CLOSE WINDOW

D4464
བོད་ཡིག

/bcom ldan 'das ma shes rab kyi pha rol tu phyin ma tshigs su bcad pa bdun ma'i mdo rdzogs so// //kha che'i paN+Di ta chen po su ma na shri dang / bod kyi lo ts+tsha ba dge slong rin chen grub kyis bsgyur ba'o/ / @#/ /dpal ldan ka lA par 'jug pa zhes bya ba yul rnams kyi mchog tu gyur pa sham+b+ha la ra 'gro tshul gyi lam yig 'phags pa don yod lcags kyus gsungs pa bzhugs/ /oM trI swA tA/ oM ang+ku sha ang+ku sha a mo g+ha hi swA hA// @##/ /rgya gar skad du/ ka lA pa/ a wa ta ra/ bod skad du/ ka lA par 'jug pa/'jig rten dbang phyug la phyag 'tshal lo/ /'gro ba'i mgon po thabs dang ldan/ /de bzhin gshegs la rab btud nas/ /gang gis dga' ba'i gnas thob 'gyur/ /thabs de 'dir ni bshad par bya/ /gzhon nu zur phud lnga pa ni/ /thugs rje ldan pa 'jam pa'i dbyangs//rgyal sras stong phrag brgyad dag dang / /lhan cig tu ni rab gshegs nas/ /dbang chen zhes bya'i ri bo chen po ni/ /shar dang nub tu chu gter zab mo gnas/ /gang gi phyogs gnyis me tog 'bras bus brgyan/ /rig 'dzin rnams kyis rol pa'i gnas der bzhugs//shes bya kun la ma thogs pa'i/ /spyan dang ldan pa 'jig rten dbang / /rgyal sras bye ba'i tshogs bcas pa/ /gnas skabs der ni der gshegs nas/ /lha dang lha min 'byung po'i dbang / /lto 'phye'i bdag dang klu yi gtso/ /bskal bzang mthu dang ldan pa yi//me dang mi rnams der 'dus la/ /gang zhig bla na med pa mchog /gzi brjid chen po theg mchog ste/ /bye ba phrag brgya'i chos kyi gtam/ /yang dag bgros nas rab tu bstan/ /b+har ta'i dum bu'i 'dzam gling skyes/ /ko sa la dang yangs pa can//lus 'phags me thi la dag na/ /bskal bzang gcig gcig de dag yod/ /blo gros che ldan lnga brgyas ni/ /de 'dra'i gtam ni yang yang thos/ /gzhan la phan byed rig pa'i blo/ /rmad byung mang po skyes par gyur/ /dka' ba brgya phrag 'bad pa yis//dbang chen gyi ni ri la song / /gzhon nur gyur pa mi snang nas/ /phyag na pad+mo'i zhabs la btud/ /yang dag mchod nas rab dris pa/ /tshangs la sogs pa'i lhas btud cing / /'gro ba drug la mnyam par brtse/ /thos nas bdag cag 'dir 'ongs lags//gang gi zhabs bkru'i chu 'thungs pas/ /bde med bde ba ldan gyur cing / /'dod pa dang ni thar pa 'grub/ /lha yi'ang lha khyod phyag 'tshal lo/ /gang zag dang ni chos la sogs/ /'ga' yang ma gzigs dmigs su med/ /'on kyang mi zad thugs rje yis//kun la skyob mdzad 'di re mtshar/ /'dir 'ongs 'di dag la brtse bas/ /don chen 'ga' zhig zhu 'tshal na/ /phyi ma'i dus 'gar phan pa'i slad/ /yang dag gsung pas bshad du gsol/ /ma 'ongs pa yi dus na ni/ /rig sngags smra bar khas 'che zhing //rgyal ba'i dgongs pa mi shes pa/ /de dag phyin ci log tu blta/ /gang phyir 'di dag yang dag pa'i/ /lam du nges par 'jug 'gyur ba/ /ji ltar phyugs la dbyug pa lta'i/ /thabs de gang las rnyed par 'gyur/ /de nas bcom ldan snying rje che/ / spyan ras gzigs kyis 'di skad gsungs/ /'gro rnams mang la phan 'dod pas/ /'dri ba 'di ni legs so legs/ /dbang chen ri la mchod 'os pa'i/ /gzhon nur gyur pas sngon bshad do/ /don 'di yang ni legs par bstan/ /mnyam med sems can don byed ba'o//skye bo 'di la phan byed phyir/ /sngags 'dzin ral pa gcig ma longs/ /snying rje ldan pa don yod pa'i/ /lcags kyu khyod ni mthu chen ldan/ /khyod dag phan tshun bgros pa yis/ /don chen 'di ni smra bar gyis/ /stobs bcu ldan pa'i bstan pa la/ /phyi ma'i dus la don chen 'gyur//'jam dpal rjes su 'jug pas ni/ /khyod kyang smra ba'i mthu dang ldan/ /de skad gsungs nas 'jig rten mgon/ /stong pa nyid kyi gnas pas bzhugs/ /de nas yang de'i tshe 'phags pa'i gtso bo don yod lcags kyus gsungs pa/ phyi ma'i dus na sna tshogs pa'i//blo gros ngan pa skyes pas na/ /lha mo sgyu 'phrul sras kyis bstan/ /shin tu nag pos dri mar byas/ /brjod pa sna tshogs tha dad de/ /skye bo tha dad spyod la bsngags/ /de phyir de ltar spyod rnams la/ /dbang po med pas rnam par 'khrugs/ /'jig rten 'das pa'i dngos grub kun//nam yang thob pa med de bzhin/ /gzhan yang dka' bas 'grub pa dang / /ngal ba 'ba' zhig bskyed par byed/ /shin tu sgrib byed kyis bsgribs pas/ /yi dgas sogs kyang lkog gyur na/ /lha rnams smos kyang ci dgos te/ /rtog ge phran tshegs 'jug shes nyid//de tsam gyis kyang grub par blta/ /'phags pa'i skye bo yid kyi lus/ /mthong ba'i spyod yul nam yang ci/ /don mchog 'dod pa'ang rnyed mi 'gyur/ /'di nas byang gi phyogs cha na/ /kai la sha yi ri bo'i ngogs/ /grong khyer ka lA pa zhes yod/ / rtag tu bde zhing 'byor pa yin/ /de na rgyal ba'i sras po mang / /mi bdag gtso bo mchog 'phags te/ /de rnams rtag tu chos dang ldan/ /g.yo sgyu bye med cing phra ma med/ /rigs dang rigs min dbyer med de/ /gzugs ldan stobs dang ldan pa yin/ /skyes bu'i bgrod pa dpag tshad bcu//rta yi nyi shu so ldan gyi/ /lnga bcu'i lam ste nyin gcig la'o/ /yams dang nyer 'tshe yongs med de/ /'phrog byed lag na rdo rje sogs/ /nyin rer rtag tu srung bar byed/ /rnam par 'dren pa'i bstan bcos ni/ /phyogs de dag tu rnam par rgyas/ / shes rab pha rol phyin mdo dang / /mdo sde lang ka'i grong du 'jug /dgongs pa nges par ston pa dang / /'dus pa chen po'i tshogs kyis te/ sgrib pa rnam par sel ba yis/ /mngon du byas pa'i dkon mchog sprin/ /bden pa'i le'u mchog gi rgyud/ /drag shul stobs dang ldan pa ni//sor mo'i phreng ba'i ched gsungs dang / /sdong pos brgyan pa la sogs pa/ /thams cad yul de las rab 'byung / /'od dpag med pa'i 'jig rten dang / /mngon dga'i bkod pa gsal ba dang / /rnam snang mdzad pa'i zhing khams ni/ / rgyan gyi bkod par bcas pa dang / /stug po bkod pa'i mdo sde dang / /dbang phyug chen pos bshad pa ni/ /gnas gtsang chen po la sogs par/ /rdo rje snying pos bshad de bzhin/ /phal po che yi mdo sde rnams/ /thams cad de na rnam par spyod/ /gang la dpe ni 'bum phrag gis//gsal bar byas pa phyi ma'i rgyud/ /de bzhin gshegs rnams snying po'i don/ /phyir mi ldog pa'i gtam yang yin/ /pha rol phyin pa drug gi mdo/ /stong phrag lnga bcur ldan pa yod/ /rig pa 'dzin pa'i sde snod ni/ /'bum phrag nyi shu der spyod de/ /de dag rjes su 'jug pa yi//nges par bstan pa 'bum phrag brgya/ /mkha' dang mnyam pa rgyud kyi rgyal/ /dngos grub nges par bstan pa yi/ /dges pa'i rdo rje chen po dang / /rjes su rig pa rnal 'byor rgyud/ /bde gshegs kun gyi 'dus pa ni/ /stong phrag nyi shu rtsa lnga pa/ /dam pa dang po'i sangs rgyas rgyud//sgyu 'phrul dra ba gnyis gnyis pa/ /rgyal ba rgya mtsho rnam dbye ba/ /rnal 'byor rnal 'byor ma rgyud kyis/ /rnam par phye ba brgyad po rnams/ /khri phrag gnyis dang stong phrag ni/ /gcig ste drug brgyas lhag pa'i lo/ /lhag pa'i brgya phrag mang por ni//phyogs der mngon sum spyod pa'o/ /phyag na rin chen blo yi bdag /spos kyi glang po ma pham pa/ /bde ldan dbang phyug nam mkha' mdzod/ /rdo rje gzi brjid rdo rje snying / /gnod sbyin gtso bo la sogs pas/ /de rnams rjes su 'jug pa yis/ /tshig rnams du ma rnam par phye//nan tan chen por gtad pas na/ /ma log don chen 'tshol ba rnams/ /gangs ri'i dbang po der song nas/ /mi dag grub pa rnams la dris/ /gdon mi za bar don grub nyid/ /de nas 'phags ma rdo rje srin mo ral pa gcig mas zhus pa/kyai rgyal ba'i sras po ma 'ongs pa'i dus lnga brgya tha ma la/ de bzhin gshegs pa'i rjes su 'jug par 'dod pa rnams kyang / mu stegs can gyi gsang tshig 'tshol ba la/ /mngon par mos pas mchog tu gsungs pa'i don las/ phyir phyogs pa de dag yang dag pa'i lam la gzud pa dang /mchog gi skal ba can gang dag rang dang gzhan la phan pa'i dngos grub kyi rgyur grong khyer ka lA par bgrod pa'i thabs de yang dag par bstan du gsol/ dge bsnyen rnam par mi rtog pa ces bya ba dang / bzang po sbas pa zhes bya ba la sogs pa lnga brgya po 'di rnams kyis dngos grub mchog gi don dang /phyi ma'i dus kyi rig pa 'dzin pa'i sde snod la zhugs pa mang po dag gi bde bar 'gyur ba dang / phan par 'gyur ba dang / grub pa mchog tu grub pa bla na ma mchis pa'i slad du bshad par gsol/rab tu bshad par gsol/ legs par bshad du gsol/ don yod lcags kyus gsungs pa/ sngags rigs rnams la phan pa'i phyir/ /khyed rnams legs par mnyan pa dang / /lnga brgya'i tshogs rnams nga la nyon/ /phyi dus don chen 'dir 'byung ngo //'dir sgrub pa po gang zhig legs pa'i lam la gnas pa/ bla na med pa'i byang chub tu sems bskyed cing / dkyil 'khor du dbang bskur ba/ rig pa'i cho ga shes shing dam tshig la yang dag par gnas pa/ de bzhin gshegs pas bstan pa'i rgyud la mngon du phyogs pa/gsal ba/ yid gzhungs pa/ shes pa dang ldan pa des/ dang por 'dod pa'i lha mnyes par bya'o/ /de'i 'og tu mngon du gyur pa'am/ rmi lam du mthong ba yin yang rung ste/ 'dod pa'i lha lan na tan du gnang ba thob par gyur na/ kai la shar 'jug pa'i thabs la brtson par bya'i//gzhan du na kun nas nyon mongs par 'gyur ro/ /rab tu mi gsal bsam gtan dang / /bzlas brjod stobs kyis dman pa dang / /mtshan ma'i dge bas bor ba gang / /'dod pa'i go 'phang grub pa med/ /ngan pa'i lam gyis khengs pa dag//cho ga tsam gyis grub par lta/ /byis rmongs 'jim pa'i gong bu la/ /'dzegs nas zla ba 'dzin par 'dod/ /ci ste gnang bar gyur na 'phags pa 'jam dpal gyi snying po/ /'bum phrag brgyad bzlas shing / /u dum wA ra'i sbyin sreg kyang khri phrag brgyad bya'o//bgegs rnams 'joms pa'i don du/ bdud rtsi 'khyil pa'i rig pa 'bum phrag bzlas shing / sbyin sreg kyang khri phrag gcig go/ /sdang pa thams cad rab tu 'jig pa'i don du/ khro bo chen po rab tu mi bzang pa gshin rje mthar byed kyi rig pa 'bum du bzlas shing /de nas thog ma nyid du keng shu ka'i sbyin sreg stong phrag gcig 'bul lo/ /de'i 'og tu bA Da'i shing gis stong phrag bcu'o/ /de'i 'og tu ni tsan+dan dmar po dang / a b+hI ra'i khu ba la sogs pa rmad du byung ba'i gtor ma dang sbyin sreg stong phrag bcus mnyes par byas te/de thams cad du 'dod pa'i don la gsol ba gdab par bya'o/ /sgrub pa po gang zhig cho ga de rnams brtsams shing / rang nyid dngos grub mchog gi don dang / lho phyogs kyi skye bo mang po la phan pa dang bde ba'i phyir/ grong khyer ka lA par 'jug par 'dod pa/ sdig pa med cing g.yo sgyu med pa/ de dag ni 'chad par 'gyur ba'i rim pa 'dis nges par der phyin par 'gyur gyi/ bar ma dor nyams nyes par mi 'gyur te/ gal te bdag gi tshig 'di brdzun par gyur na/ bdag gis mtshams med pa lnga byas par 'gyur ro//ci ste cho ga 'khrul pa'am/ sdig pa'i sems dang ldan pa dag cig yin na ni/ klu phran nam lto 'phye'am/ gnod sbyin nam/ 'byung po'am/ lha gang dag gtum po rnams kyis chad pa thob par 'gyur gyi grub pa ni nam yang ma yin no/ /grub pa rnams la dka' ba min//'byor pa'i khyad par gzhan dang gzhan/ /sngags dang rlung gi las rnams te/ /rgyud kyi bgrod pa gzhan yin no/ /shin tu nyam chung 'di mi 'grub/ /sgrub po nus ldan grub 'dod pas/ /ma grub de dag legs thob 'gyur/ /rag pa'i cho ga 'di yis so//de nas sgrub po des/ gang du de bzhin gshegs pa rnams mngon par rdzogs par byang chub pa'i shing a shwad+thal mchod pa stong gis yang dag par mchod nas/ lam du 'jug par bya ste/ gling 'di'i nub phyogs kyi rgya mtsho rat+na sA ga ra zhes bya ba la/ ded dpon mchog dang lhan cig gru la zhon pas byang phyogs su bgrod de/gling si ko d+ha ra zhes bya ba dang / nor gyi mdzod ces bya ba'i gling du bgrod par bya'o/ /gling de'i nub phyogs na kla klo'i grong yod de/ sgrub pa po der 'gro bar mi bya zhing / shar gyi phyogs la nye bar brten pa'i grong khyer du zla ba drug sdod par bya'o//de na bde bar gshegs pa gser thub kyi mchod rten yod do/ /de la bskor ba stong phrag lnga byas te de bzhin gshegs pa'i yi ge brgya pa gdon par bya'o/ /de ni 'di yin te/ na ma s+t+rai ya d+hI kA nAM/ ta thA ga ta nAM/ sarba tra a pra ti ha ta/ bAp+ti d+har+m+ma tA ba li nI/oM a sa ma sa man+ta to nya/ a nan+ta bA p+ti shA sa ni/ ha ra ha ra/ sma ra sma ra Na/ bi ga ta rA ba/ /bud+d+ha d+harma te sa ra sa ra/ sa ma ba la/ ha sa ha sa/ tra ya tra ya/ ga ga na/ ma hA war lak+Sha Ne/ dz+wa la dz+wa la na swa ga re swA hA/ dad pa stobs zhan de dang des/ /nam yang grub par yod ma yin//cho ga mi smod sngags la min/ /lha dang chos la 'phyas mi gdags/ /nges par 'grub snyam yid brtan dang / /shin tu dang ba'i shugs stobs kyis/ /'byor pa dang ni grol ba ste/ /dge chos 'joms la nam yang min/ /de nas sgrub pa po de grur bgrod pas b+ha ra ta'i dum bu 'di nyid du 'ong bar bya ste/gzhan du na nor gyi mdzod ces bya ba'i gling de nyid las byang gi phyogs la nye bar brten pa'i gling gzhan dang yul mtha' gzhan mang po dag ni legs par spyod pa ma yin pa'i phyir/ sgrub pa po kun tu 'khyams par 'gyur ro/de la gling 'di ni chu klung sngon po zhes bya ba'i mtsho dang 'bab chu dag dang shar nub tu thad mnyam pa yin te/ de'i phyir dbang po'i phyogs bor nas/ sgrub pa po dbang ldan gyi phyogs su 'gro'o/ /grong khyer rug ma dang / rA sa ri dang / ka Ta tI la dang / ma d+hu wAn d+ha la sogs pa/byang phyogs nas byang phyogs su zla ba drug tu bgrod par bya ste/ de dag gi pha rol na chu bo chen po sa tru zhes bya ba dang / ka kA ri zhes bya ba gangs kyi ri yod de de dag las kyang brgal bar bya'o/ /yul 'khor de rnams na gnas pa'i mi rnams ni/drang po'i rang bzhin can gyi phyir/ bgrod par dka' ba ma yin zhing 'jigs pa yang med do/ /ri de las tu dza na ya zhes bya ba'i sman ro mchog tu mngar ba dang / tI la ka zhes bya ba shin tu kha ba ste de dag kyang 'o ma ltar 'dzag pa dag yod do/ /gang gi me tog nyi ma 'char ka'i mdangs ltar rab tu dmar ba de'i 'dab ma yang dgra sta'i so lta bu/tsher ma rnon po can/ lho ngos su mngon du phyogs pa'i brag las byung ba de ni tu dza na yang yin no/ /ngam grog dag gi ngos la 'phyang zhing 'phyang ba ma he mo'i nu ma lta bu'i me tog dkar po dang ldan pa ni tI la ka'o//de dag gi phyogs bzhir rdo rje srin po stobs po che'i rig sngags lan bdun bzlas bzhin du/ shing ba ta la'i phur bus btab nas de dag gi ba thag dbyung bar bya'o/ /zhag bdun du de dag yongs su bskams par byas nas/ brag gi phug par bdud rtsi thab sbyor bzlas pas bsrung zhing sba bar bya'o//phyogs de na btsag kha dog lnga po dag yod de/ dkar po dang / ser po dang / dmar po dang / nag po dang ljang khu dag go/ /de dag blangs nas gangs kyi chu bos khrus byas nas rdo leb dkar po'i gzhi la lha mo 'od zer can ma'i sku gzugs bri bar bya ste/mdog gser btso ma lta bu/ ka ra bI ra'i me tog ltar dmar ba'i spyan gsum pa/ g.yas kyi zhal dmar po g.yon gyi zhal ni phag gi gdong nag po rab tu khros pa/ dar sngon po'i ga sha 'phyang ba/ nam mkha'i phyag rgya cung zad gsal bar byed pas/lha dang lha ma yin dang phyugs rnams dbang du byed pa/ phyag dang po gnyis kyis me tog gis mang dang gzhu 'gengs pa/ bar ma gnyis kyis khab dang skud pa dang mya ngan med pa'i shing bsnams pa/ tha ma gnyis kyis thod pa dang kha T+wAM ga lte ba'i dkyil 'khor gyi g.yas g.yon du 'dzin pa/phag gi steng na sdang ba dang gdug pa thams cad yongs su gnon pa/ 'di lta bu bris nas cho ga ji lta bas mchod pa dang bzlas pa bya'o/ /de la sngags ni 'di yin te/ na mo rat+na tra yA ya/ tad+ya thA/ oM btA la bi dA li/ ba ra li ba ra ha mu khA+e sarba du Sh+TA na pra duSh+TAn/b+han+d+ha b+han+d+ha mu khaM swA hA/ zhes pa 'dis a shwo ka'i shing dang / me tog dmar po brgya phrag lngas sbyin sreg bya'o/ /snying po'i sngags 'di yang khri phrag bzlas pa bya ste/ oM badzra be ta lI hUM phaT/ tshangs par spyod la legs gnas pa/ snying rjes sgrub pa legs pa ste//gdug la gdug pa nges sbyor ba/ /rtag tu byams pa'i yid kyis so/ /gang gang 'dul la de dang de/ /sngags pas rab sbyor de de'o/ /nyon mongs spyod las nam yang min/ /nang gi bdag nyid dul bas so/ /de'i 'og tu bdud rtsi 'dzag pa'i sman de dag btags te/gangs kyi ba men dag gi 'o ma lhung ba la yongs su bskol nas/ bcom ldan 'das ma'i spyan sngar gzhag par bya'o/ /snying po'i mthar bdud rtsi thigs bsgrubs shing ces spel bas/ lan stong du bzlas par byas nas/ lha mo la yang dag par mchod de dngos grub blangs nas/sman btung bar bya'o/ /phyi nas sku gzugs de yang byang phyogs la bltas te bzhag la me tog dang 'bras bu sna tshogs pas spa bar bya'o/ /des ni bkres pa dang / skom pa dang / ngal ba dang / dub pa med de/ lha mo'i mthu las bar du gcod pa thams cad kyang bdag gi dbang du byad par 'gyur ro//de nas byang phyogs su bltas nas nyin zhag nyi shu rtsa gcig tu 'gro bar bya ste/ lam de la ni rtswa yang med/ shing gel pa yang med/ chu yang med do/ /de'i pha rol na nags 'thug po dag yod de/ sbrul dang stag la sogs pa gnas pa'i 'brog dgon pa'i lam la nyi ma bcu gnyis 'gro bar bya'o//de'i pha rol na ri'i rgyal po gan+d+ha ra zhes bya ba yod de/ dpangs su ni dpag tshad nyi shu'o/ /ri de ni sman rnam pa sna tshogs kyis gang ba yin no/ /de na ni seng ge gshog pa can dag gnas te/ nyi ma re re ra yang srog chags mang po dag gsod par byed do//der ri dgas kyi khyad par zhig lus sgyur ba zhes bya ba yod do/ /de lus kyi cha byad rnam pa sna tshogs par bsgyur ba yin te/ seng ge des gsad pa'i khrag las/ rdo leb nag po la srin mo man de ha zhes bya ba rnam par gtsigs shing 'jigs su rung ba'i lus can/kha dog dmar ba mi'i pags pas smad dkris shing / lag pa g.yon pa na ral gri 'dzin pa/ g.yas pa na ni ba lang gi pags pa gsar pa'i nang du sha khrag dang snying gis gang ba 'dzin cing za ba bris te/ snod dag tu sha dang khrag gi gtor ma bsham par bya'o//bdag nyid gshin rje mthar byed mi bzad pa dbyug pa dang zhags pa thogs pa ma he la gnas par byas nas/ oM hrIHkA la rU pa hUM khaM swA hA/ /kreM ka re kre ka re/ man+d+hai ha rak+Sha sI/ A gats+tsha A gats+tsha hrIH/ dzaHzhes stong phrag bcur bzlas pas de mngon sum du 'ong bar 'gyur la/khrag gi mchod yon dang sha'i gtor ma dag sbyin nas thod pa'i phyag rgya ston te/ khro bo chen po'i stobs kyis gzir bar bya'o/ /des kyang sgrub pa po ci 'dod cis smra bar 'gyur ro/ /kye srin mo bdag sems can thams cad la phan par 'dod pa dang bde bar 'dod pas/ grong khyer ka lA par 'gro'i/ yul stongs pa 'di rnams su kha zas 'byor bar gyis shig /des kyang de bzhin du bya'o/ /de nas de mi snang bar 'gyur te/ shing ardzu na'i rtsa ba na rab tu chags pa/ me tog kun da ltar kha dog dkar ba'i bcud ro sbrang rtsi 'dra ba dag /nub mo dang nub mo gnas pa'i sa dag dog la ster bar 'gyur ro//de nas byang ngos su gangs can chen po zhes bya ba'i ri yod de/ dpag tshad brgya phrag gsum gyi khor yug can/ de ni gnod sbyin rnams dang / dka' thub can rnams dang / grub pa rnams dang / mi'am ci dag gis yongs su gang ba yin no//ci ste sgrub pa po pha rol gnon pa'i 'phrul dang ldan pa yin na ni/ der song nas dga' bar bya/ rtse bar bya/ longs spyod dag kyang bya ste/ de nas mthar gyis de dag gi phrag pa la thogs nas grong khyer ka lA bar yud kyis phyin par 'gyur ro/ /ci ste pha rol gnon pa'i stobs de med na ni der 'gro bar mi bya ste/rlung gi phyogs kyi lam chen po rab tu gsal ba la nye bar brten te myur bar 'gro bar bya'o/ /srid gsum gnas kyi rgyud rnams ni/ /bsod nams chung yang 'grub par bla/ /tshangs 'joms de yi grogs kyang ste/ /che ba'i che ba'ang rnyed ma yin//rtag tu dge ba'i stobs dang ldan/ /bag med don gyi de nyid rig /byang chub sems ni yang dag bskyed/ /mchog gi rig sngags de yis 'grub/ /gangs ri de las shar dang nub tu chu bo rab tu 'bab pa/ sa'i gzhi la lu ma chen po stong phrag brgyad cu dang yongs su 'dres te/mtsho ltar snang zhing rgyu ba yang mi mngon pa/ kha dog dkar por snang ba yod de/ de la 'di ni chu bo sI ta zhes bya'o/ /chu rlung 'di ni dkyus su dpag tshad stong phrag phyed dang gsum pa/ shar dang nub tu rgya mtsho dug can pa la yongs su 'jug pa/ zheng du ni dpag tshad tsam mo//chu 'di ni shin tu grang ba yin te/ dmyal ba'i 'gro ba ma gtogs pa/ bya dang nya dang chu srin la sogs pa srog chags 'ga' yang med do/ /chu bo de'i tshur 'gram na zangs kyi mdog ces bya ba'i ri phug pa stong dang ldan pa dag yod de/ shin ri Sha ka dang / ku lum ka dang /ta ma ru dang / de ba da tu dang / shug pas yongs su gang ba yin no/ /ri de la ni srin mo glog 'gyu ma zhes bya ba gnas te/ de'i cho ga yang snga ma dang mtshungs pa las/ lag na ni gtun shing 'dzin pa/ glang po che'i lus la za ba/ char sprin gyi mdog can te/ gany+tsa dang / ta ri na dang / nags kyi ba lang dang / glang po che'i khrag rnams kyis bri bar bya zhing / gtor ma yang de dag rnams nyid do/ /bdag gi rnal 'byor ni khro bo gshin rje gshed po zhal drug pa dus mtha'i sprin dang mtshungs pa/ zhabs drug pa/ phyag bcu gnyis pa/ ral gri dang dgra sta dang /gri gug dang / ga da dang / 'khor lo dang / tri shU la rnams g.yas na 'dzin pa'o/ /gshin rje'i dbyug pa dang / dus kyi zhags pa dang / kha T+wAM ga dang / lcags kyu dang / thod pa khrag gis gang ba dang / sdigs mdzub rnams ni g.yon pa na'o/ /rnam pa 'di lta bu las sngags ni 'di yin te/oM sarba duSh+Tu na staM b+ha ya hUM/ na di wa rA thA ra Ni ku mA da krI Da tA pi Ne ban+d+ha ban+d+ha sa ma ya ma nu sa ma phaT phaT swA hA/ zhes pa'o/ /p+Yi+u rung tsa la tsa la/ pra tsa la pra tsa la/ p+Yi+u rud dzi hwa/ sa ha sra mu kha sa ha sra ba ha we/ra ra ra ra ra k+Sha si b+h+yoHb+h+yoHA kAR+Sha ya jeH/ zhes pa ni srin mo'i sngags so/ /de la sgrub pa pos lam ston cig ces brjod par bya ste/ des kyang chu bo sI ta la lam ston par 'gyur ro/ /chu klung de'i rab tu grang bas ni/ sa'i steng gi gangs dang rlung po'i reg pa thams cad kyang zil gyis gnon pa'i phyir/dgun zla 'bring po la yang chab brom chags pa med na/ srin mo 'di'i rdzu 'phrul gyis/ /dbyar zla ba dang po la yang chab brom shin tu brtan par chags nas/ sgrub pa po 'jigs pa med pa nyid kyis chu bo'i pha rol tu 'gro bar 'gyur ro/ / chu bo 'di ni b+ha ra ta'i dum bu zhes bya ba/ gling 'di'i phyed kyi dbus la gyu ba yin te/ lho dang byang du yul chen po dgu bcu rtsa drug dang / dgu bcu rtsa drug dag gnas pa yin mod kyi/ 'on kyang shar nub tu ni byang phyogs lhag par yangs pa yin no/ /chu bo de'i pha rol na/ shing ke ta ka dang /be la dang / ka b+hi ta dang / ba tu sha dang / ba da ra dang / ka pi ta dang / a rdzu na dang / tA la'i nags tshal dag yod de/ der zla ba gcig tu ngal gso bar bya/ rtsa ba dang 'bras bu dag kyang bza' bar bya ste/ gang 'di'i rtsa ba dang 'bras bu dang lo ma dang me tog dag ni bcud dang ldan pa dang mthu dang ldan pa dag yin no//der lha mo skul byed ma'i rig pa sangs rgyas bye ba phrag bdun gyis byin gyis brlabs pa/ yi ge dgu pa'i gzungs sngags stong phrag lnga bzlas pas sgrub pa po rang gi yan lag las/ khrag nag po nag por snang ba dag zag par 'gyur ro//ci ste rmi lam du de ltar gyur na yang rung ste/ lus yang med cing stobs dang ldan pa dang shin tu yang bar 'gyur ro/ /dam tshig rnam par spangs dang bla ma smod/ /dus min 'chi dang dmyal ba brgyad par 'gro/ /dkyil 'khor ma mthong dbang bskur dman pa yang / rig sngags sbyor ba nam yang grub pa med/ /khengs zhing nga rgyal khro la mi bden pa/ /dngos grub thob ces rgyal ba mi gsung ste/ /mi rtag sdug bsngal stong pa'i don sems pa/ /mi de dag ni myur 'grub 'phags rnams gsungs/ /rigs dang gzugs dang nor dang dbang phyug dang /chos dang rig pa sngags kyis myos pa spang / /rmi lam gzugs brnyan dri za'i grong khyer bzhin/ /byed po bya ba dang ni las rnams mthong / /ma chags dul dang yang dag mnyen pa'i sems/ /mchod dang sbyin pa bzod dang brtson 'grus bskyed//bdag dang bdag gir spong la mngon dga' ba/ /de dag dngos grub mchog la reg par 'gyur/ /yang de nas nags tshal de las kha TU dza'i 'bras bu gser gyi mdog dang mnyam pa dag blangs te/ lam rgyags su 'khur bar bya'o/ /'dir ni sgrub pa po rang nyid kyis ji tsam lan nus pa de 'khur bar bya yi//nam yang lcid kyis non par mi 'gyur bas/ /mi thegs pa'i dogs pa mi bya'o/ /nags de nyid dang bar mtshams med par gangs kyi ri chung ngu chung ngu dag gral du bsgrigs pas shar nub kyi rgya mtsho'i bar khyab pa yin no//de dag las chu 'bab pa thams cad kyang lho phyogs kyi ngos su 'bab pa yin pas/ de dag tu chu mang po can no/ /ri de dag las brgal nas byang phyogs su dpag tshad lnga bcu tshun chad na ni 'thung ngu rung ba'i chu med pa yin no//'on kyang sgrub pa po de lus stobs dang ldan pa dang yang ba'i phyir/ zhag bdun du thang chen po de'i pha rol tu phyin par 'gyur la/ kha TU dza'i 'bras bu de zos pas/ bkres pa yang med skom pa yang med do/ /thang de 'das pa na/ sngon mang du khyer du zin yang rung ste/'bras bu de yang zad par 'gyur ro/ /de'i nub kyi mtshams na/ ri bo shin tu dkar ba nags tshal yid du 'ong ba du mas mdzes pa zhig rgyang ring mo nas mthong bar 'gyur mod kyi/ sgrub pa po der 'gro bar mi bya'o/ / de ci'i phyir zhe na ni/ srin mo zangs kyi mchu can lnga brgya dag gnas te/ lha ma yin gyi pho nya mo de dag gis sgrub pa po la 'tshe bar byed pa'i phyir ro/ /de lta bas na byang phyogs su dang po'i lam po che bzung nas 'gro bar bya'o/ /nyi ma gcig gis ri bo ke ta ra zhes bya bar phyin par 'gyur ro//de yang kha dog nag cing ngan pa/ 'jigs pa bskyed par byed pa/ ka ba btsugs pa lta bu/ dpag tshad bcu'i dpangs dang ldan pa yod do/ /ri de'i nang ni gser dngul 'ba' zhig gis gang ba yin te/ de'i phyogs bzhin ni pad+ma dang / u tA ga'i mtsho/ ngang pa dang / tsa kra ba ka dang / ka ra N+Da la sogs pa chu la rgyu ba'i 'dab chags gzugs dang kha dog mdzes pa skad snyan pas gang bdag yod do/ /ri de la 'jig rten skyong ba 'phags skyes po/ /dus dus su dga' zhing rtse bar byed pa yin te/lha min gyi lang tsho ma dag dang / gdug cing gtum pa'i klu rnams kyi bu mo sdug gu ma stong snyed kyis mchod par byed do/ /de'i 'khor du rtogs pa'i yi dgas mthu che zhing rdzu 'phrul che ba mang po dag kyang yod de/ der sgrub pa po de ci ste 'byor bar gyur na ni/rtsa ba dang 'bras bu rnams dang na ri ka la'i 'bras bu dang / sha dang nya sha dag gis gtor ma rnam pa sna tshogs pa dag bya'o/ /ci ste 'byor par ma gyur na thams cad yid kyis bya'o/ /de la sngags ni 'di yin te/ oM bi bi bi bi ba ru d+hA ka sha sa pa ri wA re b+h+yaH/khu ni khu ni pre to ta k+Shis ta/ i maM ba ling gr-ih+Na gr-ih+Na sa ma ya ma nu sma ra hUM hUM phaT phaT swA hA/ de bzhin du sbos dkar dang / thang chu dang sha'i bdug spos dag kyang sbyin par bya'o/ /de nas ni des srung ba byed de mi 'am ci dang / lha min dang / srin po dang / yi dgas dang /sha za dang / mkha' 'gro ma rnams kyi gnod pas mi tshugs par 'gyur ro/ /'ga' zhig rnam thar gsum gnas gzhan ni rtse ba'i bdag nyid dpa' bo dang / /byin rlabs rim pa phan tshun rgyu dang 'bras bur mkhas pas rig par bya/ /'dod pa'i dpung 'joms de las dag pa'i lam ste grub pa rjes su 'jug /mun pa nyams dang dga' ba'i rgyu las rab bde ci phyir thob ma yin/ de nas sgrub pa po byang phyogs su song na mi ring ba na me na ko zhes pa'i ri chen po yod de/ de ni tsam pa ka dang / karko la dang / ma ra ka dang / ke tu ka dang / kim+pa ka dang /nA ga puSh+pa dang / tsan dan sa mchog rnams kyi nags kyis bskor ba/ ri de'i khrod na srin po'i bu mo rta'i gdong pa can dang / lha min mo dag dang / klu phran gyi bu mo dag gar dang dbyangs dang rol mo sna tshogs pas rtag tu rtse bar byed pa dag yin te/ der sgrub pa po bud med de dag la chags par yang mi bya/glu dang rol mo de dag la dga' bar yang mi bya ste/ gzhan du na bsod snyoms dag blangs te 'gro bar bya'o/ /de'i pha rol na chu bo chen po shar nas nub tu 'bab cing / rba klong 'khrugs pa shin tu bgrod par dka' ba yong de/ chu klung de'i ming ni si tA lo ta na zhes bya'o/ /de la ni nya rnams kha dog sna tshogs pa dang / gdong rnam pa sna tshogs pa dag yod de/ stag dang / seng ge dang / gung dang / ba lang dang / sbre'u dang / ne tso dang / khra dang / mi'i gdong la sogs pa'o/ / chu klung de'i skabs 'ga' na ni/ rdo las skyes pa'i n+ya gro d+ha'i sdong po yal gas phan tshun gyi 'gram du khyab pa dag yod de/ shing de la brten nas sgrub pa po 'gro bar bya'o/ /yang na ni nya'i stobs kyis 'gro bar bya ste/ phyogs de dang nye ba na/ lo hi ta zhes bya ba'i ri dmar po chung ngu mang po dag yod de/de dag la ni sA lu dmar po dang / mud ga dang / man Du pa dag ma rmos par skye ba yin te/ de las blangs nas zan du bcos te/ phyogs phyogs su shing las sbrang rtsi mang po lhung ba dag kyang blangs shing / de dag bsres te nam mkha'i mdzod ces bya ba 'phags pa'i sngags kyis yang dag par spel zhing sbyangs la/sngags 'dis nya'i tshogs rnams la gtor mar sbyin no/ /oM maM maM maM maM maM ma ta s+ya rA dza/ ma ra s+ya ga Na sa hi ta b+hu ny+dza ho b+ha k+Sha ho/ /sarba ma ta s+ya de wa tA i maM ba liM g+h+r-i h+Na g+h+r-i h+Na ka ra ka ra ki ri ki ri ku ru ku ru ma ra ma ra mi ri mi ri mu ru mu ru/ma ma kA t+yaM s+ya d+ha ya/ sarba bud+d+ha adz+nyA pa ya ti swA hA/ de ltar lan lnga brgyar gtor ma sbyin cing / 'dod pa'i lha la gsol ba gdab par bya'o/ /der nya rnams kyang rgyal po sgrub pa po'i mdun du 'ongs pa la/sgrub pa pos smras pa/ kye nya'i rgyal po/ /sems can thams cad la phan pa'i don dang / bde ba'i don du kho bo ni grong khyer ka lA par 'gro'i/ chu bo'i pha rol tu bsgral bar mdzod cig /gnas 'di la ni de bzhin gshegs pa rnams dbang po'o zhes brjod par bya'o//de nas nya'i rgyal po des sgrub pa po de rgyab tu khur nas chu bo'i pha rol tu 'gro bar 'gyur ro/ /ka ka ra'i gangs kyi byang phyogs nas chu bo 'di'i bar gyi lam gang yin pa de dag na ni/ mi'i 'gro ba gnas pa med de/ gang mi ma yin pa'i 'gro ba dang / gnod sbyin gtum po mi bzad pa dag gnas pa yin no/ /'on kyang lam 'di dag gi shar dang nub tu dpag tshad lnga brgyas bcad pa'i pha rol na ni/ grong dang grong khyer dang grong rdal dag kyang yod mod kyi/lam de dag nas song na ni/ lo brgya phrag gis kyang grong khyer ka lA par phyin par mi 'gyur te kun tu 'khor bar 'gyur ro/ /chu klung sI ti'i byang phyogs de'i bar mtshams thams cad ni ri kha ba can mang pos kun tu gang ba yin no/ /'on kyang gangs kyi ri bar bcad pa ni med de//de nas chu klung de yongs su brgal ba'i byang phyogs na ni/ 'dzam bu'i gling gi byang phyogs kyi grong khyer rnams yod de/ yul dang grong dang grong khyer dang grong rdal dag gis gang ba/ rab tu 'byor ba dang bde ba dang lo legs pa yin no//gang la snying rje'i bdag po ni/ /mig gsum gzugs kyis gnas pa ste/ /de yi gnas kyi mtshan pas na/ /sham+b+ha la zhes rab tu grags/ /gang la sham+b+ha las mtshan pa/ /seng ges mtshan pa'i rgyal mtshan ni/ /seng ge'i rgyal mtshan rab grags ltar//sham+b+ha'i yul zhes de la brjod/ /gang na kla klo med pa dang / /bden smra brdzun pa ma yin dang / /mun pa'i stobs ni nyams gyur la/ /snying stobs yon tan rgyas pa yin/ /chu bo de dang kai la sha'i bar gyi yul ni rnam pa mang po ste/nya zhes bya ba'i yul dpag tshad nyi shu'o/ /bu la ni do zhes bya ba yang dpag tshad nyi shu'o/ /b+hang s+ye na zhes bya ba dpag tshad brgya'o/ /tsIn zhes bya ba dpag tshad stong ste dbus kyi cha la'o/ /dar do zhes bya ba zhi dag tshad brgya'o/ /ku ru zhes bya ba yang dpag tshad brgya'o//b+ha dri ka zhes bya ba dpag tshad lnga bcu'o/ /de dag gi pha rol na/ gan+d+ha ra zhes bya ba dpag tshad nyi shu'o/ /kA sha zhes bya ba dpag tshad nyi shu'o/ /b+ha tra zhes bya ba dpag tshad nyis brgya'o/ /ma hA tsI na zhes bya ba dpag tshad stong ste dbus kyi cha la'o//b+ha ra d+hau zhes bya ba dpag tshad brgya ste ri'i ngos la gnas pa'o/ /pr-i gi ka zhes bya ba dpag tshad nyis brgya'o/ /de dag gi yang pha rol na/ /ma hi Sha ka zhes bya ba dpag tshad nyis brgya'o/ /ma hi la ko zhes bya ba dpag tshad stong ste dbus kyi cha la'o/ / barba ra zhes bya ba dpag tshad nyis brgya'o/ /pu tA pha la zhes bya ba dpag tshad lnga brgya'o/ /de dag gi pha rol na/ ka Du ka zhes bya ba dpag tshad lnga bcu'o/ /khA ra zhes bya ba dpag tshad lnga brgya ste/ dbus kyi cha la'o/ /kam+po dzi zhes bya ba dpag tshad brgya'o/ / de dag gi shar dang nub kyi cha dag la yang / yul 'khor dang grong khyer gzhan dag kyang yod do/ /de dag chu ni mang po dang / /mtsho dang mtsho bran du mas brgyan/ /gangs kyi ri dang ri bo bzang / /sman ljongs nyams dga' du ma dang / /nags dang kun dga' yid 'ong dang //sman rnams dag gis gang ba yin/ /rgyal po'i pho brang sna tshogs dang / /tshong 'dus dang ni tshong khang dang / /zong rnams rnam pa sna tshogs dang / /yo byad rab tu rgyas pa yod/ /de na 'jigs pa 'ga' yang med/ /nyam ngar gyur pa yod ma yin/ / 'on kyang de la mi lta ste/ /sred pas sgrub po'i gegs byed do/ /grong khyer mchog ni ka lA pa/ /'ba' zhig bsams te 'gro bar bya/ /rgya yul rgya yul chen po dang / /ba yi la go kha ra rnams/ /byang nas byang du bgrod bya ste/ / lam de shin tu ring ba yin/ /stong phrag mang po de dag kyang / /sngags kyi shugs 'chang de yis ni/ /zhags bdun zla ba phyed la sogs/ /zla drug las gzhan lhag pas min/ /de rnams las kyang rab brgal na/ /'byung khungs rnam pa sna tshogs yod/ / kha cig la ni dug gi rgyun/ /khyad par khyad par ldan pa babs/ /gser gyi rdul brtsegs ri bo dang / /de bzhin dngul dang zangs kyi sde/ /kha cig lcags dang a b+ha dang / /rang ga b+ha da ga de bzhin no/ /de dag sa 'di 'thug po dang / /bye ma rdo bas g.yogs pa yin//gseg ma rnam pa sna tshogs dag /kha cig rin chen du mas khyab/ /yul de dag gi sa phyogs na/ /rtswa dang ljon shing rnam par spangs/ /nor bu dzi bAn+ti dang ni/ /byu ru rnam pa du ma skyes/ /gser las 'chi bar byed pa'i chu//smyo bar byed pa dngul las te/ /gzhan ni spu dang pags pa lhung / /kha cig du ma'i nad rnams so/ /'byung khungs dag nas dpag tshad gsum/ /'das na dri bral chu nyid de/ /sgrub po sngags kyi mthu yis ni/ /de kun yon tan byed pa las//gser gyis tshe ni ring po ste/ /dngul gyis de bzhin mdangs bzang ba/ /lhag ma gang rnams de rnams kyi/ /nad kun 'jig par byed pa yin/ /yang de dag brgal ba'i pha rol na/ ri lnga pa zhes bya ba/ rin po che du mas brgyan pa/ shing a d+ha dang / swa wa la/ shal+ma li dang / sA la dang / ta ma la dang / da shA ma dang / niSha kA ra dang / a mra dang / ka ra bI ra dang / shi lin dang / ba gu la dang / gan+d+ha mod dang / ma do d+ha ma la sogs pa ljon shing gi rigs brgya phrag du mas gang ba yin no//ri de la ni mi'am ci dang / mi'am ci mo dag 'dod pa'i yon tan sna tshogs kyis rtse bar byed cing rtag tu dga' bas gnas pa yin no/ /de rnams kyis sgrub pa po la 'drid par byed pa'i phyir/ rab tu snyan pa'i glu dang rol mo byed pa dag kyang yod/bsdig pa'i phyir 'jigs pa'i sgra 'byin pa'am/ gzugs sna tshogs su bsgyur ba dag kyang yod/ rab tu skyo bar byed pa'i phyir/ dud mo la sogs pa sna tshogs pa sbyor bar yang byed do/ /de dag la sgrub pa po chags par mi bya/ 'jigs par mi bya/ skyo bar mi bya ste/ gzhan du na stong pa nyid kyi gnas pas zil gyis gnan te 'gro bar bya'o/ /gal te rnam pa de lta bu la sa gzhan pas 'gro na ni/ sgrub pa po la sdug bsngal chen po ster ro/ /de nas ri bo de yang 'das pa na b+ho na dang la su dA b+ho na dang /sra b+ho na zhes bya ba'i yul chung ngu dag yod do/ /de dag na ni rdo rje mkha' 'gro ma dag mi'i bu mo rdzu 'phrul can gyi rnam par gnas so/ /der sgrub pa pos zhag bdun du gnas par bya zhing gsol ba gdab par bya'o/ /de nas de rnams kyis smras pa/kye sgrub pa po khyod la ci zhig dgos/ sgrub pa pos smras pa/ bdag grong khyer ka lA par myur du bgrod par mdzod cig /de nas mi mo rdzu 'phrul dang ldan pa gcig cig gis/ sgrub pa po phrag pa la thogs te/ dpag tshad bzhi yis mtho ba'i gangs kyi ri bo chen po dang /gangs khrod kyi lam dpag tshad brgya phrag lhag pa yang chu tshod gcig gis mngon par bgrod nas/ ri bo tsan+d+ra ka la zhes bya ba shing hi na ta la dang / ma tA la dang / ko la ka dang / sin+d+hu wa ra dang / na gu ma la dang ka dwan dang /da so ma lar+d+ha dang / sa ma na dang / ni tsu la da dang / bi du rma dang / ti na bu la sogs pa sna tshogs pas yongs su gang ba/ sman ljongs shin tu nyams dga' ba dang bcas pa der phyin par 'gyur ba'o/ /sgeg pa'i gzugs la'ang dga' min te//cha byang 'jigs la'ang de bzhin no/ /rdo rje'i mig dang ldan de dag /dge bar spyod la dges par grags/ /de dang sdig ldan rnams la yang / /snying rje ldan rnams mnyam par byams/ /sgrub po rang nyid sdig pa ni//zad pas bde bar snang ba yin/ /ri bo de ni sham+b+ha la'i yul mtha' yin te/ phyogs de na 'phags ma b+h+ri kuTI thor tshugs gcig ma bzhugs so/ /de la me tog kun da dang / ku sum+b+ha'i me tog gis sbyin sreg stong phrag brgyad phul nas/ dngos grub kyi don du gsol ba btab ste 'gro bar bya'o//de las gangs kyi puN+Da rI ka gcig dag blangs te/ oM shwa ta shwe ta shwe ta dzA TI ni shru ti smr-i ti bi dza ya/ b+h+ri swA hA/ zhes pa'i rig pa lnga stong du bzlas nas spyi bor bcings pa tsam gyis gnod sbyin gtum po mtha' dag dbang du byed pa dang /thams cad la 'jug pa'i shes rab thogs pa med pa skye bar 'gyur ro/ /de nas byang phyogs su song ste/ me g+ha ke ru zhes bya ba'i yul lo/ /de'i yang pha rol na sA la dang / tA la'i nags chen po dag yod de/ nags dang grong khyer de dag gi gzhi la dpag tshad brgyas yongs su bcad pa yin no//de dag gi yang byang phyogs su song ba na/ shu ni ka ra Na zhes bya ba'i yul dang / bi bi dza la zhes bya ba/ kha dir dang tsan dan gyi nags chen po dag yod de/ de yang bgrod par bya ba dpag tshad brgya pa yin no//de'i pha rol tu ljongs chen po sam su kha zhes bya ba yod de/ gang 'dzam bu gling na yod pa'i shing gi rigs gang yin pa de thams cad yul de na yod de/ ma lus shing lus pa med pas brgyan pa'o/ /de'i pha rol na kun tu dga' ba zhes bya ba'i nags yod de/de yang 'das pa'i pha rol na grong khyer ka lA pa yod do/ /der sgrub pa pos byang chub sems dpa' sems dpa' chen po mi bdag gi rnam pa 'dzin pa de las chos nyan pa thob par bya ba'i phyir/ pho brang chen po ka lA pa de'i phyogs bzhi kun nas phyag 'tshal bar bya/bdug spos kyang gtul bar bya/ me tog dag kyang gtor bar bya/ bskor ba dag kyang bya ste/ yang na ni zhag gcig /yang na ni zhag bdun/ yang na ni zla ba phyed/ yang na ni zla ba gcig go/ /de ltar sgrub pa po nyid kyi ji lta ji ltar sdig pa zad par gyur pa de lta de ltar/mi bdag byang chub sems dpa'i bka' yis gnang ba byin te/ gang gi zhabs kyi pad+mo'i drung du 'khrid par byed do/ /gang gi tshe sems dpa' chen po mthong ba de'i tshe/ sems shin tu mnyam par gzhag pa dang / g.yo ba med pa dang / dang ba'i sems kyis dbyug pa 'gyel ba ltar/ yan lag brgyad dang ldan pa rab tu 'dud pas/ lan brgya stong du mar phyag bya'o/ /rin po che'am me tog dag kyang gtor bar bya'o/ /gal te de sgrib pa shas chung ba zhig yin na ni/ de'i zhabs la mgo bos gtugs pa tsam gyis 'dod pa'i dngos grub thob par 'gyur ro//rnam pa gzhan ni byang chub sems dpa' de'i bka' las 'dod pa'i dngos grub tu 'gyur la/ de bzhin du gzhan yang / dngos grub phra mo dag dang shes pa dag kyang thob par 'gyur ro//ci ste 'dzam bu'i gling gi lho phyogs su skye bo mang po la phan pa dang / bde ba'i don du nges par bsams pa yin na ni/ de'i thabs gang yin pa de yang dri bar bya zhing / des ji skad bstan pa bzhin du bsgrubs na de kho na bzhin du 'grub par 'gyur ro//de nas sgrub pa pos yul gyi mchog dang / mchog de dag blta bar bya/ de bzhin gshegs pas gsungs pa'i glegs bam dag kyang mngon du bya/ gtsug lag khang rnam pa sna tshogs pa dang / mchod rten rnam pa du ma de dag la yang phyag 'tshal bar bya/smon lam dag kyang gdab par bya'o/ /yul de zlum por mnyam pa ste/ /gangs dang ldan pas bskor ba yin/ /'byung po yi ni phyogs cha na/ /dpag tshad lnga bcur 'phags pa ni/ /mchog dang grags pa rab ldan pa/ /'byung po'i dbang po'i mgrin sngon gyis//rtag tu brten cing dge ba'i sa/ /ri dbang kai la sha zhes bya'o/ /sna tshogs rig pa sman gyi las/ /sgyu rtsal dbye ba gzhan dang gzhan/ /bzo rnams du ma mtha' yas pa/ /nyin dang nyin la rtag tu spyod//pho brang mchog ni ka lA pa/ /rin chen sna tshogs las grub cing / /gru bzhi lham pa'i gzhi la gnas/ /lha yi bzo bos byas pa ste/ /grong khyer de yi g.yas ngos na/ /tsan dan a kar nags kyis khyab/ /dngas shing gsal ba yid 'ong ba'i/ /yid kyi mtsho dag yod pa yin//gang zhig yul de'i dbus na ni/ /de bshad de dag gnas pa'o/ /nags rnams dang ni ljongs dag gi /phreng ba rim pa gsum gyis mdzes/ /grong rdal nyi shu rtsa brgyad dang / yul phran du mas rnam par brgyan/ /phyogs mtshams kyi ni lam dag na//rtse mo brgyad dang brtsegs pa yang / /de rnams la ni go bsgos pa'i/ /srung ba po ni 'bum phrag yod/ /gangs dang ri bo de dag la/ /glang chen spos kyi glang po dang / /mche ba drug pa mu tig can/ /nags tshal ri dgas du mas mdzes//gdong lnga pa dang rkang brgyad pa/ /glang po'i gdong dang bya tshogs dang / /'dab chags skyes bu'i lus can yod/ /dbus las rgyab kyi phyogs cha na/ /rgyang grags tshad kyi ri bo bzang / /tshar du dngar ba bcu yin te/ /bzang skyong lhun po rtse 'dzin dang //sa yi snying po gtsug phud 'dzin/ /ha lA ha la sgrol mdzad pa/ /lcang lo'i bdag po sgra can ma/ /don dam yang dag 'phags de bzhin/ /bcu pa ma rgyal ba las rgyal/ /de dag rnams kyis brten pa ste/ /bye ba phrag brgya'i chos kyi gnas/ / rtag tu byang chub sems dpa' ni/ /stong phrag bcu bcus bsten pa yin/ /kai la sha yi 'gram ngogs na/ /mkha' khams rdo rje rnam par gnas/ /stong phrag brgyad kyi sman rnams dang / /mthu ldan srog chags du ma dang / /me tog 'bras bu'i khyad par kun/ /de na rtag tu spyod pa yin//mu tig zla ba chu shel dang / /dmar po in+d+ra nI la dang / /mar ta ka dang g.yas su 'khyal/ /puSh+pa ra ga byu ru'i ste/ /a sma gar+b+ha gser la sogs/ /khams rnams sna tshogs mtha' yas yod/ /dngul chu'i khyad par mang pos gang / /pa ru sha ka bai DUR+Ya//de na rnyed par dka' min te/ /kha zas ro bcud sna tshogs pa/ /de dag mi 'byung gang yang med/ /sna tshogs gos kyi khyad par ni/ /bsam pa ji bzhin bgo byed de/ /dge min las kyi lam bcu po/ /rtag tu spyod pa'i skye bo nyung / /phal cher dag la gnas pa yin//theg pa gsum gyi lam gnas pa'i/ /drang srong dpag tu med pas brten/ /thams cad lha yi skad du smra/ /de na gnas pa'i mi rnams ni/ /tshe ni lo brgya las mi thung / /dus min 'chi ba nyung ba yin/ /rtag tu 'dod la dga' bar spyod/ /'on kyang dge ba las mi nyams//chos dang 'dod pa de bzhin gzhan/ /nor dang thar pa'i don zhes pa/ /rdzogs ldan bzhin du rab spyod de/ /'di mtshungs gzhan ni yod ma yin/ /rgyal po'i bu ni gang btsas par/ /nor bu rin chen 'od 'gyur la/ /zhag bdun 'od bzang 'phro 'gyur ba/ / de ni byang chub sems dpar shes/ /gang gis sngon chad ma mthong ba'i/ /me tog rab tu rgyas pa che/ /khyim du mngon par skyes gyur pa/ /de ni lha yi yan lag ma'o/ /mi bdag yan lag mar bcas pa/ /rgas pa med cing na med de/ /'jam po'i khrims kyis rtag tu 'tsho//'khor los sgyur dang mtshungs pa yin/ /rtag tu byang chub sems dpa' dang / /drang srong sngags kyi spyod pa can/ /yang dag rig pa nyid ston gyi/ /rtog ges bgrod med de ming tsam/ /las rnams rnam pa sna tshogs dang / /grub pa brgyad la sogs rnams dang //gang gzhan dngos grub sna tshogs dag /der ni mngon sum rnyed dka' min/ /zla ba re rer sgrub pa po/ /'di de 'dod pa'i dngos grub ces/ /chos kyi dga' ba'i gtam chen pos/ /rtag tu ngo mtshar dga' ba yin/ /chags bral byed dang dga' ba dang //spyod pa gcig tu dge ba'i blos/ /dag pa'i sems ni mnyes gshin pa/ /sbyin dang bzod dang dul ba dang / /mi 'tshe ba dang rtse gcig dang / /reg dang shes dang legs pa thos/ /bsam gtan bzlas dang mchod de bzhin/ yang dag de nyid sgom pa'o/ /de skad gsungs pas 'dus pa de/ /thams cad rjes su yi rang 'gyur/ /skal bzang ldan pa lnga brgya pos/ /yang yang 'dud cing bskor ba byas/ /de nas brtse ldan 'jig rten mgon/ /rab tu bzhad cing legs so legs/ /skye bo mang po grol don du//don yod lcags kyus 'di bshad do/ /'khor rnams kyis ni 'di bzung nas/ /rtag tu bcang zhing chub par gyis/ /blo gros ldan pa lnga brgya po/ /ting nge 'dzin gyi shugs thob nas/ /grong khyer drug tu yud kyis song / /theg mchog chos ni rab bshad nas//rim gyis cho ga 'di nyid kyis/ /grong khyer ka lA par song ngo / /de las brgya phrag bzhi rnams kyis/ /'dod pa'i dngos grub chen po thob/ /gang ming rnam par mi rtog pa/ /de sogs lhag ma gang yin de/ /zab dang rgya che'i tshul rtogs nas//grong khyer drug tu slar yang 'ongs/ /don yod zhags pa'i mdo sde ni/ /stong phrag lnga bcu gcig pa dang / /rig pa mchog gi 'bum sde sogs/ /gzhan yang rig sngags sna tshogs dang / /ral pa gcig ma'i cho ga dang / /'jam pa'i rdo rje'i rtog pa ni//stong phrag nyi shu lnga pa ste/ /cho ga du ma rgyas par byas/ /gang zhig ka lA par 'jug pa'i/ /thabs 'di bris pa'i bsod nams gyis/ /'gro ba drug tu 'khor ba rnams/ /'jam pa'i dbyangs dang mtshungs gyur cig /ces pa dpal ldan ka lA par 'jug pa zhes bya ba/theg pa chen po'i thabs chos kyi rnam grangs ji snyed pa rdzogs so// //rgyal khams pa tA ra nA thas bal po'i dpe las bsgyur ba ste/ don dka' ba dka' ba rnams bram ze'i paN+Di ta kr-iSh+Na zhes bya ba la dris shing gtan la phab ste zhus dag byas pa'o// //mang+ga laM/ /