CLOSE WINDOW

D4376
བོད་ཡིག

/dad pas 'di bsdebs bsod nams kyis/ /'gro kun srid pa yongs spong zhing / /bsam gtan bde la rten byed de/ /rtag tu gzhan don mos par shog /bsam gtan la 'jug pa bsdus pa rdzogs so// //[]sems kyi nyams cung zad tsam zhig mdor bsdus te brjod par bya'o//de la mtshan ma dang bcas pa'i rnal 'byor dang / mtshan ma med pa'i rnal 'byor rnam pa gnyis te/ de la mtshan ma dang bcas pa'i rnal 'byor bshad pa'i dbang du byas nas chos brgyad shes shing ldan na mtshan ma dang bcas pa'i dmigs pa la gtad du 'dod par 'gyur te/ chos brgyad ni zhi gnas kyi rgyu drug dang ldan par bya ba dang / dbyibs dang kha dog gi mtshan nyid shes par bya ba dang / gtso cher spyi la bsgom par bya zhing / /bye brag la gnas kyi bar du bye brag la gzhag par bya ba dang / dmigs pa shin tu gsal ba bsgom par bya ba dang / bying rgod gnyis kyi dbang du mi gtang ba dang / bsgom pa tshod zin par bya ba dang / rgyu chos de drug yid la bzhag ste bsgoms pas 'bras bu sems bskyed pa'i rim pa mu bzhir rig par bya ba dang / mu gsum pa'i dus su ma nges pa rnam pa lnga'i rjes su 'brang bar bya ba ma yin pa'o/ /de la zhi gnas kyi rgyu drug dang ldan par bya ba ni mthun pa'i yul na gnas pa dang / 'dod pa chung ba dang / chog shes pa dang / bya ba mang po spang ba dang / tshul khrims rnam par dag par bya ba dang / 'dod pa la sogs pa'i rnam par rtog pa spang ba'o/ /zhi gnas kyi rgyu drug shes par byas nas rgyud la ldan par bya'o/ /dbyibs dang kha dog gi mtshan nyid shes par bya ba ni de bzhin gshegs pa'i sku la dmigs pa gtod pa yin na dbyibs kyi mtshan nyid ni stod smad la sogs pa'i bye brag ji ltar gnas pa bzhin du shes par bya ba dang /kha dog gi mtshan nyid ni kha dog rnam pa bzhi las ji ltar gnas pa bzhin du shes par bya'o/ /gtso cher spyi la bsgom par bya zhing / bye brag la gnas kyi bar du bye brag la gzhag par bya ba ni dbyibs dang kha dog gi mtshan nyid shes par byas nas bsgom pa'i dus na sku rdzogs pa'i ngo bo spyi la sems gtad par bya ste/de ltar gtad tsam na rdzogs pa mi snang bar bye brag phyogs 'ga' snang na ji tsam snang gi bar du bye brag de la sems gtad par bya'o/ /de bas na gtso cher spyi la bsgom par bya zhing bye brag la gnas kyi bar du bye brag la gzhag par bya ba yin te/de ltar ma yin pa'i dmigs par bya ba'am/ mdun du bzhag nas dus rtag tu har sgom byed pa'am/ /sku'i bye brag rim gyis yid la byed pa'am/ bye brag phyogs 'ga' la mi snang ba bzhin du don dang ched du gtod pa ni dmigs pa myur du mi thob pa'i rgyu yin par shes par bya'o//dmigs pa shin tu gsal bar bsgom par bya ba ni gtso cher spyi la bsgom pa'i dus na yod do snyam pa dang / gnag yo re ba tsam dang / rab rib tsam du bsgom pa ma yin te/ dbyibs dang kha dog gi mtshan nyid shin tu gsal bar bsgoms pa'i stobs kyis phyis dmigs par bya ba shin tu gsal bar 'gyur te/de bas na dmigs pa shin tu gsal bar bsgom par bya'o/ /bying rgod kyi dbang du gtang bar bya ba ma yin pa ni dmigs pa shin tu gsal bar sgom pa'i dus na bying rgod gnyis kyi dbang du btang nas bsgom pa ma yin gyi/ de bas na bying na gzengs bstod cing rgod na blan par bya'o//sgom pa tshod zin par bya ba ni khams rab 'bring tha ma gsum las rab kyis ni nyin gyi bzhi cha mtshan gyi bzhi cha bsgom par bya ste/ nyin gyi bzhi cha ni thun bzhi'am lnga bsgom par bya/ mtshan gyi bzhi cha ni srod tho rangs la bsgom par bya'o/ /'bring gis ni nyin 'ba' zhig gi bzhi cha bsgom par bya ste/mtshan gyi btang snyoms su bzhag cing nyin bar gyi bzhi cha la thun lnga'am drug tu bsgom par bya'o/ /tha mas ni nyin 'ba' zhig gi lnga cha'am drug cha'am/ bdun cha tsam bsgom par bya ste mtshan mo btang snyoms su gzhag cing / khams tha mas kyang rab 'bring tha ma gsum du shes par byas nas nyin gyi lnga cha dang drug cha dang bdun cha la thun drug gam bdun du bsgom par bya'o//de la bsgom pa'i dus ni thung la mi bsgom pa'i dus ni ring bas dmigs pa gtad du mi 'dod par 'gyur ro snyam du sems na/ sgom pa yun thung yang shin tu gsal ba'i stobs kyis bag chags 'jog nus par 'gyur la mi sgom pa'i dus ring yang g.yel ba gzhan ma byas pas snga ma'i bag chags kyang mthu chung bar mi 'gyur la sgom pa yun thung ba'i dbang gis shes pa'i rgyud nas nus pa che bar gyur nas/shin tu gsal bar bsgoms pa'i stobs kyis dmigs pa la gtad du 'dod pa myur du 'thob par 'gyur ro/ /rgyu chos de drug yid la bzhag nas bsgoms pas 'bras bu sems skye ba'i rim pa mu bzhir rig par bya ste chos drug ni zhi gnas kyi rgyu drug dang ldan par bya ba la sogs pa'i chos drug shes shing ldan nas bsgoms pa'i stobs kyis sems skye ba'i rim pa mu bzhi 'byung ste/mu dang po la ni rtsol ba drag tu bsgoms kyang dmigs par bya ba mi snang la/rtsol ba zhan du bsgoms kyang dmigs par bya ba mi snang ba yin no/ /mu gnyis pa la ni rtsol ba drag tu bsgoms na gnas skabs kha cig tu snang la/ gnas skabs kha cig tu ni drag zhan gnyis ka la yang mi snang ba yin no/ /mu gsum pa la ni rtsol ba drag tu bsgoms na snang la/ zhan du bsgoms na mi snang ba yin no//mu bzhi pa ni mu gsum pa las khyad par du gyur pa yin te/ rtsol ba drag zhan gnyis ka la yang snang la thun rkyang par yang nus/ mi mthun pa'i chos gnyis dang bral zhing mthun pa'i chos gsum dang ldan pa yin te/ mi mthun pa'i chos ni rgod pa rgyun chags dang / bying ba shas che ba yin la/mthun pa'i chos gsum ni tshor ba dga' ba de'i phyogs dang mthun pa dang / zhi gnas kyi phyogs dang mthun pa yin no/ /yang chos drug yid la bzhag nas bsgoms pas sems kyi skye ba'i rim pa mu bzhir shes par bya ba ni/ mu dang po ni rtsol ba drag zhan gnyis ka la yang snang la/ gnas skabs kha cig tu ni rtsol ba drag zhan gnyis ka la mi snang ba yin no//mu gnyis pa la ni mu dang po las khyad par du gyur pa yin te/ rtsol ba drag zhan gnyis ka la yang snang ba'i grangs ni mang la/ mi snang ba'i grangs ni nyung ba yin no/ /mu gsum pa la ni rtsol ba drag zhan gnyi ga la yang snang la/ gnas skabs kha cig tu ni rtsol ba zhan du bsgoms na mi snang ba yang yin la yang na kha cig gi dbang du byas na ma nges pa rnam pa lngar snang ste/ma nges pa rnam pa lnga ni dbyibs ma nges pa dang / kha dog ma nges pa dang / kha dog 'ba' zhig snang ba dang / grangs ma nges pa dang / che chung ma nges pa'o/ /de la dbyibs ma nges pa ni de bzhin gshegs pa'i sku'i dbyibs dang /kha dog gi mtshan nyid snang bar 'dod pa la mchod rten gyi dbyibs 'dra ba dang / zlum zlum po lta bur snang ba yin no/ /kha dog ma nges pa ni ser por snang bar 'dod pa la dkar po dang sngon po lta bur snang ba yin no/ /kha dog 'ba' zhig snang ba ni dbyibs dang kha dog gi mtshan nyid bcas par 'dod pa las dbyibs med par kha dog snang ba yin no//grangs ma nges pa ni dmigs par bya ba gcig kho nar snang bar 'dod pa la lnga 'am drug tu snang ba yin no/ /che chung ma nges pa ni dmigs par bya ba che ba snang bar 'dod pa la chung ba snang ba'am chung ba snang bar 'dod pa la che ba snang ba lta bu'o/ /rtag pa'i don mi snang bar mi rtag pa'i don snang ba'i phyir ma nges pa zhes bya'o//mu bzhi ba ni mu gsum pa las khyad par du 'gyur te/ rtsol ba drag zhan gnyis ka la yang snang la/ thun rgyang par yang nus/ mi mthun pa'i chos gnyis dang 'bral zhing mthun pa'i chos gsum dang ldan pa yin no/ /mu gsum pa'i dus su ma nges pa lnga'i rjes su 'brang bar bya ba ma yin pa ni gang gi tshe rtsol ba drag zhan gnyis ka la yang mi snang /thun rkyang bar yang mi nus/ res snang res mi snang ba yin pas 'brangs kyang bul med pa yin te/ de bas na sngar btags pa'i don la rtsol ba drag tu sgom zhing bsgom pa tshod zin par byas na dmigs pa myur du thob par 'gyur te/ de bas na de'i tshe ma nges pa lnga'i rjes su 'brang bar bya ba ma yin no//mu bzhi ba'i dus su ni ma nges pa rnam pa lnga snang bar gyur kyang dmigs pa la gtad du 'dod pa'i mtshan nyid dang ldan pas 'brangs kyang skyon med de/ phyis ji ltar 'dod pa bzhin du snang bar yang 'gyur ro/ /yang na chos drug yid la bzhag nas bsgoms pas sems kyi skye ba'i rim pa mi 'byung bar cig car sal gyis 'byung ste/thun dang po'am zhag drug gam bdun gyi bar la dbyibs dang kha dog gi mtshan nyid cig car sal gyis snang bar 'gyur nas gtad du 'dod par 'gyur ba'am/ yang na thun mi ring ba tsam du snang bar gyur nas nyin mtshan gnyis gsum gyi bar du nyams par 'gyur zhing yang phyis cig car sel gyis dbyibs dang kha dog gi mtshan nyid gsal bar gyur nas gtad du 'dod par 'gyur ba yin no//de la rim gyis pa'am/ cig car ba'i dmigs pa la gtad du 'dod pa'i mtshan nyid ni chos bzhi dang ldan na dmigs pa la gtad du 'dod pa yin te/ chos bzhi ni rtsol ba drag zhan gnyis ka la snang ba dang / thun rkyang bar nus pa dang /mi mthun pa'i chos gnyis dang bral ba dang / mthun pa'i chos gsum dang ldan pa yin no/ /dmigs pa la gtad du 'dod pa'i gsal ba'i bye brag ni rab 'bring tha mar shes par bya ste/ rab ni mig gis mthong ba las gsal bar nga rgyal skye ba dang / 'bring ni mig gis mthong ba tsam du nga rgyal skye ba dang / tha ma ni yid la gsal ba'o//rab 'bring tha mar shes nas dmigs pa la gtad du 'dod pa'i dus su gang snang yang chog shes par byas nas brten pa'i cho ga byas na khams mi bde bar mi 'gyur ba dang / phyis mi nyams par 'gyur ro/ /rab 'bring tha mar shes kyang 'bring dang tha mas chog ma shes na ci gsal du rtsol ba drag tu bsgoms shing brtan pa'i cho ga ma byas pas khams mi bde bar 'gyur ba dang /phyis nyams par 'gyur ro/ /dbang po rno rtul dang / thos pa mang nyung dang / khams rab 'bring tha ma la rim gyis pa dang / cig car ba dang / gsal ba'i bye brag rab 'bring tha ma las gang 'byung ma nges par shes par bya'o/ /cig car ba'i dbang du byas nas/ chos drug dang ldan na dmigs pa la gtad du 'dod par 'gyur ba dang / sems kyi skye ba'i rim pa dang po'i dbang du byas nas chos bdun dang ldan na dmigs pa la gtad du 'dod par 'gyur ba dang / sems kyi skye ba'i rim pa gnyis pa'i dbang du byas nas chos brgyad dang ldan na dmigs pa la gtad du 'dod par 'gyur te/ de bas na chos brgyad shes shing ldan na dmigs pa la gtad du 'dod pa'i rgyu rnams ni rdzogs la gtad du mi 'dod pa'i skyon rnams ni rnam par gcad pa yin no//de la mtshan ma dang bcas pa'i rnal 'byor la dmigs pa gtad du 'dod nas mtshan ma med pa'i rnal 'byor bsgom par bya ste/ mtshan ma med pa'i rnal 'byor gyi dbang du byas na yang chos brgyad shes shing ldan na dmigs pa la gtad du 'dod par 'gyur te/chos brgyad ni zhi gnas kyi rgyu drug dang ldan par bya ba dang / chos kyi rang bzhin ji ltar gnas pa bzhin du shes par bya ba dang / mi rtog pa bsgom par bya ba dang / dmigs pa ni shin tu gsal ba bsgom par bya ba dang / bying rgod gnyis kyi dbang du mi gtang bar bya ba dang /bsgom pa tshod zin par bya ba dang / rgyu chos de drug yid la bzhag nas bsgoms pas 'bras bu sems skye ba'i rim pa mu bzhir rig par bya ba dang / mu gsum pa'i dus su ma nges pa drug gi rjes su 'brang bar bya ba ma yin pa'o/ /de la chos kyi rang bzhin ji ltar gnas pa bzhin du shes par bya ba ni kun rdzob tu sgyu ma lta bu yin la don dam par rang bzhin med par shes par bya'o//mi rtog pa bsgom par bya ba ni don dam par chos thams cad spros pa'i mtha' rnam pa brgyad dang bral ba yin pas cir yang mi 'dzin par bsgom par bya'o/ /dmigs pa shin tu gsal bar bsgom par bya ba ni mtshan ma dang bcas pa bsgom pa'i dus na ni/sku'i kha dog dang dbyibs gsal bar bsgom pa yin la mtshan ma med pa bsgom pa'i dus na ni/ cir yang mi 'dzin pa'i mtshan nyid shin tu gsal bar bsgom pa'o/ /mtshan ma bsgom pa'i dus na ni/ mtshan ma ni rang gi ngo bo yang rags pa yin la/ so so'i skye bo'i thog ma med pa nas mngon sum du byas pas bsgom pa'i dus na yang yul can shugs kyis gsal bar 'gyur te/shugs kyis gsal bar gyur ba des kha dog dang dbyibs kyi mtshan nyid shin tu gsal bar bsgoms pa'i stobs kyis phyis kha dog dang dbyibs shin tu gsal bar snang bar 'gyur ro/ /mtshan ma med pa'i bsgom pa'i dus na ni shes pa ma bsgrims par zhan pa cir yang mi 'dzin par don dam par chos thams cad spros pa'i mtha' brgyad dang bral bas zab cing rtogs par dka' la/so so'i skye bo'i blo dang ldan pas kyang sngar mngon sum du ma byas pas bsgom pa'i dus na yul can shugs kyis gsal bar mi 'gyur te/ de lta bas na shes pa gzengs bstod cing gsal bar byas nas cir yang mi 'dzin pa shin tu gsal bar bsgoms pa'i stobs kyis phyis shin tu gsal bar nyams su myong bar 'gyur te/de bas na sems rtsol ba zhan pa cir yang mi 'dzin pa ni myur du dmigs pa thob par mi 'gyur te/ gal te sgom pa la skyed byung na cir yang mi 'dzin pa mthu chung zhing shes pa'i rgyud gsal ba ma yin pa'i mtshan nyid nyams su myong bar 'gyur te/de bas na shes pa'i rgyud shin tu gsal bar byas nas dmigs pa shin tu gsal bar bsgom par bya'o/ /bsgom pa tshod zin pa ni gong du bstan pa bzhin du shes par bya'o/ /rgyu chos de drug yid la bzhag nas bsgoms pas 'bras bu sems skye ba'i rim pa mu bzhir shes par bya ba ni mu dang po la ni rtsol ba drag zhan gnyis ka la yang mi rtog pa'i ngo bor cung zad tsam yang mi snang ba yin no//mu gnyis pa la ni rtsol ba drag tu bsgoms na mi rtog pa'i ngo bor cung zad tsam gnas la gnas skabs kha cig tu ni rtsol ba drag zhan gnyis ka la yang mi rtog pa'i ngo bor cung zad tsam yang mi gnas pa yin no//mu gsum pa la ni rtsol ba drag tu bsgoms na mi rtog pa'i ngo bor cung zad tsam gnas la gnas skabs kha cig tu rtsol ba gzhan du bsgoms na mi rtog pa'i ngo bor cung zad tsam yang mi gnas pa yin no/ /mu bzhi pa ni mu gsum pa las khyad par du gyur te/ rtsol ba drag zhan gnyis ka la mi rtog pa'i ngo bor gnas la/thun rkyang bar yang nus/ mi mthun pa'i chos gnyis dang bral zhing mthun pa'i chos gsum dang ldan pa yin no/ /yang na rgyu chos drug yid la bzhag nas bsgoms pas 'bras bu sems kyi skye ba'i rim pa mu bzhir shes par bya ba ni mu dang po ni rtsol ba drag zhan gnyis ka la yang mi rtog pa'i ngo bor cung zad tsam gnas la gnas skabs kha cig tu rtsol ba drag zhan gnyis ka la yang mi rtog pa'i ngo bor cung zad tsam yang mi gnas pa yin no//mu gnyis pa ni mu dang po las khyad par du 'gyur te/ rtsol ba drag zhan gnyis ka la yang mi rtog pa'i ngo bor cung zad tsam gnas pa'i dus ni grangs mang la gnas skabs kha cig tu ni rtsol ba drag zhan gnyis ka la yang mi rtog pa'i ngo bor cung zad tsam yang mi gnas pa yin no//mu gsum pa la rtsol ba drag zhan gnyis ka la yang mi rtog pa'i ngo bor cung zad tsam gnas la gnas skabs kha cig tu rtsol ba zhan du bsgoms yang mi rtog pa'i ngo bor cung zad tsam du mi gnas pa yin la/ yang kha cig gi dbang du byas na mi rtog pa'i ngo bor mi gnas pa'i ma nges pa drug snang ste/drug ni kha dog bzhi dang nam mkha' dang / nam mkha' sa phyogs dang bcas pa yin no/ /mu bzhi pa ni mu gsum pa las khyad par du gyur te/ chos bzhi dang ldan pa'i mtshan nyid yin no/ /mu gsum pa'i dus su ma nges pa rnam pa drug gi rjes su 'brang bar bya ba ma yin pa ni gang gi tshe chos thams cad don dam par spros pa'i mtha' brgyad dang bral ba yin pas cir yang mi 'dzin pa ni yang dag pa'i shes pa yin no//ma nges pa drug ltar snang ba'i shes pa ni phyin ci log gi shes pa yin te/ de bas na de'i tshe mu gsum pa'i dus su ma nges pa rnam pa drug gi rjes su mi 'brang bar shes par bya'o/ /yang na chos drug yid la bzhag nas bsgoms pas/sems kyi skye ba'i rim pa bzhir mi 'byung bar cig car cir yang mi 'dzin par 'gyur te/ thun dang po'am/ zhag drug bdun gyi bar du cir yang mi 'dzin par 'gyur nas gtad du 'dod pa'am/ yang na thun mi ring ba tsam du cig car cir yang mi 'dzin par 'gyur nas nyin mtshan gnyis gsum gyi bar du yang nyams par 'gyur zhing /yang phyis cig car yang mi 'dzin par gyur nas gtad du 'dod par 'gyur ba yin no/ /de rim gyis pa'am cig car ba'i dmigs pa la gtad du 'dod pa'i mtshan nyid ni chos bzhi dang ldan pa yin no/ /dmigs pa la gtad du 'dod pa'i gsal ba'i bye brag ni rab 'bring tha mar shes par bya ste/rab ni mi rtog pa'i mthu yang shin tu che la shes pa'i rgyud kyang shin tu gsal ba yin no/ /'bring ni mi rtog pa'i mthu yang 'bring la shes pa'i rgyud kyang gsal ba 'bring tsam du gnas pa yin no/ /tha ma ni mi rtog pa'i mthu yang chung la shes pa'i rgyud kyang snga ma bas cung zad tsam mi gsal ba yin no/ /rab 'bring tha mar shes nas dmigs pa la gtad du 'dod pa'i dus su gang nyams su myong yang chog shes par byas nas brtan pa'i cho ga byas na khams mi bde bar mi 'gyur ba dang /phyis mi nyams par 'gyur ro/ /'bring dang tha mas chog ma shes nas rtsol ba drag tu cir yang mi 'dzin par bsgoms shing brtan pa'i cho ga ma byas pas khams mi bde bar 'gyur ba dang /phyis nyams par 'gyur ro/ /dbang po rno rtul dang / thos pa che chung dang / khams rab 'bring tha ma la rim gyis pa dang / cig car ba dang / gsal ba'i bye brag rab 'bring tha ma las gang 'byung ma nges par shes par bya'o/ /de la chos brgyad shes shing ldan par byas nas bsgoms pa'i stobs kyis dmigs pa la gtad du 'dod par gyur na brtan pa'i cho ga ni chos bzhi'i dbang gis bye brag dgur shes na skyon spangs shing yon tan dang ldan pas phyis mi nyams par 'gyur te de la chos bzhi ni khams rab 'bring tha ma dang dmigs pa la gtad du 'dod par byed pa'i dus su mi bde ba med pa dang /cung zad mi bde ba dang / rab 'bring tha ma mi dmigs pa la gtad du 'dod par byed pa'i dus su cher mi bde bar 'gyur ba yin no//de bye brag dgu ni rab la gsum/ 'bring la gsum/ tha ma la gsum mo/ /de la rab gsum ni dmigs pa la gtad du 'dod par byed pa'i dus su ye mi bde ba med na nyin mtshan drug tu ci nus su bsgom par bya'o/ /rab de cung zad mi bde bar gyur na nyin mtshan bzhir ci nus su bsgom par bya'o//rab de cher mi bde bar gyur pa dang / dmigs pa dus mtshungs su snang na brtan pa'i cho ga bya mi dgos par shes par bya'o/ /'bring la gsum ni/ dmigs pa la gtad du 'dod par byed pa'i dus su/ ye mi bde ba med na nyin mtshan bzhir ci nus su bsgom par bya'o/ / 'bring de cung zad mi bde bar gyur na nyin mtshan gnyis su ci nus su bsgom par bya'o/ /'bring de cher mi bde bar gyur pa dang dmigs pa dus mtshungs su snang na brtan pa'i cho ga ye mi dgos par shes par bya'o/ /chos bzhi'i dbang gis khams tha ma la gsum ni khams tha ma de dmigs pa la gtad du 'dod par byed pa'i dus su mi bde ba ye med na nyin mtshan gnyis su ci nus su bsgom par bya'o//khams tha ma de cung zad mi bde bar gyur na snga so'i bsgoms pa tsam nyin mtshan gnyis nas gsum du bsgom par bya'o/ /khams tha ma de cher mi bde bar gyur pa dang dmigs pa dus mtshungs su snang na brtan pa'i cho ga ye mi dgos par shes par bya'o//skyon spang zhing yon tan dang ldan pa ni khams mi bde bar 'gyur ba dang / dmigs pa mi gsal bar 'gyur ba dang / dmigs pa nyams par 'gyur ba'i skyon rnams spangs shing yon tan gsum dang ldan te khams mi bde bar mi 'gyur ba dang / dmigs pa mi gsal bar mi 'gyur ba dang /dmigs pa nyams par mi 'gyur ba'o/ /de bas na mi nyams shing brtan par 'gyur ro/ /de dmigs pa la gtad du 'dod par gyur nas brtan pa'i cho gas brtan par byas pa'i dbang gis phyis dmigs pa la gtad du 'dod pa de ni zhi gnas kyi phyogs dang mthun pa zhes bya ste/zhi gnas rdzogs pa ma yin no/ /de la zhi gnas kyi phyogs dang mthun pa thob nas kyang chos gsum shes shing ldan na zhi gnas rdzogs par 'gyur te/ chos gsum ni mu bzhir shes shing blang dor gyi bye brag shes pa dang zhi gnas kyi rgyu drug dang ldan zhing de'i mi mthun pa spang bar bya ba dang / bsgom pa tshod zin zhing thun ring po ma yin pa'o//de la mu bzhir shes shing blang dor gyi bye brag shes pa ni ting nge 'dzin ma rdzogs pa'i dbang gis sems kyi nyams mu bzhir 'byung bar shes par bya ste/ mu dang po la ni dmigs pa mi gsal la rgod pa yod pa dang / mu gnyis pa la ni dmigs pa mi gsal la rgod pa med pa dang /mu gsum pa la ni dmigs pa 'bring tsam la rgod pa yod pa dang / mu bzhi pa ni dmigs pa shin tu gsal la rgod pa med pa yin no/ /mu dang po ni rnal 'byor ba'i shes pa'i rgyu nus pa chung ba'i dus na 'byung ngo / /mu gnyis pa ni bying ba shas che ba'i dus na 'byung ngo / /mu gsum pa ni shes pa'i rgyu nus pa 'bring gi dus na 'byung la nus pa che ba yin na yang sgom snying mi 'dod pa'i dus na 'byung ngo //mu bzhi pa ni shes pa'i rgyu yang nus pa che la/ sgom snying 'dod pa'i dus na 'byung ngo / /blang dor gyi bye brag shes pa ni ting nge 'dzin ma rdzogs pa'i dbang gis sems kyi nyams mu bzhir 'byung ste/ de ltar 'byung bar shes na blang dor gyi bye brag shugs kyis shes pa 'byung ste/de la mi lcogs pa med pa'i ting nge 'dzin gyi mtshan nyid ni sems shin tu gsal ba yin/ bying rgod gnyis dang bral ba yin no/ /tshor ba btang snyoms dang ldan pa yin pas/ de bas na mu bzhi pa la mi lcogs pa med pa'i ting nge 'dzin gyi phyogs dang mthun pa shas che ba yin pas/mu gsum pa'i dus su rtsol ba bya zhing spang bar bya'o/ /mu bzhi pa'i dus su ngang la ma shor bar bya zhing de la gus par bya'o/ /ting nge 'dzin ma rdzogs pa'i dbang gis sems kyi nyams mu bzhir 'byung ste/ de ltar 'byung bar mi shes na/ blang dor gyi bye brag shes par mi 'gyur te/ de bas na ting nge 'dzin rdzogs par mi 'gyur ro//ting nge 'dzin ma rdzogs pa'i dbang gis sems kyi nyams mu bzhir 'byung ste/ de ltar 'byung bar shes na blang dor gyi bye brag shugs kyis shes par 'gyur te/ de lta bas na ting nge 'dzin myur du rdzogs par 'gyur ro/ /zhi gnas kyi rgyu drug dang ldan zhing de'i mi mthun pa spong ba ni/ zhi gnas kyi rgyu drug mthun pa'i yul na gnas pa la sogs pa'o//zhi gnas kyi rgyu drug shes par byas nas/ rgyud la ldan par bya zhing / mi mthun pa'i yul na gnas pa la sogs pa spang bar bya'o/ /zhi gnas kyi rgyu drug dang mi ldan zhing de'i mi mthun pa mi spang ba ni/ dor bar bya ba'i mu gsum pa ni phal cher 'byung zhing / dang du blang bar bya ba'i mu bzhi pa ni gnas skabs kha cig tu 'byung bar 'gyur te/des na ting nge 'dzin rdzogs par mi 'gyur ro/ /zhi gnas kyi rgyu drug dang ldan zhing de'i mi mthun pa spang ba ni dor bar bya'o/ /mu gsum pa ni gnas skabs kha cig tu 'byung bar 'gyur zhing dang du blang bar bya ba'i mu bzhi pa ni phal cher 'byung bar 'gyur ro/ /de bas na ting nge 'dzin myur du rdzogs par 'gyur ro//sgom pa tshod zin cing thun ring po ma yin pa ni khams rab 'bring tha ma gsum las/ rab kyis ni nyin gyi sum cha mtshan gyi sum cha bsgom par bya ste/ nyin gyi sum cha ni thun gsum pa'am bzhir bsgom par bya'o/ /mtshan gyi sum cha ni nam gyi cha stod dang cha smad la bsgom par bya'o/ /khams 'bring gis ni nyin gyi bzhi cha mtshan gyi bzhi cha bsgom par bya ste/nyin gyi bzhi cha ni thun bzhi 'am lngar bsgom par bya'o/ /mtshan gyi bzhi cha ni nam gyi cha stod dang cha smad la bsgom par bya'o/ /khams tha mas ni nyin mtshan gcig gi bzhi cha tsam la/ nam gyi cha stod dang cha smad dang nyin par thun bzhi 'am lngar bsgom par bya'o//khams rab 'bring tha ma des phyis ting nge 'dzin mthu skyes par gyur nas nyin gyi phyed mtshan gyi phyed bsgom par bya ste/ nyin gyi phyed ni nyin par thun gsum du bsgom par bya'o/ /mtshan gyi phyed ni nam gyi cha stod dang cha smad la bsgom par bya'o/ /mi bsgom pa'i dus na yang chos thams cad sgyu ma lta bur shes par bya ba dang / snying rje bsgom pa la sogs pa ni bsgom pa'i rim pa nas 'byung ba bzhin du shes par bya'o/ /thun ring po ma yin pa ni sgom pa'i tshod zin cing lus dang sems la mi gnod tsam du bsgom mo/ /sgom pa'i tshod ma zin cing thun ring na ni dor bar bya ba'i mu gsum po ni phal cher 'byung la/ dang du blang bar bya ba'i bzhi pa ni gnas skabs kha cig tu 'byung bar 'gyur te/des na ting nge 'dzin rdzogs par mi 'gyur ro/ /sgom pa tshod zin cing thun ring po ma yin na ni dor bar bya ba'i mu gsum pa ni gnas skabs kha cig tu 'byung la/ dang du blang bar bya ba'i mu bzhi pa ni phal cher 'byung bar 'gyur te/ de bas na ting nge 'dzin myur du rdzogs par 'gyur ro//de ltar shes par bya zhing brtson 'grus brtsams na ting nge 'dzin myur du rdzogs par 'gyur ro/ /mu bzhir shes shing blang dor bye brag mkhas/ /zhi gnas rgyu drug mi mthun spangs la mkhas/ /sgom pa tshod zin thun ring min la mkhas/ /de ltar gang shes ting 'dzin rdzogs la mkhas/ /bdag ni blo ldan skye bo ma lags kyang //gdams ngag blo la bzhag nas sems nyams brjod/ /skye bo ma sbyangs 'di la mos gyur na/ /mnyam gzhag gong ma'i khyad par thob par 'gyur/ /shes rab rnam gsum dbang gis blo yi byi dor byas/ /blo ldan skye bo 'di la ma dad gyur na 'ang / /mi mkhas dbang gis blo ldan yid mi dbab/ /gzhan phan ma 'dres blo yis brtsams pas nyes pa med//bdag gis shin tu dang ba'i sgo nas 'di brtsams pas/ /skye bo thams cad lung dang rigs pa'i don rtogs nas/ /lam gyi rim tshul bzhin du bgrod nas mthar phyin te/ /mi rtog dang las thugs rje rgyun bzhin 'byung bar shog /sems kyi nyams cung zad tsam zhig mdor bsdus nas brjod pa rdzogs so//