CLOSE WINDOW

D4333
བོད་ཡིག

/[ ]@##/ /rgya gar skad du/ bim la prash+no ta tar rat+na mA li nA ma/ bod skad du/ dri ma med pa'i dris lan rin po che'i phreng ba zhes bya ba/ 'jam dpal gzhon nur gyur ba la phyag 'tshal lo/ /dri med dris lan rin chen phreng pa 'di//gang gi mgul na nges par gnas gyur na/ /mthong dang ma mthong sgrub pa la mkhas pas/ /nges par rgyan du 'gyur ba cis ma yin/ /bcom ldan blang bya gang zhe na/ /bla ma'i don ldan tshig rnams so/ /spang bar bya ba gang zhe na/ /bya ba ma yin thams cad do/ /bla mar gyur pa gang zhe na//de nyid ji bzhin rtogs pa dang / /rtag tu sems can thams cad la/ /phan par mngon par brtson pa'o/ /mkhas pas ring bya gang zhe na/ /'khor ba'i rgyu ni nges bcad pa'o/ /thar pa'i sa bon zhing mchog gang / /yang dag ye shes brtson byas pa'o/ /shin tu mthun pa gang zhe na//chos kyi spyod pa skyon med pa'o/ /'di na gtsang ba gang zhe na/ /gang gi yid ni yongs dag pa'o/ /mkhas par gyur ba gang zhe na/ /bye brag ji bzhin phyed pa'o/ /gdug pa'i don ni gang zhe na/ /bla ma brnyas byed gang yin pa'o/ /'khor ba na ni snying po gang / /yang dag don la rnam dpyod nyid//mi yi de nyid thob pa gang / /bdag gzhan phan par brtson pa'o/ /ra ro lta bu'i rmongs pa gang / /phyin ci log la chags pa'o/ /mi srun dgra 'dra gang zhe na/ /mi bzad pa yi yul rnams so/ /'khor ba'i 'khri shing gang zhe na/ /log par sred pa dam pa'o/ /dgra bor gyur pa gang zhe na//yang dag don la brtson med pa'o/ /'di la 'jigs pa gang zhe na/ /srog mthar gyur pa'i 'chi ba'o/ /long ba las kyang long ba gang / /phung khrol 'dod chags can rnams so/ /skyes bu dpa' bo gang zhe na/ /gang zhig bud med mdzes ma la/ /chags pa'i mig gi mda' yis ni//yid la phog par ma gyur pa'o/ /rnang snyan bdud rtsi lta bu gang / yang dag don gyi man ngag go/ /'di na lci ba'i rtsa ba gang / /gang 'di blun par gyur pa'o/ /tshang tshing mi bzad gang zhe na/ /bud med rnams kyi spyod pa'o/ /shin tu sgrin pa gang zhe na/ /gang gis des dral ma gyur pa'o/ / 'di na dbul po gang zhe na/ /gang zhig chog shes med pa'o/ /shin tu yangs ba gang zhe na/ /gzhan ltos slong mo pa rnams so/ /don yod 'tsho ba gang zhe na/ /kha na ma tho med pa'o/ /skyes bu glen pa gang zhe na/ /mkhas bya'i yul la mi slob pa'o/ /gnyid kyis ma log gang zhe na/ /ma rmongs don gyi bye brag shes//gnyid kyis log pa gang zhe na/ /skyes bu shin tu rmongs pa'o/ /pad+ma'i 'dab chags chu thigs ltar/ /mi brtan myur 'jig gang zhe na/ /skyes bu rnams kyi lang tsho dang / /nor dang de bzhin tshe nyid do/ /zla tshes lta bu'i yid 'ong gang / /skye bo dam pa phan 'dod pa'o/ / dmyal dang 'dra ba gang zhe na/ /gzhan gyi dbang du gyur pa'o/ /shin tu bde ba gang zhe na/ /'du 'dzi kun lam chags pa'o/ /srog chags rnams ni dga' bya gang / /don yod 'tsho ba'i srog nyid do/ /legs par byin ba gang zhe na/ /lan la re ba med pa'o/ /mdza' bshes yid 'ong gang zhe na//gang zhig sdig las zlog byed pa'o/ /mdzes pa'i rgyan ni gang zhe na/ /gang zhig tshul khrims phun tshogs pa'o/ /tshig gi rgyan gyur gang zhe na/ /gzhan la mi slu bden pa'i ngag /phung khrol 'bras 'byin gang zhe na/ /yid ni kun dum bsdams pa'o/ /bde ba 'thob byed gang zhe na/ /kun la byams shing phan byed pa'o//phongs pa kun 'jig mkhas pa gang / /thams cad du ni skal ldan pa'o/ /skyes bu dmus long gang zhe na/ /bya ba ma yin la dga' ba'o/ /'on par gyur pa gang zhe na/ /phan dang mi phan mi nyan pa'o/ /lce med lkugs pa gang zhe na/ /gang zhig snyan smra mi shes pa'o/ / skyes bu 'chi ba gang zhe na/ /glen zhing gti mug can nyid do/ /rin chen gyur pa gang zhe na/ /gang zhig dus su byin pa'o/ /mi yi zug rngur gyur pa gang / /dben par bya min byas pa'o/ /gang la 'bad bya gang zhe na/ /rig pa legs par slob pa dang / /sman chen tshul bzhin bsten pa dang / /sbyin pa kun du gtong ba'o//ltos med bya ba gang zhe na/ /'gro ba mi srun 'dul min dang / /chags gyur gzhan gyi bud med dang / /'brel med gzhan gyi nor rnams la'o/ /gang zhig nyin dang mtshan rnams su/ /bsam par bya ba gang zhe na/ /'khor ba snying po med nyid la/ /bag med par ni mi bya'o/ /yid du 'ong ba gang zhe na//g.yo med kun du snying rjer ldan/ /sbyin par bya ba gang zhe na/ /byams pa'i sems dang yang dag ldan/ /lkog mar srog phyin gyur kyang ni/ /bdag dang mi 'bral gang zhe na/ /glen pa skyon mi ldan pa dang / /kun gnod byas pa mi gzo ba'o/ /mchod bar bya ba gang zhe na/ / legs pa rnams la 'dzud pa'o/ /tha shal du ni shes bya gang / /rtsom pa kun la mi brtan pa'o/ /'gro ba kun la thams cad las/ /nges par rgyal ba gang zhe na/ /skyes bu bden par smra ba dang / /bzod pa yang dag ldan pa'o/ /lhas kyang gus bas phyag bya gang / /snying rje gtso bor byed pa'o/ / gang la skyo bar bya zhe na/ /mkhas bas 'khor ba'i 'brog dgon las/ /srog chags rnams kyi tshogs dag ni/ /gang gi dbang du 'gyur zhe na/ /gang zhig phan dang snyan smra dang / /dul bar spyod pa rnams kyis so/ /skyes bu legs par 'dod pa yis/ /gang la gnas par bya zhe na/ /mthong dang ma mthong bya ba'i phyir//bden pa'i lam la nges gnas bya/ /mya ngan 'gyur ba gang zhe na/ /'byor pa bzhin du zhen pa'o/ /glog ltar mi brtan gang zhe na/ /skyes bu dam pa phrad bsten pa'o/ /bsngags par bya ba gang zhe na/ /gang zhig blo gros che ba dang / /shin tu nyam chung stobs med la//nus dang ldan zhing bzod byed pa'o/ /rigs kyi ri ltar mi g.yo gang / /rtsod dus skyes bu dam pa'o/ /'di na skyes bus rnyed dka' ba'i/ /bzang po bzhi ni gang zhe na/ /sbyin pa snyan smrar bcas pa dang / /shes pa khengs pa med ldan dang / /bzod pa brtson 'grus bcas pa dang / / sems ni rnal 'byor ldan pa'o/ /dri med dris lan rin chen phreng ba ni/ /gang gi mgul na legs par yong gyur na/ /de ni skyes bu mkhas pa 'dus nang du/ /mgul gyi mu tig rgyan bzhin mdzes pa yin/ /brtags nas rgyal srid rnam spong ba'i/ /rgyal po rin chen phreng ba 'di/ /don yod 'char gyis byas pa ste//blo bzad dam pa'i rgyan yin no/ /dri ma med pa'i dris lan rin po che'i phreng ba zhes bya ba/ rgyal po chen po snyan ngag mkhan gyi dam pa slob dpon don yod 'char gyis mdzad pa rdzogs so// //rgya gar gyi mkhan po ka ma la gup+ta dang / /zhu chen gyi lo tsA ba dge slong rin chen bzang bos bsgyur cing zhus te gtan la phab pa/