CLOSE WINDOW

D4292
བོད་ཡིག

/[ ]@##/ /rgya gar skad du/ pra yo ga mu kha/ br-it+ti/ bod skad du/ /rab tu sbyor ba'i sgo'i 'grel pa/ 'jig rten mgon po la phyag 'tshal lo/ /sgra'i rab tu sbyor ba ji snyed pa bzhin du brjod pa shes par 'dod pa des dang por sgra'i gnas byed pa po shes par bya'o/ /de la byed pa zhes bya ba ni rnam pa drug ste/ byed pa po dang /las dang / byed pa dang / yang dag par sbyin pa dang / gang las 'ongs pa dang / gnas gzhi zhes bya ba'o/ /yang de dag kyang dbye na nyi shu rtsa gsum du 'gyur te/ gang zhe na/ byed pa po ni rnam pa lnga/ las ni rnam pa bdun/ byed pa ni rnam pa gnyis/ yang dag par sbyin pa ni rnam pa gsum/ gang las 'ongs pa ni rnam pa gnyis/ gnas gzhi ni rnam pa bzhi'o/ /byed pa po rnam pa lnga gang zhe na/ rang dbang gi byed pa po dang / rgyu'i byed pa po dang / las kyi byed pa po dang / ma brjod pa'i byed pa po dang / brjod pa'i byed pa po'o//de la rang dbang gi byed pa po ni ji ltar bsod nams la byed pa ni dad pa dang / byams pa la byed pa ni dge ba'i sems dang / rig pa la byed pa ni blo dang / dpal la byed pa ni brtson 'grus dang / yon tan la thob par byed pa ni le lo med pa ste/ de rnams ni rang dbang gi byed pa po zhes bya'o//rgyu'i byed pa po ni ji ltar bde ba la rnyed pa ni bsnyen bkur rnams so/ /brten pa de rnams la brten pas skul ba ni phan pa rten pa'i brten pa de'i skul la pa ni rgyu'i byed pa po dag go/ /las kyi byed pa po ni ji ltar bdag nyid kyis skye bo gsod pa'i skyon mthong na bdag nyid yongs su sdug bsngal bar byed pa dge ba'i blo dang /bdag nyid kyis skye bo phal pa la zhen pa gcod pa dag ste/ las lta bu'i las kyi byed pa po 'dra ba zhes bya bas/ las kyi bsdu bar 'gyur bar bstan pa las dngos su las dag rtag tu bdag gi tshig can gyi skad kyi dbyings su 'gyur ro//ma brjod pa'i byed pa po ni ji ltar dge ba rnams kyis gzhan gyi don byed pa'o/ /brjod pa'i byed pa po ni ji ltar gzhan gyi don byed pa ni dge ba'o/ /las rnam pa bdun gang zhe na/ rang nyid 'dod pa'i las dang / rang mi 'dod pa'i las dang / rang 'dod pa yang ma yin/mi 'dod pa yang ma yin pa'i las dang / ma smras pa'i las dang / byed pa'i las dang / brjod pa'i las dang / ma brjod pa'i las rnams so/ /rang nyid 'dod pa'i las ni ji ltar sangs rgyas kyi chos shes par dka' ba la yang dad pas sems rnam par grol bar byed pa ni rang 'dod pa'i las zhes bya'o//rang mi 'dod pa'i las ni ji ltar bud med khros pas dug la za ba dang / skyes bu mi shes pas lam tshor ma can la rkang pa 'jog pa dang / mi shes pas sprul la bzung ba lta bu ni ci zhig 'dod pas bdag nyid gsod pa lta bu ste/ rang nyid mi 'dod pa'i las zhes bya'o/ /rang 'dod pa yang ma yin/ mi 'dod pa yang ma yin pa'i las ni ji ltar byis pa mi shes pas 'o thug rdul can 'thung ba lta bu ni rang nyid 'dod pa yang ma yin/ mi 'dod pa yang ma yin pa'i las zhes bya'o/ /ma smras pa'i las ni ji ltar ba las 'o ma 'jo ba ni ba lang rdzi dang /mchod sbyin la la sreg pa lhas byin dang / ba lang la skyong du 'gro ba ba lang rdzi dang / mkhan po la bstan bcos zhu ba ni bram ze'i khye'u dang / phyug po la gser slong ba bram ze dang / shing rnams la 'bras bu 'thog pa khye'u dang / slob ma la chos smra ba slob dpon dang /bu la bstan bcos rjes su ston pa mkhan po lta bu ni ma smras pa'i las zhes bya'o/ /byed pa'i las ni ji ltar slob ma la drung du 'ong bar byed pa ni slob dpon zhes pa lta bu'o/ /'gro ba dang slob pa dang so sor gnas ba rnams kyi sgra'i don las rnams byed pa'i rkyen can zhes bya ba ni las kyi ming ngo //brjod pa'i las ni ji ltar lhas byin gyi bya ba rtswa'i stan lta bu'o/ /ma brjod pa'i las ni ji ltar stan las byed pa ni lhas byin zhes ba lta bu'o/ /byed pa rnam pa gnyis gang zhe na/ phyi rol gyi byed pa dang / nang gi byed pa pa'o//phyi rol gyi byed pa ji lta bu zhe na/ gang lus kyi yan lag las phyi rol du gyur pa ste/ ji ltar zhing la zor bas rnga ba ni mi lta bu dang / shing la sta res gcod pa ni lhas byin lta bu'o/ /nang gi ni lus kyi yan lag la gnas pa ste/ dper na lhas byin yid kyis pa ta la'i grong khyer du 'gro ba dang /mig gis gzugs la 'dzin pa lta bu ste/ byed pa zhes pa ni shin tu sgrub par byed ba zhes bya'o/ /gsum pa byed pa po dang byed pa'i gsum pa dag go/ /yang dag par sbyin pa rnam pa gsum gang zhe na/ slong ba dang / rjes su byed pa dang / slong ba med pa rnams la'o/ /slong ba la ni ji ltar bram ze la ba lang sbyin pa ni chos dang ldan pa'o/ /bram ze slong ba rnyed pa de'i phyir slong ba la zhes brjod do/ /rjes su byed pa ni ji ltar 'gron po'i phyir shing sbyin pa'i tshul te/ de dag gi phyir ma bslangs par 'gron gyis shing gi rtsa ba khyer ba ni sems kyis rjes su byed pa zhes brjod do//slong ba med pa ni ji ltar mchod rten la me tog 'bul ba'i skyes bu lta bu'o/ /gang mngon par slong ba la yang dag par sbyin pa'i las ni yang dag par sbyin pa ste/ bzhi pa yang dag par sbyin pa ni yang dag par sbyin pa'o//gang las 'ongs pa rnam pa gnyis gang zhe na/ g.yo ba dang mi g.yo ba dag las so/ /g.yo ba las ni ji ltar rta brgyugs pa las ltung ba ni rta pa'o/ /glang po brgyugs pa las ltung ba ni lcags kyu 'dzin pa zhes pa lta bu'o/ /mi g.yo ba las ni ji ltar grong las 'ongs pa ni lhas byin dang /ri las babs pa ni drang srong chen po rnams dang / mtho ris las babs pa ni lha zhes pa lta bu ste/ bstan pa las 'ongs pa ni lam gang las 'ongs pa ste/ gang las 'ongs pa ni lnga pa'o/ /gnas gzhi rnam pa bzhi gang zhe na/ khyab pa'i gnas gzhi dang /nye bar brtan pa'i dang / 'dug gnas kyi dang / nye ba'i gnas gzhi'o/ /khyab pa'i ni ji ltar til mar ni til rnams la khyab pa lta bu'o/ /nye bar brten pa'i ni ji ltar stan la brten pa ni skyes bu dang / shing rta la brten pa ni bram ze dang / rten la brten pa ni drang srong zhes pa lta bu'o//'dug gnas kyi gnas gzhi ni ji ltar nags la gnas pa ni seng ge lta bu dang / gnas la gnas pa ni thub pa lta bu'o/ /nye ba'i gnas gzhi ni ji ltar chu klung la gnas pa ni ba lang lta bu ste/ gnas kyi gzhi byed pa ni gnas gzhi ste/ bdun pa gnas gzhi ni gnas gzhi'o/ /gang 'di byed pa zhes smos pas byed pa por 'gyur te/'di ltar bya ba byed pa ni byed pa po zhes byed par 'gyur bas byed pa po smos ci dgos she na/ gzhan las dang byed pa dang / yang dag par sbyin pa dang / gang las 'ongs pa dang / gnas gzhi zhes bya ba rnams kyi byed pa po rnams ni ji ltar 'grub par 'gyur/de rnams la yang thams cad la byed pa po ni brjod do/ /gang las she na/ rang dbang brjod par 'dod pa yis/ /zhes pa so so'i byed pa po gang rang dbang gi brjod par 'dod pas byed pa po de thams cad brjod pa yang 'grub bo/ /de la brjod pa'i byed pa po ni dang po nyid du bya ste/ ji ltar lhas byin 'bras chan 'tshed do zhes pa dang /lhas byin rtswa yis stan byed ces pa lta bu'o/ /ma brjod pa'i byed pa po ni rnam pa gnyis te/ gsum pa dang drug pa zhes pa'i don ci zhe na/ ma brjod pa'i byed pa po rnam par dbye ba gnyis su 'gyur te/ gsum pa ni ji ltar lhas byin gyis 'bras chan 'tshod pa lta bu ste/gsum pa zhes pa ni byed pa po dang byed pa dag ni gsum pa'o/ /drug pa ni ji ltar 'jig rten pha rol gyis 'jigs pas chos spyod pa lta bu ste/ bya ba byed pa rnams ni drug pa'o/ /de bzhin du brjod pa'i las kyang rnam par dbye ba snga ma bzhin zhes bya ba'i don ji lta bu zhe na/ ji ltar brjod pa'i byed pa po dang po nyid du 'gyur pa de bzhin du brjod pa'i las kyang dang po nyid du 'gyur te/ ji ltar 'bras chan 'tshed pa lhas byin zhes pa dang / byA ka ra Na byed pa ni pA Ni ni lta bu'o/ /de bzhin du brjod pa'i las kyang dang po nyid du rig par bya ste/ ji ltar lhas byin gyis 'bras chan 'tshed pa dang /lhas byin gyis khur khyer ba zhes pa lta bu'o/ /ma brjod pa'i las ni dang po bor ba dang / de bzhin du lnga pa dang bdun pa'ang de bzhin no zhes pa'i don ci zhe na/ ma brjod pa'i las ni dang po dang / lnga pa dang / bdun pa bor ba'o/ /lhag ma rnam par dbye ba bzhir 'gyur te/gnyis pa dang gsum pa dang bzhi pa dang drug pa rnams so/ /de la re zhig gnyis pa ni ji ltar grong la 'gro ba ni skyes bu zhes pa ste/ gnyis pa ni las kyi gnyis pa zhes bya'o/ /gsum pa ni ji ltar/ bu yis shes pa ni pha ste bu las shes pa ni pha zhes pa'i don to//ming ngam las zhes bya ba ni gsum pa'o/ /bzhi pa ni ji ltar grong gi phyir 'gro ba ni skyes bu zhes pa dang / grong khyer gyi phyir 'gro ba ni bram ze'i khye'u zhes pa ste/ 'gro ba'i don gyi las ni gnyis pa dang / bzhi pa ste/ langs te lam du 'gro ba zhes pa ni bzhi pa'o//drug pa ni ji ltar rtswa stan gyi byed pa po lhas byin zhes pa dang / khur khyer ba'i byed pa po mchod sbyin zhes pa lta bu ste/ byed pa po dang / las byed pa ni drug pa'o/ /byed pa ni rnam pa gsum ste/ gsum pa dang / lnga pa dang / drug pa rnams nyid do/ /de la re zhig gsum pa ni ji ltar shing la sta res gcod pa ni lhas byin zhes pa ste/gsum pa zhes pa ni byed pa po dang byed pa dag go/ /lnga pa ni ji ltar cung zad las grol ba ni cung zad kyis grol ba zhes pa'i don dang / nyung zad las grol ba ni nyung zad kyis grol ba zhes pa'i don dang / bag tsam las grol ba ni bag tsam gyis grol ba zhes pa lta bu ste/lnga pa zhes bya ba ni cung zad dang / nyung zad dang / bag tsam las grol ba'i sems can zhes brjod do/ /drug pa ni ji ltar mar gyis grogs po shes pa zhes pa ni mar gyis grogs po shes pa zhes pa ste/ drug pa ni shes pa'am rig par byed pa'i don zhes pa'o//de bzhin du yang dag par sbyin pa yang gsum ste/ drug pa dang / bzhi pa dang / gsum pa rnams so/ /drug pa ni ji ltar skyes bu'i ri dgas zla ba'i sbyin pa byed pa lta bu ste/ brgya byin gyis zla ba'i phyir sbyin pa zhes pa'i don to/ /yang dag par sbyin pa ni bzhi pa'i don te/mang po len pas drug pa'i yang dag par sbyin pa'o/ /bzhi pa ni ji ltar bkres pa'i phyir zas sbyin pa dang / spyod ngan can gyi phyir zas sbyin pa ni lhas byin zhes pa lta bu ste/ bzhi pa ni yang dag par sbyin pa'i bzhi pa'o/ /gsum pa ni ji ltar bran mos me tog gi phreng ba yang dag par sbyin pa zhes bya ba ni na chung la phreng ba yang dag par sbyin pa zhes bya ba'i don te/mthun pa'i gsum pa mi 'byor ba'i sbyin pa ste/ de ni bzhi pa'i don gyi gsum pa zhes bya'o/ /gnyi ga 'dis shes par bya ste/ gsum pa'i rnam par dbye ba bdag gi tshig can du byed pa'o//gang 'di ni gsum pa mi 'byor ba'i sbyin pa ste/ de bzhi pa'i don te/ bdag gi tshig can de dman pa'i tha snyad la ni bzhi pa'i don gyi gsum pa zhes brjod do/ /lnga pa nyid ni gang las 'ongs par 'gyur te/ de las gzhan ma yin no/ /lnga pa ni ji ltar ri las 'ongs pa ni drang srong chen po zhes pa ste/lnga pa gang las 'ongs pa ni lnga ba zhes bya'o/ /bdun pa nyid ni gnas gzhi ste/ bdun pa ni ji ltar grod la gnas pa zhes pa ste/ bdun pa ni gnas gzhi'i bdun pa'o/ /'di phyogs tsam mthong ba'i don byed pa po mdor bsdus nas brjod pa'o/ /rgya cher ni 'grel ba la sogs par blta bar bya'o//de dag gi brjod pa dang ma brjod pa'i rang bzhin dmigs mod kyi/ 'on kyang rjod pa po dang brjod pa med pa smra bar bya ste/ gang zhe na/ tshig sdud pa dang / de la phan pa'i rkyen can dang / ti nga'i rkyen can dang / byed pa'i rkyen can dag ste bzhi po 'di dag rjod pa po dang brjod pa med pa dag go//ji ltar na bzhi po 'di dag rjod pa po dang brjod pa med pa yin zhe na/ tshig sdud pa dang / de la phan pa'i rkyen can dang / ting nga'i rkyen can dang / byed pa'i rkyen can te 'di dag gnas skabs kyis brjod pa ni brjod pa'o/ /las dang / byed pa po dang / bzhi po de dag gnas skabs kyi 'brel par brjod pa dang ma brjod pas brjod pa dang ma brjod pa zhes bya ba'o//sbyor ba'i sgo nas byed pa po rim par phye ba ste dang po rdzogs so// //de ltar byed pa po'i rab tu dbye ba brjod nas/ da ni tshig sdud pa rjes su bshad par bya'o/ /tshig sdud pa ni bsdu na drug ste/de'i skyes bu'i tshig sdud pa dang / las 'dzin pa'i dang / 'bru mang po pa'i dang / ba gnyis pa'i dang / zlas dbye ba'i dang / zad par mi 'gyur ba'i rnams so/ /rgyas par dbye na nyi shu rtsa brgyad du 'gyur ro/ /yang rnam par dbye ba bco lngar yang bshad par bya'o/ /de dag kyang rtag pa dang mi rtag par sbyor bas tshig sdud pa rnam pa gnyis su yang 'gyur te/rtag par tshig sdud pa dang mi rtag par tshig sdud pa zhes bya'o/ /rtag par tshig sdud pa ni ji ltar rdza ma la byed pa ni rdza ma byed pa zhes pa dang / grong khyer la byed pa ni grong khyer byed pa zhes pa lta bu'o//las zhes bya ba ni byed pa'i rkyen can du 'gyur te/ rtag par rten pa dang 'tsho ba dag gi zhes bya ba ni rtag par ro/ /mdo las rtag par rjes su 'dzin pa zhes 'byung ste/ nye ba'i tshig rting med pa ni de'i skyes bu'i tshig sdud pa'o/ /byed pa po'i tshig yod pa ni tshig snga ma dang nye ba la tshig sdud par mkhas pa rnams 'dod do//rtag par tshig sdud pa la tshig rnam par bshad pa med do zhe na/ tshig rnam par bshad par 'dod de/ rdza ma la byed pa ni rdza ma byed pa zhes pa 'dis rnam par sbyar bar bya'o/ /tshig sdud pa yod pa la su pa mtha' can skad kyi byings med pa ste su pa dbyi bar bya'o//tshig sdud pa ni tshig sdud pa ste/ dang po'i tshig gi mtha' can no/ /nye ba'i tshig dang po'i rnam par dbye ba bstan pas de dang po'i tshig gi mtha' can du 'gyur te dang po'i tshig gi mtha' can ni tshig gi phrad snga ma sdud pa ste sgra don dang ldan pa'o/ /mi rtag par tshig sdud pa ni ji ltar rgyal po'i skyes bu ni rgyal po'i skyes bu zhes pa dang /bram ze'i la ba ni bram ze'i la ba zhes pa la sogs pa drug pa'i bsdu ba zhes bya ba 'am/ mi rtag pa zhes bstan pa la dbyi ba dang mi dbyi bas rnam pa gnyis te/ dbyi ba dang mi dbyi ba'i tshig sdud pa zhes bya'o//dbyi ba'i tshig sdud pa ni ji ltar dka' ba la gnas pa ni dka' gnas zhes bya ba dang / dmyal ba la ltung ba ni dmyal ltung zhes bya ba ste/ gnas pa dang / ltung ba dang / 'das pa dang / 'gro ba dang / goms pa dang / thob pa dang / med pa zhes bya ba ni gnyis pa'i bsdu ba zhes bya'o//ma dbyi ba'i tshig sdud pa ni ji ltar dka' ba la 'gro ba ni dka' ba la 'gro ba zhes bya ba dang / brang la spu yod pa ni brang spu can zhes pa ste/ tshig gzhan du ma'i don ni 'bru mang po ba'i bsdu ba zhes bya'o/ /nye bar 'jal ba'i tshig snga ma dang phyi ma ma phyis pa ni bdun pa'i tshig sdud pa zhes bya'o//su pa phyi bar gyur pa la skad kyi byings med pa'i tshig gi don can ni/ tshig phyi ma phyis pa'i dbang du byas pa ste/ mgo bo spyi bo ma yin pa rang gi cha las/ bdun pa ma phyis pa'i tshig sdud pa zhes par 'gyur ro/ /de la de'i skyes bu brgyad ni dang po'i de'i skyes bu dang /gnyis pa'i dang / gsum pa'i dang / bzhi pa'i dang / lnga pa'i dang / drug pa'i dang / bdun pa'i dang / dgag pa'i de'i skyes bu rnams so/ /dang po'i de'i skyes bu ni ji ltar lus kyi stod ni lus stod ces pa dang / lus kyi smad ni lus smad ces pa lta bu ste/stod dang smad dang gong dang 'og yul gcig pa ni gzhi gcig tu tshig sdud pa zhes bya'o/ /pi pi ling gi phyed ni pi pi ling gi phyed ces pa dang / dar gyi srin bu'i phyed ni dar srin phyed ces pa lta bu ste/ phyed kyi tshig ni ma ning gi rtags kyi tshig sdud pa'o/ /gnyis la sbyin pa dang /sbyin pa gnyis ni gnyis sbyin pa'o/ /gsum la sbyin pa dang / sbyin pa gsum ni sbyin pa gsum mo/ /bzhi la sbyin pa dang sbyin pa bzhi ni sbyin pa bzhi'o/ /myur ba la sbyin pa dang sbyin pa myur ba ni myur ba'i sbyin pa'o zhes pa lta bu'o/ /gnyis pa'am/ gsum pa'am/bzhi pa'am/ myur ba dag gi tshig sdud pa'o/ /gang gi phyir dang po'i de'i skyes bu zhes bya zhe na/ tshig snga ma dang po nyid kyis tshig snga ma'i rnam par dbye ba khyad par can des dang po'i rnam par dbye bar 'gyur ro/ /de'i phyir dang po'i skyes bu zhes brjod do/ /gnyis pa'i de'i skyes bu ni ji ltar shing la gnas pa ni shing gnas zhes pa dang /grong la 'gro ba ni grong 'gro zhes ba dang / mda' la goms pa ni mda' goms zhes pa dang / bde ba la thob pa ni bde thob ces pa dang / 'tsho ba la rnyed pa ni 'tsho rnyed ces pa dang / 'tsho ba la ma rnyed pa ni 'tsho ba ma rnyed pa zhes pa lta bu ste/gnas pa dang / song ba dang / lhung ba dang / 'gro ba dang / goms pa dang / thob pa dang / ma thob pa rnams te/ gnyis pa'i tshig sdud pa zhes bya'o/ /yang lo la spyod pa ni lo spyod ces pa dang / dpag tshad la btang ba ni dpag tshad btang zhes pa dag ni dus dang lam la nges par sbyor ba ni nges par sbyor ba'i gnyis pa'i tshig sdud pa zhes bya'o//gsum pa'i de'i skyes bu'i tshig sdud pa ni ji ltar sha ku la'i khan+da ni sha ku la'i khan+da zhes pa dang / nor gyi don ni nor don zhes pa lta bu ste/ de byed pa'i don gyis yon tan gyi tshig gis gsum pa'i tshig sdud pa zhes bya'o//yang zla bas snga ba ni zla ba snga ma zhes pa dang / los snga ba ni lo snga ma zhes pa dang / smra bas mkhas pa ni smra mkhas zhes pa ste/ sngon dang mtshungs pa dang / rtsod pa dang / mkhas pa dang / 'dres pa dang / 'jal ba rnams ni gsum pa'i tshig sdud pa zhes bya'o/ / bzhi pa'i de'i skyes bu ni ji ltar khang pa'i phyir gyi shing ni khang shing zhes pa dang / rna cha'i phyir gyi gser ni rna cha gser zhes pa lta bu dang / rtag pa'i don gyi tshig sdud pa dang / sems can gyi rtags brjod pa dang / bram ze'i phyir gyi nor ni bram ze nor zhes pa dang / bram ze'i don gyi thug pa la ni bram ze'i thug pa zhes pa de bram ze'i don gyi 'o ma la ni bram ze'i 'o ma zhes pa dang /bram ze'i phyir gyi mchod pa la ni bram ze'i mchod pa zhes pa dang / rnam thos sras kyi phyir gyi gtor ma la ni rnam thos sras kyi gtor ma zhes pa dang / khyad par gyi phyir gyi don ni khyad par gyi don zhes pa dang / de'i don gyi stobs dang /phan pa dang / bde ba dang / yongs su srung ba dag ni bzhi pa'i tshig sdud pa zhes bya'o/ /lnga pa'i de'i skyes bu'i tshig sdud pa ni ji ltar seng ge las 'jigs pa ni seng ge'i 'jigs pa zhes pa dang / rtswa ra las 'jigs pa ni rtswa ra'i 'jigs pa zhes pa ste/ 'jigs pa dag la ni lnga pa de'i skyes bu'i tshig sdud pa zhes bya'o//phyed las 'byor pa ni phyed 'byor pa zhes pa dang / bde ba las khur ba ni bde ba khur ba zhes pa lta bu ste/ thob pa dang / khur ba dang / grol ba dang / lhung ba dang / 'dab ma dang / 'dres pa rnams te/ lnga pa'i de'i skyes bu'i tshig sdud pa zhes bya'o//drug pa'i de'i skyes bu ni ji ltar shing gi rtsa ba ni shing rtsa zhes pa dang / shing gi 'bras bu ni shing 'bras zhes pa lta bu ste/ drug pa'i tshig sdud pa zhes bya'o/ /bram ze'i len pa ni bram ze len pa zhes pa dang / rgyal rigs kyi len pa ni rgyal rigs len pa zhes bya ba la sogs pa ni drug pa de'i skyes bu'i tshig sdud pa zhes bya'o//bdun pa'i de'i skyes bu ni ji ltar cho long rnams la mkhas pa ni cho long mkhas pa zhes pa dang / rgyan po rnams la mkhas pa ni rgyan po dar zhes pa lta bu ste/ bdun pa mkhas pa'i tshig sdud pa zhes bya'o/ /grong khyer la grub pa ni grong khyer grub pa zhes bya ba la sogs pa lta bu ste/grub pa dang rab tu grub pa'i phyogs rnams kyi tshig sdud pa zhes bya'o/ /dgag pa'i de'i skyes bu'i tshig sdud pa ni ji ltar rgyal rigs la bram ze ma yin pa zhes pa dang / dmangs rigs med pa la dmangs rigs med ba zhes bya ba lta bu ste/ dgag pa de'i skyes bu'i tshig sdud pa zhes bya'o//las 'dzin pa ni rnam pa drug ste/ gang zhe na/ tshig snga ma khyad par gyi dang / tshig gnyis ka khyad par gyi dang / tshig snga ma dper sbyar ba dang / tshig phyi ma dper sbyar ba dang / tshig snga ma srid par sbyar ba dang / tshig snga ma nges par 'dzin pa rnams so/ / tshig snga ma khyad par can ni ji ltar de sngon po yang yin la ut+pa la yin pas sngon po ut+pa la zhes pa dang / de nag po yang yin la sbrul yang yin pa ni nag po sbrul lo zhes pa lta bu ni khyad par ram khyad par can gyi tshig sdud pa'o/ /tshig gnyi ga khyad par ni ji ltar de grang ba yang yin dro ba yang yin pa ni grang dro zhes pa lta bu ste/tshig gnyi ga khyad par can gyi tshig sdud pa zhes bya'o/ /tshig snga ma dper sbyor ba ni ji ltar dung lta bu'i dkar po ni dung dkar po zhes pa ste/ dpe rnams la spyi brjod pa ni lta bu bsdus pa'i tshig sdud pa zhes bya'o/ /tshig phyi ma dper sbyor ba ni ji ltar skyes bu 'di ni stag lta bu yin pas skyes bu stag go zhes pa dang /mi 'di ni seng ge 'dra bas mi'i seng ge zhes pa dang / skyes bu 'di ni glang po lta bu yin pas skyes bu glang zhes pa lta bu ni stag la sogs pa dang 'dra ba 'brel par spyir sbyor ba'i dpe'i tshig sdud pa zhes bya'o/ /tshig snga ma srid par sbyor ba ni yon tan lta bu'i ring ba ni yon tan ring ba zhes pa dang /bu lta bur 'dzin pa ni bur 'dzin pa zhes pa lta bu ni tshig snga ma srid par sbyor ba'i tshig sdud pa zhes bya'o/ /tshig snga ma nges par 'dzin pa ni ji ltar yon tan nyid blo yin pa ni yon tan blo zhes ba dang / yon tan nyid nor yin pa ni yon tan nor zhes pa dang /legs par byas ba nyid dga' ba ni legs par byas pa dga' ba zhes pa dang / rma bya nyid kyi tshang ni rma bya tshang zhes pa la sogs pa ni nges par 'dzin pa'i tshig sdud pa zhes bya'o/ /'bru mang po pa ni rnam pa bdun te/ gang zhe na/ tshig gnyis kyi 'bru mang po pa dang /mang po'i tshig gi dang / tshig phyi ma grangs can gyi dang / tshig gnyi ga grangs can gyi dang / tshig snga ma dang bcas pa dang / phan tshun bya ba byed pa'i mtshan nyid kyi dang / phyogs mtshams kyi mtshan nyid kyi 'bru mang po pa zhes bya ba rnams so/ /de la re zhig gnyis kyi ni ji ltar shing gang la spre'u stobs can yod pa de ni spre'u stobs can shing zhes pa dang /bcom ldan 'das gang la 'dod pa las rgyal ba mnga' ba de ni 'dod pa las rgyal ba'i bcom ldan 'das zhes pa dang / bram ze gang la zas nye bar sbyin pa yod pa de ni nye bar sbyin pa can gyi bram ze zhes pa dang / grong khyer gang la mi 'byung ba yod pa de ni mi 'byung ba'i grong khyer zhes pa dang /skyes bu gang la gos dkar po yod pa ni gos dkar po'i skyes bu zhes pa dang / shing gang la nam mkha' la 'gro ba yod pa de ni nam mkha' la 'gro ba can gyi shing zhes pa dang / gzhan 'bru mang po pa zhes bya ba ni tshig gzhan du ma'i don ni 'bru mang po pa'i tshig sdud pa zhes bya'o//mang po'i tshig gi ni ji ltar skyes bu chen po gang gis brtul bas len pa phun sum tshogs pa de nyid kyis brtul bas rnyed pa phun sum tshogs pa'i skyes bu ste/ tshig gzhan du ma'i tshig sdud pa zhes bya'o/ /grangs kyi tshig phyi ma'i 'bru mang po pa'i tshig sdud pa ni ji ltar skyes bu 'di ni bcu dang nye bas nye ba'i bcu zhes pa dang /skyes bu 'di ni nyi shu dang nye bas nye ba'i nyi shu zhes pa lta bu'o/ /grangs kyi tshig gnyi ga ni ji ltar gnyis dang gsum ni gnyis gsum zhes pa lta bu ste/ grangs dang / grangs med pa dang / nye ba dang / ring ba dang / lhag pa dang /grangs can gyi tshig sdud ba zhes bya ste/ 'bru mang po pa la sogs pa'i grangs can ni 'bru mang po pa'i tshig sdud pa zhes bya'o/ /tshig snga ma dang lhan cig pa ni ji ltar gang gis rtsa ba dang bcas pa'i shing bton pa des mtshungs pas sbyor ba ni tshig snga ma dang lhan cig pa'i tshig sdud pa zhes bya'o/ / phan tshun bya ba byed pa'i mtshan nyid kyis ni ji ltar skra dag dang skra rnams la 'dzin pa'i 'thab par byed pa de ni skra dang skra rnams 'thab pa zhes pa dang / dbyug pa dang dbyug pa rnams kyis 'thab par gyur pa 'di ni dbyug pa dang dbyug pa rnams 'thab pa zhes pa ste/ de la des 'di ni ngo bo nyid kyi tshig sdud pa zhes bya'o//gzhan rnams kyi yang tshig snga ma ring ba nyid du blta bar bya'o/ /de ni phan tshun gyi las kyi mtshan nyid kyi tshig sdud pa la byed pa'i tshig dbyi bar bya ste/ grangs med pa la sogs pa gzhan la yang sub dbyi bar bya'o/ /phyogs mtshams kyi mtshan nyid kyi ni ji ltar shar gyi phyogs dang lho phyogs la sogs pa phyogs rnams kyi bar na gnas pa ni shar lho'i phyogs la sogs pa'o//byang gi phyogs dang shar gyi phyogs kyi mtshams na gnas pa ni byang shar gyi phyogs zhes pa la sogs pa ste/ phyogs kyi ming dang mtshams kyi ming gi tshig sdud pa zhes bya'o//ming thams cad dang tshig sdud pa tsam las skyes par smra ba ni skyes pa lta bur 'gyur ro/ /ba gnyis pa ni rnam pa gnyis su bshad de/ gcig lta bur 'gyur ba dang / du ma lta bur 'gyur ba zhes bya'o/ /gcig lta bur 'gyur ba ni ji ltar gsum rtsa ba gcig tu bsdus pa ni gsum rtsa zhes pa dang /lnga rtsa ba gcig tu bsdus pa ni lnga rtsa zhes pa dang / bcu'i rtsa ba ni de la phan pa'i rkyen can gyi don tshig phyi ma mdor bsdus pa zhes bya'o/ /grangs kyi tshig sngon na yod pa ni ba gnyis par shes te/ ba gnyis pa'i gcig gi tshig ste/ gcig dang 'dra bar 'gyur ba zhes bya'o/ / de la ma ning gi rtags zhes bya ba ni a ma'i mtha' can ma yin pa'o/ /pu A'i mtha' can pho'i rtags so/ /tshig phyi ma ba gnyis pa mo'i rtags su bstan pa ni mo'i rtags kyi rkyen gyis mo'i rtags su 'gyur ro/ /du ma lta bur 'gyur ba ni ji ltar bzhi'i phyogs ni phyogs bzhi zhes pa dang / gsum gyi 'jig rten ni 'jig rten gsum mo zhes pa lta bu ste/ phyogs dang grangs dang grangs can gyi tshig sdud pa zhes bya'o/ /zlas dbye ba ni rnam pa bzhi ste/ kun bsdus pa'i zlas dbye ba dang / rjes su zlos pa'i dang / gcig lta bur bsdu ba'i dang / phan tshun sbyor ba'i zhes bya ba dag go/ / de la kun bsdus pa'i dang / rjes su zlos pa'i dag ni stobs med pa la ni tshig sdud pa med do/ /tshig sdud pa ni stobs can gyi dbang du byas pa'o/ /gcig lta bur bsdu ba ni ji ltar dung dang pa Ta ha ni dung pa Ta ha zhes pa lta bu ste/ zlas dbye ba yang sems can dang brda dang dmag gi cha rnams gcig lta bur 'gyur ba'o//de ni ming gi rtags te ma ning du yang dag par rab tu shes so/ /phan tshun gyi sbyor ba'i ni ji ltar lhas byin dang mchod sbyin ni lhas byin mchod sbyin dag rtsod pa smra bar byed pa dag ste/ dang gi don bsdu ba ni zlas dbye ba'i tshig sdud pa zhes bya'o//zad par mi 'gyur ba ni rnam pa gnyis su blta bar bya ste/ ming gi tshig snga ma dang grangs med pa'i tshig snga ma dag go/ /ming gi tshig snga ma ni ji ltar lo ma'i tsam ni lo ma tsam nyid do/ /sha'i tsam ni sha tsam mo/ /so so'i tsam gyi zad par mi 'gyur ba ni tsam gyi don gyi tshig sdud pa'o//grangs med pa'i tshig snga ma ni ji ltar bum pa'i nye bar gyur pa gang yin pa de nya ba'i bum pa'o/ /grangs med pa dang / rnam par dbye ba dang / yang dag par nye ba dang / yang dag pa'i rdzu 'phrul chen po'i don dang / med pa dang / brgyal ba dang / da ltar dang / sgra dang / mthu can dang /phyi ma dang / rjes su byung ba dang / sbyor ba'i tshig dang / 'dra ba dang / yang dag par ldan pa dang / mtha' thams cad kyi tshig rnams la zhes pa 'dis tshig sdud pa zhes bya'o/ /zad par mi 'gyur ba zhes pa ni zad par mi 'gyur ba'i ming ngo / /zad par mi 'gyur ba la sub dbyi ba thob pa la zad par mi 'gyur ba ma yin pa las lnga pa'i dbyi ba med pa zhes bya'o//gang dang gang bram ze rgan pa rnams la bod pa ste/ ji ltar 'dra ba nyid zad par mi 'gyur ba'i tshig sdud pa zhes bya'o/ /de yang tshig sdud pa de rnams kyi gtso po'i don ni rnam pa gsum ste/ tshig snga ma'i gtso bo'i don dang / gzhan gyi tshig gi gtso bo'i don dang / gnyi ga'i tshig gi gtso bo'i don dag go/ /de la de'i skyes bu'i gtso bo'i don ni rnam pa gnyis te/ tshig snga ma'i gtso bor bstan pa dang / tshig phyi ma'i gtso bor bstan pa'o/ /tshig snga ma'i gtso bor bstan pa'i don ni/ ji ltar rnyed pa 'tsho ba zhes pa'o//tshig phyi ma'i gtso bo'i don ni/ ji ltar rgyal po'i skyes bu zhes pa'o/ /las 'dzin pa'i gtso bo'i don ni rnam pa gnyis te/ tshig snga ma'i gtso bo'i don dang / tshig phyi ma'i gtso bo'i don no/ /tshig snga ma'i gtso bo'i don ni/ ji ltar skyes bu khyu mchog ces pa'o/ / tshig phyi ma'i gtso bo'i don ni ji ltar ut+pal sngon po zhes pa lta bu'o/ /'bru mang po pa'i gtso bo ni rnam pa gnyis te/ gzhan gyi tshig gtso bo'i don dang / gnyi ga'i tshig gtso bo'i don ni/ zlas dbye ba'i tshig la tshig gnyi ga'i don gtso bo nyid de/ ji ltar bram ze rgyal rigs/ rje rigs/ dmangs rigs zhes pa dang / ra ma srid sgrub dag ces pa lta bu'o/ /ba gnyis pa ni tshig phyi ma'i don gtso bo nyid de/ ji ltar gsum rwa zhes pa lta bu'o/ /zad par mi 'gyur ba la gtso bo gsum ste/ tshig snga ma'i don gtso bo dang / tshig phyi ma'i don gtso bo dang / tshig gzhan gyi don gtso bo dag go//tshig snga ma'i don gtso bo ni ji ltar nye ba bum pa zhes pa'o/ /tshig phyi ma'i don gtso bo ni ji ltar lo ma la so so ni lo ma so so zhes pa dang / sha la so so ni sha so so zhes pa'o/ /tshig gzhan gyi don gtso bo ni ji ltar gang la smyo byed kyi chu klung yod pa de ni smyo byed kyi chu klung ste yul gyi ming ngo //tshig gzhan gyi don nyid zad par mi 'gyur ba'i tshig sdud pa'i ming zhes bya'o/ /zad par mi 'gyur ba mo'i rtags la pho'i rtags su smras pa ni mo'i rtags la gang ba dang / 'dod pa la sogs pa'i gtso bos snga ma'i tshig pho lta bur gyur pa'o/ /zad par mi 'gyur ba ni ma ning gi rtags zhes bya ste/thung ngu nyid ni ma ning la sgra'i rang bzhin thung ngu nyid dang / zad par mi 'gyur ba ni zad par mi 'gyur ba ste/ sub dbyi bas zad par mi 'gyur ba'o/ /de ni lnga pa las gnyis par 'gyur bar smras pa ste/ tshig sdud pa'i mtshan nyid rdzogs so// //