CLOSE WINDOW

Gpb001.005
བོད་ཡིག

rin po che'i gter du sbas so// ga rgyal po'i don du bsgyur ba'o// gtad rgya/ sbas rgya// // rgya gar skad du/ dr-iSh+ti ma hA ni ya ma rat+na dI pa mU la tan+t+ra/ bod skad du/ lta ba la shan chen po rin chen sgron ma rtsa ba'i rgyud/ming med mtha' las 'das pa'i gsang bdag chen po la phyags tshal lo// 'di skad bdag gis thos pa'i dus gcig na/ ma byung ma skyes mnyam pa chen po/ chos dbyings rgya chad phyogs lhung med pa/rang bzhin gyi ming las 'das pa'i gnas nas/ snying po rang byung blo las 'das pa'i ston pa gsang bdag chen po la/ rang gi bzhin gyi 'khor rnam pa gsum gyis bskor nas/ thog bar tha gsum gyi phyogs ris dang bral ba'i dus su/snang tshul thams cad blo 'das su ston pa/ ming med mtha' grol gyi bstan pa 'di bkod do// de'i tshe 'khor gyi nang nas rang gsal sems dpal rdo rjes ston pa la zhus pa/ e ma ston pa gsang ba'i bdag po che// ming med mtha' grol blo 'das rang ngo 'di// ma rtogs gnyis 'dzin grub mthas bcings pa rnams// blos btags mthar 'dzin rang sar grol ba'i phyir// rgyu dang 'bras bu'i chos rnams la bzla ba'i// khyad 'phags don kyi rang bzhin yang tig gang// de yis 'dzin pa'i mtha' rnams ji ltar grol// zhes zhus so// blta ba la shan chen po rin chen sgron ma rtsa ba'i rgyud las// gleng gzhi'i le'u ste dang po'o//// de nas ston pa gsang ba'i bdag po de// chos thams cad dbyings las shar te dbyings su rang sar grol ba zhes bya ba'i ting nge 'dzin la snyoms par zhugs so// de la rang gsal sems dpa' rdo rjes zhus pa/ma byung ma skyes thog ma'i sngon rol na// ming med don gyi dngos gzhi ji lta bu// zhes zhus pas/ gsang bdag ston pa chen po des ting nge 'dzin de las bzhengs te bka' stsal pa// ma byung ma skyes thog ma'i sngon rol nas// sems nyid gting yangs don gyi gnas lugs ni// ming med shes med rtog med kun 'byung mdzod// mtha' stongs snying po don gyi rang bzhin la// ma rig ye shes 'khrul dang ma 'khrul med// stong las kun 'byung 'khrul rtog sna tshogs dang// byung sar rang grol rang snang ye shes yin// snying po gzhi yi ngang du dbye bsal med// ngo bo kun bral thog mtha' dge sdig dang// mtha' dbus phyogs ris blang dor ming yang med// ji bzhin cang med dbyings las ma g.yos kyang// 'on kyang rang bzhin ji ltar gsal bar snang// chos kun rtsa ba dngos med byang chub sems// med las mi zad 'byung ba'i mdzod chen po// rang bzhin ye nas ma bcos gting mtha' yas// ngo bo ci yang ma yin blo las 'das// mtshan nyid tha dad bsam yas cir yang snang// gnas lugs gting yangs don gyi ngo bo la// chos can chos nyid mi phyed mnyam pa nyid// bden rdzun 'khrul mtha' rang grol zhe 'dod med// gsal dag zang thal rin chen sgron ma 'di// ngo bo cir yang ma grub nam mkha' bzhin// rgyu las ma byung nam yang skye mi 'gyur// sangs rgyas sems can dbyer med ngo bo gcig/ gcig po bstan du med pa'i snying po ngo bo nyid// snang stong rtag dang chad pa'i mtha' las grol// spang bya gnyen po blang dor dmigs 'dzin bral// rigs drug sems can 'khrul pa'i rtog pa dang// dus gsum rgyal ba'i ye shes dgongs pa gnyis// snying po ming med don gyi ngo bo mnyam// mnyam dang mi mnyam nyid kyang mtshon brjod med// mtshon brjod yod med nyid kyang gting mtha' grol// ma byung ma skyes rang bzhin bar do na// sems nyid ngo bo mkha' dang 'ja' ltar gnas// ji bzhin ma bslad snying po kun gyi gzhi// ma phyed mi phyed 'gro 'ong med pa'i gnas// shes 'gyu myong rig med pa'i dngos gzhi can// ma byung ma btsal dmigs med dngos po med// byar med chags pa med pa bde ba'i ngang// 'gyur med rang gnas klong yangs tshig las 'das// zhes gsungs so// rin chen sgron ma rtsa ba'i rgyud las/ gnas lugs gtan la phab pa'i le'u ste gnyisapa'o//// de nas rang gsal sems dpa' rdo rje des/ blo 'das gsang bdag ston pa la zhus pa// gnas lugs rang bzhin de ltar gnas pa la// 'gro drug sems can 'di dag ji ltar 'khrul// 'khrul pa'i ngo bo gang yin 'khrul tshul gang// de yi nyes pa gang lags bka' stsol cig/ ces zhus pas/gsang bdag don gyi ston pas bka' stsal pa// gnas lugs mnyam pa'i ngang las 'khrul tshul ni// stong pa'i ngang las 'gyu ba rlung g.yos pas// de las rig pa rang sar shar ba las// yin nam ma yin snyam pa yid du myongs// snyams byed 'dod pas sems su gsal bar 'gyus// gsal ba kha dog lnga ru snang ba la// 'od kyi dngos po de yis rkyen byas nas// med las yod byung rigs drug sems can rnams// snying po ming med rang ngo ma shes 'khrul// dper na dmus long mdun na gzugs snang 'dra// med par yod snang dung la ser po bzhin// kun gzhi'i rnam par shes pas gzhi byas nas// tshogs bdun shes pa'i rtsal gyis rang ma shes// dper na rgan mo long ba'i mig dang 'dra// rtsal dang rang ngo rang gis ma shes pas// gzhi la 'khrul dus lhan cig skyes pa las// lhan cig skyes pa'i ma rig pa zhes bya// de nas nga bdag gzung 'dzin phyi nang zung// shing gi srin bzhin khams gsum sdug bsngal myangs// rang ngo rang gi ma shes bsgribs pas byung// rang las gzhan du btsal pas gol bar lhung// rtsol bsgrub gnyis 'dzin rgyas pas 'khrul pa brtas// rnam rtog btags chags gzugs gzhan gol ba dang// gdeng med tshig la 'byams pas gol ba dang// grub mtha'i lta ba bzung bas gol ba dang// spangs blangs spyod pa byas pas gol ba dang// bsgom chags nyams la zhen pas gol ba dang// blos byas 'bras bu bsgrubs pas gol ba yis// snying po ming med mtha' stong rtogs pa min// 'jig rten rgyu 'bras rtsol ba mthar 'byin pas// yang dag snying po ming med rgyang du 'phar// cang med cir yang snang ba'i rkyen byas nas// rang rang 'dod pa'i don la zhen pa yis// yang dag don las 'khrul pas rtogs par bzung// kun tu brtags pa'i ma rig pa zhes bya// log rtogs khams gsum sems can thams cad ni// dus gsum gnyis 'dzin nad kyis rab gzir nas// yun ring 'khor ba'i gnas su sdug bsngal myangs// zhes gsungs so// rin chen sgron ma rtsa ba'i rgyud las/ sems can gyi 'khrul tshul bstan pa'i le'u ste gsum pa'o//// de nas rang gsal sems dpa' rdo rje des// blo 'das gsang bdag ston pa la zhus pa// de ltar ma rig 'khor ba'i sems can rnams// 'khrul tshul 'khor ba'i nyes pa de ltar na// yang dag sangs rgyas ngo bo 'byung tshul gang// zhes gsol pas/ blo 'das gsang bdag ston pas bka' stsal pa// ma byung ma skyes thog ma'i sngon rol na// ming med mnyam nyid phyogs lhung med pa las// rtsal gyi yan lag rtogs pa'i zer 'phros kyang// 'phro sa ma rnyed gzhi yi klong du thim// gzhi nyid ngo shes rtog pa'i gdangs ldan pas// sngon thog gzhi yi sangs rgyas zhes bya'o// dper na ga pur gzhi la gnyis med kyang// tsha grang rkyen gyi sman dug gnyis su snang// grang ba'i dug tu ngo shes za mi srid// de bzhin gzhi yi ngang las kun 'byung bas// rtogs ma rtogs kyis 'khor 'das gnyis snang yang// ma rtogs 'khor ba rtogs pas gzhi shes nas// rtogs pa'i gdengs ldan 'khor bar 'khrul mi srid// des na spyi gzhi rgya chad med na yang// de nyid ngo shes sangs rgyas zhes bya ste// ma bu dbyer med ye sangs rgyas pa'o// de las snang ba gsum gyi dkyil 'khor nas// rtsal zer bstan pa gsum gyi skur snang bas// 'dod pa'i 'bras bu 'char gzhi 'di bstan to// gsal byed ming med rin chen sgron ma 'di// snang tshul sku gsum 'gro ba kun don du// 'dzad pa med pa'i thugs rje chen por snang// zhes gsungs so// rin chen sgron ma rtsa ba'i rgyud las/sangs rgyas kyi 'byung tshul gtan la 'bebs pa'i le'u ste bzhi pa'o//// de nas sems dpa' rdo rjes yang zhus pa// sku gsum rgyu dang rang bzhin mtshan nyid dang// gzhi dang gnas dang gdul bya'i zhing khams dang// bstan pa gsung tshul brgyud pa dgos ched gang// zhes zhus pas/ blo 'das gsang bdag ston pas bka' stsal pa// chos sku'i rgyu ni kun gzhi'i rnam shes te// longs sku yid kyi rnam par shes las byung// sprul sku sgo lnga'i rnam shes de las so// chos sku'i rang bzhin snying po skye ba med// longs sku'i rang bzhin 'gag med g.yo ba med// sprul sku gnyis med rgyun par bzhugs pa'o// chos sku'i mtshan nyid nam mkha' lta bu la// longs sku sprul sku 'ja' mtshon chu zla 'dra// chos sku'i gnas ni dbyings nyid rnam par dag/ longs sku 'og min sprul sku 'dzam gling kun// chos sku'i gzhi ni stong nyid ye shes la// longs sku'i gzhi ni mnyam nyid ye shes te// so sor rtog dang nan tan sprul sku'i gzhi// chos sku'i gdul bya sku gsung thugs sprul la// rang rgyud 'brel pa'i 'khor rnams 'dul bar byed// longs sku'i gdul bya phyi nang gsang gsum la// don gyis gcig pa'i 'khor rnams 'dul bar byed// sprul sku phyi 'khor nang 'khor gsum las ni// 'dod pas 'dus pa'i 'khor rnams 'dul bar byed// chos sku'i zhing khams nam mkha'i mthas gtugs pa// longs sku'i zhing khams 'og min gnas thams cad// 'dzam gling bye ba phrag brgyar sprul sku'o// chos sku'i bstan pa bskyed rdzogs rnam gsum ste// longs sku'i bstan pa phyi rgyud sde gsum yin// sprul sku'i bstan pa mtshan nyid rnam gsum mo// chos skus byin rlabs longs sku'i ngo bos bshad// sprul skus tshig gi sdebs kyis 'chad par byed// chos skus dgongs pa longs sku'i rig pas brgyud// sprul skus rna ba nas ni rna bar ro// ston pa sku gsum bstan pa'i dgos pa ni// gdul bya dbang po rab 'bring gsum 'dul ba'o// zhes gsungs so// rin chen sgron ma rtsa ba'i rgyud las/ sku gsum gtan la 'bebs pa'i le'u ste lnga pa'o//// rang gsal rdo rje sems dpas yang zhus pa// ming med mtha' 'das ston pa gsang ba'i bdag/ yang ti la shan rin chen sgron ma 'di// sku gsum bstan pa gsum gyis gsungs ma gsungs// gsung na theg pa'i chos dang khyad par gang// ma gsungs ston pas bstan pa gang ci zhig/ ces zhus pa dang/ blo 'das gsang bdag ston pas bka' stsal pa// ma g.yos mnyam nyid ming med blo 'das las/ kun 'byung rim brgyud 'khor lo gsum rim gyis// gsal ba'i rnam pa gcig tu shar nas ni// gsal ba'i 'od las kha dog rnam pa lnga// med las yod par bzung bas rigs drug byung// mi zad gter mdzod kun 'byung rin po che// sku yi klong nas rang bzhin snang ba gsum// ston pa rnam gsum ngo bor shar nas ni// mos pa tha dad thugs rjes drang ba'i phyir// thabs kyi bye brag tha dad bsam yas pa// rgyu 'bras rim dgus bsdus pa'i chos rnams ni// snang tshul ston pa sku gsum rang byung nas// snying po rtogs par byed pa'i thabs su bstan// ming med blo 'das grub pa'i mtha' brlag pa'i// snying po nges don bla med yang ti 'di// sku gsum ston pa'i bstan pa ma yin te// blo chos mtshan mas grol bar mi ston pas// chos 'das la bzla chen por nga yis bshad// sku gsum ston pa'i bstan par bcas pa can// ming med gting mtha' yas la mu mtha' grol// grub mtha'i 'dod pa grol bas khyad par 'phags// dgag bsgrub gnyis 'dzin mtha' stong ngo mtshar che// mtshon brjod blo yi yul du ma gyur kyang// tshig gi sgron mas blo ldan rnams la bstan// ces gsungs so// rin chen sgron ma rtsa ba'i rgyud las/ chos dang theg pa las 'das par la bzla ba'i le'u ste drug pa'o//// de nas rang gsal rdo rje sems dpa' des// gsang ba don gyi ston pa la zhus pa// theg pa'i chos rnams la bzla shan dbye'i phyir// kun brtags rim dgu'i 'dod pa ji lta bu// de las yang ti khyad par gang gis 'phags// zhes zhus pas/ blo 'das ston pas 'khor la bka' stsal pa// theg pa rnams kyi 'dod pa du ma rnams// blo yi spros pas bcad phyir bstan par bya// nyan thos rang rgyal byang chub sems dpa' gsum// bden bzhi rten 'brel bden gnyis sgo nas 'jug/ kri ya u pa ya dang yo ga gsum// dag pa gsum dang phyag rgya bzhi nas 'jug/ nang pa bskyed rdzogs gsum gyi 'jug sgo ni// ting 'dzin dbyings dang ye shes bka' tshogs bzhi// de ltar theg pa'i rim pa 'dod pa ltar// ched du 'jug pa'i ming med mu mtha' stongs// 'jug sgo mi dmigs ming med mu mtha' stongs// de ltar gnyis ka ming med mu mtha' stongs// gnyis med nyid kyang ming med mu mtha' stongs// nyan thos rang rgyal nyis brgya lnga bcu bsrung// byang chub sems dpa'i sdom pa nyi shu ste// kri yas rtsa ba yan lag nyis sdom brgyad// yo gas rtsa ba yan lag nyis sdom bcu// rnal 'byor chen pos nyis sdom nyi shu brgyad// a nus dmigs pa bzhi yi dam tshig bsrung// a tis don gyi dam tshig rnam bzhi bsrung// de ltar rim par bstan pa thams cad ni// bsrung bya srung byed bdag 'dzin ma logs pas// bsrung nyams rtog pa'i nad kyis tshig par 'gyur// yang ti rgyud chen rin chen sgron ma 'di// de lta bsrung ba ched du mi 'geg ste// ched du bsrung ba bsgrub pa mi byed pas// dgag bsgrub gnyis med mtha' stong snying po la// gnyis med nyid kyang ming med mu mtha' stongs// spyod pa nyan thos rang rgyal byang sems gsum// yon tan bcu gnyis rdzu 'phrul ya ma zung// pha rol phyin drug gzhan gyi don du spyod// kri ya u pa ya dang yo ga gsum// gtsang sbra phrin las bzhi dang cho 'phrul bzhi// ma hA a nu a ti nang pa gsum// sbyor sgrol rdzogs longs ma bcos ngang la spyod// de ltar rim par spyod pa'i rnam grangs rnams// ma rtogs blo can drang ba'i don du bstan// ming med ma rtogs ji ltar spyad kyang 'ching// rtsol bsgrub blang dor nad kyis rang tshi chad// yang ti la shan rin chen sgrol ma 'di// de ltar spyod pa'i ming med mu mtha' stongs// spyod pa 'gag pa'i ming med mu mtha' stongs// dgag bsgrub gnyis ka'i ming med mu mtha' stongs// gnyis med nyid kyang ming med mu mtha' stongs// sgom pa nyan thos rang rgyal byang sems gsum// keng rus tshol ba'i dbang po'i sgo 'gegs pa// rten 'brel lugs 'byung lugs las bzlog pa dang// mnyam gzhag rjes thob rtog bcas rtog med bsgom// gsang sngags phyi pa kri u yo ga gsum// yan lag bcu gcig byang chub lnga rim gyis// rigs gsum rigs bzhi rigs lnga'i dkyil 'khor bsgom// nang pa ma hA a nu a ti gsum// ma hAs phung po khams dang skye mched rnams// lha dang lha mo'i dal du sgom par byed// a nus cho ga yan lag rnam gsum gyis// dam tshig ye shes gnyis med sgom par byed// a tis bsgom du yod med rnam pa gnyis// bsgom yod 'gro ba gsum gyi lam bsdoms shing// skyon can rnam pa gsum gyi 'phrang bsal nas// dran rtog kun bral lta ba'i ngang la 'jog/ bsgom med 'khor 'das gnyis med chos rnams kun// rang byung ye shes chos nyid rang yin pas// de la bsgom bya sgom byed gnyis med do// ci yang bsgom du med par rdzogs par 'dod// snying po nges don bla med yang ti 'dir// gnyis 'dzin blos byas bsgom pa ngas ma bstan// bsgom yod bsgom med gang yang blo rtog ste// bsgom pa'i ming du btags pas bcings pa yin// cang med ma yin klong du cir snang gi/ yan lag bu dang chos nyid ngo sprod da// 'gyu med ngang du rang nyid rang thim pas// ma bsgoms dran bsam skye med snying po'i don// gang yang rang grol 'dzin bral ngo bo nyid// chags bral mu med gting yangs snying po 'di// rtsol bsgrub gnyis 'dzin blo yis rtogs mi 'gyur// shes med gsal ba'i ngo bor 'khrul snang dag/ yid gnyis mtha' stong brjod med gsung gis ni// blo 'das gting yangs gsang bdag dgongs pa ston// snying po mtha' stongs rin chen sgron ma 'dir// bsgom yod bsgom med mi 'dod mu mtha' stongs// gnyis ka ched du mi 'gag mu mtha' stongs// dgag bsgrub gnyis med mi bsgrub mu mtha' stongs// stongs dang mi stongs ming med mu mtha' stongs// lta ba theg pa chung ngu nyan thos pas// phyi yi yul dang sems nyid snang ba la// sems ni bdag med yul ni phra rags rdul// rang rgyal yul gyi rgyu ni snang ba la// sems ni rnam par rig byed ma yin no// sems tsam yul gyi rnam pa sems yin zhing// sems kyi ngo bo rang rig rang gsal 'dod// yul gyi rnam pa cir snang brdzun pa la// sems ni rig pa'i ngo bo bden par 'dod// dbu mas bden pa gnyis su phye nas ni// yul ni kun rdzob 'khrul pa'i snang ba la// sems ni don dam spros dang bral bar blta// kri yas kun rdzob snang ba rigs gsum lha// don dam dag pa'i chos nyid du blta'o// u pas rigs bzhi dal dang skye 'gag med// yo gas rigs lnga skye 'gag gnyis med lta// ma hAs snang stong thabs shes gnyis med la// a nus rgyu 'bras dbyings dang ye shes lta// a tis ka dag lhun grub nges med lta// ming med gting mtha' yas pa'i ngo bo la// de ltar lta bar ming du btags pas nor// lta ba ma skyes lta ba ma 'gags te// lta ba gnyis med lta ba rang sar grol// nga yi yang ti rin chen sgron ma 'dir// theg dgu'i lta ba mi bsgrub mu mtha' stongs// lta ba ched du mi 'geg mu mtha' stongs// dgag bsgrub gnyis su ming med mu mtha' stongs// gnyis med mtha' grol ming med mu mtha' stongs// 'bras bu mtshan nyid sde gsum theg pa yis// dgra bcom bse ru sku gzhi thob par 'dod// phyi pa'i sngags kyis longs sku zhi ba'i sku// ma hAs sku lnga ye shes lnga bsgrub cing// a nu dbyings gcig ye shes gcig bsgrub dang// a tis sku gcig ye shes gcig tu bsgrub// de ltar blos btags theg pa'i rim pa yi// thob bya 'thob byed rang sar dag pa yis// thig le spyi brdol gting mtha' ma rtogs pas// 'bras bu sangs rgyas ming du btags pas phung// bsgrub bya sgrub byed gnyis 'dzin skyes pas rlags// yang ti la shan rin chen sgron ma 'dir// 'khor 'das blang dor ma grub mu mtha' stongs// blang dor gnyis po mi 'geg mu mtha' stongs// blang dor gnyis med mi 'dod mu mtha' stongs// blang dor gnyis med mi 'gog mu mtha' stongs// de ltar snang srid 'khor 'das chos rnams la// ched du bsgrub dang ched du 'gegs pa dang// dgag bsgrub gnyis ka gnyis med gang gi yang// ming med mu mtha' stongs pa gnas kyi rdzong// gnyis 'dzin mtshan ma'i chos la bskor bar gyis// rim dgu blos btags theg pa'i rim pa las// ngo bo nyid kyis 'phags pa ngo mtshar che// zhes gsungs so// rin chen sgron ma rtsa ba'i rgyud las/ theg pa'i rim pa las khyad par 'phags pa'i rdzong bca' ba'i le'u ste bdun pa'o//// de nas rang gsal sems dpa' rdo rje des// blo 'das gsang bdag ston pa la zhus pa// rgyud ces bya ba'i rang bzhin ji lta bu// rin chen sgron ma 'di nyid gang gi rgyud// de yis dgos pa ji zhig sgrub par byed// ces zhus pas// gsang bdag ston pas 'khor la bka' stsal pa// rgyud ni dngos po lnga dang ldang tshad brgyad// nges tshig dgongs pa'i gzhi dang dbye ba'i don// mthun pa'i dpe dang dgos pa'i gzhi bstan pa'o// dngos po lnga ni ngo bo nges tshig dang// dbye ba phan yon dgos pa dang lnga'o// ldang tshad dbang dang dam tshig 'brel pa dang// thabs dang shes rab lta ba spyod pa dang// 'bras bu mchog dang thun mong 'brel pa'o// 'brel dang ma tshang med pas rgyud ces bya// gdul dka' zab cing rgya ches 'dul bar dgongs// dbye na tshig dang don dang gnyis med rgyud// mthun dpe za 'og gur khyim thags dang 'dra// dgos pa'i gzhi ni myur du don sgrub byed// de yang yangs dang gsal dang zab pa dang// dgos 'byung thams cad yongs rdzogs rgyud lnga las// nga yi yang ti rin chen sgron ma 'di// thams cad yongs rdzogs rgya chad med pa'i rgyud// 'di yi dgos pa theg pa rim dgu yi/kun brtags mthar 'dzin thams cad sel bar byed// ming med mtha' stongs chen por yongs su grol// zhes gsungs so// rin chen sgron ma rtsa ba'i rgyud las/ rgyud kyi don gtan la phab pa'i le'u ste brgyad pa'o//// de nas rang gsal sems dpa' rdo rje des// blo 'das gsang bdag ston pa la zhus pa// ming med mtha' stongs don gyi ngo bo la// dbang dang 'jug sgo la sogs ming med kyang// yongs rdzogs rgya chad med par ston pa'i phyir// ye rdzogs dbang gi rgyal po ji ltar lags// zhes zhus pas/ blo 'das ston pas 'khor la bka' stsal pa// dbang la thun mong khyad par gnyis su bstan// thun mong dbang la rnam pa bzhi yin te// lha dbang lus la bskur ba bum pa'i dbang// rdzas dbang ngag la bskur ba gsang ba'i dbang// bde ba rgyud la skyes pa shes rab dbang// de nyid rang ngo sprod pa tshig dbang ste// bskur thabs spros pa'i mtshan ma la brten nas// dgos pa lus ngag yid gsum dag par byed// 'bras bu sku gsum sangs rgyas thob par 'dod// blo dman drang ba'i don du de yang bstan// bskur bya skur byed thob bya 'thob byed dang// gnyis 'dzin dbye bsal byung bas 'khor ba'i chos// khyad par chos dbang sems la bskur ba ni// dbang gi ngo bo nges tshig dbye ba dang// bskur thabs dgos pa 'bras bur bcas te bstan// ngo bo sems nyid ye nas skye ba med// mtshan ma'i dri bral ming med mtha' stongs so// nges tshig snying po ye nas rang dbang rang gis thob// dbye na phyi nang gsang ba kho na nyid// bskur ba'i thabs ni rig pa'i rtsal dang ste// shes med rang sar stongs pa bum pa'i dbang// mtshon brjod bstan du med pa gsang ba'i dbang// kun 'byung rang sar grol ba ming med gting yangs te// rgyud la 'dres pa shes rab ye shes dbang// zhe 'dod blo btags med pa brda' yi dbang// dbang bzhi bskur bas dri ma bzhi rang dag/ shes par 'dod dang mthong bar 'dod pa dang// bzang ngan blang dor gnyis su 'dod pa dang// zhe 'dod 'bras bu 'dod pa'i dri ma dag/ stong las cir yang gsal ba bum pa'i dbang// gsal yang mthong yul 'das pa gsang ba'i dbang// gsal dag nyams su myong ba thabs shes dbang// nyams la zhen med mtha' stongs brda' yi dbang// dbang bzhi bskur bas dri ma rnam bzhi dag/ lhan cig skyes dang kun tu brtags pa dang// bsam brjod rtog tshogs zhen pa'i mtha' las grol// 'bras bu blo dngos mu mtha' rang grol nas// grol dang ma grol nyid kyang mtha' stongs te// bskur thob rang sar dag pa ngo mtshar che// yang ti rin chen sgron mar bstan pa yin// zhes gsungs so// rin chen sgron ma rtsa ba'i rgyud las// rig pa'i rtsal dbang bstan pa'i le'u ste dgu pa'o//// de nas rang gsal sems dpa' rdo rje des// ston pa gsang bdag chen po la zhus pa// yang ti la shan rin chen sgron ma 'di'i// rgyud kyi ldang tshad 'brel nas ji ltar rdzogs// zhes zhus pas/ blo 'das ston pas 'khor la bka' stsal pa// snying po mu mtha' kun grol dkyil 'khor du// 'dzin med 'jug pa dbang gi rgyal po yin// ming med gting yangs mtha' stongs ngo bo las// rtag tu 'da' ba med pa dam tshig yin// cir snang rang sar grol ba thabs yin te// grol bya grol byed blo 'das shes rab yin// ming med mtha' yis stongs pa lta ba ste// de nyid 'du 'bral med pa spyod pa dang// yongs rdzogs 'gyur med 'bras bu kun gyi mchog/ ma btsal 'gro don rang byung thun mong gi// dngos grub bla na med par nga yi bshad// thams cad yongs rdzogs rin chen sgron ma'i rgyud// rtsol bral ming med yang ti'i ngo bo 'di// srog dang bral ba'i kha bzhin bsdam par gyis// zhes gsungs so// rin chen sgron ma rtsa ba'i rgyud las// rgyud kyi ldang tshad brgyad rdzogs par bstan pa'i le'u ste bcu pa'o//// de nas rang gsal sems dpa' rdo rje des// gsang bdag blo 'das ston pa la zhus pa// yang ti sems nyid rin chen sgron ma 'di// rtogs pa'i don la rtsis gdab dbyer med kyang// de nyid ma rtogs blo la mtshon pa'i phyir// gting yangs don dang rang ngo ji ltar sprad// ces zhus pas// blo 'das don gyi ston pas bka' stsal pa// stong las kun 'byung stong par rang yal ba'i// me long rnam pa gsum gyi ngo sprod bstan// skal ldan rnams kyi blo la gdags par gyis// kun gzhi phyogs med sems kyi me long dang// rig pa cir yang gsal ba'i me long dang// gsal ba rang dngas chos dbyings me long ngo// dang po kun gzhi sems kyi me long du// bde bar gshegs pa'i dgongs pa rang ngo sprad// sprad pas cang med cir yang snang bar shes// de la snang ba grol ba'i rgya yis gdab// rig pa cir yang gsal ba'i me long du// 'khrul pa'i rtog pa bag chags rang ngo sprad// sprad pas me long gzugs brnyan lta bur rtogs// de la gsal dag rang grol rgya yis gdab// gsal bar rang dngas chos dbyings me long du// snang ba'i dngos po yul rnams rang ngo sprad// sprad pa'i snang yang ming med mtha' stongs rtogs// de la dbyer med gting yangs rgya yis gdab// de ltar bstan pa de yang mtshon pa tsam// sprad bya sprod byed gnyis dang gnyis med kyis// ming med mtha' stongs rang dag klong du grol// zhes gsungs so// rin chen sgron ma rtsa ba'i rgyud las/ me long rnam pa gsum du rang ngo sprad pa'i le'u ste bcu gcig pa'o//// de nas rang gsal sems dpa' rdo rje des// gsang bdag don gyi ston pa la zhus pa// yang ti sems nyid rin chen sgron ma 'dir// yang gsang don gyi gdams ngag la bzla gang// zhes zhus pas// blo 'das don gyi ston pas bka' stsal pa// lta sgom spyod pa 'bras bu rnam pa bzhis// sangs rgyas dgongs pa mtha' stongs klong du bzla// gtan tshigs tshad ma gsum gyis de nyid rtogs// ming gi 'dod pa lta sgom spyod 'bras rnams// thogs med don gyi ngang du la bzla'o// thog ma'i gnas dang mtha' ma'i gnad dag gis// 'khrul pa rtsad nas bcad cing nyams su blang// snying po gnas lugs gzhi yi 'phrang chen du// sangs rgyas sems can thams cad la bzla'o// mtshan nyid rnam pa gsum po ngo sprad 'phrang// phyi nang gsang ba rnam gsum la bzla'o// 'khrul pa bzlog thabs rim pa gdams ngag 'phrang// 'gyu lugs gsum gyis dus mtshams la bzla'o// snying po'i chos 'das theg gcig sgron ma 'dis// kun brtags theg pa rim dgu la bzla'o// 'dod bral ming med mtha' stongs lta ba'i mchog/ bsam bral 'gyur med gting yangs sgom pa'i mchog/ rang lugs byang med 'dzin bral spyod pa'i mchog/ re med mu mtha' grol ba 'bras bu'i mchog/'khrul rtsad chod na lta ba'i ming yang med// dus gsum 'gyu med bsgom pas ci zhig bya// snying po ming med mngon gyur bsgom mi dgos// 'khrul pa bzlog thabs ma shes mun pa 'jal// snying po'i mtha' stongs shes med gsal dag 'di// dngos dang dngos med gnyis ka gnyis med yin// rig pa med la ji ltar skye bar 'gyur// bsgom du med pa'i don la ci zhig bsgom// brjod med ngang la ci zhig bshad du yod// snying po ming med rang bzhin mthong ba med// rgyu 'bras mdo rgyud thos bsam bsgom bsgrub rnams// gzhan dag spro ba bskyed phyir rol par spyod// don du spyod pa de nyid 'khrul pa'i lam// dben par lus ngag bya btang dgongs pa la// yid gdung ma byed gting yangs klong du zhog/ 'gyu dran skye med skyes kyang shar byung na// phyi nang 'khrul pa mtshon chen gcig gis chod// dbus mtha' kun bral snying po tshig las 'das// mtshon med mtha' stongs 'gyu med kun gyi lam// zhe 'dod 'dzin pa med pa thig le'i klong// ye stong ye bral sgrau skur ming dang bral// kun khyab rgyu dang rkyen med rgya ma chad// mi zad gter mdzod snying po bstan du med// ngo bo cir yang ma mthong lta ba la// rtsal gyi yan lag lta ba'i rim pa rnams// rang 'dod so sor snang yang gcig las med// gcig po ma skyes bcos med nam mkha' 'dra// dbyibs dang kha dog gang yang ma grub pas// 'di 'dra mtshon du med pa'i byang chub sems// lus ngag yid gsum rtsol bral ngang du spyod// 'khrul rtogs skyes dang skye med gnyis med spyod// mi 'gyur mi dmigs mtshon bral ngang la bsgoms// 'gro 'ong yengs med bsgom bya sgom byed med// gzhan med rang sa snying po'i klong bsgom mchog/ gzhan nas thob med rang gnas 'bras bu'i rgyal// rgyu dang rkyen med chos sku mkha' mnyam mchog/rang bzhin kun khyab mtshan nyid thams cad mkhyen// chos sku'i ngo bo 'di zhes bstan du med// thob bya 'thob byed ming med mu mtha' stongs// 'khrul zhen grol tshe bdag gzhan yod ma yin// log pa'i rgyud las grol bas bde chen don// snying po 'khrul pa'i rkyen gyis rtogs par dka'// ldog thabs gnad kyis gang skyes thad kar gsal// snying po ma yi rtsa ba mtshon du med// 'khrul snang rang dngas ma bu ngo sprod mchog/ 'khor 'das chos rnams gang yang mthong med la// 'khrul pa'i rnam par rtog pa cir yang snang// snang ba grol bar shes pas bag chags stongs// mnyam rjes gnyis med mtha' stongs snying po rtogs// gnyis bsdus mtshan ma'i ming med mu mtha' stongs// zhes gsungs so// rin chen sgron ma rtsa ba'i rgyud las// chos thams cad yang tir la bzla ba'i le'u ste bcu gnyis pa'o//// de nas rang gsal rdo rje sems dpa' des// ston pa blo 'das gsang bdag la zhus pa// chos rnams thams cad snang grol kun brlag par// rtogs pa'i don la dbye bsal ming med kyang// cir snang ma spangs rdzogs phyir bar do gang// zhes zhus pas// blo 'das ston pas 'khor la bka' stsal pa// cang med cir snang snang tshul bsam 'das pas// bar do'i mtshan nyid bstan gyis bzung bar gyis// rang bzhin gnas lugs thog ma'i bar do ru// sangs rgyas sems can gnyis kyi 'byung gzhi btsal// rang bzhin dang ni rlung gi bar do ru// rlung dang 'gyu ba gnyis kyi gyes gzhi btsal// rtsal zer shes pa phra mo skyes pa la// rags pa skye ba'i gzhi ma btsal bar bya// yan lag snang tshul rig pa'i bar do ru// yar mar 'char sgo 'khrul sgo'i gzhi ma btsal// snang ba rnam pa gsum gyi bar do ru// ston pa sku gsum 'byung ba'i gzhi ma btsal// kha dog rnam pa lnga yi bar do ru// gzugs brnyan 'od kyi gzhi ma btsal bar bya// 'od lnga gzugs lngar 'char ba'i bar do ru// rigs drug 'khrul pa'i gzhi ma btsal bar bya// thos dang bsam pa shes rab bar do ru// mar gyi sems can 'khrul tshul rtsad nas bcad// da lta shes pa snga phyi'i bar do ru// 'khrul pa bzlog thabs rnam gsum nyams su blangs// skye dang shi ba srid pa'i bar do ru// snying po mtha' grol klong du gnas par gyis// zhes gsungs so// rin chen sgron ma rtsa ba'i rgyud las/ bar do'i le'u ste bcu gsum pa'o//// de nas rang gsal sems pa rdo rje des// blo 'das don gyi ston pa la zhus pa// yang ti la shan rin chen sgron ma 'dir// phyi rab gtad pa'i snod kyi khyad par gang// zhes zhus pas/ gsang bdag ston pas 'khor la bka' stsal pa// dgos 'dod kun 'byung nam mkha'i mtha' dang mnyam// gsal ba'i go 'byed thams cad yongs rdzogs pas// theg pa la zlo shan 'byed yang ti 'di// lha mi'i 'jig rten gnas su dar ba'i tshe// rin chen lta bur snod ldan gcig la gtod// nam mkha' lta bur klong yangs gcig la gtod// nyi zla lta bur blo gsal gcig la gtod// ma 'ongs bstan pa'i sgron ma byed par 'gyur// zhes gsungs so// lta ba la shan chen po'i rin po che'i sgron ma rtsa ba'i rgyud las/rgyud gtad pa'i le'u ste bcu bzhi pa rdzogs so//// lta ba la shan chen po rin po che sgron ma rtsa ba'i rgyud/ u rgyan gyi gu ru chen po pad+ma 'byung gnas dang/ bod kyi lots+tsha ba ska ba dpal brtsegs kyis mnga' bdag rgyal po'i don du bsgyur ba'o/

CLOSE WINDOW