CLOSE WINDOW

D4368
བོད་ཡིག

de lta bu dang mthun pa de dag ni gang zag 'dod chags chung ba'i rtags rnams yin par rig par bya'o/ /spyi'i yi ge rdzogs so// /[]/me 'bar 'obs 'dra'i 'jigs bcas 'dod pa dag/ /gang gis bag chags bcas par gtan spangs la//rab tu dang bas phyag 'tshal des gsungs pa'i/ bdud rtsi'i chu rgyun 'dod med zil gnon bshad/ /sdom ni/ rtags dang phan yon shes bya dang / /tshogs dang bsgom dang tshod gzung dang / skye rim gnas tshad bstan pa'i thabs/ /'khrul par shes dang bcu yin no//de la rtags ni 'dir 'dod chags shas che ba'i rtags gzung ste/ de yang gang zhe na/ 'di na gang zag 'dod chags spyad pa ni chags par gyur pa'i dngos po chung ngu dang / ngan pa thams cad la yang 'dod chags kyis kun nas dkris pa stug po dang / chen po skyed par byed pa dang /'bring dang bzang po dag smos kyang ci dgos/ bsod nams kyis kun nas dkris pa de dag kyang yun ring du sems kyi rgyud la gnas par byed cing / 'dod chags kyis kun nas dkris pa de yang yun ring du rjes su 'brel par 'gyur ba dang / de chags par 'gyur ba'i chos rnams kyis zil gyis non par 'gyur zhing /chags par 'gyur ba'i chos rnams zil gyis non par mi nus pa dang / dbang po mnyen pa dang / dbang po 'jam pa dang / dbang po mi rtsub pa dang / dbang po mi brlang ba dang / gzhan dag la 'di lta ste/ lus dang ngag gis shin tu rnam par tho 'tsham pa'i rang bzhin can ma yin pa dang /bral bar dka' ba dang / yid 'byung bar dka' ba dang / dman pa la mos pa dang / las kyi mtha' dma' ba dang / las kyi mtha' brtan pa dang / brtul zhugs dma' ba dang / brtul zhugs brten pa dang /spro ring ba dang / 'tshog chas dang yo byad dag la brkam pa'i rang bzhin can yin zhing de la gdu ba dang / yid bde ba mang ba dang / kun dga' ba mang ba dang / khro gnyer med pa dang / bzhin gyi mdog gsal ba dang / 'dzum pa sngon du gtong ba yin te/de lta bu dang mthun pa dag ni/ gang zag 'dod chags spyad pa'i rtags yin par bya'o zhes gsungs so/ /de la phan yon ni/ nang dang phyi rol la brten pa'i 'dod pa me dang 'dra ba de nang dang phyi rol gyi mi sdug pa la goms pa chu dang 'dra ba'i gnyen pos zhi bar 'gyur te/de skad du/ /'dod chags me ni mi sdug chus zhi byed/ /ces gsungs so/ /gzhan yang 'dod pa ni gnod pa thams cad kyi rtsa ba'o zhes gsungs pas/ de zhi na de la brten pa'i nyon mongs pa gzhan yang zhi bar 'gyur ro/ /de'i phyir ting nge 'dzin myur du thob nas de la brten pa'i shes rab goms pas nyon mongs pa rtsa nas spang ba yongs su dag pa'i ye shes shar nas lus phun sum tshogs pa gser gyi kha dog lta bu thob cing /bdag dang gzhan gyi phun sum tshogs pa'i sgrub pa lhun gyis grub pa thob par 'gyur ro/ / de skad du bu mo zla mchog gis zhus pa las kyang / gser gyi kha dog lta bur rab 'bar zhing / /yid du 'ong ba bdag lus 'di la ltos/ /kye ma rab tu lus mdzes 'di lta bu/ /chags pa'i sems dang ldan la yod re skan/ /zhes gsungs so/ /de la shes par bya ba ni 'dir 'dod chags kyi gnyen po mi sdug pa'i mtshan nyid shes par bya'o//'dod chags ni gnyis te/ nang gi 'dod pa rnams kyi 'dod pa la 'dun pa'i 'dod chags dang / phyi rol gyi 'dod pa rnams kyi 'khrig pa la 'dun pa la 'khrig pa'i 'dod chags so/ /de la nang la brten pa'i mi gtsang ba'am mi sdug pa nyid la dmigs pas ni/nang gi 'dod pa rnams kyi 'dod pa la 'dun pa'i 'dod chags las sems ldog par byed do/ /de yang gang zhe na/ 'di lta ste/ skra dang / spu dang / sen mo dang / so dang / klog pa dang / dri ma dang / pags pa dang / sha dang / rus pa dang / chu rgyus dang / rtsa dang /mkhal ma dang / snying dang / mchin pa dang / glo ba dang / rgyu ma dang / gnye ma dang / pho ba dang / long ka dang / mcher pa dang / phyi sa dang / mchi ma dang / rdul dang / mchil ma dang / snabs dang / zhag dang / chu ser dang /rkang dang / tshil dang / mkhris pa dang / bad kan dang / rnag dang / khrag dang / klad spri dang / klad rgyas dang / gcin dang / de lta bu dang mthun pa dag ni nang la brten pa'i mi sdug pa dag yin par rig par bya'o/ /de yang khams gnyis po sa'i khams dang chu'i khams kyis bsdus te/de la skra dang spu nas bshang ba'i bar dag ni sa'i khams so/ /mchi ma dang rngul dag nas gci ba'i bar dag ni chu'i khams so/ /de la phyi rol la brten pa'i mi sdug pa nyid gang zhe na/ 'di lta ste/ rnam par bsngos pa dang / rnam par rnags pa dang / rnam par 'bus gzhig pa dang /rnam par bam pa dang / rnam par zos pa dang / rnam par dmar ba dang / rnam par 'thor ba dang / rus gong dang / keng rus dang / rus pa'i keng rus dang / bshang bas gos pa dang / gci bas gos pa dang / mchil mas gos pa dang / snabs kyis gos pa dang / khrag gis gos pa dang / rnag gis gos pa dang /chab khung dang / ljan ljin dang de lta bu dang mthun pa dag ni phyi rol la brten pa'i mi sdug pa dag yin par rig par bya'o/ /de yang 'dod chags rnam pa bzhi'i gnyen po ste kha dog dang / dbyibs dang / reg pa dang / nye bar spyod pa la chags pa dang ldan pa las sems rnam par sbyong bar byed do//de la gang gi tshe rnam par bsngos pa nas rnam par zos pa'i bar yid la byed pa de'i tshe/ kha dog la 'dod chags pa las sems rnam par sbyong bar byed do/ /gang gi tshe rnam par dmar ba yid la byed pa de'i tshe/ dbyibs kyi 'dod chags las sems rnam par sbyong bar byed do//gang gi tshe rus gong dang keng rus dang rus pa'i keng rus yid la byed pa de'i tshe reg pa'i 'dod chags las sems rnam par sbyong bar byed do/ /gang gi tshe rnam par 'thor ba yid la byed pa de'i tshe/ nye bar spyod pa la 'dod chags pa las sems rnam par sbyong bar byed do//de lta bas na bcom ldan 'das kyis kyang phyi rol la brten pa'i mi sdug pa dur khrod rnam pa bzhi gsungs so/ /de ni re zhig shes par bya'o/ /de la tshogs ni tshul khrims rnam par dag pa la sogs pa gzhan du blta'o/ /'dir cung zad tsam zhig bsam par bya ste/'di snyam du bsgrub pa snying por bya ba la sems gnas pa gcig med na bsgrub par dka' bas/ bdag gis thog mar sems gnas pa cig bsgrub par bya'o snyam du bsam par bya'o/ /de yang nang gi lus dang phyi rol gyi bud med la chags na gnod pa sna tshogs skyed cing ngan song gsum du 'gro na/sems gnas pa dang / bde 'gror skye zhing thar par lta ga la 'gyur/ bde 'gro med par ji ltar bsgrub/ de skad du zla ba sgron ma'i mdo las/ rul bar gyur pa'i lus 'di dang / /srog kyang g.yo ba dbang med do/ /rmi lam sgyu ma 'dra ba la//byis pa 'di dag chags pas na/ /de dag mi bzad sems dmyal 'gro/ /zhes gsungs so/ /yang gsungs pa/ gang zhig 'dod chags sems kyis ni/ /bud med rul ba bsten byed pa/ /'gro ba rul bar 'gro 'gyur te/ /des na ngan 'gror 'gro bar 'gyur/ /zhes gsungs so//de lta bas na lus dang bud med la chags pa'i sems spang bar bya'o/ /de la sgom pa gang zhe na/ thog mar bya ba thams cad yongs su rdzogs par bya ste/ stan bde ba'i steng du skyil mo krung bcas lus drang por bsrangs la yud tsam zhig bsdad do/ /de nas re zhig nang la brten pa'i mi sdug pa la sems 'di ltar gtad par bya ste/lus 'di la skra dang / spu dang / klad pa dang / klad rgyas dang gci ba'i bar dag la re re nas 'di ni rul ba/ dri mi zhim pa/ dri nga ba/ mi sdug pa nyid do snyam du rab tu bsgrims la ci gsal du bsgom mo/ /phyi rol la brten pa'i mi sdug pa bsgom pa la sems gtod par byed pa ni rnam par bsngos pa la sems gtod par byed pa na/des bud med dam/ skyes pa'am/ mdza' bshes sam/ tha mal pa'am ngan pa'am/ 'bring ngam/ bzang po'am/ byis pa'am/ bar ma'am/ rgan po shi ba'i ro bdag nyid kyis mthong ngam/gzhan las thos sam/ yongs su brtags kyang rung ste de'i mtshan ma bzung nas shi nas zhag gcig lon pa khrag zags la rul bar ma gyur pa gang yin pa la 'di ni rnam par bsngos pa'o/ /zhes rab tu bsgrims la ci gsal du bsgom mo/ /gzhan yang rus gong dang /keng rus dang / rus pa'i keng rus kyi bar dag gang la mos pa la rab tu bsgrims la ci gsal du bsgom mo/ /khams kyi tshod gzung ba ni/ spyir khams rab dang 'bring dang tha ma gsum yod kyang / dge sbyor gzhan la rab tu snang la bsgom pa la mi nus pa yang snang ba khams rab kyis kyang thun thung ngu nas bsgom par bya'o//de bas na gsum kas kyang re zhig slob lugs gcig par bya'o/ /mtshan mo btang snyoms su bzhag ste/ gnyid ji tsam log pa de tsam gyis khams brtas pa de tsam log cing gdal lo/ /nyin par zhar la tshod gzung zhing bsgom ste/'di ltar dang po'i nyin par snga dro thun gcig la gom pa tha mal pas mda' rgyang phyed du phyin pa'i yun tsam zhig bsgom mo/ /phyi dro thun gcig la yang de bzhin du bsgom mo/ /de nas nyi ma bcu'i bar du thun re re bsnan zhing bsgom mo/ /na tsha phran tshegs byung na 'phral la zhi bar bya ste/bsran skyed cing mi bsgom mo/ /khams mi bde ba med na gong du smos pa bzhin du bsgom mo/ /de lta bas na khams kyi tshod zhar la shes par 'gyur ro/ /de la sems kyi skye ba'i rim pa ni bzhi ste/ dang po rtsol ba drag zhan gnyi ga la dmigs pa mi gsal ba dang / gnyis pa rtsol ba drag tu bsgoms na phyogs 'ga' gsal te/ de yang yun ring por mi tshugs pa dang / gsum pa ni rtsol ba drag tu bsgoms nas gang la gtad kyang gsal la zhan na la la mi gsal te/ de yang yun ring por mi snang ngo / /bzhi pa ni rtsol ba drag zhan gnyis ka la klad pa la sogs pa gang la dmigs kyang shin tu gsal bar snang ba dang /de nyid dmigs kyang rung / rim gyis bgrangs kyang rung ste/ thun ring bar nus pa dang / rang dbang med pa'i rgod pa dang / bying ba dang bral ba'i lus kyi bde ba sngar nyams su ma myong bas lus la khyab pa dang / sems kyi dga' ba dad pa dang mtshungs par ldan pas sems la khyab pa dang ldan pa'o/ /de la gnas pa'i tshad ni/ 'di ltar rnal 'byor ba des mi sdug pa'i sbyor ba kun du bsten cing goms par byas/ lan mang du byas pa'i rgyus na rgyu gang yang rung gnas kyang rung ste/yul mngon du gyur cing mtshan mar so sor brtags su zin kyang mngon par 'du byed pa med par rang bzhin gyis mi sdug pa nyid ces mang du snang ste/ 'di lta ste mi sdug pa nyid shin tu goms par byas pa'i phyir 'dod pa'i 'dod chags dang / mthun pa'i chos rnams la sems 'jug par mi 'gyur/dga' bar mi 'gyur/ mos par mi 'gyur zhing btang snyoms dang / yid 'byung ba yang mi mthun par kun tu gnas na/ rnal 'byor ba bdag ni mi sdug pa thob pa yin no/ /bdag ni bsgoms pa'i 'bras bu thob pa yin zhes rig par bya'o/ / mi sdug pa de tsam gyis mi sdug pa thob pa yin no/ /de la bsten pa'i thabs ni/ sems gnas par shes nas sngar bsgoms pa bas thun gyi grangs nyung bar rig par bya ste/ yun cung zad ring bar bya/ srod tho rangs la yang bsgom/ dmigs pa la rtsol ba mi bya bar sngar ji tsam gsal ba de tsam la dmigs so//ji srid lus ngal ba dang sems dub pa'am/ dngang pa'am/ shugs 'byung ba'am/ mgo bags kyis lci ba 'am/ yam yom byed pa'am/ 'dar ba'am/ gnyid srab pa'am/ zas mi zhim pa'am/ ngag gi 'khrul pa mang du 'byung ba la sogs pa khams mi bde ba'i mtshan ma cung zad byung ba de srid du bsgom mo//de nam byung nas ngal bso ste/ lus la bsku mnye bya/ chos dang mthun pa'i zas skom gyis lus kyi nus pa brtas su gzhug ste/ khams sor ma chud kyi bar du nyin mtshan gnyis la bsgom snying 'dod pa'i dus su thun chung ngu re re blta ba tsam bsgom mo//khams sor chud nas srod dang tho rangs thun re nyin par gsum tsam bsgom zhing / thun snga ma bas ring bar bya'o/ /de la 'khrul pa shes par bya ba gang zhe na/ de la shes pa la shin tu gsal bar snang yang rang gi ngo bos yod pa ma yin pa de ni 'khrul pa yin te/dper na rmi lam gyi gnas skabs na rang gi lus la nad byung ba dang / phyi rol gyi lus la rnam par bsngos pa la sogs pa de na med kyang gsal por snang ba lta bu'o/ /bsgom pa'i shes pa la phyi rol du chad pa lta bu shin tu gsal bar snang ba'i mi sdug pa 'di dag kyang /rang gi ngo bos don dam par yod pa ma yin pas sems nyid 'khrul pa yin no/ /bcom ldan 'das kyis 'phags pa lang kar gshegs pa las/ phyi rol gzugs ni yod min te/ /rang gi sems nyid phyi rol snang / /zhes gsungs so/ /de lta bas na yang dag par med kyang yod pa lta bur snang ba de ni phyin ci log gi don ston pas 'khrul pa yin te/'di ni yang dag pa'i mi sdug pa'o snyam du 'du shes bskyed par mi bya ste/ skye ba med pa la nges par skye bar 'gyur ba'i rigs pa gang yang rung ba la brten nas/ lhag mthong bskyed par bya'o/ /las tshul bsam gyis mi khyab kyang //bdag pas blo zhan mi srid de/ /'on kyang don du mi gnyer bas/ /mkhas pa'i gdams ngag ma thos la/ /phan srid bsams nas bris pa lags/ /rab rib can gyis gzugs bltas nas/ /gzhan la 'di zhes ston 'dra bas/ /mkhas pa rnams la bzod par gsol/