CLOSE WINDOW

D4370
བོད་ཡིག

byams pa bsgoms pa'i sgo nas sems gnas par bya ba'i thabs cung zad bris pa rdzogs so/ /[]gti mug mun pa bag chags bcas par gtan spangs nas/ /'gro ba'i don du rten 'brel zab mo'i gsung sgrogs la/ /rab tu dang ba sngon du 'gro bas phyag 'tshal te/ /dang po'i las can gti mug shas che'i don du bshad//sdom ni/ rtags dang phan yon shes bya dang / /tshogs dang bsgom dang tshod gzung dang / /skye rim gnas tshad brtan pa'i thabs/ /log rtog spang dang bcu yin no/ /de la gang zag gti mug spyad pa'i rtags rnams gang zhe na/ 'di ni gang zag gti mug spyad pa ni/ rmongs par 'gyur ba'i dngos po chung ngu la yang gti mug gis kun nas dkris pa stug po dang / mang po skyed par byed na/ 'bring dang chen po dag la lta smos kyang ci dgos te gti mug gis kun nas dkris pa de yang yun ring du sems kyi rgyud la gnas par byed cing /gti mug gis kun nas dkris pa de yang yun ring du rjes su 'brel bar 'gyur ba dang / de rmongs par 'gyur ba'i chos rnams kyis zil gyis non par 'gyur zhing / rmongs par 'gyur ba'i chos rnams zil gyis non par mi nus pa dang / dbang po rtul ba dang / dbang po blun pa dang /dbang po zhan pa dang / lus kyi las kyi mtha' lhod pa dang / ngag gi las kyi mtha' lhod pa dang / nyes par bsams pa sems pa dang / nyes par smra ba brjod pa dang / nyes par bya ba'i las byed pa dang / le lo che ba dang / bsgrub mi phod pa dang / smra ba zhan pa dang /yid mi gzhungs pa dang / brjed ngas pa dang / shes bzhin du mi spyod pa dang / log par 'dzin pa dang / bral bar dka' ba dang / yid dbyung bar dka' ba dang / dman pa la mos pa dang / glen pa dang / dig pa dang / lkugs pa dang / lag pas brda byed pa dang / legs par gsungs pa dang / nyes par bshad pa'i chos rnams kyi don kun shes par mi nus pa dang / rkyen gyis phrogs pa dang / gzhan gyi dring 'jog pa yin te/ de lta bu dang mthun pa dag ni gang zag gti mug sbyad pa'i rtags rnams yin par rig par bya'o/ /zhes gsungs so//de la phan yon ni rten cing 'brel bar 'byung ba la goms na ma rig pa spong zhing yang dag pa'i lta ba skye bar 'gyur ro/ /de skad du/ gang dag dngos rnams brten byas nas/ /chu yi zla ba lta bur ni/ /yang dag ma yin log min par/ /'dod pa de dag ltas mi phrogs/ / zhes gsungs so/ /de la shes par bya ba ni mdor bsdu na bzhi ste grangs dang / ngo bo dang / nges pa'i tshig dang / de gang gis bsdu ba'o/ /de la grangs ni bcu gnyis te/ ma rig pa dang / ma rig pa'i rkyen gyis 'du byed dang / 'du byed kyi rkyen gyis rnam par shes pa dang / rnam par shes pa'i rkyen gyis ming dang gzugs dang /ming dang gzugs kyi rkyen gyis skye mched drug dang / skye mched drug gi rkyen gyis reg pa dang / reg pa'i rkyen gyis tshor ba dang / tshor ba'i rkyen gyis sred pa dang / sred pa'i rkyen gyis len pa dang / len pa'i rkyen gyis srid pa dang / srid pa'i rkyen gyis skye ba dang / skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa'o/ /ma rig pa'i ngo bo ni khams drug po 'di dag nyid la gang gcig bur 'dzin pa dang / ril por 'du shes pa la sogs pa'o//de ltar ma rig pa yod pas yul rnams la/ 'dod chags dang / zhe sdang dang / gti mug 'jug ste/ de la yul rnams la/ 'dod chags dang / zhe sdang dang gti mug gang yin pa 'di ni/ ma rig pa'i rkyen gyis 'du byed rnams zhes bya'o/ / dngos po so sor rnam par rig pa ni/ rnam par shes pa zhes bya'o/ /rnam par shes pa dang lhan cig 'byung ba nye bar len pa'i phung po bzhi po 'di dag ni ming dang gzugs so/ /ming dang gzugs la brten pa'i dbang po rnams ni skye mched drug go/ /chos gsum 'dus pa ni reg pa'o/ /reg pa myong ba ni tshor ba'o//tshor ba la zhen pa ni/ sred pa'o/ /sred pa la 'phel ba ni len pa'o/ /len pa skyes pa yang srid pa skyed pa'i las ni srid pa'o/ /rgyu de las phung po 'byung ba ni skye ba'o/ /skyes nas phung po smin pa ni rga ba'o/ /rgas nas phung po 'jig pa ni 'chi ba'o/ /'chi zhing myos te/ mngon par chags pa dang bcas pa'i nang gi yongs su gdung ba ni mya ngan no/ /mya ngan las byung ba'i tshig tu smra ba ni smre sngags 'don pa'o/ /rnam par shes pa lnga'i tshogs dang ldan pa'i yid mi bde ba myong ba ni sdug bsngal lo/ /yid la byed pa dang ldan pa ni yid kyi sdug bsngal lo/ /yid la byed pa dang ldan pa'i yid kyi sdug bsngal ni yid mi bde ba'o//gzhan yang 'di lta bu la sogs pa nye ba'i nyon mongs pa gang yin pa de dag ni 'khrugs pa zhes bya'o/ /nges pa'i tshig ni mun pa chen po'i phyir ma rig pa'o/ /mngon par 'du byed pa'i phyir 'du byed rnams so/ /rnam par rig pa'i phyir rnam par shes pa'o//brten pa'i phyir ming dang gzugs so/ /skye ba'i sgo'i phyir skye mched drug go/ /reg pa'i phyir reg pa'o/ /myong ba'i phyir tshor ba'o/ /skom pa'i phyir sred pa'o/ /nye bar len pa'i phyir nye bar len pa'o/ /yang srid pa skyed pa'i phyir srid pa'o/ /phung po 'byung ba'i phyir skye ba'o//phung po smin pa'i phyir rga ba'o/ /'jig pa'i phyir 'chi ba'o/ /mya ngan byed pa'i phyir mya ngan no/ /tshig gi smre ba'i phyir smre sngags 'don pa'o/ /lus la gnod pa'i phyir sdug bsngal ba'o/ /sems la gnod pa'i phyir yid mi bde ba'o/ /nyon mongs pa'i phyir 'khrugs pa'o//de gang gis bsdus she na/ gsum po 'di dag gis bsdus te/ nyon mongs pa dang las dang sdug bsngal lo/ /de la tshogs ni tshul khrims rnam par dag pa la sogs pa gzhan du blta'o/ /'dir bye brag cung zad tsam zhig bsam par bya ste/ gti mug 'dis 'jig rten las 'das pa'i bya ba'i thabs mi shes shing mi mthong ste/des na ngan 'gro 'ba' zhig tu lhung na byang chub lta ga la 'thob/ de skad du/ rmongs pas chos rnams mi mthong ngo / /gang dag gti mug rten byed pa/ /de dag ngan 'gror 'gro bar 'gyur/ /zhes gsungs so//de bas na bdag gis gti mug sbyang ba'i ched du rten cing 'brel par 'byung ba la gus par bsgom mo snyam du sems bskyed par bya'o/ /de la bsgom pa gang zhe na/ thog mar bya ba thams cad yongs su rdzogs par byas la stan bde ba'i steng du skyil mo krung bcas lus drang por bsrangs la/yid tsam zhig bsdad do/ /de nas 'di snyam du rten 'brel ni ma rig pa nas 'khrug pa'i bar 'di las med par gsungs pas 'di nyid ci gsal du bsgom mo snyam du bsam mo/ /de nas rim gyis bgrang zhing grangs mi brjod pa go rims ma 'khrugs par sgra spyi dang / don spyi'i rnam pa yid kyi brjod pa de la shes pa shin tu bsgrims la rab tu gsal bar gtad do//khams kyi tshod gzung ba ni spyir khams rab 'bring gsum yod kyang dge sbyong gzhan la rab tu 'jug la bsgom pa la zhan pa yang snang bas khams rab kyis kyang thun thung ngu nas bslabs na legs so/ /de bas na gsum kas kyang dang po nas slob lugs gcig par bya'o//mtshan mo btang snyoms su bzhag ste/ gnyid ji tsam log pa de tsam gyis khams brtas pa de tsam log cing gdal lo/ /nyin par zhar la tshod bzung zhing bsgom mo/ /ji ltar dang po'i nyin par snga dro'i thun gcig la yun gom pa tha mal ba'i mda' rgyang phyed du phyin pa tsam zhig bsgom mo//phyi dro thun gcig la yang de bzhin du bsgom mo/ /de nas nyi ma bcu'i bar du nyi ma re re la thun re bsnan zhing bsgom mo/ /na tsha phran tshegs byung na thun gyi grangs dbri ba dang /thabs gzhan gyis kyang rung ste/ 'phral la zhi bar bya/ bsran bskyed cing mi bsgom mo/ /na tsha med na gong du bstan pa bzhin du bsgom mo/ /de ltar na khams kyi tshod zhar la shes par 'gyur ro/ /de la sems kyi skye ba'i rim pa ni bzhi ste/ dang po ni rab tu bsgrims kyang grangs brjed cing 'gro//go rims kyang 'khrugs shing 'gro ba dang / gnyis pa ni grangs mi brjed la go rims kyang 'khrugs pa med par 'jug go/ /gsum pa ni grangs dang go rims mi 'khrugs shing rten 'brel gzugs can gang dag yin pa de dag phal cher snang bar 'gyur ro/ / bzhi pa ni gzugs can rnams gsal bar rtsol ba drag zhan gnyis ka la snang ba dang / gzugs can ma yin pa yang shin tu nges pa'o/ /gang la gtad kyang bde zhing 'og mar 'phor mi 'dod pa snyam byed cing bde ba dang sems kyi dga' ba dang ldan pa yin no/ /de la ji tsam gyis na rten cing 'brel bar 'byung ba la sems gnas pa yin zhe na/'di ltar rnal 'byor pa des rten cing 'brel par 'byung ba la kun tu bsten cing goms par byas/ lan mang du byas pa'i rgyus/ rgyu yang rung gnas kyang rung ste/ mi rtag pa dang / sdug bsngal ba dang / stong pa dang / bdag med par ches mang du snang la/rtag pa dang / bde ba dang / 'jig tshogs la lta ba dang ldan pa med pa dang / kun tu rmongs par 'gyur ba'i mtshan ma dang / kun tu rmongs par 'gyur ba dang mthun pa'i chos rnams la sems mi 'jug pa yin no/ /de la brten pa'i thabs ni sems gnas par shes nas sngar bsgoms pa bas thun gyi grangs nyung bar bya ste/yun cung zad ring bar bsgom mo/ /srod dang tho rangs la yang bsgom mo/ /sngar ji tsam gsal ba de tsam las rtsol bar mi bya'o/ /bye brag ni 'di yin te/ skye ba snga ma'i ma rig pa las 'du byed 'byung bas de gnyis kyis skye ba 'di'i mngal du rnam par shes bzhugs nas srid pa'i bar du skye ba 'di dang len pa nas srid pa'i bar du ma 'ongs pa'i rgyu byas shing /de ma 'ongs pa nas dang po mngal du 'jug pa ni skye ba'o/ /de rga ba la sogs pa rim gyis 'byung ste/ des yang ma rig pa dang 'du byed 'byung ste/ de yang ma 'ongs pa na nying mtshams sbyor ro//des rgyun mi chad par rlung gi rgyun bzhin du 'jug go snyam du bsam mo/ /ji srid du lus ngal ba'am/ sems dub pa'am/ bsgom tsam na dngang ba 'am/ shugs 'byung ba'am/ mgo bags kyis lci ba'am/ yam yom byed pa'am/ 'dar ba'am/ nub mo gnyid srab pa'am/zas mi zhim pa'am/ ngag gi 'khrul pa mang du 'byung ba la sogs pa khams mi bde ba'i mtshan ma cung zad ma byung gi bar du bsgom mo/ /de nam byung na ngal bso ste/ lus la bsku mnye bya/ chos dang mthun pa'i zas skom gyis lus dub pa brtas su gzhug ste/ khams sor ma chud kyi bar du nyin mtshan gnyis la nam bsgom snying 'dod pa'i dus su/ thun chung ngu re re lta ba tsam bsgom mo/ /nus pa brtas nas srod tho rangs thun re mi chags par bsgom/ nyin par thun gsum gsum du bsgom zhing snying rje sngon du 'gro ba dang / smon lam la sogs pa yang bya'o//de la log par rtog pa spang ba gang zhe na rten cing 'brel bar 'byung ba'i phyir/ rang bzhin yod par rtog pa ni log par rtogs pa'o/ /de skad du 'phags pa klu sgrub kyis kyang / sangs rgyas lam la brten nas ni/ /thams cad mi rtag smra ba rnams/ /rtsod pa yis ni dngos po la/ / chags gnas gang yin de smad do/ /zhes gsungs so/ /rten cing 'brel bar 'byung ba ni sangs rgyas kyi lam mo/ /de bas na dngos po thams cad rten cing 'brel bar 'byung ba'i phyir don dam par rang bzhin med de dper na sgyu ma lta bu'o zhes gsungs pa de'i rjes su 'brang bar bya'o/ /las tshul bsam gyis mi khyab kyang //bdag pas blo zhan mi srid de/ /'on kyang don du mi gnyer bas/ /mkhas pa'i gdams ngag ma thos la/ /phan srid bsams nas bris pa lags/ /rab rib can gyis gzugs bltas nas/ /gzhan la 'di zhes ston 'dra bas/ /mkhas pa rnams la bzod par gsol/