CLOSE WINDOW

D667
བོད་ཡིག

@##/ /rgya gar skad du/ shrI ma hA kA la tan+t+ra/ bod skad du/ dpal nag po chen po'i rgyud/ dbang gi rta mchog sku la phyag 'tshal lo/ /'di skad bdag gis thos pa dus gcig na/ shar lho'i dur khrod chen po ha ha drag tu rgod pa'i gnas shing tsan+dan gyi nags tshal rab tu dga' ba'i ming zhes bya ba mi ma yin pho mo mang po 'dus pa'i pho brang du/dpal nag po chen po zhes bya ba bi nA ya ka la sogs te/ de'i tshe 'khor gdug pa can rnams kyi dbus na/ skye 'gro sems can rnams kyi srog dbugs la dbang byed pa'i nag po chen po zhes bya ba cig yod de/de'i tshe de'i dus na nub phyogs kyi 'jig rten gyi khams na/ mthar byed rta'i rgyal po zhes bya ba/ rgyal po chen po bzhi la sogs pa'i 'khor gyis bskor te/ dregs pa can 'dul ba'i ting nge 'dzin la snyoms par zhugs nas lcags kyu'i phyag rgya bcas nas/oM badzra kro d+ha ha ya grI ba hU~M hu lu hu lu hU~M ba~M zhes brjod pas dur khrod ha ha drag tu rgod pa'i gnas nag po chen po/ rang dbang med par mthar byed rta'i rgyal po'i mngon du byung ste las ci bya zer zhing rang rtags srog gi snying po 'di mdongs gsol du phul ba/o~M badzra ma hA kA la k+ShiM k+She tra big+h+na na bi nA ya ka hU~M hU~M phaT ces phul lo/ /dpal nag po chen po'i rgyud las gleng gzhi'i le'u ste dang po'o// //de nas rgyal po mig mi bzang gis mthar byed rta'i rgyal po la 'di skad ces gsol to//e ma pad+ma khros pa'i bdag /nag po chen po drag shul can/ /gsang ba'i sgrub pa bshad du gsol/ /mgon po sgrub par bya ba gang / /bsad cing lus srog dbye ba dang / /ma grub shi sa bstan pa dang / /mgon po'i rtags dang ser ba rnams/ /rta mchog chen pos bdag la stsol//zhes zhus pas/ de nas pad+ma khros pa yis/ nag po'i sgrub thabs ched du brjod/ /dam tshig ldan pa'i sngags pa yis/ /sangs rgyas bstan pa bsrung slad du/ /gza' skar tshes grangs shis pa la/ /dur khrod la sogs shing gcig tu//bsod nams tshogs ni bsags byas la/ /nag po chen po bsgrub par bya/ /phungs 'am sa nag dag la ni/ /stegs bu gru bzhi byas nas ni/ /dri spos khrag gis chag chag bya/ /dbus su gru gsum zla gam ldan/ /phyi rol pad+ma 'dab brgyad bri//de dbus thod chen nang du ni/ /sha lnga snying snas brgyan pa yis/ /gtor ma bshos bu khru gang tshad/ /de la mda' gzugs dmar nag dar/ /gri snying tsa ka li yang gzugs/ /de nyid mgon po'i rten du bzhag /Da ma ru yi pags pa'i nang / /mgon po'i srog sngags bri bar bya//ldo yi nang du bla rdos dril/ /spos dang rgyun gtor gtang bar bya/ /dkon mchog spyi la mchod pa bsham/ /de nas pad+mar bdag bsgoms la/ /thugs ka'i hrIHlas 'od 'phros pas/ /bla ma sangs rgyas la sogs pa/ / rang gi mdun du bsam byas la/ /mchod pa rnam lnga dbul bar bya/ /rnam dag bdun gyi 'og tu ni/ /tshad med bzhi po bsgom par bya/ /btang snyoms la sogs pa~M ra~M tri/ /pad stengs yi ge hUM las ni/ /nag po zhal gcig phyag drug pa/ /gri gug phreng ba DA ma ru/ / thod pa mdung dang zhags pa bsnams/ /g.yas g.yon rim pas bsnams pa'o/ /sbrul dang rin chen rgyan gyis brgyan/ /sku smad ba ti khra bo gsol/ /stag lpags zhing gi sham thabs can/ /gtum po spyan gsum mche ba gtsigs/ /dpral bar dri yi thig les brgyan//spyi gtsug mi bskyod sprul sku brtan/ /de ltar bdag mdun gsal bsgoms nas/ /spyan drangs mchod dang bzlas pa bya/ /gtor ma pU dza la sogs pas/ /nag po che la sbyin par bya/ /mgon po'i thugs ka'i hU~M las ni/ /srog gi yi ges g.yas nas bskor//khor yug dag gis bzlas par bya/ /oM badzra ma hA kA la k+ShiM k+She tra big+h+nAn bi nA ya ka hU~M hU~M phaT/ de skad ces ni rab brjod pas/ /nag po grub pa'i rtags rnams 'byung / /dpal nag po chen po'i rgyud las bsnyen cing bsgrub pa'i le'u ste gnyis pa'o// //de nas yang dag bshad bya ba/ /sangs rgyas bstan pa bshig pa dang / /rnal 'byor bar chad byed pa rnams/ /nag po chen pos bsgral 'dod na/ /stegs bu gru bzhi byas nas kyang / /drag po e yi nang du ni/ /pho mo rabs chad thod pa'i nang //gzugs ni spra tshil dag la bya/ /ming rus dag ni bkod nas kyang / /bsad dang na ba skabs dang sbyar/ /mgon po'i sku dang dam rdzas rnams/ /kha dang kha la dgod par bya/ /phag thod nang du thun rdzas blugs/ /rta gtor rgyun gtor g.yas dang g.yon//gsang sngags 'di yis gsad par bya/ /oM badzra ma hA kA la k+ShiM k+She tra ya big+h+nA na bi nA ya ka hU~M hU~M phaT/ oM ma hA kA la ya shA sa na u pa ka ri Ni e Sha a baSh+tsi ma kA lo a yang i da~M rat+na tra yA ya a pa kA ri Na~M ya di pra ti dz+nyA smar si ta dA i da~M duSh+Tan kha kha khA hi khA hi/mA ra mA ra/ g+h+r-ih+Na g+h+r-ih+Na/ ban+d+ha ban+d+ha/ ha na ha na/ da ha da ha/ pa tsa pa tsa/ di na me ke na mA ra ya hUM hUM phaT phaT/ hUM bi nA ya ka pi las tra~M bi tri hU~M dza si ma bu bi nA ya ka a mu ka bri srog hur thum dza mA ra ya rbad/ drag sngags bzlas shing thun gyis brab//zhag bdun bar du smra mi bya/ /de la rtags rnams rdzogs par 'gyur/ /dpal nag po chen po'i rgyud las lus srog dbye ba'i le'u ste gsum pa'o// //de nas yang dag bshad bya ba/ /las mtha' sbyin sreg dag gis brtul/ /gru gsum dbus su gdug pa'i shing //dbus su nag po 'khor bcas bskyed/ /ling ga gtor ma dam rdzas rnams/ /nag po'i zhal du dbul bar bya/ /sngags 'di bzlas shing bsreg par bya/ /ag+ne dz+wa la ra~M las rdzogs/ /thal ba rlung dmar dag la bskur/ / a mu ka ni myur du rlog /dpal nag po chen po'i rgyud las mtha' brtul ba'i le'u ste bzhi pa'o// //de nas yang dag bshad bya ba/ /de ltar bsgrubs kyang ma grub na/ /gcig dang gnyis la nan tan bskyed/ /de ltar byas kyang ma grub na/ /sa gsum khrag gsum dug gsum la//khru gang pa yi gzugs kyi tshad/ /gru gsum dbus su nag po'i gzugs/ /spyi tshar dag tu lding du gzhug /bris sku dam rdzas bla rdo rnams/ /rang gi gru gsum mal gyi 'og /dug dang tsher mas steng nas dgab/ / thun rdzas brab cing sngags 'di bzlas/ /o~M badzra kro d+ha ha ya gri ba hU~M hu lu hu lu hU~M phaT/ phaT hU~M hU~M ka ya nA bi nAn g+ha bi tra k+She k+ShiM la kA hA ma badzra oM/ de skad brjod cing thun gyis brab/ /de la rtags rnams rdzogs pa dang / /de nas gso ba'i cho ga bya/ /bris sku bla rdo dam rdzas rnams//spos chus bkru zhing sngags 'di bzlas/ /oM badzra ma hA kA la k+ShiM k+She tra big+h+nAn bi nA ya ka hU~M hU~M phaT sos sos swA hA/ de skad byas la gnas su ni/ /mgon po'i gzugs kyang spos chus bkru/ /gru gsum dbus su blangs byas la//dgra bo'i ming rus snying gar gzhug /zhag bdun bsgrubs la dgra la bskyal/ /a mu ka ni myur du brlag /dpal mgon po nag po'i rgyud las ma grub na spogs pa'i cho ga dang gso ba'i le'u ste lnga pa'o// //de nas yang dag bshad bya ba/ / bya nag 'phur zhing lding ba dang / /mon pa a tsa ra dang ni/ /dge bshes ban+de slob dpon dang / /'od dang sgra dang khang pa 'tsheg /mgon po'i sku dag dngos su mthong / /dgra la dmag drangs sems can bsad/ /mi nag bdag la snying stobs dang / / mdze po dang ni sprang po dang / /bya nag thang la lhung ba 'byung / /dpal mgon po nag po nag po'i rgyud las rtags kyi rim pa'i le'u ste drug pa'o// //de nas yang dag bshad bya ba/ /ser ba dbab pa'i las bya na/ /mon nam mdze can thod pa ru/ / 'khor lo rtsibs bzhi bris nas kyang / /rigs lnga klu yi sa bon dgod/ /rtsibs chen ser srung ming rus dang / /yul du phob cis bya ba bris/ /de mthar 'khor lo rtsibs dgu la/ /dregs pa'i sngags dag bri bar bya/ /rgyab tu gang yin yul ming dang / /rlung gi snying po bri bar bya//bdag nyid pad+ma khros par bsgom/ /gsang sngags 'di yis gnad la bor/ /oM badzra ma hA kA la k+ShiM k+She tra big+h+nA~M bi nA ya ka hU~M hU~M phaT/ nA ga snying gzir/ phu hur thum dza khro shar hril b+h+yo/ /de skad ces ni rab brjod la/ /yungs kar yungs nag ske tshe dang //khrag dang dug gis thod par brab/ /lo 'bras rlung khyer rtags byung na/ /dgra yi yul du dbab par bya/ /gal te 'jig rten phung ba'o/ /dpal mgon po nag po'i rgyud las ser ba dbab pa'i le'u ste bdun pa'o// // de nas yang dag nges gsungs pa/ /e ma 'khor 'dus ngo mtshar can/ /ma 'ongs dam can sgrub byed na/ /dam tshig la gnas sdom pa gzung / /gtor ma dag la brtson par bya/ /dam rdzas bla rdo lus la bsrel/ /zhes gsungs pas rgyal po mig mi bzang la sogs pa'i 'khor rnams yi rangs nas/nag po chen pos bstan pa srung bar khas blangs nas mi snang bar gyur to/ /dpal nag po chen po'i rgyud las le'u brgyad pa rdzogs so// //rgya gar gyi mkhan po a mo g+ha badzra dang / bod kyi lo ts+tsha ba phur bu 'od kyis bsgyur ba'o/

CLOSE WINDOW