CLOSE WINDOW

D4366
བོད་ཡིག

@##/ lhag mthong skyed pa'i thabs bzhugs/ @##/ /dngos 'dzin rnam rtog tshang tshing lta bu shes rab mtshon gyis rab bsal nas/ /de nyid la yang mi gnas de phyir ma rtogs 'gro rnams mun 'thoms la/ /thugs rje chen pos chu klung bzhin du ngang gis 'jug pa'i thabs sna tshogs//gsung ba de la dang bas phyag byas lhag mthong skyed thabs mdor bsdu bya/ /sdom ni/ sngon 'gro zhi gnas bsten pa yis/ /rtogs par bya dgos dang pos kyang / /ngo bo mtshan nyid nges tshig dang / /dbye ba dmigs pa skyed pa'i thabs/ /de rigs bsod nams yan lag dang //lus bcos mtshams sbyor gzhag pa dang / /nyes spangs ldang sems langs pa yi/ /tshod gzung bskyed rim gnas pa'i tshad/ /bstan pa'i thabs ni ci rigs bya/ /gsal dang thun ring skyed dbyung dang / /log par rtog pa'i gzhung nyid dang / /rang phyogs bsgrub med tshul gyis bsgrub//de la sngon du 'gro ba ni theg pa chen po'i mdo sde'i tshul gyis rjes 'jug las dang po so sor thar pa'i sdom pa la legs par gnas pa/ smon pa byang chub kyi sems bskyed nas bla ma yon tan dang ldan pa las theg pa chen po'i sdom pa legs par blangs nas gus par slob pa/tshul khrims rnam par dag pa la sogs pa zhi gnas kyi tshogs la gnas nas/ lhag pa'i sems cung zad brtan pa des lhag mthong gi tshogs la gnas nas lhag pa'i shes rab la bslab pa'i phyir de kho na tshol ba la brtson par bya'o/ /de skad du/dbu ma'i rgyan las/ gang dag dad pas rjes 'brang ba/ /rdzogs pa'i byang chub sems bskyed nas/ /thub pa'i brtul zhugs blang bya ste/ /de ni yang dag shes tshol brtson/ /zhes gsungs so/ /lhag mthong gi tshogs ni/ 'phags pa blo gros mi zad pas bstan pa las/ lhag mthong gi tshogs mi zad pa'i skabs nas 'byung ba khong du chud par bya'o/ /de la gang dngos po la mngon par zhen pa de ni nyon mongs pa sna tshogs skye ba'i gzhi yin te/ dper na skyes bu gzugs yid du 'ong ba dang phrad par 'dod cing zhen pas nyon mongs pa skye ba lta bu'o/ /lhag mthong mi skyed par ting nge 'dzin gyi dmigs pa la mngon par zhen pa 'di dag kyang nyon mongs pa yang skye bar 'gyur ro//de skad du/ 'phags pa ting nge 'dzin gyi rgyal po las/ ting nge 'dzin de sgom par byed mod kyi/ /de ni bdag tu 'du shes 'jig mi byed/ /de yis nyon mongs phyir zhing rab 'khrugs te//lhag spyod 'di na ting 'dzin bsgom pa bzhin/ /zhes gsungs so/ /gang dag nyon mongs pa'i rkyen gyis las bsags pa de dag ni yun ring por 'khor ba na 'khyam zhing sdug bsngal sna tshogs myong ste/ dper na phye ma leb me'i phung por chud pa lta bu'o//'on te des tha mal pa'i rtog pa ldog pas grol bar 'gyur zhe na ma yin te/ 'phags pa byams pas/ zas chen dug dang 'dres la zhen/ /zhes gsungs so/ /'phags pa klu sgrub kyis kyang / gang yang rung ba'i gnas rnyed na/ /nyon mongs sbrul gdug g.yon can gyis//zin par 'gyur ro gang gi sems/ /gnas med de dag zin mi 'gyur/ /zhes gsungs so/ /de bas na zhen pas zhen pa mi spong ste/ gzhan du na mes tshig pa'i 'phro mer bcug pas sos pa dang gsher ba chur bcug pas bskams pa dang / ltogs pa zas bcad pas 'drangs pa dang /skom pa btung ba bcad pas ngoms par thal bar 'gyur ro/ /gzhan dag na re de bzhin gshegs pa la sogs pa gzugs kyi sku'i bdag nyid dam/ gzhan yang rung ste/ shin tu gsal ba mthong na des grol bar 'gyur zhe na/ ma yin te/ 'phags pa da ltar gyi sangs rgyas mngon sum du bzhugs pa'i ting nge 'dzin las/dper na gser gyi gong bu de blang bar bya ba yin yang mes rab tu tsha bar gyur na lag pas gzung bar bya ba ma yin te/ de ci'i phyir zhe na/ gzhi de las lus kyi sdug bsngal skyed pa'i phyir ro/ /de bzhin du gzugs kyi sku de yang blang bar bya ba yin mod kyi 'on kyang zhen par gyur na spang bar bya'o zhes gsungs so//sgyu ma lta bur snang ba ni don dam par skye ba med pa ma gtogs par 'byung mi srid par 'phags pa ting nge 'dzin gyi rgyal po las gsungs so/ /gzhan yang 'di na kha cig de bzhin gshegs pas skye bo blun po shes rab kyi pha rol tu phyin pa zab mo'i don ma rtogs shing log par rtogs pa rnams yun ring por 'khor ba na 'khyams pa dag la thabs sna tshogs kyis drang ba'i don du gsungs pa la zhen nas zab mo'i don la mos pa yang zlog par byed de/'di skad ces 'di ni sgom du mi 'dod rtogs par dka'/ma rtogs kyang byang chub thob par byed pa'i thabs gzhan yod do/ /gang zhe na/ mtshan ma bsgom pa'o zhes zer zhing gegs byed pa de dag ni lta ba log pa dang gzhan gyis gegs byas pas las kyi sgrib pa shin tu yang spang dka' ba bsags pa'i phyir/ lha dang mi'i lus kyang mi 'thob na/bla na med pa'i byang chub lta ga la 'thob/ de skad du yang / 'phags pa yul 'khor skyong gis zhus pa las/ gang gis chos rnams kyi ni de bzhin nyid/ /ma shes pas na 'gro ba 'khyam 'gyur te/ /thugs rje thabs tshul rig pa brgya dag gis/ /de dag rnams ni ston par mdzad pa lags//zhes gsungs so/ /'phags pa shes rab kyi pha rol tu phyin pa stong phrag brgya ba las kyang / gang zag de ni sems can dmyal ba chen por skye bar gsungs la/ gang zag gzhan gyis ni bdud mkhan po la sogs pa'i cha byad du byas pa yin par yang gsungs so//de skad du 'phags pa lhas kyang / gti mug gang gis bsgribs gyur te/ /gang gi yang dag gegs byed pa/ /de la 'bras bu dge ba med/ /thar pa med pa smos ci dgos/ /zhes gsungs so/ /de bas na skyes bu gang bdag dang gzhan gyi 'khor ba'i sdug bsngal dpag tu med pa spong bar 'dod cing /bla na med pa'i byang chub chen po sku gsum dang ye shes bzhi'i bdag nyid thob par 'dod pas sdug bsngal dpag tu med pa'i rgyu/ nyon mongs pa dug dang 'dra ba'i rtsa ba dngos po la mngon par zhen pa dug gi sdang po lta bu de thabs kyis zin pa'i shes rab mtshon rnon po dang 'dra ba des/spang ba'i phyir chos rnams kyi de bzhin nyid de ni shin tu rtogs par bya dgos te/ 'phags pa dkon mchog sprin las kyang / rigs kyi bu byang chub sems dpa' dag chos nyid 'di thob nas sems can gzhan dag kyang chos nyid 'di kho na la rab tu dgod do/ / snyam ste/ don gang gi phyir 'bad cing rtsol ba dang / brtson 'grus rtsom pa dang / dka' ba brgya dag byed pa'i rigs kyi bu de ni de bzhin nyid ces bya'o zhes gsungs so/ /gzhan dag na re chos nyid de rtogs par bya dgos kyang las dang po pas bslab par bya ba ma yin no zhes zer na de lta ma yin te/shes rab kyi pha rol tu phyin pa stong phrag brgya pa las/ sems bskyed ma thag nas shes rab kyi pha rol tu phyin pa la bslab par bya'o zhes gsungs so/ /'on te de ni thos pa dang bsam pa tsam las bslab par bya ba yin te/ bsgom pa don du gsungs pa ma yin no zhe na/da ltar mi blta ste/ thos pa dang bsam pa yin mod kyang bsgom pa yang yin te/ der dgag pa'i tshig ni ma gsungs la/ sgrub pa'i tshig ni mang du gsungs so/ /mngon par rtogs pa'i rgyan las kyang tshogs kyi lam gyi skabs su/ rnam par mi rtog ting 'dzin dang / /zhes gsungs pa dang /bsgom pa'i rim pa dang po mdzad pa las kyang / theg pa chen po'i mdo sde yis/ /tshul spyod las ni dang po pa/ /de las brtsams te bsgom pa yi/ /rim pa mdo tsam brjod par bya/ /zhes gsungs la/ de'i lhag mthong bsgom pa'i skabs su/ chos thams cad ngo bo nyid med par dmigs pa med ces gsungs so//de lta bas na chos thams cad ngo bo nyid med pa ni las dang po pas kyang shin tu rtogs par bya dgos so/ /de las de rtogs par byed pa ni lhag mthong las gzhan pa ma yin te/ de'i ngo bo nyid ni shes rab bo/ /de skad du/ 'phags pa dgongs pa nges par 'grel pa las kyang /bcom ldan 'das chos rnams kyi ngo bo nyid ma mchis pa la/ byang chub sems dpa'i pha rol tu phyin pa gang gis 'dzin/ spyan ras gzigs dbang phyug shes rab kyi pha rol tu phyin pas so/ /zhes gsungs so/ /de'i mtshan nyid ni dbye ba yin te/ de nyid las shes par bya ba'i don de 'byed pa dang rab tu rnam par 'byed par byed pa de ni lhag mthong ngo zhes gsungs so//gzhan las kyang shes rab gang zhe na/ de dag nyid la rab tu rnam par 'byed pa'o/ /zhes gsungs so/ /nges pa'i tshig ni 'dir gzhan gyis ma rtogs pa rtogs pa dang ma mthong ba mthong ba ni lhag mthong yin te/de skad du 'phags pa klu'i rgyal po rgya mtshos zhus pa chen po las/ bcom ldan 'das gal te chos 'ga' zhig mthong na ni/ de ni lhag mthong ma lags so zhes gsungs te/ ma mthong ba de ni mthong ba rnams kyi dam pa yin te/ de skad du/'phags pa chos kun 'gro ba las kyang / bcom ldan 'das chos thams cad mi mthong ba ni yang dag par mthong ba'o zhes tshe dang ldan pa rab 'byor gyis gsungs so/ /de la dbye ba ni gsum ste/ thos pa'i shes rab dang / bsam pa'i shes rab dang / bsgom pa'i shes rab bo//de la dmigs pa ni thos pa'i shes rab kyi dmigs pa sgra rang gi mtshan nyid dang / sgra bkod pa'i yi ge dag la dmigs te/ mngon sum dang dmigs pa mtshungs pa'i phyir ro/ /sgra spyi dang don spyi la yang dmigs te/ mngon sum la nges pa'i shes pas grogs byed pa'i phyir ro//de la kha cig na re thos pa'i shes rab ni sgra rang gi mtshan nyid 'ba' zhig la dmigs zer te/ de lta ma yin no/ /gang gi phyir bum pa zhes zer ba'i sgra thos pa'i dus su mgrin pa phra ba la sogs pa'i don ma shes na ma thos pa dang 'dra'o/ /des na bsam pa'i shes rab gang las bskyed/bsam pa'i shes rab med na bsgom pa'i shes rab mi skye ste/ de'i phyir de ni log par rtog pa yin no/ /bsam pa'i shes rab kyi dmigs pa ni sgra'i spyi dang / don gyi spyi'o/ /yang gtso bos phye na yang dag pa'i shes pa ni rnam pa gnyis te/ zhes gsungs pas rjes su dpag pa'i shes pa mthar thug pa dang mtshungs par ldan pa'i dmigs pa ni don gyi spyi 'ba' zhig go//bsgom pa'i shes rab kyi dmigs pa ni rnam pa gnyis te/ don rang gi mtshan nyid dang / don gyi spyi'o/ /de la don rang gi mtshan nyid ni 'jig rten las 'das pa'i rnal 'byor gyi mngon sum dang mtshungs par ldan pa'i shes rab kyi dmigs pa'o//don gyi spyi ni so so'i skye bo'i rjes su dpag pa bsgom pa dang / mtshungs par ldan pa'i shes rab kyi dmigs pa'o/ /de la skyed pa'i thabs ni gsum ste/ thos pa dang / bsam pa dang / bsgom pa'i shes rab bo/ de la re zhig thos pa'i shes rab bskyed par bya'o/ /de la kha cig na re thos pa bya mi dgos te/ de ni gzhan la sma bar 'dod pa yin no/ /smra ba la dga' ba ni/ lhag pa'i bsam pa bskul ba'i mdo las/ bdag ni bsgrub nyams da ni ci bya zhes/ /'chi ba'i dus tshe mya ngan chen po ldang //gting rnyed ma gyur shin tu sdug bsngal te/ /smra la dga' ba'i nyes pa 'di dag go / zhes bya ba la sogs pa gsungs so/ /de bas na sgom par byed la mdo sde bltas pas chog zer te/ de lta ma yin te/ de ni rnyed pa dang bkur sti'i ched du smra ba la sogs pa gsungs pa yin te/gzhan la phan pa'i ched du chos smra ba yang phan yon che ba'i phyir dgos pa med pa ma yin no/ /de skad du/ lhag pa'i bsam pa bskul ba'i mdo de nyid las/ byams pa gang thos pa dang / bkur sti med par chos sbyin pa zang zing med pa'i phan yon nyi shu ste/ gang zhe na/'di lta ste/ dran pa dang ldan pa yin/ blo dang ldan pa yin/ blo gros dang ldan pa yin/ mos pa dang ldan pa yin/ shes rab dang ldan pa yin/ 'jig rten las 'das pa'i shes rab rjes su rtogs pa yin/ 'dod chags chung ba yin/ zhe sdang chung ba yin/ gti mug chung ba yin/bdud kyis de la glags mi rnyed pa yin/ sangs rgyas bcom ldan 'das rnams kyis de la dgongs pa yin/ mi ma yin pa rnams kyis de la srung ba yin/ lha rnams kyis de'i lus la mdangs 'jug pa yin/ mi mdza' ba rnams kyis de la glags mi rnyed pa yin/mdza' bo rnams dang mi phyed pa yin/ tshig gzung bar 'os pa yin/ mi 'jigs pa thob pa yin/ yid bde ba mang ba yin/ mkhas pas bsngags pa yin/ de chos kyi sbyin pa rjes su dran par 'gyur ba yin te/ byams pa phan yon nyi shu po 'di dag go zhes gsungs so/ /de ni bstan pa 'dzin par yang gsungs te/de 'dzin byed pa smra byed dang / /zhes gsungs te/ de bas na de'i ched du yang thos pa bya dgos so/ /mdo sde bklags pa tsam gyis don rtogs par mi 'gyur te/ de bzhin gshegs pa'i dgongs pa zab mo ni shin tu rtogs par dka'o/ /gsung gcig la yang mos pa sna tshogs 'jug ste/de skad du/ gsung gcig dka' ni gsal mod kyi/ /du ma nyid du so sor brdas/ /'di bdag kho na'i tshad yin zhes/ /kun gyi de ltar gda' ba ste/ /zhes gsungs pa dang / lung ni 'dam gyi phur pa 'dra/ /zhes kyang gsungs la/ dad ldan rkang brkyang 'dug /bde gshegs nyi ma 'di/ /bram ze skud 'khal bzhin/ /de nyid dngos las ring / /zhes gsungs so/ /gzhan yang las dang po pas mdo sde bklags pa tsam gyis don zab mo go na dge ba'i bshes gnyen srog gi phyir yang mi gtang zhes gsungs pa dang yang 'gal la/klog mkhan kun kyang sde snod gsum par thal bar 'gyur ro/ /de bas na/ sangs rgyas chos ni tshol 'dod na/ /thos pa mang po'i phyir mi 'brangs/ /zhes gsungs pa dge ba'i bshes gnyen brten cing de las thos pa mang po bya ba ni shin tu yang gces so/ / de'i phan yon ni sred med kyi bus zhus pa'i mdo las gsungs pa/ rigs kyi bu thos pa dang ldan pa ni shes rab 'byung bar 'gyur ro/ /shes rab dang ldan pa ni nyon mongs pa rab tu zhi bar 'gyur ro/ /nyon mongs pa med pa la bdud kyis glags mi rnyed do/ /zhes bya ba la sogs pa rgyas par gsungs nas/byang chub sems dpa' chos 'dod dri ma med pa'i gzi brjid can gyis thos pa'i tshogs la mngon par brtson par bya'o/ /zhes bya ba'i bar du gsungs so/ /de lta bas na phyin ci ma log par ston pa'i dge ba'i bshes gnyen las thos nas de'i don la legs par bsams nas sgom pa la 'jug gi gzhan du nam thos na ci zhig bsam/ma bsams par ci zhig bsgom ste/ rgyu med pa'i 'bras bu mi srid pa'i phyir ro/ /de bas na slob dpon ka ma la shI las bsgom pa'i rim pa bar du mdzad pa las kyang / lhag mthong gi tshogs gang zhe na/ skyes bu dam pa la brten pa dang / mang du thos pa yongs su btsal ba dang zhes bya ba la sogs pa gsungs so/ /yang kha cig na re thos pa kho na bya ste/ tshul khrims ni btang snyoms su gzhag go/ /de ci'i phyir zhe na/ mi'i lus ni bsnyen gnas tsam gyis kyang 'thob pa'i phyir/ dag slong la sogs pa tshul khrims kyi ched du 'bad pa don med do//zhes zer te/ de ltar na 'jig rten dang 'jig rten las 'das pa'i yon tan thams cad kyi rten ni tshul khrims yin par mdo sde mtha' dag las gsungs la/ /de'i rtsa ba ni dge slong yin te/ de la don med na spang bar bya ba yin pas/ de spangs na rtsa ba chad pas so sor thar pa rigs bdun ka spangs te/ des na bde 'gro thams cad spang ba yin no/ /de spangs pa byang chub bsgrub pa'i rten med pa'i phyir byang chub ji ltar sgrub/ de bas na de skad smra ba des ni mtho ris dang thar pa mtha' dag spang ba yin no//'on te bsnyen gnas khas blangs pa ma spangs so/ /zhe na/ dge slong med par de yang mi 'ong la/ mi lus thob pa kho nas kyang mi chog ste/ 'di na kha cig 'phen par byed pa'i las kyis mi'i 'gro bar skyes kyang rdzogs par byed pa'i las zhan pas chos la 'jug mi nus pa dag snang ste/de lta bu'i mi'i lus kyis byang chub ji ltar sgrub/ /de lta bas na bde 'gro khyad par can skyed pa'i phyir tshul khrims khyad par can srog dang 'dra bar bsrung dgos so/ /gzhan du na 'dus byas dag las thar par mi nus shing / na ba dang rga ba dang 'chi ba dag gis shin tu 'joms so//de skad du/ 'phags pa ting nge 'dzin gyi rgyal po las kyang / mi zhig chom rkun mang pos rab gtses nas/ /'tsho bar 'dod pas 'bros shing 'gror btsal na/ /de yi rkang pa 'gro zhing rgyug ma nus/ /chom rkun dag gis de bzung bcom pa ltar/ /de bzhin tshul khrims nyams pa rmongs pa'i mi//'dus byas dag las 'bros par 'dod mod kyi/ /tshul khrims nyams pas de yang 'bros mi nus/ /na rga 'chi ba dag gis shin tu 'joms/ /zhes gsungs so/ /'on te shes rab chung ngu thos pa med pa rnams kyi tshul khrims nyams na ngan 'gror skye ste/shes rab che ba thos pa mang bas tshul khrims nyams kyang ngan 'gror mi 'gro'o zhe na/ de ni bden te mkhas pas ltung ba bshags pa dang bsdams pa byas na ngan 'gror mi ltung ngo / /de skad du/ lcags kyi ri lu chung yang rgya mtsho'i gting du 'gro/ /de nyid snod du byas na steng na 'phyo ba bzhin//de bzhin mi mkhas sdig pa chung ngu byas kyang ngan 'gror 'gro /mkhas pas sdig pa chen po byas kyang ltung mi 'gyur/ /zhes gsungs so/ /de bas na snod du byas pa dang 'dra bar bshags pa dang bsdams pa byas na mi ltung ba yin gyi thos pa dang shes pa tsam gyis ma yin te/ de skad du/'phags pa ting nge 'dzin gyi rgyal po las kyang / chos kyi rnam grangs ji snyed mang po chub byas kyang / /thos pas brgyags shing tshul khrims srung bar mi byed na/ /tshul khrims nyams pa des na ngan 'gror 'gro 'gyur te/ /mang du thos pa de la thos pas skyob mi nus/ /zhes gsungs so//'o na mang du thos pa dang tshul khrims dag pas lta ba'i ched du rtsod pa la sogs pa nyon mongs pas log par ltung mi nus so zhe na/ de lta ma yin te/ 'phags pa ting nge 'dzin mchog dam pa las kyang / bcom ldan 'das kyis dga' bo la bka' stsal pa/ ngas sngon du dran pa sngon 'das pa'i dus nang mang du thos pa'i skye bor gyur pa'i tshe 'jam dpal dang yod med gnyis la rtsod par gyur te/'jam dpal ni yod ces smra/ nga ni med do zhes smra ste/ yod med gnyis kyi rtsod pa la bden par gyur te/ gcig tu ma chad do/ /mtha' tshe 'phos nas ngan song gsum du ltung ste/bskal pa grangs med kyi bar du lcags kyi thu lum za bar gyur to/ /zhes gsungs so/ /de nyid las mang du thos pa'i mi ni ri'am rgya mtsho ltar nga rgyal gyi sems che'o/ /de ltar nga rgyal gyi sems che ba ni ngan song du bskal pa grangs med kyi bar du sdug bsngal myong bar 'gyur ro//dmyal ba de las thar nas yang 'dab chags kyi byar skye bar 'gyur na mang du thos pa la phan yon ci yod ces gsungs so/ /de lta bas na tshul khrims rnam par dag pa la gnas nas sdug bsngal dang du len pa'i bzod pa dang ldan bas thos pa la bdag dang gzhan gyi don du 'bad par bya zhing nyon mongs pa'i rkyen gyis rtsod par mi bya ste/de skad du/ 'phags pa ting nge 'dzin gyi rgyal po las/ tshul khrims srung zhing de yis snyems mi bya/ /chos rnams mnyan zhing de yis mi snyems te/ /gang gi shes rab chung ngus de snyems pa/ /rtsa ba de las de yi sdug bsngal 'phel/ zhes gsungs so/ /ci zhig thos par bya zhe na/ 'dir chos thams cad skye ba med par ston pa'i lung nges pa'i don gyi mdo sde dang de gtan la 'bebs pa'i rigs pa sgron ma lta bu thos par bya'o/ /de la nges pa'i don gyi mdo sde ni gang / /drang ba'i don gyi mdo sde ni gang zhe na/'phags pa ting nge 'dzin gyi rgyal po las kyang / stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bur bstan/ /chos de thams cad drang ba'i don du shes/ /zhes gsungs so/ /de nyid las nges pa'i don gyi mdo sde'i dbang du byas nas gsungs pa/nam zhig 'jig rten khams 'di 'byung ba dang / /'jig rten thams cad nam mkhar 'gyur ba'i tshe/ /ji ltar sngon bzhin phyis kyang de bzhin te/ /chos rnams thams cad de bzhin shes par gyis/ /'jig rten 'di na ji snyed ci yod pa/ /chu yi phung po 'di ni 'og tu 'gro//'og tu ci 'dra steng du'ang de bzhin te/ /chos rnams thams cad de bzhin shes par gyis/ /ji ltar bar snang cung zad sprin med las/ /skad cig tu ni sprin gyi dkyil 'khor snang / /thog ma gang las byung ba shes par bya/ /de bzhin chos rnams thams cad shes par gyis/ / de bzhin gshegs pa mya ngan 'das pa dag /ji ltar yid la byas bzhin gzugs brnyan snang / /sngon mtha' ji bzhin phyis kyang de bzhin te/ /chos rnams thams cad de bzhin shes par gyis/ /ji ltar lbu ba mang po brdos pa dag /chu bos khyer ba skyes bus nges mthong zhing / /de la brtags na snying po yong mi snang //chos rnams thams cad de bzhin shes par gyis/ /ji ltar char pa'i thigs chen babs pa na/ /chu yi chu bur dag ni tha dad 'byung / /byung nas zhig ste chu yi chu bur med/ /chos rnams thams cad de bzhin shes par gyis/ /ji ltar spring yig grong gzhan bskur ba na//dge dang mi dge'i bya ba so sor 'byung / /sgra las spring yig tu yang 'phos pa med/ /chos rnams thams cad de bzhin shes par gyis/ /ji ltar mi dag chang gis myos nas ni/ /sa 'di kun tu 'khor snyam byed mod kyi/ /sa 'di 'gul zhing g.yos pa med pa ltar/ /chos rnams thams cad de bzhin shes par gyis//me long ngos dang 'bru mar snod rnams las/ /bud med kha bzhin brgyan pas bltas pa na/ /byis pa de ni de la chags bskyed nas/ /'dod pa tshol ba'i phyir yang shin tu rgyug /bzhin ni der yang 'phos pa ma yin te/ /gzugs brnyan la ni nam yang gzhan mi rnyed//rmongs pa de dag 'dod chags bskyed pa ltar/ /chos rnams thams cad de bzhin shes par gyis/ /ji ltar smig rgyu dri za'i grong khyer dang / /sgyu ma ji bzhin rmi lam ji lta bu/ /mtshan ma bsgom pa ngo bo nyid kyis stong / /chos rnams thams cad de bzhin shes par gyis//ji ltar nam mkha' dngas par zla shar ba/ /de yi gzugs brnyan dngas pa'i mtshor snang ste/ /zla ba chu yi nang du 'phos pa med/ /chos kun mtshan nyid de ltar shes par gyis/ /ji ltar mi dag nags ri'i khrod 'dug nas/ /glu len smra dang dgod dang rtse ba las/ /brag cha thos kyang snang ba med pa ltar//chos rnams thams cad de bzhin shes par gyis/ /glu dang rol mo de bzhin du ba yang / /de la brten nas brag cha 'byung mod kyi/ /sgra la dbyangs te nam yang yod ma yin/ /chos rnams thams cad de bzhin shes par gyis/ /ji ltar rmi lam na yang 'dod bsten pa//skyes bu sad par gyur nas mi mthong ste/ /byis pa shin tu 'dod la chags zhing zhen/ /chos rnams thams cad de bzhin shes par gyis/ /sgyu ma byed pa dag gis gzugs sprul te/ /rta dang glang po shing rta sna tshogs byas/ /de la ji ltar snang ba gang yang med//chos rnams thams cad de bzhin shes par gyis/ /ji ltar bu mo gzhon nu'i rmi lam na/ /bu pho byung zhing shi ba de mthong nas/ /byung na dga' zhing shi na mi dga' 'gyur/ /chos rnams thams cad de bzhin shes par gyis/ /ji ltar mtshan mo chu yi zla ba dag /dngas shing rnyogs pa med pa'i chu nang snang / /thog ma gang nas byung zhing gang du 'gro/ /chos rnams thams cad de bzhin shes par gyis/ /zhes gsungs so/ /don dam par nam mkha' lta bu dang / kun rdzob tu chu'i zla ba lta bu ni nges pa'i don yin pas/ de ma shes pa rnams la de bzhin gshegs pas gsungs par rigs na/ drang ba'i don de gsungs pa la dgos pa ci yod ce na/ de lta ma yin te/ de bzhin gshegs pa ni dgos pa dang dgos pa med pa cung zad kyang mi gsung ste/ de la dgos pa ni sems can kha cig 'di skad ces/ma shi tshe la bde tshol cig /shi nas de yi spyod yul med/ /lus kyang thal ba bzhin song nas/ /slar skye ba dag ga la yod/ /ces zer ba de dag gi rtog pa bzlog pa'i phyir srid pa bar mi'i sems can la dgongs nas rdzus te skye ba'i sems can yod do zhes gsungs pa lta bu'o//de lta bas na le lo can kha cig dge ba la brtson par bya ba'i ched du phung po'i rgyun la dgongs nas bdag yod do zhes gsungs so/ /de bas na 'gal ba med do/ /de la rigs pas bstan par byas na lung gi don gud du bkri bar mi nus te/de bas na gang zag la bdag med pa dang / chos la bdag med pa ston pa'i rigs pa thos par bya'o/ /de gnyis rtogs pa'i theg pa chen po'i zab mo'i don rtogs sam zhe na/ shin tu rtogs par gsungs te/ de skad du/ 'phags pa lang kar gshegs pa las/ bdag med gnyis kyi dngos por ni/ /theg pa chen po mtha' dag bsdus/ /zhes gsungs so/ /de la gang zag la bdag med pa'i rigs pa ni 'phags pa klu sgrub kyis ga las 'jigs med las/ /gal te gang zag 'khor zhe na/ /phung po skye mched khams rnams la/ /de ni rnam pa lngas btsal na//med na gang zhig 'khor bar 'gyur/ /gal te gang zag 'khor bar sems na de ni ches shin tu mi 'thad de/ de ci'i phyir zhe na/ gang gi phyir phung po dang khams dang skye mched rnams de dag nyid dam/ de dag las gzhan nam/ de la de dag yod dam/ de dag la de yod dam/de dag dang ldan nam zhes rnam pa lngas btsal na med pa'i phyir te/ de med gang zhig 'khor bar 'gyur/ /zhes gsungs so/ /chos la bdag med pa'i rigs pa ni/ slob dpon dpal sbas kyi de kho na la 'jug pa las/ phyi rol nang na gnas 'di kun/ /yang dag du na rang bzhin med//gcig dang du ma'i rang bzhin nyid/ /bral ba'i phyir na gzugs brnyan bzhin/ /gang zhig gcig dang du ma'i rang bzhin dang bral ba de ni don dam par na rang bzhin med de/ dper na gzugs brnyan bzhin no/ /phyi rol dang nang na gnas pa'i dngos po 'di dag thams cad kyang gcig dang du ma dang bral ba'i phyir rang bzhin med do zhes gsungs so//rigs pa des ni thams cad la khyab mod kyi 'dir re zhig chos la bdag med pa ston pa'i rigs pas gzung ngo / /de la chos gzugs can phyi rol lta bur snang ba 'di dag sems las logs shig na ngo bo nyid kyis gnas pa yin nam/'on te sems nyid de ltar snang ste/ rmi lam gyi gnas skabs na/ grong dang ri dang mi la sogs pa snang ba lta bu yin zhe na/ sems nyid snang bar gzung ste/ de skad du/ bcom ldan 'das kyis 'phags pa lang kar gshegs pa las/don yod ma yin sems nyid de/ /phyi rol don mthong log pa yin/ /rigs pas rnam par lta rnams kyis/ /gzung dang 'dzin pa 'gag par 'gyur/ /zhes gsungs so/ /'phags pa lha yis kyang / srid pa'i rtsa ba sems nyid de//yul rnams de yi spyod yul lo/ /yul la bdag med mthong nas ni/ /srid pa'i rtsa ba sems ldog go /zhes gsungs so/ /tshig de dag gi don ni mkhas pa tshig la mnga' brnyes pa rnams kyis kyang phyin ci ma log par lan stong du bshad zin to/ /'o na 'dir smos ci dgos she na/bden te 'on kyang las dang po pa thos pa chung ba/ dge ba'i bshes gnyen gyis ma zin pa/ rang gi dad pa dang brtson 'grus chung zad la brten nas sems gnas pa cung zad byung bas mkhas pa'i tshig sgron ma lta bu la zhe sdang zhing gzhan yang 'di skad ces tshig la phan ci yod/de ni chos kyi nang na 'dug pa tsam yin te/ des phan mi thogs te ngas nyams su myong ba 'di yin zer nas/ don dang ma 'brel pa'i tshig gis rlom par byed cing 'dir gar song song du ma ston cig /skur pa 'debs su 'ong ngo zhes zer te/ de la khyim pa dang rab tu byung ba drang po'i rang bzhin can mgu bar byed de/de dag gis ni bsngags pa brjod/ mkhas pa dag gis ni btang snyoms su bzhag pas nga rgyal skyes nas rang gi rnal 'byor yang nyams par 'gyur/ gzhan de'i rjes su bsgrub pa yang ji skad zer ba bzhin du bsgrubs kyang log par bsgrub par 'gyur ro//de skad du/ slob dpon thogs med kyis de la log par bsgrubs pas byas pa'i rnal 'byor nyams pa ni/ 'di ltar 'di na la la tshul bzhin ma yin pa la rab tu rtsom par byed pa na rnal 'byor thob par mi 'gyur zhing / rigs pa'i chos dge ba thob par mi 'gyur ba ste/'di ltar 'di la nyon mongs pa mang ba dang / 'dod chags che ba'i rang bzhin can yin la/ rnam par shes pa bsgribs pa dang / blo rno ba dang lhan cig skyes pa'i blo dang ldan pa yin te/ de thos pa nyung ngu'am/ mang po yang 'dzin par byed cing thos pa kun chub par yang byed la/dgon par gnas pa dang khyim pa dang rab tu byung ba drang po dang / drang po'i rang bzhin can dag 'ongs shing lhags pa rnams la chos ston pa dang / tshul 'chos pa'i rjes su spyod pa'i lus dang ngag dang ldan pa'i spyod pas sems mgu bar byed de/ rgyu de dang rkyen des de la rnyed pa dang bkur sti'i tshogs 'byung zhing /de bsod nams che ba dang / chos gos dang / bsod snyoms dang / mal cha dang / stan dang / nad kyi gsos sman dang yo byad rnams rnyed pa yin par shes shing / rgyal po dang / blon po chen po dang / ded dpon gyi bar dag la yang dgra bcom pa yin par grags shing /bkur stir byed/ bla mar byed pa dang / nyan thos khyim pa dang rab tu byung ba dag kyang de'i rjes su 'brang bar 'gyur te/ rjes su lhags pa dag la zhen pa skyed cing / mang po bsdu ba'i phyir 'jug par byed pas de 'di snyam du sems te/ bdag gi nyan thos khyim pa dang rab tu byung ba gang dag bdag dgra bcom pa yin par grags pa yin par yid ches pa de dag lhags te/gal te bdag la rnal 'byor dang / yid la byed pa dang / zhi gnas dang lhag mthong gi dri ba 'dri bar 'gyur na de dag la bdag gis mi shes so/ /zhes dris pa'i lan btab par gyur na/de ltar na bdag dgra bcom par grags pa yin no snyam du yid ches pa gang yin pa de nyams par 'gyur bas bdag gi rang nyid kyis bsams shing gzhan la nye bar brtags te rnal 'byor rnam par gzhag par bya'o snyam nas de rnyed pa dang bkur sti la chags pas don de nyid kyi dbang du byas te gcig pu dben par song nas rang nyid kyis bsams shing gzhan la nye bar brtags te rnal 'byor rnam par 'jog par byed do//de yi rnal 'byor de yang mdo sde la mi 'jug /'dul ba la yang dag par mi snang zhing / chos nyid dang 'gal ba yin te/ de dge slong mdo sde 'dzin pa dang / 'dul ba 'dzin pa dang / ma mo 'dzin pa gang dag yin pa de dag la yang rnal 'byor gyi gnas de 'chab par byed cing ston par mi byed do/ /de nyan thos kyi khyim pa dang rab tu byung ba gang dag yin pa de dag la yang rnal 'byor de gsang ngo zhes bsgo bar byed de/de ci'i phyir zhe na/ mdo sde 'dzin pa dang / 'dul ba 'dzin pa dang / ma mo 'dzin pa de dag gis rnal 'byor gyi gnas de thos nas mdo sde la 'jug par 'gyur na/ de yang 'jug par 'gyur ba ma yin pa dang / 'dul ba la yang dag par snang bar 'gyur na/ de yang yang dag par snang bar 'gyur ba ma yin pa dang /chos nyid kyis nye bar rtogs par 'gyur na/ de yang chos nyid dang 'gal bar 'gyur bas gzhi des de dag dga' bar mi 'gyur zhing / mi dga' ba'i tshig gis bdag la bskur bar 'gyur zhing rtsod pa skye bar 'gyur te/ de lta na bdag la rgyal po dang / blon po chen po dang / phyug po dang tshong dpon gyi bar dag gis bsnyen bkur byas par mi 'gyur/ bla mar byas par mi 'gyur zhing chos gos dang / bsod snyoms dang / mal cha dang / stan dang / nad kyi gsos sman dang yo byad dag kyang rnyed par mi 'gyur ba na mi rung ngo snyam pa'i phyir te/ de rnyed pa dang bkur sti 'dod pa de nyid kyi dbang du byas nas chos ma yin pa la chos ma yin par 'du shes bzhin du 'du shes dang / 'dod pa bsgyur nas chos ma yin pa chos kyi sgo nas ston cing yang dag par ston par byed do/ /de la de'i lta ba dang mthun pa sgrub par byed pa gang dag yin pa de dag ni chos ma yin pa la chos su 'du shes pa yin te/de dag ni dman pa dang / rmongs pa yin pa'i phyir chos ma yin pa la chos su 'du shes pa yin pas/ ji ltar gdams pa bzhin du sgrub par byed na yang log par bsgrub pa kho na yin par rig par bya ste/log par bsgrub pa byas pa'i rnal 'byor nyams pa de lta bu dam pa'i chos nub par bya ba'i phyir dag pa'i chos ltar bcos pa yin gyi/ dam pa'i chos ni ma yin no/ /de ltar na rnal 'byor nyams pa bzhi po de dag ni dge slong bsam gtan pa rnal 'byor spyod pas yongs su shes par bya ba dang /yongs su spang bar bya ba yin no zhes gsungs so/ /de lta bas na mkhas pa'i tshig stong pa nyid ston pa sgron ma lta bu ni tshig thams cad kyi mchog yin te de ni thos par shin tu gces so/ /de bzhin du/ chos kun 'gro ba las/ byang chub sems dpa' nam mkha' mdzod kyis gang stong pa nyid khong du chud par bgyid pa'i tshig de ni thams cad kyi mchog yin no zhes gsungs so//dbu ma'i rgyan las/ /tshig ma rtogs par de rtogs par bya ba'i thabs gzhan med la zhes gsungs so/ /'o na mdo sde las/ tshig gi dag pas byang chub 'tshang mi rgya/ /nan tan snying pos byed la dga' ma yin//zhes gsungs pa dang / bdag ni tshig la gtsor 'dzin ma lags te/ /zhes gsungs she na/ de yang tshig kho na la zhen nas bsam pa dang sgom par mi byed pa de dgag pa'i ched du gsung gi /mdo sde mtha' dag las tshig thos par mi bya ba ni ma gsungs te/de ci'i phyir zhe na/ bstan pa 'di ni sgra'i sgo nas chos ston pa yin pa'i phyir ro/ /de lta bas na mun pa'i nang du gser stor ba la sgron shing gi rtse mo la me 'bar ba'i phung po chen po nye lam na yod pa dang 'dra bar chos rnams kyi de kho na nyid gser lta bu rang gi lus la yod kyang ma shes pa las mkhas pa de kho na nyid ston pa'i tshig sgron shing gi rtse mo la me 'bar ba dang 'dra ba thogs pa yul gyi ma bskal ba na grangs kyis bzhugs pa la/gus pa chen pos ston pa bde bar gshegs pa'i 'du shes bzhag nas tha na tshigs bcad gcig tsam yang mnyan par bya'o//thos la log rtog rnam pa bzhi/ /ci zhig thos la log rtog gcig /de dag sun dbyung rnam lnga yis/ /thos pa bya dgos bsdus pa yin/ /zhes bya ba ni bsdu ba'i tshigs su bcad pa'o// //da ni bsam pa'i shes rab bskyed par bya ste/ de yang gnas gang du gang zag ji lta bus skyes pa dang re zhig bsam par bya ba ma yin pa spang ba dang /gang la bsam pa dang / ji ltar bsam pa dang / tshad ci tsam du bsam pa'o/ /de la gnas dgon par gnas par bya ste/ der grogs mthun pa dang yang gnyis lhan cig gnas par mi bya ste/ de skad du/ slob dpon thogs med kyis/ de la sems pa gang zhe na/ 'di ltar 'di na la la gcig pu dben par song ste zhes bya ba la sogs pa gsungs so/ /'phags pa dam pa'i chos pad+ma dkar po las kyang / mkhas pas dus su sems par byed pa na/ /khang bur zhugs te de bzhin sgo bcad nas//chos 'di thams cad la ni tshul bzhin lta/ /zhes gsungs so/ /bsam par bya ba ma yin pa spang ba ni/ bsam gyis mi khyab pa'i gnas drug po 'di lta ste/ bdag la sems pa dang / sems can la sems pa dang / 'jig rten la sems pa dang / sems can rnams kyi las rnam par smin pa la sems pa dang /bsam gtan pa rnams kyi bsam gtan gyi yul dang / sangs rgyas rnams kyi yul rnams spangs nas zhes gsungs so/ /de lta bas na dben pa'i gnas su gang zag yid la byed pa thob pa mtshan ma med par bsgom par 'dod pas bskyed par bya'o//gang la bsam zhe na/ nges pa'i don gyi mdo sde dang / de gtan la 'beb pa'i rigs pa ji ltar thos pa de nyid bsam mo/ /de skad du/ slob dpon thogs med kyis/ ji ltar thos pa'i chos de dag nyid rang dang spyi'i mtshan nyid kyi sgo nas sems par byed do zhes gsungs so//ji ltar bsam zhe na/ gnyis te bgrang bas sems pa dang / gzhal bas sems pa'o/ /de la grangs kyi rnam pas phung po bstan pa las sems par byed pa dang / gong nas gong du sems pa'i tshul gyis 'jug par rig par bya ste/ de lta bu la sogs pa ni bgrang bas sems par bya'o//de la gzhal bas sems par byed pa'i tshul gyis sems pa ni rigs pa bzhi 'jal te/ 'di lta ste/ ltos pa'i rigs pa dang / bya ba byed pa'i rigs pa dang / chos nyid kyi rigs pa dang / 'thad pa sgrub pa'i rigs pa'o//de la 'thad pa sgrub pa'i rigs pa ni mngon sum dang rjes su dpag pa ste/ de dag las don gyi skabs 'dir rjes su dpag pas ji ltar bsam pa de nyid gzung ngo / /de lta bas na 'du ba dang / 'du 'dzi thams cad yongs su spangs la yon tan lnga dang ldan pa'i dgon pa'i gnas su 'dug nas zhi gnas kyi dmigs pa gang yang rung ba la yid la byed pa thob pa'i rnal 'byor pas 'di ltar chos dang mthun pa'i zas zhun mar la sogs pa dang /chang la sogs pa myos par mi 'gyur ba'i btung bas phung po gso zhing zhag bzhi'am zhag lnga'am/ khams kyi bye brag gis zhag bcu'i bar du yang rung ste/kha ton dang bklags pa la sogs pa yang re zhig mi bya/ nyin par mi sgom/ gnyid mi log spyod lam thams cad du sos dal bar bya'o/ /nang par dang dgongs nam ma sros par lha phyag mi mang ba la sogs pa yan lag bdun pa'i sems bskyed dang bcas pa re re bya/mtshan mo srod la zhi gnas kyi dmigs pa de la ba bzhos pa'i bar tsam gyi yun las mi ring ba'i thun re bsgom zhing / smon lam cung zad tsam btab nas glos phab ste shes bzhin sngon du song bas nyal bar bya'o/ /gnyid ji tsam 'ong yang spang bar mi bya'o/ / mi yong ba yang 'dod pa dang gnod sems la sogs pa glo bur du byung ba dgag pa'i gnyen po mi mthun pa nam ma zhi'i bar bsten pa ma gtogs pa gnyen po la yang ched du btsal bar bya ba ma yin na/ mi dge ba la ched du rtog pa lta ci smos/ lung du ma bstan pa la yang brtag par mi bya'o/ / 'o na ji ltar bsam zhe na/ 'di snyam du nyal ba dang gnyid kyis lus dang sems kyi nus pa brtas par byas la/ de nas bdag sems can thams cad kyi ched du chos thams cad kyi de bzhin nyid de btsal bar bya'o snyam pa de tsam bya'o/ /de ltar byas pas khams kyi nus pa brtas nas lus yang ba dang /bya ba la 'jug 'dod cing bags kyis mi tshugs tsam na 'di snyam du/ bsam pa'i shes rab kyis legs par bsams nas phyi rol dang nang na gnas pa'i mtshan ma rnams spong bar nus te/ mtshan ma rnams spang na rnam par mi rtog pa'i dbyings su 'jug par 'gyur te/ de lta bas na legs par brtag par bya'o/ /snyam du bsam mo/ /de skad du/ rnam par mi rtog pa la 'jug pa'i gzungs kyi 'grel pa las kyang / nye bar rtog pa med par mtshan ma rnams yongs su spang bar mi nus la/ mtshan ma rnams yongs su ma spangs par yang rnam par mi rtog pa'i dbyings su 'jug par mi 'gyur te/de lta bas na gdon mi za bar nye bar brtag par bya'o zhes gsungs so/ /de la so sor rtog pa'i shes rab sngon du 'gro mi dgos te/ las dang po pas kyang ci la yang yid la mi bya'o zhes zer ba de dag gi gzhung ni mang du thos pa'i slob dpon ka ma la shI las sngar sun phyung ste/las dang po pas so sor rtog pa'i shes rab sngon du 'gro dgos par shin tu gsal bar mdzad zin te/ sprin dengs pa'i nam mkha' la nyi ma shar ba dang 'dra ba la srin bu me khyer dang 'dra bas snang bar bya mi dgos so/ /yang kha cig na re gcig dang du ma'i rang bzhin dang bral ba'i phyir rang bzhin med do zhes zer ba'i tshig tsam la brten nas/nan tan gyis rnam par mi rtog pa bsgoms pas ni rnam par rtog pa nam yang mi ldog ste/ 'phags pa dkon mchog sprin las/ thos pa dang bsam pa tsam gyis don mngon sum du mi 'gyur ro zhes gsungs pas nges par so sor brtag par bya'o zhes zer te/de ni mdo sde'i don log par rtogs pa yin no/ /de ci'i phyir zhe na/ 'di ltar thos pa dang sems pa tsam gyis don mngon sum du mi 'gyur te/ de lta bas na sgom dgos so zhes gsungs pa'i phyir ro//de lta bas na thos pa dang sems pa tsam gyis don mngon sum du mi 'gyur te/ so sor brtag dgos so zhes smras pa ni dam bcas pa rang gi tshig gis bsal ba yin no/ /sbyor ba ni gang dang gang gi tshig snga phyi 'gal ba de ni rang gi tshig gis bsal ba yin te/ dper na nga'i ma mo gsham yin no//zhes zer ba lta bu'o/ /bsam pa tsam gyis don mngon sum du mi 'gyur te/ de bas na so sor brtag par bya'o zhes zer ba 'di yang tshig snga phyi 'gal ba yin pas rang bzhin gyi gtan tshigs so/ /de'i phyir de ni gyi na'o/ /gong ma skad smra ba la 'di skad ces thos pa tsam gyis mi chog ste/tshul bzhin bsam par bya'o zhes brjod par bya ste/ 'di skad du/ slob dpon ka ma la shI las kyang lhag mthong gi tshogs kyi skabs su mang du thos pa yongs su btsal ba dang tshul bzhin sems pa dang zhes gsungs so/ / kha cig na re thos pa'i dus su rig pas 'jal ba de nyid sems pa yin te zhi gnas sngon du bsten nas yang bsam pa ni ma yin no zhes zer te/ de lta ma yin te/ 'phags pa theg pa chen po la dad pa bsgom pa'i mdo las rigs kyi bu rnam grangs 'dis kyang 'di ltar byang chub sems dpa' rnams kyis theg pa chen po la dad pa theg pa chen po la 'jug pa gang ci yang rung ba ste/de thams cad ni rnam par ma g.yeng ba'i sems kyis don dang chos yang dag par bsam pa las byung bar rig par bya'o zhes gsungs so/ /bsgom pa'i rim pa dang por mdzad pa las kyang /de lta bas na ting nge 'dzin gyi lag gis bzung ste/ shin tu cha phra ba'i shes rab kyi mtshon gyis gzugs la sogs pa la log par rnam par rtog pa'i sa bon gyi zug rngu sems de la yod pa bsal bar bya'o/ /de lta bas na rtsa ba nas phyung ba'i shing dag pa la mi skye ba bzhin du rtsa ba med pas na log par rnam par rtog pa'i sems de yang skye bar mi 'gyur ro zhes gsungs so//de lta bas na thos pa'i dus su sems pa de tsam gyis mi chog la ting nge 'dzin sngon du 'gro ba yang bstan dgos shing / des kyang mi chog ste de la gnas pa'i shes rab kyis thos pa'i don la so sor brtag dgos te/de skad du/ lhag spyod 'di na ting 'dzin bsgom pa bzhin/ /zhes bya ba la sogs pa gsungs nas/ gal te chos la bdag med so sor rtog /so sor de brtags zhes bya ba la sogs pa gsungs so/ /de lta bas na zhi gnas la brten nas bsam pa'i shes rab bskyed par bya ste/de'i skabs su sngar khams brtas par byed pa'i tshe na srod la thun re bsgom pa de yang gzhag la/ spyod lam ji ltar bde ba bzhin du 'dug nas yun khams rab dang 'bring dang thams mda' rgyang gsum dang gnyis dang gcig tu gom pa tha mal pas phyin pa'i bar tsam du bsam zhing thun gyi grangs ni khams rab kyis nyi ma re la bzhi/'bring gis lnga/ tha mas drug bsam ste/ khams zhan cing grangs mang ba ni yun thung bas bye brag tu byas pa yin no/ /gsum kas kyang dang po'i nyin par thun gcig bsam zhing / de nas rang gi khams gang yin pa'i tshad du phyin gyi bar du nyi ma re la thun re bsnan zhing bsam mo/ /de'i bar du'am/ rang rang gi thun gyi tshad du phyin nas bsam pa'i skabs su yang rung ste/ khams mi bde ba'i mtshan ma byung na sran skyed cing mi bsam pa'i tshe 'phral la zhi bar byas te/ thun bsnan cing bsam pa'i skabs yin na khams mi bde ba ma byung gi bar du mi bsnan pa dang rang rang gi tshad du bsam pa'i skabs su mi bde na thun gyi grangs 'bri ba dang bsku mnye la sogs pas zhi bar byas la gong ma bzhin du bsam mo/ /gsum kas kyang mtshan mo ye mi bsam/ gnyid dang nyal bas nyin bar gyi dub ba de brtas su gzhug go /de la re zhig gang zag la bdag med pa ston pa'i rigs pas ji ltar thos pa la bsam ste/ 'di ltar bstan bcos las phal cher bdag tu 'dzin pa'i gzhung smra ba mu stegs pa'i grub pa'i mtha' rigs mi mthun pa dpag tu med pa sun dbyung ba dang bcas pa gsungs te/de dag shes par bya ba yin mod kyi/ 'on kyang sgrub pa po phal cher la de dag gis re zhig mi gnod do/ /'o na gang gis gnod ce na/ 'di ltar phung po dang khams dang skye mched rnams kyi chos ma thos pa'am/ mang du thos kyang chos kyi rjes su ma 'brang ba tha mal pa'i rtog pa la 'di snyam du bdag ni pha dang ma 'di las skyes te/sngon las 'di dang 'di lta bu byas pa de ltar yang dran no/ /bdag gi lus 'di ni sngon nas tshul 'di ltar gnas so zhes phung po bzhi la ni bdag tu 'dzin/ gzugs kyi phung po la ni bdag gir 'dzin te/de yang rtag pa dang gcig pur sems pa'am/ yang na rangs pa la de ltar sems pa de brtag par bya'o/ /sbyor ba ni gang dang gang mngon sum dang rjes su dpag pas de nyid kyang der ma dmigs/ de las logs shig tu yang mi rnyed de la yang de dag mi snang de dag la yang de mi dmigs/de dag dang ldan par yang mthong ba de ni kun rdzob tu med de/ dper na rnam pa lngas tho yor la mi btsal kyang ma mthong ba lta bu'o/ /nga'o snyam du brtag pa 'di yang mngon sum dang rjes su dpag pas phung po dang skye mched dang khams rnams la de nyid dam zhes bya ba la sogs pa lngas btsal nas mi dmigs pas don gyis na khyab par byed pa mi dmigs pa yin no//yod pa'i tha snyad la shes pa gnyis kyi dmigs pas khyab pa'i phyir ro/ /de la phung po las logs shig na bdag yod dam snyam du cung zad bsams la/de nas 'di snyam du re zhig mngon sum gyis ni ma mthong ste/ mig gnyis shin tu phye nas bltas kyang bdag tu rung ba cung zad kyang ma mthong ngo / /rjes su dpag pas kyang ma mthong ste/ rtags gang yang med pa'i phyir ro/ /de ltar logs shig tu ma mthong ba dang phung po la bdag go snyam pa'i rtog pa 'byung bas/phung po 'di nyid bdag yin no snyam du sngar tha mal pa'i rtog pa ji lta bus 'jug pa bzhin du cung zad brtag par bya'o/ /de nas 'di snyam du phung po la rtag pa dang gcig pu'i bdag tu 'dzin pa'i shes pa de gang yin/mngon sum gyis 'dzin nam/ rjes su dpag pas 'dzin par 'gyur grang na de la re zhig mngon sum gyis ni lus la gcig pa ma mthong ste/ rkang pa yan chad nas mgo man chad la mig gnyis shin tu phye nas bltas kyang mthong tshad la cha shas med pa'i gcig pu cung zad kyang ma mthong ngo //lag pas byugs nas yang cha shas med pa'i gcig pu ni cung zad kyang mi rnyed do/ /brtag pa ma mthong ste yud tsam la yang 'gro ba dang sdod pa dang ldan pa dang ldang ba dang 'dug pa dang nyal ba dang 'phres pa dang / brkyang ba dang / bskum pa dang / tsha ba dang / grang ba dang / gsher ba dang skam pa la sogs pa mi 'dra bar snang ngo / /rjes su dpag pas gcig pur ma mthong ste/ gang gi phyir mdor bsdu na/ gzugs kyi phung po la bco lnga dang / tshor ba'i phung po la gsum dang / 'du shes kyi phung po la gsum dang / 'du byed kyi phung po la sems las byung ba bzhi bcu rtsa dgu dang mi ldan pa'i 'du byed bcu bzhi dang /rnam par shes pa'i phung po la brgyad de/ de dag kha cig ni mngon sum du mthong la kha cig yid ches pa'i lung las kyang gsungs shing las kyi sgo nas dpag pas kyang shes te/ du mar rtogs pa de'i phyir gcig pa med de/rtag pa dag kyang ma mthong ste 'di ltar gang rgyu dang rkyen gyis 'dus byas pa de ni rtag pa med do/ /dper na gar gyi ltad mo lta bu'o/ /phung po 'di yang rgyu dang rkyen gyis 'dus byas pas rtag pa med de/ 'gal bas khyab pa dmigs pa'o/ /de bas na mngon sum dang rjes su dpag pas phung po 'di rtag pa dang gcig pur ma mthong ngo //'o na bdag la phung por mthong ngam snyam pa las/ de mi srid de gzhi ma grub pa'i phyir ro/ /'o na phung po la bdag yod dam snyam pa la de yang mi rung ste/ 'di ltar gang de la da yod par ma mthong ba de ni de la de yod pa'i tha snyad du mi rung ste/dper na rta la rwa yod par ma mthong bas yod pa'i tha snyad du mi rung ba lta bu'o/ /phung po 'di la yang shes pa gnyis kyi bdag ma mthong bas yod pa'i tha snyad du mi rung ngo / /'o na bdag de phung po dang ldan nam zhen ma yin te/ 'di ltar gang dang gang rang gi ngo bo ma grub pa de ni ldan pa'i chos med de/dper na mo gsham gyi bu la gzugs mdzes pa la sogs pa'i chos dang ldan pa med pa lta bu'o/ /nan gyis rtag pa'i bdag 'di yang rang gi ngo bos ma grub pas ldan pa'i chos su med de/ khyab par byed pa mi dmigs pa'o//kun rdzob tu yod pa la ni mngon sum dang rjes su dpag pas dmigs te/ de'i phyir mi mthun pa'i phyogs las ldog pa grub bo/ /lnga yis ma rnyed mthun la zhugs/ /mi mthun phyogs las ldog pa grub/ /mthun la zhugs pas dpe grub ste/ /gtan tshigs dang ni dper skyon med//ces bya ba ni bsdu ba'i tshigs su bcad pa'o/ /mi rtag du mar snang ba'i phyir/ /mngon sum gyis ni ma bsal te/ /sgrub pa'i rtag gnyis med pa'i phyir/ /rjes dpag gis kyang ma bsal to/ /rtag pa gcig par ma smras pas//rang gi tshig dang 'gal ba med/ /mi rtag rgyun la dgongs pa'i phyir/ /lung gis kyang ni ma bsal te/ /log pa'i lung la zhen ma rtogs/ /rtag dang gcig pur grangs med pas/ /grags pas bsal ba'ang ma yin te/ /bar skabs kyi ni tshigs bcad yin/ / tshad ni ci tsam du bsam zhe na/ nam phung po 'di la cha shas mang po dang du ma dang sob sob pa dang / seng seng po dang / mi rtag par ni nges pa la rtag pa dang ril po'i 'du shes ni mi skye ste/ snying po'am bdag med pa mi gcig pa du ma 'dus pa 'jig pa'i chos rgyud dang ldan pa'i nges pa bstan par skye ste/de'i stobs kyi kha cig gis skyo ba skye zhing mi dga' ba 'byung ngo / /kha cig la dga' ba skye ste/ dam pa'i chos re mtshar snyam pa dang / rtag pa dang gcig pur 'dzin pa'i shes pa de ni nges par 'khrul pa yin te/ de la bdag gam sems can rtag pa dang gcig pur ni nges pa med do snyam pa 'byung ste/de srid du bsam mo/ /de skad du/ 'phags pa lang kar gshegs pa las kyang / 'di na bdag gam sems can med/ /chos 'di rgyu dang bcas las 'byung / /zhes gsungs so/ /yang kha cig gang zag ni rtag pa'am gcig pur ma grub ste/gong du smos pa bzhin no/ /mi rtag pa dang du mar yang ma grub ste rang gi tshig gis gsal ba'i phyir ro/ /gnyi gar brjod du med pa'i gang zag ni yod do zhes zer bas na/ de lta bu gcig yod srid dam snyam pa la/ mi srid de de 'di ltar rtag par brjod du med pas na gcig dang bral ba/mi rtag par brjod du med pas na du ma dang bral te/ de skad du/ dbu ma'i rgyan las/ rtag dang mi rtag la sogs par/ /gang zag bstan du mi rung bas/ /gcig dang du ma'i rang bzhin dang / /bral bas gsal bar rab tu shes/ /zhes gsungs so/ /da ni chos la bdag med par bsam par bya ste/re zhig 'di snyam du gang zag ces bya ba rtag pa dang gcig pur brtag pa de ni kun rdzob tu yang med par nges na/ rgyu dang rkyen gyis byung ba mi rtag pa dang du ma'i mtshan nyid phung po dang / skye mched dang / khams 'di dag gang gis bsdus/ ji ltar snang /don dam par yod dam/ 'on te yod par ma grub snyam du bsam par bya'o/ /de la gang gis bsdus she na/ gnyis kyis te/ gzugs can dang gzugs can ma yin pas so/ /de gzugs can gyis ni gzugs kyi phung po dang / skye mched bcu dang / khams bcur bsdus so//gzugs can ma yin pas ni phung po bzhi dang gzugs kyi phung po'i phyogs gcig dang / skye mched gnyis dang / khams brgyad bsdus so/ /de la phung po dang / skye mched dang / khams gzugs can lus dang / khang khyim stong pa dang / mi stong ba dang / ri dang / nags tshal dang /rgya mtsho dang / chu bo dang / chu bran la sogs pa byis pa rnams la phyi rol du chad pa bzhin du snang ba 'di dag de bzhin du sems las logs shig na yod dam/ 'on te thog ma med pa'i dus nas sems nyid gzugs la sogs pa yang dag pa ma yin pa la mngon par zhen pa'i dbang gis snang ste/dper na rmi lam gyi gnas skabs na/ lus dang / sa gzhi dang / khang stong la sogs pa snang ba lta bu yin snyam du bsam par bya'o/ /de la lus la sogs pa 'di dag rdul phra rab tu gzhig la/ rdul phra rab rnams kyang cha shas kyi ngo bo nyid so sor brtags na/nges par gzung du med pa'i phyir rang bzhin med de/ dper na gcig dang du ma dang bral ba'i phyir gang zag med pa lta bu'o snyam du bsam mo/ /de skad du/ 'phags pa lang kar gshegs pa las/ blo gros chen po glang gi rwa yang rdul phra mor bshig na mi 'dug go/ / rdul phra mo rnams kyang so sor bshig na rdul phra mo'i mtshan nyid du mi gnas so zhes gsungs so/ /yang gsungs pa/ phyi rol gzugs ni yod min te/ /rang gi sems ni phyi rol snang / /zhes gsungs so/ /de lta bas na gzugs la sogs pa logs shig na yang dag par yod do//snyam pa ni log par rtog pa'i rjes su 'brang ba yin te/ de sgrub par byed pa'i rigs pa ni med cing yod pa la gnod pa can gyi tshad ma ni mang la/ lung gis kyang med par ston pas sems nyid snang zhes bya ba de nges so/ /de skad du/ 'phags pa lang kar gshegs pa de nyid las/rdzas ni rdul du rnam bshig cing / gzugs la rnam par ma rtog cig /sems can rnam par gzhag pa ni/ /lta ba ngan pas mi shes so/ /zhes gsungs so/ /lus sogs rdul tsam ma grub phyir/ / med de gang zag mtshungs pa yin//lung gis grub cing log rtog phyir/ /de grub rigs med 'di legs gnas/ /zhes bya ba ni bsdu ba'i tshigs su bcad pa'o/ /de la 'di snyam du don dam par rang bzhin med par sgrub pa ni sems nyid snang bar yang mi 'grub ste/ rigs pa thun mong ba'i phyir ro/ / 'on te kun rdzob tu yang logs shig na med par bsgrubs na mi rigs te/ 'di ltar gang rnam par 'jog pa med pa de ni snang bar mi 'gyur te/ dper na nam mkha'i me tog dang / mo gsham gyi bu dang / ri bong gi rwa snang ba'i mig gi rnam par shes pa mi skye ba lta bu'o/ /don med kyang snang ba snyam pa 'di yang mi snang bar thal bar 'gyur te/khyab par byed pa mi dmigs pa'o snyam du sems na de ni mi rigs te/ 'di ltar gang tha dad du mthong ba de ni gcig tu mi gnas te/ dper na kha dog khra bo lta bu'o/ /bud med gcig la yang bya rgod la sogs pa dang / skyes bu g.yen pa pa dang rnal 'byor pas tha dad du mthong bas ngo bo gcig tu mi gnas te/ khyab par byed pa 'gal ba dmigs pa'o/ /gang gi phyir don logs shig na med pa de'i phyir de la 'dzin pa yang med do/ /de skad du/ 'phags pa lang kar gshegs pa las/ don yod ma yin sems nyid de//phyi rol don mthong log pa yin/ /rigs pas rnam par brtags rnams kyis/ /gzung dang 'dzin pa 'gag par 'gyur/ /zhes gsungs so/ /don dam rang bzhin med bsgrubs na/ /rigs pa gcig phyir sems kyang med/ /kun rdzob tu yang mi bsgrubs na//mi rigs rwa sogs mi snang bzhin/ /'di med thal 'gyur snyam sems na/ /mi rigs dngos gcig tha dad phyir/ /logs shig gzung med de 'dzin med/ /de skad bde bar gshegs pas gsungs/ /zhes bya ba ni bsdu ba'i tshigs su bcad pa'o/ /de lta bas na 'di snyam du srid pa gsum gyi rtsa ba ni sems kho na yin la/de nyid kyi rnam pa ni yul du snang ba yin te/ spyod yul yin pa'i phyir so sor mthun mthun du sbyar te/ 'phags pa lhas kyang / srid pa'i rtsa ba sems nyid de/ /yul rnams de yi spyod yul lo/ /zhes gsungs so/ /de nyid rten cing 'brel par 'byung ba'i phyir don dam par yod do//de skad du/ 'phags pa lang kar gshegs pa las/ brtags pa'i dngos po yod ma yin/ /gzhan gyi dbang ni yod pa ste/ sgro 'dogs pa dang skur 'debs pa'i/ /mthar rtog pa ni brlag par 'gyur/ /zhes gsungs so snyam du sems na/de ni mi rigs te/ 'di ltar re zhig bsgrub pa'i lus 'di la brtag par bya ste/ slob dpon phyogs kyi glang pos/ rang gi rnam pa tsam gyi ngo bor ni/ /shes bya ma lus rnam par bltas nas ni/ /de bzhin nyid kyi ye shes rdo rje yis/ /lus kyi 'khrul 'khor rab tu gzhig par bya//zhes gsungs so/ /de bas na lus 'di don dam par yod na rigs pa cha shas med pa'i mtshan nyid du yod dam/ cha shas dang bcas pa'am phra rab tu yod grang / de la re zhig phyogs dang po ltar na mdzub mo 'di cha shas med pa zhig yin na/ tshigs las logs shig na yod dam/ 'on te tshigs dang 'brel gong ma ltar dmigs pa'i rig byar gyur pa'i phyir/ bum pa dang ras yug bzhin du logs shig tu dmigs par thal bar 'gyur ro/ /de lta bas na logs shig na mi dmigs pa'i phyir med de/ rang bzhin mi dmigs pa'o/'brel pa'i phyogs kyang mi rigs te/ tshigs gsum po re re la yang mdzub mo re re rdzogs pa zhig tu 'gyur ro/ /de ltar 'gyur mod snyam pa la cha shas med pa'i phyir tshigs gcig bsgribs na mdzub mo thams cad bsgribs pa'am/ dmar na thams cad dmar bar thal bar 'gyur ro//'on te tshigs gcig la phyogs gcig gis khyab na/ cha shas yod pas gcig pa nyid nyams par 'gyur ro/ /de lta bas na logs shig na med pas tshigs dang ldan no snyam pa yang med de/ mdzub mo gcig tu 'dod pa dang tha mi dad pa'i phyir/mdzub mo'i rang gi ngo bo bzhin du tshigs gsum gcig tu thal bar 'gyur ro/ /mdzub mo yang tshigs gsum dang / tha mi dad pas tshigs gsum yod pa bzhin du gcig tu 'dod pa yang du mar thal bar 'gyur ro/ /gang gi phyir logs shig na yang med/ ldan pa'am 'brel pa'i phyogs kyang med pa de'i phyir/cha shas med pa'i phyogs ma grub pas med do/ /'on te phyogs gnyis pa ltar na rags pa cha shas dang bcas pa'am tshogs par yod do snyam na de yang mi rigs te/ 'di ltar tshigs dang po la sogs pa rang gi cha shas las gzhan dang gzhan ma yin pa nyid du brjod du med pa'i phyir ma grub pas med do//de lta bas na rags pa cha shas dang bcas pa yod par yang ma grub bo/ /de bzhin du gzugs la sogs pa yang med pa nyid du khong du chud par bya ste/ de dag gi rang bzhin yang 'dus pa tsam yin pa'i phyir la 'dus pa yang dngos po med pa nyid du bstan pa'i phyir ro//'o na phyogs gsum pa rdul phra rab kyi mtshan nyid du yod do snyam pa las/ de yang mi rigs te/ 'di ltar rdul phra rab kyang cha shas tha dad pa'i phyir gcig tu ma grub ste/ rang bzhin 'gal ba dmigs pa'o/ /'o na cha shas tha dad pa de dag yod pas du ma mi srid do snyam pa la/cha shas med pa'i rdul gcig ma grub na/ cha shas med pa rdul du ma mi 'grub ste/ de ni de bsags pa yin pa'i phyir ro/ /de ltar nges pa la shes pa cung zhig 'dzin pa ni rtags rjes su dpag pa'i sgo nas grub pa'o/ /de'i rjes la lus la sogs pa'i rnam pa 'di dag don dam par gcig dang du ma dang bral ba'i phyir don dam par rang bzhin med do//dper na gzugs brnyan bzhin no snyam nas gcig la yang dmigs su med do snyam pa'i shes pa'i skye ba ni rjes su dpag pa'i shes pa yin no/ /de skad du/ 'phags pa mi 'am ci'i rgyal po ljon pas zhus pa las/ji ltar gzugs brnyan me long snang / /gcig dang gzhan yang rnam spang ste/ /snang yang de la yod min ltar/ /de bzhin dngos rnams ngo bo nyid/ /ces gsungs so/ /'o na sems dang sems las byung ba cha shas med pa don dam par yod do snyam pa las/ de ni mi rigs te/'di ltar mig gi rnam par shes pa la sogs pa 'di ltar rnam pa du ma dag dang tha mi dad pa'i phyir/ rnam pa'i rang bzhin ngo bo rang gi du ma gcig pa nyid do/ /'o na du mar yod do snyam pa la/ de yang mi rigs te/ de skad du/ dngos po gang dang gang brtags na/ /de dang de la gcig pa med//gang la gcig pa yod min pa/ /de la du ma'ang yod ma yin/ /zhes gsungs so/ /de lta bas na yul du snang ba 'di rang bzhin med na sems yod par ga la 'gyur te/ tha mi dad pa'i phyir ro/ /de skad du/ 'phags pa lhas kyang / yul la bdag med mthong nas ni/ / srid pa'i rtsa ba sems ldog go/ /zhes gsungs so/ /yang gsungs pa/ tshogs pa rnams las gzhan yod min/ /gzhan ma yin pa'ang yod ma yin/ /de lta ma grub tshigs sogs med/ /de phyir tshogs pa tsam du zad/ /tshogs pa dang ni bcas pa yi/ /sor mo la sogs rnams kyis ni//dngos po thams cad med par bstan/ /tshogs ma gtogs pa'i dngos phra'ang med/ /de ltar don gcig shes byed pa'i/ /blo ni gang du brtag par bya/ /sems byung tshogs dang bcas sems kyi/ /dmigs pa gcig 'dir ji ltar 'gyur/ /zhes gsungs so/ /rten cing 'brel par 'byung ba'i phyir/don dam par yod do snyam pa yang kun rdzob la rigs te/ rang bzhin gyi gtan tshigs yin pa'i phyir ro/ /don dam par yod par bsgrubs na ni 'gal bas khyab pa dmigs pa yin pa'i phyir ro/ /gzhan du na sgyu ma la sogs pa yang don dam par yod par thal bar 'gyur ro//de lta bas na 'phags pa klu sgrub kyis/ ma rig rkyen las byung ba la/ /yang dag shes pas rnam brtags na/ /skye ba dang ni 'gag pa'ang rung / /gang yang dmigs par mi 'gyur ro/ /zhes gsungs so/ /gzhan gyi dbang ni yod pa ste/ /zhes bya ba la sogs pa'i lung de yang kun rdzob la dgongs nas gsungs pa yin te/mdo sde nyid las/ blo yis rnam par gzhibs nas ni/ /gzhan dbang med cing brtags pa'ang med/ /grub pa'i dngos po'ang yod med na/ /blo yis ji ltar rnam par brtag /zhes gsungs so//tshad ci tsam du bsams she na/ rtags grub pa dang rjes su dpag pa'i shes pa skyes pa'i skabs su rtogs pa'i don las gzhan du mi 'phro la/ sems kyis dpyad pa'i gnas ma rnyed pas rang gi ngang gis sdod pa cig 'byung ste/ de tsam du bsam mo/ /de skyes pa de'i rjes la 'di snyam du ci la yang mi gnas pa'i sems skye ba cig 'dug snyam pa'i bsam pa 'byung ba'o//de lta bas na rnam par ma yengs pa'i yid kyis gang zag dang chos la bdag med pa ji skad bshad pa bzhin du dpyad nas tshad du phyin pa dang gzhag la re zhig ngal gso'o/ /'di dag gang gis bsdus pa dang //ji ltar snang ba bstan pa dang / /de la log rtog sun dbyung dang / /lus la brtag dang tshad bstan pa'o/ /zhes bya ba ni bsdus pa'i tshigs su bcad pa'o// //da ni bsgom pa'i shes rab bskyed pa de rigs te/ 'di snyam du bsam pa'i shes rab gcig dang du ma dang bral ba'i rtags nges par grub cing 'brel pa dran pa'i rjes la dngos po dang dngos po med pa la sogs par sgro 'dogs pa'i spros pa mtha' dag nges par dpyad pa'i shes pa brtan por skyes kyang bsgom pa'i shes rab kyis goms par ma byas na rnam par mi rtog pa'i ye shes chos thams cad nam mkha'i dkyil lta bu mngon sum du mthong ba'i ye shes skye mi srid de/dper na rta dkyus kyi sa bstan nas rgyugs pa la gegs med pa ltar byas kyang ma rgyugs na dkyus kyi zhabs su phyin pa'i dus med pa lta bu'o snyam du bsam mo/ /de skad du/ 'phags pa sdong po bkod pa las/ dper na rgyal po'i mi 'ga' zhig /bang mdzod mang po bgrang byed kyang / /nor phyed tsam yang mi thob pa/ /ma bsgoms chos kyang de dang 'dra/ /zhes bya ba la sogs pa gsungs so/ /'phags pa ting nge 'dzin gyi rgyal po las kyang / 'di skad du/ dper na mi zhig na zhing sdug bsngal te/ /lo grangs mang por res 'ga' ma thar ba//de ni sdug bsngal nad kyis nyon mongs te/ /na ba 'tsho ba'i ched du sman pa btsal/ /yang dang yang du des ni btsal ba dang / /sman pa mkhas shing rigs pa des rnyed nas/ /des kyang snying rje nye bar bzhag nas su/ /sman 'di gtang bar gyis shig ces byin pa//sman mang phan pa bzang po de rnyed nas/ /na ba 'tsho bar 'gyur ba'i sman mi 'thung / /sman pas ma nyes sman gyis ma nyes te/ /nad pa de nyid kyis ni nyes pa yin/ /de bzhin bstan pa 'di la rab byung nas/ /stobs dang bsam gtan dbang po kun rig nas/ /bsgom pa la ni mngon par brtson mi byed//rigs pa mi brtson ga la mya ngan 'das/ /zhes gsungs so/ /de la kha cig na re/ bsgom par bya ba ni goms par byed pa nyid yin te/ don gzhan ma yin no/ /de lta bas na bsam pa'i shes rab so sor rtog pa dang / /'byed pa kho na goms pas mi rtog pa'i ye shes skye zhes grags te/de ni mi rigs par tshig gi sil bu'i mdo las/ lag pa rkang pas nom byed cing / /nyam nga'i lam du rgyug byed ltar/ /rjes su dpag pa gtsor 'dzin pa/ /rnam par ltung bar dka' ma yin/ /zhes gsungs so/ /de lta bas na bsgom pa'i rim pa dang por mdzad pa las kyang /de ltar bsam pa'i shes rab kyis yang dag pa'i don bye brag phyed par brtags par byas la/ de mngon sum du bya ba'i phyir bsgom pa'i shes rab skyed do/ /thos pa la sogs pa tsam gyis ni don mngon sum du mi 'gyur ro zhes 'phags pa dkon mchog sprin la sogs pa las bstan to zhes gsungs te/'phags pa dkon mchog sprin las/ byang chub sems dpa' sgrib pa thams cad rnam par sel bas gsol pa/ bcom ldan 'das rigs kyi bu gang dag gis thos pa las byung ba'am/ bsam pa las byung ba'i shes pas chos khong du chud par gyur pa de rang gis rig pa ma lags sam/bcom ldan 'das kyis bka' stsal pa/ rigs kyi bu ma yin te/ thos pa tsam mam bsam pa tsam gyis ni/ rang gis rig pa'i chos khong du chud par mi nus so/ /rigs kyi bu de lta bas na dpe nyon cig /rigs kyi bu 'di lta ste/dper na 'brog dgon pa chen por sos ka'i zla ba tha ma la mi la la zhig shar phyogs nas nub phyogs su 'gro la de nas mi gzhan zhig nub phyogs nas shar phyogs su 'ong ste/ de yang sos ka'i tsha bas yongs su gdungs par gyur nas skom gyis nyen pa des shar phyogs nas 'ong ba'i mi de la 'di skad ces smras te/kye skyes bu sos ka'i tsha bas yongs su gdungs te skom gyis nyen na/ gang na mtsho'am lteng ka'am rdzing bu gang chu bsil zhing dang sa la rnyog ma med pa gsal bas gang ba yod de/ gang du bdag tsha ba dang skom pa rab tu zhi bar 'gyur ba'i lam bdag la ston cig ces zer la/shar phyogs nas 'ong ba'i mi de yang lam shes pa/ lam la mkhas pa lam mthong ba lam gyi mtshan ma mthong ba zhig yin te/ des de na chu'i nyes pa dang bral ba'i chu sngon chad mthong la/ sngon myang zhing sngon yang zhugs pa yin te/des mi de la 'di skad du/ kye grogs po lam 'di nas lam kha brag mthong gi bar du song la/ kye skyes bu khyod kyis g.yon gyi lam bor te/ g.yas kyi lam nas nags tshal sngon po dang nags tshal de'i dbus na mtsho'am lteng ka'am rdzing bu chu bsil zhing dngas la rnyog ma med pa gsal bas gang ba mthong gi bar du song la der skyes bu khyod skom pa dang tsha ba med par byos shig /ces zer na rigs kyi bu de ji snyam du sems/ sos ka'i tsha bas gdungs te/ skom gyis nyen pa'i mi des chu thos ma thag pa dang bsam pa tsam gyis tsha ba med par 'gyur ram/skom pa dang yang bral bar 'gyur ram/ chu bsil ba yang rang gis rig par 'gyur ram/ gsol pa/ bcom ldan 'das ma lags so/ /bcom ldan 'das mi de nam der phyin nas des chu der zhugs te 'tshal bar gyur pa de'i tshe mi de'i tsha ba de ma mchis par 'gyur ro//skom pa dang yang bral bar 'gyur ro/ /de bsil ba yang rang gis rig par 'gyur ro/ /bcom ldan 'das kyis bka' stsal pa/ de bzhin du rigs kyi bu thos pa tsam dang bsam pa tsam gyis rang gis rig pa'i chos khong du chud par mi nus so/ / de la rigs kyi bu 'brog ces bya ba 'di ni 'khor ba'i 'brog gi tshig bla dgas so/ /mi sos ka'i tsha bas yongs su gdungs shing skom gyis nyen pa zhes bya ba 'di ni nyon mongs pa'i gdung bas yongs su gdungs zhing / yul gyi sred pas nyen pa'i sems can rnams kyi tshig bla dgas so//lam shes pa zhes bya ba 'di ni byang chub sems dpa' thams cad mkhyen pa nyid kyi lam la mkhas pa chos myong ba chos rang gis rig pa rnams kyi tshig bla dgas so/ /chu gsal zhing dngas la rnyog pa med pa gsal ba zhes bya ba 'di ni don dam pa'i chos nyid kyi tshig bla dgas so//yang rigs kyi bu dpe nyon cig /rigs kyi bu de ji snyam du sems/ gal te de bzhin gshegs pa tshe'i tshad bskal par bzhugs te 'dzam bu'i gling gi mi rnams kyi mdun du 'di lta ste/ lha'i bdud rtsi dri zhim pa dang gtsang ba dang gya nom pa dang shin tu zhim pa dang reg na bde ba las brtsams te bsngags pa brjod na rigs kyi bu de ji snyam du sems/ci sems can de dag gis lha'i bdud rtsi de'i rang gi bsngags pa rang gis rig par 'gyur ram/ gsol pa bcom ldan 'das ma lags so/ /bcom ldan 'das kyis bka' stsal pa/ rigs kyi bu de lta bas na khyod kyis rnam grangs 'di thos pa'am bsam pa tsam gyis rang gis rig pa'i chos khong du chud par mi nus par rig par bya'o//rigs kyi bu yang dpe nyon cig /rigs kyi bu 'di lta ste dper na mi zhig gis shing tog gi rnam pa sngon sems can sus kyang ma myangs pa zhig myangs par gyur pa des mi gzhan zhig gi mdun du shing tog gi rnam pa de'i bsngags pa 'di lta ste/kha dog phun sum tshogs pa dang / ro phun sum tshogs pa dang / dri zhim pa las brtsams te brjod na rigs kyi bu de ji snyam du sems/ ci mi des shing tog gi ro de rang gis rig par 'gyur ram/gsol pa/ bcom ldan 'das ma lags so/ /bcom ldan 'das kyis bka' stsal pa/ rigs kyi bu de lta bas na khyod kyis rnam grangs 'di ji ltar thos pa tsam mam bsam pa tsam gyis so so rang gis rig pa'i chos khong du chud par mi nus par rig par bya'o zhes gsungs so//ma bsgoms sngon du mi 'gyur dang / /de la log par rtog pa dang / de yi sun dbyung bstan pa dang / /lung gis rgyas par bstan pa yin/ /zhes bya ba ni bsdu ba'i tshigs su bcad pa'o/ /de la bsod nams kyi tshogs kyi yan lag ni/ phung po gsum pa'am/ yan lag bdun pa'am/ chos spyod bcu'am/ chos spyod bcu gsum mam/ chos spyod nyi shu yin te/ bslab pa kun las btus pa las/ de dag ni bsod nams kyi phung po yin pa'i phyir ro zhes gsungs so/ /de lta bas na gong du smos pa bzhin du tshul khrims la sogs pa zhi gnas dang lhag mthong gi tshogs la legs par gnas pa'i rnal 'byor pas bsgom pa'i tshe thog mar bya ba ci yod pa thams cad yongs su rdzogs par byas la sgra'i tsher ma med pa yid dang mthun pa'i gnas brag phugs sam rtsa'i spyil bu'am khang pa la sogs par phyag dar dang zhal zhal dang maN+Dal ci nus kyis byas te/der sangs rgyas dang byang chub sems dpa'i sku gzugs ri mor bris pa mdun logs su bkram pa'am/ lugs sku mdun logs su bzhugs pa la mchod pa'i yo byad 'byor tshad dbul ba khang par go rims bzhin du bshams nas 'di snyam du phyogs bcu'i 'jig rten gyi khams na sems can ji snyed yod pa de dag thams cad lan du mar bdag gi pha dang mar ma gyur pa'i sems can gcig kyang med do zhes thog ma med pa'i dus kyi mdo las de bzhin gshegs pas gsungs te/de lta bas na ji ltar 'jig rten gyi mi srid zhu can pha dang ma la sdang ba'i sems spangs shing khon du 'dzin pa bor nas pha dang ma de gnyis bde bar 'dod pa kho na yin pa de bzhin du bdag gis kyang 'khor ba thog ma med pa nas lus ji snyed cig bskyed cing gsos pa'i pha ma 'di dag la sdang ba'i sems la dge ba'am phan pa'i myu gu mi 'byung ba'i tha ba skam po dang 'dra ba de yud tsam la mi skyed cing khon du 'dzin pa yang spangs nas kha na ma tho ba med pa'i chos kyis deng nas byang chub kyi snying po la 'dug gi bar du rtag tu bde ba dang phrad par 'dod pa'i rnam pa bsgom par bya'o snyam du bsams te/de ni byams pa'o/ /yang ji ltar 'jig rten na mi srid zhu can ni pha ma bde bar 'dod pa'i rnam pa 'byung ba de dang mi mthun pa sdug bsngal dang sdug bsngal gyi rgyu la gnas pa mthong na des bdag la yid kyi rnam par shes pa dang mtshungs par ldan pa'i tshor ba yid mi bde ba dang de'i rkyen gyis lus kyi rnam par shes pa dang mtshungs par ldan pa'i tshor ba sdug bsngal skye zhing bde ba spang ba de bzhin du rnal 'byor pas kyang pha dang ma 'di dag thams cad rtag tu bde bar 'dod pa'i rnam pa bskyed pa la de dang mi mthun pa sdug bsngal dang sdug bsngal gyi rgyu la gnas pas zag pa dang bcas pa'i phung po lnga ni sdug bsngal gyi gong bu yin te/ji skad du/ 'phags pa dpas byin gyis zhus pa las/ phung po lnga grub pa las sdug bsngal gyi gong bu yin no zhes gsungs so/ /de lta bas na sdug bsngal rnam pa gsum gyis ci rigs par sdug bsngal zhing sdug bsngal gyi gong bu 'di dag ji ltar spang snyam du yid kyis shin tu gdung ba bskyed do//de ni snying rje ste/ des rnal 'byor pa'i bde ba dang yid bde ba spang bas de sel zhes kyang bya ste/ gzhan sdug bsngal ba mthong nas bde ba spong zhing sdug bsngal ba dang yid mi bde ba'i nad skye ba de ni/snying rje las byung ba yin te/ de skad du/ 'phags pa dri ma med par grags pas bstan pa las/ byang chub sems dpa' rnams kyi nad snying rje las byung ba yin no zhes gsungs so/ /de ltar snying rje chen po dung gis bskyod la/ 'gro ba mtha' dag gi sdug bsngal de gtan spangs nas byang chub kyi snying po la dgod par bya'o//snyam du sems bskyed nas/ phyogs bcu na bzhugs pa'i sangs rgyas dang byang chub sems dpa' thams cad yid kyi mngon sum du dmigs la tshig 'di skad ces/ phyogs bcu dus gsum sangs rgyas dang //bstan dang don dam bsgrub chos dang / /'phags dang de rjes slob pa la/ /sgo gsum dang bas phyag 'tshal lo/ /gong du bshams pa'i mchod pa yang skabs der dbul lo/ /me tog 'bras bu spos kyi shing rnams dang / /bdug pa'i shing dang rin chen shing rnams sogs//nam mkha'i mthar thug yongs su ma gzung ba/ /blo yis blangs nas dkon mchog gsum la dbul/ /byang chub snying por mchis kyi bar/ /sangs rgyas rnams la skyabs su mchi/ /chos dang byang chub sems dpa' yi//tshogs la'ang de bzhin skyabs su mchi/ /thog ma med pa'i dus nas bdag gi sems/ /mngon zhen 'dod chags la sogs nyes brgya yis/ /lus ngag gsum gyis bgyid btsal rjes yi rang / /mi bzad gnod sems dkon mchog gsum la bshags//chos dang ldan pa'i bya ba'i ched kyi phyir/ /'jig rten gyi ni khams rnams thams cad kyi/ /sangs rgyas dang ni byang chub sems dpa' la/ /rang gi lus ni nges par 'bul bar bgyi/ /sangs rgyas kun gyi thugs bskyed nas/ /chos kyi 'khor lo bskor ba dang //byang chub sems dpa' la sogs kyi/ /dge bsags rnams la yi rang ngo / /bde gshegs byang chub brnyes gyur kyang / /'khor rnams dam chos gzung slad du/ /cang mi gsung bar bzhugs rnams la/ /chos kyi 'khor lo bskor bar bskul/ /le lo can gyi 'khor rnams 'dul byed du//'dus byas mi rtag nges par bstan pa'i phyir/ /mya ngan 'da' ba'i tshul bstan zhes rnams la/ /'khor ba ji srid bar du bzhugs par gsol/ /ji ltar bde gshegs mar me mdzad sogs kyi/ /spyod dang bcas pas byang chub thugs bskyed ltar//bdag gis byang chub chen por sems bskyed nas/ /deng nas bslab pa gsum la gnas par bgyi/ /rtog pa thams cad spang slad du/ /dkon mchog gsum la phyag sogs bgyis/ /de phyir bdag gi dge bsags 'di/ /bdag la rnam smin 'bras ma gyur//zhes bsngo bar bya'o// //da ni lus bcos par bya ste/ khri'am/ khri'u'am/ rtswa bting ba'am/ stan bde ba'i steng du skyil mo krung bcas te 'dug par bya'o/ /de ci'i phyir zhe na/ rgyu lnga yang dag par mthong ba'i phyir te/ lus legs par bsgrims na/spyod lam de shin tu sbyangs pa skye ba dang rjes su mthun pa yin pa'i phyir myur ba myur ba kho nar shin tu sbyangs pa skye ba dang / de bzhin du 'dug pas yun ring du 'da' bar byed nus shing spyod lam des de'i lus shin tu ngal bar mi 'gyur ba dang / de bzhin du spyod lam de ni gzhan mu stegs pa dang /phas kyi rgol ba dag dang thun mong ma yin pa dang / spyod lam des 'dug pa gzhan dag gis mthong na shin tu dang ba skye bar 'gyur ba dang / de bzhin du spyod lam de ni sangs rgyas rnams kyis rjes su gnang zhing bsten pa yin pa'i phyir te/ rgyu de lnga yang dag par mthong ba'i phyir skyil mo krung bcas te lus drang por bsrang nas dran pa phyogs par gzhag ste 'dug par bya'o/ /lus drang po gang zhe na/ lus bsal bar bsrang ste gzhag pa dang / sems la g.yo ba med cing tshul 'chos pa med pa drang por gzhag pa'o/ / de la lus drang por rab tu zin pas na rmugs pa dang gnyid kyi sems yang dag par blangs te gnas par mi byed do/ /sems la g.yo ba med cing tshul 'chos pa med pa nas phyi rol du rnam par g.yeng ba yang dag par blangs te gnas par mi byed do/ /de la dran pa phyogs par gzhag ste/gnas par byed pa gang zhe na/ tshul bzhin yid la byed pa dang mtshungs par ldan pa'i dran pa ni nag po'i phyogs thams cad las phyir phyogs shing mi mthun pa'i phyir dran pa phyogs pa zhes bya'o/ /de nas phrag pa mnyam par gzhag la mgo mi mtho mi dma' zhing phyogs gcig tu mi g.yo bar gzhag ste/sna nas lte bar drang por gzhag go/ /mig ha cang mi dbye ha cang yang mi gzum par sna'i rtse mor gtad cing / so dang mchu yang tha mal par gzhag go/ /lce yang ya so'i drung du bzhar ro/ /dbugs phyir 'byung ba dang nang du rngub ba yang sgra can dang rngam pa can dang /dbugs rgod bag can du mi btang zhing ci nas ma tshor bar dal bus lhun gyis grub pa'i tshul du dbugs nang du rngub pa dang / phyir 'byung ba de ltar bya'o/ /de la mtshams sbyor ba'i shes pa gang zhe na/ dbugs snyoms ma thag du srid pa gsum gyi sems can 'di dag gis chos thams cad kyi de bzhin nyid ma rtogs shing /log par rtogs pa dang / goms par ma byas pa de bzhin nyid mngon sum du byed pa rnam par mi rtog pa'i ye shes sku gsum gyi mchog de ma rtogs so/ /bdag gis ci nas kyang chos nyid de phyin ci ma log par rtag tu yun ring por gus par bsgoms la ye shes de thob par byas nas gzhan dag gis kyang de kho na nyid mngon sum du byed pa'i ye shes de thob par bya'o snyam du bsam mo//de bzhin nyid de gang zhe na/ chos thams cad don dam par yod par yang ma grub/med par yang ma grub bo/ /des na gnyis kar yang ma grub/ gnyi ga ma yin pa ci yang med do/ /de skad du/ 'jam dpal gnas pa las kyang de spyod pa spros pa med cing nye bar zhi ste/ yod do zhes kyang khas mi len/ med do zhes kyang khas mi len/ yod kyang yod la med kyang med do zhes kyang khas mi len/ yod pa yang ma yin med pa yang ma yin zhes de skad kyang khas mi len to zhes gsungs so/ /de bas na bsam pa'i shes rab kyis ci yang ma rnyed de/ de tsam la gzhan ma yin pa'i don gyis de bzhin nyid ces sgro btags nas brjod de/de bas na de bzhin nyid tsam yang yang dag par ma grub par dran par bya'o/ /de la sems ji ltar gzhag pa gang zhe na/ de bzhin nyid tsam ma grub par dran nas de ma thag tu sems shes pa shin tu bsgrims la/ 'di yul gyi chos nyid ces bya ba'am/ sems kyi chos nyid ces bya ba'am/ chos ji bzhin ma zhes bya ba'am/ bsam gyis mi khyab pa'i dbyings zhes bya ba'am/ ci yang ma yin pa zhes bya ba'am/ don dam pa zhes bya ba'am/ spros pa thams cad dang bral ba zhes bya ba la sogs pa zab mo ston pa'i tshig thams cad kyi rjes su 'brangs nas gzhag par mi bya'o//de la nyes pa spangs pa gang zhe na/ mdor bsdu na bzhi ste/ nye ba'i nyon mongs pa'i nyes pa gang zhi gnas dang lhag mthong gi mtshan nyid ma shes pa'i nyes pa dang / lung du ma bstan pa'i nyes pa dang / lus dang sems mi bde ba'i nyes pa'o//de spang ba ni nyes pa re re'i skabs su bstan to/ /de la nye ba'i nyon mongs pa ni gsum ste/ rgod pa dang / dmigs pa la mi dga' ba dang / bying ba'o/ /de la rgod pa'i ngo bo ni dper na rnam par g.yengs pa'i mi lta bu'am/ spre'u bzhin du sems dmigs pa la mi gnas pa'o//de'i rgyu ni bzhi ste/ sdug pa'i mtshan nyid yid la byed pas phyi rol gyi lus la chags pa'i 'dun pa yin na/ 'di ltar rnam par bsngos pa dang rnam par rnags pa dang / rnam par 'bus gzhigs pa dang / rnam par bsam pa dang / rnam par zos pa dang / rnam par dmar ba dang / rnam par 'thor ba dang / rus gong ngam/ keng rus sam/ rus pa'i keng rus yid la byed pas zhi bar bya'o/ /yang na 'phags pa ting nge 'dzin gyi rgyal po las/ gang zhig 'dod chags sems kyis ni/ /bud med rul pa bsten byed pa//'gro ba rul par 'gro 'gyur te/ /des na ngan 'gror 'gro bar 'gyur/ /zhes gsungs so/ /de dran pas zhi bar bya'o/ /khong khro ba'i rgyus gnod sems skyes nas sems g.yengs na sems can thams cad bde bar 'dod pa byams pa bsgoms pa'am/gnod sems kyi nyes dmigs dran pas zhi bar bya ste/ byams pa seng ge sgra'i mdo las/ byang chub sems dpa' la tha ba'am ngan sems bskyed pa de tsam gyi bar du dmyal bar gnas par go cha bgo dgos so zhes gsungs so/ /'phags pa 'jam dpal rnam par rol pa'i mdo las kyang /khong khro khong khro zhes bya ba de ni 'jam dpal gang dge ba'i rtsa ba bskal pa brgyar bsags pa 'joms par byed pa ste/ de bas na khong khro ba zhes bya'o zhes gsungs so/ /'phags pa zla ba'i sgron ma'i mdo las kyang / /phan tshun gnod pa'i sems su gang byed pa//de la tshul khrims thos pa skyob mi byed/ /bsam gtan dang ni dgon gnas mi skyob ste/ /sbyin dang sangs rgyas mchod pa'ang skyob mi byed/ /ces gsungs so/ /nye du dang / ljongs dang / mi 'chi ba'i rnam par rtog pa dang / sngon dgod pa dang /rtses pa dang / dga' mgur spyad pa rjes su dran pa dang / longs spyod la chags pas g.yengs na/ 'dus byas thams cad mi rtag pa dang / sdug bsngal bar dran par bya'o/ /yang na 'phags pa rgya cher rol pa las/ /srid gsum rga dang nad kyi sdug bsngal 'bar//'chi med rab 'bar 'di na mgon med pa/ /srid las 'byung la 'gro ba rtag tu rmongs/ /bum par chud pa'i bung ba 'khor ba bzhin/ /rtag tu gzugs sdug mchog dang sgra snyan dang / /dri zhim ro mchog reg pa bde byed pa/ /dus ngan rnyi la 'gro ba 'di dag thogs//dper na rngon pa'i rnyi la spre'u thogs bzhin/ /zhes bya ba la sogs pas zhi bar bya'o/ /'gyod pa dang the tshom gyis g.yengs na chos zab mo yid la byas pas zhi bar 'gyur ro/ /mi dga' nas g.yengs na yang rgod pa'i phyogs yin pas/ bslan pa'i thabs gong ma bzhin du bya'o/ /de nas yang shes pa shin tu bsgrims la ci la yang mi gnas par gzhag go/ /de la bying ba'i ngo bo nyid ni dmus long dang 'dra ba'am/ mi mun par zhugs pa'am/ mig btsums pa dang 'dra bar mi gsal ba yin te/ de'i rgyu ni ngal dub chen po'i las dang mun pa yid la byas pa dang /gnyid skyed pa'i kha zas dang btung ba dang tshang khung du 'dug pa dang / zas skom ha cang mang ba dang ha cang nyung bar zos pa dang 'thungs pa yin te/ de spang ba ni des snang ba'i mtshan ma legs par shin tu rab tu gzung zhing legs par yid la byas/legs par bstan legs par so sor brtags te/ de snang ba dang ldan pa dang / 'od dang ldan pa'i sems kyis g.yogs pa'am/ bla gab med pa'i 'chag sa na 'chags pa'i tshe/ 'di lta ste/ sangs rgyas rjes su dran pa'am/ chos sam/dge 'dun nam/ tshul khrims sam/ gtong ba'am/ lha rjes su dran pa'am/ dang bar 'gyur ba'i dmigs pa gang yang rung bas sems yang dag par bstod pa yang dag par 'dzin du bcug /yang dag par gzengs bstod/ /yang dag par rab tu dga' bar byed pa'am/phyogs bcur lta ba'am/ zla ba'am/ rgyu skar dang / gza' dang skar ma dag la lta ba gtong ba'am/ chus gdong bkru ba'am/ mar me'am/ nor bu'i 'od la bltas pas sangs par 'gyur ro/ /yang na lhag pa'i bsam pa bskul ba'i mdo las/gang zhig rmugs dang gnyid la dga' 'gyur ba/ /de ni gti mug dra ba chen po 'phel/ /de ni lta ba rnyed na the tshom 'gyur/ /de la ltar gyur gzhan yang mang du 'byung / /zhes bya ba la sogs pas kha ton byas la bsang ngo / /mi dga' na bying ste/ 'gro ba yang gong ma bzhin du gsal bar bya'o//de nas yang rab tu bsgrims la ci la yang mi gnas par gzhag go/ /lung du ma bstan pa'i sems ni gang gi tshe sems phyi rol du yang mi rgyu nang du yang mi rgyu/ de dge ba la yang mi spyod/ mi dge ba la yang mi spyod/ lhag mthong la yang mi spyod/zhi gnas kyang mi 'dzin cing zhum pa la gnyid kyis non par gnas pa ste/ 'di lta ste dper na skyes bu nyal nyal ba las sad pa'i mig gnyis kyis/ bsgribs pa'i sems mi gsal ba de bzhin du de'i tshe sems mi gsal bar rgyu ba'o/ /de yang gong du bying ba las/gsal bar byed pa'i thabs bzhin du byas la/ yang ci la yang mi gnas par gzhag go/ /de la zhi gnas dang lhag mthong gi mtshan nyid ma shes pa'i nyes pa ni gang gi tshe dmigs pa la mi dga' nas bying ngam bying du dogs nas gsal bar byas pa'am/ dmigs pa la mi dga' nas yengs par mthong nas de la nyes dmigs su bltas nas g.yengs pa zhi bar byas pa'am/ rgod pa'i rgyu gzhan gyi rgod pa'am/ rgod du dogs nas zhi bar byas pa'am/ lung du ma bstan pa'i sems su shes nas de la gzengs bstod nas gsal bar gzhag pa de'i tshe shes bzhin gyis bltas na/shes pa shin tu gsal zhing ci la yang mi 'dzin par mthong na/ bying rgod gnyis las dben zhing zhi gnas dang lhag mthong zung du 'brel pa yin pas de'i tshe ye mi bcos par gzhag go/ /de ltar rigs pa las kha cig gis zhi gnas kyi mtshan nyid ni rtse gcig pa yin pas ci zhig 'dzin dgos snyam nas dmigs pa tshol bar byed/lhag mthong gi mtshan nyid ni yang dag pa la so sor rtog pa yin nam snyam nas rtog par byed pa de ni dper na mi zhig mar me gsal bar byed 'dod pa na gos kyi mtha' mas g.yob bar byed na des ni mar me gsod par byed de gsal bar mi 'gyur ba de bzhin du gang zag des lo 'bum phrag du ma bsgoms kyang zhi gnas dang lhag mthong zung du 'brel pa'i lam mi 'thob bo//de bas na mnyam par gzhag pa'i lhag mthong gi mtshan nyid ni rtog pa tsam du zad la/de dang zung du 'brel ba'i zhi gnas ni de las mi g.yo ba tsam du zad pas de gnyis skad cig ma gcig la tshang bas ngang de la gzhag go/ /gang gi tshe cung zhig lon nas shes pa ni ci zhig la 'dzin snyam byed pa'am bag thibs pa snyam byed pa'am/gting du 'gro ba'am song ba snyam byed pa'am/ nyam chung ba snyam byed na zhi gnas kyi shas che la lhag mthong gi shas chung ba yin pas de'i tshe stobs bskyed la sngar chos thams cad kyi chos nyid ji ltar rtogs pa de yang dang yang du dran par byas la nam nges pa skyes shing gsal bar gyur ma thag tu ngang de la bzhag go/de ltar byas pas nges pa ma skyes srid na rtags gang yang rung ba'i rjes su 'brangs nas bsam pa'i shes rab bskyed la nam nges ma thag tu ngang de la bzhag go/ /de la dub pa'i nyes pa ni gnyis te/ lus dub pa dang / sems dub pa'o/ /de yang ha cang bsgoms drags pa'am/ rkyen gzhan gyis kyang rung ste/ lus dang sems mi bde na spyod lam bag cig bsgyur la dmigs pa gtad nas 'di snyam du sems can thams cad kun rdzob tu me long gi nang gi gzugs brnyan bzhin du blta'o/ / don dam sbal pa'i spu'i gos dang 'dra'o snyam du bsam mo/ /de skad du/ 'phags pa dri ma med par grags pas bstan pa las kyang / 'jam dpal gyis smras pa/ byang chub sems dpas sems can rnams la ji ltar blta bar bya/ /de skad ces smras pa dang / dri ma med par grags pas smras pa/me long gi nang gi gzugs brnyan bzhin du blta'o/ /sbal pa'i rgyab kyi spu'i gos bzhin du ba lta'o zhes gsungs so/ /de ltar bsams nas ngal sos pa dang / spyod lam sngar 'dug pa bzhin du byas la shes pa ci la yang mi gnas par gzhag go/ / mdor na bying na ni gsal bar bya/ rgod na rlan par bya/ mnyam par zhugs na btang snyoms su bya/ zhi gnas kyi shas che na rtogs pa'i don dran par bya/ des nges pa ma skyes na rtags kyi rjes su 'brangs na ma nges pa skyes ma thag tu ngang de la bzhag go/ /nges pa skyes kyang dpyad na lhag mthong shas che bas sems me rlung la bzhag pa bzhin du g.yo bar 'gyur bas de'i tshe bags kyis lhod la bzhag go//ngang de la shes pa shin tu gsal la ci la yang mi 'dzin par gnas na nus pa'i tshad dang sbyar la bsgom mo/ /de la ldang ba'i sems gang zhe na/rnam pa gnyis te shes rab kyi sems kyis ldang ba dang / thabs kyi sems kyis ldang ba'o/ /de la shes rab kyi sems kyis ldang ba ni ting nge 'dzin las ldang bar 'dod na langs la spyod lam ma zhig par 'di snyam du chos thams cad gzod ma nas ma skyes pa nam mkha' lta bu yin snyam du bsam mo//de nas yang kun rdzob tu snang bar bsam mo/ /de skad du/ 'phags pa ting nge 'dzin gyi rgyal po las/ ji ltar bar snang cung zad sprin med las/ /skad cig tu ni sprin gyi dkyil 'khor snang / /thog ma gang las byung ba shes par bya/ /de bzhin chos rnams thams cad shes par gyis//zhes gsungs so/ /de la thabs kyi bsam pas ldang ba ni de ltar don dam par thams cad gzod ma nas ma skyes kyang kun rdzob tu sems nyid sna tshogs su snang ste sems can gyi 'jig rten du bsdus pa'i gzugs rnams ni sgyu mas byas pa'i glang po che la sogs pa lta bu'o//snod kyi 'jig rten du bsdus pa rnams ni smig rgyu la chur snang ba lta bu'o/ /yul dang longs spyod kyi ngo bo rnams ni rmi lam lta bu'o/ /lus kyi las kyi ngo bo nyid ni mig yor lta bu'o/ /ngag gi las kyi ngo bo nyid ni brag cha lta bu'o/ /'dod pa na spyod pa'i sems can rnams ni gzugs brnyan lta bu'o//gzugs dang gzugs med pa na spyod pa'i sems can rnams ni chu zla lta bu'o/ /sangs rgyas kyi zhing yongs su dag pa la sogs pa dag ni sprul pa lta bu'o/ /de bas na sgyu ma lta bu'i sems can 'di dag don dam par ngo bo nyid med pa'i chos 'di dag la yod pa la sogs par blo phyin ci log tu gyur nas nyon mongs pa'i rkyen gyis las sna tshogs bsags pas yun ring po nas 'khor bar 'khyam zhing sdug bsngal lo//bdag gis ci nas kyang sgyu ma mkhan bzhin du phyin ci ma log pa'i blos bsod nams dang ye shes kyi tshogs dpag tu med pa bsags la thams cad mkhyen pa'i ye shes thob par byas nas 'gro ba mtha' dag gi byang chub chen po thob par bya'o snyam du bsams la/thal mo sbyar nas tshig 'di skad ces/ phyogs bcu'i sangs rgyas sras dang bcas la gus pas phyag 'tshal grub pas mchod//de dag spyan sngar sdig pa 'chags shing bsod nams kun la yi rang ngo / /byang chub snying por bzhugs pa rnams la chos kyi 'khor lo bskor bar bskul/ /mya ngan 'da' bar bzhed pa rnams la bskal pa dpag tu med par bzhugs par gsol//dge ba 'di yis 'gro ba ma lus kun/ /dngos por 'dzin pa'i gdon spangs brtser ldan zhing / /rnam mi rtog dang yongs su smin byas nas/ /byang chub chen po kho na myur thob shog /ces smon lam btab nas ldang ngo // //de la lang ba'i spyod pa gang zhe na/ gnas skabs thams cad du byang chub kyi sems dang mi 'bral bar bya ste/ de yang las dang po pa rnams kyis byang chub kyi sems dang mi 'bral ba ni byang chub kyi rgyu la dgos so/ /zhes gsungs pa kun las btus las gsungs so//de ni stong pa nyid dang snying rje chen po'i snying po can gyis sbyin pa la sogs pa'i bya ba rnams yin te/ de skad du/ 'phags pa chos yang dag par sdud pa las kyang bka' stsal te/ yang dag pa ji lta ba bzhin mthong ba'i byang chub sems dpa' sems can rnams la snying rje chen po 'jug go//de yang 'di snyam du bdag gis chos thams cad yang dag pa ji lta ba bzhin du mthong ba'i ting nge 'dzin gyi sgo 'di sems can thams cad la bsgrub par bya'o snyam pa'i sems te de snying rje chen po des bskul nas/ lhag pa'i tshul khrims dang lhag pa'i sems dang lhag pa'i shes rab kyi bslab pa yongs su rdzogs par byas nas bla na med pa yang dag par rdzogs pa'i byang chub mngon par rdzogs par sangs rgyas so//zhes 'byung ngo / /yang de nyid las/ bcom ldan 'das byang chub sems dpa' rnams kyis lus kyi las gang ci lags pa dang /ngag gi las gang ci lags pa dang / yid kyi las gang ci lags pa de thams cad ni sems can thams cad la lta bas 'jug pa lags so/ /snying rje chen po sngon du 'gro ba lags so/ /snying rje chen po'i dbang du 'gyur pa lags so//sems can thams cad la phan pa dang bde bar bgyi ba'i lhag pa'i bsam pa las 'byung ba lags so/ /de ltar sman par bgyi ba'i bsam pa dang ldan pa de ni 'di snyam du 'du shes bgyid de/ sems can thams cad la phan pa bsgrub pa dang bde ba bsgrub pa gang yin pa de bdag gis bsgrub par bya'o snyam lags so zhes gsungs so//de lta bu'i dbang du byas nas 'phags pa sdong po bkod pa'i mdo las/ byang chub sems dpa' ye shes dpal gyis byang chub sems dpa' 'jam dpal la 'di skad ces smras so/ /kye rgyal ba'i sras byang chub sems dpa' rnams ji ltar na kha na ma tho ba med pa'i lus kyi las dang ldan pa yin/kha na ma tho ba med pa'i ngag gi las dang ldan pa yin/ kha na ma tho ba med pa'i yid kyi las dang ldan pa yin zhes bya ba la sogs pa rgya cher dris nas/ byang chub sems dpa' 'jam dpal gyis byang chub sems dpa' ye shes dpal la 'di skad ces smras so//kye rgyal ba'i sras khyod de ltar skye bo mang po la phan pa dang skye bo mang po la bde ba dang 'jig rten la snying brtse ba dang lha dang mi rnams kyi don dang phan pa dang bde ba rnam par gzud par spyod pa'i phyir zhugs shing //de ltar khyod rnam pa 'di lta bu'i gnas dag yongs su dri bar sems pa ni/ kye rgyal ba'i sras legs so legs so/ /kye rgyal ba'i sras byang chub sems dpa' dag gis sems kyi las yid la byed pa'i sbyor ba gang dang ldan pas byang chub sems dpa' rnams yon tan khyad par 'di dag thams cad 'thob par 'gyur ba dang /sangs rgyas kyi chos thams cad la thogs pa med pa'i las su 'gyur ba dang / sangs rgyas bcom ldan 'das 'das pa dang ma byon pa dang da ltar byung ba rnams kyi lam du 'jug pa dang /sems can thams cad yongs su mi gtong ba'i sems kyang de dag la nye bar gnas pa dang / chos thams cad ji lta ba bzhin du rnam par lta ba yang de dag la nye bar gnas pa dang / mi dge ba'i chos thams cad spang par 'gyur ba dang /dge ba'i chos thams cad dang ldan par 'gyur ba dang / kun tu bzang shing kun tu mdzes pa dang rnam pa'i mchog thams cad dang ldan pa dang / chos thams cad la dbang bsgyur zhing srog chags thams cad la ston pa gnyis par gyur pa'i sems kyi las yid la byed pa'i sbyor ba yod de/kye rgyal ba'i sras dag byang chub sems dpa' sems kyi las yid la byed pa'i sbyor ba gang dang ldan na yon tan gyi khyad par 'di dag thams cad 'thob par 'gyur ba'i byang chub sems dpa' sems kyi las yid la byed pa'i sbyor ba de dag gang zhe na/kye rgyal ba'i sras 'di la byang chub sems dpas khyim gyi nang na 'dug pa'i tshe sems can thams cad kyi rang bzhin shes pa dang ldan pas khyim gyi thibs pos zil gyis ma non par gyur cig ces sems bskyed do/ /pha ma dang 'grogs pa'i tshe byang chub sems dpas sems can thams cad yongs su bskyab pa'i phyir sangs rgyas dang 'grogs par gyur cig ces sems bskyed do//bu dang bu mo dang 'grogs pa'i tshe byang chub sems dpas sems can thams cad sred pa dang shin tu bral bas dga' ba dang mi dga' ba dang rnam par bral bar gyur cig ces sems bskyed do//'dod pa'i yon tan dang 'grogs pa'i tshe byang chub sems dpas sems can thams cad yon tan gyi pha rol tu phyin pas 'dod pa bsal cing rnam par sel bar gyur cig ces sems bskyed do//glu dang gar dang rol mo dang sil snyan dang 'grogs pa'i tshe byang chub sems dpas sems can thams cad gar mkhan gyi mtshon lta bur mthong ba dang ldan zhing chos yang dag par 'gro ba'i brjod pa rab tu thob par gyur cig ces sems bskyed do/ /chung ma'i 'khor gyi nang na 'dug pa'i tshe byang chub sems dpas sems can thams cad 'dod pa'i gsal shing dang bral zhing 'phags pa'i sar chud par gyur cig ces sems bskyed do//rgyan gyis brgyan pa'i tshe byang chub sems dpas sems can thams cad srid par 'byung ba 'jig pa'i pha rol tu phyin pa'i khur bor bar gyur cig ces sems bskyed do//khong thog tu phyin pa'i tshe byang chub sems dpas sems can thams cad chos kyi khyad par khong du chud cing chos kyi khang stengs su phyin par gyur cig ces sems bskyed do/ /sbyin pa gtong ba'i tshe byang chub sems dpas sems can thams cad bdag gir bya ba med de yongs su 'dzin pa'i sems med cing bdag gi ba thams cad yongs su gtong bar gyur cig ces sems bskyed do//ma bral zhing 'gro ba'i tshe byang chub sems dpas sems can thams cad thams cad mkhyen pa nyid kyi mthar phyin te/'du ba dang shin tu bral bar gyur cig ces sems bskyed do/ /btson ra la kha na ma tho bar mthong ba'i tshe byang chub sems dpas sems can thams cad gnas med pa la spyod cing gang du dga' bar 'dod par gyur cig ces sems bskyed do/ /khyim nas khyim med par 'byung ba'i tshe byang chub sems dpas sems can thams cad sems bcings pa dang grol ba med cing chags pa med de mi dgos pa dang bral bar gyur cig ces sems bskyed do//dge 'dun gyi ra ba'i mtshams 'da' ba'i tshe byang chub sems dpas sems can thams cad 'gal ba med pa'i chos dang ldan zhing /mthun par 'gro ba mang po dang ldan par gyur cig ces sems bskyed do/ /mkhan po dang slob dpon gyi drung du 'gro ba'i tshe byang chub sems dpas sems can thams cad chos la rtsom zhing chog la mkhas par gyur cig ces sems bskyed do//rab tu byung bar gsol ba'i tshe byang chub sems dpas sems can thams cad bar chad med cing phyir mi ldog pa'i chos can du gyur cig ces sems bskyed do/ /gos dkar po 'dor ba'i tshe byang chub sems dpas sems can thams cad sdig pa la brtson pa spangs te/dge ba'i rtsa ba shin tu sbyangs par gyur cig ces sems bskyed do/ /skra dang kha spu 'dregs pa'i tshe byang chub sems dpas sems can thams cad shin tu mnyam par gzhag cing nyon mongs pa med par gyur cig ces sems bskyed do/ /gos ngur smrig gyon pa'i tshe byang chub sems dpas sems can thams cad drang srong chen po'i sems dang ldan zhing rnyog pa med par gyur cig ces sems bskyed do//rab tu byung ba'i tshe byang chub sems dpas sems can thams cad yongs su bskyab pa'i phyir de bzhin gshegs pa'i rab tu byung bas rab tu 'byung bar gyur cig ces sems bskyed do//sangs rgyas la skyabs su 'gro ba'i tshe byang chub sems dpas sems can thams cad dge ba la mos pa mngon par skyes nas sangs rgyas kyi gdung mi 'chad pa'i don du brtson par gyur cig ces sems bskyed do/ /chos la skyabs su 'gro ba'i tshe byang chub sems dpas sems can thams cad chos kyi gter thos par gyur cig ces sems bskyed do//dge 'dun la skyabs su 'gro ba'i tshe byang chub sems dpas sems can thams cad chags pa'i gnas dang bral zhing dge 'dun yongs su sdud par gyur cig ces sems bskyed do//bslab pa'i tshig yang dag par len pa'i tshe byang chub sems dpas sems can thams cad tshul bzang po la yang dag par spyod cing bslab pa thams cad la shin tu bslab par gyur cig ces sems bskyed do/ /slob dpon gyis bstan pa'i tshe byang chub sems dpas sems can thams cad log pa ma yin pa'i las la spyod cing tshul dang spyod yul phun sum tshogs par gyur cig ces sems bskyed do//mkhan pos bstan pa'i tshe byang chub sems dpas sems can thams cad gnas med pa las yang dag par gzhol zhing mi skye ba'i ye shes kyi pha rol tu phyin par gyur cig ces sems bskyed do//bsnyen par rdzogs pa'i tshe byang chub sems dpas sems can thams cad chos thams cad kyi khyad par gyi pha rol tu phyin te/ thabs mkhas pa'i pha rol tu phyin par gyur cig ces sems bskyed do//gtsug lag khang du 'gro ba'i tshe byang chub sems dpas sems can thams cad mi 'phrogs pa'i chos can du gyur te/ bla na med pa'i gnas la rnam par spyod par gyur cig ces sems bskyed do/ /stan 'dings pa'i tshe byang chub sems dpas sems can thams cad chos ji lta ba bzhin du mthong zhing legs par bkod pa'i chos can du gyur cig ces sems bskyed do//'dug pa'i tshe byang chub sems dpas sems can thams cad mi gnas pa'i sems kyi snying po byang chub la 'dug par gyur cig ces sems bskyed do/ /skyil mo krung 'cha' ba'i tshe byang chub sems dpas sems can thams cad mi g.yo ba'i sa la dge ba'i rtsa ba shin tu brtan par gyur cig ces sems bskyed do//zhi gnas yongs su sbyong bar byed pa'i tshe byang chub sems dpas sems can thams cad ma lus pa'i mthar thug pa la brtson zhing zhi ba dang /dul ba la rab tu gzhol bar gyur cig ces sems bskyed do/ /lhag mthong yongs su sbyong bar byed pa'i tshe byang chub sems dpas sems can thams cad shin tu nyon mongs pa med pa'i chos can du gyur te chos yang dag pa ji lta ba bzhin du mthong bar gyur cig ces sems bskyed do//skyil mo krung 'jig pa'i tshe byang chub sems dpas sems can thams cad shin tu mnyam par gzhag cing 'du byed thams cad rang bzhin gyis 'jig pa rnam par mthong bar gyur cig ces sems bskyed do/ /rkang mthil gzhog pa'i tshe byang chub sems dpas sems can thams cad sems rnam par grol ba mi 'khrugs pa la rab tu gnas par gyur cig ces sems bskyed do//rkang mthil 'degs pa'i tshe byang chub sems dpas sems can thams cad kha na ma tho ba med pa dang ldan par thob ste/ 'khor ba'i rgya mtshor bying ba las 'thon par gyur cig ces sems bskyed do/ /smad g.yogs gyon pa'i tshe byang chub sems dpas sems can thams cad ngo tsha shes shing khrel yod pa bla na med pa dang ldan zhing dge ba'i rtsa ba shin tu brtan par gyur cig ces sems bskyed do/ / ska rags 'ching ba'i tshe byang chub sems dpas sems can thams cad mi 'khrugs pa'i chos can du gyur te dge ba'i rtsa ba shin tu 'brel par gyur cig ces sems bskyed do/ /bla gos gyon pa'i tshe byang chub sems dpas sems can thams cad chos thams cad kyi pha rol tu phyin pa thob ste/ gong nas gong du dge ba'i rtsa ba thob par gyur cig ces sems bskyed do/ /sbyar ma gyon pa'i tshe byang chub sems dpas sems can thams cad mi 'khrugs pa'i chos can du gyur te thabs dam pas mngon par bkab par gyur cig ces sems bskyed do/ /so shing len pa'i tshe byang chub sems dpas sems can thams cad yongs su dag pa'i dngos po thob pa'i phyir dam pa'i chos rnam par dag pa thob par gyur cig ces sems bskyed do//so shing za ba'i tshe byang chub sems dpas sems can thams cad nyon mongs pa shin tu bcom zhing sems dul zhing sems dag par gyur cig ces sems bskyed do//dben par 'gro ba'i tshe byang chub sems dpas sems can thams cad 'dod chags dang zhe sdang dang gti mug spangs te sdig pa mi dge ba'i chos thams cad spangs par gyur cig ces sems bskyed do//chu ngogs su 'gro ba'i tshe byang chub sems dpas sems can thams cad 'jig rten las 'das pa'i chos thams cad las shin tu byung bar gyur cig ces sems bskyed do/ /gtsang sbra'i las byed pa'i tshe byang chub sems dpas sems can thams cad shin tu dag pa'i dngos po gtsang zhing nges pa dang ldan par gyur cig ces sems bskyed do//lag pa 'khru ba'i tshe byang chub sems dpas sems can thams cad sangs rgyas kyi chos thams cad gzung zhing gtsang ba'i phyir bkra shis kyi lag pa dang ldan par gyur cig ces sems bskyed do//ngo 'khru ba'i tshe byang chub sems dpas sems can thams cad shin tu nyon mongs pa dang bral zhing chos thams cad kyi sgo rnam par dag pa thob par gyur cig ces sems bskyed do/ /khar ba len pa'i tshe byang chub sems dpas sems can thams cad mchod sbyin byas shing lam ston par gyur cig ces sems bskyed do//lhung bzed len pa'i tshe byang chub sems dpas sems can thams cad 'gro ba thams cad kyis mchod par 'os shing snod du gyur cig ces sems bskyed do/ /spyod yul du mngon par zhugs pa'i tshe byang chub sems dpas sems can thams cad gnas med pa la yang dag par gzhol zhing sangs rgyas kyi spyod yul la mngon du phyogs par gyur cig ces sems bskyed do//lam du zhugs pa'i tshe byang chub sems dpas sems can thams cad phyin ma lus par 'gro zhing sangs rgyas kyi lam du zhugs par gyur cig ces sems bskyed do//'gro ba'i tshe byang chub sems dpas sems can thams cad shin tu rnam par dag pa'i chos sgrib pa med pa grub par gyur pas chos kyi dbyings mtha' dang dbus med pa khong du chud par gyur cig ces sems bskyed do/ / lam mtho ba mthong ba'i tshe byang chub sems dpas sems can thams cad shin tu zhum pa med de khams gsum las gyen du 'phags par gyur cig ces sems bskyed do/ /lam dma' ba mthong ba'i tshe byang chub sems dpas sems can thams cad dge ba'i rtsa ba shin tu brtan zhing sangs rgyas thams cad shin tu 'dud par gyur cig ces sems bskyed do//lam nyam nga ba mthong ba'i tshe byang chub sems dpas sems can thams cad lta ba yo zhing mi drang ba dang bral te lam nyam nga ba yongs su spangs par gyur cig ces sems bskyed do/ /lam drang po mthong ba'i tshe byang chub sems dpas sems can thams cad g.yo med cing sgyu med de sems drang po dang ldan par gyur cig ces sems bskyed do//lam rdul chen po mthong ba'i tshe byang chub sems dpas sems can thams cad shin tu rdul med pa'i chos yang dag par thob ste 'dod chags par 'gyur ba'i chos la rnam par 'grel bar gyur cig ces sems bskyed do//rdul med pa'i lam mthong ba'i tshe byang chub sems dpas sems can thams cad snying rje chen po yongs su bsgoms pa dang ldan zhing sems 'jam par gyur cig ces sems bskyed do//g.yang sa mthong ba'i tshe byang chub sems dpas sems can thams cad bsgribs pa med par rtog pa khong du chud cing sdig pa'i chos thams cad bsal te dge ba'i chos la rab tu gzhol bar gyur cig ces sems bskyed do/ /'khor ba mthong ba'i tshe byang chub sems dpas sems can thams cad dus gsum du gtogs pa'i chos zab mo bstan pa dang mthun par gyur cig ces sems bskyed do//ka ba mthong ba'i tshe byang chub sems dpas sems can thams cad khro zhing khon du 'dzin pa dang bral te khengs pa dang 'khrug pa dang rnam par bral bar gyur cig ces sems bskyed do//nags tshal mthong ba'i tshe byang chub sems dpas sems can thams cad lha dang 'jig rten du bcas pas phyag bya ba'i gnas su gyur cig ces sems bskyed do/ /ri mthong ba'i tshe byang chub sems dpas sems can thams cad thob par dka' ba dang thibs po med par rab tu thob cing dge ba'i rtsa ba thams cad kyis mngon par 'phags par gyur cig ces sems bskyed do//shing tsher ma can mthong ba'i tshe byang chub sems dpas sems can thams cad 'dod chags dang zhe sdang dang gti mug med cing tsher ma dang bral bar gyur cig ces sems bskyed do//shing lo ma can mthong ba'i tshe byang chub sems dpas sems can thams cad bsam gtan dang rnam par thar pa dang ting nge 'dzin dang snyoms par 'jug pa dag gis rab tu g.yo bar gyur cig ces sems bskyed do//me tog mthong ba'i tshe byang chub sems dpas sems can thams cad la mngon par shes pa'i me tog rgyas pas me tog lta bur gyur cig ces sems bskyed do/ /me tog gi shing mthong ba'i tshe byang chub sems dpas sems can thams cad skyes bu chen po'i mtshan sum cu rtsa gnyis kyi me tog gis shin tu rgyas par gyur cig ces sems bskyed do//shing tog mthong ba'i tshe byang chub sems dpas sems can thams cad snying po byang chub la gzhol zhing sangs rgyas kyi chos la brtsams pa thams cad 'bras bu yod de 'bras bu dam pa rab tu thob par gyur cig ces sems bskyed do//chu klung mthong ba'i tshe byang chub sems dpas sems can thams cad sangs rgyas kyi ye shes nyams su myong ste/ chos kyi rgyun la mnyam par gzhag par gyur cig ces sems bskyed do/ /lu ma mthong ba'i tshe byang chub sems dpas sems can thams cad sangs rgyas kyi chos thams cad ro gcig pa'i phyir se gol gtogs pa tsam gyis khong du chud par gyur cig ces sems bskyed do//rdzing bu mthong ba'i tshe byang chub sems dpas sems can thams cad chos thams cad kyi tshig shin tu bstan pa la mkhas shing chos thams cad kyi rgyas pa'i tshig gi las dang ldan par gyur cig ces sems bskyed do//khron pa mthong ba'i tshe byang chub sems dpas sems can thams cad chos thams cad 'byor pa dang ldan zhing spobs pa mang bar gyur cig ces sems bskyed do//mtsho mthong ba'i tshe byang chub sems dpas sems can thams cad gong nas gong du dmigs pa la rab tu brtson zhing dge ba'i rtsa ba mi zad par gyur cig ces sems bskyed do/ /zam pa mthong ba'i tshe byang chub sems dpas sems can thams cad skye bo mang po thams cad yongs su sgrol ba la zam par red par gyur cig ces sems bskyed do//yur ba mthong ba'i tshe byang chub sems dpas sems can thams cad 'gro ba kun gyis sems dang bsam pa la mkhas shing bag la nyal ba dang / kun nas 'khor ba med par gyur cig ces sems bskyed do//ra ba mthong ba'i tshe byang chub sems dpas sems can thams cad gzugs dang / sgra dang / dri dang / ro dang reg la sred pa rab tu byang bar gyur cig ces sems bskyed do/ /mya ngan med pa'i nags tshal mthong ba'i tshe byang chub sems dpas sems can thams cad srad pa bzhin du mya ngan med pa rab tu thob par gyur cig ces sems bskyed do//bza' shing ra ba mthong ba'i tshe byang chub sems dpas sems can thams cad sangs rgyas kyi byang chub yongs su mi gtong ba la shin tu brtson par gyur cig ces sems bskyed do/ / sems can rgyan gyis brgyan pa mthong ba'i tshe byang chub sems dpas sems can thams cad skyes bu chen po'i mtshan sum cu rtsa gnyis kyis brgyan par gyur cig ces sems bskyed do/ /rgyan med pa'i sems can mthong ba'i tshe byang chub sems dpas sems can thams cad sbyangs pa'i pha rol tu phyin pa thob pas rgyan med par gyur cig ces sems bskyed do//dga' ba mang ba'i sems can mthong ba'i tshe byang chub sems dpas sems can thams cad chos la dga' zhing mos pa dang / spro bas dga' ba mang bar gyur cig ces sems bskyed do/ / mi dga' ba mang ba'i sems can mthong ba'i tshe byang chub sems dpas sems can thams cad 'dus byas kyi dngos po thams cad la mi dga' ba mang bar gyur cig ces sems bskyed do/ /sems can bde ba mthong ba'i tshe byang chub sems dpas sems can thams cad sangs rgyas kyi bde ba'i yo byad thams cad rab tu thob pas shin tu bde bar gyur cig ces sems bskyed do//sems can sdug bsngal ba mthong ba'i tshe byang chub sems dpas sems can thams cad ye shes kyi rtsa ba rab tu thob ste sdug bsngal zhi bar gyur cig ces sems bskyed do/ / nad med pa ma yin pa'i sems can mthong ba'i tshe byang chub sems dpas sems can thams cad shin tu mya ngan med pa'i chos can du gyur te tha dad pa med par khong du chud par gyur cig ces sems bskyed do/ /sems can sdug gu mthong ba'i tshe byang chub sems dpas sems can thams cad sangs rgyas dang byang chub sems dpa' thams cad la mos pa mang bar gyur cig ces sems bskyed do//mi sdug pa'i sems can mthong ba'i tshe byang chub sems dpas sems can thams cad mi dge ba'i bshes gnyen gyi bya ba la mos pa chung bar gyur cig ces sems bskyed do//drin gzo ba'i sems can mthong ba'i tshe byang chub sems dpas sems can thams cad sangs rgyas dang byang chub sems dpa' thams cad kyi mdzad pa shes par gyur cig ces sems bskyed do/ /drin gzo ba med pa'i sems can mthong ba'i tshe byang chub sems dpas sems can thams cad mi dge ba'i lta ba la drin du gzo ba med par gyur cig ces sems bskyed do//dge sbyong mthong ba'i tshe byang chub sems dpas sems can thams cad ma lus pa'i mthar thug par bya ba la brtson zhing zhi ba dang dul ba la gzhol bar gyur cig ces sems bskyed do//bram ze mthong ba'i tshe byang chub sems dpas sems can thams cad sangs pa'i dam par gyur te sdig pa spangs par gyur cig ces sems bskyed do/ /dka' thub pa mthong ba'i tshe byang chub sems dpas sems can thams cad ma lus pa'i mthar thug pa'i bya ba la brtson zhing dka' thub la shin tu gzhol bar gyur cig ces sems bskyed do//brtul zhugs la zhugs pa mthong ba'i tshe byang chub sems dpas sems can thams cad la sangs rgyas kyi byang chub yongs su mi gtong ba'i phyir brtul zhugs dam por gyur cig ces sems bskyed do//go gyon pa'i sems can mthong ba'i tshe byang chub sems dpas sems can thams cad rang byung ba'i chos yongs su btsal ba la go cha bzang po shin tu bgos par gyur cig ces sems bskyed do/ /go ma gyon pa'i sems can mthong ba'i tshe byang chub sems dpas sems can thams cad mi dge ba'i las byas pa thams cad go gyon pa med par gyur cig ces sems bskyed do//rgol ba'i sems can mthong ba'i tshe byang chub sems dpas sems can thams cad phas kyi rgol ba thams cad shin tu tshar gcod par gyur cig ces sems bskyed do//'tsho ba'i sems can mthong ba'i tshe byang chub sems dpas sems can thams cad spyod lam bcos pa med cing 'tsho ba dag par gyur cig ces sems bskyed do/ /rgyal po mthong ba'i tshe byang chub sems dpas sems can thams cad thogs pa med pa'i chos kyi 'khor lo bskor ba'i chos kyi rgyal por gyur cig ces sems bskyed do//rgyal po'i bu mthong ba'i tshe byang chub sems dpas sems can thams cad sangs rgyas kyi sras chos las skyes pa chos kyi sprul par gyur cig ces sems bskyed do/ /khyim bdag mthong ba'i tshe byang chub sems dpas sems can thams cad rnam par gdon mi za ba'i blo can du gyur te grong gi chos spangs par gyur cig ces sems bskyed do//blon po mthong ba'i tshe byang chub sems dpas sems can thams cad mi dge ba'i chos kyi spyod pa thams cad la bzang po yid la byed par gyur cig ces sems bskyed do//grong khyer mthong ba'i tshe byang chub sems dpas sems can thams cad gdul dka' ba'i sems dang ldan par gyur te mthu bo che'i lus 'dra bar gyur cig ces sems bskyed do/ /rgyal po'i gnas mthong ba'i tshe byang chub sems dpas sems can thams cad yon tan gyi rjes su 'brang bar gyur cig ces sems bskyed do//nags tshal gyi 'dab mthong ba'i tshe byang chub sems dpas sems can thams cad lha dang bcas pa'i 'jig rten gyis bsngags par 'os par gyur cig ces sems bskyed do/ / slong du 'gro ba'i tshe byang chub sems dpas sems can thams cad sgrib pa med pa'i tshul gyis/ chos kyi dbyings su chud par gyur cig ces sems bskyed do/ /sgor phyin pa'i tshe byang chub sems dpas sems can thams cad sangs rgyas kyi chos kyi sgor phyin par gyur cig ces sems bskyed do//nang du phyin pa'i tshe byang chub sems dpas sems can thams cad sangs rgyas kyi theg pa dus gsum mnyam pa nyid kyi nang du phyin par gyur cig ces sems bskyed do/ /mi sbyin no zhes ma byas pa'i tshe byang chub sems dpas sems can thams cad bsod nams kyi pha rol tu phyin pa thob cing phyir spang ba med par gyur cig ces sems bskyed do//ma sbyin no zhes bya ba'i tshe byang chub sems dpas sems can thams cad dmyal ba dang / byol song gi skye gnas dang / gshin rje'i 'jig rten las phyir spangs par gyur cig ces sems bskyed do/ / lhung bzed stong pa mthong ba'i tshe byang chub sems dpas sems can thams cad nyon mongs pa thams cad kyis stongs par gyur cig ces sems bskyed do/ /lhung bzed gang ba mthong ba'i tshe byang chub sems dpas sems can thams cad chos dkar po thams cad kyis yongs su rgyas par gyur cig ces sems bskyed do//rim gror byas pa'i tshe byang chub sems dpas sems can thams cad sangs rgyas kyi chos kyi spyod pa thams cad la rim gror byed par gyur cig ces sems bskyed do/ /rim gro ma byas pa'i tshe byang chub sems dpas sems can thams cad mi dge ba'i chos spyod pa thams cad la rag ma lus par gyur cig ces sems bskyed do//khrel yod pa'i sems can mthong ba'i tshe byang chub sems dpas sems can thams cad dbang po dben pa'i spyod pa dang ldan zhing khrel yod par gyur cig ces sems bskyed do//ngo tsha med pa'i sems can mthong ba'i tshe byang chub sems dpas sems can thams can byams pa la gnas shing ngo tsha med pa yongs su spangs par gyur cig ces sems bskyed do/ /kha zas bsod pa thob pa'i tshe byang chub sems dpas sems can thams cad zang zing med pa'i sems dang ldan zhing smon lam thams cad phun sum tshogs par gyur cig ces sems bskyed do//kha zas mi bsod pa thob pa'i tshe byang chub sems dpas sems can thams cad ting nge 'dzin nyams su bde ba thams cad thob par gyur cig ces sems bskyed do/ /kha zas snum bag thob pa'i tshe byang chub sems dpas sems can thams cad snying rje chen po yongs su bsgoms pa'i sems dang ldan zhing sems 'jam par gyur cig ces sems bskyed do//snum bag med pa'i zas thob pa'i tshe byang chub sems dpas sems can thams cad 'jig rten gyi sred pa dang bral te snum bag med pa'i sems su gyur cig ces sems bskyed do//kha zas za ba'i tshe byang chub sems dpas sems can thams cad chos la dga' ba dang rab tu dga' bas yongs su rgyas shing bsam gtan gyi zas za bar gyur cig ces sems bskyed do//ro myong ba'i tshe byang chub sems dpas sems can thams cad bdud rtsi'i ros ngoms par gyur cig ces sems bskyed do/ /zan zos pa'i tshe byang chub sems dpas sems can thams cad sangs rgyas kyi chos kyi pha rol tu phyin cing bya ba byed par gyur cig ces sems bskyed do/ / chos ston pa'i tshe byang chub sems dpas sems can thams cad sangs rgyas kyi chos thams cad la yang dag par gzhol zhing spobs pa mi zad pa dang ldan par gyur cig ces sems bskyed do/ /phyir 'byung ba'i tshe byang chub sems dpas sems can thams cad sangs rgyas kyi ye shes nyams su myong ste/khams gsum nas 'byung bar gyur cig ces sems bskyed do/ /chu 'bog pa'i tshe byang chub sems dpas sems can thams cad dus gsum mnyam pa nyid kyis thams cad mkhyen pa'i ye shes la 'bog par gyur cig ces sems bskyed do/ /khrus byed pa'i tshe byang chub sems dpas sems can thams cad 'od mtha' yas pa dang ldan zhing lus dang sems dri ma med par gyur cig ces sems bskyed do//dro ba la spyod pa'i tshe byang chub sems dpas sems can thams cad mu med par phyin te yongs su gdung ba bsil bar gyur cig ces sems bskyed do//bsil ba la spyod pa'i tshe byang chub sems dpas sems can thams cad shin tu bsil bar gyur te bla na med pa'i bsil ba'i dngos po thams cad khong du chud par gyur cig ces sems bskyed do/ /chos thob par byed pa'i tshe byang chub sems dpas sems can thams cad sangs rgyas kyi chos kyi gtam gyi rjes su 'gro zhing chos kyi dbyings dang 'dres par gyur cig ces sems bskyed do//sangs rgyas mthong ba'i tshe byang chub sems dpas sems can thams cad sangs rgyas thams cad dang 'grogs pa rab tu thob ste/ sgrib pa med pa'i mig dang ldan par gyur cig ces sems bskyed do//mig mi 'gebs par blta ba'i tshe byang chub sems dpas sems can thams cad rab tu mdzes pas kun tu bzang por gyur cig ces sems bskyed do/ /mchod rten mthong ba'i tshe byang chub sems dpas sems can thams cad 'gro ba kun gyis mchod par 'os shing mchod rten lta bur gyur cig ces sems bskyed do//lta ba'i tshe byang chub sems dpas sems can thams cad lha dang bcas pa'i 'jig rten gyis blta bar gyur cig ces sems bskyed do/ /spyi bos gtugs pa'i tshe byang chub sems sems dpas sems can thams cad lha dang bcas pa'i 'jig rten gyis spyi gtsug ltar mi snang bar gyur cig ces sems bskyed do//g.yas phyogs su skor ba byed pa'i tshe byang chub sems dpas sems can thams cad thams cad mkhyen pa nyid du don dang mthun par gyur cig ces sems bskyed do//lan gsum du bskor ba'i tshe byang chub sems dpas sems can thams cad sangs rgyas kyi byang chub tu mos pa'i rab dang ldan par gyur cig ces sems bskyed do/ /sangs rgyas kyi yon tan brjod pa'i tshe byang chub sems dpas sems can thams cad yon tan gyi pha rol tu phyin pas yon tan mi zad par gyur cig ces sems bskyed do//mtshan rnams brjod pa'i tshe byang chub sems dpas sems can thams cad mtshan nyid med pa'i chos rnams la gzhol zhing yan lag dam pa phun sum tshogs par gyur cig ces sems bskyed do/ / rkang pa 'khru ba'i tshe byang chub sems dpas sems can thams cad dri ma med pa'i mthar phyin cing rdzu 'phrul gyi rkang pas pha rol tu phyin par gyur cig ces sems bskyed do/ /lus myong ba'i tshe byang chub sems dpas sems can thams cad bsam pa la rnyog pa med cing lus kyi 'du byed shin tu bde bar gyur cig ces sems bskyed do//gnyid sad pa'i tshe byang chub sems dpas sems can thams cad phyogs bcu thams cad du mthu chen po thob par gyur te/ thams cad mkhyen pa'i ye shes la shin tu rnam par sangs rgyas pa'i sangs rgyas su gyur cig ces sems bskyed do zhes gsungs so//de dag la khams kyi nus pa dang sbyor la ci nus kyis bslab ste/ khams bde bzhin du nyes par bsam pa'i sems nyes par smra ba brjod/ nyes par bya ba'i las byed cing tha mal pa'i spyod pas dus 'da' bar byed pa yang spang bar bya'o//langs pa'i spyod pa bshad zin to/ /de la khams kyi tshod bzung ba gang zhe na/ bsam pa'i shes rab skyes pa'i rjes la khams mi bde ba'i mtshan ma cung zad ni nyin gcig gam mtshan gcig gam/ zhag gnyis kyi bar du bsam pa'i shes rab ji ltar skyes pa de tsam skabs skabs su dran par bya ba ma gtogs par bya ba gzhan yang mi bya/bsgom yang mi bsgom par khams brtas su gzhug go/ /de nas khams brtas te 'am/ khams mi bde ba ma byung yang bsam pa'i shes rab kyi rjes la mnyam par gzhag pas gnas su ma 'dod pa de dag gis 'di ltar mtshan mo ye mi bsgom par gnyid ci tsam log pa de tsam gyi khams brtas pa de tsam log cing mnal lo//nyi ma dang po snga dro thun gcig phyi dro thun gcig bsgoms te/ yul 'di gom pa tha mal pas mda' rgyang phyed du phyin pa tsam mo/ /de nas snga dro thun re phyi dro thun re bsnan cing bsgoms pas nyi ma lnga pa la thun bcu'o//de yang na tsha phran tshegs ma byung na de bzhin du bsnan par bya'i byung na de ma zhi'i bar du bsnan par mi bya'o/ /na tsha ma byung yang de phyin chad sems gnas pa ma thob kyi bar du nyin re la thun bcu bcu las mang bar mi bsgom mo//gal te khams tha ma zhig yin nam/ 'bring zhig yin yang sems gnas pa dka' bas zhag bcu tsam lon pas khams nus pa chung ba'am/ khams rab yin yang sems gnas pa bul bar rig nas zhag nyi shu tsam lon pas nus pa chung ba'am/na tsha phran tshegs byung na chos dang mthun pa'i kha zas sam/ btung ba'am bsku mnye la sogs pas zhi bar bya ste sran skyed cing mi bsgom mo/ /yang phal cher thun zhabs la zhan pa'am/ dgongs ka zhan na phyi de nyin par nas thun re re gnyis gnyis 'bri zhing bsgom mo/ yang khams drag tu song nas snga ma bzhin du bsgoms te/ de ltar byas na khams rab 'bring tha ma 'phral la shes te 'ong bas nyi ma re re la nus pa ji tsam bor ba de tsam re bsgom par bya'o/ /de dag ni sems dpa' ma thob pa'i bar gyis khams kyi tshod bzung ba yin no/ /de la bsgoms pas sems kyi skye ba'i rim pa gang zhe na/mdor bsdus na gsum ste/ shin tu myur bar bsams pa'i shes rab kyi rjes thogs kho nar skye ba dang / ha cang yun ring po ma lon par skye ba dang / yun ring du lon nas skye ba'o/ /de la shin tu myur ba la gnyis te/ kha cig ni bsams pa'i shes rab skye ba'i skabs der chos thams cad ji ltar rtogs pa dang /de la blo ji ltar gzhag na mi 'gal bar dran par byed pa mtshams sbyor ba'i shes pa cung zhig bskyed ma thag kho nar rab tu bsgrims nas ci la yang mi gnas par gzhag pas lhan cig gnas te/ de nyid du lus yod par mi tshor bar chab rom zhu ba lta bur song nas nam ma langs pa'i snod bstan pa'i nang na chu gtsang ma yod pa bzhin du ha cang mi gsal te/mi g.yo na gnas pa yin no/ /de lta bu byung nas des yun gom pa tha mal pas mda' rgyang gsum lhag tsam du phyin pa'i bar du bsgoms la/ de nas bde ba de 'phro bcad nas ldang ste/thun de la bcos kyang mi dgos so/ /de nas zhag mang rab tu yang lus dben pa dang sems ma bslad nus pa ma zad na ma bcos kyang gong ma bzhin du gnas nus so/ /tshogs mi ldan nam nus pa chung ba gzhan du song nas sngar bstan pa bzhin du ci rigs par bcos so//kha cig la gong ma bzhin du bzhag pas de ma thag tu lhan gyis gnas shing mi g.yo bar 'dug kyang lus kyang yod par mi tshor ba mi 'byung ste/ ming dang ming can du 'brel pa'i rtog pa med pa tsam mo/ /de lta bu byung na ni yun gom pa tha mal pas mda' rgyang gcig tu phyin tsam du bsgoms nas ldang ngo //thun de phyin chad kyang de las ring bar mi bsgom zhing / langs pa'i gnas skabs su bka' dang bstan bcos don dam pa ston pa kho na skabs skabs su blta ba dang dran par bya'o/ /de nas skyed byung nas lus yod par mi tshor ba'i nyams zhig byung na de'i skabs su yun gom pa tha mal pas mda' rgyang gsum du phyin pa tsam du bsgoms nas bde ba de 'phro bcad la ldang ngo //bcos pa'i dus dang / ji ltar bcos pa ni gong ma bzhin du bya ste/ de ni shin tu myur ba'i skye lugs gnyis so//de ha cang yun ring po ma yin par skye ba la gnyis te/ kha cig ni gong du bstan pa bzhin du sems gzhag pa ni skye ba'i rim pa bzhi 'byung ste/ shes pa 'phro zhing 'dug tu mi 'dod na yang bsgrims zhing gzhag kyang za zi dang / lhang lhong dang / rtsub pa dang / gyong ba dang / yud tsam yang sdod du mi 'dod pa'i nyams 'byung ste/de lta bu byung na yun gom pa tha mal pas mda' rgyang phyed du phyin pa tsam du bsgoms nas 'phro bcad de kha cig tu nyams de las mi skye ba dang / de nas zhag mang rab lon nas skyed 'byung ste/ bsgrims pa'i stobs kyis shes pa 'phro ba nyung ba za zi nyung bar gnas kyang rtsub po dang gyong pa dang 'dzin pa med pa'i nyams dang /de nas cung skyed byung ste/ sems phyi rol tu mi 'phro zhing za zi dang rtsub pa snyam byed pa yang zhi ste/ dbugs mi bde zhing shes pa gyong se 'dug la/ skabs skabs su thun stod thun smad la bag tsam 'jam par 'chor ba'i nyams zhig 'byung ngo //de nas zhag mang po mi thogs par skyed byung na bsgoms pa'i tshe thun stod dam/ bar ram smad dam/ mi bsgoms pa'i skabs zhig tu glo bur du dran pa'i thog la lhan lhan je bde je bde la dper na rlung 'tshub kyi nang na 'dug pa'i 'phro la khyim dron po'i nang du phyin pa snyam byed la 'jam zhing brtan par gnas te/nam mkha' ha cang mi dkar ba'i nang na 'dug pa bzhin du ha cang mi gsal la lus yod pa mi tshor ba yin no/ /de lta bur byung na yun gom pa tha mal pas mda' rgyang gsum lhag tsam du phyin par bsgoms nas bde ba de 'phro bcad la ldang ngo //bcos dgos pa'i dus dang / bcos pa'i thabs ni sngar smos pa bzhin du bya'o/ /yang kha cig la 'di ltar 'byung ste/ sngar smos pa bzhin du sems gzhag go/ /rtog pa rags pa mi 'byung zhing zi zi nyung yang gnas pa'i mtshan nyid med do//bsgrims pa'i stobs kyis mi 'phro ba tsam du 'dug pa'i nyams zhig byung na yun gom pa tha mal pas mda' rgyang phyed du phyin pa tsam zhig bsgoms la ldang ngo / /de ltar yun de tsam du bsgoms pas skyed byung na bsgrims pa'i stobs kyis thun stod thun smad la 'jam pa'am 'dzin pa'i zhad bag re 'ong /res 'ga' thun rangs pa la snga ma bzhin du 'dug pa 'byung ba dang / de skyed byung nas bsgrims pa'i stobs kyis thun zhabs su phyin gyi bar du mi 'phro la/ bags kyis 'jam par gnas kyang klod la de tsam yang med pa'i nyams skye ba dang /de nas skyed byung ste bsgrims na snyi mul gyis 'gro ba 'dug pas bsgrims mi dgos so/ /btang na btang dka' bas klod la bzhag pas chog ste/ shin tu gdang bas ni ma yin yang lus yod par mi tshor ba 'byung na yun gom pa tha mal pas mda' rgyang gsum lhag tsam du phyin pa'i bar du bsgoms nas bde ba de 'phro bcad la ldang ngo //bcos dgos pa'i dus dang ji ltar bcos pa ni sngar smos pa bzhin du bya'o/ /de gnyis ni ha cang yun ring po ma yin par gnas pa gnyis yin no/ /de la yun ring po lon nas skye ba'i gcig ste/ kha cig la sngar smos pa bzhin du sems bzhag pas sna tshogs su 'phro zhing 'dug tu mi 'dod de shes pa bsgribs nas slar mi bde ste/de bas klod na bde ba 'dra ba zhig 'byung ste/ de yun gom pa tha mal pas mda' rgyang phyed du phyin tsam zhig bsgoms nas ldang ngo / /de ni shin tu gnas par dka' ba yin pas mi bde yang bsgrims shing bzhag pas yun ring po lon nas skyed byung ste/thun phal cher bsgrims kyang mi bde ba med la 'phro ba nyung zhing tshor ba yang sla/ dgag pa yang sla ba'i nyams zhig 'byung ba dang / de goms pas yun ring du lon pa dang / bsgrims nas 'jam zhing mi 'phro la klod na tseg tseg tsam 'phro ba 'byung ba'i nyams dang / de nas ring por mi thogs par bsgom pa'i 'phro 'am/ ngal gso ba'am/ srod la mal du zhugs pa'i tshe'am/ dus la nges pa med do/ /ltem gyis gnas te bsgrims kyang mi nus/ klod par yang dka' bying zhad du byas nas lus yod par mi tshor zhing ha cang mi gdang ba'i nyams zhig 'byung ste/ des yun gom pa tha mal pas mda' rgyang gsum du phyin pa tsam du bsgoms nas bde ba de 'phro bcad la ldang ngo / /bcos dgos pa'i dus dang / ji ltar bcos pa ni sngar smos pa bzhin du bya ste/ skye ba'i rim pa bshad zin to/ /de la gnas pa'i tshad gang zhe na/ /de ni rgyu'i stobs kyis rab 'bring tha ma gsum du dbye ste/ de la rab ni shes pa bsgrims rung ma bsgrims rung rtog pa'i don las mi g.yo zhing dbugs bags kyis 'gul ba tsam yang tshor bar dka' ba dang /lus la rags pa dang phra ba'i 'du shes mi skye ba dang / shin tu sbyangs pa'i mtshan nyid mnyam par gzhag pa dang / mthun pa'i rlung zin pas khyim gyi nang na 'dug pa snyam byed cing 'jam pa dang yang ba shas che ba dang /bying ba dang / rgod pa dang / lung du ma bstan pa'i sems dang / lhag mthong chung ba dang / zhi gnas chung ba med kyang yun ring du goms par ma byas pas mun pa ha cang gnag pa ma yin pa'i tshul du 'dug pa dang / mtshan nyid de lta bus myur du gnas pa'am/ phyi na gnas kyang rung nus pa chung ba dang /bcos pa'i skabs ma gtogs pa/ dang po 'jug dka' ba'i sems des yun gom pa tha mal pas mda' rgyang gsum lhag tsam du phyin pa'i bar du shugs kyis gnas nus pa'o/ /de la 'bring ni dbugs la bltas na bags kyis 'gul ba tshor bar sla ba dang /lus la ji ltar gnas pa mi shes pa tsam dang / shin tu sbyangs pa'i mtshan nyid ting nge 'dzin dang mthun pa'i lus kyi rlung zin pas sgra dkar mi 'gul ba'i nang na 'dug pa snyam byed cing 'jam pa dang / yang ba 'bring dang / yun gom pa tha mal pas mda' rgyang gnyis su phyin pa tsam du gnas nus pa ste/gzhan ni snga ma bzhin du shes par bya'o/ /de la tha ma ni lus la ji ltar gnas pa bltas na shes te 'ong ba dang / 'jam pa dang yang ba cung zad yod pa dang / shin tu sbyangs pa'i mtshan nyid ting nge 'dzin dang mthun pa'i rlung zin pa ni sla/bag med pa na bsgom yang log tsam skyor ba'am/ bla gab tsam yod pa'i nang du phyin pa snyam byed pa dang / dbugs sna dang kha'i sgo nas 'byung ba mi tshor te khong nas phyed du btang yang shin tu ngal ba dang 'jam pa dang / phra rab tshor ba dang / yun gom pa tha mal pas mda' rgyang gcig tu phyin pa tsam du gnas nus pa'o//gzhan ni gong ma bzhin no/ /gnas pa'i tshad bstan zin to// //de la bsten pa'i thabs ci rigs par bya ba gang zhe na/ khams kyi tshod las dpags te/ sems gnas pa rab dang 'bring dang tha ma gsum gang byung yang mtshan nyid shes par bya/re zhig de tsam gyis chog shes par bya/ ha cang gzengs mtho bar mi bya/ khams kyi nus pa rang shugs dang sbyar la bsgom mo/ /de la mtshan nyid ma shes na sems gnas pa de 'chor ro/ /de yang gang zhe na/ gnas pa rab tshad cig byung yang kha cig snga na de 'dra ba nyams su myong bas skrag nas 'phro gcod pa dang /sngar mi gnas pa gnas par byed pa'i skabs su nyin mtshan gnyis ka bsgoms na khams 'khrugs te 'ong bas mtshan mo ma sgoms shig ces smras pas de sems la bzhag nas gal te mtshan mo gnas pa byung na bsgom rgyu ma yin snyam nas 'phro bcad pa dang /yang sngar bsgrims shing gtad pas skabs der bsgrims mi dgos bzhin lhag par bsgrims nas de nyams su ma blangs pa dang / 'bring dang tha ma byung na grogs po gzhan la rab tu byung ba/ thos pas rgyu'i bye brag la mi rtsi bar thams cad tshad gcig pas 'di med snyam nas lhag par rtsol ba byas pa dang /gzhan gsum ni snga ma bzhin no/ /de bas na gnas pa'i tshad sngar bstan pa bzhin du shes par bya'o/ /de la chog ma shes pa'i nyes pa ni kha cig sems gnas pa'i mtshan nyid shes kyang mong du thos pa'i nga rgyal gyis 'bring dang tha ma byung na lta ha cang ches/rab cig byung yang gzhan pas lhag pa cig bya snyam nas rtsol drags pas 'chor ba yin te/ de bas na rab byung na ha cang ches/ 'bring dang tha ma byung yang re zhig bsten par bya'o/ /de la ha cang gzengs mtho na nyes pa ci yod ce na/kha cig 'bring dang tha ma tsam byung na yang g.yeng nas tshod mi 'dzin par bsgom pa dang / rab byung na lta ha cang ches/ 'di tsam gzhan la med snyam nas mtshan rangs bsgom zhing gnyid spang ba dang / nang par chos gdon mi za bar bsgoms pa dang /de la nga na tsha mi 'ong zer nas tshod mi 'dzin par bsgoms te/ de ni khams cher 'khrugs te 'gro ba dang / dmigs pa 'chor ba yin no/ /de bas na sems gnas par shes nas skyon de dag spangs la sngar bsgoms pa las thun gyi grangs nyung bar bya ste/srod dang tho rangs la thun re/ nyin par thun re gnyis/ res thun gsum ste/ nyin mtshan gnyis la thun lnga las mang bar mi bsgom mo/ /de tsam mi nus na nyin gcig dang mtshan gcig la nus pa che chung gis nyin par thun gnyis/ mtshan mo thun gnyis te bzhi'am/ nyin par gnyis srod la gcig ste gsum bsgom mo/ /sngar ji tsam gsal ba de las rtsol ba mi bya bar bsgom mo/ /yun ni gom pa tha mal pas mda' rgyang gsum dang gnyis dang gcig tu ci rigs par nus pa che chung gis bsgoms te/ mtshan gcig dang / nyin gcig dang /zhag gcig dang / zhag gnyis dang / zhag gsum dang / bzhi dang / lnga dang / bcu dang / bco lnga dang / nyi shu'am/ mdor na la gor nus pa ci zad dang / khams ci 'khrugs byed pa ma yin te/ ji srid du rang shugs kyis lus ngal ba dang / sems dub pa dang /bsgom tsam na dang ba'am/ shugs 'byung ba'am/ mgo bags kyis lci ba'am/ yam yom byed pa'am/ lus 'dar ba'am/ nub mo gnyid srab pa'am/ zas mi zhim pa'am/ ngag gi 'khrul pa mang du 'byung ba'am/ sems sang sang por 'dug pa la sogs pa khams mi bde ba'i mtshan ma cung zad ma byung gi bar du bsgom mo//de nas byung ste ngal sos te/ lus bsku mnye bya/ chos dang mthun pa'i zas skom gyis lus kyi nus pa brtas su gzhug go/ /khams sor ma chud kyi bar du nyin mtshan gnyis la nam bsgom snying 'dod pa'i dus su thun mi ring ba de lta bu tsam bsgom mo//nus pa brtas nas srod tho rangs thun ring ba re nyin par snga dro gcig phyi ma red gcig dang thun bzhi nyin mtshan phrug gcig la bsgoms te/ bsod nams kyi tshogs dang lus kyi bcos thabs dang / snying rje sngon du 'gro ba dang / smon lam la sogs pa gong du smos pa bzhin bya'o/ /de la gsal ba'i skyed dbyung ba gang zhe na/ sngar bstan pa'i thabs kyis bstan par byas nas gong ma bzhin du bsgoms pa des/ dang por dmigs la 'bring dang tha ma las ma zin pa cig yin na bar chad ma byung yang gsal ba'i skyed dbyung dgos so//de bas na 'di ltar zla ba gcig kyang de tsam ha cang mi drag par bsgom mo/ /chos dang mi 'gal ba'i bya ba phran tshegs kyang bya/ des nyin par skabs med na yang srod dang tho rangs la sngon du 'gro ba dang / smon lam dang bcas pa yun mi ring ba thun re bsgom mo/ /de nas dang po'i slob lugs bzhin du zhi gnas dang /lhag mthong gi tshogs mtha' dag la ci nus kyis brten zhing yo byad sbyin bdag la gsol gdab byas la/ gnas dben zhing nyams dga' ba la sogs pa gnas kyi yon tan ci mang der grogs tshul khrims dag cing lta ba mthun pa 'ga' tsam dang lhan cig tu dam bcas la gnas so//de skad du/ 'phags pa ting nge 'dzin gyi rgyal po las/ nor bu rin chen 'dra bar tshul khrims bsrungs/ /rjes su mthun pa'i grogs la rtag par brten/ /zhes gsungs so/ /yang de nyid las/ ting 'dzin rgyal po stong pa 'di bsgom pa//tshul khrims dag pa'i mgo la 'di 'dug ste/ /chos rnams rang bzhin rtag tu mnyam gzhag na/ /byis pa mi rigs brtson pas mi shes so/ /zhes gsungs so/ /de re zhig chos dang mthun pa'i bya ba yang spangs pa yin na mi mthun pa lta ci smos/ de bas na khyim kun 'bar ba'i nang na 'dug pas chu bsil ba 'dod pa lta bu'i sems kyis thams cad btang la de kho na nyid la mos par bya'o/ /de skad du/ mdo de nyid las/ mgo dang gos la me 'bar ba lta bu'i sems kyis pha dang / ma dang / bu dang / bu mo dang / nye du dang / snag gi gnyen mtshams dang /chung ma la sogs pa me bzhin du spangs la rgyal srid kyi bde ba yang 'chil ma'i thal ba bzhin du spangs nas rab tu byung la dgon par gnas par bya'o/ /de ci'i phyir zhe na/ gzhon nu de lta bu des ni bla na med pa yang dag par rdzogs pa'i byang chub kyang rnyed par dka' ba ma yin na ting nge 'dzin 'di lta bu ci smos zhes gsungs so//de la rtag tu bya ba'i sman kha zas dang btung ba chos dang mi 'gal zhing / na ba'i gsos sman dang / dros tshad kyi gos dang stan la sogs pas khams brtas par bya'o/ /zhag bcu'am/zla ba phyed dam/ nam bde ba'i tshad du phyin gyi bar du sos dal zhing khams gso ste/ mtshan mo mi bsgom/ nyin par thun thung ngu re re tsam las mi bsgom bar nus pa brtas su gzhug go/ /dang por rab tshad du zin pa yin yang glo bur gyi nad la sogs pa bar chad kyis nyen na yang dmigs pa 'bring dang zhes bya ba nas thun re bsgom mo zhes bya ba'i bar ma gtogs pa gong ma bzhin du byas la nus pa brtas su gzhug go//de nas nyin re la thun thung ngu re bsgom pa de yang bzhag la/ bsam pa'i shes rab kyis nyin par snga dro gcig /phyi dro gcig /mtshan mo srod la gcig dang thun gsum du bsam ste/ yun nges pa skyed kyi bar du'o/ /'di snyam du sems kyi chos nyid rtags nas/ chos thams cad kyi chos nyid rtogs pa yin par theg pa chen po'i bka' sde snod dang bstan bcos las gsungs pas bdag gis rang gi sems la so sor brtag par bya'o//snyam du bsam mo/ /yang 'di snyam du gang rgyu dang rkyen la rag las pa ni nges par mi rtag ste/ dper na mar me'i rtse mo lta bu'o/ /bdag gi sems 'di yang 'dod pa la 'dun pa dang / gnod sems dang / mi dga' ba dang / rmugs pa dang /gnyid dang / rgod pa dang / 'gyod pa dang / the tshom dang / mi rtsol ba dang / rtsol ba la sogs pas dbang byas shing rag las nas skye bas na mi rtag ste/ de bas na bcom ldan 'das kyis kyang / kye ma 'du byed rnams mi rtag /ces gsungs so/ /gang skyes nas 'gag pa de ni skad cig ma'i cha shas yod de/dper na tshor ba sdug bsngal lta bu'o/ /bdag gi sems da ltar byung ba 'di yang skyes la 'gags pa yin pas cha shas dang bcas pa'o/ /gang cha shas dang bcas pa de ni nges par gcig tu mi 'grub ste/ dper na rtsom par byed pa dbugs kyi rdul phra rab gcig la bskor ba'i rdul phra rab bcu la ltos pas cha yis che na gcig tu mi 'grub pa lta bu'o//bdag gi sems skyes la ma 'gags pa 'di las skyes pa'i cha dang / gnas pa'i cha dang / 'gag pa'i cha yod pas cha shas med pa gcig mi 'grub bo/ /yang dag par gcig ma grub pas du ma ci'i du ma yin/de bas na gcig dang du ma dang bral bas da ltar byung ba'i sems don dam par rang bzhin thams cad med de/ nam mkha' dang mtshungs pas de la brten par mi bya'o/ /gnas par mi bya'o/ /de skad du/ 'phags pa klu sgrub kyis/ ji ltar skad cig mtha' yod ltar//thog ma dbus mtha' rnam par brtag /skad cig gsum gyi rang bzhin phyir/ /'jig rten skad cig la mi gnas/ /zhes gsungs so/ /'o na ma 'ongs pa yod dam snyam pa la/ de yang rang gi ngo bo ma grub pa dang / 'bras bu'i rtags don dam par ma grub pas don dam par rang bzhin thams cad med do//'o na 'das pa'i sems don dam par yod dam snyam pa la/ 'das pa'i rgyu don dam par med na ci zhig 'das pa'am/ ma 'ongs pa zhes bya/ de lta ma yin na mo gsham gyi bu la yang shi ba yod par thal bar 'gyur ro//de lta bas na da ltar byung ba'i sems yang dag par mi dmigs na de la ltos pa'i ma 'ongs pa dang 'das pa ga la dmigs/ de skad du/ 'phags pa dkon mchog brtsegs pa las kyang / 'od srungs sems ni yongs su btsal na mi rnyed do/ /gang mi rnyed pa de ni mi dmigs so//gang mi dmigs pa de 'das pa ma yin ma 'ongs pa yang ma yin da ltar byung ba yang ma yin no zhes zer ro/ /'phags pa ma skyes dgra'i mod las kyang / de nas sprul pa'i skyes bu des bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal nas/bcom ldan 'das la 'di skad ces gsol to/ /bcom ldan 'das bdag gis pha ma'i srog bcad na/ bcom ldan 'das kyis bdag la skabs mdzad par gsol/ bdag gis da ci bgyi/ de nas bcom ldan 'das kyis sprul pa'i skyes bu de la legs so zhes bya ba byin nas legs so legs so//kye skyes bu khyod ni bden par smra ba yang dag par smra ba/ ji ltar byas pa de bzhin du smra'o/ /gang khyod ni de bzhin gshegs pa'i spyan sngar bden pa'i tshig smra ba ste/ mi slu ba yin mod kyi/skyes bu khyod sems kyi rgyu la rtogs shig /khyod kyi 'das pas sam/ ma 'ongs pas sam/ da ltar gyis sam/ sems gang gis pha ma'i srog bcad/ 'das pa'i sems zad pa bral ba 'gags pa gzhan du gyur pa ste/ yul na'ang mi gnas pas de'i gdags su mi nus so//ma 'ongs pa ni ma phyin pa ste/ de ni ma skyes pa'o/ /ma byung ba/ yang dag par ma byung ba/ ma gyur pa/ rnam par ma gyur pa/ mtshan ma med pa/ ma byung ba ste/ de yang gdags su mi nus so/ /da ltar gyi sems ni gnas pa med pa ste/ skyes nas zhig cing nges par gyur pa/ phung por ma gyur pa/ btsags par ma gyur pa'o/ /de la 'gro ba dang 'ong bar gdags pa yang med do/ /kye skyes bu sems ni nang gi lus la yang mi 'jug /phyi rol gyi yul la yang mi rgyu/ gnyi ga med par yang mi dmigs so/ /kye skyes bu sems ni sngon po ma yin/ser po ma yin/ dmar po ma yin/ dkar po ma yin/ ja gong ma yin/ shel gyi kha dog ma yin no/ /kye skyes bu sems ni gzugs med/ bstan du med/ gzung du med/ thogs pa med/ sgyu ma lta bu dpe med pa ste/ de yang gdags su mi nus so//kye skyes bu sems ni 'dod mi chags/ zhe mi sdang / gti mi mug go/ /kye skyes bu sems ni mngon par 'du mi byed/ byed pa med/ tshor ba med/ sems pa med/ myong bar byed pa med do/ /kye skyes bu sems ni rang bzhin gyis dang ba yin te/ de ni kun nas nyon mongs par mi 'gyur/ rnam par byang bar mi 'gyur ro/ /kye skyes bu sems ni tshe 'di la yang med/ tshe rabs gzhan na yang med/ gnyis ka med par yang med de/ de na yang med/ gzhan na yang med pa/ nam mkha' dang mtshungs pa mi mnyam pa dang mnyam pa mi 'dra ba/rnam par rig par mi 'gyur ba ste/ de la mkhas pas mngon par chags par mi bya'o/ /bdag gir mi bya'o/ /brten par mi bya'o/ /gnas par mi bya'o/ /bdag tu bsam par mi bya'o/ /bdag gir bsam par mi bya'o/ /kye skyes bu dag chos thams cad ni rang bzhin gyis nus pa med pa'o//kye skyes bu dag nga ni de ltar mos pa la kun nas nyon mongs pa'am/ rnam par byang ba'am/ ngan song du 'gro ba'am/ mtho ris su 'gro bar mi smra'o/ /de ci'i phyir zhe na/ gang sems kyi chos nyid ni kun nas nyon mongs par mi 'gyur ro//rnam par byang bar mi 'gyur/ gang du yang 'gro bar mi 'gyur/ 'ong bar mi 'gyur/ 'dug par mi 'gyur ro/ /zhes gsungs so/ /yang mdo de nyid las/ rgyal pos gsol pa/ 'jam dpal bdag gi sgrib pa thams cad byang lags so/ / de ci'i slad du zhe na/ gang sems kyi rang bzhin ye nas dang ba de ni 'dod chags sam/ zhe sdang ngam/ gti mug gis kun nas nyon mongs par bgyi mi nus so/ /smras pa/ rgyal po chen po 'di lta ste/ dper na/ nam mkha' la rdul phran nam/ rdul lam/ du ba'am/ mun pa'am/stug po 'am/ sprin dag snang mod kyi nam mkha' ni de dag gis kun nas nyon mongs par byas nas med do/ /rgyal po chen po de bzhin du bdag dang bdag gir bya ba'i lta ba'i bag la nyal ba dang / 'dod chags dang / zhe sdang dang / gti mug 'byung mod kyi sems kyi chos nyid kun nas nyon mongs par mi byed do//rgyal po chen po khyod kyis de ltar 'gyod par mi bya'o/ /rgyal po chen po sems ni thog ma'i mtha' nas kyang ma 'phos/ rgyal po chen po sems ni tha ma'i mthar yang mi 'pho'o/ /rgyal po chen po sems ni da ltar yang mi gnas so/ de la mkhas pa dag ni chos thams cad ma 'phos pa mi 'pho ba mi gnas par rtogs te/ de ltar shes nas lta ba la mngon par chags par yang mi byed do/ /rgyal po chen po mngon par ma chags na dag pa'o zhes gsungs so/ /de ltar rigs pa dang lung gis nyin mtshan kha cig tu nges pa cher skyes pa dang /mtshan mo mi bsgom la nyin par rtsol ba drag la yun thung bar bsgom mo/ /'di ltar lus kyi bcos pa tsam byas nas sems ji lta ba bzhin du chos thams cad kyang spros pa thams cad dang bral bar bsams la bags kyis 'dug na de la yang mi gnas par shin tu bsgrims la dang po gnas par byed pa'i yul tsam du bsgoms te/nyi ma dang por snga dro thun gnyis/ phyi dro gnyis/ gnyis pa la snga dro gsum/ phyi dro gsum/ gsum pa la snga dro bzhi/ phyi ma red bzhi/ bzhi pa la snga dro lnga/ phyi dro lnga/ de nas phar skyed ma thon gyi bar du thun bcu bcu las mi bsgom mo//de ltar bsgoms pas skyed dang por byung ba'i sems dang / gnyis pa dang / gsum pa dang / bzhi pa'o/ /de'i skabs su nyin par gnyis/ mtshan mo srod la gcig ste gsum du bsgom mo/ /de la dang po ni rgod pa rgyun chad pas shin tu zhi ste/sngar dbugs la bltas na bags kyis 'gul ba de yang med pa dang / rtsol ba klod kyang sngar gyi stobs kyis yun gom pa tha mal pas mda' rgyang lnga tsam du bying ba med pa dang / sngar rgod pa la shin tu skyon che bar brtags pa'i stobs kyis 'dzin che zhing zhi gnas kyi shas che bas mtshan mun nag bzhin du 'dug pa dang /lus ji ltar 'dug pa ma shes kyang / sngar bsgrims pa'i stobs kyis ting nge 'dzin las ldang bar brtsams na/ rtsub cing bsdoms pa snyam byed cing bshig par dka' ba lta bur 'dug pa'o/ /gnyis pa ni dang po'i skabs der 'phro ba med kyang bags kyis mi gsal zhing zhugs la bying bar dogs pa yang res 'ga' 'byung bas des na langs pa'i skabs su yang lhag mthong gi shas bskyed do snyam pa'i sems 'byung ba dang /mnyam par gzhag pa'i gnas skabs na yang bag gsal ba'i stobs bskyed pa des skabs skabs su sprin bar gyi nyi ma bzhin du gsal sa le bskyed de/de'i stobs kyis mtshan mo bsgoms kyang nam langs sam snyam nas mig phye nas bltas pa 'byung ngo / /ldang bar bsams tsam na lus bsdams pa bzhin du 'dug ste/ 'on kyang rtsub pa dang /zhi nas 'jam pa dang / snum pa snyam byed pa ste/ khyad par kha cig ni snga ma bzhin no/ /gsum pa ni gsal ba de rtag par 'byung ba ste/ 'on kyang dper na mar me 'chi kha ma rlung med kyang rang shugs kyis g.yo ba bzhin g.yo zhing dogs pa skye ste/ khyad par kha cig snga ma bzhin no//bzhi pa ni sngar ha cang gsal bas skabs skabs su g.yo ba de la skyon du bltas pas dmigs pa'i khyad par dper na zha nye dkar po'am/ dngul lcags kyi snod byang ma'i 'og tu chu gtsang mas bkang nas mi g.yo bar 'dug pa bzhin du shes pa dang / shes bya bye brag med par shin tu gdang la mi g.yo zhing yangs la gzung rgyu'am/ spang rgyu yang dag par rjes su ma mthong la/ de ltar rtogs pa'i sems de yang 'di tsam na skye ba'am/ 'di ci la dmigs mi shes te/ ji ltar yang rtogs mi nus pas tha mi dad de ro gcig go/ / de ci'i stobs kyis sems drang la brtan zhing nges pa the tshom mi skye la yangs pa'o/ /lus med pa'i stobs kyis reg bya 'jam la yang ste/ mi mtho mi dma' zhing yangs par 'dug kyang g.yang za ba med cing begs bur man chad la bltas kyang kha gang ltar bltas na sgom pa yang mi shes te/de bas na ldang bar bsam na yang ldang bar dka' la stobs bskyed nas langs na lus glo bur du byung ba snyam byed pa'o/ /khyad par kha cig ni snga ma bzhin no/ /bzhi pa de ni re zhig byang chub sems dpa' las dang po pa rjes su dpag pa'i sgo nas sems mnyam par gzhag pa zhes bya'o//de skad du/ 'phags pa chos kun tu 'gro ba las/ lha'i bu bzang sems kyis gsol pa/ bcom ldan 'das ji ltar na byang chub sems dpa' mnyam par gzhag pa zhes bgyi/ bcom ldan 'das kyis bka' stsal pa/ lha'i bu nam byang chub sems dpa' yid kyi smon pa thams cad dang bral zhing chos gang la yang gzung bar ram/spang bar yang dag par rjes su ma mthong la/ /de gang dang gang yang dag par rjes su ma mthong pa de dang de stong pa dang yang dag pa ma yin par mthong ba'o/ /de ltar na byang chub sems dpa' mnyam par gzhag pa zhes bya'o//zhes gsungs so/ /yul 'khor skyong gis zhus pa las kyang / don dam de ni tha dad ma yin te/ /kun tu ro gcig mtshan nyid sangs rgyas su/ /de la gang rnams tha dad kun rtog pa/ /de dag nga rgyal gnas pas rmongs pa yin/ /zhes gsungs so/ /'phags pa las kyi sgrib pa rnam par dag pa las kyang /dge slong chos thams cad ni dang po mi dmigs pa'i phyir spangs pa'o/ /dge slong chos thams cad ni ci las kyang dben pa'i phyir ci yang ma yin pa'o/ /dge slong chos thams cad ni nam mkha'i lus dang chang pa stong pa dang 'dra ba'i phyir gzung du med pa'o//zhes gsungs so/ /'phags pa ting nge 'dzin gyi rgyal po las kyang / 'du shes rab tu rgyu ba med/ /lta ba log pa kun zad nas/ /blo yang shin tu gtan la phab/ /brtan pa nam mkha' 'dra bar spyod/ /ces gsungs so/ /tshogs bstan khams gso sems la brtag /rtsol drag thun thung je mang bsgom/ /de yi gsal skyed rim pa bzhi/ /bzhi pa'i lung ni bzhi yis bstan/ /zhes bya ba ni bsdu ba'i tshigs su bcad pa'o/ /gsal ba'i skyed dbyung ba'i thabs bstan zin to// //de la thun ring ba'i skyed dbyung ba gang zhe na/gsal ba'i skyed thon zhing ma nyams pa la nyams pa la thun bsring ba'i skyed gdon par bya ste/ de ci'i phyir zhe na/ sems cung zad gnas pa dang / lus cung zad bde ba tsam gyis yun ring por bsgom mo/ /bsams kyang bsgoms pas nyin mtshan 'da' ba'i skabs med par lus gzer ba dang /sems rmugs pa dang / gnyid kyis non par 'gyur zhing mi gsal ba dang / snying rlung ldang zhing 'jug pa dang / rlung khrag gnyis ka skye zhing sdug bsngal myong bar 'gyur te/ dper na rlung cung zad 'gro nus pa tsam gyi gyen thur gzugs po la nyin rang 'gro bar bsams kyang 'gro ba'i sa der ma phyin par lus la mi bde ba dang /sems la gnod pa 'byung ba bzhin no/ /de bas na gsal ba'i skyed thon pa'i skabs de kho nar khams kyi mi bde ba med kyang nyin mtshan gnyis tsam bsgom pa yang gzhag la/ /sos dal bar 'dug go//de nas re zhig mtshan mo nyal ba dang 'phres pa dang / gnyid kyis nus pa brtas su gzhug cing / nyin 'ba' zhig la thun ring bar bsgom ba la bslab ste/ nyi ma dang po la thun gsum bsgoms pas/ nyin par la bzhir bcad pa'i cha gcig 'das pa'i tshod tsam zhig bsgom mo//nyi ma gnyis pa la thun gsum bsgoms pas gsum du bcad pa'i cha gcig 'das pa dang / nyi ma gsum pa la thun gsum bsgoms pas nyin par gyi phyed lhag 'das pa tsam zhig bsgom mo/ /nyi ma bzhi pa la thun gsum bsgoms pas nyin gyis sum gnyis lhag bzlas pa tsam zhig bsgom mo//nyi ma lnga pa la thun gsum bsgoms pas nyin par bzhi char bcad pa'i cha gsum lhag bzlas pa tsam zhig bsgom mo/ /nyi ma drug pa la thun gsum bsgoms pas nyin rangs pa la zas za ba dang / spyod lam bcom pa ma gtogs pa bsgoms pas dus 'da' bar bya'o//nyi ma bdun pa la de dag ma gtogs pa zas kyi gong du thun gcig /zas zos nas thun gcig ste gnyis kyis nyi ma rangs par 'da' bar bya'o/ /de la spyod lam ni stan shin tu 'bol zhing 'jam pa gnyis sam/ gsum pha tshad tshu tshad du bting la gang bde bar spo zhing bsgom ste/ de'i steng du dang po skyil mo krung bcas la bsgom mo/ /de nas cung zhig lon pa dang / /sems rmugs pa dang / gnyid kyis non pa dang / lus la mi bde ba byung na rkang pa ya gcig brkyang ba'am/ gnyis ka brkyang ba'am/ glo g.yas pas snyes pa'am/ g.yon snyes pas sam/ yud tsam zhig gan rkyal du 'dug pa 'am/ mdor na spyod lam phog re bsgyur bas lus la gnod pa dang / sems la gnod pa spong bar 'gyur ro/ /de ltar byas kyang rmugs pa dang / gnyid shas che na dal bus langs la 'chag sa dkyus ring zhing zheng ha cang mi che bar byas pa'i sa phyogs su phar 'gro ba dang / tshur 'ong ba lan gnyis gsum bzhi tsam bcags la yang 'dug par bya ste/ de kun la dmigs pa mi gtang ngo / /de yang gang ltar bsgyur kyang lus la 'jam pa la sogs pa shin tu sbyangs pa'i shas che chung yod kyang kun la med pa mi srid na/de ltar bsgom pa yin gyi med na ngal gso dgos so/ sems rgod na rnam pa la mi spyad par sems la spyad na des zhi bar 'gyur te/ gzugs 'gags na gzugs brnyan 'gags pa bzhin no//de bas na de la ha cang mi 'jigs par bya/ bag glod la 'di snyam du byang chub sems dpa' rnams kyis lo bzhi khrir yang spyod lam ma bsgyur/ gos ma spos par mnyam par gzhag pa gsungs na bdag gis ni nyin mtshan re re yang mnyam par 'jog mi nus pa 'khor ba thog ma med pa nas lus grangs med pa gcig 'das kyang don med par 'gyur la da ltar yang smos pa chung zhing gnyug thung ba 'dis ma 'ongs pa na yang 'di 'dra bar 'gyur bas na bdag gi don kyang mi 'grub na/gzhan gyi don lta ga la 'grub/ de bas na bdag gis nyin rangs mnyam par gzhag ste/ spyod lam 'dis gnas par bya'o snyam du bsam mo/ /mdor na yun ring bar 'dzin pa chung du 'gro la thun gzhug la ting nge 'dzin las ldang dgos pa dang / gtang rgyu cig yod na de ltar bsgom mo/ /gtang rgyu med par sangs nas 'dug na bsgoms kyang phan med la gnod pa skye bas ngal gso'o//de ltar nyin par thun gnyis kyis nyi ma 'da' bar nus nas mtshan mo la bslab par bya ste/ nyin par btang snyoms su bzhag la phyi dro rlung gi dus su gnyid bag re log nas mtshan mo stan bde ba gnyis gsum yang bting la/yang yang bying ste 'gro na 'chag sa bde bar bcas byas la/ gos dang l+h+wam dro bar byas la dal bus 'gro ba dang / ldog pa dran pa dang / shes bzhin gyis zin par bya zhing bsgom mo/ /ngal gso dgos pa'i bsam pas yang snga ma bzhin no/ /bye brag ni rgyu skar la tshod dpag cing zhag brgyad kyi mtshan mo 'da' nus par bya'o//de ltar bslabs pas nyin mtshan gang yang rung ba cig btang snyoms su bzhag la gcig rangs pa bsgoms pas 'da' bar nus shing lus bde ba dang sems dga' ba dang bcas par 'dug na de tsam gyis re zhig thun ring la lobs pa yin no//thun bsring ba yi tshad dang ni/ /nyin mtshan res mos bslab pa dang / /go rims spyod lam bsam pa dang / /tshad du phyin pas bsdus pa yin/ /zhes bya ba ni bsdu ba'i tshigs su bcad pa'o// //de nas bsgom pa gcig pu mi bya bar sngon du 'gro ba dang /ldang ba'i sems su bcas pa nyin par gnyis/ mtshan mo gnyis las mi mang bar thabs dang shes rab zung du 'brel par bya ste/ sngar bstan pa bzhin no/ /de la log par rtog pa'i gzhung nyid gang zhe na/ gnyis te/ thabs la log par rtog pa dang / shes rab la log par rtog pa'o/ /de la thabs la log par rtog pa ni 'di na kha cig phan yon shes pa tsam gyis byang chub tu sems bskyed nas smon lam 'debs par byed kyang bdag gi don tsam sgrub pa nyan thos kyi dbang du byas nas/ /slob dpon thogs med kyis/gnas la dad pa gang zhe na/ 'di ltar 'di na la las de bzhin gshegs pas gsungs pa'i chos 'dul ba la dad pa dang sems dang ba yin te/ de ni gnas la dad par gyur pa zhes bya'o/ /de la gnas zhes bya ba ni de bzhin gshegs pas gsungs pa'i chos 'dul ba la bya ste/'jig rten dang 'jig rten las 'das pa'i dkar po'i chos thams cad skye ba'i gnas yin pa'i phyir ro/ /des sngon du drang ba'i dbang gis de la dad pa gang yin pa de ni gnas la dad par gyur pa yin te/ nyon mongs pa'i dri ma dang rnyog pa thams cad bsal bar gyur pa'i phyir ro zhes gsungs pa la brten nas 'dul ba kho nas byang chub chen po thob po zhes smra zhing lta la/bdag nyid kyang theg pa chen po'i chos thos par mi dga'/ gal te thos kyang legs par mi sems/ sems kyang sgom par mi byed cing / gzhan dag la zhe sdang ste/ theg pa chen po'i mdo sde'i tshul du zhugs pa rnams la yang zhe sdang ste/ byang chub sems dpa' las dang po pa'i bslab pa rnams la slob pa la/ 'di skad ces/ byang chub sems dpa'i bslab pa kho na gdul ba yin/ de kho nas chog go//gzhan na bslabs na 'dul ba la bcings te/ 'gro'o zhes smra zhing / lta ba de dag gis byang chub chen po thob par mi 'gyur/ zag pa zad par mi 'gyur te/ de skad du/ nges pa dang ma nges pa 'jug pa'i phyag rgya'i mdo las/ de la phyugs kyi shing rta lta bus 'gro ba'i byang chub sems dpa' gang zhe na/dper na skyes bu la la zhig sangs rgyas kyi zhing lnga'i rdul phra rab kyi rdul snyed kyi 'jig rten gyi khams 'da' bar 'dod nas de'i phyugs kyi shing rta la zhon te lam du zhugs nas yun ring zhig lon nas dpag tshad brgyar phyin pa las de rlung gi dkyil 'khor chen pos bzlog nas dpag tshad brgyad cur ded de phyir phul na skyes bu de phyugs kyi shing rtas 'jig rten gyi khams de dag 'da' 'am/bskal pa nas brjod du med pa'i yang brjod du med pa'i bskal pa yang 'jig rten gyi khams gcig kyang 'da' bar nus sam/ gsol pa/ bcom ldan 'das de ni gnas ma lags te/go skabs ma mchis so/ bcom ldan 'das kyis bka' stsal pa/ de bzhin du gang la la zhig gis byang chub tu sems bskyed la/ theg pa chen po mi 'dzin mi klog /kha ton du mi byed/ tshul bzhin yid la mi byed par nyan thos kyi theg pa pa rnams la brten cing /de dag dang lhan cig tu bstan par byed/ nyan thos kyi theg pa klog cing kha ton byed/ dpyod cing kun chub par byed la gzhan yang klog tu 'jug pa nas kun chub pa'i bar du byed na/ de ni des shes rab kyi mig gang yin/ de bla na med pa'i shes rab kyi lam las slar drangs nas phyir ldog go//byang chub sems dpa' de ni byang chub kyi sems bsgoms pa las byung ba'i shes rab kyi dbang po dang shes rab kyi mig gang yin pa de yang rtul por gyur cing nyams par byed de/ 'di ni phyugs kyi shing rta lta bus 'gro ba'i byang chub sems dpa'o//zhes gsungs so/ /de bas na legs par gsungs pa'i chos 'dul ba ni khas len pa'i khyad par gyi bslab pa rnam pa gsum las lhag pa'i tshul khrims kyis bslab pa yin la/ sdom pa gsum las sdom pa'i tshul khrims yin pa'i phyir shin tu gus pas bsgrub dgos la/de kho nas chog pa yang ma yin te/ de skad du/ 'phags pa dkon mchog sprin las/ rigs kyi bu ji ltar na/ byang chub sems dpa' rnams byang chub sems dpa'i bslab pa'i sdom pas bsdoms pa yin zhe na/ 'di la byang chub sems dpa' 'di ltar spyod do//so sor thar pa'i sdom pa tsam gyis bdag bla na med pa yang dag par rdzogs pa'i byang chub mngon par rdzogs par 'tshang rgya bar mi nus kyi/ de bzhin gshegs pas gang 'di mdo sde dang 'di dag las byang chub sems dpa'i spyod pa dang / byang chub sems dpa'i bslab pa'i gnas bcas pa de dag la bdag gis bslab par bya'o zhes gsungs so//de la shes rab la log par rtog pa la yang gnyis te/ spyi dang / bye brag go/ /de la spyi ni 'di na kha cig stong pa nyid kyi rlung chus dkar phyogs kyi me gsod par byed de/'di skad du/ mi dge ba bcu spang ba dang / dge ba bcu'i bsgrub pa ni dngos po la mngon par zhen pa nyan thos rnams kyi dbang du mdzad nas gsungs pa yin te/ theg pa chen po zab mo'i don chos thams cad rang bzhin med par shes na ci byas kyang nyes par mi 'gyur te/rab tu byung ba yang skra bregs pa tsam la zer ba ma yin te/ sems phyal le ba cig dgos so/ /de bas rtogs na srog gcod pa la sogs pa yang sgrib par mi 'gyur la/ ma rtogs na gnyen po yang sgrib par 'gyur te/ 'phags pa las kyi sgrib pa rnam par dag pa las/'dod chags sgrib pa nas shes rab sgrib pa'i bar du gsungs so zhes zer ba de ni bdag nyid mi mthun pa zil gyis ma non par gnyen po slob par byed pas ngan 'gro 'ba' zhig gi las sogs pa la/ de'i rjes su slob pa yang mi dge ba sogs 'jug go/ /de skad du/slob dpon klu sgrub kyis/ dbu ma'i rtsa ba las/ stong pa nyid la lta nyes na/ /shes rab chung ldan phung 'gyur te/ /ji ltar sbrul la bzung nyes pa dang / /gsang sngags log par bsgrubs pa bzhin/ /zhes gsungs pa dang / yang rigs pa drug cu pa las/rnam par dben don mi shes par/ /thos pa tsam la 'jug byed cing / /gang dag bsod nams mi byed pa/ /skyes bu tha shal de dag brlag /ces gsungs so/ /'on te nga shes rab che la bsod nams kyang byed pas nyon mongs pa la mi 'dzem zhes zer na/ de yang mi rigs te/ 'phags pa sa bcu pa las kyang / sa gnyis pa'i byang chub sems dpa' de ni tshul khrims rnam par dag cing ltung ba phra mo la shes bzhin du gnas pa la bzhag ste/ sa la gnas pa bas nga shes rab che zhes bya ba ni ha cang gzu lum ches so/ /de bas na kun rdzob tu gnyen po ma skyes par nyon mongs pa la btang snyoms su bzhag kyang 'phel bar 'gyur na dang du blangs pa lta smos kyang ci dgos/de'i phyir nyon mongs pa rang dgar spyod pa bslab pa dang bral ba de ni byang chub sems dpa' rab tu byung bas ma yin te/ de skad du/ 'phags pa 'jam dpal rnam par rol pa las/ 'jam dpal gyis smras pa/ bu mo rab tu byung ba ni tshul khrims la rag las pa yin te/ tshul khrims 'chal ba la ni rab tu byung ba ci yang med do/ /zhes gsungs so/ /yang mdo sde de nyid las gsungs pa/ gang bdag nyid kyang bslab pa dang /tshul khrims yang dag par blangs la/ tshul khrims 'chal ba'i sems can rnams kyang / tshul khrims kyi sdom pa dang brtul zhugs la yang dag par sbyor bar byed pa de ni byang chub sems dpa' rab tu byung ba yin no zhes gsungs so/ /de bas na stong pa nyid go yang nyon mongs pas pham par byas pa de ni byang chub sems dpa' ma yin te/mdo de nyid las/ bu mos smras pa/ 'jam dpal 'di lta ste/ dper na dgra bcom pa de ni dpa' bo zhes mi bgyi'o/ /'jam dpal de bzhin du gang nyon mongs pa rnams kyis bcom pa de yang byang chub sems dpa' zhes mi bgyi'o//zhes gsungs so/ /shes rab che zhing stong pa nyid rtogs nas bsgoms pa'i phan yon ni/ zla ba'i sgron ma'i mdo las/ de ni bde gshegs rnams kyis bslab pa gzhan mi 'dor/ /dpa' bo de ni bud med dbang du gzhar mi 'gro//zhes bya ba la sogs pa gsungs so/ /'phags pa chos kun 'gro ba las kyang / dper na mun pa dang lhan cig gnas pa de ni mar me ma yin no/ /de bzhin du nyon mongs pa dang lhan cig gnas pa de ni byang chub sems dpa'i shes rab ma lags so//zhes gsungs so/ /'phags pa gtsug na rin po che las kyang / stong pa nyid kyi rnal 'byor sbyin pa nas/ shes rab kyi bar du mi 'bral bar bya'o zhes gsungs so/ /bslab pa kun las btus pa las kyang / shes rab kyi pha rol tu phyin pa bsgoms nas kyang nyon mongs pa'i sgra dang /thabs la mkhas par bya'i/ rang gi khyim na dpa' ba bzhin du mi bya'o zhes gsungs so/ /de bas na byang chub sems dpa' bdag nyid shes rab che yang nyon mongs pas pham par byas la dad pa chung bas bslab pa la g.yel zhes smra bar bya ba ni rigs kyi gzhan lam log pa la gzud cing bstan pa la rma gdod pa ni mi rigs so//tshul khrims kho nas chog par 'dzin/ /shes rab kyis ni phyogs gcig rtogs/ /de dag sun dbyung mdor bstan pa/ /bsdu ba'i tshigs su bcad pa yin//de la bye brag la log par rtog pa la gnyis te/ lta ba la log par rtog pa dang / bsgom pa la log par rtog pa'o/ /de la lta ba la log par rtog pa ni 'di na kha cig bden pa gnyis zhes bya ba dngos po la ma grub ste/ 'di ltar gang ma skyes pa de gnyis su med de/dper na nam mkha' lta bu'o/ /bden pa rnam pa gnyis kyang gzod ma nas ma skyes zhing rnam par dag pas gnyis su med do zhes zer te/ de la smras pa/ gal te don dam par gnyis med par bsgrub na ni grub pa la sgrub po/ /'on te spyir bsgrub na ni gtan tshigs su ma grub ste/mngon sum dang 'gal lo/ /ma skyes pa la sdug bsngal med pas khyod la mtshon gyis btab na bzod dam/ zhes smra bar bya'o/ /kha cig na re don dam pa'i bden pa med de/ kun rdzob kyi bden pa gcig pu kho na yin no zhes zer te/de la smras pa/ gal te byis pa ma rig pas ldongs pa'i bsam pa dang sbyar nas smra ba'am/ 'on te dngos po'i gnas lugs te/ de dang mthun par smra ba'am/ mkhas pa'i bsam pas kyang smra/ de la phyogs dang po ltar na gnyis ma grub ste/'di ltar don dam pa'i bden pa ni de ston par byed pa'i chos gang zag des ma thos ma bsams ma bsgoms pas/ blo la mi 'grub bo/ /de ma grub pas gzugs la sogs pa yang dag pa'o/ /bden pa'o snyam pas 'ba' zhig skye bas 'di brdzun pa'o zhe'am/ sgrib par byed pa'i phyir kun rdzob ces bya ba'am/ rigs pas gnod pa'i phyir kun rdzob ces bya ba 'grub mi srid do/ /'on te phyogs phyi ma ltar yin no zhe na/ de la smras pa/ gang zhig gis sgrib par byed pa'am/ gang zhig la sgrib pa yod par de ma shes pa dang / de gzhag pa'am/ rigs pas gnod par ma grub na ni kun rdzob ces ji skad du bya/ gal te rigs pas gnod par grub pas 'di kun rdzob kyi bden par grub bo/ /zhes zer na/ de nyid kyi don dam pa'i bden pa sngar grub pas 'di kun rdzob kyi bden pa yin par shes te/ des ni gnyi ga khas blangs pa yin no/ /kha cig na re 'phags pa klu sgrub kyi dgongs pa don dam par ma grub pa ste/ ha cang yang ches kun rdzob tu yang ming las don med par bzhed do zhes zer te/ de la smras pa/ ming la brtsad pa med do zhes gsungs so/ /de ni mngon sum dang 'gal te/mo gsham gyi bu 'di na yod do zhes smras nas/ de la mtshon btab pa dang / khyod la mtshon btab pa gnyis gnod pa med pas 'dra bar thal bar 'gyur ro/ /slob dpon ni de ltar mi bzhed do/ /rigs pa drug cu pa las kyang / /rgyu dang 'bras la mkhas rnams la//nyes pa thams cad 'byung ba'i gnas/ /med pa rnam par bzlog zin gyis/ /zhes gsungs la/ de dgag par bsgrub pa'i kho bo'i nyon mongs pa yang khyod kyis bkag pas khyod kyis grogs byas te btang ngo zhes gsungs so/ /'phags pa chos kun 'gro ba las kyang /byang chub sems dpa' rtsom pa med kyis/ byang chub sems dpa' blo gros rnam par gnon pa la smras pa/ chos thams cad ni ming tsam dang brda tsam zhes bya ba la sogs pa gang yin pa de yang kun rdzob tu ming gi rnam grangs sam/ yang na gcig gis gcig bshad par gsung gi /don dam par ston pa ni ma yin no/ /kha cig ni bden pa gnyis dngos po la grub ste/ de yang kun rdzob kyi bden pa ni rigs pas gnod pa yin la/ don dam pa'i bden pa ni rigs pas grub pa/ rtag pa gcig chos thams cad kyi chos nyid du 'dug pa/spros pa thams cad las log pa'i ngo bo'o/ /de skad du/ bden pa gnyis rnam par 'byed pa las/ rigs pa'i rjes 'brang ngo bo'i phyir/ /skyob pa rnams kyi chos sku yin/ /zhes gsungs pa dang / 'phags pa sa bcu pa las/ de bzhin gshegs pa rnams byung yang rung / ma byung yang rung / chos kyi dbyings 'di ni gnas pa nyid de/ 'di ltar chos thams cad stong pa nyid dang / chos thams cad dmigs su med pa'o zhes gsungs so/ /'phags pa dkon mchog sprin las/ rigs kyi bu gal te don dam pa med du zin na/tshangs par spyod pa don med par 'gyur ro zhes gsungs so zer te/ de la smras pa/ rigs pa'i rjes 'brang ngo bo'i phyir/ /zhes bya ba la sogs pa gsungs pa de ni/ de nyid las ci'i phyir rigs pas gnas pa'i ngo bo nyid yin snyam pa la ngo bo nyid de nyid rigs pa dang ldan pa'i phyir zhes gsungs te/de yang chos thams cad don dam par rigs pas mthong bar 'gal te/ ma mthong ba tsam la brtags na de skad gsungs kyi/ de ni rigs pa grub pa don dam par gzhag rgyu med de/ de skad du/ 'phags pa bden pa gnyis bstan pa las/ lha'i bu don dam pa'i bden pa de ni thams cad mkhyen pa'i ye shes kyi yul las kyang 'das pa'o/ /zhes gsungs so/ /gzhan lta phar zhog des kyang yul du bya ba'i gnas med ces bya ba'i tha tshig go/ /ye nas gnas pa'i rtag ces bya ba yang de bzhin gshegs pa 'jig rten du ma byung tsam na gzugs la sogs pa don dam par yod la/byung bas med pa ni ma yin gyis dngos po 'ga' zhig skyes tsam nas don dam par ma grub pa'i tshul du skye ba na de skad gsungs so/ /de lta bu ma yin na chos nyid ye nas rtag pa de gang gi chos yin te/snga na gnas pa dang chos can gsar du byung ba gnyis grub pa dang bde ba gcig tu mi 'dod na/ tshangs par spyod pa don med par 'gyur/ zhes gsungs pa yang byis pa rnams kyi gang zag gis bdag dang chos kyi bdag yod par brtags nas bden par 'dzin pa la/ gang zag dang chos la bdag ma grub pa tsam la dgongs nas bdag yod par mi bden te/rigs pa dang 'gal lo/ /yod pa bden na byis pa kun gyis mthong bas ma 'khrul ba'i phyir mya ngan las 'das pas tshangs pa thob par bya ba'i phyir/ da 'bad pa don med do/ /zhes gsungs pa yin te/rigs pa'i yul du grub pa med na don med do zhes gsungs pa ni ma yin no/ /chos can kun gyi chos nyid du 'dug pa zhes bya ba yang chos can gcig spros pa dang bral ba de bzhin du gzhan yang spros pa dang bral bas de skad gsungs pa yin gyi/ chos can kun la khyab pa cig yod na/mu stegs kyis bdag thams cad la khyab par khas len pa dang 'dra ste/ de la tha dad phyogs dang 'dre bas na/ /khyab rnam gcig pur ga la 'gyur/ /zhes bya ba sun dbyung ngo / /spros pa thams cad las log pa'i ngo bo zhes bya ba yang de nyid spros pa yin no/ / de lta bus brjod na/ 'phags pa dri ma med par grags pas ci'i phyir mi bstan/ de bas na don dam par rig pas grub pa'i don dam par gcig yod mi srid do/ /'o na ji lta zhe na/ de'i phyir 'di skad du/ dngos po ji ltar gnas pa bzhin du rtogs pa'i bcom ldan 'das kyis/ 'phags pa yab dang sras mjal ba'i mdo las/ de skad du/ de bzhin gshegs pas kun rdzob bam don dam pa gnyis su thugs su chud de/ shes par bya ba yang kun rdzob dang don dam pa 'dir zad do zhes gsungs la/ de bzhin gshegs pa'i dgongs pa ji lta ba bzhin rtogs par lung bstan pa/'phags pa klu sgrub kyis 'di skad ces/ dbu ma'i rtsa ba'i shes rab las/ /sangs rgyas rnams kyis chos ston pa/ /don dam gnyis la yang dag bsten/ /'jig rten kun rdzob bden pa las/ /dam pa'i don gyi bden pa'o/ /zhes gsungs pas/ gtan la 'bebs pa'i dus su ni dngos po yang grub la/ mkhas pas kyang de ltar rtogs pas gnyis su tha snyad 'dogs so/ /gtan la 'bebs pa'i dus na grub pa yang ma yin/ ma grub pa yang ma yin/ ji ltar yang khas blang du med do/ /zhes bstan to/ /kha cig na re chos dang chos can bdag nyid gcig pas chos can dbang po'i don mngon sum du mthong ba bzhin du chos nyid kyang mngon sum du mthong ste/de skad du/ bar ti ka las/ don gyi rang gi ngo bo gcig /bdag nyid mngon sum yin pa la/ /tshad ma rnams kyi brtag bya gang / / ma mthong cha gzhan ci zhig yod/ /ces gsungs so/ /zhes zer ro/ /de la smras pa/ 'o na byis pa so so'i skye bo kun gyis kyang bden pa mthong bar thal bar 'gyur ro/ /'on te nges pa'i shes pa ma skyes pas ma mthong ba dang 'dra'o/ /de skad du/ dbu ma'i rgyan las kyang /dngos po rnams kyi sgro btags pa'i rnam par dben pa ni stong pa nyid ces bya na/ stong pa nyid ni sgro btags pa'i rnam pas bsgribs pa'i ngo bo nyid yin pa'i phyir/ dngos po'i rang bzhin bzung bzhin du yang byis pa rnams kyis nges par mi 'gyur te/ de'i phyir bzung mod kyi tha snyad gdags su rung ba'i phyir ma bzung ba dang 'dra ba nyid pas 'di ni dmigs pa'i rigs byar gyur pa ma yin no//de lta bas na mngon sum la sogs pas gnod pas yin no/ /zhes bya ba 'di ston to/ /zhes gsungs so zhes zer na/ de nyid kyi phyir mig gi rnam shes kyis chos nyid mthong zhes tha snyad du ma 'dogs shig /de skad du/ bden pa gnyis rnam par 'byed pa las/ tha snyad ni nges pa sngon du 'gro ba can yin pa'i phyir ro/ /zhes gsungs so/ /'o na slob dpon chos kyi grags pa'i dgongs pa dang 'gal lo zhe na/de ni mi 'gal te/ slob dpon gyi ni mi rtag pa la dgongs nas gsungs pa yin te/ de ni dngos po yin pas 'gal ba med de/ stong pa nyid ni dngos po ma yin pas dbang po'i mngon sum du mthong mi srid do/ /bden pa gnyis rnam par 'byed pa las/ ji ltar snang ba 'di kho na//kun rdzob gzhan ni cig shos yin/ /zhes gsungs so/ /yang na tha mi dad pa la dgongs pa yin pas de ni 'dir yang 'gal ba med do/ /de la kha cig tha mi dad ces bya ba dang / gcig ces bya ba ni don gzhan ma yin te/ de ltar chos nyid mngon sum du mthong bas thams cad kyi de kho na mngon sum du mthong bar 'gyur ba dang /chos kyi dbyings bzhin du chos can yang bden par 'gyur ba dang / kun nas nyon mongs pa can ma yin par 'gyur ba dang / chos can bzhin du chos kyi dbyings de yang 'dus byas dang / kun nas nyon mongs pa can du 'gyur ro//de thams cad du gcig khas ma blangs pas nyes pa med do zhes smras nas/ 'o na ni 'du byed kyi bdag med pa tsam nyid don dam pa'i mtshan nyid du mi 'gyur la/ 'du byed kyi mtshan mas bcings pa rnams kyang / rnal 'byor pas zil gyis non par mi 'gyur te/ de tha dad cing chos kyi dbyings gzhan du rtog pa'i phyir ro//de lta bas na dung dang dkar po bzhin du gcig dang tha dad par brjod du med pas de nyid dang gzhan du brjod du med pa'i 'brel pa yin no/ /zhes zer na/ de la smras pa/ de nyid dang gzhan du brjod pa ni skyon 'ong la/ de gnyis su ma brjod pas grub pa gcig la 'brel pa ni skyon med pa ma yin te/gcig dang tha dad pa'i skyon de ni chos dngos por 'gyur ba la 'thad do/ /chos nyid spros pa dang bral ba chos can dang gcig par skyon yod pa yang ma yin/ med pa yang ma yin/ tha dad par skyon yod pa yang ma yin med pa yang ma yin/brjod du med pa bya ba chos can dang 'brel par gzhag rgyu cig kyang yang dag par grub nas 'brel pa gsum par khas blang rgyu yang med de 'brel pa ni de'i bdag nyid dang / de las byung ba'i 'brel pa las gzhan med par/ sngon gyi slob dpon chos kyi grags pa la sogs pa rnams kyis bstan to//'o na slob dpon ka ma la shI las/ dbu ma snang ba las/ de nyid dang gzhan du brjod du med par bstan to snyam pa la bden mod kyi de ni gang zag dang chos de nyid yang dag pa'i shes pas gang zag dang chos su ma grub pa tsam la gang zag dang chos de nyid chos nyid du gdags pas de tsam la bdag nyid gcig pa'i 'brel pa zhes btags pa yin la/de nyid dang gzhan du brjod du med pas cir yang ma grub par bstan pa yin no/ /de lta bas na chos can de nyid spros pa dang bral ba tsam chos nyid yin la/ de yang sgro btags pas bkag ste/byis pa so so'i skye bo rnams kyis mngon sum du mi mthong ngo / /de skad du/ dbu ma'i rgyan las/ ma yin thog med rgyud lci bar/ /dngos por sgro btags dbang byas pas/ /de phyir srog chags thams cad kyi/ /mngon sum rtogs par mi 'gyur ro//zhes gsungs so/ /rnal 'byor gyi dbang phyug chen pos sa dang po thob yan chad nas/ de bzhin gshegs pa rnams kyis ni gsal bar rtogs so/ /so so'i skye bo rnams kyi gtan tshigs kyi sgo nas sgro btags pa gcod pa tsam du bas kyi mngon sum du byed pa ni ma yin no//de skad du/ de nyid las/ de la sgro btags gcod byed pa/ /shes par byed pa'i gtan tshigs kyis/ /rjes su dpag rnams dpog par byed/ /rnal 'byor dbang rnams mngon sum gsal/ /zhes gsungs so/ /bden pa gnyis la log par rtog /chos nyid mthong la log rtog dang / /chos dang chos can 'brel pa la/ /log par rtog pa sun dbyung ba/ /zhes bya ba ni bsdu ba'i tshigs su bcad pa'o/ /kha cig na re so so'i skye bos sgro btags pas gcod pa na/ gtan tshigs kyi sgo nas shes te 'di skad du/gang gcig dang du ma dang bral ba de ni don dam par rang bzhin med de/ bdag dang gzhan gyis smras pa 'di dag kyang gcig dang du ma dang bral ba smras pa tsam gyis 'grub bya rtogs par 'gyur ro zhes zer na/ de la smras pa/ dbang po rnon po sbyor ba la goms pa rnams kyis rtogs pa ni rigs na chos mthun pa nyid can gyi sbyor ba la sogs pa bya dgos pa'i rigs cig yin na ni/sbyor ba de kun brtags pa'i rang bzhin nam gzhan gyi dbang gi rang bzhin gang grub ma nges pa'i phyir/ thun mong gi ma nges pa'i gtan tshigs lta bur snang bar 'gyur ro//'on te rjes su 'gro ba spyir btang nas dper na gzugs brnyan lta bu'o/ /zhes smras pas skyon med do zhes zer na/ de la smras pa/ mthun pa'i dpe de la 'brel ba gtan la phab bam ma phab/ ma phab na ni dpe smros pa la don med do/ /'on te phab po zhes zer na/de la smras pa/ dgag pa'i sgrar sbyar nas gtan tshigs don dam dang / bsgrub bya don dam par rang bzhin med pa gnyis 'brel par gtan la phab bam/ 'on te ma yin par dgag pa'i sgra sbyar nas/ kun rdzob kyi bden pa cig la 'brel pa gtan la phab/ de phyogs dang po ltar na/smras pa/ 'brel pa de mngon sum gyis grub pa'am/ rjes su dpag pas grub/ de la mngon sum gyis grub bo zhes zer na/ 'on te chos nyid mngon sum du mthong bas/ rgol ba dang phyir rgol ba gnyis ka 'phags pa yin par thal bar 'gyur ro/ / des na grub par bya ba'i chos kyi rtags kyi rjes su 'brang ba don med par 'gyur ro/ /de bas na so so'i skye bos chos nyid mngon sum du mthong mi srid pas/ mi srid pa'i don smras na bdag nyid nyams par yang 'gyur ro/ /de'i phyir dpe de ni ma grub pa'i dpe ltar snang ba yin la/ bsgrub par bya ba'i chos can la yod par khas blangs pas de ni gtan tshigs kyi rang gi ngo bo ma grub pas ma grub pa'i gtan tshigs ltar snang bar 'gyur ro/ /'brel pa de la ni mngon sum gyis gnod de/ rtag tu gzugs brnyan du snang ba las gzugs brnyan du yang mi mthong mi srid do//rjes su dpag pas kyang bsal te/ gang khas blangs kyang ma mthong ba de ni tha snyad gdags su mi rung ste/ dper na/ bum pas dben pa'i sa phyogs lta bu'o/ /rtsod pa'i gzhir gyur pa'i don dam pa'i bden pa 'di yang mngon sum du ma mthong bas khyab par byed pa mi dmigs pa'o//gzugs brnyan snang ba'i phyir zhes bya ba yang 'gal bas khyab pa'i dmigs pa yin no/ /grags pas kyang gsal te/ brda shes pa grub pa'i mthas blo ma bsgyur ba cig la/ me long gi nang la ci 'dug ces dris na/ bzhin kho na 'dra ba cig 'dug ces zer ba las/ci yang ma mthong zhes zer mi srid do/ /rang gi tshig dang 'gal ba yang yin te/ don dam pa mthong zhes bya ba gzugs brnyan la zer ram/ lung gis gsal ba yang yin te/ 'phags pa mi'am ci'i rgyal po ljon pas zhus pa las/ bcom ldan 'das kyis bka' stsal pa/dper na rang bzhin stong pa yi/ /me long dkyil 'khor yongs dag la/ /gzugs brnyan snang ba de bzhin du/ /ljon pa chos rnams shes par gyis/ /zhes gsungs te/ gzugs brnyan mi snang zhes gsungs so/ /de bas na mngon sum gyis grub mi srid do//'o na rjes su dpag pa grub po zer na/ de yang mi rigs te de lta bu'i dpe mi srid do/ /gal te srid na rtags mngon sum gyis ma grub pas 'brel pa mngon sum du mi 'grub ste/ des na de yang rjes su dpag pa cig gis grub dgos pas dpe thug pa med pa dang /rtags thug pa med pa'i skyon 'ong ngo / /'on te de'i skyon mi 'ong ste/ dbu ma'i rgyan las/ mu stegs rgyal dpog pa na re/ gdong nyid der dmigs pa las/ gzugs brnyan zhes tha snyad 'dogs zer ba dang / bye brag tu smra ba na re/ gzugs gzhan zhig der byung ngo zhes zer ba dang /mdo sde pa na re shes pa kho na de ltar snang zhes zer ba dang / rjes su dpag pa'i sgo nas dpe rang bzhin med par bsgrubs pas de bas na dpe thug pa med par yang mi 'gyur la/ thams cad du mthun pa'i dpe la don dam pa gtan la 'bebs so zhes zer na/de la smras pa/ der yang gang dag sngar sgrub pa'i mthas blo ma 'gyur tsam na/ de ltar mi 'dzin yang phyis grub pa'i mthas blo bslad nas don med pa'i bzhin cig yin no zhes zer ba la/ don byed nus pa'i bzhin ma yin no zhes dgag pa tsam byed kyi gzugs brnyan de don dam par rang bzhin med par sgrub pa ni ma yin te/des na rtags dang dpe thug pa med pa'i skyon med pa yin no/ /'di ltar dang po de don byed nus pa'i rang bzhin ma yin par dgag par dgongs nas 'di skad gsungs te/ sbyor ba ni rnam par shes pa gang zhig gang dang /mtshan nyid mi mthun par snang ba de ni de'i dmigs pa ma yin te/ dper na sgra shes pa gzugs dang mtshan nyid mi mthun par snang ba bzhin no/ /gzugs brnyan gyis shes pa yang gdong la sogs pa yul ji lta ba bzhin gnas pa dang mtshan nyid mi mthun par snang ba yin pas khyab pa byed pas 'gal ba dmigs pa yin no zhes bya ba la sogs pa gsungs te/de ni don byed pa'i gzugs ma yin zhes bkag la/ der gzugs brnyan don dam par med par ma gsungs so/ /gnyis pa las gzugs can don byed nus pa lhan cig gnas pa dgag pa'i dbang du mdzad nas gsungs pa/'di skad du sbyor ba ni dngos po lus can gang dag yin pa de dag ni yul phan tshun spangs te gnas pa'i rang bzhin dag yin te/ dper na bum pa la sogs pa lta bu yin no/ /rtsod pa'i gzhir gyur pa'i dngos po 'di dag kyang lus can yin pas/rang bzhin gyi gtan tshigs yin no zhes gsungs te/ der yang don byed pa'i gzugs lhan cig gnas pa bkag pa las gzugs brnyan don dam pa'i rang bzhin med par ni ma bsgrubs so/ /phyogs gsum pa gsal ba'i phyir gsungs pa 'di skad du/pha rol po'i gzugs brnyan la sogs pa 'di dag rnam par shes pa'i ngo bor rdzas su yod par khas blangs mod kyi/ gzugs brnyan la sogs pa de dag ni dpe nyid du 'dod pa ma yin no/ /'o na ci zhe na/ gzugs brnyan la sogs par shes pa la/snang ba can gyi ngo bo gang yin pa'o/ /de yang brdzun pa'i phyir dpe grub pa kho na yin no/ /zhes gsungs te/ der yang phyi rol du kun brtags pa'i don byed nus pa'i gzugs bkag pa las/ gzugs brnyan nyid kyang rang bzhin med par ni ma bsgrubs te/ mngon sum dang 'gal ba'i phyir ro//gal te zlog na gnod pa can gyi tshad ma gcig gis don dam par rang bzhin med par grub bo zhes zer na/ de ltar na brda shes pa'i gang zag tshad ma'i bstan bcos la thos pa kun gyis gzugs brnyan la bzhin yang dag par 'dzin par thal bar 'gyur ro//de lta bas na mthun pa'i dpe la gtan tshigs don dam par dang / bsgrubs pa don dam pa 'brel par mngon sum dang rjes su dpag pas ma grub ste/ gang du smos pa bzhin no/ /gal te ma yin par dgag pa'i skra sbyar bar byas nas kun rdzob kyi bden pa gzugs brnyan de nyid la 'brel pa mngon sum du grub pas de dper byed do zhe na/de la smras pa/ 'o na ni 'brel pa grub pa la don med de/ bsgrub par bya ba'i chos can la ni gtan tshigs don dam par gcig dang du ma dang bral ba dang / bsgrub bya don dam par rang bzhin med par gnyis 'brel par go dgos la/de dang mi mthun pa kun rdzob kyi snang ba gcig la 'brel par grub pas don dam pa'i 'brel pa ni sngar gtan la ma phab la kun rdzob ni snga nas grub pas grub pa la sgrub pa yin no/ /yang don dam pa rang bzhin med pa'i mi mthun pa'i phyogs kun rdzob kyi bden pa la gtan tshigs zhugs pas 'gal ba'i gtan tshigs ltar snang bar 'gyur ro//gal te kun rdzob kyi bden pa gcig la 'brel pa sgrub bo zhes brgya la zer na/ de lta na yang 'brel pa grub pa don med pa'i nyes pa dang / gtan tshigs dang thun mong ma yin pa'i nges pa'am/'gal ba'i gtan tshigs ltar snang ba'i nyes pa yod de/ bsgrub par bya ba'i chos la ni gtan tshigs don dam par gcig dang du ma dang bral ba zhugs nas 'dug la mthun pa'i dpe la ni kun rdzob kyi/ gcig dang du ma dang bral ba zhugs pa'i phyir ro//gal te ji ltar gyur kyang rung ste/ dbu ma'i rgyan las/ bdag dang gzhan smras dngos 'di dag /yang dag tu na gcig pa dang / /du ma'i rang bzhin bral ba'i phyir/ /rang bzhin med de gzugs brnyan bzhin/ /zhes gsungs pas/ yang dag pa zhes bya ba ni don dam pa la dgos pa yin te/ de bas na med pa dgag pa yin no/ /zhes zer na/ de la smras pa/ gtan tshigs la don dam pa'i sgra ma zhugs pa yang yod de/ de kho na nyid la 'jug pa las/ phyi rol nang na gnas 'di kun/ /yang dag tu na rang bzhin med//gcig dang du ma'i rang bzhin nyid/ /bral ba'i phyir na gzugs brnyan bzhin/ /gang zhig gcig dang du ma dang bral ba de ni don dam par na rang bzhin med de dper na gzugs brnyan bzhin no/ /phyi rol nang na gnas pa'i dngos po 'di dag thams cad kyang gcig dang du ma'i rang bzhin dang bral bas na rang bzhin med do zhes gsungs pa dang /yang dag pa'i sgra yod kyang de ni ma yin pa dgag pa'i sgrar sbyar te/ de skad du/ dbu ma'i rgyan de nyid kyi TIkA las/ sbyor ba de ni 'di lta bu yin te/ gang dag gcig dang du ma'i rang bzhin ma yin pa de dag ni don dam par rang bzhin med de dper na gzugs brnyan bzhin no//bdag dang gzhan gyis smras pa'i dngos po rnams kyang gcig dang du ma'i rang bzhin ma yin pas zhes bya ba ni khyab par byed pa mi dmigs pa'o/ /gcig pa nyid dang du ma nyid kyi rang bzhin la khyab pa'i phyir ro//zhes gsungs so/ /'di ltar gang zhig mngon sum dang rjes su dpag pas 'brel pa ma grub pa de ni gtan la phab ces tha snyad gdags su med de/ dper na me dang du ba'i 'brel pa gtan la phab pa'i dus su don dam pa'i bden pa'i gtan la phab ces tha snyad gdags su mi 'dod pa lta bu'o//rtsod pa'i gzhir gyur pa'i don dam pa la 'brel pa 'jog pa 'di yang mngon sum dang rjes su dpag par ma grub pas khyab par byed pa mi dmigs pa'o/ /gang zhig bsgrub par bya ba'i chos dang mtshan nyid mi mthun pa'i 'brel pa de ni gtan la phab pas phyogs kyi chos rtogs pa la dgos pa med de/dper na byas pa dang mi rtag pa gtan la phab pa las rgyab kyi me rtogs pa la dgos pa med pa lta bu'o/ /rtsod pa'i gzhir gyur pa'i kun rdzob kyi bden pa kho na la 'brel pa gtan la 'bebs zhes bya ba 'di yang phyogs kyi chos dang mtshan nyid mi mthun pas khyab par byed pas mi dmigs pa'o//de bas na bye brag ni don dam pa'i bden pa'am/ kun rdzob kyi bden pa gang la yang gtan la dbab tu mi 'dod do/ /'o na bden pa gnyis su ma 'dus pa med pas 'brel pa mi 'grub bo zhe na/ bden te/ 'on kyang rigs mi mthun pa la sogs pa rtag pa'i spyi zhes bya ba dang / rigs mthun pa la sogs pa rang rang gi ngo bo la gnas pa zhes bya ba ni khas blangs dgos te/ 'di ltar sdod/ gcig dang du ma dang / rang bzhin las log pa'i gcig dang du ma dang bral ba dang / rang bzhin med pa gnyis ni kun rdzob kyi bden pa la yang 'jug /don dam pa'i bden pa la yang 'jug ste/ thun mong du 'jug go/ /'o na spyi de la 'brel pa sgrub bam zhe na/ smras pa de yang ma yin no/ /'o na ci ltar bsgrub ce na/ 'di ltar gang dag gcig dang du ma'i rang bzhin ma yin pa de dag ni zhes smras pa na gtan tshigs spyir smos pa'o//don dam par rang bzhin med do zhes smras pa dang / gtan tshigs spyi'i rjes su bsgrub bya spyi 'gro bar smras pa yin te/ ma rig pas ldongs pa'i 'jig rten pa dag mtshan nyid kyi yang dag pa'i kun rdzob yin pa'i lta ba dang /bsgom pa dang / myang ba can gyi don byed nus pa'i rang bzhin 'di la don dam par 'dzin la/ grub pa'i mtha' las ni rigs pas grub pa la don dam pa zhes zer bas de gnyis ka rjes su 'gro ba bstan to/ /dper na gzugs brnyan bzhin no/ /zhes smras pa/ spyi de bye brag kun rdzob kyi bden pa la zhugs par bstan to/ /des na gzugs brnyan de nyid don byed nus pa'i bzhin gcig dang du ma ma yin pas don byed nus pa'i bzhin gyi rang bzhin ma yin par bstan to/ /phyir rgol bas ni shes pa rtog med mngon sum du 'khrul pa gcig gis de de ltar rtogs so//de ltar spyi bye brag dang bcas pa de dper grub nas bsgrub par bya ba'i chos can la gtan tshigs yod par bstan pa'i phyir/ bdag dang gzhan gyis smras pa'i dngos po rnams kyang zhes smras pas/ chos can gzugs brnyan dang mi 'dra bar don byed nus pa ni 'jig rten pas/yang dag par 'dod pa 'di nyid yin par bstan to/ /gcig dang du ma'i rang bzhin ma yin pas zhes smras pa ni/ gtan tshigs de bsgrub par bya ba'i chos can don byed nus pa gzhan gyi dbang don dam par 'dod pa 'di nyid la yod par bstan to//des na spyir don dam pa'i gcig dang du ma ma yin pa de bye brag tu gzugs brnyan du zhugs pa de tsam zhig bsgrub par bya ba'i chos can thams cad la yang yod par rgol bas kyang smras pa/ phyir rgol bas kyang de tsam yod par go'o/ /de skad du/bam po lnga pa las kyang / mthun pa'i dpe ni bsgrub par bya ba'i chos kyi spyi dang don mthun no zhes gsungs so/ /de tsam la dgongs nas chos can dang / gtan tshigs la sogs pa mthun par snang ba 'jog ces gsungs pa dang / rgol ba gnyi ga'i shes pa la//ji tsam snang ba'i cha yod pa/ /de tsam de la brten nas ni/ /chos can chos la sogs pa rtogs/ /zhes gsungs pa dang / bsgrub dang sgrub pa'i dngos 'di ni/ /gzhung gis bskyed pa'i bye brag gis/ /chos can spangs nas mkhas pa dang / /bud med byis pa'i bar dag gis//shes par gyur pa'i dngos rnams la/ /ma lus yang dag 'jug par 'gyur/ /zhes gsungs so/ /rtags de bum pa lta bu bye brag cig la phyir rgol ba mkhas pas ni mngon sum dang cha shas bcur snang ste/ gcig ma yin par rtogs la bstan bcos log pa la goms pas blo bslad pa la sogs pa mi mkhas pa rnams kyis rjes su dpag pa'i sgo nas 'grub ste/'di ltar brtags te mthun par snang ba'i chos can la bzhag pas khas blang na dgos/ /mthong ba tsam gyis nges pa ni ma skyes pa de the tshom za na rags pa bum pa nas rdul phra rab la thug gi bar du yid rab tu btud nas/phyogs cha bcu'am/ drug gam/ bzhir brtags nas gcig dang bral bas nges pa skyed la/ de la yang the tshom za na yid rab tu btud nas bltas la/ phyogs cha bcur phye bas gcig tu ma mthong ngo //de mi snang bas cha shas med par du mar the tshom za ba'i rgyu med de/ de ma mthong bas gcig dang du ma dang bral ba'i rtags rjes su dpag pa'i sgo nas grub pa yin no/ /don dam pa'i gcig dang du ma zhes bya ba dang / cha shas med pa'i gcig dang du ma zhes bya ba don tha dad pa ma yin no//de ma mthong ba'i shes pa ma bskyed pas bdag nyid kyang gcig dang du ma dang bral ba'i shes pa'i tha snyad mi skye la/ gzhan la sgra'i tha snyad kyang mi brjod de/ de ni nges pa sngon du 'gro bar bstan zin to/ /kha cig de la 'o na ni gtan tshigs don dam pa la gzhag par 'gro ste/des na bsgrub pa'i mtha' spangs nas/ /ji tsam snang ba'i cha la gzhag pa dang / /'gal ba dang / rang bzhin med pa dang / tha dad ma yin pa'i dam bcas pa'i phyogs gcig gtan tshigs su blangs pas yang na ma grub/grub na rtags kyi rjes su 'brang bar don med par 'gyur ba'i nyes pa yod do zhe na/ de la smras pa/ ji tsam snang ba'i cha la 'jog /ces bya ba yang gzhan gyi don gyi rjes su dpag pa'i dus su mthun par snang ba la sgra sbyor gyis rang gi don gyi rjes su dpag pa la ni chos can mngon sum du snang ba la ni/gtan tshigs kyang mngon sum dang rjes su dpag pas gcig dang du ma dang bral bar nges pa skye ba yod/ mthun par snang ba ma yin pa la chos can dang gtan tshigs 'jog pa yang yod de/ /dper na rdul phra rab lta bu'o/ /de dngos po la gnas pas mthun par snang ba yin no zhe na/de ni mi rigs te/ nyi zer gyi ni rdul gcig la/ /phra rab rdul ni 'bum phrag brgyad/ /khri phrag gnyis dang stong phrag gsum/ /brgya phrag lnga dang bzhi bcu gsum/ /de lta bu'i cha de mthun par snang ba yin nam/ de lta bas na dgos pa ni rnal 'byor pa'i rtogs pa bsal bar bya ba dang / the tshom gyi zug rngu dbyung ba'i dgos pa yod la/ dgos pa ni mngon sum du ma gyur pa blo gzhigs pa'i dum bu shin tu phra ba la dgongs pa'o/ /dam bcas pa'i phyogs gcig ces bya ba 'di yang nyes pa med de/'di skad du/ gtan tshigs 'di la ni dam bcas pa'i phyogs gcig pa yang med de/ grub pa'i yul gyis yul can shes pa dang / sgra dang tha snyad rnams bsgrub pa'i phyir te/ dper na 'di ni ba glang ste/ lkog shal la sogs pa 'dus pa'i bdag nyid kyi phyir ro zhes bya ba dang 'dra bar ji skad smras pa'i 'thad pa rnams kyi gcig dang du ma'i rang bzhin dang bral bar bstan du zin kyang /gang dag thog ma med pa'i 'khor ba nas phyin ci log gcig nas gcig tu brgyud de/ dngos po la mngon par zhen pa yongs su 'phel ba spang bar dka' ba dang /tshul bzhin yid la byed pas goms par mi byed pa'i phyir/ yang dag par dngos po mtha' dag la khyab pa'i rang bzhin med pa nges par mi sems mi brjod cing / gzhan dag la yang nges pa bskyed par 'dod pas tha snyad 'dogs par mi byed pa de dag la/'di de ltar shes pa sgra dang tha snyad kyi yul nyid grub ste dmigs su yod pa'i mtshan nyid du gyur pa las/ mi dmigs pas med ces bya ba lta bu'o/ /zhes gsungs kyi/ gtan tshigs ni ma yin par dgag pa yin pas snang ba yin la/bsgrub bya ni med par dgag pa yin pas nyes pa med ces ni mi gsung ngo / /de lta ma yin na bdag nyid gcig pa yang ji ltar rung / 'o na mthun pa'i dpe la ni ma yin par dgag pa'i sgrar sbyor la/ de dang mthun pas phyogs kyi chos smos pas khyad par du med pa yin pas cis rtogs she na/gzugs brnyan la ni don byed nus pa'i gcig dang du ma dang bral bar bsgrubs la/ bsgrub par bya ba'i chos can la ni dgag rgyu de nyid las te/ kun brtags pa ni gzhan gyis bkag zin to/ /de bas na bsdus pa dang shugs kyis go ba'i sbyor ba zhes bya ba yin te/ming de lta bu ni theg pa bsdus pa las gsungs so/ /shugs ni 'brel ba'i shugs so/ /don dam par rang bzhin med do/ /zhes smras pas ni bsgrub par bya ba'i chos bstan zin to/ /de yang yang dag pa'i shes pa bsam pa'i dbang gis 'di nyid rang bzhin med pa yin gyi/kun rdzob kyi shes pa'i bsam pa'i dbang gis ni ma yin no/ /de la kha cig na re rang bzhin zhes bya ba ni rtag pa rgyu dang rkyen gyis ma bskyed pa/ rigs pas mi gnod pa blos ma brtags pa la zer ba yin te/'phags pa klu sgrub kyis/ gal te rang bzhin gyis yod na/ de ni med pa nyid mi 'gyur/ /rang bzhin gzhan du 'gyur ba ni/ /nam yang 'thad pa ma yin no/ /rang bzhin dag ni ji lta bur/ /byas pa can zhes bya bar 'gyur/ /rang bzhin byas pa ma yin pa//pha rol la yang ltos pa med/ /ces bya ba la sogs pa gsungs pas de med kyi/ rten cing 'brel par 'byung ba ni snang ngo zhe na/ de la smras pa bden te/ 'on kyang rigs pa bya ba ci la bya/ yang dag pa'i shes pa yin no zhe na/ de la snang ngam zhes dris pa na snang zhes zer na/de nyid rigs pas mi gnod ci grub pa don dam pa zhes bya ste/ kun rdzob ni ma yin no/ /'on te bsgrub bya khong du chud par byed pa'i dus su spyi rjes su dpag pa yin pas snang ngo zhe na/ dam bcas pa dang / phyogs dang / bsgrub par bya ba dang / rjes su dpag par bya ba ni gcig ste/don dam par rang bzhin med pa dang / kun rdzob tu snang ba gnyis su dam bcas pa la sogs pa yin gyi/ shes pa gcig la gnyis snang ba ni ma yin te/ chos can snang na chos nyid ces ji skad du bya/ mi rtag pa ni dngos po yin pas 'gal ba med do//chos can med na chos nyid de gang yin snyam na/ gtan la 'be+ebs tsam na 'di chos nyid spros pa dang bral zhe'am/ rang bzhin med ces tha snyad 'dogs kyi/ gtan la 'bebs te rjes su dpag pa'i shes pa skyes tsam na/ chos nyid du mi 'dzin pas nyes pa med do//'on kyang chos can de nyid spros pa dang bral bas bye brag tu byas pa'i chos la dmigs pa'i sgo nas spyi zhes bya ba 'gal ba med do/ /de bas na kun rdzob de nyid yang dag pa'i shes pa rang bzhin med par rtogs pa yin te/ gzhan du na 'di kun rdzob yin par cis grub/ de skad du/ 'jam dpal gnas pa las/ 'das pa gang dang ma 'ongs dang / /da ltar byung chos brjod pa ni/ /don gyis ma yin tha snyad tsam/ /zhes gsungs te/ des ni don dam par ma grub pas kun rdzob tsam yin zhes gsungs pa'o//gcig dang sna tshogs mtshan nyid min/ /zhes gsungs pa des ni don dam par na kun rdzob de nyid gcig dang du ma dang bral zhes gsungs pa'o/ /de bas na de nyid rang bzhin med do zhes gsungs pa'o/ /'o na yod pa bkag nas med pa 'dzin no zhe na/mtshan nyid med par gang rtogs pa/ /de dag nyid ni mtshan nyid 'gyur/ /zhes gsungs te/ des na med pa zhes bya ba cir yang ma grub ces bstan te/ 'phags pa chos kun 'gro ba las kyang / byang chub sems dpa' rtsom pa med kyis/ byang chub sems dpa' blo gros rnam par gnon pa la smras pa/ de la ji ltar na bdag med pas stong pa nyid khong du chud par bya zhe na/ stong pa nyid ni dngos po yang ma yin dngos po med pa yang ma yin no/ /gal te stong pa nyid dngos po yin du zin na ni/ stong pa nyid du 'dus byas dang mi rtag par 'gyur ro//'on te stong pa nyid dngos po med pa nyid yin du zin na ni/ stong pa mi stong par 'gyur te/ de'i phyir stong pa nyid dngos po ma yin/ dngos po med pa yang ma yin te/ de ltar na bdag med pas stong pa nyid khong du chud par bya'o/ / zhes gsungs so/ /'o na cir yang ma grub pa'i mi gsung bar med ces mi gsung ba snyam pa la/ 'phags pa klu sgrub kyis/ 'di ni de nyid 'gog pa ste/ /med pa nyid du mi bzung ngo / /dkar po min zhes bstan pa na/ /nag po yin zhes ma brjod bzhin/ /zhes gsungs so/'brel pa la ni log rtog bzhin/ /bsgrub bya'i gtan tshigs log rtog dang / /bsgrub bya nyid la log rtog dang / /de dag sun dbyung mdor bstan pa/ /zhes bya ba ni bsdu ba'i tshigs su bcad pa'o/ /de la sgom pa la log par rtog pa 'di gnyis te/ bsgom pa dang / de'i rtags so/ /gong ma la gnyis te/ dmigs pa dang shes pa'o/ /de la dmigs pa la ni kha cig na re da lta ni rgyu'i dus tshigs yin te/ thos bsam bya ste bsgom du mi 'dod do/ /dper na rdo'i steng du sa bon 'debs pa dang 'dra'o zhes zer ro/ / de la smras pa/ de bas na khyad par can gyi rgyu la nan tan bya dgos pas bsgom mo/ /'on te nga'i sems 'dug tu mi 'dod do/ /zhe na/ de tsam gyis gzhan bdag tu mi 'dod do/ /rtog pa dang ldan pa yid ches pa'i snga na nyams su myong ba smra ba las rjes su dpag par nus so//'phags pa ting nge 'dzin gyi rgyal po las kyang / lnga brgya tha ma'i dbang du mdzad nas ni/ /de yi tshe na ting 'dzin 'dzin pa dag /lnga brgya las ni mi nyung 'byung bar 'gyur/ /zhes gsungs so/ /kha cig na re chos dang chos can gnyis kho na bsgom mo zhes zer te/de la smras pa/ de ni mi rtag pa tsam shes pa yin gyi/ spros pa dang bral ba ye ma go ba yin pas/ re zhig gzhag ste zab mo'i snod ma yin no/ /kha cig na re chos nyid kyi rang bzhin mtshan nyid kho na bsgom mo/ /de bas na je gsal je gsal skyed 'byung ba yin te/spyi'i rnam pa la gsal ba med do zhes zer te/ rnam pa la 'gal ba med do zhes te/ de la smras pa/ de ni mi rtag pa tsam shes pa yin/ 'o na bden pa mthong bar thal bar 'gyur ro/ /de yon tan gyis mi mnyam pa yin no/ /zhes zer na/ de nyid kyi phyir khas ma len cig /spyi'i rnam pa la yang je gsal je gsal 'gro bar lung las kyang gsungs te/ de bzhin gshegs pa'i sku gzugs thos pa sems la gzhag pas mthong ba dang 'dra bar 'ong zhes gsungs la/ rigs pas kyang tshul khrims rnam par dag pa yid brtan pa'i tshig las rjes su dpag par nus so//'on te rigs pa drug cu pa las spyi'i mtshan nyid kyi rnam pa la bsgom pa'i sbyor ba grub pa'i ngo bo'i yul rang gi mtshan nyid mi 'thad de/ ha cang thal bar 'gyur ba'i phyir/ de'i tshig ni 'brel pa med ces gsungs so zhe na/de la dngos por smra ba la skyon smras pa ma yin te/ rang gi mtshan nyid rdzas su grub pa dang / dngos kyi spyi rdzas su ma grub pa gnyis tha dad pas gzhan bsgoms pas gzhan 'thob par thal bar 'gyur ro/ /kha cig na re don gyi spyi'i rnam pa kho na bsgom mo zhes zer te/de la smras pa/ rnam pa ji lta bu zhig yin/ cir yang ma grub pa snyam pa de tsam zhig yod par 'jog ste/ de chos nyid kyi rnam pa yin no zhes zer na/ de chos nyid kyi rnam pa ma yin te/ spros pa yin pa'i phyir ro/ /kha cig na re don dam pa'i bden pa zhes bya ba ye med de/kun rdzob rten cing 'brel par 'byung ba ji ltar gnas pa bzhin bsgom mo zhes zer te/ de la smras pa/ 'o na ci'i phyir kun rdzob zhes bya/ rigs pas dpyad na ma grub pas kun rdzob ces zer na/ 'o na don dam pa'ang ma grub ste/rigs pas gang zag dang chos ma grub pa tsam de nyid don dam pa ma yin no/ /'on te rigs pas ye mi 'jug ste/ gang zag dang chos la bdag med pa ye ma grub zer na/ 'o na kun rdzob ces kyang ma zer cig /khyod byis pa bsten pa chos ma thos pa dang bye brag med do//de bsgom par bya mi dgos so/ /de skad du/ zla ba'i snying po'i le'u las 'byung ba/ don dam pa'i bden pa ni bla na med pa yang dag par rdzogs pa'i byang chub ste/ nyan thos dang rang sangs rgyas thams cad dang thun mong ma yin no/ /de bas na kun rdzob kyi bden pa gang gis kyang bla na med pa yang dag par rdzogs pa'i byang chub tu dge ba'i rtsa ba'i tshogs kyi mchog bsgrub mi nus so//zla ba'i snying po 'di lta ste/ dper na me stag gang gis rgya mtsho chen po zab mo skem mi nus so/ /zla ba'i snying po de bzhin du kun rdzob kyi bden pa gang gis kyang rang gi nyon mongs pa'i rgya mtsho skem par mi nus/sems can gzhan rnams kyis lta smos kyang ci dgos zhes gsungs so/ /kha cig na re don dam pa'i bden pa ni ye mi bsgoms te/ 'phags pa blo gros mi zad pas bstan pa las/ don dam pa'i bden pa ni gang la sems rgyu ba yang med na zhes gsungs pas/sems kyi bsgom du mi 'dod do/ /zhes zer te/ de la smras pa/ sna tshogs pa'i phyir sems dang don la sems pa'i phyir sems pa dang / bems po las log pa'i phyir sems kyi ni bden na/ gang gi ngo bo gang yin pa de'i rnam par byung ba des mi rtogs zhes ni byar mi rung ste/ rnam par mi rtog pa'i ye shes kyi shes bya dang khyad par med pa chos thams cad nam mkha'i dkyil ltar mthong ngo zhes gsungs pa dang / rtags kyi stobs kyi don la nges pa ni slu bar mi 'gyur ro zhes gsungs so//kha cig na re yod pa bkag la med pa bsgom mo zhes zer na/ de la smras pa/ de phung po la sogs pa'i chos yin nam/ gal te yin no zhe na/ med pa de don dam pa'i bden pa yin nam/ 'on te kun rdzob kyi bden pa yin/ gal te don dam pa'i bden pa yin zhe na/shes rab kyi pha rol tu phyin pa bsgom pa yin te/ chos thams cad bsam du med cing sems pa med pa/ rin po che bsags pa bstan pa'i mdo las/ 'jam dpal gyis gsol pa/ gang ci la yang mi gnas pa de shes rab kyi pha rol tu phyin pa bsgom pa lags so//zhes gsungs te/ de yang 'gal lo/ /yod pa bkag nas med pa don dam pa yin pa ni mdo sde gang na yang mi bzhugs so/ /med pa ni don dam pa'i bden pa ma yin te/ de skad du/ 'phags pa klu sgrub kyis/ gal te dngos po ma grub na/ /dngos po med pa 'grub mi 'gyur/ /dngos po gzhan du gyur pa ni/ /dngos po med ces skye bo smra/ /zhes gsungs so/ /skye bo su dag smra zhe na/ /rgyal dpog pa la sogs pa'o/ /de skad du/ gnas brtan gzhon nu ma legs kyi/ 'o ma dag la zho sogs med/ /de ni snga nas med ces bya/ /zho la 'o ma med pa ni/ /zhig nas med pa'i mtshan nyid do/ /mgo yi yan lag 'jong ba dang / /skyed dang sran pa rnams spangs pa/ /ri bong rwa la sogs dngos su/ /de ni gtan med brjod pa yin//ba lang la ni rta sogs med/ /de ni gcig la gcig med brjod/ /ces smras so/ /de dag las gang zhig yin par 'dod/ gang khas blangs kyang chos nyid ma yin no/ /'on te kun rdzob kyi med pa yin no zhe na/ de mngon sum dang 'gal ba skur pa 'debs pa smra bas re zhig gzhag go//de bas na bden pa gnyis kyis ma bsdus pa bka' dang bstan bcos dang 'gal ba smra ba de la zlog par byed pa su zhig yod/ kha cig na re kun rdzob kyi bden pa brdzun pa skyon dang bcas pa bsgoms te/ des mi rtog pa'i ye shes skye zhes zer te/de la smras pa ci'i phyir kun rdzob brdzun pa skyon dang bcas pa zhes bya/ gal te rigs pas gang zag dang chos ma grub pas snang ba 'di brdzun pa dang kun rdzob yin zhe na/ 'o na rigs pas gang zag dang chos ma grub pa tsam de don dam pa'i bden pa yin pas de bsgom mo//'on te ma grub na ci'i phyir kun rdzob ces bya/ de ni yang dag par kho na snang ba'i rigs so/ /gzhan yang nyan thos mdo sde pa dang bye brag tu smra ba yang 'dus pa rdzas su mi 'dod do/ /dbu ma par khas 'ches nas 'dus pa rigs pa'i shes pas goms par byed dam/de goms pas bden pa mthong na byis pa kun gyis bden pa mthong ste/ de skad du/ 'phags pa klu sgrub kyis/ ji ltar byis pa rnams brtag bzhin/ /dngos po des te bden 'gyur na/ /de dag dngos med rnams thur du/ /gang phyir mi 'dod rgyu de ci/ / zhes gsungs so/ /spyir sun dbyung ba gang goms par byas pa de ni de'i bdag nyid du 'gyur te/ dper na dngos po la mngon par zhen pa lta bu'o/ /yod pa dang med pa la goms par byed pa 'di dag kyang de'i bdag nyid du 'gyur te/ /zhes bya ba rang bzhin gyi gtan tshigs so/ des ni so so'i skye bo'i sa las 'das par mi 'gyur te/ de skad du/ slob dpon nyid kyis/ yod pas rnam par mi grol te/ /med pas srid pa 'di las min/ /zhes gsungs so/ /yang / so so'i skye bo dngos bdag can/ /yod dang med par phyin ci log / nyes pas nyon mongs dbang gyur pa/ /rang gi sems kyis bslus par 'gyur/ /zhes gsungs so/ /yang gsungs pa/ blo chung gang dag dngos rnams la/ /yod pa nyid dang med nyid du/ /lta ba des ni blta bya ba/ /nye bar zhi ba mi mthong ste/ /dmus long bzhin no zhes gsungs so//kha cig na re rang bzhin med/ /rang bzhin med ces bya ba yid kyi 'das pa gcig bsgom mo/ /zhes zer te/ de la smras pa/ de don dam pa'i bden pa yin nam/ 'on te kun rdzob kyi bden pa yin/ gal te don dam pa'i bden pa yin no zhe na/'di ltar gang cha shas dang bcas pa de ni don dam pa ma yin te/ dper na bum pa lta bu'o/ /rang bzhin med ces bya ba yid kyis bzlas pa 'di yang cha shas dang bcas pas rang bzhin gyi gtan tshigs kyis kun rdzob kyi bden pa'am khyab par byed pa 'gal ba dmigs pas don dam pa'i bden pa ma yin par bsgrub bo//gal te bsgrub par bya ba'i chos can la gtan tshigs the chom za ba'i ma grub pa yin no zhe na/ 'di ltar de ni khyod kyi rang bzhin med pa brjod par bya'i/ don la 'dug tu mi btub pas rjod par byed pa goms par byas na brjod bya'i don lan cig mngon du 'gyur ro zhes khas blangs pas rjod byed kyi mtha' ni yi ge yin te/spyi de yang rnam par rtog pa cha shas dang bcas pa yin no/ /'on te rang gi mtshan nyid yin/ /de yang rkan la sogs pa sgra'i gnas brgyad yod pas de yang cha shas dang bcas pa'o//de ni mi srid de/ klog mkhan du 'gro ba dang / rjod byed ma yin pas khas kyang mi len no/ /brgya la zer srid na de'i tshig 'jug pa la gnod pa byas pa'o/ /de lta bas na/ de ni don dam pa'i bden pa yin te/ rjod byed yin pa'i phyir ro/ /de skad du/ 'phags pa blo gros mi zad pas bstan pa las/ don dam pa'i bden pa gang la sems rgyu ba yang med na/ yi ge rnams lta smos kyang ci dgos zhes gsungs so/ /de skad du/ 'phags pa klu sgrub kyis/ yi ge gcig sngags gang yang med/ /yi ge mang po gzhan yang med//yi ge 'gag pa rnams min yang / /zhes gsungs so/ /ga las 'jigs med las kyang 'phags pa klu sgrub kyis/ rig pa sngon du btang ste/ yongs su rtog pas ni/ de kho na rtogs par 'gyur ro zhes gsungs so/ /'on te kun rdzob kyi bden pa yin no zhe na/de byis pa kun gyi chos yin pas re zhig gzhag go/ /kha cig na re kun brtags pa kho na bsgom mo zhes zer te/ de la smras pa/ kun brtags pa ni kun rdzob kun tu yang rang gi ngo bos ma grub ste/ de la skur pa btab kyang nyes pa med de/ slob dpon ka ma la shI las kyang / rnam par mi rtog pa'i gzungs 'grel las/ kun rdzob tu yang med pa la skur pa btab na/ skur pa 'debs pa'i mtha' mi 'gyur ro/ /zhes gsungs so/ /de bas na yang kun rdzob tu yang dngos po la med pa de goms pas nyon mongs pa'i sgrib pa dang /shes bya'i sgrib pa yang spong bar mi 'gyur ro/ /kha cig na re gzhan gyi dbang kho na bsgom ste/ blo'i rnam pa bsgom pa de yang blo tha mi dad de/ blo gzhan gyi dbang yin pa bzhin no/ /zhes zer na/ de la smras pa/ 'o na rten cing 'brel par 'byung ba dang gzhan gyi dbang tha mi dad pas rten cing 'brel bar 'byung ba bsgoms par thal bar 'gyur ro//gal te thal bar mi 'gyur te/ mdo las rten cing 'brel bar 'byung ba mthong ba des chos mthong / /chos mthong ba zer na/ de la smras pa/ mthong zhes gsungs so//zhe na/ de ni kun rdzob la dgongs pa yin no/ /don dam pa mthong nas langs pa'i gnas skabs su rten cing 'brel bar 'byung ba dang / chos dang sangs rgyas la sogs pa 'jog gi/ /mnyam par gzhag pa'am/ don dam pa'i gnas skabs su ni ma yin no/ / de skad du/ 'phags pa blo gros rgya mtshos bstan pa las/ gang dag rten cing 'brel 'byung ba/ /de dag dngos nyid ci yang min/ /gang dag ngo bo nyid med pa/ /de dag gang du'ang 'byung ba med/ /ces gsungs so/ /'phags pa sdong po bkod pa'i mdo las/ de bzhin gshegs pas bka' stsal pa/ 'jam dpal dbugs 'byin pa lnga po 'di dag rnyed na/ byang chub sems dpa' rnams kyis dang po yongs su sbyor bar 'gyur ro zhes bya ba nas/ bdag gis chos rnams brten te mi 'byung bar mos pa gnas pa ste/ gzhan dag kyang chos rnams brten te mi 'byung bar mos pa la dgod par bya'o snyam nas dbugs 'byin pa rab tu rnyed de/ de la rkyen rnams skye ba med pa'i rang bzhin yin pas chos rnams brten te mi 'byung zhes bya'o zhes bya ba la sogs pa gsungs so/ /chos thams cad 'byung ba med par bstan pa las kyang /sangs rgyas med cing chos dang dge 'dun med/ /de ltar gang shes de ni mkhas par 'gyur/ /zhes gsungs so/ /kha cig na re yongs su grub pa kho na bsgom ste/ de don dam pa yin pa'i phyir ro/ /de lta ma yin na kun rdzob gcig bsgom bar thal bar 'gyur ro zhes zer te/de la smras pa/ yongs su grub pa gang la bya ba/ gal te mi 'gyur bar yongs su 'grub pa la bya'o zhe na/ de nyid mi shes so/ /gal te kun brtags las byis pa'i gnas skabs dang / 'phags pa'i gnas skabs su stong par 'dra bas na mi 'gyur ba yongs su grub pa ste/thag pa la sbrul du 'khrul pa'i gnas skabs dang / thag par mthong ba'i gnas skabs gnyis sprul med par 'dra ba bzhin no/ /kun brtags pa'i zhes bya ba ji lta bu de yang mi shes sam/ bdag dang bdag gis dang /gzung ba dang / 'dzin pa la sogs pa tshad mas gnod bzhin du byis pas yod par kun brtags pa'o/ /'on ni dbu ma bsgom zhes mi bya ste/ sems tsam bsgom pa yin no/ /gal te ma yin te/ des ni gzhan gyi dbang don dam par 'dod/ dbu ma pas ni sgyu ma tsam du 'dod pa khyad che'o//sgyu ma bya ba don dam par shes rab dang ye shes kyis ma grub pas kun rdzob du snang ba la zer ram/ 'on te rigs pa'i shes pa la snang ba la yang bya/ de lta'o zhe na/ smras pa/ de kun brtags pa kho na yin te/ rigs pas gnon bzhin du yod par 'dod pa'i phyir gang zag gi bdag bzhin no/ /de lta bas na sgyu ma la sogs pa yang don dam par thal bar 'gyur ro/ /gal te rigs pas gnod pa'i phyir gzhan gyi dbang ni mi bsgom ste/ de dag gis chos nyid ye nas grub pa ni bsgom ste/ des na sems tsam dang mi 'dra ste/ de dag ni kun brtags pa dang / gzhan gyi dbang gis stong pa la mi bsgom gyi/ kun brtags pas stong pa gcig pu ye nas grub pa bsgom mo/ /de ni bden te/ 'on kyang gzhan gyi dbang gis chos nyid la dmigs pas de yang yongs su grub pas bsgom par 'dra'o//de lta bas na dbu ma ni yongs su grub pa la yang dmigs te/ 'phags pa dgongs pa nges par 'grel pa las/ bcom ldan 'das kyis 'di skad ces/ don dam yang dag 'phags/ ngas ngo bo nyid med pa gsum la dgongs nas chos thams cad ngo bo nyid med par bstan te/mtshan nyid ngo bo nyid med pa dang / skye ba ngo bo nyid med pa dang / don dam pa ngo bo nyid med pa'o/ /de la mtshan nyid ngo bo nyid med pa ni/ kun brtags ngo bo nyid med pa'o/ /skye ba ngo bo nyid med pa ni gzhan gyi dbang ba ngo bo nyid med pa'o//don dam pa ngo bo nyid med pa ni/ de dag gis stong par 'dzin pa de yang ngo bo nyid med pa'o/ /zhes gsungs so/ /'phags pa lang kar gshegs pa las kyang / blo yis rnam par bshigs pa ni/ /brtags pa med cing gzhan dbang med//grub pa'i dngos po yang med na/ /blo yis ji ltar rnam par brtag /ces gsungs so/ /kha cig na re slob dpon klu sgrub kyi dbu ma chen po bya ba yin te/ de bsgoms pas ni thabs kyang ma bsten/ ci la yang mi bya bar zab mo kho nar yid la bya'o zhes zer te/ de la smras pa/ dbu ma la che chung ni ma gsungs la/ slob dpon nyid kyis mdo kun las btus las/ byang chub sems dpa' thabs la mkhas pa dang bral bas chos zab mo la brtson par mi bya ste/ de skad du/ 'phags pa dri ma med par grags pas bstan pa las/ thabs med pas bcings pa'i shes rab bcing ba gang zhe na/ 'di lta ste/ stong pa nyid dang / mtshan ma med pa dang / smon pa med pa nges par rtogs shing / mtshan dang dpe byad bzang po dang / sangs rgyas kyi zhing gi rgyan dang / sems can yongs su smin par bya ba la nges par mi rtog pa 'di ni thabs med pas bcings pa'i shes rab bcing ba'o zhes bya ba la sogs pa rgyas par bstan to//kha cig na re theg pa mchog gi gnas skabs na yod pa dang med pa la sogs pa cir yang mi bsgom zhes zer te/ de la smras pa/ de nyid kyi dbu ma la yod med du bsgom pa med par smras pa yin te/dbu ma la ni theg pa mchog dang mchog ma yin par phye ba ni chos gang la yang med do/ /kha cig na re khye'us khye'u dbyung ba'i tshul du zhes gsungs pas/ sngon la med pa bsgom/ de nas ci yang ma yin pa la bsgom zer te/de la smras pa/ don dam pa bden pa la rim gyis 'jug pa'i phyir med pa bsgom pa la gsungs pa ma yin te/ sgom pa'i rim pa dang por mdzad pa las nyan thos la sogs pa'i lam bstan pa ni/ gzhug pa la ldem por dgongs nas/ khye'us khye'u dbyung ba bzhin du bstan par zad do//'di ltar 'di dag ni phung po la sogs pa chos tsam du zad de bdag med par bsgoms pas/ nyan thos gang zag la bdag med pa la 'jug go/ /khams gsum rnam par shes pa tsam du bsgoms pas/ rnam par shes pa smra ba'i phyir don med pa la 'jug go//tshul 'dis ni gnyis su med pa'i shes pa de yang bdag med pa nyid du 'jug pas bdag med pa nyid mchog la zhugs pa yin no zhes gsungs so/ /de lta bas na de lta bu la khye'us khye'u dbyung ba'i tshul du gsungs pa las/ dbu ma bsgom pa la med pa bsgom pas rigs kyi 'jug pa ni/bka' dang bstan bcos mtha' dag las mi srid do/ /kha cig na re dbu ma pa ni mtha' rnams spangs nas dbus la bsgom ste/ des ni chos nyid ji lta ba bzhin bsgom pa ma yin te/ des ni gsang sngags na legs par yod do//zhes zer te/ de la smras pa/ gsang sngags ni dgag pa mi byed mod kyi/ 'on kyang dbu ma ni dbus la mi gnas pa ste/ 'phags pa ting nge 'dzin gyi rgyal po las/ yod ces med ces gnyi ga mtha'/ /dag dang ma dag gnyi ga mtha'/ /de bas de gnyis rab spangs nas//mkhas pa dbus la'ang gnas mi byed/ /ces gsungs te/ de ni dbu ma'i mkhan po rnams kyis dbu ma'i bstan bcos kun tu drangs so/ /'phags pa klu sgrub kyis kyang / rigs pa drug cu pa las/ gang blo yod dang med pa las/ /rnam par 'das shing mi gnas pa//de dag zab mo mi dmigs pa'i/ /rkyen gyi don la rnam par bsgom/ /zhes gsungs te/ de ni 'grel pa las/ de dag ni blo yod pa dang med par mthong ba las 'das so/ /mtha' gnyis de las lhag pa'i dbus med pa'i phyir de la yang gnas pa med pas mi gnas so zhes gsungs so//slob dpon ka ma la shI las kyang / bsgom pa'i rim pa bar du mdzad nga las ji ltar sems mtha' dang dbus med pa de bzhin chos mtha' dag kyang / mtha' dang dbus med par khong du chud do zhes gsungs nas/ yang ting nge 'dzin de'i ming gdags pa'i skabs su mi gnas pa'i bsam gtan pa zhes bya'o//zhes gsungs so/ /kha cig na re dbu ma pa ni stong pa phugs rings bsgoms te/ sems kyang med par byas nas stong pa gcig yul du byed de des ni byang chub mi thob bo/ /'phags pa klu sgrub kyi dgongs pa ni/rang gi sems yod med gang du yang ma grub pa ye nas rnam par dag pa de bsgom pa yin te/ des byang chub thob ces zer te/ de la smras pa/ dbu ma ni 'phags pa klu sgrub kyis gsungs pa ste/ de bzhin gshegs pas kyang / 'phags pa lang kar gshegs pa las/nga ni mya ngan 'das 'og tu/ /lho phyogs be ti'i yul du ni/ /dge slong dpal ldan cher grags pa/ /de ming klu zhes bod pa ste/ /yod dang med pa'i phyogs 'jig cing / /nga yi bstan pa 'jig rten du/ /bla med theg chen rab bshad de/ / rab tu dga' ba'i sa bsgrubs pas/ /bde ba can gyi zhing du 'gro/ /tshul rnams 'dzin par 'gyur ba ste/ /dus dag 'das nas 'byung ba ste/ /blo gros chen po khyod shes byos/ /zhes gsungs te/ yod pa dang med pa'i phyogs 'jig pa dang / theg pa chen po ji lta ba bzhin du bshad pa yin par lung bstan pa dang /sngon gyi slob dpon ka ma la shI la la sogs pas kyang / shes rab kyi pha rol tu phyin pa gsal bar mdzad pa zhes gsungs pa las/ byang chub kyi rgyu ma yin pa cig dbu ma'i nang du ston mi srid do/ /stong pa cig yul du byed pa ni dbu ma'i bstan bcos gang las kyang ma gsungs na/ci la 'khrul/ 'on te sems skye ba med par ston pas stong pa skad du bya na/ 'on ni sems tsam bsgom pa yin pas grub pa'i mtha' rim gyis drang ba'i ched du bstan pa la dad pa yin pas bden te/ re zhig gzhag go/ de lta ma yin te/ 'phags pa klu sgrub kyi dgongs pa'i rjes su 'jug ste/ de ni sems yong med du mi bsgom mo zhe na/ de sems don dam par yod med du ma grub pa la zer ram/ 'on te kun rdzob tu yang yod med du ma grub/ de phyogs dang po ltar na dbu ma pa yang sems don dam par yod med gang yang mi bsgom ste/ de ni rnal 'byor dpyod pa'i dbu ma yin te/ khyad par cung zad kyang med do/ /'on te phyi ma yin na ni/ med pa ma grub pa la zer ram/ 'on te kun rdzob tu yang med pa de bka' dang bstan bcos las kyang ma gsungs la/ med pa de la nor pa dang / ma nor ba yang brtsir mi 'dod de mo gsham gyi bu'i sems bzhin no//de lta bas na don dam par ni sems stong par lta na/ de yang sgro 'dogs pa yin la/ yod par lta na de yang sgro 'dogs pa yin cing yod pa yang ma yin med pa yang ma yin par ltan/ de yang sgro 'dogs pa yin te/ zag pa med par bltas kyang sgro 'dogs pa yin no//ye nas rnam par dag ces bya ba yang chos la dgongs nas gsungs pa las/ chos can la dgongs nas gsungs pa ni ma yin te/ 'phags pa lang kar gshegs pa las/ blo gros chen pos zhus pa la bcom ldan 'das kyis mdo gzhan brjod pa las/de bzhin gshegs pa'i snying po gsungs pa de bcom ldan 'das kyis rang bzhin gyis 'od gsal ba rnam par dag pas thog ma nas rnam par dag pa nyid mtshan sum cu rtsa gnyis dang ldan pa sems can rnams kyi lus kyi nang na mchis par brjod de/ bcom ldan 'das kyi rin po che rin thang chen po gos dri ma can gyis yongs su dkris pa ltar/phung po dang khams dang skye mched kyi gos kyis yongs su dkris pa/ 'dod chags dang zhe sdang dang gti mug gis zil gyis non pa/ yongs su rtog pa'i dri ma can du gyur pa rtag pa brtan pa ther zug par ni brjod na/bcom ldan 'das de bzhin gshegs pa'i snying por smras pa/ 'di mu stegs byed kyi bdag tu smra ba dang ji ltar mi 'dra ba lags/ bcom ldan 'das mu stegs byed rnams kyang rtag pa byed pa/ yon tan byed pa/ khyad par mi 'jog pa'o/ /zhes bdag smra ba ston par bgyid do//bcom ldan 'das kyis bka' stsal pa/ blo gros chen po nga'i de bzhin gshegs pa'i snying po bstan pa ni mu stegs kyi bdag tu smra ba dang mtshungs pa ma yin te/ blo gros chen po de bzhin gshegs pa dgra bcom pa yang dag par rdzogs pa'i sangs rgyas rnams ni stong pa nyid dang /yang dag pa'i mtha' dang / mya ngan las 'das pa dang / ma skyes pa dang / mtshan ma med pa dang / smon pa med pa la sogs pa'i tshig gi don rnams la de bzhin gshegs pa'i snying por bstan pa byas nas/ byis pa rnams bdag med pas 'jigs par 'gyur ba'i gnas rnam par spang ba'i don du/de bzhin gshegs pa'i snying po'i sgo bstan pas rnam par mi rtog pa'i gnas snang ba med pa'i spyod yul ston te/ 'di la blo gros chen po ma 'ongs pa dang da ltar byung ba'i byang chub sems dpa' sems dpa' chen po rnams kyis bdag tu mngon par zhen par mi bya'o//blo gros chen po dper na rdza mkhan ni 'jim pa'i rdul gyi phung po gcig las lag pa dang / bzo dang / lag gzung dang / chu dang / srad bu dang / nan tan dang ldan pa las snod rnam pa sna tshogs byed do/ /blo gros chen po de bzhin gshegs pa rnams kyang chos la bdag med pa rnam par rtog pa'i mtshan nyid thams cad rnam par log pa de nyid shes rab dang /thabs la mkhas pa dang / ldan pa rnam pa sna tshogs kyis de bzhin gshegs pa'i snying por bstan pa'am/ bdag med par bstan pas kyang rung ste/ rdza mkhan bzhin du tshig dang yi ge'i rnam grangs rnam pa sna tshogs kyis bstan te/des na de'i phyir blo gros chen po de bzhin gshegs pa'i snying po bstan pa mu stegs byed kyi bdag tu smra ba'i bstan pa dang mi 'dra'o/ /blo gros chen po de ltar de bzhin gshegs pa rnams ni mu stegs byed kyi bdag tu smra ba la mngon par zhen pa rnam grangs pa'i phyir de bzhin gshegs pa'i snying po bstan pas de bzhin gshegs pa'i snying po ston te/yang dag pa ma yin pa'i bdag tu rnam par rtog pa'i lta ba ltung ba'i bsam pa can dag rnam par thar pa gsum gyi spyod yul la gnas pa bsam pa dang ldan zhing myur du bla na med pa yang dag par rdzogs pa'i byang chub mngon par 'tshang rgya bar ji ltar 'gyur zhe na/blo gros chen po de'i don du de bzhin gshegs pa dgra bcom pa yang dag par rdzogs pa'i sangs rgyas rnams de bzhin gshegs pa'i snying po ston pa mdzad do/ /de lta bas na 'di ni mu stegs byed bdag tu smra ba dang mtshungs pa ma yin no//blo gros chen po de lta bas na mu stegs byed kyi lta ba rnam par zlog pa'i phyir/ de bzhin gshegs pa'i snying po bdag med pa'i rjes su 'jug par bya'o/ /'di lta ste/ chos stong pa nyid dang / skye ba med pa dang / gnyis ma yin pa dang /rang bzhin med par bstan pa 'di ni byang chub sems dpa' rnams kyi grub pa'i mtha' bla na med pa'o zhes gsungs so/ /de bzhin gshegs pa la log par rtog pa ni kha cig na re don dam pa'i bden pa ni cir yang ma grub pas shes pa snga ma bas gsal ba cig kho na bsgom mo zhes zer te/de la smras pa/ gang shes pa la dmigs pa de ni don dam pa'i bden pa bsgom pa yin te/ dper na yid kyi rnam shes chos kyi skye mched 'dus byas bzhi'i yul can lta bu'o/ /rnal 'byor pa 'di yang shes pa snga ma bas gsal ba la dmigs pas khyab par byed pa 'gal ba dmigs pa ma yin no//don dam pa'i bden pa mi bsgom pas ni so so'i skye bo sa las 'da' bar mi 'gyur te/ spros pas chog go/ /kha cig na re rang rig pa gcig pa kho na bsgom zhes zer te/ de la smras pa/ bdag nyid rig pa yin pa'i phyir//sems spyod yul du gyur pa'i shes/ /rnam par dag pa'ang yang dag tu/ /rigs sam 'on te mi rigs sam/ /zhes bya bas sun dbyung bar bya'o/ /kha cig na re rang rig pa las bsgom pa zhes ji skad bya/ shes pa gzhan cig rigs par bya ste/ de bas na chos nyid kho na rig par bya'o zhes zer te/de la smras pa/ 'o na ni gnyis su rtog pa'i phyir chos nyid bsgom pa ma yin te/ bum pa dang de 'dzin pa bzhin no/ /de bas na de gnyi ga la/ shes bya med phyir gzhan rig min/ /gnyis su med phyir bdag rig min/ /gal te brtags na yang dag min//zhes bya ba la sogs pas sun phyung ngo / /kha cig na re shes pa rig pa med pa cig kho na bsgom mo zhes zer te/ de la smras pa/ des ni mu stegs dpyod pa pa'i lta ba khas blangs pa yin te/ de ni 'di skad du/ shes pa rnam pa dang bcas pa ma yin pa 'ba' zhig tu ma zad kyi rang rig pa yang ma yin no zhes zer ro//de ni rnal 'byor par yang ji ltar 'gyur/ spros pas chog go/ /kha cig na re mnyam par bzhag pas yul du byed pa kho na'o zhes zer te/ de la smras pa/ gang yul du byed pa de ni don dam pa'i yul can ma yin te/dper na mig gi rnam par shes pa lta bu'o/ /rnal 'byor ba'i shes pa 'di yang yul du byed pas rang bzhin 'gal ba dmigs pa'o/ /kha cig na re yul du mi byed pa kho na yin no zhes zer te/ de la smras pa/ gang de kho na yul du ye mi byed pa de ni kho na mthong bar mi 'gyur te/dper na mi tha mal pa'i shes pa lta bu'o/ /rnal 'byor pa'i shes pa 'di yang de kho na ye yul du ye mi byed pas khyab par byed pa'i mi dmigs pa'o/ /kha cig na re rtsol ba byas na chos nyid dang 'gal te ye mi bcos par gzhag ste/ ma brtsal bar bzhag na bsgom par 'gyur/zhes 'byung bas go ba tsam gyis chog zer te/ de la smras pa/ mngon sum dang 'gal ba kun tu spyod pa chu yod par go bas skom pa sel bar 'gyur ram/ zas yod par go bas bkres pa sel lam zhes bya ba la sogs pas lan gdab par bya'o/ / mnyam par gzhag pa'i gnas skabs su lhan ne 'dug bzhin du rtsol ba skyon du 'gyur ba la dgongs nas gsungs pa ma go bar tshig gi rjes su 'brang nas smra ba yin te/ bde bar gshegs pas ni/ shes rab kyi pha rol tu phyin pa las/ sems g.yengs pa la ni 'jig rten pa'i bsam gtan bskyed pa yang dkon na/'jig rten las 'das pa'i bsam gtan lta ci smos de bas na sems bskyed ma thag nas mi g.yengs par bya'o/ /zhes gsungs so/ /kha cig na re mngon sum bsgom mo zhes zer te/ de la smras pa/ dbang po'i mngon sum ni dngos po'i yul can yin pas de ni ma yin no//yid kyi mngon sum ni de dang skad cig gcig la 'jog par byed pas mi srid do/ /rang rig pa ni bems po las log pa tsam yin pas de mi srid do/ /rnal 'byor gyi mngon sum 'jig rten pa'i sa ni mi srid do/ /'jig rten las 'das pa yin na ni 'phags pa yin par thal bar 'gyur ro zhes bya bas sun dbyung ngo //kha cig na re nga la bsam gyis mi khyab pa'i man ngag yod de/ de la blo gnas pa ni mi tha mal ba'i shes pa ngal dub ma khyer ba'i shes pa lhang nge ba cig yod pa de ni 'dra ba de bsgom pa yin no zhes zer te/de la smras pa/ bsam gyis mi khyab pa bya ba de ci la bya/ gal te sems sam/ gal te sems kyi chos nyid de la zer te/ de gsang sngags na yod pa yin te/ mdo sde'am/ pha rol tu phyin pa nas de mi ston te/ chos thams cad rang bzhin med bya ba tsam la 'jog pa las rang gi sems kyi chos nyid yin par ni mi 'jog go zhe na/gsang sngags la ni dgag pa mi byed mod kyi/ 'on kyang de ni mdo las kyang gsungs te/ chos thams cad dmigs su med cing sems pa med pa rin po che brtsegs pa bstan pa'i mdo las/de bzhin gshegs pas 'jam dpal la smras pa/ 'jam dpal bsam gyis mi khyab pa'i dbyings zhes bya ba la bsam gyis mi khyab pa'i dbyings zhes bya ba de gang yin/ 'jam dpal gyis gsol ba/ bcom ldan 'das bsam gyis mi khyab pa'i dbyings zhes bgyi ba ni/dbyings gang sems ma mchis pa/ sems grol bar bgyi ba ma lags pa/ sems dgag par bgyi ba ma lags pa bsam pas rab tu dbye ba bgyi ba ma lags mod kyi/ 'on kyang bcom ldan 'das sems nyid bsam gyis mi khyab pa'i dbyings lags so//de ci'i slad du zhe na/ sems la sems ma mchis pa lags kyi/ sems nyid sems ma lags pas sems ni ngo bo nyid kyis ma mchis pa'o/ /sems ji lta ba bzhin pas sems ma mchis pa nyid sems lags te/ / bcom ldan 'das 'di ni bsam gyis mi khyab pa'i dbyings lags so zhes gsungs te/ de ni rnal 'byor spyod pa'i dbu ma'i khungs yin te/ bye brag med do/ /'on kyang sems tha mal pa'i sems de lta bu ni lung du ma bstan pa'i sems yin pa'i phyir/ chos nyid bsgom pa ma yin no//kha cig na re rang gi kun gzhi byang chub kyi sems dus gsum du 'dus ma byas pa mi 'gyur ba rtag pa de ngo shes na/ byang chub dang chos nyid la sogs pa de la zer bas/ de ni pha rol tu phyin pa'i theg pa ltar ha cang ches gsang sngags zab mo nas kyang mi ston to/ /'di ni de bzhin gshegs pa'i snying po yin/bstan pa'i snying po yin pas de rtag go/ /zhes zer te/ de la smras pa/ gsang sngags pa ni dgag pa mi byed mod kyi/ 'on kyang rim gyis drang ba'i dbang du mdzad nas/ 'phags pa lang kar gshegs pa las/ theg pa gsum du yang gsungs pa//ji srid 'du shes yod kyi bar/ /theg pa'i mtha' la thug pa med/ /ces bya ba la sogs pa yang gsungs so/ /yang sdong po bkod pa'i mdo las/ theg pa bcu bzhi gsungs pa la/ nges pa'i don du ni theg pa gcig las med par gsungs chos kyi dbyings gcig las med pa'i phyir ro//de skad du/ 'dus pa chen po'i le'u las/ theg pa gcig tu yang dag par 'du ba ni theg pa thams cad theg pa gcig tu mnyam pa nyid du yang dag par 'du ste/ chos kyi dbyings dbyer med pa la 'jug par tshul gcig go zhes gsungs so//de lta bas na chos nyid la dgongs pa'i dbang gis sems nyid ye nas rnam par dag pa gsungs pa yin te/ blo gros chen pos zhus pa bzhin no/ /de ni rnal 'byor spyod pa'i dbu ma pas yang 'dod do/ /bye brag med do/ /'on te nged 'dus ma byas su rtog dbu ma pa ni de lam 'dod pa byed par yod do zhe na/'phags pa 'jam dpal rnam par 'phrul pa las/ 'dus ma byas la gang rtog dang / /mya ngan 'das la gang rtog pa/ /gnyi ga bdud kyi spyod yul yin/ /de ni mkhas pa rnams kyis bshad/ /ces gsungs so/ / 'on te chos can rang de ltar yin no zhe na/ mu stegs rig byed kyi mtha' gsang bar smra ba khas blangs pa yin te/ de dag ni 'di skad ces/ bdud rtsi'i thigs pa gsang ba las bstan pa/ rnam rig tsam ni rtag tu rnam par dag /'di ltar sangs rgyas rtag tu 'gro ba yin//blang dang dor ba med ces rab brtag pa/ /tshangs pa mya ngan med ces rtag gnas byos/ /zhes 'byung ngo / /de bas na de bzhin gshegs pa'i dgongs pa ma go bar tshig tsam gyis gzhan la rlom par byar mi 'dod do/ /spros pas chog go/ /kha cig na re ci la yang mi rtog mod kyi/'on kyang don dam pa byang chub kyi sems bsgom pa yin te/ byang chub ni spros pa dang bral ba nam mkha' lta bu yin la/ de la sems dpas don dam pa byang chub kyi bsgom pa zhes bya ste/ de skad du/ byang chub nam mkha'i mtshan nyid de/ /kun tu rtog pa thams cad spangs//gang zhig de rtogs 'dod pa ni/ /byang chub sems dpa' zhes bya'o/ /zhes gsungs te/ de dbu ma pa la med do zhes zer na/ de la smras pa/ ngo bo'i sgo nas smra'am/ brtags nas smra/ gong ma ltar ro zhe na/ 'o na ni 'phags par khas blangs pas re zhig gzhag go/ /'on te brtags pa yin no zhe na/ de la smras pa/ dbu ma pa yang de 'dod de/ slob dpon ka ma la shI las don dam pa byang chub kyi sems de ni 'jig rten las 'das pa spros pa'i mtha' dang bral ba zhes bya ba la sogs gsungs te/de 'grub pa'i rgyu la yang rtog pa dang / dpyod pa dang bral zhes gsungs pas bye brag med do/ /kha cig na re thos pa'i dus su bsam pa byed pa de bsam pa'i shes rab yin te/ phyi nas zhi gnas la bslabs nas de phyin chad bsgom pa gcig pu yin no/ / zhes zer te/ de la smras pa/ sngar thos pa'i dus su bsam pa de ni thos pa'i grangs su 'gro ste/ gzhan du na thos pa chud zos pa yin no/ /phyi nas kyang bsam dgos te/ bsam pa'i shes rab kyi skabs su bstan pa bzhin no/ /de bas na bsgom pa gcig pu byed pa yin zhes byar mi rung ngo //kha cig na re de la gnyis te/ so sor rtog pa'i lhag mthong bsgom pa dang / /rnam par mi rtog pa'i lhag mthong bsgom pa'o/ /zhes zer te/ de la ni nyes pa med kyi/ 'on kyang de so sor rtog pa'i lhag mthong de ni bsam pa'i shes rab tu bsdu ste/de skad du/ bsgom pa'i shes rab kyi lhag mthong gi dbang du byas nas/ 'phags pa dgongs pa nges par 'grel pa las/ lhag mthong ni thos pa dang bsam pa rnam par dag pa'i rgyu las byung ba yin no zhes gsungs pa dang / slob dpon ka ma la shI las kyang / thos pa dang bsam pa las byung ba'i shes rab kyi rtog pa gang yin pa de nyid bsgoms pa las byung ba'i shes rab kyis bsgom par bya ba bzhin du ma yin te/ rta dkyus kyis bstan nas rgyug pa bzhin no zhes gsungs so/ /kha cig na re rjes su dpag pa kho na bsgom mo zhes zer te/ de la smras pa/ gal te rjes su dpag pa'i rgyun yin pas rjes su dpag pa'i shes pa zer ram/ 'on te mnyam par gzhag pa na yang rtags la brtan nas yang yang skyed par byed/ phyi ma ltar yin no zhe na/ de bsgom zhes mi bya ste/ bsam pa'i shes rab yin pa'i phyir ro//kha cig na re rtog pa med pa kho na bsgom mo zhes zer na/ de la smras pa/ de ni mi srid de/ mngon sum yin par thal 'gyur ro/ /kha cig na re bsam pa'i shes rab kho nar goms par byed pa yin te/ bsgom zhes bya ba ni sngar mthong ba goms par byed do/ / mthong ba'i lam gyi rjes la bsgom pa bzhin no/ /da lta ni ma mthong bas bsgom zhes mi bya'o/ /de bas na 'jig rten chos kyi mchog man chad bsam pa'i shes rab yin no zhes zer na de la smras pa/ bsam pa'i shes rab ni mi spong mod kyi/ 'on kyang bsgom pa yang yod de/'phags pa dgongs pa nges par 'grel pa las/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi ting nge 'dzin gnyis ni 'jig rten chos kyi mchog man chad la gsungs pa'i phyir ro/ /slob dpon ka ma la shI las kyang /'di ni zhi gnas dang lhag mthong zung du 'brel bar 'jug pa'i lam ste/ rnam par rtog pa dang bcas pa dang / rnam par mi rtog pa'i gzugs brnyan la dmigs pa'o/ /zhes gsungs so/ /yang kha cig na re da lta rnam par mi rtog pa bsgom pa yang zhi gnas kho na bsgom pa yin te/lhag mthong ni mi skye zer te/ de la smras pa/ gal te so sor rtog pa'i shes rab kyis brtags nas bsgoms pa yin nam/ 'on te ma brtags par bsgom pa la bya/ gal te 'og ma la zer na rigs kyi/ so sor rtog pa sngon du song nas bsgom pa ni zhi gnas dang lhag mthong zung du 'brel par sgom pa yin par slob dpon ka ma la shI las gsungs so//kha cig na re da lta nas sa bcu man chad lhag mthong so sor rtog pa'i shes pa kho na bsgom pa yin te/ 'phags pa mya ngan las 'das pa chen po las/nyan thos rnams kyis ni de bzhin gshegs pa'i rigs mi mthong ste/ zhi gnas kyi shas che ba dang / lhag mthong gi shas chung ba'i phyir ro/ /byang chub sems dpas ni mthong ste mi gsal la/ lhag mthong gi shas che ba'i phyir dang / zhi gnas kyi shas chung ba'i phyir ro/ /de bzhin gshegs pas ni thams cad gzigs te zung du 'brel ba'i phyir ro/ /zhes gsungs so zhe na/ de la smras pa/ de ni mi spong ste/ 'on kyang de ni slob pa dang mi slob pa'i lam gyi bye brag bstan pa yin te/ slob pa'i lam re nas med par ni ma gsungs te/zhi gnas shas che ba dang / lhag mthong shas che ba'i sgra yod pa'i phyir ro/ /gzhan yang lhag mthong gcig pos bden pa mthong na ni/ 'phags pa dgongs pa nges par 'grel ba las/ 'jig rten las 'das pa'i dge ba thams cad zhi gnas dang lhag mthong gi 'bras bu yin no zhes gsungs pa dang 'gal bar 'gyur ro//de lta bas na so so'i skye bos kyang gnyi ga slob dgos par slob dpon ka ma la shI las kyang bstan to/ /kha cig na re zhi gnas dang / lhag mthong zung du 'brel ba zhes bya ba ni sngar gyi zhi gnas bsgoms nas/phyi nas lhag mthong bsgom pa la gsungs pa yin te/ gang zag cig gi rgyud la ldan zhes bya ba'i don yin te/ de lta ma yin na skad cig la chos mi mthun pa gnyis tshogs mi srid do/ /zhes zer te/ de la smras pa/ gang du snga phyi yod pa de dus mtshungs pa ma yin te/ dper na dpyid dang ston bzhin no/ /dbyar la sogs pa'i dus su zhi gnas bsgoms nas dgun la sogs pa'i dus su lhag mthong bsgom pa 'di yang snga phyi yod pa'i rang bzhin 'gal ba dmigs pa'o/ /gang skad cig gcig la mi 'chogs pa de ni shas che chung mnyam mi dgos te/dper na khyim na 'dug pa'i glang dang / zhing thog na 'dug pa'i glang lta bu'o/ /rnal 'byor pa'i zhi gnas dang / lhag mthong yang skad cig ma gcig la mi 'tshogs pas khyad par byed pa mi dmigs pa'o/ de lta'o/ /zhe na/ 'o na ni gang gi tshe lhag mthong bsgom pas shes rab shin tu shas che bar gyur pa de'i tshe/ zhi gnas chung ba'i phyir mar me rlung la bzhag pa bzhin du sems g.yos pas de kho na shin tu gsal bar mthong bar mi 'gyur te/ de'i phyir de'i tshe zhi gnas de bsgom par bya'o//zhi gnas kyi shas che na yang gnyid kyis log pa'i mi bzhin du de kho na shin tu gsal bar mthong bar mi 'gyur te/ de lta bas na de'i tshe yang shes rab bsgom par bya'o/ /zhes gsungs pa de ji ltar drang bar bya/ gal te da lta lhag mthong bsgom pas shes rab shas che ba'i phyir sems g.yo ba de'i tshe/sang dgun gyi zhi gnas bsgom par bya'o zhes bya ba la sogs par thal bar 'gyur ro/ /de lta bas na gang gi tshe glang gnyis zung du 'brel bar mnyam du zhugs pa de bzhin du gnyis ka mnyam du zhugs par gyur pa de'i tshe/ ji srid du lus dang / sems la gnod par ma gyur pa de srid du mngon par 'du byed pa med par gnas par bya'o zhes gsungs pa de yang dus tha dad pa'i sems nyid mnyam du 'jug pa dang / glang gcig khyim na 'dug pa dang / glang gcig zhing thog na 'dug pas zhing rmor 'dod pa la gsungs par thal bar 'gyur ro//chos mi mthun pa gnyis zhes bya ba de yang grub ste/ 'di ltar gang yang rung ba gcig med na ni mi skye la/ gnyis ka yod la skyed pa de gnyis ni de skyed pa la mthun pa yin te/ dper na mig dang rna ba gnyis gang yang rung ba gcig med na bum pa la sogs pa la mig gi rnam par shes pa mi skye la/de gnyis yod na skye ba de skyed pa la mthun pa lta bu'o/ /zhi gnas dang lhag mthong de gnyis kyang gang yang rung ba gcig med na ni/ yid kyi rnam par shes pa chos nyid la gsal bar mi skye la gnyis ka yod na skye ba rang bzhin gyi gtan tshigs so//de skad du/ 'phags pa chos kun bgro ba las/ mnyam par gzhag pas yang dag pa ji lta ba bzhin du shes par 'gyur ro zhes gsungs so/ /mnyam par gzhag pa ni ting nge 'dzin las gzhan med do/ /rigs pa drug cu pa las kyang / sems rtse gcig pa las yang dag pa ji lta ba bzhin du shes par 'gyur ro zhes gsungs te/spros pas chog go/ /kha cig na re gang don dang ma phrad par don gyi rnam pa cig 'byung ba de ni rtog bcas yin te/ dper na du ba la brten nas skyes pa'i shes pa la rgyab kyi mir snang ba rtog bcas yin pa lta bu'o//so so skye bo'i shes pa 'di yang chos nyid dang ma phrad bzhin du chos nyid kyi rnam par 'byung bas rtog bcas yin te rang bzhin gyi gtan tshigs so/ /chos nyid ni yod med gang yang ma yin pa ci'i rnam par yang ma byung ba cig dgos te/ des spyi rnam pa bsgom zer ba ni brjod pa dang 'brel rung ba'i rtog pa yod par 'gyur bas de ni chos nyid bsgom pa bya bar 'gro'o//yang na byis pa chung ngu'i shes pa dang 'dra bar rnal 'byor pas chos nyid bsgom pa tha snyad 'dogs mi shes par 'gyur ro/ /de bas na rtog bcas bsgom pa yang ma yin/ chos nyid kyi rang gi mtshan nyid mthong mi srid pas rtog pa med pa'i shes pa yang ma yin no zhes zer ro//de la smras pa/ 'o na ni rtog bcas dang rtog med gnyis kyi shes pa thams cad la khyab pa'i phyir/ shes pa gzhan dag kyang ma 'byung ste/ khyab par byed pa log na khyab pa yang bsdogs pa yin no//de lta bas na/ rnal 'byor pas yon tan khyad par can thob par mi 'gyur te/ med pa las gang gis rgyu las 'bras bu yang mi rung ste/ ri bong gi rwa la sogs pa bzhin no/ /gal te med par khas mi len par skyon 'dogs sam zhe na/'o na yod na rtog bcas yin nam rtog med yin/ der smra mi 'dod do zhe na/ gal te gnas skabs de bstan par/ /bya min zhes bya rkang brkyang ste/ /grags pas dad pa bskyed pa yi/ /dad ldan rnams la mdzes pa yin/ /zhes bya bas sun dbyung ngo / /'on te rtog pa dang bcas pa'am rtog pa med par brjod du mi 'dod do//shes pa dper na mda' sgro byi ba 'dra ba brkyang ba zor mtho ba cig yin zhe na/ de ni 'di skad du/ rtog bcas ma yin rtog med min/ /rnam pas nye bar ma bsgoms shig /snga na bas ni zor mtho ba'i/ /shes pa yang dag nges par gnas/ zhes bstan par 'gyur bas re zhig gzhag go/ /kha cig na re de lhag mthong gi gnas skabs na gsal zhes bya ba ni yul med pa la gsal ba yin no zhes zer na/ de la smras pa/ 'o na zhi gnas kyi shes pa dang 'dra bar thal bar 'gyur ro/ /gal te zhi gnas kyi dmigs pa yod med du 'jug la/ lhag mthong gi ni de gnyis gang la yang mi 'dzin pa mi 'dra zhe na/de nyid kyi phyir yul la 'dogs pa yin te/ mi rtog ces btags pa dang 'dra'o/ /kha cig na res dang po yan chad ni mi rtog pa bsgom pa yin gyi 'jig rten chos kyi mchog man chad ni/ so sor rtog pa'i shes rab la bsgom pa yin te/ de skad du/ 'phags pa dkon mchog brtsegs pa las/ 'od srungs 'di lta ste/ dper na shing gnyis drud pa las me byung nas shing de nyid sreg pa de bzhin du yang dag par so sor rtog pa nyid las ji lta ba bzhin du shes pa'i me byung na/ gtsub shing gtsubs pa'i me bzhin du rtog pa'i shing sreg go zhes gsungs so//'phags pa lang kar gshegs pa las kyang / sems tsam la ni rab brten nas/ /phyi rol don la mi rtog go/ /de bzhin nyid kyi dmigs gnas dang / /sems tsam las kyang bzla bar bya/ /sems tsam las ni 'das nas su/ /snang ba med las 'da' bar bya//snang med gnas pa'i rnal 'byor pa/ /de yis theg pa chen po mthong / /zhi ba lhun gyis grub pa'i gnas/ /smon lam dag gis rnam par sbyangs/ /ye shes dam pa bdag med par/ /snang ba med par mthong bar 'gyur/ /zhes gsungs so/ /de bas na de dag so sor rtog pa'i shes rab rim gyis bsgom pa yin gyi/cir yang mi rtog par bsgom pa ni ma yin no/ /da ltar kha cig cir yang mi rtog pa bsgom zer ba ni/ ston mon mun gyi rjes su slob pa yin te/ rim gyis 'jug pa'i bsgom lugs ni ma yin no/ /'o na gzungs 'grel las/ bsgom pa'i rim pas ni mi rtog pa skad du gsungs pa zhe na/de ni sa dang po yan chad kyi yin no/ /yang na spros pa'i phyogs re bcad pa la dgongs pa yin te/ las dang po ni cir yang mi rtog pa la blo gnas mi srid do/ /de skad du/ bsgom pa'i rim pa tha mar mdzad pa las/ yang rnal 'byor pa ting nge 'dzin la snyoms par zhugs pa las/gal te yid kyi rnam par shes pa yod na ni gdon mi za bar ci zhig la dmigs dgos te/ so so'i skye bo rnams kyi shes pa ni glo bur du dmigs pa med par mi 'gyur ro/ /ci ste med na ni de'i tshe ji ltar chos rnams kyi ngo bo nyid rtog par 'gyur/ gnyen po gang gis ni nyon mongs pa spong bar 'gyur/bsam gtan bzhi po ma thob pa'i so so'i skye bo'i sems ni 'gag par 'gyur mi srid do zhes gsungs so/ /zhes zer na/ de la smras pa/ re zhig dang por so sor rtog pa'i shes rab bsgom mo zhes zer ba de ni bden te/ de bzhin gshegs pas gsungs pa la/ slob dpon ka ma la shI las kyang / de lta bas na rnam par mi rtog pa'i ye shes bskyed par 'dod pas yang dag so sor rtog pa'i mtshan nyid lhag mthong la thog mar bsgom par bya ste/ des mtshan ma rnams yongs su spong bar 'gyur ro/ /zhes gsungs so/ /'on kyang spyad par bya ba cung zad yod do/ /so sor rtog pa zhes bya ba ni sgra 'jug pa'i rgyu mtshan gnyis yod de/zhi gnas grub nas gang zag dang chos la bdag med par rtogs pa dang tshol bar byed pa bsam pa'i shes rab la zer ba dang / mi rtog mi 'byed mi tshol ba byed pa bsam pa'i shes rab la zer ba dang / mi rtog mi 'byed mi tshol mi 'gyur mi g.yo ba la bya'o//de la bsam pa'i shes rab kyi dbang du mdzad nas/ 'phags pa ting nge 'dzin gyi rgyal po las/ gal te chos la bdag med so sor rtog /so sor de rtag gal te sgom byed na/ /de nyid mya ngan 'das thob 'bras bu'i rgyu/ /rgyu gzhan gang yin des ni zhir mi 'gyur/ /zhes gsungs so/ /'phags pa dgongs pa nges par 'grel pa las/de lus shin tu sbyangs pa dang / sems shin tu sbyangs pa thob nas de nyid la gnas te/ sems kyi rnam pa spangs nas ji ltar bsam pa'i chos de dag nyid nang du ting nge 'dzin gyi spyod yul gzugs brnyan du so sor rtog par byed do/ /mos par byed do/ /de ltar ting nge 'dzin gyi spyod yul gzugs brnyan de dag la shes bya'i don de rnam par 'byed pa dang /rab tu rnam par 'byed pa dang / yongs su rtog pa dang / yongs su dpyod pa dang / bzod pa dang / 'dod pa dang / bye brag 'byed pa dang / lta ba dang rtog pa gang yin pa de ni lhag mthong zhes bya ste/ de ltar na byang chub sems dpa' lhag mthong la mkhas pa yin no zhes gsungs so//rnam par mi rtog pa la 'jug pa'i gzungs kyi 'grel ba las kyang bsdus pa'i don bdun pa'i skabs su der yang ji skad bstan pa'i mtshan ma snang ba la sems bzhag nas bying ba dang rgod pa la sogs pa zhi bar byas te zhi gnas bsgrub la yang dag par so sor rtog pa'i mtshan nyid yid la mi byed pa des/mtshan ma de dag yongs su spong ngo / /der yang ji skad thos pa dang bsam pa'i don la nges pa'i tshul gyis so sor brtag par bya ste/ rten cing 'brel bar 'byung ba bsgom pa'am 'ong ba dang 'gro ba med par so sor brtag pa'am/ bdag dang gzhan dang gnyis ka las mi 'byung bar dpyad pa'am/cha la so sor brtag pa'am/ mdor na ji ltar rtog pas kyang rung ste/ dngos po med pa la nges pa skye bar 'gyur ba de ltar so sor brtag par bya'o/ /zhes gsungs so/ /dngos po med pa ni chos med pa ste chos kyi dbyings la dgongs so/ /zhes de nyid las gsungs so/ /mi rtog / mi 'byed/ mi 'tshol/ mi 'gyur/ mi g.yo zhing / ji lta ba bzhin du so sor rtog pa'am/ rtog pa tsam la lhag mthong dang po so sor rtog pa zhes gsungs pa ni 'phags pa chos thams cad dmigs su med cing sems pa med pa rin po che bsags pa'i bstan pa'i mdo las/ bcom ldan 'das kyis bka' stsal pa/'jam dpal yang dag par so sor rtog pa zhes bya ba de chos gang gi tshig bla dgas yin/ 'jam dpal gyis gsol pa/ bcom ldan 'das yang dag par so sor rtog pa zhes bgyi ba ni so sor rtog pa gang / chos gang la yang tha dad par yang mi bgyid gcig tu yang mi bgyid de/ bcom ldan 'das 'gyur ba ma mchis pa rnam par mi rtog pa'o//bcom ldan 'das yang dag par so sor rtog pa zhes bgyi ba de ni yang dag par so sor rtog pa ma mchis pa'i tshig bla dgas so/ /bcom ldan 'das yang dag par so sor rtog pa la brten te/ bdag ni so so'i skye bo'am/ 'phags pa nyan thos snyam du de ltar mi sems so//de ci'i slad du zhe na/ 'di ltar chos gang so so'i skye bo'am/ 'phags par 'gyur ba'i chos de yang dag par rjes su mi mthong ba'i slad du'o/ /bcom ldan 'das yang dag par so sor rtog pa la brten nas/ rigs kyi bu'am rigs kyi bu mo chos kyi dbyings kyi tshul gyis de ltar snang ba lags te/ chos gang la yang mnyam pa nyid du yang mi bgyid mi mnyam par yang mi bgyid/so so'i skye bo'i chos ni mi mnyam pa'o zhes rtog par mi bgyid/ 'phags pa'i chos ni mnyam pa'o zhes rnam par rtog par mi bgyid do/ /de ci'i slad du zhe na/ 'di ltar dmigs pa gang mnyam pa'am/mi mnyam par bgyid pa de la mi dmigs pa'i slad du'o/ /gang gi mnyam pa'am mi mnyam par bgyid pa de yang dge slong de la ma mchis so/ /de ltar rnam par mi rtog pa'i dge slong ni bdag rnam par mi rtog go snyam du de ltar 'dzin pa yang ma mchis so/ /zhes gsungs so/ /rnam par mi rtog pa'i gzungs 'grel de nyid las/bsdus pa'i don brgyad pa'i skabs su yang dag pa'i don bsgoms pa'i stobs kyis chos thams cad ngo bo nyid med par rtog pa'i rnam pa skye zhing rang rig pa dang / bdag nyid kyang ngo bo nyid med par rtog pa skye na/ rnal 'byor pa'i ye shes kyis mthong ngo zhes bstan to//zhes gsungs so/ /'phags pa 'od srungs kyis zhus pa'i 'grel pa las/ yang dag pa ji lta ba bzhin du so sor rtog pa zhes gsungs so/ /de bas na sgra 'jug pa'i rgyu mtshan gnyis yod do/ /zhes bya ba de 'grub bo/ /'on te nyi khri snang ba las/ mtha' ma mthong ba'i bya ba bzhin no/ /zhes gsungs pa de ji ltar drang /de yang mtha' ma mthong nas phyir log ste da ci'i sar 'dug pa bzhin du/ so sor brtags nas ma mthong bas yang so sor rtog ces gsungs pa ni ma yin te/ de lta na ni yang ltar 'gro bya bar 'gyur gyis/ da ci'i sar 'dug ces mi bya'o/ /de lta bas na 'di skad du/ dper na bya de rgya mtsho'i mtha' bltas pas ma mthong ste 'gro sa med nas 'dug pa de bzhin du bsam pa'i shes rab so sor rtog pa'i shes rab kyis brtags nas ma mthong ba la ting nge 'dzin gyis grogs byas nas de las mi g.yo bar lhan ne yod kyi rnam par shes pa 'dug pa yin no zhes gsungs pa yin no//gtsub shing gis gtsubs pa'i mes bsregs pa'i zhes bya ba de yang gtsubs pas me lam gyis 'bar bas bsregs pa bzhin du btsal phye brtags pas/de'i 'phro kho nas ye shes lhag gis skye zhes gsungs pa ma yin te/ de ni 'di skad du/ so so'i skye bo sa las rtags la brten nas cir yang ma grub par rtog pa la ting nge 'dzin gyis grogs byas nas zhi gnas dang lhag mthong cha mi snyoms na mnyam/mnyam na ji srid nus kyi bar du 'dug pa las 'bad pa dang / bsgrim pa dang / rtsol ba'i sgo nas 'di lta ste dper na mes me'i bya ba byed 'dod cing me don du gnyer ba'i mi la la zhig gis gtsub gtan gyi steng du gtsub shing gtsubs te de mngon par gtsubs shing 'bad par byed/sgrim par byed/ rtsol bar byed na/ des 'bad pa dang / sgrim pa dang / rtsol ba 'di'i sgo nas dang po kho nar gtsub gtan las drod skye bar 'gyur ro/ /drod de nyid mngon par 'phel ba na rtse mo 'byung zhing du ba 'thul bar 'gyur ro/ /rgya cher mngon par 'phel bar gyur pa na me lce med pa'i me 'phel bar 'gyur/me byung ma thag kho nar me lce 'byung bar 'gyur ro/ /me lce 'byung zhing 'bar ba des me'i bya ba byed do/ /de bzhin du ji ltar mngon par gtsub shing 'bad pa dang / bsgrim pa dang / rtsol bar byed pa de ltar na dbang po lnga po dag la kun tu brten cing goms par byed/lan mang du byed par blta bar bya'o/ /ji ltar dang po kho nar gtsub gtan nas drod skye bar 'gyur ba de ltar ni me lta bu'i gang zag dang chos la bdag med pa'i chos nyon mongs pa rnams bsreg pa skye ba'i sngon rol du 'gro zhing rgyur gyur pa'i dro bar 'gyur ba dag blta bar bya'o/ /ji ltar drod de nyid mngon par 'phel ba na rtse mo 'byung bar 'gyur ba ltar ni rtse mo dag blta'o//ji ltar du ba 'thul bar 'gyur ba de ltar ni bden pa dang rjes su mthun pa'i bzod pa rnams blta bar bya'o/ /ji ltar rgya cher mngon par 'phel bar 'gyur ba nas me lce med pa'i me 'byung bar 'gyur ba de lta na ni 'jig rten pa'i chos kyi mchog rnams blta bar bya'o//ji ltar me byung ma thag kho nar me lce 'byung bar 'gyur te/ me lce 'byung zhing 'bar ba des me'i bya ba byed pa de ltar na gang dag 'jig rten pa'i chos kyi mchog gis yang dag par zin pa'i stobs lnga po dag mjug thogs su byung ba 'jig rten las 'das pa spros pa mtha' dag dang bral ba na shin tu gsal ba ma mthong ba mthong ba byung bas spyi'i rnam pa la rang gi mtshan nyid du shes pa'i rtsol ba dang /'bad pa dang bral ba de tsam la sreg ces gsungs pa yin te/ rang gi mtshan nyid mtshan nyid med par ma mthong ba des rtags la brten nas mtshan nyid thams cad dang bral bar nges pa tsam la blo gnas pa de 'khrul mnyam pa'i shes pa skye bas sreg ces bya ste/'od srungs kyis zhus pa las/ yang dag pa ji lta ba bzhin du rtogs pas tshig pa dang 'dra ste zhes gsungs so/ /de bas na me 'byung ba'i rgyu mes sreg pa dang 'dra bar mi rtog pa'i ye shes skye ba'i rgyu rtags la brten nas cir yang ma grub par rtog pa de ting nge 'dzin gyis grogs byas nas zhi gnas dang lhag mthong zung du 'brel ba la goms pas cir yang ma grub pa'am/cir yang ma mthong ba'i ye shes skyes pa na rtags la brten nas nges pa tsam la bsgom mi dgos te/ de dang bral ba yin no zhes bstan to//langs pa'i gnas skabs su 'byed pa dang 'tshol ba'i shes pa yang rtag tu mi 'bral bar brten dgos te/ 'phags pa gtsug na rin po che las/ stong pa nyid kyi bsam gtan sbyin pa nas shes rab kyi bar du ma bral ba zhes gsungs so/ /'phags pa lang kar gshegs pa las/shes rab bsgom pa'i rim pa mdor bka' stsal te/ sems tsam pa ni bab brtan nas/ /zhes bya ba la sogs pa yang zhi gnas grub nas bsam pa'i shes rab kyi rim gyis nam yid ches kyi bar du brtag pa yin gyi/ brtags nas chos nyid re mos bsgom pa ma yin te/de skad du/ bsgom pa'i rim pa dang por mdzad pa las/ de ltar dmigs pa la sems brtan par byas nas shes rab kyis dpyad par bya ste/ zhes bya ba nas ye shes dam pa bdag med par snang ba med pas mthong bar 'gyur/ zhes gsungs pa'i bar du legs par bshad nas/ de ltar bsgom pa'i rim pa 'dis de kho na bsgom par bya'o zhes gsungs te des ni bsam pa'i shes rab kyis yid ches par goms par bya zhes gsungs pa yin no//des na yid ches pas de'i don la bsgom pa'i dbang du mdzad nas/ da la bying ba dang rgod pa la sogs pa byung na sngar bstan pa bzhin du zhi bar bya'o zhes gsungs pas na/sngar zhi gnas 'ba' zhig bsgom pa'i skabs su bying rgod la sogs pa zhi bar byed pa de bzhin du/ bsam pa'i shes rab kyis so sor brtags pa'i don la zhi gnas dang lhag mthong zung du 'brel bar bsgom pa 'di la yang zhi bar bya dgos pa'i don to/ gang gi tshe chos thams cad ngo bo nyid med par dmigs pa la zhes gsungs pas ni spros pa phyogs re bcad pa la dgongs pa ma yin par bstan to//bying ba dang rgod pa la sogs pa dang bral zhing zhes gsungs pas ni zhi gnas kyi shas che ba dang / lhag mthong gi shas che ba dang / mi dga' ba dang / lung du ma bstan pa'i shes pa dang yang bral bar bya ba zhes bya ba'i don to//mngon par 'du byed pa med par shes pa 'jug par gyur pa de'i tshe zhes gsungs pas ni/ rtsol ba ma byas kyang lhan ne gnas zhes gsungs pa'o/ /zhi gnas dang lhag mthong zung du 'brel bar 'jug pa'i lam rdzogs pa yin no/ /zhes gsungs pa ni gnyis ka chung yang mnyam par zung du 'brel bar yod pas gdags su 'dod de/re zhig skabs der rtsol ba mi bya zhes gsungs pa'o/ /de'i tshe ji srid du nus pa de srid du mos pa'i stobs kyis/ mos pa spyod pa'i sa la gnas par bsgom par bya'o zhes gsungs pas ni/ 'phags pa shin tu chos thams cad kyi chos nyid mngon du ma gyur te/gtan tshigs la brten nas de lkog tu gyur pa'i don la nges pa skyes shing / de la so so'i skye bo'i sa na mos pa yin pas de la goms par bya'o zhes gsungs pa yin no/ /'di ni so so'i skye bo'i sa na yang mos pa sgo nas cir yang mi rtog pa bsgom pa yod do zhes bstan par 'gyur ro//de lta ma yin na rim gyis bsgom nas rnam par mi rtog pa'i ye shes skyes par byas nas yang mos pa'i sgo nas bsgom par thal bar 'gyur ro/ /'o na gnas skabs kyi bye brag bcu gnyis su 'gyur/ zhes gsungs pa dang / drod dang / rtse mo'i gnas skabs su phyi gzung ba'i yul spong /bzod pa dang / 'jig rten chos kyi mchog gi gnas skabs su nang 'dzin pa'i sems spong zhes bya ba la sogs pa gsungs pa de ji ltar drang zhe na/ bden mod kyi/ 'on kyang thams cad kyi chos nyid mtshan nyid thams cad dang bral ba tsam la yang mi gnas par bsgom yang spang bar bya ba'i rtog pa rags rim gyis 'brel te/de la dgongs nas gsungs pa yin no/ /'o na chos nyid rim gyis bsgoms na ni rim gyis 'brel bar rigs kyi cig car du bsgoms pas chos can spangs rgyu rim gyis 'bral ba mi rigs te/ cig car du spong ba rigs so zhe na/ 'o na sa dang por chos thams cad kyi chos nyid mngon sum du byed pa'i ye shes skyes pa'i bsgom pas spang bar bya ba'i nyon mongs pa yang dus gcig tu spong ba'i rigs so/ /de ni gos kyi dri ma dang 'dra ste rags rim gyis spong ba yin te/ de bas na dus gcig tu spong mi nus so zhe na/de bzhin no/ /'o na rnam par mi rtog pa la 'jug pa'i gzungs las kyang / rang bzhin la rnam par rtog pa dang / gnyen po la rnam par rtog pa dang / de kho na la rnam par rtog pa dang / 'thob pa la rnam par rtog pa'i mtshan ma dang / bzhi rim gyis spong bar gsungs pa zhe na/de yang zhi gnas grub nas bsam pa'i shes rab kyi so sor rtog pa'i shes rab kyis nam yid ches kyi bar du brtags pa la/ de'i don la mi rtog par bsgom mo zhes gsungs pa yin te/ de nyid las mtshan ma rnams yongs su spong ba yang dag par sbyor ba bsdus pa'i don bdun pa'i skabs su zhi gnas grub nas rang bzhin la rnam par rtog pa'i mtshan ma la so sor brtags nas de nas de spong ba na brgya la rnal 'byor pa dag 'di snyam du zhes bya ba la sogs pa yang rtog pa byung na/de la so sor rtog par bya'o/ /zhes gsungs pa yin te/ gal te rang bzhin la rnam par rtog pa la yid ches pa'i skabs su bzhi ga la yid ches na yang de nas bsgom zhes gsungs pa yin no//gal te yid ma ches na 'thob pa la rnam par rtog pa yang so sor rtog pa'i shes rab kyis spang bar bya ste/ des ni so so'i skye bos spang ba yin par de nyid las sa la sogs pa la rnam par rtog pa'i mtshan ma la kun tu spyod pa 'di dag ni las dang po'i rnal 'byor pa kho na'i ste/sa la zhugs pa la ni ma yin te/ de la mi srid pa'i phyir ro/ /zhes gsungs so/ /de nas bsam pa'i shes rab kyis mtshan ma bzhi car ma grub par yid ches pa'i don bsgom pa'i dbang du mdzad nas/de nas rnal 'byor pa mos pa'i dbang dang / shes rab kyis yod pa la sogs par rtog pa'i mtshan ma'i dra ba thams cad spangs la/ rtog pa med cing dpyod pa dang 'bral ba brjod pa med par ro gcig pa'i yid kyi de kho na nyid la mos nas mngon par 'du mi byed par shin tu gsal bar bsgom zhing 'dug par bya'o zhes bya ba la sogs pa gsungs pa des ni 'di skad du so so'i skye bos ting nge 'dzin la gnas nas bsam pa'i shes rab kyis so sor brtags nas mtshan ma thams cad la rtog pa'i dra ba spangs la cir yang mi rtog pa mos pa'i sgo nas bsgom zhing 'dug par bya'o zhes bstan pa yin te/spros pa phyogs re bcad nas bsgom zhes bya ba'am/ las dang po bcir yang mi rtog pa bsgom pa ni ma bstan to/ /bsgom pa'i rim pa bar du mdzad pa las kyang / de nas zhi gnas grub nas lhag mthong bsgom par bya ste/ 'di snyam du bsam par bya'o zhes bya ba nas/shes rab mchog gi bsam gtan pa zhes bya'o zhes bya ba'i bar du bsam pa'i shes rab bstan nas bsgom pa'i shes rab kyi gnas skabs su de ltar gang zag dang chos la bdag med pa/ de kho na la zhugs pa/ de yongs su brtag par bya ba blta bar bya ba gzhan med pas rtog pa dang /dpyod pa dang bral ba brjod du med pa dang gcig tu 'gyur ba'i yid la byed pa rang gi ngang gis 'jug pa mngon par 'du byed pa med pas de kho na nyid la shin tu gsal bar bsgom zhing 'dug par bya'o zhes bya ba la sogs pa gsungs te/ der yang spros pa phyogs gcig bcad pa la bsgom pa yang gsungs la/las dang po pa la mi rtog par bsgom pa yang grub pa yin te/ sa dang po pa me la tshe thun phyed la sogs pa las gnas mi nus pa ni mi srid do/ /bsgom pa'i rim pa tha mar mdzad pa las kyang / ting nge 'dzin la gnas nas bsam pa'i shes rab kyi so sor rtog pa'i shes rab kyis dbang du mdzad nas/de bzhin gshegs pa'i sku ji srid du mdun du bzhugs pa bzhin du gsal bar mthong bar gyur pa de srid du bsam gtan bya'o/ /de nas de bzhin gshegs pa'i sku'i gzugs brnyan byon pa'am/ bzhud pa la rtog pas lhag mthong bsgom par bya'o/ /zhes bya ba la sogs pa gsungs nas/de nas de'i don la bsgom pa'i dbang du mdzad nas/ yod pa la sogs pa'i ngo bo dang bral ba'o/ /zhes dpyad nas rnam par rtog pa med cing brjod pa med pa dang gcig tu gyur ba'i yid kyis de kho na bsgom zhing ji srid 'dod pa'i bar du 'dug par bya ba la sogs pa gsungs pa dang /rnal 'byor pa'i zhi gnas grub nas de kho na rtogs par bya ba'i phyir de nas lhag mthong bsgom par bya ste/ yang dag pa la so sor rtog pa ni lhag mthong zhes bya ba nas shes rab kyis brtags nas/ dngos po mtha' dag gi ngo bo nyid mi dmigs pa'i phyir shes rab mchog gi bsam gtan pa yang yin no zhes gsungs nas/de bsgom pa'i dbang du mdzad nas/ de ltar gang zag dang chos la bdag med pa de kho na la zhugs pas blta bar bya ba'am/ brtag par bya ba gzhan med pa'i phyir dpyod pa med cing brjod pa med pa dang /ngang gcig tu gyur pa'i yid rang gi ngang gis 'jug pas mngon par 'du byed pa med pa'i phyir/ rnal 'byor pa de kho na shin tu gsal bar nges par gzung zhing 'dug par bya'o/ /der gnas nas kyang sems kyi rgyud mi g.yeng bar bya'o/ /zhes bya ba la sogs pas kyang zhi gnas la gnas nas/bsam pa'i shes rab kyis lhag mthong so sor rtog pa des gang zag dang chos thams cad ma dmigs nas/ de'i don bsgom pa'i phyir yang mi rtog par nges par gzung du med pa'i tshul gyis gzung zhes bya ste/ spros pa phyogs re la bsgom pa yang ma yin la/ las dang po pa rtog pa dang tshol ba las mi rtog pa'i bsgom pa med pa yang ma yin zhing /de tsam gyis bden pa mthong ba yang ma yin te/ shas che chung la sogs pa yang / yang dang yang du bcos la/ de lta bu des kyang chu tshod gcig la sogs pa las gnas mi nus par bstan pa'i phyir ro/ /las dang po pa spros pa thams cad bral ba yang mi rtog pa bsgom pa yang ma yin te/shes rab kyi pha rol tu phyin pa bdun brgya pa las/ de bzhin gshegs pas 'jam dpal khyod bsam gyis mi khyab pa'i ting nge 'dzin la snyoms par mi 'jug gam zhes gsungs pa dang / 'jam dpal gyis gsol pa/bcom ldan 'das bdag bsam gyis mi khyab pa'i ting nge 'dzin la snyoms par mi 'jug lags so/ /de ci'i slad du zhe na/ bdag sngon las dang po pa'i tshe na ni bsam gyis mi khyab pa'i ting nge 'dzin la snyoms par 'jug go/ /da ltar ni bdag nyid bsam gyis mi khyab pa lags pas bsam gyis mi khyab pa'i ting nge 'dzin la snyoms par mi 'jug lags so//zhes dpe dang bcas nas gsungs so/ /bsam gyis mi khyab pa ni de nyid kyi 'grel pa las/ /bsam gyis mi khyab pa zhes bya ba ni/ bsam pa las 'das pa'o/ /bsam pa las 'das pa ni bsam du med pa'o//zhes spros pa dang bral ba las gsungs so/ /rnam par mi rtog par 'jug pa'i gzungs las kyang / mtshan ma spong ba'i thabs kyi skabs su rnam par rtog pa thams cad kyis/ gang rnam par ma brtags pa de rnam par mi rtog pa'i dbyings so//zhes dpyod na yang rnam par rtog pa la dpyod pa'o/ /zhes gsungs so/ /ston mun zhes bya ba ni cig car 'jug ces bya ste/ gang cig car 'jug pa zhes bya ba ni/ chos nyid spros pa thams cad dang bral ba la so sor rtog pa'i shes rab kyis legs par rtog pa sngon du 'gro ba spangs nas cir yang mi rtog par bsgom pa tsam byed pa yin par slob dpon ka ma la shI las bstan to//thabs mi ston pa ni gzhan du bstan zin to/ /de bas na de lta bu la zer ba yin gyi/ so sor rtog pa sngon du song nas cir yang mi rtog pa ni rim gyis 'jug pa yin par slob dpon nyid kyis gsungs pa yin te/gong du smos pa bzhin no/ /so so'i skye bo rnams kyi shes pa ni glo bur du dmigs pa med par mi 'gyur te/ zhes gsungs pa de yang rgyu med par mi 'gyur ro/ /zhes gsungs pa yin gyi/yun ring po ma lon pas mi rtog pa'i ye shes mi skye zhes gsungs pa ma yin te/ de ni gzhan dag kyang khas mi len pa'i phyir ro/ /de lta bas na de ni 'di skad du/ gang dang gang legs par rtog pa sngon du 'gro ba med pa de dag ni dmigs pa med par mi 'gyur te/dper na smig rgyu la chur snang ba gang zhig legs par rtog pa sngon du 'gro ba med pas chur dmigs pa med par mi 'gyur ba lta bu'o/ /rnal 'byor pa 'di yang rnam par ma yengs pa'i yid kyis gang zag dang chos la dmigs pa 'jig par byed pa'i rtog pa sngon du 'gro ba med pas khyab par byed pa mi dmigs pa'o//de skad du/ 'phags pa ting nge 'dzin gyi rgyal po las/ ting nge 'dzin de sgom par byed mod kyi/ /de ni bdag tu 'du shes 'jig mi byed/ /de yis nyon mongs phyi nas rab tu ldang //zhes gsungs so/ /gang dang gang ma yengs par legs par rtog pa sngon du 'gro ba de ni dmigs pa med par 'gyur te/ dper na smig rgyu la chur mthong ba gang zhig ma yengs par gyen la 'gro bar snang ba 'di/ mtha' 'gro'am/ dbus 'gro'am zhes bya ba la sogs par ma yengs par rtog pa sngon du 'gro bas chur dmigs pa'i shes pa skye ba lta bu'o//las dang po pa'i rnal 'byor pa 'di yang zhi gnas la gnas nas 'di yang dag par gcig yin nam/ du ma yin/ zhes legs par rtog pa sngon du 'gro bas rang bzhin gyi gtan tshigs so//de skad du/ 'phags pa dkon mchog sprin las/ lhag mthong gis brtags nas ngo bo nyid med par rtogs pa ni mtshan ma med pa la 'jug pa'o/ /zhes gsungs so/ /'phags pa lang kar gshegs pa las/blo gros chen po gang gi phyir/ blos rnam par brtags nas rang dang spyi'i mtshan nyid mi rtog ste/ des na chos thams cad ngo bo nyid med pa zhes bya'o/ /zhes gsungs so/ /yang de nyid las/ blo gros chen po glang gi rwa yang rdul phra mor bshig na mi 'dug go//rdul phra mo rnams kyang so sor bshig nas rdul phra mo'i mtshan nyid du mi gnas so/ /zhes gsungs so/ /'phags pa 'jam dpal rnam par rol pa las kyang / 'jam dpal gyis smras pa/ bu mo ji ltar na byang chub sems dpa' g.yul las rnam par rgyal ba yin/bu mos smras pa/ 'jam dpal gang chos thams cad la rnam par 'byed kyang dmigs pa lags so/ /zhes gsungs so/ /'phags pa ting nge 'dzin gyi rgyal po las/ gal te chos la bdag med so sor rtog//so sor de dag gal te sgom byed na/ /de nyid mya ngan 'das thob 'bras bu'i rgyu/ /rgyu gzhan gang yin des ni zhir mi 'gyur/ /zhes gsungs so/ /sgom pa'i rim pa tha mar mdzad pa las/ de nyid kyi skabs su so sor rtog pa sngon du song nas yid la bya bar nus pa dang /dmigs pa med par nus pa gsungs te/ 'di skad du/ de lta bas na dam pa'i chos las dran pa med pa dang / /yid la byed pa med par 'byung ba de yang / yang dag par so sor rtog pa sngon du 'gro ba yin par blta bar bya ste/ gang gi phyir yang dag par so sor rtog pa nyid kyi dran pa med pa dang /yid la byed pa med par nus srid kyi/ gzhan du ma yin te/ 'di ltar rnal 'byor pas gang gi tshe yang dag pa'i shes rab kyis brtags na/ don dam par na dus gsum du chos skyes pa gang yang ma mthong ba de'i tshe/ji ltar dran pa dang yid la byed par bya zhes bya ba la sogs pa gsungs so/ /bsgom pa'i rim pa dang por mdzad pa las kyang / ting nge 'dzin gyi lag gis bzung ste shin tu cha phra ba'i shes rab kyi mtshon gyis gzugs la sogs pa la log par rnam par rtog pa'i sa bon gyi zug rngu sems de la yod pa bsal bar bya'o//de ltar byas na rtsa ba nas phyung ba'i shing dag sa la mi skye ba bzhin du rtsa ba med pas na log par rnam par rtog pa'i sems de yang skye bar mi 'gyur ro zhes gsungs so/ /bsam gtan bzhi ma thob pa'i zhes gsungs pa de yang pha rol po la mnyam par gzhag pa'i dus su/yid kyi rnam par shes pa yod na ni de'i tshe/ gdon mi za bar ci zhig la dmigs dgos te/ so so'i skye bo'i shes pa rgyu med par dmigs pa med par mi 'gyur ro/ /ci ste yid kyi rnam par shes pa med na ni/de'i tshe ji ltar chos rnams kyi ngo bo nyid med par rtog par 'gyur/ gnyen po gang gis ni nyon mongs pa spong bar 'gyur/ de lta bas na rnal 'byor par ji ltar 'gyur zhes gsungs pas/ de'i lan du pha rol po brgya la 'du shes med pa'i snyoms par 'jug pa la yid kyi rnam shes med kyang rnal 'byor pa zhes zer ba dang /'gog pa'i snyoms par 'jug pa la yid kyi rnam shes yod bzhin du yul la dmigs par mi 'gyur bas skyon de ma nges so zhes zer du dogs nas/ lan du so so'i skye bo yin yang bsam gtan bzhi pa ma thob par yid kyi rnam shes dgag par mi nus la/so sor rtog pa'i shes rab sngon du ma song bar yid kyi rnam par shes pa yod bzhin du dmigs pa med par 'gyur ba ni 'phags pas nus kyi/ so so'i skye bo ni mi nus pas de skad smras pas ci la phan zhes gsungs pa yin te/ so so'i skye bo la ting nge 'dzin sngon du song nas legs par brtags kyang dmigs par mi 'gyur ro zhes gsungs pa yin no//de bas na zug po'i blos mi dpyod par res 'ga' ni da ltar dmigs pa med par 'gyur mi srid de zhes khungs 'dren par byed/ res 'ga' ni cir yang mi rtog par ma sgoms shig /'du shes med pa'i snyoms par 'jug par 'gyur ro zhes smras pa ni/ mkhas pa'i sems 'phrogs par byed pa ma yin no/ /zhes bstan pa yin no/ /de la rtags la log par rtog pa ni rnam pa gnyis te/ mnyam par gzhag pa dang / langs pa'o/ / de na kha cig na re mnyam par gzhag tsam na lus phyogs re la sogs pa ha cang za ba dang / g.ya' ba dang / 'dzag pa dang / rtsub pa dang / 'dar zhing g.yo 'phar ba dang / dro ba dang / gting du'am/ gyen du bteg pa la sogs pa dang / sems kyis dga' ba tsam lhag mthong gi rtags su byed pa de ni log par rtog pa yin te/zhi gnas tsam gyi rjes su 'brang ba yin pa'i phyir ro/ /mi ma yin pa'i sgra thos pa dang / gzugs mthong ba dang / 'od la sogs pa dang / zas stobs pa la ngo mtshar du 'dzin pa dang / kha cig ni dri ma rags pa gsum dang ma bral bar ni sprul pa'i sku'i zhal mi mthong na lo dang zla ba tsam lon ma thag tu 'phags pas lung ston pa dang /byin gyis brlabs su re ba dag ni bdud kyis byin gyis rlob pa'i phyir log par rtog pa'o/ /langs pa'i gnas skabs su kha cig rdul phra rab tu mthong zhes zer ba'am ci yang ma mthong zhes zer ba yang log par rtog pa yin te/'dus pa dang gnyis kyis tha snyad 'dogs pa dang / langs pa'i shes pa la rnam pa med par skye mi srid pa'i phyir ro/ /de bas na 'phags pa lang kar gshegs pa las/ byis pa nye bar spyod pa'i bsam gtan dang /don rab tu rnam par 'byed pa'i bsam gtan gyi dbang du mdzad nas/ rnal 'byor can gyis brtson byas na/ /nyi ma zla ba'i gzugs 'dra dang / /'od dang pad+mo 'dra ba dang / /ri mo nam mkha'i me 'dra mthong / /mtshan ma sna tshogs de dag ni/ /mu stegs can lam khrid par byed//de dag thams cad rnam spongs shing / /snang ba med par nam gyur pa/ /de tshe sangs rgyas lha yi phyag /thams cad zhi nas byung ba yis/ /de yi mgo la nyug mdzad de/ /yang dag rjes su 'gro ba'i ltas/ /zhes gsungs so/ /de lta bas na bslab pa bsrung bar 'dod pas lkugs pa bzhin du bya zhing nam mkha' lta bu'i ye shes dang /sgyu ma lta bu'i ye shes skye bar 'dod pas mnyam par gzhag pa'i dus su ci la yang mi gnas par bslab cing langs pa'i skabs su yang dag pa'i ngo bos stong pa'i phyir/ rmi lam snang ba dang 'dra ba la bslab dgos pas/shin tu dben pa'i skabs su de la mos pa brten po 'byung na lam du zhugs pa'i rtags yin no/ /ma nor lam rtags gzhan dag ni/ /sgrub pa snying por byed pa la/ /de dag rim gyis bstan par bya/ /bar skabs kyi ni tshigs bcad yin/ /dmigs pa dang ni shes pa la/ / log rtog sun dbyung mdor bstan dang / /rtags la log rtog sun dbyung gis/ /bsgom la log rtog bsdus pa yin/ /zhes bya ba ni bsdu ba'i tshigs su bcad pa'o/ /de la rang gi phyogs sgrub tu med pa'i tshul gyis bsgrub pa ni zhen pa mi skyed ces bya ba yin te/ gang dag la ni phyogs med pa//de la gzhan phyogs ga la yod/ /ces 'byung ba'i rjes su slob pas so/ /'on kyang gang zhig bsgrub bya gang dang 'brel pa'i rtags dran zhing 'brel pa'i rjes la skyes pa'i shes pa de ni rtog bcas yin te/ dper na du ba la brten nas 'brel pa dran pa'i rjes la skyes pa'i shes pa lkog tu gyur pa'i mer snang ba lta bu'o//chos nyid spros pa thams cad dang bral ba dang 'brel ba'i rtags gcig dang du ma dang bral ba la brten nas 'brel pa dran pa'i rjes la skyes pas rang bzhin gyi gtan tshigs so/ /gang rtog pa dang bcas pa de ni spyi'i yul can yin te dper na me ma yin pa las log pa tsam la dmigs pa'i shes pa lta bu'o//so so'i skye bo don lkog tu gyur pa la dpyod pa'i chos nyid la dmigs pa 'di yang rtog pa dang bcas pa yin pas yod pa dang med pa la sogs pa'i spros pa thams cad dang bral ba'i spyi'i yul can yin no//de la mnyam par gzhag pa'i shes pa'i bsam pas gang yang khas mi len pas gong du smos pa'i skyon thams cad sel to/ /langs pa'i shes pas tha snyad 'dogs pa ni ngo bo'i sgo nas rtog bcas zhes bya ba dang / yod pa dang med pa'i brjod pa dang 'drer rung ba tsam dang ha cang ches spyir yang dmigs su med ces bya ba la yang mi nges pas mi rtog pa zhes bya dang /de tsam la yul gsal zhes bya ba dang / byang chub kyi sems zhes bya ba dang / rang gi mtshan nyid du zhen pa yod pas na kun brtags bsgom zhes bya ba la sogs pa gong du smos pa phal cher brjod du 'dod de/'dir mangs kyis dogs nas ma bris so/ /mnyam gzhag langs pa'i shes pa yis/ /tshul gnyis mtshon cha gzung nas ni/ /rigs pa'i lag gis 'debs byed pa/ /log rtog spangs nas lhag mthong skye//zhes bya ba ni bsdu ba'i tshigs su bcad pa'o/ /bdag ni shin tu dmus long bas/ /lhag mthong skyed thabs zab mo'i don/ /mi rigs bzod gsol bdag gis 'di/ /slob mas lhag mthong bskyed phyir byas/ /dge ba 'di yis dang po'i las can kun//ha cang mi mtho mi dma' rgyu 'bras ston/ /tshul khrims srung zhing mi bsnyems chos nyid bsgom/ /ma nor lam zhugs drod sogs skye bar shog /lhag mthong skyed pa'i thabs cung zad bris pa rdzogs so// //