CLOSE WINDOW

D4374
བོད་ཡིག

/ /zhig nas sku la bsgom thabs chung ngu rdzogs so// //[]gang gis zhi gnas lhag mthong mthar phyin pas/ /'gro ba'i mi shes rab rib sel mdzad pa/ /thams cad mkhyen pa de la phyag 'tshal te/ /zhi gnas 'jug pa'i thabs tshul cung zad bri/ / sdom ni/ tshogs dang shes bya sngon 'gro dang / /bsgom dang nyes spang tshod gzung dang / /ngal gso skye lugs gnas pa'i tshad/ /bcu pa bstan thabs ngos zung cig /de la zhi gnas kyi tshogs gang zhe na/ 'phags pa blo gros mi zad pas bstan pa las/ zhi gnas kyi tshogs kyi dbang du byas nas/de la zhi gnas mi zad pa gang zhe na/ gang sems zhi ba dang / rab tu zhi ba dang / nye bar zhi ba dang / rnam par mi g.yeng ba dang / dbang po legs par bsdams pa dang / mi rgod pa dang / mi 'phyar ba dang / mur cor mi smra ba dang / yab yab po ma yin pa dang / mi 'gyur ba dang / zhi des pa dang / bsrung ba dang / cang shes pa dang / las su rung ba dang / rtse gcig pa dang / gcig pur dga' ba dang / 'du 'dzi yongs su spang ba dang / dben par dga' ba dang / lus dben pa dang / sems ma bslad pa dang / dgon par mngon du phyogs pa yid la byed pa dang / 'dod pa nyung ba dang / 'dod pa med pa dang / 'dod chen med pa dang / chog shes pa dang / 'tsho ba yongs su dag pa dang / cho ga phun sum tshogs pa dang / spyod lam bsrung ba dang / 'du shes pa dang / tshod shes pa dang / dus min shes pa dang / rlan drod shes pa dang / dgang sla ba dang / gso sla ba dang / so sor rtogs pa'i stobs kyis mi mtho mi dma' ba dang / ngan du brjod pa dang / ngan du smra ba'i tshig gi lan dang du len pa dang / rnal 'byor la mngon du phyogs pa'i sems bskyed pa dang / nang du yang dag par 'jog la mngon par dga' ba dang / bsam gtan gyi yan lag yid la byed pa dang / byams pa bskyed pa dang / snying rje mngon par sgrub pa dang / dga' ba la gzhog pa dang / btang snyoms sgom pa'o zhes gsungs so/ /gzhan yang dkon mchog sprin las/ dal 'byor spyod pa'i skabs su skyon la mkhas pa yin zhes bya ba las brtsams te/skyon de dag gang zhe na/ 'di lta ste/ sangs rgyas la rim gro mi byed pa dang / chos dang / dge 'dun dang bslab pa dang / 'phags pa rnams dang / tshangs par spyod pa rgan rabs dang / bar ma dang gsar bu rnams la rim gro mi byed pa ni skyon no//bdag la ri mo byed pa dang / gzhan la brnyas pa dang / yul la mngon du phyogs pa dang / mya ngan las 'das pa la rgyab kyis phyogs pa dang / bdag tu lta ba dang / sems can du lta ba dang / gang zag tu lta ba dang / chad par lta ba dang / rtag par lta ba dang / stong pa nyid du 'dzin pa dang / rtag par 'dzin pa dang / mi rtag par 'dzin pa dang / 'phags pa rnams la mnyes par mi byed pa dang / byis pa'i skye bo brten pa dang / tshul khrims dang ldan pa yongs su spong ba dang / sems can tshul khrims 'chal ba la bsnyen bkur byed pa dang /sdig pa'i grogs la brten pa dang / dge ba'i bshes gnyen yongs su spang ba dang / mdo sde zab mo spang ba dang / mdo sde zab mos skrag pa dang / snyom las dang le lo byed pa dang / bdag la brnyas pa dang / gzi brjid chung ba dang / spobs pa med pa dang /gnas ma yin pa la 'gyod pa dang / mi 'gyod pa la 'gyod pa dang / 'gyod pa la mi 'gyod pa dang / sgrib pa kun nas ldang ba'i grags pa dang / g.yo sgyus bcings pa dang / rmugs shing gnyid kyis non pa dang / rnyed pa dang bkur sti 'dod pa dang / rus la 'dod chags pa dang /rigs la 'dod chags pa dang / lta ba la 'dod chags pa dang / yul la 'dod chags pa dang / 'khor la 'dod chags pa dang / 'jig rten rgyang pan pa'i gsang tshig la brten pa dang / dam pa'i chos la 'byor ba dang / yi dam 'dor ba dang / mi dge ba dang ldan pa dag la rtsol ba dang /rab tu byung ba dang bsdeb dang / skyes pa dang bsdeb pa dang / bud med dang bsdeb pa dang / khye'u dang bsdeb pa dang / bu mo dang bsdeb pa dang / mu stegs can dang bsdeb pa dang / dgon pa la mngon par mi dga' ba dang / zas kyi tshod mi shes pa dang /bla ma'i drung du mi 'gro ba dang / kha ton gyi dus mi shes pa dang / spyod yul gyi gnas mi shes pa dang / bslab pa phra mo dag la gus par mi byed pa dang / sdig pa chung ngu rnams la 'jigs par mi lta ba dang / dbang po gti mug gis bsgribs pa dang ldan pa dang / g.yeng ba dang ldan pa la dbang po grims pa dang /rgod par spyod pa dang / bcos dka' ba dang / bka' blo mi bde ba dang / yid du 'ong ba dang / yid du mi 'ong ba'i gzugs dag la mtshan ma dang mngon rtags su 'dzin pa dang / khro ba rnams la sems mi byams pa dang / sdug bsngal ba rnams la snying mi brtse ba dang /na bas skyo bar mi byed pa dang / shi bas mi skrag pa dang / kun tu 'bar ba las mi 'byung ba dang / lus so sor mi rtogs pa dang / tshul khrims la so sor mi rtogs pa dang / ci byas ci byed ci bya zhes so sor mi rtogs pa dang / mi bsam pa la sems pa dang / mi rtag pa la spyi rtog pa dang /mi smon pa la smon pa dang / mi 'byung ba la 'byung bar 'du shes pa dang / mi dge ba la dge bar 'du shes pa dang / lam ma yin pa lam du 'du shes pa dang / ma thob pa la thob par 'du shes pa dang / 'phral gyi bya ba la chags pa dang / byed pa ngan pas g.yengs pa dang / dge ba'i phyogs rgya chen po rnam par spong ba dang / theg pa chen po la mi bsngags pa brjod pa dang / nyan thos kyi theg pa la bsngags pa brjod pa dang / theg pa chen po la mngon par dad pa'i gang zag rnams la mi bsngags pa brjod pa dang / nyan thos kyi theg pa la mngon par dad pa'i gang zag rnams la bsngags pa brjod pa dang /rtsod pa lhur byed pa dang / 'thab pa'i ngang tshul can dang / brlang ba dang / rtsub pa dang / pho theg can dang / spyi rtol che ba dang / gtum pa dang / gdug pa dang / ngag mi snyan pa dang / mur cor smra ba dang /mi gtsigs par smra ba dang / ngan du smra bas smra ba dang / brdzun zer ba dang / spros pa la mngon par dga' ba dang / spros pa la gzhol ba ni skyon no zhes gsungs so/ /de nyid las yang gsungs pa/ de 'du ba thams cad kyi thams cad yongs su spang ngo / /'du 'dzi thams cad du yongs su spong ngo //smra ba la dga' ba dang / 'dod pa'i rnam par rtog pa dang / gnod sems kyi rnam par rtog pa dang / 'tshe ba'i rnam par rtog pa dang / lta ba la rnam par rtog pa thams cad du yongs su spang ngo / /shes kyi khe 'dod pa dang / grags pa 'dod pa dang /rnyed pa 'dod pa thams cad kyi thams cad du yongs su spong ste/ de lus dang sems rab tu dben pas sems la mkhas pa yin te/ de la sems la 'di snyam du bdag gi sems 'di ci dge ba la spyod dam/ 'on te mi dge ba'am/ 'on te lung du ma bstan pa'am/ chos gang la spyod ces rnam par dpyod de/gal te dge ba la spyod na de la sems dga' ba dang / rangs pa dang / mgu ba bskyed do/ /dge ba'i chos de dag kyang gang zhe na/ 'di lta ste/ byang chub kyi phyogs kyi chos sum cu rtsa bdun no/ /'on te mi dge ba la spyod na de la skyo ba mang ba dang / rtog pa mang ba yin te/mi dge ba'i chos de dag spang ba la brtson pa yin no/ /mi dge ba'i chos de dag kyang gang zhe na/ 'di lta ste/ 'dod chags dang / zhe sdang dang / gti mug go/ /de la 'dod chags rnam pa gsum du rig par bya ste/ chen po dang / 'bring dang / chung ngu'o/ /de la 'dod chags chen po gang zhe na/gang lus thams cad du khyab ste/ sems kun nas gzung zhing gnas pa dang / gang gi de la gzhol zhing 'dod chags dang bral ba'i sems mi 'thob pa ste/ de la gzhol ba de la ngo tsha dang 'dzem pa thams cad kyi thams cad du med par 'gyur te/ ji ltar na ngo tsha dang 'dzem pa thams cad kyi thams cad du med pa yin zhe na/de la gcig pu lkog tu song ste/ sems kun nas gzung zhing gnas pa dang / de nyid rjes su rnam par rtog cing de nyid la legs par shin tu smon pa dang / de nyid la yang yon tan du lta ba yin te/ de ltar na de la ngo tsha med pa yin no//ji ltar na 'dzem pa med pa yin zhe na/ de rgyu de dang rkyen de dang / gzhi des pha ma'am bla ma lta bu gzhan dag dang rtsod cing phyir zlog pa dang / rgol bar byed cing des ngo mi tsha la de la yon tan du lta ba yin te/ de ltar na de la 'dzem pa dang / ngo tsha med pa yin te/ de la rgyu de dang rkyen de dang /gzhi des ngan song rnams su skye bar 'gyur te/ de ni 'dod chags chen po zhes bya'o/ /de la 'dod chags 'bring po gang zhe na/ gang gis 'dod pa rnams la brten par gyur na bya ba grub kyi bar du rten gyi bya ba grub nas 'dod chags dang bral ba'i sems thob nas 'gyod pa 'thob pa dang /sems la mi 'chab pa 'thob pa ste/ de ni 'dod chags 'bring po zhes bya'o/ /de la 'dod chags chung ngu gang zhe na/ gang gis 'dod pa rnams bsten par gyur kyang mnams pa dang / byug pa dang / lus kyis reg pa tsam mam/ tshig tu smras pa tsam mam/ mthong ba tsam gyis tshim par 'gyur ba de ni 'dod chags chung ngu zhes bya'o//mdor na 'tsho ba'i yo byad thams cad la chags pa'i sems su gyur pa ste de ni 'dod chags zhes bya'o/ /de la zhe sdang gang zhe na/ zhe sdang yang rnam pa gsum du rig par bya ste/ chen po dang / 'bring dang / chung ngu'o/ de la zhe sdang chen po gang zhe na/ zhe sdang gi rnam pa gang gis zhe sdang zhing rngam 'khrugs gtum par gyur nas mtshams med pa lnga las gang yang rung ba byed pa'am/ dam pa'i chos spang ba gang byas pa la mtshams med pa lnga bsdams pa bas kyang grangs su yang nye bar mi 'gro//cha dang / bgrang ba dang / dpe dang / rgyur yang nye bar mi 'gro ba de lta bu phyed de/ de rgyu de dang rkyen de dang / gzhi des lus zhig nas sems can dmyal ba chen po dag tu skye zhing / gal te brgya la mir skye ba na yang / gnag cing dmar la/ gtum zhing gnod sems mang bar 'gyur te/de rgyu de dang rkyen de dang gzhi des kyang sems can dmyal ba dag tu skye bar 'gyur ba de ni zhe sdang chen po zhes bya'o/ /de la zhe sdang 'bring po gang zhe na/ gang gis zhe sdang bar gyur te/ sdig pa mi dge ba'i las byas nas myur ba myur bar skyen pa skyen pa la gor la gor du 'gyod cing de'i gnyen po la yang brten pa ste/de ni zhe sdang 'bring po zhes bya'o/ /de la zhe sdang chung ngu gang zhe na/ gang gis zhe sdang bar gyur nas tshig tsam dang / mi snyan pa tsam dang / ngan du brjod pa tsam gyis mi dge ba'i las sogs pa ste/ de yang brgyal bar 'ga' zhig 'byung ste/ byung na yang skad cig de nyid dang /yul tsam de nyid dang / thang cig de nyid la gnyen po bsten pa ste/ de ni zhe sdang chung ngu zhes bya'o/ /de la gti mug gang zhe na/ gti mug kyang rnam pa gsum du rig par bya ste/ chen po dang / 'bring dang / chung ngu'o/ /de la gti mug chen po gang zhe na/ gang ji skad du smos pa'i gnas de dag las nyes kyang dga' zhing mya ngan du mi byed/smre sngags mi 'don/ 'gyod par mi byed pa yin te/ de ni gti mug chen po zhes bya'o/ /de la gti mug 'bring po gang zhe na/ gang gis mi dge ba'i las byas kyang la gor la gor du 'gyod cing / tshangs pa mtshungs par spyod pa rnams kyi drung du 'chags shing mi 'chab la/de la yon tan du yang mi lta ba yin te/ de ni gti mug 'bring po zhes bya'o/ /de la gti mug chung ngu gang zhe na/ gang gis rang bzhin gyi kha na ma tho ba ma yin pa bcas pa'i kha na ma tho ba bslab pa kun spyad pa'i lam gnyis gsum las 'da' ba ste/ de ni gti mug chung ngu zhes bya'o//de la yang byang chub sems dpa' sems phyir zlog pa la mkhas pa yin te/ de de ltar sems la mkhas pa la gang 'dod pa rnams la dga' ba dang / 'dod pa rnams la 'dun pa dang / 'dod pa rnams la lhag par chags pa de lta bu med pa yin te/de ci'i phyir zhe na/ de ltar sems la mkhas pa'i phyir ro/ /'on te lung du ma bstan pa la spyod na/ de la dran pa dang ldan zhing nan tan byed la/ de brtag pa la brtson pa yin no/ /de la ji ltar na lung du ma bstan pa la spyod pa yin zhe na/ gang gi tshe sems phyi rol du yang mi rgyu nang du yang mi rgyu//dge ba la yang mi spyod/ mi dge ba la yang mi spyod/ lhag mthong la yang mi spyod/ zhi gnas kyang mi 'dzin cing zhum la gnyid kyis non par gnas te/ 'di lta ste/ dper na skyes bu nyal nyal ba las sad pa mi gnyid kyis bsgribs pa'i sems mi gsal ba de bzhin du de'i tshe sems de mi gsal bar rgyu ba ste/de la byang chub sems dpa' sems yang dag par gzengs bstod pa dang / yang dag par rab tu dga' bar bya ba dang / yang dag par gzhag pa la mkhas pa yin te/ de ltar na byang chub sems dpa' sems la mkhas pa yin no/ /de de ltar sems la mkhas pa chos 'di dag ni sgyu ma lta bu'o//chos 'di dag ni rmi lam lta bu'o/ /chos 'di dag ni dge ba'o/ /chos 'di dag ni mi dge ba'o/ /chos 'di dag ni 'byung ba'o/ /chos 'di dag ni mi 'byung ba'o/ /zhes chos rnams la yongs su rtog ste/ 'di snyam du chos 'di dag thams cad ni sems la gnas pa/sems las byung ba/ sems sngon du 'gro ba ste/ sems shin tu bcil ba dang / shin tu brtul ba dang / shin tu khong du chud par byas na chos de dag thams cad kyang shin tu bcil ba dang / shin tu brtul ba dang / shin tu khong du chud par 'gyur ro zhes gsungs so//'phags pa dran pa nye bar gzhag pa las kyang / 'du 'dzi'i gtam nyan pa dang / ri mo bri ba dang / snyan dang gas sbyor ba dang / gza'i tshogs dang / rgyu skar sems pa dang / zas rnyed pa bdag gir byed pa dang / sha za mo lta bur nor bsgrub par sems pa dang /rgyal po la brten pa dang / mkhas pa rnams la gdams ngag mi nod pa dang / bde ba la mgron du bod pa dang / 'dre zhing gnas pa'o zhes gsungs so/ /bsgom pa'i rim pa bar du mdzad pa las kyang / zhi gnas kyi tshogs gang zhe na/mthun pa'i yul la gnas pa dang / 'dod pa chung ba dang / chog shes pa dang / bya ba mang po yongs su spangs pa dang / tshul khrims rnam par dag pa dang / 'dod pa la sogs pa'i rnam par rtog pa spang ba'o/ /de la yon tan lnga dag dang ldan pa ni/ mthun pa'i yul yin te/skye bo mi srun pa dang / dgra la sogs pa med pa'i phyir legs par ldan pa dang / gos dang zas la sogs pa tshigs med par rnyed pa'i phyir rnyed sla ba dang / nad nyung ba'i sa phyogs yin pa'i phyir sa bzang ba dang / grogs tshul khrims rnam par dag pa dang / lta ba mthun pas grogs bzang ba dang /nyin mo skye bo mang bos ma gang ba dang / mtshan mo sgra chung ba'i phyir gnas bzang ba'o/ /'dod pa chung ba gang zhe na/ chos gos la sogs pa bzang po'am/ mang po la lhag par ma chags pa'o/ chog shes pa gang zhe na/ chos gos la sogs pa ngan ngon tsam rnyed pas rtag tu chog shes pa'o//bya ba mang po yongs su spang ba gang zhe na/ nyo tshong la sogs pa'i las ngan pa yongs su spang ba dang / khyim pa dang / rab tu byung ba dag dang ha cang smos 'drin byed pa dag dang / sman byed pa dang / skar ma brtsi ba la sogs pa yongs su spang ba'o/ / tshul khrims rnam par dag pa gang zhe na/ sdom pa gnyi ga la yang rang bzhin dang bcas pa'i kha na ma tho ba dang bcas pa'i mi 'dral ba dang / bag med pas ral yang skyen pa skyen par 'gyod cing chos bzhin du byed pa'o/ /zhes bya ba la sogs pa gsungs so/ /'dod pa'i rnam par rtog pa la sogs pa spangs pa gang zhe na/'dod pa rnams la tshe 'di dang phyi ma'i nyes dmigs rnams rnam pa mang por yong bar bsams la/ de dag la rnam par rtog pa spang bar bya'o/ /yang 'khor ba'i dngos po sdug pa'am/ mi sdug pa yang rung ste/ de dag thams cad dang bdag ring por mi thogs par bral na bdag ci zhig la chags par 'gyur snyam du bsams la rnam par rtog pa spang bar bya'o//zhes gsungs so/ /zhi gnas kyi tshogs de dag ni mdor bsdu na gnyis te/ kha cig ni dgag pa'i sgo nas ston to/ /kha cig ni bsgrub pa'i sgo nas gsungs so/ /yang zhi gnas kyi tshogs gnyis te/phyi'i dang / nang gi'o/ /phyi'i ni yid du 'ong ba'i sa phyogs so/ /mthun pa'i yul na gnas pa zhes kyang gsungs so/ /nang gi ni ma chags pa dang / tshul khrims rnam par dag pa'o/ /'jig rten chags pa med la mngon dgas 'jug /ces gsungs na/ sdom pa'i tshul khrims kyis sems gnas pa'i bya ba byed ces kyang gsungs so//lhag pa'i tshul khrims la brten nas lhag pa'i sems skye zhes gsungs pa dang / tshul khrims la ni gnas nas ting nge 'dzin 'thob po/ /zhes gsungs so/ /tshul khrims ni ting nge 'dzin gyi rgyu yin no zhes kyang gsungs pa dang /nyon mongs med pa'i ting 'dzin myur thob ste/ /de ni tshul khrims rnam dag phan yon yin/ /zhes gsungs so/ /tshul khrims la g.yel na phyis 'gyod pa 'byung zhing / 'gyod pas ni sems 'phro bar byed de de bas na 'bras bu ting nge 'dzin 'dod pas rgyu tshul khrims gus par bsrung ngo //dmigs pa'i mtshan nyid shes par bya ba gang zhe na/ 'dir de bzhin gshegs pa la sogs pa'i sku gzugs kyi mtshan nyid shes par bya ba ste/ 'di yang 'dod chags dang / zhe sdang dang / gti mug dang / nga rgyal dang / rnam par rtog pa shes che ba dang / cha mnyam pa dang /nyon mongs pa chung ngu las tha ma gnyis la legs sam snyam du bsams pa'o/ /mang du thos pa'am/ gdams ngag gis zin na kun gyis kyang / re zhig dmigs kyang legs so snyam du bsams so/ /rnam par rtog pa la sogs pa de dag gi rtags dang / de dpag pa'i thabs dang /dmigs pa dang / bsgom pa'i thabs nyan thos kyi sa las gsal lo/ /dmigs pa de ga las gsungs snyam pa la/ 'phags pa ting nge 'dzin gyi rgyal po las/ gser gyi kha dog lta bu'i sku lus kyis/ /'jig rten mgon po kun nas rab tu mdzes/ /dmigs pa de la gang gis sems 'jog pa//byang chub sems dpa' de mnyam gzhag ces bya/ /zhes gsungs pa dang / da ltar gyi sangs rgyas mngon sum du bzhugs pa'i ting nge 'dzin las kyang / de bzhin gshegs pa 'od dpag tu med pa'i sku mdog dang / phyag mtshan dang /gdan dang / che ba'i yon tan la sogs pa thos nas dang ba'i sems kyis nub phyogs su bltas te bsgoms na gsal bar snang bar 'gyur ro/ /de yang thog mar rmi lam du snang ste/ dper na smad 'tshong ma mdog shin tu sdug pa zhig yod la/ tshong dpon gyi bu zhig gis thos pa dang /de'i nub mo mthong ba'am 'phrad par rmis pa bzhin no zhes gsungs so/ /la la dag de bzhin gshegs pa mngon sum du bzhugs pa la dmigs na snang bar 'gyur srid kyi mya ngan las 'das pa la ni ma yin no snyam na/ 'phags pa ting nge 'dzin gyi rgyal po las/ de bzhin gshegs pa mya ngan 'das pa dag//ji ltar yid la byas bzhin gzugs brnyan snang / /zhes gsungs so/ /yang bris sku la sogs pa la dmigs pa med dam snyam na/ mdo sde las de bzhin gshegs pa'i sku gzugs ri mor bris pa yongs su rdzogs pa zhig la tshong dpon gyi bu zhig gis gzugs brnyan yang 'di 'dra na rang gi ngo bo mthong ba lta ci smos snyam du bsams te/de ma thag tu sa phyogs byi dor ma byas pa zhig tu 'dug nas dang ba'i sems kyis mig mi 'dzums par bltas shing / bsgoms pas bsam gtan dang po nas bzhi pa'i bar du thob pa la sogs pa gsungs so//gzhan dag na re zhi gnas kyi dmigs pa la nges pa med ces 'byung bas bum pa la sogs pa gang yang rung ba la dmigs pas chog zer te/ de lta yin mod kyi 'on kyang yud tsam re re la yang phan yon chen po yod pa'i phyir dang / dang ba skye bas de bzhin gshegs pa la sogs pa'i sku gzugs la dmigs pa legs so snyam du bsam mo//de la phan yon ni 'phags pa dad pa'i stobs bskyed pa'i phyag rgya'i mdo las/ stong gsum gyi stong chen po'i 'jig rten gyi khams kyi rdul phra rab thams cad nyan thos dang rang sangs rgyas su gyur la/ gang la la zhig bsod nams 'dod pas de dag la chos gos dang /mal stan dang / na ba'i gsos sman la sogs pas bskal pa gang gA'i klung gi bye ma snyed du mchod cing bsnyen bkur byas pa bas/ gang la la zhig gis yang dag par rdzogs pa'i sangs rgyas kyi sku gzugs ri mor bris pa zhig mthong na de de bas ches bsod nams che na/me tog gtor ba la sogs pa lta ci smos zhes gsungs so/ /'phags pa ting nge 'dzin mchog dam pa las kyang / gang la la zhig gis rin po che sna bdun las byas pa'i gtsug lag khang gis 'dzam bu'i gling thams cad bkang ste/de dag gi nang du tsan+dan sbrul gyi snying po las byas pa'i de bzhin gshegs pa'i sku gzugs kyis bkang ste/ de dag la bskal pa gang gA'i klung gi bye ma snyed du las gzhan mi byed par nyin gcig bzhin du lha'i me tog dang spos la sogs pas mchod pa byas pa bas gang la la zhig gis yang dag par rdzogs pa'i sangs rgyas kyi sku la yud tsam zhig sems nang du bsdus nas brtags na de ni de bas bsod nams ches grangs med pa skyed do//zhes gsungs so/ /'phags pa ting nge 'dzin gyi rgyal po las kyang / ji lta ji ltar mang du mi brtag na/ /de la gnas pa'i rnam par rtog pa des//de lta de ltar de la sems gzhol 'gyur/ /de bzhin rgyal ba yi ni sku byad dang / /ye shes dpag tu med par thub dbang dran/ /rtag par rjes su dran par goms byed na/ /de yi mdun na ston pa rtag tu bzhugs/ /zhes gsungs so/ /yang de nyid las/nam zhig de ni na zhing mi bde ste/ /shi la thug pa'i sdug bsngal tshor byung na/ /sdug bsngal tshor bas phrogs par yong mi 'gyur/ /zhes bya ba la sogs pa gsungs so/ /'phags pa kA t+yA ya nas bran mo zhig la dbul 'tshong ngam zhes gsungs pa dang / bran mos smras pa/dbul gang zhig nyo ba mchis zhes zhus pa dang / dbul 'tshong ba'i thabs yod do/ de bzhin gshegs pa'i sku yid la gyis shig ces gsungs pa dang / des de'i mtshan mo tho rangs rtswa bting ba'i steng du 'dug ste/ de bzhin gshegs pa'i sku yid la byas pa dang / de nyid du tshe'i dus byas kyang sum cu rtsa gsum gyi lha'i nang du skyes pa la sogs pa gsungs so/ /da ltar gyi sangs rgyas mngon sum du bzhugs pa'i ting nge 'dzin las kyang / nam zhig de bzhin gshegs pa mngon sum du mthong ba dang / des gsungs pa'i chos kyi sgra thos par 'gyur ba la sogs pa'i phan yon gsungs so//'phags pa yul 'khor skyong gis zhus pa las/ sangs rgyas rjes su dran pa yang yin par gsungs so/ /de ltar mdo de dag de dag tu de bzhin gshegs pa'i sku la bsgoms na phan yon che bar gsungs so//dmigs pa la dang ba'am dad pa skye ba ci dgos she na/ nyes pa lnga spang ba'i 'du byed brgyad kyi dang po mngon par yid ches pa'i dad pa yin par gsungs pa dang / dad pa sngon 'dren ma ltar skyes pa ste/ /lag pa bzhin du dge sdud rtsa ba yin/ /zhes gsungs pas dad pa skye ba'i yul gal che'o//de bas na phan yon che ba dang / dad pa skye ba'i yul yin pa'i phyir de bzhin gshegs pa'i sku'i gzugs brnyan gang la mos pa cig la 'khar ba dang ra gan la sogs pa'i 'du shes mi skyed par bsod nams dang ye shes kyi tshogs mtha' dag bsags pa las 'bras bu khyad par can ye shes dang bcas pa'i sku 'di lta bu bskyed pa yin snyam du bsams la dbyibs kyi bye brag bzhugs thabs sam/sku stod dang sku smad dang / dbu dang phyag dang / zhabs dang / rgyab yol dang / gdan khri dang / phyag mtshan dang / rgyan la sogs pa ji ltar gnas pa dang /kha dog gi bye brag ser po'am/ dmar po la sogs pa kha dog gcig pa'am/ mi gcig pa la legs par blta zhing nyi ma gnyis gsum du skabs skabs su bskyed cing blta/ 'dud cing rtags bye brag chung ngu yan chad sems la gzung shes par bya ste/ de ltar dmigs pa'i mtshan nyid shes par bya'o//sngon du 'gro ba gang zhe na/ dang por bya ba thams cad yongs su rdzogs par bya ste/ yid du 'ong ba'i sa phyogs su phyag 'tshal ba la sogs pa sngon du song bas stan bde ba'i steng du 'dug ste/ lus bags kyis glod la drang por bsrangs/ skyil mo krung dal bus bca'/lus la skyo ba bskyed de 'dug par bya'o/ /de nas 'di snyam du bsam par bya ste/ 'gro ba mtha' dag skye ba dang / rga ba dang / na ba dang / 'chi ba'i me rab tu 'bar bas sreg cing gzung ste 'khor zhing rab tu sdug bsngal lo snyam du bsam mo/ /de skad du/'phags pa rgya cher rol pa las/ srid gsum rga dang nad kyi sdug bsngal 'bar/ /'chi me rab 'bar 'di na mgon med pa/ /srid las 'byung las 'gro ba rtag tu rmongs/ /bum par chud pa'i bung ba 'khor ba bzhin/ /zhes gsungs so/ /de lta bas na srid pa gsum gyi sems can thams cad srid pa las 'byung ba'i thabs ni mi shes shing 'jug par dka' la 'khor ba'i rgyu la ni rang gi ngang gis 'jug go//de bas na bdag gis thams cad mkhyen pa'i ye shes thob par byas la/ 'gro ba mtha' dag byang chub chen po la dgod do snyam du bsam mo//thams cad mkhyen pa'i ye shes de yang zhi gnas dang / lhag mthong goms pa las thob po zhes 'phags pa dgongs pa nges par 'grel pa las gsungs so/ /de yang sngon du zhi gnas goms par bya dgos te/ de skad du/ ting nge 'dzin rnams thob nas shes rab shin tu bsgom//shes rab kyis ni ye shes rnam par dag pa 'thob/ /ces gsungs so/ /'phags pa sa bcu pa las kyang / thams cad mkhyen pa'i ye shes ni ting nge 'dzin la brten nas skye'o/ /zhes gsungs so/ /bslab pa kun las btus pa las kyang /srid la sogs pa'i sdug bsngal mtha' yas mi bzad pa/ /sems yid ma zhi khyed kyis yang dang yang myong gyur/ /ces gsungs so/ /spyod pa la 'jug pa las kyang / yid ni rnam par g.yengs gyur na/ /nyon mongs mche ba'i phrag na gnas/ /zhes gsungs so//de lta bas na bdag gi thog mar zhi gnas bsgrub po snyam du bsam mo/ /de ni sngon du 'gro ba'o/ /sems ji ltar gtad pa gang zhe na/ gong du legs par brtags pa'i sku de bdag gi mdun logs su khru gang gi pha mtha' tsam na sngar brtags pa bas kyang dbyibs legs sam kha dog gsal lam snyam du rdzogs pa mtshan nyid ci gsal du shes pa rab tu bsgrims la gtad do//de ltar gtad tsam na ye mi snang na yang rdzogs pa kho nar bsam mo/ /bye brag cung zad tsam snang na yang rab tu bsgrims la bzung ngo / /yang mi snang na rdzogs pa kho nar zhugs par bsam mo//de bas rdzogs par ci gsal du bsgom zhing rdzogs par mi snang na bye brag cung zad snang yang de la gtad/ de snang ma thag tu yang rdzogs pa'i mtshan nyid du sems rab tu bsgrims la gtad do/ /de bas na gtso cher spyi la bsgom zhing bye brag la gnas kyi bar du bye brag la gzhag go//gzhan dag na re shes pa bsgrims ci dgos tha mal par gzhag pas chog mod zer te/ las dang po pas ni de ltar mi bya ste/ slob dpon thogs med kyi zhal snga nas bsam gtan rnams la yid la byed pa bdun gyis 'jug pa ni bzhis bsdus te/bsgrims te 'jug pa dang / skabs su 'chad cing 'jug pa dang / skabs su 'chad pa med par 'jug pa dang / lhun gyis grub par 'jug pa'o zhes gsungs te de bas na las dang po pas shes pa rab tu bsgrims la dmigs pa gzung ste/ de ni sems ji ltar gtad pa'i thabs so//nyes pa spang ba gang zhe na/ nyes pa ni skabs 'dir bying rgod gnyis la bya ba ste/ gong ma bzhin du gtad pa'i skabs su sems bying ngam bying du dogs par mthong na dad pa skye ba'i yul yid la byas la shes pa gsal bar gyur ma thag tu gong ma bzhin du gtad do/ /bying ba'i rgyu ni kha zas kyi bye brag dang /ngal dub dang / mun pa yid la byas pa la sogs pas dmigs pa gsal bar 'dzin mi nus so/ /rgod pa ni gong ma bzhin du gtad tsam na dmigs pa de las gzhan gang dran yang rgod pa yin te/ dran ma thag tu skyo ba bskyed cing dmigs pa gang yin pa la myur du gtad do//rgod pa'i rgyu ni phal cher chags pa las 'byung ste/ de bas na mi rtag par bsam zhing skyo ba bskyed pas yul la ldog go/ /sgom pa yun thung ba'i dbang gis bying ba ni shas chung ste/ rgod pa las blan pa la rab tu 'bad do/ /sems gnas nas phyis skyed 'dod tsam na ni sgom pa'i rim par gsungs pa bzhin du bya'o//mdor na bying na gsal bar bya/ rgod na blan/ mnyam par zhugs na yid glod de/ de ltar nyes pa spang ngo / /khams kyi tshod gzung ba gang zhe na/ khams rab kyis nyin gyi bzhi cha mtshan gyi bzhi cha la thun bzhi'am lnga/ mtshan gyi bzhi cha ni nam gyi cha stod dang /cha smad la thun bzhi'am lngar bsgom mo/ /'bring gis nyin gyi bzhi cha la thun lnga'am drug tu bsgom mo/ /tha mas nyin gyi lnga cha'am/ drug cha tsam la thun drug gam bdun tsam du bsgom mo/ /khams zhan cing thun mang ba ni thung bas bye brag tu byas pa yin no/ /rab kyis ni zan re bza' ran tsam/'bring dang tha mas ni gom pa tha mal pas mda' rgyang gcig gam gsum mam gnyis sam phyed du phyin pa'i bar tsam du bsgoms te de ni spyir btang ba'o/ /de kun gyis kyang yun thung bar bsgom zhing / de'i phyi de nyin par gnyis/ de bzhin du zhag bcu'i bar du nyin re thun re bsnan cing bsgoms na/snga dro phyi ma red gang bde ba dang / khams rab 'bring gi tshod zhar la shes par 'ong ngo / mi bde ba phran tshegs tsam yang tshor bar bya zhing zhi bar bya'o/ /de ltar na khams kyi tshod gzung ngo / /ngal gso ba'am/ mi bsgom pa'i skabs su ji ltar bya zhe na/ bsam pa phun sum tshogs pa dang / 'tsho ba phun sum tshogs pa dang / spyod lam phun sum tshogs par bya'o/ /de la bsam pa phun sum tshogs pa ni bdag dul ba la mngon par brtsan par bya ba'i bsam pa dang / gang zag gzhan gyi skyon la mi rtag pa dang / 'jigs pa la sogs pa byung ba la ji ltar bya ba'i bsam pa dang /zhi gnas kyi tshogs spyir bsam ba'o/ /de la bdag dul ba la mngon par brtson par bya ba'i bsam pa ni/ 'phags pa drag shul can las/ bdag ci'i phyir dgon par 'ong / dgon pa na gnas pa 'ga' zhig ni dge sbyong dang bram ze ma yin te/ 'di na ma zhi ba/ ma byang ba/ma sbas pa/ mi brtson pa/ mi 'grus pa/ /'di lta ste ri dwags dang / spre'u dang / bya mang po dang / chom rkun dang / gdol ba dag kyang mang du gnas te/ de dag ni dge sbyong gi yon tan dang ldan pa ma yin te/ bdag gang gi phyir dgon pa na gnas nas dge sbyong gi don de thob par bya'o snyam du sems bskyed do zhes gsungs so//gzhan yang bdag ni lam ring po nas 'dir 'ongs shing gcig pu gnyis su med pa ste/ legs par byas pa dang / nyes par byas pa la bskul ba'i grogs gang yang med de/ lha dang / klu dang / gnod sbyin dang / dri za dang /sangs rgyas bcom ldan 'das gang dag gzhan gyi sems shes pa yod de/ bdag dgon pa na gnas na mi dge ba'i sems kyi dbang du song na de dag gi dbang du 'gyur ro/ /bdag lam ring po nas 'ongs shing gcig pu gnyis su med la nga'i ba med pa yongs su 'dzin pa med pa yin la/ gal te 'dod pa la rnam par rtog pa'am/ gnod sems kyi rnam par rtog pa'am/ 'tshe ba'i rnam par rtog pa la sogs pa mi dge ba'i sems kyi dbang du gyur na/ 'du 'dzi ba'am 'du 'dzi la gnas pa'i sems can rnams dang bye brag med par 'gyur la/ lha dang / klu dang / gnod sbyin dang dri za rnams kyang bslus par 'gyur zhing /sangs rgyas bcom ldan 'das rnams kyang mi mnyes par byas par 'gyur gyi/ de bas na bdag ci nas lha rnams 'phya bar mi 'gyur ba dang / sangs rgyas bcom ldan 'das rnams mi dgyes par mi 'gyur ba de ltar sems bskyed par bya'o zhes gsungs so//gzhan gyi skyon la mi brtag pa ni 'di skad du mdo las/ yon tan 'dod pa nags na gnas pa dag /pha rol dag gi skyon la brtag mi bya/ /bdag ni khyad par 'phags shing bdag mchog ces/ /de snyam du ni sems bskyed mi bya'o/ /rgyags ni bag med kun gyi rtsa ba ste/ /dge sbyong dman la brnyas par ma byed cig /bskal pa gcig gis byang chub thob mi 'gyur/ /'di ni bstan pa 'di la go rims yin/ /zhes gsungs so/ /'phags pa dkon mchog sprin las kyang / pha rol gyi skyon la rtogs pa ni dgon pa la gnas pa'i tshul bzhin ma yin pa yid la byed pa'o zhes gsungs so//mi ma yin pa'i 'jigs pa la sogs pa byung na snying rje chen po bskyed do/ /des zhi bar 'gyur bar mdo sde las gsungs so/ /zhi gnas kyi tshogs spyir bsam pa ni gong du smos pa rnams skabs skabs su bsam par bya'o/ /'tsho ba phun sum tshogs pa ni rab tu byung ba yin na/ mthar chags kyi bsod snyoms dang /rnyed pas chog pa'i bsod snyoms pa gang yang rung bas dang por 'dul ba'am mdo sde las 'byung ba bzhin du blang ba'am/ sbyin bdag la gsol ba gdab pa byas la phyis 'tsho ba shin tu ngan kyang 'gyod par mi bya ste/ bdag gi 'tsho ba gzhan la rag las pa yin no snyam du bsam zhing nga rgyal bskyungs te/lhad zan zhag bdun pa yang rung ste/ zas kyi ro la chags pa ni bcom ldan 'das kyis rnam grangs du mar smad de/ zas la brten nas nyon mongs pa ma skyes pa 'di ni 'tsho ba phun sum tshogs pa yin no snyam du bsam mo/ /dge bsnyen yin na yang / kha na ma tho ba med cing khams dang 'phrod pa dang po tshags byas nas phyis 'dod pa'am/phul bskyed pa'am/ tshol ba'i bsam pa mi bya bar chog shes par bya ste/ ji ltar za gcig pas kyang ma thob pa thob par bya ba 'grub na/ bdag cag dus dang dus ma yin pa thams cad du za bas lhad zan las med kyang khams ci'i phyir mi brta/de bas zan gyi don du sdig pa bsag cing dge ba'i bar chad mi byed pa ni 'tsho ba yongs su dag pa yin no snyam du bsam mo/ /spyod lam phun sum tshogs pa ni sems mi gnas kyi bar du kha ton dang / phyag mang po mi bya/ yi dam du bcas pa yang du bas su bcad cing nyin par phar 'gro tshur 'gro bya zhing zhar la sgra ha cang mi che bar gdon/lus kyi spyod lam sos dal bar bya/ gyen thur zug po la mi 'gro/ /sa gcig tu yun ha cang ring bar mi 'dug /nyin par glos phab ste gnyid mi log /stobs bskyed pa'am/ drag shul chen po mi bya/ spyod lam kun byang chub kyi sems kyis zin par bya ste/'phags pa dkon mchog sprin las 'byung ba'am/ spyod yul yongs su dag pa las 'byung ba bzhin du dran par bya'o/ /de bas na/ dge ba la ni lus dang sems 'jug par bya ste/ mi nus na btang snyoms dang lung du ma bstan pas ngal bso'o//mi dge ba'i sems cung zad kyang mi btang ste/ 'dus shing kha stobs 'gyed pa dang / rgyal po dang / bud med la sogs pa'i gtam ngan pa smra ba'am/ ngan pa'i rtog pa cung zad kyang mi bskyed do/ /gong du bstan pa bzhin du sngon du 'gro ba dang / smon lam ci rigs par cung zad la gdab pa ni las dang po pas nyin re la thun re tsam bya ste/sgom res kyis mi bya'o/ /de dag ni mi bsgom pa'i dus kyi bya ba'o/ /bsgom pas sems kyi skye lugs ni rnam pa gnyis te/ cig car dang rim gyis so/ /gong ma la gnyis te/ thun gcig nas zhag bdun tshun chad kyis cig car rtsol ba drag zhan gnyis ka la rdzogs par snang ba la sogs bsal gyis snang nas brtan pa dang /thun gcig tsam snang nas zhag kha cig mi snang ste/ cis kyang cig car du rdzogs par snang nas brtan pa'o/ /rim gyis pa la bzhi ste/ dang po rtsol ba drag kyang rung zhan yang rung dmigs ba cung zad kyang mi snang ba'i nyams dang /de nas rtsol ba drag tu bsgoms na snang la/ skabs skabs su drag zhan gnyi ga la mi snang ba'i nyams dang / drag tu bsgoms na ni snang la/ gzhan du bsgoms na skabs kha cig tu mi snang ba dang / rtsol ba drag zhan gnyis ka la rdzogs pa'i mtshan nyid du snang ba la sogs pa gtad du 'dod pa'i mtshan nyid dang ldan pa'o//yang kha cig la 'di ltar skye ste/ thog ma nyid la rtsol ba drag zhan gnyi ga la mi snang ba mi srid de/ phyogs re tsam snang ste rdzogs par mi snang du mi 'dod do/ /gang gsal ba la gtad cing de mi gsal tsam na rangs pa la gtad/yang phyogs gcig gsal na de la gtad de mi gsal na yang snga ma bzhin du byas pas gsal tshabs je che je tshe brten skyed byung na rtsol ba drag zhan gnyi ga la rdzogs par snang ba la sogs pa gtad du 'dod pa'i mtshan nyid dang ldan pa'o/ /yang kha cig la thog ma nyid nas rtsol ba drag zhan gnyi ga la res 'ga' snang /res 'ga' mi snang ba'i nyams dang / cung zad skyed byung nas rtsol ba drag zhan gnyis ka la phal cher snang la gnas skabs kha cig tu mi snang ba'i nyams dang rtsol ba drag zhan gnyis ka la yang snang ste/ rtsol ba zhan du bsgoms na kha cig tu mi snang ba'i nyams dang /rtsol ba drag zhan gnyis ka la rdzogs par snang ba la sogs pa 'dod pa'i mtshan nyid dang ldan pa'o/ /yang kha cig la sems kyi skye lugs 'das ma thag pa dang 'dra ba las skye ba'i rim pa gsum pa rtsol ba drag zhan gnyis ka la snang / skabs kha cig tu gzhan du bsgoms na mi snang bar 'byung ba'i skabs der ma nges pa lnga snang ba 'byung ste/dbyibs ma nges pa dang / kha dog ma nges pa dang / kha dog 'ba' zhig dang / grangs dang / che chung ma nges pa'o/ /de la dbyibs ma nges pa ni/ bde bar gshegs pa'i sku gzugs snang bar 'dod pa la/ sku mi snang bar mchod rten nam/gzhan zlum po la sogs par snang ba'o/ /kha dog ma nges pa ni ser por snang bar 'dod pa la sngon po'am dmar po la sogs pa gzhan snang ba'o/ /kha dog 'ba' zhig pa ni dbyibs dang kha dog bcas par 'dod pa las dbyibs kyi tha snyad ni gdags par dka'/ ser po la sogs pa 'od du snang ba'o//grangs ma nges pa ni gcig bsgoms na gnyis yan chad snang ba'o/ /che chung ma nges pa ni chen po bsgoms pa ni chung ngu snang ba la sogs pa'o/ /ma nges pa de dag las thun gcig la yang gnyis snang ba dang / gsum dang bzhi gang zag gcig la snang ba srid kyi lnga kho na thun gcig la snang ba ni mi srid do//kha dog 'ba' zhig pa dang 'gal ba'i phyir ro/ /kha dog 'ba' zhig la yang sngar gyi sku'i kha dog dang mthun pa dang / mi mthun pa yang 'byung ngo / /thams cad la nag por snang ba ni khams mi bde ba yin no/ /ci'i phyir ma nges pa zhes bya zhe na/ skye ba'i rim pa gsum pa'i skabs su de dag gang yang ma nges pas na ma nges pa zhes bya'o//skabs der de dag gi rjes su 'brang bar mi bya ste/ sngar brtags pa'i sku nyid la bsgom mo/ /gzhan ni gsal bar 'dra yang gtad du 'dod pa'i mtshan nyid dang mi ldan pas rjes su mi 'brang ste/ khams la gnod pa'i phyir ro//rjes su ma 'brang bas skyed byung ste/ rtsol ba drag zhan gnyis ka la rdzogs par snang ba la sogs gtad du 'dod pa'i mtshan nyid dang ldan pa'o/ /gtad du 'dod pa'i mtshan nyid dang ldan pa ni ma nges pa la yang bstan pa'i thabs bya'o/ /phyis gang mos pa la gyur du 'dod do/ /cig car ba dang rim gyis pa de dag gi gnas pa'i tshad ni mtshan nyid bzhi yin la/gsal ba'i bye brag ni rab 'bring gsum mo/ /de la mtshan nyid bzhi ni rtsol ba drag zhan gnyis ka la rdzogs par snang ba dang / thun ril por gnas nus pa dang / bying rgod gnyis dang bral ba dang / lus kyi bde ba spang ba dang /'jam pa cung zad dang / sems la dga' ba dgod 'chor ba tsam dang / sems rtse gcig pa'i phyogs dang mthun pa yod pa'o/ /gsal ba'i bye brag gsum ni/ rab mig gis mthong ba bas gsal zhing 'jam pa'am snyam pa dang / 'bring mngon sum du mthong ba dang 'dra snyam pa dang /tha ma cha rdzogs par gsal bar mi snang ba ste/ de rnams gang byung yang rung chog shes par bya ste/ re zhig de bstan par bya'o/ /phyis ni skyed dbyung ste/ mi gsal ba gsal bar bya ba dang / gsal ba yun ring ba la sogs pa'i thabs bya'o/ /la lan re brten pa'i thabs mi dgos zer te/de lta ma yin te/ brtan pa'i thabs ni bsgom pa dang ngal gso ba gnyis ka yin te/ de bas na khams kyi bye brag las dpag dgos pas shin tu gces so/ /khams kyi bye brag las ji ltar shes par bya zhe na/ khams rab cig yin na khams mi bde ba med pa'i skabs su sems gnas pa rnyed na/nyi ma gsum mtshan mo gsum srod tho rangs dang / nyin par gsal ba'am rtsol ba mi bya bar sngar ji tsam snang ba de ma shor bar nus tshad du bsgom mo/ /cung zad mi bde ba'i skabs su sems gnas par gyur na/ nyi ma gnyis dang / mtshan mo gnyis su srod dang tho rangs dang nyin par snga ma bzhin du bsgom mo//khams 'bring gis mi bde ba med pa'i skabs su sems gnas par gyur na/ nyi ma gnyis dang mtshan mo gnyis su srod dang tho rangs nyin par nus chad du bsgom mo/ /cung zad mi bde ba'i dus su sems gnas par gyur na/ nyi ma gcig dang mtshan mo gcig srod dang tho rangs nyin par snga ma bzhin du bsgom mo//khams tha mas mi bde ba med pa'i dus su sems gnas par gyur na/ nyi ma gcig dang mtshan mo gcig tu snga ma bzhin du bsgom mo/ /cung zad sems mi bde ba'i dus su sems gnas par gyur na/ thun gyi tshad ni dang po slob pa tsam du bya ste/ shes pa ni mi bsgrims par nyin mtshan gnyis tsam du bsgom mo//de ni spyir btang ba ste/ gsum kas kyang nam lus ngal ba dang / shugs 'byung ba dang / dngang ba dang / mgo bags kyis lci ba dang / yang yang bying ste 'gro ba'am nus pa byung ma thag tu 'phro bcad/ gsum kas kyang khams cher mi bde ba dang / sems gnas pa dus mtshungs par gyur na/ ye mi bsgom par ngal gso'o/ /khams sor ma chud kyi bar du yud tsam lta ba las thun du bcad pa bsgom par bya'o/ /de ltar brtan pa'i thabs kyis brtan par byas pa'i dmigs pa de ngos gzung ba ni yid la byed pa dang mthun pa yin te/ de skad du/ 'phags pa dgongs pa nges par 'grel pa las/ lus shin tu sbyangs pa dang / sems shin tu sbyangs pa de ma thob pa de'i bar du yid la bgyid pa de la ci zhes bgyi/ /byams pa zhi gnas dang mthun pa'i mos pa dang ldan pa yin te/ zhi gnas ni ma yin no zhes gsungs so/ /gang zhig dri ma gsum gyis bsgribs pas na/