CLOSE WINDOW

D4367
བོད་ཡིག

@##/ sems gnas spyir mdor bsdus bzhugs/ @##/ /sdom ni/ smon dang 'jug dang bzod pa dang / /thos bsten bkur ste smra dga' spang / /las dang spros pa 'du 'dzi spang / /dgon gnas spyod lam bsam pa bsten/ /zhi gnas lhag mthong tshogs dang rtags/ /dmigs dang gzhag dang ngos gzung dang //skyo dang zung 'brel lam 'jug phyir/ /nyi shu gcig gis bsgrub la gdams/ /sdom ni/ rten dang grogs byed sngon 'gro dang / /dbye ba ngo bo dmigs pa dang / /phan yon so so nges tshig dang / bsgrub dang mi ldan rkyen dang rgyu/ / ldog rgyu nyams byed gtong tshad dang / /nyes dmigs gang gis cho ga dang / /mi nyams 'phel byed bslab bya ste/ /nyi shu gcig gis smon pa'i sems/ /sdom ni/ phan yon so so khams dang ni/ /'gro ba gtong dang gnas pa'i dus/ /grangs dang go rims nges tshig dang //dgag dang sgrub dang khyad par dang / /che 'bring nyams dang mi nyams rgyu/ /sngon 'gro cho ga ngo bo dang / /yan lag nyes dmigs bslab bya ste/ /nyi shu gcig gis 'jug pa'i sems/ /cho ga'i sdom ni/ slob dpon dang ni slob mas so/ /sdom ni/ bsgrags dang brtag dang ma yengs dang / /ma yengs spro bskyed ma yengs gnyis/ /dri dang brjod dang mkhyen par gsol/ /rdzogs dang gzengs bstod khyad par dang / /mdor bstan dang ni gdams pa yi/ /slob dpon cho ga bsdus pa yin/ /sdom ni/ thos dang rtag dang gus pa dang //gsol gdab spro bya lan gdab dang / /bsod nams sku dang ston pa'i sems/ /bskul dang spyod lam bsam pa dang / /sngon 'gro ngo bo khas blangs nyams/ /gzengs bstod rdzogs dang khyad par dang / /mdor bstan gdams la mnyan pa'o/ / slob dpon brtag pa'i spyi sdom ni/ /snod du rung dang mi rung ba'o/ /sdom ni/ smod dang ngan dang zhugs min dang / /smon dang blangs dang gnas pa dang / /mkhas dang 'dzin nus go byed nus/ /mthu yod brtser ldan skyo ba bzod/ /sdom ni/ mi mos mi 'jug mi rtogs dang //brkam dang zil non 'dod pa che/ /mi chog nyams dang ma gus dang / /lhod dang khro dang khon du 'dzin/ /mi bzod gshe dang brdeg pa dang / /mtshang 'dru 'phya dang le lo dang / /snyom las nyid dus tshod min dang / /nyal ba dus tshod gnyis dus min//tshod min dus yol g.yengs pa dang / /mi gnas yid dul rmongs pa dang / /zhum dang sdig pa'i tshig smra dang / /lta dang rtog pa'ang de bzhin no/ /gang gi rgyu dang skyes pa dang / /'bab dang bag gnyis nyes med dang / /nyes dmigs phyir bcos mi 'byung rgyu//bcu gcig bslab bya phan yon gnyis/ /gang zag las dang po pa/ las thog ma pa/ bdag la phan par 'dod pa/ bdag gi don rjes su thob par 'dod pas/ gnas bzhi po kun shes par 'dod cing / klan ka'i sems med pa dang / gus pa dang bcas shing /nga rgyal gyi khengs pa med pa dang / dge ba gang yin zhes tshol zhing / bdag nyid sgrogs pa'i phyir ma yin pa dang / bdag dang gzhan dag dge ba'i rtsa ba la nges par sbyar bar bya zhing / rnyed pa dang bkur sti don du gnyer ba med pa dag la dran pa nye bar bzhag nas//mkhan po'am slob dpon nam/ bla ma'am/ bla ma lta bu rnal 'byor shes pa gang yin pa'i drung du 'gro bar bya'o/ /de ltar dus su song nas kyang skabs su bab par bya ste/ stan shin tu dma' ba la 'dug nas bla gos phrag pa gcig la gzar te/ pus mo g.yas pa'i lha nga sa la btsugs te/rjes dang bcas gus pa dang bcas pas/ btsun pa bdag ni rnal 'byor don du gnyer ba lags na/ bdag la rjes su thugs brtse ba'i slad du/ rnal 'byor bstan du gsol zhes rnal 'byor gsol bar bya'o/ /de ltar gsol ba btab pa'i rnal 'byor pa rnal 'byor shes pa des kyang /gang zag las dang po pa/ las thog ma pa/ rnal 'byor yid la bya ba la rab tu brtson par 'dod pa de la/ bzhin bzangs khyod skye dgu bag med pa dang ldan pa/ yul la gzhol ba/ yul la lhag par zhen par gyur pa/ bag yod pa la rab tu sbyor bar 'dod pa dang /ngan song gi btson rar zhugs pa/ ngan song gi btson ra nas gdon par 'dod pa dang / 'dod chags dang / zhe sdang dang / gti mug pa'i lcags sgrog gis bcings pa'i 'ching ba dag gcod par 'dod pa dang / 'khor ba'i 'brog dgon pa chen po bgrod dka' ba'i lam du zhugs pa/'brog dgon pa chen po bgrod dka' ba'i lam las nges par bsgral bar 'dod pa dang / nyon mongs pa dang mi dge ba'i rtsa ba'i mu ge chen po byung ba la/ dge ba'i rtsa ba'i lo legs par 'byung bar 'dod pa dang / nyon mongs pa'i chom rkun gyi 'jigs pa chen po dang bral bas/mya ngan las 'das pa'i bde ba rjes su thob par 'dod pa dang / nyon mongs pa'i nad chen pos thebs pa/ shin tu nad med pa'i mya ngan las 'das pa rjes su thob par 'dod pa dang / chu bo bzhis rgyun phyogs su bdas pa/ chu bo las bsgral bar 'dod pa dang / ma rig pa'i mun pa chen por zhugs pa dang / ye shes kyi snang ba rjes su thob par 'dod pa ni legs so legs so/ /tshe dang ldan pa khyod de ltar/ yang dag par rab tu brtson par byed pa na/ gdon mi za bar yul 'khor gyi bsod snyoms 'bras bu yod par za ba dang /ston pa'i bka' lung bzhin du byed pa dang / rtag tu 'grus pa'i bsam gtan pa lhag mthong dang ldan pa dang / khyim gyi stong pa dag rgyas par byed pa dang / bdag gi don gyi rjes su brtson pa dang / tshangs pa mtshungs par spyod pa mkhas pa rnams kyis ma smad pa dang /bdag la phan pa dang / gzhan la phan pa dang / skye bo mang po la phan pa dang / skye bo mang po la bde ba dang / 'jig rten la rjes su snying brtse ba dang / lha dang mi rnams la phan pa dang bde ba'i phyir zhugs par 'gyur ro zhes tshig gi lam 'jam po 'jam po dag gis yang dag par gzengs bstod par bya/yang dag par rab tu dga' bar bya zhing spong ba'i phan yon yang brjod par bya'o/ /de ltar de lta bu dang mthun pa'i tshig gi lam 'jam po 'jam po dag gis yang dag par gzengs bstod/ yang dag par rab tu dga' bar byas shing /spong ba'i phan yon yang dag par bstan nas yongs su dri bar bya ba'i gnas kyi chos bzhi po dag yongs su dri bar bya ste/ ci tshe dang ldan pa khyod gcig tu sangs rgyas dang chos dang dge 'dun la skyabs su song zhing / 'di las phyi rol pa'i ston pa'am/sbyin gnas gzhan dag yang dag par mi 'dod pa yin nam/ ci khyod tshangs par spyod pa bsgom par bya ba'i phyir/ khyod kyis dang por yongs su sbyang ba dang / tshul khrims shin tu rnam par dag pa dang / lta ba drang po yin nam/ ci khyod 'phags pa'i bden pa mdo dang rnam par dbye ba las brtsams te/chos nyung ngu'am mang po dag mnyan cing gzung ba yin nam/ ci khyod mya ngan las 'das pa la sems mos shing mya ngan las 'da' bar 'dod pas rab tu byung ba yin nam/ zhes dri bar bya ba'i gnas kyi chos bzhi po de dag yongs su dri bar bya'o//de ltar dris pa na/ gal te de lta bu lags so zhe na/ dam 'cha' bar byed na de'i 'og tu gnas bzhi po dag rgyu rnam pa bzhis legs par rjes su brtag par bya ste/ smon lam legs par rjes su brtag par bya/ rigs dang / dbang po dang / spyad pa legs par rjes su brtag par bya'o//dris pas legs par rjes su brtag par bya'o/ /gtam dang / spyod pa dang / sems kyi rnam grangs shes pas legs par brtag par bya'o/ /de la ji ltar dri bas smon lam legs par rjes su brtag par bya zhe na/ 'di skad yongs su dri bar bya ste/ tshe dang ldan pa khyod kyis nyan thos kyi theg pa'am/ rang sangs rgyas kyi theg pa'am/ theg pa chen po'am gang du smon lam btab ces yongs su dri bar bya'o/ /de yang gang dang gang du smon lam btab pa de bzhin du bdag nyid lan 'debs par 'gyur te/ de ltar dri bas smon lam legs par rjes su brtag par bya'o//ji ltar dri bas rigs dang / dbang po dang / spyad pa dag legs par rjes su brtag par bya zhe na/ des 'di skad dri bar bya ste/ tshe dang ldan pa khyod kyis bdag gi rigs gang yin pa dang / bdag gi dbang po rnams rtul ba'am 'bring ngam rno ba ji lta bu yin pa dang /ci bdag 'dod chags spyad pa'am/ 'on te zhe sdang spyad pa'am/ de bzhin du rnam par rtog pa spyad pa'i bar gang zhig yin/ zhes bdag nyid kyi rigs dang / dbang po dang / spyad pa dag shes sam zhes dri bar bya'o/ /gal te shes rab can zhig yin na des rim gyis bdag nyid kyi rigs dang /dbang po dang / spyad pa dag nye bar rtogs shing mtshan mar bzung ba de bzhin du lan 'debs par byed do/ /gal te de dman pa zhig yin na ni des rim gyis bdag nyid kyi rigs dang / dbang po dang / spyad pa dag nye bar rtogs shing mtshan mar ma zin pas de dris kyang lan 'debs par mi byed pas/de la de'i 'og tu re zhig gtam gyis de gsum legs par rjes su brtag par bya ste/ de'i mdun tshig gi lam gsal ba/ 'brel pa sna tshogs pa/ snyan pa/ go sla ba dag gis nyan thos kyi theg pa dang ldan pa'i gtam bya'o//de gal te nyan thos kyi rigs can zhig yin na ni/ gtam de byas pa na/ gtam des shin tu dga' ba dang / rangs pa dang / kun tu dga' ba skye ba dang / yid bde ba skye ba dang / rab tu dang ba dang / mos par 'gyur ro/ /gal te de rang sangs rgyas kyi rigs can nam/theg pa chen po'i rigs can zhig yin na ni/ gtam des shin tu dga' ba dang / rangs pa dang / yid bde ba skye ba dang / rab tu dang ba dang / mos par mi 'gyur ro/ /theg pa chen po'i rigs can gang yin pa de ni/ theg pa chen po dang ldan pa'i gtam byas pa na/gtam des shin tu dga' ba dang / rangs pa dang / kun tu dga' ba skye ba dang / yid bde ba skye ba dang / rab tu dang ba dang / mos par 'gyur ro/ /nyan thos dang rang sangs rgyas kyi rigs can ni de lta ma yin no/ /gal te de dbang po rtul po zhig yin na ni/gsal ba'i gtam byas na yang / chos kyi don nye bar rtogs pa dang / gzung ba dang / so sor brtag par bya ba la shin tu dbang po rtul bar 'gyur ro/ /gal te dbang po 'bring zhig yin na ni de lta ma yin no/ /gal te dbang po rnon po zhig yin na ni/ dbang po rtul po la sla ba'i gtam byas pa las bzlog pa/zab mo'i gtam byas na yang chos kyi don myur du nye bar rtogs pa dang / zin pa dang / so sor rtogs par byed do/ /gal te de 'dod chags spyad pa zhig yin na ni dang bar 'gyur ba'i gtam byas pa na/ gtam des shin tu rab tu dang ba dang /dga' ba dang / dgongs pa'i rjes su 'jug pa dang / spu zing zhes bya ba dang / mchi ma dkrug ces byed pa dang / sems kyi rgyud snum pa dang / sems 'jam pa ston par byed do/ /gal te de zhe sdang spyad pa zhig yin na ni/ de las bzlog pa yin par rig par bya'o//gal te gti mug spyad pa zhig yin na ni/ nges par 'byed pa'i gtam mya ngan las 'das pa dang ldan pa zang zing med pa byas na/ skrag pa dang dngang ba dang / kun tu skrag par 'gyur te/ ji ltar dbang po rtul po bstan pa de bzhin du de yang rig par bya'o/ / gal te de nga rgyal spyad pa zhig yin na ni/ shin tu gus par nyan par mi byed cing / rna gtod par mi byed la/ de bzhin du kun shes par bya ba'i sems nye bar 'jog par mi byed cing / dad par gyur na yang de bzhin du bsnyen bkur dang / legs so zhes bya ba byin mi byed do/ / gal te de rnam par rtog pa spyad pa zhig yin na ni/ legs par rna blags te nyan par byed kyang sems rnam par g.yeng bar 'gyur zhing log par gzung ste/ 'dzin par yang 'gyur la mi brtan zhing mi dam par 'dzin par yang 'gyur/ gzung na yang chud za bar 'gyur zhing / yang dang yang du phyi phyir yongs su 'dri bar byed par yang 'gyur te/de ltar rigs dang / dbang po dang / spyad pa dag legs par rjes su brtag par bya'o/ /ji ltar na spyod pas rigs dang / dbang po dang / spyad pa dag legs par rjes su brtag par bya zhe na/ gang zag nyan thos kyi rigs can la/'dod chags la sogs pa spyad pa dag gis rtags gang dag sngar bstan pa de dag ni spyod pa zhes bya ste/ spyod pa des rigs dang / dbang po dang / spyad pa dag ci rigs par legs par rjes su brtag par bya'o/ /de la ji ltar na sems kyi rnam grangs shes pas rigs dang / dbang po dang / spyad pa dag legs par rjes su brtag par bya zhe na/ gal te rnal 'byor pa rnal 'byor shes pa de sems kyi rnam grangs [(]shas [,]shes [)]pa thob pa zhig yin na/ des pha rol gyi sems shes pa des/ de'i rigs dang / dbang po dang / spyad pa dag yang dag pa ji lta ba bzhin du rab tu shes pas legs par rjes su brtag par bya'o//nyes pa kun spangs ye shes thob med rab brnyes pa/ /khams rnams sna tshogs mkhyen pa'i stobs kyis mngon sum gzigs/ /gang la gang phan gsungs pa'i dam chos ri rab las/ /rdul tsam blangs nas dang po'i las can don du bshad//de la las dang po pa'i gang zag ni bdun te/ 'dod chags shas che ba nas rnam par rtog pa shas che ba'i bar lnga dang / cha mnyam pa dang / nyon mongs pa chung ba'o/ /cha mnyam pa'i rtags gang zhe na/ gang zag gang gi sngon tshe rabs gzhan dag tu 'dod chags dang /zhe sdang dang / gti mug dang / nga rgyal dang / rnam par rtog pa kun tu ma bsten cing goms par ma byas/ lan mang du ma byas kyang chos de dag nyes dmigs su ma mthong zhing sun ma phyin yang dag par ma rtogs pas/ de rgyu de dang rkyen des da ltar chags par 'gyur ba dang / zhe sdang bar 'gyur ba dang / rmongs par 'gyur ba dang / khengs par 'gyur ba dang / rnam par rtog pa dang mthun pa'i dngos po la 'dod chags shas chen po dang / 'dod chags yun ring por skye bar mi 'gyur yang 'di lta ste/ dngos po des de las 'dod chags kun tu mi 'byung ba ma yin pa dang / 'dod chags ji lta ba bzhin du zhe sdang dang gti mug dang nga rgyal dang rnam par rtog pa rnams kyang de bzhin te/ de ni gang zag cha mnyam par 'gyur ba zhes bya'o/ /gang zag nyon mongs pa chung ba'i rang bzhin can gang zhe na/gang zag gang gis sngon tshe rabs gzhan dag tu 'dod chags kun tu ma bsten cing goms par ma byas/ lan mang du ma byas la nyes dmigs su yang lan mang du mthong zhing sun kyang phyin yang dag par rtogs pas de rgyu de dang rkyen des da ltar chags par 'gyur pa'i dngos po chen po dang / mang po dang / lhag pa dang phrad cing mngon sum du gyur pa la ni 'dod chags bul bar skye la/ 'bring dang chung ngu la ni gtan mi skye ba dang / 'dod chags ji lta ba bzhin du zhe sdang dang / gti mug dang / nga rgyal dang / rnam par rtog pa yang de bzhin du rig par bya ste/de ni gang zag nyon mongs pa chung ba'i rang bzhin can zhes bya'o/ /zhes gsungs so/ /yang na gang zag cha mnyam par spyad pa la ni 'dod chags la sogs pa spyad pa dag gi rtags gang dag yin pa de dag thams cad kyang yod mod kyi/ de dag ji ltar chags pa la sogs pa spyad pa de dag gi ltar che ba dang btsan pa ni ma yin te/de dag kyang rkyen dag yod na cha mnyam par 'gyur ba yin par mngon no/ /yang na gang zag nyon mongs pa chung pa'i rtags rnams ni ma bsgribs pa dang / dbang po dag pa dang / tshogs bsags pa dang / dad pa che ba dang / yid gzhungs pa dang / bsod nams bya ba dang / yon tan dang ldan pa yin no zhes gsungs so/ /de gnyis kyi dmigs pa ni mi sdug pa bsgom pa nas dbugs bgrang ba yan chad dmigs pa gang la dga' ba skye bar 'gyur ba de la bsgom mo zhes gsungs te/ de ni mthun pa'i dmigs pa yin no zhes kyang gsungs so//'dod chags la sogs pa shas che ba de dag gi dmigs pa ni so sor nges pa kho na yin no/ /nyon mongs pa chung bas ni dus nyes pas myur ba myur bas sems gnas pa rtogs par 'gyur ro/ /cha mnyam par rtogs pas ni ha cang yun ring po ma yin pas so//shas che ba ni yun ring bas so/ /nyon mongs pa de dag las gzhi shas che ba dang / gsum shas che ba dang / gnyis shas che ba yang shes par bya'o/ /nyon mongs pa chung ba dang / cha mnyam pa la ni bde bar gshegs pa'i sku la sogs pa la dmigs kyang sems gnas par 'gyur ro//de skad du slob dpon ka ma la shI las kyang de'i dmigs pa la nges pa med do zhes gsungs so/ /de'i bsgom pa ni gzhan du blta'o/ /de la ma bsgribs pa ni sgrib pa gsum po las kyi sgrib pa dang / nyon mongs pa'i sgrib pa dang / rnam par smin pa'i sgrib pa dag gis ma bsgribs pa ste/de la las kyi sgrib pa ni mtshams med pa lnga'i las dag dang / gzhan yang bsams bzhin du byas pa'i las lci ba las kyi rnam par smin pa ma skyes pa lam bskyed pa'i bar chad byed pa gang yin pa'o/ /de la nyon mongs pa'i sgrib pa ni/nyon mongs pa shas chen po dang / nyon mongs pa yun ring po gang dag yin pa ste/ tshe 'di nyid la spyad pa rnam par sbyang ba'i dmigs pa rnam par sbyang bar mi nus pa gang yin pa'o/ /de la rnam par smin pa'i sgrib pa ni/ skye ba'i gnas gang du 'phags pa'i lam la mi 'jug cing mi rgyu ba dang /gang du 'phags pa'i lam la 'jug cing rgyu ba der rnam par smin pa mngon par grub na yang / der skyes pa'i tshe glen pa dang / lkugs pa dang / lag pas brda byed par 'gyur zhing legs par gsungs pa dang / nyes par bshad pa'i chos rnams kyi don kun shes par mi nus par gyur pa'o//de la dang po dag pa tshul khrims shin tu rnam par dag pa dang lta ba drang ba'o/ /de la tshul khrims shin tu rnam par dag pa ni snga ma bzhin du rnam pa bcur rig par bya'o/ /de la lta ba drang ba ni/ dad pa dang mtshungs par ldan pa dang mos pa dang mtshungs par ldan pa dang /sgyu dang g.yo dang bral ba dang / legs par bsams pa'i chos kyi don la nem nur med cing the tsom med pa'i sbyor ba dang ldan pa'i phyir te/ lta ba dang mtshungs par ldan pa gang yin pa ni chos 'dul ba 'di las mi 'phrog par 'gyur ro/ /mos pa dang mtshungs par ldan pa ni/sangs rgyas dang / sangs rgyas kyi nyan thos rnams kyi mthu bsam gyis mi khyab pa dang / skyes pa'i gnas bsam gyis mi khyab pa dag dang / zab mo bstan pa dag dang / lung du ma bstan pa'i dngos po dag la mos shing mi skrag mi dngang bar 'gyur ro//sgyu dang g.yo dang bral ba'i lta ba ni/ de na drang po dang / drang ba'i rang bzhin can dang / ji ltar rjes su bstan pa bzhin du sgrub par byed pa dang / bdag nyid ji lta ba bzhin du ston par byed do/ /chos thams cad la mi rtag pa dang / sdug bsngal ba dang / stong pa dang / bdag med pa las brtsams te/ don legs par brtsams/ don legs par gzhal/ legs par nye bar brtags pa yin te/ rgyu des de nem nur med cing the tsom med la lam gnyis dang bral zhing khyad par du 'gro ba yin te/ ji skad mos pa'i lta ba rnam pa bzhi po de dag la lta ba drang ba zhes bya'o//de la tshogs bsags pa ni/ rgyas par sngar bstan pa'i de kho na lta bu'i tshogs dang ldan pa'o/ /yang mdor bsdu na rnam pa bzhi ste/ bsod nams kyi tshogs dang / ye shes kyi tshogs dang / sngon gyi dang / tshe 'di'i'o/ /de la bsod nams kyi tshogs ni/gang gis da ltar de la yo byad rkyen du bab cing mthun pa rab tu mang po dag bdog pa dang / dge ba'i bshes gnyen dag rnyed pa dang / rab tu brtson pa na bar chad med pa gang yin pa'o/ /de la ye shes kyi tshogs ni gang gis yid gzhungs par 'gyur ba dang / legs par gsungs pa dang / nyes par bshad pa'i chos rnams kyi don kun shes par nus pa dang / rjes su mthun pa'i chos bstan pa dang / don bstan pa gdams zhing rjes su bstan pa thob par 'gyur ba'o/ /de la sngon gyi ni sngon dge ba'i rtsa ba nye bar bsags pas des da ltar dbang po yongs su smin pa dag thob pa'o//de la tshe 'di'i ni 'di lta ste/ dge ba'i chos 'dun pa dang / de bzhin du dbang po yongs su smin pa dang / tshul khrims kyi sdom pa dang / dbang po sdom pa la sogs pa ste rgyas par snga ma bzhin no/ /de la dad pa che ba ni ston pa la nem nur med cing the tsom med la dad par byed cing mos par byed pa dang /ston pa ji lta ba bzhin du chos dang bslab pa la yang de bzhin no/ /zhes bya ba la sogs pa ste rgyas par snga ma bzhin no/ /de la yid gzhungs pa ni/ gang gis chos rnams myur du 'dzin par byed pa dang / chos dang don rnams yun ring por yang mi brjed par byed pa dang /chos dang don rnams myur du rtogs par byed pa'o/ /de la bsod nams byas pa ni/ gang gis gzugs bzang ba dang / blta na sdug pa dang / mdzes pa dang / tshe ring ba dang / tshig btsun pa dang / dbang che bar grags pa dang / grags pa dang ldan pa dang / bsod nams che ba dang / chos gos la sogs pa rnyed pa dang / rgyal po la sogs pas bsnyen bkur byas bla mar byas pa'o/ /de la yon tan dang ldan pa zhes bya ba la yon tan ni 'dod pa chung ba la sogs pa yin par rig par bya ste/ de ni rang bzhin gyi dge sbyong gi rgyan ji skad bstan pa de dang ldan pa dang /