CLOSE WINDOW

D4329
བོད་ཡིག

/ //rgya gar gyi mkhan po sarba dz+nyA de ba dang / zhu chen gyi lo tsA ba ban de dpal brtsegs kyis bsgyur cing zhus te gtan la phab pa'o//[ ]@##/ /rgya gar skad du/ nI ti shAs+t+ra pradz+nyA daN+DanA ma/ bod skad du/ lugs kyi bstan bcos shes rab sdong bu zhes bya ba/dkon mchog gsum la phyag 'tshal lo/ /mi srun skye bo gdul bar bya/ /yon tan can ni bkur bar bya/ /drang po'i spyod pas dkor mdzod dgang / /rang gi yul 'khor bskyang bar bya/ /bdag gi gsang dang gzhan gyi gsang / /rang gi bu gces bzhin bsrungs nas/ /sa rnams la ni snyoms gyur pa'i//mi ni gces pa rab gces 'gyur/ /chung ma ngan dang 'dza' bo ngan/ /rgyal po ngan dang nye du ngan/ /khyim mtshes ngan dang yul ngan rnams/ /thag ring du ni spang bar bya/ /grogs po nor dad che ba spang / /chung ma log g.yem dad che spang / /bkur dka' so mi mkhas pa yi//de lta bu yi sman pa spang / /bye brag phyed ba'i blo ldan yang / /bya ba gros kyis bsgrub par bya/ /'grub 'gyur kho nar ma zad gyi/ /ma 'grub na yang mdzes pa yin/ /brtan zhing 'jam la tshig nyung gang yin pa/ /de la shin tu shin tu bag bya ste/ /nyi ma sprin bug nang nas byung ba yi//'od zer shin tu tsha bar gyur pa bzhin/ /brtan rnams sdug bsngal myong gyur kyang / /yid ni gdung bar mi byed de/ /zla ba sgra gcan khar zhugs nas/ /'char bar ci ga mi byed dam/ /kun dga' ra ba'i phreng rgyud ltar/ /me tog rgyas pa btu bya yi/ /ji ltar sol ba mkhan bzhin du//rtsa nas bcad par mi bya'o/ /gsug dang rgyal po'i bka' drin dang / /smad 'tshong gla dang legs brjod dang / /gru yi gla dang gnas kyi skal/ /'di nyid du ni blang bya ste/ /drug po yun ring thob mi 'gyur/ /rig sngags log par shes pa dug /nad la btang snyoms byas pa dug /rgan pos gzhon nu bsten pa dug /dbul po nyin par nyal ba dug /dam pa mang po khas 'ches mi byed la/ /gal te dka' bas khas ni blangs gyur na/ /rdo la ri mo bris ba lta bur ni/ /shi yang gzan du byed par mi 'gyur ro/ /dus su dgra dam 'dum bar bya/ /dus su bshes dang 'thab bar bya//bya dang mi bya'i tshod shes bas/ /mkhas pas dus ni 'da' bar bya/ /kha yi nyes pas phung 'gyur te/ /ne tso ri skegs ti ti ra/ /mi smra chu skyar mis mi 'dzin/ /thams cad 'grub byed mi smra yin/ /chas bzhag bstar bar dgra bo gdul/ /gos ngan gyis ni chud ma gdul//smyung ba byas pas nad rnams gdul/ /goms pa yis ni ma rig gdul/ /rang gi spyod pa sba bar bya/ /'dam gyi nang du lus bcug pa'i/ /gal te myu gus ma bos na/ /pad+ma'i rtsa ba su yis rnyed/ /gal te mngon sum gyur kyang ni/ /mi srid dngos po smra mi bya/ / ri mo la gnas rma bya yis/ /ji ltar nor bu za bar byed/ /gang zhig yid la gnod byed 'dod/ /de la rtag tu snyan tshig brjod/ /rngon pa ri dgas gsod mthong tshe/ /yid 'ong glu snyan len pa bzhin/ /bsam pa gang dang gang gis ni/ /mi rnams yid ni yang dag sbyor/ /des na de yi dbang du 'gyur//sna tshogs nor bu ji bzhin no/ /gzhan gyi khu tshur 'tsho ba bla/ /nag na shing shun gyon ba bla/ /mi rnams shi bar gyur kyang bla/ /nyin re bzhin tu brnyas thabs min/ /ma brnyas mi yi rtsa ba yin/ /brnyas pa'i nor gyis ci zhig bya/ /nga rgyal dregs pas rab bcom pa'i/ /nor dang srog gis ci zhig bya//bya ba mi lcogs rtsom par byed pa dang / /tshogs dang 'khon zhing stobs ldan dag la rgol/ /bud med la ni yid brtan byed pa ste/ /'chi bdag bzhi po sgo yi drung na sdod/ /rgyal po ngan pa yod ma mthong / /mdza' bo g.yon can yod ma mthong / /'dod ldan chung ma yod ma mthong //skye bo sdig can yod ma mthong / /gang zhig kun du bgrod bya lod pa de/ /rang yul chags pas brlag par ci phyir byed/ /skye bo ngan pa bdag gi khron pa ni/ /'di yin zer zhing ba tshwa can chu 'thung / /skye bo blo dpangs mtho ba la/ /'di na bde skyid gnyis yod de/ /'du 'dzi thams cad spangs ba'am//'byor pa shin tu rgya che ba'o/ /dpal ni rgyab kyis phyogs gyur cing / /rtsol ba don med nyid gyur pa'i/ /dam pa dbul bor gyur pa las/ /nags las gzhan du bde ba med/ /dam pa'i 'gro ba gnyis yin te/ /me tog dag gi mgo lcogs bzhin/ /'jig rten kun gyis spyir bkur ba'am//nags nyid du ni dengs par bya/ /ngang gis skad yig 'jig pa yi/ /tshe yi snying po 'di yin te/ /mja' dang mkhas dang shed ma bye/ /lhan cig bag yangs gnas pa'o/ /bsags na grogs 'khar 'phel 'gyur la/ /spyad na mig sman zad 'gyur ltar/ /dus las 'god pa chung 'gyur ba//de nyid kho na mkhas pa yin/ /grogs 'khar dang ni sbrang rtsi dang / /zla ba tshes pa yar gyi ngo / /rgyal po'i nor dang sbrang po'i nor/ /cung zad cung zad bsags pas 'phel/ /ha cang sred par mi bya ste/ /sred pa che la nyes pa 'byung / /ha cang sred pas rmongs byas na/ /ce spyang gzhu mchog gtsug tor bzhin//bya ba'i don du rjes su 'brang / /byas zin pa la brten mi byed/ /blo ngan zho yi rna ba can/ /bsrung bar bya ba khyod kyis bcom/ /rab tu grags pa 'gro mi bya/ /bdag nyid kyis ni mngon sum bya/ /bil ba chu nang lhung ba yis/ /nags tshal stong par phyur la ltos//gnad du 'phog pa'i tshig mi brjod/ /shin tu gnod pa'ang brjod mi bya/ /skyes bu dang ni mtshon cha yi/ /pha rol dag ni shes par bya/ /dgra bo'i bu ni snyan par smra na yang / /mkhas ba yis ni btang snyoms mi bya ste/ /dug lo shin tu mi bzad yin pas na/ /de nyid dus gzhan dag tu gnod pa skyed//gang zhig dgra bo dag la yang / /g.yo med sems kyis phan byed pa/ /de la dgra bo thams cad kyang / /thal mo sbyor ba nyid du byed/ /dgra bo zil gnon 'dod pa yis/ /bdag nyid yon tan gyis bstod kyi/ /gnod sems ngan pas ci zhig bya/ /des ni bdag gnod dgra la min//mi srun skye bo zhi bas min/ /de dang 'tsham pa'i rtsub pas bsten/ /bu ni mi bsgrungs pa dag la/ /phan 'dod pa yis mi bsdigs sam/ /ji srid lam ni mthong ba dang / /ji srid rkang pa brtan pa dang / /ji srid shes rab ma nyams pa/ /de srid rang gi phan pa gyis//rnam pa kun du rang phan spyad bya yi/ /'gro mang nang du gnas pas ci zhig bya/ /skye bo thams cad yongs su mgu 'gyur ba/ /de 'dra'i thabs ni gang yang yod ma yin/ /gzhan las tshol zhing zas zhim 'dod/ /slong mos 'tsho zhing khengs pa che/ /bstan bcos shes med rtsod par 'dod/ / khyod kyi de gsum bzhad gad rgyu/ /nags bsregs pa yi me la ni/ /rlung gis grogs su 'gyur ba yin/ /de nyid mar me 'jig byed pas/ /nyam chung ba la bshes yod min/ /gzhan la gnod pa ma byas dang / /dman la 'dud pa ma byas shing / /dam pa'i lam ni ma spangs gang / /nyung ba de ni mang po yin//nad kyi 'jigs pa ma byung zhing / /dam pa dag dang 'grogs par brtson/ /dman pa'i tshig ni ma smras pa'i/ /nyin gcig lo brgya bas mchog yin/ /dman pas gang tshe nor ni cung zad rnyed/ /'gro ba thams cad brnyas pa'i brgya la ldan/ /dam pa nor gyi 'byor ba thob gyur kyang //sA lu smin pa lta bur shin tu 'dud/ /rigs rus dma' ba'i sems can dag /nor ram rig pa rnyed gyur na/ /'gro ba kun la rtswa snyam sems/ /pags pa sngon po'i wa bzhin no/ /nor ram rig par ldan gyur na/ /dman pa rnams ni dregs par 'gyur/ /go 'phang gnyis po de dag gis/ / mkhas pa shin tu dul bar 'gyur/ /bogs med tshong dang 'khor ldan dag la 'tshe/ /slong zhing 'gying la nor med 'dod la dga'/ /bud med gzhon la tshig rtsub smra ba ste/ /skyes bu log par spyod pa de lnga'o/ /rma bya so pa'i tsha bas gdungs gyur kyang / /mkha' dkyil char gyi rgyun la re bla yi/ / rdzing bu rnyog pa can gyi chu ngan la/ /dregs pas bstod ba'i mgron pa ma gdud cig /ti ti ra ni zil pa yi/ /thigs pas spog ni 'dzin byed kyang / /bsla ngan gtugs ba'i 'jigs pa yis/ /brgya byin la yang mi slong ngo / /de nyid shes na slob dpon ci/ /nad pos sman pa ga la dgos/ /chu bo brgal na gru pas ci//chags bral byad mas ci zhig bya/ /ngan pa ji srid nyam chung ba/ /de srid bar du rang bzhin bzang / /ston ka yi ni chu bo'i chu/ /skye bo kun gyis bgrod pa bla/ /gang du byi pas mdzod pa byed/ /byi las mar ni bsrung pa dang / /khwa yis phyag tshang byed pa yi/ /dngos de la ni smos ci dgos//gang na zhal ta byed pa mang / /thams cad mkhas par nga rgyal che/ /kun kyang gtso bo byed 'dod pa/ /de yi tshogs rnams 'jigs par 'gyur/ /nyin par 'khrig dang nyin nyal dang / /chang gsar zho ni gzhon nu 'thung / /sha skam bud med rgan nyal te/ /'di drug lus kyi stobs 'phrog pa'o//gang zhig khro na'ang 'jigs med la/ /dga' na'ang phan 'dogs mi nus pa/ /tshar gcod bsdu ba med 'gyur ba'i/ /de khros pas ni ci byar yod/ /nad dang phangs dus byung ba dang / /mu ge'i tshe dang dgras 'jigs dang / /rgyal po'i sgo dang gshin rje'i gnas/ /de rnams kun gyi gnyen por 'gyur//dgos pa'o don du 'jig rten sgrub/ /dam pa'i don du de dag min/ /be'us 'o ma zad mthong nas/ /ba ni ring du spang ba bzhin/ /sdug pa dang bral rang mis brnyas pa dang / /bu lon mang zhing ngan pa dag la brten/ /dbul bor mthong nas mdza' bos spangs pa ste/ / me ma yin pas lus sreg de lnga'o/ /mi mthun chung du 'phel ba la/ /mi gang zhi bar mi byed pa/ /sbrang rtsi'i thigs pa 'dzag pa dang / /yul 'khor 'jig par 'gyur pa bzhin/ /gang zhig rigs ldan de bzhin brten pa dang / /dam pa phangs kyang yon tan gtong mi byed/ /nyi ma'i rang bzhin tsha bas gdungs kyang ni//kha ba grang ba'i rang bzhin gtong mi byed/ /sdig pa zad 'dod bde bar gshegs la dad/ /skal ba zad 'dod skye bo ngan dang bsten/ /rigs rgyud zad 'dod klan zhing lkugs pa skye/ /'bru rnams zad 'dod pho ba'i me drod skye/ /'dod pas long bas sdig mi mthong / /dmus long gis ni gzugs mi mthong //dregs pa yis ni skyon mi mthong / /bdag ltas de nyid mi mthong ngo / /rgyal po yur chu 'khri shing dang / /bud med dmus long lnga po ni/ /g.yon can blo yis ji ltar khrid/ /khrid rnams gzhan gyi dbang du 'gyur/ /bde ba'i rjes la sdug bsngal te/ /sdug bsngal rjes la bde ba yin/ /mi rnams kyi ni bde sdug dag /'khor lo bzhin du 'khor bar byed/ /ma mthong ba dag mdun du lhags/ /slar yang ma mthong ba ru song / khyod kyi de ci khyod kyang ci/ /de la mya ngan su zhig byed/ /ji lta ji ltar shing dag ni/ /rgya mtsho che la mnyam 'gro ba/ /dba' rlabs kyis ni so sor phye/ /de la mya ngan su zhig byed//blo gros che ldan khro bas shugs las rgyal/ /skye bo ngan pa khro bas mod la pham/ /pham pas pham par byas pa'i blo ngan dag /blo ldan dag dang lhan cig ci phyir 'gran/ /pha bong 'bad pa chen po yis/ /ri yi rtse mor 'degs par nus/ /cung zad tsam gyis de skur ba//rang gi skyon yon de dang mtshungs/ /me gang bya ba ma yin pa'i/ /bya ba la ni sbyor byed pa/ /des ni nges par phung 'gyur te/ /khyi'u 'byin pa'i spre'u bzhin/ /rang gi phyogs ni yongs spangs nas/ /gzhan gyi phyogs la dga' ba gang / /de ni nges par brlag 'gyur te/ /rgyal po rab dmar ji bzhin no//mkha' la skar mkhan dag gis rtsis byas na/ /zla ba dang ni skar ma'i lam rnams shes/ /khyim na mi dang khyim thab log pa dag /sna tshogs spyod pa de ni mthong ma gyur/ /rnyog med chu nang zla tshes snang gyur pa/ /pad+ma'i rtsa ba len par khyod byed gyur//ngang pa chu dang 'o ma 'byed shes pa'i/ /khyod kyi blo gros de ring gang du song / /mi gang bya ba chen po gang / /cung zad byed par 'dod na yang / /de ni bsgrims nas rab bya ste/ /seng ge'i las gcig yin par bshad/ /ji ltar rgyal srid bskyang pa dang / /bsdo pa'i dgra rnams 'dul ba dag /'bangs la re ba ma 'jog par/ /zhal bzhugs tshe na smyur te mdzod/ /snying du sdug pa'am gzhan gang zhes/ /sems yang ba dag rtse bar byed/ /spyod pa rgya chen ldan pa dag /sa yi dkyil 'khor thams cad gnyer/ /rtag tu snyan tshig smra ba yi/ /rgyal pos skye dgu brid par sla//phan tshig sman dang 'dra ba de/ /nyan pa bas kyang smra ba dkon/ /gal te chos don rtogs pa yis/ /zhal che lam srang skyon na ni/ /'gro ba blo ldan gcig gyur kyang / /de las bdag ni rnam par rgyal/ /nor mnyam nus pa mnyam pa dang / /gnad shes 'bad rtsol che ba yi//'khor gyis nges par gnod 'gyur gyi/ /gang dgras mi phung de yis phung / /chu yi nang nas me 'bar na/ /me de gang gis zhi bar byed/ /skyob pa las ni 'jigs pa byung / /'jigs pa de las du yis srung / /ma bskul mi snyan dgra ston la/ /bskul nas snyan pa mi sgrogs la//'jig rten rnga zlum dang 'dra la/ /de ltar bskul zhing sgra snyan sgrogs/ /sa bdag 'dod la chags pas phan dang gnod pa shes mi 'gyur/ /ji ltar rang dgar rang spyod myos pa'i glang chen bzhin du spyod/ /de 'og 'gyod pas rab gdungs nyam nga'i mya ngan g.yang sar lhung //de yis 'khor la nyes pa bgod byed rang gi skyon ma rig /rtsod dus rgyal po nor tshogs thob pa las/ /srog ni srung gi nor ni gtang bar bya/ /ji ltar shan pas lug gi bal bregs nas/ /srog thar byas pa rnyed ba che ba bzhin/ /rtsa ba brang 'gro rtse mo mkha' lding dang / /yal ga spre 'jogs me tog bung bas bskor//gang zhig gdug pa'i sems can gnas bcas pa/ /tsan dan shing de la ni bsnyen du med/ /gang gis thabs kyis pha rol gnon/ /nus pas ma yin thabs kyis de/ /bya rog gis ni gser phreng gi /sbrul dag gsad par gyur la ltos/ /gang la blo yod de stobs ldan//blo med stobs kyis ci zhig bya/ /ci zhig seng ge stobs dang ldan/ /ri bong gis ni srog dang phral/ /bya ba'i thabs kyis grogs byed na/ /blo ldan dag la dri bar bya/ /phun sum tshogs pas smos ci dgos/ /phung gyur na yang mdzes pa yin/ /yon tan tshul spyod rang bzhin gsal ba yis//skye bo ngan pa bcos su ga la rung / /tsha zhing drod che rtsub pas bsgrubs pa yi/ /bad kan nad bzhin shin tu 'phel bar 'gyur/ /snying la khon du gzung bya yi/ /de la tshig gis mi bskul bar/ /dgra bo'i rkang pa nas gzung zhing / /tshig gi mtshon chas bsnun par bya//ji srid 'jigs pa ma byung ba/ /de srid 'jigs la 'jigs par bya/ /'jigs pa mngon du byung ba'i tshe/ /'jigs med lta bur gzhom par bya/ /bden pa zhugs par gyur pa la/ /slu byed mkhas pa yin nam ci/ /pang par brten te nyal ba la/ /gsod pa de ci dpa' bo'am//gzhon yang rgan pa'i nye bar zhi la dga'/ /mkhas par gyur kyang shes pa'i nga rgyal med/ /gzi brjid che yang bzod cing des pa'i ngang / /je mthor phyin yang nga rgyal dregs pa med/ /rtag tu sems can phan dga' rnams/ /rin chen smon ltar mchog yin te/ / snum la ltos par mi byed cing / /snod dang sdong bu la ltos min/ /sman pa zas ni ma zhu dang / /rgyal po brdzun du smra ba dang / /rigs ldan sdig pa spyod pa ste/ /'di gsum shin tu mi rigs pa'o/ /mthu che ba dang 'grogs gyur na/ /mthon po nyid du su mi 'gyur/ /me tog phreng bar 'brel pa yi//skud pa mgo la 'dogs par byed/ /dus la bab par ston pa dang / /gnas skabs bcas par smra ba dang / /shin tu ngo mtshar gyur la 'god/ /'jig rten chen po nyid thob 'gyur/ /brtson 'grus brtul phod brtan pa dang / /stobs dang blo gros pha rol gnon//'bad rtsol yon tan drug ldan pa/ /de la lha yang 'jigs pa skye/ /skyon chad dgra bo pham par byas pa dag /mdza' bor 'dod 'ongs pa la yid mi brtan/ /brag phug 'ug pa'i tshogs kyis gang ba la/ /bya rog gis ni me btang bsregs la ltos/ / zad pa gnyid log 'jigs dang 'khrig pa spyod/ /mi dang phyugs rnams de dag mnyam pa yin/ /chos spyod pa yi mi rnams khyad par 'phags/ /chos mi shes na phyugs dang ci mi mnyam/ /gang zhig chos la smod pa rnams/ /nyi mar 'gro dang 'ong na yang / /de ni mgar ba'i sbud pa yin/ /dbugs 'byin kyang ni gson ma yin//sangs rgyas mgon po yongs spangs te/ /lha gzhan la ni phyag byed pa/ /blo ngan gang gA'i 'gram du ni/ /skom nas khron pa byed dang mtshungs/ /yul ni shin tu yun ring gnas kyang nges pa kho nar 'gro bar 'gyur/ /'bral la khyad par ci zhig yod la 'gro ba rang nyid sbyong mi byed//dbang med 'bral bas yid la yongs su gdung ba mtha' yas skyed par byed/ /'di dag rang gis sbong na zhi ba'i bde ba mtha' yas 'thob par 'gyur/ /'dod pa yid 'ong yin pa bde/ /'byor pa mnyam dga' yin mod kyi/ /'on kyang 'tsho ba'i 'jig rten 'di/ /nad med chang 'thung khur par mtshungs//'gro ba'i dri ma chags pa 'dra ba med/ /gzhan la gnod pa phrag dog 'dra ba med/ /mdza' bo slong mo pa 'dra yod min te/ /gtong dang mnyam pa'i gnyen bshes gang yang med/ /shes rab dang mnyam mig med de/ /rmongs pa dang mnyam mun pa med/ /nad dang 'dra ba'i dgra med de//'chi ba dang mnyam 'jigs pa med/ /de bas shin tu mi bzad pa'i/ /'chi ba nges par 'byung 'gyur bas/ /'dod pa rnams la sems bzlog la/ /dam pa'i chos la dga' bar gyis/ /grogs po 'di na nor de yod legs pas/ /yid bzhin nor khyed rdor 'gyur nor ma byed/ /spur long rgyan gyi dam par byed 'gyur pa//der ni 'di 'dra'i nor bu 'jig rten phung / /gang zhig sa stengs 'bru rnams dang / /gser dang phyugs dang nad med rnams/ /de dag kun gyis gcig mi ngoms/ /de ltar shes nas zhi bar gyis/ /'bad pas bsags pa'i nor la ni/ /yang dang yang du nyugs par byed//bkren pas byi ba ji bzhin du/ /nor rnams sdug bsngal kho nar zad/ /'jig rten 'tsho ba brtan ma yin/ /nor dang longs spyod brtan ma yin/ /bu dang chung ma brtan min gyi/ /chos dang grags pa snyan pa brtan/ /rgyal po nor sogs ngoms pa med/ /mkhas pa legs bshad kyis ma ngoms//rgya mtsho chu yis ngoms pa med/ /'jig rten sdug la bltas mi ngoms/ /me la shing gis ngoms pa med/ /byis pa 'dod pas ngoms pa med/ /tshul khrims dag dang dul ba dang / /sems ni dul bar gyur pa dang / /gang zhig drang por zhugs pa dag / de la gnas na ci zhig dgos/ /chog shes dbang phyug la gnas na/ /skye bo ngan pa'i sa dang ring / /longs spyod 'dod pa'i sled bas bcing / /gom re brnyas ba thob par 'gyur/ /lus zhes bya ba skyon ldan 'di/ /yon tan chen po gcig yin te/ /gnas skabs gang dang gang phrad pa/ / de dang der 'gro nga gor ba/ /nags kyi glang po rtswa lo za yang stobs dang ldan/ /sbrul ni zas su rlung zar gyur kyang sbegs pa med/ /drang srong rtsa ba 'bras bu tsam gyis dus 'das byed/ /de bas khrel 'dzem chog shes kho na 'byor pa'i mchog /tshod ma dag dang rdul med pa'i/ /chu yi dgon pa ga na'ang yod//zla ba thun mong mar me yin/ /'byor pa dag gis ci zhig bya/ /chog shes nges pa'i bdag nyid can/ /'tsho ba gang na'ang btsal mi dka'/ /rtswa dang lo ma chu yi gnas/ /gang na'ang med pa ma yin no/ /nags mchog stag dang glang po'i gtsos bsten par/ /rtswa yi stan byas shing shun gos su gyon//shing gi 'bras bu la sogs zas za ba'i/ /nor med nye du'i tshogs nang gson pa min/ /bzang po'am na ni ngan pa yi/ /sbyor ba gang yang rung ba yis/ /lus ni shin tu bsrung bya yi/ /nor la chags pas ci zhig bya/ /bsod nams chen po'i rin gyis ni//khyod kyis lus kyi gru nyos pa/ /ji srid chag par ma gyur par/ /sdug bsngal rgya mtsho'i pha rol song / /ji srid sdug pa'i dus kyi zla rgyas pa/ /'chi bdag gza' chen 'di yis ma rnyed pa/ /de srid bag yod par ni gnas bya ste/ /rang gi bya ba dag ni bya ba'i rigs/ /gang tshe 'du shes bral zhing mig mi g.yo//skigs bu rgyun 'byung dbugs mthar thug pas slebs/ /mun par g.yang sa cher khring ltar gyur na/ /de tshe bu dang chung ma gnyen cir 'ong / /snying rjes gdungs pa'i yid dang dbang po dul zhing sems ni chog shes dag la dga' ba dang //chags bral mngon dga'i sems dang shing drung dag na lhung pa'i 'bras bus bza' ba'i bya ba byed/ /lus ring shing shun gyon zhing rgyal ba zhes ni snyan pa lta bur sgra sgrogs la/ /bA rA Na sIr gshin rje'i dbang gyur bcom pa'i lus chig 'di ni nam zhig spong bar 'gyur/ /bstan bcos 'dzin pas thar ba yin//lus dub pas kyang ma yin te/ /shes rab kyis ni sems btub na/ /thar ba thag nye 'di na yod/ /nyes pa'i skyon ni breg par gyis/ /mgo bo bregs pas ci zhig bya/ /gang zhig yid kyi gos med na/ /ras kyi chos gos ci la phan/ /sems can rnams la gang gi tshems/ / snying rjes brlan par gyur pa dag /thar dang ye shes de yin gyi/ /thal ba ral ba chos gos min/ /gang zhig lang tsho la zhi ba/ /de ni zhi bar bdag gis shes/ /khams rnams yongs su zad pa na/ /ci yi phyir na zhi mi 'gyur/ /mdza' bshes nye du dur khrod du/ /du ba 'thul nas ldog par byed//gang zhig rang dang lhan cig 'grogs/ /las te nges na dge ba spyad/ /gang zhig rab tu nyon mongs dang / /chos dang 'gal bar byed pa dang / /dgra la 'dud pa'i nor rnams ni/ /gang gi nor du rung ma yin/ /dam pa legs spyod la sred shin tu bsdams gyur te/ /kun du'ang skye bos smod 'jigs rtag tu sdug bsngal gnas//gang zhig 'dzom med longs spyod ngag gi rtsa rtsol ba/ /rigs dang mi rigs dpyod med tham la skye bo skyed/ /rigs dang mi rigs dpyod pa'i blo med cing / /thos dang sdom pa mang po rnam spangs nas/ /lto ba 'gengs pa tsam zhig 'ba' zhig 'dod//skyes bu phyugs dang phyug ma la khyad ci yod/ /mthong dang ma mthong yon tan gyi/ /'byung gnas chen po regs pa yin/ /des na de bas don gnyer bas/ /shes rab yongs su gzung bar bya/ /brgya yi nang nas dpa' bo skye/ /stong gi nang nas mkhas pa 'byung / /brgya stong las ni mdzangs pa ste//stong pa skye'am mi skye'ang srid/ /mkhas pas rig pa rnam kun du/ /na tshod yol yang bslab par bya/ /gal te 'dir 'dras mi ster yang / /skye ba gzhan du rnyed pa sla/ /skra dkar gnyer ma lhags dus su'ang / /thog pa bsags par bya ba ste/ /gang du thos mang 'gro 'gyur ba//der ni phung po 'gro mi 'gyur/ /rgyal po dang ni yon tan ldan/ /de gnyis 'dra ba ma yin te/ /rgyal po rang gi yul na bkur/ /yon tan ldan pa kun du bkur/ /yon tan ldan pa skyon yod kyang / /yon tan dga' rnams skyo mi byed/ /zla ba rnyog pa yod gyur kyang / / brtan rnams dga' bas lta bar byed/ /yon tan dang 'dra lus kyi rgyan gzhan med/ /sems las dang 'dra lus kyi sdug bsngal med/ /bzod pa dang 'dra lus kyi srung ma med/ /gtor ba dang mnyam gnyen ni gdan med/ /dam pa ring na gnas gyur kyang / /yon tan pho nya nyid byed de//ke ta ka yi dri bsnams nas/ /bung ba rang nyid 'ong bar 'gyur/ /yon tan dag la 'bad bya yi/ /'gying tshul dgos pa ci zhig yod/ /ba ni 'o ma med pa la/ /dril bu btags kyang nyo mi 'gyur/ /dus ni yun thung rig pa'i rnam pa mang / /tshe yi tshad kyang ji tsam mi shes pas//ngang pas chu nang nas ni 'o ma bzhin/ /gang zhig gces pa de ni bsten par bya/ /skar ma chen po mang du shar gyur cing / /sa yi rgyan gyur zla ba shar na yang / /gang du nyi ma nub na mtshan mor 'gyur/ /nyi ma ma gtogs shar nub ming mi 'dogs/ /gang zhig shar bar gyur na ni//mun pa med cing gzi can byed/ /nyi ma shar ba mchog yin gyi/ /gzhan rnams shar bas ci zhig bya/ /skyes bu bya ba gang yin gcig byas mthar phyin pas/ /sems 'phags 'gyur te mang po ci la dgos/ /zla ba rgyas pas sa stengs gsal ba bzhin/ /skar ma mang po'i tshogs kyis nus ma yin//yon tan skyes pa rang khar las/ /rdzas ni bson nams khar las pas/ /skyes bu la ni ci phyir smra/ /yon tan 'bad pas bsgrub bya yin/ /'bad pa'ang bdag nyid la gnas na/ /gzhan dag yon tan ldan zhes te/ /de ltar gson pa su yis bzod//bstan bcos don ni shes pa'i mi/ /'di na zha bo rnams la'ang mang / /ral gri'i rtsa mo rnon po yis/ /dgra las rgyal byed de rnyed dka'/ /phyug po kla klo rnams la'ang yod/ /dpa' bo dud 'gro rnams la'ang mang / /sna tshogs don gyi gtam smra ba'i/ /dam pa dag ni kun du dkon//ri bo kun la tsan+dan med/ /glang po kun la mu tig med/ /yang dag don gyi gtam smra pa'i/ /mkhas pa'ang kun na yod ma min/ /yon tan shes la de nyid yon tan 'gyur/ /yon tan med na de nyid skyon du 'gyur/ /chu bo'i chu ni shin tu skyon med pa'ang / /rgya mtshor phyin na btung du mi rung 'gyur/ / yon tan ldan pa yon tan la dga' yi/ /yon tan med pa yon tan gyis mi mgu/ /bung ba nags nas pad+mar 'ong 'gyur gyi/ /sbal pa lhan cig gnas kyang de lta min/ /mkhas pa rnams kyi grags pa ni/ /mkhas pa nyid kyi nang du 'phel/ /rin chen shel la rin chen dang / /g.yul ngo dag tu dpa' bo bzhin//ngang pa khra yi tshogs nang mdzes ma yin/ /cang shes bong bu'i tshogs nang mdzes ma yin/ /seng ge wa yi tshogs nang mdzes ma yin/ /mkhas pa blun po'i tshogs nang mdzes ma yin/ /gang zhig chen pos spyi bos bkur/ /de nyid dman pas rtswa snyam sems/ /mkhas pas phyag byas mchod rten ni//khwa dag stan du byed pa yin/ /bdag la grangs med yod gyur kyang / /gzhan la nyung zad yod pa yi/ /yon tan med la dam pa dga'/ /spyod pa 'di ni ngo mtshar che/ /thams cad mkhyen pa'i yon tan ni/ /thams cad mkhyen pa nyid kyis mkhyen/ /sa gzhi yi ni lci ba'i tshad//mtha' yas nyid kyis shes pa yin/ /gzhan gyis gzhan dag bsgrags na ni/ /med pa'ang yon tan can du 'gyur/ /yon tan rang nyid sgrogs pa ni/ /brgya byin yin yang mi btsun 'gyur/ /gang du yon tan ldan mi mchod/ /mkhas pa de ru ci phyir 'gro/ /gos med gcer bu'i grong khyer du//khrus mkhan gyis ni ci zhig bya/ /kye ma 'jig rten glen pa 'di/ /rang rgyud grub pa yod min te/ /gzhan gyis byas pa'i rje 'brang bas/ /zangs ma'i snod ni stor nas med/ /bzhad gad mkhan dang mkhas pa gnyis/ /blun la bzhad gad byed pa mchog /bzhad gad mkhan gyis nor rnyed kyis//mkhas la nor med stong par 'gro/ /sna tshogs don ldan gtam rgyud kyis/ /mkhas pa dus ni 'da' bar byed/ /dbul bo chos kyis phongs gyur bas/ /gnyid log na yang 'thab bar byed/ /gang zhig mang po tshogs par gyur pa las/ /skye bo dam pa'i yon tan sten mi byed//de ni rang gi ma yi sdug bsngal gyis/ /bskyed de skyes par gyur kyang ci zhig phan/ /mkhas pa'i tshul ni rigs pa yin/ /khu byug tshul ni sgra snyan yin/ /dka' thub tshul ni bzod pa yin/ /bud med tshul ni nyon mongs yin/ /skar rtsis de bzhin grub mtha' dang / /mkha' lding sngags dang sngags smra ba//don gyi de nyid gzung bya yi/ /sgra la dpyad par mi bya'o/ /glegs bam la bzhag rig pa dang / /gzhan la tshol ba'i nor dag ni/ /dgos pa'i dus la bab pa na/ /de ni nor min rig pa min/ /bzo slob pa yi yon tan kun/ /yon tan 'tsho ba'i rgyu tsam yin//'khor ba gcod pa'i blo gros gang / /ci yi phyir na de mi byin/ /mi ni su la'ang ma brtags par/ /gdams ngag sbyin par mi bya ste/ /spre'u tsam gyi gnas bcas dang / /gnas med par ni byas la ltos/ /kha cig smra ba lhur len te/ /kha cig mi smra don yang bsgrub/ /'dam bu me tog 'bras bu med//star ka 'bras bu me tog ldan/ /ke ta ka yi 'bras bu ni/ /chu rnams dang bar byed mod kyi/ /de yi ming tsam smos pa yis/ /chu rdul dang bar mi byed do/ /gzhung lugs dag la byang byas kyang / /nyams su len pa'i par mi byed na/ /lag na sgron ma yod kyang ni//long bas lam ni mthong mi 'gyur/ /zla ba yar ngo mar ngo ltar/ /dam pa dam min bsten pa las/ /yon tan chung ngu'ang rgyas 'gyur zhing / /rgya chen po yang 'grib par 'gyur/ /mkhas pas dgra bor gyur pa'ang bla'i/ /mi mkhas pa dang mdza' ba min/ /rkun pos bram ze bsrungs pa dang //spre'us rgyal po'i mig bcar bzhin/ /mkhas pa dang ni dul ba dang / /chog shes bden par smra ba dang / /'chi ba na yang 'dug bla yi/ /skye bo ngan dang rgyal srid min/ /sbrul gdug skye bo ngan pa dug /sbrul las lhag par skye ngan dug /sbrul gdug sman dang sngags kyis thub//skye ngan gdug pa gang gis ni/ /skye bo ngan pa yon tan brgya yis phan btags te/ /dga' bar gyur kyang de ni tshig rtsub smra bar byed/ /gang zhig rigs ldan de bzhin brtan pa dang / /bsngags 'os phongs kyang yon tan gtong mi byed//rang bzhin ngan pa'i mi dag dang / /srang gi mtshan nyid dag dang mtshungs/ /cung zad tsam gyis mtho 'gyur zhing / /cung zad tsam gyis dma' bar 'gyur/ /tsan dan bla rtsi ga bur gyis byugs kyang / /sgog skya'i rang bzhin drid mi 'dor ltar/ /rigs pa'i gzhung lugs mang po rab bslabs kyang //rang bzhin ngan pa'i mtshan nyid 'dor mi srid/ /dam pa'i bu la gdong na pad+ma med/ /smad 'tshong bu la glad nas rwam skyes/ /ji lta ji ltar log par byed gyur pa/ /de lta de ltar nal bu'i mtshan nyid yin/ /kha nas smras pa'i tshig gzhan la/ /yid la sems pa'i bsam pa gzhan//kye ma yon po'i blo gros can/ /'di yi rang bzhin su yis sprul/ /'bad pas skyon ni len par byed/ /yon tan rtag tu spong bar byed/ /skyon len yon tan spong ba yi/ /skye bo ngan pa chu tshags 'dra/ /skye bo ngan pa sun phyung na/ /dam pa la yang yid mi rton/ /byis pa 'o mas kha tshig na/ / zho la'ang phu yis 'debs shing 'thung / /mtshan mo mtsho nang skar ma'i gzugs brnyan snang ba la/ /ngang pa pad+ma'i rtsa bar 'khrul pas sun phyung ba/ /nyid mo pad rtsa mngon sum mthong yang za mi byed/ /brdzun smras sun phyung bden pa la yang dogs pa skye/ /bud med zas ni nyis 'gyur te/ /de yi g.yo sgyu bzhi 'gyur ro//ngo tsha dag ni drug 'gyur ro/ /'dod chags brgyad 'gyur zhes brjod do/ /sbyin pas ma yin rim gros min/ /mchod pas ma yin bsnyen bkur min/ /brtan pas ma yin brtson pas min/ /kun tu mi bzad bud med yin/ /mkha' lding dbang pos khyer ba'i tshe/ /pad dkar klu yis smras pa ni//gsang tshig bud med la smra ba/ /de yi srog ni de zad 'gyur/ /don dang chos ni rnam par nyams byed cing / /mtho ris dag dang thar ba'i gegs byed la/ /gnod pa kun gyi rtsa ba nyid gyur pas/ /de bas gzhan gyi bud med rtag tu spang / /gang gis tshigs bcad gcig tsam zhig /bla mas slob ma la byin na//gang zhig btang nas shog btang 'gyur/ /rdzas de sa stengs yod ma yin/ /'du 'dzi kun du spang bar gyis/ /gal te de spong ma nus na/ /dam pa dag dang 'bre bar gyis/ /de nyid de yi sman yin no/ /'dod pa kun du spang bar gyis/ /gal te spong bar ma nus na/ /thar ba dag la 'dod par gyis//de nyid de yi sman yin no/ /phan med gnyen yang gzhan yin te/ /pha rol yon yang gang phan gnyen/ /lhan cig 'byung ba'i lus sogs nad/ /phan byed dgon pa'i sman bzhin no/ /'bad pa yis ni bzung ba yi/ /bum pa yi ni chu phyed bzhin/ /spyi bo la ni bkur byas na/ / skye bo ngan pa khro bar byed/ /gang zhig yid dang rjes mthun pa/ /ring na gnas kyang nye ba yin/ /gang zhig yid la brtan mi gnas/ /drung na gnas kyang ring ba yin/ /dam pa min dang lhan cig gnas gyur kyang / /chu dang pad mo bzhin du 'dres mi 'gyur/ /dam pa thag ring dag tu gnas gyur kyang //zla ba ku mu ta ltar dga' bar byed/ /gal te rtag tu mja' 'dod na/ /gsum po 'di dag mi bya ste/ /rgyan po 'gyed dang nor 'brel dang / /lkog tu chung ma dang smra ba'o/ /ji ltar rwa las 'o ma 'byung / /'dam bu me tog sbrang rtsi 'dzag /gal te bud med bden gyur na/ /skam sa las kyang pad+ma skye//bsod nams yongs su dman pa'i mis/ /longs spyod thob kyang spyod mi shes/ /gangs chen mtsho la khyi bzhin du/ /skom na'ang lce yis lhag par byed/ /'jig rten 'di na las byed pa/ /gla med lam brgyags khyer mi btub/ /slong ba dman pa mi mngon par/ /phyi ma'i dus na brgya 'gyur khyer//rang nor spangs nas 'gro 'gyur bas/ /skyes bu sbyin pa gtong bar byed/ /shi na'ang nor ni mi 'dor bas/ /sbyin byad ser sna can 'drar shes/ /sbyin na dbul gyur dogs pa yis/ /bkren pa sbyin pa gtong mi byed/ /nges par 'jig pa de nyid kyis/ / mkhas pas nor ni gtong bar byed/ /zas las zan gyi phyed tsam yang / /slong ba rnams la cis mi ster/ /'dod dang rjes mthun 'byor ba yang / /gang gi tshe na 'byung bar 'gyur/ /las kyis 'byor pa med kyang gdung ba mi skyed kyi/ /'on kyang ci 'byor pa la sbyin pa gtang bya ste/ / lo ma me tog 'bras bu chu dang sman rnams ni/ /thams cad mtha' yas bsngo ba'i stobs kyis mtha' yas 'gyur/ /sbyin dang spyod pas stong ba yi/ /nor des nor bdag yin na go /nor de nyid kyis bdag kyang ni/ /nor gyi bdag po cis ma yin/ /yab gcig 'di ni las kyi sa//'di nas pha rol 'bras bu'i sa/ /'di ni gang zhig byas gyur pa/ /de nyid gzhan du nges par spyod/ /gzhan 'byor rigs dang gzugs dang nad med nyid/ /mthong nas 'dir ni ci phyir gdung bar byed/ /gal te 'di kun khyod 'dod bsod nams kyi/ /sa bon las ni 'bras 'byung ma thos sam//'byor pa yod kyang gtong med na/ /nye bar 'tsho bas ci byar yod/ /kim pa ka yi 'bras bu ni/ /chag kyang ltogs la mi byar yod/ /gang zhig gzhan la gnod pa med par sbyin gtong ba/ /'di yi longs spyod sna tshogs chu yis mi 'khyer zhing / / me yis mi tshugs rkun po rnams kyis 'phrog mi nus/ /de yi 'byor pa nam yang rab nyams mi 'gyur ro/ /gang zhig dmyal ba'i nad la ni/ /gso ba dag ni mi byed pa/ /sman med gnas su song nas ni/ /nad dang bcas pas mi byar yong / /mi srun skye bo sa khung las byung ba'i/ /tshig ni sbrul gyis skye bo dam pa zin//dug de zhi bar byed pa'i gnyen par yang / /shes rab bzod pa'i sman dag btung bar bya/ /ji srid 'tsho bar gsad kyang ni/ /dgra bo zad par mi 'gyur gyi/ /de ni dgra bo nyid gsod yin/ /mthu chen bcos du mi rung la/ /bzod ba byar yang ci zhig yod/ /dul ba zhi ba'i spyod pa la//bzod par bya yang ci zhig dgos/ /gnod byed 'os pas khro zhe na/ /chos don 'dod dang thar pa dag /mngon sum du ni 'jig byed pa'i/ /khro la khyod ni cis mi khro/ /gzhan gyi 'byor pa dam pa mthong nas ni/ /gang zhig sems 'khrug ba ni skye 'gyur bas/ /don de cung zad rnyed par mi 'gyur gyi//'gro de rang gi bsod nams 'joms par byed/ /thams cad chos ni mnyan par bya/ /thos nas rab tu gzung bya ste/ /gang zhig bdag yod mi 'dod pa/ /de dag gzhan la mi bya'o/ /'jig rten pha rol 'gro ba dag /shes par smra la su zhig mkhas/ /de ni nyams su len pa na//drang srong rnams kyang mkhas pa yin/ /'byor pa g.yo zhing lang tsho yun kyis 'jig /srog ni gshin rje'i so gcig gnas dang mtshungs/ /'on kyang 'jig rten pha rol sgrub la lhod/ /kye ma mi yi spyod pa ngo mtshar che/ /blo gros bzang yang le lo yis/ /skye ba mthon por mi 'gyur te//lag rtsis sa la 'dri ba yi/ /pho long gsher ba dag dang mtshungs/ /gal te 'gro ba 'di kun gyis/ /'chi bdag spyi bor gnas mthong na/ /zas kyang yi gar mi 'ong na/ /bya ba gzhan lta smos mi dgos/ /'dus byas zin dam ma zin ces/ /'chi bdag sdod par mi 'gyur bas/ / sang gi bya ba de ring bya/ /phyi dro'i bya ba snga dro bya/ /ji srid nad med lo tog skyes gyur pa/ /nad kyi sar ba chen pos ma brlag cing / /ji srid blo ni bya ba'i rjes 'jug pa/ /'di ni dam chos mnyan pa'i dus yin no/ /bong bu phyugs la me tog phreng ba ci/ /dud 'gro phag la kha zas zhim po ci//long la snang dang 'on pa dag la glu/ /glen pa rnams la chos kyis ci zhig bya/ /ji srid 'dod chen ma gyur par/ /de srid yon tan che nyid yin/ /'dod chen nyid la zhugs gyur na/ /yon tan btsun par ga la 'gyur/ /ji srid su la'ang mi slong ba/ /de srid dka' thub gzi brjid can//dpa' zhing shes ldan rigs mtho dag /skyes bu zhes kyang de srid brjod/ /dang po'i rtsom pa gang yin pa/ /'di ltar ngo mtshar che ba yin/ /zo chun bzo sbyar gyur pa ni/ /bud med kyi yang dbang du 'gyur/ /drang srong bu ni myur du shi yang rung / /rgyal po'i bu ni yun ring gson yang rung //rngon pa'i bu ni shi'am gson mi rung / /dam pa'i bu ni shi'am gson yang rung / /de nas 'byung ba la gnas pa'i/ /mi yi blo ni 'phel bya'i phyir/ /gang gis bstan bcos shes gyur pa'i/ /legs par bshad pa bshad par bya/ /legs par bshad pa'i rang bzhin tshig / gang yang rung ba bsag par bya/ /tshig gi gnas skabs mchod sbyin la/ /nor med ci zhig ster bar byed/ /rig pa bslab dang dpa' bo dang / /gang yang gzugs bzang ldan bud med/ /gang dang gang du 'gro gyur pa/ /de dang der ni dpal chen thob/ /rig par ldan dang rgyal po yi/ / gang du'ang mnyam pa ma yin te/ /rgyal po rang gi yul na bkur/ /rigs ldan kun du bkur bar 'gyur/ /gzugs dang lang tsho phun tshogs shing / /rigs mtho rnams las skyes gyur kyang / /rgya skyegs shing gi me tog ltar/ /rigs dang bral na mdzes ma yin//lus can rigs dang bral gyur ba/ /rigs ldan yin yang ci zhig dgos/ /'jig rten du ni rig pas mchog /rig pa med pas rlag par byed/ /bde ba 'dod na rig pa dor/ /rig pa 'dod na bde ba dor/ /bde ldan rig pas ga la 'grub/ /rig pa don gnyer ga la bde/ /rigs dang mdza' bshes med gyur pa'i//mi ni rtag tu sdug bsngal 'gyur/ /rigs dang mdza' bshes ldan gyur pa'i/ /mis ni rtag tu dga' ba 'thob/ /rigs dang ldan pa gzhan yul gang / /snyan par smra la pha rol su/ /gnas dang ldan pa khur lci gang / /brtson dang ldan la thag ring ci//rtsol ba yi ni grogs yod la/ /ri rgyal rtse mo'ang mtho ba min/ /sa yi 'og kyang dma' ba min/ /rgya mtshos chod pa'ang pha rol min/ /rig pa glegs bam la bslabs kyi/ /bla ma'i thad rnams ma bslabs pa/ /'phyon ma'i bud med sbrum ma bzhin/ /tshogs pa'i nang du mi mdzes so//bla ma gang zhig yi ge gcig /ster ba la ni brnyas byed pa/ /khyi yi skye gnas brgyar brgyud nas/ /rigs ngan du yang skye bar 'gyur/ /gang zhig la ni yi ge gcig /bla mas slob ma la byin na/ /gang zhig btang nas shog gtong ba'i/ /nor ni sa stengs yod ma yin/ /skyed par byed dang legs slob dang //gang zhig rig pa ster pa dang / /zas ster ba dang mi 'jigs sbyin/ /lnga po 'di dag pha ru bshad/ /rgyal po blon po'i chung ma dang / /de bzhin mdza' bo'i chung ma dang / /spun zla'i chung ma ma nyid de/ /lnga po 'di dag ma ru bshad/ /blun po rnams pa gdams pa ni/ /'khrug par 'gyur gyi zhi mi 'gyur//sbrul la 'o ma blud pa ni/ /dug 'phel 'gyur ba kho nar zad/ /mngon sum pa yi rkang gnyis phyugs/ /blun po yongs su spang bar bya/ /ma mthong tsher ma ji lta bar/ /tshig gi zug rngus gnod par byed/ /blun pos blun po mthong gyur na/ /tsan dan bas kyang bsil bar byed//gal te mkhas pa mthong gyur na/ /pha gsod pa ni lta bur sems/ /skye bo ngan la phan pa dag /byas kyang gang la'ang byas mi gzo/ /dam pa cung zad bkur na yang / /ji srid 'tsho bar rang dbang 'gyur/ /blun po chu yi ri mo ltar/ /gang zhig byas pa de myur 'jig /dam pa rdo yi ri mo ltar//shin tu chung ngu'ang brtan par gnas/ /skye bo ngan pa snyan smra yang / /'di la yid brtan rung ma yin/ /rma bya sgra snyan sgrogs na yang / /zas su dug chen za ba yin/ /e ma skye bo ngan pa dang / /bad kan dag gi rang bzhin mtshungs/ /'jam po yis ni 'khrug 'gyur pa/ /rtsub po yis ni zhi bar 'gyur//skye bo ngan dang gser dang rnga/ /mi srun rta dang bud med dregs/ /brdungs nas dul ba nyid 'gyur gyi/ /de dag legs byas snod ma yin/ /skye bo ngan dang ldan cig tu/ /dgrar gyur mdza' ba'ang mdzes ma yin/ /khyis ni rtse bar byed pa'am/ /lhag pa'ang mdzes par 'gyur ma yin//sgul bas kyang ni mi srun gdug /sbrul gdug sman dang sngags kyi zhi/ /mi srun cis kyang zhi mi byed/ /mi srun pa yi nyas pa ni/ /ngo bo nyid kyis rjes 'jug la/ /gang zhig mi srun dang 'dres de/ /mi srun las kyang mi srun 'gyur/ /pha yi spyod pa ma mthong yang / /bu ni rjes su 'jug byed de//ke ta ka yi shing las ni/ /skyu ru ra 'bras 'byung mi 'gyur/ /pha dang ma dang de bzhin spun/ /chung ma rjes mthun 'jug pa rnams/ /de yis sdug pa byas pa gang / /de ni mi des byas dang mtshungs/ /sa 'di rgya mtsho chen po dang / /ri bor bcas pa khur min gyi//gang zhig byas pa mi gzo ba/ /de ni shin tu khur lci yin/ /tshul khrims ldan dang lhan cig gnas/ /'byung po kun la phan par dga'/ /gshin rje 'jigs byed gang yin pa/ /da ni mkhas pas rab tu bsngags/ /mkhas pa dang ni dul ba dang / /chog shes bden smra lhan cig tu//btson rar gnas pa'ang gnas bla yi/ /mi sun nang gi rgyal srid min/ /dam pa dag dang lhan cig 'dris/ /mkhas dang lhan cig smra ba dang / /brkam med lhan cig mja' ba nyid/ /byed pa skyong bar mi 'gyur ro/ /shin du yun ring dus su yang / /gang gis 'jig rten 'di dang ni//gzhan du sdug bsngal mi 'thob pa'i/ /blo ni chos mthun nyid du bya/ /sems ni dga' bar byed na yang / /rnam smin gnod byed ci ru rung / /gang gis khams ni 'khrug byed pa'i/ /kha zas zhim po'ang ci ru rung / /gnod kyang phan par 'gyur ba ni//mkhas bas sman bzhin btung ba ste/ /'di yi 'bras bu rjes thob pa/ /mtshungs pa med pa nyid du 'gyur/ /don 'dir rigs dang ldan pa yi/ /rgyal pos bsdu ba byas na ni/ /thog ma dbus dang tha ma ru/ /de ni gzhan du mi 'gyur ro/ /rgya mtsho 'jig pa'i dus su ni/ / gzhung las rgal bar 'gyur zhes grags/ /dam pa 'chi na'ang gzhung lugs las/ /nam yang 'da' bar mi byed do/ /lugs kyi bstan bcos shes rab sdong bu zhes bya ba/ slob dpon klu sgrub kyis mdzad pa las le'u gnyis pa logs shig tu bsgyur ba rdzogs so// //lo tsA ba shI len dra bo ng+hi dang /