160b1 @##/ /rgya gar skad du/ byA ka ra Na mU la triM shad nA ma/ bod skad du/ lung du ston pa'i rtsa ba sum cu pa zhes bya ba/ smra ba'i dbang phyug 'jam pa'i dbyangs la phyag 'tshal lo/ /gang la yon tan mchog mnga' ba'i/ /dkon mchog de la phyag 'tshal lo/ /
160b2 gang gi sgra dbyangs sngon gsungs pa'i/ /'jam pa'i dbyangs la phyag 'tshal lo/ /gang gi ming gzhi sngon gsungs pa/ /rtag zhi ba la phyag 'tshal lo/ /sdeb sbyor legs mdzad mkhas rnams dang / /bla ma rnams la phyag 'tshal nas/ /bslab pa kun gyi gzhi 'dzin cing / /rig
160b3 byed smra ba rnams kyi rgyu//ming tshig brjod pa kun gyi gzhi/ /yi ge'i sbyor ba bshad par bya/ /yi ge A li kA li gnyis/ /A li gsal byed i sogs bzhi/ /kA li sum cu tham pa'o/ /de la rjes 'jug bcu yin te/ /de la lnga ni sngon du 'jug /mi 'jug pa ni nyi shu'o/ /kA li
160b4 byed dang brgyad sde ni//bzhi bzhi dag tu dbye ba las/ /dang po gsum pa bzhi pa la/ /mas gnyis drug pa'i gsum pa dang / /bdun pa la ni sha ma gtogs/ /rjes 'jug yi ge bcu ru 'dod/ /rjes 'jug yi ge bcu nyid las/ /dang po gsum pa lnga pa drug /bdun pa rnams ni sngon du 'ang 'jug /
160b5 ming gzhi gnyis sam gsum sbrel lam/ /de la dbyangs kyi bzhir ldan yang / /gang du 'ang 'jug min sbyar ba'ang min/ /rjes 'jug yi ge bcu po ni/ /ming gang gi ni mthar sbyar ba/ /de la A li bzhi pa sbyar/ /slar bsdu bar ni shes par bya/ /rjes 'jug yi ge bcu po las/ /
160b6 gang ming mtha' na bcu pa gnas/ /de la A li gnyis pa sbyar/ /gang ming mtha' na brgyad pa gnas/ /de la gnyis pa u yang sbyar/ /gang ming mtha' na gsum pa gnas/ /de la A li gnyis pa sbyar/ /bzhi pa dgu pa dngos kyang ste/ /las dang ched dang rten gnas dang / /de
160b7 nyid tshe skabs la sgra yin//rjes 'jug yi ge bcu po la/ /i dang mthun lugs 'di zhes bya/ /dang po gnyis la dang po mthun/ /gsum lnga bcu la kya dang sbyar/ /bdun pa nyid la bdun pa ste/ /lhag ma rnams la gyi sbyar ba/ /de dag i sbyar 'brel ba'i sa/ /de nyid la ni bcu
161a1 pa sbyar//byed pa po ru shes par bya/ /A li phyis nas gnyis pa sbyar/ /tshig rgyan gnyis dang sdud par 'gyur/ /la don su la u phyis nas/ /de la gsum pa'i dang po sbyar/ /de la A li gsum pa sbyar/ /de ni lhag dang bcas pa'o/ /rjes 'jug yi ge bcu po
161a2 la//drug pa sbyar na 'byed sdud yin/ /rjes 'jug yi ge bcu po yi/ /bzhi pa dgu pa la bcu pa/ /sbyor ba 'byung khungs dag yin te/ /dgar dang sdud pa'ang de bzhin yin/ /gang ming brjod pa dang bo ru/ /kye sbyar ba ni bod pa yin/ /gang ming mtha' na mthun pa yi/ /bzhi pa la ni i
161a3 sbyar ba//dgar dang bsnan pa'i tshig tu 'gyur/ /ming gang rung ba'i bar mtshams su/ /gsum pa la ni gnyis pa sbyar/ /de ni sdud dang 'byed pa dang / /rgyu mtshan tshe skabs gdams ngag lnga'o/ /gang ming gi ni ya tha ru/ /dang po la ni gnyis pa sbyar/ /spyi la khyab pa nyid du 'gyur/ /
161a4 ming gang gi ni ma tha na/ /pu ling+ga yi sgra med pa/ /de la pu ling+ga sbyar na/ /bdag po'i sar ni shes par bya/ /ming gang gi ni ya tha na/ /s+t+rI ling+ga yi sgra med pa/ /de la s+t+rI ling+ga sbyar na/ /dgag pa'i gnas su shes par bya/ /gang ming gi ni ya tha na/ /gsum pa la ni e sbyar ba/ /tha snyad
161a5 dbang du gsum yin te//dngos po'i dbang du bzhi ru sbyar/ /dus kyi dbang du gnyis yin te/ /tshigs su bcad pa mtshams sbyor rnams/ /cung zad bsdus pa yod na yang / /de ni de bzhin sbyar bar bya'o/ /sngon 'jug yod dam med kyang rung / /ming gzhi'i yi ge gang yin la/ /
161a6 gnyis 'brel yod dam gsum 'brel yod/ /A li bzhi las gang ldan yang / /rjes 'jug bcu bo ma zhugs na/ /ming gzhan sbyor ba yod mi srid/ /rjes 'jug bcu yi don shes nas/ /'dri dang klog dang bshad rnams kyi/ /mtshams sbyor sgra la thogs med cing / /
161a7 'brel par smra ba'i mchog tu 'gyur/ /gzhan yang rjes 'jug shes pa yis/ /don gyi sbyor ba ma mthong yang / /don dang mthun pa'i sbyor ba shes/ /rjes 'jug sbyor ba mkhas pa na/ /lung gi don dang sbyor ba dang / /bla ma'i man ngag gsum sbyar nas/ /don gyi thog tu dbab par
161b1 bya//bslab la brtson pa'i gang zag gis/ /dang por nga ro rnams la sbyang / /sngon 'jug rjes 'jug ming gzhi gsum/ /klog gi ched du bslab pa yin/ /rjes 'jug bcu yi sbyor ba ni/ /mnyan bsam gtan pa'i ched du sbyar/ /yan lag de dag mthu yis ni/ /'bras bu'i ched du
161b2 don la dbab//bslab pa'i rim pa 'di yis ni/ /gang zhig 'bad pa chung ngus kyang / /shes rab myur du 'grol bar 'gyur/ /de phyir dang por 'di nyid bslab/ /de nas rgyas pa'ang mnyan byas nas/ /bslab pa gang la dad pa yi/ /gzhung nyid bla ma rnams las mnyan/ /slob dpon de
161b3 nyid du 'dzin cing //le log g.yeng ba rnam par spang / /zo bzang dad pa la brten pa/ /skyes bu des ni myur rtogs te/ /de la dus su 'doms par bya/ /cig shos de las bzlog pa'o/ /de ltar bshad des deng nas 'dir/ /kun gyis de ltar rtogs gyur cig /byA ka ra Na rtsa ba'i sh+lo ka
sum cu pa zhes bya ba slob dpon a nus mdzad pa rdzogs so/