CLOSE WINDOW

D4397
བོད་ཡིག

mchog gi spyod pa'i smon lam rdzogs so//[ ]@/ /'phags pa shes rab kyi pha rol tu phyin pa'i phyogs kyi smon lam bzhugs/ @##/ /'phags pa shes rab kyis pha rol tu phyin ba'i phyogs kyi smon lam bzhugs/ /@#/ /'phags pa shes rab kyi pha rol tu phyin pa stong phrag brgya pa la sogs pa klog gi dus su smon lam du gsol pa/phyogs bcu'i 'jig rten gyi khams rab 'byam bsam gyis mi khyab pa dag na/ ston pa bla na med pa sangs rgyas bcom ldan 'das/ zhi ba chos kyi sku/ rnam pa thams cad mkhyen pa'i ye shes dang ldan pa/ stobs dang / mi 'jigs pa dang /ma 'dres pa'i chos kyis brgyan pa/ phyogs bcu dus gsum gyi sangs rgyas thams cad la ston pa dam pa'i 'du shes kyis gus par phyag 'tshal zhing dang bas skyabs su mchi'o/ /bstan pa bla na med pa dam pa'i chos ngo bo nyid kyis rnam par dag cing rang bzhin gyis rnam par grol ba/'phags pa so so rang gis rig pa'i ye shes kyi spyod yul/ rnam grangs byis pa lta bu'i spyod yul du ma gyur pa/ don dam pa'i chos dang / dus gsum gyi 'phags pa thams cad gshegs pa'i shul lam gyi chos 'phags pa'i lam yan lag brgyad kyis bsdus pa dang /bstan pa'i chos skyes bu chen po'i dpal gyi mgur nas legs par gsungs pa/ thog mar dge ba/ bar du dge ba/ tha mar dge ba/ don bzang zhing tshig 'bru gsal ba/ mngon par mtho ba/ nges par legs pa'i lam du gyur pa/mdo sde 'dul ba mngon pa bstan bcos la sogs pa dam pa'i chos yi ge 'bru gnyer gyis bsnyad pa thams cad la bstan pa dam pa'i 'du shes kyis gus par phyag 'tshal zhing dang bas skyabs su mchi'o/ /sgrub pa bla na med pa/ 'phags pa'i dge 'dun byang chub sems dpa' sems dpa' chen po 'jigs pa lnga las shin tu 'das pa/phyir mi ldog pa'i sa'i go 'phang brnyes pa/ sa chen po la rtogs pa'i khyad par gyis rim par bzhugs pa/ de bzhin gshegs pa'i thugs kyi sras/ 'gro ba yongs kyi dpal mgon du gyur cing /sems can thams cad kyi don mdzad pa la brtson pa sku nyams su bzhes pa rnams dang / 'phags pa rang sangs rgyas rang gi shes rab kyi rtsal gyis go zhing / bsam gtan dang ting nge 'dzin la dbang thob pas rdzu 'phrul gyis don mdzad pa rnams dang /nyan thos dgra bcom pa gnas brtan chen po mchog bcu drug la sogs pa de bzhin gshegs pa'i gsung las byung ba'i sras/ chos las skyes pa/ rang gi don rjes su thob pa/ srid par kun du sbyor ba/ yongs su zad pa/ shes rab dang ting nge 'dzin gyi cha las rnam par grol ba/lha dang mi'i 'jig rten kun gyis mchod cing phyag bya bar 'os pa thams cad la dge ba'i bshes gnyen dang mchod gnas dam pa'i 'du shes kyis gus par phyag 'tshal zhing dang bas skyabs su mchi'o/ /khyad par du yang dus gsum gyi bde bar gshegs pa thams cad kyi yum/bcom ldan 'das ma shes rab kyi pha rol tu phyin pa la sogs pa pha rol tu phyin pa bcu'i lha mo dang / sras phyogs bcu'i sangs rgyas dang / phyogs bcu'i byang chub sems dpa' 'khor mtha' yas pa dang bcas pa thams cad bdag ming 'di zhes bgyi ba'ang 'khor dang bcas pa dang /mtha' yas pa'i sems can thams cad lus dang ngag dang yid rab tu dang bas gus par phyag 'tshal zhing skyabs su mchi'o/ /dkon mchog gsum 'khor mtha' yas pa dang bcas pa phyag gi gnas bsod nams thams cad kyi dpal gyi zhing mthu dang yon tan bsam gyis mi khyab pa thams cad la bdag ming 'di zhes bgyi bas mchod do//bstod do/ /bsngags so/ /lus dbul lo/ /srog phyogs so/ /dkon mchog gsum mchod gnas de dag thams cad la mchod par dbul ba/byang chub sems dpa' rnams kyi ting nge 'dzin dang / chos kyi dbyings rtogs par gyur pa rnams kyi byin gyi rlabs las byung ba/ gser gyi pad+ma 'dab ma stong dang / gzhan yang mchod pa bla na med pa dang / bla na med pa'i lha'i me tog dang /lta'i bdug spos dang / lha'i phreng ba dang / lha'i byug pa dang / lha'i na bza' dang / rgyan dang / gdugs dang / rgyal mtshan dang / ba dan dag gis rim gror bgyi'o/ /bkur stir bgyi'o/ /phu dud du bgyi'o/ /mchod par bgyi'o/ / gzhan yang skad cig thang cig yud tsam la stong gsum gyi stong chen po'i 'jig rten gyi khams 'di rin po che sna tshogs kyi rang bzhin du kun nas gnas par gyur te/ me tog gi sil ma sna tshogs kyis kun du gang ba dang / dar gyi lda ldi dang / chun po mang po kun du bres pa dang / snod sna tshogs nas bdug spos mang po 'thul ba dang / dpag bsam gyi shing mang po'i yal ga'i rtse mo g.yur za ba dang / me tog gi shing dang / 'bras bu'i shing dang / spos kyi shing dang / phreng ba'i spos dang / bdug spos sna tshogs kyi shing sna tshogs kyis rab tu brgyan pa kun nas gnas par gyur pa/bla na ma mchis pa mchod par 'bul gyis bzhes su gsol lo/ /da ltar gyi mchod pa rnam pa lnga la sogs pa dngos su 'byor pa rnams kyang / lha dang mi'i mchod pa khyad par can rgya chen por sprul pas yum shes rab kyi pha rol tu phyin pa la sogs te/pha rol tu phyin pa bcu dang / sras phyogs bcu'i sangs rgyas 'khor dang bcas pa rnams mngon sum dang 'dra bar dmigs te/ mchod par dbul gyis bzhes su gsol lo/ /bdag gir mdzad du gsol lo/ /longs spyad nas mnyes shing dgyes pa chen por mdzad du gsol lo//bdag ming 'di zhes bgyi ba/ 'khor ba thog ma mchis pa nas/ yang dag pa'i don ma mthong ste/ phyin ci log gis bslad nas/ sdig pa mi dge ba'i las mtshams med pa lnga dang / de dang nye ba lnga dang / me dge bcu spyod pa dang /'phags pa la skur pa btab pa dang / dam pa'i chos spong ba'i las bgyis pa dang / sems can gzhan la gnod pa'i las rnam pa mang po bgyis pas/ 'khor ba dang ngan song gi rgyur gyur cing / mtho ris dang thar pa'i sgrib par gyur pa/ sdig pa mi dge ba'i las ci bgyis so 'tshal thams cad mi 'chab mi sbed par gnod zhing 'gyod pa'i sems kyis ma lus par mthol zhing bshags so/ /'jig rten dang 'jig rten las 'das pa'i chos rgyu dang 'bras bur bcas pa/ 'dus byas dang 'dus ma byas kyis bsdus pa'i dge ba'i rtsa bar gyur pa/rnam par dkar ba'i phyogs thams cad la shin tu rjes su yi rang ba'i mchog gis rjes su yi rang ngo / /de bzhin gshegs pa gang dag dam pa'i chos btsun par mdzad pa'i slad du nang du yang dag 'jog la gnas nas/ chos kyi 'khor lo mi bskor zhing bskul ba'i sa la gzhes pa de dag la yang chos kyi 'khor lo rnam pa bcu gnyis bden pa bzhi'i tshul du bskor nas dam pa'i chos bdud rtsi'i char dbab par bskul zhing gsol lo/ /bde bar gshegs pa gang dag gdul bya rnams kyi don mdzad nas/'dus byas thams cad mi rtag cing / 'byor pa thams cad rgud par bstan te/ 'jig rten mi rtag par bstan pa'i slad du/ rdo rje lta bu'i sku bshig nas/ thabs kyis mya ngan 'da' ba'i tshul ston par bzhed pa de dag la yang thugs rje chen po'i gzugs kyis 'khor ba ma stongs kyi bar du mya ngan las mi 'da' zhing /'jig rten na yun ring por bzhugs nas/ lha dang mi'i ston pa dang / dge ba'i bshes gnyen du bzhugs par gsol ba 'debs so/ /de bzhin gshegs pa gang dag gis sems can ma lus pa'i don du bla na med pa'i byang chub tu thugs bskyed pa de bzhin du/bdag gis kyang dus thams cad dang gnas thams cad du dkon mchog gsum la skyabs su gsol te/ bla na med pa'i byang chub tu sems bskyed par bgyi'o/ /de ltar phyag 'tshal ba nas byang chub tu sems bskyed pa'i bar gyi dge ba'i rtsa ba dang /srung ma thugs dam can mi mjed kyi bdag po tshangs pa dang / lha rnams kyi dbang po brgya byin dang / rgyal po chen po bzhi la sogs pa 'khor mtha' yas pa dang bcas pa/ sangs rgyas mthong ba/ chos thos pa bstan pa bsrung bar khas blangs pa/ lha'i dge bsnyen chen po de dag la chos dang zang zing gi longs spyod rgya chen po bstabs shing phul ba dang / 'gro ba ris khams gsum gyis bsdus pa/ lam rgyud lngar 'khor zhing / 'gro ba ris drug tu skye gnas rnam pa bzhi las skyes pa/ji tsam sems can gyi ris na mchis pa/ sems can bsdu bar bsdus pa thams cad la yang bsdu ba rnam pa bzhis bsdus pa'i mchod sbyin gyi gtor ma rgya chen pos khyab par bsngos pa dang / tshe rabs brgyud pa nas lan chags par gyur pa'i bgegs rnams la yang /gnas dang / dus dang / longs spyod ji ltar 'dod pa'i mchod sbyin gyi gtor ma rgya chen po bsngos shing stsal pa/ de lta bu'i dge ba'i rtsa ba dang / gzhan yang bdag cag gi snga slad du dge ba'i rtsa ba bgyis so 'tshal gyi mthu dang /khyad par du yang yum shes rab kyi pha rol tu phyin pa stong phrag brgya pa la sogs te/ shes rab rnam gsum gyi don du gsungs pa'i phyogs/ g.yo sgyu med par bris pa dang / bklags shing ston pa dang / mchod cing rim gro bgyis pa dang /rig sngags dang / gsang sngags kyi mthu dang / lha dang drang srong la sogs pa rig pa 'dzin pa thams cad kyi gzi brjid dang / bden pa'i byin gyi rlabs kyis/ bdag cag gis mchod pa bshams pa'i gnas 'di/ sngon bya rgod kyi phung po'i ri la/ bcom ldan 'das shAkya thub pas thams cad dang ldan pa'i 'khor gyi dkyil 'khor du/ yum shes rab kyi pha rol tu phyin pa rgya cher bstan cing bshad pa de bzhin du/ rang bzhin gyi dkyil 'khor rnam par dag par gyur cig /yum shes rab kyi pha rol tu phyin pa dang / sras phyogs bcu'i sangs rgyas 'khor phun sum tshogs pa dang bcas pa/ pho brang gi dkyil 'khor rnam par dag pa'i gnas 'dir spyan drangs te/ mchod pa dang / bklags pa dang / mdo sde dang / mi mnyam pa dang mnyam pa'i gsang sngags kyi gzhung dang / dngos grub kyi cho ga dang /mchod pa la sogs pa'i dbang dang / byin gyi rlabs kyis bdag cag 'khor dang bcas pa dang mtha' yas pa'i sems can thams cad tshe rabs gar skyes gar gnas kyang / las dang nyon mongs pa'i sgrib pa thams cad ni byang / ngan song gsum dang / mi khom brgyad la sogs pa sdug bsngal thams cad las ni yang dag par grol zhing thar te/ bde 'gro lha'i 'jig rten du skyes nas 'phags pa thams cad kyi zhal mngon sum du mthong ste/ phyag g.yas pa gser gyi kha dog can brkyang nas bdag gi spyi bor bzhag ste/ rigs kyi bu khyod ma 'ongs pa'i dus na 'jig rten gyi khams 'di zhes bgyi bar/ sangs rgyas 'di lta bu zhes bya bar 'gyur ro zhes lung bstan pa myur du thob nas/ bla na med pa'i sangs rgyas su myur du 'grub par gyur cig /sangs rgyas su ma grub kyi bar du 'jig rten 'di dag tu yang /tshe ring nad med longs spyod 'phel/ rigs rgyud rgyas shing bde skyid phun sum tshogs pa dang ldan par gyur cig /mi dang mi ma yin pa la sogs pa dgra bgegs bar du gcod pa cis kyang mi tshugs shing / 'jig rten dang 'jig rten las 'das pa'i bsam pa thams cad yid bzhin du 'grub par gyur cig /khyad par du yang shes rab kyi pha rol tu phyin pa la/ chos spyod rnam pa bcu'i sgo nas tshul bzhin bgyis pa'i phan yon bsam gyis mi khyab na yang / mdor bsdus pa bcu ste/ sangs rgyas thams cad kyis sras su dgongs shing /byin gyis rlob par 'gyur ba dang / tshangs pa dang brgya byin la sogs pa'i srung ma khyad par can rnams kyis bu bzhin du skyong bar 'gyur ba dang / tshe dang dbang phyug phun sum tshogs par 'gyur ba dang / bgegs dang log 'dren la sogs pa gdon thams cad kyi bsam sbyor ngan pas mi tshugs pa dang /gza' skar dang rmi ltas la sogs pa'i mtshan ma ngan pa thams cad zhi bar 'gyur ba dang / pha rol gyi dmag tshogs thams cad bzlog par 'gyur ba dang / 'jig rten dang 'jig rten las 'das pa'i yon tan thams cad bos pa bzhin du 'du bar 'gyur ba dang /tshe rabs thams cad du shes rab kyi pha rol tu phyin pa'i don dang mi skol bar 'gyur ba dang / de bzhin gshegs pa'i zhal mngon sum du mthong ba dang / mthar bla na med pa'i sangs rgyas su grub par 'gyur ba la sogs pa'i yon tan gyi tshogs mtha' yas shing rmad du byung ba rnams bdag cag 'khor dang bcas pa la smin cing grub par gyur cig /khyad par du yang bod kyi rgyal khams su sangs rgyas kyi bstan pa yun ring por bzhugs par gyur cig /'phags pa shes rab kyi pha rol tu phyin pa bzhugs pa'i yul phyogs su yang ngan sems kyi 'khrugs pa mi 'byung ba dang / mi nad dang phyugs nad rgyun chad pa dang / lo phyug rtag tu legs/ char chu dus su phebs bde skyid phun sum tshogs pa dang ldan te/sems can thams cad dge ba spyod pa'i bsam pa bzang po dang ldan par gyur cig /sangs rgyas kyi bstan pa la zhe sdang ba'i gang zag log sred can bstan pa gzhig pa'i ngan sems dang ldan pa rnams ni chu shing gi rtsa ba bzhin du gyur cig /dkon mchog gsum la dad cing dam pa'i chos bsrung ba'i bsam pa bzang po dang ldan pa'i gang zag rnams ni tshe ring zhing bsam pa thams cad yid bzhin du grub par gyur cig /bdag dang sems can thams cad rnam pa kun tu/ dkon mchog gsum gyi bden pa'i byin rlabs dang //dus gsum rgyal ba'i yum gyi mthu byin gyis/ /gang dang gang na ji ltar gnas pa yi/ /sgrib dang sdug bsngal ma lus kun bsal te/ /'khor ba'i sdug bsngal ma lus rab bsnyil nas/ /rgyud drug 'gro ba ma lus kun bsgral te//kun du bzang po'i spyod pas bsgrubs pa'i zhing / /rin chen mdzes pa rnam bkod bde ba can/ /bdud rtsi'i mtsho dang dpag bsam shing dang ldan/ /der 'byung skal ldan pad+ma'i mchog las skyes/ /yid bzhin phun sum tshogs pa 'phags pa'i sa/ / rnam dag khyad par can gyi gnas mchog der/ /thogs med rdzus te bde bar gshegs gyur nas/ /mtshan tsam thos pas sgrib pa rnam sel ba/ /rin chen 'od 'bar sku mchog 'gro ba'i skyabs/ /tshe dang longs spyod dpag med sbyin pa'i gtso/ /snang ba mtha' yas 'gro don mngon sum ste//de las mchog thob lung bsten dbang bskur nas/ /rgyal sras gnyis dang spyod pa'i blo mthun zhing / /phyogs bcur 'gro la phan pa'i don mdzad nas/ /srid gsum yongs kyi skyabs su gyur par shog /'phags pa shes rab kyi pha rol tu phyin pa'i phyogs kyi smon lam rdzogs so/