CLOSE WINDOW

D4258
བོད་ཡིག

@##/ /rgya gar skad du/ kA t+ya ka ra Na b+hA ba sid+d+hi/ bod skad du/ rgyu dang 'bras bu'i ngo bo grub pa zhes bya ba/ 'jam dpal gzhon nur gyur pa la phyag 'tshal lo/ /mngon sum dang ni mi dmigs pa'i/ /dbye ba gsum gyis yang dag 'grub/ /rgyu dang 'bras bu'i bdag nyid ni/ / kha cig rnam pa lnga yis smra/ /zhes bya ba smos te/ mngon sum dang mi dmigs pa dag gis grub pa ni rgyu dang 'bras bu'o zhes bya bar rigs so/ /de la spyi la mngon du zhugs pa mi dmigs pa'i grogs dang ldan pa yul gnyis pa rim pas byung ba'i mngon sum gnyis sam/ yang na gnyi ga'i spyi 'dzin pa mngon sum gyi grogs dang ldan pa rim pas byung ba'i mi dmigs pa gnyis zhes bya ste/dbye ba rnam pa gsum gyis grub pa yin no zhes kha cig zer ro/ /yang gzhan dag ni de gsum dang tha ma gnyis kyi grogs dang ldan pa nyid de dbye ba rnam pa lnga'i rim pas nges pa yin no zhes smra ste/ dang po gsum yod du zin kyang rtogs par byed pa po'i blo the tshom nye bar skye bas tha ma gnyis yod na rjes su 'gro ba dang ldog pa'i mtshan nyid la sogs pa dang / rgyu dang 'bras bu'i ngo bo grub par 'gyur ro/ /de la mngon sum gyis ni rjes su 'gro ba rtogs la/ gnyis kyis ni ldog pa zhes bya ste/ lngas nges par grub pa yin no/ /de dag las gcig las gcig gis ma nges na the tshom spong bar dka'o zhes bsams pa yin no/ /'di spyad par bya ste/ gal te snga ma'i mi dmigs pas/ /gzhan dang 'brel pa la sogs pa/ /gcod pa med na de ci zhig/ /gcod na phyi mas ci zhig bya/ / zhes bya ba smos te/ mi dmigs pa gnyis po gang yin pas ldog pa bsgrub par bya ba'i phyir mi dmigs pa 'di nyid don du gnyer ba yin na de la yang rgyur mngon par 'dod pa med na/ 'bras bu gnyis mngon par 'dod pa yod pa gnod pa 'dis bsgrub par bya'i/ /de yang rnam pa gsum ste/ yul de nyid na gnas pa'am/yul gzhan nas 'ongs pa'am/ tshogs pas dben pa can de dag la sogs pa las byung ba'o/ /de lta bu'i bye brag gi gnod pa dang bral ba'i rgyu mtshan ma yin na 'di la ci zhig ltos/ ldog pa la 'di dgos pa ma yin gyi 'on kyang rjes su 'gro ba 'dzin pa'i mngon sum la grogs byed pa nye bar bstan pa yin no zhes zer na/'di yod pas na 'di byung ba/ /mngon sum gyis rtogs min nam ci/ /zhes bya ba smos te/ yod na yod pa las gzhan gyis rjes su 'gro ba ni med do/ /de yang mngon sum gyis grub ste/ 'dir mi dmigs pa'i grogs kyis ci zhig bya/'di ltar rjes su 'gro ba ci 'dra ba 'di 'dra ba/ nye bar thob par yang 'gyur ba ma yin nam/ mngon sum tsam gyis yod pa ma yin pa'i phyir ro/ /snga na med pa gzung ba khyad par can gyi mngon sum gyis de 'dzin te mi 'dod par thal ba med do/ /de ltar dbye ba gsum las tha dad pa'i dngos po bzlog pa'i ngo bo snga na med pa mi dmigs pas 'grub bam/med pa tsam yin/ phyogs dang po yin na 'di ltar 'gyur te 'di yod pas na 'di 'byung ba yin te/ gzhan las 'byung ba med pa'i phyir/ /ldog pa de nyid kho na ste/ /de na mi gnas gzhan las ni/ / skyes min gzhan las 'ongs pa min/ /gang zhig yod las 'bras 'byung ba/ /gal te des min 'ga' las min/ /zhes bya ba smos te/ de yang mi dmigs pa sngon du song ba'i mngon sum gyis grub ste/ phyi ma gnyis kyis cung zad kyang ma yin no/ /de yang rgyu med na 'bras bu de na gnas pa'am//gzhan las skyes pa'am/ gzhan gyis 'bad pas gzhan nas 'ongs pa bkag pa nyid kyis ldog pa bsgrubs pa yin no/ /phyi ma gnyis kyis ni ma yin te/ de dag gis bya ba ma grub na brgyas kyang med pa'i phyir ro/ /de yang dang po nyid kyis gcig tu grub zin pas gzhan dogs pa med do//gal te yang dang po'i mi dmigs pas med pa tsam rtogs so snyam du sems na/ dngos po med tsam rtogs na yang / /snga ma dogs pa yod ma yin/ /'di yi bya ba sngams na/ /'di la lhag mas ci zhig bya/ /zhes bya ba smos te/ re zhig med pa tsam rtogs na//gang zhig gang gi rjes su 'gro/ /'di med pa zhes bya bas kyang rjes su 'gro ba rtogs na ji ltar 'dod pas nye bar thob pas shin tu thal bar 'gyur bas dogs pa yongs su chad pa nyid do/ /'di'i bya ba las snga ma'i dngos po med pa 'di rtogs na gsum pos de nyid rtogs pas lhag mas ci zhig bya/gang gi phyir tha ma gnyis kyis ma tshang ba med pa thob pa ma yin no/ /rjes su 'gro ba 'khrul ba yis/ /ldog pa khong du chud ce na/ /mngon sum tsam gyis bya ba la'ang / /'di la ci yi phyir mi brjod/ /ces smos te/ gang snga ma don du gnyer ba ni rjes su 'gro ba dang ldog pa dag re re 'khrul pa nyid kyis lhan cig rgyu dang 'bras bur bstan pa yin no//de bas na re res de'i ngo bo ma yin pa yang yod pa la gnod pa med pa nyid de bdag cag mtshungs pa yin no/ /de'i phyir tha ma gnyis yod na yang dang po mi dgos na/ dang po yod na tha ma dag dgos pa med do zhes bya bar grub po//ma grub ste gang gi phyir dang po nyid kyis de'i bya ba las sngar de nyid med do zhes rtogs pas kyang bya ba de nyid kyi ngo bo la rab tu sbyor bas med do zhes nges par gzung ba ma yin te/ phyi mas yang nges par gzung ba yin no zhes bya ba ni mi rigs te/ dang po'i yang dogs pa med pa de nyid gnas pa'i phyir ro//de tsam med las yang med par/ /phyi mas rnam par nges yin na/ /rigs pa de nyid mtshungs pa'i phyir/ /snga mas kyang ni cis mi 'dod/ /ces bya ba smos te/ bya ba de nyid las snga mas med pa zhes bya ba yang gang gi phyir de med pa tsam gyis med par bstan pa yin te ji skad bstan pa'i dbye ba gsum yod pas gsal bar 'phags pa'i phyir ro//de lta bas na des ma nges na phyi mas kyang mi 'gyur ro/ /de la snga ma gnyis po med pa tsam du gnas pa yin gyi gcig ni ma yin pa'i rigs pa 'di mthong bas phyi ma la yang su zhig yid rton no/ /de la rag ma las pas de med par yang 'byung bar thal bar 'gyur bas gnyis pas med pa nyid la 'brel pa med par mtshungs pa yin no//gzhan yang me dang snga mo yod pa'i de ma thag tu byung ba'i du ba yang bong bu med pas sngar nyams su myong ngo zhes brjod mod kyi/ gnyi ga ldog pas log pa'am phyi mas kyang ngo zhes bya ba ni gzhan dang gzhan brgyud pa'i thabs rjes su 'brang ba yin pas/sngar bzhag pa nyams pa yin no/ /de ltar gnas na gsum ma yin gyi/ gnyis ni yin no zhes zer na phyi ma yang don med pa yin no zhes bya ba de tsam zhig ston gyi de gnyis sam gsum zhes bya bas ci zhig bya/gnyis kyis dgos pa yod de gzhan med pas kyang nges par mi rung ngo zhes zer na de lta mod kyi rgyu 'ba' zhig med pas mi dmigs pa yin na de'i cha snga ma nyid kyi nus pa yin no zhes ci'i phyir mi 'dod/ ma yin no zhe na/ thams cad du dogs pa med pa'i phyir zhes bstan zin to//gzhan du na yang mngon sum yang gsum yin gyi/ de gnyis ni ma yin no zhes smra bar nus pa'i phyir ro/ /gzhan yang sngar smra ba dang gzhung mtshungs pa nyid du bye brag med pa'i phyir ro/ /snga ma'i mi dmigs pa gcig tu 'dod mod kyi/ de yang me dang bong bu gnyis log pa yod pa dang /de ma thag tu du ba mi dmigs pas ldog pas da ltar yang rnam pa gnyis yin no/ /dang po med snang rim pas dmigs/ /rgyu dang 'bras bur gnas par shes/ /yang na mthong rim mi dmigs pas/ /gzhan du thug pa med par 'gyur/ /zhes bya ba smos te/the tshom de dang de bsal ba'i phyir phyi ma phyi ma dang snga ma snga ma dmigs pa dang mi dmigs par tshol bar thal bar 'gyur ro/ /de la ji ltar 'dod par gsum la sogs par gzhan par gyis shig /mngon sum dbus su gzhag pa'i mi dmigs pa dag gang du yang mi dgos te/ gzhan dgos pa yod pas gnyis ka la yid brtan du med pa'i phyir ro/ /de gnyis dpyad na yang gcig nyid kyis 'grub ste/ de bas na mngon sum dang mi dmigs pa dag gis rjes su 'gro ba dang ldog pa nges te rgyu dang 'bras bu ji lta ba bzhin du gnas so/ /de gnyis don tha dad pa'i ngo bo de rang bzhin gcig pa'i phyir ro//de gnyis kyang rtogs pa'i rim pa nges pa med pas rnam pa gnyis ka yang 'grub pa'i phyir ro/ /de lta mod kyi ldog pa bstan pa de ltar rnam par gzhag pa yin te/ de'i phyir de 'dzin pa'i mi dmigs pas rjes su 'gro ba'i yul can mngon sum ldog pa rigs pa yin no//ma yin te med na mi 'byung ba'i mtshan ma nyid kyi gzhal bya bstan pa nyid du gzhag pa yin gyi mang pos ni ma yin te tshad ma ltar snang ba rnams la yang mthong ba yod pa'i phyir ro/ /snang ba mi dmigs pa gcig nyid kyis de med pa shin tu med par bsgrub pa ni legs pa yin te/ lhag par brtsad pa 'dis ci zhig bya/de'i tshe du ba'i dri ma tsam yang mi srid do/ /du ma ldog pa las gang ldog pa du ba log par gyur to zhes nges par bya ba ma yin nam zhes zer na/ de nyid kyi phyir rjes su 'gro ba 'dzin pa'i mngon sum la ltos pa yin no/ /gzhan med pa'i sbyor ba nyid kyis med pa nyid la gus par mi bya'o//de bzhin du rjes su 'gro ba gzung ba sngon du 'gro ba nges pa la yang du ma srid pa dag las gang zhig yod pa'i sbyor bas 'di yod do zhes shes par 'dod pa la mi dmigs pa las gang zhig med pa'i sbyor bas 'di med pa yin na re zhig de yod pa'i sbyor bas sngar yang 'di yod pas yin no zhes bya bar grub pa de la yang re re nas bzhag pa dang /bsal ba de lta bus rtogs par nus so/ /de bzhin du yang yod pas snga ma dang phyi ma dag gis ldog pa bsgrub par nus so/ /du ma bsal ba la sogs pa yang gnyis bos kyang mi nus so zhes bya bar gnas so/ /lnga po rnam par gzhag pa 'di yang ma khyab pa yin te/thal ba dang me dang bum pa dang / /rdza mkhan la sogs pa rnams la phyi ma med pa'i phyir dang chu'i rgyun 'gag pa la sogs pa la yang snga ma med kyang grub pa'i phyir te/ 'di ltar chu lon gyis 'gags na chu'i rgyun 'gags pa dmigs te/ de yod pas de med par mthong bas de dag rgyu dang 'bras bu'i ngo bor nges pas snga ma la ltos pa ma yin pa nyid do//de bzhin du gzhan la yang gsum la ltos pa nyid du rig par bya'o/ /'di ltar sngar ma mthong ba'i me ma yin pa nye ba na du ba mthong bas me la ltos pa gzhan nyid kyis du ba yang bskyed do zhes ci'i phyir mi brtag /de lta na yang me rgyu nyid yin te bud shing bzhin no//de lta yin na gzhan yang gang 'dod pa'i bong bu la sogs pa rgyu nyid yin na/ de'i phyir de yang du ba las rjes su dpag par thal bar 'gyur ro zhes zer na/ de ci me rgyu nyid du nges pa de bzhin du bong bu yang yin nam/ 'on te mngon sum dang mi dmigs pa dag de la yang 'jug pa'i phyir ro zhe na/gnyi ga la yang mi rigs pa'i phyir dang / /gzhan de dag dgag pa'i phyir gsum pa la brten pa ma yin gyi/ 'on kyang me bsgrubs na de yang grub pa yin te/ gzhan dgag pa med pa la gnod pa med pa nyid do/ /rjes su dpag pa yang ma yin te/ rgyu nyid du ma nges pa nyid kyi phyir ro//me la ltos pa las nam yang bong bus byas pa yin no zhes pa'i the tshom ni ma yin te/ nges pa dang 'gal te de ni the tshom gyi ngo bo yin pa'i phyir ro/ /de 'gag pa yang de nyid la dpyad pas yin gyi gzhan gyis ni ma yin pas de ltar glags tshol gyi gnas ma yin no/ /de bzhin du me rgyu yin zhes nges par bzung ba ma rig pa'i phyir bkag pa nyid du gnas ma yin nam/me nyid rgyu ma yin te gzhan rgyu ma yin pa ma bkag pa'i phyir dang bud shing yang don dam par rgyu yin pa'i phyir ro/ /rgyu nyid kyang ma yin te/ du ba mi rtsom pa yang srid pa'i phyir zhe na/ brtsad par mi rigs te/ rnam par gcod pa gsum gyi bye brag gis 'grub pa'i phyir te/'di ltar/ tshogs la ltos nas gzhan dang ldan/ /rnam gcod rdzas la ltos pa yis/ /mthun pas ma 'brel rnam par gcod/ /las las shin tu rnam gcod 'grub/ /ces bya ba smos te gang gi tshe me'i sgra des nye bar mtshon pa'i tshogs pa bsdus pa brjod pa de'i tshe/de nyid kho na gzhan dang ldan pa rnam par gcod pa yin no/ /gang gi tshe yang me'i rdzas nyid yin pas de'i tshe yang me'i rgyu nyid ces bya ste/ gang gi tshe mthun pa yin pa de'i tshe rgyu yin te de ni ma 'brel pa rnam par gcod pa yin no/ /don bya ba byed pa nyid yin pas de'i tshe yang ma 'brel pa rnam par gcod pa yin no//de yang 'di ltar bya ba'i bye brag rnam pa gsum po 'di nyid mngon sum dang mi dmigs pas nus pa yin no/ /skabs 'dir she se as+dza ta'i zhal snga nas bshad pa nyid rigs pa yin no/ /rje btsun rnam 'grel mdzad pa nyid kyis kyang / rdza mkhan gyis ni bum pa dang //me yis thal ba byed pa yin/ /mtshon sogs kyis ni rma la sogs/ /gsungs pa'i dgongs pa de nyid yin/ /'bras bu nyid du khyad par med pa'i phyir yang ji lta bu ba bzhin du thal bar gyur pa las kyang me ci'i phyir rjes su mi dpag /ma yin te/ yul dang dus la sogs pa la ltos par 'dod pa'i phyir ro//'di ltar/ 'bras bu'ang kha cig skye ba ni/ /tsam zhig rgyu la'ang ltos pa yin/ /gzhan dag rgyu ni gnas pa dang / /de dag ltos par dus rig bya/ /zhes bya ba smos te/ de la bum pa dang thal ba la sogs pa skye ba kho na gzhan la ltos pa yin no/ /de nyid kyi phyir don gzhan la ltos nas rgyun chad pa las 'das pa'i phyir 'dus byas kyi rgyu yod pa nyid nges par nus kyi da ltar byung ba ni ma yin te/'jug pa la sogs pa gcig pa ma yin pa'i phyir ro/ /phyogs gzhan la ni du ba snang ba la sogs pa gnas skabs kyi khyad par la ltos pa yin gyi/ rgyun 'gag pa gzhan la ltos pa ni ma yin no/ /rgyu ma tshang na rgyun 'gag pa'i phyir gzhan la ltos pa med pa las da ltar ba nyid yin no zhes bya ba la nyes pa med do/ /de lta bu la ltos nas yang rje btsun chos mchog gis phyi ma gnyis la brten pa'i 'bad pa 'bras bu dang bcas pa yin no/ /sngar nyes pa de'i tshe yang phyi ma'i cha la ni brten pa ma yin no//mngon sum sngon du song ba'i mi dmigs pas yin gyi/ gzhan la ltos pa med pa'i phyir dang po nyid kho na mchog ces bya'o/ /tshigs su bcad pa bcu gcig gis bsdus nas mngon sum dang mi dmigs pa rnam pa gsum sngon du 'gro bas rgyu dang 'bras bu'i ngo bo grub pa zhes bya ba/