CLOSE WINDOW

Gpb001.015
བོད་ཡིག

/ yi ge brgya pa dbang mchog rgyal po'i rgyud ces bya ba le'u nyer gcig pa rdzogs so//// dge legs so// // rgya gar skad du/ badzra satwa sha tA k+Sha rA ka a b+hi She kot+ta ma hA rA dza tan tra nA ma/ bod skad du/ rdo rje sems dpa'i yi ge brgya pa dbang mchog rgyal po'i rgyud ces bya ba/ bcom ldan 'das dpal rdo rje mchang chen po la phyag tshal lo// 'di skad bdag gis thos pa'i dus gcig na/ de bzhin gshegs pa thams cad 'og min rdo rje'i gnas kyi dang po na bzhugs te/chos nyid 'byed pa med pa'i ngang las/ thugs rje byams pa chen pos 'gro ba rnams la gzigs pa dang/ byang chub kyi myu gu skams pa'i sems can dag mthong ste/de'i tshe de'i dus na/ phyogs bcu kun nas rgyal ba thams cad 'dus nas bka' 'gros te thugs rje'i don bgro ba/ kye ma rdo rje sems dpa' rdo rje 'dzin// 'jig rten 'dod khams dam tshig skyon// nyes byas rnam smin rgyu las bzlog/ de yi gnyen po khyod nyid yin// zhes bgro'o// rdo rje 'chang ba rdo rje 'dzin// de nyid sprul pas 'di skad gsungs// dus la bab bam de bzhin du// nyes byas rnam smin la spyod pa'i// ngan song na raka gnas nas 'dren// zhes pa zhal gyis bzhes pa dang// de nas ston pa kun bzang dang// kun rig rnam par snang mdzad sogs// mi g.yo mnyam pa'i ngang la bzhugs// phyogs bcu'i zhing khams de bzhin no// de nas ston pa rdo rje sems// gnas kyi dang po 'og min du// lag na rdo rje rgyal sras 'khod// 'khor ba thugs rjes bzung ba'i dus// 'khor ba dong sprug 'gyod tshangs gsungs// rgyud mchog rdo rje rgyal po dang// dbang mchog rgyal po'i rgyud 'di bstan// slob dpon slob mas nyes byas pa'i// gcer bu lus srul na ra ka/ pre ta ka dang tir+ya ka// rim pa bzhin du don byed de// nr-i dang de wa a su ra// drug gi gnas nas 'dod byed pa'i// dbang mchog rgyal po'i bstan pa 'byung// zhes gsungs so// rdo rje sems dpa'i yi ge brgya pa dbang mchog rgyal po'i rgyud las/gleng gzhi phun sum tshogs pa'i le'u ste dang po'o//// de nas rdo rje sems dpa' dang// sprul pa lag na rdo rje yis// 'jig rten rgyal ba rab 'byams dang// rgyal sras sprul pa 'dus rnams la// dam tshig rtsa ba nyams pa yi// slob mas slob dpon nyes byas te// 'dul te drang ba'i dus babs sam// gdul byar thugs rjes gzigs pa dang// nyes skyon sngon byung ci yi rgyu// ces pa mkhyen bzhin smras pa dang// kun bzang rdo rje rnam snang gis// sprul pa nyid la bka' stsal pa// rgyal sras 'khor 'dus sngon byung ni// jig rten zhing khams mi mjed 'dir// bram ze dung gi phreng ba can// rgyal ba rnams la bsnyen bkur bas// rig pa'i gnas lnga la mkhas pa// byang chub sems dpa'i rigs can gcig/ bas mtha'i dur khrod gnas na bsgrub// mkhas pa kun gyi seng ger gyur// de lta bu yi slob dpon la// yul khams skyong ba'i rgyal po'i bus// blo sbyong rig pa rdzogs byas nas// rgyal po'i gong na bram ze gnas// rgyal bu phrag dog ngan sems skyes// bla ma bram ze sgrub pa la// mkha' 'gro'i tshogs kyis brda' brtan pa// rnal 'byor gser snod ngan dug g.yo// dug can snod la bros par 'os// ma bros nyes skyon lus sems 'bral// ces pa dam tshig brda' bstan yang// rnal 'byor pas ni bsam gtan mdzad// de nas rgyal bus bram ze bos// myos chang blud nas rngan byas pa// dbang po'i dngas ma gsal byed mig/ lcags kyi thur ma phra mos gtsags// tshig sgo gsal byed smra ba'i lce// lcags kyus drangs te spu gris bcad// lus la rus sbal khrag gis byugs// mi gtsang dme ba'i bud med kyis// lus la brdzi bcag nye bar byas// rkang pa'i sgyid pa mtshon gyis bcad// lag pa'i sran tsho de bzhin bregs// de ltar rngan byas bzhag pa na// bram ze dran pa sad pa las// mig dbyer mig med lce yang med// 'gro ba'i rkang med lus stobs bral// bud med kyis brdzis 'gul stobs med/ rus sbal khrag byugs chu bur dang// rkang pa la sogs nad rnams byung// dran pa rang yang rab rib 'dug/ rtabs te bram zes bsams pa la// 'di ltar bdag la 'di byung ba// sngon ma'i las kyi rnam smin nam// 'on te gzhan gyis phrag dog byas// mnyam par bzhag ste bltas pa las// rang la rgyal bus rngan byas mthong// de nas bram ze dmod pa bor// kye ma kye hud rgyal bu khyod// lo dang zla bar bslabs sbyangs nas// rig pa'i gnas la mkhas byas pas// lan du 'di ltar rngan byed pa// khyod ka skye ba gcig gis su// sems can srul po gcig tu skyes// tshe thung nad kyis lus gzir ba// dmus long lkugs pa mdze lhog dang// sha bkra bas ldag chu bur dang// rkang lag zha grum dbul po dang// lus la sha zas tshang 'cha' shog/ tshe 'phos nas kyang na raka gnas// kha 'khor sdug bsngal thar med shog/ de las thar yang pre ta ka/ tir+ya ka yi kha 'khor shog/ dus dang tshe rabs thams cad du// 'phags pa'i zhal ni mi mthong zhing// byang chub myu gu sngo bskam shog/ ces pa ngan sems dmod pa bor// nyes byas dam nyams rgyal bu de// de nas myur du lus dag la// nad rnams kun phog tshe dus byas// rang gi nyes byas rnam smin dang// bram ze'i dmod pa smon lam gyis// sems can lus srul gcer bur skyes// lus la nad sna sna tshogs byung// sha za stong gi tshang yang bcas// byang chub myu gu sngo bskams nas// na raka gnas na sdug bsngal spyod// tsha grang gshags gtubs la sogs myong// de bzhin pre ta tir+ya 'khor// rnam smin sdug bsngal de spyod pas// rdo rje sems dpa' rdo rje 'dzin// thugs rje chen pos de las drongs// zhes gsungs so// rdo rje sems dpa' yi ge brgya pa dbang mchog rgyal po'i rgyud las/ sngon byung rgyu rkyen gtam rgyud kyi le'u ste gnyis pa'o//// de nas rdo rje sems dpa' dang// lag na rdo rje stobs chen gyis// skad mthun tshig sgo gcig pa yis// rgyal ba'i tshogs la 'di skad babarjod// de ltar 'dul ba'i dus yin na// thabs mchog gang gis drang bar bya// slar gsol ba de bstan du gsol// ces pa rgyal ba la zhus pas// kun bzang rdo rje rnam snang gis// sprul pa nyid la bka' stsal pa// legs so sems dpa' rdo rje 'dzin// mkhyen par gyur kyang zhus pa legs// rig pa 'dzin pa rigs kyi bu// gsang sngags dam tshig nyams pa la// na raka dong nas sprugs pa yis// 'gyod tshangs bshags pa'i rgyal po sgrogs// chos nyid don gyi sgron ma theg/ lus ngag yid gsum brtson 'grus phyung// sku gsung thugs kyi tshangs pa thob// ngan song dong sprugs sku gsum mthong// phyi nang gsang ba'i dbang bskur gyis// rgyud drug gnas nas nges par drongs// ye shes lnga ldan chos sku thob// yul med ming gi sgro 'dogs chod// gsang sngags bla med rdo rje la// thabs mchog bla na med pa bzhugs// nyan thos rang rgyal lta bu min// dper na nyan thos 'dul khrims ni// rdza so ma btang chag pa 'dra// chag par gyur na gso thabs med// gsang sngags rdo rje theg pa ni// rin chen gser 'dra rgyu mchog bzang// gser dngul snod 'dra zhoms kyang bcos// snga ma bzhin du legs par sos// de bzhin gsang sngags dam tshig ni// nyams chag byung yang gso thabs yod// sbyang thabs mang la thabs sgo mang// spyi khrus ngan song dong sprugs mdzod// dbang mchog rgyud drug skye sgo chod// yul med sgro 'dogs gnyis med chod// ces lung bstan to// rdo rje sems dpa' yi ge brgya pa dbang mchog rgyal po'i rgyud las/ nyams pa gso thabs lung bstan pa'i le'u ste gsum pa'o//// de nas rdo rje sems dpa' dang// lag na rdo rje 'dzin pa yis// sangs rgyas kun la 'di skad gsol// kye kye rgyal ba rgya mtsho'i tshogs// gsang sngags bla med rdo rje la// dam tshig bsdus rgyas ji ltar lags// srung sdom nyams pa ji ltar bskang// zhes pa mkhyen bzhin du zhus pas// rgyal ba 'dus pas bka' stsal pa// rdo rje sems dpa' rdo rje 'dzin// gsang sngags 'bras bu'i theg pa la// dam tshig rtsa ba rnam pa gsum// sku dang gsung dang thugs gsum mo// yan lag dam tshig nyi shu lnga// mi spang lnga dang blang ba lnga// spyad bya lnga dang bsgrub bya lnga// gzhan yang nying lag bsam las 'das// 'bum sde la sogs dam tshig kyang// rtsa ba yan lag shes par bya// bsnyen bsgrub rnam bzhi'i sgor zhugs nas// dam tshig de dag bsrung bar bya// legs par bsrung dang bsrung du med// yan lag nyi shu rtsa lnga yang// rtsa ba'i dam tshig gsum du 'dus// lus ngag yid gsum bag yod bya// chag nyams thams cad gsum las 'byung// sku gsung thugs ni lus ngag yid// byin brlab bshags sbyang spang sgrub dang// rang 'khrungs rdo rje gser nyid do// yid kyi sgo nas chag nyams na// thugs kyi lta bas bshags par bya// lta ba log pa nyams pa che// yin pa med pa lta ba'i mchog/ yid kyi bshags thabs chen po yin// lus kyi sgo nas chag nyams na// phyag rgya sku yi bsgom pas bshags// phyogs su 'dzin pa nyams pa che// yengs pa med pa bsgom pa'i mchog/ dge las lus kyi bshags thabs yin// ngag gi sgo nas chag nyams na// sngags dang bzlas brjod spyad pas bshags// tshul chos spang blang nyams pa che// yin min med pa spyod pa'i mchog/ mdzad spyod ngag gi bshags thabs yin// de ltar dam tshig gsum bshags na// nyi shu rtsa lnga bshag pa rnams// thams cad ma byung ma skyes te// yan lag dam tshig bshags su med// ci phyir bsrung bya srung byed med// skye med dam tshig shes par gyis// zhes gsungs so// rdo rje sems dpa' yi ge brgya pa dbang mchog rgyal po'i rgyud las/ dam tshig mtshon pa'i le'u ste bzhi pa'o//// de nas rdo rje sems dpa' dang// lag na rdo rje sems can lus srul po'i de nyid kyi mdun du byon te/ mnar med nyam thag de la 'di skad ces smras so// na ra ka bud+d+ha tsak+ShU a be sha ya a/zhes bsgrags pas/ de nas las ngan sems can des// sngon gyi las ngan dran gyur te// sdug bsngal gnong nas 'gyod pa skyes// rdo rje nyid la ngo smad de// kye ma kye hud kye hud nongs// thugs rjes 'gro ba bdag la skyobs// thabs mchog rgyal pos bsgral du gsol// slad nas mi 'chab mi bgyid do// zhes gdung ba phyung ba las/ de nas rdo rje sems dpas/ sems can las ngan de yi rna lam du 'gyod tshangs kyi rgyal po na rag dong sprug 'di bka' stsal to// nyon cig las ngan sems can khyod// 'gyod sems phyung la yid gtod cig/ ngag sgo gsal brjod brkyang phyag 'tshol// zhes gsungs nas bka' stsal pa// ho dus gsum 'jig rten rab 'byams ma lus kyi// rgyal ba rgya mtsho rnams la phyag 'tshal lo// chos rnams rnam dag ye nas lhun grub cing// bya ba byed dang yid chos rnam par dag/ kun bzang yab yum gnyis la phyag 'tshal lo// chos sku nam mkha' bzhin du dbyer med kyang// gzugs sku 'ja' tshon bzhin du so sor gsal// thabs dang shes rab mchog la mnga' brnyes pa'i// rigs lnga bde bar gshegs la phyag 'tshal lo// ngo mtshar pho brang bde bar gshegs pa'i yum// dus gsum rgyal ba thams cad bskyed mdzad ma// rigs kyi yum gyur rnams la phyag 'tshal lo// rnam shes dbang po dag pas sku gsung thugs// bde bar gshegs pa kun gyi sras mchog ste// sems dpa' chen po brgyad la phyag 'tshal lo// sgeg mo phreng thogs rin chen glu gar can// mkha' mnyam mchod pas rgyal ba rgya mtsho mchod// dbang phyug lha mo'i tshogs la phyag 'tshal lo// me tog bdug spos mar me dri chab kyis// rgyal ba rgya mtsho rnams la mchod 'bul ma// mchod pa'i lha mo rnams la phyag 'tshal lo// drag shul thabs kyis 'gro ba 'dul mdzad pa// tshad med bzhi ldan sgo bzhi thub par srungs// ta kr-ita sgo ba bzhi la phyag 'tshal lo// rtag chad mthar phyin gsang ba yum gyi ngang// lcags kyu zhags pa lcags sgrog dril bu ma// rdo rje sgo ma bzhi la phyag 'tshal lo// steng 'og phyogs bzhi'i 'jig rten 'dul ba'i gtso// nyon mongs drug 'joms rgyud drug dag par sbyang// bcom ldan thub pa rnams la phyag 'tshal lo// gsal mtsher lhun sdug gzi brjid phyogs bcur 'phro// mnyen lcugs 'khril ldem gzhon tshul zhi ba'i tshogs// rgyal ba bzhi bcu gnyis la phyag 'tshal lo// rang bzhin sgyu 'phrul zhi ba'i lha rnams la// gang zhig lus ngag gus pas phyag 'tshal na// nyams chag kun kyang ma lus byang bar 'gyur// de bas de la gus par phyag 'tshol zhig/ zhes gsungs so// dbang mchog rgyal po'i rgyud las le'u ste lnga pa'o//// de nas rdo rje sems dpas bka' stsal pa// brtson 'grus phyung zhig las ngan sems can khyod// 'di ltar rgyal ba dpang du gsol la phyag/ lus gus tshig gsal mos gus ldan pas 'tshol// ho/ rang bzhin sgyu 'phrul chen po'i dkyil 'khor ni// zhi ba chos nyid ngang las ma g.yos kyang// phrin las mthar phyin thabs mchog khro bor ston// 'bar ba khro bo'i tshogs la phyag 'tshal lo// ho/ rang rig ye shes thabs kyi rgyal po mchog/sangs rgyas kun gyi spyi dpal khro bo'i rje// che mchog he ru ka la phyag 'tshal lo// rang bzhin rnam dag chos nyid dbyings gnas pa// yum chen dpal 'bar rngams pa'i cha lugs can// khro mo gnam zhal ma la phyag 'tshal lo// 'jig rten 'das pa'i dus na sngon byung ba'i// gdug pa 'dul phyir dus las mi 'da' ba'i// dpal chen he ru ka la phyag 'tshal lo// khro mo dbang phyug sku la 'khril mdzad cing// mkha' 'gro'i mi bzad 'bar ba'i sprin 'phro ma// gdug pa 'dul mdzad yum la phyag 'tshal lo// phyogs bcu'i dgra bgegs ma lus bsgral ba'i phyir// gdug pa'i tshogs 'joms khro rgyal tshogs su sprul// ye shes mtshon chas dgra bgegs kun sgrol ba// bdud 'dul khro bo bcu la phyag 'tshal lo// phyogs bzhi'i sgo gcod ye shes bzhi yi ngang// gdug pa'i tshogs rnams ma lus 'dul byed pa// phyag rgya bzhi yis 'gugs 'chings sdom zhing gtogs// sgo skyong khro mo bzhi la phyag 'tshal lo// dbang mchog rgyal po'i rgyud las/ khro bo che mchog gi le'u ste drug pa'o//// de nas yang ni sems dpas bka' stsal pa// ho/ khro gtums 'jigs byed dpal chen he ru ka// dregs pa ru dra 'dul ba'i thabs mnga' ba// khrag 'thung rigs lnga'i tshogs la phya tshal lo// khro mo dbang phyug kro d+hi yum chen lnga// khro rgyal sku la gnyis med dgyes skong ma// khrag 'thung yum chen rnams la phyag 'tshal lo// bskal pa me ltar 'bar ba'i klong dkyil nas// ye shes sku mchog 'jigs byed rgyan gyis brgyan// khro mo chen mo brgyad la phyag 'tshal lo// nam mkha'i lus can gar yang thogs med cing// 'dod dgur bsgyur ba'i gzugs can 'phrul mo che// phra men chen mo brgyad la phyag 'tshal lo// rdo rje gdong mo pho nya mgyogs ma bzhi// shar lho nub byang sgo bzhi thub par bsrungs// sgo skyong khro mo bzhi la phyag 'tshal lo// dbang mchog rgyal po'i rgyud las/ yang dag gi le'u ste bdun pa'o//// de nas yang cig sems dpas bka' stsal pa// ho/ mi gnas mi dmigs chos skur dag pa las// bdud 'dul khro bo mchog gi skur bstan pa// thugs rje'i gzi ldan gdug pa thabs kyis 'dul// khro mchog gshin rje'i tshogs la phyag 'tshal lo// chos dbyings skye med ngang las ma g.yos missing lo// snying rje ma bral las byed rdzu 'phrul can// thogs med kun tu rgyu ba'i pho nyar bstan// sgo bzhi'i las mdzad rnams la phyag 'tshal lo// dbang mchog rgyal po'i rgyud las/ phrin las phur pa'i le'u ste bcu pa'o//// de nas yang cig thabs sgo bka' stsal pa// chos dbyings yum gyi ngang las sku sprul pa// pha rol phyin drug ye shes drug gi ngang// thugs rjes sems can ma lus don la dgongs// dbyings kyis yum drug tshogs la phyag 'tshal lo// dgongs spyod rgya mtsho dpag gi mi longs kyang// thugs rjes sems can ma lus don la dgongs// snying rje'i dbang gis ji ltar 'dul mdzad ma// rje mo bcu bzhi'i tshogs la phyag 'tshal lo// 'gro ba'i don phyir sna tshogs skur ston cing// zhing chen gsar rnying tshogs la longs spyod pas// gnod byed bgegs kyi tshogs dpung 'joms mdzad ma// srid pa ma mo'i tshogs la phyag 'tshal lo// mi srin la sogs dbang phyug nyi shu brgyad/ kun kyang dus las mi 'da' dam tshig can// gdug pa thams cad ma lus 'dul mdzad ma// dbang phyug nyi shu brgyad la phyag 'tshal lo// gdug pa'i dgra bgegs ma lus bsgral ba'i phyir// sku mdog phyag mtshan gcig tu ma nges te// phrin las rnam bzhis bka' yi bstan pa bsrung// bka' nyan las byed tshogs la phyag 'tshal lo// zhes gsungs so// dbang mchog rgyal po'i rgyud las/ ma mo'i le'u ste bcu gcig pa'o//// de nas yang cig thabs sgo bka' stsal pa// gang la gang 'dul de la der bstan nas// so so'i sgrub mchog yi dam rtags 'chang ba// sgrub pa'i rig 'dzin rnams la phyag 'tshal lo// lhun grub phyag rgya rnam smin tshe la dbang// so so'i rigs su rig 'dzin phyag rgya brnyes// rigs kyi rig 'dzin rnams la phyag 'tshal lo// rig 'dzin sa la gnyis med lhun gyis grub// rdo rje 'dzin pa kun gyi ngo bo nyid// rdo rje chos mchog yon tan 'byung ba'i gtso// rdo rje slob dpon rnams la phyag 'tshal lo// zhes gsungs so// dbang mchog rgyud po'i las rig 'dzin rnams kyi le'u ste bcu gnyis pa'o//// de nas yang cig sbyangs thabs bka' stsal pa// dmigs med thabs kyis sna tshogs sku gzugs ston// sku mdog phyag mtshan cir yang sprul zhing bsgyur// sangs rgyas bstan pa bsrung ba'i las mdzad pa// 'jig rten bstan srung rnams la phyag 'tshal lo// rgyal ba'i bstan pa bsrung bar zhal bzhes nas// legs nyes ltangs 'dzin dam tshig rjes gcod cing// bka' bzhin rjes su bsgrub pa'i grogs mdzad pa// dam can rgya mtsho'i tshogs la phyag 'tshal lo// 'jig rten las las grub pa'i dregs pa can// las kyi dbang gis dregs pa'i stobs brnyes shing// dam tshig dbang gis bka' yi bstan pa srung// sngags bdag dam can tshogs la phyag 'tshal lo// zhes gsungs so// dbang mchog rgyal po'i rgyud las bstan srung gi le'u ste bcu gsum pa'o//// de nas yang cig sbyangs thabs bka' stsal pa// las ngan sems can nyes byas khyod// lus ngag yid gsum gus pas brtson 'grus phyung// dkyil 'khor lha tshogs dpang du gsol la mthol// dmigs med chos kyi sku la phyag 'tshal lo// longs spyod rdzogs pa'i sku la phyag 'tshal lo// cir yang sprul pa'i sku la phyag 'tshal lo// mi 'gyur rdo rje'i sku la phyag 'tshal lo// mngon par byang chub sku la phyag 'tshal lo// thugs rjes zhi mdzad lha la phyag 'tshal lo// thabs mchog dmar nag 'jam dpal sku la phyag 'tshal lo// skyon med sgra sgrog pad+ma'i gsung la phyag 'tshal lo// yang dag don ldan khrag 'thung thugs la phyag 'tshal lo// nyes pa'i nad sel bdud rtsi sman la phyag 'tshal lo// phrin las drag po phur pa'i tshogs la phyag 'tshal lo// mkha' 'gro rnam bzhi ma mo'i tshogs la phyag 'tshal lo// sa dang lam rdzogs rig 'dzin tshogs la phyag 'tshal lo// bstan pa bsrung mdzad dam can tshogs la phyag 'tshal lo// dgra bgegs sgrol mdzad sngags bdag tshogs la phyag 'tshal lo// zhes gsungs so// rdo rje sems dpa' yi ge brgya pa dbang mchog rgyal po'i rgyud las/nongs pa dpang gsol phyag 'tshal rten gyi skabs las/ dkyil 'khor bsdus pa'i le'u ste bcu bzhi pa'o//// rdo rje sems dpas bka' stsal pa// gang gis rgyal ba zhi khro yi// dkyil 'khor lha la phyag 'tshal na// nyams chag ma lus lta ci smos// mtshams med lnga yi sdig kyang 'byang// na raka gnas kyang dong sprugs te// rig 'dzin rgyal po'i zhing du grags// de skad ces pa bsgrags pa dang// dmyal ba'i gnas kyi sems can rnams// dran pa slar ni rnyed par gyur// sdug bsngal skabs der zhi ba las/ rdo rje sems dpas 'di skad gsungs// zhing khams rgyal ba rgya mtsho dgongs// dus gsum sangs rgyas thams cad kyi// thugs kyi yang snying bdag gis brjod// kun nas byin gyis brlab par mdzod// kye kye ston pa sangs rgyas rnams// dus gsum rgyal ba'i yang snying 'dis// 'tshams med nyes byas rnam smin byang// gsang sngags dam tshig so ru chud// mi dge rnams la smos ci dgos// gang zhig nad kyis nyen gyur kyang// sdug bsngal de las nges par grol// 'go ba'i nad rims byung ba'i tshe// bdag nyid yi dam gsal ba yis// snying po 'di brjod des mi tshugs// gang zhig ngan sngags mtshon brdeg kyang// snying po 'di brjod rang la bzlog/ don gnyer lam 'gro 'di brjod na// 'jigs pa'i dgra las nges par grol// gdon 'jigs 'gegs kyis 'tshe ba'i tshe// rig pa 'di brjod gdon de 'jil// sems can gang zhig bu 'dod kyang// rig pa 'di bzlas rabs des zin// nyon mongs dbul zhing phongs pas kyang// snying po 'di brjod rin chen rnyed// gang zhig 'khor bsdu 'di brjod na// srid pa gsum yang 'khor du 'du// phrin las rnam bzhi nges par 'grub// nyams sgrib thams cad dag byed pa'i// yi ge brgya pa bdag gis brjod// nyams chag thams cad 'di yis skongs// zhes smras te ngan song dong nas sprugs pa 'di gsungs so// oM AHhUM swA hA/ oM badzra satwa sa ma ya/ ma nu pA la ya/ badzra satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha/ sarba karma su tsa me/ tsit+taM shre yaM ku ru hUM/ ha ha ha ha ho/ b+ha ga wAn sarba ta thA ga ta badzra mA me muny+tsa/badzrI b+ha wa ma hA sa ma ya badzra satwa a/ 'di ni dus la bab pa'i tshe// gsum mam bdun nam bcu bzhi'am// nyi shu rtsa gcig brgya rtsa brgyad// lha bsgom gsal bas brjod byas na// nyams chags thams cad skong bar byed// ngan song gsum las thar bar 'gyur// yi dam dag tu 'di brjod na// dus gsum rgyal ba'i sras su 'gyur// de nas las ngan sems can dmyal ba pa rnams kyis// mgon po sems can la dgongs pa a la la ho// zhes smras so// de nas dus gsum sangs rgyas rnams kyis rdo rje sems dpa' la gsungs pa/ thugs kyi yang snying brjod pa lags so// zhes ched du brjod de gnang ba byin no// dbang mchog rgyal po'i rgyud las/ yang snying gsang sngags bshad pa'i le'u ste bco lnga pa'o//// de nas badzra pA Ni yis// las ngan sems can de la ni// sngags kyi snod du rung ba'i phyir// dang po'i sems bskyed dad byas nas// bum pa lha yi dbang bskur dang// na raka gnas nas drangs pa yi// gsang ba'i sngags kyis dbang bskur ro// bum pa rdzas dang ldan thogs nas// las ngan de yi gtsug tu bzhag/rig pa'i tshigs bcad 'di brjod do// hU~M kun bzang yab yum bum pa na// rgyal ba zhi khro'i lha tshogs bzhugs// sems can khyod la dbang bskur bas// na raka sdug bsngal bral bar shog/ du da ha da ha sarba na ra ka ga te he tun hUM phaT/hUM badzra satwa sa ma ya/ ma nu pA la ya/ badzra satwa twe no pa tiSh+Tha/ dr-i D+ho me b+ha wa/ su toSh+yo b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha/ sarba karma su tsa me/tsit+taM shre yaM ku ru hUM/ ha ha ha ha ho/ b+ha ga wAn/ sarba ta thA ga ta badzra ma me muny+tsa/ badzrI b+ha wa ma hA sa ma ya badzra satwa a/ hUM badzra a b+hi Shiny+tsa a// zhes dbang bskur bas// dus der na rag gi gnas dong sprug par gyur to// dbang mchog rgyal po'i rgyud las// na rag dong sprug pa'i le'i ste bcu drug pa'o//// de nas sems can las ngan de// yi dwags gnas su yang skyes te// phyi nang gnyis ka'i sdug bsngal myang// rnam smin yi dwags chen por gnas// de nas lag na rdo rje yis// ye dwags de yi rtsar byon nas// las ngan de la 'di skad bsgrags// pre ta ka tsak+Shu pra be sha ya a// de skad rna bar bsgrags pa yis// sngon gyi las ngan yongs su dran// kye ma kye hud mgon po yis// thugs rjes zung la bdag skyobs shig/ bdag lus sgrol la bde la 'khod// mgon pos myur du bdag skyobs shig/ ces pa gsol ba btab pa dang// de nas badzra pA Ni yis// rin chen sgrom bu lag thogs nas// las ngan de yi gtsug tu bzhag/ rig pa'i tshigs bcad 'di brjod do// A/ rin chen sgrom gyi bum pa na// rgyal ba zhi khro'i lha tshogs bzhugs// sems can khyod la dbang bskur bas// pre ta'i sdug bsngal bral bar shog pre pa tsa pa tsa/ sarba pre ta ka ga te he tuM hUM phaT/ AHpad+ma satwa sa ma ya ma nu pA la ya/ pad+ma satwa twe no pa tiSh+Tha/ dr-i D+ho me b+ha wa/su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha/ sarba karma su tsa me tsit+taM shre yaM ku ru hUM/ AM oM a a hUM ha ho/ b+ha ga wAn sarba ta thA ga ta pad+ma mA me muny+tsa/ pad+ma b+ha wa ma hA sa ma ya/ pad+ma satwa aH pad+ma a b+hi Shiny+tsa a/ zhes dbang bskur bas/ dus der yi dwags rigs gsum la// rgyu ba gnas pa rnam par smin// phyi nang gnyis ka'i sgrib pa can// yi dwags gnas ngan de las thar// mthong log sdug bsngal las grol lo// dbang mchog rgyal po'i rgyud las// pre ta ka dong sprug gi le'u ste bcu bdun pa'o//// de nas las ngan sems can de// byol song gnas su yang skyes so// byol song rigs bzhi yod pa las// gor ma rdo yi 'bu ru skyes// sngon gyi las ngan bag chags kyis// de yi rnam par smin pa byung// rigs bzhi'i byol song dpag tu med// bsdus pas sum 'bum nyi khri yod// shin tu bsdus pas rigs bzhi yin// de dag kun tu skyes pa la// de nas lag na rdo rje yis// sems can de yi gam du byon// las ngan de la 'di skad bsgrags// tir+ya ka tsak+ShU pra be sha ya AH de skad sems can des thos pas// sngon gyi las ngan de dran nas// kye ma kye hud bdag 'dra sogs// las kyi rnam smin rang la smin// mgon po'i thugs rjes bdag sgrol cig/ zhes gsol ba btab pa dang/ de nas badzra pA Ni yis// las ngan sems can byol song la// shes rab pu sti lag thogs nas// las ngan de yi gtsug tu bzhag/ rig pa'i bden tshig 'di brjod do// oM shes rab rig pa'i pusti 'di// dus gsum sangs rgyas zhi khro'i gsung// sems can khyod la dbang bskur bas// tir+ya'i sdug bsngal bral bar shog/ su ma tha ma tha sarba tir+ya ka ga te he tuM hUM hUM phaT/ oM bud+d+ha satwa sa ma ya/ ma nu pA la ya/ bud+d+ha satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha/ sarba karma su tsa me tsit+taM shre yaM ku ru hU~M/ ha ha ha ha ho/ b+ha ga wAn/ sarba ta thA ga ta bud+d+ha mA me muny+tsa bud+d+ha b+ha wa ma hA sa ma ya/bud+d+ha sahA aH oM a b+hi Shiny+tsa a/ zhes dbang bskur ba dang/ yang de'i dus su byol song glen lkugs dang/ bsad bcad dang/ nying sha nying gis za ba las thar te/ 'khor der byol song khri sum stong bde ba rnyed do// las ngan gyi sems can de yang rdo rang zhig ste// byol song gi mun pa las thar ro// dbang mchog rgyal po'i rgyud las/ tir+ya ka rang grol ngan song dong sprugs kyi le'u ste bco brgyad pa'o//// de nas las ngan sems can des// lha min nas su skyes te yang// 'gro la gnod sems mtho ris 'khrug/ 'thab rtsod las la dga' zhing nad rims gtong// mi dge'i las byed dge la bar chod gtong// sgra gcan nag por bya bar skyes// lha la khong khros 'khrug par byed// dpung gi stobs kyis thams cad bred par byed// lha yul dmag 'dren bsam gtan 'khrugs// de nas lag na rdo rje yang// sems can de yi gnas su byon// las ngan de la 'di skad bsgrags// de ba a su ra tsak+ShU pra be sha ya a// sgra gcan nag pos de thos pas// sngon gyi las ngan de ru dran// mgon po nyid la ngo dma' zhing// gdung ba'i smre sngags 'di skad smras// e ma bdag 'dra'i sems can zhig/ sngon gyi las ngan dag las byung// kye ma kye hud mgon po yis// bdag lus ngan pa bsgral du gsol// sngar byas 'gyod de mthol bshags bsdam// thugs rjes zung la dbang bskur sbyongs// slad nas byang chub mchog thob mdzod// ces gsol ba mang du btab po// de nas phyag na rdo rje yis// phyag na go mtshon thogs nas su// las ngan de la dbang bskur bsgral// rig pa'i bden tshig 'di brjod do// hA/ shes rab don mtshon ral gri dang// bdud kyi mtshon rdug go cha 'di// dus gsum sangs rgyas rnams kyi sbyor sgrol te// zhi khro rgyal ba rnams kyi phyag mtshan 'dis// sems can khyod la dbang bskur bsgral// a su ra yi sdug bsngal bral bar shog/ tri sarba duHkha sarba karma pra be sha hUM phaT/ ha karma satwa sa ma ya/ ma nu pA la ya/ karma satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha// sarba karma su tsa me/ karma shre yaM ku ru hUM/ ha ha ha ha ho/ b+ha ga wAn/ sarba ta thA ga ta/ karma mA me muny+tsa/ karma b+ha wa/ ma hA sa ma ya/ karma satwa a/ hA a bi Shiny+tsa aH zhes dbang bskur bas lha ma yin gzhan rnams kyang byams pa'i sems skyes te/snying rje tshad med pa la gnas so// 'thab rtsod thams cad dus der rang zhi'o// sgra gcan nag po de badzra pA Nis bsgral lo// lha ma yin gzhan rnams kyang dge ba'i sems la gnas te/ skye ba gnyis pa dang gsum pa sha stag tu gyur to// dbang mchog rgyal po'i rgyud las/ sgra gcan nag po bsgral ba'i le'u ste bcu dgu pa'o//// de nas sngar gyi sems can des// lha yi gnas su skye ba blangs// lha gnas rnam pa gsum las ni// 'dod khams sum bcu rtsa gsum gyi// dge ba'i ngang tshul bya bar skyes// lha mo bdun dang lhan cig 'grogs// 'dod yon chags pa can de la// badzra pA Nis 'di skad bsgrags// de wa tsa k+Shu pra be sha ya aH dge ba'i ngang tshul de thos nas// sngon gyi las ngan skye ba dran// rang gi rgyan bkrol thogs nas ni// 'gro mgon nyid la ngo dma' zhing// kye ma kye hud thugs rje che// bdag 'dra rmongs pa 'du 'dzi can// dam tshig rtsa ba nyams pa'i skyon// ngan song mtho ris gnas na 'khod// mi 'chab mthol bshags me tog bzhes// dbang bskur lha yi gnas nas drongs// zhes gsol rang gi rgyan phul lo// de nas lag na rdo rje yis// nga rgyal phrag dog 'joms byed pa'i// pi wang lag tu thogs nas ni// dge ba'i ngang la dbang bskur nas// rig pa'i bden tshig 'di brjod do// swa/ longs spyod bdud kyi g.yengs 'joms pa'i// pi wang snyan pa'i don byed 'dis// de ba khyod la dbang bskur bas// skye ba gcig gis las rdzogs shog/a sarba ta thA ga ta bid+h+wan+sa khaD+ga ts+tshin+da ts+tshin+da hUM phaT/ swa rat+na satwa sa ma ya/ ma nu pA la ya/ rat+na satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+d+hi m+me pra yats+tsha/sarba karma su tsa me/ tsit+taM shre yaM ku ru hUM/ ha ha ha ha ho/ b+ha ga wAn/ sarba ta thA ga ta rat+na mA me muny+tsa/ rat+na b+ha wa ma hA sa ma ya/ rat+na satwa a/ swA rat+na a b+hi Shiny+tsa aH/ zhes dbang bskur bas/ lha gzhan rnams kyang dge ba la brtson 'grus dang ldan par gyur te/skye ba gcig pa sha stag du byung bar gyur to// dge ba'i ngang tshul lha yi 'pho ltung las dus der grol bar gyur to/ dbang mchog rgyal po'i rgyud las/ lha yi le'u ste nyi shu pa'o//// de nas las ngan sems can de// gling mchog 'dzam gling mi ru skyes// skye ba gcig pa'i byang chub sems// rig 'dzin gsang spyod rnal 'byor de// sngar byas las kun dran pa can// rig pa'i blau can sngon sbyangs stobs// 'gyod sems drag pos dka' thub spyod// 'phags pa bla ma mnyes par byed// gsang bdag phyag na rdo rjes kyang// ngan song sbyong ba'i rgyud dbang bskur// bum pa thabs shes gsang tshig gis// dbang mchog bsgrub pa de la bskur// 'gro ba'i skye sgo bcad pa'i phyir// rang rgyud sbyong ba'i sngags rjod pa// hUM bi sha mu tsa la tsan d+ha tsan d+ha hUM phaTaH de nas dam tshig nyams pa gso ba'i phyir// bshags pa'i rgyal po brgya pa brjod// yi dam lha ni gsal byas la// 'phro 'dus 'gyod sbyongs tshar bcad bya// rgyal ba zhi khro dpang gsol la// phyag 'tshal mos gus bshags pa bya// gsar sngags 'bru brgya'i bshags pa brjod/ hUM hUM badzra satwa sa ma ya/ ma nu pA la ya/ badzra satwa twe no pa tiSh+Tha/ dr-i D+ho me b+ha wa/ su toSh+yo me b+ha wa/ a nu rak+to me b+ha wa/ su poSh+yo me b+ha wa/ sarba sid+hi m+me pra yats+tsha/ sarba karma su tsa me/ tsit+taM shre yaM ku ru hUM/ ha ha ha ha ho/ b+ha ga wAn/ sarba ta thA ga ta/ badzra mA me muny+tsa/ badzri b+ha wa ma hA sa ma ya/ badzra satwa a/ hUM badzra a b+hi Shiny+tsa a:/ oM b+hud+d+ha a b+hi Shiny+tsa aH/ swA rat+na a b+hi Shiny+tsa aH/ AM pad+ma a b+hi Shiny+tsa aH hA karma a b+hi Shiny+tsa aH/ zhes phyag mtshan du/ rin po che'i par bu dang/ gseg shang dang/ rdo rje dang/ 'khor lo dang/ rin po che dang/ pad+ma dang/ rgya gram dang/ dril bu la sogs pas dbang bskur te/bden pa'i tshigs bcad 'di yang brjod/ hUM rin chen par bu'i bum pa na// rgyal ba zhi khro'i lha tshogs bzhugs// rigs kyi bu la dbang bskur bas// lha dbang lus la thob par shog/ hUM gseg shang drang srong sgra sgrogs 'di// thugs rtags zhi khro'i lha yi brda'// rigs kyi bu la dbang bskur ro// a ba d+hu tI'i dbang thob shog/ rdo rje 'khor lo rin po che// pad+ma rgya gram thugs kyi rtags// rigs kyi bu la dbang bskur bas// 'khor lo lnga la dbang rdzogs shog/ ces sngags ting 'dzin tshigs bcad kyis// rig 'dzin de la dbang bskur bas// lha dbang lus kyis thob par gyur// rang lus rgyal ba'i skur rdzogs kyang// mya ngan 'das pa'i don ma rtogs// rtog bcas lha yi dbang zhes bya// zhes gsungs so// dbang mchog rgyal po'i rgyud las/ lha dbang bskur ba'i le'u ste nyer gcig pa'o//// de nas rdo rje sems dpa' yis// blo ldan slob bu de la ni// thabs kyi dbang bskur brda' ru bstan// shes rab dbang bskur shes sam blta// gsang ba'i dbang bskur rang nyams bstan// tshig gi dbang bskur med par bstan// thabs kyi dbang bskur bstan pa ni// phyi nang snod bcud thams cad kyi// snang ba yod med brda' ru bstan// gcig las sna tshogs bsgyur byas pas// snang ba yod med bstan pa yin// lha tshogs bskur ba ming gis mtshon// ri rab gling bzhi dkyil 'khor dang// bum pa sku dang rdo rje dang// 'khor lo rin chen pad+ma dang// rgya gram ral gri rtse gsum dang// phur bu mda' dang gzhu dang ni// me longs dbyibs dang kha dog tu// bla mas ming btags de la ni// slob ma'i shes rab lta ba min// dpe yi don de shes na shes rab yin// gsang ba'i dbang bskur bstan pa ni// rang la rang gsal bstan pa yin// rang ngo shes na gsang dbang thob/ gcig pa shes na thams cad de// mnyam pa nyid ni ngo mtshar che// yod na yod par ye nas mnyam// med na med par ye nas mnyam// bden na bden par ye nas mnyam// rdzun na rdzun par ye nas mnyam// stong na stong par ye nas mnyam// dngos na dngos por ye nas mnyam// mnyam pa nyid du shes pa ni// gsang ba'i dbang bskur thob pa yin// tshig gi dbang bskur rang med bstan// nga bdag 'dug na nams kyang 'khor// dbang med ro dang bral ba ni// tshig gcig tshig med dbang gi mchog/ nga med bdag med snang ba med// ces gsungs so// rig 'dzin dge mthong dang/ 'khor 'dus pa mang po dang/ theg pa brgyad po'i las dang po pa rnams brgyal te/ sa la 'gyel bar gyur to// la la ngu zhing smre sngags 'don/ la la ni skrag cing sngangs par gyur nas skur pa 'debs/ la la ni mos pa log ste kha na ma tho ba smra/la la ni yi chad de byas pa la don med pa kye ma kye hud/ gsang bdag rdo rje ma gsung zhig/ ces gleng ngo// yid ma rang ba rnams ni mu stegs pa bden no// zhes rang rang smra'o// de nas lag na rdo rjes 'khor de dag la yid ches par bya ba'i phyir/ bos shing bsdus te 'di skad ces gsungs so// 'dus pa rnams the tshom bcad par bya'o// rdo rje sems dpa'i zhal dang sprod kyis longs shig/chos kyi sku dang mjal te 'ong ngo// zhes gsungs te/ 'khor rnams slar 'dus te rdo rje sems dpa'i drung du bskor ba dang/ phyag dang mchod pa'i tshogs kyis mchod de 'khod do// dbang mchog rgyal po'i rgyud las/ gsang ba'i chos nyid la yid ma ches pa'i le'u ste nyer gnyis pa'o//// de nas badzra pA Ni yis// rdo rje 'chang la 'di skad gsol// kye kye rdo rje sems dpa' mchog/gsang sngags gsang ba mnyam mi mnyam// nga bdag rang snang yod dam med// chos can dngos gcig bden nam rdzun// bag chags re dogs 'bral mi 'bral// zhes zhus pas// rdo rje sems dpas bka' stsal pa// stobs can rdo rje 'khor 'dus nyon// chos nyid chos sku'i dgongs tshad ni// mnyam pa nyid du mkhyen pa yin// mnyam pa nyid la gnyis med de// dper na chos can ngo bo gcig/ phyi rol ka ba bum pa dang// dper na rdo rje lta bu 'di// ming gis yin nam gzugs kyis yin// mtshon pas yin nam las kyis yin// 'dus pas yin nam 'bral bas yin// mdog gis yin nam dbyibs kyis yin// bsam pas yin nam gang gis yin// rdo rje 'dzin pa'i 'khor tshogs kun// ming gis rdo rje yin pas na// ming gi gang grags rdo rje 'am// gzugs kyis rdo rje yin pas na// gzugs su gang snang rdo rje'am// 'dus pas rdo rje yin pa na// sa rdo bong ba rdo rje'am// bral ba'i rdo rje yin pas na// 'dus byas thams cad rdo rje'am// mtshon pas rdo rje yin pas na// dpe bkod thams cad rdo rje'am// las kyis rdo rje yin pas na// sems can thams cad rdo rje'am// mdog gis rdo rje yin pas na// dkar dmar thams cad rdo rje'am// dbyibs kyis rdo rje yin pas na// zlum pa la sogs rdo rje'am// bsam pas rdo rje yin pas na// yid smon thams cad rdo rje'am// de ltar rgyu yis yin pa med// rdo rje bya ba gang la zer// nyon mongs rtogs pa skyes pa rnams// dper na chos can rdo rje 'di// ming gis yin no nges par 'jug/gzugs kyis yin no sgo nga ral// mtshon pas yin no chos can 'di// las kyis yin no chos bdun ldan// 'dus pas yin no 'bral ba yin// mdog gis yin no zhi rgyas kyis// dbyibs kyis yin no de bzhin no// bsam pas yin no de bzhin no// de ltar rgyu yis yin pa ste// snang srid thams cad rdo rje yin// rdo rjer ma gyur gang yang med// de ltar rdo rje mtshon pa 'di// yin na ye nas yin par mnyam// chos can ye nas yod par mnyam// med na med par ye nas mnyam// bden na bden par ye nas mnyam// rdzun na rdzun par ye nas mnyam// stong na stong par ye nas mnyam// dngos na dngos por ye nas mnyam// snang na snang bar ye nas mnyam// mnyam nyid mkha' 'dra gud na med// dper na gser gzugs chu yi ro// dug mchog ha la 'bar ba dang// sman mchog ga pur dkar po gnyis// sman dang dug tu ye nas mnyam// zhes gsungs so// dbang mchog rgyal po'i rgyud las/ chos nyid mnyam pa chos sku'i le'u ste nyer gsum pa'o//// de nas yang lag na rdo rjes 'di skad ces gsol to// kye kye rdo rje sems dpa' che// bdag snang log pa yod dam med// chos can snang ba bden nam rdzun// mi dge spang du yod dam med// ces zhus pas/ rdo rje sems dpas bka' stsal pa// nyon cig rdo rje 'dzin pa sogs// nga med ro dang phrol cig 'khor tshogs khyed// nga dang snang ba gnyis pa med// nga med nga gcig su la 'dug/ snang med snang ba su la bden// chos can dngos po gang na 'dug/ dge dang mi dge mnyam pa nyid// nga med bdag med nga bdag gang// su la nga bdag yod pa 'khor// gang zhig the tshom sus za ba// nga bdag ltos shig nga bdag ltos// btsal kyang 'dug na da rung tshol// tshol mkhan tshol bas tshol mkhan med// bltas kyang ma mthong lta mkhan med// lta mkhan ltos shig lta mkhan med// dper na chos can rdo rje de// de yi dngos po gang gis byed// bum pas byed dam pad+mas byed// steng rwas byed dam 'og rwas byed// 'dus pas byed dam rdo rje gang// de bzhin nga bdag dngos po de// lus kyis byed dam sems kyis byed// lus kyis byed na dngos po gang// mgo dang rkang lag dbang po dang// don rnying nang khrol sha lpags rus// rtsa dang ba spu skra sen gang// des na lus kyi dngos po med// sems kyis byed na gsal stong dang// 'gyu dran 'dzin chags gang gis byed// lus sems dngos po 'di zhes pa// rdo rje sems dpa' ngas ma rnyed// mtshon pa tsam du nga zhes bya// ming tsam 'di zhes bstan pa ni// kun tu bzang pos bstan du med// rdo rje sems dpa' mtshon du med// snang ba med dam snang ba gang// snang ba yul gcig su la bden// yul du bden rdzun gcig la ltos// dper na 'byung ba chu lta bur// 'gro drug mu stegs rtag chad dang// rim dgu mthong snang tha dad pas// ming du bden pa gcig kyang med// dper na rgya bod zhang zhung 'dra// ming tsam 'di zhes bstan pa ni// rdo rje sems dpas mtshon du med// snang ba yod med 'khrul ma 'khrul// 'khrul na 'khrul pa bden nam rdzun// 'khrul pa bden na su la bden// 'khrul pa rdzun na de lta med// ma 'khrul pa la snang zer su// zer na zer mkhan 'khrul pa yin// des na chos can dngos po med// yod na dngos po gtan la phob// gtan la phebs na dngos po gang// dngos por 'dod pa blo phugs can// blo phugs gang ltar byas kyang 'khrul// blo phugs gtib dang skal ldan bu// dge dang sdig pa ye nas mnyam// ci phyir blo phugs grol phyir ro// blo bzang dge bas gtong du med// sdig pas gnod pa bskyal ba med// ci ste mtshan ma med pas smon pa med// stong pa nyid la phan gnod med// bag chags bzang rtog ngan rtog yin// rtog pas nams kyang 'khor ba byed// 'khor ba'i nang na khyad par che// dge ba spyod cig rigs kyi bu// bag chags ro dang bral bar gyis// bag chags ro dang ma bral na// 'khor ba'i gzung thag mi chod do// skye ba'i rten phur phyung re kan// zhes gsungs so// dbang mchog rgyal po'i rgyud las/ rtog pa the tshom gyi gegs bsal ba chos sku zhal mthong gis le'u ste nyer bzhi pa'o/// de nas yang bka' stsal pa/ nyon cig rdo rje 'dzin pa'i 'khor// dper na snang ba sna tshogs kyang// sgyu ma'i cho 'phrul ji bzhin no// sgyu ma'i dngos po gang gi byed// sgyu ma'i rten 'brel ci yis byed// dper na skyes bu gnyid log na// rmi lam dge sdig cho 'phrul ni// dngos por snang ba ji bzhin rmi// nyin par bag chags mtshon pa la// de la dngos po yod dam med// dper na mdang gis rmi lam na// skyes bu mtshon thogs mang po yis// bdag gsod 'thab mkhon ri la ded// bred sngangs ngal chad shi med bros// sad par gyur na de cir snang// de bzhin snang ba'i dngos po 'di// ri rab gling bzhi 'byung ba kun// dgra gnyen chags sdang sdug bsngal kun// sgyu ma rmi lam ji bzhin no// yod nas mi snang med nas snang// mthong snang chos kun yod pa med// med la yod gzugs 'khrul pa yin// 'khrul pa'i dus na yod pa med// kun rdzob tsam du su la bden// bden nam bden na 'gro ba kun// thams cad ma lus mthun par rigs// des na phyogs mthun tsam yang med// dper ba dngos po chu lta bu// rigs drug rtag chad theg pa rnams// phyogs mthun tsam yang mi snang phyir// des na med nas snang ba yin// zhes gsungs so// dbang mchog rgyal po'i rgyud las/ snang ba'i gnad bsal ba'i le'u ste nyer lnga pa'o//// de nas lag na rdo rje yis// ston pa nyid la 'di skad gsol// kye kye ston pa rdo rje 'chang// med nas snang ba'i dpe don gang lags/ bka' stsal pa/ nyon cig 'dus pa'i 'khor tshogs khyed// 'khrul pa snang ba sna tshogs 'di// yod nas mi snang med nas snang// dper na sgyu ma'i dpe brgyad 'dra// skyes bu gnyid log rmi lam na// bu dang chung ma nor phyugs ldan// shin tu longs spyod skyid ldan la// go mtshon dmag mang dag gis ni// bu bsad nor bcom sdug bsngal rmi// skyes bu de yis rmi lam de// yod nas snang ngam med nas snang// sad par gyur na ci snyam sems// 'khrul pa'i chos de yod dam med// de bzhin da lta'i 'khrul snang yang// yod nas snang ngam med nas snang// rmi lam tshul du kri le mnyam// rmi lam chos de bden nam rdzun// bden na bden par kri le mnyam// rdzun na rdzun par kri le mnyam// de bzhin sgyu ma'i mkhan po yis// sgyu ma'i skyes pa bud med dang// khang khyim rol mo gcan gzan kun// yod nas snang ngam med nas snang// sgyu ma shes pas sgyu ma med// sgyu ma bden rdzun sgyu mar shes// de bzhin 'khrul pa'i dngos po 'di// 'khrul pa bden rdzun 'khrul pas shes// sgyu ma'i chos dang kri le mnyam// de bzhin smig rgyu chur snang ba// yod nas mi snang med nas snang// dngos po'i chu yang de bzhin no// smig rgyu nyid dang kri le mnyam// cis te bden pa med pa'i phyir// de bzhin mig skyon mig yor kyang// yod nas mi snang med nas snang// skra lo bal 'dab khab tsam kun// yod nas mi snang med snang phyir// kun rdzob dngos dang kri ler mnyam// dngos po 'khrul pa bden pa med// de bzhin sprul pa'i sprul pa yang// yod nas mi sprul med nas sprul// sprul pa yin pas yod pa med// de bzhin 'khrul pa'i las rnams kyang// sprul pa nyid dang kri le mnyam// ci phyir 'khrul pa zer bas chog/de bzhin gzugs brnyan chu zla 'dra// krong nge 'dug kyang snang ba med// yod na snang ba mthun no cog/ snang ba gcig la mthun pa med// gzugs brnyan nyid dang kri le mnyam// de ltar sgra brnyan lta bu de// yod nas ma btags med nas btags// yod na ming btags gcig par rigs// gcig la ming mang don mthun med// sgra brnyan nyid dang kri le mnyam// des na brag cha nyid dang khyad par med// yod nas mi snang med nas snang// dper na dri za'i grong 'khyer 'dra// krong nge 'dug pa'i dus na med// snang ba rang gis med pa yin// med na sems kyi cho 'phrul ltos// sgyu ma'i chos nyid mthong na lta ba yin// mthong med mthong na yin pa med// lta ba yin pa med pa yin// zhes gsungs so// dbang mchog rgyal po'i rgyud las/ sgyu ma dang chos mthun gyis snang ba med par thag bcad pa'i lta ba bstan pa'i le'u ste nyer drug pa'o//// de nas yang bka' stsal pa/ rdo rje 'dzin pa'i 'khor 'dus nyon// mthong ngam mthong na mthong bas ltos// mthong ba med na ci zhig bsgom// dper na dmus long 'ga' dag gis// glang chen rtsal ldan lag noms nas// sna dang mjug ma rkang lag rgyab// rang rang gang reg bsgom pa 'dra// bsgom pas glang chen ring du spangs// lta ba'i gnas lugs ma rtogs par// sgom pa byed pa'i blun po rnams// dmus long glang chen bsgom pa 'dra// de bas mkhas pas legs par ltos// rmi lam ltos shig mthong ba na// rmi lam shes nas rmi lam bsgom// rmi lam goms pa bsgom pa yin// sgyu ma mthong na sgyu ma bsgom// sgyu ma'i gzugs dang sgyu ma'i sgra// sgyu ma'i dri dang sgyu ma'i ro// sgyu ma'i reg dang sgyu ma'i chos// sgyu ma legs par mthong ba na// sgyu ma 'dris pa bsgom pa yin// bsgom par gyis shig sgyu ma las// sgyu mar spyod shig sgyu ma yin// sgyu ma 'bras med 'bras bu yin// de bzhin rmi lam smig rgyu rnams// de ltar mkhas pas legs par ltos// mthong ngam mthong na lta ba yin// de dag goms na sgom pa'o// gnyis med spyad na spyod pa yin// 'du 'bral med pa 'bras bu'o// zhes gsungs so// de nas rig 'dzin dge mthong des// sangs rgyas rdo rje sems dpa' dang// mgon po rdo rje 'dzin pa la// 'dzum pa'i mdangs phyung gus btud nas// rgyal ba'i tshogs la 'di skad gsol// drug gi dkyil 'khor gnyis 'dus lhar// bdag 'dra ma rig rtog pa yis// yang dag nyid la log bltas nas// rtsa ba'i dam tshig nyams pa'i tshogs// mi 'chab mi sbed mthol lo bshags// slan chad bsdam mo dpang mdzod cing// snga rabs gong du ci bgyis pa// lus ngag yid kyi 'bad rtsol gyis// pha rol phyin drug nyams blangs nas// 'gyod tshangs dpang gsol zhi khro'i lhar// lus ngag yid gsum mos phyag bshags// byin rlabs sngags mchog brgya pa ni// bdun gsum nyi shu rtsa gcig gam// brgya rtsa brgyad du bshags pa bya// smre 'gyod mthol ba gdung ba'i tshig/ brkyang phyag gus phyag tshig gis bshags// sems bskyed la brtson 'gro ba'i don// smon lam bkra shis dge bas bshags// thams cad yul med ming bral mthong// rtog pa mnyam nyid lta bas bshags// e ma bdag gi phung po khams dang skye mched rnams// 'dod pa'i yon tan lngar bsgyur te// phyi nang gsang ba'i mchod par bzhes// ba spu rdul phran re res kyang// 'gro ba'i don rnams byed par shog/ ces gsol nas/ phyi nang gsang ba gsum gyi mchod pa phul lo// dbang mchog rgyal po'i rgyud las/ sgyu ma bshags mchod smon lam gyi le'u ste nyer bdun pa'o//// de nas 'khor de dag gis/ rdo rje sems dpa' mgon po lags// rgyud chen 'di yi dpe mtshon ci// gang gi dus su dar bar bgyi// zhes zhus so// rdo rje sems dpas bka' stsal pa// nyon cig badzra pA Ni sogs// nga yi rgyud chen rgyal po ni// dper na nyi ma mun pa 'dra// mun khung sgrol ba'i rgyud du zung// dper na nad dang sman lta bu// sman mchog rgyal po'i rgyud du zung// dper na rtsi shing me lta bu// bskal pa'i me chen rgyud du zung// dper na dmangs dang rgyal po 'dra// dbang mchog rgyal po'i rgyud du zung// dam pa rigs brgya'i lha gsal bas// gsang chen rigs brgya'i rgyud du zung// de nyid rigs lnga'i lhar bsdus nas// yi ge brgya pa'i sngags brjod pas// yi ge brgya pa'i rgyud du zung// nyams chag thams cad 'dis bskang bas// bshags pa chen po'i rgyud du zung// 'gro drug gnas nas 'dis 'dren pas// 'khor ba dong sprugs rgyud du zung// thams cad sgyu mar la zla bas// sgyu ma mnyam nyid rgyud du zung// snang srid lha dang dkyil 'khor dang// bsnyen bsgrub bskyed rdzogs dam tshig sngags// phyag rgya dbang dang dam tshig dang// 'khor 'das thams cad bltas pas mthong// lta ba dbang mchog rgyud du zung// mthong nas bsgom du med pas na// sgom pa dbang mchog rgyud du zung// ci yang spyad du med pas na// spyod pa rgyal po'i rgyud du zung// mthong bas 'du 'bral med mthong bas// 'bras bu dbang mchog rgyud du zung// nyams grib thams cad 'dis dag pas// dam tshig khrus lung rgyud du zung// 'khor tshogs 'dus pa khyed rnams kyis// dbang mchog rgyal po'i rgyud 'di ni// dus ngan tha ma'i dus dag tu// sngags pas dam tshig mi bsrung bas// las kyi 'bras bu ngan song 'khor// zang zing nor gyis mig brid nas// na raka gnas su 'khor byed pa// de dus nga yi rgyud 'di 'byung// dper na nor bu rin chen 'dra// dbul dang nad dang 'jigs pa med// thar pa'i lam skal byed par nges// dper na mkha' la nyi shar nas// mun pa'i smag nyid gsal ba'i rkyen// nyi zla lta bur don byed nges// dper na me dang shing lta bu// shing nyid me yi grogs su nges// kye ho/ nam mkha'i dbyings na 'byung ba gnas// sa chu me rlung gang yang snang// thams cad nam mkha'i ngang du thim// zhes gsungs nas ston pa nyid mi snang bar gyur to// de nas rig 'dzin gyi rgyal po dge mthong la sogs pa 'khor rnams kyis mngon par bstod de rjes su yi rang ngo// sprul pa rnams ni mngon par bsdus te/ rgyud 'di rdo rje sprul sku pad+ma byung gnas la gtad do/ yi ge brgya pa dbang mchog rgyal po'i rgyud las/ rgyud kyi mtshon dpe dang yongs su gtad pa'i le'u ste nyer brgyad pa'o//// le'u'i grangs ni nyi shu brgyad// dbu zhabs don ni gsum du 'dus// yang dag don gyi man ngag 'di// sgyu ma mnyam pa nyid la blta/ u rgyan gyi mkhan po pad+ma byung gnas dang/ bod kyi lots+tsha ba nam mkha'i snying pos bsgyur ba'o/

CLOSE WINDOW