CLOSE WINDOW

D4302
བོད་ཡིག

@##/ /rgya gar skad du/ me g+ha dU ta nA ma/ bod skad du/ sprin gyi pho nya zhes bya ba/ yang dag par rdzogs pa'i sangs rgyas gsung gi dbang phyug la phyag 'tshal lo/ /rje bo khros pa'i shin tu lci ba'i bka' lung dag gis gzi brjid nyams par byas gyur cing / /gnod sbyin 'ga' zhig la ni rang nyid bag med dbang gyur mdzes ma spangs la lo yi bar//yid 'ong skyed byed bu mo'i khrus bya bsod nams che ba rnams dang shin tu rab mdzes pa'i/ /rab bzang ljon shing grib ma dang ldan dra ma'i dri bor song la spyod pas gnas par gyis/ /'dod ldan de ni mdzes ma spangs shing zla ba 'ga' yis ri bo der ni phyin byas pas//lag pa phra bar gyur nas gser gyi gdu bu dag ni dpud pa'i bar du rgyu bar byed/ /chu stod zla ba rdzogs pa'i nyin la sprin rnams ri shod ri steng nyal bar gyur pa ni/ /mchog tu rol cing mdzes par gyur pa'i glang chen yin nam snyam du rtog cing mthong bar gyur/ /nor cing rgyal po'i rjes 'brangs de ltar gnas de mdun du ke ta'i me tog rgyas stobs kyis//nang du yid la rab tu gdung ba'i mchi ma yun ring dag tu ci yang byung gyur te/ /mgrin par 'khyud bya dga' ma ring na gnas par gyur pa'i skye bo'i sems la ni/ /chu 'dzin mthong na bde ldan yang ni rnam pa gzhan du gdung ba ci yang 'jug par 'gyur//dbyar dus zla ba gnyis pa 'ongs par gyur tshe brtse ldan ma yi ched du srog chags ni/ /bde la char sprin dag gis rang nyid bde'am zhes pa'i tshig 'di khyer nas 'jug pa bzhin/ kun da'i zla yi chu skyes 'dzum pa rnams kyis de la mchod pa'i ched du dga' byed bzhin/ /mdza' ba mngon du gyur pa'i tshig de legs par 'ongs sam dga' bzhin brjod pa bzhin//gang du du ba gzi ldan chu gter myur 'gro rnams kyi tshor ba las ni char sprin te/ /gang du mkhas pa'i byed pa rnams dang srog rnams kyis ni legs bshad ched du thob par byed/ /ces pa mchog tu dga' ba'i gsang ba pa ni de las yongs su mi shes gang gis ni//'dod pa'i don du mkhas dang mi mkhas rnams dang sems ldan sems med rnams la zhu bar byed/ /khyod ni rigs mchog dang ldan mchod sbyin brgya pa'i blon po mchog ste 'dod 'jo'i ngo bo nyid/ /sa gsum mtha' dag rig cing bskal par 'jug pa'i che ba'i chu 'dzin nyid du bdag gis shes/ /des na khyod ni don gnyis nyid la skal ba'i dbang gis dman min 'dod pa thob pa nyid//mchod sbyin 'bras med bdag gi ring gnas gnyen 'dun dag tu yon tan mchog dbang khyod gshegs mdzod/ /ka ye chu ldan khyod ni shin tu gdungs gyur skabs nyid de phyir bdag gi dga' ba la/ /gtam gyi bdag po ched cher khros pas 'khyams shing bral ba dag gi phrin ni mdzad du gsol//phyi rol skyed mos mchog gnas 'phrog byed gtsug gi zla ba'i 'od kyis snang byas khang bzangs can//gsang ba'i bdag po'i bsti gnas chen po lcang lo can zhes bya ba'i gnas su khyod gshegs mdzod/ /khyod ni dri yi bzhon pa dang ldan mkha' lam gshegs pa'i dbang gis lam bgrod mdzes ma rnams//bsam pa dga' bar gyur te len bu'i rtse mo rgyab tu byas nas blta zhing gus par byed/ /khyod 'ongs tshon brel bas mchog tu nyen cing g.yog bzhin gzhan dbang gyur pa bdag 'dra dang / /gang zhig gzhan yang mi yi skye bo su zhig gus shing dga' ba rgya cher byed mi 'gyur//dal bu dal bus bskyod pa'i dri bzhon dag gis khyod la mdzes mthun zhabs tog byed pa bzhin/ /myos pa'i tsa ta ka 'di'ang khyod la snyan pa'i bstod pa'i bstod pa g.yon nas sgrogs pa dang / /chu skyar mdzes ma rnams kyang skal bzang mig gis mkha' la khyod mthong phreng bar byas nas brten//nges par mngal ni rab tu 'dzin pa yongs su gsal ba nyid du bya ba bzod par nus/ /bdag gis mdzes ma de yang nyin zhag grangs bzhin bdag po gcig pu yid la 'dri bar ni/ /gdon mi za bar myur du gshegs te bdag ni ma shi ba nyid khyod kyis bstan par mdzod/ /gang phyir 'phral la chu skyed phal cher phreng bas bcings pas ltung ba med par gyur pa bzhin//lha mo'i snying gi dga' ba bral las ltung ba phral la 'gog cing mdza' bas 'ching bar byed/ /gang zhig khyod kyi 'brug sgra sgrogs pa de ni skal bzang rna bas thos byas nas/ /mchog tu rgyas pa'i me tog dag gis sa gzhi'i ched du gdugs dag byas par gyur pa nyid//khyod ni nam mkha' dag la gshegs tshe dga' ba'i yid kyis mtsho dang gangs can bar la ni/ /pad+ma'i rtsa ba lo ma'i lam rgyags ldan pa'i ngang pa'i rgyal po rnams kyang grogs su 'gyur/ rag+hu'i bdag po'i zhabs kyis mtshan pa'i ri ngos rnams la skye bo kun gyis phyag byed pa'i//che ba'i ri bo 'di ni khyod kyi dga' ba'i grogs bzang khyod lang 'khyud pa sngon 'gro ba'i/ /mdza' ba gsal byas yun ring 'bral las byung ba'i mchi ma'i dro ba'ang 'byung ba yongs mthong la/ /khyod dang gang de dus dus dag tu yang dag mjal 'gyur zhes ni byas nas khams bde mdzod//kwa ye chu 'dzin re zhig khyod ni lam la bgrod pa'i thabs kyis gtam ni mnyan par mdzod/ /de yi rjes su bdag gi 'phrin ni rna ba'i bde ba skyed khyod rna bar gzung bar mdzod/ /shin tu ngal zhing rab tu ngal tshe ri bo'i rtse la rkang bkod ngal ba bsal nas gshegs/ /gang du skom shing shin tu skom na nyung ngu'i chu dang che ba'i mtsho la'ang btung bar bya//ni tsu la ni gsar pas gnas 'di las ni khyod langs mkha' la byang du gdong phyogs mdzod/ /phyogs kyi glang po rnams kyi lag pa che bas bcings pa'i lam ni yongs su dor bar gyis/ /ri yi rtse mo phrogs nas dri bzhon 'gro ba'am chu 'dzin langs nas 'gro ba'i ci zhes the tshom du//gyur nas grub pa'i bud med rnams kyis gyen phyogs bltas te 'jigs shing skrag pas rmongs par 'gyur/ /rin chen 'od kyis snang ba bzhin du rab mdzes mchod sbyin brgya pa'i gzhu yi dum bu ni/ /che ba'i grog mkhar rtse las byung ba de ni mdun du yang dag mthong bar 'gyur//khyab 'jug glang rdzi'i tshul bzung rma bya'i sgro yi 'od kyis khyab par gyur pa bzhin/ /khyod sku mchog tu mdzes pa mthing nag gang gis kun du khyab par byed pa thob par 'gyur/ /khyod 'ongs te na grong khyer na chung dga' zhing chags pa'i mig rnams kyis ni smin ma yi/ /rnam 'gyur mngon par mi shes bzhin du blta zhing 'bru rnams kun ni 'phel bar byed pa'i phyir//khyod ni cung zad nub tu bskyod cing gnas bya 'phrin la smon gyi rol dga' ba yi/ /gnam chu sgug pa'i zhing la gru char rgyas bya slar yang byang du myur bar dal gyis gshegs/ /lam du yongs su ngal ba'i tshe na ngos ldan a sma brtsegs pa'i ri rtser gnas bya ste//khyod kyi nags nang shing skam rnams ni char gyis brlan par byas bzhin legs par mdzod/ /gang phyir che ba'i skye bo dang por legs byas rgyu mtshan thob pa'i grogs bzang la/ /de lta'i bya bas gnas ched ci yang gyur la phyir phyogs ngan pa'i skye bo'ang 'gyur ma yin/ /kwa ye chu 'dzin khyod ni lam la ngal tshe sna tshogs brtsegs pa zhes pa'i ri bo ni//ngos ldan rtse mo yangs la bsdad nas phan tshun mngon du phyogs pa'i bsnyun ni byed bzhin pas/ /khyod kyang de yi so ka'i ma ni bdud rtsis zhi byed de yang phan pa'i dngos bo'i rten du 'gyur/ /chen po rnams la phan btags lan du 'phral la 'bras bu dam pas brlan pa nyid//khyod ni g.yo med rtse mor gnas tshe a mra'i nags kyi 'bras bu rgyas par smin pa ni/ /phyogs kun khyab par bkram pa dga' ma'i rnam mdzes len bu dag dang mtshungs pa bzhin du gyur/ /sa gzhi'i mdzes ma'i nu rgyas lhag ma dkar zhing thig le sngon pos mdzes pa bzhin//'chi med khyo shug dag ni ya mtshan nges pa thob pa'i mig gis rab tu lta bar byed/ /de nas ri dgas pa dag po'i chung ma'i nags kyi khang pa de la yud tsam gnas byas nas/ /de yi pha rol chu las thon nas mchog tu myur bas lam gzhan dag tu gshegs shing bgrod pa na/ / drang srong bu mo'i chu bo 'bigs byed ri yi zhabs ni rtsub pa'i rdol 'og tu 'bab ldan ma/ /so gnyis yan lag mchog las dkar mo tshon gyis legs bris bzhin du khyod kyis mthong bar 'gyur/ /khyod kyis thog mar char pa sgyug bya de yi chu ni 'thungs nas bgrod par bya ste phyin nas ni/ /nags kyi glang po myos pa'i tig ta'i ro dang 'dzam bu'i shing gi chu de'ang myur du 'gengs//kwa ye sprin stug khyod ni nang gi snying po ldan na dri bzhon dag gis g.yo mi nus/ /gang phyir thams cad stong na yang bar 'gyur zhing yongs su gang na kun kyang lji ba nyid/ /dang por kan+da li yi me tog kha 'bus rnams ni shun pas bsgribs pa byung ba dang / / 'dab ma ljang zhing ge sar dkar ser phye ldan brtan pa rnams kyi chu skyes me tog mthong nas kyang / /'brog dgon rnams su mes bsregs sa gzhir dri 'dzin mnam bya dri bzang mang po byung ba na/ /chu 'dzin dal bus char bskrun khyod la sA rigs rnams ni ston par byed par 'gyur/ /khyod ni legs par 'ongs [(]che [,]tshe [) ] snyan pa'i sgra bsgrags dus na grub pa rnams kyis mchod byed cing //tsU ta ka rnams chu yi thigs pa bzung nas dga' bas 'thung la lta bar byed bzhin dang / /chu sgrogs rnams ni phring bar bsgrigs rnams yongs su bsgreng zhing ci zhes nges par lta bzhin dang / /mchog tu 'dar byas dga' bas dga' ma la ni dam du 'khyud pa rnams ni byed pa yin//kwa ye grogs po khyod ni bdag gi dga' ba'i don la myur du 'gro snyam yod na yang / /ka ku b+ha yi dri ldan ri bo ri bo rnams la yun ring thogs par bdag gis shes/ /gtsug phud can gyi 'dren byed chu dang bcas pas legs par 'ongs sam byas nas yun ring gnas par 'dod//de slad khyod ni shin tu shin tu myur ba 'gro bar 'gyur ba dag kyang ji ltar yin/ /khyod 'ongs tshe na ngang pa rnams ni de nyid cung zad gnas nas 'gro zhing 'bras bu ni/ /yongs su smin pa ljang sngon dang ldan 'dzam bu'i nags kyis bskor dbus dkar po'i 'od ldan che ba yi/ /nags kyi 'khri shing ke ta'i chu skyes ge sar gsal bar rgyas shing grong dang mchod rten gyis//bskor ba'i khang par gtor len tshang skyed rtsom pa'i grong khyer tam sha zhes pas mchod par 'gyur/ /de yi byang phyogs gzhi la bi di sha zhes mchod cha rgyal po'i khab tu myur song nas/ /der ni khyod kyis shin tu che ba'i 'bras bu thob mchog go 'phang 'phral la thob 'gyur zhing //che ba'i kha zheng dang ldan mtha' nas lhung lhung skad snyan sgrogs shing dang zhing bsil ldan pa/ /g.yo ba'i rlabs phreng gdong kha smin ma g.yo bzhin pa 'dra'i mtsho de'ang skal bzang khyod 'thung 'gyur/ /gang zhig ni tsa zhes grags ri bor khyod 'ongs thob las der ni ngal bso'i ched du gnas//ka dam pa yi me tog dga' bas spu long rgyas shing ge sar 'dzum par byed pa bzhin/ /grong khyer rnams ni sman 'tshong ma rnams dga' bar byed pa'i dri bzangs dag gis gang ba rnams/ /rdo yi phrag phrug rnams kyi mchog tu mdzes pa'i lang tsho ma rnams smra ru 'jug pa bzhin/ / ngal sos gyur na bgrong bya gsar skyes rnams kyi me tog gsar pa'i dra ba mdzes pa rnams/ /chu bo chu ngogs skyes pa rnams ni chu thigs rnams kyis bran pa 'phral du 'ongs 'gyur zhing / /chu skyes thog ma'i gdong gi 'gram pa'i rngul thigs ser la rna ba'i ut+pal ngal ba dang / /rnyings gyur la ni nyid kyis skad cig bde ba'i grib bsil yongs su gnang bar mdzod cig kye//yang ni byang gi phyogs su bgrod cing gang zhig khyed ni 'khyog po'i lam la zhugs pa'i tshe/ /grong khyer udz+dza ya na'i rgyal po'i pho brang nang du phyir phyogs min par gnas par mdzod/ /de na grong gi dga' ma rnams kyi rol sgeg zur mig glog gi thag pa g.yo ba ni//skyong byed mig gis gal te khyod ni ma mthong 'bras bu med cing bslus pa nyid du 'ang 'gyur/ /rlabs phreng g.yo ldan snyan par sgrogs shing 'dab chags phreng ba'i rked rgyan ska rags sil sil can/ /dal gyis dal gyis 'gro zhing lang ling mdzes pa'i skal bzang 'khor lo'i lte ba dang ldan pa//ro mchog dang ldan chu bo'i na chung bir bin+d+ha ni khyod ni lam na mngon bzhugs nas/ /dga' ma rnams kyis mdza' bo rnams la rol sgeg thog mar ston cing rked rgyan 'grol 'dra mthong / /de rgal sin+d+hu'i chu ni len bu bzhin du lus ni rab tu phra bar gyur pa can/ /dgos su gyur pa'i shing ni rnyings pa'i 'dab ma lhung ba rnams kyis khyab par bkram pas dkar//kwa ye skal bzang khyod dang bral bar gnas pas lus kyi gnas skabs 'di 'drar 'gyur/ /gang gi chung ma spangs nas che ba'i gnas skabs mdzad dam khyod mkhyen de ni rjod par byed/ /a wan+ta'i yul thog na u da ya na'i gtam ni grong gi rgan mos shes pa yod//de rjes grong khyer sngar bstan khang pa yangs shing dpal dang phun tshogs che ldan yangs pa can/ /'dzam gling sa gzhir mtho ris mdzes ldan dum bu bsod nams lhag ma rnams kyi skabs gsum pa'i/ /legs bshad 'bras bur gyur pa nyung shas 'ga' zhig dag ni phrogs nas 'ongs par gyur pa bzhin//gang du bzhad rnams myos pa'i gdangs snyan che bar sgrogs shing yid 'ong sgra ni gsal bar byed/ /nyi gzhon gyis rgyas chu skyes dri bzangs dga' skyed bska ba'i ro ldan yid du 'ong gyur cing / /chu thigs kyis bran dri bzhon bud med chags gzir gdung ba phrog byed lus kyi rjes mthun pa//bdag po mchog ni 'dod don gnyer bar byed la snyan par sgrogs shing dga' bar byed pa bzhin/ /de yi nor ldan khang pa rnams na len bu spos kyis bdugs pa'i dri bzangs dra ba nas/ /'thon pas khyod lus cher 'gyur khyim gyi gtsug phud can ni dga' bas gnyen mthong gar gyis ni/ / mchod 'bul chu skyes dri bzangs ldan pa bud med rol sgeg ldan pa'i rkang pa'i tshon rnams kyis/ /mtshan pa rnams kyi dbus su dub par gyur pa'i rang nyid sdug bsngal bsal bar bya/ /yang ni srid pa gsum gyi bla ma dpal mgrin gnas su bsod nams ldan khyod bgrod par bya/ /'khor tshogs chos kyis khyab bdag mgrin 'od mtshungs bzhin zhes gus dang bcas pas lta bar byed//yid 'ong dri ldan chu la lang tsho ma rnams rol sgeg khrus ni byed pa'i dri ldang zhing / /ut+pal ge sar ldan pa'i dri rnams kyis bsgos rlung gi skyed tshal g.yo bar byed pa yod/ /kwa ye chu 'dzin nag po chen po'i gnas su bgrod nas nyin zhag gzhan pa'i dus la yang //nyin mor byed pa 'dren byed yul du 'ongs par gyur gyi bar du khyod ni gnas par mdzod/ /rtse gsum can la thun mtshams la ni gtor ma rnga chen bsgrags shing bstod dbyangs byed pa bzhin/ /khyod kyis 'brug dbyangs bsgrags tshe ma tshang med pa'i 'bras bu thob pas kun gyi don yang byed//de nas rkang pa bkod par gyur tshe 'og phag dag las sil sil snyan pa'i sgra 'byung zhing / /rol sgeg g.yo ba'i rin chen 'od 'phros lus mdzes rnga yab 'dzin pas ngal ba'i lag pa can/ /tshogs kyi mdzes ma sen rjes gsar pas gdungs la khyod las char thigs thob na tshim byed pa//khyod la sbrang rtsi byed pa'i phreng ba bzhin du g.yo ba'i zur mig ring ba dag gis blta bar 'gyur/ /phyugs bdag glang chen lpags rlon 'dod bzhin gyon nas gar ni rtsom pa 'phrogs par gyur pa bzhin/ /khyod 'ongs snga dro'i thun mtshams nyi gzhon dmar ba'i 'od kyis dmar ba'i chu skyes 'dzin byed cing //rgyab nas mtho ba'i lag pa zlum po'i nags kyi shing chen dag gis brgyangs nas 'dzin cing gnas/ /zhi ba'i char rgyun 'bab tshe ri yi sras mos g.yo med mig gis gus pas lta bar byed/ /des na bdag po'i gnas su mchog gi btsun mo rnams ni rab dgas sgeg par byed pa na/ /mtshan mo'i mun pa stug po rnams kyis mi yi bdag po'i lam gyi snang ba 'gog byed pas//khyod kyi glog 'od gser mtshungs 'od kyi snang bas sa gzhi'i lam ni kun nas bstan par mdzod/ /chu char 'brug dbyangs sgra chen mang po ma byed mdzes pa de rnams skrag cing 'chi bar 'gyur/ /de rnams kyis ni khang bzangs phug nor nyal sa steng gi rgya phubs 'ga' zhig dag tu ni//yun ring 'ongs las dub pa'i rang gi dga' ma glog ma'i don du mtshan mo gnas byas nas/ /nyi ma mthong tshe khyod ni slar yang lhag ma'i lam dag shin tu mgyogs pas bgrod par bya/ /gang phyir snying grogs dag gi don du 'bad pa byas pa nges par bya ba byas pa nyid//de yi dus su nyin mor byed pas lam ni dor nas myur du 'gro bar bya/ /'od zer rab tu 'phro ba bsgrags na khro ba chung ba min pa khyod la byed par 'gyur/ /mtshan mo bdag po song ba'i bud med mig gi mchi ma sel la bdag po 'ong ba bzhin/ /pad+mo'i yum gyi chu skyes gdong gi mig chu de yang rab tu sel ba byed par 'gyur//rab tu dang ba'i sems bzhin shin tu zab mo dang ldan mtsho yi chu yi nang du ni/ /khyod kyi gzugs brnyan yang ni rang bzhin skal ba bzang po bdag nyid 'char ba thob par 'gyur/ /de slad de yi ku mu ta ni dkar po rnams kyis khyod la bkur sti bsnyen bkur byed//brtags pas don yod bya ba'i ched du g.yo ldan nya rnams gyen du 'phar zhing lta bar byed/ /de yi chu gos sngon pos chu yi dogs kyi tshing ra 'phrogs par byas nas spangs pa na/ /ma 'phrog ces ni shing chen yal ga'i lag pa dag gis dbus su cung zad 'dzin pa bzhin/ /kwa ye grogs po chu 'thungs lto khengs lji nas lam du 'gro ba yang ni ji ltar yin//mdzes ma'i sgron ma mdzes pa'i bro ba shes na ji ltar 'dor ba'i nus pa yod pa yin/ /khyod ni de pa'i ri las nye bar 'gro tshe dal bu dal bu'i rlung ni ldang 'gyur zhing / /bsil ba'i rlung gis bsgos pa'i u du m+WA ra'i nags kyi 'bras bu 'chang zhing rol rtsed byed//khyod kyis char chen phab pas nor 'dzin ma yi dri dang rlangs pa gtsang ma tshogs pa ni/ /so ldan rnams kyi sna yis rngub cing bu ga'i nang du skal bzang glu dbyangs sgrogs par byed/ /der ni skye mched nyi ma las lhag gzi ldan sreg zla las skyes son du phyogs pa can/ / gtsug na zla ba rin chen mang gi dmag tshogs bsrung pa'i don du bskos pa de ni gnas/ /khyod kyi mkha' yi gang+gA'i chu las sprin gyi me tog gsher ba mang po rnams kyis ni/ /me tog gru char bdag nyid phab pa rnams kyis gang zhig de ni khrus ni byed par 'gyur/ /gtsug phud ldan de chu 'thungs dga' bas phyin nas ri gzung snyan pa'i sgra sgrogs gar dag byed//mig zur dkar ba'i zer gyis 'phrog byed gtsug gi zla ba'i 'od kyi zer ni skyengs byed kyang / /gang gi che ba'i mjug sgro mdongs 'od tshon rtsis bris bzhin mdzes pa 'od gyur pa/ /u ma'i sras ni dga' bar byed pa chu skyes 'dab ma bzhin du rna bar byed pa yod//smyig ma'i tshal nas skyes pa'i lha de yang dag mchod nas slar yang lam ni brgal bar mdzod/ /grub pa'i khyo shug dag gi lag pa'i pi wang chu thigs brlan la 'jigs pas lam ni ster/ /khyod kyis mthong bar 'gyur ba'i sa bdag dga' ba'i lha yi sras po chu gter gzugs 'dzin ni//sa yi gzhi la byung zhing lhun po 'dod 'jo'i bu mos 'ongs nas mchod pa byed par 'gyur/ /khyod kyi de yi rlabs ldan mtsho yi chu 'thungs 'ongs pa'i tshe na thag ring mthu las ni/ /chen po yin yang phra mo dang ni sbrang rtsi'i bu yi kha dog bskus par gyur pa dang / /chen po'i sa la in+d+ra nI la mu tig do shal dag ni gcig tu bkod pa bzhin//mkha' la bgrod pa rnams kyi mig rnams dag gis 'og tu blta zhing nges par mthong bar 'gyur/ /de rnams brgal nas bgrod tshe smin ma 'khri shing gzhon nu rol pa rnams kyis mdzes pa can/ /dkar nag 'od zer dang ldan rnams kyi rdzi ma steng du bskyod par gyur pa'i mdzes pa dag / kun da'i me tog g.yo ba'i rjes 'gro sbrang rtsi byed pa'i dpal gyi mdzes pa bzhin du ni/ /mdzes ldan da sha zhes bya'i grong khyer na chung mig gis blta 'dod la ni rang lus bstan par mdzod/ /dang por tshangs pha 'jug pa zhes bya'i ljongs la khyod ni bgrod bya 'og tu grib bsil bya/ /de nas rgyal rigs bcom pa'i dur ldan ku ru ba yi bzhin ni khyod kyis bstan par bya//gang du srid sgrub mda' rnon brgya phrag dag gis rgyal rigs mang po'i mgo bo bcad pa ni/ /khyod kyi gru char chen po rab tu mang po phab pas pad+ma rnams ni chad pa bzhin/ /myos par byed pa'i ro ldan dga' ma snar ma'i tshig gis mtshan pa'i chang ni spang byas nas/ / rang gi gnyen la dga' bar 'gyur bas yul las phyir phyogs stobs bzang gang de blta bar bya/ /kwa ye zhi ldan sA ra swa ti'i chu la mngon par phyogs tshe khyod kyis 'thungs byas nas/ /lus kyi kha dog dag ni nag por 'gyur zhing nang gi bsam pa yang ni dkar ba nyid/ /de nas bgrod pa'i phyi nas ka kha pa yi grong yod dza hu'i bu mo ri rgyal gyi//ngos la bgrod pa dug can rgyal po'i bu ni mtho ris de yi them skas bgrod pa bzhin/ /gang gi dbu ba'i phreng ba rnams kyis gau rI'i zhal gyi khro gnyer rnams la dgod pa bzhin/ /bde 'byung skra nas rlabs kyi lag pa dag gis bzung nas zla phyed 'phrog par byed pa bzhin/ /khyod ni gal te de yi chu 'thungs bsams nas lus phyed snga ma mkhar las 'phyang ba ni//lha yi glang po bzhin te chu de'i zhing ni dri med dkar ba'i shel bzhin snang ba nyid/ /chu bo de la khyod kyi glag ma bsam pas 'phral la yang dag 'byung 'gyur mdzes pa ni/ /ya mu na yi chu dang gang+gA 'grogs ba'i mdzes pa las 'ongs gyur la gnas ma yin//rdo leb steng du ri dgas gnas pas ri dgas lte ba'i dri bzang 'dzin pa'i rdo ldan zhing / /gang+gA nyid kyi yab gyur kha bar dkar ba'i g.yo med gangs ldan de nyid thob byas nas/ /lam gyis dal ba rnam par 'dul ba'i ched du de yi rtse la slebs nas 'dug pa yi/ /mdzes pa mig gsum pa yi bzhon pa dkar ba'i khyu mchog rwa yis 'dam ni blangs pa bzhin//de la gal te rlung gis rab bskyod thang shing lag pa kun du 'thabs pa las byung ba'i/ /me yi dug dang me stag dag gis 'brong gi dga' ma'i spu tshogs mang po sreg byed na/ /khyod kyis de rnams zhi ba'i ched du chu 'dzin stong phrag mang po char ni bya bar 'os//gang phyir chen po rnams kyi phun tshogs 'bras bu mang po'i sdug bsngal zhi bar byed pa nyid/ /der ni khyod kyis sgra chen bsgrags la ma bzod che ba'i dregs pa kun du ldan pa'i rkang brgyad pa/ /khyod kyi steng du mchong bar bya'o snyam nas ma mchongs rang gi yan lag kun du rmas/ /de rnams dag la rab tu bzhad ldan thog ser char pa drag phab mang pos gzhom par mdzod//rang bzhin ngan pa'i gnas pa dag gi 'bras med rtsom pa'i 'bad pa rnams ni ci yang med/ /der ni che zhing gsal ba'i rdol gtsug na zla phyed 'dzin pa'i rkang bkod rjes la ni/ /rtag tu grub pa rnams kyis gtor ma mchod kyis gus pas phyag dang bskor ba mdzod//gang zhig mthong na byed pas byas pa'i sdig pa rnams ni shin tu ring por 'dor byed cing / /gus pa 'dzin pa rnams ni de yi 'khor du gnas pa thob byed brtan pa thob par 'gyur/ /dri zhim rnams kyis khengs par gyur pa'i khang pa nang nas snyan pa'i yid 'ong sgra 'byung zhing / /mi'am ci mo rnams kyis grong khyer gsum rgyal 'gyur las yang dag dga' bas glu dbyangs sgrogs//rda zlum snyan pa'i sgra bzhin gal te khyod kyis rdo yi gtsug lag khang der sgra snyan ni//bsgrags par gyur na nges par phyugs bdag drung du gsum 'dus dbyangs snyan don gyi tshogs pa 'byung / /gangs kyi ril nye ba'i thang la rkang pa bskyod tshe de dang de yi khyad par la//krauny+tsa'i ri yi lam la rab grags b+h+ri gu'i bdag po'i mda' phug ngang pa'i sgo can yod/ /de nas nor sbyin phyogs su khyod ni rjes su 'gro tshe 'khyog por 'gro ba'i mdzes pa ni/ /stobs ldan slu ba'i ched du khyab 'jugs 'jal rkang pa sngo bsangs yang dag bkod pa bzhin/ / mgrin bcu'i lag pas bskyod bya ri ngos yangs pa dang ldan shel gyi kai la sha yi ri/ /skabs gsum mdzes ma'i gdong gi me long bstan bya'i steng du'ang song ste cung zad gnas par bya/ /gang gi rtse mo shin tu mtho ba ku mu ta ltar mkha' la khyab par gnas pa ni/ /mig gsum pa yis rab tu brgad pa phyogs bcu dag nas gcig tu spungs par gyur pa bzhin//de yi ri ngos dag la khyod ni 'gro tshe snum pa'i sman mchog dag dang mtshungs pa dang / /de ni gnyis 'thung so ni 'phral la bcad par byas pa lta bur dkar zhing mdzes pa de/ /mdzes pa'i ri bo la ni g.yo ba med pa'i mig gis blta bya nyid du 'gyur ba dang / /stobs ldan dkar ba'i dpung pa dag la gos sngon bkod par gyur bzhin 'byung ba bdag gis shes//der ni bde 'byung sbrul gyi gdu bu dor nas gau rI'i lag pa dag la 'dzin byed cing / /gal te yang ni rol rtsed ched du zhabs kyis 'gro bas ri la de dag dal 'gro na/ /khyod bgrod lus ni 'khyog por 'gro zhing nang na gnas pa'i chu chen dag ni spang bya zhing //bkab par byas nas steng du 'gro ba rnams la rkang pa'i bde ba reg par bya ba mdzod/ /rigs gnas der ni khyod kyis chu rnams skyugs par byas pas nges par nang na med pa na/ /lha yi na chung rnams kyis khyod ni 'khrul 'khor gyis bzung khang bzangs nang du 'khyer bar byed//kwa ye grogs bzang tsha bas gdungs pa de rnams ched du gal te khyod ni mi gtong na/ /rol sgeg g.yo ba'i mdzes ma de rnams rna bar rtsub pa'i sgra chen bsgrags pas 'jigs par bya/ /chu thigs dag gis bran pa dang ldan dri bzhon gyis bskyod dpag bsam shing la g.yo bzhin du/ /khyod kyi grib 'od shel ltar dkar ba'i gos kyis ri dbang de ni yongs su g.yogs bya zhing //yid 'ong chu bo bzhi yi rgyun ni gser gyi chu skyes gsar pa ltar de'ang 'thung ba dang / /sa srung bu yi gdong pa'i gos ni ci 'dod spyad cing dga' ba'ang skad cig bya bar mdzod/ /kwa ye 'dod bzhin rgyu byed khyod ni des las rgal tshe lcang lo ldan ma shes par 'gyur//slar yang ri de g.yo ldan gang+gA'i chu gos ldan ma'i bdag po bzhin du mi mthong min/ /mthong ba'i gzhal med khang steng char sprin che las khyod kyi chu byas sgyugs byas dus su ni/ /gang zhig 'dod ldan ma ni len bu mu tig dra bas bsgrigs pa'i phreng ba ldan pa bzhin//khyod la glog 'od ldan bzhin sgeg pa'i mdzes ma dang ldan dbang po'i gzhu bzhin bkra bar ldan/ /snyan pa'i dbyangs ni zab pa bzhin du glu dbyangs dag dang rol mo'i dbyangs snyan rnams dang ldan/ /chu yi snying po can bzhin sa gzhi nor bu'i rang bzhin mtho bzhin rtse mo mkha' la reg / gang du khyad par de rnams kyis ni khyod dang khang bzangs mtshungs pa'i ched du nor bur ldan/ /gang du na chung rnams ni lag pad mdzes shing len bu'i kun da gzhon nu'i skra ni 'ching / /gdong gi chu skyes 'dzum zhing dkar ba'i ge sar dpal ni gsar pa dag gis mdzes byas shing / /gtsug phud ku ru ba ka'i me tog zhags pas bcings pa mdzes shing rna bar ut+pal can//skra mtshams bkra ba'i me tog dag dang ldan pa'ang khyod ni nye bar 'ongs las skyes pa yin/ /gang gi dkar po'i nor bu dang ldan rin chen 'od kyis khyab pa chu skyes ltar mdzes pa'i/ /yang thog gzhi la gnod sbyin rnams ni mchog gis dga' ma dang bcas yang dag gnas byas nas//dpag bsam shing las rab tu 'khrungs pa'i dga' ma'i ro ldan chang ni kun du 'thung byed cing / /dal bu rnams kyis rnga rnams la ni brdungs pa khyod kyi 'brug sgra zab pa'i dbyangs snyan bzhin/ /gang du rab bgrod ches cher 'dar bas len bu lhung zhing man+da ra ba'i me tog ni//mtshar bar gyur cing rna ba'i rgyan gyur rab mdzes gser gyi me tog lhung bar gyur pa dang / /nu rgyas mu tig dra ba mtshar bar gyur cing do shal srad bu chad par gyur pa yi/ /'dod ldan ma rnams mtshan mo lam du 'gro la byung ba 'od ldan shar tshe gsal bar byed/ /gang ched chags pas gnod sbyin bud med rnams kyi 'og pag bcings pa 'grol zhing gos dag ni//bsal la mdza' bo rnams la 'dod mas 'dar bar gyur cing g.yo ba'i lag pa 'phen pa na/ /mchog tu che ba'i 'od zer dang ldan rin chen mar me mngon du mthong bar byed pa ni/ /ngo tshas rmongs pa rnams kyi lag pa dag gis phye ma gtor bar gyur pa 'bras med 'gyur//gang du chu 'dzin sa steng gnas rnams 'dren byed rtag 'gros gzhal med khang nang nged pa na/ /gang zhig rang gi chu thigs dag gis bkra ba'i ri mo rnams la 'phral du skyon byung nas/ /ngo tsha reg pa bzhin du khyod 'dra dum bu dum bu dag tu 'thon par byed pa ni/ /dra mig rnams kyi nang nas du ba zhugs pa 'thon pa rnams kyi rjes su byed pa bzhin//gang du bud med mchog rnams bdag po mchog gis kun nas 'khyud pa rnams ni btang ba na/ /lus ni kun nas gdung bar byed la zla ba chu shel srad bu'i dra ba 'phyang ba can/ /khyod kyis bsgribs pa med cing dkar ba'i zla ba'i 'od rnams gsal bar mthong bar gyur pa na//chu thigs 'bab pa kun nas byugs pas zhi bar byed cing mchog tu dga' ba skyed pa nyid/ /gang du gnod sbyin bdag po'i grogs bzang lha nyid mngon sum nyid du gnas pa shes byas nas/ /'jigs pa mang las yid srubs gzhu ni rkang drug pa yi gzhu rgyud can de dor bas chog /bdag po'i 'ben la mdzes ma'i smin ma 'khyog po'i gzhu la zur mig g.yo ba dag gi mda'/ /rol sgeg g.yo ba rtsom par byed pa nyid kyis de yi 'bras bu nges par grub pa nyid/ /de na nor gyi bdag po'i khang bzangs las ni byang gi phyogs na bdag gi grong khyer ni/ /mtho ris bdag po'i gzhu dang 'dra ba'i rta babs mdzes pas ring nas 'tsham par byas pa ste//gang gi skyed tshal man+da ra dang ljon shing gzhon nu bdag gi mdzes ma'i bu ltar ni/ /bskyangs pa'i mthu las 'phel ba'i me tog chun 'phyang thur du 'phyang ba lag pas thob bya yod/ /bkod ma bzang mo'i chu ni mar ka ta'i rdo yi phring ba bsgrigs pa'i lam skas can//'di nas mdzes pa'i gser gyi pad+ma rgyas pa rin chen rtsa ldan rnams kyis khyab pa ste/ /gdung ba dang bral ngang pa'i tshogs rnams dag ni gang+gA'i chu la gnas par byas pa'i tshe/ /khyod nyid yang dag mthong bar gyur kyang nye bar gnas pa'i yid 'ong mtsho las 'gro mi 'gyur//kwa ye grogs bzang khyod ni glog gi dga' ma g.yo bzhin nye bar mthong bar gyur pa na/ /mtsho de'i dogs na mdzes pa'i ri bo yid 'ong mchog gi in+d+ra nI la rnams kyis ni/ /rtse mo mdzes par byas par gsar gyi bskor ba rnams kyis bskor ba khyod kyis blta bya ba/ bdag gi dga' ma dga' byed dang bcas de nyid sems gdungs bdag ni shin tu dran par gyur//de la ku ru ba ka'i shing gis bskor ba'i yal ga'i khang bzangs dang ldan nye ba na/ /mya ngan med shing dmar dang ke sa ra yi shing chen yal 'dab g.yo ba mdzes pa yod/ /gcig la khyod kyi grogs su gyur ba'i dga' ma bdag dang bcas pa'i g.yon pas bsgrun 'dod cing //gzhan la gdong gi chang 'thungs me tog 'byung ba'i don du dga' ma de ni bdag 'dod gyur/ /de yi dbus na rab dkar shel gyi gzhi la gser gyi sdong po che zhing mtho bar gnas/ /rtsa ba rin chen phreng bas bcings pa rdo rje pha lam che ba min pa 'od 'phro ba/ /gang la khyod kyi grogs bzang mgrin sngon gnas nas nyin phyed song tshe rol sgeg gar byed cing //bdag gi mdzes ma rin chen gdu bu 'thab pa'i dbyangs snyan skal bzang mchog tu mdzes pa yod/ /de rnams kyis ni legs par mtshan pa kwa ye legs pa'i thugs 'dzin khyod kyis blta bar bya/ /sgo yi mtha' dang nye ba dag na dung dang pad+ma'i gzugs bris mthong bar byas pa na//da lta bdag dang bral bar gyur pas nges par mdzes pa dman pa nyid du gnas par nges/ /nyi ma nub par gyur pas nges par pad+ma dag gis mdzes pa nyams par gyur pa nyid/ /mdzes ma de ni yongs su bskyangs ched myur du gshegs nas glang phrug lus bzhin chung ba yis//mdzes pa'i ri bo de yi ngos la gnas nas dang por legs bshad snyan pa'i gsung gleng mdzod/ /bdag gi khang nang 'jug tshe me khyer phreng ba lta bu'i snang ba chung shing chung ba ni/ /mdzes shing rol pa'i smin ma g.yo ba'i glog gi mig ni byas nas khyod kyis blta bar 'os/ /de na bdag gi dga' ma lus phra mdog mdzes gnyis skyes bkra ba'i phra lam mchu dag ni//bil ma smin pa bskyed pa phra zhing 'dren byed g.yo ba'i ri dgas mig can lte ba dma'/ /ro smad sbom zhing dal gyis 'gro mkhas 'o ma 'dzin pa dag gi bar dag mchog tu mdzes/ /na chung dag gi yul la mngon du zhen par byed po tshangs pas dang po nyid du gyur//gzhon ma de ni bdag gi srog ni gnyis par shes par mdzod ces dal gyis smra bar bya/ /bdag dang lhan cig spyod la shin tu ring bar gyur te ngang mo gcig pur gyur pa bzhin/ /'di la nyin zhag mang po 'ong ba rnams su yid la gcags pa med pa nyid du gyur/ /dgun smad pad+ma can ni kha bas nyams pa bzhin du gzugs gzhan thob par bdag gis shes//dga' ma de ni nges par mchi ma mang po babs las mig 'phur che ba dag tu gyur/ /steng 'og chu yi pags pa dag ni shugs ring shin tu dro ba'i dbugs ni du ma byas/ /gdong ni legs par bkod la len bu 'phyang bas bsgribs pas mtha' dag gsal ba min pa ni//zla ba'i 'od kyis mdzes pa khyod ni 'ongs pas bsgribs las snang min sman pa 'dzin pa bzhin/ /gtor ma byed pa'ang bral bas btud par gyur pa bdag 'dra yid kyis rtogs bya 'dri ba'am/ /snyan pa'i tshig gis smra ba'i sha ri ka ni gur gyi nang na gnas shing gnas pa la/ / kwa ye grogs mo de yi dga' ba dran nam zhes pa'i dri ba byed pa bdag kyang ni/ /khyod ni mthong bar gyur pa na ni nga ni mdun du 'ongs shing dga' bar byed par 'gyur/ /kwa ye grogs bzang dri ma'i gos dang bcas pa'i rang gi phang par pi wang bzhag byas nas/ /bdag gi ming nas bod pas mtshan cing 'dod pa'i dbyangs snyan cher sgrogs snyan par gyur pa'i tshe//rang gis byas par gyur kyang dbyangs snyan dum bu dum bur bcas nas sems zhing yang yang ni/ /mig chus brlan pa'i rgyud mangs cung zad phyi bar byas nas kyang ni de ni 'ong bar 'gyur/ /bdag ni 'ongs pa'i nyin nas brtsams te nyin zhag dang ni zla ba song ba'i lhag ma rnams/ / sa la rnam par 'god cing sgo yi nang du gangs kyi me tog rnams ni sgyur bar byed/ /bdag can nam ni phrad par 'gyur ram snyam pa snying la sems pa'i rtsom pa mang po byed/ /phal cher bud med rnams ni bdag po bral bas yid kyi las kyi gdung ba mang po nyid/ /nyin mo'i bar la bya ba dang ldan bdag dang bral las de ltar shin tu min na yang //mtshan mo shin tu ring las khyod kyi grogs mo bya med gdung ba che bar bdag gis shes/ /legs ma mtshan ring rnams la gnyid bral stan med sa la nyal tshe dra mi gnye bar ni/ /gnas nas blta bya bdag gi phrin rnams bzlas pa rnams ni bde ba'i ched du nus pa nyid/ /bral bas lhag par gdungs pas sa yi gzhil gzhogs gcig brten te nyal bar gyur pa ni//tshes gcig zla ba shar ba cha gcig lhag ma rtsa bar gnas pa'i lus bzhin du ni gyur/ /bdag dang lhan cig gnas tshe 'dod pa'i dga' ma rnams kyi mtshan mo skad cig bzhin du song / /gang de da ltar bral ba las skyes mchi ma dron mo rnams bcas shin tu ring ba nyid//khrus kyis dag cing yangs shing rtsub pa'i skra yi len bu 'gram pa dag las 'phyang ba rnams/ /dbugs kyi rlung gis sel bar byed pa rnams la mchu yi 'dab ma dag ni dal bar nges/ /gnyid ni 'dod pa med cing bdag dang phrad pa las byung gnyid ni cung zad 'byung 'gyur zhes/ / dga' ma de ni 'dren byed mchi ma dang bcas shin tu gdungs pa mthong bas 'gog par byed/ /bdag gis bcings pa'i spyi gtsug len bu bral ba'i nyi ma dang po nyid la dor byas nas/ /len bu rnams ni gcig gyur reg pa rtsub pa mi bzad 'gram pa dag la gnas pa las/ /sen mo ring ba'i lag pas reg pa'i nyon mongs ldan pas lan cig min par sgyur byed ma//rje bo khros pa'i bka' lung rdzogs pa gdung bral gyur pa bdag gis gang bde dgrol bar bya/ /mig ni mchi ma mang po rnams kyis gdungs la rdzi ma rnams kyis bkab par byas nas ni/ /zla ba'i rkang pa'i 'od zer bdud rtsi sil ma rnams ni dra mig nang nas zhugs pa na/ / bkab pa bsal te mngon du 'ongs nas dang por dga' 'gyur ldog pa na ni de bzhin nyid/ /sprin dang bcas pa'i nyin mo sa la gnas pa'i pad+ma rgyas min zum pa ma yin bzhin/ /dga' ma de ni nyin par mdza' bo'i grogs mo rnams kyis skad cig kyang ni gtong min bzhin/ /lus phra ma la gcig ni blta tshe kun gyi rmad byung blta bas 'jug par 'gyur ba nyid//mtshan mo skye bo rnams ni nyal bar gyur la mdzes ma gnyid bral kwa ye chu 'dzin khyod/ /dra mig dang ni nye bar gnas nas nyal sar nye bar 'ongs te de ni dga' bar mdzod/ /len bu gcig tu gyur la reg pa 'gram pa la gnas sen mo mtho ba'i lag pa yis/ /yang dang yang du sel bar byed cing sa yi gzhi yi mal gyi steng du gzhogs gcig ni//ltung bar gyur cing de yi mtha' na mchi ma rnams ni 'bab pa do shal chad pa dag /g.yo zhing ltung bar gyur pa bzhin du gnas pa de mthong nyid kyis dal gyis brjod par bya/ /mdzes ma de ni rgyan rnams yang dag gzhag cing lus ni shin tu phral 'dzin byed cing / /gdung ba'i sdug bsngal dag gis mal stan steng na yang dang yang du 'dre ldog byed pa na//khyod kyang 'phral la chu yi rang bzhin mchi ma 'dzag pa nyid du 'gyur ba gdon mi za/ /phal chos thams cad nang gi bdag nyid bstan pas snying rje ci yang 'jug par 'gyur ba nyid/ /kwa ye grogs po khyod kyi grogs mo bdag la mdza' ba mang du 'dzin pa bdag gis shes//de phyir de ltar gyur pa rnams ni dang por bral la de ni bdag la sems par byed/ /skal bzang nang gi bsam pa dag gis brjod pa nges par brdzun min bden par shes pa ni/ /bdag gis gang gang brjod pa ma lus yun ring min par khyod la mngon sum nyid du 'gyur/ /len bu rnams kyis mi gzung gnyis po g.yo ba 'gog cing mig sman byug pas gtor ba dang //nyes par byed pa nam yang med par gyur las smin ma'i rnam 'gyur brjed par 'gyur na yang / /khyod ni yang la ri dgas mig can 'dren byed steng ni g.yo bar byed par bdag gis shes/ /gang zhig nya yis bskyod las chu skyes g.yo ba'i dpal ni 'dzin par byed pa nyid dang mtshungs//de yi bdag gi lag pa'i sen mo'i rjes ni med cing mu tig rnams kyi dra ba ni/ /yun ring nyid nas 'dor bar byas par gyur cing longs spyod nyid kyis rdzogs pa'i mtha' ru ni/ /bdag gis lag pa rnams kyis mnyes par byas pa med kyang khyod 'ongs skal bzang dbang gis ni/ /de yi chu shing gsar pa'i sdong po brla yang g.yon pa g.yo ba nyid ni thob par gyur//kwa ye chu 'dzin de la de yi dus su gal te bde ba'i nyid ni thob gyur na/ /de tshe khyod ni thun tshod bar du sgra sgrogs min par lhan cig dag tu gnas par mdzod/ /de yi bdag por gyur ba bdag la dka' tshegs chen pos thob par 'gyur ba'i rmi lam ni/ /mgrin par lag pa'i 'khri shing dag gis che bar 'khyud pa'i mdud pa 'phral la gtong bar byed//rang gi chu yi thigs pa bsil bas bsgos pa'i rlung gi mA la ta ya rnams kyis ni/ /shin tu gzhon pa'i me tog bcas pa de ni bslad nas kyang ni de yi dbugs dbyung mdzod/ /khyod ni glog gi 'dren byed g.yo zhing g.yo ba khyod mdog dang mtshungs gnas su gnas byas nas//khengs ldan ma la 'brug dbyangs tshig ni snyan pa'i brjod pa khyod kyis yang yang rtsom par mdzod/ /kwa ye khyod ldan chu gzhon ming can bdag ni rje yi grogs bzang yin par shes par mdzod/ /de yi 'phrin snyan yid la bzung nas khyod kyi drung du nye bar 'ongs par gyur ba nyid/ /bdag gi sgra ni bsgrags tshe lam bgrod dub pa'i tshogs rnams sgo yi nang du 'bros par byed//snyan pa'i sgra dbyangs rnams kyis bud med len bu 'grol zhing 'dod pas gzir bar mtshon par byed/ /ces pa de skad bshad tshe dri bzhon bu ni mi thil yi bu mos mthong ba bzhin/ /de ni dga' bde'i snying gis khyod la mngon phyogs blta zhing bden pa nyid du'ang nges pa nyid//kwa ye grogs bzang de nas legs par gnas la gzhan yang nyan 'dod sgra ldan ma rnams ni/ /bdag po'i tshig ni snying grogs bdag gis khyer 'ongs gyur las phrad ltar lhag mar lus pa nyid/ /kwa ye tshe ldan bdag gi tshig dang nyid kyis kyang ni de la phan pa'i ched du ni/ /khyod kyi rgyal po mchog ni rgyal por ma yi ri yi gnas na gnas shing 'tsho ba nyid//khyod ni spangs par gyur la kwa ye mdzes ma dge'am dri zhes de ltar smra bar mdzod/ /gang phyir skye bo rnams ni byed pa nyams la dang por de 'dra'i dbugs dbyung byed pa nyid/ /lus kyi nang nas shin tu phra pas phra gyur dang ni shin tu gdung bas gdungs gyur dang / /mchi ma 'dzags pas mchi ma 'dzag gyur che bar phrad 'dod nyid kyi phrad 'dod mchog tu gyur//dbugs dron shugs rings lhags pas dbugs dron shugs rings mchog tu lhags gyur ring nas 'jug pa can/ /bsod nams chom rkun dag gis lam bkag gyur cing de rnams yid la sim zhing 'jug pa yin/ /grogs mo'i mdun du de yi rna ba la ni khyod kyi gdong ni reg par thob gyur pas//khyod kyi gang yang gus pa'i gtam gyi ched du gyur pa'i che ba'i sgra 'di brjod par 'os/ /gang de rna ba'i yul las shin tu gang yang 'das shing mig dag gis ni mthong bya min/ /khyod dang dga' bas 'phrad 'dod gyur zhes bdag gis kha yi tshig 'di zer zhes smra bar mdzod//'khri shing 'ga' la yan lag mdzes pa 'jigs pa bcas ri dgas mo la mig mdzes g.yo ba mthong / /'gram pa'i mdzes 'od ri bong can la skra rnams gtsug phud can gyi mjug sgro'i tshogs la mthong / /smin ma'i rol sgeg mdzes ma rnams ni chu klung rlabs phreng phra mo rnams la rab tu mthong / /e ma gcig tu tshogs pa dang ldan g.yon mig khyod dang mtshungs pa 'ga' yang yod ma yin//char gyis brlan las dri med sbrang rtsi can bzhin khyod kyi gdong 'di mdzes so lus phra ma/ /khyod ni ring gyur bdag ni phra ba'i lus gyur mda' lnga pa yi gdung ba yang yang byin/ /so ka rdzogs pa'i mtha' ru phyogs kun che ba'i chu 'dzin stug pos bsgribs pas nyi ma yi/ /snang ba rnams ni nyams shing rgyun du char 'ong bdag gis zhag gi grangs ji lta ba yin//khyod ni rdo leb gzhi la khams kyi mtshon rnams kyis ni dga' dang khro bas legs bris te/ /de rnyed rdzogs nas 'dod pa bya ba'i ched du khyod kyi zhabs drung lhung bar gyur pa na/ /tshig lan ma byung bdag la mchi ma mang po yang yang byung bas zugs pas mig la khro/ /der yang bdag cag gnyis ni lhan cig 'grogs pa'i skal ba med pas nyid du gyur pa zhig /khyod ni bdag gi rmi lam dag tu 'ongs shing thob pa ci yang mthong bar gyur pa na/ /kho bos dam du 'khyud par bya ba'i ched du nam mkha' dag la lag yug bya ba ni/ /sa la gnas pa'i nags kyi lha rnams kyis ni nges par ma mthong ma yin mang po ru/ / mu tig brgyud pa bzhin du shing gi yal ga rnams la mchi ma'i dum bu lhung bar 'gyur/ /de wa dA ru'i ljon pa rnams kyi yal ga'i 'dab ma rnams ni 'phral du bcad byas nas/ /de rnams kyi ni 'o ma zags pa'i dri bzang dang ldan lho phyogs zhugs pa'i dri bzhon rnams/ /gang zhig bdag la dang por rab tu 'khyud do kwa ye yon tan ma lus de rnams ni//gangs kyi ri la gal te song na khyod kyi lus la reg pa nges par gyur ro ce'o/ /thun gsum mun pa can ma yun ring gyur ba skad cig bzhin du bsdus pa ci ltar yin/ /nyin par yang ni gnas skabs kun du cung zad gdung ba'ang ji ltar gyur pa yin/ /kwa ye 'dren byed g.yo ba de ltar gyur pas bdag sems don gnyer skal ba dman par gyur//khyod dang bral ba'i gdung ba rnams dang che ba'i sdug bsngal rnams kyis brtan par min par byas/ /bdag ni zhag grangs mang po'i bdag nyid bgrang zhing nang gi bsam pas mi 'chi bar ni shes/ /kwa ye dge legs ldan ma khyod kyang mya ngan mang po shin tu bya ba ma yin te/ /bde ba mtha' gcig ldan pas su yin rtag tu sdug bsngal mtha' gcig pa yang su zhig yin//de dag 'khor lo rtsibs ni cung zad 'og tu 'gro zhing steng du'ang rim gyis bskor ba bzhin/ /khyab 'jug lag 'gro'i gnas na gnyid las langs tshe rje bo khros pa'i bka' lung rdzogs pa nyid/ /de la zla ba bzhin yod de bar mig ni zum par byas nas khyod ni gnas par mdzod/ /phyi nas bdag cag gnyis ni yun ring bral bar las byung 'dod pa'i longs spyod de thob ste//ston ka'i zla ba rdzogs pa'i mtshan ma rnams la 'dod pa'i longs spyod de dag ldan par 'gyur/ /yang ni brjod pa sngon ni bdag dang khyod ni mal stan gnas na mgrin 'khyud gnyid song bas/ /bdag ni phral la rab tu sad par gyur nas ci yang ngu bar byas par gyur pa na/ /nang nas rgod pa dang bcas lan cig min par khyod kyis bdag la dri ba brjod pa na//kwa ye g.yo ma 'ga' zhig dang yang dga' byed rmi lam mthong zhes bdag gis khyod la'o/ /de la bdag ni khyod la mtshan ma bzang po sbyin par byed pa yin par rig byas na/ /kwa ye 'dren byed dkar min skye bo ngan pa'i tshig las bdag mi gus 'os ma yin/ /gang phyir bral bas gdungs pa longs spyod bral la de rnams mdza' bo'i brjod pa ci zhig yin//dngos po rnams ni mthong tshe mchog tu dga' ba'i ri ni mang po'i phung po nyid du 'gyur/ /'di rnams kyis ni dang por bral bas gdungs par gyur pa'i grogs mo de ni dbugs dbyung mdzod/ /mig gsum pa yi khyu mchog lta bur dkar ba'i kai lA sha yi ri las slar ldog bya//de la'ang rang gi dge ba'i mtshan ma khyer 'ongs de dang de ni bdag la bshad par bya/ /khyod ni kun da'i ge sar g.yo ldan myur 'gro rnams kyis bskul byas myur bar 'ong bar bya/ /kwa ye grogs bzang khyod kyis bdag gi gnyen 'dun dag tu cung zad gnas pa 'di byas nas/ /slar yang 'phrin rnams brtan pa khyod las nges par bdag la 'ong bar 'gyur zhes bdag sems so//tsUta ka rnams sgra med par yang chu ni sbyin par mdzod ces khyod la zhu bar sems/ /gang phyir skye bo rnams la 'dod par gyur pa rnams kyi bya ba'i don nyid lan gyi tshig /kwa ye chu 'dzin gdung ldan bdag gi brjod pa bdag gi sems la don gnyer dga' ba yi//tshogs 'di byams par gyur pa'am rjes su rab tu brtse ba'i blos ni 'di rnams kun byas nas/ /khyod kyang 'dod pa'i yul ni thob cing mdzes pa'i char sprin tshogs 'dzin dpal dang ldan pa dang / /glog ma dang yang nam yang mi 'bral gyur cig de bzhin kun kyang dge zhing shis gyur cig /snyan ngag mkhan chen po nag mo'i khol gyis mdzad pa'i sprin gyi pho nya rdzogs so// //blo gros dang snying rje dang / brtul ba dang des pa dang / gtong ba la sogs pa'i yon tan phul du phyung ba dpag tu med pas spras pa'i dpon chen nam mkha' brtan pa'i bka' lung gis/ kha che'i paN+Di ta snyan ngag mkhan chen po su ma na shrI dang / zhu chen gyi lo tsA ba mang du thos pa'i dge slong byang chub rtse mo dang /lo tsA bar gtogs pa lung rigs smra ba nam mkha' bzang pos dpal sa skya'i gtsug lag khang chen por bsgyur cing zhus te gtan la phab pa/ /gang zhig thugs dgongs rnam par dag pa yis/ /'di la bskul zhing mthun rkyen bsgrubs pa dang / /bdag cag 'bad las bsod nams gang bsgrubs pas//'khor ba las rgal sku gsum thob par shog /byang gi bdag po'i gsung bzang las/ /snyan ngag 'di ni bod skad du/ /kha che paN chen dang lhan cig /dge slong byang chub rtse mos bsgyur/ /'dis 'gro ba dpag tu med pa la phan thogs nas bkra shis shing bde legs su gyur cig/ //