu snang ba mched// srin bu me 'khyer lta bur hrab hrib tsam// snang ba thob pa mar me'i rtse mo ltar// shin tu brtag dka' rab rib 'byung ba'i tshe// ye shes gnyug gis byung ste ma rig bsgribs// da yang 'dus pa'i rdo rje sems dpa' nyon// de tshe bar do'i 'brel byung bag chags kyis// snga ma'i lus dang bcas yod snyam pa 'byung// bar do'i snang ba 'gyur ba yid kyi lus// 'khor los bsgyur rgyal cha lugs rang yid kyis// dbang po kun tshang thog med kun tu 'gro// de nas shes pa'i snang ba yang 'gyur te// phyi ma gang len lus su yod snyam nas// rtswa spyil khyim sogs bla gab gang rung du// rang dbang med par shes pa mngal du 'jug/zhugs nas chags sdang skyes te lus blangs pas// skye rga na 'chi can gyi 'khor bar 'khyams// yang nas yang du 'khor bar sdug bsngal bskyed// de phyir 'khor ba'i mtha' la zad pa med// rdzogs pa chen po lta ba ye shes gting nas rdzogs pa'i rgyud las/ ma rtogs pa bar dor 'khor bar 'khyams pa'i le'u ste brgyad pa'o//// de nas 'khor gyi snying po yang gsol pa// dad ldan 'dus pa'i tshogs la phan gdags phyir// kun rig chos kyi rje la 'di skad gsol// myang 'das 'og ma'i blta sgom ji ltar dbye// theg pa'i bye brag sa lam ji ltar sbyar// lhun gyis grub pa'i 'dod gzhung dbye ba gang// mnyam pa'i rgyal pos nges par bshad du gsol// de skad zhus pas don gsan 'khor rnams la// ston pas theg pa'i dbye ba bka' stsal pa// mu stegs rtag chad log lta 'dzin pa dang// nyan thos rang rgyal mdo sde'i mtshan nyid dang// phyi pa kri ya u pa yo ga dang// nang pa ma hA a nu yo ga rnams// de yis dbye ba ngas bshad legs par nyon// nyan thos gang zag bdag med blos byas nas// lam du kun 'byung ba dang sdug bsngal spang// phyi nang dbugs la sems gtad 'gog pa sgom// sngon gyi mar me'i bstan pa la zhugs nas// shAkya thub pa'i bstan la mnyam par bzhag/ ma 'ongs byams par sems bskyed dgra bcom 'dod// re ba yod phyir chos nyid gnas lugs 'khrul// da yang 'dus pa'i rdo rje sems dpa' nyon// rang rgyal 'dod pa yul rnams phyogs chas stong// sems su snang ba'i chos rnams ma gtogs par// ne tso khyu lding bse ru dpung bcas nas// sgo lnga'i yul ni mi 'geg rgyu ba 'geg/ rjes 'brang med par stong pa blos bzung bsgom// lung ldan man ngag med phyir rang sems gol// then tshor mig gi nam mkha' chung ba la// phra rags 'then thag nan gyis 'dzud pa bzhin// yum la spang sdud zhen pa byed pa'i phyir// yul sems tha dad bdag med blos btags nor// da yang 'dus pa'i 'khor gyi snying po nyon// mdo sde'i lta sgom rnam pa gnyis gsungs pa// sems tsam snang ba sems su blos sdud byed// bden gnyis bzang ngan ris su 'byed pa'i phyir// yang dag sems su 'dzin pa rags par gsungs// rnam rig blang dor ched du yang dag byed// yul rnams 'khrul pa gnyen pos sbyangs par 'dod// don dam 'khrul med nyams myong rang gsal ba// blang dor yod phyir nges pa'i don dang 'gal// da yang 'dus pa'i rdo rje sems dpa' nyon// theg chen dbu ma'i kun rdzob sgyu ma'i yul// don dam mtha' gnyis bral ba'i dmigs med de// zhi gnas dang ni lhag mthong zung 'brel bsgom// rjes thob mnyam bzhag rim gyis yod phyir gol// yul la rtog pa zhugs nas sems kyis gzhig/ yid kyis dmigs pa zhugs nas 'dzin pa skyes// de phyir ma rtogs bdud kyi spyod yul te// lam la rim par bgrod pa'i grangs byung na// chos sku yang dag don du ga la 'gyur// rdzogs pa chen po lta ba ye shes gting nas rdzogs pa'i rgyud las/ phyogs mtshams 'dzin pa'i le'u ste dgu pa'o//// de nas kun rig chos rjes yang gsungs pa// kri ya'i blta ba chos nyid stong bsgom nas// snang ba kun rdzob cho 'phrul rigs gsum lha// rje 'bangs rim pa bzhin du dngos grub re// gzhi la gcig par ma rtogs don dang 'gal// gnyis ka rgyud kyis lta spyod ya 'gal ste// gong 'og gzung 'dzin theg pas ma zin pas// rtsa ba gcig tu ma shes don dang bral// lta spyod gong 'og gnyis 'dod rang nyid 'khrul// rnal 'byor yo gas chos dbyings dkyil 'khor du// spun dang grogs po mnyam nyid lhar bsgoms pas// lus ngag rtsol ba yod phyir gol ba ste// ji ltar nan gyis bsgoms kyang chos sku min// da yang 'dus pa'i rdo rje sems dpa' nyon// ched du bsgrubs dang rtsol ba ci spyad kyang// byas pa don med sdug bsngal gyi nar 'khyams// rtsol sems byas pas thams cad don med 'khrul// bla med byang chub chen po'i gegs su che// ji srid dngos po mtshan ma rags kyi bar// de bzhin lha yi sku yang shin du rags// de phyir dngos po mtshan ma med na ni// lha yi sku yang gzhi la med pa'i phyir// blo dman drang ba'i don gyi gsang sngags la// nges don snying po don gyi lta ba med// rdzogs pa chen po lta ba ye shes gting nas rdzogs pa'i rgyud las/ rtsol ba phra rags kyi gol sa bstan pa'i le'u ste bcu pa'o//// de yang rdo rje sems dpa' legs par nyon// gnyis su med pa'i rgyud kyi lta ba'i gzhi// snang ba 'di nyid ye nas skye ba med// skye med nyid na gang yang thams cad skyes// skyes tsam nyid na rang sems ngang gis stong// dper na chu dang me long gzugs brnyan bzhin// snang dang stong pa dbyer med gdod nas dag/ da yang 'khor gyi snying po legs par nyon// chags grol gnyis kyi lam du bstan pa yang// ting 'dzin rnam gsum la sogs dmigs bsgom pa// gzhi la rtsol med lam la rtsol yod phyir// rtog tshogs lhar bsgyur don dang 'gal bar gsungs// de phyir lam nor 'bras bu mi 'byung bas// ye sangs rgyas su 'dod pa chos sku bral// de bas ma hA lta ba yul sems bsres// nan gyis gnyis med lta ba 'bras bu med// da yang rdo rje sems dpa' chen po nyon// a nu yo ga snang ba skye med la// kun tu bzang mo'i mkha' dbyings b+ha gar brtags// yul la rnam rtog 'dzin pa cir snang ba// kun tu bzang po'i rol pa yin par brtags// gnyis med bde chen sras dang rtsal du 'gyur// de la rang gis rgyun du ma yengs bsgoms// de nyams bde gsal rtsal ni btang mi bra// ji bzhin pa yi don gyi chos nyid la// ma bcos ma yengs ched du blo bzhag go// de don mi brjed spyod pa'i 'bras bu yang// ched du byar med ngang ngam shugs las gsal// de la yid 'jog rtsol ba phra mo yod// de phyir lung gis yul sems gcig 'dod gol// de dag rgyud lung yul gyis bsgribs pa'i phyir// rang byung ye shes don ma reg pa'i lam// de don rim gyis dad du bzhag dgos pas// yengs pa 'byung phyir ma nor don dang bral// rdzogs pa chen po lta ba ye shes gting nas rdzogs pa'i rgyud las/ rgyud lung dang bsgom gyis don ma reg par bstan pa'i le'u ste bcu gcig pa'o//// de nas kun rig rgyal pos bka' stsal pa// theg brgyad mya ngan 'das par bstan pa yang// gong 'og sa lam rim par phye ba ste// la shan drang don yin te ngas bshad nyon// nyan thos rang rgyal mdo sde bye brag pa// mun las nam langs byad ltas nyi med bzhin// bskal par lam lngar rim gyis bgrod gyur kyang// phyogs tsam rtogs kyang bag la nyal yod phyir// gnas skabs bde tsam mthar thug 'bras bu med// da yang rdo rje sems dpa' yid kyis nyon// byang chub sems dpa'i theg pa chen po la// nyi ma'i snying po ma mthong zer mthong bzhin// bdag gzhan don du sa lam rim sbyangs pas// 'og ma dag las khyad par 'phags gyur kyang// yang dag ma rtogs bag nyal phra yod phyir// shes bya'i sgrib pa yod pas chos skur bsgribs// da yang rdo rje sems dpa' legs par nyon// ting 'dzin khyad par 'phel ba'i rim pa las// sa yi ngo bo nges tshig dbye ba dang// rten dpe rtsal gyi sgo nas ston par gsungs// sa dang lam lnga rim gyis bstan pa yang// pha rol phyin pa bcu dang sbyar ba ste// shes rab che chung khyad par che ba las// log nas 'gran thub yod pa ma yin no// da yang 'dus pa'i 'khor rnams yang nyon cig/ gsang sngags gsang chen lam ni phyi nang lnga// sgra mthun don dang nges pa'i gtan tshigs kyis// lam lnga pa la khyad yod thabs chen yang// rgyal srid med pa'i rgyal po 'khor sdud bzhin// blta ba khyad med snang ba sems su sdud// de phyir rang byung chos sku'i gegs su che// rdzogs pa chen po lta ba ye shes gting nas rdzogs pa'i rgyud las/ theg pa thun mong gi lam bstan pa'i le'u ste bcu gnyis pa'o//// de nas 'dus pa'i 'khor gyi snying po la// kun rig ston pa chos rje kun bzang gis// lhun grub la shan dbye ba bka' stsal ba// gzhi dang bsam pa mthun snang nges med dang// sems yin spros med thal drags grub la bsgrub// rnam dag dgos med rnam pa mang phye yang// de dag chos nyid gnas lugs min phyir gol// da yang 'dus pa'i rdo rje sems dpa' nyon// 'khor 'das gzhi la gnas pa'i lhun grub ni// rang sems snying po byang chub chos nyid de// kun la rang chas yod phyir ye sangs rgyas// rtogs dang ma rtogs med par kun gyi gzhi// bsam pa lhun grub yid smon blo yi chos// sa rdo gser du byed bzhin med de yod par 'dod// gnas 'gyur lha bsgom grol 'dod kun brtags te// med las yod 'tshol smig rgyu bsnyeg pa 'dra// da yang 'khor gyi snying po legs par nyon// 'jig rten mthun snang lhun grub 'khrul pa ste// snang srid yul snang blo yis 'di ltar brtags// gzhi ni lam la ma bsgyur sangs rgyas su// log lta ye yin mi phan 'khor bar smin// nges med sna tshogs lhun grub yin zer nas// gzhi ni nges med lta ba phyogs med 'dod// rang sems sna tshogs phyir na chos nyid min// de phyir rig byed smra ba'i lta bar gol// de yang rdo rje sems dpa' chen po nyon// gang yang sems yin lhun grub 'dod pa de// phyi nang chos rnams sems su blos bsdus pas// dbang po yul yengs phyir na rang sems 'khrul// sems tsam ka ta ri yi lta bar gol// spros med rgyun chad lhun grub 'dod pa de// me shi shing zad dpe bzhin 'dod pa'i phyir// ye shes rnam rtog rgyun chad spang bya med// de phyir gnyen po med pas grub bya bral// ye shes med par 'dod phyir don las 'khrul// da yang 'dus pa'i rdo rje sems dpa' nyon// thal drags gong rgal lhun grub 'dod pa de// chos can kha dkar rdzas gcig gang rung ba// 'khor 'das dus gsum tshang zhing rdzogs 'dod pas// gcig la gcig med grangs can lta bar gol// grub zin pa la bsgrub pa'i lhun grub de// sangs rgyas yon tan grub la sems can skyon// rang ngor lhun gyis grub pa yin pa'i phyir// skyon yon tha dad gnyis 'dzin don las gol// chos nyid rnam dag lhun grub 'dod pa de// ngo bo nyid kyi gzhi la dgongs nas ni// dpe ni rin po che yi gser gling ltar// sangs rgyas rnams kyi dgongs pa'i ngo bo la// bsgom du rdul tsam du yang med do zer// rang gi sems kyis chos sku ma rtogs par// mi ltogs phyug po'i nor rnams bgrang ba dang// sems can sangs rgyas yon tan brjod dang 'dra// ye nas rnam par dag par 'dod pa de// gnas lugs bden ste rang blo 'khrul snang tshul// da yang 'khor gyi snying po yang nyon cig/ dgos pa med pas lhun grub 'dod pa dang// rang sems snying po ye shes ma rtogs par// dge rtsa kun la thun mong bsngo ba'i phyir// sdig can sgrib sbyang tshogs su 'gyur 'dod gol// de nas lhun grub bcur gsung gol sa ste// don gyi nges don lhun grub med pa'i phyir// de yang dus kyi lta log nan brtags pas// nges pa'i lung med blos dpyad shin du 'khrul// rdzogs pa chen po lta ba ye shes gting nas rdzogs pa'i rgyud las/ spyi'i mtshan nyid lhun grub tu 'dod pa shan dbye ba'i le'u ste bcu gsum pa'o//// de nas rdo rje sems dpa' yis// 'khor rnams bsam pa thugs chud nas// sems rtog gsal phyir don 'di zhus// don 'di sangs rgyas rgyu 'di gang las byung// gzhi la 'pho 'gyur med pa'i lta ba gang// snang ba nges med sna tshogs ci las byung// ma bsgoms skye bor mi gol thabs ci lags// yid kyis zhus pas don gsan thugs chud nas// ston pa kun rig rgyal po chos rje yi// thugs kyi dkyil 'khor rin chen sgo phye nas// sangs rgyas dpal gyi mgur nas bka' stsal pa// 'khor 'das bzhi ni ngo bo nyid kyi sku// don gyi sangs rgyas rang byung don rtogs na// kun tu bzang po rang byung bcom ldan 'das// ye shes rab tu che mchog chos kyi sku// mi skye mi 'gag nam mkha'i rang bzhin la// 'khrul rtogs nyid kyang ye shes bde ba'i klong// dper na khyung chen chu klung gyen mthur kyang// nyam nga med par nam mkhar spyod pa'i lam// de bzhin ye nas blo sbyangs rnal 'byor thugs// sangs rgyas snying po rtogs pa'i skal ldan rnams// chos sku mngon du grub pa'i gdams ngag can// don rtogs ye shes yon tan de las byung// de phyir gzhi las 'gyur med rgyal ba'i bka'// de la 'phel 'grib med pa rtogs pa'i mchog// mngon 'gyur sangs rgyas da lta nyid du grub// rdzogs pa chen po lta ba ye shes gting nas rdzogs pa'i rgyud las// sangs rgyas ye shes 'byung bar bstan pa'i le'u ste bcu bzhi pa'o//// de nas 'dus pa'i 'khor la bka' stsal pa// sangs rgyas rgyal po chos kyi sku mchog la// 'khor 'das ma grub rig pa'i klong du rdzogs// gzhi la 'gyur ba med pas lta ba'i gdeng// yul la mi ltos rang rig chos kyi sku// nam mkha' bzhin du ye shes mtha' mnyam pas// don la 'gyur med rang rig ye shes la// skyon gyis mi gos lta ba ngan pa la// 'pho 'gyur med pas chos nyid gdal ba'i klong// mi skye mi 'gag lta ba rang byung la// sgom pas mi rnyed rtogs pas 'gyur med don// ma bsgoms 'du 'bral med ltar rang rig thugs// bskal par 'khyams kyang ngo bo nyid la ni// skye 'chi med pa rig pa lta ba'i mchog/ don du ma bsgoms ye shes mthar phyin lam// re dogs med phyir 'khor bar lhung mi srid// gdod nas 'gyur med byang chub snying po yin// rdzogs pa chen po lta ba ye shes gting nas rdzogs pa'i rgyud las/ don la 'gyur ba med par bstan pa'i le'u ste bco lnga pa'o//// de nas kun rig ston pas yang gsungs pa// 'khor 'das snang ba gcig tu ma nges pas// 'khrul pa'i yul rnams ji ltar snang ba de// bag chags sna tshogs brtas phyir 'khrul ngor bden// don la mi bden gzung 'dzin mthu brtas pas// ji ltar goms pa de ltar snang ba'i phyir// snang ba blo yis brtags las yod min te// yod na 'gro drug kun la mthun snang rigs// da yang 'dus pa'i sems dpa' yid kyis nyon// gdod ma rang 'khrul kun gzhi rnam gsum gyis// rang sems mthong snang so so sna tshogs pas// de phyir bag chags sems ni so sor snang// ngo bo nyid kyi sku la 'gyur med phyir// blo yis btags pa gcig yul gcig min pas// rang sems 'khrul par snang bar the tshom med// de phyir dbang po yul rnams gzhi la med// 'khrul pa'i rtogs sems 'gro ba so so'i sems// gcig na dge sdig rnam smin 'bras bu yang// ma spyad sems can kun gyi myong bar rigs// las kyi rnam smin thun mong ma grub phyir// bag chags brtas pas 'khrul pa'i sdug bsngal yin// da yang rdo rje sems dpa' chen po nyon// gzhi dang snang ba 'brel med yin pa'i phyir// yul ni 'khrul pa'i bag chags brtas pa'i phyir// nges med blo yi spyod yul sna tshogs pa// ma rig med na gnod mi nus par gsungs// rdzogs pa chen po lta ba ye shes gting nas rdzogs pa'i rgyud las/ snang ba nges med don dang mi 'gal bar bstan pa'i le'u ste bcu drug pa'o//// de nas kun rig chos rjes bka' stsal pa// ma bsgoms shes pa rang yan bzhag gyur kyang// phyi rol yul gyi rnam pa gang la yang// 'khrul pa yin par shes phyir gzhan pa med// chos brgyad rang sar grol ba mnyam pa'i phyir// skye bo nyid kyang ma spangs chos kyi sku// dper na a shu ka nyid bdud rtsir shes// de bzhin skye bo rang sems 'di nyid ni// bla mas don bstan tha mal byang chub sems// bdag nyid snying po don nyid ye nas yin// da yang 'dus pa'i rdo rje sems dpa' nyon// chos nyid don ma rtogs pa'i skye bo ste// de nyid lung dang man ngag don stobs kyis// rang sems rtogs pas skye bo min pa'i phyir// ma bsgoms gol ba med par mkhas pas gsungs// ngo bo nyid la rtag chad med pa'i phyir// sems nyid rang gsal don gyis ma brjed pas// phyal pa lung ma bstan du gol sa med// dper na gser 'gyur rtsi yis gang thebs rnams// thams cad gser las gzhan du mi 'gyur bzhin// de bzhin mu stegs skye bo sems nyid kyang// man ngag gser 'gyur rtsi yis thebs pa'i sems// mu stegs rnams kyang ye shes bde ba'i ngang// yul la mi zhen phyir na bsgom du med// rdzogs pa chen po lta ba ye shes gting nas rdzogs pa'i rgyud las/ ma bsgoms kyang gol sa med par bstan pa'i le'u ste bcu bdun pa'o//// de nas rdo rje sems dpas yang zhus pa// rang sems snying po don rdzogs lta ba yi// nges don gdams ngag rtogs pa'i 'bras bu gang// ngo bo nyid kyang lhun grub lta ba gang// snang med blo ngos don ni ci ltar gcig/ ma bsgoms 'bral med don ni ji ltar 'grub// ye shes don ni ji ltar mtshon du med// nyams dang rtags kyi rim pa ji ltar 'byung// de skad gsol pas thugs chud bka' stsal pa// sa mkhan ldan pas kun tu rgyu ba ltar// 'khor ba myang 'das gnyis kyi bar do ru// thog mtha' nges par gcod pa'i gdams ngag gis// rang byung ye shes ngo bo nyid du rtogs// 'bras bu skye shi med par mngon sangs rgyas// de yang rdo rje sems dpa' yid kyis nyon// sgron btags mun pa nges par sangs pa bzhin// skye shi rnam gnyis 'byung ba'i bar do ru// rang sems chos sku ngo sprad man ngag gis// ma rig 'khor ba sangs nas rigs pa rgyas// nyon mongs bag chags rnam rtog gzhi nas med// chu bo chen po gzhung 'drel nyams med bzhin// ting 'dzin mnyam bzhag rjes thob bar do ru// rgyun du 'bral med nges pa'i gdams ngag gis// bar chad rkyen thub don la 'bral ba med// gzhan du ka nas yengs pa 'byung mi srid// da yang 'dus pa'i 'khor gyi snying po nyon// ngang pas chu 'dres 'o ma bcud len bzhin// zhen pa'i lus sems gnyis kyi bar de ru// phyi yi gol sa bcad pa'i man ngag gis// spang sdud zhen pa'i yul 'di med pa'i phyir// yul med rgod 'phro byings rmugs gzhi nas dag/dper na yid bzhin nor bu rin chen ltar// srid pa dag gi las kyi bar do ru// sangs rgyas 'byung ba'i dus kyi man ngag gis// mthar thug 'bras bu nges pa'i yon tan 'byung// phyis ni skye ba gzhan du len mi srid// da yang 'dus pa'i 'khor rnams legs par nyon// g.yul ngo legs par rgyal ba'i dpa' bo bzhin// bdag gzhan rtsod pa byed pa kun las rgyal// gal med rtsod pa'i tshig gis man ngag gi// rang gzhung zab par nges pa'i khyad chen 'phags// de phyir 'jig rten gsum na 'gran zla med// da yang 'dus pa'i rdo rje sems dpa' nyon// de yang gdams ngag don bstan 'bras bu yang// phyi ma ma yin dus 'di nyid du rtogs// de phyir 'bras bu nges pa'i sangs rgyas thob// che ba'i yon tan lhun gyis thams cad rdzogs// rdzogs pa chen po lta ba ye shes gting nas rdzogs pa'i rgyud las/ nges don rtogs pa'i 'bras bu bstan pa'i le'u ste bco brgyad pa'o//// de nas 'dus pa'i 'khor la bka' stsal pa// rang sems ngo bo nyid kyis lhun grub ni// chos rnams kun gyi rtsa ba rang rig sku// de nyid ye shes chos skur blta ba'i phyir// rgyal ba'i thugs nas dmyal ba yan chod kyi// kun gyi gzhi ni rang byung ngo bo nyid// rang sems gnyug mar gnas pa 'di nyid ni// rgyu rkyen ma bskyed yang dag yod pa'i phyir// mtha' yi sgro skur bral bas rig pa gsal// de ldan chos sku gzhi nges yin par bshad// da yang 'khor gyi rdo rje sems dpa' nyon// nges pa'i gdeng chen blta bsgom spyod pa dang// 'bras bu 'byung med yid ches gdeng ldan pas// de la lta ba'i gdeng gis nges pa'i don// zin phyir kun bzang ye shes rgyal ba'i thugs// dge la dad cing mos pa'i rgyu mi dmigs// bsgom pa'i gdeng chen don las ma yengs na// ched du gtad la bsgom ni mi dgos pas// rang byung gdod nas snying po skye 'gag med// de phyir rang gsal ye shes chos kyi sku// 'khor 'das chos la spyod pa'i gdeng ldan phyir// ci spyod don ldan tsham tshom med par bstan// nyam nga med par brtul zhugs mchog spyod pa// ye shes 'bral med sangs rgyas dgongs pa yin// de yi 'bras bu nges pa'i chos nyid de// sdug bsngal mi 'byung mya ngan 'das pa ste// skye 'chi med pa'i ye shes rig pa'i sku// de phyir da lta chos sku kha mig can// rdzogs pa chen po ma rig mun pa sel bar byed pa ye shes gting nas rdzogs pa'i rgyud las/ ngo bo nyid kyi lhun grub rang gzhung bstan pa'i le'u ste bcu dgu pa'o//// de nas 'dus pa'i 'khor la bka' stsal pa// sems can ma 'khrul sangs rgyas med pa'i gong// ngo bo nyid kyi sku la rang byung sems// de nyid don gyi gnas lugs yin pa'i phyir// de rtogs chos sku mya ngan 'das pa'i chos// kun tu bzang po rang byung ye shes thugs// rang sems rang gis rig pa chos kyi rje// rang sems rang byung 'gro drug sems can gyi// kun gyi gzhi cha chos sku ye shes la// gsum ldan 'khor bas bsgribs pa lus yin phyir// dus tshod bla ma'i gdams ngag bstan pa'i don// gzhi cha chos sku rang byung de nyid dang// dang po sems nyid ngo bo nyid kyi sku// snga phyir ma bslad chos skur gcig pa'i phyir// blo dngos gcig pa'i don la bsgom mi dgos// da yang 'dus pa'i 'khor rnams yid kyis nyon// sangs rgyas ye shes thugs dang sems can sems// 'bral med so sor snang ba ma yin te// btsal med rang sems chos skur gcig pa'i phyir// blo dngos gcig par yid ches sems nyid yin// da yang 'dus pa'i 'khor rnams yid kyis nyon// 'khor ba'i sdug bsngal lus 'di sgrib g.yogs dang// sangs rgyas sku dang sems can don gcig phyir// tha mal 'di nyid yin rtogs chos sku la// blang dor med par blo dngos ngo bo gcig/ dper na chu nyid chang du rkyen gyis 'gyur// de bzhin skye bo rang sems 'di nyid la// bla ma'i rkyen gyis rtogs pas bsgom mi dgos// ma bsgoms phyir na goms med blo dngos gcig/ da yang 'dus pa'i 'khor rnams yid kyis nyon// ye shes rtogs nas mnyam pa'i don nyid la// rgyun du ma brjed rig pas gsal thebs nas// bag chags nyon mongs rtog pa'i skyon gyis kyang// de la rdul tsam mi bsgrib ye shes gsal// dper na skyes bu sngags kyis gdeng ldan pas// dug ma gsal bar dug nyid sman 'gyur ltar// snga phyi ma song chos sku yin shes nas// snga phyir ma spangs glo bur rang stong phyir// bla dngos dbyer med rtogs pa'i tshad yin no// rdzogs pa chen po lta ba ye shes gting nas rdzogs pa'i rgyud las/blo dngos gcig par bstan pa'i le'u ste nyi shu pa'o//// de nas 'dus pa'i 'khor la bka' stsal pa// rang sems don rtogs snying po chos sku las// bsgom bya'i ye shes chos sku gud na med// snga phyi sems kyi ye shes mtha' bral phyir// ma nor sgom pa po yang ga la yod// de ltar sgom chen sems la dngos med na// mi gnas mi rtog 'jog pa rnal 'byor yin// rdo rje sems dpa'i snying po da yang nyon// a ti rdzogs chen chos sku bden gnyis bral// ngo bo nyid kyi rang shar ye shes ni// yod med dbus kyi ye shes mtha' gsum bral// yul la spang sdud gnyis po gdod nas med// dper na nam mkha' rang du shes pa bzhin// ji bzhin ma nor rang sems rtogs pa yis// lus ngag ma skyes rtogs pa'i gzhi med phyir// skyil krung drang 'dug smra bcad kha na med// de phyir sems kyang dngos med rtag chad bral// rtog spangs mi rtag bsgom pa'i khar mi 'ong// ye shes lta ba'i shugs las byung ba'i phyir// rnal 'byor dmigs pa'i sems kyis bsgom mi dgos// rnam rtog rang sems ma skyes ye shes phyir// dad ldan ched du bsgom pa bsten mi dgos// sems dpa' 'dus pa'i snying po da yang nyon// yul gyi snang ba spyod yul ma grub phyir// nam mkha' lta bur ye shes rang shar bas// rang sems chos sku'i ngang du don rtogs pas// rnal 'byor ci yang yid la mi bsgoms na// yang dag lta ba'i don dang mthun par grub// rdo rje sems dpa'i snying po da yang nyon// rdzogs chen gol sa bcad phyir bsgom med de// ye shes bsgom med dag tu rab rtogs na// bsgoms kyang skyon med chos dbyings nam mkha' 'dra// bsgom med des ni kun gyi re ba bskangs// kun la khyab phyir ma rdzogs med mod kyis// kun gyis gdams ngag ma 'phrad rtogs par dka'// rdzogs pa chen po lta ba ye shes gting nas rdzogs pa'i rgyud las/ ma bsgoms 'bral ba med pa'i le'u ste nyi shu gcig pa'o//// kun rig rgyal po chos rjes bka' stsal pa// rang sems ngo bo nyid kyi chos sku ni// dbang po mngon sum mi gnas kun la khyab// chos sku tshig tu 'di zhes bstan pa ni// rdo rje sems dpa' nyid kyis mtshon du med// da yang rdo rje sems dpa' yid kyis nyon// 'khor 'das tshig las 'das pa'i ye shes ni// dbyibs dang kha dog dbang po'i spyod yul du// sangs rgyas nyid kyis bstan cing mtshon du med// mtshon cing brtag par dka' ba'i rang sems don// yod med dbus las 'das pa'i byang chub de// dngos med yid la dran pa'i ye shes ni// kun bzang nyid kyis mi gzigs blta ba'i mchog/ gzung 'dzin mthu brtas rnam smin lus 'di la// dbang po yul rnams ming du brjod byed kyang// don la phan par rdul tsam mtshon mi nus// dper na bum pa'i nang gi nam mkha' la// dngos med brjod kyi nam mkha' chen po min// de bzhin rtse gcig mi rtog don bsgoms kyang// ye shes rang shar chen po'i lta ba min// bum chag nam mkha' chen por thim pa bzhin// lus bral rang sems ngo bo nyid kyi sku// de nyid rig par gsal btab bde ba'i klong// de tsam nyid las kun tu bzang pos kyang// ngo bo nyid kyi chos sku mtshon mi mkhyen// rdzogs pa chen po lta ba ye shes gting nas rdzogs pa'i rgyud las/ mtshon du med pa'i le'u ste nyer gnyis pa'o//// de yang 'dus pa'i rdo rje sems dpa' nyon// nyams dang rtags kyi rim pa ngas bshad kyis// legs par bzung la yid kyis da nyon cig/ zhen med rang gsal bde la mi g.yo ba// de nyid rang gi chos sku ye yin zhes// de phyir gol ba med pa ye shes klong// de las mi 'da' gdeng chud mchog gi nyams// da yang rdo rje sems dpa' chen po nyon// nges don nang du gsal ba zhen med bde// chos nyid don rtogs ye shes mi g.yo ba// rgyun du 'bral med rang gsal mi rtog nyams// de don rkyen gyis mi 'gyur rang rig sku// thog mtha' chod pas ma rig mun pa med// de phyir rang byung chos sku nyams chen la// dus gsum gcig par bying rgod 'phel 'grib med// de yi yon tan rang byung mkha' dang mnyam// da yang 'dus pa'i 'khor gyi snying po nyon// gdams ngag gnad chud don la mnyam pa med// chos nyid don las mi 'da' rgyal ba'i thugs// ched du mi dmigs ngang la gnas pa'i tshe// lus ngag spyod pa gang yang nyams pa med// de nyid sangs rgyas dgongs pa nyams su myong// lta ba'i gdeng ldan ye shes rang gsal thugs// de yi yon tan sangs rgyas chos kun rdzogs// phyi ma ma yin dus 'dir 'bras bu smin// da yang 'khor gyi snying po legs par nyon// rang byung gdal khyab bde ldan dgongs pa'i nyams// sems can dus na sangs rgyas 'bras bur ldan// de yi ye shes da lta nyid kyi sems// de ltar rtogs pa dgongs pa'i nyams su gsungs// nyams kyi rim pa de dag gsungs pa yang// ngo bo chos sku don gcig rang byung sku// de don yang dag 'bras bu gzhi la gcig/dus gsum rgyal ba'i yon tan ma lus pa// rnal 'byor dam pa de la tshang zhing rdzogs// rdzogs pa chen po lta ba ye shes gting nas rdzogs pa'i rgyud las/ nges pa don gyi lta ba'i gdeng nyams bstan pa'i le'u ste nyer gsum pa'o//// de nas kun rig sems kyi rgyal po yis// don gyi rtags chen 'khor la bka' stsal pa// rmi lam bag chags byang rtags 'byung ba dang// sa thob ltas dang sa non ltas rnams dang// nang rtags klong gsum ldan pa'i yon tan dang// 'bras bu da lta nyid grub nges par gsungs// da yang rdo rje sems dpa' yid kyis nyon// de don nges rnyed nyams ni gsal ba la// rmi lam bag chags dag rtags 'byung ba ni// rtag tu gcer bur phyung dang me dpung bsreg/ chu bo'i pha rol chod par rkyal ba dang// bum chus spyi nas dag par 'khru 'dod dang// nam mkha' dag la 'phur dang skyil krung 'cha'// da yang rdo rje sems dpa' yid kyis nyon// rnal 'byor dam pas sa thob 'byung ba yang// ljon shing 'dzegs dang mchod rten khar byed dang// khams gsum dus gcig mthong 'gyur ma zhen 'byung// ting nge 'dzin gyis sa ni nges par non// de rtogs ltas ni 'byung bar gsungs pa ni// nam mkhar seng ge zhon 'gro nyam nga med// dpung pa g.yas g.yon nyi zla 'char ba dang// ri rab khar khyer mkha' la nges par 'gro// sprin lding steng na 'dug pa la sogs 'byung// da yang 'dus pa'i tshogs kyi snying po nyon// rnal 'byor dam pa skyes mchog dam can la// rtog pas bar ma chod pas ye shes klong// mnyam nyid mthar phyin lam chen kun bsgral bas// ci spyod ting 'dzin las ni ma nyams klong// goms pa'i klong du shin tu gsal 'gyur te// rgyal ba'i dgongs pa chos nyid rang byung klong// bdag gzhan gnyis su mthong ba ci yang med// de phyir klong gsum ldan pa'i ye shes bshad// rdzogs pa chen po lta ba ye shes gting nas rdzogs pa'i rgyud las/ rtags bstan pa'i le'u ste nyer bzhi pa'o//// de nas 'dus pa'i 'khor gyi yang zhus pa// rang sems don rtogs rnal 'byor spyod pa la// 'ching grol med pa'i spyod pa'i don ni gang// sa lam sbyang du med pa'i don ni ci// dam tshig bsrung dang nyams pa ji ltar med// la bzla don gyi lta ba gang la bgyi// de skad gsol pa'i don gsan bka' stsal pa// sangs rgyas rnams kyi dgongs pa ji lta ba// rang gi mtshan nyid ma bcos de bzhin nyid// chos sku skye med rtogs nas 'gro don du// ji ltar snang ba'i gzugs can sprul pa'i sku// mdzad pa bcu gnyis 'gro don mthar phyin pa// thugs rje'i sprul pas gdul bya kun 'dul yang// ye shes blo ldan rlom sems rdul tsam med// bdag dang gzhan du rtogs pa med pa'i phyir// ye nas gnyis med don gcig chos kyi sku// mthun 'jug mtshan mar spyod pa rgya mtshor ni// thugs rje chen po'i 'gro don rdzogs par mdzad// rang byung ye shes dbyings las ma g.yos kyang// 'gro ba'i dpal mgon kun tu bzang po ste// bdag dang gzhan don blang dor med pa'i phyir// spyod pa rgya mtshor sna tshogs ci bder spyod// pad+mo skye ba'i rgyu ni 'dam yin te// de la 'dam gyi skyon gyis ma gos bzhin// chos nyid blang dor med par rtogs gyur na// ye shes rtog med nyams pa rdul tsam med// thun mtshams mi bsgom rgyun gyi rnal 'byor la// 'ching grol spyod pa med phyir gol sa med// rdzogs pa chen po lta ba ye shes gting nas rdzogs pa'i rgyud las/ spyod pa 'ching grol med par bstan pa'i le'u ste nyer lnga pa'o//// kun rig ston pa chos rjes bka' stsal pa// bde gshegs mya ngan 'das pa nges pa'i don// sa lam yang dag chos sku gcig las med// gong 'og nye ring yod par gsungs pa yang// blo dman drang ba'i don du bshad pa yin// 'dus pa'i 'khor rnams yid kyis da nyon cig/sa med rdzogs chen chos sku ye shes sa// gar yang mi 'gro sa mchog sbyor chod pa// bgrod med sems gnyis ye shes mchog gi lam// ye shes chos sku mthar phyin chos nyid sa// rdo rje sems dpa'i snying po da nyon cig/sa ni dang po 'khor bar mi ldog sa// snying po byang chub mchog ni ye shes na// gza' zhing bgrod pa'i yul ni ga la yod// byar med rdzogs pa'i ngang du rab rtogs na// lam la gza' zhing sa sbyangs yul las 'das// bgrod med snying po lam gyi mchog ston pa// gzhan nas btsal bas rnyed pa'i gnas med de// ye shes chen po kun tu khyab gnas pa// rang byung ye shes rang rig 'od gsal ba/sa lam btsal du med de snying po'i don// rnam par snang mdzad che mchog kun tu bzang// da yang rdo rje sems dpa' yid kyis nyon// dper na rgyal po bzhin du mi 'gro bzhin// rang sems yul la mi spyod don la gnas// de tsam nyid ni chos sku bde ba'i klong// sa lam ma bgrod chos nyid ye shes sku// sa dang lam la ltos na byang chub gegs// rdzogs pa chen po lta ba ye shes gting nas rdzogs pa'i rgyud las/sa lam sbyang du med pa'i le'u ste nyer drug pa'o//// de nas 'dus pa'i 'khor la bka' stsal pa// dam tshig bsrung nyams med pa'i ye shes ni// 'og ma bzhin du dam du ma bcas pas// nyams pa med phyir ye bsrungs chen po yin// gdeng ldan blta ba'i dam tshig rgyun du dran// ched du ma yin rang rig don gsal bas// ye bsrungs chen po'i blta ba dam tshig yin// de yang 'dus pa'i 'khor rnams yid kyis nyon// theg pa'i khyad par ji snyed bgrangs pa dang// tshul khrims sdom dang phyi nang dam tshig kyang// 'gro ba gdul bya'i ji ltar 'dod par ston// tha snyad tsam du 'dul zhes bya mod kyi// dam du bca' bar don la rdul tsam med// dam du bca' ba med pa'i ngang rtogs na// dam du bcas kyang skyon med nam mkha' 'dra// 'dus pa'i rdo rje sems dpa' da yang nyon// chos sku mi g.yo thugs kyi dam tshig ste// blang dor med pa spyod pa'i dam tshig yin// rang sems mi spang ye shes chen por gnas// dus gsum don dang ma bral nyams pa med// rdzogs pa chen po'i lta ba ye shes gting nas rdzogs pa rgyud las/dam tshig bsrung nyams med par bstan pa'i le'u ste nyer bdun pa'o//// de nas 'dus pa'i 'khor la bka' stsal pa// la bzla' ba yi ye shes chen po ni// kun gzhi gzhi cha mkha' la nyi shar 'dra// thams cad kun 'dus rang snang ye shes gsal// ye nas btsal med 'bras bu mngon sangs rgyas// rgyal ba kun gyi spyi mes chen po ste// gol med gdod nas dag pa chos kyi sku// rang byung 'gag pa med pa ye shes klong// lam lnga ma bgrod sangs rgyas sa yi mchog/ cir snang dmigs su med pas rang byung sku// gzhan la smon du med par rang la rdzogs// chos sku 'di ni gzhan las ma rnyed pas// rtogs par 'dod na rang gi sems la tshol// sems pa don rnyed nus pa'i rnal 'byor pa// 'khrul pa med phyir sems can 'khor ba med// rang rig rtogs pa'i don las ma rtogs pa// bde zhing skyid pa'i sangs rgyas logs na med// de phyir rgyu las mi rtsol 'bras bu la// re dogs rtsol ba rgya mtsho'i chu bor nas// smig rgyur ri dwags chur mthong bsnyegs pa bzhin// bsgom med don nyid bor nas su bsgom pa// byang chub med par rang gi sdug bsngal snon// da yang rdo rje sems dpa' yid kyis nyon// rang rig de nyid rtogs pa'i rnal 'byor pa// ye shes bcud nyid chos kyi gter du smin// nam mkha' go yangs 'byung ba'i lam du bde// rtogs pa'i go yangs sangs rgyas lam du bde// gdams ngag go yangs bsgom pa'i lam du bde// dus gsum 'gyur med rang rig lta ba'i dbyings// 'dod dgu rang las yon tan 'char ba'i phyir// rgyu 'bras gzhan la rag ma lus pas zab// ye nas chos nyid ye shes rang byung la// 'khor bar gnas kyang sgrib pas gos pa med// de phyir don rtogs da lta nyid nas ni// chos sku mngon du gyur pa'i sangs rgyas yin// rdzogs pa chen po lta ba ye shes gting nas rdzogs pa'i rgyud las/ ye shes don la la bzla ba'i le'u ste nyer brgyad pa'o//// de nas rdo rje sems dpas yang zhus pa// nges don chos sku rtogs pa'i rnal 'byor la// dug lnga ma spangs rang grol ji ltar 'byung// tshogs ma bsags par gzugs sku gang las 'byung// gong 'og the tshom gegs ni ji ltar sel// de skad zhus pa'i don gsan bka' stsal pa// dug lnga ma spangs rang sar gol ba yang// dper na rin chen 'od kyis mun sel ltar// 'khor ba'i thog mtha' rtsad nas chod pa'i phyir// ngo bo nyid kyi sku ru rang rtogs na// gdod nas ma rig dag pas gti mug bral// da yang 'dus pa'i rdo rje sems dpa' nyon// ma rig med phyir zhe sdang yul med pas// kha dog yul la mnar sems byed pa yang// ba mo la ni nyi shar dngos med ltar// yul dang 'brel med dran pas zhe sdang grol// pho mo chags pa las kyis skye gyur tshe// snga phyi ma song de dus chos skur shes// gzugs brnyan brda yis chags med rmi lam bzhin// chags pa nyid nas rang byung skyon mi gos// da yang 'dus pa'i snying po yid kyis nyon// nga rgyal chen po rang sems rtog pa 'char// de phyir lhag mthong rig pa'i nga rgyal des// log rtog 'khor ba rtsad nas gcod pa'i don// dran pa'i ye shes nga rgyal rang byung thugs// lta ba mngon par man ngag gdeng gi 'phrang// gol sgrib skyon med rang rig chos nyid la// dgag sgrub med pas phrag dog rang sar grol// dug lnga spyad kyang rang byung ye shes thugs// rdzogs pa chen po lta ba ye shes gting nas rdzogs pa'i rgyud las/dug lnga rang grol bstan pa'i le'u ste nyer dgu pa'o//// de nas 'dus pa'i 'khor la bka' stsal pa// rang sems chos sku chen por gsal gyur na// ye shes tshogs chen rang rig byang chub thugs// dper na rgya mtsho rnyog med dngas gyur na// nam mkha'i gza' skar 'byung ba mi 'gag bzhin// chos nyid ngang la longs spyod rig pa'i rgyun// de yi sprul pa sna tshogs sprul pa'i sku// da yang rdo rje sems dpa' yid kyis nyon// chu nyid tshags kyis btsags kyang gzugs brnyan med// de bzhin ngo bo nyid rtogs chos sku la// kun bzang nyid kyis shes bzhin gzugs bcos kyang// gdos pa'i lus can sangs rgyas nyid mi rnyed// bsod nams tshogs kyis sangs rgyas 'byung ba min// rim dgu ston pa'i sangs rgyas gzugs kyi sku// mos pa so sor 'dul phyir snang mod kyang// brgyud nas chos sku rtogs pa'i thabs su bstan// smon lam dbang gis 'gro don byed 'dod pa// 'og min blos bzhag sangs rgyas chos sku min// de phyir rang sems ma rtogs dge ba yis// rgyu med 'bras bu mi 'byung dpe bzhin du// bskal pa stong du tshogs bsags sgrib sbyangs kyang// 'bras bu gzugs sku sangs rgyas 'byung mi 'gyur// da yang 'dus pa'i dad ldan 'khor kun nyon// gser sprul mig gis 'dod pa'i yon tan lnga// dus gcig nyams su myong ba'i dpe bzhin du// ngo bo nyid kyi don rtogs chos kyi sku// de don rig pa longs spyod rdzogs pa'i sku// sna tshogs nyid na gsal thebs sprul pa'i sku// skal med rtogs pa dka' phyir gsang ba'i sku// blo dngos gcig phyir mngon par byang chub sku// de rnams gcig gi yon tan lngar snang bas// sangs rgyas 'gro ba'i don btsal mi dgos phyir// sems can chad dam dpyad/nyid nas rang byung chos kyi sku// rdzogs pa chen po lta ba ye shes gting nas rdzogs pa'i rgyud las// chos sku rtogs nas gzugs sku 'byung ba bstan pa'i le'u ste sum cu pa'o//// de nas 'dus pa'i 'khor rnams kyis// the tshom gegs chen don zhus pa// 'khor 'das spyi mtshan sems yin phyir// rtogs na kun kyang yin te ma rtogs min// a ti theg chen snying po rdzogs gzhi la// yod med gang yang rtag chad skyon yin phyir// ma nges rgyu 'bras lam pa'i kha rje la// sangs rgyas 'bras bu mi thob snying rje gnas// da yang 'dus pa'i 'khor rnams yid kyis nyon// 'jig rten pa dang 'dus pa'i chos rnams kyi// gnyis ka'i gzhi ni ngo bo chos skur nges// yul gyi snang ba ma nges sna tshogs pa// blang dor med cing chos rnams lhun gyis grub// 'dus pa'i snying po don gsol pa// yul nyid sems sam sems nyid yul// yul nyid yin phyir yul la sdug bsngal rigs// sems nyid yul na rang sems bem por thal// spang sdud mi shes zhen pa skye bo'i blo// de phyir rdzogs chen chos sku bla med gang// da yang 'dus pa'i 'khor gyi snying po nyon// yul nyid spang sdud zhen pa rnams kyi skyon// blang dor med phyir gnyen pos btsal mi dgos// de tsam nyid na bsam gtan mchog gi lam// de la gnyen po med phyir bla med chos kyi sku// 'dus pa'i gtso bos yang zhus pa// bsgom du yod med sgro skur mthar lhung phyir// bsgom yod zhi gnas mtha' la zhen pa ste// ma rtogs bsgom med don gyi gdeng dang bral// de phyir mtha' yi blta ba nor ba'i blo// da yang dad ldan 'khor rnams yid kyis nyon// a ti'i man ngag chos sku'i snying po 'di// bsgoms kyang 'gal med rang sems nam mkha' 'dra// ma bsgoms pas kyang chos sku stor bral med// byang chub lam du sems nyid rtogs pa gces// rdo rje sems dpas yid kyis don zhus pa// sangs rgyas sems can gcig gam tha dad lags// tha dad 'brel med thugs rjes phan mi nus// gcig na 'gro drug sdug bsngal ci phyir 'byung// kun rig ston pas bka' stsal yid kyis nyon// de gnyis so sor snang ba ma yin te// rtogs na ngo bo gcig phyir thugs rje 'byung// rang sems ma rig rnam rtog sdug bsngal yin// don la dbyer med sems nyid lhun gyis grub// 'dus pa'i tshogs kyis rang don yid kyis zhus// sangs rgyas sems can rgyu 'bras yin gyur na// sangs rgyas las byung rnam gsum don med 'gyur// sems can las byung tshogs gnyis 'dus mi rtag/ kun rig ston pas bka' stsal pa// sangs rgyas sems can rgyu 'bras ro gcig phyir// ltos pa'i gcig la gcig 'byung ma yin te// gnyis ka'i ngo bor rang sems chos skur gcig/sangs rgyas sems can skyon yon rnam pa gnyis// chos nyid 'khrul pa gang rung gzhir bzhag la// gnyis ka ltar yang rtsod na mi 'gal phyir// ma rig ye shes gang zag phyogs bzung na// kun kyang yid la thams cad med pa'i phyir// rgyu yod dang ni rgyu med gang 'khrul pa// gzhi 'jog ma nor shin tu gces par gsungs// rdo rje sems dpas 'khor gyi don zhus pa// rang la yod na mkhas pas ji ltar ston// ye nas yod na man ngag bston mi dgos// med na ri bong rwa bzhin rgyu mi dmigs// kun rigs rgyas pos 'khor la bka' stsal pa// ye nas rang la yod pa'i chos sku ni// bla mas mtshon nas rang sems don bstan pas// ma rig rnam rtog chos skur shes pa las// logs nas btsal bas rnyed pa ma yin no// dad nyan 'khor gyi don ched yid kyis zhus// bla ma'i gdams ngag yul la mi rtog pa// rtsal du nyams myong zhi gnas skyon yin phyir// rtogs na rang rgyud yin phyir man ngag min// ma dran 'du shes 'gag phyir gnyid du nyal// da yang rdo rje sems dpa' yid kyis nyon// yul la mi rtog de nyid bsam gtan te// rtogs dang mi dran gnyis ka'i gzhi yin te// thog mtha' chod na chos nyid byang chub sems// de nyid rang byung ye shes don rtogs na// yul nyid mi rtog bsgom pa'i don nyid shar// man ngag gis ni bcos na don dang 'gal// ma bcos man ngag bka' la dgos pa med// da yang 'dus pa'i 'khor rnams yid kyis nyon// lung ldan mkhas pa'i man ngag don zab kyis// kun gyi gzhi cha chos sku ngo bo nyid// bcos su med par rang sems nam mkha' 'dra// sgo lnga yul nyid 'khrul phyir 'brel pa chod// yid la blta ba bstan pa'i nyon mongs grol// de phyir bka' don rtogs pa shin tu gces// rdzogs pa chen po lta ba ye shes gting nas rdzogs pa'i rgyud las/ the tshom gegs sel bstan pa'i le'u ste so gcig pa'o//// de nas 'dus pa'i ched du yang zhus pa// bar chad mi 'byung spyod pa'i dam tshig gang// rnal 'byor lta ba nyams pa'i skyon ni gang// de la skong thabs ji ltar bstan par bgyi// bskangs pa'i 'bras bu ji ltar 'byung ba lags// mnyam pa'i rgyal pos lung ni bstan du gsol// zhus pa'i don gsan thugs kyis bka' stsal pa// bar chad mi 'byung spyod pa'i dam tshig ni// nges pa'i lung ldan man ngag 'chang ba yis// rdo rje slob dpon sku dgra brnyas byed dang// skad cig tsam yang mi 'grog spang rgyu la// 'dris shing gus par byed pa'i slob ma der// mkha' 'gro bar gcod tshe thung nad mang 'byung// 'chi la rab tu tsha ba'i dmyal bar skye// sku dgra bsgral zhing spang na dngos grub 'byung// da yang 'dus pa'i snying po yang nyon cig/de yi phyogs mthun dam tshig bsrung ba'i phyir// dam nyams 'thab dang nag mo 'dzings pa yis// shugs sdum mi bya bka' las 'das par gsungs// byas na gtsang ris chos skyong mgon khros nas// go ka 'byung zhing sgrub pa'i lha dang 'bral// phyi ma dran nyams lkugs pa'i dmyal bar skye// de phyir bya ba bskyungs la don la bzhag/ da yang 'dus pa'i snying po yang nyon cig/ nges pa'i rnal 'byor lung ldan pas// rig 'dzin spyod pa bstan pa'i phyir// rta bo rmig zlum sha rnams rtag tu spangs// ma spangs dgra rkun rnams kyis bar chad yong// phyi mar yi dwags 'dre srin gnas su skye// de phyir nges pa'i rnal 'byor lung ldan gyis// de bas gtsang sbra bram ze bzhin du spyad// de la rig 'dzin byin gyis brlabs par nges// da yang rdo rje sems dpa' yid kyis nyon// bla ma'i thugs kyi dam tshig bsrung ba'i phyir// yang dag nges pa'i bka' don 'di yi chos// snod ldan las can slob ma dad pa yis// nges don ma nor rgyal ba'i bka' yi lung// chad dam dpyad/ theg dman bstan bsrung chos dang 'di brjes na// 'di la bar chad tshan can brjod mi langs// phyi mar rdo rje dmyal ba chen por ltung// de phyir rang gi sems la bcang bar gyis// da yang 'dus pa'i rdo rje sems dpa' nyon// 'jig rten mkha' 'gro dam tshig bsrung ba'i phyir// rnal 'byor ting 'dzin mi g.yo don ldan pas// khyod shi yugs sa ngo gnag de ma thag/ gzhan gyis ma spyad khrus nas ma bton la// 'khrig pa spyad na bar chad 'go ba'i nad// yun ring thebs te dud 'gro lbur bar skye// de phyir mkha' 'gro rtag tu mchod par bya// des ni thun mong mchog gi dngos grub myur// da yang 'dus pa'i rdo rje sems dpa' nyon// de dag bar chad mi 'ong dam tshig la// srog la babs kyang ma nyams bsrung gyur na// rgyal ba rnams kyis byin rlabs ye shes tshogs// 'bras bu ci bsam grub cing chos skur smin// rdzogs pa chen po lta ba ye shes gting nas rdzogs pa'i rgyud las/spyod pa'i dam tshig bsrung bar bstan pa'i le'u ste so gnyis pa'o//// de nas kun rig ston pas yang gsungs pa// snod ngan dam nyams kha gsag g.yo sgyu can// lung ldan nges pa'i don gyi gdeng med par// bka' la gzu lums byed cing nan brtags kyis// blos byas tshig tsam mang du smra byed cing// don med nga rgyal dregs pa'i mkhas 'dod pas// rang gi lta ba ya rabs mtho bzhed nas// tshig la mnyam sbyor mkhas pa'i zla med kyang// dam tshig 'chal por byang chub sems spangs nas// log 'dren khong gsog bden tshig ci spras kyang// 'khrul pa'i sems nyid log 'dren dbang du 'gyur// gnam lcags mkha' las 'dam du bying ba bzhin// dmyal bar gtan du nges 'gro snying re rje// da yang 'dus pa'i rdo rje sems dpa' nyon// gsang ba'i gsang sngags lta ba'i sgor zhugs nas// yang dag chos nyid don la mi 'dud par// mi chos lus ngag g.yeng ba'i las byed pa// ri bos srog chags chung ngu mnan pa ltar// mi shes rang gi chos snyems byed pa de// nam yang sangs rgyas thar pa thob mi srid// de yang rdo rje sems dpa' da nyon cig/rgya mtsho'i 'jing gi pha bong dkyil bskam ltar// theg pa 'og ma'i sde snod chos mnyan kyang// yang dag don gyi lta ba'i gdeng med par// dam tshig lung las chos kyi khungs phyung nas// byar med chos kyis nga rgyal blo skyes nas// lus ngag rtsing chos phad dral spyod byed la// sangs rgyas bkas kyang 'khor bar mi skyo bas// sdug bsngal ya nga'i 'bras bur the tshom med// lta ba nyams pa'i nyes skyon chen po ni// thar med rdo rje dmyal ba chen por ltung// las dbang sgro skur ngan pas rkyen byas nas// thar med sdug bsngal bsam 'das brjod mi langs// log lta'i dbang gis byang chub sems ni 'char mi srid// nyes pa'i skyon du bshad pa yin pa'i phyir// shin tu rnal 'byor don nyid rtogs pa med// rdzogs pa chen po lta ba ye shes gting nas rdzogs pa'i rgyud las// rnal 'byor lta ba nyams pa'i skyon bstan pa'i le'u ste so gsum pa'o//// de nas kun rig ston pa chos rje kun bzang gis/ rnal 'byor lta ba nyams pa skong ba'i thabs// 'dus pa'i tshogs la ched du bka' stsal pa// rang gi byang chub sems nyid ma rtogs na// ma hA yo ga'i chos kyi tshogs mchod kyis// skong bshags phrin las gzhung du byas gyur kyang// rnal 'byor lta ba nyams pa skong mi 'gyur// da yang rdo rje sems dpa' yid kyis nyon// bla ma brgyud pa'i man ngag don ldan la// rang sems dpang btsugs don zhus nas// rgyun du mi gtong lta ba dran byas na// snying po mchog ni sangs rgyas chos kyi sku// bde chen thugs la gsal ba'i dam tshig ste// yan lag dam tshig nyams kyang bsgrib mi nus// rgyun du mi gtong ting 'dzin don ldan na// mtshams med la sogs byas kyang chos kyi sku// 'gyod pa drag po yid la byas nas lta ba ni// mi brjed gzungs thob don la gus pa'i chos// sems la gsal bas rnam rtog ming yang med// de phyir rang byung ye shes thugs la shar// de tsam nyid ni nges don chos kyi sku// de rtogs sangs rgyas rang byung bcom ldan 'das// thams cad mkhyen pa'i ye shes thugs la bkra// de phyir man ngag nges don snying po 'di// skyabs dang mgon du lta ba mchog tu gsungs// rdzogs pa chen po lta ba ye shes gting nas rdzogs pa'i rgyud las/ lta ba nyams pa skong ba'i thabs bstan pa'i le'u ste so bzhi pa'o//// de nas 'dus pa'i 'khor rnams la// kun bzang ston pa chos rjes bka' stsal pa// lta ba nyams pa bskangs pa'i 'bras bu ni// rang sems sangs rgyas snying po ye shes 'byung// rtogs pa tsam gyis rang rig chos kyi sku// 'bras bu gzhan nas btsal mi dgos pa'i mchog/ rang byung gdod nas dag pa'i ngo bo nyid// chos sku 'gyur ba med pa'i ye shes bde// 'bras bu dus la mi ltos da lta nyid// ye dbang thob nas sangs rgyas kun dang mnyam// rnam smin lus 'di bral nas kun bzang thugs// skye ba mi len 'bras bumangon du gyur// byang chub mchog nyid rang byung mthar phyin pas// mi tshe 'di yis byang chub mchog thob pas// rgyu las mi ltos 'bras bu ye shes tshogs// da lta nyid ni rang rig kun du bzang// lus 'di bral bas sangs rgyas chos kyi sku// skye ba mi len 'bras bu mngon du grub// dngos po lus med snying po byang chub sems// sprin med mkha' la gza' skar shar ba bzhin// rang sems rtogs pas 'gro don btsal mi dgos// da yang rdo rje sems dpa' yid kyis nyon// ma rig 'khrul pa'i mun pa gtan nas sangs// rig pa'i ye shes yang dag nges par rgyas// rnam pa thams cad mkhyen pa'i ye shes rab tu ldan// 'gro drug sems can lus 'di len mi srid// rdzogs pa chen po lta ba ye shes gting nas rdzogs pa'i rgyud las// lta ba nyams pa bskang ba bstan pa'i le'u ste so lnga pa'o//// de nas 'dus pa'i 'khor gyi snying po yis// ston pa kun bzang rdo rje chen po la// bden pa'i dgos don yid kyis 'di skad gsol// chos rnams kun gyi mtha' ni gang la thug/ theg dgu'i 'bras bu'i rim pa ji ltar 'byung// rtsol med ngang du yid ches ji ltar 'dus// don gyi dbye ba'i bye brag ngo bo gang// thun mong chos rnams zil gyis ji ltar gnon// kun rig ston pa chos rjes bshad du gsol// de skad zhus pas don chen nges bstan nas// kun rig ston pa chos rjes bka' stsal pa// lam gyi mthar thug 'gro 'ong nges pa 'ang// grong khyer nang du mthar thug 'gro 'ong bzhin// chos kun rtsa ba rang gi sems yin pas// de yi rtsa ba ma rig sems la thug/ chu bran kun gyi 'gro 'ong dus bzhir ni// rgya mtsho chen por mtha' gting med par thug/de bzhin 'khor ba'i sdug bsngal chen po yang// skye rga na 'chi las ngan mtha' ru thug/ 'byung bzhi snang ba'i chos 'phrul cir snang yang// nam mkha' mtha' dbus med pa'i ngang la thug/de phyir yul sems 'dod gzhung cir bshad kyang// 'khrul pa'i rnam par rtog pa'i mtha' ru thug/ da yang 'dus pa'i sems dpa' chen po nyon// chos kyi sgo mo brgyad khri bsam yas dag/yongs bsdus theg dgu'i chos su bstan pa yang// rdzogs pa chen po'i chos kyi mtha' ru thug/ de phyir nges pa kun gyi rtsa ba yin// ye shes rnam lnga la sogs mdor bsdus pa// rang byung ye shes chen por 'dus pa'i phyir// rig par 'dus pa chos kun rtsa ba ste// rang rig ye shes mi zad chos skur thug/ yul gyis bsdus pa'i chos rnams ma lus pa// yin min blo yis byas pa'i zhen pa la// bdag la mthar thug yod pa mtha' yin kyang// nges don chos nyid zab mo'i mthar thug mchog/ rdzogs pa chen po lta ba ye shes gting nas rdzogs pa'i rgyud las/ chos nyid kyi mthar thug bstan pa'i le'u ste so drug pa'o//// de yang 'dus pa'i 'khor gyi tshogs rnams la// ston pa kun bzang rdo rjes bka' stsal pa// sdug bsngal ched du spangs pa'i nyan thos dang// ma rig rgyu ba 'geg pa'i rang rgyal dang// rnam rtog rim gyis sbyangs pa'i mdo sde gsum// rang rang bsgom pa ched du gzhung du byas// bskal pa chen po gsum du sgrib sbyangs nas// tha ma sangs rgyas sa la nges par sbyor// da yang 'dus pa'i sems dpa' chen po nyon// lus ngag las kyi bya ba gtsor byed pa'i// kri ya bya ba rgyud kyi theg pa ni// rang gzhung chos kyi yan lag tshang ba yis// mi tshe bdun gyi rig 'dzin sa la sbyor// phyag rgya bzhi la brtson 'grus byed pa'i phyir// byang chub lam lnga lhar rdzogs cho 'phrul gyis// 'di nas phreng gcig chad/ rnal 'byor yo ga'i theg pa ni// mi tshe gsum gyi rig 'dzin sa la sbyor// da yang 'khor gyi sems dpa' chen po nyon// nang pa ma hA yo ga'i theg pa ni// cho ga lnga yis rim pas rdzogs byas nas// gsang sngags yan lag lnga tshang nas// rnam 'byor zhag ni sum cu phrag drug na// tshe la dbang ba'i dngos grub thob par nges// lo ni nyis stong lnga brgyar rang gnas pas// longs spyod rdzogs pa'i tshul du lus bzung nas// dus der sangs rgyas sa la nges par 'gro// sku lnga ye shes lhun gyis grub par 'gyur// a nu rjes su yo ga'i theg pa ni// snying po dran tsam ma bskyed rdzogs pa'i phyir// gzhan gyis bar ma chod kyi tshe gcig gi/ 'bras bu sangs rgyas sa la nges par 'gro// da yang rdo rje sems dpa' 'chang ba nyon// rdzogs chen nges don a ti yo ga ni// grangs dang dus la mi ltos rang byung thugs// chos sku ji bzhin ma nor rtogs pa yis// 'bras bu sangs rgyas sku gsum dus gcig rdzogs// rdzogs pa chen po lta ba ye shes gting nas rdzogs pa'i rgyud las/theg dgu'i 'bras bu bstan pa'i le'u ste so bdun pa'o//// de nas 'dus pa'i 'khor gyi sems dpa' la// ston pa kun rig chos kyi rje bo yis// rtsol med ngang du yid ches bka' stsol pa// ma bcos rnal du bzhag pa chen po der// theg dman rtsol bsgrub ma lus kun 'dus te// pha rol phyin bcu gsang sngags phrin las ma lus kun// byas pa med par chos nyid ngang du rdzogs// ji ltar snang ba'i chos can chos nyid kun// rtsol ba ma byas byang chub mi 'gyur dbyings// mi snang ba la mngon du 'byin nus phyir// chos kyi snying po yin par yid kyang ches// ye nas gnas pa'i rang byung snying po 'di// rgyu las ma byung rang byung rkyen gyis ma bskyed pas// rtsol ba gang yang byed do chos sku ru// rang byung ye shes yin par yid kyang ches// gzhan las ma btsal rang las rnyed pa'i phyir// gnyen pos ma bskyed rang bzhin gnas pas na// lus ngag ched du rtsol ba med pas na// ma btsal lhun gyis grub par yid kyang ches// phyi nang theg pa ma lus bka' yi don// chos rnams thams cad gtan la 'bebs pa'i phyir// rtsol bas rtsol med don 'di bstan pa yis// ye shes sgron ma yin par yid kyang ches// sde snod chos rnams man ngag kun kyang ni// 'byung gnas gtan la 'bebs pa'i chos yin pas// bstan pas go zhing rtogs par 'gyur ba'i phyir// kun gyi spyi 'grel yin par yid kyang ches// drang don blo 'bring chos kyi rnam grangs kyi// rgyu 'bras theg pa kun las khyad 'phags phyir// theg pa'i yang rtse yin par yid kyang ches// nges don snying po man ngag gsang chen 'di// dus gsum sangs rgyas kun gyi lam yin pas// nges don chos sku rtogs pas chog pa'i phyir// rnam dag lam chen yin par yid kyang ches// kun gyi gzhi ma chos nyid rang byung bas// 'khor 'das gnyis kyi ma rig don chen 'di// kun gyi rtsa ba yin par yid kyang ches// sems can kun la khyab pa'i snying po 'di// thams cad rang las byung ba'i ye shes te// lung ldan bstan pas shes phyir nges pa'i don// nges pa'i sangs rgyas yin par yid kyang ches// ye nas gnas pa'i chos nyid snying po 'di// snang ba med par kun la khyab pa'i phyir// rtsol med ngang du rtsol ba 'dus pas na// chos sku brdal ba yin par yid kyang ches// rang byung ngo bo nyid sku ye gnas la// gcig dang du mar bgrang du med pa ste// gcig shes pas ni chog pa'i don yin phyir// thig le nyag gcig yin par yid kyang ches// rang la yod kyang rtogs par dka' ba yis// ma bstan rab tu mi shes nges pa'i phyir// chos rnams kun gyi snying po chen po 'di// gsang ba'i man ngag yin par yid kyang ches// rdzogs pa chen po lta ba ye shes gting nas rdzogs pa'i rgyud las/rtsol med ngang du yid ches pa'i le'u ste so brgyad pa'o//// de nas 'dus pa'i 'khor tshogs dang ldan la// kun rig ston pa kun bzang chos rje yis// don gyi dbye ba'i bye brag bka' stsal pa// chos kyi sku dang chos kyi dbyings gnyis ni// nyi ma'i snying po dang ni zer bzhin du// gcig pa ma yin tha dad min pa'i phyir// ldog bcas tha dad ngo bo gcig par gsungs// chos nyid sku dang gzugs sku 'byung ba gnyis// nam mkha'i zla ba dang ni chu zla bzhin// chos sku las ni gzugs sku 'byung ba las// gzugs sku las ni chos sku 'byung ba med// chos kyi sku dang ye shes rnam gnyis ni// til dang mar me dang ni 'od bzhin du// chos sku kun la don gyis khyab pa las// de don rtogs pas ye shes nges par shes// da yang rdo rje sems dpa' chen po nyon// ma rig pa dang ye shes rnam pa gnyis// me dang chu gnyis mi mthun dpe bzhin du// gcig yod na ni gcig med rkyen gyis 'gyur// de phyir lung ldan man ngag gces par gsungs// chos can dang ni chos nyid rnam pa gnyis// rtogs dang ma rtogs khyad par rnam gnyis kyis// snang ba dag dang ma dag gnyis su 'byung// de phyir gzhi la chos can chos nyid med// rdzogs pa chen po lta ba ye shes gting nas rdzogs pa'i rgyud las/ don gyi bye brag bstan pa'i le'u ste so dgu pa'o//// de nas 'dus pa'i 'khor gyi tshogs rnams la// ston pa kun rig chos rje chen po yis// thun mong chos rnams zil gnon bka' stsal pa// khyung chen gshog rgyas mkha' la lding ba la// ngam grog g.yang sa rgya mtshor nyam mi nga// de bzhin rang gis sems rtogs rnal 'byor pas// 'khor ba'i sdug bsngal zil gnon gnod mi nus// seng ge rtsal rdzogs gangs gong nyal ba la// gcan gzan char lhag zil gnon gnod mi nus// de bzhin rnal 'byor gdeng chen ldan pa yis// khams gsum 'khor ba'i gol sgrib zil gyis gnon// da yang 'dus pa'i rdo rje sems dpa' nyon// snang med chos sku nges don rtogs pa la// mtshan ma sna tshogs snang rung mi snang rung// skye 'chi med pa'i ye shes don rtogs na// rgyu rkyen 'dus byas rtag rung mi rtag rung// ye nas chos sku yin pas don rtogs na// da bzod rtsol ba byed rung mi byed rung// gzhi la gnyis med nges pa'i don mthong na// gcig dang du mar byed rung mi byed rung// mnyam pa nyid kyi ye shes don rtogs na// mtho dman bzang ngan byed rung mi byed rung// rang byung bgrod pa med pa'i don rtogs na// sa lam rim par bgrod rung mi bgrod rung// ye shes gsal sgrib med pa'i don rtogs na// snang ba mun pa sros rung mi sros rung// da yang 'dus pa'i 'khor kun nyon// rang byung rig pa 'di yi don rtogs na// sangs rgyas ye shes snying po chos sku yang// da lta bsgrubs nas 'byung ba ma yin te// ye nas rang la gnas pa'i snying po chos// 'khor ba'i ming med sangs rgyas 'ba' zhig yin// da yang 'dus pa'i snying po'i sems dpa' nyon// de nyid dus 'dir shes pa'i rtogs pa ni// yang dag sangs rgyas nges pa'i don chen gyis// ye shes mngon 'gyur sangs rgyas dus gcig byung// de phyir lung ldan man ngag gces su che// rdzogs pa chen po lta ba ye shes gting nas rdzogs pa'i rgyud las/ thun mong chos rnams zil gyis gnon pa'i le'u ste bzhi bcu pa'o//// de nas 'dus pa'i snying po 'khor rnams la// ston pa kun rig rgyal pos don gtad pa// theg pa'i rgyal po chos nyid lhun rdzogs 'di// skal ldan 'dus pa'i 'khor rnams khyed kyis kyang// rgyud 'di yid la brnags shing bcang bar gyis// da yang 'dus pa'i rdo rje snying po nyon// spyod pa tshul 'chos byed cing slob dpon smod// nor phangs chos 'dod thabs kyis 'dru ba la// ye shes gting rdzogs rgyud chen lta ba 'di// snod ngan rnams la nams kyang bstan par ma gsungs so// bka' bzhin ma byas don gyi snying po'i chos// 'jig rten nor 'dod don ston rnal 'byor la// sangs rgyas bka' mchog dka' chad 'byung nges phyir// 'jig rten mkha' 'gro dam can rnams dang ni// gnod sbyin srin pos srog bcad mnar med ltung// da yang 'khor gyi sems dpa' yid kyis nyon// bstan pa 'jigs ka'i dus 'dir chos rnams kyi// snying po rdzogs chen don 'di 'byung 'gyur bas// snod ldan rnal 'byor 'ga' la gtad pa las// dad med snang dgu rnams kyi spyod yul min// 'khor rnams kun kyang nges pa de la zhog/ lan cig rnal 'byor khas 'che'i chos pa rnams// don med tshig mkhas nyams su len pa med// 'dus byas chos spangs don la mi 'dud par// bsod nams 'dod phyir grong du chos 'chad 'byung// da yang rdo rje sems dpa' yid kyi nyon// rnal 'byor las can dad ldan tshe 'di la// gzhung gzhan don las mi 'da'i bsam pa can// dka' dgur brdos nas man ngag rgyud 'di tshol// de tshe rnal 'byor las can kun gyi don gyi phyir// sba bskyil mi bya rgyud 'di bstan par gyis// gal te snod ldan ma rnyed dus nye na// chos skyong yod pa'i gtsug lag khang chen nam// dregs pa lha 'dre yongs kyi brag dkyil du// sa phyogs brtags la dad ldan phyi rabs la// phan phyir smon lam btab la sbas la bzhag/ rdzogs pa chen po ye shes gting nas rdzogs pa'i rgyud las/ 'khor la rgyud gtad pa'i le'u ste zhe gcig pa'o//// rdzogs pa chen po ma rig mun pa sel bar byed pa'i lta ba ye shes gting nas rdzogs pa'i rgyud rin po che dngul gyi dril shing can 'di rgya gar gyi mkhan po bi ma la mi tra dang/bod kyi lots+tsha ba A tsar+ya dran pa ye shes kyis skad rang rgyud kyis bsgyur nas gtan la phab nas/nyang ting 'dzin bzang pos lcags sgrom nag po'i nang du bse sgrom smug por bcug ste/ dbu ru gzong phug mo'i brag phug tu/ mkha' 'gro ma rdo rje rgyan gcig ma dang/ badzra sA d+hu legs pa rtsal la gtad nas sbas pa/'brom ye shes snying pos bton nas/ nyang dbang phyug rgya mtsho la gtad pa'o// des shangs pa lce chung ba ye shes la gtad pa lags so////

CLOSE WINDOW