CLOSE WINDOW

Gpb001.003
བོད་ཡིག

/ rnal 'byor dbang phyug chen po shrI rat+na badzra gyis bshad cing/ dpal he ru kas bsgyur ba'o// las 'phro can dang 'phrad par shog/ rgya rgya rgya// rgya gar skad du// tan+t+ra sarba tsU DA' sUr+ya tsan+d+ra byU ha ga ga na an+ta sa ma tan+t+ra/bod skad du/ rgyud thams cad kyi spyi phud nyi zla bkod pa nam mkha'i mtha' dang mnyam pa'i rgyud/ bcom ldan 'das ka dag snying po chos kyi sku la phyag tshal lo// 'di skad bdag gis rtogs pa bshad pa'i dus gcig na/chos nyid kyi klong/ snying po ka nas dag pa'i gnas/ 'od gsal rnam dag rin po che snang gsal nyi zla'i dkyil 'khor na/ bcom ldan 'das snying po ka dag chos kyi sku bzhugs te/'khor kun rig gsal ba'i khye'u chung la// nam mkha'i mtha' dang mnyam pa'i bstan pa 'di gsungs so// zhes phun sum tshogs pa'o// de nas kun rig gsal ba'i khye'u chung gis// ston pa snying po ka dag chos sku la// phun sum tshogs pa'i don ni de lags na// sangs rgyas sems can gnyis kyi gzhi ni gang// de las 'khor 'das gnyis su j-i ltar 'khrul// 'khrul pa rtsad nas gcod pa'i man ngag gang// chod nas de yi 'bras bu ji ltar 'thob// dbang po yang rab rnams kyi ji ltar rtogs// dbang po thod brgal dag gi skyes bu la// gzhi yi 'khrul pa rtsad chod cang 'tshal lam// 'khrul dang ma 'khrul zhes bya cang bdog gam// ming med mtha' stong don ni gang gis rtogs// mu mtha' yangs par rtogs par byed thabs gang// byar med blo las 'das pa'i don rtogs na// bya zhing btsal ba'i rtsol ba mi 'tshal lam// theg pa'i lta sgom grub pa'i mtha' med par// yang ti yo ga ji ltar rtogs par 'gyur// bcu rtse yang tir rim dgu ji ltar rdzogs// yang tis ma bsgrubs 'bras bu ji ltar 'thob// ces zhus so// nyi zla bkod pa nam mkha'i mtha' dang mnyam pa'i rgyud las/ gleng gzhi phun sum tshogs pa dang/ 'khor gyis gleng bslang zhus pa'i le'u ste dang pa'o//// de nas kun rig gsal ba'i khye'u chung gis// snying po ka dag chos sku la// sangs rgyas sems can gzhi ni gang// zhes zhus pas/ ston pas 'khor la bka' stsal pa// gzhi la bye brag ming med kyang// 'khor gyi rtog pa bsal phyir bstan// 'khor rnams ma yengs gus pas nyon// sangs rgyas sems can gnyis kyi gzhi// kun gzhi mkha' klong yangs pa yin// ya tha rgyal ba'i dkyil 'khor nas// ma tha dmyal ba'i 'jigs tshogs su// mtha' yas sems can thams cad la// til la mar gyis khyab bzhin gnas// de yang ji ltar gnas zhe na// rgyu rkyen 'pho 'gyur med par gnas// skye 'gag mtha' dbus med par gnas// lhun grub rgya chad phyogs lhung med// dper na rgya mtsho gnam bzhin gnas// sa gser bang mdzod rin chen no// gnas lugs gzhi yi dpe ru bshad// ces gsungs so// nyi zla bkod pa'i rgyud las/ sangs rgyas sems can gyi gzhi bstan pa'i le'u ste gnyis pa'o//// de nas kun rig khye'u chung gis// snying po ka dag chos sku la// gzhi la mnyam par gnas pa la// khams gsum sems can ji ltar 'khrul// zhes zhus pa dang/ ston pas 'khor la bka' stsal pa// gzhi la 'khrul dang ma 'khrul gnyis med kyang// rig pa skyes shing yid g.yos sems 'khrul pas// gnas pa'i don de ma shes ma rig te// rang sa ma zin rig pa'i mgo rlung langs// chos nyid ma 'phrad mun pa'i 'khor sgor 'khyams// de ma yin la der 'dzin 'khrul pa langs// rigs drug sems can thams cad de ltar 'khrul// gzhi la med de rtog pa'i yid skyes pas// gdug rtsub zhe sdang dbang gis srog bcad de// de yi las kyi rnam par smin pa yis// dmyal bar skyes pas tsha grang btso bsreg gi/ sdug bsngal dmyal khams bco brgyad gnas su myang// de ltar sems can dmyal ba'i gnas su 'khrul// gzhi la med de ser sna skyes pa las// yi dags su skye bkres skom sdug bsngal myang// de ltar ser snas yi dwags gnas su 'khrul// gzhi la med de gti mug rmongs pa las// byol song gnas skyes glen lkugs sdug bsngal myong// de ltar sems can byol song gnas su 'khrul// gzhi la med de nga rgyal skyes pa las// lha min gnas skyes 'thab rtsod sdug bsngal myang// gzhi la med de 'dod chags skyes pa las// lha yi gnas 'khrul ltung ba'i sdug bsngal myong// gzhi la med de phrag dog skyes pa las// mi ru skyes nas 'gyur ba'i sdug bsngal myang// de ltar 'gro drug sems can thams cad 'khrul// dper na thag sbrul smig rgyu chur 'khrul 'dra// gzhi la med de rnam rtog 'dzin pas 'khrul// zhes gsungs so// nyi zla bkod pa'i rgyud las/ 'khrul lugs bstan pa'i le'u ste gsum pa'o//// de nas kun rig gsal ba'i khye'u chung gis// snying po ka dag chos sku la/ 'khrul pa rtsad gcod gdams pa gang// zhes zhus pa dang/ ston pas 'khor la bka' stsal pa// dbang po rab 'bring rnam gsum la// 'khrul pa gcod thabs rnam pa gsum// tha ma'i 'khrul pa gcod thabs ni// 'khrul snang yul gyi rtsad gcod dang// 'khrul gzhi kun gzhi'i rtsad gcod dang// sems dang bag chags rtsad gcod do// 'khrul snang yul gyi rtsad gcod ni// dngos por snang ba'i yul rnams la// dgag bsgrub spang len mi bya ste// dbye bsal med par rang sar bzhag/ snang la rang bzhin grub pa med// dper na chu yi zla ba bzhin// cir snang der 'dzin med pas chog/ 'khrul rgyu yid rig rtsad bcad pa// rig med gang la'ang blo ma skyes// de yis rig pa 'khrul rtsad chod// snang srid 'khor 'das yod med sogs// yul snang bzang ngan gang la yang// mi 'gyu mi dpyod 'dzin zhen chod// des ni yengs 'khrul rtsad nas chod// sems kyi 'khrul rtsad bcad pa ni// dngos po rnam pa sna tshogs la// mi dpyod mi sems gzung 'dzin med// gang yang sems pa med pa ni// thig le nyag gcig rdo rje'i sku// 'khrul gzhi kun gzhi'i rtsad gcod ni// ye med ming med skye ba med// 'dod rlom rtsis gdab blo yul 'das// gti mug ma rig bag chags dang// sgrib g.yogs zhes bya'i ming yang med// de ni 'khrul gzhi rtsad bcad pa'o// 'khrul pa'i rtsa ba chod pa na// yan lag 'khrul pa shugs la chod// dug gsum ma spangs sku gsung thugs// dug gsum 'khrul pa shugs la chod// dug lnga ma spangs sku lngar grol// 'gro ba rigs drug sdug bsngal bcad// dbang po tha ma'i bcad thabs so// dbang po 'bring gi 'khrul bcad pa// cir snang rang sar grol bas chod// ci sems 'dzin sems med pas chod// snyam byed 'dod pa med pas chod// rtsis gdab blo yi yul las 'das// dbang po 'bring gi bcad thabs so// dbang po rab kyis bcad thabs ni// 'khrul dang ma 'khrul med de skye med ka nas chod// gcod bya gcod byed med pas 'khrul gzhi rtsad nas chod// ma rig ye nas ye shes gsal// 'khor ba nyid ni myang ngan 'das// 'khrul snang rang sar grol bas chos nyid gsal// sems can sems nyid shes pas yang dag sangs rgyas yin// zhes gsungs so// nyi zla bkod pa'i rgyud las/ 'khrul pa rtsad nas gcod pa'i gdams ngag bstan pa'i le'u ste bzhi pa'o//// de nas kun rig gsal ba'i khye'u chung gis// ston pa skye med ka dag chos sku la// 'khrul pa chod nas 'bras bu ji ltar 'thob// ces zhus pas/ ston pas 'khor la bka' stsal pa// blos brtags re dogs 'bras bu ngas ma bstan// thob pa med pa'i 'bras bu 'di ltar thob// 'bras bu'i rgyal po rang sems gdod nas dag/ 'bras bu'i rgyal po thig le mthong brdol 'thob// 'bras bu'i rgyal po thig le gsang lam yin// 'bras bu'i rgyal po skye med ka dag yin// 'bras bu'i rgyal po dngos med zang ka yin// 'bras bu'i rgyal po byar med blo 'das yin// 'bras bu'i rgyal po ming med mtha' stong yin// 'bras bu'i rgyal po sku gsum rang gnas yin// 'bras bu'i rgyal po sku lnga rang chas yin// 'bras bu'i rgyal po ye shes zang thal yin// 'bras bu 'di ltar rang grol rang sangs rgyas// zhes gsungs so// nyi zla bkod pa'i rgyud las/'bras bu bstan pa'i le'u ste lnga pa'o//// de nas kun rig gsal ba'i khye'u chung gis// ston pa skye med ka dag chos sku la// dbang po yang rab rnams kyis ji ltar rtogs// zhes zhus pas/ ka dag ston pas 'khor la bka' stsal pa// yang rab skal ldan rnams kyis rtogs pa ni// ming med blo 'das chen po'i ngo bo rtogs// gting mtha' yangs la mu mtha' grol bar rtogs// byar med rtsol bsgrub bral ba'i ngo bo rtogs// chos rnams bya ba med pa'i ngo bo rtogs// lta ba'i rgyal po mu mtha' grol bar rtogs// sgom pa'i rgyal po gting mtha' yas par rtogs// spyod pa'i rgyal po byar med rnal mar rtogs// dam tshig rgyal po ka dag chen por rtogs// phrin las rgyal po rtsol bsgrub med par rtogs// sa yi rgyal po sbyang du med par rtogs// lam gyi rgyal po bgrod du med par rtogs// 'bras bu'i rgyal po sku gsum lhun grub rtogs// chos nyid rgyal po bcos su med par rtogs// nyams myong rgyal po bstan du med par rtogs// 'di ltar snang ba'i dngos po thams cad la// mi bsgrub mi spang rang sar grol bar rtogs// rig pa sems dang yid dang dran pa rnams// rang byung ngang dngas chu rlabs lta bur rtogs// chos rnams dbye bsal blang dor med par rtogs// zhes gsungs so// nyi zla bkod pa'i rgyud las/ yang rab kyi rnal 'byor bas thod rgal du rtogs par bstan pa'i le'u ste drug pa'o//// de nas kun rig gsal ba'i khye'u chung gis// skye med ka dag ston pa la// dbang po thod rgal skyes bu yis// gzhi 'khrul rtsad gcod cang dgos sam// zhes zhus pas/ ston pas 'khor la bka' stsal pa// dbang po thod rgal rnal 'byor gyis// gzhi 'khrul rtsad gcod mi dgos te// gzhi dang 'khrul pa shes pas chog/ gzhi yi don shes 'khrul du med// de ni ci yi phyir zhe na// gzhi de ming med mtha' stong yin// chos nyid gzhi yi ngo bo de// ye shes kyis gsal ma myong la// 'khrul pas 'grib ma myong ba'o// dper na shel sgong drung dag tu// bzang ngan sna tshogs gang bstan kyang// bzang ngan skyon yon gyis ma gos// gnyis ka shel sgong nang du dag/ de bzhin gzhi yi ngo bo yang// skyon yon gnyis ka klong du dag/ ma rig ye shes tha dad med// 'khrul dang ma 'khrul tha dad med// ma 'khrul rtogs pa'i lam du gcig/ ngo bo gcig la snang tshul gnyis// dper na ga pur lta bu ste// ga pur gzhi la gnyis med kyang// tsha grang rkyen gyis sman dug gnyis// ga pur ngo bo tha dad med// snying po ka dag mu mtha' grol rtogs pas// snam rtog 'khrul ba snang yang ga la 'grib// ces gsungs so// nyi zla bkod pa'i rgyud las/ gzhi 'khrul rtsad gcod ngo shes pas 'khrul pa dang ma 'khrul pa med par bstan pa'i le'u ste bdun pa'o//// de nas kun rig khye'u chung gis// snying po ka dag chos sku la// ming med mtha' stong gang gis rtogs// zhes zhus pa dang// ston pas 'khor la bka' stsal pa// ming med mtha' stongs rtogs 'dod na// bya ba thams cad btang ba yin// snang srid 'khor 'das chos rnams la// ci la mi bsam zhe 'dod med par bzhag/ dngos por snang ba'i chos rnams la// ming med zhe mtha' grol bar bzhag/ chos rnams theg pa sna tshogs la// bzang ngan blang dor med par bzhag/ grub mtha' gang snang rang sar grol// chos kun rtsol bsgrub med par bzhag/ 'brel pa chod la gcig pur sdod// bla ma'i man ngag gnad kyis zin par gyis// gang shes nyams su longs la chos dang sems su bsres// sems kyi rgyu 'grul ma mang rang sar sdod// so ma zang ka rnal mar sdod// longs spyod g.yengs pa'i bdud byung na// dgra dang tsher ma bzhin du spang bar bya// gnyen drung pha ma la sogs rgyab bor la// bya ba kun btang ri khrod dgon par sdod// rtsol bsgrub ci yang mi bya yid kyi bya ba btang// rig pa gang la'ang mi rgyu yid kyi 'khrul rtog med// dran sems gang la'ang mi 'jug gang snang yul ma chags// yid sems tha mal ma yin chos kyi dbyings su sdod// 'jigs sar dgra la ma bskur rang gi de nyid ltos// dbang po 'bring gis 'di ltar shes par gyis// gtad med byar med mtha' las grol bar sdod// 'on kyang ming med mtha' stongs ngo bo rtogs// yang rab tu gyur thod rgal la// ming med mtha' stongs rtogs par byed pa'i thabs// bya ba btang nas blo 'das rtogs pa ni// nyon mongs dug lnga'i ming med mtha' stongs so// dug gsum zhes bya'i ming med mtha' stongs so// rnam rtog ming med mtha' stongs so// 'gro drug sems can ming med mtha' stongs so// khams gsum 'khor ba'i ming med mtha' stongs so// 'khrul pa zhes bya'i ming med mtha' stongs so// ma rig gnyis 'dzin ming med mtha' stongs so// snang ba chos sku stong par mtha' stongs so// rig pa chos sku rang grol mtha' stongs so// chos nyid rtsis gdab med par mtha' stongs so// lta ba yul med mtha' stongs so// sgom pa ming med mtha' stongs so// spyod pa la med mtha' stong so// 'bras bu rgyu med mtha' stongs so// re dogs sems med mtha' stongs so// chos med bshad med mtha' stongs so// theg med 'jug med grub pa'i mtha' stongs so// sems rig med pas rgyu mtha' stongs// yul sems gzung 'dzin mtha' stongs so// bzang med ngan med spang len stongs// dgra med gnyen med phyogs ris stongs// yin min dbye bsal mtha' stongs so// zhes gsungs so// nyi zla bkod pa'i rgyud las/ ming med mtha' stongs rtogs thabs bstan pa'i le'u ste brgyad pa'o//// de nas kun rig khye'u chung gis// skye med ka dag ston pa la// mu mtha' yas par rtogs thabs gang// zhes zhus pas/ ston pas 'khor la bka' stsal pa// brda dang gnad kyi sgo nas bstan// 'khor rnams ma yengs gus par nyon// mu med mtha' yas rtogs thabs la// chos rnams blo yis zhe 'dod mi bya ste// snang grag chos rnams gang la yang// zhe 'dod bcas bcos chags sdang med par gzhag/ sna tshogs yul sems ma chags te// chos nyid rang grol lo// de yis mu med mtha' yas rtogs// kye ma rnal 'byor skal ba can// mu med mtha' yas rtogs 'dod na// gang la'ang ma sems ci la'ang zhe 'dod med par zhog/ rig pa rnam dag ye sangs rgyas// sna tshogs rang snang rang sar grol// brda yi sgo nas rtogs thabs ni// kye ho e ma rnal 'byor kun// mu med mtha' yas rtogs 'dod na// rgya mtsho'i klong du nyol la nam mkha'i dbyings su ltos// khyung dang seng ge zhon la nyi zla'i snying po ltos// shes rab gri thogs khyi phag bya sprel gsod// sgron me lag thogs mun pa'i smag rum sel// 'ja' tshon rgyal mtshan gyis la na bun smug pa sol// chu gnyer kha ru chugs la spre'u lag pas zung// rlung pho stod la non la rdo tshan kha ba phyogs// ri bo'i rtse la 'dug la spang la gser phur thob// snang ba'i chos rnams dbye bsal med pa yis// de yi mu med mtha' yas rtogs par 'gyur// zhes gsungs so// blta bya lta byed med pas mu med mtha' yas rtogs// bsgom bya sgom byed med pas mu med mtha' yas rtogs// spyad bya spyod byed med pas mu med mtha' yas rtogs// bsgrub bya sgrub byed med pas mu med mtha' yas rtogs// ye shes nyi ma shar bas mu med mtha' yas rtogs// ma rig gti mug sangs pas mu med mtha' yas rtogs// dug lnga rang sar grol bas mu med mtha' yas rtogs// 'khrul sgo 'khrul snang med pas mu med mtha' yas rtogs// snang ste grub pa med pas mu med mtha' yas rtogs// rig kyi ngos gzung med pas mu med mtha' yas rtogs// sems kyang dngos gzhi med pas mu med mtha' yas rtogs// snang ba rang sor bzhag pas mu med mtha' yas rtogs// rig pa ming med rig med mu med mtha' yas rtogs// yid la 'gyu med 'dzin med mu med mtha' yas rtogs// sems la dran bsam med pas mu med mtha' yas rtogs// gzugs sgra dri ro med pas mu med mtha' yas rtogs// phung po lnga po med pas mu med mtha' yas rtogs// dbang po rnam lnga med pas mu med mtha' yas rtogs// rnam shes tshogs brgyad med pas mu med mtha' yas rtogs// theg chos lta sgom med pas mu med mtha' yas rtogs// zhes gsungs so// nyi zla bkod pa'i rgyud las/ mu med mtha' yas rtogs thabs bstan pa'i le'u ste dgu pa'o//// de nas kun rig khye'u chung gis// snying po ka dag chos sku la// byar med blo 'das don 'dod na// bya btsal rtsol bsgrub mi 'tshal lam// zhes zhus pas/ ston pas 'khor la bka' stsal pa// chos dang sems su 'dres pa na// bya btsal ci yang mi dgos so// blo dngos 'phrad nas mu mtha' grol ba na// bya ba gang yin bya rgyu ci zhig spyod// lta byed gang yin blta bya gang na 'dug// nam mkha'i dbyings su ltos dang ci ma 'dra// sgom byed gang yin bsgomabya gang na 'dug/ bsgom na dngos po bsgom mam stong pa bsgom// dngos po bsgom na ye nas grub zin pas// grub zin de la bsgom yang ci zhig dgos// gal te stong pa bsgom mo zhes 'dod na// ye stong yin pas da gdod stong mi dgos// lha dang lha mo gzhal yas phyi nang dang// rtsa dang thig le bsgom pa'i dmigs gtad med// bya ba btang bas las rnams dus gcig zin// dge spyod chos spyod sdig pa bya rgyu med// dal ba lhug pa bag yangs rnal ma la// so ma zang ka ma bcos ma byas pas// ma btsal ye nas rtsol bsgrub las zin pas// da ni bya byed dgag bsgrub mi 'tshal lo// zhes gsungs so// nyi zla bkod pa'i rgyud las/ bya btsal rtsol bsgrub mi dgos par bstan pa'i le'u ste bcu pa'o//// de nas kun rig khye'u chung gis// snying po ka dag chos sku la// theg pa'i lta sgom mu med par// yang ti yo gas ji ltar rtogs pa lags// zhes zhus pas/ ston pas 'khor la bka' stsal pa// theg pa'i rim pa lta sgom zhe 'dod yin// zhe 'dod yid smon chos kyis sangs mi rgya// grub mtha'i rtsol ba med pa'i chos gcig dgos// chos gcig yang ti yo gas 'di ltar rtogs// snang srid dbye bsal med pa'i chos gcig rtogs// yul sems gzung 'dzin med pa'i chos gcig rtogs// rig sems skye 'gag med pa'i chos gcig rtogs// lta sgom rtsol bsgrub med pa'i chos gcig rtogs// lta ba gtad med phyogs med mtha' grol rtogs// sgom med bsam med mu med mtha' yas rtogs// byar med rtsol med mtha' rnams yongs grol rtogs// re med dogs med 'di ltar sangs rgyas rtogs// theg pa'i rgyal po yang ti yo ga yin// mu med mtha' yas ming med blo 'das rtogs// rtsol bsgrub ci yang ma byas grol bar bshad// ces gsungs so// nyi zla bkod pa'i rgyud las/ yang ti yo gas ji ltar rtogs pa bstan pa'i le'u ste bcu gcig pa'o//// de nas kun rig khye'u chung gis// skye med ka dag chos sku la// bcu rtse yang ti yo ga ru// theg pa rim bcu ji ltar rdzogs// zhes zhus pa dang/ ston pas 'khor la bka' stsal pa// bcu rtse yang ti yo ga 'dir// theg pa dgu yi rdzogs lugs ni// gang zag bdag med mi 'dod pas// nyan thos lta ba yongs su rdzogs// bdag med phyogs cha mi 'byed pas// rang rgyal lta ba yongs su rdzogs// rang rig sems su ma grub pas// sems tsam lta ba yongs su rdzogs// bden pa gnyis su mi blta bas// dbu ma'i lta ba yongs su rdzogs// dag gsum rigs gsum bsgom med pas// kri ya'i lta ba yongs su rdzogs// mar spyod yar lta'i rtse gnyis med// u pa'i lta ba yongs su rdzogs// rigs lnga skye 'gag gnyis med pas// yo ga'i lta ba yongs su rdzogs// snang stong gnyis med mi bsgrub pas// ma hA'i lta ba yongs su rdzogs// dbyings dang ye shes gnyis med pas// a nu'i lta ba yongs su rdzogs// snang dang chos sku gnyis med pas// a ti'i lta ba yongs su rdzogs// ka dag ma dag gnyis med pas// spyi ti'i lta ba yongs su rdzogs// yang ti ming med mtha' grol du// brgyad khri bzhi stong ma 'dres rdzogs// zhes gsungs so// de yang dpe yi mtshon tsam bstan pa ni// gnam sa gnyis su dngos po'i chos rnams rdzogs// nam mkha'i cho 'phrul nam mkha'i ngang du rdzogs// rgya mtsho'i klong du rgya mtsho'i chos rnams rdzogs// zhes gsungs so// nyi zla bkod pa'i rgyud las/ rdzogs chen yang ti yo gar theg pa rim bcu rdzogs par bstan pa'i le'u ste bcu gnyis pa'o//// de nas kun gsal rig pa'i khye'u chung gis// skye med ka dag ston pa la// rdzogs chen yang ti yo ga yi// ma bsgrubs 'bras bu ji ltar 'thob// ces zhus pa dang/ ston pas 'khor la bka' stsal pa// rdzogs chen yang ti'i 'bras bu la// thob dang ma thob gnyis med kyang// re zhig brod pa skye phyir bshad// gong du 'bras bu bshad zin kyang// mu mtha' yas pa'i 'bras bur bshad// gting mtha' grol ba'i 'bras bu yin// chos rnams zad sar skyol ba 'bras bu yin// snying po klong du gyur pa 'bras bu yin// skye med ka dag rtogs pa 'bras bu yin// dngos med zang ka rtogs pa 'bras bu yin// byar med blo 'das rtogs pa 'bras bu yin// ming med mtha' bral rtogs pa 'bras bu yin// rang byung rang la rtogs pa 'bras bu yin// rang dngas rang la rtogs pa 'bras bu yin// gzhi med skye med chos sku'i 'bras bu yin// 'od gsal ka dag longs sku'i 'bras bu yin// dngos rnams dngos med sprul sku'i 'bras bu yin// sku gsum dbyer med don dam bden med thob// ci yang ma grub 'di ltar sangs rgyas so// zhes gsungs so// nyi zla bkod pa'i rgyud las/ yang ti yo ga'i 'bras bu bstan pa'i le'u ste bcu gsum pa'o//// de nas kun rig gsal ba'i khye'u chung gis// skye med ka dag ston pa la// gong zhus don rnams de ltar na// mtshan dang gtad rgya gang la gtad// ces zhus pas/ ston pas 'khor la bka' stsal pa// rgyud rnams kun gyi spyi rje spyi phud pas// dgu rtse spyi phud rgyud kyi rgyal por zung// nyi zla bkod pas mun pa 'jom pa'i phyir// mun sel snang ba bkod pa'i rgyud du zung// snang gsal nyi ma 'od gsal zla ba'i rgyud// snang ba 'od gsal dag pa bkod pa'i rgyud du zung// mu med mtha' yas nam mkha'i mtha' mnyam phyir// nam mkha'i mtha' dang mnyam pa'i rgyud du zung// nam mkha'i chos 'phrul sprin char bu yug sogs// nam mkha'i klong dang nam mkha'i mtha' dang mnyam// de phyir nam mkha'i mtha' dang mnyam pa'i rgyud du zung// zhes mtshan bstan pa'i le'u ste bcu bzhi pa'o//// de nas kun rig gsal ba'i khye'u chung gis// rgyud 'di gang zag gang la gtad// ces zhus pas/ ston pas 'khor la bka' stsal pa// ri bo'i blo la rgya mtsho'i thugs// nam mkha'i dgongs pa nyi zla'i sems// ral gri'i shes rab spu gri'i blo// gla bring rgyud la shel sgong dam// bla ma la gus snying rje che// dam tshig gzhung bsrung rnam smin 'dzem// nga rgyal ser sna chung la gtong phod che// de la rgyud kyi rgyal po gtad// dam nyams chos 'tshong sdig pa can// snod med rnams la ma sbyin cig/ ces gdams so// nyi zla bkod pa'i rgyud las/ rgyud gtad pa'i le'u ste bco lnga pa'o//// rgyud thams cad kyi spyi phud nyi zla bkod pa nam mkha'i mtha' dang mnyam pa'i rgyud rdzogs so/// rgya gar gyi slob dpon chen po pad ma 'byung gnas dang/ bod kyi lots+tsha ba ska ba dpal brtsegs kyis bsgyur zhing gtan la phab pa'o/

CLOSE WINDOW